ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་རྒྱ་མཚོ་ལྔ་ཡི་བསྐང་སྤུང་རྒྱུན་ཁྱེར།
ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་རྒྱ་མཚོ་ལྔ་ཡི་བསྐང་སྤུང་རྒྱུན་ཁྱེར་བཞུགས་སོ།།
བཀའ་བརྒྱད་གསང་འདུས་རྩ་རྒྱུད་ལས། །ནང་དུ་ཏིང་ངེ་འཛིན་གྱིས་བསྐང་། །རང་ཉིད་ཐུགས་ཀའི་ཧཱུྃ་འཕྲོས་ཏེ། །སྣོད་ཀྱི་འཇིག་རྟེན་གཞོང་པ་རུ། །བཅུད་ཀྱི་སེམས་ཅན་འདོད་ཡོན་སྲུང་། །རིག་པ་ལྷ་མོའི་ཚོགས་འཕྲོས་ཏེ། །གཟུགས་སྤྱན་སྒྲ་སྙན་དྲི་ཤངས་དང་། །རོ་མཆོག་ལྗགས་ལ་རེག་བྱ་ཆོས། །སྣང་སྲིད་བཅུད་ཀྱི་ཐུགས་དམ་བསྐང་། །འདོད་ཡོན་དབང་པོ་ལྔར་ཐིམ་ནས། །ལྷ་མཉེས་ཕྲིན་ལས་འགྲུབ་པར་བསམ། །ཨོཾ་ཨཱཿཧཱུྃ་ཧ་ཧོ་ཧཱུྃསྭཱ་ཧཱ། ཞེས་བསྐང་རྫས་ཀྱི་གཟུགས་འབུར་དུ་བཏོད་པའམ་རི་མོར་བྲིས་པ་གཏོར་མ་ལ་གཟུགས་པ་ཡོད་ན་རབ་ཡིན་ལ། མ་འབྱོར་ན་རྒྱུན་གཏོར་ལྟ་བུ་
ལ་ཐུགས་དམ་གཏོར་མ་ཤ་ཟན་གྱིས་གསོས་ནས། ཧཱུཾ་ཧཱི༔ ནུབ་ཕྱོགས་བདེ་ཆེན་ཞིང་ཁམས་ནས། །རིགས་བདག་སྣང་བ་མཐའ་ཡས་ནི། །སྐུ་མདོག་དམར་པོ་མཉམ་བཞག་མཛད། །ལོངས་སྤྱོད་རྫོགས་སྐུ་མཚན་དཔེས་སྤྲས། །འཁོར་དུ་རིགས་ཀྱི་སེམས་དཔས་བསྐོར། །འོད་དཔག་མེད་ལ་ཕྱག་འཚལ་བསྟོད། །བསྐང་ངོ་ཁྱེད་ཀྱི་ཐུགས་དམ་བསྐང་། །ཚེ་ཡི་ལྷ་ཚོགས་ཐུགས་དམ་བསྐང་། །ཚེ་དབང་རྒྱས་པའི་དངོས་གྲུབ་སྩོལ། །ཧཱུྃ། རི་བོ་ཏ་ལའི་ཕོ་བྲང་ནས། །ཐུགས་རྗེའི་བདག་ཉིད་སྤྱན་རིས་གཟིགས། །ཕྱག་བཞི་དྲི་མེད་སྐུ་མདོག་དམར། །རིན་
ཆེན་མཛེས་པའི་རྒྱན་གྱིས་བརྒྱན། །བསྐལ་བཟང་སངས་རྒྱས་སྟོང་གིས་བསྐོར། །ཐུགས་རྗེ་ཅན་ལ་ཕྱག་འཚལ་བསྟོད། །བསྐང་ངོ་ཁྱེད་ཀྱི་ཐུགས་དམ་བསྐང་། །ཕྲིན་ལས་འགྲོ་འདུལ་དངོས་གྲུབ་སྩོལ། །དངོས་འབྱོར་ཡིད་སྤྲུལ་མཆོད་སྤྲིན་འདིས། །རྒྱལ་བ་རྒྱ་མཚོ་བླ་མ་དང་། །ཡི་དམ་རྒྱ་མཚོའི་ཐུགས་དམ་བསྐང་། །བསྐང་གྱུར་དབང་དང་དངོས་གྲུབ་སྩོལ། །ཧཱུྃ། རྔ་ཡབ་དཔལ་རིའི་གཞལ་ཡས་ནས། །སྤྲུལ་སྐུ་པདྨ་འབྱུང་གནས་ནི། །སྐུ་མདོག་དཀར་དམར་རྡོར་དྲིལ་བསྣམས། །སྙན་ཞུ་ཟ་བེར་ཆོས་གོས་མཛེས། །འཁོར་དུ་མཁའ་འགྲོ་སྡེ་ལྔས་བསྐོར། །འགྲོ་བའི་མགོན་ལ་ཕྱག་འཚལ་བསྟོད། །བསྐང་ངོ་ཁྱེད་ཀྱི་ཐུགས་དམ་བསྐང་། །སྐུ་ལྔ་མཚན་བརྒྱད་ཐུགས་དམ་བསྐང་། །དྲག་པོ་ཐོད་ཕྲེང་ཐུགས་དམ་བསྐང་། །མཚོ་སྐྱེས་རྡོ་རྗེའི་ཐུགས་དམ་བསྐང་། །རིག་འཛིན་ཚེ་ཡི་དངོས་གྲུབ་སྩོལ། །ཧཱུྃ། དཔལ་ཆེན་ཞི་ཁྲོ་ཡབ་ཡུམ་སྲས་དང་བཅས། །རྣམ་འགྱུར་ཆ་ལུགས་སྤྲུལ་བསྒྱུར་དུ་མའི་བདག །དཀྱིལ་འཁོར་དགུ་རྫོགས་དངོས་གྲུབ་མཛོད་ཆེན་པོ། །དགོངས་འདུས་ལྷ་ཚོགས་རྣམས་ཀྱི་ཐུགས་དམ་བསྐང་། །
ཧཱུྃ། ཐུགས་དམ་གཉན་པོ་བསྐང་བའི་ལྷ་ཚོགས་ནི། །སྒྲུབ་པ་བཀའ་བརྒྱད་ལྷ་ཚོགས་ཐུགས་དམ་བསྐང་། །བཀའ་བརྒྱད་རིག་འཛིན་རྣམས་ཀྱི་ཐུགས་དམ་བསྐང་། །ཐུགས་དམ་གཉན་པོ་བསྐང་བའི་བྱིན་རླབས་ཀྱིས། །རྣལ་འབྱོར་དམ་ཚིག་ཉམས་ཆག་བསྐང་གྱུར་ཅིག །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཡིད་ལ་མནག་པའི་དགྲ་བགེགས་སྒྲོལ། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། སྣང་སྲིད་ཕུར་པས་གདབ་པའི་ཕྱིར། །རྡོ་རྗེ་གཞོན་ནུའི་ཐུགས་དམ་བསྐང་། །ཡབ་ཡུམ་གཉིས་སུ་མེད་པའི་ཕྱིར། །འཁོར་ལོ་རྒྱས་འདེབས་ཐུགས་དམ་བསྐང་། །རྡོ་རྗེ་ཕུར་པའི་ལྷ་ཚོགས་རྣམས། །བསྐང་ངོ་མཆོད་དོ་ཐུགས་དམ་བསྐང་། ཁམས་དང་སྐྱེ་མཆེད་གནས་དག་པའི། །ཞི་བའི་ལྷ་ཚོགས་ཀློང་དུ་བསྐང་། །ཉོན་མོངས་རྟོག་པ་གནས་གྱུར་པའི། །ཁྲོ་བོའི་ལྷ་ཚོགས་ཀློང་དུ་བསྐང་། །མཆོད་དུ་མེད་དེ་གཉིས་མེད་རོལ་པས་མཆོད། །བསྐང་དུ་མེད་དེ་སྐྱེ་མེད་ངང་དུ་བསྐང་། །སྦྱོར་དུ་མེད་དེ་ཟུང་འཇུག་ཆེན་པོར་སྦྱོར། །བསྒྲལ་དུ་མེད་དེ་མཉམ་ཉིད་དབྱིངས་སུ་བསྒྲལ། །ཡེ་སྦྱོར་ཡེ་སྒྲོལ་ཆེན་
པོས་ཐུགས་དམ་བསྐང་། །ཧཱུཾ། བྷནྡྲ་ཡངས་པའི་གཏོར་གཞོང་དུ། །དགྲ་བགེགས་ཤ་ཁྲག་ཐོད་ཚིལ་སྤུངས། །ཞག་དང་རླངས་པ་ཆི་ལི་ལི། །ནག་པོ་ལྕགས་རལ་ཐུགས་དམ་བསྐང་། །མེ་ཏོག་བདུག་སྤོས་མར་མེ་དྲི་ཞལ་ཟས། །སྦྱོར་སྒྲོལ་ཏིང་འཛིན་ཚོགས་མཆོད་དང་། །ཕྱི་ནང་གསང་བའི་མཆོད་སྤྲིན་གྱིས། །དབང་ཆེན་ལྷ་ཚོགས་ཐུགས་དམ་བསྐང་། །ནཱ་ག་རཀཱའི་ཐུགས་དམ་བསྐང་། །ཧཱུྃ་ཧྲཱིཿ ལྷག་པའི་ལྷ་མཆོག་པདྨ་དབང་གི་ཚོགས། །དུས་རྣམས་རྟག་ཏུ་ཁྲོ་རྒྱལ་ཁྱོད་སྒྲུབ་སྟེ། །སྲོག་གི་ཕྱིར་ཡང་ཡི་དམ་མི་སྤངས་ན། །ཡེ་ཤེས་ཐུགས་རྗེའི་སྤྱན་གྱིས་གཟིགས་སུ་གསོལ། །ཁྲོ་རྒྱལ་འཁོར་བཅས་ཁྱེད་ཀྱི་གཟི་བརྗིད་ཀྱིས། །བར་ཆད་བགེགས་ཀྱི་ཚོགས་རྣམས་བསལ་ནས་ཀྱང་། །བྱམས་པའི་ཞལ་བཟང་དངོས་སུ་བསྟན་པ་དང་། །སྒྲུབ་པའི་འབྲས་བུ་དུས་འདིར་བསྟན་དུ་གསོལ། །ཧཱུྃ། གཤིན་རྗེ་རོལ་པའི་དུར་ཁྲོད་ཆེན་པོ་ནས། །སུམ་ཅུ་རྩ་དགུའི་ལྷ་ཚོགས་ཐུགས་དམ་བསྐང་། །བཅོམ་ལྡན་འཇམ་དཔལ་གཤིན་རྗེ་བྷེ་ཏ་ཡུམ། །ཡབ་ཡུམ་གཉིས་སུ་མེད་པའི་ཐུགས་དམ་བསྐང་། །བཛྲ་རཏྣ་པདྨ་ཀརྨ་ཡི། །ཡ་མཱནྟ་ཀ་
གཤིན་རྗེ་ཡབ་ཡུམ་དང་། །ཁྲོ་ཆུ་དུག་གདོང་དུག་ཏི་ནག་མོ་ཡུམ། །ལས་གཤིན་དྲུག་དང་བཅས་པའི་ཐུགས་དམ་བསྐང་། །རྡོ་རྗེ་འཇིགས་བྱེད་དུག་སྦྲུལ་ནག་མོ་ཡུམ། །ཡ་མ་རཱ་ཙ་མྱོས་བྱེད་འབར་བ་དང་། །ཨཅུ་མེ་རུ་རལ་པ་ཚར་དགུ་དང་། །དམ་ཅན་ཅིག་ཆར་དམར་པོའི་ཐུགས་དམ་བསྐང་། །ཚེ་བདག་འབར་བ་འཆར་ཁ་ནག་པོ་དང་། །ཆོས་རྒྱལ་ལ་སོགས་དམ་ཅན་གཤིན་རྗེའི་ཚོགས། །ཕྱོགས་སྐྱོང་གཤིན་རྗེ་གྲི་ཐོགས་ཁྲམ་ཐོགས་དང་། །ཤོ་ཐོགས་ཤན་པའི་ཚོགས་ཀྱི་ཐུགས་དམ་བསྐང་། །ཕྱི་ནང་གསང་མཆོག་ཚོགས་ཀྱི་ཡོ་བྱད་ཀྱིས། །བསྐང་ངོ་བསྐལ་པར་ཐུགས་དམ་གཉན་པོ་བསྐང་། །རྣལ་འབྱོར་བདག་གི་གཡར་དམ་སོར་སྩོལ་ཅིག །མཆོག་ཐུན་ཕྲིན་ལས་ཀུན་འགྲུབ་དངོས་གྲུབ་སྩོལ། །རྐྱེན་ངན་བར་ཆད་མ་ལུས་བཟློག་ཅིང་བསྒྱུར། །ཧཱུྃ། བཀའ་བརྒྱུད་བླ་མའི་ཐུགས་དམ་བསྐང་། །ཡི་དམ་ལྷ་ཚོགས་ཐུགས་དམ་བསྐང་། །རྒྱལ་བ་རྒྱ་མཚོའི་ཐུགས་དམ་བསྐང་། །དཔའ་བོ་རྒྱ་མཚོའི་ཐུགས་དམ་བསྐང་། །དཔའ་མོ་རྒྱ་མཚོའི་ཐུགས་དམ་བསྐང་། །ཡེ་ཤེས་མགོན་པོའི་ཐུགས་དམ་བསྐང་། །ལས་ཀྱི་
མགོན་པོའི་ཐུགས་དམ་བསྐང་། །འཇིག་རྟེན་མགོན་པོའི་ཐུགས་དམ་བསྐང་། །སྲས་མཆོག་ནག་པོའི་ཐུགས་དམ་བསྐང་། །དཔལ་ལྡན་ལྷ་མོའི་ཐུགས་དམ་བསྐང་། །དབུགས་ལེན་ཡབ་ཡུམ་ཐུགས་དམ་བསྐང་། །ཕྱོགས་བཅུ་མགོན་པོའི་ཐུགས་དམ་བསྐང་། །དྲེགས་པ་དོན་གཉིས་ཐུགས་དམ་བསྐང་། །དྲེགས་པ་རྣམ་གསུམ་ཐུགས་དམ་བསྐང་། །མ་མོ་བདུན་གྱི་ཐུགས་དམ་བསྐང་། །སྲིང་མོ་བཞི་ཡི་ཐུགས་དམ་བསྐང་། །འབར་མ་དགུ་ཡི་ཐུགས་དམ་བསྐང་། །དུས་བཞིའི་ལྷ་མོའི་ཐུགས་དམ་བསྐང་། །ཚེ་དམག་གི་རྒྱལ་མོའི་ཐུགས་དམ་བསྐང་། །དབང་ཕྱུག་ཉེར་བརྒྱད་ཐུགས་དམ་བསྐང་། །བརྟན་མ་བཅུ་གཉིས་ཐུགས་དམ་བསྐང་། །སྤྲུལ་པ་ཡང་སྤྲུལ་ཐུགས་དམ་བསྐང་། །དམ་ཅན་རྒྱ་མཚོའི་ཐུགས་དམ་བསྐང་། །ཐུགས་དམ་བསྐངས་བའི་བྱིན་རླབས་ཀྱིས། །ཆག་ཆེན་ཉམ་ང་བཟློག་ཏུ་གསོལ། །ཕྱི་ནང་བར་ཆད་བཟློག་ཏུ་གསོལ། ཕྲིན་ལས་རྣམ་བཞི་བསྒྲུབ་ཏུ་གསོལ། ༈ ཐམ༔ ༔ གུ་རུ་དྷེ་ཝ་ཌཱཀྐི་ནི་ཧཱུྃ༔ བསྐང་བ་བྱ་ཐབས་འདི་ལྟ་སྟེ༔ ཧཱུྃ༔ ཐུགས་དམ་བསྐང་བའི་དམ་རྫས་ནི༔ གཟུགས་སྒྲ་དྲི་རོ་རེག་བྱ་དང་༔ མཆོད་
ཡོན་ཞབས་བསིལ་མེ་ཏོག་དང་༔ བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོ་སྙན་པའི་དབྱངསཿ༔ སྨན་གཏོར་རཀྟ་གླུ་གར་མས༔ བླ་མ་སྐུ་གསུམ་ཐུགས་དམ་བསྐང་༔ སྐུ་ལྔ་མཚན་བརྒྱད་ཐུགས་དམ་བསྐང་༔ བླ་མ་རྣམས་ཀྱི་ཐུགས་དམ་བསྐང་༔ གུར་དྲག་བཀའ་དགོངས་ཕུར་གསུམ་སོགས༔ ཡི་དམ་རྣམས་ཀྱི་ཐུགས་དམ་བསྐང་༔ ཕག་ཁྲོས་སེང་གསུམ་མཚོ་རྒྱལ་སོགས༔ མཁའ་འགྲོ་རྣམས་ཀྱི་ཐུགས་དམ་བསྐང་༔་རྒྱལ་པོ་ཁྲི་སྲོང་ལྡེའུ་བཙན་སོགས༔ རྗེ་འབངས་རྣམས་ཀྱི་ཐུགས་དམ་བསྐང་༔ མ་ནིང་ཤན་པ་གཟའ་བདུད་སོགས༔ ཆོས་སྐྱོང་བཀའ་སྲུང་ཐུགས་དམ་བསྐང་༔ རྣམ་སྲས་ཛཾ་ལྷ་ལ་སོགས་པ༔ ནོར་ལྷ་ཀུན་གྱི་ཐུགས་དམ་བསྐང་༔ དེ་ལྟར་ཐུགས་དམ་བསྐངོས་ནས་ཀྱང་༔ བདག་གི་བསམ་པ་འགྲུབ་པ་དང་༔ ཞི་རྒྱས་དབང་དྲག་འགྲུབ་པར་མཛོད༔ ས་མཱ་ཡཱ༔ རྒྱ་རྒྱ་རྒྱ༔ ཁ་ཐོ་གུ་ཧྱ༔ ཤུམས༔ ༔ཞེས་པ་འདི་བདག་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་བྱ་ལོ་ནག་པ་ཟླ་བའི་ཚེས་བཅོ་བརྒྱད་ལ་ཨོ་རྒྱན་རིན་པོ་ཆེས་དངོས་སུ་གསུངས་སོ༔ ཧཱུཾ། །རྒྱལ་བའི་དགོངས་པ་ཕྱོགས་བཅུར་རྒྱས་མཛད་ཅིང་། །རྟོགས་པ་མཐར་
ཕྱིན་འགྲོ་བ་འདྲེན་པའི་དཔལ། །མཐར་ཐུག་གསང་བའི་རྒྱུད་ལ་མངའ་བརྙེས་པའི། །བཀའ་བཞི་བརྒྱུད་པའི་བླ་མའི་ཐུགས་དམ་བསྐང་། །གྲུབ་ཆེན་བརྒྱ་དང་བརྒྱད་ཅུའི་ཐུགས་དམ་བསྐང་། །ཏེ་ལོ་ནཱ་རོ་མར་མི་དུས་གསུམ་མཁྱེན། །རས་ཆེན་སྤོམ་བྲག་རྣམས་ཀྱི་ཐུགས་དམ་བསྐང་། །བསམ་བཞིན་སྲིད་པར་སྐུ་འཁྲུངས་འཛམ་གླིང་རྒྱན། །ཐུགས་རྗེ་མངའ་བདག་ཀུན་མཁྱེན་སྲིད་ཞིའི་དཔལ། །སྨིན་གྲོལ་གཉིས་ལ་མངའ་བརྙེས་རིན་པོ་ཆེ། །དཔལ་ལྡན་ཀརྨ་པ་ཡི་ཐུགས་དམ་བསྐང་། །བཀའ་བརྒྱུད་རྒྱ་མཚོའི་རྗེས་སུ་རབ་འབྲངས་ནས། །བཞེད་དོན་བསྒྲུབ་པའི་དད་བརྩོན་ལྷུར་རྒྱས་ཏེ། །བསྟན་འགྲོའི་དོན་རྣམས་བསྒྲུབ་ལ་མངོན་གཞོལ་བ། །གར་དབང་ཆོས་ཀྱི་དབང་ཕྱུག་ཐུགས་དམ་བསྐང་། །ཧཱུྃ། སྤྲུལ་སྐུ་གྲུབ་ཐོབ་རྣམས་ཀྱི་ཐུགས་དམ་བསྐང་། །ཟུང་འཇུག་བརྒྱུད་པའི་བླ་མའི་ཐུགས་དམ་བསྐང་། །ཕྱག་ཆེན་བརྒྱུད་པའི་བླ་མའི་ཐུགས་དམ་བསྐང་། །རིག་འཛིན་རྩ་བརྒྱུད་བླ་མའི་ཐུགས་དམ་བསྐང་། །ཕྱི་ནང་གསང་བ་ཡང་གསང་བླ་མེད་ཀྱི། །མཆོད་ཚོགས་གཏོར་མས་ཐུགས་དམ་གཉན་པོ་བསྐང་། །ཐུགས་དམ་བསྐང་ཞིང་
ཉམས་ཆག་དག་གྱུར་ཅིག །མཆོག་དང་ཐུན་མོང་དངོས་གྲུབ་བདག་ལ་སྩོལ། །མི་མཐུན་གནོད་པའི་ཕྱོགས་ཀུན་བཟློག་ཏུ་གསོལ། །ཧཱུྃ། །ནམ་མཁའ་དང་མཉམ་ཆོས་སྐུ་བསམ་མི་ཁྱབ། །མཚན་དཔེས་རབ་བརྒྱན་ལོངས་སྐུ་བསམ་མི་ཁྱབ། །ཆུ་ཟླ་དང་མཉམ་སྤྲུལ་སྐུ་བསམ་མི་ཁྱབ། །སྐུ་གསུམ་བདེ་མཆོག་ཡབ་ཡུམ་ཐུགས་དམ་བསྐང་། །དཔའ་བོ་དཔའ་མོ་སུམ་ཅུ་རྩ་བདུན་དང་། །ཉི་ཤུ་རྩ་བཞིའི་གནས་དང་ཉེ་བའི་གནས། །དཔའ་བོ་མཁའ་འགྲོ་རྣམས་ཀྱི་ཐུགས་དམ་བསྐང་། །ཧཱུཾ། ཆོས་དབྱིངས་རྣམ་དག་ངང་ཉིད་ལས། །འགྲོ་བའི་དོན་མཛད་གཞན་དོན་དུ། །ཡེ་ཤེས་སྤྲུལ་པ་ཕྱོགས་བཅུར་འགྱེད། །རྗེ་བཙུན་མ་ཡི་ཐུགས་དམ་བསྐང་། །ཕག་མོ་ལྷ་ལྔའི་ཐུགས་དམ་བསྐང་། །སེང་གདོང་མ་ཡི་ཐུགས་དམ་བསྐང་། །ཁྲོས་མའི་ལྷ་ཚོགས་ཐུགས་དམ་བསྐང་། །གནས་དང་ཉེ་བའི་གནས་ལ་སོགས། །པུ་རི་ར་མ་ལ་སོགས་པ། །ཡུལ་ཆེན་ཉི་ཤུ་རྩ་བཞི་ཡི། །དཔའ་བོ་དཔའ་མོ་མཁའ་འགྲོའི་ཚོགས། །བསྐང་ངོ་བསྐལ་པར་ཐུགས་དམ་བསྐང་། །རྣལ་འབྱོར་བདག་ཅག་འཁོར་བཅས་ཀྱི། །དམ་ཚིག་
ཉམས་ཆག་ཚོགས་ཀྱིས་བསྐང་། །ལྟ་བ་ལོག་པ་གཏོར་མས་བསྐང་། །སྲུང་མ་གཡེལ་བ་འཛབ་ཀྱིས་བསྐང་། །འདིར་བྱོན་དམ་སྐོངས་ཕྲིན་ལས་མཛོད། །འདོད་པའི་དངོས་གྲུབ་བདག་ལ་སྩོལ། །ཧཱུྃ། བྱང་ཕྱོགས་ལྕང་ལོ་ཅན་གྱི་གནས། །ཁྲོ་ཆེན་འདུས་པའི་དཀྱིལ་འཁོར་ནས། །མཐུ་སྟོབས་རྩལ་ལྡན་ཁྲོ་བོའི་རྒྱལ། །སངས་རྒྱས་ཀུན་གྱི་གསང་བ་འཛིན། །ཁྱོད་ཀྱི་ཐུགས་དམ་བསྐང་བ་ནི། །ལོངས་སྤྱོད་རྫས་དང་སྤྱན་གཟིགས་དཀོར། །མཐུན་རྫས་དུ་མས་ཐུགས་དམ་བསྐང་། །ཁྱུང་ཆེན་སྡེ་ལྔའི་ཐུགས་དམ་བསྐང་། །བདག་ཅག་ཉམས་ཆག་བསྐང་གྱུར་ཅིག །བསྐངས་ནས་བདག་ལ་དངོས་གྲུབ་སྩོལ། །ཕྲིན་ལས་རྣམ་བཞི་འགྲུབ་གྱུར་ཅིག །བསྐང་ངོ་བཀའ་བརྒྱུད་བླ་མ་ཡི་དམ་ལྷ། །དཔའ་བོ་མཁའ་འགྲོ་དམ་ཅན་རྒྱ་མཚོའི་ཚོགས། །ཐུགས་དམ་བསྐང་ལ་ཉམས་ཆག་སོར་ཆུད་མཛོད། །ཐུགས་རྗེ་ཆེན་པོས་བདག་ལ་དགོངས་པར་མཛོད། །ནག་པོ་ཆེན་པོ་ཡུམ་གཅིག་དུད་སོལ་མ། །ལེགས་ལྡན་ནག་པོ་ཡུམ་གཅིག་རྩ་འཇིབ་དམར། །སྤྲུལ་པའི་ལས་མཁན་ཆེན་པོ་བྱ་རོག་གདོང་། །སེངྒེའི་གདོང་ཅན་རྣལ་འབྱོར་མ་ཁྲོས་
དང་། །བྱ་རྒོད་མཁའ་ལྡིང་ཁྭ་དང་འུག་པ་དང་། །ཕག་ཁྱི་ལྕེ་སྤྱང་སྟག་གི་གདོང་པ་ཅན། །ཤ་ཟ་ཁྲག་འཐུང་མ་མོ་འཁོར་དང་བཅས། །བྱ་ནག་ཁྱི་ནག་སྤྲུལ་པའི་ཚོགས་བཅས་དང་། །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །ཁྱོད་ལ་བདག་གིས་བཅོལ་བའི་ཕྲིན་ལས་ནི། །རྡོ་རྗེ་སློབ་དཔོན་བླ་མའི་སྐུ་ཚེ་སྲིངས། །རྣལ་འབྱོར་བདག་ཅག་རྡོ་རྗེ་མཆེད་ལྕམ་བཅས། །རྒྱུ་སྦྱོར་ཡོན་བདག་རྐང་ཕྲན་འཁོར་གཡོག་བཅས། །མི་མཐུན་བར་ཆད་གཡུལ་ལས་རྒྱལ་བ་དང་། །སྐག་དང་སྲི་དང་ལྟས་ངན་མཚན་ངན་དང་། །རྨི་ལམ་ངན་པ་ལ་སོགས་བར་ཆད་བཟློག །ཚེ་དང་དཔལ་དང་བཀྲ་ཤིས་འབྱོར་པ་སྤེལ། །བསམ་པའི་དོན་རྣམས་ཡིད་བཞིན་འགྲུབ་པ་དང་། །གནོད་བྱེད་དགྲ་བགེགས་སྒྲོལ་བའི་ལས་མཛོད་ཅིག །སྤྲུལ་པའི་འཁོར་ཚོགས་དམ་ཚིག་གཉན་པོ་རྣམས། །ཐུགས་རྗེ་ཆེན་པོས་དགོངས་ཤིག་བཅོམ་ལྡན་གྱི། །བཀའ་དང་འགལ་བ་ཐམས་ཅད་མཐོལ་ལོ་བཤགས། །སྐུ་གསུང་ཐུགས་ཀྱི་དམ་ཚིག་ཉམས་ཆག་བཤགས། །ཐུགས་དམ་བསྐངས་བའི་བྱིན་རླབས་ཀྱིས། །ཆོག་ཆེན་ཉམ་ང་བཟློག་ཏུ་གསོལ། །
ཕྱི་ནང་བར་ཆད་བཟློག་ཏུ་གསོལ། །ཕྲིན་ལས་རྣམ་བཞི་བསྒྲུབ་ཏུ་གསོལ། །ཧཱུྃ། རང་བཞིན་རྣམ་དག་དབྱིངས་ཉིད་ལས། །ཐུགས་རྗེ་ཆེན་པོའི་སྐུ་སྤྲུལ་པ། །སྐྱེ་མེད་ངང་ལས་འཇིགས་བྱེད་སྐུ། །བསྟན་པ་བསྲུང་ཕྱིར་ཐུགས་བརྩེ་བར། །དཔལ་ལྡན་མགོན་པོའི་ཐུགས་དམ་བསྐང་། །དཔལ་ལྡན་གཉན་གྱི་རེ་མ་ཏི། །ལྷ་མོ་ཆེན་མོ་ནམ་གྲུ་མ། །རྫོགས་བྱེད་ཆེན་མོ་སྐག་བཟློག་མ། །ནག་མོ་ཆེན་མོ་ཁ་འབར་མ། །བྱིསྦ་ཀུན་གྱི་དུར་འདེབས་མ། །དུར་ཁྲོད་ཀུན་གྱི་ལོ་མ་ཅན། །རཀྟ་ཀུན་གྱི་ཙ་མུན་ཏྲ། །ནམ་མཁའི་ཁམས་ཀྱི་དབང་མོ་ཆེ། །བར་སྣང་ཁམས་ཀྱི་གློག་མ་སྤྲིན། ཁ་ནས་མེ་འབར་རྒྱ་མཚོ་སྐེམ། །ལག་ནས་རྡོ་འཕེན་རི་རབ་བསྙིལ། །རལ་པ་ནག་པོས་སྟོང་ཁམས་ཁེངས། །ཁ་ནས་ཁྲག་གི་རྒྱ་མཚོ་ཁོལ། །ཉིན་གྱི་དུས་སུ་རྟོག་བྱེད་ཅིང་། །མཚན་གྱི་དུས་སུ་རྒྱུག་བྱེད་མ། །དཔལ་གྱི་བཀའ་ཉན་དམ་ཚིག་ཅན། །ནག་མོ་འཁོར་བཅས་ཐུགས་དམ་བསྐང་། །དམ་རྫས་བདུད་རྩིའི་གཏོར་མ་དང་། །རྟེན་རྫས་སྒྲུབ་རྫས་བསྐང་རྫས་ཀྱིས། །འཁྲུགས་པའི་མ་མོའི་ཐུགས་དམ་བསྐང་། །ཐུགས་དམ་བསྐང་ངོ་ས་མ་ཡ། །
ཐུགས་དམ་བསྐངས་བའི་བྱིན་རླབས་ཀྱིས། །རྣལ་འབྱོར་བདག་ཅག་འཁོར་བཅས་ཀྱི། །ནད་ཁ་ཆོད་ལ་རིམས་ཁ་བསྒྱུར། །ཁྲམ་ཁ་ཕྱེས་ལ་ཤོ་རྡེལ་སྤོས། །ནད་གདོན་བར་ཆད་བསྒྱུར་དུ་གསོལ། །མི་ནད་ཕྱུགས་ནད་བསྒྱུར་དུ་གསོལ། །ཧཱུྃ། བླ་མ་མགོན་པོ་དབྱེར་མེད་ལ། །བདག་ནི་གུས་པས་ཐུགས་དམ་བསྐང་། །བདག་དང་སེམས་ཅན་ཐམས་ཅད་ཀྱི། །བར་ཆད་མ་ལུས་བསལ་དུ་གསོལ། །གཞན་ཡང་ཐུགས་དམ་བསྐང་བ་ནི། །བདུད་རྩི་སྨན་གཏོར་རཀྟ་དང་། །ཤ་སྣ་སྙིང་སྣ་ཁྲག་སྣ་དང་། །ཆིབས་རྟ་འགྱིང་གཡག་རྟེན་ལུག་དང་། །བེང་དང་རུ་མཚོན་གསང་བའི་རྫས། །མཐུན་རྫས་དུ་མས་ཐུགས་དམ་བསྐང་། །ཐུབ་བདག་གློག་ཕྲེང་ཐུགས་དམ་བསྐང་། །སྲོག་བདག་ཏྲཀྐད་ཐུགས་དམ་བསྐང་། །མ་ནིང་ནག་པོ་འཁོར་བཅས་ཀྱི། །ཐུགས་དམ་གཉན་པོ་བསྐང་གྱུར་ཅིག །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །ཉེར་སྤྱོད་འོས་པ་ཕུན་སུམ་ཚོགས་པའི་མཆོག །མ་ཚང་མེད་པར་རྒྱ་ཆེར་སྤེལ་བ་ཡིས། །ལྷ་ཆེན་ཀུན་དགའ་གཞོན་ནུའི་ཐུགས་དམ་བསྐང་། །རླུང་ལྟར་མགྱོགས་པའི་རྟ་ནག་རྟིང་དཀར་དང་།
གཡག་ནག་རུ་རྣོན་སྤུ་ཞོལ་བརྗིད་ཅིང་རྔམ། །ཁྱི་ནག་དོམ་བུ་གཏུམ་ཞིང་འཇིགས་པའི་གཟུགས། །ལུག་ནག་རྒྱན་ལྡན་རྣམས་ཀྱིས་ཐུགས་དམ་བསྐང་། །བྷྱོ༔ ལྷོ་ནུབ་ལང་ཀ་པཱུ་རིའི་དུར་ཁྲོད་ནས། །རིག་འཛིན་སྲོག་ཤིང་རྣལ་འབྱོར་དགྲ་ལྷ་ཆེ། །བསྟན་པའི་བཀའ་སྲུང་མཐུ་སྟོབས་རྫུ་འཕྲུལ་ཆེ། །ནག་པོ་ཐོད་ཕྲེང་ཡབ་ཡུམ་ཐུགས་དམ་བསྐང་། །གཉེན་མགོན་གདོང་བཞི་ཡབ་ཡུམ་ཐུགས་དམ་བསྐང་། །ལྷ་ཆེན་དབང་ཕྱུག་ཡབ་ཡུམ་ཐུགས་དམ་བསྐང་། །བྲག་ལྷ་མགོན་པོ་དཔོན་གཡོག་ཐུགས་དམ་བསྐང་། །ལས་མགོན་མདུང་འཛིན་འཁོར་བཅས་ཐུགས་དམ་བསྐང་། །བདག་ལ་སྡང་བའི་དགྲ་བགེགས་ད་ཐུལ་ཅིག ༈ །བཞུགས་པའི་གནས་དང་མཆོད་པའི་རྫས། །ཆགས་པའི་བསྟེན་དང་མྱོས་པའི་རྫས། །དམ་ཚིག་རྫ་ས་མཆོག་མྱོས་པའི་སྐོར། །སྣ་ཚོགས་སྤྱན་གཟིགས་མཆོད་པ་འདིས།། །དུར་ཁྲོད་བདག་པོའི་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་བསྐང་། །འཁོར་གྱི་ཤ་ཟའི་ཐུགས་དམ་བསྐང་། །དབུགས་ལེན་ཤན་པའི་ཐུགས་དམ་བསྐང་། །སྐུ་ཡི་སྤྲུལ་པས་ནམ་མཁའ་གང་། །སྤྲུལ་པ་འབུམ་སྡེའི་ཐུགས་དམ་བསྐང་། །
ལྷ་སྲིན་སྡེ་བརྒྱད་ཁྱོད་ཀྱི་འཁོར། །སྟོང་ཕྲག་བརྒྱད་ཅུ་ཁྱོད་ཀྱི་འཁོར། །འཁོར་དང་བཅས་པའི་ཐུགས་དམ་བསྐང་། །ངེ་ནེ་མ་ཡི་ཐུགས་དམ་བསྐང་། །དགའ་བྱེད་དབང་ཕྱུག་ཐུགས་དམ་བསྐང་། །ཁྱོད་ཀྱི་ཐུགས་དམ་བསྐང་གྱུར་ཅིག །དཔལ་ལྡན་སྔགས་ཀྱི་སྲུང་མ་ལ། །མཐུན་པའི་རྫས་ཀྱིས་བསྐང་བ་ནི། །ཤ་ཁྲག་དམར་གྱི་གཏོར་མ་དང་། །བདུད་རྩི་སྨན་གྱི་མཆོད་པ་དང་། །རཀྟ་དམར་གྱི་ཨནྡྷཾ་དང་། །ཞུན་ཆེན་མར་མེའི་གསུར་དུད་དང་། །ཞལ་ཟས་ཚོགས་ཀྱི་མཆོད་པ་ཡིས། །སྨུག་ནག་འཁོར་བཅས་ཐུགས་དམ་བསྐང་། །སྲོག་སྒྲུབ་ནག་མོའི་ཐུགས་དམ་བསྐང་། ཁ་མོ་ཆེ་ཡི་ཐུགས་དམ་བསྐང་། །སྤྱང་ཞོན་མཆེད་གསུམ་ཐུགས་དམ་བསྐང་། །ཧཱུྃ། གཟའ་མཆོག་ཆེན་པོ་འཁོར་བཅས་ལ། །དམར་གཏོར་བཤོས་བུ་དགུ་བསྐོར་དང་། །དགྲ་བོའི་ཤ་ཁྲག་རུས་པ་དང་། །མེ་ཏོག་སྟོང་དང་ཆུ་སྣ་སྟོང་། །སྨན་སྣ་སྟོང་དང་ཤ་སྣ་སྟོང་། །སྙིང་སྣ་སྟོང་དང་ཁྲག་སྣ་སྟོང་། །གསུར་ཆེན་རོལ་མོ་སྣ་ཚོགས་ཀྱིས། །དྲང་སྲོང་འཁོར་བཅས་ཐུགས་དམ་བསྐང། །ཧ་བ་ཤ་ཡི་ཐུགས་དམ་བསྐང་། །ཤན་པ་དམར་ནག་
ཐུགས་དམ་བསྐང། །ཧ་ར་ནག་པོའི་ཐུགས་དམ་བསྐང་། །ཧཱུཾ། རྡོ་རྗེ་མི་འགྱུར་དཔལ་གྱི་ཡུམ། །གསང་མཚན་རྡོ་རྗེ་བཞེད་པ་མོ། །རྡོ་རྗེ་དཔལ་མོ་ལོངས་སྤྱོད་ཡུམ། །གསང་བ་རྡོ་རྗེ་གར་མཁན་མ། །མཆེད་ལྔ་འཁོར་བཅས་ཐུགས་དམ་བསྐང་། །གྷ་ན་པ་ཏིའི་ཐུགས་དམ་བསྐང་། །ཆོས་ཀྱི་སྒྲོལ་མའི་ཐུགས་དམ་བསྐང་། །མཁའ་རི་ལྕམ་དྲལ་ཐུགས་དམ་བསྐང་། །ཁྱེད་ཀྱི་མཐུ་སྟོབས་རྫུ་འཕྲུལ་གྱིས། །སྣང་སྲིད་བདག་གི་དབང་དུ་བསྡུས། །རྣལ་འབྱོར་བཅོལ་བའི་ཕྲིན་ལས་མཛོད། །ཧཱུྃ། སྟོང་གསུམ་སྟོང་གི་འཇིག་རྟེན་ན། །ལྷ་རྫས་དགེ་བའི་མཆོད་གཏོར་འདི། །ཀླུ་རྒྱལ་འཁོར་དང་བཅས་ལ་འབུལ། །བཞེས་ནས་ཐུགས་དམ་བསྐང་གྱུར་ཅིག །གཞོན་ནུ་གཏུམ་པོའི་ཐུགས་དམ་བསྐང་། །མི་མགོན་དཀར་པོའི་ཐུགས་དམ་བསྐང་། །ཀླུ་ཆེན་བརྒྱད་ཀྱི་ཐུགས་དམ་བསྐང་། །ཐང་ལྷ་གཉན་གྱི་ཐུགས་དམ་བསྐང་། །རྡོ་རྗེ་རྒྱལ་པོའི་ཐུགས་དམ་བསྐང་། །གཏེར་སྲུང་སྨྱོ་ཁའི་ཐུགས་དམ་བསྐང་། །དགེ་བསྙེན་ལྕམ་དྲལ་ཐུགས་དམ་བསྐང་། །ཐུགས་དང་འགལ་བ་བསྐང་ཞིང་བཤགས། །ནད་དང་གནོད་པ་ཞི་བར་མཛོད། །སྨིན་
དང་རཀྟ་བདུད་རྩིའི་ཁུ་བར་བཅས། །སྨྲེང་བའི་ཨགྷོ་འབྲས་ཆེན་གཙང་མའི་བཤོས། །བྱུག་པའི་ཞུན་ཆེན་བདུག་པའི་གསུར་ཆེན་དྲི། །མཛེས་པའི་བ་དན་གཡབ་དེར་རྟེན་པའི་རྫས། །སྟག་གཟིག་རྒྱལ་མཚན་མདུང་དར་བ་དན་བཅས། །ཐུགས་དམ་བསྐང་ཕྱིར་འབུལ་གྱིས་བཞེས། །ཀླུ་བཙན་སྤུན་བདུན་དགེ་བསྙེན་སྤུན་བདུན་དང་། །གནོད་སྦྱིན་སྤུན་བདུན་རྣམས་ཀྱི་ཐུགས་དམ་བསྐང་། །ཇག་པ་མེ་ལེན་སྤྲུག་གི་བཙན་རྒོད་དང་། །སྐྱེས་བུ་ལུང་བཙན་རྣམས་ཀྱི་ཐུགས་དམ་བསྐང་། །བེག་རྩེ་སྙིང་དྲུང་བཙན་པོ་ལ་སོགས་པ། །བཙན་རྒོད་སུམ་བརྒྱ་དྲུག་ཅུའི་ཐུགས་དམ་བསྐང་། །ཁྱེད་ཀྱི་ཐུགས་དམ་གཉན་པོ་དེས་བསྐངས་ལ། །བདག་གིས་བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། གཞན་ཡང་འཇིག་རྟེན་བོད་ཁམས་ན། །སློབ་དཔོན་པདྨའི་དགེ་བསྙེན་ཚོགས། །བསྟན་པ་བསྲུང་བར་ཞལ་བཞེས་པའི། །སྔགས་བདག་དྲེགས་ཆེན་བཅོ་བརྒྱད་དང་། །དྲེགས་པའི་སྡེ་དཔོན་སུམ་ཅུ་དང་། །བསྟན་སྲུང་བརྟན་མ་བཅུ་གཉིས་དང་། །དགེ་བསྙེན་ཉེར་གཅིག་གཞི་བདག་ཚོགས། །ངོམ་རྒྱལ་རྨ་རྒྱལ་སྨོན་སྐྱེས།
སོགས། །ཆོས་སྲུང་དམ་ཅན་ཐམས་ཅད་ལ། །སྤོས་དང་མར་མེས་ཐུགས་དམ་བསྐང་། །ཞལ་ཟས་ཚོགས་ཀྱིས་ཐུགས་དམ་བསྐང་། །སྨན་གཏོར་རཀྟས་ཐུགས་དམ་བསྐང་།། དངོས་འབྱོར་ཡིད་སྤྲུལ་ལ་སོགས་པ། །མཐུན་རྫས་དུ་མས་ཐུགས་དམ་བསྐང་། །བསྐངས་ནས་ཕྲིན་ལས་འགྲུབ་པར་མཛོད། །བཅོམ་ལྡན་རྩ་བ་གསུམ་པོ་ལ། །བཀྲ་ཤིས་རྫས་རྟགས་རིན་ཆེན་བདུན། །བདག་ཅག་འཁོར་དང་བཅས་པ་ཡིས། །མཆོད་པར་འབུལ་ལོ་ཐུགས་དམ་བསྐང་། ༈ །ཐུགས་དམ་བསྐང་བའི་བྱིན་རླབས་ཀྱིས། །ཆོག་ཆེན་ཉམ་ང་བཟློག་ཏུ་གསོལ། །ཕྱི་ནང་བར་ཆད་བཟློག་ཏུ་གསོལ། །ཕྲིན་ལས་རྣམ་བཞི་བསྒྲུབ་ཏུ་གསོལ། །།དཀྱིལ་འཁོར་གཉན་པོ་དྲལ་ལ་རེ། །ཉེས་བྱེད་སྡེབས་སུ་ཤོར་ལ་རེ། །བདག་ཅག་རྣལ་འབྱོར་སྒྲུབ་པ་པོ། །རྡོ་རྗེ་སློབ་དཔོན་སློབ་མར་བཅས། །རྡོ་རྗེ་མཆེད་དང་ལྕམ་དྲལ་དང་། །རྒྱུ་སྦྱོར་ཡོན་བདག་འཁོར་བཅས་ལ། །མི་ལ་ནད་ཡམས་མ་གཏོང་ཅིག །ཕྱུགས་ལ་གོད་ཡམས་མ་གཏོང་ཅིག །ནོར་ལ་རྒྱ་གྲམ་མ་གཏོང་ཅིག །ཞིང་ལ་བཙའ་སད་མ་གཏོང་ཅིག །བདུད་ཀྱི་ཞགས་པ་ནག་པོ་ཆོད། །
གཤིན་རྗེའི་ཁྲམ་ཁ་དགྲ་ལ་བསྒྱུར། །མི་མཐུན་བར་ཆད་རྐྱེན་རྣམས་ཟློག །འཁོར་རྣམས་སྲུངས་ལ་རྐྱེན་རྣམས་ཟློག །སྡང་བའི་དགྲ་ལ་རྟགས་ཕྱུངས་ཤིག །གནོད་པའི་བགེགས་ལ་ལས་མཛོད་ཅིག །འདོད་པའི་དངོས་གྲུབ་སྩོལ་བ་དང་། །བཅོལ་བའི་ཕྲིན་ལས་འགྲུབ་པར་མཛོད། །ཐུགས་དམ་བསྐངས་བའི་བྱིན་རླབས་ཀྱིས། །ཁྲོ་བོའི་དྲག་ཤུལ་བཟློག་ཏུ་གསོལ། །ཧེ་རུ་ཀ་ཡི་གཟི་བརྗིད་ཟློག །ཕུར་པའི་བྱད་ཁ་བཟློག་ཏུ་གསོལ། །སྟོབས་པོ་ཆེ་ཡི་ཟིལ་གནོན་ཟློག །ལྷ་རྣམས་ཀུན་གྱི་རྩུབ་རིམ་ཟློག །ལྷ་མིན་རྣམས་ཀྱི་དུག་གཟེར་ཟློག །གཟའ་ཆེན་བརྒྱད་ཀྱི་གཟེར་འདེབས་ཟློག །གཤིན་རྗེ་ཕོ་མོའི་འཕྲུལ་འཁོར་ཟློག །བདུད་དམག་རྣམས་ཀྱི་ཁྲམ་ཁ་ཟློག །མ་མོ་རྣམས་ཀྱི་ཐུན་ཟོར་ཟློག །ཀླུ་ཆེན་རྣམས་ཀྱི་འཆིང་བ་ཟློག །གནོད་སྦྱིན་རྣམས་ཀྱི་གཟེར་ནད་ཟློག །བཙན་གྱི་རྒྱུ་སྲང་བཟློག་ཏུ་གསོལ། རྒྱལ་པོའི་དབྱིངས་སྨྱོ་ཐམས་ཅད་ཟློག །མཁའ་འགྲོའི་ཁྲག་ནད་བཟློག་ཏུ་གསོལ། །འབྱུང་པོ་ཡི་དྭགས་རིམས་ནད་ཟློག །ཐེའུ་རང་འགོང་པོ་ལ་སོགས་པ། །དམ་སྲི་ལོག་འདྲེན་བགེགས་ཚོགས་ཀྱིས། །
ཕུགས་ཀྱི་སྲི་རྐུན་ཐམས་ཅད་ཟློག །བལ་མོའི་དུག་མཚོན་བཟློག་ཏུ་གསོལ། གུ་རུ་དྷེ་ཝ་ཌཱཀི་ནི༔ ཨོཾ་མ་ཧཱ་ཀཱ་ལ་ཀཱ་ལི༔ མ་ཧཱ་མཱ་ས་ཁ་རཾ་ཁཱ་ཧི༔ མ་ཧཱ་རཀྟ་ཁ་རཾ་ཁཱ་ཧི༔ མ་ཧཱ་ཙིཏྟ་ཁ་རཾ་ཁཱ་ཧི༔ མ་ཧཱ་བ་སུ་ཏ་ཁ་རཾ་ཁཱ་ཧི༔ མ་ཧཱ་པཉྩ་མེ་ཙི་ཁ་རཾ་ཁཱ་ཧི༔ མ་ཧཱ་གོ་རོ་ཙ་ན་ཁ་རཾ་ཁཱ་ཧི༔ མ་ཧཱ་ཨ་མྲྀ་ཏ་ཁ་རཾ་ཁཱ་ཧི༔ མ་ཧཱ་སུ་ར་ཏ་ཁ་རཾ་ཁཱ་ཧི༔ མ་ཧཱ་བྷ་ལིང་ཏ་ཁ་རཾ་ཁཱ་ཧི༔ མ་ཧཱ་ཀཾ་ནི་རི་ཏི་ཁ་རཾ་ཁཱ་ཧི༔ ༈ བཅོམ་ལྡན་རྩ་བ་གསུམ་པོ་ལ། །བདག་ཅག་འཁོར་དང་བཅས་པ་ཡི། །འཁོར་བའི་ཉོན་མོངས་དབང་གྱུར་པས། །མི་ཤེས་ཐུགས་དང་འགལ་གྱུར་ཏེ། །མཐོལ་ལོ་བཤགས་སོ་བཟོད་པར་གསོལ། ༈ །རྗེ་བཙུན་བླ་མ་རྣམས་ཀྱི་སྤྱན་ལམ་དུ། །ཡོ་བྱད་འབྱོར་ཚོགས་ཆུང་བ་མཐོལ་ལོ་བཤགས། །ཡི་དམ་ལྷ་ཚོགས་རྣམས་ཀྱི་སྤྱན་ལམ་དུ། །མངོན་རྟོགས་སྤྱངས་ལེན་བགྱིས་པ་མཐོལ་ལོ་བཤགས། །མཁའ་འགྲོ་སྡེ་བཞི་རྣམས་ཀྱི་སྤྱན་ལམ་དུ། ཁས་བླངས་དམ་བཅས་ཉམས་པ་མཐོལ་ལོ་བཤགས། །ཆོས་སྐྱོང་སྲུང་མ་རྣམས་ཀྱི་སྤྱན་ལམ་དུ། །གཏོར་མ་ལོ་ཟླར་འགྱངས་བ་མཐོལ་ལོ་བཤགས། །དུས་གསུམ་ཕ་མ་རྣམས་ཀྱི་
སྤྱན་ལམ་དུ། །དྲིན་ལན་ལན་གྱིས་མ་ལོན་མཐོལ་ལོ་བཤགས། །མཆེད་དང་ལྕམ་དྲལ་རྣམས་ཀྱི་སྤྱན་ལམ་དུ། །དམ་ཚིག་བརྩེ་གདུང་ཆུང་བ་མཐོལ་ལོ་བཤགས། །འགྲོ་དྲུག་སེམས་ཅན་རྣམས་ཀྱི་སྤྱན་ལམ་དུ། །སྙིང་རྗེ་ཕན་སེམས་ཆུང་བ་མཐོལ་ལོ་བཤགས། །སོ་སོར་ཐར་པ་རྣམས་ཀྱི་སྡོམ་པ་དང་། །བྱང་ཆུབ་སེམས་དཔའ་རྣམས་ཀྱི་བསླབ་པ་དང་། །རིག་འཛིན་སྔགས་ཀྱི་དམ་ཚིག་ལ་སོགས་པ། །འགལ་ཞིང་ཉམས་པ་ཐམས་ཅད་མཐོལ་ལོ་བཤགས། །མི་འཆབ་མི་སྦེད་སླན་ཆད་སྡོམ་པར་བགྱི། །དུས་གསུམ་བྱས་པའི་སྡིག་སྒྲིབ་མཐོལ་བཤགས་ན། །ཚངས་པར་མཛད་ནས་སྐུ་གསུང་ཐུགས་ལ་སོགས། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཨོ་ས་མ་ཡ༔ ཨཱ༔ ས་མཱ་ཡ༔ ཧཱུྃ་ས་མ་ཡ༔ གུ་རུ་དྷེ་ཝ་ཌཱཀི་ནི༔ སརྦ་དྷརྨ་པ་ལ་ལོ་ཀ་པཱ་ལ་ས་པ་རི་ཝཱ་ར། ཨོཾ་བཛྲ་སཏཱ་ས་མ་ཡ། སོགས་ཡི་གེ་བརྒྱ་པ་ཅི་རིགས་བཟླས། ཞེས་རྒྱལ་བ་རྒྱ་མཚོ་ལྷ་ལྔའི་དཀྱིལ་འཁོར་ལ་སྦྱར་རྒྱུའི་རྒྱུན་ཁྱེར་བསྐང་སྤུང་འདི་ནི་དཔལ་རི་རྩེའི་མཚམས་ཁོང་དུ་སྣ་ཚོགས་དབྱིག་གི་ལོ་སྤྲེལ་ཟླའི་ཚེས་བཅུ་འགྲུབ་སྦྱོར་ཉིན། རཱ་ག་ཨ་སྱས་བསྒྲིགས་པ་ལ། ཉེས་འགལ་ལྷ་ལ་བཤགས་ཤིང་དགེ་བས་སྒྲིབ་
གཉིས་བྱང་བར་གྱུར་ཅིག །སརྦ་མངྒ་ལཾ།། །། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།