ཤོག་གྲངས་ ༥༠༡ ནས་ ༦༠༠ བར།
ལས་དབང་གི་དོན་དུ་རྟོགས། །དེ་ཡང་ས་བཅུའི་མགོན་པོ་ལ། །དབང་བསྐུར་བ་ནི་རྨད་བྱུང་ཆེ། །ཁམས་གསུམ་གྱི་ནི་ཡང་དག་ཆེ། །མི་འཇིག་སེང་གེའི་ཁྲི་ལ་བཞུགས་།ཕྱོགས་བཅུའི་རྒྱལ་བའི་ཕྱག་དང་ནི། །བདེ་གཤེགས་ཆེན་པོའི་དབང་བསྐུར་བས། །སྐད་ཅིག་ཡུད་ཙམ་ཐང་ཅིག་ལ། །ཆོས་ཀྱི་སྣང་བ་ཆེན་པོ་དང་། །འོད་དང་ཆོས་སྤྲིན་ཚད་མེད་དང་། །དེ་བཞིན་གཤེགས་པ་ཚད་མེད་པའི། །ཆོས་ཀྱི་སྣང་བ་ཆོས་ཀྱི་འོད། །ཆོས་ཀྱི་སྤྲིན་ཆེན་ཚད་མེད་ཐོབ། །ཅེས་གསུངས་སོ། །དེ་ནས་རྡོ་རྗེ་ལྟ་བུའི་ཏིང་ངེ་འཛིན་བསྒོམས་པས་ས་བཅུ་གཅིག་ཀུན་ཏུ་འོད་ཐོབ་སྟེ། སྒྱུ་མ་ལམ་རིམ་ལས། སྲིད་པ་ཐ་མར་གྱུར་པ་དེས། །ཤེས་བྱའི་སྒྲིབ་པ་ལེགས་སྤངས་པས། །རྡོ་རྗེ་ལྟ་བུའི་ཏིང་འཛིན་རྟོགས། །ནང་ལྟར་བཅུ་གཅིག་མགོན་པོ་སྟེ། །འོག་མིན་བཙུན་མོའི་གཞལ་ཡས་སུ། །ཟག་མེད་ཆེན་པོའི་དབང་བསྐུར་བས། །འོད་གསལ་རྡོ་རྗེའི་ཏིང་འཛིན་རྟོགས། །ཞེས་གསུངས་ཏེ། ཀུན་ཏུ་འོད་དང་དཔེ་མེད་དང་། །རྫོགས་པའི་སངས་རྒྱས་ཞེས་བྱ་སྟེ། །སྲོད་ལ་བདུད་བཏུལ། ནམ་གུང་ཆོས་སྐུ་དྲི་མ་མེད་པས་ཐམས་ཅད་མཁྱེན་ནས་ཤེས་བྱའི་སྒྲིབ་
པ་ཕྲ་ཞིང་ཕྲ་བ་སངས་ཏེ། ཐོ་རངས་མངོན་པར་བྱང་ཆུབ་སྟེ་སྐུ་གསུམ་གྱི་ངོ་བོར་འཚང་རྒྱ་བར་བཤད་དེ། དེའི་གསུང་བྱའི་ཆོས་ནི་སྡེ་སྣོད་གསུམ་གསུངས། ཡོན་ཏན་ནི་ཚད་བཟུང་མེད་དེ་སྤྲུལ་སྐུ་ཤཱཀྱ་ཐུབ་པ་ལྟ་བུ་སྟེ། སྡེ་སྣོད་གསུམ་རྒྱུ་མཚན་ཉིད་ཐེག་པ་དང་། བྱ་རྒྱུད་ཀྱི་འབྲས་བུ་མཐར་ཐུག་པ་ཡིན་ཏེ། པདྨ་ཟབ་པའི་རྒྱུད་ལས། ལམ་ལྔ་སྨིན་པའི་དབང་ལ་ཚང་། །ཞེས་གསུངས་པ་ལྟར། མི་སློབ་ལམ་བུམ་པའི་དབང་མཐར་ཕྱིན་པའི་འབྲས་བུ་ཡིན་པར་བཤད་དོ། །མདོའི་ལུགས་ཀྱི་འབྲས་བུ་འདི་ལས་ཡན་དུ་གཞན་དུ་མ་གསུངས་ཀྱང་། འདིར་ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྒྱུད་ལུང་གི་དགོངས་པ་ཕྱག་རྫོགས་དབྱེར་མེད་བསྐྱེད་རྫོགས་ཟུང་འཇུག་གི །འབྲས་བུ་ཀརྨ་པས་བཞེད་པ་ས་བཅོ་ལྔར་ཕྱེ་ནས། །མགྲིན་པའི་རྩ་མདུད་གོང་མ་དྷུ་ཏིའི་ཆོས་དབྱིངས་རྒྱལ་བ་རྒྱ་མཚོ་ཕོ་བྲང་གྲོལ་བས་ས་བཅུ་གཉིས་མ་ཆགས་པདྨ་ཅན་ཡེ་ཤེས་ཆེན་པོའི་ས་ཐོབ་སྟེ། རྒྱུད་གསང་བ་སྙིང་པོར། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་མི་སྨྲ་སྟེ། །སྐུ་ཡི་ཆོས་རྣམས་མཇལ་བར་སྟོན། །
ཞེས་གསུངས་པས། སྣང་སྲིད་རྒྱ་ཆད་ཕྱོགས་ལྷུང་མེད་པར་སངས་རྒྱས། རིགས་ལྔའི་ཕོ་བྲང་དུ་ཏིལ་གྱིས་གང་བུ་ལྟར་གསལ། འོག་མིན་སྟུག་པོ་བཀོད་པའི་ཞིང་ཁམས་སུ་རྣམ་སྣང་གངས་ཆེན་མཚོའི་སྐུ་ལ་སངས་རྒྱས་ཀྱི་ཞིང་ཁམས་ཐམས་ཅད་རྫོགས་པ་དེ་ཉིད་ཇི་ལྟ་བར་དེ་དང་དབྱེར་མེད་དུ་གྱུར་པའི་ཕྱོགས་བཞིར་རིགས་བཞིའི་སངས་རྒྱས་ཀྱི་ཞིང་ཁམས་སོགས་མདོར་ན་རྒྱུ་ལུས་ཀྱི་ཕུང་ཁམས་སྐྱེ་མཆེད་ཐམས་ཅད་དཀྱིལ་འཁོར་གྱི་འཁོར་ལོའི་ངོ་བོར་མངོན་སུམ་དུ་ཚང་བ་སྟེ། སྒྱུ་མ་ལམ་རིམ་ལས། བཅུ་གཉིས་མ་ཚོགས་པདྨ་ལྷཅན། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་ནི་འདིར་སངས་རྒྱས། །ཞེས་གསུངས་པས་དེའི་ཡོན་ཏན་ཚད་མེད་པ་སྟེ། ས་བཅུ་སེམས་དཔའི་ཡོན་ཏན་ནི། བ་གླང་གི་རྨིག་རྗེས་ཀྱི་ཆུ་དངསངས་རྒྱས་ཀྱི་ཡོན་ཏན་རྒྱ་མཚོ་ཙམ་སྟེ། ས་བརྒྱད་པ་ཡན་གྱིས་སེམས་དཔའི་ཡོན་ཏན་དཔག་པར་དཀའ་སྟེ། སངས་རྒྱས་ལོངས་སྤྱོད་རྫོགས་པའི་སྐུའི་ཡོན་ཏན་བརྗོད་པར་ག་ལ་ནུས་ཏེ། སྒྱུ་མ་ལམ་རིམ་ལས། བྱང་ཆུབ་སེམས་དང་སངས་རྒྱས་ཁྱད། །རྒྱ་མཚོ་བ་གླང་རྨིག་རྗེས་མཚུངས། །དག་པ་ས་གསུམ་ཡོན་ཏན་ཀྱང་། །དཔག་
ཅིང་གཞལ་བར་མི་ནུས་ན། །ཐམས་ཅད་མཁྱེན་པའི་ཡོན་ཏན་ནི། །བརྗོད་ཅིང་དཔག་པར་སྨོས་ཅི་དགོས། །ནམ་མཁའ་ས་གཞི་གང་ཡིན་པ། །སྐྲ་རྩེས་གཞལ་བར་ནུས་སྲིད་ཀྱི། །རྒྱལ་བའི་ཡོན་ཏན་རྒྱ་མཚོ་ནི། །བསྐལ་པ་གྲངས་མེད་བརྗོད་མི་ནུས། །དེ་ཕྱིར་ཐམས་ཅད་མཁྱེན་པ་ཡི། །སྤྱོད་ཡུལ་བརྗོད་ལས་འདས་པའོ། །ཞེས་གསུངས་སོ། །དེ་ཡང་ངེས་པ་ལྔ་དང་ལྡན་པ། དུས་ངེས་པ་འཁོར་བ་ཇི་སྲིད་དུ་བཞུགས། གནས་ངེས་པ་འོག་མིན། འཁོར་ངེས་པ་ས་བཅུའི་སེམས་དཔའ། སྟོན་པ་ངེས་པ་ལོངས་སྤྱོད་རྫོགས་སྐུ། །ཆོས་ངེས་པ་ཐེག་པ་ཆེན་པོ་འབའ་ཞིག་སྟེ། བརྡའི་སྒོ་ནས་མཚོན་ཏེ་གསང་སྔགས་ཕྱི་པའི་རྒྱུད་གསུམ་མོ། །པདྨ་ཟབ་པ་ལས། ལམ་ལྔ་སྨིན་པའི་དབང་ལ་ཚང་། །གསུངས་པའི་དོན་གསང་དབང་མཐར་ཐུག་པའི་འབྲས་བུ་ཡིན་ཞིང་། ཡོ་གའི་རྒྱུད་ཀྱི་མཐར་ཐུག་གི་འབྲས་བུ་ཡིན་ཞིང་དེ་བས་གོང་དུ་མེད་ཀྱང་སྙིང་པོ་དོན་དམ་པའི་འོག་མིན་གྱི་བར་དུ་ཅུང་ཟད། ངོ་བོ་རྫོགས་མ་རྫོགས་ཁྱད་པར་ཡོད་པར་བཞེད་དེ། སྤྱི་བོ་བདེ་ཆེན་རྩ་མདུད་འཁོར་ལོའི་དབྱིབས་ཅན་གསུམ་གྱི་དང་པོ་གྲོལ་བས། ས་བཅུ་གསུམ་རྡོ་རྗེ་འཛིན་པའི་སའམ། རྡོ་རྗེ་
འཆང་གི་ས་ཐོབ། གཤིས་འགྱུར་མེད་ཆོས་སྐུ་ནམ་མཁའ་ལྟ་བུ་ལ། རང་བཞིན་གསལ་བའི་ལོངས་སྐུ་ཉི་མའི་དཀྱིལ་འཁོར་ལྟ་བུ་ལ་སྤྲུལ་སྐུ་འོད་ཟེར་ལྟ་བུར་འཆར། །རིགས་ལྔ་ལ་སོགས་ལོངས་སྤྱོད་རྫོགས་པའི་སངས་རྒྱས་རྣམས་ལ་རྡོ་རྗེ་ཐེག་པ་རྒྱ་མཚོ་ལྟ་བུའི་བརྡའི་མཚོན་ནས་སྟོན་ནོ། །པདྨ་ཟབ་པ་ལས། ལམ་ལྔ་སྨིན་པའི་དབང་ལ་ཚང་། །ཞེས་གསུངས་པས་མི་སློབ་ལམ་བཅུ་གསུམ་རྡོ་རྗེ་འཛིན་གྱི་ས་ཞེས་སམ། འཁོར་ལོ་ཚོགས་ཆེན་གྱི་ས་སྟེ། ཤེས་རབ་ཡེ་ཤེས་ཀྱི་དབང་མཐར་ཕྱིན་པའི་འབྲས་བུ་མ་ཧཱ་ཡོ་ག་དང་། གསང་སྔགས་སྤྱིའི་མཐར་ཐུག་གི་འབྲས་བུ་དེ་ལས་གོང་ན་མེད་དོ། །དེ་ཡང་སྐུ་གསུམ་དབྱེར་མེད་ཅིང་སྤྱི་བོར་རྩ་མདུད་བར་པ་བཅིངས་དགྲོལ་མེད་པར་གྲོལ་བས་བཅུ་བཞི་ཡེ་ཤེས་བླ་མ་འོད་ཀྱི་ས་སྟེ། བརྒྱད་སྟོང་པ་ལས། དེ་བཞིན་གཤེགས་པ་ནི་ཆོས་སྐུར་བལྟ་བར་བྱ་སྟེ། གཟུགས་ཀྱི་སྐུར་བལྟ་བར་མི་བྱ་གསུངས་པ་ལྟར། ངོ་བོ་ཉིད་ཀྱི་དཀྱིལ་འཁོར་དུ་དེ་བཞིན་ཉིད་ཐམས་ཅད་མཁྱེན་ཏེ། གནས་ལུགས་ཀྱི་དགོངས་པ་མཐར་ཕྱིན་པ་དབང་བཞི་པའི་འབྲས་བུ་ཕྱག་རྒྱ་ཆེན་པོའི་འབྲས་བུ་ཡིན་ཏེ། རྒྱུད་ལས། ལམ་ལྔ་སྨིན་པའི་དབང་ལ་ཚང་། །
ཞེས་པས་དབང་བཞི་པའི་དོན་ལམ་དུ་བྱས་པའི་འབྲས་བུ་འཐོབ། དེ་ནས་སྤྱི་བོའི་རྩ་མདུད་གོང་མ་བཅིངས་དགྲོལ་མེད་ཅིང་དགྲོལ་བྱ་གྲོལ་བྱེད་མེད་པར་གྲོལ་ཏེ་ཐམས་ཅད་ཀུན་ཏུ་བཟང་པོ་འཕོ་འགྱུར་མེད་པའི་ཀློང་དུ་རོ་གཅིག །གཞི་དང་པོའི་སངས་རྒྱས་གདོད་མའི་མགོན་པོ་མངོན་དུ་གྱུར་ཏེ། སྐུ་ལྔ་ཡོངས་རྫོགས་དབྱེར་མེད་པའམ། ཀུན་བཟང་གི་ས་ཞེས་སམ། །དབྱེ་བ་མེད་པའི་ས་གཅིག་སྐུ་གཅིག་ཐེག་པ་གཅིག་ཞེས་བྱ་སྟེ་ཐམས་ཅད་འདི་ལ་རྫོགས་སོ། །དེ་ནི་རྩལ་དབང་གི་འབྲས་བུ་ལྟ་བུ་ཡང་རྙིང་མའི་ལུགས་སུ་བཞེད་ལ། ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ནི་པདྨ་སྙིང་གུར་པདྨ་བརྩེགས་པ་དང་། རྒྱལ་བ་རྒྱ་མཚོ་ཞེས་བྱ་བའི་རྒྱུད་དང་། མཁའ་འགྲོ་རྒྱ་མཚོ་ཞེས་བྱ་བའི་རྒྱུད་གསང་སྔགས་རྙིང་མ་རྣམས་ནས་གསུངས་པས། རྫོགས་པ་ཆེན་པོ་ཨ་ཏི་ཡོ་གའི་བཞེད་པ་ཐེག་པ་ཀུན་ལས་འདས་པ་ས་བཅོ་ལྔ་འདས་ནས་བཅུ་དྲུག་ཡང་དག་དོན་གྱི་འོག་མིན་དུ། ཆོས་ཐམས་ཅད་ཡོངས་སུ་རྫོགས་པར་བཞེད་དོ། །གྲུབ་ཆེན་ཀརྨ་པས། གནས་ལུགས་ཀུན་བཟང་ཆོས་ཀྱི་དབྱིངས། །རྫོགས་ཆེན་ཨ་ཏི་ཡོ་ག་ནི། །ཐེག་པ་ཀུན་ལས་འདས་པ་སྟེ། །ས་ལམ་རིམ་པ་བཅུ་དྲུག་ཀྱང་། །ཡང་དག་
དོན་གྱི་འོག་མིན་དུ། །གདོད་ནས་ཐམས་ཅད་རང་བཞིན་རྫོགས། །ཞེས་གསུངས་སོ། །དོན་དམ་པར་ས་ལམ་སོ་སོར་བགྲོད་དུ་ཡང་མེད་དེ། རྣལ་འབྱོར་པའི་ཉམས་རྟོགས་སོ་མ་རེ་སྐྱེས་པ་ལ། ས་ཞེས་བཏགས་པ་ཙམ་ཡིན་ཏེ། གསང་བ་བསམ་གྱིས་མི་ཁྱབ་པའི་རྒྱུད་ལས། སྐྱོན་དག་ཡོན་ཏན་རྫོགས་པའི་ས་ལམ་ལས། །ཐེ་ཚོམ་བྲལ་བའི་ངེས་ཤེས་སོ་མ་རེ། །ཉམས་དང་མྱོང་བའི་རིག་པ་མ་འགགས་པས། །རྒྱལ་སྲས་རྣམས་ལ་ས་ཞེས་བྱ་བར་བཤད། །།ཅེས་གསུངས་སོ། །འོན་ཀྱང་དྲང་དོན་ས་ལམ་སོ་སོར་ཡོད་དེ་ལ་བསྐྱེད་པའི་ས་དང་། སྤྱོད་པའི་ས་དང་། འབྲས་བུ་མཐར་ཕྱིན་པ་གྲུབ་པའི་ས་གསུམ་དུ་ཡང་བཞེད་དེ། བསྐྱེད་པའི་ས་ལ་བཞི་ཡོད་པ་ནི། རྡོ་རྗེ་ཐེག་པའི་བསྙེན་སྒྲུབ་ཡན་ལག་བཞི། སྤྱོད་པ་དང་གྲོལ་བའི་ས་ནི་བཅུ་སྟེ་གོང་ལྟར་ལས། རྩ་མདུད་བཅུ་གྲོལ་བས་ས་བཅུ་སྟེ། ཡོན་ཏན་རྫོགས་པ་དེའི་འབྲས་བུ་གྲུབ་པའི་ས་སྟེ་གསུམ་གསུམ་དུ་ཕྱེ་འབྲས་བུ་ས་ལྔ་ཡང་གོང་དུ་བཤད་པ་སྟེ། གདམས་ངག་རྒྱ་མཚོ་ལས། དྲང་དོན་ས་ལམ་བགྲོད་ཚུལ་ནི། བསྐྱེད་པའི་ས་དང་སྤྱོད་པའི་ས། །འབྲས་བུ་མཐར་ཕྱིན་གྲུབ་
པའི་ས། །བསྐྱེད་པའི་ས་ནི་བཞི་ཡིན་ཏེ། །རྡོ་རྗེ་ཐེག་པའི་བསྙེན་སྒྲུབ་བཞི། །སྤྱོད་དང་གྲོལ་བའི་ས་དག་ཀྱང་། །རྩ་མདུད་བཅུ་དང་ས་བཅུ་སྟེ། །གྲོལ་བ་དང་ནི་རྫོགས་པའི་མཆོག །འབྲས་བུ་གྲུབ་པའི་ས་བཅུ་སྟེ། །བཅུ་བཞི་བླ་མ་འོད་ཀྱི་ས། །ཞེས་སོགས་གསུངས་སོ། །ཡང་རྫོགས་ཆེན་བླ་མེད་ཀྱི་དགོངས་པ་ལྟར། གང་ཟག་དབང་པོ་རབ་ནི་ས་བཅུ་རིམ་པར་བགྲོད། ཡུན་རིང་པོར་མི་དགོས་པར་ཚེ་གཅིག་ལ་དུས་ཐུང་ངུས་གཅིག་ཆར་དུ་བགྲོད་དེ། སའི་མིང་དང་བགྲོད་ལུགས་གོང་ལྟར་ལས། འབྲས་བུ་སངས་རྒྱས་ཀྱི་ས་ལ་བཅུ་གཅིག་ཏུ་བཤད་དེ། བཅུ་གཅིག་ཀུན་ཏུ་འོད་ཀྱི་ས། བཅུ་གཉིས་རྡོ་རྗེ་འཛིན་གྱི་ས། བཅུ་གསུམ་པདྨ་ཅན་གྱི་ས། བཅུ་བཞི་འཁོར་ལོ་ཚོགས་ཆེན་ས། བཅོ་ལྔ་བཀོད་པ་རབ་རྫོགས་ས། བཅུ་དྲུག་དེ་ཝ་ཀོ་ཤའི་ས། བཅུ་བདུན་རྡོ་རྗེ་འཛིན་པའི་མིང་འཛིན་ས། བཅོ་བརྒྱད་ལྕང་ལོ་ཅན་གྱི་ས། བཅུ་དགུ་རྫོ་གས་པ་བླ་མེད་ས། ཉི་ཤུ་སྲིད་གསུམ་ངང་རྫོགས་ས། ཉེར་གཅིག་བྱ་རྩོལ་གཉིས་མེད་ཀྱི་ས་སྟེ། ས་ལམ་ཉེར་གཅིག་བགྲོད་པར་གསུངས་ཏེ། གྲུབ་ཆེན་ཀརྨ་པཀྴིས། གཅིག་ཆར་བ་ཡི་གང་ཟག་རྣམས། །རྟོགས་ཐོབ་
དུས་མཚུངས་ཀུན་ཏུ་བཟང་། །ས་ལམ་བགྲོད་དང་མི་བགྲོད་པའི། །འཁོར་འདས་ཀུན་ལ་ཁྱབ་པར་ཡང་། །ས་ལམ་རིམ་པ་ཉི་ཤུ་གཅིག །ཡང་དག་དོན་གྱི་འོག་མིན་དུ། །ཐམས་ཅད་རྫོགས་པ་སྤྱི་གཅིག་པ། །ཞེས་གསུངས་སོ། །དེ་ཡང་སྒྱུ་མ་ལམ་རིམ་ཡེ་ཤེས་ཌཱཀིའི་གསུངས་ལས། དེ་ལྟར་ས་རྣམས་བགྲོད་པ་ཡིས། །ལྕགས་སྲེག་བཞིན་དུ་གནས་གྱུར་ཏེ། །ཉོན་མོངས་ཡིད་ལ་མི་རྟོག་དང་། །སྒོ་ལྔ་རྣམ་ཤེས་ཡེ་ཤེས་ལྔ། །ཀུན་གཞི་གནས་འགྱུར་མཐར་ཐུག་སྐུ། །ཟག་མེད་བདེ་ཆེན་འདུས་མ་བྱས། །དབྱིངས་དང་ཡེ་ཤེས་གཉིས་མེད་པས། །ཕྲིན་ལས་ལྷུན་གྲུབ་རྒྱུན་ཆད་མེད། །མཐའ་བྲལ་རང་ཤར་ཆེན་པོའོ། །ཞེས་གསུངས་སོ། །འབྲས་བུ་སྐུ་ལྔ་དབྱེ་ཚུལ་གླིང་རས་ཀྱིས། །འབྲས་བུ་འོད་གསལ་ཆོས་ཀྱི་སྐུ། །གཟུགས་སྐུ་གཉིས་པོ་ཤུགས་ལས་འབྱུང་། །དབྱེར་མེད་ངོ་བོ་ཉིད་ཀྱི་སྐུ། །ཟག་མེད་བདེ་བ་ཆེན་པོའི་སྐུ། །སངས་རྒྱས་སྐུ་ལྔའི་བདག་ཉིད་ཅན་། །ཞེས་གསུངས་སོ། །སློབ་དཔོན་དགའ་རབ་རྡོ་རྗེས། རང་གི་ངོ་བོ་དཔེ་མེད་ཆོས་སྐུ་ནམ་མཁའ་འདྲ། །རྟགས་ནི་སངས་རྒྱས་ཆོ་འཕྲུལ་ཡིན། །འབྲས་བུ་སངས་རྒྱས་དེ་
ཉིད་དོ། །ཞེས་གསུངས་ལ་འགའ་ཞིག་གིས། སངས་རྒྱས་ས་ན་ཡེ་ཤེས་མེད་པར་བཞེད་པ་ཡང་ཡོད་མོད་ཀྱི། སངས་རྒྱས་མཛོད་ཀྱི་མདོར། སངས་རྒྱས་ནི་ཡེ་ཤེས་ལྔའི་བསྡུས་པ་ཡིན་ཏེ། ལྔ་གང་ཞེ་ན། ཆོས་ཀྱི་དབྱིངས་ཀྱི་ཡེ་ཤེས་དང་། མེ་ལོང་ལྟ་བུའི་ཡེ་ཤེས་དང་། བྱ་བ་གྲུབ་པའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་རྟོག་པའི་ཡེ་ཤེས་དང་། །ཞེས་གསུངས་པས། ཡེ་ཤེས་ཡོད་པ་གསལ་ལོ། །དེ་ལྟར་སངས་རྒྱས་ཆོས་ཀྱི་སྐུ་ནམ་མཁའ་ལྟ་བུ་ལ། ལོངས་སྐུ་ཟླ་བའི་དཀྱིལ་འཁོར་ལྟ་བུ་ལ་ས་བརྒྱད་པ་ཡན་གྱི་མཐོང་ལམ། སྤྲུལ་སྐུ་ཆུའི་ཟླ་བ་ལྟ་བུ་ཚོགས་སྦྱོར་ཡན་གྱིས་ཅི་རིགས་པ་མཐོང་སྟེ། རྒྱུད་བླ་མར། ཇི་ལྟར་སྤྲིན་མེད་ནམ་མཁའི་ཟླ་བའི་གཟུགས། །སྟོན་ཀའི་ཆུ་སྔོན་མཚོ་ནི་མཐོང་ཟབ་ལྟར། །དེ་བཞིན་རྒྱལ་སྲས་ཚོགས་ཀྱི་ཁྱབ་བདག་གཟུགས། །རྫོགས་སངས་དཀྱིལ་འཁོར་ནང་དུ་མཐོང་བར་འགྱུར། །ཞེས་གསུངས་སོ། །དེ་ལ་གནས་ལུགས་ཀྱི་གདང་འགག་མེད་དུ་འཆར་བས་བདག་པོའི་རྐྱེན་བྱས། སྔོན་སྨོན་ལམ་དང་སེམས་བསྐྱེད་ཀྱི་ཐུགས་རྗེ་མཐར་ཕྱིན་པའི་རྒྱུ་བྱས། གདུལ་བྱ་ལས་དག་པས་དམིགས་རྐྱེན་བྱས་ཏེ། དེ་གསུམ་
འཚོགས་པས་དཔག་བསམ་གྱི་ཤིང་དང་ནོར་བུ་རིན་པོ་ཆེ་ལྟར་འགྲོ་དོན་འཁོར་བ་ཇི་སྲིད་དུ་འབྱུང་ངོ་། །དེ་ཡང་སྐུ་ཞི་ཁྲོ་སོགས་གང་འདུལ་དུ་སྟོན་པ། གསུང་ཡན་ལག་དྲུག་ཅུ་ཆོས་ཕུང་བརྒྱད་ཁྲི་བཞི་སྟོང་། ཐུགས་མཁྱེན་བརྩེ་ནུས་མཐུ་གསུམ་གྱི་ཡོན་ཏན་རྣམས་དང་། སྟོབས་བཅུ་དང་མི་འཇིགས་པ་བཞི་དང་། མ་འདྲེས་པ་བཅོ་བརྒྱད་ལ་སོགས་པ་ཡོན་ཏན་ཐམས་ཅད་རྫོགས་པའོ། །རྒྱུད་བླ་མ་ལས། སྟོབས་ལས་མ་རིག་བསྒྲིབ་ལས་རྡོ་རྗེ་ཉིད། །མི་འཇིགས་ཉིད་ནི་འཁོར་དང་སེང་གེ་བཞིན། །དེ་བཞིན་གཤེགས་པའི་མ་འདྲེས་བཅོ་བརྒྱད་ནམ་མཁའ་བཞིན། །ཐུབ་པའི་བསྟན་པ་རྣམ་གཉིས་ཆུ་ཟླ་བཞིན། །ཞེས་གསུངས་སོ། །དེ་ལ་སྤྱིར་ཉན་ཐོས་རང་དོན་ཡིད་བྱེད་བྷོ་པས། བསྐལ་པ་མང་པོའི་བར་མི་ཐོབ་པ་དང་། ཡང་ཤིན་ཏུ་མྱུར་བར་སྐྱེ་བ་གསུམ་ནས་རང་གིས་འབྲས་བུ་ཉན་ཐོས་དགྲ་བཅོམ་པ་ཐོབ་པའང་ཡོད་ལ། དེ་རྒྱུན་ཏུ་ཞུགས་པ་ཐོབ་ནས་ནི། སྐྱེ་བ་བདུན་ལས་འགོར་མི་སྲིད་ལ། དེ་ནི་རང་ཉིད་འཁོར་བའི་སྡུག་བསྔལ་ལས་ཐར་བ་ཙམ་ཡིན་པས་ཐེག་པ་དམན། རང་སངས་རྒྱས་ནི་བསྐལ་པ་ཉི་ཤུས་འགྲུབ་པ་ཚོགས་ན་སྤྱོད་པའི་རང་རྒྱལ་
ཡིན་ལ། བསེ་རུ་ལྟ་བུའི་རང་སངས་རྒྱས་ནི་བསྐལ་པ་བརྒྱས་འགྲུབ་ཀྱང་ཐེག་པ་དམན། ཐེག་ཆེན་བྱང་ཆུབ་ཏུ་སེམས་བསྐྱེད་ནས་རྒྱུ་མཚན་ཉིད་ཀྱི་ལུགས་ཁོ་ན་ཉམས་སུ་བླངས་བས་གྲངས་མེད་གསུམ་ནས་ས་བཅུ་པ་ཐོབ། ལམ་དེ་སོར་བཞག་ངོས་ནས་བྱ་སྤྱོད་ཉམས་སུ་བླངས་ན་སྐྱེ་བ་དྲུག་ཅུས་ས་བཅུ་གཅིག་པ་ཐོབ། ཡང་རྣལ་འབྱོར་རྒྱུད་ཉམས་སུ་བླངས་ན་སྐྱེ་བ་བཅུ་དྲུག་གིས་ས་བཅུ་གཉིས་པ་དེ་ཐོབ། བླ་མེད་རྒྱུད་ཀྱི་བསྐྱེད་རྫོགས་ཉམས་སུ་བླངས་ན་བརྩོན་འགྲུས་ཅན་ཚེ་གཅིག་ལ་ས་བཅུ་གསུམ་པ་ཐོབ་སྟེ། ཟབ་མོ་ནང་དོན་ལས། གང་ཟག་བདག་མེད་ཞི་བ་ཙམ། །མྱུར་བ་སྲིད་ལ་ལན་གསུམ་སྟེ། །རྒྱུན་ཞུགས་འགོར་ན་ལན་བདུན་ཡིན། །དེ་ནི་རང་དོན་ཞི་བ་ཙམ། །རང་རྒྱལ་བསྐལ་པ་ཉི་ཤུ་ནས། །བསེ་རུ་བསྐལ་པ་བརྒྱ་ཡིས་འགྲུབ། །སེམས་ཅན་ཐམས་ཅད་ཕན་བྱེད་པ། །བྱང་ཆུབ་སེམས་དཔའི་གྲངས་མེད་གསུམ། །འདིར་ནི་ཐབས་ཀྱི་ཁྱད་པར་གྱིས། །ཕ་རོལ་ཕྱིན་པའི་ལམ་དེ་ལ། །བྱ་སྤྱོད་ཚུལ་གྱིས་ཐབས་མཁས་ཙམ། །ལྡན་ཡང་མི་ཚེ་དྲུག་ཅུ་སྟེ། །རྣལ་འབྱོར་མི་ཚེ་བཅུ་དྲུག་ཡིན། །བླ་ན་མེད་པའི་ཚེ་གཅིག་གིས། །བཅོམ་ལྡན་ངེས་པར་འགྲུབ་པར་
འགྱུར། །ཞེས་གསུངས་སོ། །དེ་ལས་ཀྱང་སྙིང་པོ་དོན་གྱི་མན་ངག་ཕྱག་རྫོགས་ཀྱི་དོན་བྷེ་པས་ལམ་མྱུར་ཏེ། རྩ་རླུང་བྷེ་པས་ལོ་བཅུ་གཉིས་ནས་ས་བཅུ་བཞི་པ་འགྲུབ། ཕྱག་ཆེན་བྷེ་པས་ལོ་དྲུག་སོགས་ལ་ས་བཅུ་བཞི་པ་འཐོབ་པ་དང་། རྫོགས་ཆེན་བསྒོམ་དུ་མེད་པའི་དོན་བསྒོམས་པས་ལོ་གསུམ་ཕྱོགས་གསུམ་ནས་ས་བཅོ་ལྔ་ཐོབ་པ་དང་། དེ་དག་ཀྱང་ཡུན་གཅིག་ཏུ་མ་ངེས་བསྐལ་པ་བཟང་ངན་དབང་པོ་རྣོ་རྟུལ་བརྩོན་འགྲུས་ཆེ་ཆུང་ལ་རགས་ཤིང་། དེའི་དོན་གསང་བ་བསམ་གྱིས་མི་ཁྱབ་པའི་ཨཱ་ལི་ཀཱ་ལི་ཆུ་ཀླུང་ཆེན་པོའི་རྒྱུད་ལས། སེང་གེ་རྣམ་པར་འགྱིང་བའི་ཏིང་ངེ་འཛིན་གྱིས། །མི་གཡོ་རྩེ་གཅིག་དྭངས་མའི་ཤེས་པ་གསལ། །རང་རིག་ཡེ་ཤེས་ཁོང་ནས་སད་པར་བྱེད། །བཟོད་པ་བརྟན་པོས་ངན་སོང་སྡུག་བསྔལ་སྤངས། །གཉིས་པ་སྒྱུ་མ་ལྟ་བུའི་ཏིང་འཛིན་གྱིས། །སྤྲོས་དང་བྲལ་བའི་མཉམ་བཞག་ཆེན་པོ་ལ། །བསམ་གྱིས་མི་ཁྱབ་ཏིང་འཛིན་རྩལ་དུ་ཤར། །དྲོད་ཐོབ་ནས་ནི་སྐྱེ་ལ་དབང་བ་ཡིན། །གསུམ་པ་དཔའ་བར་འགྲོ་བའི་ཏིང་འཛིན་གྱིས། །དུ་མ་རོ་གཅིག་ས་བཅུའི་རྟོགས་པ་འཆར། །དུས་གསུམ་རྒྱལ་བའི་སྲས་པོས་གཞན་དོན་མཛད། །རྩེ་
མོ་ཐོབ་ནས་འཕེལ་བ་རྒྱུན་མི་འཆད། །བཞི་པ་རྡོ་རྗེ་ལྟ་བུའི་ཏིང་འཛིན་གྱིས། །བྷོ་དུ་མེད་པའི་ཉམས་ལེན་བརྩོན་པ་ལ། །རྣམ་མཁྱེན་སངས་རྒྱས་ཞིང་ཁམས་དཔག་མེད་མཐོང་། །མ་བཙལ་ལྷུན་གྲུབ་ཆོས་མཆོག་ཆེན་པོ་ཡིན། །ཞེས་གསུངས་པའི་དོན། བདེ་མཆོག་མཁའ་འགྲོ་སྙན་བརྒྱུད་སོགས་ནས་ཀྱང་ས་མཚམས་ཞིབ་རྒྱས་འབྱུང་བ་དང་མཐུན་པར་བཀའ་བརྒྱུད་ཀྱི་གྲུབ་ཆེན་གོང་མ་རྗེ་རྒོད་ཚང་བ་སོགས་ཀྱིས་གསུངས་པའི་དོན་ཐམས་ཅད་འཕགས་པ་ཐུགས་རྗེ་ཆེན་པོའི་ངོ་བོ་རྗེ་བཙུན་དབང་ཕྱུག་རྡོ་རྗེས་ཚིགས་སུ་བཅད་དེ་གསུངས་པ་ནི་འདི་ལྟ་སྟེ། རྩེ་གཅིག་ཚོགས་སྦྱོར་སྤྲོས་བྲལ་མཐོང་བའི་ལམ། །རོ་གཅིག་བསྒོམ་མེད་འབྲིང་མན་བསྒོམ་ལམ་སྟེ། །བསྒོམ་མེད་ཆེན་པོ་རྫོགས་པའི་སངས་རྒྱས་སོ། །ཞེས་གསུངས། འདིར་རྣལ་འབྱོར་བཞི་རིམ་དང་ས་ལམ་སྦྱར་བའི་སྐབས་འདིར། བཀའ་བརྒྱུད་གོང་མའི་གསུངས་རྣམས་ཀྱང་། གོང་འོག་མི་མཐུན་པ་འགའ་རེ་བྱུང་ཡང་འགལ་བ་མེད་དེ། བཞི་རིམ་རེ་རེ་ལ་ཡང་བཞི་བཞིར་དབྱེར་ཡོད་པའི་ཕྱིར་རོ། །དེ་ལྟར་ས་བཅུ་བགྲོད་ནས་སངས་རྒྱས་ཀྱི། །ས་ལྔར་དབྱེ་བའང་རྟོགས་པའི་ཡེ་ཤེས་དེ། །རང་ལ་དབྱེ་བ་བྱས་པ་དེ་ཙམ་
དུ། གྲུབ་ཆེན་རིན་པོ་ཆེ་ཀརྨ་པཀྴིས་བཞེད་དེ། རྒྱ་མཚོ་མཐའ་ཡས་ལས། སངས་རྒྱས་སྐུ་ལྔའི་བདག་ཉིད་ནི། །རང་བྱུང་ཡེ་ཤེས་མ་འགག་རྟགས། །སྒོ་ལྔ་ཀུན་ལས་གསལ་བ་ལས། །ཀུན་ཏུ་འོད་ཅེས་བཏགས་པ་ཡིན། །འདོད་ཡོན་ལྔ་ལ་མ་ཆགས་ཤིང་། །མ་ཆགས་གཉིས་མེད་རོལ་པ་ལས། །པདྨ་ཅན་དུ་བཤད་པ་ཡིན། །རང་བཞིན་དབྱིངས་ཀྱི་དཀྱིལ་འཁོར་ལས། །རང་ལ་གནས་པའི་ཆོས་རྣམས་ཀུན། །ཡེ་ཤེས་ཡི་གེའི་ཚོགས་རྣམས་སུ། །སྐུ་གསུམ་སྐྱེ་འཇིག་མེད་པའི་ཕྱིར། །ཚོགས་ཆེན་ས་རུ་བཞེད་པ་ཡིན། །སྐྱེ་འཇིག་མེད་པ་བྱང་ཆུབ་སེམས། །འཕོ་འགྱུར་མེད་པ་རྡོ་རྗེའི་དབྱིངས། །བླ་མ་འོད་དུ་བཏགས་པ་ཡིན། །འཁོར་འདས་ཐམས་ཅད་རང་བཞིན་རྫོགས། །གནས་ལུགས་དབྱེ་བསལ་མེད་པའི་ཕྱིར། །ས་ལམ་སྤང་དུ་མེད་པ་ལ། །འབྲས་བུ་ཐོབ་དུས་མེད་པར་ཕྱིར། །སྐུ་ལྔ་ཡོངས་སུ་རྫོགས་པ་ཡིས། །དབྱེ་བ་མེད་པའི་ས་རུ་བཤད། །ཅེས་གསུངས་སོ། །དེ་ལྟར་བསྐལ་པ་མཆོག་དང་ལྡན་ཞིང་བརྩོན་འགྲུས་མཆོག་དང་ལྡན་པའི་གང་ཟག་གིས་འདི་ཚུལ་བཞིན་ཉམས་སུ་བླངས་ན། ཚེ་གཅིག་ལ་འཚང་རྒྱ་བར་ཐེ་ཚོམ་མེད་
པར་བཤད་པ་ནི་མདོ་རྒྱུད་དང་གྲུབ་ཆེན་རྣམས་ཀྱིས་གསུངས་པ་སོར་བཞག་བྱས་ནས་བཤད་པ་ཡིན་ལ། གལ་ཏེ་ཚེ་འདིར་མཆོག་གི་དངོས་གྲུབ་ཐོབ་པར་མ་གྱུར་ཀྱང་། ཚེ་འདིར་ལས་ཚོགས་གང་བརྩམས་འགྲུབ་པ་དང་། མ་བརྩམས་ཀྱང་རང་བཞིན་གྱིས་ཕན་ཡོན་འབྱུང་བ་དང་། ཕྱི་མའི་ཕན་ཡོན་འབྱུང་ཚུལ་ལོ། །དང་པོ་སྲིད་པ་གཏེར་ཁྱིམ་ལས། ཡི་དམ་ལྷ་བསྙེན་མ་ཐེམས་པར། །ཁ་ཚར་ལས་ལ་སྦྱར་བ་དེ། །མི་རྒན་དཔའ་བོ་ཁས་ལེན་འདྲ། །ཞེས་གསུངས་པས་དུས་རྟགས་གྲངས་གསུམ་བསྙེན་པ་ཐེམ་པར་བྱའོ། །ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་དགུའི་རྒྱ་གཞུང་ཉིད་ལས། དེ་ནས་རང་བཞིན་གྱི་དོན་བྱ་བའི་ཕྱིར། ཕྲིན་ལས་བཞི་བསྒྲུབ་པའི་ཕྱིར་ཕྲིན་ལས་གང་སྒྲུབ་ཀྱི་དམིགས་པ་སྤྲོ་སྟེ། སྔགས་ཀྱི་ཤམ་བུ་སྒྱུར་ལ་བཟླ་བར་བྱའོ། །ཞེས་གསུངས་པའི་དོན་སྤྱིར་ལས་ཚོགས་རབ་མཆོག་གི་དངོས་གྲུབ་འགྲུབ་པ། འབྲིང་གྲུབ་ཆེན་བརྒྱད། ཐ་མ་ཞི་སོགས་ལས་བཞི་ཞེས་བཤད་ཅིང་། དེ་དག་ཇི་ལྟར་བསྒྲུབ་ཚུལ་ནི། ཐུགས་རྗེ་ཆེན་པོ་རྒྱལ་བ་རྒྱ་མཚོ་པདྨ་རྒྱལ་པོའི་རྒྱུད་ཆེན་པོ་ལས། ཟིལ་གྱིས་གནོན་པའི་ང་རྒྱལ་ཆེན་པོ་བཞི་ལ་གནས་པར་བྱའོ། །ཞེས་ཟད་པར་ཟིལ་
གནོན་གྱི་རྫུ་འཕྲུལ་སྒྲུབ་ཐབས་དང་། མཆོག་གི་དངོས་གྲུབ་འདོད་པས་ནི་སྟོང་པ་ཉིད་ལ་ཡང་ཡང་དུ་བདེ་བ་རྒྱས་གདབ་པར་བྱའོ། །ཐུན་མོང་གི་དངོས་གྲུབ་འདོད་པས་ནི་ཡིད་ཆེས་པར་བྱས་ཤིང་གསོལ་བ་ཉིན་མཚན་དུ་དྲག་ཏུ་གདབ་པར་བྱའོ། །ཞེས་དངོས་གྲུབ་གཉིས་སྒྲུབ་ལུགས་དང་། ལུས་ལ་ནད་མེད་པར་འདོད་པས་ནི། ལྷ་དང་བླ་མའི་སྐུ་གསུང་ཐུགས་དང་རང་གི་ལུས་ངག་ཡིད་གསུམ་གཅིག་ཏུ་ཡང་ཡང་བསྲེ་བར་བྱའོ། །ཞེས་བསྲེ་བའི་དམིགས་པ་རང་བཞིན་གྱིས་ནད་གདོན་ཞི་ཐབས་རྣམས་གསུངས་ཏེ། དེ་ལ་མཆོག་གི་དངོས་གྲུབ་སྒྲུབ་ཐབས་ནི་འཁོར་ལོ་ལྔའི་གདམས་ངག་སྐོར་རྣམས་ཡིན་ལ། གཙོ་ཆེར་སྦྱོར་ལམ་དྲོད་ནས་བྷོ་བྱ་ཡིན། ཟབ་པ་ཟིལ་གནོན་སྒྲུབ་པ། རླུང་སེམས་ཅུང་ཟད་ལས་སུ་རུང་བ་སྦྱོར་ལམ་བཟོད་པ་དང་། ཆོས་མཆོག་ནས་ཅུང་ཟད་འགྲུབ། དེ་མན་ཆད་དུ་འགྲུབ་དཀའོ། །ཐུན་མོང་དངོས་གྲུབ་ལ་གྲུབ་ཆེན་བརྒྱད་ནི། མིག་སྨན་ལ་བརྟེན་ནས་ས་འོག་གི་གཏེར་མཐོང་བ་དང་། ཡུལ་དང་རི་བྲག་གིས་མི་སྒྲིབ་པར་མཐོང་བ་དང་། ལེགས་ཉེས་ཅི་འོང་མཐོང་བ་སྟེ་ཐུན་མོང་གི་མངོན་ཤེས་དང་ཆ་འདྲའོ། །རྐང་བྱུག་ལ་བརྟེན་ནས་ཡུད་ཙམ་
ལ་རྒྱ་གར་སོགས་འཁོར་བ། ཞག་རེས་འཁོར་བ་ཞག་བདུན་ཙམ་ནས་འཁོར་བ། ཐ་ན་ཞག་བདུན་ལམ་ཉིན་རེས་ཆོད་པ། རྟ་དང་བང་མཉམ་པ་སོགས་ཏེ་རྐང་མགྱོགས་སོ། །རལ་གྲི་ལ་བརྟེན་ཏེ་རལ་གྲི་ཐོགས་ནས་མཁའ་སྤྱོད་དུ་གཤེགས་པ་ཞིང་ཁམས་མང་པོ་བགྲོད་པ། ལྷ་གནས་དང་གླིང་བཞིར་བགྲོད་པ། དཔག་ཚད་ལྔ་བརྒྱ་ཙམ་འཕུར་བ། བར་སྣང་ལ་དཔག་ཚད་ཙམ་འཕུར་བ་རྣམས་སོ། །ས་འོག་གི་དངོས་གྲུབ་ནི་ས་འོག་ནས་ན་བུན་ལྟར་འགྲོ་བ་སྟེ། རི་དང་བྲག་དང་རྩིག་པ་གྱོང་ལ་སོགས་ལ་ཐོགས་པ་མེད་པ་དང་། ས་འོག་གི་གཏེར་ཐམས་ཅད་མཐོང་ཞིང་ལོངས་སྤྱོད་ཆོག་པའོ། །རིལ་བུའི་དངོས་གྲུབ་ནི་རིལ་བུ་ཟོས་པས་མཁའ་སྤྱོད་དུ་གཤེགས་པ་དང་། སྐྱེ་བ་དྲན་པ་དང་། ཚེ་ལོ་དཔག་མེད་ཐུབ་པ་དང་། ནམ་མཁའ་ལ་འགྲོ་བ་སོགས་མི་སྣང་བའི་དངོས་གྲུབ་ལ་རབ་ལུས་མ་སྤངས་མཁའ་སྤྱོད་དུ་གཤེགས་པ་དང་། ལུས་མི་སྣང་བར་གཞན་གྱིས་མི་མཐོང་བར་བྱེད་པ་དང་། ལུས་སྟོང་ཉིད་དུ་བྱེད་ནས་སླར་སྟོན་པ་སོགས་སོ། །བཅུད་ལེན་ནི་དངུལ་ཆུའི་བཅུད་ལེན་གྲུབ་པས་ཚེ་བསྐལ་པ་དང་། སངས་རྒྱས་རེ་རེའི་བསྟན་པ་དང་། ལོ་སྟོང་ལྔ་བརྒྱ་དང་། ཉིས་
བརྒྱ་སོགས་ཐུབ་ཅིང་ལུས་ལ་དུག་མཚོན་སོགས་མི་ཚུགས་པའོ། །འདིར་ས་ལུགས་པ་རྣམས་བུ་མོ་འགུགས་པ་གྲུབ་ཆེན་བརྒྱད་ཀྱིས་གྲར་འདྲེན་མོད་ཀྱི། དེ་ལྟར་དབང་གི་ལས་ཀྱི་ཁོངས་སུ་སྡུད་པས་འདིར་མི་བསྒྲུང་སྟེ། རྗེ་དཀོན་མཆོག་འབངས་ཀྱིས་ཞིང་སྐྱོང་གི་ལས་ཆེན་བརྒྱད་དུ་ཡང་མཆིལ་ལྷམ་བསྒྲུངས་བས་རང་ལུགས་དེ་ཡིན་ཏེ། མཆིལ་ལྷམ་ལ་རྫས་སོགས་ལྷན་པས་ཆུ་ལ་ཐོགས་པ་མེད་པར་འགྲོ་བ་དང་། རྐང་མགྱོགས་ལྟར་བང་མཉམ་པ་སོགས་ཡིན་ནོ། །གྲུབ་ཆེན་བརྒྱད་པོ་དེ་རབས་རྟོགས་པ་དང་བསྐྱེད་རྫོགས་ཟུང་འཇུག་གི་ནུས་པས་བསམ་པ་བཞིན་དུ་བྱས་སམ་རང་བཞིན་གྱིས་འབྱུང་བ་མཆོག་གི་གྲུབ་རྟགས་དང་། ཞི་གནས་ཀྱི་ཉམས་དང་རླུང་ནུས་ཁོ་ན་ལས་འབྱུང་བ་ཕྱི་རོལ་པ་དང་། ཐུན་མོང་གྲུབ་རྟགས་དང་ས་ཐོབ་པའི་བྱང་སེམས་བདེན་སྟོབས་བརྗོད་པས་དེ་ལྟར་འབྱུང་བ་ཕྱིར་མི་ལྡོག་པའི་གྲུབ་རྟགས་དང་། ས་མ་ཐོབ་པ་ཐོབ་པར་རློམ་པའི་བྱང་སེམས་བདེན་སྟོབས་བརྗོད་པ་ལས་དེ་ལྟར་འབྱུང་བ་བདུད་ཀྱིས་བསླུ་བའི་ཆོ་འཕྲུལ་དང་། སྔགས་དང་ཏིང་ངེ་འཛིན་དང་། འཁྲུལ་འཁོར་དང་སྦྱིན་སྲེག་སོགས་ཐམས་ཅད་འཛོམ་པ་ལས་བྱུང་བའི་རིག་སྔགས་ཀྱི་
ནུས་པ་སྟེ། རྣལ་འབྱོར་པ་ཐ་མའི་གཅོད་ཡུལ་ལོ། །ཞི་སོགས་ལས་བཞི་ལས། སྡིག་སྒྲིབ་ནད་གདོན་ཞི་བ། བསོད་ནམས་ཡེ་ཤེས་རྒྱས་པ། རླུང་སེམས་དབང་དུ་འདུས་པ། བདུད་བཞི་ཚར་གཅོད་པ་སྟེ། མཆོག་གི་ལས་བཞི་དང་། ལས་བཞི་རེ་རེ་ལ་ཡང་། ནང་གསེས་ཀྱིས་དབྱེ་བས་ལས་རབ་འབྱམས་གསུངས་ཏེ། པདྨ་ཅོད་པན་གྱི་རྒྱུད་དང་། པདྨ་དྲྭ་བའི་རྒྱུད་དང་། དོན་ཡོད་ཞགས་པའི་རྒྱུད་དང་། སྙིང་རྗེ་མི་བཤོལ་བའི་གཟུངས་དང་། ཡིད་བཞིན་ནོར་བུའི་གཟུངས་དང་། ཐུགས་རྗེ་ཆེན་པོ་གསང་འདུས། ཐུགས་རྗེ་ཆེན་པོ་ཡེ་ཤེས་འོད་མཆོག་དང་། ཐུགས་རྗེ་ཆེན་པོ་ཡང་གསང་བླ་མེད་དང་། མི་ཏྲ་གསང་སྒྲུབ་དང་། ཐུགས་རྗེ་ཆེན་པོ་ཡང་སྙིང་འདུས་པ་སོགས་ནས་དཔག་ཏུ་མེད་པར་གསུངས་པ་ཐམས་ཅད་འདི་ལ་སྦྱར་བར་བྱ་བ་ནི་སྨོས་ཅི་དགོས་ཏེ། དེ་ལས་དགོངས་འདུས་ཀྱི་ལས་རབ་འབྱམས་སོགས་མདོར་ན་ལས་ཚོགས་སྤྱིའི་རིགས་ཐམས་ཅད་རང་གི་ཡི་དམ་གྱི་ལས་སུ་སྦྱར་རུང་བར། ཨོ་རྒྱན་རིན་པོ་ཆེས་གསུངས་དང་བྱ་སྤྱོད་ཀྱི་གཞུང་རྣམས་ལས་གསུངས་སོ། །དེ་ལ་བྱ་སྤྱོད་ཀྱི་རྒྱུད་ནས། རང་གི་ཡི་དམ་དེ་ལས་ཚོགས་ལ་སྦྱར་མི་རུང་དམ་ཚིག་ཏུ་
གསུངས་པ་ནི། ནུས་པ་མ་ཐོན་པར་ལས་ལ་སྦྱར་ན་ལས་མ་གྲུབ་པས་རང་གི་ནུས་པ་མ་ཐོན་པར་མི་ཤེས་ནས། ལྷ་དང་གདམས་ངག་ལ་ལོག་ལྟ་སྐྱེ་བས་དམ་ཚིག་ཉམས་པར་དགོངས་པའོ། །དེའི་ནི་དོན་ལེགས་པར་གྲུབ་པའི་རྒྱུད་ལས། གདོན་གྱི་ལས་རྣམས་མི་བྱ་ཞིང་། །སྲུང་དང་སླར་ཟློག་མི་བྱའོ། །རང་གི་སྔགས་སམ་གཞན་གྱིས་ཀྱང་། །ཟློག་པ་དུག་གི་ལས་མི་བྱ། །བསྒྲུབ་ལ་དགོངས་པར་མ་གཏོགས་པར། །གསང་སྔགས་གཞན་དུ་སྤྱད་མི་བྱ། །འདྲེན་པ་དང་ནི་པད་ཕྱིར་ཡང་། །བདག་གིས་གསང་སྔགས་མི་སྦྱར་རོ། །ཞེས་གསུངས་སོ། །དེ་ལ་བྱ་རྒྱུད་ལུགས་འདིར་རང་གི་ཡི་དམ་རྩ་བ་དེ་ཐུན་མོང་གི་ལས་ལ་མི་སྦྱར་རོ། །གལ་ཏེ་སྦྱར་ཡང་ནུས་པ་དང་རྩལ་སྤྲུག་པར་མི་བྱ་བར་གསུངས་ལ། དུས་འཁོར་བ་དག་གིས་ལས་སྦྱོར་རྣམས་སྔགས་ཀྱི་ནུས་པ་འདི་ལྟར་ཡོད་དོ། །ཞེས་སྟོན་པའི་ཆེད་ཡིན་པས་ལག་ཏུ་བླང་བྱ་མ་ཡིན། གལ་ཏེ་ན་ཡང་ཞི་རྒྱས་དབང་གསུམ་ནི་བྱ་རུང་གིས་མངོན་སྤྱོད་ནི་ནམ་དུ་ཡང་བྱ་མི་རུང་བར་བཞེད་ལ། དགྱེས་རྡོར་གྱི་ཆོས་སྐད། ས་ལུགས་པ་རྣམས་ཐུན་མོང་གི་ལས་ཚོགས་ནི་ལས་དང་པོ་པ་རྣམས་བསྒྲུབས་པ་
ན་ཡ་མཚན་པས་ཐུན་མོང་གི་དངོས་གྲུབ་ཐོབ་པས། སྤྲོ་བ་སྐྱེ་ནས་མཆོག་སྒྲུབ་པ་ལ་བརྩོན་པའི་ཆེད་ཡིན་པར་བཞེད། འཇིག་རྟེན་ཕ་རོལ་དོན་གཉེར་ན། །འདི་འབྲས་འབད་པ་མེད་པར་འགྲུབ། །ཅེས་གསུངས་པ་ལྟར། བཀའ་བརྒྱུད་རིན་པོ་ཆེའི་ནི་མཆོག་ཁོ་ན་བསྒྲུབས་ནས་ཐུན་མོང་ཞོར་ལ་འབྱུང་སྟེ། འབྲས་ལོ་ལེགས་ན་སོག་ཕུབ་ཞོར་ལ་འབྱུང་བ་དང་འདྲ་བས་མཆོག་ཁོ་ན་བསྒྲུབ་པ་སྟེ། དེའི་དབང་དུ་མཛད་ནས་རྡོ་རྗེ་ཕག་མོའི་ལས་རབ་འབྱམས་དང་འབུམ་གྱི་ཊིཀ་ཡོད་པས་ན། རྡོ་རྗེ་མཁའ་འགྲོའི་མཆོག་གི་དངོས་གྲུབ་ཁོ་ནའི་དབང་དུ་བྱས་པས་ལས་ཚོགས་མང་དུ་མ་གསུངས། དེ་དང་མཚུངས་པར་བདེ་མཆོག་སྙན་བརྒྱུད་སོགས་ཀྱང་མཆོག་ཁོ་ན་ལས་ཐུན་མོང་སྒྲུབ་ཐབས་གསལ་བར་མ་བཤད་ཅེས་བཞེད། བོད་ཀྱི་དུས་ཕྱིས་ཀྱི་མཁས་པ་ཁ་ཅིག་གིས་སངས་རྒྱས་ཐོབ་པ་ལ་ཆེས་རིང་བའི་གང་ཞིག་གིས་ལས་ཚོགས་མང་པོ་མི་བཀོལ་ཏེ་མཆོག་ཁོ་ན་སྒྲུབ། སངས་རྒྱས་ཐོབ་པ་ལ་དེ་ཙམ་མི་རིང་བའི་གང་ཟག་གིས་ལས་རབ་འབྱམས་བསྒྲུབ་པ་ཡིན་ཟེར་ལ། གསང་སྔགས་རྙིང་མ་པ་རྣམས་བསྙེན་སྒྲུབ་ཚད་དུ་མ་འཁྱོལ་བས་ལས་ཚོགས་བསྒྲུབ་པ། མཆོག་གི་དངོས་གྲུབ་འགྱངས་ཤིང་ལྷ་
དང་མཁོན་ཞུགས་པའི་རྒྱུ་ཡིན་པས་མི་རུང་ལ། བསྙེན་སྒྲུབ་ཚད་དུ་ཕྱིན་ནས་སྒྱུ་མ་རྨི་ལམ་ལྟ་བུར་བསམ་པ་བྱང་ཆུབ་སེམས་ཀྱིས་ཀུན་ནས་བསླངས་ཏེ། སྦྱོར་བ་ལས་ཚོགས་རབ་འབྱམས་གང་ལ་གང་འདུལ་དུ་སྤྱོད་ཅིང་། རྗེས་བྱང་ཆུབ་ཏུ་བསྔོ་བས་རྒྱས་འདེབས་པ་ནི་རྒྱུད་ཀྱི་དགོངས་པ་ཡིན་ཏེ། མཆོག་གི་དངོས་གྲུབ་ལ་མི་སྒྲིབ་པར་འཕྲལ་ཐུན་མོང་གི་དངོས་གྲུབ་ཡིད་བཞིན་དུ་འབྱུང་བར་བཞེད་ནས། རྙིང་མའི་སྒྲུབ་སྐོར་ཐམས་ཅད་ལས་ཚོགས་ཕྱུག་པའོ། །དེ་ཡང་རབ་དང་འབྲིང་གི་རབ་དང་ཐ་མ་དང་ཐ་མའི་ཐ་མའོ། །དེ་ལ་རབ་རླུང་དང་ཏིང་ངེ་འཛིན་གྱིས་འགྲུབ། འབྲིང་གི་རབ་བྷོ་བཟླས་ཙམ་གྱིས་འགྲུབ། འབྲིང་སྒོམ་བཟླས་རྫས་སྦྱོར་གསུམ་གྱིས་འགྲུབ། ཐ་མ་ལ་ནི་རྫས་སྔགས་དམིགས་པ་སྦྱིན་སྲེག་ཤདང་བཞིས་འགྲུབ། ཐ་མའི་ཐ་མ་དམིགས་པ་སྔགས་རྫས་སྦྱོར་འཁྲུལ་འཁོར་ཏེ་འཁོར་ལོ་སྦྱིན་སྲེག་གཏོར་མ་སོགས་ཐམས་ཅད་འཛོམས་ན་འགྲུབ་བོ། །དེ་ལྟར་ཚེ་འདིར་མཆོག་མ་གྲུབ་ཊྛིན་ཐུན་མོང་རབ་འབྲིང་ཐ་མ་འགྲུབ་ཅིང་། རབ་འཆི་དུས་གོང་དུ་བཤད་པ་ལྟར་མཐའ་ནས་དབུས་ཡལ་གྱི་རྫོགས་རིམ་བྷེ་ཞིང་དེའི་ངང་ནས་འཆི་བས་གཞིའི་འོད་གསལ་དང་། བསྒོམ་
པའི་ལམ་གྱི་འོད་གསལ་གཉིས་དབྱེར་མེད་དུ་འདྲེས་ནས་འཆི་བ་འོད་གསལ་ཆོས་སྐུར་སངས་རྒྱས་སོ། །དུས་འཁོར་ལས། འོད་གསལ་བར་ནི་རྒྱུན་ཏུ་གནས། །བར་དོའི་གྲོང་ཁྱེར་དེས་མི་མཐོང་། །ཞེས་གསུངས་སོ། །གལ་ཏེ་འོད་གསལ་ལ་གོམས་འདྲེས་ཆེ་ན་ཡང་འཆི་དུས་འོད་གསལ་མ་ཟིན་ན། ལུས་སེམས་བྲལ་མ་ཐག་འོད་གསལ་གཉིས་པ་འཆར་བ་ཟིན་ནས་གྲོལ་ཏེ། ངམ་རྫོང་སྙན་བརྒྱུད་ལས། ལུས་ཡི་དམ་ལྷ་དང་སྤྱི་བོར་བླ་མ་བསམ་པའི་ངང་ནས་སྒྱུ་མ་ལྟ་བུའི་ལུས་བླངས་ལ་སེམས་ཅན་གྱི་དོན་བྱའོ་སྙམ་པའམ། འོད་གསལ་ངང་ལ་ཟུང་འཇུག་གིས་སྐུར་ལྡང་བར་བྱ་སྙམ་ནས་དྲན་འདུན་སྔོན་དུ་བཏང་བར་བྱའོ། །ཡི་དམ་གྱི་སྐུ་དེ་ལས་ལྡང་བའི་དོན་དུ་སྣང་ལ་རང་བཞིན་མེད་པའི་འོད་གསལ་བསྒོམས་ནས། ནམ་མཁར་སྤྲིན་འབྱུང་བ་བཞིན་དུ་གར་འདོད་དུ་སྐྱེ་བར་འགྱུར་རོ། །ཞེས་གསུངས་པ་ལྟར་འོད་གསལ་དེའི་ངང་ལས་ཟུང་འཇུག་གིས་སྐུར་ལྡང་སྟེ། འགྲོ་དོན་བྱ་བའམ་བདེ་བ་ཅན་སོགས་སྔོན་སྨོན་ལམ་གང་དུ་བཏབ་ཅིང་འཕེན་པ་བཏང་བས་ཞིང་དེར་སྐྱེ་སྟེ། དཔེར་ན་རྒྱའི་མིག་ནི་ནམ་མཁའ་གང་ནས་མ་བྱུང་བ་ལྟར། སྐད་ཅིག་དེ་ཉིད་ལ་གར་སྐྱེ་དེའི་སྣང་བ་འཆར་གྱི་
འགྲོ་བའི་འདུན་པ་དགོས་པའི་ངེས་པ་མེད་པར་གསུངས་སོ། །གལ་ཏེ་འོད་གསལ་ལ་གོམས་འདྲེས་ཆུང་ན་ལོངས་སྐུའི་འཕོ་བ་བྱ་སྟེ། ཐུགས་རྗེ་ཆེན་པོ་རྒྱལ་བ་རྒྱ་མཚོའི་འཕོ་བའི་མན་ངག་ལོགས་ནས་འབྱུང་བ་བཞིན་ནོ། །འཕོ་བ་ཐེབས་ན་བར་དོ་མི་འཆར་ལ། མ་ཐེབས་ན་བར་དོ་སྦྱངས་ལུགས་ད་ལྟའི་བསྐྱེད་རིམ་བར་དོར་བསྒོམས་པས་ཤ་ཁྲག་གི་ལུས་མེད་པས་དེ་དུས་ཡིད་ཀྱི་ལུས་དེ་ཡི་དམ་གྱི་སྐུར་གྱུར། དེའི་ངང་ལ་འོད་གསལ་བྷེ་པས་གསལ་སྟོང་ལོངས་སྤྱོད་རྫོགས་པའི་སྐུར་སངས་རྒྱས་སོ། །ཡང་ཡི་དམ་དེའི་སྐུ་ཇི་ལྟ་བར་འགྱུར་ཞིང་རྫུ་འཕྲུལ་ཡ་མ་ཟུང་སྟོན་ཞིང་བར་དོའི་སེམས་ཅན་འདྲེན་པ་དང་། སངས་རྒྱས་ཀྱི་ཞིང་ཁམས་བགྲོད་ཅིང་ཆོས་ཉན་པ་སོགས་བྱེད་པ་ནི་ཕྱག་རྒྱ་ཆེན་པོའི་རིག་འཛིན་ཞེས་བྱ་སྟེ། ལྷ་སྐུ་ཕྱག་རྒྱ་ཆེན་པོ་དངོས་སུ་འགྲུབ་པའི་ཕྱིར་རོ། །གལ་ཏེ་བར་དོ་གཉིས་པ་ལོངས་སྐུར་ཡང་མ་གྲོལ་ན། ད་ལྟ་སྨོན་ལམ་གྱིས་འཕེན་པ་དང་ཐུགས་རྗེ་ཆེན་པོ་འགྲུབ་པའི་བྱིན་རླབས་ཀྱིས་བདེ་བ་ཅན་གྱི་ཞིང་ཁམས་སུ་བྱ་ངང་པའི་རྒྱལ་པོ་ལྟར་འགྲོ་སྟེ། དེར་པདྨ་ལ་བརྫུས་ཏེ་སྐྱེས་ནས་ལུས་ཐོབ་དེ་ནས་ས་ལམ་ཐམས་ཅད་བསྒྲོད་ནས་སངས་རྒྱས་པར་ཐེ་ཚོམ་མེད་དེ། །
མདོ་སྡེ་ཟ་མ་ཏོག་བཀོད་པ་ཆེན་པོ་ལས། སྔོན་སངས་རྒྱས་གཙུག་ལྡན་གྱིས་གསུངས་པ། སླར་ཤཱཀྱ་ཐུབ་པ་ཉིད་ཀྱིས་བཀའ་སྩལ་པ། གང་འཇིག་རྟེན་གྱི་ཁམས་ན་སྤྱན་རས་གཟིགས་ཀྱི་དབང་པོའི་མིང་དྲན་པ་དེའི་བསོད་ནམས་དེ་དག་ནི་བདེ་བ་དང་ལྡན་པ་ཡིན་ནོ། །དེ་དག་ནི་རྒས་པ་དང་ན་བ་དང་འཆི་བའི་སྡུག་བསྔལ་ལས་ཡོངས་སུ་ཐར་བ་ཡིན་ནོ། །དེ་དག་འཁོར་བའི་ཐ་མ་གཞན་མེད་པའི་སྡུག་བསྔལ་བར་མི་འགྱུར་རོ། །དེ་དག་ནི་གོས་དཀར་པོ་དང་སྐྱ་བོ་བཞིན་དུ། བྱ་ངང་པའི་རྒྱལ་པོ་ལྟར་མགྱོགས་པ་དང་རླུང་གིས་ཤུགས་འོང་བ་བཞིན་དུ་བདེ་བ་ཅན་གྱི་འཇིག་རྟེན་གྱི་ཁམས་སུ། དེ་བཞིན་གཤེགས་པ་སྣང་བ་མཐའ་ཡས་ལས་ཆོས་མངོན་དུ་ཉན་པའི་ཕྱིར་འགྲོའོ། །ཐོས་ནས་ཀྱང་དེའི་ལུས་ལ་འཁོར་བའི་སྡུག་བསྔལ་མི་འབྱུང་། འདོད་ཆགས་ཞེ་སྡང་གཏི་མུག་མི་འབྱུང་། རྒས་པ་དང་ཤི་བར་མི་འགྱུར། དེ་དག་གི་ལུས་ལ་བཀྲེས་པར་མི་འགྱུར། མངལ་ན་གནས་པའི་སྡུག་བསྔལ་བ་ཤེས་པར་མི་འགྱུར་ཏེ། ཆོས་ཀྱི་རོས་བསྐྱོད་ནས་དེ་ཉིད་དུ་པདྨའི་ནང་དུ་སྐྱེ་བར་འགྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་པོའི་ཡི་དམ་བརྟན་པོ་རྫོགས་པ་
དང་། སེམས་ཅན་ཐམས་ཅད་ཐར་པ་ལ་ཞོག་གི་བར་དུ། འཇིག་རྟེན་གྱི་ཁམས་དེ་ན་རྟག་ཏུ་འཛིན་ཅིང་གནས་སོ། །ཞེས་གསུངས། དེ་ཡང་ཞིང་དེར་སྨོན་ལམ་། འདེབས་ཤིང་ཐུགས་རྗེ་ཆེན་པོ་བསྒྲུབས་པས་དེ་ལྟར་འགྱུར། ཡང་མི་ལུས་སོགས་སུ་སྨོན་ལམ་བཏབ་ཡང་སྐྱེ་བ་བདུན་ལས་མི་འགྱང་བར་འཚང་རྒྱ་བོར་བཤད། ཉི་ཟླ་ཁ་སྦྱོར་ལས། རབ་ལ་སྐྱེ་གཉིས་མི་དགོས་ཏེ། །འབྲིང་ལ་སྐྱེ་བ་གཉིས་ཙམ་དུ། །ཐ་མ་རྣམས་ནི་དབུགས་ཕྱུང་སྟེ། །སྤྲུལ་པ་པོས་ནི་རང་རྒྱུད་གྲོལ། །ཅེས་གསུངས་སོ། -་།དེ་ལྟར་ས་བཅད་ཙམ་ཡིན་གྱི་འོད་གསལ་དང་འཕོ་བ་བར་དོའི་གདམས་པ་རྒྱས་པར་གུད་དུ་ཤེས་སོ། །དེ་ལྟར་བརྩོན་འགྲུས་ཅན་ཚེ་འདིར་སངས་རྒྱས་ཚུལ་རྒྱས་པར་བཤད། འབྲིང་བར་དོར་སངས་རྒྱས་ཚུལ་དང་། ལེ་ལོ་ཅན་སྐྱེ་བ་བརྒྱུད་ནས་སངས་རྒྱས་ཚུལ་ཟུར་ཙམ་བཤད་ནས། ༈ ད་ནི་གཙོ་བོར་མཆོག་གི་དངོས་གྲུབ་འདོད་པས་འདི་ཁོ་ན་ཉམས་སུ་བླངས་ན་ཚེ་འདིར་ཐུན་མོང་གི་དངོས་གྲུབ་ཐམས་ཅད་ཤུགས་ལ་འབྱུང་ཞིང་ཕྱི་མ་ཡང་ས་ལམ་རིམ་པས་ཐོབ་པའི་ཕན་ཡོན་རྣམས་བཤད་དེ། དེ་ཡང་སྤྲུལ་པའི་རྒྱལ་པོས་ཕྱི་བློན་ལ་གདམས་པ་ལས། །
ཐུགས་རྗེ་ཆེན་པོའི་མཐའ་ནི། ཨོཾ་མ་ཎི་པདྨེ་ཧཱུྃ། ཞེས་པའི་ཡི་གེ་དྲུག་པ་འདི་ལ་ཐུག་གོ །རང་དོན་སྒྲིབ་པ་སྦྱང་བ་ཡང་ཡི་གེ་དྲུག་པ་འདི་ཡིན་ནོ། །གཞན་དོན་འགྲོ་དྲུག་གནས་ནས་དྲངས་བ་ཡང་ཡི་གེ་དྲུག་པ་འདི་ཡིན་ནོ། །ཚེ་འདི་ལ་ཐུན་མོང་གི་དངོས་གྲུབ་འབྱུང་བ་ཡང་ཡི་གེ་དྲུག་པ་འདི་ཡིན་ནོ། །ཕྱི་མ་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་འབྱུང་བ་ཡང་ཡི་གེ་དྲུག་པ་འདི་ཡིན་ནོ། །ཨོཾ་མ་ཎི་པདྨེ་ཧཱུྃ། ཞེས་པའི་ཡི་གེ་དྲུག་པ་འདི་ཟློས་ཤིག །སྒྲོངས་ཤིག །སྒྲུབས་ཤིག །སྟོན་ཅིག །ཤོད་ཅིག །སྔ་མའི་སངས་རྒྱས་ཀྱི་གཤེགས་ཤུལ། ད་ལྟའི་སངས་རྒྱས་ཀྱི་བསྟན་པ། ཕྱི་མའི་སངས་རྒྱས་ཀྱི་ལམ་ཡིན་ནོ། །ཞེས་དང་། ཆོས་ཐུགས་རྗེ་ཆེན་པོའི་ཡང་སྙིང་། ཨོཾ་མ་ཎི་པདྨེ་ཧཱུཾ། ཞེས་པ་འདི་ལས་ལྷག་པ་མེད་དོ། །བླ་ན་མེད་པའི་བྱང་ཆུབ་ཐོབ་པའི་སྙིང་པོ་མ་ནོར་བ་ཡིན་ནོ། །ཞེས་བོད་འབངས་སྤྱི་ལ་གདམས་ཏེ། རྒྱུད་སྡེ་སྤྱི་ལ། བསྐྱེད་རིམ་དང་བཟླས་པ་ལ་བརྟེན་ནས་ཐུན་མོང་གི་དངོས་གྲུབ་འགྲུབ་ལ། རྫོགས་རིམ་གྱིས་མཆོག་འགྲུབ་པར་བཤད་ཀྱི། སྔགས་བཟླས་པ་ཁོ་ནས་སངས་རྒྱས་ཐོབ་པར་བཤད་པ་ཆེར་མེད་ན། འདིར་ཡི་གེ་དྲུག་པ་བཟླས་པ་
ཁོ་ནས་སངས་རྒྱས་ཐོབ་པར་བཤད་པས་ཀྱང་ངོ་མཚར་ཆེ་བ་ཡིན་ནོ། །ཡང་སྤྲུལ་པའི་རྒྱལ་པོའི་སྙིང་པོ། ཨོཾ་མ་ཎི་པདྨེ་ཧཱུཾ། ཞེས་པ་འདི་ཡིད་བཞིན་གྱི་ནོར་བུ་ཡིན་རྣཔས་མཆོག་ཐུན་མོང་གི་དངོས་གྲུབ་ཐམས་ཅད་འདི་ལས་འབྱུང་བ་ཡིན་ནོ། །འདི་ཟློས་ཤིག །འདི་ལ་ནན་ཏན་སྐྱེད་ཅིག་གསུངས་ཏེ། ཐུགས་རྗེ་ཆེན་པོའི་ཡི་གེ་དྲུག་པ་འདི་ལས་དངོས་གྲུབ་ཐམས་ཅད་འབྱུང་བ་ལུང་ནི། ཨོ་རྒྱན་རིན་པོ་ཆེས་རྔ་ཡབ་གླིང་དུ་གཤེགས་ཁ་བོད་སྤྱི་ལ་ཞལ་ཆེམས་ཚུལ་དུ་གསུང་པ་ལས་ཕན་ཡོན་རྒྱ་ཆེར་གསུངས་ཤིང་། ཁྱད་པར་ཨོཾ་མ་ཎི་པདྨེ་ཧཱུྃ། ཞེས་ཡི་གེ་དྲུག་པ་འདི་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་ཡིན་པས། ཞག་རེ་ལ་བརྒྱ་རེ་བཟླས་ན་ངན་སོང་དུ་མི་སྐྱེ་བར་ཕྱི་མར་མི་ལུས་ཐོབ་ནས་འཕགས་པ་སྤྱན་རས་གཟིགས་དབང་ཕྱུག་གི་ཞལ་མཇལ་བར་འགྱུར་རོ། །ལན་ཉི་ཤུ་རྩ་གཅིག་རེ་རྟག་ཏུ་བཟླས་བརྗོད་བྱས་ན་ཡིད་གཞུངས་བར་འགྱུར་རོ། །དབྱངས་སྙན་པར་འགྱུར་རོ། །ཆོས་ཐམས་ཅད་ཀྱི་དོན་ལ་མཁས་པར་འགྱུར་རོ། །ཞག་རེ་ལ་ལན་བདུན་བདུན་བཟླས་བརྗོད་བྱས་ན་སྡིག་པ་ཐམས་ཅད་ཟད་པར་འགྱུར་རོ། །སོགས་རྒྱ་ཆེར་གསུངས་སོ། །ཕྱག་
སྟོང་སྤྱན་སྟོང་གི་གཟུངས་ལས་སྤྱན་རས་གཟིགས་ཀྱི་མཚན་ནི་བརྗོད་ན་ཡང་། སྡིག་སྒྲིབ་གྲངས་མེད་འབྱངས་ཤིང་བསོད་ནམས་དཔག་མེད་འཐོབ་སྟེ། འདི་ནས་འཆི་འཕོས་ན་ཡང་བདེ་བ་ཅན་དུ་སྐྱེ་བར་འགྱུར་རོ། །ཞེས་དང་། གདོང་བཅུ་གཅིག་པའི་མདོ་ལས་སྤྱན་རས་གཟིགས་ཀྱིས་གསུངས་པ། ངའི་མིང་བརྗོད་ཅིང་དྲན་པར་གྱུར་ན། གནོད་པ་ཐམས་ཅད་དང་བྲལ་བར་འགྱུར། སྡིག་སྒྲིབ་ཐམས་ཅད་བྱང་བར་འགྱུར། འཇིགས་པ་ཐམས་ཅད་ལས་ཐར་བ་འགྱུར། གདོན་བགེགས་ཐམས་ཅད་ལས་ཐར་ཞིང་སྐྱོབ་པར་འགྱུར། ལེགས་པའི་ཡོན་ཏན་ཐམས་ཅད་འཕེལ་བར་འགྱུར། བཀྲ་མི་ཤིས་པ་ཐམས་ཅད་ནུབ་པར་འགྱུར། ཞེས་དང་། མཚན་རབ་ཏུ་བསྟན་པའི་མདོ་ལས། ང་ནི་ཐུགས་རྗེ་ཆེན་པོ་འགྲོ་བ་ཐམས་ཅད་སྡུག་བསྔལ་སྐྱོབ་པ་ཡིན། ངའི་མིང་དྲན་པར་གྱུར་ན་ཕ་རོལ་པོས་མདའ་འཕང་ཡང་ཟུག་པར་མི་འགྱུར། མཚོན་རྣོན་པོས་བཏབ་ཀྱང་དེས་ཆོད་པར་མི་འགྱུར་རོ། །གྲགས་པ་ཆེ་ཞིང་རིགས་རྒྱུད་འཕེལ་བར་འགྱུར། ཟས་ནོར་གྱིས་མི་འཕོངས་ཤིང་ལོངས་སྤྱོད་རྒྱས་པར་འགྱུར། ངའི་མིང་དྲན་པ་དེས་སུས་ཀྱང་མི་ཐུབ་པར་འགྱུར། འབྲོག་དགོན་པའམ། ནགས་
ཁྲོད་དུ་སོང་ཡང་སེང་གེ་དང་། སྟག་དང་། གཟིག་དང་། དོམ་དང་། དྲེད་དང་། །གཡག་རྒོད་དང་། དུག་སྦྲུལ་དང་གཅན་གཟན་རྣམས་ཀྱིས་མི་གཡེང་། ངའི་མིང་དྲན་པ་ཙམ་གྱིས་བགེགས་ཐམས་ཅད་བྲོས་པར་འགྱུར་རོ། །མེ་དཔུང་འབར་བའི་ནང་དུ་བོར་ན་ཡང་། ངའི་མིང་དྲན་པ་ཙམ་གྱིས་པདྨས་གང་བའི་རྫིང་བུར་གྱུར། ངའི་མིང་དྲན་པ་ཙམ་གྱིས་ཆུར་མི་བྱིངས། ཆུས་མི་ཁྱེར། མེས་མི་ཚིག །གང་གིས་ངའི་མིང་དྲན་པར་བྱེད་པ་དེ་མཐོང་བ་ཙམ་གྱིས་གཞན་དག་མོས་པར་འགྱུར། དགྲས་ཟིལ་གྱིས་མི་གནོན། དུག་གིས་མི་ཚུགས། ངའི་མིང་ཐོས་ནས་དྲན་པར་བྱེད་ན། དེ་དག་ནི་ལྷ་དང་ཀླུ་དང་གནོད་སྦྱིན་དང་། གྲུལ་བུམ་དང་། སྲིན་པོ་དང་། ཤ་ཟ་དང་། ཡི་དྭགས་རྣམས་ཀྱིས་མདངས་འཕྲོག་པར་མི་ནུས་སོ། །ཕ་རོལ་གྱི་སྔགས་ཀྱིས་ཚུགས་པར་མི་འགྱུར་རོ། །ཞེས་གསུངས་སོ། །མདོ་སྡེ་ཟ་མ་ཏོག་ཆེ་བ་ལས། ཤཱཀྱ་ཐུབ་པས་བཀའ་སྩལ་པ། གང་གིས་འཕགས་པ་སྤྱན་རས་གཟིགས་ཀྱི་མིང་དྲན་པ་དེ་དག་ནི་བདེ་བ་དང་ལྡན་པ་ལགས་སོ། །སྐྱེ་བ་དང་རྒས་པ་དང་ན་བ་དང་འཆི་བའི་སྡུག་བསྔལ་ལས་ཡོངས་སུ་ཐར་བ་
ལགས་སོ། །བདེ་བ་ཅན་གྱི་ཞིང་ཁམས་སུ་སྐྱེས་ནས་སྣང་བ་མཐའ་ཡས་ལས་ཆོས་ཉན་པར་འགྱུར་རོ། །དེ་དག་གི་ལུས་ལ་འཁོར་བའི་སྡུག་བསྔལ་མི་འབྱུང་། སེམས་ལ་སྡུག་བསྔལ་མི་འབྱུང་། རྒྱུད་ལ་ཉོན་མོངས་པ་དང་། བཀྲེས་པ་དང་། སྐོམ་པ་དང་། འཕོང་པའི་སྡུག་བསྔལ་མི་འབྱུང་། མངལ་ན་གནས་པའི་སྡུག་བསྔལ་མི་འབྱུང་། ཆོས་ཀྱི་རོས་བསྐྱོད་པ་པདྨ་ལ་རྫུས་ཏེ་སྐྱེ་བར་འགྱུར་རོ། །འཕགས་པ་སྤྱན་རས་གཟིགས་དབང་ཕྱུག་ལ་ཡི་དམ་བསྟེན་པ་མཛད་པ་དེ་བསྟེན་པར་མཛད་དོ། །སངས་རྒྱས་ཀྱི་ཞིང་དེར་རྟག་ཏུ་འཛིན་ཅིང་གནས་སོ། །འཕགས་པ་སྤྱན་རས་གཟིགས་དབང་ཕྱུག་ཞལ་བཅུ་གཅིག་པའི་གཟུངས་ལས། བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་གསུངས་པ། བཅོམ་ལྡན་འདས་བདག་གི་མིང་འཛིན་པ་ནི་དོན་མཆིས་ཏེ། སངས་རྒྱས་བྱེ་བ་ཕྲག་འབུམ་གྱི་མིང་འཛིན་པ་བས་ལྷག་གོ །བདག་གི་མིང་འཛིན་པའི་སེམས་ཅན་ཐམས་ཅད་ནི་ཕྱིར་མི་ལྡོག་པ་ཉིད་ལ་གནས་པར་འགྱུར་རོ། །བྲོ་ནད་ཐམས་ཅད་ལས་ཡོངས་སུ་ཐར་བར་འགྱུར་རོ། །སྒྲིབ་པ་ཐམས་ཅད་དང་ལུས་ངག་ཡིད་གསུམ་གྱི་ཉེས་པ་སྤྱོད་པ་
ཐམས་ཅད་ལས་ཡོངས་སུ་ཐར་བར་འགྱུར་བ་ལགས་སོ། །ཞེས་དང་། དམ་པའི་ཆོས་པདྨ་དཀར་པོ་ལས། གལ་ཏེ་གསོད་པས་མེ་ཡི་དངོས་སུ་ཡང་། །བསད་པར་བྱ་བའི་ཕྱིར་ན་བོར་བའི་མིས།། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །ཆུ་བཏབ་བཞིན་དུ་མེ་དག་ཞི་བར་འགྱུར། །རྒྱ་མཚོ་དང་ནི་མྱ་ངན་བརྒལ་ན་ཡང་། །ཀླུ་དང་འབྱུང་པོ་ལྷ་མ་ཡིན་གནས་སུ། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །ཆུ་ཡི་ནང་དུ་ནམ་ཡང་མི་ནུབ་བོ། །རབ་ཏུ་སྡང་བའི་ཡིད་ཀྱིས་བསད་པའི་ཕྱིར། །རི་རབ་ལྷུན་པོའི་རྩེ་ནས་བོར་ན་ཡང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །ཉི་མ་ལྟ་བུར་ནམ་མཁར་གནས་པར་འགྱུར། །གལ་ཏེ་རྡོ་རྗེ་དང་ནི་རི་དྭགས་ཀྱང་། །བསད་པའི་ཕྱིར་ནི་སྤྱི་བོར་འོང་ན་ཡང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །བ་སྤུ་ཁུང་ཙམ་འཚེ་བར་མི་ནུས་སོ། །གལ་ཏེ་མང་པོ་དགྲ་ཡིས་ཡོངས་བསྐོར་ཏེ། །བསད་པའི་སེམས་ཀྱིས་ལག་ཎྜིན་མཚོན་ཐོགས་ཀྱང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །དེ་མ་ཐག་ཏུ་བྱམས་པའི་སེམས་སུ་གྱུར། །གལ་ཏེ་གསོད་པར་ཉེ་བར་འོངས་ནས་སུ། །གཤེད་མའི་དབང་
དུ་གྱུར་པའི་ཚེ་ན་ཡང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །དེ་ཡི་མཚོན་ཆ་དུམ་བུ་དུམ་བུར་འགྱུར། །གལ་ཏེ་ཤིང་ངམ་ལྕགས་ལས་བྱས་པ་ཡིས། །ཁོང་བསྒྲིལ་དང་ནི་གདོས་ཀྱིས་བཅིངས་ན་ཡང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །བཅིངས་བ་དག་ནི་མྱུར་དུ་འཆད་པར་འགྱུར། །སྔགས་དང་སྨན་དང་སྟོབས་དང་རིག་སྔགས་དང་། རོ་ལངས་པ་དང་འབྱུང་པོ་ལུས་འཇིགས་པ། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །གང་ན་རབ་ཏུ་བཏང་བ་དེ་ལྟར་འགྲོ། །གནོད་སྦྱིན་ལྷ་མིན་དབང་པོ་ཀླུ་འབར་བ། །ཟླུམདངས་འཕྲོག་པ་ཡིས་ཡོངས་སུ་བསྐོར་ན་ཡང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །བ་སྤུས་ཁུང་ཙམ་བཙས་པར་ཡང་མི་ནུས། །མཆེ་བ་སེན་རྣོན་རབ་ཏུ་འཇིགས་པ་ཡི། །གཅན་གཟན་མ་རུངས་པ་ཡིས་བསྐོར་བས་ཀྱང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །མྱུར་བར་ཕྱོགས་ཀུན་ཏུ་ནི་འགྲོ་བར་འགྱུར། །མི་འཇིགས་མེ་ལྕེ་ལྟ་བུར་འོད་འཕྲོ་བར། །མི་གདུག་ཅན་གྱིས་ཡོངས་སུ་བསྐོར་ན་ཡང་། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །ཤིན་ཏུ་མྱུར་བར་གདུག་པ་མེད་པར་འགྱུར། །བཟང་པོ་གློག་ཀྱང་
འབྱུང་ཞིང་རྟུག་པ་ཡིས། །སྤྲིན་དང་ལྕེ་ལས་སེར་བ་ཆར་འབེབས་པ། །སྤྱན་རས་གཟིགས་ཀྱི་དབང་ཕྱུག་དྲན་ན་ནི། །དེ་མ་ཐག་ཏུ་མྱུར་བར་རབ་ཏུ་ཞི། །སྡུག་བསྔལ་མང་པོ་བརྒྱ་ཡིས་བརྩེས་པ་དང་། །སྡུག་བསྔལ་མང་པོས་གཟེར་བའི་སེམས་ཅན་མཐོང་། །ཡེ་ཤེས་དགེ་བའི་སྟོབས་ཀྱི་སྤྱན་རས་གཟིགས། །དེ་བས་ལྷག་བཅས་འགྲོ་བ་སྐྱོབ་པ་པོ། །རྫུ་འཕྲུལ་སྟོབས་ཀྱིས་ཕ་རོལ་སོན་པ་སྟེ། །ཐབས་དང་ཤེས་རབ་ཡངས་པ་བསླབས་པ་ནི། །ཕྱོགས་བཅུའི་འགྲོ་བ་མང་པོ་ཐམས་ཅད་དང་། །མ་ལུས་ཞིང་ཀུན་ཏུ་ཡང་རབ་ཏུ་སྣང་། །སྲོག་ཆགས་རྣམས་ནི་ངན་འགྲོའི་འཇིགས་པ་དང་། །མི་ཁོམ་པ་དང་སེམས་ཅན་དམྱལ་བ་དང་། །བྱོལ་སོང་དག་ནི་གཤིན་རྗེའི་བསྒོ་བ་དང་། །སྐྱེ་རྒ་ན་བས་གཟིར་བས་མཐར་ཞི་བྱེད། །ཅེས་དང་། འཐབ་མོ་དང་ནི་རྩོད་ཅིང་འབྱེད་པ་ཡིས། །འཇིགས་ཆེན་གཡུལ་ངོར་སྐྱེས་བུ་སོང་ན་ཡང་། །སྤྱན་རས་གཟིགས་ཀྱི་དབང་པོ་དྲན་ན་ནི། །དེ་མ་ཐག་ཏུ་དགྲ་རྣམས་རབ་ཏུ་ཞི། །ཞེས་དང་། དག་པའི་སེམས་དཔའ་སྤྱན་རིས་གཟིགས་དབང་ཕྱུག་།ཐེ་ཚོམ་མེད་པར་དྲན་བྱོས་དྲན་པར་གྱིས། །འཆི་བའི་ཚེ་དང་ཉོན་མོངས་
གཙེས་པའི་ཚེ། །མགོན་དང་སྐྱབས་དང་དཔུང་གཉེན་དག་ཏུ་འགྱུར། །ཞེས་གསུངས་སོ། །དེ་ལྟར་འདི་ལ་ཡི་དམ་བྱས་ནི་ཆེད་དུ་མ་བསྒྲུབས་ཀྱང་ཐུན་མོང་གི་དངོས་གྲུབ་ཚེ་འདི་ལ་འབྱུང་ཚུལ་དང་། ཕྱི་མ་དག་པའི་ཞིང་དུ་བགྲོད་དེ་སངས་རྒྱས་ཚུལ་རྒྱ་མཚོ་ལས་ཆུ་ཐིགས་ཅིག་ཙམ་བཤད་ན། འདི་ནི་ཕྱི་ནང་མདོ་རྒྱུདཀྱི་ཉམས་ལེན་ཐམས་ཅད་ལས་ཁྱད་པར་དུ་འཕགས་པ་ཡིན་ཏེ། མདོ་སྡེ་ཟ་མ་ཏོག་བཀོད་པ་ཆེན་པོ་ལས། བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་པ། རྣལ་འབྱོར་པ་གཞན་རྣམས་ནི་འབྲས་ཀྱི་ཕུབ་མ་དང་འདྲའོ། །བློརྣལ་འབྱོར་པ་ཐམས་ཅད་ཀྱི་ནང་ནས་ཡི་གེ་དྲུག་པའི་རིག་སྔགས་ཀྱི་རྒྱལ་པོ་འདི་ནི་འབྲས་ཀྱི་སྙིང་པོར་གྱུར་པའོ། །ཞེས་གསུངས་པ་དང་། མདོ་སྡེ་ཉིད་ལས། ཡུལ་འཁོར་མོ་འཇིག་གིས་གྲོང་ཁྱེར་གྱི་ཆོས་སྨྲ་བའི་བཤེས་གཉེན་གྱིས་བྱང་ཆུབ་སེམས་དཔའ་སྒྲིབ་པ་རྣམ་སེལ་ལ་གསུངས་པ། ཆོས་གཞན་གྱི་རྣལ་འབྱོར་པ་ནི་ཕུབ་མ་དང་འདྲའོ། །ཡི་གེ་དྲུག་པའི་རྣལ་འབྱོར་པ་ནི་མཆོག་ཅེས་བྱ་སྟེ། མི་མཉམ་པ་དང་མཉམ་པ་ཞེས་བྱའོ། །ཞེས་གསུངས་པས། ཐུགས་རྗེ་ཆེན་པོའི་ཆོས་འདི་ཀུན་མཐུན་ཀུན་ལས་ལྷག་པའི་ཆོས་ཡིན་ནོ། །འདིའི་རྒྱུ་
མཚན་ཅུང་ཟད་བཤད་ན། མིའི་འཇིག་རྟེན་འདི་དང་པོ་ཆགས་ནས་མི་རྣམས་འབྲས་ཞིང་ས་མ་དུམ་པར་འཐབས་པས། ཐུགས་རྗེ་ཆེན་པོའི་སྤྲུལ་པ་མི་གཞན་ལས་གཟུགས་དང་ཁ་དོག་ཁྱད་པར་འཕགས་པ་ཞིག་གིས་སོ་སོར་བགོས་ནས་རང་གི་སྐལ་བ་ཡང་མ་བཞག་པས། མི་ཐམས་ཅད་ཀྱིས་དཔོན་དུ་བཀུར་ཏེ། མི་ཆོས་ཀྱི་ཁྲིམས་དང་བྱ་བཞག་ཐམས་ཅད་རྒྱལ་པོ་དེས་དར་བར་མཛད་དོ། །འཇིག་རྟེན་མི་ཆོས་དང་ཡང་ཐུགས་རྗེ་ཆེན་པོའི་ཆོས་འདི་ཆ་མཐུན་ཏེ། འཇིག་རྟེན་མ་དག་པའི་བྱ་བ་ཐམས་ཅད་སྤངས་ནས་བག་ཡོད་པས་ལྷ་རྒྱལ་པོ་མང་བཀུར་གྱིས་ངོ་བོ་ཐུགས་རྗེ་ཆེན་པོ་ལ་སྐྱབས་དང་དཔོན་ཞུ་བ་ཡིན། འོན་ཀྱང་འཇིག་རྟེན་པའི་མི་ཆོས་ནི་འཁོར་བ་དང་ངན་སོང་ལས་མི་ཐར། འདིས་ཐར་པ་བསྒྲུབས་པས་འཁོར་བ་ལས་འཕགས་ནུས་ཕྱིར་དུང་ཕྱུར་གྲངས་མེད་ཀྱིས་ཁྱད་པར་འཕགས་སོ། །ཕྱི་རོལ་མུ་སྟེགས་པ་རྣམས་འཇིག་རྟེན་འདི་ཡང་དབང་ཕྱུག་གིས་བྱས། བདེ་སྡུག་ཐམས་ཅད་དབང་ཕྱུག་གིས་བྱས་པས་དབང་ཕྱུག་མཆོད་ལེགས་ན་ཐར་པ་བདེ་བ་ཐོབ། དབང་ཕྱུག་མཆོད་མ་ལེགས་ན་ངན་སོང་སྡུག་བསྔལ་ཐོབ་པར་བྱེད་དེ། དེ་ཡང་ཆོས་སྐུ་ཚངས་པ། ལོངས་
སྐུ་ཁྱབ་འཇུག །སྤྲུལ་སྐུ་དྲག་པོ་འཇིགས་བྱེད་ནག་པོ་ཐམས་ཅད་ཀྱང་དབང་ཕྱུག་གི་སྤྲུལ་པ་ཡིན་པར་འདོད་པ་སྟེ། །མུ་སྟེགས་དབང་ཕྱུག་ནག་པོའི་རྒྱུད་ལས། སྐྱེ་བོ་མི་ཤེས་བདག་ཉིད་འདི། །བདེ་སྡུག་རང་དབང་ཡོད་མིན་ཏེ། །དབང་ཕྱུག་གིས་བྱས་མཐོ་རིས་སམ། །ངན་སོང་དག་ཏུ་འགྲོ་བར་འགྱུར། །ཡོན་ཏན་ནོར་ལྡན་ཚེ་ཐུང་དང་། །ངན་པ་སྤྱོད་རྣམས་ཚེ་རིང་དང་། །གཏོང་ལྡན་དབུལ་པོ་མཐོང་བས་ན། །དབང་ཕྱུག་གིས་བྱས་གསལ་བ་ཡིན། །ཞེས་འབྱུང་ངོ་། །དེ་དག་ལ་མུ་སྟེགས་རིགས་མང་ཡང་། ཐམས་ཅད་ཀྱི་དབང་ཕྱུག་ཡིན་ཏེ། དབང་ཕྱུག་ཉིད་སྤྱན་རས་གཟིགས་ཀྱི་སྤྲུལ་པ་ཡིན་པས། འཇིག་རྟེན་ན་དང་པོ་སྒྲ་དང་ཡི་གེ་དང་སྨན་དང་། རྩིས་དང་སྒྱུ་རྩལ་དང་ལྷ་དབང་ཕྱུག་སོགས། མཆོད་པས་ལྷས་ཕན་འདོགས་པ་དང་། འདྲེས་གནོད་པ་དེ་འདུལ་ཐབས་དང་། སྔགས་དང་ཏིང་ངེ་འཛིན་ལ་བརྟེན་ནས་མངོན་ཤེས་དང་རྫུ་འཕྲུལ་ནམ་མཁའ་ལ་འཕུར་བ་སོགས་གྲུབ་ཆེན་བརྒྱད་དང་། ཕྲིན་ལས་བཞི་སྒྲུབ་ཐབས་རྣམས་དབང་ཕྱུག་གིས་བསྟན་པས། ལམ་བསྒྲུབ་ཏུ་ཡོད་པར་ཤེས་པས། དེ་ནས་སངས་རྒྱས་བྱོན་ནས་ཆོས་ཀྱང་དར་བའི་
ལམ་སྟེགས་ཡིན་པས་མུ་སྟེགས་ཞེས་བྱ། དབང་ཕྱུག་གིས་དེ་ལྟར་དང་པོ་མ་བསྟན་ན། ཆོས་ཤེས་སུ་མ་བཏུབ་པས་མུན་པའི་བསྐལ་པར་འགྱུར་ཏེ། མགོན་པོའི་རྒྱུད་ཁྲག་མཚོ་ཁོལ་ཆེན་ལས། དབང་ཕྱུག་ལ་བསྟོད་པ་མགོན་པོ་འཕགས་པ་སྤྱན་རས་གཟིགས་དབང་གིས། རབ་སྤྲུལ་སངས་རྒྱས་བསྟན་པའི་ཐོག་མར་ནི། །འཇིག་རྟེན་ཀུན་ཏུ་འབྱུང་བའི་བདག་པོ་ཆེ། །དབང་ཕྱུག་ཆེན་པོ་ལམ་ཚོལ་ལྷ་ལ་བཀོད། །ཕྱི་རོལ་ཀུན་ཏུ་རྒྱུ་བ་ཐམས་ཅད་ཀྱིས། །གནས་འགྱུར་ནུས་པའི་ལས་ཆེན་སྒྲུབ་བྱེད་ཅིང་། །རོ་ལ་རལ་གྲི་གསེར་འགྱུར་གནོད་སྦྱིན་མོ། །བུམ་པ་བཟང་པོ་རིལ་བུ་མིག་སྨན་དང་། །རྐང་མགྱོགས་རྡོ་རྗེ་ཨན་ཛ་འབབས་པ་ལྟར། །ཞེས་གསུངས་སོ། །འོ་ན་མུ་སྟེགས་ལས་དུང་ཕྱུར་གྲངས་མེད་པའི་ལྷག་ཅིང་ཁྱད་པར་འཕགས་ཏེ། དགོངས་གཅིག་ལས། ཕྱི་རོལ་པ་ལ་བདེན་མཐོང་གནས་མེད་དོ། །ཐར་པ་ཆ་མཐུན་དགེ་བ་འགའ་ཞིག་དང་། །སྒོམ་པའི་ཚུལ་ཁྲིམས་སྙིང་རྗེ་ལ་སོགས་ཡོད། །ཅེས་དང་། མདོ་སྡེ་ཟ་མ་ཏོག་བཀོད་པ་ཆེན་པོ་ལས། སྔོན་གྱི་དེ་བཞིན་གཤེགས་པ་ལྷ་མཐོང་ཞེས་བྱ་བས་ལྷའི་བུ་དབང་ཕྱུག་ཆེན་པོ་ལ་འདི་སྐད་ཅེས་
གསུངས་སོ། །དབང་ཕྱུག་ཆེན་པོ་ཁྱོད་དུས་ངན་པའི་ཚེ། སེམས་ཅན་ཁམས་མ་རུངས་བ་དག་བྱུང་བ་ན། ཁྱོད་ཐོག་མར་བྱེད་པ་པོ་དང་བཏང་བ་པོ་ལྟར་གྲགས་པར་འགྱུར་རོ། །སེམས་ཅན་དེ་དག་ནི་བྱང་ཆུབ་ཀྱི་ལམ་ཡོངས་སུ་སྤོང་བར་འགྱུར་རོ། །ཞེས་ལུང་བསྟན་ཏེ། བསྟན་པ་འདི་ལ་ལུང་བསྟན་པ་ལྟར། མུ་སྟེགས་སྟོན་པ་དྲུག་དར་བ་བཅོམ་ལྡན་འདས་ཀྱིས་ཆོ་འཕྲུལ་ཆེན་པོ་བསྟན་ཏེ་བཏུལ་ལོ། །དེ་ནས་སྟོན་པ་འདས་རྗེས་ལོ་ཉིས་བརྒྱ་ཉི་ཤུ་ཙམ་ན་བྲམ་ཟེའི་ཁྱེའུ་སྤྱན་གསུམ་གྱིས་ཕྱི་ནང་གི་ཆོས་གང་བཟང་མ་འཆམས་ནས་བརྩད་པས། མ་ཡེ་ཤེས་ཀྱི་ཌཱཀྐིའི་རིགས་གཅིག་ཡོད་པས། བུ་གསུམ་ལ་རྐང་མགྱོགས་བྱུག་སྟེ་གངས་ཏི་སེར་བཏང་ནས་ལྷ་དབང་ཕྱུག་ཆེན་པོ་བཞུགས་པ་ལ་དྲིས་པས། མ་ཧཱ་དེ་ཝས། ང་མུ་སྟེགས་ཀྱི་ལྷ་ཡིན་པས་མཐུ་དང་རྫུ་འཕྲུལ་དང་། ཚེ་འདིའི་དོན་ནི་མུ་སྟེགས་མྱུར་བ་ཡིན། ཕྱི་མའི་བདེ་བ་བྱང་ཆུབ་བསྒྲུབ་པ་ནང་པའི་ཆོས་ལུགས་བཟང་བ་ཡིན་ཟེར་བས། གནས་བརྟན་བཅུ་དྲུག་སོགས་ལ་མཆོད་པ་བྱེད་པར་མཐོང་སྟེ། བུ་གསུམ་གྱིས་ནང་པ་བཟང་བར་ཤེས་ནས། རྡོ་རྗེ་གདན་གྱི་རྟེན་མ་ཧཱ་བྷོ་དྷི་སོགས་གསུམ་བཞེངས་སོ། །དེ་དང་མཐུན་པར་
མགོན་པོའི་རྒྱུད་ཁྲག་མཚོ་ཁོལ་མར་དབང་ཕྱུག་ལ་བསྟོད་པ། མཐུ་སྟོབས་རྩལ་ལྡན་རྩ་གསུམ་དབང་བྱེད་པ། །ཕ་རོལ་རྒོལ་བའི་ནུས་པ་ཚར་གཅོད་ཅིང་། །བདུད་དཔུང་ཟློག་བྱེད་ཡོན་ཏན་རྒྱལ་པོ་ཆེ། །ཉན་རང་སངས་རྒྱས་བྱང་ཆུབ་སེམས་དཔའ་ལ། །རྟག་ཏུ་ཁྱོད་ནི་རབ་ཏུ་མཆོད་བྱེད་པ། །ཞེས་གསུངས་སོ། །དེ་ལྟར་མུ་སྟེགས་དབང་ཕྱུག་ཐུགས་རྗེ་ཆེན་པོའི་སྤྲུལ་པ་ཡིན། དབང་ཕྱུག་གིས་འཇིག་རྟེན་ཐམས་ཅད་བྱས་པ་ལྟར། འཇིག་རྟེན་ཐམས་ཅད་ཐུགས་རྗེ་ཆེན་པོ་ལོངས་སྐུ་རྣམ་སྣང་གི་སྐུ་ལས་གྲུབ་པར་འདོད། སྤྱན་རས་གཟིགས་དབང་ཕྱུག་མཆོད་ན་ཐར་པ་ཐོབ་པས་ཕྱི་རོལ་པ་དང་མཐུན་ཀྱང་དུང་ཕྱུར་གྲངས་མེད་ཀྱིས་ལྷག་ཅིང་ཁྱད་པར་འཕགས་སོ། །དེ་བཞིན་དུ་དབང་ཕྱུག་གིས་ཚངས་པ་སྤྲུལ་ཚངས་པས་རང་གི་མཁུར་ཚོས་སྣད་པ་དང་། སེམས་ཅན་མི་རྣམས་དང་པོ་མ་ཞུ་བའི་ནད་གདོན་བྱུང་ན་སེལ་བའི་ཕྱིར། སྔོན་སངས་རྒྱས་ལས་ཐོས་པའི་གསོ་དཔྱད་སུམ་འབུམ་པ་ཚངས་པས་གསུངས་པ། འཇིག་རྟེན་དུ་འབྱུང་བ་དང་། ཚངས་པ་གསལ་བྱེད་སོགས་སྒྲ་དང་ཡི་གེ་བཤད་པ་བརྒྱ་བྱིན་དང་། སྨིན་དྲུག་ཕུར་བུ་སོགས་ལས་བརྒྱུད་ནས་འཇིག་རྟེན་དུ་དར་བ་
སོགས་རིག་གནས་ཐམས་ཅད་ཀྱང་སྤྱན་རས་གཟིགས་ལས་བྱུང་བས། རིག་པ་ཐམས་ཅད་དང་མཐུན་ལ། འདི་ནི་བྱང་ཆུབ་ཐོབ་ཐབས་ཡིན་ཡང་ཁྱད་པར་འཕགས་སོ། །བཀའ་གདམས་བུ་ཆོས་རྒྱལ་བུ་བློ་གྲོས་འཕེལ་གྱི་སྐྱེས་རབས་ལས། རྒྱལ་བུས་སྨྲས་པ། སེམས་ཅན་དག་ལ་བློ་རིག་སྟེ། །མིང་ཡང་དེ་དང་མཐུན་པར་འདོགས། །ལྷ་ཡང་ཐ་དད་དུ་མ་སྐད། །རྒྱ་གར་ནང་པའི་བློ་ངོ་ན། །ང་ནི་མགོན་པོ་སྤྱན་རས་གཟིགས། །བློ་གྲོས་འཕེལ་ཞེས་འབོད་པར་བྱེད། །བོན་པོའི་གཤེན་ལྷ་འོད་དཀར་ཞེས། །ད་ལྟ་ལྕགས་འབར་བུ་རུ་འབོད། །ཕྱི་པ་དབང་ཕྱུག་ཆེན་པོ་ཞེས། །ཆོས་ཀྱང་དེ་དང་མཚུངས་པར་སྨྲ། །སྤྱད་ན་ཚད་མེད་བཞི་ལྡན་བཟང་། །ཞེས་གསུངས་པ་དང་། གྲུབ་ཆེན་མི་ཏྲའི་རྣམ་ཐར་རྒྱས་པ་ཨོ་རྒྱན་གྱིས་མཛད་པ་ལས། འཕགས་པ་སྤྱན་རས་གཟིགས་དེས་རྒྱ་གར་ཆོས་ཀྱིས་འདུལ་བར་དགོངས་ནས། བཅོམ་ལྡན་འདས་ཤཱཀྱ་ཐུབ་པར་སྤྲུལ་ནས་ཆོས་བསྟན། དེ་ནས་རྒྱ་ནག་རྩིས་ཀྱིས་འདུལ་བར་དགོངས་ནས་འཇམ་དཔལ་དུ་སྤྲུལ་ནས་རྩིས་བསྟན། སྟག་གཟིག་ནོར་གྱིས་འདུལ་བར་དགོངས་ནས་ཨཱརྱ་འཛམ་བྷ་ལྷར་སྤྲུལ་ནས་གཏེར་ཁ་ཕྱེས། ཞང་ཞུང་
བོན་གྱིས་འདུལ་བར་དགོངས་ནས་གཤེན་རབ་ཏུ་སྤྲུལ་ནས་བོན་བསྟན། ཞེས་དང་། བོན་གྱི་གཞུང་ལས་ཀྱང་། དུ་ཏྲི་འཁོར་བའི་ཕྱགས་བདར་ཡིན། །མ་ཎི་འདྲེན་པའི་ལྕགས་ཀྱུ་ཡིན། །ཞེས་བསྟོད་ཅིང་བསྔགས་པ་བརྗོད་པས། ཐུགས་རྗེ་ཆེན་པོའི་ཆོས་འདི་བོན་དང་རྩིས་རྣམས་དང་ཡང་མཐུན་ལ། དེ་བས་དུང་ཕྱུར་གྲངས་མེད་ལྷག་ཅིང་ཁྱད་པར་དུ་འཕགས་ཏེ། རྒྱལ་བུ་བློ་གྲོས་འཕེལ་ལ་ཡབ་ཀྱིས་ཞུས་པ། ངེས་པར་ཆོས་དང་བོན་དང་ཕྱི་པ་གང་བདེན། རྒྱལ་བུ་ན་རེ། ལན་གཅིག་ཧྭ་ཤང་གི་ཡུལ་འདི་ཁོ་བོ་ནག་པོ་ཧ་སུ་ཞེས་བྱ་བར་འགྱུར། བོན་དང་ཕྱི་པའི་ཆོས་ལ་དཔྱད། བོན་དང་ཕྱི་པོ་གཉིས་ཀ་ཁོ་བོས་འཆད་པ་ལ། ཁོ་བོ་གུམ་མ་ཐག་ཏུ་དམྱལ་བར་སྐྱེས་པས། དམྱལ་བའི་གནས་དེ་ན་དམྱལ་བའི་ཐུབ་པ་ཞེས་བྱ་བ་ནང་པའི་ལྷ་ཞིག་གདའ་བ་ན་རེ། ཁྱོད་ཀྱིས་བོན་དང་མུ་སྟེགས་ཀྱི་ཆོས་ལོག་སྤྱད་པས་འདིར་སྐྱེས་ཤིང་། ད་ཤེས་པར་མཛོད་ཅིག་ཟེར་ནས་ཚད་མེད་པ་བཞི་བསྟན་པས་སྔར་གྱི་ལས་ལ་འགྱོད་པ་དྲག་པོ་སྐྱེས་ཤིང་བཤགས་པས། ད་ལྟ་ཡན་ཁྱོད་མཐོ་རིས་ཐོབ་ཅིང་བདེ་བར་གྱུར་པ་ཡིན་ནོ། །ཞེས་དང་། མུ་སྟེགས་བོན་ནི་དངོས་གྲུབ་
མྱུར། །འཕྲལ་དགའ་ཕུགས་ནི་ངན་འགྲོ་འགྱུར། །ཞེས་གསུངས་པས་ནང་པ་བཟང་བར་ཤེས་སོ། །ཐུགས་རྗེ་ཆེན་པོ་ཕྱག་སྟོང་སྤྱན་སྟོང་ལས་སངས་རྒྱས་སྟོང་སྤྲུལ་པར་གསུངས་པས་སྟོན་པ་ཤཱཀྱ་ཐུབ་པ་ཡང་ཐུགས་རྗེ་ཆེན་པོའི་སྤྲུལ་པ་ཆ་གཅིག་ཡིན་ལ། སྡེ་སྣོད་གསུམ་ནི་ཐུབ་པས་གསུངས་པའི་ཕྱིར་དང་། སྡེ་སྣོད་གསུམ་ཀ་ལ་སྤྱན་རས་གཟིགས་ཡོངས་སུ་གྲགས་ཤིང་མདོ་སྡེ་ཆེན་པོ་བདུན་ནས་སྤྱན་རས་གཟིགས་ཀྱི་བསྔགས་པ་ཕན་ཡོན་རྒྱ་ཆེན་པོ་འབྱུང་བས་མདོ་ལུགས་དང་ཡང་མཐུན་ནོ། །འོན་ཀྱང་མདོའི་ལམ་དེ་སངས་རྒྱས་པ་ལ་གྲངས་མེད་གསུམ་འགོར། འདིར་བླ་མེད་ཚེ་གཅིག་གམ་སྐྱེ་བ་བདུན་ལས་མི་འགོར་བས་ཁྱད་པར་འཕགས་སོ། །སྤྱན་རས་གཟིགས་ཀྱི་གཟུངས་བཅུ་བཞི། རྩ་རྒྱུད་པདྨ་དྲྭ་བ། བཤད་རྒྱུད་དོན་ཡོད་ཞགས་པའི་ལེའུ་སོགས་བྱ་སྤྱོད་རྒྱུད་མཐའ་ཡས་པ་ཞིག་ཡོད་པས་བྱ་སྤྱོད་དང་ཡང་མཐུན། ལམ་དེས་མི་ཚེ་དྲུག་ཅུ་འགོར། འདིར་ཚེ་གཅིག་བསྒྲུབས་པས་འཕགས་སོ། །པདྨ་ཅོད་པན་སོགས་རྣལ་འབྱོར་རྒྱུད་ནས་ཐུགས་རྗེ་ཆེན་པོ་འདི་གསུངས་ཤིང་རྣལ་འབྱོར་རྒྱུད་དང་མཐུན། དེ་མི་ཚེ་བཅུ་དྲུག་གིས་བྱང་ཆུབ་བསྒྲུབ། ལམ་འདིར་མྱུར་བས་འཕགས་
སོ། །ཕ་རྒྱུད་གསང་འདུས་ནས། ཐུགས་རྗེ་ཆེན་པོ་གསང་འདུས་འཇིག་རྟེན་དབང་ཕྱུག་སྒྲུབ་ཐབས་གསུངས་པ་དང་། མ་རྒྱུད་དགྱེས་རྡོར་གྱི་བཤད་རྒྱུད་རྡོ་རྗེ་གུར་ལས། ཐུགས་རྗེ་ཆེན་པོ་འཇིག་རྟེན་དབང་ཕྱུག་སྒྲུབ་ཐབས་སྔགས་ཡིག་དྲུག་ཕཊསྭཱ་ཧཱ་ཅན་གསུངས་པ་དང་། བདེ་མཆོག་ནི་སྔོན་དྲག་པོ་དབང་ཕྱུག་འདུལ་ཕྱིར་རྣམ་སྣང་ཆེན་པོའི་སྤྲུལ་པར་བཤད་ལ། རྣམ་སྣང་ཆེན་པོ་ཐུགས་རྗེ་ཆེན་པོ་ལོངས་སྐུའི་ཆ་གཅིག་ཙམ་དུ་བཤད་པ་དང་། ཁྱད་པར་བདེ་མཆོག་རྒྱུད་ནས་ཐུགས་རྗེ་ཆེན་པོ་པདྨ་གར་དབང་གསུངས་པ་དང་། །མདོར་ན་ཕ་རྒྱུད་གསང་འདུས། མ་རྒྱུད་མཱ་ཡཱ། སྤྱི་རྒྱུད་དུས་འཁོར། སྙིང་པོ་དགྱེས་རྡོར།། ཡང་སྙིང་བདེ་མཆོག་དང་འབྲེལ་པའི་དཀྱིལ་འཁོར་བརྒྱ་སྟོང་ཡོད་པ་ཐམས་ཅད་གསུངས་པ་པོ། ཤཱཀྱ་ཐུབ་པ་ཉིད་རྡོ་རྗེ་འཆང་དང་ཧེ་རུ་ཀའི་རྣམ་པར་བཞེངས་ནས་གསུངས་ལ། ལྷའི་ངོ་བོ་ཐུབ་དབང་དེ་ཉིད། ལོངས་སྐུ་ཧེ་རུ་ཀའམ། རྡོ་རྗེ་འཆང་གི་ཆ་ལུགས་སུ་བཞེངས་པ་ཁོ་ན་ཡིན་པས། ཐུབ་དབང་ཉིད་ཐུགས་རྗེ་ཆེན་པོའི་སྤྲུལ་པ་ཆ་གཅིག་ཙམ་དུ་བཤད་པས། ཐུགས་རྗེ་ཆེན་པོའི་དཀྱིལ་འཁོར་འདི་ངོ་མཚར་ཆེ་སྟེ། ཨོ་རྒྱན་རིན་པོ་ཆེས།
ཐུགས་རྗེ་ཆེ་བསྒྲུབ་བདེ་གཤེགས་ཀུན་འགྲུབ་འགྱུར། །ཞེས་གསུངས་པ་དང་། བཀའ་གདམས་གླེགས་བམ་ལས། ལྷ་བཞི་གདམས་པའི་སྐབས་སུ་སྤྱན་རས་གཟིགས་ལ་བསྟོད་པ། ཞི་བ་ཐུགས་རྗེ་མཚུངས་མེད་པ། །ཐུགས་རྗེའི་ཚོགས་རབ་དཔག་མེད་པ། །སྤྱན་རས་གཟིགས་ཀྱི་ངོ་བོ་ཉིད། །ཅེས་དང་། རྒྱལ་བ་སྲས་བཅས་མ་ལུས་པའི། །ཕོ་བྲང་ཉིད་ཀྱང་དེ་ཉིད་ཡིན། །བུ་ག་གཅིག་ན་རྒྱལ་བ་ཡི། །ཞིང་ཁམས་དཔག་མེད་མཆོག་ཏུ་རྒྱལ། །ཞེས་དང་། ལེགས་པར་དཔྱད་ན་འདི་ལྟ་སྟེ། །སྐུ་བཞིའི་སངས་རྒྱས་མ་ལུས་དང་། །ཞི་ཁྲོ་དཔའ་བོ་དཔའ་མོའི་ཚོགས། །ཀུན་གྱི་དཀྱིལ་འཁོར་གཅིག་པུ་ཉིད། །ཅེས་གསུངས་ཤིང་། ཁྱད་པར་ཐུགས་རྗེ་ཆེན་པོ་རྒྱལ་བ་རྒྱ་མཚོའི་གཞུང་ཡིག་རྙིང་གི་དབང་༈ མཆོག་དང་། གཞུང་མང་པོ་ལས་རྒྱུད་སྡེ་བཞིའི་སྤྱི་བསྒྲུབ་ཅེས་གསུངས་པའི་དོན་ཡང་དེ་དག་རྣམས་ཡིན་ནོ། །ཡང་བླ་མེད་རྒྱུད་ཐམས་ཅད་ནས། བསྐྱེད་རིམ་དང་བཟླས་པ་ཐུན་མོང་གི་དངོས་གྲུབ་དང་མཆོག་བསྒྲུབ་པ་ལ་རྫོགས་རིམ་དགོས་པར་བཤད་ཀྱི། སྔགས་བཟླས་པ་ཁོ་ནས་མཆོག་ཐུན་མོང་ཐམས་ཅད་འགྲུབ་པར་མ་གསུངས་ལ། འདིར་ཡིག་དྲུག་ཁོ་ན་
བཟླས་པས་མཆོག་ཐུན་མོང་ཐམས་ཅད་འགྲུབ་པར་གསུངས་པས་ཀྱང་ངོ་མཚར་ཆེའོ། །གཞན་གསང་སྔགས་ཅི་ཙམ་ཟབ་པ་བཞིན་དུ་དམ་ཚིག་སོགས་དང་མ་ལྡན་ན། །ལྟུང་བ་ཚབ་ཆེ་བས་སྐྱོན་ཡོན་ཤིན་ཏུ་ཆེ་ལ། འདིར་པདྨ་རྒྱལ་པོའི་རྒྱུད་ལས། ལྟུང་བ་རྣམས་ཀྱིས་མི་འཇིགས་སོ། །ཆོས་ཀྱི་རྩ་བ་འདི་ཟིན་ན། །ཡན་ལག་ཐམས་ཅད་འདུས་པ་ཡིན་། །ཞེས་གསུངས་སོ། །སྔགས་གཞན་ནི་འདོད་ཡོན་ལ་བག་མེད་སྤྱོད་ན་མི་འགྲུབ་པར་གསུངས་ལ། འདིར་པདྨ་རྒྱལ་པོའི་རྒྱུད་ལས། འདོད་པའི་ཡོན་ཏན་ལྔ་སྤྱད་ཀྱང་། །འདི་དང་མ་བྲལ་གཙང་མར་གནས། །ཞེས་གསུངས་སོ། །སྔགས་གཞན་ཟས་གོས་གྲིབ་ཅན་དང་། །དད་ཟས་གཤིན་ཟས་ཤ་ཆང་སོགས། །ཟོས་པས་མི་འགྲུབ་པར་གསུངས་ལ། །འདིར་པདྨ་རྒྱལ་པོའི་རྒྱུད་ལས། ཟས་དང་གོས་དང་བཏུང་བ་དང་། འདི་དག་དྲན་པས་ཉེས་པ་མེད། །ཅེས་གསུངས་སོ། །གསར་རྙིང་གི་རྒྱུད་དང་། སྒྲུབ་ཐབས་དང་ལྷ་ཚོགས་དཔག་ཏུ་མེད་པ་ནས་རང་རང་གི་གཞུང་ལུགས་ལ་མཆོག་ཏུ་བྱེད་ཀྱང་། རྙིང་མ་རྣམས་གསར་མ་ལ་མི་བརྩི་སྟེ། ཐུགས་རྗེ་ཆེན་པོ་གསུང་འདུས་ཀྱི་ཞུས་ལན་དུ། ཨོ་རྒྱན་
རིན་པོ་ཆེས་ལུང་བསྟན་པ། མཁས་པ་ཅི་འདྲ་འོང་ན་རྒྱ་གར་གྱི་པཎྜི་ཏ་དང་། ད་ལྟའི་ལོ་པཎ་ཚད་མ་འདི་དག་སྨོན་ལམ་གྱིས་བོད་དུ་སྐྱེ་བ་བླངས་ནས་མཁས་པ་ཚད་མ་བསྟན་ལ་ཕབ་པ་ཡང་འགའ་ཙམ་འབྱུང་། ཡང་མངའ་བདག་ཁྲི་སྲོང་གི་གདུང་རྒྱུད་དྲུག་བདུན་ཙམ་མར་སོང་དུས། བོད་ཐམས་ཅད་ལོ་ཙཱ་བར་གྲགས་པ་སྟེ། མི་ཕྱེད་རྒྱ་གར་དུ་ཐག་ལྟར་འདྲེན། ཐམས་ཅད་རང་གི་ཆེ་བ་ནི་འདོན། ཆགས་སྡང་དང་འགྲན་སེམས་ནི་རླུང་ལྟར་འཚུབ། རྒྱ་གར་གྱི་པཎྜི་ཏ་གསེར་འདོད་རྣམས་ཀྱང་བོད་ན་གང་དར་བའི་ཆོས་ལ་བཅོས་འཆོར། དེ་ཡང་རྒྱ་གར་གྱི་སྡེ་སྣོད་གསུམ་ལ་སོགས་པ་སྔགས་མཚན་ཉིད་ཡོངས་སུ་གྲགས་པ་ཐམས་ཅད་ནི་ད་ལྟ་འགྱུར་ཟིན། རྒྱུད་མན་ངག་མ་གྲགས་པ་རྣམས་ནི། ཨོ་རྒྱན་ལ་སོགས་མཁའ་འགྲོའི་གསང་མཛོད་རྣམས་ན་ཡོད་པ་ནི་རྣལ་འབྱོར་གྱི་དབང་ཕྱུག་མིན་པས་མི་ཐོབ། དེ་དུས་བོད་རྣམས་ཀྱིས་ཨོ་རྒྱན་གྱི་ཡུལ་དུ་མི་རྟོལ། དབུས་འགྱུར་རྡོ་རྗེ་གདན་དུ་ནི་ཡུད་རེ་ལས་ཚད་པས་མི་ཚུགས། རྒྱ་གར་ཤར་ཕྱོགས་ཁ་ཆེ་བལ་ཡུལ་རྣམས་ལ་ཆུ་ལྟར་རྒྱུག །ལོ་ཙཱར་གྲགས་པ་རྣམས་རང་ཆེ་འདོད་པས་གཅིག་སྐྱོན་གཅིག་ལ་འགེལ། སྔར་འགྱུར་ཟིན་པ་རྣམས་ལ་རྒྱུད་
ཁུངས་བཅོས་ཁུལ་རེ་བྱས་ནས་ངའི་འགྱུར་བཟང་ཟེར། ད་ལྟ་སྤྲུལ་པའི་ལོ་པཎ་རྣམས་མི་བཟང་ན། མ་འོངས་པའི་བོད་ཕྲུག་སོ་སོའི་སྐྱེ་བོ་རྣམས་མི་མཁས་གསུངས། །དེར་བོད་ཕྲུག་ལོཙྪ་བར་གྲགས་པ་རྣམས་རྒྱུད་འཕྲོས་ནས། མན་ངག་ཅུང་ཟད་རེ་ལ་བཅོས་ཆུང་དང་གབ་སྦས་དང་། འདྲ་མིན་མང་པོ་འཆོས། རྒྱ་གར་གྱི་ཁུངས་དང་བརྒྱུད་པ་ཡང་ལོགས་ནས་འདྲེན། བོད་རྣམས་གསར་ངེས་ནི་ཆེ། རྒྱུ་མཚན་མ་རིག་པས་རང་རང་གི་ལོཙྪ་བའི་ཁ་འཛིན་ཆོས་སྲིད་ཕྱོགས་དྲེད་བྱེད། ལོཙྪ་བ་ཁ་ཅིག་སྔར་མ་གྲགས་པའི་ཆོས་ནི་མ་རྙེད་། དེར་སྔགས་ལ་སྒྲ་བཅོས་བྱེད། ལྷ་དཔའ་བོ་གཅིག་པ་ལ་ཡུམ་བཅོས། ཞལ་ཕྱག་མང་པོ་ལ་ལྷན་སྐྱེས་བཅོས། ལྷན་སྐྱེས་ལ་ཞལ་མང་ཕྱག་མང་བཅོས། སྐུ་མདོག་ལ་རིགས་མང་པོ་བཅོས། དཀྱིལ་འཁོར་ལ་འདོད་བཞེད་ཀྱིས་དཀྲུག །མདོར་ན་གཞན་དང་མི་འདྲ་བ་གཅིག་གཙོ་བོར་འདོན། མཁས་པ་དེ་འདྲ་བའི་རིགས་མ་ངེས་གསུངས་ནས་བཞེད་དོ། །དེ་ལྟར་རྙིང་མ་རྣམས་གསར་མ་ལ་མི་མགུ་ནའང་རྒྱལ་བ་རྒྱ་མཚོའི་རྒྱུད་འདི་གཉིས་རྙིང་མས་ཀྱང་ཚད་ལྡན་དུ་བྱེད་དེ། རྒྱལ་བ་རྒྱ་མཚོའི་སྒྲུབ་ཐབས་རིག་འཛིན་སངས་རྒྱས་གླིང་
པའི་གཏེར་མ་ལས། ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྒྲུབ་ཐབས་ཡབ་ཡུམ་གཉིས་མེད་ཀྱི་རྒྱུད། པདྨ་རྒྱལ་པོ་དང་པདྨ་ཟབ་པའི་བརྒྱུད་ནས་བཏུས་ཏེ། དགེ་སློང་པདྨ་འབྱུང་གནས་ཀྱིས་མཛད་པའོ། །ཞེས་བྱུང་བ་དང་། མངའ་བདག་ཉང་དང་གྲུབ་ཐོབ་དངོས་གྲུབ་ཀྱི་གཏེར་མ་ཨོ་རྒྱན་གྱིས་མཛད་པའི་རྒྱལ་བ་རྒྱ་མཚོའི་ལེའུ་བཅུ་གཉིས། བལ་པོ་མཉྫ་ཤི་ནས་སྲོང་བཙན་ལ་བརྒྱུད་པའི་རྒྱལ་བ་རྒྱ་མཚོ། སྲོང་བཙན་ལ་མཁའ་འགྲོས་གནང་བའི་རྒྱལ་བ་རྒྱ་མཚོ་རྣམས་འདི་ལ་འདུས་ཤིང་། འདི་དང་འདོན་བྱའི་ཚིག་ཡང་ཕལ་ཆེར་གཅིག་ལ་དོན་ལ་ལྷ་ལྔ་ཁོ་ནར་གཅིག་པ་དང་། སངས་རྒྱས་གླིང་པ་དང་རཏྣ་གླིང་པའི་གཏེར་མ་རྒྱལ་བ་རྒྱ་མཚོ་ཡང་དོན་གཅིག་ལ། འདི་ཉིད་ཞིག་པོ་གླིང་པས་དཀོན་མཆོག་འབངས་ཀྱི་ཞལ་སྔ་ནས་གསན་ཏེ་ཐུགས་དམ་དུ་མཛད་པས། ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ཉིད་རྙིང་མ་པ་ཐམས་ཅད་ཡིད་ཆེས་ཤིང་མཐུན་སྣང་འགྲུབ་པའི་ཆོས་སོ། །ཡང་འགོས་ལོ་ཙཱ་བ་ཁུག་པ་ལྷ་བཙན་དང་། འབྲི་ཁུང་ལོ་ཙཱ་བ་དཔལ་འཛིན་བཟང་པོ་དང་། མཁས་གྲུབ་ཆོས་རྗེ་དགེ་ལེགས་དཔལ་བཟང་པོ་རྣམས་ཀྱིས་རྙིང་མ་དང་གཏེར་མའི་ཆོས་ལ། རྒྱ་འགྲེལ་རྣམས་སུ་
མིང་ཙམ་མ་གྲགས་པའི་ཕྱིར་དང་། སྔགས་དང་རྒྱ་སྐད་ལ་བོད་སྐད་དང་བོད་ཡིག་འདྲེས་པ་དང་། གསར་མ་དང་མི་མཚུངས་པའི་ཆོས་སྐད་མང་པོ་གདའ་བ་དང་། ཡི་༧གེ་བཏགས་པས་སངས་རྒྱས་ཟེར་བ་དང་། རིལ་བུས་སངས་རྒྱས་ཟེར་བ་དང་། ཐུབ་པ་དྲུག་རྫོགས་པའི་སངས་རྒྱས་ཡིན་ཟེར་བ་དང་། སེམས་གློ་བའི་ནང་དུ་ཡོད་ཟེར་བ་དང་། རྩོམ་ལུགས་ལ་བླུན་ཚིག་འདྲེས་པ་དང་། མིག་བཙིར་བས་ལྷ་མཐོང་བ་དང་། དེ་སོགས་སྙད་དུ་མ་བཏགས་ནས་རྙིང་མ་དང་གཏེར་མའི་ཆོས་ཆོས་མིན་དང་། བཀའ་མིན་དུ་བསྒྲུབས་ཏེ་མཁས་གྲུབ་ཆོས་རྗེས་མདོར་ན་བོན་དང་རྙིང་མས་མ་བསླད་པའི་ཆོས་གཅིག་དགོས་གསུངས་པ་དང་། དཔལ་འཛིན་བཟང་པོས་བོད་དུ་ཡང་ཆོས་ཡིན་པར་ཡིད་ཆེས་པ་ལ་སངས་རྒྱས་ཀྱི་གསུང་ངོ་ཤེས་པ་དང་། ཤཾ་བྷ་ལ་ཨོ་རྒྱན་རྒྱ་གར་ལ་སོགས་པའི་མཁས་གྲུབ་སངས་རྒྱས་ཀྱིས་ལུང་བསྟན་ཐོས་པས་མཛད་ངོ་ཤེས་པ་དང་། ལོ་པཎ་གྱིས་བསྒྱུར་ངོ་ཤེས་པ་དང་། ཚིག་དོན་ལ་མཁས་པ་དཔྱད་བཟོད་པ་ཞིག་དགོས་གསུངས། འགོས་དང་ས་པཎ་བུ་སྟོན་སོགས་མཁས་གྲུབ་ཀྱིས་བཞེད་པ་ཡང་དེ་ལྟ་བུ་ཞིག་ཡིན་པར་སྣང་ལ། ཁོང་རྣམས་ཀྱིས་བཞེད་པ་
ཡང་འདི་ལ་ཚང་སྟེ། སྤྱིར་ཐུགས་རྗེ་ཆེན་པོའི་སྒོམ་བཟླས་འདི་ཆོས་ཡིན་པས་བོད་ཐམས་ཅད་ཡིད་ཆེས། བོད་དུ་མཁས་ཤིང་མཁས་པར་གྲགས་པ། སྔོན་གྱི་སྐ་ཅོག་ཞང་གསུམ། བར་དུ་ལོ་ཆེན་རིན་ཆེན་བཟང་པོ། ལོ་ཆུང་ལེགས་པའི་ཤེས་རབ་ཁུ་དབོན། ཕྱིས་ས་པཎ་བུ་སྟོན། གསང་ཕུ་སེང་ཆེན་བརྒྱད། ཙོང་ཁ་པ་དཔོན་སློབ་གསུམ། འཇམ་དབྱངས་ཆེན་པོ་དང་མི་བསྐྱོད་རྡོ་རྗེ།། པདྨ་དཀར་པོ་དང་ཕྱོགས་ལས་རྣམ་རྒྱལ། གཡག་རོང་རྣམ་གཉིས་སོགས་མཁས་པ་ཐམས་ཅད་ཀྱིས་ཀྱང་ཐུགས་རྗེ་ཆེན་པོའི་སྒོམ་བཟླས་ཆོས་ཟབ་མོ་ཡིན་པར་ཞལ་འཆམ། བླུན་པོ་སྡིག་ཆེན་མཚམས་མེད་མཁན་རྣམས་ཀྱིས་ཀྱང་ཡིད་ཆེས་བྱེད་དེ། མ་ཎི་བགྲངས་དོ་བས་བོད་ཐམས་ཅད་ཡིད་ཆེས་པའི་ཆོས་དགོས་ན་འདི་ཡིན། ཨོ་རྒྱན་དང་རྒྱ་གར་གྱི་མཁས་གྲུབ་ལུང་བསྟན་ཐོབ་པས་མཛད་ངོ་ཤེས་པ་ཡང་ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ཡིན་ཏེ། བྱང་ཆུབ་སེམས་དཔའ་རྡོ་རྗེ་སྙིང་པོ་དང་། ཨོ་རྒྱན་རིན་པོ་ཆེ་དང་༔ བྷ་ག་ལའི་ཕག་མོ་དང་། གྲུབ་ཆེན་ཛ་ལེན་དྷ་ར་པ་རྣམས་ཀྱིས་རྒྱ་གཞུང་ཚད་ལྡན་དུ་མ་ད་ལྟ་དངོས་སུ་ཡོད་པ་འདི་ཡིན། སངས་རྒྱས་ཀྱིས་གསུང་ངོ་ཤེས་པ་ཡང་འདི་ཡིན་
ཏེ། སྔ་འགྱུར་མདོ་རྒྱུད་ཉི་ཤུ་རྩ་གཅིག །ཕྱི་འགྱུར་པདྨ་དྲྭ་བ་སོགས་མཐའ་ཡས་པ་ད་ལྟ་དངོས་སུ་ཡོད་པ་འདི་ག་ཡིན། ལོ་པཎ་གྱིས་བསྒྱུར་ངོ་ཤེས་པ་ཡང་འདི་ཡིན་ཏེ། སྔོན་བེ་རོ་ཙཱ་ན་རྒྱལ་བ་མཆོག་དབྱངས་སོགས་དང་། སྲོང་བཙན་དུས་ཐོན་མི་སམ་བྷོ་ཊ། ཕྱིས་ལོ་ཆེན་རིན་ཆེན་བཟང་པོ་སོགས་ཀྱིས་བསྒྱུར་བ་འདི་ཡིན། ཚིག་དོན་ལ་མཁས་པས་དཔྱད་བཟོད་པ་ཡང་ཐུགས་རྗེ་ཆེན་པོ་རྒྱལ་བ་རྒྱ་མཚོའི་ཆོས་འདི་ཡིན། རྗེ་རང་བྱུང་རྡོ་རྗེ་མི་བསྐྱོད་ཞབས་འཇམ་དབྱངས་ཆེན་པོ་སོགས་ཀྱིས་དཔྱད་དཔྱད་ཡིག་ཆ་དུ་མ་དང་བསྟོད་བསྔགས་མང་དུ་མཛད། ཁྱད་པར་ཀུན་མཁྱེན་མི་བསྐྱོད་རྡོ་རྗེས་སྐུ་གསུམ་ངོ་སྤྲོད་རྩ་བ་འདི་གཅིག་ལས་མེད་པ་ལ་པོ་ཏི་བཞི་མཛད་དོ། །ས་སྐྱ་པཎྜི་ཏས། བདག་ནི་སངས་རྒྱས་བསྟན་པ་ལ། །མི་ཕྱེད་པ་ཡི་དད་པ་ཡོད། །འོན་ཀྱང་སངས་རྒྱས་བསྟན་པ་ལ། །འཁྲུལ་པར་སྤྱོད་ལ་བདག་མ་དད། །ཅེས་དང་། མདོ་མིན་མདོ་འདྲ་མང་པོ་དང་། །རྒྱུད་མིན་རྒྱུད་འདྲ་མང་པོ་དང་། །ཚུལ་མིན་བསྟན་བཅོས་མང་པོ་དང་། །ཞེས་སོགས། གཞན་ཡང་གསང་སྔགས་གསར་རྙིང་ལའང་། བོད་ཀྱིས་སྦྱར་བའི་རྒྱུད་སྡེ་མང་། །དེ་འདྲའི་
རང་བཟོའི་མདོ་རྒྱུད་ལ། །མཁས་པས་ཡིད་བརྟན་མི་བྱའོ། །ཞེས་སོགས་སྡོམ་གསུམ་རབ་དབྱེ་དང་། ཐུབ་པ་དགོངས་གསལ་དང་། ཕྱོགས་བཅུའི་སྤྲིང་ཡིག་རྣམས་ནས། དངོས་སམ་ཤུགས་ཀྱིས་བོད་དུ་དར་བའི་གསར་རྙིང་གི་མདོ་རྒྱུད་དུ་མ་བཀག་པར་མཛད་ཀྱང་། ཐུགས་རྗེ་ཆེན་པོ་རྒྱལ་བ་རྒྱ་མཚོ་ལ་ནི་དངོས་ཤུགས་གང་ནས་བཀག་པ་མི་སྣང་ལ། ལྷག་པར་པདྨ་ཟབ་པའི་རྒྱུད་དང་པདྨ་རྒྱལ་པོའི་རྒྱུད་གཉིས། པདྨ་དྲྭ་བ་སོགས་རྒྱུད་དང་། དོན་ཡོད་ཞགས་པ་པདྨ་དཀར་པོ་ཟ་མ་ཏོག་སོགས་འདི་དག་མདོ་རྒྱུད་ཡོངས་སུ་གྲགས་ཤིང་སུས་ཀྱང་སྙད་མ་བཏགས་པར་ཐམས་ཅད་ཀྱི་སྤྱི་བོར་ཁུར་བ་ཡིན་ལ། ཁྱད་པར་སྔགས་གསར་མ་ཞེས་པའི་དང་པོ་བྱུང་ཁུངས་དེ་འདི་ལོ་ཆེན་རིན་ཆེན་བཟང་པོ་སྟེ། མཁས་པའི་ཡོན་ཏན་ལ་ཇོ་བོ་རྗེས་ཀྱང་བོད་ཀྱི་པཎྜི་ཏ་ཕ་ལ་ཕ་ལ། ཁྱེད་ལྟ་བུ་བཞུགས་པས་ན་ང་ཡང་བོད་དུ་འོང་དགོས་པ་མི་འདུག་པར་གསུངས། གྲུབ་པའི་ཡོན་ཏན་ལུས་མ་སྤངས་པར་མཁའ་སྤྱོད་དུ་བྱོན། ནུས་པའི་ཡོན་ཏན་གྱིས་ཀླུ་དཀར་རྒྱལ་བཏུལ། ཁོང་གསར་མ་ཐམས་ཅད་ཀྱི་གཙུག་གི་ནོར་བུ་ཡིན་པ་ལས། ཁོང་གིས་རྒྱ་གར་ཁ་ཆེ་སོགས་ནས་པཎྜི་ཏ་མང་པོ་སྔ་ཕྱི་དུ་མར་སྤྱན་དྲངས་
ནས། ལྷ་བཙན་པོ་ཞི་བ་འོད་ཁུ་དབོན་གྱིས་ཡོན་བདག་མཛད་ནས། སྔགས་མཚན་ཉིད་མང་དུ་བསྒྱུར་ཞིང་ཁྱད་པར་པདྨ་ཟབ་པའི་རྒྱུད་འདི་ཉིད་རྒྱ་གར་གྱི་མཁན་པོ་ཆོས་ཀྱི་སྙིང་པོ་དང་། བོད་ཀྱི་ལོ་ཙཱ་བ་རིན་ཆེན་བཟང་པོས་མངའ་རིས་སུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཞེས་གསུངས་སོ། །པདྨ་ཟབ་པའི་རྒྱུད་འདི་ཡང་རྒྱ་གར་གྱི་མཁན་པོ་ཨ་མོ་གྷ་རཀྟི་དང་། ལོ་ཙཱ་བ་རིན་ཆེན་བཟང་པོས་མངའ་རིས་སུ་བསྒྱུར་ཏེ་གཏན་ལ་ཕབ་པའོ། །ཞེས་གསུངས་སོ། །དེས་ན་ལོ་ཙཱ་བ་རིན་ཆེན་བཟང་པོས་བསྒྱུར་བའི་ཆོས་ལ་ཐེ་ཚོམ་བྱེད་མཁན་ནི་མི་སྲིད་དོ། །དེ་ནས་ལྷ་ལྔའི་རྒྱ་གཞུང་བྱང་ཆུབ་སེམས་དཔའ་རྡོ་རྗེ་སྙིང་པོས་མཛད་དེ། རྡོ་རྗེ་སྙིང་པོ་ནི། རིག་འཛིན་རྡོ་རྗེ་ཆོས་ཞེས་བྱ་བ་རྙིང་མའི་ལུགས་ཨོ་རྒྱན་རིན་པོ་ཆེའི་བླ་མ་ཡིན། གསར་མ་ལྟར་བརྟག་གཉིས་སོགས་རྒྱུད་མང་པོའི་ཞུ་བ་པོ་ཡིན་པས་དེ་ལས་ཁུངས་བཙུན་པ་ཅི་ཞིག་ཡོད། རྒྱལ་བ་རྒྱ་མཚོའི་སྒྲུབ་ཐབས་གཞུང་འཇིགས་བྱེད་ཆེན་པོ་སྒོམ་བརྒྱུད་ཀྱི་སྐོར་སོགས་ནི་གྲུབ་པའི་རྒྱལ་མོས་མཛད་དེ། གྲུབ་པའི་རྒྱལ་མོའི་ཚེ་སྒྲུབ་སོགས་ད་ལྟ་བོད་ཡུལ་དུ་གྲུབ་མཐའ་ཕྱོགས་རིས་མེད་པར་ཉམས་སུ་བླང་བྱ་ཡིན་པས་
ཁུངས་བཙུན་ཞིང་། ཏི་ཕུ་པས་རས་ཆུང་བ་ལ་གནང་སྟེ། རས་ཆུང་བས་རྒྱ་གར་ཕལ་སྐད་ནི། ཕྱག་བཞི་པའི་སྤྲུལ་པ་ཨ་ཙ་ར་གཅིག་གིས་བསླབས་པས་ཤེས་ཤིང་དབང་ལུང་ལ་ལོ་ཙཱ་མི་དགོས་ལ། ལེགས་སྦྱར་སྐད་དང་སྒྲ་ཡིག་མཁས་པ་མི་མཁྱེན་པས། ཆོས་ལོ་ཙཱ་བ་འགོས་ལོ་དང་རྨ་ལོ་གཉིས་ལ་གསེར་བྱིན་ནས་བསྒྱུར་བཅུག་ཀྱང་ཕྲག་དོག་གིས་ཐད་ལ་མ་བསྒྱུར་བ་ཏི་ཕུས་མཁྱེན་ནས་ལམ་དུ་མཁའ་འགྲོ་མ་གཅིག་གིས་མ་དག་པ་སེལ་བར་ལུང་བསྟན་པ་ལྟར། བལ་པོ་བྷ་རོ་མས་ཞུ་དག་མཛད་ནས་གནང་། སླར་ཡང་རྗེ་མི་ལས་མུ་སྟེགས་ཀྱི་ངན་སྔགས་སོགས་ཆོས་མིན་ཐམས་ཅད་ཚིག་ཅིག །ཆོས་རྣམ་དག་ཐམས་ཅད་མཁའ་འགྲོ་མས་བྲག་གསེབ་ཏུ་གདན་དྲོངས་ཤིག་གསུངས་ནས། དཔེ་བུམ་མེའི་ནང་དུ་བྱོལ་པས། རྒྱལ་བ་རྒྱ་མཚོའི་ཚེ་སྒྲུབ་ལུས་མེད་མཁའ་འགྲོའི་ཆོས་སོགས་མཁའ་འགྲོས་གདན་དྲངས། ངན་སྔགས་དང་ཆོས་མིན་ཐམས་ཅད་ཚིག་ནས། ཆོས་ཡིན་ངེས་ཐམས་ཅད་རས་ཆུང་བའི་པང་དུ་བབས་སོ། །དེ་ལྟར་དང་པོ་ལོ་ཙཱ་བ་གཅིག་གིས་མ་བསྒྱུར་བ་གཅིག་གིས་དག་སྟེར། མཁའ་འགྲོ་མའི་ཞུ་དག །མི་ལའི་བདེན་སྟོབས་ཀྱིས་ཞུ་དག་དང་གསུམ་སོང་བས་རྒྱལ་བ་རྒྱ་
མཚོའི་ཆོས་འདི་ལ་ལོ་ཙཱ་བའི་ཚིག་ལྷད་སོགས་མ་དག་པའི་ཆ་མེད་ངེས་པའོ། །ཡང་བྷ་ག་ལའི་ཕག་མོས་ཏ་ལའི་ལོ་མ་ལ་མཁའ་འགྲོའི་བརྡ་ཡིག་སུ་བཀོད་ནས་རས་ཆུང་བ་ལ་གནང་བ་དེ་ཕྱིས་གཉན་ཆུང་ལོ་ཙཱ་བས་བསྒྱུར་རོ། །གཉན་ཆུང་ལོ་ཙཱ་བ་ཡང་སྒྲ་དང་ཐ་སྙད་ལ་མཁས་པ་ཞིག་གོ །ཡང་བལ་པོ་མཉྫ་ཤིས་རྒྱལ་བ་རྒྱ་མཚོ་སྦ་ལྕག་མའི་སྐོར་རྒྱལ་པོ་སྲོང་བཙན་ལ་གནང་བ་ཐོན་མི་སམ་བྷོ་ཊས་བསྒྱུར་ཏེ། ཐོན་མི་ལོ་ཙཱ་བ་ཐམས་ཅད་ཀྱི་སྤྱི་མེས་ཆེན་པོ་ཡིན་ནོ། །ཨོ་རྒྱན་གྱིས་མཛད་པའི་སྐོར་ལ་ནི་སྒྲ་རང་བསྒྱུར་དུ་གསུངས། ལ་|ལ་བེ་རོ་དང་རྒྱལ་བ་མཆོག་དབྱངས་ཇོ་མོ་མཁར་ཆེན་སོགས་ཀྱིས་བསྒྱུར་རོ། །ཁྱད་པར་དུ་ཡང་ལྷ་དགུ་ནི་ཁུངས་བཙུན་ཏེ། པཎྜི་ཏ་རྡོ་རྗེ་གདན་པ་དང་བལ་པོ་པཎྜི་ཏ་ཐུགས་རྗེ་ཆེན་པོ་གཉིས་གསུང་མཐུན་པར། རྡོ་རྗེ་ཕག་མོས་བྱིན་གྱིས་བརླབས། །རྒྱུད་སྡེ་བཞིའི་དགོངས་པར་མཁས། །ཛ་ལེན་དྷ་ར་ཞེས་བྱ་བའི། །བླ་མ་དེ་ལ་ཕྱག་འཚལ་ལོ། །ཞེས་བསྟོད་བསྔགས་མཛད་པ་ཡོངས་སུ་གྲགས་པའི་གྲུབ་ཆེན་དེས་མཛད་པས་མཛད་མཁན་བཟང་། མངའ་བདག་མེ་ཏྲིའི་སློབ་མ་རང་དང་མཉམ་པ་བཞིའི་ཡ་གྱལ། རྒྱ་བལ་ཐམས་ཅད་དུ་གྲགས་
ཆེ་བའི་པཎྜི་ཏ་བཛྲ་པཱ་ཎི་དང་། བོད་ཀྱི་ལོ་ཙཱ་བ་འབྲོག་ཤེས་རབ་གྲགས་པ་ཞེས་དཔལ་དུས་ཀྱི་འཁོར་ལོ་བོད་དུ་བསྒྱུར་ནས། སྦྱོར་དྲུག་སོགས་དར་བར་མཛད་མཁན། ད་ལྟ་བོད་ཀྱི་དུས་འཁོར་བ་ཐམས་ཅད་ཀྱི་ཆོས་ཕུག་ཏུ་གྱུར་པའི་ལོ་ཙཱ་བ་དེས་བསྒྱུར་བས། བསྒྱུར་མཁན་གྱི་ལོ་པཎ་ཤིན་ཏུ་ཁམས་ཆེ་བ་ཡིན་པས་ཐེ་ཚོམ་མེད་དོ། །དཔེ་ཡང་མངའ་བདག་མེ་ཏྲི་པའི་རྒྱ་དཔེ་ལས་བསྒྱུར་བས་ཁུངས་བཙུན། འདིའི་དབང་ལུང་གི་རྒྱུན་ཡང་ཏི་ཕུ་པས་ལུང་བསྟན། མི་ལས་བཀའ་གནང་ནས་རས་ཆུང་བས་བལ་པོ་པཎྜི་ཏ་ཨ་སུ་ཞེས་རྒྱ་གར་དུ་ཕྱག་ཆེན་ལ་མཁས་པར་གྲགས་པ་དེ་ལ། བརྒྱ་འབུལ་དང་འབུལ་ཆེན་ལན་གསུམ་བྱས་ནས་བོད་ལྷ་ས་སོགས་སུ་ཞུས་པས་ཡིད་ཆེས་སོ། །རྒྱུད་གཉིས་ཀྱི་ལུང་རྒྱུན་ལྷ་དགུའི་དབང་རྒྱུན་ལུང་དང་བཅས་པ་འདི་ནས་བྱུང་ངོ་། །དེས་ན་མདོ་རྒྱུད་ཚད་ལྡན་ནས་གསུངས་ངེས་པའི་ཆོས་ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ཡིན། གྲུབ་ཆེན་གྱིས་མཛད་ངེས་པ་འདི་ཡིན། ལོ་ཙཱ་བ་ཚད་ལྡན་གྱིས་བསྒྱུར་ངེས་པའི་ཆོས་ཀྱང་འདི་ཡིན་ནོ། །སུས་ཀྱང་བཅོས་མ་བརྒྱབ་ཆོས་ལོགས་སུ་མ་བསྒྲུབས་པ་ཡང་འདི་ཡིན་ནོ། །གཞན་ཆོས་གང་ཟབ་ཐམས་ཅད་ལ་བཀག་པ་མ་བྱས་པ་
མི་འདུག་སྟེ། ཁ་ཅིག་ནི་བླ་མ་གོང་མའི་གསུང་སྒྲོས་སྙན་སྙན་རྣམས་བསྡུས་ནས་ཞེས་ལམ་འབྲས་བཀག །དེ་བས་ཀྱང་ཁ་ཅིག་གིས་ཨ་ཙ་ར་དམར་པོའི་ཆོས་ལོག་ཅེས་སྐུར་པ་ཆེན་པོ་འདེབས་པ་ཐོས་ཏེ། ཨ་ཙ་ར་དམར་པོ་དང་། ཐ་དྷ་ཀཱ་ར་ཝརྨ་དང་། ག་ཡ་དྷ་ར་གསུམ་སྐུ་གཅིག་མཚན་གྱི་རྣམ་གྲངས་ཏེ། བོད་དུ་ལན་གསུམ་ཕེབས་པ་ལ་མཚན་གསུམ་དུ་གྲགས་པ་ཡིན་པར་ཡོ་གའི་བཤད་པ་རྣམས་ནས་བྱུང་ཞིང་། བཀའ་གདམས་བུ་ཆོས་ནས་རྒྱལ་བུ་སེང་གེ་སྒྲའི་སྐྱེས་རབས་ལས། སྔོན་གྲོང་ཁྱེར་རྩྭ་མཆོག་ཏུ་རྔོག་ཆོས་རྒྱལ་དཔའ་བོ་དང་། འབྲོམ་རྒྱལ་བུ་སེང་གེ་སྒྲར་སྐྱེས་དུས། ལན་གཅིག་བོད་ཀྱི་ཡུལ་དུ་ལོག་པའི་དབང་སྡུད་མཁན་ཨ་ཙ་ར་དམར་པོ་ཞེས་བྱ་བ་འདི་རི་དྭགས་ཁོ་ན་གསོད་པའི་སྡིག་རྒྱལ་སྤྱོད་མེད་བྱ་བར་སྐྱེས་ཏེ། དེར་འབྲོམ་རྒྱལ་བུ་སེང་གེ་སྒྲར་གྱུར་པས་སྟོབས་དང་རྫུ་འཕྲུལ་སྣ་ཚོགས་ཀྱིས་སྡིག་རྒྱལ་དེ་ཕམ་པར་བྱས་ཀྱང་སྲོག་དང་མ་བྲལ་བ་ལ། ཡབ་ཀྱིས་དེ་མ་བསྒྲལ་བ་མ་ལེགས། ཕྱི་རབས་མཐའ་འཁོབ་བླུན་པོའི་ཡུལ་དུ་ཆོས་ལ་སྙད་བཏགས་ནས་སེམས་ཅན་ཉོན་མོངས་ཅན་ལ་འདོད་ཡོན་གྱིས་ཆོས་བསྟན་ནས། ཚུལ་ཁྲིམས་ཀྱི་མེ་ཏོག་ལ་
སད་བརྡེག །ཐོས་བསམ་གྱིས་ལོ་ཏོག་སེར་བས་བརྡེག །ཅེས་སོགས་ལུང་བསྟན་ལོ་རྒྱུས་རྒྱས་པར་གསུངས་ཏེ། ཇོ་འབྲོམ་རྔོག་གསུམ་དང་དུས་མཚུངས་ཏེ། ཨ་ཙ་ར་དམར་པོས་ཆགས་ལམ་བསྟེན་པས་སེར་ཁྱིམ་པ་དར་ནས་བཀའ་གདམས་བསྟན་པ་ལ་གནོད་པ་བྱུང་སྐད་ཅིང་། ཕྱག་ཆེན་ཐིག་ལེ་ར་ལི་ཉེར་བཞི་ཡེ་ཤེས་ཐིག་ལེ་སོགས་ག་ཡ་དྷ་རའམ། ཨ་ཙ་ར་དམར་པོའི་བརྩམ་ཆོས་རྒྱུད་དང་བརྫུས་མར་འགའ་ཞིག་གིས་བྱེད། ས་ལུགས་པས་རྣམ་དག་ཏུ་བྱེད་ནས་བརྟག་གཉིས་བཤད་སྲོལ། དེ་དག་ནས་ལུང་འདྲེན་པ་དང་། བཀའ་བརྒྱུད་པའི་ཕྱག་ཆེན་ཕག་མོ་བདེ་མཆོག་དགོངས་གཅིག་སོགས་ས་པཎྜི་ཏས་བཀག་ནས། ཕྱག་ཆེན་འདི་སེམས་ཙམ་ལུགས་ཡིན་ཕྱག་ཆེན་མིན་པར་གསུངས། ཕྱག་རྒྱ་ཆེན་པོ་གཅིག་ཆོད་ལ། །ས་ལམ་བརྩི་བ་རྨོངས་པ་འཁྲུལ། །ཞེས་སོགས་ཚིག་རྣམས་སྨྲ་བ་ནི། །བདུད་ཚིག་ཡིན་པས་རྣ་བ་བཀབ། །ཅེས་དང་། ས་སྐྱ་པཎ་ཆེན་ལ་ནམ་མཁའ་འབུམ་གྱིས་ཞུས་པར། ཚིག་འདི་གཞན་ལ་མི་འཕེལ་བར་གྱིས། གླན་གཏམ་དུ་སོང་ན་འབྲི་སྟག་དང་ཕྱག་ཆེན་པའི་ཆོས་ལུགས་འདི། རྒྱུད་སྡེ་བཞི། སྡེ་སྣོད་གསུམ་གང་དང་ཡང་མི་མཐུན་པར་
སྣང་བས་ཡང་དག་པའི་ལམ་མ་ལགས་སམ། སྙམ་གསུངས་སྐད་པ་དང་། རྗེ་མི་ལས། བོད་ངན་པའི་སྙིང་ལ་འདྲེ་ཞུགས་ནས། ཇོ་བོ་རྗེ་ཨ་ཏི་ཤ་ལ་གསང་སྔགས་འཆད་མ་བཅུག་པས། མི་མང་པོ་ཕུང་། ཞེས་སོགས་དང་། ཁྱེད་བཀའ་གདམས་པས། ཉེས་པ་མེད་པ་ཞིག་ལ་ཡོད་སྨྲ། ཡོད་པ་ལ་མི་འཛེམ་ཞེས་དང་། དམ་པ་དང་ས་པཎ་ཡང་བཀའ་གདམས་ལ་བསྐྱོན་པ་ཆེན་པོ་མཛད། །དམ་པ་ཞི་བྱེད་གཅོད་ཡུལ་རྣམས་ཚག་ལོས་བཀག་སྟེ། ཆུ་ཀླུང་རོལ་པའི་རྒྱུད་ཀྱིས་སྐད་དོད་མི་ཤེས་པ་དང་། ལྷ་མེད་པའི་ངག་རྒྱུད་དང་ཡོད་ཚུལ་གསུངས་པ་དང་། ཞི་བྱེད་ཐམས་ཅད་ཇོ་སྲས་རྟེན་བེ་དང་ཞིག་པོ་ཉི་སེང་གིས་བྱས་པའི་ཆོས་ལོག་ཡིན་ཞེས་གསུངས་ཤིང་། ཁ་ཅིག་རྙིང་མ་གཏེར་མ་ཞི་བྱེད་དང་། །ཞེས་སྒྲོན་གསལ་ཆགས་འགྱུར་གསུམ་དུ་བཀག །ཁ་ཅིག་གིས་མ་ཇོ་སྨྱོན་མའི་སྦྱོར་ཆོས་ཡིན། ཞེས་དང་། གཅོད་དང་ཞི་བྱེད་ཐམས་ཅད་ནི། །རྒྱུད་སྡེ་རྣམས་ལས་བཤད་རེ་ཀན། །ཞེས་བཀག །ཁ་ཅིག་གིས། རྩ་བའི་རྒྱུད་ལ་ཨེ་ཝཾ་འདི་གཉིས་མེད། །བསྡུས་པའི་རྒྱུད་ལ་འགལ་བ་དུ་མ་མཐོང་། །གང་ནས་བླངས་བའི་ཁུངས་ཀྱང་མི་སྣང་
བ། །འཕྱོན་མའི་བུ་བཞིན་འདི་ལ་སུ་ཡིད་གཏོད། །ཅེས་དང་། ཁྱོད་ཀྱིས་འདི་ལ་ལན་བྱེད་ཚད་མ་མེད། །ཆེན་པོ་རྣམས་ལ་ཚད་མར་མ་གྲགས་ཕྱིར། །དུས་ཞབས་ལ་སོགས་ཚད་མའི་སྐྱེས་བུ་མིན། །ཞེས་དང་། སྦྱོར་བ་ཡན་ལག་དྲུག་གི་ཁྲིད་རིམ་ཡང་། །གསང་བ་འདུས་པའི་རྒྱུད་དང་འགལ་བར་སྣང་། །དེ་དོན་ཉམས་སུ་བླངས་པས་སུ་ཞིག་གྲོལ། །ཞེས་གསུངས་ནས། དུས་འཁོར་རྒྱུད་འགྲེལ་སྦྱོར་དྲུག་དང་བཅས་པ་བཀག་པ་དང་། ཡང་ཁ་ཅིག་གིས། ཞི་ཕྱག་རྫོགས་གསུམ་རྫུན་དང་བཞི་བསྲེས་ཀྱིས། །ལ་སྟོད་དམར་པོའི་ཐུགས་ཀྱི་སྙིང་ཁུ་བྱས། །ཞེས་གསུངས་ནས། ཐུགས་རྗེ་ཆེན་པོ་དམར་པོའི་ལུགས་བཀག །མར་པའི་བདེ་མཆོག་སྙན་བརྒྱུད་ཀྱང་བཀག་སྟེ། ས་པཎྜི་ཏས་ཕག་མོ་བརྡའི་དབང་བཞི་བཀག་སྟེ། འགའ་ཞིག་འདི་ལ་ཕག་མགོ་ལ། །སོགས་པའི་དབང་བཞི་ཡོད་ཅེས་ཟེར། །དེ་འདྲའི་དབང་བསྐུར་རྙིང་མ་ཡིན། །རྒྱུད་སྡེ་ཀུན་ལས་འདི་མ་གསུངས། །ཞེས་སོགས་དང་། བཀའ་གདམས་གླེགས་བམ་ནས་རྔོག་ལོ་ཆེན་པོ་ལེགས་པའི་ཤེས་རབ་ཀྱི་ཞལ་ནས། ཆོས་ལུགས་འདི་ཀུན་གཞན་ལ་མེད་པའི་ཆོས་ཟབ་མོ་ཡིན་ཟེར་ནས་རང་ལ་དྲི་མེད་
ཀྱང་རྒྱ་ཆ་ཐམས་ཅད་བསགས་ནས་ཚོགས་འཁོར་ཆེན་པོ་བཏང་སྟེ། དངོས་གཞི་ལ་ཅི་ཡོད་སྙམ་ཙ་ན། རས་དམར་ཙམ་གྱིས་མིག་དཀྲིས། ལག་པའི་མེ་ལོང་གཟུགས་བརྙན་ཙམ་རེ་བཏོན། ཁྱོད་མ་རིག་པའི་བསྒྲིབས་པས་འོད་གསལ་མ་མཐོང་ཞེས་བྱ་བ་ལ་སོགས་པ་བྱིས་སྦའི་རྩེད་མོ་འདྲ་བའི་བརྡ་ཆོས་ཟབ་མོ་རྣམས་ལས་རྒལ་བ་ཙམ་དུ་རྩི་ཞིང་གདའ། ཡང་ངས་བལྟས་ཙ་ན་ཡང་འགལ་གྱིན་གདའ། ལེགས་པ་ཐེག་ཆེན་པའི་ཡང་རྩེ་བར་ཁས་ལེན་ཆོས་བརྡ་ཆོས་ལ་བརྟེན་དུ་མི་བཏུབ། ཐེག་པ་དེ་ནས་མར་ལ་སོང་ནས་མིག་རས་དཀྲིས་པ་འདྲ་བའི་སྒྲིབ་པ་ཞིག་འོང་བའི་ཁྲིམས་ཡོད། ལར་ཆོས་མགོ་འདོན་མཁས་མི་མཁས་ཀྱིས་ཁྱད་པར་དུ་གདའ། ཞེས་སོགས་དང་། འུ་ཅག་ལས་དང་པོ་དམའ་ཤོས་ནའང་ངེས་ངེས་ཏིག་ཏིག་རྗེན་ཆེ་རེ་བ་རེ་ཉམས་སུ་ལེན་ན། ཁོང་ཐེག་ཆེན་པའི་ཡང་རྩེ་དེ་ནས་མར་ལྐུགས་པའི་ལག་བརྡ་བྱེད་པ་དང་འདྲ་བ་ཞིག་འོང་། ཞེས་སོགས་གསུངས་ནས། སྙན་བརྒྱུད་སྐོར་གསུམ་སོགས་ཤུགས་ཀྱིས་བཀག་པ་དང་། ཉ་ཀུན་དགས། དྭགས་པོའི་ཕྱག་ཆེན་སེམས་ཁྲིད་དང་། མཚལ་པའི་ཐབས་ལམ་གཏུམ་མོ་རྣམས་དང་། གཞན་ཡང་
གདམས་པ་ཕལ་མོ་ཆེ་ཐམས་ཅད་བཀག །མར་པ་ལོ་ཙཱས་ཀྱང་རྫོགས་ཆེན་ལ་བསྐྱོན་ཞིང་འདི་ས་བརྒྱད་པ་ཡན་གྱི་ཉམས་ལེན་ཡིན། ད་ལྟ་མི་ཀུན་རྫོགས་ཆེན་ཡིན་སྨྲ་བ། བྱིས་པ་ལོ་གསུམ་ལོན་པ་གཅིག་གིས་ལོ་ཉི་ཤུ་པའི་དཔའ་རྩལ་ཡོད་སྨྲ་བ་དང་འདྲ་གསུངས་པ་དང་། རྗེ་མི་བསྐྱོད་རྡོ་རྗེས་དགོངས་གཅིག་གི་རྣམ་བཤད་དུ། དེང་སང་གསང་སྔགས་རྙིང་མར་གྲགས་པ་ཡིས། །བཅོམ་ལྡན་ཤཱཀ་ཐུབ་སྟོན་པར་མི་བྱེད་ཅིང་། །བྱང་ཆུབ་ཕྱོགས་ཀྱི་ཆོས་ཀུན་མི་བརྟེན་པར། །བསླབ་པ་གསུམ་གྱི་རིམ་པ་གང་ཡང་མེད། །འཕགས་པའི་བདེན་པ་བཞི་ཡི་རྣམ་བཞག་ཉམས། །ཞི་གནས་ལྷག་མཐོང་རིམ་པ་ཅི་ཡང་མེད། །རང་བཟོས་ལྷ་འགའི་མངོན་རྟོགས་ཕྲེང་རེ་དང་། །ཅང་མེད་སྟོང་བསྒོམ་མུན་མཚམས་བཅད་པ་ནས། །མིག་གི་འཁྲུལ་སྣང་ཤར་ཚེ་འོད་གསལ་གྱི། །ངོ་བོ་ཡིན་ཞེས་དེ་ཡི་ངང་ཉིད་དུ། །གྲོལ་ནས་སྐུ་དང་ཡེ་ཤེས་འབྱུང་བའི་ཕྱིར། །བར་དོའི་གནས་སུ་ཞི་ཁྲོར་འཚང་རྒྱ་ཞེས། །སྨྲ་བ་འདི་ཀུན་ལ་ཡང་དོགས་པ་སྐྱེས། །ཐར་པ་འདོད་པ་རྣམས་ཀྱིས་ཟོན་ཅིག་འཚལ། །མགོ་གཡོག་མགོ་སྐོར་གར་ཡོད་མི་ཤེས་པས། །ཇི་བཞིན་སྤྱོད་པའི་ཤེས་རབ་མེད་པ་ཀུན། །
དོན་མེད་གནས་སུ་འཇུག་ཉེན་ཆེ་བར་སྣང་། །ཞེས་གསུངས་པ་དང་། མཁས་གྲུབ་རྗེས། བོད་ཀྱི་རྨོངས་ཚིག་མང་པོ་ཞིག་གིས་བར་བར་དུ་རྦད་དང་རྡུད་ལ་སོགས་པ་རེ་རེ་ཙམ་དུ་བཅུག་པ་སྲོག་ཧབ་ཤ་རྦད་དང་། སྙིང་སྲོག་ཤག་བཀུག་གཞུག་ལ་སོགས་པ་མང་པོ་ཞིག་བྲིས་ཤིང་། བོད་ཀྱིས་གུ་རུ་པ་ཁོ་ནའི་སྔགས་སུ་ཀུན་ལ་རླུང་ལྟར་གྲགས་པའི་ཨ་རྩིག་ནེར་རྩིག་ལ་སོགས་པ་སོར་བཞག་བྲིས་ནས་རྒྱ་གཞུང་རྣམ་དག་ནས་བཤད་པའི་སྔགས་སུ་སྨྲ་བར་འདུག་པས། དེ་འདྲ་བ་ལ་རྣམ་དཔྱོད་དང་ལྡན་པ་སུ་ཞིག་ཡིད་བརྟན་བྱེད། ཅེས་སོགས་གསུངས་པས། རྙིང་མ་གཏེར་མ་རྣམས་དངོས་ཤུགས་ཀྱིས་བཀག་ཅིང་། ཤང་པའི་ཐུགས་རྗེ་ཆེན་པོ་རྒྱན་ཅན་བཅུ་གཅིག་ཞལ་གྱི་སྒྲུབ་བསྐོར་མཐའ་ཡས་པ་ཐམས་ཅད་མཁས་གྲུབ་རྗེས་བཀག་པར་མཛད། ཐམས་ཅད་མཁྱེན་པ་མི་བསྐྱོད་རྡོ་རྗེས། ཆོས་ཀྱི་རྒྱལ་པོ་རྒྱལ་བ་ཙོང་ཁ་པས། །ཐེག་ཆེན་དགོངས་དོན་ཟབ་མོའི་དབུ་མའི་སྲོལ། །ཟླ་གྲགས་བཞེད་པའི་ཐལ་འགྱུར་ལུགས་བཟང་པོ། །བཀག་ནས་ཐལ་འགྱུར་ལུགས་མཆོག་གསར་དུ་བརྩམས། །རྒྱུད་སྡེ་མཐར་ཐུག་གསང་བ་འདུས་པ་ལས། །འཕགས་པ་ཡབ་སྲས་བཞེད་པའི་རིམ་
གཉིས་ཚུལ། །བཀག་ནས་འདུས་པ་འཕགས་ལུགས་སྔོན་མེད་པས། །གངས་རིའི་ཁྲོད་འདིར་ཉིན་ལྟར་སྣང་བར་བྱས། །ཁྱད་པར་དཔལ་ལྡན་འདུས་པ་རིམ་ལྔ་ཡི། །མར་འགོས་མན་ངག་རྙིང་པ་ཀུན་བཀག་ནས། །རིམ་ལྔ་མར་འགོས་ལུགས་མཆོག་ཟླ་མེད་ཅིང་། །འཇམ་དབྱངས་བཤེས་དང་བཅས་ཏེ་སྨྲ་བར་བྱེད། །དྭགས་པོ་ནས་བརྒྱུད་ནཱ་རོ་ཆོས་དྲུག་པོ། །འཆད་ཚེ་ཕག་གྲུ་འབྲི་གུང་པ་སོགས་ཀྱིས། །ནཱ་རོ་ཆོས་དྲུག་བཀག་ནས་ནཱ་རོའི་ལུགས། །འཁྲུལ་མེད་འདི་ཞེས་ཆོས་དྲུག་རྨད་བྱུང་སྟོན། །རྡོ་རྗེ་འཇིགས་བྱེད་པ་དང་ར་ལུགས་ཀྱི། །མན་ངག་ཐམས་ཅད་ལེགས་པར་བཀག་མཛད་པས། །སླར་ཡང་རྡོ་རྗེ་འཇིགས་བྱེད་ར་ལོ་ཡི། །བཞེད་པ་འདི་ཞེས་སྔོན་མེད་རྒྱ་ཆེར་སྤེལ། །ནེ་གུའི་བཀའ་སྲུང་ཕྱག་དྲུག་མགོན་པོ་ཡི། །སྒྲུབ་ཐབས་རིན་ཆེན་རྣམ་བདུན་གྱིས་མཛད་ཀུན། །བོན་དང་རྙིང་མའི་ཆོས་ལྟར་ལེགས་བཀག་ནས། །ཕྱག་དྲུག་མགོན་པོའི་སྒྲུབ་ཐབས་གསར་དུ་སྤེལ། །གསུང་རབ་ཀུན་གྱི་དགོངས་པ་འགྲེལ་པ་ན། །སྔོན་བྱུང་ལེགས་བཤད་ཐམས་ཅད་མིང་ཙམ་ཡང་། །འཐད་པ་བྲལ་བའི་ལུང་རིགས་དུ་མ་ཡིས། །བསྒྲུབས་ནས་རང་ལུགས་ཐུན་མོང་
མིན་པ་ནི། །ཕྱག་ཆེན་འདོད་པའི་སྐྱེས་མཆོག་ཙོང་ཁ་པ། །ཁྱེད་ཀྱིས་བསྟན་པ་རྒྱ་ཆེར་འཛིན་རྣམས་ཀྱང་། །ཐར་པའི་ཁྱེད་ཀྱིས་ལམ་མཆོག་བསྒྲུབ་སླད་དུ། །རང་གཞན་ལུགས་ལ་གཅིག་ཏུ་འཁྲུལ་མེད་བྱོས། །ཞེས་གསུངས་ཤིང་། ཀུན་མཁྱེན་རོང་པོ་དང་གོ་རམ་པ་ཤཱཀྱ་མཆོག་ལྡན་རྣམས་ཀྱིས་རྗེ་རིན་པོ་ཆེ་ཙོང་ཁ་པའི་ལྟ་གྲུབ་བསྐྱེད་རྫོགས་ཐམས་ཅད་ཤིན་ཏུ་བཀག་པ་རྒྱ་ཆེར་མཛད་དེ། དེ་དག་གི་གསུང་རབ་ལས་གསལ་ལོ། །དེ་བཞིན་དུ་སྒོམ་སྒྲུབ་པ་རྣམས་མཚན་ཉིད་བཤད་སྒྲུབ་རྣམས་ལ་དག་པ་མི་སྟེར་ཏེ། སྔར་རྒྱ་བོད་ཚད་མ་དང་རྩོད་པ་ཡོད་ཀྱང་། བསྡུས་ར་ཟེར་བ་མེད་བསྡུས་ར་ནི་གསང་ཕུའི་བླ་མ་ཕྱ་པ་ཆོས་ཀྱི་སེང་གེས་བརྩམས་པ་ཡིན་ཞིང་། བགྲོ་གླེང་དུས་ལག་པ་དང་རྐང་པ་རྡེབ་པ་ཐལ་སྐད་འདོན་པ་ཕར་རྒྱུག་ཚུར་རྒྱུག་བྱེད་པ་ཡང་དུས་ཕྱིས་བླ་མ་དེས་མཛད་པ་ཡིན། ཞེ་སྡང་ཁོང་ཁྲོ་བསླངས་ཤིང་གོས་ལག་གཟན་པ་ལས་དོན་དམ་པར་སྙིང་པོ་ཆེར་མེད་ཟེར་ཏེ། ཁྲོ་ཕུ་ལོ་ཙཱ་བས། བགྲོ་གླེང་ཆོས་ཀྱི་ག་དར་ཡིན་སྙམ་ཡང་། །དེ་ལ་བརྟེན་ནས་ཁོང་ཁྲོ་སྐྱེ་བ་མང་། །སྨྲ་བཅད་བྱེད་པ་ཁོ་བོའི་སྙིང་གཏམ་ཡིན། །ཞེས་གསུངས་ཤིང་། མདོ་སྡེ་ཏིང་འཛིན་
རྒྱལ་པོ་ལས། ཕྱི་མའི་དུས་ན་དགེ་སློང་མང་པོ་དག །བསྐམ་ཞིང་གཏུམ་པ་བསྡམ་པ་འབྱུང་བར་འགྱུར། །སྡིག་ལ་དགའ་ཞིང་ཆོས་གོས་ལྷུང་བཟེད་ཆགས། །ཏིང་འཛིན་འདི་ནི་རབ་ཏུ་སྤངས་བར་འགྱུར། །རྒོད་ཅིང་དབང་པོ་གཡེང་བ་ཕྲག་དོག་ཅན། །གྲོགས་ལ་ཆགས་ཤིང་རྙེད་པ་འདོད་པ་དག །སྦྱོར་བ་བྱེད་པའི་སྐབས་ལ་རྟག་ཏུ་གནས། །ཏིང་འཛིན་འདི་ནི་རབ་ཏུ་སྤངས་བར་འགྱུར། །ལག་པ་དང་ནི་རྐང་པ་རྣམ་པར་རྡེབ། །རྩེད་འཇོ་རྒོད་ལ་རྟག་པར་རབ་ཏུ་ཞུགས། །གཅིག་ལ་གཅིག་གིས་མགུལ་འཁྱུད་ལག་ཀྱང་སྦྲེལ། །གྲོང་དུ་སྤྱོད་ལམ་བཞིན་དུ་འགྱུར་བར་བྱེད། །ཉོ་ཚོང་ལྷག་པར་བྱེད་ཅིང་རྟག་ཏུ་བརྩོན། །སྲང་དང་ཚད་ལ་གཡོ་སྒྱུ་བྱེད་པར་ཞུགས། །དེ་འདྲའི་སྡིག་པའི་ཉོན་མོངས་ལས་བྱས་པས། །ལས་ངན་བྱེད་པ་དེ་དག་ངན་འགྲོར་འགྲོ། །ངས་ནི་སྔོན་ཚེ་སྤྱད་པ་སྤྱོད་པ་ན། །བསྐལ་པ་སྟོང་དུ་ཤིན་ཏུ་དཀའ་སྤྱད་དེ། །ང་ཡི་ཏིང་འཛིན་ཞི་བ་འདི་བཙལ་ན། །དེ་དག་དེ་ཚེ་འདི་ཐོས་གད་མོས་འདེབས། །དེ་དག་ཡུན་རིང་རྫུན་སྨྲ་ཚངས་མི་སྤྱོད། །རྟག་ཏུ་རྙེད་ལ་དགའ་ཞིང་ངན་སོང་གཞོལ། །ཚངས་པར་སྤྱོད་པའི་རྒྱུན་དག་ཐོགས་ནས་ནི། །ཚུལ་ཁྲིམས་
འཆལ་པ་དེ་ནི་ཆོས་མི་སྨྲ། །དེ་དག་ཕན་ཚུན་དབྱེ་བའི་ཕྱིར་འཇུག་སྟེ། །རིག་པ་མ་ཡེངས་པས་ནི་རྙེད་པ་ཚོལ། །གཅིག་ལ་གཅིག་གིས་མི་སྙན་རབ་བརྗོད་དེ། །འཆི་འཕོས་ནས་ནི་ངན་སོང་སར་ཡང་འགྲོ། །དེ་དག་བརྒྱ་དང་སྟོང་གི་ནང་ན་ཡང་། །དེ་ཚེ་བཟོད་པའི་སྟོབས་ལྡན་ཤིན་ཏུ་དཀོན། །དེ་ཕྱིར་འཐབ་ལ་བརྩོན་པ་མང་དུ་འབྱུང་། །བདེ་བར་གཤེགས་པའི་བསྟན་པ་འདི་དྲན་ནས། །དེ་དག་ལ་ནི་ནམ་ཡང་ཡིད་མ་རྟོན། །ཞེས་དང་། །ཚུལ་ཁྲིམས་འཆལ་པ་ཅན་ཚར་གཅོད་པའི་མདོ་ལས། ཤཱ་རིའི་བུ་དེ་ལ་དགེ་སློང་སྨྲ་བ་ལྷུར་ལེན་པ་གང་ཡིན་པ་དག་འབྱུང་བར་འགྱུར་ཏེ། དེ་དག་ཁྱིམ་པ་དེ་དག་དང་དགེ་འདུན་གྱི་ཀུན་དགའ་ར་བར་ཞུགས་ནས་སྟོན་པར་བྱེད་དོ། །རྣམ་པར་རིག་བྱེད་ལ་མཁས་པ། ཡི་གེའི་རྗེས་སུ་འབྲང་བ། ཡོངས་སུ་མ་དག་པའི་ཆོས་སྟོན་པ། ཡོངས་སུ་མ་དག་པའི་ཆོས་བྱེད་པ། གཏམ་ལ་སེམས་པ། འཇིག་རྟེན་པའི་ལམ་དུ་བྱིང་བ། ཏིང་ངེ་འཛིན་མ་ཡིན་པ་ལྷུར་བྱེད་པ་དེ་དག་ནི། ཉིན་པར་རམ་མཚན་མོའམ་ཉིན་མཚན་དུ་རྩོད་པའི་གཏམ་ལ་མངོན་པར་དགའ་ཞིང་། དེ་དག་བསམ་གཏན་ལ་གཞོལ་བའི་སེམས་གཅིག་ཀྱང་
བསྐྱེད་པར་མི་བྱེད་ན། འབྲས་བུ་ཐོབ་པར་བྱེད་པ་ལྟ་སྨོས་ཀྱང་ཅི་དགོས་ཏེ་གནས་མེད་དོ། །དེ་དག་ནི་དམན་པ་མ་དག་པའི་གཏམ་ལ་མངོན་པར་བརྩོན་ཞིང་། ཆོས་གོས་དང་། སོད་སྙོམས་དང་། གནས་མལ་དང་། ནད་ཀྱི་རྐྱེན་སྨན་དང་། ཡོད་བྱད་ཀྱི་རྙེད་པ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་སྐྱེས་བུ་དམ་པ་མ་ཡིན་པ་རྣམས་བསླུ་བའི་ཕྱིར་བདུད་སྡིག་ཅན་མངོན་པར་བརྩོན་པར་བྱེད་དོ། །དེ་དག་ལ་བདུད་སྡིག་ཅན་སྤྲོ་བར་འགྱུར་ཞིང་མངོན་པར་བརྩོན་པར་བྱེད་དོ། །ཞེས་གསུངས་པ་ལ་ཡང་དཔྱད་དོ། །ཡང་མཚན་ཉིད་པ་ཕལ་ཆེར་རྟོགས་ལྡན་ཚེམ་བུ་སྟེ་དགེ་ཚུལ་སློང་ཞུས་ནས་སྒེབ་བེ་ནག་པོ་གྱོན་ནས་ཆོས་པས་གང་གྱོན་ཆོས་གོས་ཡིན་ཟེར་བ་དང་། ལྷགས་སྐྱོབས་སྐྱ་རྣ་བ་ཁེབས་ཙམ་རབ་བྱུང་ཡིན་ཡང་བཞག་ཆོག་ཟེར་བ་དང་། ལོངས་སྤྱོད་ཆེན་པོ་ཡོད་ཀྱང་དཀའ་ཐུབ་བྱེད་པ་དང་། སེམས་ལ་འདོད་པ་ཆེ་ཡང་ངག་ནས་མི་འདོད་ཟེར་བ་སོགས། ཟོབ་ཡིན་ཞེས་སྨྲ་བར་བྱེད་དེ། མདོ་སྡེ་པདྨ་དཀར་པོ་ལས། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བརྒྱད་ཁྲི་ལ་མདོ་སྡེ་གཏད་དེ། བྱང་ཆུབ་སེམས་དཔའ་དེ་དག་མགྲིན་གཅིག་ཏུ་མ་འོངས་པར་མདོ་སྡེ་འཛིན་
པར་དམ་བཅས་ཤིང་། མ་རུངས་སླད་མའི་དུས་ལ་ནི། །ལོག་པའི་གཡོ་དང་གཡོན་པོ་དང་། །བྱིས་པ་གཡོ་དང་ང་རྒྱལ་ཅན། །མ་ཐོབ་ཐོབ་པར་འདུ་ཤེས་པ། །དགོན་པ་དག་ལ་རབ་སེམས་ཤིང་། །ཚེམ་བུ་དག་ཀྱང་བགོས་ནས་ནི། །ཡོ་བྱད་བསྙུང་ཚུལ་སྤྱོད་དོ་ཞེས། །བློ་ངན་དེ་སྐད་སྨྲ་བར་འགྱུར། །རོ་བྲོ་ཆགས་ཤིང་ཞེན་པ་རྣམས། །ཁྱིམ་པ་དག་ལ་ཆོས་ཀྱང་འཆད། །མངོན་ཤེས་དྲུག་ཅན་ཇི་བཞིན་དུ། །བསྟི་སྟང་དག་ཀྱང་བགྱིད་པར་འགྱུར། །གཏུམ་པའི་སེམས་དང་སྡང་སེམས་ལྡན། །ཁྱིམ་དང་ནོར་ལ་རྣམ་པར་སེམས། །དགོན་པ་དབེན་པར་རབ་ཞུགས་ཏེ། །བདག་ཅག་རྣམས་ལ་སྐུར་བ་འདེབས། །བདག་ཅག་ལ་ནི་འདི་སྐད་མཆི། །རྙེད་དང་བཀུར་སྟི་གནས་པ་སྟེ། །དགེ་སློང་འདི་དག་མུ་སྟེགས་ཅན། །བདག་གི་རང་བཟོ་རབ་ཏུ་འཆད། །རྙེད་པ་དང་ནི་བཀུར་སྟི་ཕྱིར། །རང་གི་མདོ་སྡེ་བྱས་ནས་སུ། །འཁོར་གྱི་དབུས་སུ་འཆད་བྱེད་ཅེས། །བདག་ཅག་རྣམས་ལ་ཤིན་ཏུ་འཕྱ། །རྒྱལ་པོ་དང་ནི་རྒྱལ་བུ་དང་། །དེ་བཞིན་རྒྱལ་པོ་བློན་པོ་དང་། །བྲམ་ཟེ་དག་དང་ཁྱིམ་བདག་དང་། །དགེ་སློང་གཞན་དག་དྲུང་དུ་ནི། །བདག་ཅག་
རྣམས་ལ་མི་བསྔགས་བརྗོད། །མུ་སྟེགས་ཅན་ཞེས་ཚིག་ཀྱང་བརྗོད། །དྲང་སྲོང་ཆེ་ལ་གུས་པས་ནི། །ཐམས་ཅད་བདག་ཅག་བཟོད་པར་བགྱིད། །ཅེས་གསུངས་པ་དང་། རྗེ་དཀོན་མཆོག་འབངས་ཀྱིས། རབ་བྱུང་གིས་མཆོངས་རྒྱུག་དང་ཀ་པཱ་ལ་ཐོགས་པ། རྐང་དུང་དྲག་འབུད་བྱེད་པ་བཀག་ཅིང་། གཞན་མཁས་པ་མང་པོས་ཀྱང་རབ་ཏུ་བྱུང་ནས་སྐྲ་ཨར་དབད་དང་གོས་སྒེབ་བེ་ནག་པོ་སོགས་བཀག་གོ །དེས་ན་སྒྲུབ་བརྒྱུད་འདི་པས་རབ་བྱུང་ཆས་ཁོ་ན་མཛད་དོ། །དེ་ལྟར་མདོ་སྡེ་གཉིས་ཀ་ནས་ལུང་བསྟན་པའི་སྐྱོན་དེ་དག་ཆོས་འདི་ལ་མི་འཇུག་གོ །དེ་བཞིན་དུ་བརྒྱུད་པ་གཙང་མི་གཙང་དང་། ལྟ་བ་བཟང་ངན་ལ་རང་རང་གི་ལུགས་བསྟོད་ཅིང་། གཞན་ལུགས་སུན་འབྱིན་པ་བོད་ཀྱི་མཁས་བླུན་ཐམས་ཅད་བྱེད་ཚུལ་འདྲ་བར་འདུག་ནའང་། ཕྱོགས་གཞན་གྱི་ཕོ་རུས་སྤངས་ནས། རང་གི་ནམ་བཞག་གཏན་སྲིད་ཡིན་པས། མདོ་རྒྱུད་ཀྱི་ལུང་བསྟན་རྣམས་དང་། ཁྱད་པར་སྣང་སྲིད་གསལ་བར་མཁྱེན་ངེས་པ་ཨོ་རྒྱན་ཆེན་པོའི་གཏེར་ལུང་ཐམས་ཅད་གོ་བསྟུན་ནས་ལེགས་པར་བརྟགས་པས། ཆོས་འདི་དང་འདི་བརྒྱུད་པ་དང་། ལྟ་གྲུབ་ལ་སྐྱོན་ཅུང་ཟད་ཀྱང་མེད་པར་ཐག་ཆོད་
དོ། །བཅོམ་ལྡན་འདས་ཀྱིས། དགེ་སློང་གང་དག་མཁས་རྣམས་ཀྱིས། །བསྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་སོ། །མངའ་རིས་པཎ་ཆེན་གྱིས་སྨྲ་བའི་རྒྱན་ལས། དེང་སང་དགྱེས་རྡོར་བྱེད་པ་འགའ། །མན་ངག་ལུགས་སུ་ཁས་ལེན་ཅིང་། །མཚོ་སྐྱེས་མི་ཐུབ་ཟླ་བ་དང་། །ནག་པོ་ལུགས་སོགས་དུ་མ་ཞིག །སྤྲང་པོའི་ཕྱེ་བཞིན་བསྲེས་ནས་ནི། །མན་ངག་ལུགས་སུ་བརྒྱུད་པ་འདེད། །འདི་འདྲ་གཞན་དང་འགལ་བས་ཞོག །རང་ལུགས་དང་ཡང་ཅིས་མི་འགལ། །ཞེས་དང་། འཇམ་དབྱངས་ཆེན་པོས། པཎ་གྲུབ་ཕག་མོའི་ཆོས་ལུགས་འདི། །ཆོས་ལོག་སྙིང་པོ་མེད་པར་འཆད། །མོན་བུ་པུ་ལ་ཏྲའི་རྗེས་འབྲང་ལ། །མཁས་པའི་ཟབ་ཁྱད་གསེར་དང་བརྗེ། །མཁས་པའི་བསྟན་དྲངས་བློ་ཚད་ལགས། །ཞེས་དང་། །རྗེ་གཙུག་ལག་ཕྲེང་བས། ཕག་མོའི་རྒྱ་གཞུང་ཚད་ལྡན་འདི་ཙམ་བཀག་ནས། རང་གི་ཉམས་ལེན་གྱི་ཟབ་ཆོས་དེ་འདོད་པའི་གཙོ་བོ་བདུད་སྡིག་ཏོ་ཅན་དང་བགེགས་བྱི་ན་ཡ་ཀ་བསྒྲུབ་པ་འདི། སངས་རྒྱས་སུ་ཞིག་གི་ཉན་ཐོས་ལགས་
སམ། ཞེས་པ་ས་སྐྱའི་ལྷ་དམར་པོ་རྣམ་གསུམ་འདོད་རྒྱལ་དམར་པོ་དང་། ཚོགས་བདག་དམར་པོའི་བསྒྲུབ་པ་བཀག །དེ་ལྟར་བོད་ཀྱི་ཆོས་ཕལ་ཆེར་ལ་སྐྱོན་མ་བརྒྱབ་པ་ཆེར་མི་སྣང་ཞིང་། གཞན་ཡང་སྡོམ་གསུམ་སོགས་ནས་ཐུབ་པ་དྲུག་བཀག་པ་དང་། མྱོང་གྲོལ་བཏགས་གྲོལ་སོགས་དཔལ་འཛིན་བཟང་པོས་བཀག་པས། ཐུགས་རྗེ་ཆེན་པོ་གསང་འདུས་ཡང་སྙིང་འདུས་པ་ལ་ཡང་གནོད་ལ། སྡོམ་གསུམ་ལས། ཞལ་གཟིགས་ཀྱི་ལྷ་དང་ལུང་བསྟན་པའི་ཆོས་དང་སངས་རྒྱས་སོགས་བཀག་པས། ཐུགས་རྗེ་ཆེན་པོ་ཡང་གསང་བླ་མེད་དང་། མི་ཏྲ་གསང་སྒྲུབ་མི་ཏྲ་ཁྲིད་དྲུག་ལ་ཡང་གནོད། རྫོགས་ཆེན་བཀག་པས། ཐུགས་རྗེ་ཆེན་པོ་དོན་ཏིག་དང་ཡེ་ཤེས་འོད་མཆོག་སོགས་ལ་གནོད་། ཁ་ཅིག་གཏེར་མ་ལ་དབང་རྒྱུན་ཆད་པ་སོགས་བཀག་པས། ཐུགས་རྗེ་ཆེན་པོ་འགྲོ་འདུལ་རྒྱབ་ཆོས་སྐོར་དངོས་གྲུབ་གཏེར་མའི་སྐོར་སོགས་ཐུགས་རྗེ་ཆེན་པོ་གཏེར་མ་ཐམས་ཅད་དང་། ཐུགས་རྗེ་ཆེན་པོ་མུན་སེལ་སྒྲོན་མེ། ནམ་མཁའ་རྒྱལ་པོ། ཐུགས་རྗེ་ཆེན་པོ་ངན་སོང་རང་གྲོལ་སོགས་ལ་ཡང་གནོད་དོ། །བཀག་པ་དེ་དག་ཐམས་ཅད་ཀྱིས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལ་ནི་
གནོད་པ་ནི་ཅི་ཡང་མི་སྣང་ངོ་། །བཀག་པ་དེ་དག་ཀྱང་སྔོན་གྱི་མཁས་པ་རྣམས་ཀྱིས་གསུངས་པའི་རྗེས་བརྗོད་ཙམ་ཡིན་གྱི། བདག་གིས་ནི་ཆོས་དེ་དག་ཐམས་ཅད་རང་གི་ཉམས་སུ་མ་ལོན་ཀྱང་ཕྱག་འཚལ་ཞིང་དད་གུས་བྱ་བའི་ཡུལ་ཡིན་ནོ། །མཁས་པ་རྣམས་བཀག་པ་མཛད་པ་ཡང་། སྡོམ་གསུམ་ལས། རིན་ཆེན་ཆོས་ཀྱང་དཀོན་པ་ནི། །རྟག་ཏུ་འཚེ་བ་མང་ཞེས་གསུངས། །འདི་ལ་བསམས་ནས་མཁས་རྣམས་ཀྱིས། །རྟག་ཏུ་བསྟན་པའི་བྱི་དོར་བྱ། །ཞེས་གསུངས་པས། བསྟན་པའི་གད་དར་དང་། འདི་ལྟར་བཀག་པ་ལ་བསྟེན་ནས་འཆད་རྩོད་རྩོམ་པ་འཕེལ་བར་འགྱུར་ཕྱིར་དང་། རང་གི་ཆོས་བརྒྱུད་མི་འཆད་ཕྱིར་བསྟན་པ་བསྲུང་བའི་ཆེད་དུ་ས་པཎ་སོགས་མཁྱེན་བཞིན་བཀག་པ་དང་། ལ་ལ་རང་ཆེ་འདོད་ཕྱིར་གཞན་ལ་ཟུར་ཟ་དང་། འགོས་ལོ་ཙཱས་སངས་རྒྱས་ཡེ་ཤེས་ལ་སྒྱུ་འཕྲུལ་གསང་སྙིང་ཞུར་སོང་བས་མ་གནང་བས་སྙིང་ནད་ཀྱིས་བཀག་པ་དང་། འགའ་ཞིག་རང་གི་སྨོན་ལམ་དབང་གིས་བཀག་པ་དང་། འགའ་ཞིག་རང་གིས་གྲུབ་མཐའ་དང་བླ་མ་ལ་གནོད་པའི་ཚིག་ཕ་རོལ་པོའི་ཆོས་ཀྱི་ནང་ན་འདུག་པ་མཐོང་ན་བཀག་པ་སོགས་རིགས་མང་ཞིང་།
བཀག་པ་དང་ཁ་བརྒྱབ་པ་ཙམ་གྱིས་ཆོས་ལོག་ཏུ་མི་འགྱུར་བས་སྐྱོན་མེད་ཅེས་བདག་གི་བླ་མ་མཁས་གྲུབ་ལུང་རིགས་ཉི་མས་གསུངས་ལ། རྗེ་ཆོས་ཀྱི་དབང་ཕྱུག་གིས་དགོངས་གཅིག་བཤད་པའི་སྐབས་སུ། ས་པཎ་གྱིས་ལུགས་དེ་དག་དང་བཀའ་བརྒྱུད་གཉིས་མི་འགལ། གཉིས་ཀ་བདེན་ཚུལ་རྒྱ་ཆེར་གསུངས་པ་ཐོས། མདོར་ན་ལུགས་འདི་གཉིས་ཀ་བདག་གིས་སྤྱི་བོར་ཁུར་ནུས། འོན་ཀྱང་ཨོ་རྒྱན་རིན་པོ་ཆེའི་གསུངས་དགོངས་འདུས་འདྲ་མིན་ཤན་འབྱེད་ལས། ཁ་ཅིག་ཆོས་ལོག་སུན་འབྱིན་ཞེས། །ཡིན་པའི་སྐབས་ལ་ཡིན་ཞེ་ན། །གཤེ་ལོག་འགེལ་ཞིང་ལུང་རྒྱབ་མཐུད། །འགྲོ་རྣམས་ཡིད་གཉིས་གནས་སུ་འཕེན། །དེ་མཐུས་ཆོས་ལ་ཐེ་ཚོམ་ཟ། །ཉམས་ལེན་འཕྲོ་བསྐྱུར་རྩོད་པ་བསྒྲུབ། །ལམ་ལོག་ལམ་གོལ་བདུད་ཀྱི་བསླུས། །དེ་འདྲའི་འདྲ་མིན་ཙམ་རྒྱུད་ཀྱིས། །རྒྱལ་ཁམས་འགེངས་པའི་རྟག་པ་གཅེས། །ཞེས་གསུངས་པ་ལྟར། ཤེས་རབ་ཅུང་ཟད་ཡོད་ཅིང་ཐེ་ཚོམ་ཆེ་བ་རྣམས་རང་གི་ཆོས་ལ་ཐེ་ཚོམ་ཁུ་འཕྲིག་ཅུང་ཟད་སྐྱེ། དེས་གེགས་བྱས་ནས་ཉམས་སུ་བླངས་ཀྱང་མི་འགྲུབ་པས་རྐྱེན་བྱེད་ལ། དད་པ་ཆེ་ལ་ཨུ་ཚུགས་ཅན་རྣམས་རང་གི་ལུགས་ལ་ཆགས། ཕ་རོལ་
བཀག་མཁན་ལ་ཞེ་སྡང་ཆེ་སྟེ། དབུ་མ་འཇུག་པ་ལས། རང་གི་ལྟ་ལ་ཆགས་དང་དེ་བཞིན་དུ། །གཞན་གྱི་ལྟ་བ་འཁྲུལ་གང་རྟོག་པ་ཉིད། །དེ་ཕྱིར་འདོད་ཆགས་ཁོང་ཁྲོ་རྣམ་བསལ་ནས། །རྣམ་དཔྱོད་པ་ནི་མྱུར་དུ་གྲོལ་བར་འགྱུར། །ཞེས་གསུངས་པས། རང་ལུགས་མཆོག་ཏུ་འདོད་པའི་འདོད་ཆགས། གཞན་ལུགས་ལ་ཁོང་ཁྲོའི་ཞེ་སྡང་ནི་འཇིག་ལྟ་སྟེ་འཁོར་བར་འཆིང་ངོ་། །དེས་ན་ད་ལྟ་རྒྱལ་བློན་བྱང་ཆུབ་སེམས་དཔའ་ལོ་པཎ་སྐྱེས་མཆོག་རྣམས་ཀྱི་བཀའ་དྲིན་གྱིས། བོད་ན་དམ་ཆོས་རྒྱ་མཚོ་ལྟ་བུ་བཞུགས་པའི་ནང་ནས། རང་གི་གྲུབ་མཐའི་སྲོལ་འཛིན་འདི་ཡིན་ཞེས་གཅིག་ལ་འཐམ་མི་དགོས་སུས་ཀྱང་མ་བཀག །སུས་ཀྱང་བསྙོན་དུ་མེད་པའི་ཆོས་ཟབ་མོ་ཉམས་སུ་ལེན་ཆོག་གོ །དེ་ཡང་རྒྱུད་མཐོ་བ་གཉིས་མེད་རྒྱུད། བརྒྱུད་པ་དམ་ཉམས་འདྲེས་ཁྱེར་དང་རང་བཟོ་སོགས་མ་ཡིན་པར་སངས་རྒྱས་ནས་སངས་རྒྱས་ཀྱི་བརྒྱུད་པ་བར་མ་ཆད་ཅིང་ཞལ་གཟིགས་བཀའ་བབས་མ་ཆད་པ། རྒྱུད་དེ་ཡང་རྒྱ་གར་དུ་ཡོད་སྐད་ཟེར་བ་ལྟ་བུ་མ་ཡིན་པར་ད་ལྟར་མཇལ་རྒྱུ་ཡོད། རྒྱུ་གཞུང་མེད་པར་བོད་དུ་ལུང་བསྟན་བྱུང་ཟེར་བ་སྐད་མིན་པར་རྒྱ་གཞུང་ཡོད་པ། རྒྱུད་རྒྱ་
གཞུང་དངབཀའི་བསྟན་འགྱུར་དུ་ཡོད་ཀྱང་མན་ངག་ཟབ་མོའི་བརྒྱུད་པ་མེད་པ་མ་ཡིན། མན་ངག་ཡོད་པ་དབང་ལུང་གི་བརྒྱུད་པ་ཆད་པ་དག་སྣང་དུ་ཐོབ་ཟེར་བ་ལྟ་བུ་མ་ཡིན་པར་མ་ཆད་པར་ཡོད་པ། བཀའ་གསར་རྙིང་གཉིས་ཀས་ཚད་མར་འཛིན་པ། སྔགས་གཅིག་དང་ལྷ་གཅིག་གིས་ཆོག་པས་ཉམས་ལེན་བདེ་བ། བོད་ཀྱི་ལྷ་སྐལ་ཡིན་པས་བྱིན་རླབས་མྱུར་བ། ཆོས་ཟབ་ཀྱང་དེའི་བསྟན་པ་རྫོགས་ཁ་བྱིན་རླབས་འབྱུང་དཀའ་སྟེ། ཐུགས་རྗེ་ཆེན་པོ་ནི་སྙིགས་མའི་བསྟན་པའི་མཇུག་མ་ལ་དར་རྒྱས་སུ་འོང་བར་གསུངས་ཏེ། བར་ཆད་མེད་པར་ཐམས་ཅད་འཛོམ་པ་ནི། ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་དང་ལྷ་དགུ་རྗེ་དྲུག་པས་རྩོམ་པ་འདི་ལ་བདག་གིས་ཚང་བར་མཐོང་སྟེ། བདག་གིས་ལོ་དུ་མར་བཀའ་མདོ་རྒྱུད་མན་ངག་དུ་མ་བལྟས། བླ་མ་ཆེ་ཕྲ་དུ་མ་བསྟེན་པས་ཆོས་འདི་བས་ཟབ་པ་མེད་པར་རྟོགས་སོ། །དེ་ཡང་ཆོས་གཞན་ལ་སྐྱོན་ཚོལ་ཕྱིར་མ་ཡིན། རང་ལུགས་བསྟོད་ཕྱིར་མ་ཡིན་ཏེ། ས་སྐྱ་པཎྜི་ཏས། ཉི་མ་གཅིག་གིས་བཟའ་བཏུང་ལའང་། །བཟང་ངན་རྟོག་དཔྱོད་སྣ་ཚོགས་བཏང་། །གོས་དང་མཁར་གདན་ལ་སོགས་པ། །བྱ་བ་གང་ལའང་ལེགས་ཉེས་དང་། །
བཟང་ངན་མཁས་དང་མི་མཁས་ཞེས། །བླང་དོར་རྟོག་དཔྱོད་སྣ་ཚོགས་བྱེད། །རྟ་དང་ནོར་བུ་ལ་སོགས་པ། །ཅུང་ཟད་ཙམ་གྱིས་ཉོ་ཚོང་ལའང་། །ཀུན་ལ་འདྲི་ཞིང་བརྟགས་ནས་སྤྱོད། །ཚེ་འདིའི་བྱ་བ་ཅུང་ཟད་ལའང་། །དེ་འདྲའི་འབད་པ་བྱེད་པར་མཐོང་། །སྐྱེ་བ་གཏན་གྱི་ལེགས་ཉེས་ནི། །དམ་པའི་ཆོས་ལ་རག་ལས་ཀྱང་། །ཆོས་འདི་ཁྱི་ཡི་ཟས་བཞིན་དུ། །བཟང་ངན་གང་དུའང་མི་སྤྱོད་པར། །གང་འཕྲད་དེ་ལ་གུས་པར་འཛིན། །ཉིན་གཅིག་གི་ནི་སྐྱེལ་མའམ། །ཚེ་གཅིག་གི་ནི་གཉེན་འབྲེལ་ལའང་། །འབད་དེ་བརྟགས་ནས་ལེན་པ་མཐོང་། །དེང་ནས་བརྩམས་ཏེ་རྫོགས་པ་ཡི། །སངས་རྒྱས་མ་ཐོབ་བར་གྱི་དོན། །བླ་མ་མཆོག་ལ་རག་ལས་མོད། །འོན་ཀྱང་རྟོག་དཔྱོད་མི་བྱེད་པར་། །ཚོང་དུས་ངན་པའི་ཟོང་བཞིན་དུ། །སུ་འཕྲད་རྣམས་ལ་ལེན་པར་མཐོང་། །ཀྱེ་མ་སྙིགས་མའི་དུས་འདི་མཚར། །འབད་མི་དགོས་པ་འབད་པར་བྱེད། །འབད་དགོས་ཆོས་དང་བླ་མ་ནི། །ཅི་ཡང་རུང་བས་ཚིམ་པར་སྣང་། །ཞེས་གསུངས་པ་ལྟར། འབད་པ་ཆེན་པོས་མདོ་རྒྱུད་དང་། ཨོ་རྒྱན་རིན་པོ་ཆེའི་གཏེར་ཆོས་ལྷད་མེད་རྣམས་དཔང་དུ་བཞག་
ནས་བདག་གི་ལོ་དུ་མར་བརྟག་བརྟགས་པས། ཆོས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་ཉམས་ལེན་འདི་ལས་ཟབ་པ་དང་། གསོལ་བ་འདེབས་ཡུལ་གྱི་བླ་མ་ད་ལྟ་ཞལ་དངོས་སུ་མཇལ་རྒྱུ་ཡོད་པ་རྒྱལ་བ་ཡབ་སྲས་ལས་བཟང་བ་མེད་དེ། བླ་མ་ཡི་དམ་གཉིས་པོ་མོས་བློས་ཡར་གཞལ་བ་མ་ཡིན་པར་ཐ་དད་མེད་པར་སྣང་ངོ་། །དེས་ན་ཕྱོགས་འདོད་དང་། ལྟ་ཞེན་དང་། ཕོ་རུས་ཀྱི་གཏམ་མ་ཡིན་པར། ཆོས་འདི་དང་བླ་མ་བརྒྱུད་པ་འདི་ལ་བློ་བཀལ་ན་མི་བསླུ་ངེས་པར་སྣང་བར་བདག་གིས་ཐག་ཟད་ཀྱིས་ཆོད་བྱུང་ངོ་། །འདིའི་དོན་རྗེ་ཆོས་ཀྱི་དབང་ཕྱུག་གི་ཞལ་ནས། ཡོངས་འཛིན་ཕྱག་ན་པདྨོའི་རྗེས་བཟུང་ཞིང་། །འཁྲུལ་མེད་བཀའ་བརྒྱུད་སྙིང་ལ་ཞུགས་པའི་མཐུས། །ཆོས་ཀྱི་དབང་ཕྱུག་རྗེས་འབྲང་མི་བསླུ་བའི། །རེ་བ་དོན་ཡོད་ལྡན་ལ་གསོལ་བ་འདེབས། །ཞེས་གསུངས་ཤིང་། བཀའ་བརྒྱུད་གཅིག་ཤི་གཅིག་འཐམ་བྱ་བ་ཡིན་གསུངས་པ་ཡང་ཐོས་སོ། །དུས་ཕྱིས་ཤིག་བདག་གི་རྨི་ལམ་ན་མུན་ནག་ཆེན་པོ་མིག་ཕྱེས་བཙུམ་མེད་པར། མི་མང་པོ་དག་གར་འགྲོ་ཆ་མེད་པར་འགྲོ་དགོས་པར་སྣང་། རྡོག་འཛུར་ན་གཡང་ས་ཆེན་པོས་སྲོག་དང་བྲལ་བར་བྱེད་པ་འཇིགས་སུ་རུང་བར་ལྟུང་དོགས་
སྐྲག་སྣང་ཆེན་པོ་དང་བཅས་ནས་འགྲོ་དགོས་དོ་བས། བདག་གི་མདུན་དེ་ན་རྗེ་ཆོས་ཀྱི་དབང་ཕྱུག་ཡིན་ནམ་སྙམ་པ་གཅིག་འབྱོན་འགྲོ་དོ་བས་སྐུ་རྒྱབ་ན་བཟའ་ནས་བདག་གིས་དམ་པོར་འཇུས། དེས་ཀྱང་དབང་ཕྱུག་རྡོ་རྗེ་ནས་བཟུང་སྟེ། གཅིག་གིས་གཅིག་ལ་འཇུས་ཏེ་ནཱ་རོ་ཏེ་ལོ་ནས་རྡོ་རྗེ་འཆང་གི་བར་གཅིག་གིས་གཅིག་ལ་དམ་པོར་འཇུས་ནས་ཐམས་ཅད་ཡར་འགྲོ་ཞིང་ཡོད་པ་ཡིན་སྙམ་ཞིང་སོང་ཛ། ངའི་འོག་ཙམ་ན་མི་མང་པོ་འགྲོ་ཞིང་གྲག་པ་ལ་ཁྱེད་རྣམས་དེར་མ་འགྲོ། རྡོག་འཛུར་ན་གཡང་ས་ཆེན་པོར་ལྟུང་དོགས་ཡོད། །ང་ལ་འཇུས་ནས་ངའི་རྗེས་སུ་ཤོག་དང་། ངས་ལམ་འདི་མི་ཐོད་དེ། ངས་སྔོན་མ་འདི་ལ་དམ་པོར་འཇུས་ནས་ཡོད་པས། གཅིག་ལ་གཅིག་འཇུ་བྱས་ཡོད་པས། བཀའ་བརྒྱུད་ཐམས་ཅད་གཡང་ལ་མ་ལྟུང་ན་ང་ལྟུང་དོགས་ཡོད་ལེ་མེད་སྨྲས་པས། གཅིག་གཉིས་ངའི་རྗེས་སུ་བྱུང་། གཞན་ཚོ་གར་སོང་མ་ཤེས། ང་རང་གིས་བསམ་པ་ལ། ངས་ནི་ལམ་མི་མཐོང་ངོ་། །མུན་པ་ཆེ་དྲགས་པས་གཞན་ཚོས་ཀྱང་གསལ་པོར་མཐོང་དཀའ་ལེ་གདའ་སྟེ། སྔོན་མ་རང་དེས་ལམ་གསལ་པོར་མཐོང་ཞིང་། ཨེ་མི་ཡོད་བསམ་ཞིང་སོང་སོང་བ་
རྨིས། མནལ་སད་ནས་སྔར་སློབ་དཔོན་རིན་ཆེན་པོ་ཆེས་བཀའ་བརྒྱུད་གཅིག་ཤི་གཅིག་འཐམ་ཡིན་གསུངས་པ་དེའི་ངོ་སྤྲོད་དང་བརྡ་ཆོས་རེད་བསམ་པ་བྱུང་ངོ་། །འདི་ལ་ལེགས་པར་དཔྱད་ན་བརྡ་ཆོས་ཟབ་མོར་སྣང་ངོ་། །ཡང་གྲྭ་པ་ཁ་ཅིག་ཏུ་ཡོན་ཏན་ལོབ་པར་མི་འདུག་ཟེར་བའི་བརྡའ་ལ། ཅི་མི་འོང་ཡིག་དྲུག་བསྒོང་ཨེ་གོ་ཟེར་སྲོལ་གདའ་བས། དེ་ཡོན་ཏན་འོང་བའི་ཤེས་རབ་མི་འདུག་ཟེར་བ་ཡིན། ཡིག་དྲུག་ཆོས་ཟབ་མོ་མིན་ཟེར་བ་མིན་ལ། བླུན་རྨོངས་ཁ་ཅིག་ངས་ཡིག་དྲུག་འདོན་མ་དགོས་ཙམ་ཤེས་ཟེར་ནས། ཡིག་དྲུག་རྒན་འཁོགས་བྱིས་པ་དང་བླུན་པོའི་ཆོས། ནོར་མ་ཉན་པའི་དབམ་ཆོས་ཡིན་བསམ་ཞིང་སྨྲ་བ་ནི། ཤིན་ཏུ་སྡིག་ཆེ་རང་གི་དགེ་རྩ་གང་ཡོད་བརླགས་ཏེ། སྤྲུལ་པའི་རྒྱལ་པོའི་ཞལ་ནས། དུས་ཕྱི་མའི་གང་ཟག་ལྟ་བ་ལ་ཞེན་ནས་ཆོས་ལ་རིས་སུ་གཅོད་ནས་ཆོས་སྤྱོད་སྤངས། ཐུགས་རྗེ་ཆེན་པོ་མ་ཎི་པདྨེ་རྒན་འཁོགས་བྱིས་པའི་ཆོས་ཡིན་ཟེར་ནས་ཁྱད་གསོད་བྱེད་པ་འགའ་འོང་བས༔ དེ་རྣམས་ནི་བདུད་ངག་ལ་ཞུགས་པ་ཡིན་ཏེ། ཕྱི་མ་གཏན་སྡུག་དམྱལ་བའི་གནས་སུ་འགྲོ་བ་ཡིན་པས། ཐུགས་རྗེ་ཆེན་པོའི་ཆོས་ལ་ཐེ་ཚོམ་མ་ཟ་བར་སྒྲུབས་ཤིག །འགྲུབ་
ཐག་འདི་ལས་ཉེ་བ་མེད། །བྱིན་རླབས་འདི་བས་ཆེ་བ་མེད། །ཅེས་དང་། རང་ཉིད་ཐུགས་རྗེ་ཆེན་པོར་བསྒོམས་ནས་ཡི་གེ་དྲུག་པ་བསྒྲངས་ན་སྒྲིབ་པ་བྱང་ནས་བྱང་ཆུབ་ཐོབ། འདི་ལ་ཡིད་མ་ཆེས་པ་རྣམས་སྔོན་ལས་མེད་པས་འཁོར་བར་འཁྱམས་ཐོ་བ་ཡིན་ནོ། །དེས་ན་ཐུགས་རྗེ་ཆེན་པོ་ཉམས་སུ་ལོངས་ཤིག །ཅེས་གསུངས་སོ། །ལྷ་གཞན་ལས་ཐུགས་རྗེ་ཆེན་པོ་འདི་རང་རེ་ལ་འབྲེལ་བ་ཆེ་སྟེ། བདེ་བ་ཅན་ནས་སྣང་བ་མཐའ་ཡས་ཀྱིས་སྤྱན་རས་གཟིགས་ལ་ཁ་བ་ཅན་གྱི་སེམས་ཅན་པ་དང་པོ་ཟང་ཟིང་གིས་བསྡུས། དེ་ནས་ཆོས་ཀྱིས་སྨིན་པར་གྱིས་ལ་མཐར་ང་ཡི་གནས་ལ་ཁྲིད་ལ་ཤོག་ཅིག །ངས་ཀྱང་གདུལ་བྱའི་གྲོགས་བྱའོ། །ཞེས་བཀའ་བསྒོས་པས། སྤྱན་རས་གཟིགས་ཀྱིས་ང་དང་འབྲེལ་པ་ཆེར་བཞག་པའི་སེམས་ཅན་རྣམས་མཐར་བདེ་བ་ཅན་དུ་ཁྲིད་ནས་འོང་གི་ཞུས་ནས། འཇིག་རྟེན་འདིར་བྱོན་ནས་ལྷོ་ཕྱོགས་རི་བོ་ཏ་ལའི་རྩེ་ནས་འཕགས་པ་སྤྱན་རས་གཟིགས་ཨཱརྱ་པ་ལོའི་ཞལ་བྱང་དུ་གཟིགས་ནས་ཁ་བ་ཅན་གྱིས་སེམས་ཅན་གྱི་དོན་མཛད་པར་གསུངས་པ་དང་། བཅོམ་ལྡན་འདས་ཤཱཀྱ་ཐུབ་པ་མྱ་ངན་ལས་འདའ་ཁར་ཡང་ཁ་བ་ཅན་གྱི་ཡུལ་ཁམས་
ཞབས་ཀྱིས་མ་བཅགས་པ། སྤྱན་རས་གཟིགས་ལ་ཐུལ་ཅིག་པར་བཀའ་བསྒོས་ཤིང་། འདུལ་བར་ཞལ་གྱིས་བཞེས་ཕྱིར་བོད་ཀྱི་ལྷ་སྐལ་ཡིན་ཏེ། མ་གཅིག་ལབ་སྒྲོན་གྱི་ཞལ་ནས། །བྱིས་སྦ་ཆུང་ངུ་སྨྲ་ཤེས་པ་ཙམ་ལ་ཡི་གེ་དྲུག་པ་འདོན་ཤེས་པ་དུས་མཉམ་སྟེ། འཕགས་པས་རྒྱུད་བྱིན་གྱིས་བརླབས་པོར་ངེས་པའི་རྟགས་ཡིན་པས་ངེས་པར་འཕགས་པ་ལྷ་སྐལ་དུ་བྱ་བར་རིགས་སོ། །ཞེས་དང་། སྙིང་པོ་ཡི་གེ་དྲུག་པ་འདི་ནི། ཆོས་ཀྱི་ཕུང་པོ་སྟོང་ཕྲག་བརྒྱད་ཅུ་རྩ་བཞིའི་མདོ་དོན། རྒྱུད་སྡེ་ཟབ་མོ་ཐམས་ཅད་ཀྱི་གཞི་མ། མདོ་སྔགས་གཉིས་ཀྱི་བཅུད་བསྡུས་པ། གསུང་རབ་རྒྱ་མཚོ་འདྲ་བ་རྣམས་ཀྱི་འོ་མ་ལྟར་བསྲུབ་པའི་སྙིང་པོ་མར་ཕྱུང་བ་ལྟ་བུ་འདི་ཡི་ནུས་པ་ནི་ནད་གདོན་བགེགས་རིགས་མི་མཐུན་པའི་ཕྱོགས་ཐམས་ཅད་འཇོམས་པར་བྱེད་པའི་རྫ་ས་ཀྱི་ཕ་ལམ་དང་འདྲ་ཞིང་། འདོད་པའི་དོན་ཐམས་ཅད་མྱུར་དུ་འགྲུབ་པར་བྱེད་པ་ནི་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བའི་ཡི་གེ་དྲུག་པ། ཞེས་གསུངས་སོ། །ཨོ་རྒྱན་རིན་པོ་ཆེས་བོད་སྤྱི་ལ་ཞལ་ཆེམས་སུ་བཞག་པར་ཡང་། བོད་ཀྱི་བྷེ་སྐལ་ལགས་པས་ཐུགས་རྗེ་ཆེན་པོ་བྷེ། ཆོས་ཀྱི་སྙིང་ཁུ་ལགས་པས་ཡི་གེ་དྲུག་པ་
བསྒྲངས། དེ་ལྟར་བྱས་ན་འདི་དང་ཕྱི་མར་ཇེ་བདེར་འགྲོ། ཞེས་གསུངས་སོ། །གྲུབ་ཐོབ་ཚེམ་བུ་པས་ཀྱང་། འོ་སྐོལ་ཐུགས་རྗེ་ཆེན་པོ་ཁོང་གི་དགོས་མི་དང་འདྲ་བས་ཁོང་བསྒྲུབ་དགོས་གསུངས་པ་དང་། བཀའ་གདམས་གླེགས་བམ་ནས་འབྲོམ་གྱི་ལྷ་བཞི་གདམས་དུས། ཐུགས་རྗེ་ཆེན་པོ་མཚུངས་པ་མེད། །ཁྱད་པར་བོད་ཀྱི་ལྷ་སྐལ་ཡིན། །ཨེ་མ་ལོ་ལྔའི་བུ་ཆུང་ཡང་། །འབྲུ་དྲུག་ཟབ་མོ་ཁ་ནས་འབྱིན། །དབང་པོ་མ་ཚང་དུ་མ་ཡང་། །ཡུལ་མིན་མི་ཟེར་འདི་ཉིད་འབྱིན། །བསྒོམ་ལ་སྙིང་རྗེ་ཆེན་པོ་སྟེ། །ཕན་ཆེ་འཁོར་བའི་མཚོ་ལས་སྒྲོལ། །བོད་ཀྱི་ལྷ་སྐལ་ཉིད་དུ་ངེས། །འབྲུ་དྲུག་ཕ་རོལ་ཕྱིན་དྲུག་གོ །རིགས་དྲུག་སོ་སོའི་དུཁ་ཡང་། །འབྲུ་དྲུག་བརྡ་ཡིས་སེལ་གྱུར་ཏེ། །དུགཁ་ནད་སེལ་སྨན་དུ་བཟང་། །འདི་ལ་བདག་གིས་ལྷ་ཅིག་བགྱི། །ལེགས་ཉེས་ཐམས་ཅད་ཐུགས་རྗེས་མཁྱེན། །ཞེས་གསུངས་སོ། །དེ་ལྟར་བོད་སྤྱིའི་ལྷ་སྐལ་ཡིན་པའི་ནང་ནས་རང་རེ་ཁམས་བར་པ་ལ་ཁྱད་པར་བཀའ་བབས་པ་ནི། ཨོ་རྒྱན་རིན་པོ་ཆེས། ཨེ་མ། ཐུགས་རྗེ་ཆེན་པོ་འཕགས་པ་སྤྱན་རིས་གཟིགས། །བོད་ཡུལ་ཁ་བ་ཅན་གྱི་ལྷ་ཡིན་ཀྱང་། །ཁྱད་པར་ཆོས་འདི་
ཁམས་ཀོང་ཕྱོགས་སུ་དར། །ཡིག་དྲུག་བསྟན་པ་མདོ་ཁམས་ཕོ་མོས་བཟུང་། །ཞེས་གསུངས་སོ། །ཨོ་རྒྱན་རིན་པོ་ཆེས་མ་འོངས་ལུང་བསྟན་དུ་མ་ནས། སྙིགས་དུས་ཆོས་གཞན་གྱི་བྱིན་རླབས་ཡལ། ལྷ་གཞན་གྱི་ཐུགས་རྗེ་རྡུགས། མཁའ་འགྲོ་ཆོས་སྐྱོང་རི་རབ་ལ་ཞལ་གཟིགས། བདུད་རིགས་ཁ་འཕྱུར་ཚུལ་དུ་མ་ལུང་བསྟན་སྐབས་དེ་དུས་ལྷ་གང་ཆེ་ཐུགས་རྗེ། ཆོས་གང་དེར་ཞུས་པས། ལྷ་ཚོགས་ཐུགས་རྗེ་སྤྱན་རས་གཟིགས་ཀྱིས་ཆེ། །ཆོས་ཀྱི་མཇུག་མ་ཡི་གེ་དྲུག་པས་སྡུད། །པདྨེ་གླུ་རུ་ལེན་ཅིང་བྲོ་རུ་བརྡུང་། །པདྨེས་ཚོང་དུས་འདྲེན་ཅིང་རྒྱུན་དུ་འདྲེན། །ཐུགས་རྗེ་ཆེན་པོའི་བསྟན་པ་བག་ཙམ་དར། །ཞེས་རཏྣ་གླིང་པའི་གཏེར་ཁ་དུ་མ་ནས་བྱོན་པ་དང་། ཁྱད་པར་འཇའ་ཚོན་པའི་གཏེར་ཁ་རྟ་ཕག་གསང་བའི་ལུང་བསྟན་ལས། དུས་ད་ལྟ་བཞི་བཅུ་ཁ་རལ་སུམ་ཅུར་ཉེ་བའི་དུས་རྟགས་ཐམས་ཅད་ལུང་བསྟན་སྐབས་སུ། ཤར་དུ་མ་ཎི་ཆོས་སྒྲ་དར། །ཞེས་གསུངས་པ་དང་། རྒྱལ་པོ་སྲོང་བཙན་སྒམ་པོས། དུས་ད་ལྟའི་ལུང་བསྟན་མང་དུ་མཛད་པའི་སྐབས་སུ། ཆོས་དར་ལ་མ་སྨིན་པའི་དུས་གཅིག་བྱུང་ཙ་ན། ཤཱཀྱ་ཐུབ་པའི་བསྟན་པ་ཉམས་དམའ་བས་བཙུན་པས་ཁྱིམ་
པ་བྱེད། གནས་གཞི་སྡེ་འཁྲུག་བྱེད། དུས་དེ་ཙམ་ལ་ཐུགས་རྗེ་ཆེན་པོའི་བསྟན་པ་དར་ནས། ཨོཾ་མ་ཎི་པདྨེ་ཧཱུྃ། ཞེས་པའི་ཡི་གེ་དྲུག་པ་རང་བྱུང་རང་ཤར་ནས་བོད་ཁམས་ཐམས་ཅད་ཡིད་ཆེས་པར་བྱེད་པས་དེའི་དུས་སུ་ཐུགས་རྗེ་ཆེན་པོ་སྒྲུབས་ཤིག །ཡིད་བརྟན་པར་གྱིས་ལ་ཐུགས་རྗེ་ཆེན་པོའི་ཆོས་ལ་བློ་མ་ལྡོག་ཅིག །ཅེས་གསུངས་པ་དང་། དུས་ཕྱི་མ་ཁ་བ་ཅན་གྱི་རྒྱལ་ཁམས་ཐུགས་རྗེ་ཆེན་པོས་འདུལ་བར་འགྱུར་རོ། །ཞེས་ལུང་བསྟན་ཅིང་། རྒྱལ་པོ་ཡབ་ཡུམ་གསུམ། ཇོ་བོ་བཅུ་གཅིག་ཞལ་ལ་ཐིམ་དུས། དུས་ཀྱི་ལམཐའ་ལ་བབ་པའི་ཚེ་ཁ་བ་ཅན་བོད་ཀྱི་རྒྱལ་ཁམས་ཀྱི་ལྷ་སྐལ་ཐུགས་རྗེ་ཆེན་པོ་ཡིན་པས། གསུང་ཡི་གེ་དྲུག་པ་དར་ཞིང་རྒྱས་པར་འགྱུར་རོ། །འགྲུབ་ཐག་ཉེ་བར་འགྱུར་རོ། །བྱིན་རླབས་ཆེ་བར་འགྱུར་རོ། །ཞེས་ལུང་བསྟན་པའི་སྒྲ་རང་གྲག་ཏུ་བྱུང་སྐད་དོ། །དེས་ན་ད་ལྟའི་དུས་ལ་བབ་པའི་ཆོས་ཡིན་པས་བར་ཆད་མེད་པར་འགྲུབ་ཐག་ཉེ་བྱིན་རླབས་ཆེའོ། །དེ་ཅིའི་ཕྱིར་ཞེ་ན། སྤྱན་རས་གཟིགས་ལྷ་ཐམས་ཅད་ལས་ཐུགས་རྗེ་ཆེ་བའི་ཕྱིར། སྙིགས་དུས་ཐུགས་རྗེ་བྱིན་རླབས་འཇུག་ནུས་ཤིང་གཞན་གྱིས་མི་ནུས་སོ། །ཡི་གེ་དྲུག་པ་ཡང་ཟབ་
དྲགས་པས་དར་བ་སྟེ། ཆོས་སྤྱོད་ཐམས་ཅད་མངོན་པར་རྟོགས་པའི་རྒྱུད་ལས། དཔེར་ན་མར་མེ་འཆི་ཁ་རུ། །འོད་དེ་གསལ་བར་འབྱུང་བར་འབྱུང་། །དེ་ནི་ང་ཡི་བསྟན་པ་ཡང་། །ནུབ་ཁར་ཟབ་མོའི་ཆོས་དར་འགྱུར། །ཞེས་གསུངས་སོ། །ཡང་མོའུ་འགལ་གྱི་བུས་མ་ལ་ཕན་བཏགས་པའི་མདོ་སྡེ་ཆེན་པོ་ལས། གཏམ་རྒྱུད་རྒྱ་ཆེར་འབྱུང་བའི་དོན་བསྡུས་ན་ཕ་མའི་དྲིན་ལན་བསབས་ཕྱིར་འཕགས་པ་མོའུ་འགལ་གྱི་བུ་རབ་ཏུ་བྱུང་སྟེ། །ཕ་ནི་དགེ་བ་སྤྱོད་པས་ལྷར་སྐྱེས་ཏེ་བུ་དང་ཡང་འཕྲད། མ་ནི་གར་སྐྱེས་མ་ཤེས་ནས་ཕ་ལྷར་སྐྱེས་པ་ལ་དྲིས་པས་དམྱལ་བར་ཡོད་པར་གསུངས་པས། བཅོམ་ལྡན་འདས་ཀྱིས་བཀའ་གནང་ནས། མ་འཚོལ་ཕྱིར་དམྱལ་བར་མོའུ་འགལ་གྱི་བུ་བྱོན་ནོ། །དེར་དམྱལ་བའི་བཀོད་པ་དང་སྡུག་བསྔལ་རྒྱུ་འབྲས་དཔག་ཏུ་མེད་པ་རྣམས་གཟིགས་སོ། །དེ་རྣམས་སུ་མ་ག་རེ་དྲིས་པས་ཀྱང་མཐོང་མཁན་མ་བྱུང་ནས། དེ་ནས་སྒོ་སྲུང་ལ་ཞུས་པས་གཤིན་རྗེའི་རྒྱལ་པོ་དང་མཇལ་བ་ལས། རྒྱལ་པོས་མའི་ལས་ཅི་བྱས་ཐམས་ཅད་གསལ་བར་གསུངས་པ་དང་། མ་འདི་བཏང་བར་གསོལ་ཞེས་རྒྱལ་པོ་ལ་ལན་དུ་མར་ཞུས་པ་དང་། ཆོས་ཀྱི་རྒྱལ་པོས་ལན་གསུངས་
པ། བཙུན་པས་བདག་གིས་མ་ལ་ཕན་མཛོད་གསུང་། །བདག་གིས་མ་ལ་ཕན་པར་རབ་ཏུ་དཀའ། །བཙུན་པའི་མ་ནི་ཤིན་ཏུ་སྡུག་བསྔལ་བས། །སྡིག་པ་གཞན་ལས་ཆེ་བས་ཐར་བར་དཀའ། །བཙུན་པའི་མ་འདི་བདག་གིས་མི་ཕྱིན་ཏེ། །མ་འདི་ཕྱིན་པར་བྱེད་པ་སངས་རྒྱས་ཡིན། །དེ་བས་བཅོམ་ལྡན་འདས་ལ་གསོལ་བ་ཐོབ། །ཁྱད་པར་ངན་སོང་འདི་ལས་སྐྱབས་མཛད་པ། །ཐུགས་རྗེ་ཚད་མེད་སྤྱན་རས་གཟིགས་དབང་ཡིན། །ལམ་འདི་རྒྱུད་ལྔའི་དབང་པོ་བདག་པོར་འགྱུར། །དེ་ལ་དྲིས་ན་མ་འདི་མཐོང་བར་འགྱུར། །།དེ་བས་འཕགས་པ་དེ་ལ་མ་དྲིས་ཤིག །ཅེས་དང་། བཙུན་པ་ལམ་རྒྱུད་ལྔ་ལ་དབང་བར་བྱེད་པའི་བདག་པོ་འཕགས་པ་སྤྱན་རས་གཟིགས་དབང་ཕྱུག་ཅེས་བྱ་བ་སྔོན་གྱི་སྨོན་ལམ་གྱིས་སེམས་ཅན་ཐམས་ཅད་ཀྱི་ལམ་ལ་དབང་བར་བྱེད་པ། སེམས་ཅན་ཐམས་ཅད་ལ་ཐུགས་རྗེས་བསྐྱབས་པར་མཛད་དེ། བཙུན་པ་དེ་ནི་ད་ལྟ་འཛམ་བུ་གླིང་གི་ལྷོ་ཕྱོགས་ཀྱི་རྒྱུད་འདི་ན་རི་པོ་ཏ་ལ་ཞེས་བྱ་བ་མེ་ཏོག་སྣ་ཚོགས་ཀྱིས་བརྒྱན་པ་ན། ལྷ་དང་མི་ལ་སོགས་པའི་འཁོར་ཐམས་ཅད་ལ་ཐབས་མཁས་པའི་སྒོ་ནས་ཆོས་བསྟན་ཏོ། བཙུན་པ་དེའི་གན་དུ་སོང་མ་གང་ན་
ཡོད་ཆ་ཡོད་པར་འགྱུར་རོ། །ཞེས་སྨྲས་སོ། །དེ་ནས་མོའུ་འགལ་གྱི་བུ་པོ་ཊ་ལར་བྱོན་ནས། སྤྱན་རས་གཟིགས་མཇལ་ནས་ལམ་རྒྱུད་ལྔར་གང་ལགས་ཞུས་པས། ངན་སོང་གསུམ་ལྷ་མི་གཉིས་དང་ལྔའི་རྒྱུ་འབྲས་ཐམས་ཅད་གསུངས་སོ། །དེར་མ་བསྟན་ཅིང་དྲང་བར་ཞུས་པས། ཁྱོད་ཀྱི་མ་ལོག་སྲེད་ཅན་དེ་དེ་བཞིན་གཤེགས་པས་ཀྱང་འདུལ་དཀའ་བར་གསུངས་ནས། དེ་ལན་གཅིག་བདེར་གཏུབ་ཀྱིས་དུས་ཐམས་ཅད་བདེ་བར་དཀའོ་གསུངས་ནས་ཏིང་ངེ་འཛིན་ལ་བཞུགས་པས། འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་སོ། །སེམས་ཅན་དམྱལ་བའི་སྡུག་བསྔལ་ཐམས་ཅད་ཞི། སེམས་ཅན་ཐམས་ཅད་བདེ་བ་ཚད་མེད་པ་ལ་བཀོད། སྐུ་ལས་འོད་ཟེར་ཕྱུང་ནས་འཇིག་རྟེན་གྱི་ཁམས་ཐམས་ཅད་ཁྱབ་པས། སེམས་ཅན་ཐམས་ཅད་ཀྱི་སྡུག་བསྔལ་ཞི་ནས་ལྕགས་ཀྱི་རན་འཐག་ཐམས་ཅད་ཁ་ཕྱེས་ནས་ལུས་ལ་ལྕགས་ཀྱི་ཕུར་པ་འདེབས་པ་རྣམས་རིན་པོ་ཆེའི་ཕྲེང་བས་ལུས་བརྒྱན་པར་གྱུར། མི་གཙང་བའི་འདམ་རྫབ་རྣམས་ཡན་ལག་བརྒྱད་ལྡན་གྱི་ཆུར་གྱུར། རལ་གྲི་ནགས་ཚལ་རྣམས་སྐྱེད་མོའི་ཚལ་ཉམས་དགའ་བར་བྱིན་གྱིས་བརླབས། ཤལ་མ་རི་རྣམས་དཔག་བསམ་གྱི་ལྗོན་ཤིང་དུ་
བྱིན་གྱིས་བརླབས། རུལ་མྱག་གི་ཆུ་རྣམས་བདུད་རྩི་གཙང་མའི་ཆབ་ཏུ་བྱིན་གྱིས་བརླབས། ལྕགས་ཀྱི་སོག་ལེས་དྲ་བ་རྣམས་རིན་པོ་ཆེའི་ཕྲེང་བས་ལུས་བརྒྱན་པར་མཐོང་། ལྕགས་ཀྱི་གཏུན་ཁུངས་སུ་བརྡུང་བ་རྣམས་མེ་ཏོག་པདྨའི་ནང་ན་འདུག་པར་མཐོང་། ལྕགས་ཀྱི་མཆུ་ཅན་གྱིས་འཇོམས་པ་ངང་ངུར་སྐད་སྙན་ཅིང་ཁ་ནས་མེ་ཏོག་གིས་ཕྲེང་བ་ཁྱེར་བར་མཐོང་། གཤིན་རྗེ་མཐུ་ཆེན་གྱིས་རྒྱག་པ་རྣམས་ལྷའི་བུ་དང་བུ་མོར་མཐོང་། གཤིན་རྗེས་མིག་འབྱིན་ནས་ལག་པ་གཅོད་མཚོན་ཆ་འདེབས་པ་རྣམས་ཡིད་དུ་འོང་བའི་རོལ་མོ་དུ་མ་དང་ལྡན་པར་མཐོང་ངོ་། །དེ་ནས་སྤྱན་རས་གཟིགས་ཀྱིས་མོའུ་འགལ་གྱི་བུ་ལ་བཀའ་སྩལ་པ། ངས་སེམས་ཅན་དམྱལ་བའི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་དོ། །བདེ་བ་ཆེན་པོ་ཐོབ་པར་བྱས་སོ། །མི་ཁོམ་པ་དང་ངན་སོང་ཐམས་ཅད་རྒྱུན་གཅོད་དོ། །ཁྱོད་ཀྱི་མ་ཡང་ལུས་ལ་ལྕགས་ཀྱི་ཕུར་པ་འདེབས་པའི་སྡུག་བསྔལ་རབ་ཏུ་ཞི་བར་བྱས་སོ། །ད་ཁྱོད་སེམས་ཅན་དམྱལ་བའི་གནས་སུ་སོང་ལ་ངའི་མིང་ནས་བརྗོད་པ་དང་། སེམས་ཅན་དམྱལ་བའི་གནས་ནས་ཐར་བར་འགྱུར་ཞིང་། དམྱལ་བའི་སྡུག་བསྔལ་གྱིས་མི་བརྫི་བར་
འགྱུར་རོ། །ཞེས་གསུངས་ཤིང་དེ་བཞིན་དུ་བྱས་པས་མ་ཡང་རིམ་པར་དྲང་ཚུལ་རྒྱས་པར་གསུངས་སོ། །འོ་དེ་ལྟར་མདོ་རྒྱུད་ཚད་ལྡན་གྱི་ལུང་། པཎ་གྲུབ་ཚད་ལྡན་གྱིས་མཛད་པའི་རྒྱ་གཞུང་དང་། ཡེ་ཤེས་མཁའ་འགྲོ་རྣམས་ཀྱི་གསང་ཚིག་དང་། བོད་ཀྱི་མཁས་གྲུབ་རྣམས་ཀྱི་གསུང་དེ་རྣམས་མཁས་པ་རྣམས་ཡིད་ཆེས་པའི་གནས་ཡིན་གྱི། །རྣལ་འབྱོར་པ་རྣམས་ལ་ཉམས་ཀྱི་འཁྲུལ་སྣང་རིགས་དྲུག་གི་གནས་སྦྱངས་སྣ་ཚོགས་འཆར་བ་ལ་བདེན་རྫུན་གང་དུ་ཡང་ཁ་ཚོམ་བཅད་དུ་མེད་མོད། འོན་ཀྱང་སྐྱེ་བོ་ཕལ་པ་དང་རབ་ཏུ་བྱུང་ཡང་ཤེས་རབ་དམན་པ་ཁ་ཅིག་གིས་མདོ་རྒྱུད་ཀྱི་ལུང་དྲང་ཡང་དོན་མི་གོ་བར་གཏམ་རྒྱུད་དང་འདྲ་ལ་ངེས་ཤེས་བྱེད་པ་ཡོད་པས། འདིར་ཟུར་ཙམ་བརྗོད་ན། སྤྱན་རས་གཟིགས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་སྤྲུལ་པའི་ཆ་ཤས་ལ། བོད་དུ་འདས་ལོག་པ་ལྔ་བྱུང་བར་གྲགས་པའི་ནང་ནས་ག་ཟི་ཨ་སྲུང་དེ་བར་དོ་དང་དམྱལ་ཁམས་འགྲིམ་དུས། །ལམ་དེ་ལ་ཡི་གེ་དྲུག་པའི་སྒྲ་དབྱངས་ཆེན་པོ་ཞིག་གྲགས་པས། དེ་མ་ཐག་ཏུ་ནམ་མཁའི་དབྱིངས་ནས་ལྷའི་བུ་དང་བུ་མོ་ལ་སོགས་པ་རྣམས་ཀྱིས་མཆོད་པའི་ཡོ་བྱད་བསམ་གྱིས་མི་ཁྱབ་པ་མང་པོ་བཟུང་ནས་བསུ་བ་
ཆེན་པོ་བྱེད་ཅིང་འདུག་པས། ཆོས་ཀྱི་རྒྱལ་པོ་ཡང་ཁྲི་ཐོག་ནས་བཞེངས་ནས་ལྡང་བ་ཞིག་མཛད་ནས་ཐལ་ཛ། དེ་མ་ཐག་ཏུ་རྣལ་འབྱོར་པ་གཅིག་གིས་རས་དཀར་པོའི་ན་བཟའ་མནབས་ནས་དྲྭ་བ་དམར་པོ་ཞིག་ཁུར། དོམ་ར་ཁམས་སིག་གེ་བ་གྱོན་ནས་དར་ཅོག་ཆེན་པོ་ངང་ཡ་ལེ་བ་ཞིག་ཁུར་ནས་ཡི་གེ་དྲུག་པའི་སྒྲ་དབྱངས་ཆེན་པོ་བྱེད་ཅིང་འགྲོ་བ་ཕོ་མོ་དཔག་ཏུ་མེད་པ་ཁྲིད་ནས། ལམ་དཀར་པོ་ལ་སྲུང་མ་ཚོས་བལྟ་བར་ཡང་མི་བཟོད་པར་བྱོན་ནས་ཐལ། དེ་མ་ཎི་བ་བསམ་པའི་དོན་འགྲུབ་པ་བྱ་བ་གཅིག་ཡིན་ཟེར་རོ། །འགྲོ་བ་ཕོ་མོ་དེ་རྣམས་ནི་རྣལ་འབྱོར་པ་དེ་ལ་འབྲེལ་པ་ཡོད་ཚད་ཚོ་ཡིན་ཟེར་རོ། །ཆོས་ཀྱི་རྒྱལ་པོའི་ཡིག་དྲུག་དར་ལྕོག་གི་ཕན་ཡོན་རྒྱ་ཆེན་པོ་གསུངས་སོ། །དེ་ནས་ཨ་སྲུང་གསོན་བྲ་ང་ཁམས་ན་གཤིན་རྗེའི་རྒྱལ་པོའི་བཏང་ནས། དར་ལྕོག་དང་ཡིག་དྲུག་གི་ཕན་ཡོན་སོགས་ཆོས་རྒྱལ་གྱི་གསུང་ཕྲིན་རྣམས་ཡི་གེར་བཀོད་དོ། །ཡང་བྱང་ཆུབ་སེམས་དཔའ་ཉག་ཕྲུག་བྱང་ཆུབ་སེང་གེ་ཤི་ནས་དམྱལ་ཁམས་འགྲིམ་དུས། ཀྱེ་མ་ཆོས་ཉིད་བར་དོ་ཨ་ཙ་མ། །སྒྲ་འོད་ཟེར་གསུམ་ང་རེ་བསྔངས། །གཤིན་རྗེའི་གཟུགས་བརྙན་མཐོང་ཙ་གློ་སྙིང་འདར། །ཡི་
དམ་ལྷ་ངོ་མ་ཤེས་ང་རེ་ཕམ། །ཞེས་གསུངས་ཤིང་། ཉི་ཟླའི་ཕོ་བྲང་དུ་ཞྭ་ནག་ཅོད་པན་ལ་རང་དང་མཚུངས་པའི་པཎ་ཆེན་སྟོང་གིས་བསྐོར་ནས་ཞལ་ནས་ཡིག་དྲུག་གསུངས་ནས་ཧཱུྃ་ལས་འོད་ཟེར་མཐིང་ཁ་ཉི་ཟླ་ཙམ་སྟོང་ཕྲག་གི་སྣ་ལ། སེམས་ཅན་དུང་ཕྱུར་ཐར་ལམ་ལ་འདྲེན་དོ་བ་དུས་གསུམ་མཁྱེན་པ་ཡིན་གསུངས། རྣལ་འབྱོར་པ་གཅིག་གིས་མ་ཎི་པདྨེ་འཆམས་ཤིང་བྱུང་ཙ་ན་ཡི་གེ་དེ་ལ་གསེར་གྱི་ཐོ་བ་རི་རབ་ཙམ་ཆད་ནས་ལྕགས་མཁར་གྱིས་སྒོ་བཅོམ་སྟེ། སེམས་ཅན་དུང་ཕྱུར་ཙམ་ཡར་ཁྲིད་ནས་ཐལ་བ་རྨ་སེ་རྟོགས་ལྡན་ཡིན་གསུངས། གཤིན་རྗེ་ཆོས་ཀྱི་རྒྱལ་པོའི་ཞལ་ནས་ཉག་ཕྲུག་ལ་གསུངས་པ། འོ་རིགས་ཀྱི་བུ་ཉོན་དང་། ཆོས་ཐམས་ཅད་ཡི་གེ་དྲུག་མ་ཡིན། བརྒྱ་ཚོ་བཏོན་ན་ལུས་ངག་ཡིད་གསུམ་གྱི་སྒྲིབ་པ་དག །སྟོང་ཚོ་རེ་བཏོན་ན་མི་དགེ་བ་བཅུའི་སྒྲིབ་པ་དག །ཁྲི་ཚོ་རེ་ཚར་ན་དམ་ཚིག་ཉམས་ཆག་བྱུང་། འབུམ་ཐེར་ཚར་ན་དཀོར་གྱི་ཕུང་པོ་རི་རབ་ཙམ་ཟོས་པ་ཡང་དག་གོ །བྱེ་བ་ཚར་ན་མཚམས་མེད་པ་ལྔའི་སྡིག་པ་དག །བྱེ་ཆེན་ཚར་ན་ངན་སོང་དུ་འཕང་ཡང་མི་འགྲོ། དུང་ཕྱུར་ཚང་ན་བདག་གཞན་དུས་གཅིག་ཏུ་སངས་རྒྱས་པ་ལ་ཐེ་ཚོམ་མེད་གསུངས། ལས་རྒྱུ་
འབྲས་མང་དུ་གཟིགས། རྒྱལ་པོའི་གསུང་ཕྲིན་ཁྱེར་ནས་ཉག་ཕྲུག་གསོན་བྲ་ང་ཁམས་ན་ལོག་ནས་མཐོང་ཚུལ་དང་། གསུང་ཕྲིན་ཡི་གེར་བཀོད་སྐད་དོ། །ཡང་པཎྜི་ཏ་སྨི་ཏི་ཛྙཱ་ནའི་སྐྱེ་བ་ཀུ་སུ་ལུ་པ་དེ་ཤི་ནས་བར་དོ་དང་དམྱལ་ཁམས་བསྒྲོད་དུས། བྱ་བྲལ་དཀོན་མཆོག་སེང་གེ་ཡིན་ཟེར་བ་གཅིག་མ་ཎི་པད་དབྱངས་དི་རི་རི་བྱེད་ཅིང་སེམས་ཅན་འབུམ་ཐེར་སྟོང་དང་ཁྲི་ཚོ་དྲུག་སྤྱན་རས་གཟིགས་ཀྱི་ཞིང་ཁམས་སུ་སྐྱེལ་བ་ཡིན་ཟེར་ནས་ཐལ། ཡང་རྒྱལ་པོས་ཕྱག་དང་མཆོད་པ་ཕུལ། དགེ་སྡིག་གི་གཤག་རལ་མི་དགོས་དང་སྤྱན་རས་གཟིགས་ཀྱི་སྤྲུལ་པ་ཡིན་གསུངས། གཤིན་རྗེ་ཆོས་ཀྱི་རྒྱལ་པོས་གསུང་ཕྲིན་བསྐུར་བ། གཤིན་ཡུལ་ཁྲ་མོ་འགྲིམས་ནས་འོང་བ་ལ། ཟོག་ཡོད་བརྒྱ་བས་མ་ཎི་པདྨེ་རྡོག་གཅིག་གིས་ངོ་ཆེ་དོ་གྱིས། བྲ་ང་ཁམས་ན་བདེ་སྐྱིད་ཕུན་སུམ་ཚོགས་པ་བས་འདི་ན་མུ་གེའི་ཤི་ལ་ཁད་ཅིག་ལ་མ་ཎི་རྡོག་གཅིག་ཁྱེར་རྒྱུ་ཡོད་ན་ངོ་ཆེ་དོ་གྱིས། བྲ་ང་ཁམས་ན་བདག་འཛིན་མགོ་མ་ནོན་པའི་མིའི་ཕྱི་ནང་གསང་གསུམ་གྱི་ཆོས་མ་ལུས་པ་འཆད་ཉན་ཤེས་པ་བས། འདི་ན་འོང་ཆིས་ཀྱི་དམིགས་པའི་མ་ཎི་རྡོག་གཅིག་ཙམ་གྱིས་ངོ་སོ་ཆེ་དོ་གྱིས། བྲ་ང་ཁམས་ན་ཞག་
གཅིག་གི་ནང་དུ་ཆོས་ཐམས་ཅད་ཀྱི་བསྐྱེད་རིམ་ཚར་བ་བས། འདི་ན་སེམས་རང་ཐོག་ན་སེ་གོལ་བརྡབ་པའི་ཡུན་གྱིས་བཞག་པའི་ངོ་སོ་ཆེ་དོ་གྱིས། ཞེས་གསུང་ཕྲིན་རྣམས་ཁྱེར་ཏེ་ལས་མཁན་སེང་གེའི་མགོ་ཅན་གྱིས་བསྐྱེལ་ནས་གསོན་བྲ་ང་ཁམས་ན་ཕྱིན་ཏེ། མཐོང་ཚུལ་དང་གསུང་ཕྲིན་ཡི་གེར་བཀོད་སྐད་དོ། །དེ་ལྟར་རང་གི་སྡིག་སྒྲིབ་སྦྱང་བ་གཞན་ཚེ་འདས་འདྲེན་༈ པ་ལའང་ཡི་དམ་ཐུགས་རྗེ་ཆེན་པོ་བྱས་ནས་ཆོས་ཡི་གེ་མ་ཎི་པདྨེ་བསྒྲང་བ་ལས་ལྷག་མེད་དོ། །དེའི་ཕྱིར་སྤྲུལ་པའི་ཆོས་རྒྱལ་སྲོང་བཙན་སྒམ་པོས། ལྷ་ཐུགས་རྗེ་ཆེན་པོ་འགྲོ་དྲུག་སྤྱིའི་ལྷ་ཡིན་པས་ཉིན་མཚན་མེད་པར་ཐུགས་རྗེས་སྤྱན་གྱིས་གཟིགས་པ་ཡིན། ཁྱད་པར་བོད་ཁ་བ་ཅན་གྱི་མི་རྣམས་ཀྱིས་ལྷ་སྐལ་མཛད་པས་བྱིན་རླབས་ཁྱད་པར་ཆེ་བ་ཡིན་པས། ཐུགས་རྗེ་ཆེན་པོ་ལ་གསོལ་བ་བཏབ་དགོས། སྙིང་པོ་ཡི་གེ་དྲུག་པ་བཟླ་དགོས། འགྲོ་དྲུག་གཡང་ས་གཅོད་པ་ཡིན། འདི་ཉམས་སུ་ལོངས་ཤིག །ཅེས་དང་། སྡིག་པ་རྩད་ནས་གཅོད་པ་ལྷ་ཐུགས་རྗེ་ཆེན་པོའི་སྙིང་པོ། ཨོཾ་མ་ཎི་པདྨེ་ཧཱུཾ། འདི་སྒྲོངས་ཤིག །སྡིག་པ་མཚམས་མེད་ལྔ་བྱས་པ་ཡང་བྱང་ཞིང་དག་གོ །ཨོཾ་མ་ཎི་པདྨེ་ཧཱུྃ། ཞེས་པའི་ཡི་གེ་དྲུག་པ་འདི་
བཟླའོ། །སྡིག་སྒྲིབ་ཐམས་ཅད་དག་ནས་བླ་ན་མེད་པའི་བྱང་ཆུབ་ཐོབ། ཡི་དམ་ཐུགས་རྗེ་ཆེན་པོ་བསྒོམ། སྙིང་པོ་ཨོཾ་མ་ཎི་པདྨེ་ཧཱུཾ། ཞེས་པ་ཡི་གེ་དྲུག་པ་བཟླས་སོ། །འགྲོ་དྲུག་གནས་སྦྱངས་པ་ཡིན་ནོ། །ཞེས་དང་། ཨོཾ་མ་ཎི་པདྨེ་ཧཱུཾ། ཞེས་ངག་གི་བཟླས་པ་དེའི་ལྟོ་བ་ན་གནས་པའི་སྲིན་བུ་དང་། ལུས་ལ་གནས་པའི་ཤིག་ལྡི་བ་ལ་སོགས་སྲོག་ཆགས་ཐམས་ཅད་ངན་སོང་ནས་ཐར་ལ། གང་གིས་བཟླས་པའི་ལུས་ཀྱིས་རླུང་སེམས་ཅན་ལ་ཕོག་པས་ཀྱང་སྒྲིབ་པ་དག་པར་བཤད་དེ། རྒྱུན་ཏུ་བཟླས་པས་བྱང་ཆུབ་ཐོབ་པ་ལྟ་ཅི་སྨོས། ཐུགས་རྗེ་ཆེན་པོ་ཧྲིལ་གྱིས་དྲིལ་བས་ཨོཾ་མ་ཎི་པདྨེ་ཧཱུཾ་ཞེས་སྙིང་པོ་ཡི་གེ་དྲུག་པ་འདི་ལ་འདུས་པ་ཡིན། འགྲོ་བ་རིགས་དྲུག་སྤྱིའི་སྒྲིབ་པ་ཡང་འདིས་སྦྱངས། དངོས་གྲུབ་ཀྱང་འདིས་ཐོབ། བྱིན་རླབས་ཀྱང་འདི་ལས་འབྱུང་བ་ཡིན་པས། རྒྱུན་དུ་ཡི་གེ་དྲུག་པ་བསྒྲུངས་ལ་གསོལ་བ་ཐོབ་ཅིག །ཇི་ལྟར་བསམ་པ་ལྟར་འགྲུབ་པ་ཡིད་བཞིན་གྱི་ནོར་བུ་རིན་པོ་ཆེ་ཡིན་ནོ། །རང་བཞིན་གྱི་དོན་དུ་ཐུགས་རྗེ་ཆེན་པོའི་ཡང་སྙིང་། ཨོཾ་མ་ཎི་པདྨེ་ཧཱུཾ། ཞེས་པ་འདི་རྒྱུན་དུ་བཟླས་པས་སྙིང་པོ་བྱང་ཆུབ་ཐོབ་པར་གདོན་མི་ཟའོ། །སྙིང་པོ་ཨོཾ་མ་ཎི་པདྨེ་
ཧཱུྃ༔ ཞེས་པ་འདི་ཡིད་བཞིན་གྱི་ནོར་བུ་རིན་པོ་ཆེ་ཡིན་པས་མཆོག་ཐུན་མོང་གི་དངོས་གྲུབ་ཐམས་ཅད་འདི་ལས་འབྱུང་བ་ཡིན་པས་འདི་ཟློས་ཤིག །འདི་ལ་ནན་ཏན་བསྐྱེད་ཅི་པོ་མ་ནོར་བ་ཡི་གེ་དྲུག་པ་འདི་ཡིན་ཏེ། ཨོཾ་མ་ཎི་པདྨེ་ཧཱུཾ། ཞེས་པ་འདི་ཡིས་འགྲོ་དྲུག་སྡུག་བསྔལ་སྦྱོངས་ཤིང་སྐྱེ་སྒོ་གཅོད་པ་ཡིན་པས། རྒྱུན་དུ་བཟླ་བ་པ་གལ་ཆེ། ཞེས་དང་། ཡང་འོད་ཟེར་བླ་མའི་གསུང་སྒྲོས་དེའི་སློབ་མ་བསོད་ནམས་སེང་གེས་འབྱམས་ཡིག་བསྐུར་བ་ལས་ཀྱང་། ཨོཾ་མ་ཎི་པདྨེ་ཧཱུྃ། གཅིག་གམ་བདུན་གྱི་བར་ལ་འདོན་ན། བསྐལ་པ་བརྒྱ་སྟོང་ཇི་སྙེད་ཅིག་འཁོར་བར་འགྱུར་བའི་སྡིག་པ་དང་སྒྲིབ་པ་ཐམས་ཅད་འབྱངས་ཤིང་དག་པར་འགྱུར་རོ། །འདི་འདོན་ཅིང་འཛིན་པ་དག་ཆུ་ཀླུང་ངམ་རྒྱ་མཚོར་ཞུགས་ཏེ། ཁྲུས་བྱས་ན་དེར་གནས་པའི་སེམས་ཅན་དེ་དག་གི་ལུས་ལ་ཆུས་རེག་པར་གྱུར་ན། སྡིག་པ་ཐམས་ཅད་བྱང་ཞིང་དག་ནས་པདྨ་ལ་བརྫུས་ཏེ་སྐྱེ་བར་འགྱུར་རོ། །དེ་རྒྱུ་གཏོང་བ་ལ་མ་རྩིས་ན་ཕྲེང་བསྐོར་གཉིས་ལ་དངུལ་བྲེ་ཆེན་གཅིག་སྟོང་ལ་ལྔ། འབུམ་ཐེར་བརྒྱ་ལ་དངུལ་བྲེ་ཁྲི་ཚོ་ལྔ་བཏང་བའི་བསོད་ནམས་ཡོད་པས། རང་གིས་འདོན་པ་དང་གཞན་ལ་འདོན་བཅོལ་བ་ལ་
འབད་པར་བྱེད་དོ། །ཞེས་དང་། མདོ་རྒྱུད་ཀྱི་དགོངས་པ་ལུང་བསྟན་ལྟར་གསུང་མཆོག་ཡི་གེ་དྲུག་པ་རང་གཞན་གྱིས་འདོན་ཅིང་བསྐུལ་བ་ལ་འབད་ན། གནས་སྐབས་ཀྱི་བདེ་སྐྱིད་མཐར་ཐུག་བདེ་བ་ཅན་གྱི་ཞིང་ཁམས་སུ་དོན་གཉིས་མཐར་ཕྱིན་སངས་རྒྱས་ཐོབ་ནས། ཕྲིན་ལས་མི་ཟད་རྒྱན་གྱི་འཁོར་ལོ་ཇི་སྲིད་འཁོར་བ་མ་སྟོང་གི་བར་དུ་འགྲོ་དོན་ལྷུན་གྲུབ་རྒྱ་ཆེན་པོ་འབྱུང་བར་འགྱུར་རོ། །ཞེས་གསུངས་སོ། །མདོར་ན་སྤྱི་སྔགས་ཡིག་དྲུག་དང་། ལྷ་ཐུགས་རྗེ་ཆེན་པོ་ཉམས་སུ་ལེན་པར་བྱ་སྟེ། རྗེ་དབང་ཕྱུག་རྡོ་རྗེས། ཆོས་ཀྱི་སྙིང་པོ་བསྐྱེད་རྫོགས་གཉིས་ལ་འདུས། དེའི་གཙོ་བོ་བོད་གངས་ཅན་པའི་ཆོས་སྐལ་ཡིག་དྲུག །ལྷ་སྐལ་སྤྱན་རས་གཟིགས་ཡིན་པས། འདི་འགྲུབ་ཐག་ཉེ་ཞིང་གང་ལས་བྱིན་རླབས་ཆེ་བ་རྩེ་གཅིག་བསྒྲུབ་པར་བྱ་དགོས་ཞེས་གསུངས་ལ། དེའི་ནང་ནས་ཀྱང་རྒྱལ་བ་རྒྱ་མཚོ་འདི་སྙིང་པོ་ཡང་སྙིང་དམ་པ་ཡིན་ཏེ། རྒྱལ་བ་རྒྱ་མཚོའི་གཞུང་ཉིད་ཡིག་རྙིང་གྲུབ་པའི་རྒྱལ་མོས་རས་ཆུང་པ་ལ་གནང་བ་ལས་ཚོགས་འཁོར་དཔོན་སློབ་ཡོན་གྱིས་མཉེས་ནས། ཞག་བདུན་བསྒྲུབས་ཀྱང་ཕྲིན་ལས་དུས་གསུམ་སངས་རྒྱས་དང་མཉམ་པར་འགྱུར་རོ། །
འདི་ལས་ཟབ་པ་མེད་དོ། །ཞེས་དང་། ཞག་བདུན་གྱིས་ཞལ་མཐོང་དངོས་གྲུབ་མ་ལུས་པ་འབྱུང་བ་ཤིན་ཏུ་གསང་བར་བྱ། ཞེས་དང་། སྐད་ཅིག་དྲན་པ་ཙམ་གྱིས་མཆོག་ཐུན་མོང་གི་དངོས་གྲུབ་ཐོབ་ནས་མཁའ་སྤྱོད་དུ་ཁྲིད་པར་བྱེད་ཚེ། རྟགས་དང་འཇའ་དང་སྐུ་གདུང་རིང་བསྲེལ་ཤ་རིར་འབྱུང་གྱུར་ཏེ། ཐེ་ཚོམ་ཡོད་པ་མ་ཡིན་ཞེས་གསུངས་སོ། །ཡང་རྒྱལ་བ་རྒྱ་མཚོའི་དབང་ཆོག་ཡིག་རྙིང་ལས། སྣང་བ་མཐའ་ཡས་ཀྱི་བྱིན་རླབས། སློབ་དཔོན་པདྨའི་དགོངས་པ། མཁའ་འགྲོ་རྒྱ་མཚོའི་གསང་སྐོར། དཔའ་བོ་རྣམས་ཀྱི་ཊིཀ །སྤྱན་རས་གཟིགས་དབང་ཕྱུག་གི་གསང་སྒྲུབ། རྒྱུད་སྡེ་བཞིའི་སྤྱི་སྒྲུབ། ཅེས་གསུངས་སོ། །དེ་ཡང་ཆོས་བྱེད་པ་ལ་དོན་ཕྱི་མ་ཅི་འགྱུར་བརྟགས་དགོས། ལྷ་མིར་སྐྱེས་ཀྱང་སྡུག་བསྔལ་གྱི་རང་བཞིན། ཞིང་ཁམས་ཆུང་ངུ་རྣམས་སུ་སྐྱེས་ཀྱང་སླར་མི་ལྟུང་བའི་ཐག་ཆོད་མེད། དག་པའི་ཞིང་མཆོག་ཏུ་ནི་སྐྱེས་དཀའ་སྟེ། མ་གཅིག་ལབ་སྒྲོན་གྱི་དམ་ཚིག་ཉེར་གཅིག་མ་ལས། ། བདེ་བ་ཅན་མ་གཏོགས་པའི་ཞིང་ཁམས་རབ་རྣམས་སུ་ས་བརྒྱད་མ་ཐོབ་པར་མི་སྐྱེ། ཞིང་འབྲིང་རྣམས་སུ་ཉོན་སྒྲིབ་ཕྲ་བ་རྣམས་སྤངས། བསྒོམ་ལམ་ཡན་ཐོབ་དགོས་དེ་མིན་