བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔའི་དཀྱིལ་འཁོར་ཆེན་པོའི་བསྐང་བཤགས་ཀྱི་ཆོ་ག་ཉམས་ཆག་སྦྱོང་བྱེད་བདུད་རྩིའི་ཆུ་རྒྱུན།
རྒྱ་གར་སྐད་དུ། ས་མ་ཡ༔ མ་ཧཱ་ཤཱནྟི༔ ཝརྟི་ན་མཿ བོད་སྐད་དུ། དམ་ཚིག་ཉམས་ཆག་བསྐང་བའི་ཆོ་ག་ཞེས་བྱ་བ། བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔའི་དཀྱིལ་འཁོར་ཆེན་པོའི་བསྐང་བཤགས་ཀྱི་ཆོ་ག་ཉམས་ཆག་སྦྱོང་བྱེད་བདུད་རྩིའི་ཆུ་རྒྱུན་ཞེས་བྱ་བ་བཞུགས་སོ། །ཡི་དམ་གང་རུང་གི་བདག་བསྐྱེད་རྒྱས་བསྡུས་ཅི་རིགས་ཚར་ནས་འདི་ཁོ་ན་བཏོན་པས་ཆ་ཚང་བར་འགྱུར་རོ། །ཤུ་བྷཾ།
ན་མོ་ལོ་ཀི་ཤྭ་ར་ཡེ། འཇིག་རྟེན་དབང་ཕྱུག་ཞབས་ལ་ཕྱག་འཚལ་ནས། །རྒྱལ་བ་རྒྱ་མཚོ་ལྷ་ལྔའི་བསྐང་གསོ་བྲི། །རྒྱ་མཚོ་ལྔ་ཡི་ལྷ་ཚོགས་ཐམས་ཅད་ཀྱིས། །དགོངས་པ་ཁྲོལ་ཞིང་བྱིན་རླབས་དངོས་གྲུབ་སྩོལ། །དེ་ལ་དང་པོ་བསྐང་བའི་བྱུང་ཁུངས་ནི། །དགོངས་འདུས་སྐུ་རྒྱུད་ཤེལ་གྱི་རི་བོ་ལས། །ལྷ་མཆོག་ཐུགས་དམ་བསྐང་བ་ནི། །ཕྱི་ལྟར་ཐུན་མོང་རྫས་ཀྱིས་མཆོད། ནང་ལྟར་དབང་པོ་རྣམ་ལྔས་མཆོད། །གསང་བ་རྟོག་ཚོགས་རིགས་པས་མཆོད། །དེ་ཉིད་སྤྲོས་བྲལ་དགོངས་པས་མཆོད། །བདེ་སྟོང་རོ་མཉམ་དབྱིངས་སུ་བསྐང་། །སྣང་སྲིད་གཞིར་བཞེངས་ཆེན་པོའི་ཀློང་། །བླང་དོར་བྲལ་བས་ཐུགས་དམ་བསྐང་། །ཞེས་སོ། །ཉེར་གསུམ་
བསྐང་བའི་ལེའུ་གསུངས། སྒྲུབ་པ་བཀའ་བརྒྱད་ཀྱི་རྩ་རྒྱུད་གསང་བ་འདུས་པ་ལས། སྟོན་པ་ཉིད་ཀྱིས་བཀའ་སྩལ་པ། །རྩ་ལག་དམ་ཚིག་མ་ཉམས་ཉོན། །ལེ་ལོས་དུས་ཉམས་མཆོད་ཆག་དང་། །ལྷ་དང་འཁོན་གཅུགས་སྦྱངས་བ་དང་། །བསོད་ནམས་ཚོགས་ཆེན་བསགས་བྱའི་ཕྱིར། །བསྐང་གསོའི་རིམ་པ་འདི་ལྟ་སྟེ། །ཞེས་སོགས་ལེའུ་ཉེར་བཞི་པ་ཐུགས་དམ་བསྐང་བའི་ལེའུ་རྒྱས་པར་བཀའ་སྩལ་པ་དང་། གཏོར་མའི་ལས་རྒྱུད་ཆེན་པོ་ལས། གཏོར་མ་ནི་བསྐང་བར་ཤེས་པར་བྱའོ། །གཏོར་མ་ནི་བཤགས་པར་ཤེས་པར་བྱའོ། །ཞེས་གསུངས་པ་དང་། འཕགས་པ་སྤུ་གྲི་ཀླད་གཟེར་རྒྱུད་ལས། ཐུགས་དང་འགལ་འཁྲུལ་མཆིས་ན་ཡང་། །བསྐང་དང་བཤགས་པ་འདི་ལྟ་སྟེ། །ཕྱི་རུ་གཡག་དང་ལུག་གིས་བསྐང་། །ནང་དུ་
ཟན་ལུག་དཔལ་བཤོས་དང་། །སྤྱན་གཟིགས་གཏོར་མས་ཐུགས་དམ་བསྐང་། །གསང་བ་དམ་ཚིག་གཉན་པོས་བསྐང་། །དེ་ཁོ་ན་ཉིད་བསྐང་བ་དང་། །དེ་དག་ཐམས་ཅད་བསྐང་བའི་ཕྱིར། །ནག་པོའི་སྐུ་དང་དམ་རྫས་ལ། །ཚིག་འདིས་རབ་ཏུ་བསྐང་བར་བྱ། །ཞེས་སོགས་བསྐང་བའི་ལེའུ་རྒྱས་པར་གསུངས། །ཉམས་ཆག་འགལ་འཁྲུལ་གང་བྱུང་ཡང་། །ཚིག་འདིས་རབ་ཏུ་བསྐང་བར་བྱ། །ཞེས་སོགས་བསྐང་བའི་ལེའུ་རྒྱས་པར་གསུངས། །ཉམས་ཆག་འགལ་འཁྲུལ་གང་བྱུང་ཡང་། །ཚིག་འདིས་དེ་དག་ཐམས་ཅད་བཤགས། །ཞེས་བཤགས་པའི་ལེའུ་རྒྱས་པར་གསུངས། །བྱ་རོག་སྲོག་ཟན་ནག་པོའི་རྒྱུད་ལས་ཀྱང་། །དེ་ནས་ཡང་དག་བཤད་པར་བྱ། །རྣལ་འབྱོར་དམ་ཚིག་ཉམས་པ་ནི། ཁས་བླངས་དམ་བཅས་ཉམས་པ་ན། །དེ་ཚེ་བསྐང་བའི་མདོས་འདི་བྱ། །ཞེས་དང་། མི་ཤ་སྙིང་གིས་མགོན་པོ་བསྐང་། །བསྐང་ཞིང་བསྔོས་ལ་མཆོད་གཏོར་དང་། །མཚེ་དང་ཡུངས་ཀར་ཕུད་ཀྱིས་མཆོད། །བསྐང་ཞིང་བཤགས་པ་དྲག་ཏུ་བྱ། །ཞེས་བསྐང་བ་དང་བསྐང་མདོས་རྒྱས་པར་གསུངས་སོ། །རྩ་འཇིབ་དུག་རླངས་ཁོལ་མའི་རྒྱུད་ལས། །དེ་ནས་ཧེ་རུ་ཀ་དཔལ་གྱིས། །བསྐང་ཐབས་ཡང་དག་བཤད་པར་བྱ། །མདོས་དང་ཚོགས་དང་གཏོར་མ་དང་། །བདུད་རྩི་སྨན་དང་རཀྟས་བསྐང་། །ཞེས་བསྐང་བ་དང་བསྐང་མདོས་ལེའུ་རྒྱས་པར་གསུངས་སོ། །མེ་ལྕེ་འབར་བའི་རྒྱུད་ལས། རྣལ་འབྱོར་དམ་ཚིག་ཉམས་པ་ན། །བསྐང་བ་ནན་ཏན་བཤད་པ་ནི། །གང་གི་དམ་ཚིག་
ཉམས་པ་ན། །མཁའ་འགྲོ་མ་ཡི་ཆད་པ་འོང་། །ཉམས་པ་ཆེ་ན་བསྐང་ཚད་ཆེ། །སྒྲུབ་པ་འགྲུབ་རྟགས་མེད་པ་དང་། །རང་ཉིད་སྲོག་ལ་བབ་པའོ། །ཉམས་པ་འབྲིང་གི་བཀའ་ཆད་ནི། །འཁོར་ལ་རྐྱེན་དང་རིམས་ནད་འབྱུང་། །ཉམས་པ་ཐ་མའི་བཀའ་ཆད་ནི། །དགྲ་ལྡང་ནོར་ལ་གོད་ཁ་འབྱུང་། །དེ་ནས་ཉམས་པ་བསྐང་བ་བསྟན། །ཅེས་སོགས་ལེའུ་བཅུ་གསུམ་པ་སྤོག་ཅིང་། །ཐུགས་དམ་བསྐང་བའི་ལེའུ་རྒྱས་པར་གསུངས་སོ། །སྲིད་པ་མ་མོའི་རྒྱུད་ལྕགས་མཁར་ནག་པོ་ལས། རྡོ་རྗེ་སེམས་དཔས་ཡང་གསོལ་བ། །སེམས་ཅན་དུས་མིན་འཆི་བ་རྣམས། །དེ་ལས་བཟློག་ན་ཇི་ལྟར་ཟློག །བསྐང་བའི་གནས་ལྔ་ཇི་ལྟར་ལགས། །ཡང་དག་དོན་གྱིས་བཀའ་སྩོལ་ཅིག །དེ་སྐད་གསོལ་བ་གསན་ནས་ཀྱང་། །ཡང་དག་རྫོགས་ཀྱིས་བཀའ་སྩལ་པ། །སེམས་ཅན་དུས་མིན་འཆི་བ་དེ། །བསྐང་བའི་གནས་ལྔ་འདི་རྣམས་སོ། །ཞེས་ཞེ་ལྔ་པ་བསྐང་བའི་ལེའུ་རྒྱས་པར་གསུངས་སོ། །མ་ནིང་ལས་རྒྱུད་ལས། བླ་མ་ཡོན་གྱིས་མཉེས་བྱས་ཤིང་། །མགོན་པོ་བསྐངས་བས་མཉེས་པར་བྱ། །ཞེས་དང་། འདོད་ཡོན་ལྔ་ལྡན་མཆོད་པ་དམ་པ་འདིས། །ཆེ་མཆོག་ཧེ་རུ་ཀ་ཡི་ཐུགས་དམ་བསྐང་། །དཔལ་མགོན་མ་ནིང་ནག་པོའི་ཐུགས་དམ་བསྐང་། །སྤྲུལ་པ་ཉི་ཁྲི་ཆིག་སྟོང་ཐུགས་དམ་བསྐང་། །ཞེས་གསུངས་སོ། །དེ་ལྟར་བསྐང་བ་འདི་ནི་གསར་རྙིང་གི་རྒྱུད་སྡེ་ཆེན་པོ་ཚད་ལྡན་དུ་མ་ནས་གསུངས་ལ། བཤགས་པ་ནི་ཐེག་པ་ཆེ་ཆུང་མདོ་སྔགས་ཐམས་ཅད་ནས་རྒྱ་ཆེར་གསུངས་སོ། །
ཁྱད་པར་དུ་བསྐང་བའི་རྒྱུད་སྐུ་མཆོག་རོལ་པ་ཞེས་བྱ་བ། བསྐང་བའི་གེལ་རྒྱུད་གཅིག་ཀྱང་བཞུགས་པར་སྣང་ངོ་། །རྒྱུད་སྡེ་དག་ལ་བསྟེན་པའི་རྒྱ་གཞུང་ནི། །བཀའ་བརྒྱད་མདངས་བསྐང་ཆེན་མོ། དགོངས་འདུས་མདངས་བསྐང་ཆེན་མོ། ཞི་ཁྲོ་ན་རཀ་སྐོང་ཆོག་སོགས། ཨོ་རྒྱན་རིན་པོ་ཆེས་མཛད་པ་མཐའ་ཡས་པ་དང་། གསར་མ་ལུགས་བདེ་མགོན་གྱིས་བསྐང་བ་ཀླུ་སྒྲུབ་དང་། མི་བསྐྱོད་རྡོ་རྗེས་མཛད་པ། སྤྱོད་མཛད་ཆོས་ཀྱི་རྡོ་རྗེས་མཛད་པ་ཧ་སྒྲོག་མ་དང་། །ནག་པོ་སྟོང་བསྐང་སོགས་མང་དུ་བྱུང་ཞིང་། ཁྱད་པར་བླ་མ་རྡོ་རྗེ་གདན་པས་མཛད་པའི་བདེ་མཆོག་རིན་ཆེན་ཕྲེང་བ་དང་། མགོན་པོ་རིན་ཆེན་ཕྲེང་བ་གཉིས་དང་། བོད་གཞུང་། གྲུབ་ཆེན་ཀརྨ་པས་མཛད་པའི་གསར་བསྐང་རྡོ་རྗེ་ཕྲེང་རྫོབ་དང་། རྙིང་བསྐང་བཀྲ་ཤིས་སྒོ་མང་སྟེ། དེ་བཞི་ལ་བསྐང་ཆེན་བཞིར་གྲགས་ཤིང་། པཀིས་མ་མགོན་གྱི་བསང་ཡིག་རྒྱས་པ་དང་། དེ་དག་ལས་རང་བྱུང་བས་བསྡུས་པ་སོགས། བོད་གཞུང་ཚད་ལྡན་མང་དུ་ཡོད་ཅིང་། ཁྱད་པར་ཐུགས་རྗེ་ཆེན་པོའི་བསྐང་བ་ནི། ཐུགས་རྗེ་ཆེན་པོ་གསང་འདུས་སྒྲུབ་ཆེན་ལས། མཚན་ལྟས་ངན་པ་བྱུང་ན་དེ་དག་གི་དམ་སེལ་དང་། མཁའ་འགྲོ་ཆོས་སྐྱོང་ཁོང་ཁྲོས་པ་དང་། བར་ཆད་འབྱུང་བས་བསྐང་བཤགས་ལ་འབད། ཅེས་གསུངས་པ་དང་། དེ་དང་མཚུངས་པ་ཐུགས་རྗེ་ཆེན་པོ་མི་ཏྲ་གསང་སྒྲུབ་ལས། མོ་ཉི་འཚེ་བ་བྱུང་ན་དངོས་གྲུབ་ཉེ་བ་ཡིན་ནོ། །དེ་ཡང་ངུ་བ་དང་བྲང་རྡུང་བ་དང་། ཆས་གོས་ངན་པ་གྱོན་པ་དང་། སྤྲང་མོར་བྱུང་ན་དམ་ཚིག་ཉམས་
ཆག་ཡོད་པས་བཤགས་པ་དང་བསྐང་བ་བརྒྱ་རྩ་བྱའོ། །ཞེས་གསུངས་པ་དང་། རྙིང་བསྐང་བཀྲ་ཤིས་སྒོ་མང་དུ་ཡང་། རྒྱལ་བ་རྒྱ་མཚོ་ལྷ་དགུའི་བསྐང་བ་འབྱུང་ཞིང་། རྒྱལ་བ་རྒྱ་མཚོའི་ལྷ་ཚོགས་དགོངས་སུ་གསོལ། །བསྐང་ངོ་ཐུགས་དམ་གཉན་པོ་བསྐང་། །ཞེས་སོགས་ནས། བཅོམ་ལྡན་འདས་ཐུགས་རྗེ་ཆེན་པོའི་ཐུགས་དམ། ཞེས་པའི་བར་གཙོ་བོའི་བསྐང་བ་དང་། ཧཱུྃ། གཡས་ཕྱོགས་ཐབས་ཀྱི་དཀྱིལ་འཁོར་ནས། །ཁྲོ་བོའི་རྒྱལ་པོ་རྟ་མཆོག་དཔལ། །ཞེས་སོགས་ལྷ་ལྔའི་བསྐང་གསོ། རྗེ་རང་བྱུང་བས་མཛད་པ་རྣམས་ཀྱི་རྗེས་སུ་འབྲངས་བས་སོ། །བསྐང་བའི་ལུང་ཁུངས་བསྟན་པའོ། །དེ་ལྟར་རྒྱུད་རྒྱ་གཞུང་ནས་བྱུང་བའི་བསྐང་གསོ་སྔོན་གྱི་རིག་འཛིན་རྣམས་ཀྱིས་ཇི་ལྟར་ཉམས་སུ་བླངས་བའི་ལོ་རྒྱུས། བསྐང་ཐུང་ནས་རྒྱ་ཆེར་གསུངས་པ་དོན་བསྡུས་ཏེ་བརྗོད་ན། སྔོན་རྒྱ་གར་རྡོ་རྗེ་གདན་དུ་སློབ་དཔོན་འཇམ་དཔལ་བཤེས་གཉེན་གྱིས་སྒྲུབ་པ་མཛད་པའི་ཚེ། མུ་སྟེགས་ལྷ་མོ་མ་ཏི་མ་ཕྱག་རྒྱར་བསྟེན་པས། ལྟ་སྤྱོད་མ་མཐུན་ཏེ། ཡེ་ཤེས་དང་འཇིག་རྟེན་གྱི་ལྷ་སྲུང་གིས་བཀའ་ཆད་བྱུང་བ་ལ། སློབ་དཔོན་བོ་དྷི་སཏྭ་སྤྱན་དྲངས་ཏེ་བསྐངས་བ་བྱས་པས། ཉམས་ཆག་བསྐངས་ནས་བཀའ་ཆད་ཞིའོ། །དེ་ནས་དུར་ཁྲོད་བསིལ་བའི་ཚལ་དུ་སློབ་དཔོན་ཀ་མ་ལ་ཤཱིས་སྒྲུབ་པ་མཛད་པའི་ཚེ། སློབ་མ་དམ་ཉམས་ཤིག་སློབ་མར་བསྟེན་ནས་གསང་སྔགས་ཟབ་མོ་བཤད་པས་ཐུགས་དམ་འཁྲུགས་ཤིང་ཡེ་ཤེས་དང་འཇིག་རྟེན་གྱི་བཀའ་ཆད་དྲག་པོ་བྱུང་ནས། སློབ་
དཔོན་འཇམ་དཔལ་བཤེས་གཉེན་སྤྱན་དྲངས་ཏེ་བསྐང་བ་མཛད་པས་ཉམས་ཆག་བསྐངས་ནས་བར་ཆད་ཞིའོ། །དེ་ནས་རྒྱ་གར་གྲོང་ཁྱེར་ཡངས་པ་ཅན་དུ། སློབ་དཔོན་དྷརྨ་ཀོ་ཤས་སྒྲུབ་པ་མཛད་པའི་ཚེ། སྒྲུབ་པའི་རྫས་མཆོག་རྣམས་ལོག་པར་གོལ་ཏེ་སྲོག་བཅད་ནས་བསྒྲུབས་པ་དང་། གསང་བའི་རྫས་གཞན་ལ་བསྟན་པ་སོགས་ཀྱིས། ཡེ་ཤེས་དང་འཇིག་རྟེན་གྱི་བཀའ་ཆད་དྲག་པོ་བྱུང་བ་ན། སློབ་དཔོན་ཀ་མ་ཤཱི་ལ་སྤྱན་དྲངས་ནས་བསྐང་བ་བྱས་པས་ཉམས་ཆག་བསྐངས་ནས་བཀའ་ཆད་ཞིའོ། །དེ་ནས་རྒྱ་གར་ན་ལེནྡྲར་སློབ་དཔོན་བོ་དྷི་ཤཱཀྱ་དེ་འགྲོ་དོན་ཁོ་ན་ལ་ཡེངས་ནས། ལྷ་བསྒོམ་པ་དང་སྔགས་བཟླ་བ་མ་ཁོམ་པས། ཡེ་ཤེས་དང་འཇིག་རྟེན་གྱི་བཀའ་ཆད་དྲག་པོ་བྱུང་བ་ན། སློབ་དཔོན་དྷམ་ཀོ་ཤ་སྤྱན་དྲངས་ཏེ་བསྐང་བ་བྱས་པས་ཉམས་ཆག་བསྐངས་ནས་བཀའ་ཆད་ཞིའོ། །ཡང་རྒྱ་གར་ཝཱ་རཱ་ཎ་སཱིའི་གྲོང་ཁྱེར་དུ་རྒྱལ་བུ་སྤྲིན་གྱི་ཤུགས་ཅན་གྱིས་སྒྲུབ་པ་མཛད་པའི་ཚེ། ཁོ་རྒྱལ་པོ་དབང་ཆེ་བས་རྒྱལ་པོའི་ཆད་པས་མི་མང་པོ་བསད་པ་དང་། བུད་མེད་མང་པོ་ལ་སྤྱོད་པས་ཡེ་ཤེས་ཀྱི་ལྷས་དབྱིངས་ནས་བསྐྱོན། འཇིག་རྟེན་གྱི་སྲུང་མས་བཀའ་ཆད་དྲག་པོ་ཕབ་པ་ནི། སློབ་དཔོན་དྷརྨ་ཤཱི་ལ་སྤྱན་དྲངས་ནས་བསྐང་བ་བྱས་པས་ཉམས་ཆག་བསྐངས་ནས་བཀའ་ཆད་ཞིའོ། །དེ་ནས་བལ་ཡུལ་ཡེ་རང་དུ་སློབ་དཔོན་ལོཙྪབ་ལྷ་གཙང་བྱ་བས་སྒྲུབ་པ་མཛད་པའི་ཚེ། མུ་སྟེགས་ལོག་ལྟ་ཅན་གྱིས་སྲུང་ཟློག་བྱས་པས། ཡེ་ཤེས་དང་འཇིག་རྟེན་གྱི་བཀའ་ཆད་དྲག་པོ་བྱུང་ནས། སློབ་དཔོན་ག་ཡ་དྷ་ར་སྤྱན་
དྲངས་ཏེ་བསྐངས་བ་བྱས་པས། བཀའ་ཆད་ཞི་ཉམས་ཆག་སོར་ཆུད་དོ། །དེ་དག་ནི་རྒྱ་བལ་གྱི་ཡུལ་དུ་བསྐང་བ་བྱུང་ཚུལ་ཡིན་ལ། བོད་དུ་བསྟན་པ་སྔ་དར་གྱི་དུས་རྒྱལ་པོ་ཁྲི་སྲོང་ལྡེའུ་བཙན་གྱིས་གནུབས་ནམ་མཁའི་སྙིང་པོ་བླ་མར་བཀུར་རྗེས། བདུད་བློན་དབང་ཆེ་བས་ལྷོ་བྲག་མཁར་ཆུར་སྤྲུགས། དེར་ཡེ་ཤེས་དང་འཇིག་རྟེན་གྱི་བཀའ་ཆད་གཡོས་ཏེ། རྒྱལ་པོ་བསྙུངས་ནས་ཅིས་ཀྱང་མ་ཕན་གྲོངས་བ་ལ་ཉེ་བ་ན། ནམ་མཁའི་སྙིང་པོ་ཉིད་སྤྱན་དྲངས་ནས་ནང་གི་སྦྱིན་སྲེག་ལ་བརྟེན་ནས་བསྐང་བའི་ཆོ་ག་མཛད་པས། བཞེས་པ་གཅིག་གསོལ་ཡུན་ལ་སྐུ་གསུང་ཐུགས་ཀྱི་ཉམས་ཆག་བསྐངས་ནས་བསྙུང་གཞི་སོས་སོ། །བསྟན་པ་ཕྱི་དར་ལ་ཡང་གཙང་ལ་སྟོད་ཕུག་ཏུ་སློབ་དཔོན་ཇོ་མོ་ཉི་མ་བྱ་བས་སྒྲུབ་པ་མཛད་པའི་ཚེ། དགོས་པའི་རྫས་མ་འཚོགས་ཏེ་ཡེ་ཤེས་དང་འཇིག་རྟེན་གྱི་བཀའ་ཆད་གཡོས་པ་ན། སློབ་དཔོན་ལོཙྪབ་ལྷ་གཙང་སྤྱན་དྲངས་ནས། བསྐང་བ་མཛད་པས་ཉམས་ཆག་བསྐངས་ནས་བཀའ་ཆད་ཞིའོ། །དེ་ལྟར་ཉམས་ཆག་བསྐང་ཕྱིར་སློབ་དཔོན་གཞན་སྤྱན་དྲངས་ནས་བསྐངས་བ་བྱས་པས། དེ་ནི་ཉམས་ཆག་བསྐང་བའི་སློབ་དཔོན་ཞེས་བྱ་སྟེ། བླ་མའི་གྲྭར་བསྒྲངས་དགོས་པ་ཡང་ཤེས་པར་བྱའོ། །ལུང་ཁུངས་དང་ལོ་རྒྱུས་ཀྱི་ལེའུ་དང་པོའོ།། །།དེ་ནས་བསྐང་བའི་སྟ་གོན་བཤད། བསྐང་བའི་གནས་ནི་བསྐང་ལུང་ལས། དབེན་ཞིང་ཡིད་འོང་གནས་དག་ཏུ། །ཞེས་གསུངས་སོ། །བསྐང་བའི་དུས་ནི་བསྐང་ལུང་ལས། །བསྙེན་སྒྲུབ་ལས་སྦྱོར་དུས་དག་
འདི། །དུས་བཟང་ཚོགས་དང་གཏོར་མའི་དུས། །ཕྲིན་ལས་རྣམ་བཞི་བཅོལ་བ་སོགས། །ཉམས་ཆག་བཤགས་པའི་དུས་སུ་བསྐང་། །ཞེས་དང་། བྱ་རོག་སྲོག་ཟན་ནག་པོའི་རྒྱུད་ལས། ཟླ་བ་ངོ་རེ་མཆོད་པ་བྱ། །བསྐང་གསོ་བསྟོད་པ་དང་བཅས་པས། །ནག་པོ་ཆེན་པོ་དུས་དུས་མཆོད། །ཅེས་དང་། གཞི་སྙིང་སྲོག་གཟེར་སྦས་པའི་རྒྱུད་ལས། བསྐང་དང་བཤགས་པ་ལོ་དུས་བཟུང་། །ཞེས་གསུངས་པས་ལོ་དུས་བསྐང་བ་ཆེན་མོ། ཟླ་དུས་འབྲིང་པོ་དང་། ཉ་སྟོང་དུས་བཟང་གི་བསྐང་གསོ་དང་། ཕྲིན་ལས་བསྒྲུབ་ཕྱིར་དང་། ཉམས་པ་ཚོར་བ་བྱུང་ན་བཤགས་བསྐང་དང་། མ་ཚོར་བ་བྱུང་དོགས་པས་རྒྱུན་དུ་ཉུང་ངུ་ནར་མར་བྱའོ། །དེ་ནས་བསྐང་བའི་རྟེན་བཀྲམ་པ་ནི། རྒྱུད་གསང་བ་འདུས་པ་ལས། བསྐང་གསོའི་རིམ་པ་འདི་ལྟ་སྟེ། །དཀྱིལ་འཁོར་གཞུང་བཞིན་བཞེངས་པའི་རྩར། །ལྷ་བཀྲམ་རྟེན་གྱི་ཚོགས་རྣམས་བཤམས། །འབྱོར་ལྡན་ལོངས་སྤྱོད་མཆོད་གཏོར་བཤམས། །སྐལ་ལྡན་མི་ཡི་ཚོགས་ཀྱང་བཤམས། །ཞེས་དང་། བསྐང་ལུང་ལས། རྩ་བ་གསུམ་གྱི་དཀྱིལ་འཁོར་བཞེངས། །སྐུ་གསུང་ཐུགས་ཀྱི་རྟེན་བཀྲམ་སྟེ། །ཕྱི་ནང་གསང་མཆོད་རྒྱས་པར་བཤམས། །ཞེས་གསུངས་པ་ལྟར་བྱའོ། །དེ་ནས་བསྐང་བའི་རྫས་ནི། བསྐང་ཡིག་གཞུང་རྣམས་ནས་གསུངས་པ་ལྟར་དངོས་སུ་ཅི་འབྱོར་རབ། འབྲིང་བྲིས་པའི་ཐང་སྐུ། ཐ་མ་ཟན་ལ་འབུར་དུ་བཏོད་པ་དང་། དེ་ཡང་མེད་ན་ཡིད་ཀྱིས་སྤྲུལ་ལོ། །སྤུ་གྲི་ཀླད་གཟེར་རྒྱུད་ཀྱི་བསྐང་བའི་ཚིག་ལས།
ཁྱོད་དང་མཐུན་པའི་དམ་ཚིག་ནི། །གཡག་ལུག་ནག་པོ་མར་གྱིས་བྱུག །དར་ནག་རུ་མཚོན་རྭ་ལ་བརྒྱན། །ཕྲག་པར་དགྲ་བགེགས་ལིངྒ་བཀལ། །ཞེས་སོགས་དང་མེ་ལྕེ་འབར་བ་ལས། །དང་པོ་མཁའ་ལྡིང་གསུམ་གྱིས་བསྐང་། །དེ་ནས་ཤེལ་ནག་གསུམ་གྱིས་བསྐང་། །ཞེས་སོགས་རྒྱ་ཆེར་གསུངས་སོ། །དེ་ནས་བསྐང་གཏོར་བཅའ་བ་ནི། མགོན་པོ་སྤྱི་རྒྱུད་ཁྲག་མཚོ་ཁོལ་ཆེན་ལས། དེ་ནས་མགོན་པོ་འཁོར་བཅས་ཀྱི། །ཐུགས་དམ་བསྐང་བའི་མཆོད་སྦྱིན་ཏེ། །དེ་ཉིད་གཏོར་མ་ཆེན་པོ་དང་། །མཆོད་སྦྱིན་གྱིས་ནི་མཉེས་པར་བྱ། །འདིར་ནི་ས་དང་འབྲུ་ནག་ལས། །རི་རབ་བང་རིམ་གསུམ་པའམ། །བཞི་པ་དེ་ཉིད་ནག་པོ་བྱ། །དེ་ལ་བྱ་ཡི་རིམ་པ་ནི། །སྟེང་དུ་ལྡིང་བ་ཁྱུང་ནག་སྟེ། །ཏོག་དང་བཅས་པ་ཞལ་དུ་གྲུབ། །གདུགས་དང་བ་དན་རྒྱལ་མཚན་དང་། །སྣ་ཚོགས་གཅན་གཟན་རི་དྭགས་ཚོགས། །སྲོག་ཆགས་ངར་མི་དེད་དཔོན་ལ། །ལྷ་བཤོས་མར་མེ་ཐོགས་པ་བྱ། །རུས་སྦལ་དང་ནི་གླང་པོ་དང་། །འབྲུག་ལངས་སྟེང་འགྲོ་ཐམས་ཅད་ཀྱང་། །བཞི་བཞི་དག་ཏུ་བྱ་བའོ། །ཡང་ན་བཅུ་གསུམ་དག་ཡིན་ཏེ། །དེ་ཉིད་སྔར་དང་འདྲ་བར་བྱ། །ཞེས་བསྐང་བ་དང་བསྐང་མདོས་གསལ་བར་གསུངས་པ་ལྟར། སྣོད་གཙང་འབྲུས་བཀང་བའི་སྟེང་དུ་རི་རབ་བང་རིམ་བཞི་བྱ། སྟེང་དུ་ཉམས་ཆག་བསྐང་བ་དང་བར་ཆད་ཞི་ཕྱིར་ཡིན་ན་གཏོར་མ་ཟླུམ་པོ། རྒྱས་པའི་ལས་བཅོལ་ན་ཟུར་བཞི། དབང་གི་ལས་བཅོལ་ན་ཟུར་གཉིས། དྲག་པོའི་ལས་བཅོལ་ན་ཟུར་
གསུམ་བཞག་ཅིང་། ཞི་བ་ལ་མེ་ཏོག །རྒྱས་པ་ལ་རིན་པོ་ཆེ། དབང་ལ་ཉི་ཟླ་ནོར་བུ། དྲག་པོ་ལ་མེ་རིའི་གཟུགས་ཀྱི་མར་རྒྱན་བཏགས། རྩེ་ལ་ནོར་བུ་དང་གདུགས་སོགས་བཀྲ་ཤིས་རྟགས་བརྒྱད། དེ་འོག་རྒྱལ་སྲིད་སྣ་བདུན། དེ་འོག་རྒྱན་སྣ་ཚོགས་ཕྱག་མཚན་སྣ་ཚོགས། དེ་འོག་བྱ་རིགས། དེ་འོག་གཅན་གཟན་རི་དྭགས། དེ་འོག་ཆུ་གནས་སོ། །བྱ་ནག་རྟ་ནག་གཡག་ནག་སོགས་བཞི་བཞིའམ་བཅུ་གསུམ་རེ། མར་ཐུད་ཀྱི་རིལ་བུ་དང་ཤ་རྒྱན་བཙུགས་སོ། །དེ་ཡང་རྒྱུན་དུ་ནར་མར་བསྐང་བ་བྱེད་དམ། ཉམས་ཆག་བསྐང་བ་དང་ཞི་བའི་ལས་བསྒྲུབ་ན། གཟུགས་རྣམས་ཁ་ནང་དུ་བསྟན་ནོ། །རྒྱས་པའི་ལས་སྒྲུབ་ན་ཁ་ཕྱོགས་བཞིར་བསྟན། བར་ཆད་བཟློག་པ་ལ་ཁ་ཕྱོགས་ཐམས་ཅད་དུ་བསྟན་ཏེ་དམག་ཐབས་ཞེས་བྱའོ། །ཇག་ཐབས་ནི་ཁ་ཕྱོགས་གཅིག་ཏུ་བསྟན་ཏེ། དེ་ཡང་དབང་གི་ལས་ལ་ཁ་རང་ལ་བསྟན་ནོ། །དྲག་པོའི་ལས་ལ། བསྒྲུབ་བྱའི་ཕྱོགས་སུ་བསྟན་ནོ། ༈ །གཞན་ཡང་སྤྱི་ལྟར་མཆོད་གཏོར་དང་ཚོགས་བཤམ་མོ། །བསྐང་འབྲས་བཙུགས་པ་འདི་རྙིང་མ་སྤྱི་དང་ཟུར་མང་ལུགས་ལ་ཡོད་ཅིང་། རི་རབ་སོགས་རྒྱུད་དང་མཐུན། ལྷ་སོ་སོའི་གཏོར་མ་ལ་སོ་སོའི་མཐུན་རྫས་བསྐང་འབྲས་བཙུགས་པ་མཁར་དྲུང་པའི་ཕྱག་ལེན་ལ་ཡོད་དེ། ལྷ་སོ་སོའི་བསྐང་བ་སོ་སོར་འདོན་ཅིང་གཏོར་མ་གཞན་ལ་འཁྱར་རུང་དང་མི་རུང་ཕྱེ་བ་དགོངས་པ་འདྲའོ། །སྒར་ཆེན་ན་བསྐང་འབྲས་མི་བཙུགས་པ་ནི། གདན་ས་སོ་སོ་དང་འཕྲལ་དེ་ཡང་སྤྱན་གཟིགས་དངོས་སུ་དཔག་མེད་
ཡོད་པས་གཟུགས་བརྙན་བྱ་མི་དགོས་པ་ཡིན་གྱིས། རང་རེས་དེའི་སྤྱན་ལྟོས་མི་གཏུབ་པར་སེམས་སོ། །སྟ་གོན་གྱི་ལེའུ་སྟེ་གཉིས་པའོ།། ༈ །།དེ་ནས་བསྐང་བའི་ཆོ་ག་ལ། རྒྱུད་གསང་བ་འདུས་པ་ལས། །ཕྲིན་ལས་གཞུང་བསྲང་ཚོགས་འཁོར་རྗེས། །དང་པོ་ལྷ་ལ་དགོངས་པ་བྱ། །དེ་འོག་མཆོད་རྫས་རང་རྟགས་བརྗོད། །བླ་མ་ལྷ་ཚོགས་མཚན་བརྗོད་དེ། །མདངས་བསྐང་ཆོ་ག་རྒྱས་པར་བྱ། །ཞེས་དང་། སོ་སོའི་ཕྲིན་ལས་གཞུང་བསྲངས་ལ། ཞེས་གསུངས་པས། འདིར་རྒྱལ་བ་རྒྱ་མཚོའམ་ཡི་དམ་གཙོ་བོ་གང་ཡིན་བདག་མདུན་བྱས། ཚོགས་ཕུད་ཕུལ་ནས། བར་པས་བཤགས་པ་དང་བསྐང་བ་གསོས་ནས་འདོན་པ་རྙིང་མའི་ལུགས། ཚོགས་ཕུད་ཕུལ་ནས་གཏོར་བསྔོས་ཐམས་ཅད་དང་། ཆོས་སྐྱོང་རྣམས་ཀྱི་ལས་བྱང་འདོན། དེ་ནས་གསོལ་ཁ། དེ་ནས་བསྐང་བ་འདོན་པ་གསར་མའི་ལུགས་ཏེ་གང་རུང་བྱའོ། །དེ་ཡང་བསྐང་བ་བྱིན་གྱིས་བརླབས་པ་ནི། བཀའ་བརྒྱད་རྩ་རྒྱུད་གསང་འདུས་ལས། ནང་དུ་ཏིང་ངེ་འཛིན་གྱིས་བསྐང་། །རང་ཉིད་ཐུགས་ཀའི་ཧཱུྃ་འཕྲོས་ཏེ། །སྣོད་ཀྱི་འཇིག་རྟེན་གཞོང་པ་རུ། །བཅུད་ཀྱི་སེམས་ཅན་འདོད་ཡོན་སྤུངས། །རེག་པ་ལྷ་མོའི་ཚོགས་འཕྲོས་བསྐང་། །གཟུགས་སྤྱན་སྒྲ་སྙན་དྲི་ཤངས་དང་། །རོ་མཆོག་ལྗགས་ལ་རེག་བྱ་ལུས། །སྣང་སྲིད་བཅུད་ཀྱིས་ཐུགས་དམ་བསྐང་། །འདོད་ཡོན་དབང་པོ་ལྔར་ཐིམ་ནས། །ལྷ་མཉེས་ཕྲིན་ལས་འགྲུབ་པར་བསམ། །དེ་ནས་ལྷ་མཉེས་དངོས་གྲུབ་སྟེར། །ཞེས་
གསུངས་པའི་དོན་ནོ། །ཨོཾ་ཧཱིཔདྨན་ཀྲྀཏ་སོགས་ཀྱིས་བགེགས་དང་མ་དག་པར་བསང་། ཨོཾ་སྭ་བྷ་ཝས་དངོས་འཛིན་གྱི་དྲི་མ་སྦྱངས། སྟོང་པའི་ངང་ལས་འབྱུང་བ་རིམ་བརྩེགས་རི་རབ་གླིང་བཞི་ལྕགས་རི་མུ་ཁྱུད་དང་བཅས་པ་རི་རབ་ཀྱི་སྟེང་དུ་རླུང་མེ་ཐོད་སྐྱེད། དེའི་སྟེང་དུ་ཀ་པཱ་ལ་རྒྱ་ཁྱོན་དཔག་ཏུ་མེད་པའི་ནང་དུ། ཤ་ལྔ་བདུད་རྩི་ལྔ་ཞུ་བའི་ཡེ་ཤེས་ཀྱི་བདུད་རྩིའི་རྒྱ་མཚོ་ཆེན་པོ། ལྦུ་བ་ལ་གཟུགས་མཛེས་པ་སྣ་ཚོགས་འཕྱུར་བ། རྦ་རླབས་ལ་སྒྲ་སྙན་པ་སྣ་ཚོགས་གྲགས་པ། ངད་པ་ལ་དྲི་ཞིམ་པ་སྣ་ཚོགས་ཀྱི་ངད་ལྡང་བ། ལྗགས་ལ་བདའ་བའི་རོ་བརྒྱ་དང་ལྡན་པ། ལུས་ལ་རེག་བྱ་འཇམ་ཞིང་གསོལ་བས་ཟག་མེད་ཀྱི་བདེ་བ་བསྐྱེད་པ། དེའི་ཕུད་རླངས་ལ་འདོད་ཡོན་གྱི་ལྷ་མོ་ནམ་མཁའ་གང་བ་རྒྱུན་མི་འཆད་པར་འཕྲོ་ཞིང་། སོ་སོ་རང་རང་གི་མཆོད་རྫས་དུ་མ་ཐོགས་པ། ལྷ་སོ་སོའི་དབང་པོ་དྲུག་ལ་མཆོད་ཅིང་ཐིམ་པས། མཉེས་ཤིང་ཐུགས་དམ་གྱི་རྒྱུད་བསྐང་བར་བྱེད་པ། བཀྲ་ཤིས་པའི་ལྷ་མོ་བརྒྱད་དང་། མཆོད་པའི་ལྷ་མོ་བཅུ་དྲུག་གིས་རང་རང་གི་མཆོད་རྫ་ས་ཐོགས་ནས། བདེ་བ་ཆེན་པོས་ལྷ་རྣམས་སོ་སོའི་ཐུགས་མཉེས་པར་བྱེད་པ། རྒྱལ་སྲིད་སྣ་
བདུན་དང་། ངོ་མཚར་བའི་མཆོད་པ་བཅོ་བརྒྱད་དང་། ཉེ་བར་སྤྱོད་པའི་མཆོད་པ་བདུན་ལ་སོགས་པ། ལྷ་དང་མི་ཡི་ལོངས་སྤྱོད་སྤྲིན་ལྟར་གཏིབ་ཅིང་ཆར་ལྟར་འབེབས་པ། ལྷ་སོ་སོའི་བསྟེན་རྫས་དང་། སྒྲུབ་རྫས་དང་། མཆོད་རྫ་ས་དང་། བསྐང་རྫ་ས་ཐམས་ཅད་མ་ཚང་བ་མེད་ཅིང་ཕུན་སུམ་ཚོགས་པ། བྱ་གཅན་རི་དྭགས་ཆུ་གནས་ཐམས་ཅད་ཀྱང་ཆེ་བ་ཚོ་བ་སྟོབས་དང་ལྡན་པ། ཕུང་པོ་ཁམས་དང་སྐྱེ་མཆེད་ཡོངས་སུ་རྫོགས་པ། རེ་རེ་ལའང་གྲངས་མེད་པ་འཕྲོ་ཞིང་འབྱུང་བ། དེ་ལྟ་བུའི་གླིང་བཞི་གླིང་ཕྲན་རི་རབ་དང་བཅས་པ་ལྷ་དང་སྲུང་མ་ཐམས་ཅད་ལ་རེ་རེའི་སྤྱན་སྔར་ཡོངས་སུ་རྫོགས་པ་རེ་རེ་འབྱུང་ཞིང་གྲངས་མེད་པ་འཕྲོ་བས་ནམ་མཁའི་མཐར་ཁྱབ་ཅིང་། འཁོར་བ་མ་སྟོང་གི་བར་དུ་རྒྱུན་མི་འཆད་པར་འབྱུང་བའི་རང་བཞིན་ཅན་དུ་གྱུར། ཨོཾ་སརྦ་དྷརྨ་པཱུ་ཙ་པཉྩ་རཏྣ་ཀཱ་ཡ་ཀོ་ཏི་བྷེ་བྷ་ཝཱཀ་སྭ་བྷ་ཝ་ཤུདྡྷོཉཧཾ། བསམ་གྱིས་མི་ཁྱབ་པར་སྤེལ་བའི་སྔགས་སོ། །ཨོཾ་སརྦ་དྷརྨཱ་ཨ་བཱི་བད་ཏ་ཧི་ཀོ་ཧ་ཡ་ནཱ་གྷ་མི་སྭ་བྷ་ཝ་ཤུདྡྷོཉཧཾ། དཔག་ཏུ་མེད་པར་བྱིན་གྱིས་བརླབས་པའི་སྔགས་སོ། །ཨོཾ་སརྦ་དུཏྟཾ་གྲིབྷ་གྲཧྨཱ་གརྫ་ཧཱུྃ་ཕཊ༔ དེ་དག་ངག་གི་ནུས་པ་བསམ་གྱིས་མི་ཁྱབ་
པའི་སྔགས་སོ། །བསྐང་རྫས་བྱིན་རླབས་སྔགས་འདི་གསུམ་ཕྲིན་ལས་རྒྱ་མཚོའི་རྒྱུད་ལས་གསུངས་སོ། །དེ་ནས་བསྐང་གཞུང་གང་རུང་འདོན་ནོ། ༈ །དེ་ནས་བསྐང་བའི་གནས་ལྷ་སྤྱན་འདྲེན་པ་ནི། ཧཱུྃ། འོག་མིན་མཁའ་སྤྱོད་དག་པའི་ཞིང་ཁམས་ནས། །རྩ་བརྒྱུད་བླ་མ་གྲུབ་ཐོབ་རྒྱ་མཚོའི་ཚོགས། །ཁྱེད་ཀྱི་རྗེས་སུ་རྣལ་འབྱོར་བདག་བསྒྲུབ་ཀྱིས། །ཐུགས་རྗེས་བྱིན་གྱིས་བརླབ་ཕྱིར་གཤེགས་སུ་གསོལ། །ཆོས་དབྱིངས་རབ་འབྱམས་སྐུ་གསུམ་ཞིང་ཁམས་ནས། །ཐུགས་རྗེ་ཆེན་པོ་བདེ་གཤེགས་རྒྱ་མཚོའི་ཚོགས། གཤེགས་དང་བཞུགས་པའི་མཚན་མ་མི་མངའ་ཡང་། །ཆུ་ཟླ་བཞིན་དུ་གནས་འདིར་སྣང་བར་མཛོད། །རང་བཞིན་ལྷུན་གྲུབ་དྲག་པོའི་གཞལ་ཡས་ནས། །རྟ་མཆོག་ལ་སོགས་ཁྲོ་རྒྱལ་རྒྱ་མཚོའི་ཚོགས། །ཐུགས་རྗེའི་ངང་ནས་དྲག་པོའི་སྐུར་བཞེངས་ལ། །ས་ཆེན་རི་བཅས་གཡོ་ཞིང་གནས་འདིར་བྱོན། །ཨོ་རྒྱན་ལ་སོགས་ཡུལ་ཆེན་ཉེར་བཞི་ནས། །ཡེ་ཤེས་ཌཱཀི་དཔའ་མོ་རྒྱ་མཚོའི་ཚོགས། །མས་གདུང་བུ་ལ་བརྩེ་བ་ཇི་བཞིན་དུ། །བརྡ་སྐད་རོལ་མོའི་སྒྲ་དང་བཅས་ཏེ་བྱོན། །དུར་ཁྲོད་བརྒྱད་དང་འོག་མིན་དུར་ཁྲོད་ནས། །མ་མགོན་ལྕམ་དྲལ་དམ་ཅན་
རྒྱ་མཚོའི་ཚོགས། །སྔོན་གྱི་ཞལ་བཞེས་དམ་ཚིག་དྲན་མཛོད་ལ། །སྒྲུབ་མཆོག་རྣལ་འབྱོར་སྐྱོང་ཕྱིར་མྱུར་དུ་བྱོན། །ལྕང་ལོ་ཅན་སོགས་རང་རང་གནས་རྣམས་ནས། །ནོར་ལྷ་གཏེར་བདག་ཕྱི་རྒྱུད་སྲུང་མའི་ཚོགས། །དཀར་པོའི་ཕྱོགས་ལ་དགའ་བ་མ་ལུས་པ། །འཇིག་རྟེན་བདེ་ལེགས་བསྒྲུབ་ཕྱིར་གཤེགས་སུ་གསོལ། །སྟེང་ཕྱོགས་རིན་ཆེན་དར་ཆེན་གདན་ཁྲི་ལ། །བླ་མ་རིག་འཛིན་ལྷ་ཚོགས་བཞུགས་སུ་གསོལ། །དབུས་ཕྱོགས་སྐྱོན་གྱིས་མ་གོས་པད་ཟླའི་སྟེང་། །རྒྱལ་བ་རྒྱ་མཚོའི་ལྷ་ཚོགས་བཞུགས་སུ་གསོལ། །གཡས་ཕྱོགས་བདུད་བཞི་དྲེགས་པ་བསྣོལ་བའི་སྟེང་། །དཔའ་བོ་ཁྲོ་རྒྱལ་རྒྱ་མཚོ་བཞུགས་སུ་གསོལ། །གཡོན་ཕྱོགས་པད་ཉི་དབུགས་བྲལ་བསྣོལ་བའི་སྟེང་། །མཁའ་འགྲོ་དཔའ་མོ་རྒྱ་མཚོ་བཞུགས་སུ་གསོལ། །འོག་ཕྱོགས་དགྲ་བགེགས་བསྒྲལ་བའི་བམ་བརྩེགས་ལ། །ཆོས་སྐྱོང་དམ་ཅན་ཚོགས་རྣམས་དགྱེས་པར་བཞུགས། །རིན་ཆེན་ཁྲི་སོགས་འོས་ཤིང་འཚམས་པའི་སྟེང་། །ནོར་ལྷ་ཕྱི་རྒྱུད་སྲུང་མ་བཞུགས་སུ་གསོལ། །སརྦ་གུ་རུ་དྷེ་ཝ་ཀྲོ་དྷ་ཏྟཀི་དྷརྨ་པཱ་ལ་བཱ་སུ་དྷེ་ཝ་ལོ་ཀ་པཱ་ལ་ས་པ་རི་ཝཱ་ར་བཛྲ་ས་མཱ་ཛ༔
ཛཿཧཱུྃ་བཾ་ཧོ༔ ཏིཥྛ་ལྷན། ཨགྷཾ་སོགས། རཱུ་པ། ཤརྡ། གནྡྷེ། རཱ་ས། སྤངྒེ། དྷརྨ་དྷཱ་ཏུ་ཨཱཧཱུྃ། པཉྩ་རཀྟ་བྷ་ལིཾ་ཏ་ཁཱ་ཧི། སྲོག་ཟན་ནག་པོའི་རྒྱུད་ལས། བསྐང་བ་དང་བསྐང་མདོས་སྐབས་སུ། །སྤྱན་འདྲེན་བཞུགས་གསོལ་མཆོད་པ་འབུལ། མཆོད་པ་རྣམ་ལྔས་ལྷ་སྲུང་མཆོད། །ཅེས་གསུངས་པའི་དོན་ཡིན་ནོ།། དྷཱི༔ རྒྱལ་བ་རྒྱ་མཚོའི་ལྷ་ཚོགས་ཐམས་ཅད་ལ། །དམ་ཚིག་ཉམས་ཆག་བསྐང་ཕྱིར་ཕྱག་འཚལ་ལོ། །བདག་ལུས་ཞིང་གི་རྡུལ་སྙེད་སྤྲུལ་བྱས་ཏེ། །ཆོས་གོས་ཐང་ཤམ་ལྡན་པས་ཕྱི་ཕྱག་འཚལ། །ཕོད་ཁ་སྔགས་ཆས་ལྡན་པས་ནང་ཕྱག་འཚལ། །རྒྱན་དྲུག་སྟག་ཤམ་ལྡན་པས་གསང་ཕྱག་འཚལ། །གཅེར་བུ་འཕར་ཞིང་བརྡབས་པས་བརྐྱང་ཕྱག་འཚལ། །གང་འདུལ་འགྲོ་བའི་དོན་དུ་སྤྲུལ་པའི་སྐུ། །རིག་འཛིན་བླ་མ་རྣམས་ལ་ཕྱག་འཚལ་ལོ། །ཕྱོགས་བཅུ་དུས་གསུམ་བཞུགས་པའི་བཅོམ་ལྡན་འདས། །རྒྱལ་བ་རྒྱ་མཚོའི་ཚོགས་ལ་ཕྱག་འཚལ་ལོ། །གསང་སྔགས་ཕྱི་ནང་དྲག་སྔགས་ཀུན་གྱི་བདག །ཁྲོ་རྒྱལ་རྒྱ་མཚོའི་ཚོགས་ལ་ཕྱག་འཚལ་ལོ། །ཐེག་པ་དགུ་དང་རྒྱུད་སྡེ་བཞི་ཡི་ལྷ། །ཡི་དམ་དཔའ་བོའི་ཚོགས་ལ་ཕྱག་འཚལ་ལོ། །རྩྭ་དང་ཞིང་དང་
གནས་ཡུལ་ཀུན་གྱི་བདག །དཔའ་མོ་རྒྱ་མཚོའི་ཚོགས་ལ་ཕྱག་འཚལ་ལོ། །ཡེ་ཤེས་ལས་དང་འཇིག་རྟེན་སྲུང་མའི་ཚོགས། །དམ་ཅན་རྒྱ་མཚོའི་ཚོགས་ལ་ཕྱག་འཚལ་ལོ། །ཞེས་པ་ན་རཀ་དོང་སྤྲུགས་རྒྱུད་དང་དྲི་མེད་བཤགས་རྒྱུད་ནས། ཉམས་ཆག་བསྐང་བའི་མཆོག་ཕྱག་རབ་རྒྱ་ཆེར་གསུངས་པའི་དོན་བསྡུས་པའོ། །སྤྲོ་ན་སྐབས་འདིར་གསོལ་ཁ་མངའ་གསོལ་བྱ་སྟེ། སྐར་སྐྱོན་ཆེ་དུས་བསྒྱུར་ཀྱང་རུང་། ཧཱུྃ། དངོས་འབྱོར་ཡིད་སྤྲུལ་མཆོད་པ་དཔག་མེད་ཀྱིས། །པདྨ་ཐོད་ཕྲེང་གྲུབ་ཐོབ་རྒྱ་མཚོའི་ཚོགས། །གསོལ་ལོ་མཆོད་དོ་ཐུགས་རྗེའི་བྱིན་རླབས་བསྐུལ། །བདག་དང་སློབ་མ་བརྒྱུད་པར་བཅས་པ་ཡི། །སུམ་ལྡན་རྩ་བའི་བླ་མར་མངའ་གསོལ་ལོ། །ཕྱག་རྒྱ་ཆེན་པོའི་དངོས་གྲུབ་བསྩལ་དུ་གསོལ། །ཕྱི་ནང་གསང་བའི་མཆོད་པ་དཔག་མེད་ཀྱིས། །འཇིག་རྟེན་དབང་ཕྱུག་རྒྱལ་བ་རྒྱ་མཚོའི་ཚོགས། །གསོལ་ལོ་མཆོད་དོ་ཐུགས་བསྐྱེད་སྨོན་ལམ་བསྐུལ། །བདག་དང་མཁའ་མཉམ་འགྲོ་བ་ཐམས་ཅད་ཀྱིས། །བསླུ་མེད་གཏན་གྱི་སྐྱབས་སུ་མངའ་གསོལ་ལོ། །འཇིགས་རུང་འཁོར་བའི་འཇིགས་ལས་བསྐྱབ་ཏུ་གསོལ། །སྨན་རཀ་གཏོར་མའི་མཆོད་པ་དཔག་མེད་ཀྱིས། །
དཔལ་ཆེན་རྟ་མཆོག་ཁྲོ་རྒྱལ་རྒྱ་མཚོའི་ཚོགས། །གསོལ་ལོ་མཆོད་དོ་མཐུ་སྟོབས་ནུས་པ་བསྐུལ། །བདག་ཅག་དཔོན་སློབ་ཡོན་མཆོད་འཁོར་བཅས་ལ། །སྲུང་ཞིང་སྐྱོབ་པའི་དཔུང་དུ་མངའ་གསོལ་ལོ། །སྒོ་གསུམ་རྡོ་རྗེ་གསུམ་དུ་བྱིན་གྱིས་རློབས། །ཤ་ལྔ་བདུད་རྩི་ལྔ་ཡི་མཆོད་ཚོགས་ཀྱིས། །གསང་བ་ཡེ་ཤེས་ཌཱཀི་རྒྱ་མཚོའི་ཚོགས། །གསོལ་ལོ་མཆོད་དོ་བདེ་ཆེན་ཡེ་ཤེས་སྤོར། །བདག་དང་བདག་གི་རྗེས་སུ་འཇུག་རྣམས་ཀྱི། །བྱང་ཆུབ་སྒྲུབ་པའི་གྲོགས་སུ་མངའ་གསོལ་ལོ། །སྒྲུབ་པའི་བར་ཆད་སོལ་ལ་ཉམས་རྟོགས་སྤོར་། །དགྲ་བགེགས་བསྒྲལ་བའི་ཤ་ཁྲག་གཏོར་ཆེན་གྱིས། །མ་མགོན་ལྕམ་དྲལ་དམ་ཅན་རྒྱ་མཚོའི་ཚོགས། །གསོལ་ལོ་མཆོད་དོ་ཁས་བླངས་དམ་ཚིག་བསྐུལ། །བདག་དང་བདག་གི་བརྒྱུད་པ་འཛིན་རྣམས་ཀྱི། །ལས་བྱེད་བཀའ་ཡི་ཕོ་ཉར་མངའ་གསོལ་ལོ། །ཕྲིན་ལས་རྣམ་བཞི་ཐོགས་མེད་འགྲུབ་པར་མཛོད། །དཀར་དམར་ཕུད་ཀྱིས་བརྒྱན་པའི་གཏོར་མ་ཡིས། །རྣམ་སྲས་ཛམ་ལྷ་གཏེར་བདག་རྒྱ་མཚོའི་ཚོགས། །གསོལ་ལོ་མཆོད་དོ་རྨ་གཡང་དངོས་གྲུབ་སྩོལ། །བདག་ཅག་དཔོན་སློབ་འཁོར་དང་བཅས་པ་ཡི། །
སྦྱིན་བདག་དཀོར་གྱི་བདག་པོར་མངའ་གསོལ་ལོ། །འཛད་མེད་གཏེར་གྱི་དངོས་གྲུབ་བསྩལ་དུ་གསོལ། །དཀར་གྱི་བྷ་ལིང་ཟས་ཕུད་གསེར་སྐྱེམས་ཀྱིས། བརྟེན་མ་མགུལ་ལྷ་དགེ་བསྙེན་རྒྱ་མཚོའི་ཚོགས། །གསོལ་ལོ་མཆོད་དོ་དགྱེས་པའི་གཟི་མདངས་བསྐྱེད། །བདག་ཅག་དཔོན་སློབ་ཡོན་མཆོད་མི་ནོར་བཅས། ཁ་འཛིན་སྡོང་གྲོགས་བྱེད་པར་མངའ་གསོལ་ལོ། །ལེགས་དང་སྤྱོད་ལ་ཉེས་པ་ཀུན་དང་བསྣོལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །བཀའ་བརྒྱད་བཀའ་སྲུང་དང་གཏེར་མགོན་འབར་ཝཱི་མ་རྣམ་སྲས་དམ་ཅན་སོགས་ལ་ཨོ་རྒྱན་གྱིས་མཛད་པའི་གསོལ་ཁ་དང་། མ་ནིང་ལས་རྒྱུད་ལས། མདོར་ན་འདི་ཉིད་གསོལ་ཁས་འགྲུབ། །ཅེས་དང་། རྒྱུད་མེ་ལྕེ་ཕྲེང་བར་ལྷའི་དམག་དཔོན་ལ་གསོལ་ལོ་ཞེས་སོ། །གསོལ་ཁ་མངའ་གསོལ་བར་གསུངས་ཤིང་། ལྷ་རྣམས་ཀྱིས་མགོན་པོ་ལ་མངའ་གསོལ་ཕུལ་བའི་ལོ་རྒྱུས་རྒྱ་ཆེར་གསུང་ཞིང་། རས་ཆེན་པས་མཛད་པའི་བེར་གྱི་གསོལ་ཁ་དང་། ཕྱག་བཞི་དྲུག་བེར་རྣམས་ལ་མངའ་གསོལ་གྱི་རྒྱ་གཞུང་མང་དུ་བྱུང་བའི་དོན་བསྡུས་པའོ། །དེ་ནས་བསྐང་བའི་དམིགས་རིམ་གྱེར་བསྒོམ་བྱ་སྟེ། ཧཱུྃ། རྒྱ་མཚོ་ལྔ་ཡི་ལྷ་ཚོགས་ཐམས་ཅད་ལ། །སོ་སོར་བསྐང་རྫས་ཕུལ་ཞིང་བསྐང་བས་མཉེས། །སྐུ་གསུང་ཐུགས་
ལས་འོད་ཟེར་དཀར་པོ་འཕྲོས། །བདག་དང་བསྲུང་བྱའི་ལུས་ངག་ཡིད་གསུམ་ལ། །ཕོག་པས་ནད་གདོན་སྡིག་སྒྲིབ་ཉམས་ཆག་ཞི། །དེ་བཞིན་འོད་ཟེར་སེར་པོ་འཕྲོས་པ་ཡིས། །ཚེ་དང་བསོད་ནམས་དཔལ་འབྱོར་ཕུན་ཚོགས་རྒྱས། །དམར་པོ་འཕྲོས་པས་སྣང་སྲིད་དབང་དུ་འདུས། །འོད་ཟེར་མཐིང་ནག་ཉི་མ་འབུམ་གྱི་གཟི། །དམྱལ་བའི་མེ་ཡི་ཚ་ངར་ལྡན་པ་འཕྲོས། །དགྲ་བགེགས་བདུད་བཞི་ཉོན་མོངས་ཐུལ་གྱིས་བསྲེགས། །ཕྲིན་ལས་ཀུན་འགྲུབ་དངོས་གྲུབ་གཉིས་ཐོབ་གྱུར། བཱི༔ པདྨ་ཐོད་ཕྲེང་གྲུབ་ཐོབ་རྒྱ་མཚོ་ཡི། །ཐུགས་དམ་གཉན་པོ་བསྐང་བའི་དམ་རྫས་ནི། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་གཟུགས་སྒྲ་དྲི་རོ་རེག །བཀྲ་ཤིས་ལྷ་མོ་བརྒྱད་དང་རིན་ཆེན་བདུན། །གདུགས་དང་བླ་བྲེ་ཁྲི་གདན་ན་བཟའི་ཚོགས། །དུང་དང་གླིང་བུ་རྐང་གླིང་བ་དན་སོགས། །འདོད་ཡོན་ལྔ་ཡི་མཆོད་སྤྲིན་ནམ་མཁའ་མཛོད། །དངོས་བཤམས་ཡིད་སྤྲུལ་མཆོད་པ་དཔག་མེད་ཀྱིས། །རང་སེམས་ཆོས་སྐུ་མངོན་སུམ་སྟོན་མཛད་པ། །དྲིན་ཐོབ་རྩ་བའི་བླ་མའི་ཐུགས་དམ་བསྐང་། །རྒྱལ་བ་ཀུན་ལས་བཀའ་དྲིན་
ཁྱད་པར་འཕགས། །དྲིན་ཐོབ་སློབ་དཔོན་རྣམས་ཀྱི་ཐུགས་དམ་བསྐང་། །ཀུན་དགའི་མཚན་ཅན་དྷརྨེ་ཤྭ་ར་དང་། །བཛྲ་དྷརྨ་དྷཱ་ཏུའི་ཐུགས་དམ་བསྐང་། །རྒྱལ་བའི་ཕྲིན་ལས་འདྲེན་མཛད་ཤིང་རྟ་མཆོག །བརྒྱུད་པའི་བླ་མ་རྣམས་ཀྱི་ཐུགས་དམ་བསྐང་། །སྐུ་ལྔའི་བདག་ཉིད་རིགས་རྣམས་ཀུན་གྱི་གཙོ། །བཅོམ་ལྡན་རྡོ་རྗེ་འཆང་གི་ཐུགས་དམ་བསྐང་། །རྒྱལ་བས་ལུང་བསྟན་སྟོན་པ་གཉིས་པར་གྲགས། །མཆོག་གི་གྲུབ་ཆེན་བརྒྱུད་ཀྱི་ཐུགས་དམ་བསྐང་། །དགའ་རབ་རྡོ་རྗེ་ཤྲཱི་སེང་ཧ་དང་། །རྒྱ་གར་རིག་ཝོའཛིན་བརྒྱད་ཀྱི་ཐུགས་དམ་བསྐང་། །མི་ཏྲ་ཛོ་ཀི་རྡོ་རྗེ་གདན་པ་དང་། །གྲུབ་ཆེན་བརྒྱད་ཅུ་རྩ་ལྔའི་ཐུགས་དམ་བསྐང་། །ཁྱད་པར་ས་ར་ཧ་དང་ཏེ་ལོ་པ། །ནཱ་རོ་མི་ཏྲི་རྣམས་ཀྱི་ཐུགས་དམ་བསྐང་། །མེས་དབོན་རྣམ་གསུམ་རྗེ་འབངས་ཉི་ཤུ་ལྔ། །ཟུར་སོ་དམ་གཙང་རྣམས་ཀྱི་ཐུགས་དམ་བསྐང་། །མར་མི་དྭགས་པོ་ཕག་གྲུ་དུས་གསུམ་མཁྱེན། །འབྲི་སྟག་ཚལ་འབྲུག་བརྒྱུད་པའི་ཐུགས་དམ་བསྐང་། །ཁུ་རྔོག་འབྲོམ་དང་རྒྱལ་སྲས་སྐུ་མཆེད་གསུམ། །འཇམ་དབྱངས་བདུན་རྒྱུད་རྣམས་ཀྱི་ཐུགས་དམ་བསྐང་། །རཏྣ་གླིང་
དང་འཇའ་ཚོན་སྙིང་པོ་དང་། །གཏེར་སྟོན་བརྒྱ་རྩ་བརྒྱད་ཀྱི་ཐུགས་དམ་བསྐང་། །རིག་འཛིན་གཙོ་མཆོག་པདྨ་ཐོད་ཕྲེང་རྩལ། །མངལ་གྱིས་མ་གོས་རང་བྱུང་སྤྲུལ་པའི་སྐུ། །སྐྱེ་འཆི་མི་མངའ་ཨོ་རྒྱན་ཚེ་དཔག་མེད། །གུ་རུ་པདྨ་འོད་འབར་ཐུགས་དམ་བསྐང་། །བླ་མ་གསང་འདུས་མཚོ་རྒྱལ་ཡུམ་དང་འཁྲིལ། །བླ་མ་ལོངས་སྐུ་མནྡཱ་ར་བ་ཡུམ། །བླ་མ་སྤྲུལ་སྐུ་སྐུ་ལྔ་མཚན་མཆོག་བརྒྱད། །གུ་རུ་ཞི་བའི་ལྷ་ཚོགས་ཐུགས་དམ་བསྐང་། །རྟ་ཕག་ཡབ་ཡུམ་གིང་ཆེན་ཡབ་ཡུམ་བརྒྱད། །ཤུགས་འགྲོ་ཡབ་ཡུམ་བརྒྱད་དང་སྒོ་མ་བཞི། །དྲག་མཐིང་བདུད་རྩི་སྨན་གྱི་རིག་འཛིན་སོགས། །ཡང་སྙིང་འདུས་པའི་ལྷ་ཚོགས་ཐུགས་དམ་བསྐང་། །གྲུབ་ཐོབ་རྒྱ་མཚོའི་ཐུགས་དམ་བསྐངས་གྱུར་ནས། །བྱིན་རླབས་འཛད་མེད་གའི་རྒྱུན་བཞིན་སྩོལ། །བདག་གི་ལུས་ངག་ཡིད་གསུམ་བྱིན་རློབས་ལ། །ཕྱག་རྒྱ་ཆེན་པོའི་དངོས་གྲུབ་བསྩལ་དུ་གསོལ། །ཧྲཱིཿ འཇིག་རྟེན་དབང་ཕྱུག་རྒྱལ་བ་རྒྱ་མཚོ་ཡི། །ཐུགས་དམ་གཉན་པོ་བསྐང་བའི་དམ་རྫས་ནི། །དངོས་འབྱོར་བདག་ལུས་ལོངས་སྤྱོད་དགེ་རྩར་བཅས། །ཡིད་ལས་བྱུང་བའི་རིག་མ་བཅུ་དྲུག་དང་། །
ངོ་མཚར་མཆོད་པ་བཅོ་བརྒྱད་ནམ་མཁའ་བཀང་། །ནམ་མཁའི་མཐར་ཐུག་ཞིང་ཁམས་རབ་འབྱམས་ན། །བདག་པོས་བཟུང་དང་མ་བཟུང་མཆོད་པའི་ཚོགས། །གླིང་བཞི་རི་རབ་ཉི་ཟླ་བྱེ་བ་བརྒྱ། །རིན་ཆེན་ས་གཞི་རི་བོ་རིན་ཆེན་གཏེར། །རིན་ཆེན་གྲམ་བུ་རིན་ཆེན་ཕྱེ་མ་གདལ། །ལྷ་ཡི་བདུད་རྩི་རིགས་བཞི་ལྷ་ཡི་གོས། །མ་རྨོས་ལོ་ཏོག་དཔག་བསམ་ལྗོན་པའི་ཚལ། །ལྷ་ཀླུ་མི་ཡི་དབང་པོ་དཔལ་འབྱོར་བཅས། །འགྲོ་ཀུན་བྱང་ཆུབ་ཐོབ་ཕྱིར་བློ་ཡིས་བླངས། །ཐུགས་དམ་བསྐང་བའི་རྫས་སུ་དམིགས་བྱས་ཏེ། །རྒྱལ་བའི་སྤྱི་མེས་ཀུན་བཟང་ཡབ་དང་ཡུམ། །རིགས་ལྔ་ཡབ་ཡུམ་སེམས་དཔའ་ཡབ་ཡུམ་བརྒྱད། །སྤྲུལ་སྐུ་ཐུབ་དྲུག་སྒོ་བ་ཡབ་ཡུམ་བརྒྱད། །བུདྡྷཱ་བཞི་བཅུ་རྩ་གཉིས་ཐུགས་དམ་བསྐང་། །རིགས་ཀྱི་བདག་པོ་གསང་འདུས་ཚེ་དཔག་མེད། །གོས་དཀར་ཡུམ་བཅས་ཚེ་བདག་ཡབ་ཡུམ་བཞི། །སྒེག་མོ་བཞི་དང་དེ་བཞིན་མགྱོགས་མ་བཞི། །རིགས་ཀྱི་ཡུམ་ཆེན་བཞི་ཡི་ཐུགས་དམ་བསྐང་། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་མ། །གྲུབ་རྒྱལ་ཕྱི་ནང་གསང་གསུམ་ཚེ་དཔག་དཀར། །མཚོ་སྐྱེས་རྡོ་རྗེ་
ཕྲེང་བ་མདའ་འཕེལ་མ། །ཉི་ཟླ་ཁ་སྦྱོར་ལྷ་ཚོགས་ཐུགས་དམ་བསྐང་། །གཟུགས་ཕུང་གཏི་མུག་རྣམ་དག་ཆོས་དབྱིངས་སྐུ། །རྣམ་སྣང་སྤྱན་རས་གཟིགས་ཀྱི་ཐུགས་དམ་བསྐང་། །རྣམ་ཤེས་ཞེ་སྡང་རྣམ་དག་མེ་ལོང་སྐུ། །རྡོ་རྗེ་སྤྱན་རས་གཟིགས་ཀྱི་ཐུགས་དམ་བསྐང་། །ཚོར་བ་ང་རྒྱལ་གནས་དག་མཉམ་ཉིད་སྐུ། །རིན་ཆེན་སྤྱན་རས་གཟིགས་ཀྱི་ཐུགས་དམ་བསྐང་། །འདུ་ཤེས་འདོད་ཆགས་གནས་དག་སོར་རྟོག་སྐུ། །པདྨ་སྤྱན་རས་གཟིགས་ཀྱི་ཐུགས་དམ་བསྐང་། །འདུ་བྱེད་ཕྲག་དོག་རྣམ་དག་བྱ་གྲུབ་སྐུ། །ལས་ཀྱི་སྤྱན་རས་གཟིགས་ཀྱི་ཐུགས་དམ་བསྐང་། །ནམ་མཁའི་རྣམ་དག་བདེ་གཤེགས་རིགས་ཀྱི་ཡུམ། །བཅོམ་ལྡན་རྡོ་རྗེ་ཕག་མོའི་ཐུགས་དམ་བསྐང་། །ས་ཁམས་རྣམ་དག་རྡོ་རྗེ་རིགས་ཀྱི་ཡུམ། །ཡུམ་ཆེན་སངས་རྒྱས་སྤྱན་མའི་ཐུགས་དམ་བསྐང་། །ཆུ་ཁམས་རྣམ་དག་རིན་ཆེན་རིགས་ཀྱི་ཡུམ། །ཡུམ་ཆེན་མཱ་མ་ཀཱི་ཡི་ཐུགས་དམ་བསྐང་། །མེ་ཁམས་རྣམ་དག་པདྨ་རིགས་ཀྱི་ཡུམ། །ཡུམ་ཆེན་གོས་དཀར་མོ་ཡི་ཐུགས་དམ་བསྐང་། །རླུང་ཁམས་རྣམ་དག་ལས་ཀྱི་རིགས་ཀྱི་ཡུམ། །ཡུམ་ཆེན་དམ་ཚིག་སྒྲོལ་མའི་ཐུགས་
དམ་བསྐང་། །སྙིང་རྗེ་ཚད་མེད་ཞི་བའི་ལས་མཛད་མ། །རྡོ་རྗེ་རིགས་ཀྱི་མཁའ་འགྲོའི་ཐུགས་དམ་བསྐང་། །བྱམས་པ་ཚད་མེད་རྒྱས་པའི་ལས་མཛད་མ། །རིན་ཆེན་རིགས་ཀྱི་མཁའ་འགྲོའི་ཐུགས་དམ་བསྐང་། །དགའ་བ་ཚད་མེད་དབང་གི་ལས་མཛད་མ། །པདྨ་རིགས་ཀྱི་མཁའ་འགྲོའི་ཐུགས་དམ་བསྐང་། །བཏང་སྙོམས་ཚད་མེད་དྲག་པོའི་ལས་མཛད་མ། །ལས་ཀྱི་རིགས་ཀྱི་མཁའ་འགྲོའི་ཐུགས་དམ་བསྐང་། །ཞིང་འདིར་འགྲོ་བའི་དོན་ལ་རིམ་བཞིན་འབྱོན། །བསྐལ་བཟང་རྒྱལ་བ་སྟོང་གི་ཐུགས་དམ་བསྐང་། །འཇིག་རྟེན་དབང་ཕྱུག་རྒྱལ་པོ་རིན་ཆེན་སྙིང་། །འདས་པའི་སངས་རྒྱས་རྣམས་ཀྱི་ཐུགས་དམ་བསྐང་། །མགོན་པོ་ཀུན་གཟིགས་འོད་ཟེར་དཔལ་བརྩེགས་རྒྱལ། །མ་འོངས་སངས་རྒྱས་རྣམས་ཀྱི་ཐུགས་དམ་བསྐང་། །སྨན་བླ་མཆེད་བདུན་པདྨ་དམ་པ་སོགས། །ད་ལྟའི་སངས་རྒྱས་རྣམས་ཀྱི་ཐུགས་དམ་བསྐང་། །རྣམ་སྣང་རིགས་བཞི་ཡུམ་བཞི་སེམས་དཔའ་སོགས། །ངན་སོང་སྦྱོང་རྒྱུད་ལྷ་ཚོགས་ཐུགས་དམ་བསྐང་། །མི་ཏྲ་ཁྲི་དྲུག་གསང་སྒྲུབ་གསང་བ་འདུས། །འགྲོ་འདུལ་ཡང་གསང་ལྷ་ཚོགས་ཐུགས་དམ་
བསྐང་། །སྒྲུབ་ཐབས་བརྒྱ་རྩ་རྒྱ་མཚོ་རྡོ་རྗེ་ཕྲེང་། །མི་ཏྲ་བརྒྱ་རྩའི་ལྷ་ཚོགས་ཐུགས་དམ་བསྐང་། །མཚན་ཆེན་ཡོངས་གྲགས་ནས་གསུངས་སངས་རྒྱས་དང་། །བྱང་སེམས་མ་ལུས་པ་ཡི་ཐུགས་དམ་བསྐང་། །ཀླུ་དབང་རྒྱལ་པོ་ལ་སོགས་ལྟུང་བཤགས་ཀྱི། །བདེ་གཤེགས་སུམ་ཅུ་སོ་ལྔའི་ཐུགས་དམ་བསྐང་། །མི་འཁྲུགས་རྒྱལ་བ་རིགས་ལྔ་ལྷ་མོ་བརྒྱད། །ལས་སྒྲིབ་སྦྱོང་བའི་ལྷ་ཚོགས་ཐུགས་དམ་བསྐང་། །རྡོར་སེམས་རིགས་ལྔ་ལྔ་ལྔ་ཉི་ཤུ་ལྔ། །ན་རཀ་དོང་སྤྲུགས་ལྷ་ཚོགས་ཐུགས་དམ་བསྐང་། །ངག་གི་དབང་ཕྱུག་ཨ་ར་པ་ཙ་དང་། །འཇམ་དབྱངས་དཀར་དམར་ནག་པོའི་ཐུགས་དམ་བསྐང་། །གསང་འདུས་འཇམ་པའི་རྡོ་རྗེ་མི་བསྐྱོད་པ། །ཕ་རྒྱུད་ལྷ་ཚོགས་རྣམས་ཀྱི་ཐུགས་དམ་བསྐང་། །མཁའ་འགྲོ་ལྔ་ཡི་དཀྱིལ་འཁོར་རྣམ་པ་ལྔ། །མ་རྒྱུད་ལྷ་ཚོགས་རྣམས་ཀྱི་ཐུགས་དམ་བསྐང་། །རྡོར་དབྱིངས་སྦྱོང་རྒྱུད་གསུང་གི་དཀྱིལ་འཁོར་སོགས། །ཡོ་གའི་ལྷ་ཚོགས་རྣམས་ཀྱི་ཐུགས་དམ་བསྐང་། །རྣམ་སྣང་མངོན་བྱང་དམ་ཚིག་གསུམ་བཀོད་སོགས། །ཨུ་པའི་ལྷ་ཚོགས་རྣམས་ཀྱི་ཐུགས་དམ་བསྐང་། །ཚེ་དཔག་ལྷ་དགུ་དོན་ཞགས་
བཅུ་གཅིག་ཞལ། །ཀྲི་ཡའི་ལྷ་ཚོགས་རྣམས་ཀྱི་ཐུགས་དམ་བསྐང་། །ཐུབ་དབང་མཆོག་ཟུང་གནས་བརྟན་བཅུ་དྲུག་དང་། །དགེ་བསྙེན་དྷརྨཱ་ཏ་ཡི་ཐུགས་དམ་བསྐང་། །ཕྱོགས་བཅུ་དུས་གསུམ་བཞུགས་པའི་བདེ་བར་གཤེགས། །མ་ལུས་ལུས་པ་མེད་པའི་ཐུགས་དམ་བསྐང་། །རབ་དགའ་ནས་བཟུང་ཆོས་ཀྱི་སྤྲིན་གྱི་བར། །སར་གནས་བྱང་སེམས་རྣམས་ཀྱི་ཐུགས་དམ་བསྐང་། །སྐྱེས་བུ་ཟུང་བཞི་གང་ཟག་ཡ་བརྒྱད་དེ། །འཕགས་པ་ཉན་རང་རྣམས་ཀྱི་ཐུགས་དམ་བསྐང་། །རྒྱལ་བ་རྒྱ་མཚོའི་སྲས་དང་སློབ་མའི་ཚོགས། །མ་ལུས་ཀུན་གྱི་ཐུགས་དམ་བསྐངས་གྱུར་ནས། །བདག་དང་མཐའ་ཡས་སེམས་ཅན་ཐམས་ཅད་ཀུན། །མྱུར་དུ་བྱང་ཆུབ་འཁོར་བ་དོང་སྤྲུགས་མཛོད། །རྟ་མགྲིན་ཁྲོ་རྒྱལ་རྒྱ་མཚོའི་ལྷ་ཚོགས་ཀྱི། །ཐུགས་དམ་གཉན་པོ་བསྐང་བའི་དམ་རྫས་ནི། །དངོས་འབྱོར་སྨན་རཀ་གཏོར་མ་འདོད་ཡོན་ལྔ། །ཡིད་སྤྲུལ་དུར་ཁྲོད་ཆས་བརྒྱད་དཔལ་ཆས་བཅུ། །ལྷ་མིན་དམྱལ་གནས་དུར་ཁྲོད་ཆེ་རྣམས་སུ། །འཇིགས་རུང་གཟུགས་དང་མི་སྙན་གཏུམ་པའི་སྒྲ། །གསུར་ཆེན་གུ་གུལ་དྲི་དང་ཤ་ཁྲག་ཟས། །
གཡང་གཞི་ཀོ་རློན་འཇོམ་བེར་བརྗིད་པའི་ཆས། །དྲག་པོའི་མཆོད་པར་འོས་པ་ཅི་མཆིས་པ། །བློ་ཡིས་བླངས་ཏེ་བསྐང་བའི་རྫས་སུ་དམིགས། །ཁྲོ་བོའི་ཆེ་བཙན་པདྨ་ཧེ་རུ་ཀ །རྟ་མཆོག་དབང་གི་རྒྱལ་པོའི་ཐུགས་དམ་བསྐང་། །གསང་སྒྲུབ་དམར་པོ་རྟ་མཆོག་གསང་བ་འདུས། །དབང་ཆེན་བདེ་མཆོག་དམར་པོའི་ཐུགས་དམ་བསྐང་། །ནག་པོ་ལྕགས་རལ་རིགས་བཞིའི་རྟ་མགྲིན་བཞི། །ནཱ་ག་ཀླུ་འདུལ་ལྷ་ཚོགས་ཐུགས་དམ་བསྐང་། །མེ་དབལ་གནོད་སྦྱིན་སྡིག་རྒོད་ནམ་མཁའ་ལྡིང་། །རྟ་ནག་ལྕགས་རལ་ལྷ་ཚོགས་ཐུགས་དམ་བསྐང་། །བགེགས་མཐར་ལ་སོགས་མཐར་བྱེད་ཁྲོ་བོ་བཞི། །དཔའ་བོ་རྒྱ་མཚོའི་ལྷ་ཚོགས་ཐུགས་དམ་བསྐང་། །དམར་ནག་མེ་ཕྲེང་ཡབ་ཡུམ་རིགས་བདག་ཁྱུང་། །ཐོད་ཕྲེང་གོ་ཆ་ལྷ་དགུའི་ཐུགས་དམ་བསྐང་། །དྲག་པོ་རིགས་བཞི་ཌཀྐི་ཡབ་ཡུམ་བརྒྱད། །ཚེ་བདག་སེང་གདོང་ཕུར་པའི་ཐུགས་དམ་བསྐང་། །ཁྲོ་བཅུ་སྒོ་བ་ཕྱི་ནང་ཡང་གསང་ལྷ་། །ཟིལ་གནོན་ཧཱུཾ་སྒྲུབ་བཅས་པའི་ཐུགས་དམ་བསྐང་། །ཆེ་མཆོག་གཙོ་དགུ་བདུན་བརྒྱ་ཉི་ཤུ་ལྔ། །སྒྲུབ་ཆེན་བཀའ་བརྒྱད་ལྷ་ཚོགས་ཐུགས་དམ་བསྐང་། །ཆེ་མཆོག་ཁྲག་
འཐུང་རིགས་ལྔ་ཀེ་སེང་བཅས། །འབར་བ་ལྔ་བཅུ་རྩ་བརྒྱད་ཐུགས་དམ་བསྐང་། །པདྨ་བཛྲ་ཡུམ་ཆེན་མན་ར། །དགོངས་པ་འདུས་པའི་ལྷ་ཚོགས་ཐུགས་དམ་བསྐང་། །དུས་ཀྱི་འཁོར་ལོ་སྐུ་གསུང་ཐུགས་དཀྱིལ་འཁོར། །གཉིས་མེད་རྒྱུད་ཀྱི་ལྷ་ཚོགས་ཐུགས་དམ་བསྐང་། །དགྱེས་པ་རྡོ་རྗེ་ཡུམ་ཆེན་བདག་མེད་མ། །གོ་རི་ལྷ་མོ་བརྒྱད་ཀྱི་ཐུགས་དམ་བསྐང་། །བདེ་མཆོག་ཡབ་ཡུམ་སྙིང་པོའི་རྣལ་འབྱོར་མ། །དྲུག་ཅུ་རྩ་གཉིས་ལྷ་ཚོགས་ཐུགས་དམ་བསྐང་། །དགྲ་ནག་གཤེད་དམར་གདོང་དྲུག་འཇིགས་བྱེད་སོགས། །གཤེད་སྐོར་ཁྲོ་བོ་རྣམས་ཀྱི་ཐུགས་དམ་བསྐང་། །འཇིགས་བྱེད་ཡབ་ཡུམ་ལས་གཤིན་མཆེད་སྡེ་བཞི། །མེ་ཡི་སྤུ་གྲིའི་ལྷ་ཚོགས་ཐུགས་དམ་བསྐང་། །ཀིང་ཀང་ཡབ་ཡུམ་རིགས་བཞི་རླུང་སྒྲུབ་དམར། །ཕ་རོལ་རྒོལ་འཇོམས་ལྷ་ཚོགས་ཐུགས་དམ་བསྐང་། །སྨན་གདོང་དམར་ནག་ལས་ཀྱི་གཤིན་རྗེ་དྲུག །ཁྲོ་ཆུ་དུག་གདོང་ལྷ་ཚོགས་ཐུགས་དམ་བསྐང་། །གསང་བའི་བདག་པོ་ཁྱུང་ཆེན་ཉི་ཤུ་གཅིག །གཏུམ་པོ་ཆེ་ཆུང་ལྷ་ཚོགས་ཐུགས་དམ་བསྐང་། །འབྱུང་འདུལ་འཁོར་ཆེན་ལོཀྟི་པ་ལ་དང་། །གོས་སྔོན་
ཅན་དང་ཁྱུང་ཁྲའི་ཐུགས་དམ་བསྐང་། །རྡོ་རྗེ་གཞོན་ནུ་ཁྲོ་བཅུ་ཁྲ་ཐབས་བཅས། །བདུད་འདུལ་ཕུར་པའི་ལྷ་ཚོགས་ཐུགས་དམ་བསྐང་། །མ་ཧཱ་མཱ་ཡཱ་སངས་རྒྱས་ཐོད་པ་དང་། །རྡོ་རྗེ་གདན་བཞིའི་ལྷ་ཚོགས་ཐུགས་དམ་བསྐང་། །རྣམ་འཇོམས་སྨེ་བ་བརྩེགས་པ་མི་གཡོ་མགོན། །སྟོབས་པོ་ཆེ་སོགས་ཁྲོ་བོའི་ཐུགས་དམ་བསྐང་། །མདོར་ན་གསང་སྔགས་རིག་སྔགས་གཟུངས་སྔགས་ཀྱི། །ཁྲོ་བོ་མ་ལུས་པ་ཡི་ཐུགས་དམ་བསྐང་། །ཁྲོ་རྒྱལ་རྒྱ་མཚོའི་ཐུགས་དམ་བསྐངས་གྱུར་ནས། །བདག་ཅག་དཔོན་སློབ་ཡོན་མཆོད་བསྲུང་བྱ་རྣམས། །ལུས་ངག་ཡིད་གསུམ་སྲུང་ཞིང་བསྐྱབ་པ་དང་། །བདུད་བཞིའི་དགྲ་ལས་རྒྱལ་བའི་ཕྲིན་ལས་མཛོད། །ཧཱུྃ། གསང་བ་ཡེ་ཤེས་ཌཱཀི་རྒྱ་མཚོའི་ཚོགས། །ཁྱེད་རྣམས་ཐུགས་དམ་བསྐང་བའི་དམ་རྫས་ནི། །ཤ་ལྔ་བདུད་རྩི་རྣམ་ལྔ་ཡེ་ཤེས་ལྔ། །འདོད་ཡོན་གཏོར་མ་ཚོགས་ཀྱི་ལོངས་སྤྱོད་བཅས། །འོག་མིན་ལ་སོགས་ཞིང་ཁམས་རབ་འབྱམས་ན། །ཚོགས་ཀྱི་མཆོད་པ་བདུད་རྩིའི་བྱེ་བྲག་དང་། །གླུ་གར་རོལ་མོ་པི་ཝང་གླིང་བུའི་ཚོགས། །རྐང་གླིང་ཅང་ཏེའུ་རྒྱན་དྲུག་རིན་ཆེན་བརྒྱད། །
འཇའ་འོད་སྤོས་སྤྲིན་མེ་ཏོག་ཆར་རྒྱུན་སོགས། །བླ་མེད་མཆོད་པའི་ཚོགས་དང་རྒྱན་ཆའི་ཚོགས། །གང་མཆིས་བསམ་པ་དག་པའི་བློས་བླངས་ནས། །དེང་འདིར་བསྐང་བའི་རྫས་སུ་དམིགས་བྱས་ཏེ། །ཆོས་ལོངས་སྤྲུལ་སྐུའི་ངོ་བོ་ཌཱཀིའི་གཙོ། །གསང་བ་ཡེ་ཤེས་མཁའ་འགྲོའི་ཐུགས་དམ་བསྐང་། །རྡོ་རྗེ་རིན་ཆེན་པདྨ་ལས་ཀྱི་རིགས། །མཁའ་འགྲོ་བྱེ་བ་འབུམ་གྱི་ཐུགས་དམ་བསྐང་། །རྡོ་རྗེ་ཕག་མོ་ཞལ་གཅིག་མཁའ་འགྲོ་བཞི། །སྙན་བརྒྱུད་ལྷན་ཅིག་སྐྱེས་མའི་ཐུགས་དམ་བསྐང་། །ཞལ་གཉིས་ཞལ་བཞི་དབུ་བཅད་དོན་འགྲུབ་མ། །མཁའ་སྤྱོད་དཀར་དམར་རྣམས་ཀྱི་ཐུགས་དམ་བསྐང་། །ཁྲོས་མ་རིགས་ལྔ་དུར་ཁྲོད་མཁའ་འགྲོ་བརྒྱད། །ཐུགས་རྗེ་ཁྲོས་མའི་ལྷ་ཚོགས་ཐུགས་དམ་བསྐང་། །སེང་གདོང་མ་དང་སྟག་གདོང་དོམ་གདོང་མ། །སེང་གདོང་ལྷ་མོ་བཅུ་བཞིའི་ཐུགས་དམ་བསྐང་། །ཀུ་རུ་ཀུལླེ་སྒྲོལ་མ་དུག་སེལ་མ། །སྒྲོལ་མ་ཉི་ཤུ་རྩ་གཅིག་ཐུགས་དམ་བསྐང་། །ཡིད་བཞིན་འཁོར་ལོ་སེང་ལྡེང་ནགས་ཀྱི་སྒྲོལ། །ཤེར་ཕྱིན་སྣ་ཚོགས་ཡུམ་གྱི་ཐུགས་དམ་བསྐང་། །སྐུལ་བྱེད་མ་དང་རྡོ་རྗེ་ལྕགས་སྒྲོག་མ། །ལྷ་
མོ་འོད་ཟེར་ཅན་མའི་ཐུགས་དམ་བསྐང་། །གདུགས་དཀར་རྣམ་རྒྱལ་གདུགས་ནག་རི་ཁྲོད་མ། །སྲུང་བའི་ལྷ་མོ་ལྔ་ཡི་ཐུགས་དམ་བསྐང་། །དབྱངས་ཅན་མ་དང་རལ་གཅིག་ཁྲོ་གཉེར་ཅན། །རིག་སྔགས་ལྷ་མོ་ཀུན་གྱི་ཐུགས་དམ་བསྐང་། །ཁྲི་བཙུན་ཀོང་ཇོ་མ་གཅིག་ལབ་ཀྱི་སྒྲོན། །བོད་ཡུལ་ཌཀི་ཀུན་གྱི་ཐུགས་དམ་བསྐང་། །དཀར་སེར་དམར་ལྗང་སྔོ་དང་སྨུག་པའི་མདོག །འབུམ་ཕྲག་ཡངས་པའི་མཁའ་འགྲོའི་ཐུགས་དམ་བསྐང་། །གནས་ཡུལ་རྩ་དང་ཞིང་ལ་གནས་པ་ཡི། །ཊཱཀི་མ་ལུས་ཀུན་གྱི་ཐུགས་དམ་བསྐང་། །དཔའ་མོ་རྒྱ་མཚོའི་ཐུགས་དམ་བསྐངས་གྱུར་ནས། །དྲོད་གསུམ་འབར་བ་གསུམ་དང་འདུ་བ་གསུམ། །མཆོག་དང་ཐུན་མོང་དངོས་གྲུབ་མྱུར་དུ་སྩོལ། །ཧཱུྃ། ཆོས་སྐྱོང་དམ་ཅན་རྒྱ་མཚོ་འཁོར་བཅས་ཀྱི། །ཐུགས་དམ་གཉན་པོ་བསྐང་བའི་དམ་རྫས་ནི། །ཤ་ཁྲག་གཏོར་མ་བསྐང་བཤོས་རི་རབ་དབྱིབས། །སྲོག་ཆགས་སྣ་ཚོགས་གཟུགས་བརྙན་འབུར་དུ་བཏོད། །རྟེན་རྫས་སྒྲུབ་རྫས་བསྐང་རྫ་ས་འབྱོར་ཚད་བཤམས། །ཡིད་ཀྱིས་བསམ་གྱིས་མི་ཁྱབ་དཔག་མེད་སྤྲུལ། །སྟོང་གསུམ་རབ་འབྱམས་འཇིག་རྟེན་ཁམས་འདི་
ན། །བྱ་ནག་ཁྱི་ནག་གཡག་ནག་ལུག་ནག་ཚོགས། །སྐྱེ་འགྲོ་སྲོག་ཆགས་དར་ཟབ་རིན་པོ་ཆེ། །གོ་མཚོན་སྤྱན་གཟིགས་ཅི་མཆིས་བློ་ཡིས་བླངས། །བསྟན་དང་བདག་ལ་སྡང་བའི་དགྲ་བགེགས་ཀྱི། །བླ་ཚེ་སྲོག་དབུགས་ཁ་རྗེ་དབང་ཐང་བཅས། །ཆོས་སྐྱོང་གསོལ་བའི་ཟས་སུ་དམིགས་བྱས་ཏེ། །མགོན་པོ་ཀུན་གྱི་སྤྲུལ་གཞི་རྩ་བའི་ལྷ། །ཡབ་གཅིག་ལེགས་ལྡན་ནག་པོའི་ཐུགས་དམ་བསྐང་། །སྲས་མཆོག་ནག་པོ་ཕྱོགས་བཅུ་མགོན་པོའི་ཚོགས། །འཇིག་རྟེན་མགོན་པོ་ཡབ་ཡུམ་ཐུགས་དམ་བསྐང་། །ཧཱུྃ་མཛད་ནག་པོ་རྒྱུད་གུར་ས་གུར་དང་། །པུ་ཏྲ་ལྕེ་སྤྱང་གདོང་གི་ཐུགས་དམ་བསྐང་། །རང་བྱུང་རྒྱལ་མོ་མ་བདུན་སྲིང་མོ་བཞི། །དུས་བཞིའི་ལྷ་མོ་རྣམས་ཀྱི་ཐུགས་དམ་བསྐང་། །འབར་མ་དགུ་དང་དམག་གི་རྒྱལ་མོ་བཞི། །དབང་ཕྱུག་ཉི་ཤུ་རྩ་བརྒྱད་ཐུགས་དམ་བསྐང་། །བྱ་རོག་མཚན་ཅན་ནག་པོ་ཕྱག་བཞི་པ། །སྐུ་ལྔ་མགོན་པོ་ཡབ་ཡུམ་ཐུགས་དམ་བསྐང་། །བྱ་རོག་གདོང་ཅན་མཆེད་དགུ་ནག་པོ་སྟོང་། །སེང་གདོང་ཤ་ཟ་འབུམ་གྱི་ཐུགས་དམ་བསྐང་། །ཙནི་རྩ་འཇིབ་མཁའ་འགྲོ་བརྒྱད་དང་དྲུག །མ་མོ་བྱེ་བ་
འབུམ་གྱི་ཐུགས་དམ་བསྐང་། །ལེགས་ལྡན་དམག་དཔོན་བརྒྱད་དང་གནོད་སྦྱིན་ཁྲི། །ཁྲབ་ཅན་བྱེ་བ་འབུམ་གྱི་ཐུགས་དམ་བསྐང་། །དུད་སོལ་ལྷ་མོ་སྙིང་འཕྲོག་མ་གསུམ་དང་། །རིགས་བཞིའི་ལྷ་མོ་བཞི་ཡི་ཐུགས་དམ་བསྐང་། །དུར་ཁྲོད་མ་མོ་བརྒྱད་དང་གདོང་ཅན་བརྒྱད། །སྒོ་མ་ཀང་ཀ་གདོང་བཞིའི་ཐུགས་དམ་བསྐང་། །རེ་མ་ཏི་དང་བ་ལམ་ཁྲི་སྨན་མ། །སྲིན་མོ་སྟོང་ཕྲག་དྲུག་ཅུའི་ཐུགས་དམ་བསྐང་། །རེ་ཏི་མཆེད་བཞི་དམག་ཟོར་རྒྱལ་མོ་དང་། །མ་མོ་བྱེ་བ་འབུམ་གྱི་ཐུགས་དམ་བསྐང་། །མྱུར་མཛད་མགོན་པོ་ཇོ་བོ་གཟི་ལྡན་དང་། །མགོན་དཀར་ཡིད་བཞིན་ནོར་བུའི་ཐུགས་དམ་བསྐང་། །གསང་བའི་ལས་མཁན་ཡབ་ཡུམ་གནོད་སྦྱིན་བཞི། །ཕྱག་བཞི་ཕྱག་གཉིས་ལྷ་མོའི་ཐུགས་དམ་བསྐང་། །མ་ནིང་སྡེ་ལྔ་སྲོག་བདུད་དཔལ་འབར་མ། །མ་མགོན་སྡེ་བརྒྱད་རྣམས་ཀྱི་ཐུགས་དམ་བསྐང་། །སྟག་ཞོན་སེང་ཞོན་བེང་དང་ཨ་གྷོ་ར། །ཞང་བློན་དམ་ཅན་སྡེ་དགུའི་ཐུགས་དམ་བསྐང་། །ཏྲཀཱད་ཡབ་ཡུམ་མོན་པ་ཨ་ཙ་ར། །བདུད་དམག་ཉི་ཁྲི་ཆིག་སྟོང་ཐུགས་དམ་བསྐང་། །སེང་གདོང་ཡབ་ཡུམ་ལས་མཁན་བམ་རོ་བཅས། །
སྡེ་བརྒྱད་བདུད་དམག་སྟོང་སྡེའི་ཐུགས་དམ་བསྐང་། །སྲིན་མགོན་ཡབ་ཡུམ་བྲག་མགོན་མོན་པ་ནག །གདོང་བཞི་མགོན་པོ་ཡབ་ཡུམ་ཐུགས་དམ་བསྐང་། མགོན་དཀར་དུར་ཁྲོད་བདག་པོ་ཡབ་དང་ཡུམ། །ངེ་ནེ་དུར་ཁྲོད་བདག་མོའི་ཐུགས་དམ་བསྐང་། །མགར་ནག་མཆེད་ཟླ་སུམ་བརྒྱ་དྲུག་ཅུ་དང་། །མགར་དམར་བཙན་འཁོར་སུམ་བརྒྱའི་ཐུགས་དམ་བསྐང་། །དགེ་བསྙེན་ཉེར་གཅིག་འཛིན་གིང་བཞི་བཅུ་གཉིས། །གིང་ཆེན་སྡེ་བཞི་འཁོར་བཅས་ཐུགས་དམ་བསྐང་། །ལྷ་ཀླུ་བདུད་བཙན་གནོད་སྦྱིན་གྲངས་མེད་འཁོར། །བྱ་གཅན་སྤྲུལ་པའི་འཁོར་བཅས་ཐུགས་དམ་བསྐང་། །སྒྲ་གཅན་ཁྱབ་འཇུག་གཟའ་བརྒྱད་གདོང་མོ་བཞི། །རྒྱུ་སྐར་ཉེར་བརྒྱད་འཁོར་བཅས་ཐུགས་དམ་བསྐང་། །ཤན་པ་དམར་ནག་སྡེ་བརྒྱད་མགོ་བརྙན་ཅན། །འཇིག་རྟེན་གཟའ་རྒོད་འཁོར་བཅས་ཐུགས་དམ་བསྐང་། །ཨེ་ཀ་ཙ་ཏི་སྲོག་སྒྲུབ་ཁ་མོ་ཆེ། །སྲིད་པའི་མ་མོ་བདུན་འབུམ་ཐུགས་དམ་བསྐང་། །གདོང་ལྷ་མཆེད་གསུམ་སྤུ་གྲི་མཆེད་གསུམ་དང་། །ལེགས་རྩལ་མཆེད་གསུམ་འཁོར་བཅས་ཐུགས་དམ་བསྐང་། །འབར་བ་སྤུན་བདུན་དགེ་
བསྙེན་སྤྱན་བདུན་དང་། །གནོད་སྦྱིན་སྤྱན་བདུན་རྣམས་ཀྱི་ཐུགས་དམ་བསྐང་། །རོལ་པ་སྐྱ་བདུན་ལུང་བཙན་ཇག་མེ་དང་། །བེག་རྩེ་ཡབ་ཡུམ་འཁོར་བཅས་ཐུགས་དམ་བསྐང་། །རྒྱལ་ཆེན་སྐུ་ལྔ་ཡུམ་ལྔ་སྤྲུལ་པ་ལྔ། །ཙི་དམར་བློན་པོ་ལྔ་བཅས་ཐུགས་དམ་བསྐང་། །ཆོས་རྒྱལ་ཡབ་ཡུམ་ཅིག་ཆར་འཆར་ཁ་དང་། །དོང་བདག་ཡབ་ཡུམ་སྲས་གསུམ་ཐུགས་དམ་བསྐང་། །ནཱ་ག་རཀཱ་ཡུམ་དང་བློན་པོའི་ཚོགས། །སྨྱོ་ཁ་ཡུམ་དང་བཅས་པའི་ཐུགས་དམ་བསྐང་། །སྤྱང་ཞོན་མཆེད་གསུམ་ཌཱཀྐི་ཟ་བྱེད་གདོང་། །རབ་བརྟན་མ་དང་ཧོར་མོའི་ཐུགས་དམ་བསྐང་། །རྒྱལ་པོ་གཡུ་ཕྲེང་བྲན་གཡོག་ཨ་ཙ་ར། །སྐྱེས་བུ་སྲིད་གསུམ་གསལ་བྱེད་ཐུགས་དམ་བསྐང་། །སྡེ་དཔོན་སུམ་ཅུ་དྲེགས་ཆེན་བཅོ་བརྒྱད་དང་། །བཀའ་བརྒྱད་བཀའ་སྲུང་ཚོགས་ཀྱི་ཐུགས་དམ་བསྐང་། །ཕྱི་ནང་གསང་བ་ཡང་གསང་སྦས་པ་དང་། །བཏགས་ཚགས་དྲག་སྔགས་སྡེ་བརྒྱད་ཐུགས་དམ་བསྐང་། །དྲེགས་པ་ཉི་ཤུ་རླུང་ལྷ་ཡབ་ཡུམ་སྲས། །དྲེགས་པ་གསུམ་སྦྲེལ་ལྔ་འདུས་ཐུགས་དམ་བསྐང་། །དམ་ཅན་རྒྱ་མཚོའི་ཐུགས་དམ་བསྐངས་གྱུར་ནས། །མ་བསྐུལ་པར་
ཡང་གནོད་བྱེད་དགྲ་བགེགས་སྒྲོལ། །གར་བསྐུལ་དགྲ་བགེགས་བདུན་བརྒྱུད་རྩད་ནས་ཆོད། །ལས་བཞི་གྲུབ་པ་བརྒྱད་དང་སྲུང་ཟློག་བསད། །དབྱེ་བསྐྲད་བཅིངས་མནན་ལས་ཚོགས་གང་བསམ་ཀུན། །ཐོགས་མེད་བསམ་པ་ཙམ་གྱིས་འགྲུབ་པར་མཛོད། །ཧཱུཾ། ནོར་ལྷ་གཏེར་བདག་རྒྱ་མཚོ་བསྐང་བའི་རྫས། །དཀར་གསུམ་མངར་གསུམ་བ་ལི་རིན་ཆེན་འབྲུ། །རྟེན་རྫས་བསྒྲུབ་རྫས་མཆོད་རྫས་དངོས་འབྱོར་བཤམས། །ཡིད་ཀྱིས་འཛད་མེད་ནམ་མཁའ་མཛོད་དུ་སྤྲུལ། །དག་དང་མ་དག་ཞིང་ཁམས་རབ་འབྱམས་ན། །རིན་ཆེན་གཏེར་ཆེན་དཔག་བསམ་རིན་ཆེན་ཤིང་། །།གཏེར་གྱི་བུམ་པ་རྟ་ལུག་གནག་གི་ཁྱུ། །མི་དབང་སྟོབས་ལྡན་བཙུན་མོ་དཔལ་འབྱོར་བཅས། །དཔུང་བཞི་ཡན་ལག་རུ་དར་གོ་མཚོན་ཁབ། །བསྐང་བའི་རྫ་ས་སུ་བློ་ཡིས་བླངས་བྱས་ནས། །གསེར་མདོག་རྣམ་མང་ཐོས་སྲས་གནོད་སྦྱིན་བརྒྱད། །ལྗང་ཆུང་ཀླུ་བརྒྱད་བཅས་པའི་ཐུགས་དམ་བསྐང་། །ལུས་ངན་མཐིང་ཀ་ཕྱག་དྲུག་ལྷ་མོ་བརྒྱད། །མདུང་དམར་མ་ཏྲག་བཞི་ཡི་ཐུགས་དམ་བསྐང་། །རྣམ་སྲས་རིགས་བརྒྱད་དྲག་བྱེད་འབྲོག་གནས་
ལྔ། །གནོད་སྦྱིན་གར་མཁན་མཆོག་གི་ཐུགས་དམ་བསྐང་། །རྒྱལ་ཆེན་ཡབ་གྱུར་ལྷ་ཆེན་དབང་ཕྱུག་ཆེ། །ཨུ་མ་མཁའ་འགྲོ་བཞིར་བཅས་ཐུགས་དམ་བསྐང་། །རྒྱལ་ཆེན་ཡུམ་ནི་ལྷ་མོ་དཔལ་ཆེན་མོ། །པདྨའི་ཕྲེང་བ་ཅན་མའི་ཐུགས་དམ་བསྐང་། །བཀྲ་ཤིས་མ་དང་དཀར་མོ་ཟས་སྦྱིན་མ། །རིན་ཆེན་རབ་སྦྱིན་མ་ཡི་ཐུགས་དམ་བསྐང་། །ནོར་གྱི་བདག་མོ་སྙན་དང་གྲགས་ཆེན་མོ། །བྱེད་པ་མོར་གྲགས་མ་ཡི་ཐུགས་དམ་བསྐང་། །པདྨའི་སྤྱན་མ་གཟི་ཆེན་འོད་ཅན་མ། །བཅུ་གཉིས་མཚན་ལྡན་ལྷ་མོའི་ཐུགས་དམ་བསྐང་། །མཚན་བཅུ་གཉིས་འདི་ཤེས་པས་ལོངས་སྤྱོད་འཕེལ་བར་གསུངས་ཕྱིར་རོ། །རྒྱལ་ཆེན་སྲས་མཆོག་ཨཱརྱ་ཛཾ་བྷ་ལ། །སྨུག་འཛིན་གནོད་གནས་དབང་པོའི་ཐུགས་དམ་བསྐང་། །སྤྲུལ་ཛམ་དཀར་འབྲུག་ཆིབས་མཁའ་འགྲོ་བཞི། །ཀུན་འཁྱིལ་ལྷ་མོ་གསུམ་བཅས་ཐུགས་དམ་བསྐང་། །གསུང་སྤྲུལ་ཛམ་དམར་སྦས་ཡུམ་རིག་བྱེད་མ། །ནོ་སྦྱིན་གཉིས་ཀྱི་ཐུགས་དམ་བསྐང་། །ཐུགས་སྤྲུལ་ཛ་ནག་གནོད་སྦྱིན་ཀླུ་ཡི་ཚོགས། །ཕྲིན་ལས་ཛེ་ཁྲ་དང་བཅས་ཐུགས་དམ་བསྐང་། །ཡོན་ཏན་ཛཾ་སེར་གནོད་སྦྱིན་ཕོ་མོ་
དགུ། །ཛཾ་སེར་ཞལ་གསུམ་ཕྱག་དྲུག་ཐུགས་དམ་བསྐང་། །ཛཾ་ལྷའི་ཡུམ་མཆོག་ལྷ་མོ་ནོར་རྒྱུན་མ། །མཆེད་ལྔ་གནོད་སྦྱིན་མོ་བརྒྱད་ཐུགས་དམ་བསྐང་། །རྒྱལ་ཆེན་བཙུན་མོ་ཀླུ་མོ་ནོར་སྐྱོང་མ། །གནོད་སྦྱིན་བུ་མོ་ལྔ་བརྒྱའི་ཐུགས་དམ་བསྐང་། །རྒྱལ་ཆེན་མཛོད་འཛིན་གཞན་གྱིས་མི་ཐུབ་པ། །རིགས་གསུམ་ལས་མཁན་བཅས་པའི་ཐུགས་དམ་བསྐང། །མངག་གཞུག་གནོད་སྦྱིན་གང་མཛེས་ཡབ་ཡུམ་དང་། །ཀླུ་རྒྱལ་གང་མཛེས་རྣམས་ཀྱི་ཐུགས་དམ་བསྐང་། །རྒྱལ་ཆེན་སྲས་པོ་དབང་པོ་དགུ་བཅུ་གཅིག །ཆོས་སྤྱན་སུམ་བརྒྱ་དྲུག་ཅུའི་ཐུགས་དམ་བསྐང་། །སྡེ་དཔོན་ཉེར་བརྒྱད་ལྗང་གནས་བཅུ་དྲུག་དང་། །ལས་མཁན་ཡེ་ཤེས་གྲགས་ཀྱི་ཐུགས་དམ་བསྐང་། །འཕྲོག་མ་བུར་བཅས་སྲིན་མོ་ཆེན་མོ་བརྒྱད། །ཡུལ་འཁོར་སྐྱོང་བ་ལྔ་བརྒྱའི་ཐུགས་དམ་བསྐང་། །གནོད་སྦྱིན་སྡེ་དཔོན་བཅུ་གཉིས་བདུན་འབུམ་འཁོར། །གནོད་སྦྱིན་བྱེ་བ་དྲུག་ཅུའི་ཐུགས་དམ་བསྐང་། །འཕགས་སྐྱེས་སྤྱན་མི་བཟང་དང་ཡུལ་འཁོར་སྲུང་། །རང་རང་དཔུང་དང་བཅས་པའི་ཐུགས་དམ་བསྐང་། །ལྷ་ཆེན་ཚོགས་བདག་ཡུམ་མཆོག་ཚེ་རིང་
མ། །མཆེད་ལྔ་འཁོར་དང་བཅས་པའི་ཐུགས་དམ་བསྐང་། །སྔགས་ཀྱི་བདག་པོ་ཀླུ་བརྒྱད་མི་མགོན་དཀར། །ནོར་རྒྱས་ཝ་རུ་ཎ་ཡི་ཐུགས་དམ་བསྐང་། །རྟ་ལྷ་རེ་མན་དང་ཀུ་བེ་ར། །ཕྱུགས་ལྷ་ལྗང་གུ་རྣམས་ཀྱི་ཐུགས་དམ་བསྐང་། །ནོར་ལྷ་རྒྱ་མཚོའི་ཐུགས་དམ་བསྐངས་གྱུར་ནས། །ཚེ་རབས་ཀུན་ཏུ་དཔལ་འབྱོར་ཕུན་ཚོགས་ཏེ། །སྦྱིན་པའི་ཕར་ཕྱིན་རྫོགས་པའི་ཕྲིན་ལས་མཛོད། །དེང་ནས་བཟུང་སྟེ་ལོངས་སྤྱོད་མངའ་ཐང་རྣམས། །ཡར་ངོའི་ཟླ་ལྟར་འཕེལ་བར་མཛད་དུ་གསོལ། །ཧཱུྃ། ཕྱི་རྒྱུད་དཀར་ཕྱོགས་དགེ་བསྙེན་རྒྱ་མཚོ་ཡི། །ཐུགས་དམ་བསྐང་ཕྱིར་དཀར་གཏོར་གསེར་གྱི་སྐྱེམས། །ཀླུ་སྨན་ཟས་ཕུད་གཡག་ལུག་ར་རྟ་གླང་། །མདའ་དར་ཞིབ་མར་བཟང་ཤིང་སྤོས་སྤྲིན་བཅས། །ཏིང་འཛིན་སྔགས་དང་ཕྱག་རྒྱས་རྒྱ་ཆེར་སྤེལ། །དབང་པོ་དྲུག་གི་སྤྱོད་ཡུལ་ཚིམ་བྱེད་འདིས། །ལྷ་བརྒྱད་ཕྱོགས་སྐྱོང་དཔལ་མགོན་བདུན་ཅུ་གཉིས། །དཀར་པོ་བརྒྱད་ཅུ་རྣམས་ཀྱི་ཐུགས་དམ་བསྐང་། །མཁའ་རི་ལྕམ་དྲལ་ཐང་ལྷ་ཤམ་པོ་གངས། །ཧ་བོ་གང་བཟང་རྣམས་ཀྱི་ཐུགས་དམ་བསྐང་། །རྡོ་རྗེ་རྒྱལ་པོ་ན་ར་སེང་སྔོན་དང་། །
བར་བློན་ཀླུ་ཆེན་མིང་སྲིང་ཐུགས་དམ་བསྐང་། །སྤྲུག་གི་བཙན་རྒོད་སྐྱ་དགུ་ནང་བློན་དང་། །ཕྱི་བློན་བདུན་བརྒྱ་ཉི་ཤུའི་ཐུགས་དམ་བསྐང་། །སྤོམ་ར་ཤེ་ནེ་ཕྱོགས་བཞིའི་གཉན་ཆེན་བཞི། །གཉན་ཕྲན་བཞི་བཅུ་རྩ་གཉིས་ཐུགས་དམ་བསྐང་། །ཨ་ཕྱི་མཆེད་ལྔ་བརྟན་མ་བཅུ་གཉིས་དང་། །སྐྱོང་མ་བཅུ་གཉིས་རྣམས་ཀྱི་ཐུགས་དམ་བསྐང་་།སྨན་བཙུན་ཆེན་མོ་རྡོ་རྗེ་འོད་འབར་མ། །མཆེད་ལྔ་སྨན་ཕྲན་འབུམ་གྱི་ཐུགས་དམ་བསྐང་། །མགུལ་ལྷ་བཅུ་གསུམ་སྨོན་སྐྱེས་མཆེད་གསུམ་དང་། །རྡོ་རྗེའི་མཚན་ཅན་འཁོར་བཅས་ཐུགས་དམ་བསྐང་། །རྡོ་རྗེ་བདུད་འཇོམས་རེ་ཏི་པོ་ཏོ་དང་། །རབ་རྔ་བྷོ་དྷི་གྷིརྟིའི་ཐུགས་དམ་བསྐང་། །ནག་པོ་བདུད་འདུལ་རྡོ་རྗེ་བདུད་འཇོམས་དང་། །ནཱ་ག་ཀ་ལི་འཁོར་བཅས་ཐུགས་དམ་བསྐང་། །དབང་ཆེན་ས་ཡི་ལྷ་མོ་ལག་ཆེན་སྲས། །འབྱུང་བ་སྤར་སྨེའི་བདག་པོའི་ཐུགས་དམ་བསྐང་། །ལོ་ཟླ་ཞག་དུས་ཕྱོགས་མཚམས་ལྷ་ཀུན་དང་། །རྗེ་བློན་བཅུ་བདུན་རྣམས་ཀྱི་ཐུགས་དམ་བསྐང་། །འགྲོ་ཀུན་སྡིག་ལྟུང་སྦྱང་ཕྱིར་བསྐང་བ་འདིས། །རིགས་དྲུག་སྙིང་རྗེའི་མགྲོན་གྱི་ཐུགས་དམ་བསྐང་། །འགྲོ་
ཀུན་བདེ་དང་ལྡན་ཕྱིར་བསྐང་བ་འདིས། །ལན་ཆགས་བུ་ལོན་མགྲོན་གྱི་ཐུགས་དམ་བསྐང་། །གཞན་ཡང་སྟོང་གསུམ་ཁམས་གནས་གཞི་ཡི་བདག །བསྟན་ལ་དགའ་བ་རྣམས་ཀྱི་ཐུགས་དམ་བསྐང་། །ཏིང་འཛིན་བསྟན་སྐྱོང་བྱེ་བ་བརྒྱད་ཅུ་དང་། །པདྨས་དམ་བཏགས་ཀུན་གྱི་ཐུགས་དམ་བསྐང་། །སྐྱོབ་པའི་ལྷ་ལྔ་བརྟེན་པའི་ལྷ་དགུ་དང་། །ཡུལ་ཕྱོགས་འདིར་གནས་རྣམས་ཀྱི་ཐུགས་དམ་བསྐང་། །ཕྱི་རྒྱུད་སྲུང་མའི་ཐུགས་དམ་བསྐངས་གྱུར་ནས། །བདག་ཅིག་དཔོན་སློབ་ཡོན་མཆོད་མི་ནོར་བཅས། །སྐྱེལ་བསུ་རོགས་དན་མཐུན་རྐྱེན་ཐམས་ཅད་སྒྲུབས། ཁ་འཛིན་སྡོང་གྲོགས་མེལ་ཚེ་མ་གཡེལ་ཅིག །ཆར་ཆུ་དུས་འབེབས་ལོ་ལེགས་འཁྲུག་པ་ཞི། །འཇིག་རྟེན་བདེ་ཞིང་དམ་ཆོས་དར་བར་མཛོད།ཅེས་པ་བསྐང་ལུང་ལས། བླ་མ་རིག་འཛིན་མན་ཆད་ནས། །བཀའ་སྲུང་ཊཱཀི་ཡན་ཆད་དུ། །བསྐང་བར་འོས་རྣམས་བསྐང་བར་བྱ། །ཞེས་གསུངས་པའི་དོན་ནོ། །བསྐང་རྫ་ས་མཐུན་རྫས་འབུལ་བ་འདི་སྤྱི་ཁྱབ་ལ། ཧཱུཾ། རྒྱ་མཚོ་ལྔ་ཡི་ལྷ་ཚོགས་ཐམས་ཅད་ལ། །སྲིད་པའི་བསྐང་རྫས་རྣམས་ཀྱིས་ཐུགས་དམ་བསྐང་། །བྱང་སེམས་དཀར་དམར་ཤ་ལྔ་བདུད་རྩི་ལྔ། །རྩ་བརྒྱད་
སྟོང་ལ་སྦྱར་བས་ཐུགས་དམ་བསྐང་། །པཉྩ་གམ་ཕྱེ་པཉྩ་རིལ་བུ་དང་། །བདུད་རྩི་ཨ་མྲྀ་ཏ་ཡིས་ཐུགས་དམ་བསྐང་། །སུ་ར་ཛ་གད་ཆང་དང་ཛཱ་ཏི་གླུམ། །རྒུན་ཆང་འབྲས་ཆང་རྣམས་ཀྱིས་ཐུགས་དམ་བསྐང་། །པདྨ་རཀྟ་རིགས་བཟང་རྩ་ཡི་ཁྲག །མུ་ལ་རཀྟ་སྦྱོར་བའི་ཁྲག་གིས་བསྐང་། །མ་ཧཱ་རཀྟ་བསྒྲལ་བའི་ཁྲག་ཆེན་པོ། །ཆ་འབྲི་མོག་རྒྱ་སྐྱེག་འབྱུང་བའི་ཁྲག་གིས་བསྐང་། །གཏའ་གཏོར་རྟེན་གཏོར་རྒྱུན་གཏོར་དུས་གཏོར་དང་། །ཐུན་གཏོར་བྷ་ལིང་ཆེན་པོས་ཐུགས་དམ་བསྐང་། །ག་ཎ་ཙཀྲ་ཚོགས་ཀྱི་འཁོར་ལོ་དང་། །ག་ན་པཱུ་ཙ་ཚོགས་ཀྱི་མཆོད་པས་བསྐང་། །ཏཱཾ་ས་ཤ་ཆེན་ཙིཏྟ་སྙིང་ཆེན་དང་། །ཀཾ་ནི་རི་ཏི་རུས་པས་ཐུགས་དམ་བསྐང་། །གོ་རོ་ཙ་ན་ཀླད་པ་རཀྟ་ཁྲག །རྒྱུ་མ་བ་སུ་ཏ་ཡིས་ཐུགས་དམ་བསྐང་། །ཟླ་རྒྱས་འཇོ་པོ་ཞོ་དང་ཟླ་ཕྲུམ་ཐུད། །ཁུར་བ་ཟླ་བ་རྒྱས་པས་ཐུགས་དམ་བསྐང་། །ཟན་ནི་རྡོ་རྗེ་ཚེ་དང་ཐུག་པ་གལ། །པུ་ཙ་མཆོད་པའི་ཚོགས་ཀྱིས་ཐུགས་དམ་བསྐང་། །གཏི་མུག་གླང་ཆེན་འདོད་ཆགས་བྱ་ཡི་གཟུགས། །ཞེ་སྡང་སྦྲུལ་དང་ང་རྒྱལ་རྟ་ཡིས་བསྐང་། །ཕྲག་དོག་མི་དང་ཀུ་ཀུ་ར་ཙ་
ཁྱི། །རྒྱུ་མཆོག་མི་ཡི་གཟུགས་ཀྱིས་ཐུགས་དམ་བསྐང་། །ཤེལ་སྒོང་ལུག་དཀར་ཤེལ་ནག་ལུག་ནག་དང་། །ཙ་ར་ར་དང་ཅང་ཤེས་རྟ་ཡིས་བསྐང་། །མཁའ་ལྡིང་སྐྱུང་ཁ་ནག་མོ་དེ་མོ་ནག །རོག་པོ་བྱ་རོག་སྤྱི་དཀར་གོ་བོས་བསྐང་། །མདངས་ལྡན་བུད་མེད་མཆོག་ཕྲན་གླིང་བུ་དང་། །མ་ཧཱ་མཆོག་ཆེན་མི་རྐང་དུང་གིས་བསྐང་། །དྲེའུ་ཆུང་ཐོད་རྔ་ལྕང་ཏེའུ་ཌཱ་མ་རུ། །རྨད་བྱུང་ཟན་དྲོན་སྒོག་ཆུས་ཐུགས་དམ་བསྐང་། །དབུགས་མེད་སྤྲོས་དང་སྲོག་མེད་མར་མེའི་མདངས། །དབུགས་ལེན་སྲོག་གི་སྒོ་ངས་ཐུགས་དམ་བསྐང་། །རྟ་ནག་གཡག་ནག་གྲི་རྒོད་སྙིང་ཆེན་གྱིས། །ཕོ་རྒྱུད་མགོན་པོའི་ཚོགས་ཀྱི་ཐུགས་དམ་བསྐང། །ལུག་ནག་དེ་མོ་མི་དབང་འབྲས་བུ་ཡིས། །མོ་རྒྱུད་ལྷ་མོ་རྣམས་ཀྱི་ཐུགས་དམ་བསྐང། །ལྷ་གཡག་སེ་བོ་རྟ་སྔོན་ནེའུ་ལེའི་མགོས། །གཏེར་བདག་ནོར་ལྷ་རྣམས་ཀྱི་ཐུགས་དམ་བསྐང་། །ཀླུ་སྨན་སྣ་ཚོགས་ཆུ་གནས་གཟུགས་འགྲོས་ཀྱིས། །སྔགས་བདག་ལ་སོགས་ཀླུ་རིགས་ཐུགས་དམ་བསྐང་། །ར་སྐྱེས་བཙན་བཤོས་ཕ་ཝཾ་ལོང་རྡོ་ཡིས། །སྐྱེས་བུ་བཙན་རིགས་དགེ་བསྙེན་ཐུགས་དམ་བསྐང་། །མེ་ལོང་མདའི་དར་
སྤོས་དཀར་དུད་པ་ཡིས། །སྲིང་ལྕམ་བརྟན་མའི་ཚོགས་ཀྱི་ཐུགས་དམ་བསྐང་། །གཡག་ལུག་དཀར་པོ་མདའ་དར་དཀར་པོ་ཡིས། །ཕྱི་རྒྱུད་སྲུང་མ་རྣམས་ཀྱི་ཐུགས་དམ་བསྐང་། །གཡར་དམ་བསྐངས་ནས་རྐྱེན་ངན་བཟློག་ཏུ་གསོལ། །རྒྱུད་གསང་འདུས་ལས་བསྐང་བའི་སྐབས་སུ། དེ་འོག་མཆོད་རྫས་རང་རྟགས་བརྗོད། ཅེས་གསུངས་པའི་ཕྱིར་རོ། །གསང་སྔགས་ཡིན་ཕྱིར་བརྡ་ཡི་སྐད། དེ་རང་གིས་ཤེས་ཕྱིར་བོད་སྐད་དུ་སྤེལ་བའོ། །དེ་ནས་བཤགས་རྒྱུད་སོགས་ཀྱི་དོན། གནོང་འགྱོད་དྲག་པོས་བཤགས་པ་སྤྱི་ཁྱབ། ཧཱུཾ། རྒྱལ་བ་རྒྱ་མཚོའི་ལྷ་ཚོགས་དགོངས་སུ་གསོལ། །བདག་དང་མཁའ་མཉམ་འགྲོ་བ་ཐམས་ཅད་ཀུན། །ཐོག་མེད་དུས་ནས་ད་ལྟ་ཡན་ཆད་དུ། །མི་དགེའི་ལས་ལམ་བཅུ་དང་མཚམས་མེད་ལྔ། །ལོག་བརྒྱད་ལྕི་བཞི་བགྱིད་དམ་བགྱིད་དུ་སྩོལ། །དེ་དག་བགྱིས་ལ་ཡི་རང་བྱས་པ་ཀུན། །མི་འཆབ་མི་སྦེད་གནོང་འགྱོད་སོ་སོར་བཤགས། །སྐྱེ་བ་འདི་དང་ཚེ་རབས་གཞན་རྣམས་སུ། །བསྟན་ལ་ཞུགས་ནས་སྐྱབས་འགྲོའི་བསླབ་པ་དགུ། །གསོ་སྦྱོང་ཡན་ལག་བརྒྱད་དང་རྟེན་ཁྲིམས་ལྔ། །རབ་བྱུང་སྡོམ་པ་བཅུ་པོ་ཡན་ལག་བཅས། །བསྙེན་རྫོགས་འདུལ་ཁྲིམས་ཉིས་
བརྒྱ་ལྔ་བཅུ་གསུམ། །ཕམ་ལྷག་སྦོམ་པོ་སྤང་ལྟུང་སོར་བཤགས་དང་། །ཉེས་བྱས་ལ་སོགས་གང་བྱུང་མཐོལ་ལོ་བཤགས། །དང་པོ་བྱང་ཆུབ་སེམས་བསྐྱེད་ནས་བཟུང་སྟེ། །ནག་པོའི་ཆོས་བཞི་ལྟུང་བ་ལྔ་ལྔ་བརྒྱད། །སྡོམ་པ་ཉི་ཤུར་གང་འགལ་མཐོལ་ལོ་བཤགས། །གཞན་ཡང་མདོ་སྡེ་རྣམས་ལས་གསུངས་པ་ཡི། །རྒྱལ་བའི་སྲས་ཀྱི་སྤྱོད་དང་གང་འགལ་བ། །མཐོལ་ལོ་བཤགས་སོ་སྒྲིབ་པར་མ་གྱུར་ཅིག །གསང་སྔགས་ཕྱི་ནང་དབང་ཐོབ་ནས་བཟུང་སྟེ། །བརྟུལ་ཞུགས་ཉེར་ལྔ་རིགས་ལྔའི་ཕྱི་ནང་སྡོམ། །རྩ་ལྟུང་བཅུ་བཞི་ཡན་ལག་ལྟུང་བ་དགུ། །རྣམ་པ་བཅུ་བཞི་རྩ་བ་སྐུ་གསུང་ཐུགས། །ཡན་ལག་དམ་ཚིག་ཉི་ཤུ་རྩ་ལྔ་སོགས། །དམ་ཚིག་ས་ཡ་འབུམ་སྡེ་ཐམས་ཅད་ལ། །ཉམས་ཆག་འགལ་འཁྲུལ་གང་མཆིས་ཐམས་ཅད་བཤགས། །དེ་ནས་སྤྲོ་ན། ཀྱེ་མ་དགོངས་ཤིག་རིག་འཛིན་གྲུབ་ཐོབ་ཚོགས། །ཐོག་མེད་དུས་ནས་ད་ལྟ་ཡན་ཆད་དུ། །སྒྱུ་ལུས་བསྐྱེད་པའི་ཕ་མ་དྲིན་ཆེན་ལ། །དྲིན་ལ་ལན་གྱིས་མ་ལོན་མཐོལ་ལོ་བཤགས། །རིག་གནས་ཅུང་ཟད་བསླབ་པ་ཡན་ཆད་ལ། །དྲིན་ལན་བཀུར་སྟི་མ་བགྱིས་མཐོལ་ལོ་བཤགས། །
འདུལ་བ་ལས་བཤད་བླ་མ་ལྔ་པོ་ལ། །ཕ་ལྟར་བཀུར་སྟི་མ་བྱས་མཐོལ་ལོ་བཤགས། །སེར་མོའི་རྟགས་ཙམ་འཛིན་པ་ཡན་ཆད་ལ། །ཡིད་དགའ་དང་སེམས་མ་སྐྱེས་མཐོལ་ལོ་བཤགས། །སྨོན་སེམས་ལན་གཅིག་སྐྱེས་པ་ཡན་ཆད་ལ། །སྟོན་པའི་འདུ་ཤེས་མ་བཞག་མཐོལ་ལོ་བཤགས། །དབང་བསྐུར་གཅིག་ཙམ་ཞུས་པ་ཡན་ཆད་ལ། །ཡི་དམ་དངོས་སུ་མ་བལྟས་མཐོལ་ལོ་བཤགས། །གནས་ལུགས་རང་ངོ་སྤྲོད་པའི་བློ་མ་དེ། །རྡོ་རྗེ་འཆང་དུ་མ་བལྟས་མཐོལ་ལོ་བཤགས། །དེ་ལ་བདེ་གཤེགས་བཤགས་པ་མཐུད། ཀྱེ་མ་དགོངས་ཤིག་རྒྱལ་བ་རྒྱ་མཚོའི་ཚོགས། །བདག་ནི་འཁོར་བར་འཁོར་ཚེ་ཐམས་ཅད་དུ། །ཉོན་མོངས་འཁྲུལ་པའི་དབང་གྱུར་སྡིག་པའི་ལས། །ཅི་དང་ཅི་བགྱིས་ཐམས་ཅད་མཐོལ་ལོ་བཤགས། །སོ་སོར་ཐར་པའི་ཆོས་ཀྱི་སྒོར་ཞུགས་ནས། །གཞན་གནོད་གཞིར་བཅས་མི་སྤངས་མཐོལ་ལོ་བཤགས། །བྱང་ཆུབ་སེམས་དཔའི་སྡེ་སྣོད་སྒོར་ཞུགས་ནས། །གཞན་ཕན་གཞིར་བཅས་མ་བསྒྲུབས་མཐོལ་ལོ་བཤགས། །གསང་སྔགས་རྡོ་རྗེ་ཐེག་པའི་སྒོར་ཞུགས་ནས། །ཐབས་ཤེས་ཟུང་དུ་མ་ཆུད་མཐོལ་ལོ་
བཤགས། །ལྟ་བ་གཞི་ཡི་གནས་ལུགས་མ་རྟོགས་པས། །ལྟ་ལོག་དྲུག་ཅུར་གོལ་བ་མཐོལ་ལོ་བཤགས། །སྒོམ་པ་ཉམས་ལེན་བརྟན་པ་མ་ཐོབ་པས། །སྲིད་རྩེ་ཡན་དུ་མ་འཕགས་མཐོལ་ལོ་བཤགས། །སྤྱོད་པ་དུས་ཚོད་ཐིག་ལ་མ་འཕྲོད་པས། །བར་ཆད་དབང་དུ་ཤོར་བ་མཐོལ་ལོ་བཤགས། །འབྲས་བུ་གཞི་འབྲས་དབྱེར་མེད་མ་རྟོགས་པས། རེ་དང་དོགས་པས་བཅིངས་བ་མཐོལ་ལོ་བཤགས། །དེ་ལ་ཡི་དམ་བཤགས་པ་མཐུད། ཀྱེ་མ་དགོངས་མཛད་དཔའ་བོ་ཁྲོ་རྒྱལ་ཚོགས། །ཐོག་མེད་དུས་ནས་དེ་རིང་ཡན་ཆད་དུ། སྔགས་དང་ཕྱག་རྒྱ་ཏིང་འཛིན་སྒོར་ཞུགས་ནས། །གཞུང་བཞིན་མ་གྱུར་ཉེས་པ་ཅི་མཆིས་བཤགས། །བསྐྱེད་རིམ་མ་བརྟེན་མི་གསལ་ཐེར་ཟུག་གོལ། །སྦྱང་གཞི་སྦྱོང་བྱེད་མ་འཕྲོད་མཐོལ་ལོ་བཤགས། །བཟླས་བརྗོད་མ་དག་སྒྲ་ཟུར་རིང་ཐུང་ཉམས། །གཞན་ཚིག་ངག་དང་འདྲེས་པ་མཐོལ་ལོ་བཤགས། །ཏིང་འཛིན་བསྐྱེད་རྫོགས་ཡ་བྲལ་ཟུང་མ་ཆུད། །ཕྱག་རྫོགས་རྟོགས་པ་མ་འཁྲུངས་མཐོལ་ལོ་བཤགས། །རྟགས་མཚན་བཟང་ངན་དགའ་སྡུག་འཛིན་པོ་ཆེ། །རྟགས་བཟང་རློམ་སེམས་ཆེས་པ་མཐོལ་ལོ་བཤགས། །
རྙེད་བཀུར་ཆེད་དུ་ཞིང་བཅུའི་སྲུང་ཟློག་བགྱིས། །ཆོས་སྐྱོང་བརྡུང་གཏག་བཏང་བ་མཐོལ་ལོ་བཤགས། །བསྙེན་སྒྲུབ་དྲོད་རྟགས་མ་ཐོན་ལས་ལ་སྦྱར། །རྟག་ཆད་ལྷ་ལ་ལོག་ལྟ་མཐོལ་ལོ་བཤགས། །ཚེ་འདིའི་ནུས་མཐུའི་ཆེད་དུ་ཁྲོ་རྒྱལ་བསྒྲུབས། །བྱང་ཆུབ་དོན་དུ་མི་དམིགས་མཐོལ་ལོ་བཤགས། །མཁའ་འགྲོའི་བཤགས་པ། ༈ ཀྱེ་མ་དགོངས་ཤིག་དཔའ་བོ་ཌཱཀིའི་ཚོགས། །ཐོག་མེད་དུས་ནས་ད་ལྟའི་ཆུ་ཚོད་བར། །མ་སྲིང་མཁའ་འགྲོ་ནམ་བསྟེན་དེ་ཡི་ཚེ། །དམ་ཚིག་ཉམས་ཆག་ཅི་མཆིས་མཐོལ་ལོ་བཤགས། །སྒྲུབ་གནས་གནས་བཟང་མ་བསྟེན་གྲོང་ནག་སྒྲུབ། །དམ་རྫས་མ་འཚོགས་ཐམས་ཅད་མཐོལ་ལོ་བཤགས། །དུས་བཟང་ཚོགས་གཏོར་མར་མེ་སྦྱིན་སྲེག་ཆག །རྟགས་མཚན་གཞན་ལ་བསྒྲགས་པ་མཐོལ་ལོ་བཤགས། །རྩ་རླུང་མ་འབྱོངས་ཀུན་བྱང་སེམས་ཉམས། །ཚོད་མིན་ལས་རྒྱ་བསྟེན་པ་མཐོལ་ལོ་བཤགས། །གནས་ཡུལ་ཕྱི་ནང་རྟེན་འབྲེལ་བསྒྲིགས་མ་ཤེས། །བུད་མེད་སྤྱི་ལ་སྨོད་པ་མཐོལ་ལོ་བཤགས། །རང་གི་རྩ་དང་རླུང་དང་བྱང་ཆུབ་སེམས། །དཔའ་བོ་མཁའ་འགྲོར་མ་རྟོགས་མཐོལ་ལོ་བཤགས། །
གནས་གྲིབ་གྲོང་གྲིབ་ཟས་གོས་གྲིབ་ཀྱི་གོས། །གཞན་གྱིས་ཉམས་པ་བསྐང་བ་མཐོལ་ལོ་བཤགས། །རྒྱུད་དང་རྒྱ་གཞུང་གཏེར་ཆོས་བསྲེ་སླད་དཀྲུགས། །དབང་བཞི་ཁྲོམ་ཆོས་བྱས་པ་མཐོལ་ལོ་བཤགས། །ཟས་ནོར་འདོད་ཕྱིར་སྣོད་མིན་གསང་སྔགས་བསྟན། །སྣོད་དང་ལྡན་ལ་མ་བསྟན་མཐོལ་ལོ་བཤགས། །རབ་བྱུང་གསང་དབང་གསུམ་པ་དངོས་སུ་བསྐུར། །སྙན་བརྒྱུད་ཡི་གེར་བྲིས་པ་མཐོལ་ལོ་བཤགས། །ཀྱེ་མ་དགོངས་ཤིག་དམ་ཅན་སྲུང་མའི་ཚོགས། །ཐོག་མེད་དུས་ནས་ད་ལྟ་འདི་ཡི་བར། །ཆོས་སྐྱོང་སྲུང་མ་ནམ་དང་ནམ་བསྟེན་ཆེ། །ཆག་ཉམས་འགལ་འཁྲུལ་ཅི་མཆིས་མཐོལ་ལོ་བཤགས། །རྟེན་གསུམ་གཞིག་གཞོམ་བྱས་དང་ལྷ་ཆ་སློང་། །འཕྲོག་པའི་དཀོར་ཟས་ཟོས་པ་མཐོལ་ལོ་བཤགས། །རྟེན་རྫས་སྒྲུབ་རྫས་མཆོད་རྫས་བསྐང་བའི་རྫས། །དགོས་པའི་དམ་རྫས་མ་འཛོམ་མཐོལ་ལོ་བཤགས། །ལྟ་བས་མ་ཆུན་གཉེན་པོས་སྒྲུབ་མ་ཐེམ། །བསྙེན་སྒྲུབ་གཞུང་བཞིན་མ་བྱས་མཐོལ་ལོ་བཤགས། །གསང་བའི་མན་ངག་དབང་ལུང་གཞན་ལ་སྤེལ། །དམ་རྫས་གཞན་གྱིས་མཐོང་བ་མཐོལ་ལོ་བཤགས། །ཉ་སྟོང་བརྒྱད་
དང་དགུ་གསུམ་རྒྱུ་བའི་དུས། །ཚོགས་གཏོར་དུས་གཏོར་ཆག་པ་མཐོལ་ལོ་བཤགས། །བསྟེན་གཏོར་གཏའ་གཏོར་རྒྱུན་གཏོར་ཐུན་གཏོར་དང་། །ལོ་དུས་བསྐང་གསོལ་ཆག་པ་མཐོལ་ལོ་བཤགས། །བསྟན་དོན་མ་དམིགས་རང་དོན་ཁོ་ནར་དམིགས། །དོན་ཆུང་ལས་སྦྱོར་ཆེས་པ་མཐོལ་ལོ་བཤགས། །སྲོག་སེལ་མནན་གཏད་ག་སྦྱོར་ངན་མང་། །ཆོས་སྐྱོང་ཐུགས་ཀྱིས་ཁྲེལ་གྱུར་མཐོལ་ལོ་བཤགས། །བསྒྲལ་བའི་རྣམ་ཤེས་ཞིང་ཁམས་སྤར་མ་ནུས། །མུ་སྟེགས་སྤྱོད་པར་སོང་བ་མཐོལ་ལོ་བཤགས། །བྱ་ཁྱི་ནག་པོར་འཚེ་དང་སྤོས་སྦྱོར་མེད། །ཕོ་རྒྱུད་མགོན་པོའི་ཚོགས་ལ་མཐོལ་ལོ་བཤགས། །བོང་བུ་ཡུགས་ས་ནེའུ་ལེ་ལ་སྡང་། །མེ་དང་འཚུབ་མར་མ་དགའ་ལྷ་མོར་བཤགས། །ནལ་ཕྲུག་སྦྲུམ་མར་མ་བྱམས་ཁ་འཕྲོ་འདྲེས། །ཕྲེང་བ་གཞན་གྱིས་རེག་པ་ཁོལ་མོར་བཤགས། །རྟོག་ཆེད་གོས་དྲོན་གཡར་དང་སྒྲུབ་གཏོར་བྱིན། །དགྲ་དང་མནའ་བཞག་དམ་ཅན་ཚོགས་ལ་བཤགས། །གཞན་ཡང་ཆོས་སྐྱོང་སྤྱི་དང་བྱེ་བྲག་གི །དམ་ཚིག་གང་དང་ཅི་འགལ་ཐམས་ཅད་བཤགས། །ནོར་ལྷ་སྤྱིའི་བཤགས་པ། ཀྱེ་མ་
དགོངས་ཤིག་གཏེར་བདག་ནོར་ལྷའི་ཚོགས། །ཚེ་རབས་འདི་དང་ཚེ་རབས་ཐམས་ཅད་དུ། །བརྣབ་སེམས་སེར་སྣ་རྐུ་འཕྲོག་སྦྱིན་པའི་གེགས། །གང་དང་ཅི་བགྱིས་འགྱོད་པས་སོ་སོར་བཤགས། །བསྟན་འགྲོ་བླ་མའི་དོན་དུ་མི་དམིགས་པར། །རང་དོན་སྒེས་མནོག་བསྒྲུབ་སེམས་མཐོལ་ལོ་བཤགས། །བསྙེན་སྒྲུབ་མཆོད་རྫས་དམ་རྫས་མ་འཚོགས་དང་། །མཆོད་པ་ཆུང་ཞིང་ངན་པ་མཐོལ་ལོ་བཤགས། །རྟ་བོང་ཤ་དང་ཡུགས་སའི་ཕྱག་ཚང་ཟས། །གས་ཆག་སྣོད་དུ་ཟོས་པ་མཐོལ་ལོ་བཤགས། །རྟ་ནག་ཞོན་དང་ཞྭ་གོས་ནག་པོ་གྱོན། །གཏོར་མ་བྱ་ཁྱིར་བྱིན་པ་མཐོལ་ལོ་བཤགས། །སྟོད་གཡོགས་སྔོན་པོ་ལུང་ཐང་ཕྲེང་བ་མེད། །རོ་འཇུས་རོ་གདན་བཏིང་བ་མཐོལ་ལོ་བཤགས། །ནང་གྲོལ་གཏོར་མ་བརྒྱན་དང་གཏོར་སྣོད་བཤལ། །དམ་རྫས་གཞན་ལ་བྱིན་པ་མཐོལ་ལོ་བཤགས། །དེ་སོགས་ནོར་ལྷ་སྤྱི་དང་ཁྱད་པར་གྱི། །དམ་ཚིག་གང་དང་གང་འགལ་ཐམས་ཅད་བཤགས། །སྲུང་མ་ཕྱི་རྒྱུད་བཤགས་པ། ༈ ཀྱེ་ཧོ། དགོངས་མཛོད་ཕྱི་རྒྱུད་སྲུང་མའི་ཚོགས། །བདག་ཅག་དཔོན་སློབ་ཡོན་མཆོད་བསྲུང་བྱ་ཡི། །ཡང་མྱེས་བདུན་བརྒྱུད་
ནས་བཟུང་ཡང་ཚ་ཡན། །ཕོག་ཐུག་འགྲམ་འཁྲུག་གང་བྱུང་ཐམས་ཅད་བཤགས། །མནན་བསྲེག་འཕང་གསུམ་ཐུན་ཟོར་དྲག་པོའི་སྔགས། །རྒྱུ་དུས་ཐེབས་ལྡོག་མ་ཤེས་གང་བྱས་བཤགས། །དཀར་ཐབ་དམར་ཐབ་སྔོ་ཐབ་ཇ་ཡི་ཐབ། །མི་རུང་རོ་བསྲེག་གསུར་གཞོབ་གང་བྱས་བཤགས། །ནགས་ཚལ་ཤིང་གཅིག་རྩྭ་སྔོ་གཉན་པོ་ཆ་སོགས། །བྲེག་ཏུ་མི་རུང་གང་བྲེག་ཐམས་ཅད་བཤགས། །བྲག་བཤིག་རྡོ་རློག་རྦབ་གཏང་ཕ་ཝང་གསེས། །ནེའུ་སེང་ཞིང་མུ་ས་གཉན་བརྐོས་པ་བཤགས། །ན་ཉེས་ཤི་ཉེས་རོ་དང་བག་མ་ཉེས། །མཁར་ལེན་ཤིང་དང་དམག་ཁྲོམ་ཉེས་པ་བཤགས། །།མནའ་གཉན་སྐྱེལ་ལེན་མནའ་ཟོས་དཔང་པོ་བྱས། །རྡོ་ལྕགས་གནུར་དང་མར་ཁུ་བསྐོལ་བ་བཤགས། །རི་མེ་བཀྱེས་དང་བྱ་གཅན་རི་དྭགས་བསད། །རྒྱ་བྲེས་སྙི་དང་ཤ་དོང་བསྐོས་པ་བཤགས། །ལྕགས་ཀྱུ་འཕངས་དང་ཉ་རྒྱ་ཆུར་གནས་བསད། །ཁྲག་བཙོ་ངན་|རྫས་ཆུ་རུ་བསྐུར་བ་བཤགས། །སྤར་སྨེ་ལོ་ཟླ་ཞག་དུས་འབྱུང་བ་ཡི། །འཛེམ་པའི་རྫ་ས་བླངས་མི་རུང་གང་བྱས་བཤགས། །གཟའ་སྐར་དུས་ཚེས་ལོ་དང་ཟླ་བ་ལ། །མི་རུང་
བྱ་བ་གང་དང་གང་བྱས་བཤགས། །བཙས་དང་ཤི་དང་ཁྱིམ་གཅིག་འདུས་པ་ལ། །འབྱུང་བའི་གཅོད་འདྲལ་མི་རུང་གང་བྱུང་བཤགས། །ཕྱི་རྒྱུད་ལྷ་འདྲེ་གཞི་བདག་གནོད་པ་ལ། །རྙེད་བཀུར་འདོད་ཕྱིར་བརྡུང་གཏག་གང་བྱས་བཤགས། །གཞུང་ཆུ་ཡུར་དྲངས་ཆུ་མིག་བསུབ་དང་བརྡུངས། །དྲག་འབོད་ཆར་དང་ཐོག་སེར་ཕབ་པ་བཤགས། །དམིགས་ངན་མང་ཤིང་གསོ་བའི་དམིགས་རིམ་ཉུང་། །ལྷ་འདྲེ་དགྲར་བཟུང་ཐུབ་ཐུབ་བྱས་པ་བཤགས། །སྲིད་པའི་ལྷ་རབ་བརྟན་མ་ཡུལ་གྱི་ལྷ། །ལོ་ཟླ་དུས་ཀྱི་མཆོད་གསོལ་ཆགས་པ་བཤགས། །ལྷ་ཚོགས་སྤྱིའི་དྲུང་ནས་སེམས་བསྐྱེད་ཀྱི་བཤགས་པ། ༈ ཀྱེ་མ་དགོངས་ཤིག་ཡེ་ཤེས་འཇིག་རྟེན་གྱི། །ལྷ་ཚོགས་མ་ལུས་ཐམས་ཅད་དགོངས་སུ་གསོལ། །བདག་དང་མཐའ་ཡས་སེམས་ཅན་ཐམས་ཅད་ཀྱི། །མི་རུང་མི་དགེ་ཅི་བགྱིས་བདག་གིས་བཤགས། །ནམ་མཁའི་མཐའ་མཉམ་སེམས་ཅན་མ་ལུས་པའི། །སྡིག་སྒྲིབ་ཉེས་ལྟུང་མཐའ་དག་མ་ལུས་པ། །བདག་ལ་སིབ་ཀྱིས་བསྟིམས་ནས་བདག་ཁོ་ནས། །རྒྱ་མཚོ་ལྔ་ཡི་ལྷ་ཚོགས་དྲུང་དུ་བཤགས། །དེ་ལྟར་བདག་གི་ལྷག་བསམ་རྣམ་དག་མཐུས། །
འགྲོ་ཀུན་སྡུག་བསྔལ་ཀུན་བྲལ་བདེ་སྐྱིད་ལྡན། །ས་དང་ལམ་གྱི་ཡོན་ཏན་རབ་རྫོགས་ནས། །རྡོ་རྗེ་སེམས་དཔའི་གོ་འཕང་མྱུར་ཐོབ་ཤོག །ཐོག་མེད་དུས་ནས་ད་ལྟ་ཡན་ཆད་ཀྱི། །སྡིག་ལྟུང་ཐམས་ཅད་མི་འཆབ་མི་སྦེད་དོ། །རབ་ཏུ་གནོང་ཞིང་ཤིན་ཏུ་འགྱོད་སེམས་ཀྱིས། །སོ་སོར་བཤགས་སོ་བྱང་ཞིང་དག་གྱུར་ཅིག །ལྷ་ཚོགས་སྤྱིའི་མན་ངག་གི་དམིགས་རིམ། མཐོལ་བཤགས་ཕུལ་བས་ཐུགས་རྗེས་བཟོད་པར་བཞེས། །སྐུ་གསུང་ཐུགས་ལས་འོད་ཟེར་བདུད་རྩིའི་རྒྱུན། །བདག་གི་གནས་གསུམ་དུ་ཐིམ་སྒྲིབ་ཀུན་དག །ཉེས་ལྟུང་དེ་དག་ཉེས་པར་མཐོང་ངམ་གསུངས། །མཐོང་ལགས་ཞུས་པས་ཕྱིན་ཆད་བསྡོམས་སམ་གསུངས། །སྡོམ་ལགས་ཞུས་པས་དེ་ནི་ཐབས་ཡིན་གསུངས། །ལེགས་སོ་ཞུས་པས་དགེ་གསོ་སྡིག་པ་སྦྱོང་། །ལྷ་རྣམས་ཐུགས་རྗེའི་འོད་ཀྱིས་རབ་བསྐུལ་ཏེ། །རྡོ་རྗེ་སེམས་དཔའ་དུང་མདོག་ལོངས་སྤྱོད་རྫོགས། །རྡོར་དྲིལ་བསྣམས་ཤིང་༔ པད་དཀར་ཟླ་སྟེང་རོལ། །འོག་མིན་གནས་ནས་སྤྱན་དྲངས་ནམ་མཁར་བཞུགས། །ཡིག་བརྒྱའི་སྔགས་སྒྲ་འཇིག་རྟེན་ཁྱབ་པར་བསྒྲགས། །རིགས་དྲུག་སེམས་ཅན་ཀུན་གྱི་
སྒྲིབ་པ་སྦྱངས། །རྡོར་སེམས་གནས་གསུམ་ཟླ་སྟེང་འབྲུ་གསུམ་མཐར། །ཡིག་བརྒྱ་དཀར་དམར་མཐིང་གསུམ་གཡས་སུ་འཁོར། །དེ་ལས་ཡིག་བརྒྱ་ཚན་གསུམ་དཔག་མེད་འཕྲོས། །ལྷ་ཚོགས་ཀུན་གྱི་གནས་གསུམ་འབྲུ་གསུམ་མཐར། །ཞུགས་ཤིང་འཁོར་བས་སྐུ་གསུང་ཐུགས་དམ་བསྐུལ། །ལྷ་ཚོགས་གནས་གསུམ་ནས་འཕྲོས་ཡིག་བརྒྱ་གསུམ། །བདག་དང་བསྲུང་བྱའི་གནས་གསུམ་འབྲུ་གསུམ་མཐར། །གཡས་སུ་འཁོར་བས་སྒོ་གསུམ་ཉམས་ཆག་དག །རྡོར་སེམས་སྐུ་གསུང་ཐུགས་དང་དབྱེར་མེད་གྱུར། །དེ་དག་མན་ངག་གི་དམིགས་རིམ་ཤིན་ཏུ་ཟབ་བོ། །ཨོ་ས་མ་ཡ། ཨཱས་མ་ཡ། ཧཱུཾ་ས་མ་ཡ། ཨོཾ་ཨཱཿཧཱུཾ་ཧྲཱིཿ ཨོཾ་མ་ཎི་པདྨེ་ཧཱུཾ། འདིར་ཡི་དམ་གང་བྱེད་བཅུག་ཏུ་རུང་ངོ་། །ཨོཾ་བཛྲ་སཏ་ས་མ་ཡ། ནས་སཏཱ་དམ་ཚིག་ཉམས་ན་ས་མ་ཡ། དམ་ཚིག་སྔགས་ཀྱིས་སྡེབ། ཟབ་མོའོ། །ཨྠྀི། དེ་ལྟར་བཤགས་ཚིག་ཡིག་བརྒྱས་གསུང་གི་བསྐང་བ་ཡང་ཟེར་རོ། ༈ །ལྟ་བའི་བཤགས་པ། ཧཱུྃ། སྣོད་བཅུད་སྐྱེ་འགྲོ་སྣང་སྲིད་འཁོར་འདས་ཀུན། །བདག་ལས་གཞན་དུ་གྲུབ་པ་རྡུལ་ཙམ་མེད། །དཔེར་ན་རྨི་ལམ་ཡུལ་གྱི་སྐྱེ་འགྲོ་བཞིན། །བདག་གི་ལུས་ནི་སྒྱུ་མ་རྨི་ལམ་འདྲ། །
སེམས་ནི་དངོས་པོ་མ་གྲུབ་སྤྲོས་དང་བྲལ། །ལུས་སེམས་གང་ལའང་སྙིང་པོ་མ་མཆིས་ན། །བདག་ཅེས་བྱ་བ་ཡོད་པར་ག་ལ་འགྱུར། །བདག་མེད་རྟོགས་ན་ལས་མེད་རྣམ་སྨིན་མེད། །སྡིག་སྒྲིབ་ཉམས་ཆག་ཀུན་ཀྱང་ཡོད་མིན་ཏེ། །རི་བོང་རྭ་ཡིས་བརྡུངས་བའི་རྨ་དང་ཁྲག །མོ་གཤམ་བུ་ཡིས་བསད་པའི་མི་རོ་བཞིན། །ཇི་ལྟར་ནམ་མཁར་དྲི་མས་མི་གོས་ལྟར། །ཆོས་རྣམས་གདོད་ནས་རྣམ་དག་ཆོས་ཀྱི་དབྱིངས། །ཡོད་མེད་སྐྱེ་འགགས་བྲལ་བའི་ངང་ལ་ཞོག །བསྐང་བྱ་སྐོང་བྱེད་བྲལ་བའི་ཐུགས་དམ་བསྐང་། །ཨོཾ་སྭ་བྷ་ཝ་ཤུདྡྷསརྦ་དྷརྨསྭ་བྷ་ཝ་ཤུདྡྷོཉཧཾཿ བཀའ་བརྒྱད་རྒྱུད་གསང་བ་འདུས་པ་ལས། །གསང་བ་གཉིས་མེད་ལྟ་བས་བསྐང་། །བསྐང་རྫས་ལྷ་སེམས་སྐོང་བྱེད་ཀྱི། །མཁན་པོ་དག་ཀྱང་རང་གི་སེམས། །བསྐང་བའི་རྫས་ཀྱང་སེམས་ཡིན་པས། །སེམས་ཉིད་གཞི་རྩ་བྲལ་བའི་ཕྱིར། །མཆོད་བྱ་མཆོད་བྱེད་གཉིས་མེད་པས། །གཉིས་མེད་དོན་གྱི་ཐུགས་དམ་བསྐང་། །ཞེས་དང་། བཤགས་རྒྱུད་ལས། ཡིད་ཀྱི་སྒོ་ནས་ཉམས་ཆག་བྱུང་ན་ཐུགས་ཀྱི་ལྟ་བས་བསྐང་སྟེ། ཞེས་དང་། སྐུ་རྒྱུད་ཤེལ་གྱི་རི་བོ་ལས། །སྣང་སྲིད་གཞིར་བཞེངས་ཆེན་པོའི་ཀློང་། །བླང་དོར་བྲལ་བས་ཐུགས་དམ་བསྐང་། །བསྐང་བྱ་སྐོང་བྱེད་བསྐང་བའི་ཡུལ། །མཉམ་ཉིད་
རོལ་པ་ཆེན་པོས་བསྐང་། །ཞེས་གསུངས་པའི་དོན་ནོ། །ཉམས་ཆག་བསྐངས་ནས་རྐྱེན་སོགས་བཟློག་པ་ནི། བླ་མ་རིག་འཛིན་བཟློག་པ། ཧཱུཾ། རིག་འཛིན་རྒྱ་མཚོའི་ཐུགས་དམ་བསྐངས་གྱུར་ནས། །སྲིད་པའི་འཁྲུལ་པ་ཞི་བདེའི་གོལ་ས་ཟློག །སྐྱོ་ཤས་དྲག་པོས་དལ་འབྱོར་སྟོང་ལོག་ཟློག །འཆི་བ་དྲན་པས་ཚེ་འདིས་ཞེན་འཁྲིས་ཟློག །ཉེས་དམིགས་དྲན་པས་འཁོར་བའི་ཆགས་ཞེན་ཟློག །བྱམས་དང་སྙིང་རྗེས་ཐེག་དམན་གོལ་ས་ཟློག །བྱིན་རླབས་དབང་གིས་སྒོ་གསུམ་མ་སྨིན་ཟློག །ཐོས་བསམ་འབྲེལ་པས་བླུན་སྒོམ་ཨུ་ཚུག་ཟློག །མོས་གུས་དྲག་པོས་དྲེད་པོ་ཆོས་སྡུག་ཟློག །ཏིང་འཛིན་གེགས་སྐྱོན་རང་རང་ངོ་ལྟས་ཟློག །རྣམ་རྟོག་ཐམས་ཅད་ཆོས་ཀྱི་སྐུ་རུ་ཟློག །འཁོར་བ་ཐམས་ཅད་མྱ་ངན་འདས་པར་ཟློག །སྣང་སྲིད་ཐམས་ཅད་ཕྱག་རྒྱ་ཆེན་པོར་ཟློག །མ་གཡེལ་བྱིན་ཕོབ་གྲུབ་ཐོབ་རྒྱ་མཚོའི་ཚོགས། །ཐུགས་རྗེ་དུས་ལ་བབ་བོ་ས་མཱ་ཡ། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུཾ། ཨི་མ་དྷི་རུ་ས་པ་ན་རི་སྭཱ་ཧཱ། རྟོགས་པ་གོང་དུ་སྤོར་བའི་སྔགས་སོ། ༈ །བདེ་གཤེགས་རྣམས་ཀྱི་ཟློག་པ། ཧཱུཾ། རྒྱལ་བ་རྒྱ་མཚོའི་ཐུགས་དམ་བསྐངས་གྱུར་ནས། །མ་དག་འཁོར་བའི་
འཁྲུལ་སྣང་ཐམས་ཅད་ཟློག །གཟུགས་ཕུང་རྣམ་སྣང་སྤྱན་རས་གཟིགས་སུ་ཟློག །རྣམ་ཤེས་རྡོ་རྗེ་སྤྱན་རས་གཟིགས་སུ་ཟློག །ཚོར་བ་རིན་ཆེན་སྤྱན་རས་གཟིགས་སུ་ཟློག །འདུ་ཤེས་པདྨ་སྤྱན་རས་གཟིགས་སུ་ཟློག །འདུ་བྱེད་ཀརྨ་སྤྱན་རས་གཟིགས་སུ་ཟློག །གཏི་མུག་ཆོས་དབྱིངས་ཡེ་ཤེས་ངང་དུ་ཟློག །ཞེ་སྡང་མེ་ལོང་ཡེ་ཤེས་ངང་དུ་ཟློག །ང་རྒྱལ་མཉམ་ཉིད་ཡེ་ཤེས་ངང་དུ་ཟློག །འདོད་ཆགས་སོར་རྟོག་ཡེ་ཤེས་ངང་དུ་ཟློག །ཕྲག་དོག་བྱ་གྲུབ་ཡེ་ཤེས་ངང་དུ་ཟློག །ས་ཡི་ཁམས་རྣམས་སངས་རྒྱས་སྤྱན་མར་ཟློག །ཆུ་ཡི་ཁམས་རྣམས་མཱ་མ་ཀཱི་རུ་ཟློག །མེ་ཡི་ཁམས་རྣམས་ན་བཟའ་དཀར་མོར་ཟློག །རླུང་གི་ཁམས་རྣམས་དམ་ཚིག་སྒྲོལ་མར་ཟློག །ནམ་མཁའི་ཁམས་རྣམས་དབྱིངས་ཕྱུག་མ་རུ་ཟློག །ཁྲིག་གི་ཁམས་རྣམས་རྡོ་རྗེ་མཁའ་འགྲོར་ཟློག །ཤ་ཡི་ཁམས་རྣམས་རིན་ཆེན་མཁའ་འགྲོར་ཟློག །དྲོད་ཀྱི་ཁམས་རྣམས་པདྨ་མཁའི་འགྲོར་ཟློག །དབུགས་ཀྱི་ཁམས་རྣམས་ལས་ཀྱི་མཁའ་འགྲོར་ཟློག །སེམས་ནི་ཡུམ་ཆེན་རྡོ་རྗེ་ཕག་མོར་ཟློག །རྣམ་ཤེས་ཚོགས་བརྒྱུད་ཉེ་སྲས་བརྒྱད་དུ་ཟློག །ཡུལ་བརྒྱད་
སྒེག་སོགས་སེམས་མ་བརྒྱུད་དུ་ཟློག །རིགས་དྲུག་རྟོག་པ་ཐུབ་ཆེན་དྲུག་ཏུ་ཟློག །རྟག་ཆད་སྒོ་བཞི་ཁྲོ་ཆེན་བཞི་རུ་ཟློག །སྐྱེ་གནས་བཞི་པོ་སྒོ་མ་བཞི་རུ་ཟློག །དམྱལ་བའི་འཇིག་རྟེན་མངོན་དགའི་ཞིང་དུ་ཟློག །ཡི་དྭགས་འཇིག་རྟེན་བདེ་བ་ཅན་དུ་ཟློག །དུད་འགྲོའི་འཇིག་རྟེན་འཐུག་པོ་བཀོད་པར་ཟློག །ལྷ་མིན་འཇིག་རྟེན་ལས་རབ་རྫོགས་པར་ཟློག་ལྷ་ཡི་འཇིག་རྟེན་དཔལ་དང་ལྡན་པར་ཟློག །མི་ཡི་འཇིག་རྟེན་འོག་མིན་ཞིང་དུ་ཟློག །ཉན་རང་ཐམས་ཅད་ཐེག་པ་ཆེན་པོར་ཟློག །བྱང་སེམས་ཐམས་ཅད་ས་ལམ་གོང་མར་ཟློག །ཐམས་ཅད་བཅུ་གསུམ་རྡོ་རྗེ་འཛིན་པར་ཟློག །མ་གཡེལ་ལས་མཛོད་རྒྱལ་བ་རྒྱ་མཚོའི་ཚོགས། །འཁོར་བ་དོང་ནས་སྤྲུགས་ཤིག་སྤྱན་རས་གཟིགས། །ཐུགས་བསྐྱེད་དུས་ལ་བབ་བོ་ས་མཱ་ཡ། །ཨོཾ་ཨཱཿཧཱུྃ་ཧྲཱིཿ ཨོཾ་མ་ཎི་པདྨེ་ཧཱུྃ། ཨ་ར་པ་ཙ་མི་ཏ་ཧྲི་ཏ་སྭཱ་ཧཱ། མ་བསྒྲུབས་པར་སངས་རྒྱས་པའི་སྔགས་སོ། ༈ །ཁྲོ་ཚོགས་རྒྱ་མཚོའི་ཟློག་པ། ཧཱུྃ༔ ཁྲོ་ཚོགས་རྒྱ་མཚོའི་ཐུགས་དམ་བསྐངས་གྱུར་ནས། །བྱང་ཆུབ་ལམ་གྱི་བར་ཆད་ཐམས་ཅད་ཟློག །རྟ་མཆོག་རྒྱལ་པོས་བདུད་བཞིའི་བར་ཆད་ཟློག །གསང་སྒྲུབ་དམར་
པོས་བེ་དཀར་དཀོར་འདྲེ་ཟློག །རྟ་མགྲིན་གསང་འདུས་སྣང་སྲིད་ལྷ་འདྲེ་ཟློག །བདེ་མཆོག་དམར་པོས་སྐྱེ་བོའི་ཡ་ཁ་ཟློག །ནཱ་ག་ཀླུ་འདུལ་ཀླུ་རིགས་གནོད་པ་ཟློག །ལྕགས་རལ་ཅན་གྱིས་སྡེ་བརྒྱད་གནོད་པ་ཟློག །ཁྲོ་ཆེན་བཞི་ཡིས་ཕྱོགས་བཞིའི་གདོན་ཚོགས་ཟློག །དམར་ནག་མེ་ཕྲེང་རྒྱལ་བསེན་དམ་སྲི་ཟློག །ཆེ་མཆོག་གཙོ་དགུས་སྲིད་པའི་གཡོས་ཆེན་ཟློག །ཁྲག་འཐུང་རིགས་ལྔས་ཉམས་པའི་བཀའ་ཆད་ཟློག །དགོངས་པ་འདུས་པས་དུས་མིན་འཆི་ལྟས་ཟློག །དུས་ཀྱི་འཁོར་ལོས་དུས་ཚེས་གནོད་པ་ཟློག །དགྱེས་པ་རྡོ་རྗེས་ནད་རིགས་བརྒྱད་པོ་ཟློག །བདེ་མཆོག་འཁོར་ལོས་ལྷ་ཆེན་གནོད་པ་ཟློག །དགྲ་ནག་གདོང་དྲུག་དགྲ་བགེགས་གནོད་པ་ཟློག །གཤེད་དམར་འཇིགས་བྱེད་གཤིན་རྗེའི་གནོད་པ་ཟློག །ཀིང་ཀང་ནག་པོས་དགྲ་ཆེན་ལངས་པ་ཟློག །ཀིང་ཀང་དམར་པོའི་དགྲ་སྲི་མི་ཁ་ཟློག །ཁྲོ་ཆུ་དུག་གདོང་བན་བོན་བྱད་ཁ་ཟློག །རྡོ་རྗེ་གཏུམ་པོས་གཟའ་གདོན་གཟའི་ནད་ཟློག །ཁྱུང་ཆེན་རིགས་ལྔས་ཀླུ་ནད་ཀླུ་གདོན་ཟློག །ཡེ་ཤེས་ཁྱུང་ཁྲས་དུག་དང་བད་ཀན་ཟློག །འབྱུང་པོ་འདུལ་བྱེད་
འབྱུང་པོའི་གནོད་པ་ཟློག །གོས་སྔོན་ཅན་གྱིས་གནོད་སྦྱིན་གནོད་པ་ཟློག །རྡོ་རྗེ་གཞོན་ནུས་དམ་སྲིའི་གནོད་པ་ཟློག །ཁྲོ་བོ་བཅུ་ཡིས་ཕྱོགས་བཅུའི་གདོན་ཚོགས་ཟློག །མ་ཧཱ་མཱ་ཡཱས་འཁྲུལ་སྣང་འཇིགས་སྐྲག་ཟློག །སངས་རྒྱས་ཐོད་པས་ཀླུ་ཡི་གནོད་པ་ཟློག །རྣམ་པར་འཇོམས་པས་གྲིབ་ཀྱི་གནོད་པ་ཟློག །སྨེ་བ་བརྩེགས་པས་ཉམས་གྲིབ་དམེ་གྲིབ་ཟློག །མི་གཡོ་མགོན་པོས་མོ་གདོན་གནོད་པ་ཟློག །སྟོབས་པོ་ཆེ་ཡིས་ས་བདག་གནོད་པ་ཟློག །ལོཀྲི་པ་ལས་སྦྱོར་ངན་ལོག་པ་ཟློག །ཚེ་བདག་ནག་པོས་མཐུ་གཏད་ལོག་པ་ཟློག །བདུད་རྩི་འཁྱིལ་པས་བགེགས་རིགས་སྟོང་ཕྲག་ཟློག །འཁོར་ཚོགས་ཁྲོ་བོས་གནོད་བྱེད་ཐམས་ཅད་ཟློག །མ་གཡེལ་ལས་མཛོད་དཔའ་བོ་ཁྲོ་རྒྱལ་ཚོགས། །མཐུ་སྟོབས་དུས་ལ་བབ་བོ་སཱ་མཱ་ཡ། །ༀ་བཛྲ་མ་ཧཱ་ཀྲོ་དྷ་ཡ་མ་པདྨ་ཀྲོ་དྷི་ཤྭ་རི་བཛྲ་ཀཱི་ལི་ཀཱི་ལ་ཡ་མ་ཧཱ་ཡཀྵ་ཀཱ་ལ་རཱུ་པ་ཀརྨ་རཾ་རཾ་ཛྭ་ལ་རཾ་ཧཱུྃ་ཕཊ༔ ཨེ་ཀ་དུ་ན་ཟློག །མ་ཧཱ་དུ་ན་ཟློག །ས་ག་དུ་ན་ཟློག །ར་ཙ་དུ་ན་ཟློག །ཙ་དུར་སྙིང་ན་ཟློག །སུ་ཏྲ་རཀྵ་ཟློག །བྱད་ཟོར་ཕུར་ཁ་ཆག་ཆེན་ཉམ་ང་ཐམས་ཅད་མཱ་ར་ཡ་བྷོ་བྷོ༔ ཟློག་ཟློག༔ ཅེས་ཁྲོ་བོ་
སྤྱི་དྲིལ་དྲག་སྔགས་དང་ཟློག་སྔགས་སོ། ༈ །མཁའ་འགྲོ་རྒྱ་མཚོའི་ཟློག་པ། ཧཱུྃ། དཔའ་མོ་རྒྱ་མཚོའི་ཐུགས་དམ་བསྐངས་གྱུར་ནས། །སྲིད་པའི་ཆག་ཆེན་ཉམ་ང་ཐམས་ཅད་ཟློག །གསང་བ་ཡེ་ཤེས་མཁའ་འགྲོའི་བཀའ་ཆད་ཟློག །རིགས་བཞི་མཁའ་འགྲོས་གིང་བཞིའི་བཀའ་ཆད་ཟློག །ལྷན་ཅིག་སྐྱེས་མས་རྩ་རླུང་གེགས་སྐྱོན་ཟློག །ཞལ་གཉིས་མ་ཡིས་མཐའ་གཉིས་ལྟུང་བ་ཟློག །ཞལ་བཞི་མ་ཡིས་རྟག་ཆད་མུ་བཞི་ཟློག །དབུ་བཅད་མ་ཡིས་བདག་འཛིན་རྩད་ནས་ཟློག །དོན་གྲུབ་མ་ཡིས་བསམ་པའི་བར་ཆད་ཟློག །མཁའ་སྤྱོད་དཀར་དམར་སྒྲུབ་པའི་བར་ཆད་ཟློག །ཁྲོས་མ་ནག་མོས་ལྟས་ངན་བརྒྱད་ཅུ་ཟློག །སེང་གདོང་མ་ཡིས་བནྡེའི་བྱད་ཁ་ཟློག །སྟག་གདོང་མ་ཡིས་བོན་པོའི་བྱེད་ཁ་ཟློག་་།དོམ་གདོང་མི་ཡིས་མུ་སྟེགས་བྱེད་ཁ་ཟློག །ཕྲ་མེན་བཅུ་བཞིས་མི་རུང་སྣ་ཚོགས་ཟློག་་་་་ཀུ་རུ་ཀུལླེས་སྐྱེ་དགུའི་སྡོང་བོ་ཟློག་སྒྲོལ་མ་ཉེར་གཅིག་འཇིགས་པ་ཐམས་ཅད་ཟློག །ཡིད་བཞིན་འཁོར་ལོས་དུས་མིན་འཆི་བ་ཟློག །སེང་ལྡེང་ནགས་སྒྲོལ་འཇིགས་པ་རྣམ་བརྒྱད་ཟློག །ཤེར་ཕྱིན་དཀར་མོས་བླུན་རྨོངས་གཏི་མུག་ཟློག །སྣ་
ཚོགས་ཡུམ་གྱིས་འཇིགས་ཆེན་བཅུ་དྲུག་ཟློག །སྐུལ་བྱེད་མ་ཡིས་ནད་རིགས་ཐམས་ཅད་ཟློག །དུག་སེལ་མ་ཡིས་དུག་ནད་ཐམས་ཅད་ཟློག །ལྕགས་སྒྲོག་མ་ཡིས་གཅན་གཟན་གནོད་པ་ཟློག །འོད་ཟེར་ཅན་གྱིས་དགྲ་དང་ཆོམ་རྐུན་ཟློག །གདུགས་དཀར་མོ་ཡིས་རིག་སྔགས་བྱད་སྟེམས་ཟློག །གཙུག་ཏོར་གདུགས་ནག་སྣང་སྲིད་བྱད་ཁ་ཟློག །རི་ཁྲོད་མ་ཡིས་རིམས་ནད་ཐམས་ཅད་ཟློག །སྲུང་བ་ལྔ་ཡིས་གདོན་ཆེན་བཅོ་ལྔ་ཟློག །དབྱངས་ཅན་མ་ཡིས་ཁྲག་ནད་རྒྱུ་གཟེར་ཟློག །ཁྲོ་གཉེར་ཅན་གྱིས་འཇིགས་དང་སྡུག་བསྔལ་ཟློག །ལྷ་གཅིག་གཉིས་ཀྱིས་མཁའ་འགྲོའི་སུན་མ་ཟློག །ལབ་ཀྱི་སྒྲོལ་མས་སྣང་སྲིད་ལྷ་འདྲེ་ཟློག །གནས་ཡུལ་མཁའ་འགྲོས་དུས་འཁྲུག་མཚོན་གྲི་ཟློག །ཊཱའི་བྱེ་བས་གནོད་བྱེད་མ་ལུས་ཟློག །འབུམ་ཕྲག་མཁའ་འགྲོས་དལ་ཡམས་རིམས་ནད་ཟློག །མ་གཡེལ་ལས་མཛོད་མ་སྲིང་མཁའ་འགྲོའི་ཚོགས། །རྫུ་འཕྲུལ་དུས་ལ་བབ་བོ་ས་མཱ་ཡ། །ཨོ་དྷ་མ་གྷ་ཡེ་ན་མ་སྭཱ་ཧཱ། ང་པ་ཧ་རི་ནི་ས་ཧྲི་ཏ་སྭཱ་ཧཱ། ཨཀསམརཿཙཤདརསམརཡཕཊ༔ མཁའ་འགྲོའི་བཀའ་ཆད་བཟློག་པའི་སྔགས་དང་མཁའ་འགྲོ་མ་རི་རབ་སུམ་ཅུ་སོ་
གཉིས་ཀྱི་རྡུལ་གྱི་གྲངས་དང་མཉམ་པའི་བཟློག་སྔགས་སོ། །རྒྱུད་གསང་བ་འདུས་པར། དེ་ནས་ཕུར་གདབ་སྦྱོར་སྒྲོལ་བསྐང་། །ཞེས་གསུངས་པས་སྐབས་འདིར་ཚོགས་ཀྱི་བསྒྲལ་ལས་བྱས་ཕུར་པ་བཏབ་ནས། བསྟབ་པ་བྱས་ལ་བསྐང་བ་གསོའོ། །གཏོར་ཟློག་ཡོད་དམ་གསར་མའི་ཚོགས་ཡིན་ན་མི་དགོས་སོ། །ཚོགས་མེད་ན་ཡང་མི་དགོས་སོ། ༈ །དེ་ནས་དམ་ཅན་རྒྱ་མཚོའི་ཟློག་པ་ཐམས་ཅད་བྱ་བ་ནི། ཧཱུྃ། དམ་ཅན་རྒྱ་མཚོའི་ཐུགས་དམ་བསྐངས་གྱུར་ནས། །གནོད་བྱེད་དགྲ་བགེགས་ནད་གདོན་བྱད་ཁ་ཟློག །ལེགས་ལྡན་ནག་པོས་ལྷ་མིན་གནོད་པ་ཟློག །སྲས་མཆོག་ནག་པོས་སྒྲུབ་པའི་བར་ཆད་ཟློག །ཕྱོགས་བཅུའི་མགོན་པོས་ཕྱོགས་བཅུའི་དགྲ་བགེགས་ཟློག །ཧཱུྃ་མཛད་ནག་པོས་ཡེ་ཤེས་བྱད་ཁ་ཟློག །གུར་གྱི་མགོན་པོས་སྤྲུལ་པའི་བྱད་ཁ་ཟློག །པུ་ཏྲ་མིང་སྲིང་དཀོར་བདག་གནོད་པ་ཟློག །རང་བྱུང་རྒྱལ་མོས་ཁྲག་ནད་དེལ་ཁ་ཟློག །མ་མོ་བདུན་གྱིས་མ་མོའི་ཁ་རླངས་ཟློག །སྲིང་མོ་བཞི་ཡིས་གིང་བཞིའི་གནོད་པ་ཟློག །དུས་བཞིའི་ལྷ་མོས་དུས་བཞིའི་སྐག་རྣམས་ཟློག །འབར་མ་དགུ་ཡིས་རིགས་དྲུག་གནོད་པ་ཟློག །དམག་གི་རྒྱལ་མོས་དམག་སྣ་ཇག་སྣ་ཟློག །དབང་ཕྱུག་ཉེར་བརྒྱད་དལ་ཡམས་
ལྟས་ངན་ཟློག །བྱ་རོག་མཚན་ཅན་ཞིང་སྐྱོང་གནོད་པ་ཟློག །སྐུ་ལྔ་མགོན་པོས་ཕྱོགས་ལྔའི་དགྲ་བགེགས་ཟློག །ནག་པོ་སྟོང་གིས་ནག་ཕྱོགས་གནོད་པ་ཟློག །ཤ་ཟ་འབུམ་གྱིས་ཤ་ཟའི་གནོད་པ་ཟློག །མ་མོ་བྱེ་བས་ཡམས་ནད་རིམས་ནད་ཟློག །གནོད་སྦྱིན་ཁྲི་ཡིས་གནོད་སྦྱིན་གནོད་འཚེ་ཟློག །དུད་སོལ་ལྷ་མོས་ནད་རིགས་བཞི་བརྒྱ་ཟློག །མ་མོ་འབུམ་གྱིས་རྐྱེན་ཁ་ནད་ཁ་ཟློག །བདུད་མོ་དཔོན་གཡོག་མ་བདུད་གནོད་པ་ཟློག །རེ་ཏི་མཆེད་བཞིས་ཁྲག་ནད་རྒྱུ་གཟེར་ཟློག །མྱུར་མཛད་མགོན་པོས་འདི་ཕྱིའི་བར་ཆད་ཟློག །ཇོ་བོ་གཟི་ལྡན་ཚོང་ཉེས་སྙིང་གཏོང་ཟློག །མགོན་དཀར་ཡིད་བཞིན་དབུལ་ཕོངས་ཐམས་ཅད་ཟློག །མ་ནིང་ནག་པོས་བྱད་ཁ་དྲོད་གཏོང་ཟློག །སྐུ་མགོན་དཀར་པོས་འཇིགས་པ་རྣམ་བརྒྱད་ཟློག །གསུང་མགོན་དམར་པོས་མི་ཁ་བྲ་མཆུ་ཟློག །ཡོན་ཏན་མགོན་སེར་དབང་ཐང་རྒུད་པ་ཟློག །ཏྲག་ཤད་ནག་པོས་སྒྲུབ་པའི་བར་ཆད་ཟློག །སྲོག་བདུད་ནག་པོས་ཚེ་སྲོག་བར་ཆད་ཟློག །དཔལ་འབར་མ་ཡིས་དཔལ་འབྱོར་ཉམས་པ་ཟློག །མ་ནིང་ཛཾ་ནག་ལོ་ཉེས་མུ་གེ་ཟློག །ཞང་བློན་སྡེ་དགུས་སྨན་ལོག་
སྤྱད་ལོག་ཟློག །སེང་གདོང་ཡབ་ཡུམ་བྱེད་ཁ་དྲོད་གཏོང་ཟློག །སྡེ་བརྒྱད་བམ་རོས་ཟ་འདྲེའི་གནོད་པ་ཟློག །སྲིན་མགོན་ཡབ་ཡུམ་སྲིན་པོའི་གནོད་པ་ཟློག་གདོང་བཞི་ཡབ་ཡུམ་འབྱུང་པོའི་གནོད་པ་ཟློག །དུར་ཁྲོད་བདག་པོས་དགྲ་ཇག་ཆོམ་རྐུན་ཟློག །དུར་ཁྲོད་བདག་མོས་དགྲ་རྐུན་ཇག་ཤོམ་ཟློག །ངེ་ནེ་མ་ཡིས་ཕྲན་ཚེགས་དཀོར་རྐུན་ཟློག །མགར་བ་དམར་ནག་ཕོ་ལྷོག་གླང་ཐབས་ཟློག །རཱ་ཧུ་ལ་ཡིས་གཟའ་ཡི་ནད་གདོན་ཟློག །ཤན་པ་དམར་ནག་ཁྲག་སྐྱུགས་སྐྱུགས་རིམས་ཟློག །ཚུ་སྔགས་སྲུང་སྲོག་སྒྲུབ་གློ་བུར་རིམས་གཟེར་ཟློག །ཁ་མོ་ཆེ་ཡིས་གོད་འདྲེ་ཤ་ཟན་ཟློག །སྤུ་གྲི་མཆེད་གསུམ་བྱད་ཁ་ཕུར་ཁ་ཟློག །འབར་བ་སྤྱན་བདུན་བཙན་སྲི་རྟ་ནད་ཟློག །བེག་རྩེ་ལུང་བཙན་བཙན་གྱི་རྐྱང་རྒྱུག་ཟློག །ཇག་པ་མེ་ལེན་བོན་བྱེད་རྦོད་གཏོང་ཟློག །རྒྱལ་ཆེན་སྐུ་ལྔས་རྒྱལ་འགོང་གནོད་པ་ཟློག །ཆོས་རྒྱལ་ཅིག་ཆར་དུས་མིན་འཆི་བ་ཟློག །ནཱ་ག་རཀཱས་ཀླུ་ཡི་ནད་གདོན་ཟློག །སྨྱོ་ཁ་ཡབ་ཡུམ་ཀླུ་གཏད་ཞ་གྲུམ་ཟློག །སྤྱང་ཞོན་རིགས་གཉིས་མོ་གདོན་གནོད་པ་ཟློག །སྡེ་དཔོན་སུམ་ཅུས་རང་རང་
གནོད་པ་ཟློག །སྔགས་བདག་བཅོ་བརྒྱད་རང་རང་དྲག་སྔགས་ཟློག །བཀའ་བརྒྱད་སྲུང་མས་དགྲ་བགེགས་ཐམས་ཅད་ཟློག །སྣང་སྲིད་ལྷ་འདྲེས་ལྷ་འདྲེའི་དལ་ཁ་ཟློག །མ་གཡེལ་ལས་མཛོད་དམ་ཅན་རྒྱ་མཚོའི་ཚོགས། །མཐུ་རྩལ་ཅི་འདུག་བལྟའོ་ང་རྒྱལ་ཅན། །དམ་ཚིག་དུས་ལ་བབ་བོ་ས་མཱ་ཡ། །ཨོཾ་མ་ཧཱ་ཀཱ་ལ་རེ་མ་ཏི་ཨ་ཡ་མ་དུ་རུ་ཙ་ཤུ་ན་གནོད་བྱེད་དགྲ་བགེགས་ཐམས་ཅད་མཱ་ར་ཡ་བྷྱོ་བྷྱོ༔ ཟློག་ཟློག༔ ༈ ནོར་ལྷའི་ཟློག་པ། ཧཱུྃ། གཏེར་བདག་རྒྱ་མཚོའི་ཐུགས་དམ་བསྐངས་གྱུར་ནས། །སྦྱིན་པའི་ཕར་ཕྱིན་རྫོགས་པའི་བགེགས་རྣམས་ཟློག །རྣམ་ཐོས་སྲས་ཀྱིས་ཆོས་སྲིད་རྒུད་པ་ཟློག །དབང་ཕྱུག་ཆེན་པོས་དབང་ཐང་རྒུད་པ་ཟློག །དཔལ་ཆེན་མོ་ཡིས་དཔལ་གཡང་ཉམས་པ་ཟློག་་ཛམ་ལྷ་རིགས་ལྔས་ཚེ་བསོད་ཟད་པ་ཟློག །ནོར་རྒྱུན་མ་ཡིས་ནོར་གཡང་ཉམས་པ་ཟློག །འབྲོག་གནས་མཆེད་ལྔས་ཕྱུགས་གཡང་ཉམས་པ་ཟློག །ཨ་པར་ཙིཏྟས་བང་མཛོད་གཡང་ཉམས་ཟློག །གནོད་སྦྱིན་ཕོ་དགུས་མི་ཕྱུགས་གཡང་ཉམས་ཟློག །གནོད་སྦྱིན་མོ་དགུས་མོ་དཔལ་ཉམས་པ་ཟློག །གནོད་སྦྱིན་བྱེ་བས་མངའ་ཐང་དཔལ་ཉམས་
ཟློག །སྔགས་བདག་ཀླུ་བརྒྱད་ས་ཚིག་བཙའ་འབུ་ཟློག །ཡུལ་སྐྱོང་ལྔ་བརྒྱས་བཙའ་རིགས་བཞི་པོ་ཟློག །སྡེ་དཔོན་ཉེར་བརྒྱད་སྡེ་འཁྲུག་ཤོར་གོད་ཟློག་སྟོབས་ཆེན་སོ་གཉིས་སྟོབས་དང་གཟི་ཉམས་ཟློག །སྡེ་དཔོན་བཅུ་གཉིས་སྲིད་སྡེའི་གཡང་ཉམས་ཟློག །རེ་མནྟ་ཡིས་རྟ་གཡང་ཉམས་པ་ཟློག །ཀུ་བེ་ར་ཡིས་རྟ་ཡི་ནད་གདོན་ཟློག །གང་བ་བཟང་པོས་ལུག་གཡང་ཉམས་པ་ཟློག །ཕྱུགས་ལྷ་ལྗང་ཀུས་ཕྱུགས་གཡང་ཉམས་པ་ཟློག །གནོད་སྦྱིན་བྱེ་བས་སྐལ་ངན་མུ་གེ་ཟློག །ཚོགས་ཀྱི་བདག་པོས་ཚོགས་ལམ་འགག་པ་ཟློག །ཚེ་རིང་མ་ཡིས་རིགས་རྒྱུད་རབས་ཆད་ཟློག །གནོད་སྦྱིན་གང་མཛེས་ཟ་ཁ་འགག་པ་ཟློག །ཡེ་ཤེས་གྲགས་ཀྱིས་བཀྲེས་སྐོམ་བསེ་རག་ཟློག་མ་གཡེལ་ལས་མཛོད་གཏེར་བདག་ནོར་ལྷའི་ཚོགས། །མཐུ་བྱིན་ཅི་འདུག་བལྟའོ་དཔའ་བརྗིད་ཅན། །དངོས་གྲུབ་དུས་ལ་བབ་བོ་ས་མཱ་ཡ། །ཨོ་ཛམ་བྷ་ལ་ཛ་ལེནྡྲ་ཡེ་སྭཱ་ཧཱ། ཏདྱ་ཐཱ། ཨོཾ་ཚོམ་མེ་ལེ་དུ་ཀ་ཧཱུཾ་ཕཊསྭཱ་ཧཱ། ༈ ཕྱིའི་རྒྱུད་པའི་བཟློག་པ། ཧཱུྃ། ཕྱི་རྒྱུད་སྲུང་མའི་ཐུགས་དམ་བསྐངས་གྱུར་ནས། །མི་མཐུན་གནོད་པའི་ཕྱོགས་རྣམས་
ཐམས་ཅད་ཟློག །ལྷ་ཆེན་བརྒྱད་ཀྱིས་མངའ་ཐང་དཔལ་ཉམས་ཟློག །འདོད་པའི་དབང་ཕྱུག་བདུད་རིགས་བར་ཆད་ཟློག །དཔལ་མགོན་བདུན་ཅུས་འཇིག་རྟེན་གཡོ་འཁྲུག་ཟློག །དཀར་པོ་བརྒྱད་ཅུས་ནག་ཕྱོགས་བདུད་རིགས་ཟློག །མཁའ་རི་ལྕམ་དྲལ་གཏེར་སྲུང་འཁུ་ལྡོག་ཟློག །ཧ་བོ་གང་བཟང་རྟ་ནད་ལུག་ནད་ཟློག །རྡོ་རྗེ་རྒྱལ་པོས་ཀླུ་བདུད་གནོད་པ་ཟློག །ཐང་ལྷ་འབར་གྱིས་གྲི་བཙན་གནོད་པ་ཟློག །རྨ་ཆེན་སྤོམ་རས་རྨ་གཡང་ཉམས་པ་ཟློག །གཉན་ཆེན་ཐང་ལྷས་གཉན་ནད་ཐམས་ཅད་ཟློག །ཨ་ཕྱི་མཆེད་ལྔས་དྲེལ་གཡང་ཉམས་པ་ཟློག །བརྟན་མ་སྐྱོང་མས་ནད་ཡམས་དལ་ཁ་ཟློག །མགུལ་ལྷ་བཅུ་གསུམ་དུས་ཀྱི་འཁྲུག་པ་ཟློག །ས་བདག་ཚོགས་ཀྱིས་སོ་བདག་ནད་ཐོརྣམས་ཟློག །ལྷ་བྲན་བྱེ་བ་བརྒྱད་ཅུས་དགྲ་བགེགས་ཟློག །ས་ཡི་ལྷ་མོས་བཙའ་དང་ལོ་ཉེས་ཟློག །སྤར་སྨེ་ལོ་ཟླའི་བདག་པོས་སྐག་རིགས་ཟློག །གཟའ་སྐར་དུས་ཚེས་བདག་པོས་དུས་སྐག་ཟློག །ཡུལ་ལྷའི་ཚོགས་ཀྱིས་ཡུལ་འཆུག་འཁྲུག་ལོང་ཟློག །འཇིག་རྟེན་ལྷ་འདྲེ་ཀུན་གྱིས་ངན་དགུ་ཟློག །མ་གཡེལ་ལས་མཛོད་འཇིག་རྟེན་སྲུང་མའི་
ཚོགས། །མཐུ་རྩལ་ཅི་འདུག་བལྟའོ་མཐུ་བོ་ཆེ། །ནུས་པ་དུས་ལ་བབ་བོ་ས་མཱ་ཡ། །ཨོཾ་སརྦ་ལོ་ཀ་པཱ་ལ་གནོད་བྱེད་ཐམས་ཅད་བྷོ་བྷོ༔ ཟློག་ཟློག༔ དཔལ་བཀའ་བརྒྱུད་ཀྱི་རྩ་རྒྱུད་གསང་བ་འདུས་པ་ལས། རྗེས་སུ་རྐྱེན་ཟློག་བྱོལ་ཆེན་གདབ། །དེ་རྣམས་རྫས་ཀྱི་ཕྱི་བསྐང་ཡིན། །ལྷ་ཚོགས་ཀུན་མཉེས་རྐྱེན་དབང་ཟློག །ཅེས་གསུངས་སོ། །རྗེས་ཆོག་སྤྱི་ལྟར་རམ། བསྡུ་ན། ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །ཅེས་བརྗོད་དུས་སུ་དེ་ལྟར་བསྐང་གསོ་བྱ་བ་གལ་ཆེ། འདི་ཐམས་ཅད་འདོན་པ་ནི་རྒྱས་པའོ། །གསོལ་ཁ་དང་། བཤགས་པ་རྒྱབ་མ་སྦྲུལ་ཤད་ཀྱི་བར་དེ་དང་། བླ་མའི་ཟློག་པ་དང་། ་་བདེ་གཤེགས་ཟློག་པ་དང་། ནོར་ལྷོ་དང་ཕྱི་རྒྱུད་པའི་ཟློག་པོ་རྣམས་སྐྱུར། དེ་འཕྲོ་ཐམས་ཅད་འདོན་པ་འབྲིང་པོ་ཡིན། གསོལ་ཁ་དང་བཤགས་པ་རྒྱབ་མ་དང་། བླ་མ་བདེ་གཤེགས་དང་། ཆོས་སྐྱོང་ནོར་ལྷ་ཕྱི་རྒྱུད་པ་རྣམས་ཀྱི་བཟློག་པ་སྐྱུར། དེ་འཕྲོ་འདོན་པ་ནི་བསྡུས་པའོ། །བསྐང་བ་བྱིན་རླབས་ནས་བསྐང་བའི་དམིགས་རིམ། བཤགས་པ་དང་ཡིག་བརྒྱའི་དམིགས་རིམ་འདོན། གཞན་དཀྱིལ་འཁོར་ལྔ་པོ་གང་འདོད་པ་གཅིག་མགོ་ནས་མཇུག་
བར་བསལ་ནས་འདོན་པ་ནི་ཤིན་ཏུ་བསྡུས་པ་ཡིན་ནོ། །བསྐང་བ་བྱིན་བརླབས་ནས་གསལ་ལྟར་ལྷ་སོ་སོ་དང་རྒྱུད་སྡེ་སོ་སོར་གང་ལ་གང་དགྱེས་སུ་སྤྲུལ་ནས་མཆོད་པའི་ཕྱིར། རྒྱུད་སྡེ་མཐོ་དམན་ཐམས་ཅད་ཕྱོགས་གཅིག་ཏུ་བྱས་པ་སྐྱོན་མེད་དེ། གསར་བསྐང་རྡོ་རྗེ་ཕྲེང་བ་ལས། སི་ཏི་ཀ་ར་ལ་སོགས་པའི་བྱ་བའི་རྒྱུད་ཀྱི་ཐུགས་དམ་བསྐང་། རྣམ་སྣང་མངོན་བྱང་ལ་སོགས་པའི་སྤྱོད་པའི་རྒྱུད་ཀྱི་ཐུགས་དམ་བསྐང་། །ཞེས་སོགས་དང་། དཔལ་ཆེན་སྐྲ་ལོས་བསྐང་མདོས་སྐབས་སུ་མགྲོན་རིགས་བཞི་ཀ་ལ་བསྔོ་བར་གསུངས། རཏྣ་གླིང་པ་པདྨ་གླིང་པ་སོགས་ཀྱིས་མཛད་པ། སོགས་དུ་མ་ལ་གསར་རྙིང་ལྷ་ཚོགས་བསྐང་ཡིག་གཅིག་ཏུ་བསྡུས་པ་ནི་ཆེས་མང་ངོ་། དེས་ན་ཐེ་ཚོམ་མི་བྱ་ཞིང་། ཏིང་ངེ་འཛིན་གསལ་བའི་ངང་ནས་འདོན་སྒོམ་སྦྲགས་ལ་ཞེ་ཐག་པ་ནས། འདི་ཚར་གཅིག་བཏོན་པས་ཀྱང་། བསྐལ་པ་གྲངས་མེད་པའི་སྡིག་སྒྲིབ་བྱང་ཞིང་བར་ཆད་སེལ་ནས་དངོས་གྲུབ་འབྱུང་ངོ་། །དེ་ཅིའི་ཕྱིར་ཞེ་ན། འདི་རྒྱུད་གཞུང་མན་ངག་ཐམས་ཅད་ཤིན་ཏུ་གབ་འཕྲོད་ཅིང་ཟབ་པ་དང་། གསང་སྔགས་ཕྱི་ནང་གི་དཀྱིལ་འཁོར་གྲངས་མེད་པ་ཚང་ནི་ཡོད་པའི་ཕྱིར་རོ། །དེ་ལྟར་བསྐང་གསོ་བྱས་ན། ཕྲིན་ལས་གང་འདོད་ཀྱི་ལས་ཚོགས་བརྩམས་པས་འགྲུབ་པར་གསུངས་ཏེ། བསྐང་ལུང་བཀའ་རྒྱ་མ་ལས། དེ་ལྟར་ཐུགས་དམ་བསྐངས་ནས་ནི། །ཞི་རྒྱས་དབང་དྲག་ལ་སོགས་པའི། །རྣལ་འབྱོར་ཅི་ལྟར་འདོད་པ་རྣམས། །ཕྲིན་ལས་སོ་སོར་བཅོལ་བར་བྱ། །ཞེས་གསུངས་བཀའ་བརྒྱད་མདངས་
བསྐང་རྩ་བ་ལས་ཀྱང་། བསྐངས་ནས་ཡིད་ལ་བརྣག་པ་ཡི། །ཞི་རྒྱས་དབང་དྲག་ཕྲིན་ལས་བཅོལ། །ཞེས་གསུངས་སོ། །དེ་ནས་བསྐང་བའི་ཕན་ཡོན་འབྲས་བུ་ནི། སྐུ་རྒྱུད་ཤེལ་གྱི་རི་བོ་ལས། །དེ་ལྟར་ཐུགས་དམ་བསྐངས་ནས་ནི། །འབྲས་བུ་མཆོག་དང་ཐུན་མོང་ཀུན། །ཡེ་ཤེས་ལྷ་དགྱེས་སྩོལ་བར་འགྱུར། །ཅེས་དང་། བཀའ་བརྒྱད་རྒྱུད་གསང་བ་འདུས་པ་ལས། གཉིས་མེད་དོན་གྱི་ཐུགས་དམ་བསྐང་། །ཡེ་ཤེས་ལྷ་ཚོགས་ཀུན་མཉེས་ནས། །མཆོག་གི་དངོས་གྲུབ་རྒྱུན་མི་འཆད། །ཅེས་དང་། བཀའ་བརྒྱད་མདངས་བསྐང་རྩ་བ་ལས། བསྐང་བའི་འབྲས་བུ་བསྟན་པ་ནི། །མཆོག་དང་ཐུན་མོང་འབྱུང་བར་ངེས། །ཞེས་གསུངས་སོ། །བསྐང་ལུང་ལས་ཀྱང་། འདི་ལྟར་བསྐང་བའི་བྱིན་རླབས་ཀྱིས། །རྣལ་འབྱོར་ཕོ་མོའི་ཉམས་ཆག་བསྐང་། །དཀྱིལ་འཁོར་ལྷ་ཚོགས་དགྱེས་པ་བསྐང་། །ཚོགས་ཆེན་གཉིས་རྫོགས་སྒྲིབ་གཉིས་བྱང་། །མཆོག་དང་ཐུན་མོང་དངོས་གྲུབ་ཐོབ། །གནས་སྐབས་རྣལ་འབྱོར་ཅི་བསམ་འགྲུབ། །ཅེས་གསུངས་སོ། །རྩ་བ་གསུམ་གྱི་བསྐང་གསོ་དྲི་མེད་རབ་གསལ་ལས། བདག་འདྲ་བུད་མེད་ཡེ་ཤེས་མཚོ་རྒྱལ་གྱིས། །ཕྱི་རབས་རྗེས་འཇུག་དོན་གྱི་ཕྱིར། །ཨུ་རྒྱན་རྗེ་ལ་འདི་སྐད་ཞུས། ་་ད་ལྟ་དུས་སྤྱོད་ལྟ་བ་ལ་སོགས་བཟང་། །ནམ་ཞིག་དུས་ངན་སྙིགས་མ་ལ། །སྔགས་ཀྱི་སྒོར་ཞུགས་མི་རྒོད་རྣམས། །དམ་ཚིག་གཞུང་བཞིན་མི་སྲུང་ཞིང་། །ཡེ་ཤེས་ལྷ་སྤང་འཇིག་རྟེན་སྒྲུབ། །རྒྱུ་འབྲས་རྣམ་སྨིན་གཙོར་མི་ལེན། །བསྐྱེད་
རྫོགས་ཡ་བྲལ་བོན་གྱེར་བྱེད། །ཚོགས་གཏོར་བསྐང་བཤགས་དུས་མཆོད་གཡེལ། །ལྟ་བའི་གདེང་མེད་སྒྲུབ་པ་མེད། །རྫས་མེད་བརྗེ་གླང་སྙིང་གི །དམ་ཅན་དྲེགས་པ་ལས་ལ་ཁོལ། །དེ་ལྟར་ཉམས་པའི་བཀའ་ཆད་ཀྱིས། །ཆེ་འདིར་མི་རུང་སྣ་དགུ་འབྱུང་། །ནད་མང་ཚེ་ཐུང་ལོངས་སྤྱོད་མེད། །ཕྱི་མ་དམྱལ་བའི་གནས་སུ་ལྟུང་། །དེ་ཕྱིར་ཉམས་ཆག་བསྐང་བའི་ཐབས། །ཡང་གསང་སྒྲུབ་ཐབས་ཆ་རྐྱེན་དུ། །གུ་རུས་བདག་ལ་གསུངས་བར་ཞུ། །ཞེས་ཕྱག་འཚལ་རང་ལུས་ཡོན་དུ་ཕུལ་ནས་ཞུས་པས། དེར་སློབ་དཔོན་ཆེན་པོས་བཀའ་སྩལ་པ། ཀྱེ་མ་རིགས་བཟང་ལྷ་ཡི་ལྕམ། །བདག་འདྲ་པདྨ་ཐོད་ཕྲེང་གིས། །རང་གི་སྒྲུབ་པ་རང་གིས་བརྩམས། །དེ་ཡི་ཉམས་ཆག་སྦྱོང་བའི་ཐབས། །རྩ་བ་གསུམ་གྱི་བསྐང་གསོ་བསྟན། །ཞེས་དང་། བླ་མ་དྲག་པོའི་བསྐང་བ་ཨོ་རྒྱན་ཉིད་ཀྱིས་མཛད་པའི་དྲི་མེད་ཤེལ་ཕྲེང་ལས། དུས་ཀྱི་སྙིགས་མར་གྱུར་པ་ན། ཆོས་འདོད་བླ་མ་མི་འདོད་པའི་དུས་འབྱུང་སྟེ། གསང་སྔགས་ཀྱི་སྒོར་ཞུགས་ནས་དབང་དང་དམ་ཚིག་རྫོགས་པར་ཞུས་ནས་དམ་ཚིག་མི་སྲུང་། བླ་མ་ལ་ལོག་པར་བསྒོམ། རྒྱུ་འབྲས་ཁྱད་དུ་གསོད། མཆེད་གྲོགས་ནང་དམེ་བྱེད། དེར་མཁའ་འགྲོ་ཆོས་སྐྱོང་རྣམས་ཐུགས་ཁྲོས་ཏེ་ཕྱིར་གྱེས། དེའི་རྐྱེན་གྱིས་ཉམས་པ་ཅན་དེ་བློ་ལས་སུ་མི་རུང་། ནད་མང་དགེ་སྦྱོར་མེད། འཇིག་རྟེན་ཆོས་བརྒྱུད་དང་ལོག་འཚོའི་དབང་དུ་འགྲོ། སྒྲུབ་པ་ལ་རྟགས་དང་ནུས་པ་མེད། ཆོས་སྐྱོང་རྒྱབ་གྱེས་པས་མཐུ་དང་ནུས་པ་མེད། དགྲ་ཡིས་བརྙས། ཕྱི་
མ་དམྱལ་བར་ལྟུང་བ་མང་དུ་འབྱུང་བས། དེ་དག་བསྐང་བ་དང་གསོ་བ་དང་བཤགས་པར་བྱ་བ་གཅེས་གསུངས་པའི་ཕྱིར། དེང་སང་གསང་སྔགས་ཀྱི་སྒོར་ཞུགས་ནས་བསྐང་བ་འདི་ལ་ཐུགས་དམ་ཀྱི་མཐིལ་པོབྱེད་པ་ཤིན་ཏུ་གལ་ཆེ་བ་ཡིན་ནོ། །སྒྲུབ་པའི་བོགས་འདོན་པ་ལ་ཡང་བསྐང་བ་འདི་ཟབ་པར་གསུངས་ཏེ། མགོན་པོའི་སྤྱི་རྒྱུད་ཆེན་པོ་གྲི་གུག་བརྩེགས་པ་ལས། གལ་ཏེ་ལོ་ཟླ་དུ་མར་ཡང་། །བསྒྲུབས་ཀྱང་ནུས་པ་མ་བྱུང་ན། །ཐུགས་དམ་མ་བསྐངས་འགྱོད་པས་ན། །རྩལ་འདོན་ཐབས་ནི་མཆོད་གཏོར་དང་། །བསྐང་བཤགས་དམ་ཚིག་སྡོམ་གནས་དང་། །ཞེས་སོགས་གསུངས་སོ། །རྐྱེན་ཕྱི་ནང་གི་བར་ཆད་སེལ་བ་ལ་ཡང་བསྐང་བ་འདི་ཟབ་སྟེ། པཎྜི་ཏ་རྡོ་རྗེ་གདན་པས་ཀླུ། མཛད་པའི་བདེ་མཆོག་གི་བསྐང་བ་རིན་ཆེན་ཕྲེང་བར། ཐུགས་དམ་བསྐངས་བའི་བྱིན་རླབས་ཀྱིས། །ཕྱི་ཡི་བར་ཆད་ཕྱི་རུ་སོལ། །ནང་གི་བར་ཆད་ནང་དུ་སོལ། །ཞེས་གསུངས་སོ། ཆོས་སྐྱོང་ལས་སྦྱོར་ལ་བསྐང་བ་གལ་ཆེ་སྟེ། མ་ནིང་བསྐང་གསོ་གཏེར་གཞུང་ལས། བསྙེན་སྒྲུབ་ལས་ལ་སྦྱར་བ་དང་། །ཐུགས་དམ་བསྐང་དང་ཉམས་ཆག་བཤགས། །དགྲ་ལ་རྦད་དང་གཏང་རག་གཏོང་། །རྣལ་འབྱོར་ཚེ་སྲོག་རྒྱས་པའི་ཕྱིར། །ཆོས་སྐྱོང་ཆེན་པོའི་བསྐང་གསོ་བསྟན། །ཞེས་གསུངས་སོ། །པཎྜི་ཏ་ཨ་བྱཱ་ཀ་རས་མཛད་པའི་མགོན་པོའི་བསྐང་བ་རིན་ཆེན་ཕྲེང་བར་ཚོགས་དང་གཏོར་མ་བསྐང་བ་ལ་སོགས་ལ་ཚུལ་བཞིན་བྱའོ། །དེ་ལྟར་དུས་རྟག་ཏུ་མ་འགྲུབ་ཀྱང་། ལོ་དུས་དང་ཟླ་བའི་དུས་
རྣམས་ལ་མ་ཆག་པར་བྱས་ན། རྣལ་འབྱོར་པ་ཚེ་རིང་བ་དང་བར་ཆད་ཞི་བ་དང་། དངོས་གྲུབ་ཐམས་ཅད་འབྱུང་བ་དང་། ལུས་ངག་ཡིད་གསུམ་གྱི་ནུས་པ་སྣ་ཚོགས་ཐོན་པ་དང་། ཕྲིན་ལས་རྣམ་བཞི་འགྲུབ་པ་དང་། བཀའི་བསྟན་པ་སྐྱོང་བ་ཐམས་ཅད་ལ་མངའ་ཐང་ཤིན་ཏུ་དར་བར་འགྱུར་རོ། །ཞེས་གསུངས་སོ། །ཡང་མགོན་པོའི་འཁུ་ལྡོག་བྱུང་ན་ཡང་བསྐང་བས་ཞི་སྟེ། ནག་པོ་སྟོང་བསྐང་པཎྜི་ཏ་རྡོ་རྗེ་གདན་པ་ཤཱི་ན་ལེནྡྲའི་གཙུག་ལག་ཁང་དུ་མཛད་པ་ལས། ནག་པོ་ཆེན་པོ་སྒྲུབ་པའི་ཚེ། །དམ་ཚིག་འཁུ་ལྡོག་བྱུང་བ་ན། །སྙིང་མི་དགའ་ཞིང་ཚིག་པ་ཟ། །ཤེས་པ་བྱིང་རྨུགས་ནད་ཀྱིས་ཐེབས། །རིམས་ནད་གློ་གཟེར་བཏབ་པ་ན། །དེ་ལ་བསྐང་བའི་ཐབས་གསུམ་སྟེ། །ཕྱི་དང་ནང་དང་གསང་བ་གསུམ། །ཞེས་སོགས་གསུངས་སོ། །ཡང་མ་མོ་མཁའ་འགྲོ་འཁྲུགས་པ་དང་རིམས་ནད་དལ་ཡམས་འབབ་པ་ལ་ཡང་། བསྐང་བས་ཞི་སྟེ། མ་མོའི་འཁྲུགས་བསྐང་སློབ་དཔོན་པདྨས་མེ་ལྕེ་འབར་བའི་རྒྱུད་ལས་བཏུས་པ་ལས། སྐྱེ་བོ་རང་དགའ་སྡིག་སྤྱོད་ཚེ། །དེ་ཚེ་སྲིད་པའི་མ་མོ་འཁྲུགས། །འཁྲུགས་པའི་མ་མོ་བསྐང་བར་བྱ། །ཞེས་དང་། ཨོ་རྒྱན་རིན་པོ་ཆེས་མཛད་པའི་མ་མོའི་ཁྲག་མདོས་ལས། སྡེ་འཁྲུགས་ནང་དམེ་བྱེད་པའི་དུས། །མ་མོ་ནག་མོ་ཐུགས་ཁྲོས་ནས། །ནད་ཀྱི་ཁ་རླངས་ནག་པོ་གཏོང་། །མཁའ་ལ་ནད་སྤྲིན་ནག་པོ་འཁྲིགས། །བུད་མེད་ནག་མོས་སྟོང་གསུམ་གང་། །དེ་ཚེ་ནད་ཀྱི་བསྐལ་པ་དར། །ཞེས་སོགས་དལ་ཡམས་ཆེན་པོ་འབྱུང་བར་གསུངས་ནས།
འཁྲུགས་པའི་མ་མོའི་ཐུགས་དམ་བསྐང་། །ཐུགས་དམ་བསྐང་ངོ་ས་མཱ་ཡ། །ཐུགས་དམ་བསྐང་བའི་བྱིན་རླབས་ཀྱིས། །རྣལ་འབྱོར་བདག་ཅག་འཁོར་བཅས་ཀྱི། །ནད་ཁ་ཆོད་ལ་རིམས་ཁ་བསྒྱུར། །ཅེས་དང་། དེའི་ལོ་རྒྱུས་དང་བསྐང་བས་ཕན་ཚུལ་རྒྱ་ཆེར། རྒྱུད་མེ་ལྕེ་འབར་བའི་ལུགས། ལྕོག་རོ་ཀླུའི་རྒྱལ་མཚན་གྱིས་སློབ་དཔོན་པདྨ་ལ་ཞུས་ནས་བསྒྱུར་བ་རྒྱ་ཆེར་འབྱུང་ངོ་། །ཡང་མ་མོའི་རྒྱུད་ལུང་གི་བསྐང་གསོ། སློབ་དཔོན་པདྨས་མཛད་པ་ལས། བསྐང་གསོའི་ཆོ་ག་འདི་ནི། མཆོག་ཆེན་བསྒྲལ་བའི་དུས་སུའམ། མ་མོའི་མཚན་ལྟས་ངན་ནམ་ལྟས་མི་དགེ་བ་བྱུང་ངམ། དྲག་པོའི་ལས་སྦྱོར་དུས་སུ་སྔོན་དུ་བསྐང་བཤགས་འདི་བྱའོ། །ཞེས་གསུངས་པས་ཐན་ལྟས་ངན་པ་བྱུང་ན་ཡང་བསྐང་བས་སེལ་ལོ། །དུས་མིན་འཆི་བ་བཟློག་པ་སོགས་རིམ་གྲོའི་མཆོག་ཀྱང་བསྐང་བ་ཡིན་ཏེ། ༈ དམ་ཚིག་ཉམས་ཆག་བསྐང་བའི་ཆོ་ག་ཞེས་བྱ་བ་ལས། ཨེ་མ་ཧོ། བཅོམ་ལྡན་འདས་ཕྱི་རབས་ཀྱི་རྣལ་འབྱོར་པ་རྣམས་ལ། རྩ་བ་དང་ཡན་ལག་གི་དམ་ཚིག་ཉམས་ཆག་བྱུང་ན་ཇི་ལྟར་བསྐང་། དམ་ཅན་འཁྲུགས་ན་གྲལ་ལ་ཅི་ལྟར་བཞུགས། བཀའ་ཆད་བྱུང་ན་ཇི་ལྟར་ཟློག །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཉམས་པ་རྣམས་ནི་ཚོགས་ཀྱིས་བསྐང་། །དམ་ཅན་འཁྲུགས་ན་བམ་གྱིས་བཅོས། །བཀའ་ཆད་བྱུང་ན་མདོས་ཀྱིས་ཟློག །སེམས་ཅན་དུས་མིན་འཆི་བ་ལ། །བསྐང་བའི་ཆོ་ག་འདི་ལྟར་རོ། །ཞེས་གསུངས་
སོ། ༈ །ཡང་གཟའི་ནད་དང་གཟའི་འཁུ་ལྡོག་ལ་ཡང་བསྐང་བ་འདི་ཡིས་ཕན་ཏེ། གཟའ་བདུད་དུག་གི་སྤུ་གྲིའི་བསྐང་གསོ་གཏེར་གཞུང་ལས། བརྒྱལ་ནད་མགོ་འཁོར་སྨྱོ་འབོག་སོགས། །དམ་ཚིག་འཁུ་ལྡོག་བྱུང་བ་ན། །།ཐུགས་དམ་བསྐང་བའི་རིམ་པ་ནི། །ཞེས་གསུངས་སོ། །དེ་བཞིན་གཟའི་རྭ་བསྐང་ཨོ་རྒྱན་གྱིས་མཛད་པ་ལྟར། ཉམས་པ་དང་འཚེར་རྩུབ་ཆེ་ན་རས་བསྐང་། རྭ་ལ་དར་ཚོན་སྣ་ཚོགས་བཏགས་ཉམས་དང་འཚེར་རྩུབ་འབྲིང་ཙམ་བྱུང་ན་གཏོར་མས་བསྐང། ཉམས་པ་དང་འཚེར་རྩུབ་ཆུང་ན་བསྐང་བ་མི་འཚལ། ཞེས་གསུངས་པ་དང་། གཟའ་བདུད་མིག་དམར་ཤན་པ་དམར་ནག་གི་བསྐང་གསོ་གཏེར་གཞུང་ལས། དེ་ཡང་གནོད་སྦྱིན་ཆེན་པོ་མཐུ་རྩལ་སྟོང་གསུམ་ན་ཆེ་བས། རྣལ་འབྱོར་པས་སྒྲུབ་ཚེ་ཐུགས་དམ་མ་བསྐང་ངམ། དམ་ཚིག་འཁུ་ལྡོག་བྱུང་ན་སྙིང་མི་དགའ་ཞིང་ཚིག་པ་ཟ། ཤེས་པ་བྱིང་རྨུགས་ནད་ཀྱིས་ཐེབས། རིམས་ནད་ལྷོག་གཟེར་ལ་སོགས་སྟབས་ཉེས་འབྱུང་བས། དེ་ཚེ་བསྐང་གསོལ་ཐུགས་དམ་བསྐང་། གཞན་ཡང་རྒྱུན་དུ་བསྐང་གསོལ་བརྩོན་པར་བྱས་ན། རྣལ་འབྱོར་པའི་ཕྲིན་ལས་འགྲུབ་པ་དང་། ཕྱི་ནང་གི་བར་ཆད་སེལ། ཚེ་བསྲིང་ནོར་འཕེལ་སྙན་གྲགས་བསོད་ནམས་འབྱུང་། ཡོན་ཏན་དཔག་ཏུ་མེད་པས་བསྐང་བ་ནི། ཞེས་དང་། འདི་ལྟར་བསྐང་བ་ལ་བརྩོན་ན། བཀྲ་ཤིས་མི་ནོར་འཕེལ། རྐྱེན་དང་བར་ཆད་བསྲུང་། དགྲ་བགེགས་ཚར་གཅོད། ལུས་དང་གྲིབ་མ་ལྟར་འགྲོག་ཅིང་། ཅི་བཅོལ་བུ་བས་ཉན། འཕྲལ་
ཕུགས་གཉིས་ལ་བཀྲ་ཤིས། ཞེས་གསུངས་ཏེ། ཆོས་སྐྱོང་གང་ལ་ཡང་ཕན་ཡོན་དེས་རིགས་འགྲེས་སོ། །ཡང་སྐྱེས་བུ་ཆེན་པོ་སོགས་དགེ་བསྙེན་བརྟན་མ་སོགས་ལ་ཡང་ཕྲིན་ལས་བཅོལ་ན་བསྐང་བ་བྱས་པས་འགྲུབ་སྟེ། དམ་ཅན་བསྐང་གསོ་ཆེན་མོ་ཨོ་རྒྱན་རིན་པོ་ཚེས་མཛད་པ་ལས། དམ་ཅན་ལས་ལ་ཁོལ་བ་དང་། །ཉམས་ཆག་བསྐངས་ནས་དངོས་གྲུབ་བླངས། །དགྲ་བོ་ཆམ་ལ་ཕབ་པའི་ཕྱིར། །བསྐང་གསོ་དག་ལ་འབད་པར་བྱ། །དེ་ཡང་དུས་ཀྱི་བསྐང་གསོ་དང་། །མ་འགྲུབ་ལས་ལ་ཆད་པ་དང་། །འགྲུབ་ནས་གཏང་རིག་བཏང་བ་དང་། །དོན་ཆེན་སྒྲུབ་བམ་ཤུལ་རིང་འགྲོ། །དམ་ཅན་བསྐང་ཕྱིར་འདི་ཉིད་བྲིས། །ཞེས་གསུངས། ཡང་ནོར་དང་རིགས་རྒྱུད་ལྟའཕེལ་བ་ལ་ཡང་། བསྐང་གསོས་འབྱུང་སྟེ། རྣམ་སྲས་ནོར་ལྷའི་ཚོགས་ཀྱིས་བསྐང་གསོ་རིན་ཆེན་སྤུང་པ། ཨོ་རྒྱན་རིན་པོ་ཆེས་མཛད་པ་ལས། ཞེས་བསྐང་གསོལ་དུས་བཟང་པོའམ། རྟག་ཏུ་བྱས་ན་ལྷའི་དཔལ་འབྱོར་དང་ལྡན་པ་འབྱུང་ན། འགྲོ་བའི་རྣམ་ཤེས་ལྟ་ཅི་སྨོས། གླིང་བཞི་སྲིད་གསུམ་དབང་དུ་འདུས། །ཞེས་གསུངས་སོ། །དེ་ལྟར་ལྷ་སོ་སོའི་བསྐང་བ་དང་། བསྐང་བའི་རྒྱུད་རྒྱ་གཞུང་ཐམས་ཅད་ཀྱི་ཕན་ཡོན་ཐམས་ཅད་སྣང་བ་ཉུང་ངུ་འདི་ཁོ་ན་ལུང་འདྲེན་ཧ་ཅང་འདི་འཐད་དམ་སྙམ་ན་འཐད། འདི་ནི་རྒྱུད་རྒྱ་གཞུང་ནས་སོ་སོའི་བསྐང་གསོ་དེ་ཐམས་ཅད་ཀྱི་དོན་འདིར་འདུས་ཤིང་མ་ཚང་བ་མེད་པའི་ཕྱིར་རོ། །ཨེ་མ་རྒྱུད་དང་རྒྱ་གཞུང་མང་པོ་ཕུག་ཆེ་ཞིང་། །གནད་ཀྱི་དམིགས་རིམ་
ཟབ་པས་བྱིན་རླབས་ཆེ། །ལྷ་ཚོགས་རྣམ་གྲངས་མང་བས་ཁྱབ་ཆེ་ཞིང་། །ཚིག་ཉུང་འཁྱེར་བར་བདེ་བས་ཕན་ཆེ་ཞིང་། །ཆེ་བ་བཞི་ལྡན་བསང་ཡིག་མདོར་བསྡུས་འདི། །སྒྲུབ་ལ་བརྩོན་པའི་རྣལ་འབྱོར་ཡང་དག་པས། །ཉེར་མཁོའི་བསྐང་ཡིག་མང་པོ་མཎྜལ་བཅས། །ཉེ་བར་བསྐུལ་ཕྱིར་འཕྲལ་དུ་བྲིས་པ་ལ། །ཉེས་འགལ་གང་མཆིས་ལྷ་ལ་བཤགས་བགྱིས་ཤིང་། །དགེ་བས་འགྲོ་ཀུན་རྡོ་རྗེ་འཆང་འགྲུབ་ཤོག །ཅེས་པ་སྔགས་འཆང་རཱ་ག་ཨ་སྱས་ཆུ་སྦྲུལ་མགོ་ཟླའི་ནག་པོའི་ཕྱོགས། ཉི་མ་ལྔའི་ཐུན་ལ་བྲིས་པས་མངྒ་ལཾ། དགེའོ། །དགེའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།