བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལས་འོག་དམ་ཅན་རྒྱ་མཚོའི་གཏོར་འབུལ།
བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལས་འོག་དམ་ཅན་རྒྱ་མཚོའི་གཏོར་འབུལ་བཞུགས་སོ།།
དཀར་གཏོར་དམར་གཏོར་གཉིས་བཤམས། དཀར་གཏོར་གནམ་ཆོས་ལས་བྱུང་བ་ལྟར་བསྔོ་ཞིང་དཀར་ལ་དགའ་བ་ཐམས་ཅད་ལ་དམིགས། དམར་གཏོར་བྲན་ལ། ན་མོ་རྩ་བརྒྱུད་སོགས། ཤ་ཁྲག་བདུད་རྩི་གྱུར་པ་སྲུང་མས་རོལ། ཨོཾ་ཨཱཿཧཱུྃ་ཧ་ཧོ་ཧི་རོ་བཅུད་ནུས་པ་ཕུན་སུམ་ཚོགས་པར་བསམས་ལ། ཨོཾ་མ་ཧཱ་ཀཱ་ལི་ཀཱ་ལི་སརྦ་དྷརྨ་པ་ལ་དགྲ་བགེགས་ཀྱི་སོགས བྷ་ལིཾ་ཏ་ཁཱ་ཧི། ཧཱུྃ། གསོན་ཅིག་མ་ཧཱ་ཀཱ་ལ་ཆེ། གསོན་ཅིག་རྣལ་འབྱོར་དབང་ཕྱུག་མ། །གསོན་ཅིག་གཤིན་རྗེ་ཕོ་མོའི་ཚོགས། །གསོན་ཅིག་ཕོ་རྒྱུད་མོ་རྒྱུད་ཚོགས། །ལྕམ་དྲལ་ཁྱེད་རྣམས་བཀའ་འཁོར་ན། །ཤ་ཟ་ཁྲག་འཐུང་བྱེ་བ་
སྟོང་། །ཁྱད་པར་སྲོག་གཅོད་ཤན་པ་བརྒྱ། །ཕྱོགས་རྣམས་སྐྱོང་བའི་མགོན་པོ་བཅུ། །དྲེགས་པའི་གཙོ་བོ་བདུན་ཅུ་གཉིས། །ཁྱད་པར་མྱུར་མགྱོགས་རྩལ་ལྡན་གསུམ། །མ་བདུན་སྲིང་བཞི་འབར་མ་དགུ། །དུས་ལ་འཆར་བའི་ལྷ་མོ་བཞི། །དམག་གི་རྒྱལ་མོ་ཆེན་མོ་བཞི། །དབང་ཕྱུག་ཉེར་བརྒྱད་བརྟན་མར་བཅས། །གཞན་ཡང་སྤྲུལ་པ་ཡང་སྤྲུལ་ཚོགས། །ཁྲོ་ཆུ་དུག་གདོང་ལས་གཤིན་དྲུག །ཀིང་ཀང་དམར་ནག་དྲེགས་པའི་ཚོགས། །འཆར་ཁ་ནག་པོ་མ་གཤིན་ཚོགས། །སེང་གདོང་ལྷ་མོ་ཌཱཀྐིའི་ཚོགས། །ཕྱག་བཞི་བྱ་
སེང་ཡུམ་དང་འཁོར། །མྱུར་མཛད་མགོན་པོ་གནོད་སྦྱིན་བཞི། །མ་ནིང་སྲོག་བདུད་ཏྲཀྐད་བཅས། །སེང་གདོང་ཡབ་ཡུམ་བམ་རོ་བཅས། །སྲིན་མགོན་གཉན་མགོན་དབང་རྒྱུཕྱུག་བཅས། །བྲག་མགོན་མདུང་འཛིན་རྟ་ནག་དྲེགས། །སྔགས་སྲུང་ཤན་པ་དམར་ནག་དང་། །ཁ་མོ་ཆེ་དང་ངན་ནེ་མ། །དུར་ཁྲོད་བདག་པོ་ཡབ་ཡུམ་བཅས། །ཚེ་རིང་མཆེད་ལྔ་ཨ་ཕྱི་མ། །ཚོགས་བདག་སྔགས་བདག་དྲེགས་པ་ཀླུ། །རེ་མ་ཏི་དང་རཱ་ཧུ་ལ། །འབར་བ་སྤུན་བདུན་རྡོ་རྗེ་རྒྱལ། །སྨྱོ་ཁ་མཁའ་རི་ཐང་ལྷ་འབར། །།ཐང་ལྷ་དྲེགས་པ་སུམ་སྒྲིལ་དང་། །ལུང་བཙན་བེག་རྩེ་སྤུ་གྲི་མཆེད། །མ་མགོན་སྡེ་བརྒྱད་ཇག་མེ་དང་། དྲེགས་ཆེན་བཅོ་བརྒྱད་ཨ་ཙ་ར། །དྲེགས་པ་ཉི་ཤུ་རླུང་ལྷར་འཚུབ། །སྡེ་དཔོན་སུམ་ཅུ་སྡེ་འཁོར་བཅས། །དགེ་བསྙེན་ཉེར་གཅིག་སྤྲུལ་པའི་ཚོགས། །བྱ་ནག་ཚོགས་དང་ཁྱི་ནག་ཚོགས། །གཅན་གཟན་མཁའ་ལྡིང་གདུག་པའི་ཚོགས། །ནམ་མཁའ་ས་བགཞི་བར་སྣང་གང་། །འཇིགས་རུང་རྔམ་པའི་ང་རོ་ཅན། །མི་བཟོད་མཚོན་ཆའི་ཆར་པ་འབེབས། །འདིར་གཤེགས་བཀའ་ཡི་གཏོར་མ་ལོངས། །དེ་རིང་དཔལ་ཆེན་དམ་ལ་
འདུས། །བདེ་གཤེགས་བསྟན་པ་རིན་ཆེན་འདི། །ཁྱོད་ཀྱིས་བསྲུང་བྱ་མ་ཡིན་ནམ། །དམ་ཉམས་ལོག་པར་བལྟ་བ་འདི། །ཁྱོད་ཀྱིས་བསྒྲལ་བྱ་མ་ཡིན་ནམ། །ཆོས་བཞིན་སྤྱོད་པའི་སྒྲུབ་པ་པོ། །ཁྱོད་ཀྱིས་སྐྱོང་བྱ་མ་ཡིན་ནམ། །དམ་རྫ་ས་དམར་གྱི་གཏོར་མ་འདི། ཁྱོད་ཀྱིས་བླང་བྱ་མ་ཡིན་ནམ། །སྔོན་ཚེ་དཔལ་ཆེན་སྤྱན་སྔ་རུ། ཁས་བླངས་དམ་བཅས་མི་དྲན་ནམ། །པདྨ་ཐོད་ཕྲེང་ལ་སོགས་པའི། །རིག་འཛིན་བཀའ་ལ་མི་བརྩི་འམ། །།རྩ་བར་བརྒྱུད་པའི་བླ་མ་ཡི། །བཀའ་དང་དམ་ལ་མི་གནས་སམ། །ད་ལྟ་རྣལ་འབྱོར་བདག་ཅག་གིས། །གདུང་བའི་གསོལ་བཏབ་མི་གསན་ནམ། །ཧཱུྃ། མ་གཡེལ་མ་གཡེལ་ལྷ་ཆེན་པོ། །མ་གཡེལ་མ་གཡེལ་དཔལ་ལྷ་མོ། །མ་གཡེལ་མ་གཡེལ་ཆོས་སྐྱོང་ཚོགས། །མ་གཡེལ་མ་གཡེལ་བཀའ་སྡོད་ཚོགས། །གཡབ་པའི་ཚེ་ན་སྤྱན་མ་རྟུལ། །བོས་པའི་ཚེ་ན་སྙན་མ་སྲ། །བརྟེན་པའི་ཚེ་ན་རྒྱང་མ་རིང་། །བསྐུལ་བའི་ཚེ་ན་མཐུ་མ་ཆུང་། །རྦད་པའི་ཚེ་ན་རྩལ་མ་ཞན། །ད་དུས་སྙིགས་མ་ལྔ་ཡི་དུས། །ནག་པོའི་སྤྱོད་པ་ཁ་དར་བས། །སངས་རྒྱས་བསྟན་པ་
འཇིག་ལ་ཁད། །དཀོན་མཆོག་དབུ་འཕང་སྨད་ལ་ཐུག །དམ་ཉམས་ལོག་པར་ལྟ་བ་འདིས། །ངན་སོང་གསུམ་གྱི་ས་བོན་སྒྲུབ། །འདི་ལ་ཆོས་སྐྱོང་ཁྱེད་རྣམས་ཀྱིས། །བྱམས་པའི་ཐུགས་ཀྱིས་བཟོད་ཕོད་དམ། །བསྐུལ་ལོ་བསྐུལ་ལོ་ཁྲོས་པར་བསྐུལ། །བཞེངས་ཤིག་བཞེངས་ཤིག་རྔམ་པར་བཞེངས། །རྒྱུག་ཅིག་རྒྱུག་ཅིག་རིངས་པར་རྒྱུགས། །མཛོད་ཅིག་མཛོད་ཅིག་ལས་མཛོད་ཅིག །འབར་བའི་ལྕགས་ཀྱུས་སྙིང་ནས་ཟུངས། །བདུད་ཀྱི་ཞགས་པས་དམ་དུ་ཆིངས། །ལྕགས་སྒྲོག་འབར་བས་གནས་ལྔ་སྡོམས། །དྲིལ་ཆེན་སྒྲ་ཡིས་མྱོས་པར་གྱིས། །ཧཱུྃ། སྲུང་བྱེད་འབར་བའི་ལྕགས་ཁང་ནང་། །འདེབས་བྱེད་ཁྲོ་ཆེན་ཕུར་པའི་དབལ། །དྲག་པོ་གསོད་བྱེད་ཐུན་གྱི་ཆར། །གནོད་བྱེད་དགྲ་བགེགས་མཱ་ར་ཡ། །གཅོད་བྱེད་རལ་གྲི་རྣོ་བའི་མཚོན། །རྡུང་བྱེད་ཐོ་བ་གཏུན་ཤིང་ཚོགས། །འབིགས་བྱེད་མདའ་དང་མདུང་རྣམས་ཀྱིས། །སྡང་བའི་དགྲ་བགེགས་མཱ་ར་ཡ། །ཧཱུྃ། ལྕམ་དྲལ་བཀའ་སྲུང་ཐམས་ཅད་ཀྱིས། །སྡང་བྱེད་དམ་ཉམས་དགྲ་བགེགས་འདིས། །དབང་པོ་ལྔ་ལ་ཁ་རཾ་ཁཱ་ཧི། །རྣམ་ཤེས་བརྒྱད་ལ་ཁ་རཾ་ཁཱ་ཧི།
འབྱུང་བ་ལྔ་ལ་ཁ་རཾ་ཁཱ་ཧི། །ཤ་ཁྲག་རུས་ལ་ཁ་རཾ་ཁཱ་ཧི། །དོན་སྙིང་ལྔ་ལ་ཁ་རཾ་ཁཱ་ཧི། །སྲོག་དང་དབུགས་ལ་ཁ་རཾ་ཁཱ་ཧི། །སྡང་བྱེད་དགྲ་བོ་བྱད་མ་འདིས། །འགོ་བའི་ལྷ་ལ་ཁ་རཾ་ཁཱ་ཧི། །སྲུང་བའི་མགོན་ལ་ཁ་རཾ་ཁཱ་ཧི། །བྱམས་པའི་ཕ་མ་ལ་ཁ་རཾ་ཁཱ་ཧི། །མཐུན་པའི་ཉེ་དུ་ལ་ཁ་རཾ་ཁཱ་ཧི། །བརྩེ་བའི་གྲོགས་བཤེས་ལ་ཁ་རཾ་ཁཱ་ཧི། །ཕན་པའི་གཉེན་ཡ་ལ་ཁ་རཾ་ཁཱ་ཧི། །འཁོར་བའི་བྲན་གཡོག་ལ་ཁ་རཾ་ཁཱ་ཧི། །ཤ་ལ་དགའ་བའི་སྲུང་མ་རྣམས། །དགྲ་བགེགས་ཤ་ལ་ད་ཟོ་ཅིག །ཁྲག་ལ་རྔམས་པའི་ཕོ་ཉ་རྣམས། །དགྲ་བགེགས་ཁྲག་ལ་ད་འཐུང་ཅིག །གསོད་ལ་དགའ་བའི་ཤན་པ་རྣམས། །གནོད་བྱེད་དགྲ་བགེགས་ད་སོད་ཅིག །གཅོད་ལ་དགའ་བའི་རྔོན་པ་རྣམས། །དགྲ་བགེགས་སྲོག་རྩ་ད་ཆོད་ཅིག །ཧཱུྃ། བྱམས་པ་ཆེན་པོས་བསྒྲལ་བའི་ལས། །འདི་ནི་བྱང་ཆུབ་མཆོག་གི་རྒྱུ། །བསྒྲལ་བར་བྱ་བ་མི་དམིགས་པས། །བསྒྲལ་དང་སྒྲོལ་བྱེད་དབྱིངས་སུ་ཞི། །གཏོར་མ་བཀྱག་གམ་ཕྱིར་བསྒྱུར་ལ། ཐྩོ༔ རྡོ་རྗེ་གར་གྱི་སྐག་ཟློག་མ། །ཤར་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་
མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །རིན་ཆེན་གར་གྱི་སྐག་ཟློག་མ། །ལྷོ་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །པདྨ་གར་གྱི་སྐག་ཟློག་མ། །ནུབ་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །ལས་ཀྱི་གར་གྱི་སྐག་ཟློག་མ། །བྱང་ཕྱོགས་གདོན་གྱི་སྐག་སྒྱུར་ཅིག །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །གཞན་གྱིས་ཕུར་ཆེན་འདེབས་པ་ཟློག །ཚེ་ཟོར་ཡུངས་ཟོར་འཕེན་པ་ཟློག །གཤིན་རྗེས་འཁོར་ལོ་བསྐོར་བ་ཟློག །བདུད་ཀྱིས་ཁྲམ་ལ་བཏབ་པ་ཟློག །མ་མོས་ཁྲག་ཟོར་འཕེན་པ་ཟློག །ཀླུ་ཡིས་བྱད་དུ་བཅུག་པ་ཟློག །ཕོ་ཉས་བླ་སྲོག་འཕྲོག་པ་ཟློག །ཐེའུ་རང་ཚེ་ལ་བརྐུ་བ་ཟློག །མུ་སྟེགས་ངན་སྔགས་བྱེད་པ་ཟློག །ཞང་ཞུང་ཇོ་ཟོར་འཕེན་པ་ཟློག །བོན་པོའི་སྔགས་ལོག་བསྒྲུབས་པ་ཟློག །སུམ་པས་གླིང་ཟོར་འཕེན་པ་ཟློག །སྐྱེས་པས་མདའ་ཟོར་འཕེན་པ་ཟློག །བུད་མེད་དམོད་ཟོར་འཕེན་པ་ཟློག །ལྟས་ངན་བརྒྱད་ཅུ་རྩ་གཅིག་
ཟློག །ཡེ་འདྲོག་སུམ་བརྒྱ་དྲུག་ཅུ་ཟློག །བགེགས་རིགས་སྟོང་ཕྲག་བརྒྱད་ཅུ་ཟློག །བྱིས་པའི་གདོན་ཆེན་བཅོ་ལྔ་ཟློག །བཟློག་གོ་དམར་ཆེན་གཏོར་མས་*ཟློག །བསྒྱུར་རོ་ལྟས་ངན་དགྲ་ལ་སྒྱུར། །གཏོར་མ་ཕྱིར་ཁྱེར་བཅུག་ཅིང་། ཨོཾ་ལོཀ་ཏྲི་པཱ་ལ་ནན། ས་ག་པ་ཤ་ནན། ནཱ་ག་དུ་དུ་ནན། མ་མཾ་མ་མཾ། ཙི་ཙ་ར་ཙི་ཙ་ར། ཐཾ་རུ་ལུ་ཁཾ་རུ་ལུ། རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ། ཧོ་ར་ཧོ་ར། ཙི་དུ་སོད་ཙི་དུ་སོད། ཤིག་ལྷུ་རུ་གཏུབས། ཧ་ལ་པ་ཏི་ནན། འཁོར་བ་དུལ། བདག་གི་གནོད་བྱེད་ཀཱ་ཝཱ་ཙི་བརླག་བརླག །ཅེས་རོལ་མོ་དྲག་ཏུ་བྱའོ། །གཏོར་སྣོད་ཚུར་ལམ་ཁ་ནང་དུ་བསྟན་ཏེ་ཁྱེར་ནས་མདུན་དུ་སྤྲུབ་ལ། ན་མོ་དཀོན་མཆོག་རྩ་བ་གསུམ་གྱི་བདེན་པས་གནོད་བྱེད་དགྲ་བགེགས་བྱད་མ་དམ་སྲི་ཐམས་ཅད་ས་རིམ་པ་དགུ་ཡི་ས་འོག་ལྕགས་སྒྲོམ་གྲུ་གསུམ་མེ་འབར་བའི་ནང་དུ་ཚུད་པའི་སྟེང་དུ་གཏོར་སྣོད་སུམ་རིམ་ལས་རི་རབ་སྣ་ཚོགས་རྡོ་རྗེས་མཚན་པ་གཅིག་གིས་བསྐལ་པའི་བར་དུ་མནན་པར་གྱུར། ཧཱུྃ། ཐུགས་རྗེའི་འགྲོ་འདུལ་དཀྱིལ་འཁོར་དུ། །བར་ཆད་དམ་སྲི་འདུལ་བའི་ལྷ། །ཁྲོ་བོའི་རྒྱལ་པོ་རྟ་མཆོག་དཔལ། །དབང་ཆེན་རྔམས་
པའི་སྒྲ་སྒྲོག་ཅིང་། །དཔལ་གྱི་རྟ་སྐད་ཙེ་རེ་རེ། །ཁྲོ་བོའི་འབྲུག་སྒྲ་དྷི་རི་རི། །རོལ་པའི་རྟ་བྲོ་ཆེམས་སེ་ཆེམ། །བར་ཆད་དམ་སྲི་རྡུལ་དུ་རློག །ཨོཾ་ཧིཔདྨནྟ་ཀྲི་ཏ་བཛྲ་ཀྲོ་དྷ་བྱ་གྷི་ཝ་ཧུ་ལུ་ཧུ་ལུ་ཧཱུྃ་ཕཊ༔ གནོད་བྱེད་དམ་སྲི་སྟམྦྷ་ཡ་ནན། ཞེས་གཏོར་བྲོ་བརྡུང་ལ། གཏོར་གཞོང་ཁ་གྱེན་དུ་ཟེད་ལ་དངོས་གྲུབ་ཀྱིས་གང་བར་བསམས་ལ། སརྦ་སིདྡྷི་ཕ་ལ་ཨ་ལ་ལ་ཧོ། ཞེས་མགོན་པོའི་གཞུང་གི་བསྐུལ་པ་ལ་ལྷ་འགའ་ཞིག་གི་མཚན་རྣམས་བསྣན་པ་དང་། དགྲ་བོ་ཟེར་བ་དགྲ་བགེགས་བསྒྱུར་བ་ཙམ་བྱས་ཏེ་གཏོར་འབུལ་ཉུང་བསྡུས། གོང་གི་བཀུག་གཞུག་བྱང་བདག་ཆེན་པོས་མཛད་པ་དང་། བསྒྲལ་དམིགས་རྟ་མགྲིན་ལས་རིམ་བདུན་པ་ལས་བྱུང་བ་ཚིགས་བཅད་དུ་ཕབ་སྟེ། བླ་མ་དོན་གྲུབ་ནས་བསྐུལ་ངོར་སྔགས་འཆང་རྣལ་འབྱོར་པ། ༧ རཱ་ག་ཨ་སྱས་འཕྲལ་དུ་བྲིས་པ་ལ་འགལ་འཁྲུལ་ཉེས་པ་གང་མཆིས་ལྷ་དང་སྲུང་མའི་ཚོགས་ལ་བཤགས། དགེ་བས་རྒྱལ་བའི་བསྟན་པ་འཕེལ་ཞིང་རྒྱས་པར་གྱུར་ཅིག །སརྦ་མངྒ་ལཾ། དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།