འཕགས་པ་སྤྱན་རས་གཟིགས་པདྨ་རྒྱལ་པོའི་རྒྱུད།
འཕགས་པ་སྤྱན་རས་གཟིགས་པདྨ་རྒྱལ་པོའི་རྒྱུད་ཅེས་བྱ་བ་བཞུགས་སོ། །
རྒྱ་གར་སྐད་དུ། པདྨོ་རཱ་ཛ་ཏནྟ་ནཱ་མ། བོད་སྐད་དུ། པདྨ་རྒྱལ་པོའི་རྒྱུད་ཅེས་བྱ་བ། བྱང་ཆུབ་སེམས་དཔའ་སེམས་དཔའ་ཆེན་པོ་གསུང་གི་མངའ་བདག་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་པདྨ་རྣམ་པར་འབྱེད་པ་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དབང་པོ་བདེ་བ་ཆེན་པོ་ལ་སྙོམས་པར་ཞུགས་སོ། །དེའི་ཚེ་མགོན་པོ་སྤྱན་རས་གཟིགས་ལ་འདི་སྐད་ཅེས་བཀའ་སྩལ་ཏོ། །སེམས་ཅན་ཀུན་གྱི་དོན་གྱི་ཕྱིར། །སྐུ་དང་གསུང་དང་ཐུགས་ལ་སོགས། །ཡོན་ཏན་ཕྲིན་ལས་ལམ་དང་འཁོར། །
བྱིན་གྱིས་བརླབས་དང་གཏད་པ་འདི། །ཁྱོད་ཀྱིས་བདག་ལ་ལེགས་པར་དྲིས། །།ཞེས་བཀའ་སྩལ་པ་དང་། འཕགས་པ་སྤྱན་རས་གཟིགས་ཀྱི་དབང་པོ་དེ་ལ་ཡིད་དགའ་བ་ཆེར་སྐྱེས་ནས། སྟོང་གསུམ་གྱི་སྟོང་ཆེན་པོ་འདི་གཡོས། རབ་ཏུ་གཡོས་སོ། །འགུལ་རབ་ཏུ་འགུལ་ལོ། །འོད་ཆེན་པོ་ཉི་མ་འབུམ་བས་ཆེས་ཆེར་ལྷག་པའི་ཁམས་གསུམ་དུ་སྣང་བ་ཆེན་པོས་སྣང་བར་བྱས་སོ། །དེ་ནས་ཤར་ཕྱོགས་ཀྱི་འཇིག་རྟེན་གྱི་ཁམས་འོད་དྲི་མ་དང་བྲལ་བ་ཞེས་བྱ་བ་ན། སངས་རྒྱས་པདྨའི་དཔལ་འཁོར་ཉི་ཁྲི་ལྔ་སྟོང་དང་བཅས་པ་དང་། ཤར་ལྷོའི་འཇིག་རྟེན་གྱི་ཁམས་ན་
དགའ་བའི་གནས་པདྨ་ཟིལ་ཅན་ཞེས་བྱ་བ་ན། སངས་རྒྱས་དཔལ་གྱི་སྙིང་པོ་འཁོར་ཉི་ཁྲི་ལྔ་སྟོང་དྲུག་བརྒྱ་དང་བཅས་པ་དང་། ལྷོ་ཕྱོགས་ཀྱི་འཇིག་རྟེན་གྱི་ཁམས་རྡུལ་དྲི་མ་མེད་པ་ཞེས་བྱ་བ་ན། སངས་རྒྱས་པདྨ་རབ་ཏུ་རྒྱས་པ་ཞེས་བྱ་བ་ལ་འཁོར་ཉི་ཁྲི་ལྔ་སྟོང་དྲུག་བརྒྱ་དང་བཅས་པ་དང་། ལྷོ་ནུབ་ཀྱི་འཇིག་རྟེན་གྱི་ཁམས་དྲི་མ་མེད་པའི་གཞལ་ཡས་ཞེས་བྱ་བ་ན་སངས་རྒྱས་པདྨ་བདེ་བ་ཅན་ཞེས་བྱ་བ་ལ་འཁོར་ཉི་ཁྲི་ལྔ་སྟོང་དྲུག་བརྒྱ་དང་བཅས་པ་དང་། ནུབ་ཕྱོགས་ཀྱི་འཇིག་རྟེན་གྱི་ཁམས་འོད་ཀྱི་རྒྱལ་མཚན་ཞེས་བྱ་བ་ན། སངས་རྒྱས་འོད་ཟེར་གྱི་རྒྱལ་པོ་ཞེས་བྱ་བ་ལ་འཁོར་བྱེ་བ་ཕྲག་བརྒྱ་དང་བཅས་པ་དང་། ནུབ་བྱང་གི་འཇིག་རྟེན་གྱི་ཁམས་པདྨ་མུན་པ་རབ་ཏུ་གསལ་བ་ཞེས་བྱ་བ་ན། སངས་རྒྱས་མཆོག་ཏུ་མཛེས་པ་ཞེས་བྱ་བ་ལ་འཁོར་ཉི་ཁྲི་ལྔ་སྟོང་དྲུག་བརྒྱ་དང་བཅས་པ་དང་། བྱང་ཕྱོགས་ཀྱི་འཇིག་རྟེན་གྱི་ཁམས་པདྨ་སྣང་བ་བསྟན་པ་ཞེས་བྱ་བ་ན། སངས་རྒྱས་པདྨའི་གདུང་ཆེན་པོ་པ་ཞེས་བྱ་བ་ལ་འཁོར་ཉི་ཁྲི་ལྔ་སྟོང་དང་བཅས་པ་དང་། བྱང་ཤར་གྱི་འཇིག་རྟེན་གྱི་ཁམས་ནམ་མཁའ་དག་པ་ཞེས་བྱ་བ་ན། སངས་རྒྱས་བདེ་བའི་སྙིང་པོ་རབ་ཏུ་འཛིན་པ་ཞེས་བྱ་བ་ལ་འཁོར་ཉི་
ཁྲི་དྲུག་སྟོང་སུམ་བརྒྱ་དང་བཅས་པ་དང་། སྟེང་ཕྱོགས་ཀྱི་འཇིག་རྟེན་གྱི་ཁམས་རབ་ཏུ་ཉམས་དགའ་བ་ཞེས་བྱ་བ་ན། སངས་རྒྱས་འགྲོ་བའི་དཔལ་ལ་འཁོར་ཉི་ཁྲི་བདུན་སྟོང་ཉིས་བརྒྱ་དང་བཅས་པ་དང་། འོག་གི་ཕྱོགས་ཀྱི་འཇིག་རྟེན་གྱི་ཁམས་མཉམ་པར་གནས་པ་ཞེས་བྱ་བ་ན། སངས་རྒྱས་པདྨ་ཆགས་པ་ཞེས་བྱ་བ་ལ་འཁོར་ཉི་ཁྲི་འབུམ་དང་བཅས་པ་ཐམས་ཅད་ཕྱག་ཏུ་པདྨ་འདབ་མ་སྟོང་དང་ལྡན་པ་རེ་རེ་བསྣམས་ནས། སངས་རྒྱས་པདྨ་རྣམ་པར་འབྱེད་པ་དང་། འཕགས་པ་སྤྱན་རས་གཟིགས་དབང་པོའི་དྲུང་དུ། ཅི་ལྟ་བ་བཞིན་དུ་ཕྱག་ཐལ་མོ་སྦྱར་ནས་བྱོན་ནོ། །པདྨའི་རིགས་ཀྱི་གདུལ་བྱ་ལ། །པདྨའི་དམ་ཆོས་ལེགས་བཤད་པ། །པདྨའི་རིགས་ཀྱི་སངས་རྒྱས་ཐོབ། །བདེ་བ་སྟོང་པ་གཉིས་མེད་འཛིན། །ཞེས་གསུངས་སོ། །གླེང་གཞིའི་ལེའུ་སྟེ་དང་པོའོ།། །།འཕགས་པ་སྤྱན་རས་གཟིགས་དབང་ཕྱུག་གིས་ཞུས་པ། སྐུ་ཡི་རྣམ་པ་ཅི་ལྟ་བུ། བཅོམ་ལྡན་འདས་ཀྱིས་བཀའ་སྩལ་པ། ཤིན་ཏུ་རྒྱས་པ་ལ་དབུ་འབུམ། ཕྱག་བྱེ་བ། སྤྱན་བྱེ་བའོ། །རྒྱས་པ་ལ་དབུ་བཅུ་གཅིག །ཕྱག་སྟོང་། སྤྱན་སྟོང་། དེ་ནས་བསྡུས་པ་ལ། ཞལ་བཅུ་
གཅིག་པ་ལ་ཕྱག་བཞི་བཅུ་རྩ་དྲུག་པའོ། །དེ་ནས་བསྡུས་པ་ལ་ཞལ་བཅུ་གཅིག་པ་ལ་ཕྱག་བརྒྱད་པའོ། །དེ་ནས་བསྡུས་པ་ལ་ཞལ་བཞི་པ་ལ་ཕྱག་དྲུག་པའོ། །དེ་ནས་བསྡུས་པ་ལ་ཞལ་གསུམ་ཕྱག་དྲུག་པའོ། །དེ་ནས་བསྡུས་པ་ལ་ཞལ་གཅིག་པ་ལ་ཕྱག་བཞི་པའོ། །དེ་ནས་བསྡུས་པ་ལ་ཞལ་གཅིག་ཕྱག་གཉིས་པའོ། །རྒྱལ་བའི་སྐུ་ནི་དྲི་མ་མེད། །སྣང་བ་དག་པའི་སྤྱོད་ཡུལ་ཡིན། །མཛེས་པའི་དོན་དང་མིག་གཏད་དང་། །རྒྱ་ཆེ་བ་དང་ཆུང་བ་དང་། །ཀུན་ཀྱང་དང་བ་འདྲེན་པའི་ཕྱིར། །རིན་ཆེན་རྒྱུན་ནི་ཀུན་ལའང་། །ཞི་བའི་ཞལ་ནི་བཅུ་པ་སྟེ། །ཁྲོ་བོའི་ཞལ་ནི་གཅིག་ཡིན་ནོ། །ཕྱག་བཞི་ཡན་ཆད་ཐམས་ཅད་ལ། །དང་པོ་ཐུགས་ཀར་ཐལ་སྦྱར་བ། །དཀར་ལ་སྔ་བ་མདངས་བཏོན་པ། །སྐུ་མདོག་ཀུན་གྱི་དག་པ་ཡིན། །རྣམ་དག་རྒྱ་ཆེ་ཀུན་ལ་ཤེས། །བསྒོམ་དང་ཡིད་ལ་དྲན་པས་ཀྱང་། །མཚམས་མེད་སྒྲིབ་པ་དག་པར་བྱེད། །འབྲེལ་དང་རང་དང་གཞན་དག་ཀྱང་། །ཁོང་གི་དཀྱིལ་འཁོར་གཅིག་པུར་གཅེས། །མང་པོ་བསམ་པ་སྣང་བ་དག །ལེགས་པར་གྱུར་ན་གཅིག་པུའོ། །སྐུའི་ལེའུ་གཉིས་པའོ།། །།།ཡང་འཕགས་པ་སྤྱན་རས་གཟིགས་
དབང་ཕྱུག་གིས། བཅོམ་ལྡན་པདྨ་རྣམ་པར་འབྱེད་པ་ལ། སྐུ་ལ་ཐེ་ཚོམ་མ་མཆིས་ན། །གསུང་གི་རྣམ་པ་ཅི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །རྒྱལ་བའི་གསུང་ནི་རྫུན་མི་མངའ། །བསོད་ནམས་བསགས་པའི་སྤྱོད་ཡུལ་ཡིན། །ཨོཾ་མ་ཎི་པདྨེ་ཧཱུྃ་སྭཱ་ཧཱ། ཐོག་མར་དགེ་བ་ཨོ་ཡིན་ནོ། །ཡེ་ཤེས་ལྔ་ལྡན་བསྐུལ་བར་བྱེད། །བར་དུ་དགེ་བ་མ་ཡིན་ནོ། །བྱམས་པ་ཆེན་པོ་བསྐུལ་བར་བྱེད། །ཐ་མར་དགེ་བ་ཎི་ཡིན་ནོ། །ཐུགས་རྗེ་ཆེན་པོ་བསྐུལ་བར་བྱེད། །དོན་ཟབ་ཡིག་འབྲུ་པད་ཡིན་ནོ། །ལོག་ལྟ་ཐེ་ཚོམ་མ་ལུས་གཅོད། །ཚིག་འབྲུ་བཟང་པོ་མེ་ཡིན་ནོ། །བློ་གྲོས་ཆེན་པོ་བསྐྱེད་པར་བྱེད། །ཡོངས་སུ་རྫོགས་པ་ཧཱུཾ་ཡིན་ནོ། །རྡོ་རྗེའི་ཚིག་ལ་འོང་མི་ནུས། །གསལ་བའི་ཡིག་འབྲུ་ནོ། །ཐེག་པའི་གོ་ཡང་འབྱེད་པ་ཡིན། །མ་འདྲེས་ཡིག་འབྲུ་ཧཱུཾ་ལས་བྱུང་། །ཡན་ལག་དྲུག་ཅུ་གཞན་ལ་མེད། །འཕགས་པ་སྤྱན་རིས་གཟིགས་དབང་ཕྱུག་འདི་ནི་ཤར་ཇིག་རྟེན་གྱི་ཁམས་སུ་སྒྲོགས་ཤིག །དེ་བཞིན་དུ་ཕྱོགས་བཞིར་བསྒྲགས་པ་དང་། སངས་རྒྱས་རྡོ་རྗེ་སེམས་དཔའ། རིན་ཆེན་འབྱུང་ལྡན་དང་། རྣམ་པར་སྣང་མཛད་
དང་། དོན་ཡོད་གྲུབ་པ་དང་། ཡུམ་བཞི་དང་བཅས་པ་ཕྱོགས་བཞིར་འཁོད་དོ། །ཕྱོགས་བཞིའི་སངས་རྒྱས་ཀྱི་སྒྲ་དེ་བསྒྲགས་པ་དང་། བྱང་ཆུབ་སེམས་དཔའ་འཇམ་དཔལ་དང་། ཕྱག་ན་རྡོ་རྗེ་དང་། བྱམས་པ་དང་། སྒྲིབ་པ་རྣམ་པར་སེལ་བ་བཞི་རང་གི་ཕྱོགས་སུ་འཁོད་དོ། །བྱང་ཆུབ་སེམས་དཔའ་བཞིས་སྒྲ་དེ་བསྒྲགས་པ་དང་། འདོད་པའི་རྒྱལ་པོ་དང་། གཤིན་རྗེའི་གཤེད་པོ་དང་། རྟ་མགྲིན་དང་། བདུད་རྩི་འཁྱིལ་པ་བཞི་ཕྱོགས་བཞིར་འཁོད་དོ། །ཡང་ཁྲོ་བོ་བཞིས་སྒྲ་དེ་བསྒྲགས་པ་དང་། མཆོད་པའི་ལྷ་མོ་དྲུག་ཕྱོགས་མཚམས་ཐམས་ཅད་ནས་བསྐོར་ཏེ། འདི་ལྟ་སྟེ། མེ་ཏོག་མ། དྲི་ཆབ་མ། མར་མེ་མ། བདུག་སྤོས་མ། ཞལ་ཟས་མ། སྒྲ་སྙན་མའོ། །དེ་དག་ཐམས་ཅད་ཀྱིས། ཨོཾ་མ་ཎི་པདྨེ་ཧཱུྃ༔ ཞེས་བརྗོད་པས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཐམས་ཅད་ཡི་གེ་དྲུག་པའི་སྒྲས་གང་བར་གྱུར་ཏོ། །སེམས་ཅན་ཐམས་ཅད་ཀྱིས་ཐོས་པ་དང་། ལ་ལས་ནི་མིག་གིས་ལྷའི་གྲོང་ཁྱེར་ཐམས་ཅད་མཐོང་ངོ་། །ལ་ལས་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་མཐོང་ངོ་། །ལ་ལས་ནི་ཟབ་པ་དང་། རྒྱ་ཆེ་བའི་ཆོས་མང་པོ་ཐུགས་སུ་
ཆུད། ཉམས་དགའ་བ་དང་། ཤིན་ཏུ་དགའ་བ་དང་། བདེ་བ་དང་། ཡངས་པ་དང་། མང་པོ་ཐུགས་སུ་ཆུད་དོ། །བསྐལ་པ་སྟོང་དང་བརྒྱད་ཁྲིར་བསགས་པའི་སྡིག་པ་ཐམས་ཅད་ཕྱགས་སོ། །ཉོན་མོངས་པ་དང་། ཤེས་བྱའི་སྒྲིབ་པ་ཐམས་ཅད་ཕྱིས་སོ། །དམྱལ་བ་དང་། ཡི་དྭགས་དང་། དུད་འགྲོར་སྐྱེས་པའི་སྒོ་མ་ལུས་པ་ཁེགས་སོ། །བདེ་འགྲོ་ཐམས་ཅད་ཀྱི་སྒོ་དཀར་བ་དང་། ཤིན་ཏུ་དཀར་བ་ཐམས་ཅད་འབྱེད་དོ། །སངས་རྒྱས་དང་ཆོས་དང་དགེ་འདུན་ཐམས་ཅད་ཀྱིས་མཆོད་པ་ཆེན་པོར་འགྱུར་རོ། །གསུང་གི་ལེའུ་སྟེ་གསུམ་པའོ། །ཡང་འཕགས་པ་སྤྱན་རས་གཟིགས་ཀྱི་དབང་པོས། བཅོམ་ལྡན་འདས་ཀྱི་གསུང་ལ་ཐེ་ཚོམ་མ་མཆིས་ན། ཐུགས་ཀྱི་རྣམ་པ་ཇི་ལྟ་བུ། བཅོམ་ལྡན་འདས་ཀྱིས་བཀའ་སྩལ་པ། །རྒྱལ་བའི་ཐུགས་ནི་མི་སྒྲིབ་སྟེ། །མོས་པ་ཆེ་རྣམས་རྗེས་སུ་འཛིན། །ཐུགས་ནི་ཡེ་ཤེས་ཆེན་པོ་སྟེ། །ཟག་མེད་བདེ་བའི་ཁྱད་པར་ཅན། །ང་ཡིས་ཁྱེད་ལ་བཤད་ཀྱིས་ཉོན། །ཅེས་དང་། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀྱི་རང་བཞིན་སྟོང་པ་ཉིད་དུ་ཐུགས་སུ་ཆུད་པའི་ཡེ་ཤེས་ཆེན་པོ་དང་། ཆོས་
ཐམས་ཅད་རོ་གཅིག་པར་རྟོགས་པའི་མཉམ་པ་ཉིད་ཆེན་པོ་དང་། ཆོས་ཐམས་ཅད་རང་བཞིན་མེད་པར་མཁྱེན་པའི་ཡེ་ཤེས་ཆེན་པོ་དང་། ཆོས་ཐམས་ཅད་མ་འདྲེས་མི་འདྲེས་འདྲེས་པར་མི་འགྱུར་བའི་ཡེ་ཤེས་ཆེན་པོ་དང་། ཆོས་ཐམས་ཅད་རང་དོན་གཞན་དོན་གཉིས་སུ་མེད་པར་མཁྱེན་པའི་ཡེ་ཤེས་ཆེན་པོ་དང་། ཆོས་ཐམས་ཅད་བདེ་བ་དང་སྟོང་པ་གཉིས་སུ་མེད་པར་མཁྱེན་པའི་ཡེ་ཤེས་ཆེན་པོ་དང་། སེམས་ཅན་ཐམས་ཅད་ལ་ཐུགས་མཉམ་པར་བརྩེ་བའི་ཡེ་ཤེས་ཆེན་པོ་དང་། དེས་མི་མཁྱེན་པའམ། མི་གཟིགས་པའམ། ཐུགས་སུ་མི་ཆུད་པ་རྡུལ་ཙམ་ཡང་མེད་དོ། །རང་བཞིན་སྟོང་དང་རོ་གཅིག་དང་། །སྣང་ལ་རང་བཞིན་མེད་པ་དང་། །མ་འདྲེས་པ་དང་རང་གཞན་དོན། །བརྩེ་བའི་བདེ་སྟོང་བདུན་པོ་འདི། །ཡེ་ཤེས་ཐམས་ཅད་བསྡུས་པའོ། །ཐུགས་ཀྱི་ལེའུ་སྟེ་བཞི་པའོ།། ་།།བཅོམ་ལྡན་འདས་པདྨ་རྣམ་པར་འབྱེད་པ་ལ། སྤྱན་རས་གཟིགས་ཀྱིས་ཞུས་པ། །ཐུགས་ལ་ཐེ་ཚོམ་མ་མཆིས་ན། །ཡོན་ཏན་རྣམ་པ་ཅི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །དུས་གསུམ་སངས་རྒྱས་ཐམས་ཅད་ཀྱི། །སྐུ་ཡི་དཀྱིལ་འཁོར་གཅིག་བསྒོམས་པས། །སངས་
རྒྱས་ཐམས་ཅད་འདུས་པ་ནི། །མགོན་པོ་སྤྱན་རས་གཟིགས་སྐུ་ཡིན། །དྲན་པ་ཙམ་གྱིས་འཁོར་བ་ཡི། །རྟོགས་པ་ཐམས་ཅད་འགགས་པར་འགྱུར། །མྱ་ངན་འདས་པ་ཐམས་ཅད་ཀྱི། །སྙིང་པོ་མ་ལུས་ལེགས་པར་འགྱུར། །པདྨས་ཉོན་མོངས་བདུད་བཅོམ་མོ། །ཟླ་བས་ལྷ་ཡི་བདུད་བཅོམ་མོ། །ཉི་མས་འཆི་བདག་བདུད་བཅོམ་མོ། །སྐུ་ཡིས་ཕུང་པོའི་བདུད་བཅོམ་མོ། །ཉོན་མོངས་ཤེས་བྱའི་སྒྲིབ་པ་གཉིས། །སྐུ་མདོག་དཀར་པོས་འགགས་པ་ཡིན། །བསོད་ནམས་དང་ནི་ཡེ་ཤེས་ཉིད། །རིན་ཆེན་རྒྱན་གྱིས་བརྒྱན་པར་མཛེས། །ཕ་རོལ་ཕྱིན་བཅུ་ཡོན་ཏན་ནི། །ཞལ་ནི་འཛུམ་པ་གཅིག་པུར་འདུས། །ཆོས་ཀྱི་རྣམ་གྲངས་སོ་བདུན་ཏེ། །སྐུ་ཡི་རྣམ་པ་གསལ་བས་ཚང་། །པདྨས་རང་གི་རིགས་མཚོན་ནོ། །རྒྱལ་པོའི་གོང་ན་རྒྱུད་གཞན་མེད། །སངས་རྒྱས་ཀུན་གྱི་སྙིང་པོ་ནི། །མགོན་པོ་སྤྱན་རས་གཟིགས་ཀྱི་སྐུ། །མཚན་ཙམ་ཐོས་པས་སྡུག་བསྔལ་འགགས། །དྲན་དང་མོས་པས་བདེ་བར་འདྲེན། །ཐབས་དང་ཤེས་རབ་གཉིས་མེད་བསྒོམ། །བདེ་དང་སྟོང་པའི་འབྲས་བུ་ནི། །རྒྱུད་ཆེན་འདི་ཡི་བརྗོད་བྱའོ། །སྐུའི་ཡོན་ཏན་གྱི་ལེའུ་སྟེ་ལྔ་
སྐུའི་ཡོན་ཏན་ལ་ཐེ་ཚོམ་མ་མཆིས་ན། གསུང་གི་ཡོན་ཏན་ཅི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །དུས་གསུམ་སངས་རྒྱས་ཐམས་ཅད་ཀྱི། སྙིང་པོ་བསྡུས་པ་འདི་ལ་ནི། །ཐེ་ཚོམ་མེད་པར་བརྩོན་པར་གྱིས། །རྒྱ་མཚོའི་ནང་གི་རིན་ཆེན་བཞིན། །ཨོཾ་མ་ཎི་པདྨེ་ཧཱུཾ། ཐེབ་གཅིག་མོས་པས་བརྗོད་པ་ན། །སེམས་ཅན་དམྱལ་བའི་ནད་ལས་ཐར། །ཐེབ་གཉིས་བརྗོད་པས་ཡི་དྭགས་ཀྱི། །འགྲོ་བའི་སྒོ་ཡང་འགག་པར་འགྱུར། །གསུམ་བརྗོད་དུད་འགྲོའི་འགྲོ་བ་འགག །འདོད་པའི་ཡོན་ཏན་ལྔ་སྤྱད་ཀྱང་། །འདི་དང་མ་བྲལ་གཙང་མར་གནས། །ཟས་དང་གོས་དང་བཏུང་བ་ཡང་། །འདི་དག་དྲན་པས་ཉམས་པ་མེད། །འབྲས་ཀྱི་ཕུབ་མའི་གསེབ་ནས་ནི། །སྙིང་པོ་འབྲས་བུ་ལེན་པ་ཡིན། །དཔག་བསམ་ཤིང་གི་སྡོང་པོ་ལས། །མེ་ཏོག་ལེན་པ་ལྟ་བུ་ཡིན། །ལྷ་དང་ཀླུ་དང་གནོད་སྦྱིན་དང་། །དྲི་ཟ་མེ་ལྷ་གཤིན་རྗེ་དང་། །ཚངས་པ་བརྒྱ་བྱིན་གྲུལ་བུམ་དང་། །ཕྱི་དང་ནང་གི་འཚེ་བ་ཀུན། །སྔགས་ཀྱི་རྒྱལ་པོ་བགྲང་བས་ཞི། །ཡོན་ཏན་བགྲང་ལས་འདས་པ་ནི། །འཕགས་པས་གྲངས་སུ་བྱར་མི་ནུས། །གསུང་གི་ཡོན་ཏན་
གྱི་ལེའུ་སྟེ་དྲུག་པའོ།། །།བཅོམ་ལྡན་འདས་གསུང་གི་ཡོན་ཏན་ལ་བདག་དད་ལགས་སོ། །ཐུགས་ཀྱི་རྣམ་པ་ཅི་ལྟ་བུ། བཅོམ་ལྡན་འདས་ཀྱིས་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་མགོན་པོ་སྤྱན་རས་གཟིགས། །འགྲོ་བའི་མགོན་པོ་བདག་ལ་གསོན། །ཁྱེད་ཀྱི་ཐུགས་ཀྱི་ཡེ་ཤེས་ཡོན་ཏན་ནི། །འཁོར་བ་དང་མྱ་ངན་ལས་འདས་པ་ཐམས་ཅད་ཀྱི་ཆོས་རྣམས་ལ། མི་མཁྱེན་པའམ། མི་གཟིགས་པའམ། ཐུགས་སུ་མ་ཆུད་པ་གང་ཡང་མ་མཆིས་སོ། །ཐུགས་ཀྱི་ཡོན་ཏན་གྱི་ལེའུ་སྟེ་བདུན་པའོ།། །།འཕགས་པ་སྤྱན་རས་གཟིགས་ཀྱི་དབང་པོས། ལམ་ལ་ཇི་ལྟར་བསླབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། །འགྲོ་བའི་མགོན་པོ་ཁྱོད་ཉོན་ཅིག །ལམ་ལྔ་བཞི་དང་གསུམ་དང་གཉིས། །འདི་ནི་བསྒྱུར་དང་སྦྱོར་བ་གཉིས། །སྨིན་ལམ་གྲོལ་ལམ་གཉིས་སུ་བཤད་ན་ཡང་། །ལུས་ངག་ཡིད་གསུམ་སྦྱར་བ་ལ། །ལུས་ལ་ཁྲུས་ཀྱིས་གཙང་བར་བྱ། །སངས་རྒྱས་ཡེ་ཤེས་སེམས་དཔའ་བཞུགས། །ངག་གི་དྲི་མ་བཤལ་ནས་ཀྱང་། །གསང་སྔགས་མཉམ་མེད་བཟླ་བར་
བྱ། །ཐ་མལ་ཐེག་པ་གཉིས་སྤངས་ནས། །རྣལ་འབྱོར་གསུམ་དང་མི་འབྲལ་ཞིང་། །བྱམས་པ་ཆེན་པོས་རྟག་ཏུ་བཟུང་། །ཕུང་པོ་ལྔ་ཡི་བྱ་བ་ཤེས། །སངས་རྒྱས་ལྔ་ཡི་འབྲས་བུ་ལ། །ཡེ་ཤེས་ལྔ་ཡི་རྒྱས་ཐེབ་པ། །ལུས་དབེན་གནས་པར་གནས་པ་ཡིན། །གསང་སྔགས་རྒྱུན་ཏུ་བཟླས་པ་ནི། །ཨོཾ་མ་ཎི་པདྨེ་ཧཱུཾ། རྡོ་རྗེའི་བཟླས་པ་འདི་ཡིན་ནོ། །དེ་ལ་མ་ཡེངས་ནང་དུ་བདེ། །སེམས་ལ་ཡེ་ཤེས་ཆེན་པོ་སྐྱེ། །སེམས་དབེན་རྟོགས་པ་ངན་པ་མེད། །སྣང་ལ་རང་བཞིན་མེད་པར་མཐོང་། །སྒྱུ་མ་ལྟ་བུར་བསྡུས་པ་ཡིན། །གསལ་ལ་མི་རྟོག་འོད་གསལ་ལོ། །ཐམས་ཅད་སྤྲོས་པ་མེད་པར་རྟོགས། །བདེ་དང་སྟོང་པ་གཅིག་ཏུ་སྣང་། །འབྲས་བུ་ཞེས་བྱ་ཟུང་འཇུག་ཡིན། །རྟོགས་པ་ཐམས་ཅད་བསྡུས་ནས་ནི། །བསམ་པ་བཟང་པོས་ལྷ་འདི་བསྒོམ། །ནམ་ཡང་འབྲལ་བར་མ་བྱེད་ཅིག །བདེ་བར་གཤེགས་པ་ཐམས་ཅད་ཀྱིས། །བྱིན་གྱིས་བརླབས་པར་རྒྱུན་མི་འཆད། །ལུས་ངག་ཡིད་ཀྱི་བདེ་བ་ནི། །ནམ་ཡང་འབྲལ་བར་མི་འགྱུར་རོ། །ལྟུང་བ་རྣམས་ནི་མི་འཇིགས་སོ། །ཆོས་ཀྱི་རྩ་བ་འདི་ཟིན་པས། །ཡན་ལག་ཐམས་ཅད་འདུས་པ་ཡིན། །སྤྱན་རས་གཟིགས་
པདྨ་རྒྱལ་པོའི་རྒྱུད་ལས། ལམ་དང་འབྲས་བུའི་ལེའུ་སྟེ་བརྒྱད་པའོ།། །།།འཕགས་པ་སྤྱན་རས་གཟིགས་ཀྱི་དབང་པོས། བཅོམ་ལྡན་འདས་ལམ་ལ་ཐེ་ཚོམ་མ་མཆིས་ན། འཁོར་རྣམས་བདག་ལ་གསུང་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་འགྲོ་བའི་མགོན་པོ་ཁྱོད། །ང་ཡི་འཁོར་དང་བཙུན་མོར་བཤད། །འདུས་པའི་འཁོར་ནི་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་འཇིག་རྟེན་གྱི་ཁམས་ཀྱི་རྡུལ་དང་མཉམ་པའོ། །ཉན་པའི་འཁོར་ནི་བྱང་ཆུབ་སེམས་དཔའ་ཁྱེའུ་དང་བུ་མོའི་ཚུལ་དུ་བཞུགས་པ་བྱེ་བ་ཁྲི་བདུན་སྟོང་ངོ་། །འབྲས་བུའི་འཁོར་ནི་སངས་རྒྱས་རིགས་ལྔ་ཡབ་ཡུམ་དང་བཅས་པའོ། །བསྡུས་པའི་འཁོར་ནི་བྱང་ཆུབ་སེམས་དཔའ་བཞིར་འདུས། སོ། །བསྲུང་བའི་འཁོར་ནི་ཁྲོ་བོ་བཞིའོ། །བསོད་ནམས་བསགས་པའི་འཁོར་ནི་མཆོད་པའི་ལྷ་མོ་དྲུག་གོ །བར་ཆད་ཞི་བར་བྱེད་པའི་འཁོར་ནི་ཚད་མེད་བཞིའོ། །བྱིན་གྱིས་བརླབས་པའི་འཁོར་ནི་མཁའ་འགྲོ་སྡེ་བཞིའོ། །རྒྱ་ཆེ་བའི་འཁོར་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །གཡོན་དུ་བཞུགས་པའི་ཡུམ་ནི་ཡི་གེ་དྲུག་མའོ། །ལས་ཀྱི་འབྲས་བུ་མཐར་
ཕྱིན་པའི་ཡུམ་ནི་སྒྲོལ་མའོ། །ཟབ་མོའི་ཡུམ་ནི་རྡོ་རྗེ་རྣལ་འབྱོར་མའོ། །གཙོ་བོ་གཅིག་པུ་བསྒོམས་པས་ཀྱང་སྣང་བ་ཁེག་ན་ཆེ་མཆོག་གོ །སྤྱན་རས་གཟིགས་ཀྱི་པདྨ་རྒྱལ་པོའི་རྒྱུད་ལས་འཁོར་གྱི་ལེའུ་སྟེ་དགུ་པའོ།། །།འཕགས་པ་སྤྱན་རས་གཟིགས་ཀྱི་དབང་པོས་ཞུས་པ། འཁོར་ལ་ཐེ་ཚོམ་མ་མཆིས་ན། །བྱིན་གྱིས་བརླབས་པ་ཅི་ལྟ་བུ། །ཁྱེད་ཀྱིས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། །ཉོན་ཅིག་འགྲོ་བའི་མགོན་པོ་ཁྱོད། །རྣལ་འབྱོར་རིང་ལ་བྱིན་རླབས་པ། །ཆོས་ལ་འཇུག་པའི་དུས་དག་ཏུ། །འདི་ནི་ངག་ཏུ་བརྗོད་པར་གྱིས། །དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་གྱི་སྐུ། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བདག་ལ་བྱིན་གྱིས་བརླབ་ཏུ་གསོལ། །ཨོ། དཔལ་ལྡན་སངས་རྒྱས་གསུང་འཆང་བ། །རྡོ་རྗེ་མི་ཕྱེད་གསུམ་གྱི་གསུང་། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བདག་ལ་བྱིན་གྱིས་བརླབ་ཏུ་གསོལ།
ཨཱཿ དཔལ་ལྡན་སངས་རྒྱས་ཐུགས་འཆང་བ། །རྡོ་རྗེ་མི་ཕྱེད་གསུམ་གྱི་ཐུགས། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བདག་ལ་བྱིན་གྱིས་བརླབ་ཏུ་གསོལ། །ཧཱུྃ། རང་ལུས་ལྷ་རུ་གསལ་བ་དང་། །ང་རྒྱལ་ཕྲ་བ་རྩེ་གཅིག་བྷེ། །བྱིན་གྱིས་བརླབས་པ་དང་པོ་ནི། །མོས་པ་ཆེན་པོ་འབྱུང་བའོ། །བྱིན་གྱིས་བརླབས་པ་གཉིས་པ་ནི། །དམིགས་པ་གསལ་བ་ཡིན་པར་བཤད། །བྱིན་གྱིས་བརླབས་པ་གསུམ་པ་ནི། །གསོལ་བ་བཏབ་པ་འདི་ཡིན་ནོ། །དཀྱིལ་འཁོར་ཀུན་གྱི་སྒོར་ཞུགས་པའི། །རང་གིས་བསླབ་པའི་ཤེས་རབ་ཀྱིས། །ཆོས་རྣམས་བདེ་སྟོང་དུ་དྲན་པར་བྱའོ། །ཟིལ་གྱིས་གནོན་པ་ནི༔ ང་རྒྱལ་ཆེན་པོ་བཞི་ལ་གནས་པར་བྱའོ། །མཆོག་གི་དངོས་གྲུབ་འདོད་པ་ནི། སྟོང་པ་ཉིད་ལ་ཡང་ནས་ཡང་དུ་བདེ་བས་རྒྱས་གདབ་བོ། །ཐུན་མོང་གི་དངོས་གྲུབ་འདོད་པ་ནི། ཡིད་ཆེས་པར་བྱས་ཤིང་གསོལ་བ་ཉིན་མཚན་དུ་གདབ་པར་བྱའོ། །ལུས་ལ་ནད་མེད་པར་འདོད་པ་ནི། ལྷ་དང་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་
གཅིག་ཏུ་ཡང་ཡང་བསྲེ་བར་བྱའོ། །སྤྱན་རིས་གཟིགས་པདྨ་རྒྱལ་པོའི་རྒྱུད་ལས། སྐུ་གསུང་ཐུགས་བྱིན་གྱིས་བརླབས་པའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་ཏྟཱའདས་པདྨ་རྣམ་པར་འབྱེད་པ་མི་སྣང་བར་གྱུར་ཏོ། །འཕགས་པ་སྤྱན་རས་གཟིགས་ཀྱི་དབང་པོས་ཅི་ཡི་ཕྱིར་མི་སྣང་བར་གྱུར་ཅེས་བོས་པས། པདྨ་རྣམ་པར་འབྱེད་པའི་སངས་རྒྱས་ཀྱི་སྐུ་སྣང་བ་ལས་རྒྱལ་བ་ཤཱཀྱ་ཐུབ་པ་འཕྲོས་ནས་སྤྱན་རས་གཟིགས་ཀྱི་དབང་པོ་ལ་འདི་སྐད་ཅེས་བཀའ་སྩལ་ཏོ། །ལྷའི་དབང་པོ་ཁྱོད་འདྲ་འཇིག་རྟེན་གསུམ་ན་མེད། །དམ་ཆོས་ཟབ་དང་རྒྱ་ཆེ་ཀུན་གྱིས་སྤྱོད་ཡུལ་མིན། །ལྷ་དང་ཀླུ་དང་གནོད་སྦྱིན་མི་རྣམས་དགའ། །པདྨའི་རིགས་ཀྱི་སེམས་ཅན་མཆོག་ཏུ་བདེ། །ཞེས་གསུངས་ནས། ཡང་འཕགས་པ་སྤྱན་རས་གཟིགས་ཀྱི་དབང་པོས། ཟབ་པའི་ལམ་འདི་དང་པོར་ཁྱེད་ཀྱིས་གཟིགས། །ཉོན་ཅིག་ཅེས་ནས་ཁྱེད་ཀྱིས་བདག་ལ་གསུངས། །བདག་ནི་དད་པ་དྲག་པོ་གསུམ་ཀ་སྐྱེས། །དེང་འདིར་ཁྱེད་ནི་ང་ཡིས་མ་མཐོང་ན། །སྟོང་པ་ཉིད་དུ་ཞུགས་པ་ཇི་ལྟར་ལགས། །ཞེས་ཞུས་པས། དེ་ནས་སངས་རྒྱས་ཀྱི་ཉིད་ཀྱི་གསུང་མཉམ་པོར་བཏང་ནས། ཨོཾ་མ་ཎི་པདྨེ་ཧཱུཾ།
ཞེས་པ་སེང་གེའི་ང་རོ་ལྟ་བུར་གྲགས་སོ། །སེམས་ཅན་རྣམས་ཀྱི་སྣང་བ་ཐ་དད་པས། སྣོད་དུ་མི་རུང་བས། ལ་ལ་ནི་བརྒྱལ་ལོ། །འགྱེལ་ལོ། །སྐྲག་གོ །རེངས་སོ། །སྣོད་དང་ལྡན་པ་རྣམས་ཆོས་ཀྱི་སྣང་བ་རྒྱ་ཆེན་པོ་བསམ་ལས་འདས་པ་མང་པོ་ཐོབ་པར་གྱུར་ཏོ། །དབང་པོ་གསལ་བ་དང་། རིགས་བཟང་བ་དང་། དྲན་པ་རྙེད་པར་འགྱུར་བ་དང་། ནོར་རྙེད་པར་འགྱུར་བ་ལ་སོགས་པར་གྱུར་ཏོ། །ཡང་བཅོམ་ལྡན་འདས་པདྨ་རྣམ་པར་འབྱེད་པ་ཤཱཀྱ་ཐུབ་པའི་དབུའི་གཙུག་ཏོར་དུ་བཞུགས་ནས་ཕྱག་བརྐྱངས་ཏེ་སྤྱན་རས་གཟིགས་ཀྱི་སྤྱི་བོར་བཞག་ནས། རྒྱུད་འདི་ནི་སྤྱིར་བྱང་ཆུབ་སེམས་དཔའ་ཐམས་ཅད་ལ་གཏད་དོ། །བྱེ་བྲག་ཏུ་པདྨའི་རིགས་ཀྱི་བྱང་ཆུབ་སེམས་དཔའ་རྣམས་ལ་གཏད་དོ། །ཉེ་བར་ཡིད་ལ་ཟུངས་ཤིག །གཅེས་པར་གཏད་དོ། །བཀུར་སྟིའི་གནས་སུ་སྦྱིན་པ། འཕགས་པ་སྤྱན་རས་གཟིགས་ཀྱི་དབང་པོས། བཅོམ་ལྡན་འདས་འདི་རྣམས་ནི། འཕགས་པ་ཉན་ཐོས་དང་རང་སངས་རྒྱས་རྣམས་ཀྱིས་སྤྱོད་ཡུལ་མ་ཡིན་གྱི། སྙིང་རྗེ་ཆེན་པོ་དང་ལྡན་ན། སོ་སོའི་སྐྱེ་བོས་ཀྱང་ཉན་པ་དང་། ཚུལ་བཞིན་དུ་ཡིད་ལ་བྱེད་པ་དང་། གསེར་གྱིས་
བྲིས་ཏེ་གླེགས་བམ་དུ་བྱས་ན། མཆོད་པ་ལྔས་གཏན་དུ་མཆོད་པ་དང་། སྤྱི་བོར་བཞག་པ་དང་། ཡང་དང་ཡང་དུ་དྲན་པར་བྱ་བ་དང་། བཀུར་སྟི་བྱ་བར་ངེས་གནང་ངོ་། །བཅོམ་ལྡན་འདས་པདྨ་རྣམ་པར་འབྱེད་པས་འདི་སྐད་ཅེས་བཀའ་སྩལ་པ་དང་། བཅོམ་ལྡན་འདས་པདྨ་རྣམ་པར་འབྱེད་པ་དང་། ཤཱཀྱ་ཐུབ་པ། སྤྱན་རས་གཟིགས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། འཕགས་པ་སྤྱན་རས་གཟིགས་ཀྱི་དབང་པོ་དང་། འཇམ་དཔལ་དང་། ལག་ན་རྡོ་རྗེ་ལ་སོགས་པ་དང་། ལྷ་དང་ཀླུ་དང་གནོད་སྦྱིན་དང་། ལྷ་མ་ཡིན་ཐམས་ཅད་དང་། མི་དང་ནམ་མཁའ་ལྡིང་དང་། དྲི་ཟར་བཅས་པ་ཐམས་ཅད་ཡི་རངས་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཡོངས་སུ་གཏད་པའི་ལེའུ་སྟེ་བཅུ་གཅིག་པའོ།། །པདྨ་རྒྱལ་པོའི་རྒྱུད་རྫོགས་སོ།། །།རྒྱ་གར་གྱི་མཁན་པོ་ཨ་མ་ཀ་ར་ཀྲི་དང་། ལོཙྪ་བ་རིན་ཆེན་བཟང་པོས་མངའ་རིས་སུ་བསྒྱུར་ཏེ་གཏན་ལ་ཕབ་པའོ། །ཤུ་བྷསྨཱ་ག་ཨཱ། ཤུ་བྷཾ་མ་སྐུ་སརྦ་ཛ་ག་ཏཾ། །མངྒ་ལཾ། བྷ་ཝ།། །།
འཕགས་པ་སྤྱན་རས་གཟིགས་པདྨ་ཟབ་པའི་རྒྱུད་ཅེས་བྱ་བ་བཞུགས་སོ།།
རྒྱ་གར་སྐད་དུ། གེ་སར་གྷོ་བྷི་ར་ཏན་ན་མ། བོད་སྐད་དུ། པདྨ་ཟབ་པའི་རྒྱུད་ཅེས་བྱ་བ། གསུང་གི་མངའ་བདག་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་ཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་ཐུགས་གཉིས་སུ་མེད་པའི་བདེ་བ་ཆེན་པོའི་གནས་ན་བཞུགས་སོ། །དེའི་ཚེ་བཅོམ་ལྡན་འདས་པདྨའི་སྣང་བ་ཆེན་པོ་རབ་ཏུ་རྒྱས་པ་ལ། འཕགས་པ་སྤྱན་རས་གཟིགས་ཀྱི་དབང་པོ་དང་། ཡུམ་རྡོ་རྗེ་ཕག་མོ་དང་། མཱ་མ་ཀཱི་དང་། སངས་རྒྱས་སྤྱན་མ་དང་། ན་བཟའ་
དཀར་མོ་དང་། དམ་ཚིག་སྒྲོལ་མ་དང་། །པདྨ་མཁའ་འགྲོ་མ་དང་། རྡོ་རྗེ་མཁའ་འགྲོ་མ་དང་། རིན་ཆེན་མཁའ་འགྲོ་མ་དང་། ལས་ཀྱི་མཁའ་འགྲོ་མ་དང་། གཟུགས་རྡོ་རྗེ་མ་དང་། སྒྲ་རྡོ་རྗེ་མ་དང་། དྲི་རྡོ་རྗེ་མ་དང་། རོ་རྡོ་རྗེ་མ་དང་། རེག་རྡོ་རྗེ་མ་ལ་སོགས་པ་དེ་རྣམས་ཀྱིས་བསྐོར་བ་ལ། སངས་རྒྱས་པདྨའི་སྣང་བ་རབ་ཏུ་རྒྱས་པ་ཆེན་པོས་འཁོར་རྣམས་ལ་གཟིགས་ནས་འོད་ཟེར་བཀྱེས་ཏེ། འཁོར་ཐམས་ཅད་གཉིས་སུ་མེད་པར་སྣང་བར་བྱས་སོ། །དེ་ནས་འཁོར་རྣམས་ལ་འདི་སྐད་ཅེས་བཀའ་སྩལ་ཏོ། །སེམས་ཀྱི་རྣམ་པར་རྟོག་པ་གང་། །
གཉིས་སུ་མེད་པའི་ཡེ་ཤེས་ཏེ། །བདེ་དང་སྟོང་པའི་མཚན་ཉིད་ཅན། །ཐབས་དང་ཤེས་རབ་བསྒོམསལས་བྱུང་། །ཞེས་བཀའ་སྩལ་ཏོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་བཞེངས་ནས། བཅོམ་ལྡན་འདས་ལ་དེ་ཁོ་ན་ཉིད་བཞིན་ནོ་ཞེས་ཞུས་ནས། འཕགས་པ་སྤྱན་རས་གཟིགས་དབང་ཕྱུག་སངས་རྒྱས་པདྨའི་སྣང་བ་རབ་ཏུ་རྒྱས་པའི་ཐུགས་ཀར་མི་སྣང་བར་གྱུར་ཏོ། །རྣལ་འབྱོར་བླ་ན་མེད་པའི་རྒྱུད་པདྨ་ཟབ་པ་ལས། གླེང་གཞིའི་ལེའུ་སྟེ་དང་པོའོ།། །།པདྨའི་སྣང་བ་རབ་ཏུ་རྒྱས་པ་ཆེན་པོ་ནི་སྐུ་མདོག་པོ་ཞལ་གཅིག་ཕྱག་བཞི་པ། དང་པོས་ཐུགས་ཀར་ཐལ་མོ་སྦྱར་བ། གཡས་པ་ན་རྡོ་རྗེ་རྩེ་ལྔ་པ། གཡོན་པ་ན་པདྨ་དམར་པོ། སྤྱན་རས་གཟིགས་ཐམས་ཅད་ཕྱག་དང་པོ་གཉིས་ཐལ་མོ་སྦྱར་བའོ། །གཡས་ཕྲེང་བ་གཡོན་པདྨའོ། །ཡུམ་བཞི་པོ་ཞལ་གཅིག་ཕྱག་བཞི་པའོ། །ཐལ་མོ་ལྷ་མོ་ཐམས་ཅད་ལའོ། །སངས་རྒྱས་སྤྱན་མ་ནི་འཁོར་ལོ་དང་པདྨ། །མཱ་མ་ཀཱི་ནི་རིན་ཆེན་དང་པདྨ། ན་བཟའ་དཀར་མོ་པདྨ་དཀར་དམར་གཉིས། དམ་ཚིག་སྒྲོལ་མ་ལྗང་ཀུ་ཨུཏྤལ་དང་པདྨ། ཕྱག་མཚན་ནོ། །པདྨ་མཁའ་འགྲོ་པདྨ་དང་བུམ་པ། རྡོ་
རྗེ་མཁའ་འགྲོ་རྡོ་རྗེ་དང་པདྨ། རིན་ཆེན་མཁའ་འགྲོ་རིན་ཆེན་དང་པདྨ། ལས་ཀྱི་མཁའ་འགྲོ་རལ་གྲི་དང་པདྨའོ། །།མཁའ་འགྲོ་བཞིའི་ཕྱག་མཚན་ནོ། །གཟུགས་རྡོ་རྗེ་མ་མེ་ལོང་དང་པདྨའོ། །སྒྲ་རྡོ་རྗེ་མ་གླིང་བུ་དང་པདྨའོ། །དྲི་རྡོ་རྗེ་མ་བདུག་པ་དང་པདྨའོ། །རོ་རྡོ་རྗེ་མ་འཁར་གཞོང་དང་པདྨའོ། །རེག་རྡོ་རྗེ་མ་ན་བཟའ་དང་པདྨའོ། །ལྷའི་སྐུ་མདོག་ཕྱག་མཚན་གྱི་ལེའུ་སྟེ་གཉིས་པའོ།། །།དེ་ནས་སྟོན་པ་པདྨ་བཛྲ་ནི། །འཁོར་ལ་འཛུམ་པ་ཆེར་མཛད་ནས། །གསང་སྔགས་ཀུན་གྱི་ཡང་འདི། །དགའ་བ་ཆེར་མཛད་ནན་ཏན་ཏུ། །བརྗོད་པས་སྐལ་བ་ཅན་གྱི་རིགས། །སྒྲིབ་པ་ཐམས་ཅད་བྱུང་ནས་ཀྱང་། །བདེ་བའི་གནས་སུ་ཁྲིད་པ་ཡི། །དོན་འདི་ཟབ་ད་ཆེན་འདི། །ང་ཡིས་ཁྱོད་ལ་བརྗོད་པར་བྱ། །ཉོན་ཅིག་འགྲོ་བའི་མགོན་པོ་ཁྱོད། །ཐུབ་པའི་སྐུ་ནི་མི་བསླུ་བས། །སྣང་བ་དག་པ་ཀུན་གྱིས་མཐོང་། །ཐུབ་པའི་གསུང་ནི་མི་བསླུ་བས། །ཤེས་རབ་ཅན་ནི་ཡིད་ཆེས་བྱེད། །ཐུབ་པའི་ཐུགས་ནི་མི་བསླུ་བས། །མོས་གུས་ཅན་ལ་བྱིན་གྱིས་རློབས། །འཁོར་དང་བཅས་པས་ཉན་པར་རིགས། །དེ་ལ་གུས་པ་
ཆེར་མཛད་ནས། །ལེགས་པར་ཐལ་མོ་སྦྱར་བྱས་ཏེ། །སྟོན་པ་ལ་ནི་གུས་པས་ཉོན། །སྟོན་པས་ལེགས་པར་བཀའ་སྩལ་པ། །ཨོཾ་མ་ཎི་པདྨེ་ཧཱུྃ། སྟོན་པས་འདི་ནི་གསུངས་ཙམ་གྱིས། །རི་རབ་རྡུལ་དང་མཉམ་པ་ཡི། །མཁའ་འགྲོ་ཐམས་ཅད་དགྱེས་ནས་ཀྱང་། །གར་དང་གླུ་ཡིས་གཟེངས་བསྟོད་ནས། །ནམ་མཁའ་གང་བར་བྱས་ནས་བྱོན། །མཎྜལ་སྐུ་མདོག་མི་འདྲ་བ།། །བྱེ་བ་འབུམ་ཚོ་ཞེ་དྲུག་ནི། །སངས་རྒྱས་པདྨ་རིབ་རྒྱས་དང་། །འཕགས་པ་སྤྱན་རས་གཟིགས་ལ་ཕུལ། །མཁའ་འགྲོ་མ་ལུས་གསུང་གཅིག་ཏུ། །བསྟུན་ནས་བསྟོད་པ་ཆེར་མཛད་ནས། །མགོན་པོ་གཉིས་པོའི་སྙན་ཐད་དུ། །ཕྱག་གཉིས་ཐལ་མོ་རབ་སྦྱར་ནས། །ལེགས་སོ་ལེགས་སོ་སྟོན་པ་ཁྱེད། །ལས་དང་ཉོན་མོངས་འགག་པར་བྱེད། །སྡུག་བསྔལ་ཆེན་པོ་བདེ་བར་འདྲེན། །ཆོས་ཀྱི་ཁམས་རྣམས་སད་པར་བྱེད། །ལུས་ངག་ཡིད་གསུམ་བདེ་བར་བྱེད། །སྒྲ་ཡི་དབྱངས་ནི་དག་པར་བྱས། །བདེ་བའི་གནས་སུ་བདེ་བའི་ལམ། །བདེ་བའི་འབྲས་བུ་བླ་ན་མེད། །ཨེ་མ་ཧོ་བདེ་བའི་སྐུ་ཆེན་པོ། །ཨེ་མ་ཧོ་བདེ་བའི་གསང་སྔགས་ཆེ། །ཨེ་མ་ཧོ་བདེ་བའི་ཁམས་རྣམ་དག །ཨེ་མ་ཧོ་བདེ་
བའི་གནས་ན་གནས། །ཨེ་མ་ཧོ་བདེ་བ་འཛད་པ་མེད། །ཅེས་བརྗོད་ནས་རང་རང་གི་གནས་སུ་གཤེགས་སོ། །འཕགས་པ་སྤྱན་རས་གཟིགས་དབང་ཕྱུག་རྣལ་འབྱོར་ཆེན་པོའི་རྒྱུད་ལས། སྔགས་གསུངས་པ་དང་། ངོ་མཚར་ཆེ་བའི་ལེའུ་སྟེ་གསུམ་པའོ།། །།མགོན་པོ་སྤྱན་རས་གཟིགས་ཀྱི་དབང་པོས་སངས་རྒྱས་པདྨའི་སྣང་བ་ཆེན་པོ་རབ་ཏུ་རྒྱས་པ་ལ་འདི་སྐད་ཅེས་གསོལ་བ་བཏབ་བོ། །པདྨ་རིགས་ཀྱི་དམ་ཚིག་འདི། །པདྨའི་དཀྱིལ་འཁོར་ཆེན་པོ་རུ། །པདྨའི་དབང་བསྐུར་ཞུ་བར་བགྱི། །བཅོམ་ལྡན་འདས་ཀྱིས་བཀའ་སྩལ་པ། །མི་མཁས་པ་ནི་འཆིང་བར་འགྱུར། །མཁས་པ་རྣམས་ནི་གྲོལ་བར་འགྱུར། །འདོད་ཆགས་དག་པ་བདེ་བ་འབྱུང་། །འདོད་ཆགས་དག་ལ་དགའ་བ་ང་། །འདོད་ཆགས་དགའ་བདེ་གཉིས་མེད་པས། །སེམས་ཅན་དད་ཅན་སྨིན་པར་བྱེད། །དུས་གསུམ་སངས་རྒྱས་ཐམས་ཅད་ཀྱང་། །འདོད་ཆགས་ཕ་རོལ་ཕྱིན་པས་དེས། །སྲིད་པའི་འདམ་ལས་འདི་ཡིས་བརྒལ། །འདོད་ཆགས་སྤང་བའི་དཀྱིལ་འཁོར་དུ། །ང་ཡིས་འབོད་པས་ཡིད་གཉིས་སྤོངས། །དམ་ཚིག་སྡོམ་པ་ཀུན་ཀྱང་འབོགས། །
དང་པོ་བུམ་པའི་དབང་ཡིན་ནོ། །གསང་བའི་དབང་ནི་གཉིས་པ་ཡིན། །ཤེས་རབ་བསྐྱེད་པ་གསུམ་པ་ཡིན། །ངེས་ཤེས་བསྐྱེད་པ་བཞི་པ་ཡིན། །ལྷ་དང་སྔགས་དང་སྟོང་པ་ཉིད། །བདེ་སྟོང་འབྲེལ་པར་བསྒོམ་པ་དང་། །ཐ་མལ་ལུས་ཀྱི་རྣམ་རྟོག་ནི། །རང་གཞན་ལྷ་ཡི་སྣང་བར་བསྒོམ། །ཐ་མལ་ངག་གི་རྣམ་རྟོག་ནི། །གཉིས་པ་གསང་བའི་དབང་གིས་བཅད། །བཟླས་བརྗོད་རྒྱུན་ཏུ་བཟླས་པའོ། །ཐ་མལ་སེམས་ཀྱི་རྣམ་རྟོག་ནི། །གསུམ་པ་ཤེས་རབ་དབང་གིས་བཅད། །བདེ་དང་སྟོང་པར་ཤེས་པའོ། །བདེ་སྟོང་འདུ་འབྲལ་མེད་པའོ། །བཞི་པ་ཡེ་ཤེས་དབང་ཡིན་ནོ། །འབྲས་བུ་ཐམས་ཅད་བསྡུས་པ་ནི། རང་ལུས་ལྷ་རུ་ངོ་ཤེས་ནས། །ཐ་མལ་སྤྱོད་པ་དྲན་ཀྱང་སྤངས། །ཞེས་གསུངས་སོ། །རྣལ་འབྱོར་ཆེན་པོའི་རྒྱུད་པདྨ་ཟབ་པ་ལས། དབང་གི་ལེའུ་སྟེ་བཞི་པའོ།། །།ཡང་སྤྱན་རས་གཟིགས་ཀྱི་དབང་པོས། སངས་རྒྱས་པདྨའི་སྣང་བ་ཆེན་པོ་རབ་ཏུ་རྒྱས་པ་ལ་འདི་སྐད་ཅེས་ཞུས་སོ། །དཀྱིལ་འཁོར་ལ་མཎྜལ་ལྟར་བསྒོམ་པ་དང་། དཀྱིལ་འཁོར་དུ་བསྒོམ་པ་དང་། རང་གི་ཕུང་པོ་ལ་སྒོམ་པ་གསུམ་མཆིས་ན། འདིར་ཇི་ལྟར་བསྒོམ་པར་བྱ་
ཞེས་ཞུས་པ་དང་། གཙོ་བོས་བཀའ་སྩལ་པ། འདིར་ནི་རང་གི་ཕུང་པོ་བསྒོམ་མོ་ཞེས་བཀའ་སྩལ་ཏོ། རང་ཉིད་སྤྱན་རས་གཟིགས་སུ་བྷོ། །དབུ་རྒྱན་ཉིད་ལ་ང་སྒོམས་ཤིག །སངས་རྒྱས་སྤྱན་ནི་དཔྲལ་བར་བསྒོམ། །མཱ་མ་ཀཱི་ནི་སྙིང་ལ་བསྒོམ། །གོས་དཀར་མོ་ནི་མགྲིན་པར་བསམ། །སྒྲོལ་མ་ལྟེ་བར་བསམ་པར་བྱ། །རྡོ་རྗེ་མཁའ་འགྲོ་དཔྲལ་བ་ནས། །ཁྲུ་གང་ཙམ་གྱི་ས་རུ་བསམ། །པདྨ་མཁའ་འགྲོ་ཁ་ཡི་བར། །རྡོ་རྗེ་ཕག་མོ་སྐུ་ལ་འཁྲིལ། །རིན་ཆེན་མཁའ་འགྲོ་རང་གི་ལྟོར། །ལས་ཀྱི་མཁའ་འགྲོ་བྱང་གི་སྐྱོབ། །གཟུགས་མིག་སྒྲ་སྙན་དྲི་སྣའོ། །རོ་ལྕེ་རེག་བྱ་ལུས་ལ་བསྒོམ། །ཀུན་གྱིས་སྔགས་ནི་གཅིག་ཏུ་བསྡུས། །ཡང་ཡང་བསྒོམ་ཞིང་ཡང་ཡང་བཟླས། །ཞེས་ལུས་ལ་ལྷ་འགོད་པའི་ལེའུ་སྟེ་ལྔ་པའོ།། །།སྐུ་མདོག་དམར་ལ་སྤྱན་གསུམ་དང་། །རུས་པའི་རྒྱན་ནི་སྣ་ཚོགས་ལྡན། །གཡས་ན་རྡོ་རྗེ་གྲི་གུག་འཛིན། །གཡོན་ན་ཐོད་པ་བདེ་བས་གང་། །གཙོ་བོ་ལ་ནི་སྟེར་བའི་ཚུལ། །དེ་ནས་མགོན་པོ་སྤྱན་རས་གཟིགས་ཀྱིས། སངས་རྒྱས་པདྨའི་སྙིང་པོ་རབ་ཏུ་རྒྱས་པ་ལ། ལུས་ལ་དཀྱིལ་འཁོར་འདི་ལྟ་བུ་བསྒོམས་པས་
ཡོན་ཏན་ཅི་ཞིག་བདོག་ཞུས་པས། སྟོན་པས་བཀའ་སྩལ་པ། ཁྱེད་རང་ཕུང་པོ་ལྔ་ཡི་བདག །ང་ནི་རིགས་ཀྱི་བདག་པོར་འགྱུར། །སངས་རྒྱས་སྤྱན་ནི་རྣལ་འབྱོར་གྱི། །ལུས་ལ་བདེ་བ་ཆེན་པོ་སྟེར། །གོས་དཀར་དྲོད་ལ་བདེ་བ་རྙེད། །མཱ་མ་ཀཱི་ཡི་རྣལ་འབྱོར་གྱིས། །ཁྲག་ལ་བདེ་བ་སྟེར་བར་བྱེད། །སྒྲོལ་མས་དབུགས་ལ་བདེ་བ་སྟེར། །ལས་ཀྱི་མཁའ་འགྲོ་རྣལ་འབྱོར་གྱིས། །སེམས་ལ་བདེ་བ་ཆེན་པོ་སྟེར། །པདྨ་མཁའ་འགྲོས་རབ་དགའ་སྟེར། །རིན་ཆེན་མཁའ་འགྲོས་མཆོག་དགའ་སྟེར། །རྡོ་རྗེ་མཁའ་འགྲོས་བདེ་སྟོང་གཉིས་ཟླུམེད་སྟེར། །གཟུགས་ཀྱི་ལྷ་མོས་རྣལ་འབྱོར་ལ། །མཐོང་བ་ཐམས་ཅད་བདེ་བ་སྟེར། །སྒྲ་ཡི་ལྷ་མོས་རྣལ་འབྱོར་ལ། །ཐོས་པ་ཐམས་ཅད་བདེ་བ་སྟེར། །དྲི་ཡི་ལྷ་མོས་རྣལ་འབྱོར་ལ། །སྣོམ་པ་ཐམས་ཅད་བདེ་བ་སྟེར། །རོ་ཡི་ལྷ་མོས་རྣལ་འབྱོར་ལ། །བདེ་བ་ཆེན་པོ་རོ་ཡིས་གང་། །རེག་གི་ལྷ་མོས་རྣལ་འབྱོར་ལ། །རེག་པ་ཐམས་ཅད་བདེ་བར་འཆར་། །འཁོར་བ་མྱ་ངན་འདས་པ་ཡི། །དངོས་པོ་རྡུལ་ཙམ་ཡོད་མ་ཡིན། །ཐམས་ཅད་བདེ་བ་ཆེན་པོར་སྣང་། །དུས་ཀྱི་ཚད་ཀྱང་སྐད་ཅིག་ལ། །སྡུག་བསྔལ་གྱིས་ནི་བར་ཆད་
དུ། །བྱ་བར་ནུས་པ་མ་ཡིན་ནོ། །ཐམས་ཅད་བདེ་བའི་རང་བཞིན་ལ། །བདེ་བ་སྟོང་པ་ཁོ་ནའོ། །མགོན་པོ་སྤྱན་རས་གཟིགས་དབང་ཕྱུག་རྒྱུད་པདྨ་ཟབ་པ་ལས། བདེ་བའི་ལེའུ་སྟེ་དྲུག་པའོ།། །།ཡང་མགོན་པོ་སྤྱན་རས་གཟིགས་དབང་ཕྱུག་གིས། སངས་རྒྱས་པདྨའི་སྣང་བ་ཆེན་པོ་རབ་ཏུ་རྒྱས་པ་ལ་འདི་སྐད་ཅེས་ཞུས་སོ། །བཅོམ་ལྡན་འདས་ཕྱོགས་བཅུའི་སངས་རྒྱས་དེ་རྣམས་ཐམས་ཅད་སྔགས་གཅིག་གིས་ཇི་ལྟར་བསྐུལ་བར་བྱ་ཞེས་ཞུས་པ་དང་། སངས་རྒྱས་པདྨའི་སྣང་བ་ཆེན་པོ་རབ་ཏུ་རྒྱས་པ་དེས། །ཨོཾ་མ་ཎི་པདྨེ་ཧཱུཾ། ཞེས་གསུངས་པས། འཇིག་རྟེན་གྱི་ཁམས་མ་ལུས་ཤིང་ལུས་པ་མེད་པ་ན་བཞུགས་པའི་སངས་རྒྱས་ཐམས་ཅད་སེམས་ཅན་གྱི་དོན་ལ་བསྐུལ་ལོ། །སྤྱན་རས་གཟིགས་དབང་ཕྱུག་གིས། ཨོཾ་མ་ཎི་པདྨེ་ཧཱུྃ། ཞེས་བརྗོད་པས། ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་གཅིག་ཀྱང་མ་ལུས་པར་སེམས་ཅན་གྱི་དོན་ལ་བསྐུལ་ལོ། །ཡུམ་རྡོ་རྗེ་རྣལ་འབྱོར་མས། ཨོཾ་མ་ཎི་པདྨེ་ཧཱུྃ། ཞེས་བརྗོད་པས། མཁའ་འགྲོའི་ཚོགས་རི་རབ་ཆེན་པོའི་རྡུལ་དང་མཉམ་པ་ཐམས་ཅད་སེམས་ཅན་གྱི་དོན་ལ་བསྐུལ་ལོ། །མཁའ་
འགྲོ་སྡེ་བཞིས་ༀ་མ་ཎི་པདྨེ་ཧཱུྃ། ཞེས་བརྗོད་པས། མཁའ་འགྲོའི་ཚོགས་པདྨའི་རིགས་སུ་གཏོགས་པ་ཐམས་ཅད་ཀྱི་ཐུགས་ལ་ཡེ་ཤེས་ཆེན་པོ་འབར་རོ། །རབ་ཏུ་ཆེར་འབར་རོ། །ཡུམ་བཞིས་ༀ་མ་ཎི་པདྨེ་ཧཱུྃ། ཞེས་བརྗོད་པས་སེམས་ཅན་ཉན་པར་རྟོགས་ཚད་ཀྱིས་ཤེས་རབ་ཀྱི་སྒོ་མང་པོ་ཕྱེའོ། །འདོད་ཡོན་གྱི་ལྷ་མོ་རྣམས་ཀྱིས་ༀ་མ་ཎི་པདྨེ་ཧཱུྃ། ཞེས་བརྗོད་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ན། ཆོས་བྱེད་རྣམས་ལ་ལོངས་སྤྱོད་ཀྱི་གཏེར་ཆེན་པོ་དང་འཕྲད་པར་གྱུར་ཏོ། །སེམས་ཅན་འོན་པ་རྣམས་ཀྱིས་རྣ་བས་སྒྲ་ཐོས་པར་གྱུར་ཏོ། །ལོང་བ་རྣམས་ཀྱིས་མིག་རྙེད་པ་དང་། སྨྱོན་པ་རྣམས་ཀྱིས་དྲན་པ་རྙེད་པ་དང་། བཞོན་པ་དང་། སྐྱེད་མོས་ཚལ་དང་། སྐྱབས་འོས་པ་དང་། འདོད་པའི་དོན་རྙེད་པར་གྱུར་ཏོ། །སྔགས་བསྐུལ་བའི་ལེའུ་སྟེ་བདུན་པའོ།། །།དེ་ནས་སྟོན་པ་རབ་རྒྱས་ཀྱིས། །འཁོར་རྣམས་ཉན་པར་འོས་པ་ལ། །ཟབ་མོའི་དོན་འདི་རབ་ཏུ་གསུངས། །ཨེ་མ་ཧོ་སངས་རྒྱས་སྤྱན་རས་གཟིགས། །ཨེ་མ་ཧོ་དམ་ཆོས་ཐུགས་རྗེ་འཆད། །ཨེ་མ་ཧོ་གསང་སྔགས་འདུས་རེ་ཆེ། །ཨེ་མ་ཧོ་སྔགས་ཀྱི་དོན་ཆེན་
ཡིན། །ཨེ་མ་ཧོ་པདྨའི་རིགས་རྣམས་མང་། །ཞེས་གསུངས་སོ། །མགོན་པོ་སྤྱན་རས་གཟིགས་ཀྱིས་ཚིགས་སུ་བཅད་པ། སེམས་ཅན་པདྨའི་རིགས་མཆོག་ལ། །པདྨ་འདོད་ཆགས་བྲལ་བའི་ཆོས། །ལམ་མཆོག་ཟབ་པ་པདྨའི་ལམ། །སངས་རྒྱས་པདྨ་རྒྱས་པ་ཉིད། །པདྨའི་བདེ་དང་སྟོང་པ་འཐོབ། །ཅེས་སོ། །རྡོ་རྗེ་རྣལ་འབྱོར་ཡུམ་གྱིས་ཚིགས་སུ་བཅད་པ། སྟོང་ཉིད་སྙིང་རྗེའི་དཀྱིལ་འཁོར་འདིར། །ཐ་མལ་རྣམ་པར་རྟོག་པ་སྤང་། །བདེ་སྟོང་གཉིས་ཀྱི་དཀྱིལ་འཁོར་དུ། །ཐེ་ཚོམ་མེད་པའི་སློབ་མ་བཞུགས། །ཡུམ་བཞིས་ཚིགས་སུ་བཅད་པ། །ཐ་མལ་པ་ཡི་སེམས་ཅན་ལ། །དབང་པོ་དང་ནི་འཚམས་པར་བསྟན། །མཆོག་ནས་མཆོག་གི་སེམས་ཅན་ལ། །ཟབ་དང་རྒྱ་ཆེའི་ཆོས་རྣམས་བསྟན། །ཤེས་རབ་ཕུན་སུམ་ཚོགས་པ་ལ། །ཆོས་ཀྱི་རྣམ་གྲངས་ཆེན་པོ་བསྟན། །མཁའ་འགྲོ་བཞིས་ཚིགས་སུ་བཅད་པ། བྱམས་དང་སྙིང་རྗེ་དགའ་བ་བཏང་སྙོམས་ཀྱིས། །ཉོན་མོངས་ལོག་པར་ལྟ་བའི་དགྲ་སྡང་འཇོམས། །བདེ་བ་བཞི་དང་རྒྱུ་དང་འབྲས་ལྡན་པ། །དབང་པོ་རྣོ་དང་བླ་མ་ལ་གུས་ཤིང་། །ཡིད་གཉིས་མེད་པའི་སེམས་ཀྱིས་
འདིར་འཇུག་ཅིག །འདོད་ཡོན་གྱི་ལྷ་མོས་ཚིགས་སུ་བཅད་པ། མཛེས་པའི་གཟུགས་དང་སྙན་པའི་སྒྲ། །དང་བ་འདྲེན་དང་རོ་མཆོག་ལྡན། །རེག་བྱ་འཇམ་དང་དམ་ཚིག་སྡོམ། །ཀུན་གྱི་དོན་དུ་ཀུན་ལ་འབུལ། །མཉེས་ནས་བདེ་བ་ཆེན་པོ་སྟེར། །ཚིགས་སུ་བཅད་པའི་ལེའུ་སྟེ་བརྒྱད་པའོ།། །།དེ་ནས་དེའི་དུས་སུ་བཅོམ་ལྡན་འདས་པདྨའི་སྣང་བ་རབ་ཏུ་རྒྱས་པ་ཆེན་པོའི་དྲུང་དུ། རྒྱལ་བ་ཤཱཀྱ་ཐུབ་པ་བྱོན་ནས། ཕྱག་བྱས་ཏེ་ཐལ་མོ་སྦྱར་ནས་འདི་སྐད་ཅེས་གསུངས་སོ། །ང་ཡི་བསྟན་པ་དྲི་མེད་འདི། །ཚུལ་ཁྲིམས་ཕ་རོལ་ཕྱིན་པར་བཅས། །ལམ་ལྔ་ས་བཅུ་ཕ་རོལ་བཅུ། །ཁྲུས་དང་གཙང་སྦྲ་དཀའ་སྤྱད་དང་། །བྱིན་གྱིས་བརླབས་དང་སྡོམ་ལེན་དང་། །གསོ་སྦྱོང་དང་ནི་བཤགས་པ་ལ། །ཁྱེད་ཀྱིས་ཉེས་པ་ཆེར་བྱས་ན། །ཞེས་གསུངས་པ་དང་། སྟོན་པ་པདྨ་རབ་རྒྱས་ཀྱིས། དེ་ཡི་མི་དགྱེས་དགག་པའི་ཕྱིར། །ཚུལ་ཁྲིམས་ཐམས་ཅད་དམ་ཚིག་སྟེ། །ལམ་ལྔ་སྨིན་པའི་དབང་ལ་ཚང་། །ས་བཅུ་ལྷ་ཡི་སྐུར་བསྒོམས་པས། །རབ་ཏུ་དགའ་བ་དང་པོ་ཡིན། །སྐུ་ལ་དྲི་མ་གཏན་མེད་པ། །གཉིས་པ་དྲི་མ་མེད་པ་ཡིན། །ལྷ་ཡི་སྐུ་འོད་འཕྲོས་པ་ལ། །གསུམ་
པ་འོད་བྱེད་པ་འདི་ཡིན། །འོད་ཀྱིས་སེམས་ཅན་གོ་འབྱེད་པ། །བཞི་པའི་ས་ནི་འོད་འཕྲོ་བའོ། །དམིགས་པ་རྩེ་གཅིག་སྦྱང་དཀའ་བས། །ཤེས་རབ་འབྱེད་པས་མངོན་དུ་འགྱུར། །སེམས་ཅན་དོན་དུ་ལྷ་བསྒོམས་པས། །བདུན་པ་རིང་དུ་སོང་བ་ཡིན། །ཐེ་ཚོམ་ཡིད་གཉིས་མི་བསྐྱེད་པས། །བརྒྱད་པ་མི་གཡོ་བ་ཡི་ས། །སེམས་ཅན་ཐམས་ཅད་སྨིན་པ་དང་། །རང་ལ་དྲི་མ་རྟོག་པ་མེད། །དགུ་པ་ལེགས་པའི་བློ་གྲོས་ཡིན། །ཐུགས་རྗེའི་སྤྲིན་གྱིས་འགྲོ་ལ་ཁྱབ། །བཅུ་པ་ཆོས་ཀྱི་སྤྲིན་འདི་ཡིན། །རང་བཞིན་སྟོང་པའི་ཡེ་ཤེས་ཀྱི། །དྲི་མ་ཕྲ་བ་ལུས་ལ་མེད། །ཆོས་སྐུ་ཞེས་བྱ་དྲི་མ་བྲལ། །བོ་དྷི་ས་ཏཱ་ལོངས་སྐུར་སྣང་། །འགྲོ་བའི་བསམ་པ་དང་བསྟུན་ནས། །ཀུན་ལ་སྣང་བ་སྤྲུལ་པའི་སྐུ། །དེ་གསུམ་དབྱེར་མེད་བདེ་ཆེན་སྐུ། །ཞེས་གསུངས་པ་དང་། སྟོན་པ་ཤཱཀྱ་ཐུབ་པ་ཆེན་པོ་ཐུགས་ཆེས་ནས། མེ་ཏོག་གི་ཚོགས་ནམ་མཁའ་གང་བ་སངས་རྒྱས་པདྨའི་སྣང་བ་རབ་ཏུ་རྒྱས་པ་ལ་གཏོར་ནས་སྤྱན་རས་གཟིགས་ཀྱི་སྤྱི་བོར་མི་སྣང་བར་གྱུར་ཏོ། །ཐེ་ཚོམ་བསལ་བའི་ལེའུ་ཞེས་བྱ་སྟེ་དགུ་པའོ།། །།སྟོན་པ་པདྨའི་སྣང་བ་རབ་ཏུ་རྒྱས་པ་ལ་འཕགས་པ་སྤྱན་
རས་གཟིགས་ཀྱི་དབང་པོ་རྣལ་འབྱོར་པའི་ལུས་འདི་ལ་འཁོར་ལོ་དུ་ལགས་ཞུས་པས། སྐུ་ལ་བཞུགས་པའི་རྡོ་རྗེ་ཕག་མོ་རང་གི་བདག་པོ་ལ་ཐིམ་ནས་མི་སྣང་བར་གྱུར་ཏོ། །སྟོན་པས་བཀའ་སྩལ་པ། འཁོར་ལོ་ནི་བཞི་སྟེ། བདེ་བའི་འཁོར་ལོ་དང་། ལོངས་སྤྱོད་ཀྱི་འཁོར་ལོ་དང་། ཆོས་ཀྱི་འཁོར་ལོ་དང་། སྤྲུལ་པའི་འཁོར་ལོའོ། །སྐུ་བཞི་དང་། བདེ་བ་བཞི་དང་། ཚད་མེད་བཞི་དང་། བསྡུ་བའི་དངོས་པོ་བཞི་དང་། འགོག་པ་བཞི་དང་། དེར་བླ་མ་བཞི་དང་། ལྷ་བཞི་དང་། ཡིག་འབྲུ་བཞི་དང་། བདག་མེད་པའི་ཡེ་ཤེས་ཕྲ་མོ། དཀར་པོ་དང་། དམར་པོ་དང་། སྔོན་པོ་དང་། སེར་པོ་དང་། ཟིན་པ་བཞི་དང་། ཡང་དག་པར་བསྔོ་བའོ། །གདམས་ངག་གི་ལེའུ་སྟེ་བཅུ་པའོ།། སྤྱི་བོར་བླ་མ་བསྡུས་ནས་ནི། །ཟག་མེད་བདེ་བས་ལུས་དགང་ངོ་། །སྤྱི་བོར་ཡི་དམ་བསྡུས་ནས་ནི། །ཡེ་ཤེས་བདེ་བས་ལུས་དགང་ངོ་། །སྤྱི་བོར་ཡིག་འབྲུ་བསམས་ནས་ནི། །བྱིན་རླབས་བདེ་བས་ལུས་དགང་ངོ་། །བདེ་བ་བཟུང་བ་དང་པོ་ཡིན། །བདེ་བར་གནས་པ་གཉིས་པ་ཡིན། །བདེ་བ་མི་འཆོར་གསུམ་པ་ཡིན། །དེ་ལ་མ་ཆགས་བཞི་པའོ། །བདེ་
བ་དབབ་པའི་ལེའུ་སྟེ་བཅུ་གཅིག་པའོ།། །།རང་ལུས་ཀྱི་དྲི་མ་འཁྲུད་པ་དང་པོ། བྱིན་རླབས་འཇུག་པ་གཉིས་པ། ངག་གི་དྲི་མ་འཁྲུད་པ་དང་པོ། བྱིན་རླབས་འཇུག་པ་གཉིས་པ། སེམས་ཀྱི་དྲི་མ་འཁྲུད་པ་དང་པོ། བྱིན་རླབས་འཇུག་པ་གཉིས་པ། གསུམ་ཀའི་དྲི་མ་འཁྲུད་པ་དང་པོ། བྱིན་རླབས་འཇུག་པ་གཉིས་པ། སྒོམ་པའི་ལེའུ་སྟེ་བཅུ་གཉིས་པའོ།། །།དེ་ནས་མགོན་པོ་སྤྱན་རས་གཟིགས་དབང་ཕྱུག་གིས། སངས་རྒྱས་པདྨའི་སྣང་བ་ཆེན་པོ་རབ་ཏུ་རྒྱས་པ་ལ། འདི་སྐད་ཅེས་ཞུས་སོ། །འདི་ལྟར་བདག་ལ་ཐེ་ཚོམ་མཆིས། །འདི་ནི་ཁྱོད་ཀྱིས་བསལ་དུ་གསོལ། །དབང་པོ་རབ་ནི་གང་ཞིག་ལགས། །བཅོམ་ལྡན་འདས་ཀྱིས་བདག་ལ་གསུངས། །བཅོམ་ལྡན་འདས་ཀྱིས་བཀའ་སྩལ་པ། །དབང་པོ་རབ་ནི་བཅུ་གཉིས་ཡིན། །དད་པ་གསུམ་དང་ལྡན་པ་དང་། །བླ་མ་ལ་གུས་མཉམ་པར་ལྟ། །ཤེས་རབ་ལྡན་ཞིང་སྙིང་རྗེ་ཆེ། །རྟག་ཏུ་ཆོས་ལ་སྤྱོད་པ་དང་། །གསང་སྔགས་ཐེ་ཚོམ་མེད་པ་དང་། །ཡིད་ཆེས་ཚད་མ་སྐྱེད་པ་དང་། །མང་དུ་བློ་གྲོས་སྦྱངས་པ་དང་། །ངེས་པའི་དོན་ལ་འཇུག་པ་དང་། །འཁོར་བ་སྐྱོན་དུ་ལྟ་བ་
དང་། །ལྷ་ལ་སྤོང་ལེན་མི་བྱེད་པའོ། །ཞེས་བཀའ་སྩལ་པས། འཕགས་པ་སྤྱན་རས་གཟིགས་ཐེ་ཚོམ་ཆོད་དེ། བདག་ཉིད་ཀྱིས་ཡིད་ཆེས་པར་གནས་སོ། །ཞེས་གསུངས་སོ། །དབང་པོ་རྣོ་བའི་ལེའུ་སྟེ་བཅུ་གསུམ་པའོ།། །།དམ་ཚིག་བསྟན་པ་ཁྱེད་རྣམས་ལ། །བདེ་བ་སྣ་ཚོགས་མྱུར་དུ་འོང་། །སྙིང་རྗེ་ཆེན་པོས་སེམས་ཅན་བཟུང་། །དད་པ་དྲག་པོས་བླ་མ་བསྟེན། །དམིགས་པ་གསལ་པོས་ལྷ་དང་ནི། །མི་འབྲལ་མྱུར་དུ་འགྲོགས་པའོ། །མཎྜལ་འབུལ་དང་མཆོད་པ་དང་། །ལུས་ཀྱི་ལས་རྣམས་ཅི་ནུས་བྱ། །ཟབ་མོའི་བཟླས་པ་གྲངས་སུ་བཅད། །ཡོན་ཏན་ཡང་ཡང་དྲན་པར་བྱ། །སྤྱི་བོར་བླ་མ་རབ་ཏུ་བསྒོམ། །རང་ལུས་ལྷ་ཡི་རྣམ་པར་གསལ། །སྟོན་པའི་བཀའ་ལ་རབ་མོས་དང་། །སེམས་ཅན་ཀུན་ལ་མི་འཚེ་དང་། །སེམས་ཅན་མ་དད་སྤོང་བ་དང་། །སྟོང་པ་ཉིད་ལ་སྒྲོས་འདོད་སྤོང་། །རྒྱུ་འབྲས་ཆོས་ལ་ཡང་ཡང་བསམ། །འདི་ནི་སྡིག་པ་བཤགས་པའི་མཆོག །ཅེས་བཀའ་སྩལ་ཏོ། །དམ་ཚིག་གི་ལེའུ་སྟེ་བཅུ་བཞི་པའོ།། །།ཡང་འགྲོ་བའི་མགོན་པོ་སྤྱན་རས་གཟིགས་ཀྱིས། སངས་རྒྱས་པདྨའི་སྣང་བ་རབ་ཏུ་རྒྱས་པ་ཆེན་པོ་ལ་འདི་
སྐད་ཅེས་ཞུས་སོ། །སྟོན་པ་ཆེན་པོ་ཁྱོད་སེམས་ཅན་ཐམས་ཅད་ཀྱི་དོན་དུ་རྒྱུད་འདི་ལྟ་བུ་གསུངས་པ་ངོ་མཚར་ཆེའོ། །ཞེས་པ་དང་། སངས་རྒྱས་པདྨའི་སྣང་བ་རབ་ཏུ་རྒྱས་པ་ཆེན་པོས་སྤྱན་རས་གཟིགས་ལ་བསྟོད་པ་འདི་རྣམས་ཀྱིས་བསྟོད་དོ། །ང་ནི་པདྨའི་རྒྱལ་པོ་སངས་རྒྱས་ཡིན། །སངས་རྒྱས་རིགས་ལྔའི་ནང་ན་ང་མཆོག་ཡིན། །ཁྱོད་ནི་སྐུ་མཆོག་རྣམ་པར་སྣང་མཛད་ཡིན། །པདྨ་བསྣམས་པས་པདྨའི་རིགས་སུ་འཁྲུངས། །ཐལ་མོ་སྦྱར་བས་རྡོ་རྗེའི་རིགས་རྒྱུད་འཛིན། །རྒྱན་གྱིས་སྤྲས་པས་རིན་ཆེན་རིགས་སུ་མཛེས། །ཕྲེང་བ་བསྣམས་པས་ལས་ཀྱི་རིག་པ་འཛིན། །རིགས་ལྔས་ཁྱོད་སྤྲུལ་འགྲོ་དོན་གྱིས་ཤིག་ཅེས། །མཚན་ཙམ་ཐོས་པས་ངན་འགྲོ་ཐམས་ཅད་འདྲེན། །ཡིད་ལ་བསམས་པས་ཐ་མལ་རྟོག་པ་འགག །རྣམ་དག་དྲན་པས་ཆོས་ཀྱི་ཕུང་པོ་འདུས། །ཡང་ཡང་བརྗོད་པས་བདུད་ཀྱི་བར་ཆད་ཞི། །པདྨའི་གདན་ནི་རྡུལ་དང་དྲི་མ་མེད། །ཉི་མའི་གདན་ནི་ཐུགས་རྗེས་ཀུན་ལ་ཁྱབ། །ཟླ་བའི་གདན་ནི་དྲི་མ་ཐམས་ཅད་དག །སྐུ་ཡི་མདོག་ནི་ཤེལ་སྒོང་ཕྱིས་པ་འདྲ། །རིན་ཆེན་རིགས་མི་འདྲ་བས་སྐུ་ལ་རྣམ་པར་སྤྲས། །ཚད་མེད་བཞི་ཡིས་འཁོར་བ་ཡུད་
ཙམ་མི་སྟོང་བར། །འགྲོ་བའི་དོན་ལ་ཡུད་ཙམ་མཉམ་པར་བཞག །པདྨའི་རིགས་སུ་ཁྱེད་ཀྱིས་ཞལ་བཞེས་ནས། །ཁྱོད་འདྲའི་བྱང་ཆུབ་སེམས་དཔའ་གཞན་ན་མེད། །ང་ཡང་ཁྱོད་ལ་ཐལ་མོ་རབ་སྦྱར་ན། །གཞན་རྣམས་ཁྱོད་ལ་གསོལ་བ་ཅིས་མི་འདེབས། །ཞེས་གསུངས་ནས། སྤྱན་རས་གཟིགས་ཀྱི་སྤྱི་བོར་སྐུ་དེ་མི་སྣང་བར་གྱུར་ཏོ། །དེ་ནས་མཁའ་འགྲོའི་ཚོགས་ཀྱིས་སྒྲ་དེ་གསན་པ་དང་། ཨུ་རྒྱུན་ནས་གཙོ་མོ་བྱོན་ནས་ཕྱོགས་བཅུའི་མཁའ་འགྲོ་མ་མ་ལུས་པ་རི་རབ་ཀྱི་རྡུལ་དང་མཉམ་པས། ཕྱག་ཏུ་ཕྲེང་བ་དང་། མེ་ཏོག་དང་། མེ་ལོང་དང་། བདུག་པ་དང་། པདྨའི་རིགས་མི་འདྲ་བ་བདུན་ཅུ་རྩ་བདུན་དང་བཅས་ནས་ནམ་མཁའི་ཕྱོགས་ཐམས་ཅད་བར་མཚམས་མེད་པར་གང་སྟེ། གར་དུ་མ་མཛད་ཅིང་དབྱངས་སུ་འདི་སྐད་བརྗོད་པ། བདུག་པ་མར་མེ་དྲི་ཆབ་དང་། །ཞལ་ཟས་སིལ་སྙན་སྣ་ཚོགས་སྒྲ། །གཟུགས་སྒྲ་དྲི་རོ་རེག་བྱ་དང་། །བདེ་བའི་མཆོད་པ་འདི་རྣམས་ནི། །བདག་ཅག་དད་པས་འབུལ་ལགས་སོ། །བཞེས་ཤིག་བདེ་བ་ཆེན་པོས་བཞེས། །ཞེས་བརྗོད་ནས་རང་རང་གི་གནས་སུ་བདེ་བའི་ལོངས་སྤྱོད་དུ་སྤྱོད་པར་བཞེས་སོ། །བཅོམ་ལྡན་འདས་ཀྱིས་དེ་
སྐད་ཅེས་བཀའ་བསྩལ་ནས། ལྷ་དང་། མི་དང་། ལྷ་མ་ཡིན་དང་། སྲིན་པོ་དང་། གནོད་སྦྱིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། །བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །མགོན་པོ་སྤྱན་རས་གཟིགས་དབང་ཕྱུག་པདྨ་ཟབ་པའི་རྒྱུད་ལས། མཆོད་པའི་ལེའུ་སྟེ་བཅོ་ལྔ་པའོ།། །།རྒྱ་གར་གྱི་མཁན་པོ་ཆོས་ཀྱི་སྙིང་པོ་དང་། བོད་ཀྱི་ལོ་ཙཱ་བ་རིན་ཆེན་བཟང་པོས་མངའ་རིས་སུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །རྫོགས་སོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།