རྒྱལ་བ་རྒྱ་མཚོའི་གཏོར་བསྔོས་ཉུང་བསྡུས་རྒྱུན་ཁྱེར་གྱི་དམིགས་རིམ་ཟིན་བྲིས་ཤིན་ཏུ་གསལ་བ།
རྒྱལ་བ་རྒྱ་མཚོའི་གཏོར་བསྔོས་ཉུང་བསྡུས་རྒྱུན་ཁྱེར་གྱི་དམིགས་རིམ་ཟིན་བྲིས་ཤིན་ཏུ་གསལ་བ་བཞུགས་སོ།།
ན་མོ་གུ་རུ་དྷེ་ཝ་ཌཱ་ཀི་ནཱི་ཧཱུྃ། རྒྱལ་བ་རྒྱ་མཚོའི་རྒྱུན་ཁྱེར་གཏོར་བསྔོས་ནི། །འདོན་ཆ་ཐམས་ཅད་དམིགས་པ་ཡིན་པའི་ཕྱིར། །ལོགས་ཏུ་དམིགས་རིམ་བྲི་ནི་མི་དགོས་ཀྱང་། །གཞུང་ཚིག་ཅུང་ཟད་ཁ་སྦོམ་བཀྲོལ་བ་ནི། །རྒྱས་པར་བདག་མདུན་ཚང་མ་ཚོགས་བཅས་བྱ། །གལ་ཏེ་ཚོགས་མ་འབྱོར་ཀྱང་རུང་བ་ཡིན། །ཚོགས་ཕུད་ཕུལ་ནས་གཏོར་བསྔོས་ཀཾ་ཚང་ལུགས། །འབྲིང་དུ་བདག་བསྐྱེད་ཚར་ནས་གཏོར་བསྔོས་བྱ། །མ་ཁོམ་དྲན་རྫོགས་བདག་བསྐྱེད་བསྒོམས་ཀྱང་རུང་། །རང་ཉིད་ཡི་དམ་གསལ་བའི་ཐུགས་ཀ་ནས། །ཡི་གེ་ཡཾ་རཾ་ཁཾ་གསུམ་འཕྲོས་པ་ཡིས། །རཾ་
ལས་མེ་བྱུང་མི་གཙང་དྲི་མ་བསྲེགས། །ཡཾ་ལས་རླུང་བྱུང་ཐ་མལ་བག་ཆགས་གཏོར། །ཁཾ་ལས་ཆུ་བྱུང་གཉིས་འཛིན་དྲི་མ་བཀྲུས། །པདྨན་ཀྲྀཏ་འདོན་ཚེ་བསྒོམ་རྒྱུ་ཡིན། །དེ་ནས་གཏོར་མ་སྣོད་བཅས་སྟོང་པར་བསྒོམ། །།སེམས་ངོ་བལྟ་ཞིང་པྲ་བྷའི་སྔགས་བརྗོད་དོ། །དེ་ནི་བསངས་དང་སྦྱངས་བའི་དམིགས་པའོ། །རང་གི་ཐུགས་ལས་ཡི་གེ་ཡཾ་འཕྲོས་པས། །ངོ་བོ་རླུང་ལ་དབྱིབས་ནི་གཞུ་འདྲ་བ། །གཞུ་རྒྱུན་གནམ་བསྟན་ཆང་ཟུང་ཡཾ་གྱིས་མཚན། །གཞུ་མཆོག་གཉིས་ལ་བ་དན་ལྗང་ཁུ་ནི། །ཟུར་གསུམ་རབ་ཏུ་ཆེ་བ་གཉིས་བཏགས་པ། །དེ་སྟེང་རང་གི་ཐུགས་
ལས་རཾ་འཕྲོས་པས། །མེ་ཡི་རང་བཞིན་ཟུར་གསུམ་རཾ་གྱིས་མཚན། །དེ་སྟེང་ཀཾ་ཡིག་སྐྱ་བོ་གསུམ་འཕྲོས་པས། །མི་མགོའི་སྒྱེད་པུ་རི་རབ་ཙམ་པ་གསུམ། ཁ་ཕྱིར་བསྟན་ཏེ་ཟུར་གསུམ་སྟེང་དུ་གནས། །དེ་སྟེང་རང་གི་ཐུགས་ལས་ཨ་སྤྲོས་པས། །བྷན་དུམ་གཅིག་དཔྲལ་བ་རང་ལ་བསྟན། །དེ་ཡང་རུས་པའི་བྷན་མ་ཡིན་ཏེ། །ཕྱི་ནི་ཆུ་ཤེལ་ཟླ་བའི་རང་བཞིན་དཀར། །ནང་ནི་མེ་ཤེལ་ཉི་མའི་རང་བཞིན་དམར། །རྒྱ་ནི་སྟོང་གསུམ་འཇིག་རྟེན་ཁྱོན་ཙམ་བསྒོམ། །དེ་ནང་གཞུང་ལྟར་བདུད་རྩི་ལྔ་པོ་ནི། །ངོ་བོ་བདུད་རྩི་ལྔ་པོ་ཡིན་མོད་ཀྱང་། །རྣམ་པ་གཅིན་སྟུག་མི་གཙང་གཟུགས་སུ་མིན། །རྣམ་པ་ཚབ་དང་རཀྟ་འདྲ་བའང་མིན། །རློན་པ་ཆུ་ཡི་རང་བཞིན་ཡིན་ནའང་། །དཔེར་ན་ཆབ་རོམ་ཆེན་པོའི་རི་བོ་བཞིན། །དྲི་ཆུ་བེཊྛར་དྲི་ཆེན་ཤེལ་གྱི་རི། །རཀྟ་གསེར་རི་བྱང་སེམས་དུང་གི་རི། །ཀླད་པ་བྱི་རུ་དཀར་པོའི་རི་འདྲ་བསྒོམ། །ཀུན་ཀྱང་དྲོད་མ་ཡལ་ཞིང་རླངས་པ་ཅན། །བདུད་རྩི་ལྔ་པོ་སྒྲོན་མ་ལྔ་ཞེས་བྱ། །མངོན་ཤེས་ལྔ་པོ་ཐོབ་པའི་དགོས་པ་ཡོད། །གཞུང་ལྟར་མི་ཤ་ལ་སོགས་ཤ་ལྔ་ཡང་། །ལུས་མ་ཚང་བའི་ཤ་གཟུགས་མ་ཡིན་ཏེ། །མི་དང་གླང་སོགས་
རོ་ནི་ཆེན་པོ་ལྔ། །དྲོད་མ་ཡལ་ཞིང་དབུགས་ནི་སོང་མ་ཐགེ །ཆེ་ཚོ་སེམས་ཅན་སོ་སོའི་བཀྲག་མདངས་ཅན། །རྐང་མགྱོགས་ལ་སོགས་དངོས་གྲུབ་ལྔ་གྲུབ་རྫས། །དེ་ལྟར་ཤ་ལྔ་བདུད་རྩི་ལྔ་པོ་འདི། །རིགས་ལྔ་ཡུམ་ལྔས་བྱིན་གྱིས་བརླབ་པའི་ཕྱིར། །མཐར་ཐུག་དེ་ཡི་གོ་འཕང་ཐོབ་པ་དང་། །གནས་སྐབས་བཅུད་ལེན་ཀུན་གྱི་མཆོག་ཏུ་བཤད། །དགོས་ཆེད་གཙང་བཙོག་རྣམ་རྟོག་འཇོམས་ཕྱིར་ཡིན། །གོ་བ་མི་གཙང་རྫས་ནི་བཅུ་པོ་སྟེ། །སྔགས་དང་ཏིང་འཛིན་བྱིན་རླབས་བདུད་རྩིར་འགྱུར། །དེ་བཞིན་རང་རེ་སེམས་ཅན་ཐ་མལ་རྣམས། །དབང་དང་གདམས་པས་བྱིན་རླབས་སངས་རྒྱས་འགྱུར། །ཞེས་པའི་བརྡའ་དེ་གོ་བའི་ཆེད་ཡིན་ནོ། །གྲུབ་ཐོབ་ཆེན་པོས་དངོས་སུ་དེ་རྣམས་ལ། །བདུད་རྩི་དངོས་སུ་བསྒྱུར་ནས་གསོལ་བ་དང་། །ལྷ་དང་དཀྱིལ་འཁོར་མཆོད་སོགས་དངོས་སུ་མཛད། །དངོས་སུ་བདུད་རྩིར་བསྒྱུར་བ་མི་ནུས་ན། །གཏོར་མར་གཙང་སྦྲ་བྱེད་ཅིང་ཡིད་ཀྱིས་བསྒོམ། །བསྒོམ་པར་ནུས་ན་ཤ་རྒྱན་མེད་ཀྱང་ཆོག །དེ་ཡང་ཕ་རྒྱུད་གསང་འདུས་རྒྱུད་ལས་གསུངས། །དེ་ནས་གཞུ་ཡི་ཆང་བཟུང་ཡཾ་ཡིག་ལས། །རླུང་བྱུང་གཞུ་མཆོག་
བ་དན་གཉིས་པོ་བསྐྱོད། །དེ་ཡིས་གཡབ་པས་སྟེང་གི་རཾ་ཡིག་ལས། །མེ་འབར་ཐོད་པ་དྲོས་ཤིང་རྫས་རྣམས་ཁོལ། །ཞུ་ཞིང་འཕྱུར་བའི་མི་གཙང་དྲི་མ་རྣམས། །ལྦུ་བའི་ཚུལ་དུ་ཕྱིར་ལུད་ལྷག་མ་རྣམས། །ལྟེམས་སེ་ཞུ་བ་དམ་ཚིག་བདུད་རྩི་ཡིན། །དེ་སྟེང་ཨོཾ་དཀར་ཨཱདམར་ཧཱུྃ་མཐིང་གསུམ། །བརྩེགས་མའམ་ནི་སུམ་ཚོམ་བསྒོམས་ཀྱང་རུང་། །དེ་ལས་འོད་ཟེར་ཕྱོགས་བཅུར་འཕྲོས་པ་ཡིས། །སངས་རྒྱས་ཀུན་གྱི་དཔྲལ་མགྲིན་ཐུགས་ཀ་ནས། །སྐུ་གསུང་ཐུགས་ཀྱི་བདུད་རྩི་དཀར་དམར་མཐིང་། །སྤྱན་དྲངས་ཡིག་འབྲུ་གསུམ་ལ་སོ་སོར་ཐིམ། །དེ་ནི་ཡེ་ཤེས་བདུད་རྩི་སྤྱན་འདྲེན་ཡིན། །དེ་ནས་ཡིག་འབྲུ་གསུམ་པོ་གཅིག་བརྗོད་པས། །ཨཱཡིག་ཞུ་ནས་འོག་ཏུ་ཐིམ་པ་ཡིས། །གསུང་གི་བདུད་རྩི་དམར་དང་ལྟེམས་སེ་གྱུར། །འབྲུ་གསུམ་གཅིག་བརྗོད་ཧཱུྃ་ཡིག་ཞུ་ཐིམ་པས། །ཐུགས་ཀྱི་བདུད་རྩི་སྔོ་དང་ལྟེམས་སེ་སོང་། །འབྲུ་གསུམ་གཅིག་བརྗོད་ཨོཾ་ཡིག་ཞུ་ཐིམ་པས། །སྐུ་ཡི་བདུད་རྩི་དཀར་དང་ལྡེམས་སེ་སོང་། །དམ་ཚིག་ཡེ་ཤེས་བདུད་རྩི་གཉིས་མེད་འདྲེས། །ཁ་དོག་མུ་ཏིག་ཁ་དོག་ལྟ་བུ་སྟེ། །དཀར་ལ་ཅུང་ཟད་སྔོ་ཞིང་དམར་མདངས་ཆགས། །རོ་ནི་སྦྱང་དང་
བུ་རིམ་ཀ་ར་བཞིན། །ལེགས་པར་བརྟགས་ན་རོ་མཆོག་བརྒྱད་དང་ལྡན། །བཀྲེས་པ་འགྲང་ཞིང་སྐོམ་རྣམས་ངོམ་པ་དང་། །ལུས་ལ་བདེ་བ་སྐྱེ་ཞིང་རིག་པ་གསལ། །དེ་སོགས་ནུས་པ་སྟོང་དང་ལྡན་པར་བསྒོམ། །དེ་ཡི་རླངས་པར་མཆོད་པའི་ལྷ་མོའི་ཚོགས། །མཆོད་རྫས་དུ་མ་འཛིན་པས་བར་སྣང་ཁྱབ། །བདུད་རྩིའི་རྒྱ་མཚོ་དཀྲུགས་པའི་སྒྲ་སྐད་ལ། །རོལ་མོའི་སྒྲ་དང་བསྟོད་དབྱངས་སྣ་ཚོགས་འབྱུང་། །བདུད་རྩིའི་དྲི་ངད་སངས་རྒྱས་ཞིང་ཁམས་ཀུན། །སྤོས་དྲི་སྣ་ཚོགས་རྣམ་པ་དུ་མས་ཁྱབ། །བདུད་རྩི་གཏོར་མ་བསྐྱེད་ལུགས་ཁྱད་མེད་དེ། །བདུད་རྩིའི་ཟེགས་མ་འཐོར་བ་རེག་པས་ཀྱང་། །ལྷ་ལ་ཕོག་ན་ཐུགས་དམ་དབྱིངས་སུ་བསྐང་། །མཆེད་ལྕམ་ལ་ཕོག་ཉམས་ཆག་སྡིག་སྒྲིབ་དག ། དགྲ་དང་བགེགས་ལ་ཕོག་ན་རྡུལ་དུ་བརླག །དམ་སྲི་དམ་ཉམས་ལ་ཕོག་དུག་ཏུ་འགྱུར། །ལྕེ་ལ་བཞག་ན་དངོས་གྲུབ་རྣམ་གཉིས་ཐོབ། །དེ་ནི་གསང་སྔགས་ནང་གཏོར་བསྐྱེད་ཆོག་ཡིན། །ནོར་ལྷ་ཕྱི་རྒྱུད་གཞི་བདག་གཏོར་མ་ནི། །ཧཱུྃ་ལས་རིན་ཆེན་སྣ་ཚོགས་ལས་གྲུབ་སྣོད། །ཡངས་ཤིང་རྒྱ་ཆེ་གླིང་བཞིའི་ཁྱོན་ཙམ་པ། །དེ་ནང་ཨོཾ་ཡིག་གམ་ནི་ཁཾ་ཡིག་ཞུ། །
དཀར་གསུམ་མངར་གསུམ་འོ་མའི་རྒྱ་མཚོར་བསམ། །ཨ་ཀཱ་རོ་ཡིས་འབྲུ་གསུམ་བྱིན་གྱིས་རློབས། །གཏོར་མ་བྱིན་རླབས་ཀྱི་ལེའུ་སྟེ་དང་པོའོ།། ༈ །།མདུན་བསྐྱེད་བཏོན་ན་སྤྱན་འདྲེན་དེས་འཐུས་ཀྱང་། །འཕྲལ་དུ་སྤྱན་འདྲེན་དམིགས་པ་རྒྱས་འདེབས་སྲོལ། །པད་ཀོར་དང་བཅས་འབར་བའི་ཕྱག་རྒྱ་ནི། །དཔྲལ་བར་བསྐོར་ཞིང་མིག་གཉིས་ནམ་མཁར་བལྟ་།ལུས་ནི་ཙོག་པུར་རྐང་གཡས་གཡོན་པ་མནན། །ཕོ་ཕོ་བརྗོད་པ་སྤྱན་འདྲེན་མཆོག་ཡིན་ཏེ། །གཏོར་མགྲོན་ཐམས་ཅད་སྐད་ཅིག་ཉིད་ལ་འབྱོན། །དེ་ཡང་དཀྱིལ་འཁོར་གཞན་དང་འབྲེལ་བ་ནི། །མདུན་བསྐྱེད་དཀྱིལ་འཁོར་ཕྱི་ཁྱམས་མགྲོན་ཀུན་བཞུགས། །དཀྱིལ་འཁོར་ཤར་སྒོའི་ཁྱམས་དེར་གཏོར་མ་ཡོད། །ལྷ་དགུ་ལྟ་བུ་བདག་བསྐྱེད་དཀྱིལ་འཁོར་དུས། །དཀྱིལ་འཁོར་ཕྱི་ཡི་ཁྱམས་དེར་གཏོར་མ་དང་། །མགྲོན་རྣམས་ཐམས་ཅད་བཞུགས་པར་བྷེ་པ་ཡིན། །འོན་ཀྱང་མདུན་བསྐྱེད་ལྷ་ལྔ་འབྲེལ་བའི་ཚེ། །ཀཐོག་དམ་པ་བདེ་གཤེགས་ཕྱག་ལེན་ལྟར། །གྲུབ་ཆེན་པཀཱིའི་ཐུགས་དམ་མཛད་པ་ཡིན། །རང་རེ་རྣམས་ཀྱིས་རྒྱུན་དུ་འདི་བྱ་སྟེ། །སྟོང་གསུམ་འཇིག་རྟེན་བདུད་རྩིས་ཁྱབ་པའི་སྟེང་། །བར་
སྣང་མཐོན་པོར་རྒྱལ་བ་རྒྱ་མཚོ་ལ། །ཡི་དམ་ཞི་བའི་ལྷ་ཚོགས་ཀུན་གྱིས་བསྐོར། །གཡས་སུ་རྟ་མགྲིན་ཁྲོ་བོ་ཀུན་གྱིས་བསྐོར། །གཡོན་དུ་གསང་ཡེ་མཁའ་འགྲོ་ཀུན་གྱིས་བསྐོར། །སྟེང་དུ་ཨོ་རྒྱན་བླ་མ་ཀུན་གྱིས་བསྐོར། །འོག་ཏུ་མ་མགོན་ཆོས་སྐྱོང་ཐམས་ཅད་དང་། །ནོར་ལྷ་བཀའ་སྲུང་ཀུན་གྱིས་བསྐོར་བའི་རྒྱབ། །ཡུལ་ལྷ་གཞི་བདག་རིགས་དྲུག་སེམས་ཅན་རྣམས། །རིགས་ལྔའི་དཔའ་བོ་མཁའ་འགྲོའི་སྐུར་གྱུར་བསྒོམ། །དེ་དག་བར་སྣང་ཁམས་སུ་པད་ཉི་སོགས། །རང་རང་གདན་ལ་རྫུ་འཕྲུལ་སྟབས་ཀྱིས་བཞུགས། །སྤྲིན་གྱི་ཕུང་པོ་ཞེས་སོགས་ཚིག་དེ་བརྗོད། །གཏོར་མགྲོན་སྤྱན་འདྲེན་གྱི་ལེའུ་སྟེ་གཉིས་པའོ།། ༈ །།རཏྣ་གུ་རུ་བླ་མ་སྤྱི་ཡི་མཚན། །གཏོར་བསྔོས་འདི་ལ་རྣམ་པ་མང་བ་སྟེ། །བརྗོད་པའི་ཚིག་གིས་བསྔོ་དང་སྔགས་ཀྱིས་བསྔོ། །ཕྱག་རྒྱས་བསྔོ་དང་ཡིད་ཀྱིས་བསྔོ་བ་དང་། །གྱེར་གྱིས་བསྔོ་དང་རྣམ་པ་ལྔ་ཙམ་ལས། །ཕྱོགས་བཅུ་དུས་གསུམ་ཞེས་པ་ནས་བཟུང་སྟེ། །འབུལ་ལོ་ཞེས་པར་ཚིག་གིས་བསྔོ་བ་ཡིན། །ཡི་དམ་སོ་སོའི་སྔགས་ལ་ཨི་དཾ་སོགས། །བརྗོད་པ་དེ་ནི་སྔགས་ཀྱིས་བསྔོ་བ་སྟེ། །ཚིག་དང་སྔགས་
ཀྱིས་བསྔོ་བའི་ལེའུ་སྟེ་གསུམ་པའོ།། ༈ །།ཕྱག་རྒྱས་བསྔོ་བ་ཐལ་མོ་ཁ་གྱེན་ཕྱེ། །ཨི་དཾ་བ་ལི་ཟེར་དུས་ཡར་བཏེག་ཚུལ། །ཁཱ་ཧི་ཚར་རྗེས་སེ་གོལ་རེ་རེ་རྡེབ། །དམིགས་པས་བསྔོ་བ་རྣམ་པ་གཉིས་ཡོད་དེ། །གཏོར་བསྔོས་ཚར་ནས་གཏོར་མ་བཀྲོལ་ན་ནི། །ལྷ་ཚོགས་ལྗགས་ལས་འོད་ཀྱི་སྦུ་གུ་བྱུང་། །གཏོར་མ་བདུད་རྩིའི་རྒྱ་མཚོ་ལ་ཟུག་ནས། །བདུད་རྩི་དྲངས་ཤིང་གསོལ་བས་མཉེས་པར་བསྒོམ། །འོད་ཀྱི་སྦུ་གུའང་སོ་སོའི་ཕྱག་མཚན་དབྱིབས། །འདི་ནི་གསར་རྙིང་སྒྲུབ་གཞུང་ཀུན་ནས་གསུངས། །འོན་ཀྱང་། གཏོར་མ་བཞག་རྒྱུར་དེ་བསྒོམ་ན། །གཏོར་མ་ལྷག་མར་གྱུར་པ་དེ་རྗེས་ནས། །གཏོར་བསྔོས་བྱེད་པ་ཅུང་ཟད་མི་ལེགས་པས། །རང་གི་ཐུགས་ལས་མཆོད་པའི་ལྷ་མོ་ནི། །གྲངས་མེད་སྤྲོས་ཏེ་ཕྱག་ན་བྷན་ཐོགས། གཏོར་མ་བདུད་རྩིའི་རྒྱ་མཚོ་ནས་བཅུས་ལ། །མགྲོན་རྣམས་སོ་སོའི་མདུན་དུ་ལྷ་མོས་བཏེག །འོད་ཀྱི་སྤུ་གུས་སྔར་ལྟར་གསོལ་བར་དམིགས། །དེ་ནི་ཏིང་ངེ་འཛིན་གྱི་བསྔོ་བ་ཡིན། །གཏོར་བསྔོས་སྤྱི་ཁོག་རྒྱལ་བ་རྒྱ་མཚོ་འདིར། །བླ་མའི་སྐབས་སུ་གང་འདོད་བླ་མ་དང་། །ཡི་དམ་མཁའ་འགྲོ་ཆོས་སྐྱོང་སོ་སོའི་སྐབས། །རང་
གི་གང་འདོད་བཙུད་པར་རུང་བ་ཡིན། །སྔོན་གྱི་རིག་འཛིན་གོང་མ་རྣམས་ཀྱི་དྲུང་། །གསང་སྔགས་དབང་བསྐུར་ཐོབ་པ་མ་གཏོགས་པའི། །གཞི་བདག་གཏོར་མ་ཕུགས་གཏོར་གྲལ་མི་རུང་། །ནང་མཆོད་ཕྱི་རྒྱུད་གཏོར་མ་བྲན་མི་རུང་། །འོན་ཀྱང་གཞི་བདག་རིགས་དྲུག་སེམས་ཅན་བཅས། །དཔའ་བོ་མཁའ་འགྲོའི་སྐུ་རུ་བསྒོམས་པ་དེས། །ནང་མཆོད་བྲན་རུང་ཕུགས་གཏོར་གྲལ་བཞག་རུང་། །ཕྱག་རྒྱ་ཏིང་ངེ་འཛིན་གྱིས་བསྔོ་བའི་ལེའུ་སྟེ་བཞི་པའོ།། ༈ །།དེ་ནས་གྱེར་གྱི་བསྔོ་བ་ཞེས་བྱ་བ། །སྟོན་པས་གསུངས་པའི་མདོ་སྡེ་རྣམས་ལ་ཡང་། །དང་པོ་ཚིག་ལྷུག་རྒྱས་པར་གསུངས་པའི་རྗེས། །དེ་དོན་བསྡུས་པའི་ཚིགས་བཅད་དབྱངས་སུ་གསུངས། །དེ་བཞིན་ཚིག་ལྷུག་གཏོར་བསྔོས་རྒྱས་པའི་རྗེས། །དེ་དོན་བསྡུས་པའི་གཏོར་བསྔོས་དབྱངས་སུ་གྱེར། །དེ་ལ་གྱེར་གྱིས་བསྔོ་བ་ཞེས་བྱ་སྟེ། །གཏོར་མ་བྱིན་རླབས་རྒྱས་པ་སྔར་སོང་ཡང་། །བསྡུས་པ་དྲན་རྫོགས་སླར་ཡང་གསལ་འདེབས་ཏེ། །ཨོཾ་ཞེས་བརྗོད་པས་གཏོར་སྣོད་གཏོར་མ་རྣམས། །མ་དག་དྲི་མ་སྟོང་པ་ཉིད་དུ་བསམ། །དེ་ནས་མཚུངས་མེད་གྱུར་ཞེས་བྱ་བའི་བར། །གཏོར་མ་བྱིན་རླབས་
སྔར་ལྟར་དྲན་ཙམ་བསྒོམ། །དེ་ནས་གཏིབས་པར་གྱུར་ཞེས་བྱ་བའི་བར། །གཏོར་མགྲོན་སྤྱན་འདྲེན་དམིགས་པ་དྲན་ཙམ་བསྒོམ། །དེ་ནས་ཚིག་གིས་བསྔོ་བ་འདི་ཉིད་ལས། །ཏིང་ངེ་འཛིན་གྱིས་བསྔོ་བའི་དམིགས་པ་བྱ། །ཡི་དམ་ཀུན་འདུས་བྱ་བའི་དུས་ཀྱི་ཚེ། །ཡི་དམ་དཀྱིལ་འཁོར་ལྷ་ཚོགས་ཐམས་ཅད་མཆོད། །ཀུན་འདུས་རྩ་བའི་བླ་མ་ཟེར་བའི་དོན། །ཡི་དམ་རྒྱུད་སྡེའི་ལྷ་ཚོགས་ཐམས་ཅད་ནི། །རྩ་བའི་བླ་མའི་ཡོན་ཏན་ངོ་བོ་ཡིན། །བླ་མ་མཆོད་ཅེས་བླ་མ་ཐམས་ཅད་མཆོད། །དཀོན་མཆོག་ཀུན་འདུས་ཟེར་བའི་དུས་ཀྱི་ཚེ། །སངས་རྒྱས་དཀོན་མཆོག་ཐམས་ཅད་མཆོད་པར་ཧཱུྃ། །དེ་ནི་བླ་མའི་ཐུགས་ཀྱི་ངོ་བོ་ཡིན། །དམ་ཆོས་དཀོན་མཆོག་ཐམས་ཅད་མཆོད་པར་བྷྱོ༔ །དེ་ནི་བླ་མའི་གསུང་གི་ངོ་བོ་ཡིན། །དགེ་འདུན་དཀོན་མཆོག་ཐམས་ཅད་མཆོད་པར་བསྒོམ། །དེ་ནི་བླ་མའི་སྐུ་ཡི་ངོ་བོ་ཡིན། །དེ་བཞིན་རང་གི་དྲིན་ཐོབ་བླ་མ་མཆོད། །དེ་ལྟར་དཀོན་མཆོག་གསུམ་གྱི་རྩ་བ་སྟེ། །དེ་ཕྱིར་རྩ་བའི་བླ་མ་ཞེས་བྱའོ། །ཆོས་སྐྱོང་ཀུན་ཞེས་ཆོས་སྐྱོང་ཐམས་ཅད་མཆོད། །དེ་ནི་བླ་མའི་ཕྲིན་ལས་ངོ་བོ་ཡིན། །དམིགས་པ་གསལ་ན་སྔོན་གྱི་དམིགས་པ་ལྟར། །སོ་སོར་
བསྒོམས་ནས་སོ་སོར་མཆོད་པར་བྱ། །སོ་སོར་དམིགས་པ་ཟིན་པར་མ་ཐེབ་ན། །རྒྱལ་བའི་དབང་པོའམ་ནི་ཨོ་རྒྱན་བསྒོམ། །དེ་ལ་ཐམས་ཅད་འདུས་པ་ཤེས་བྱས་ལ། །དེ་ཉིད་མཆོད་པས་ཐམས་ཅད་འཐུས་པ་ཡིན། །ཀུན་འདུས་རྩ་བའི་བླ་མ་མཆོད་སོགས་བརྗོད། །དེ་ནི་རྒྱ་ཆེན་སྤྱི་རུ་བསྔོ་བ་ཡིན། །དེ་ནས་བྱེ་བྲག་སོ་སོར་བསྔོ་བ་ནི། །བེར་ནག་ཅན་དང་དེ་ཡི་མཆེད་གྱུར་པ། །གུར་དང་ཕྱག་བཞི་ཕྱག་དྲུག་ཚོགས་བདག་ཡིན། །དེ་ཡི་སྤྲུལ་པའི་མགོན་ཆེན་བཞི་བཅུ་ལྔ། །དེ་རྣམས་བེར་ནག་ཅན་གྱི་མཆེད་ཡིན་ནོ། །ལྕམ་ནི་རང་བྱུང་རྒྱལ་མོ་དུད་སོལ་མ། །རེ་མ་ཏི་སོགས་ལྷ་མོ་སྟོང་རྩ་བརྒྱད། །དེ་དག་མགོན་པོའི་ལྕམ་དུ་གཏོགས་པ་ཡིན། །དབུགས་ལེན་བཅུ་དྲུག་ཕྱོགས་བཅུའི་མགོན་པོ་བཅུ་།དྲེགས་པའི་གཙོ་བོ་བདུན་ཅུ་རྩ་གཉིས་ཏེ། །དེ་དག་བེར་ནག་ཅན་གྱི་འཁོར་ཡིན་ནོ། །མ་བདུན་སྲིང་མོ་དུས་བཞི་འབར་མ་དགུ། །དུས་བཞི་ལྷ་མོ་དམག་གི་རྒྱལ་མོ་བཞི། །དབང་ཕྱུག་ཉེར་བརྒྱད་བརྟན་མ་བཅུ་གཉིས་དང་། །སྤུ་གྲི་མཆེད་གསུམ་མ་མགོན་གཉིས་ཀའི་འཁོར། །མཆེད་ལྕམ་འཁོར་དང་བཅས་པ་མཆོད་ཟེར་དུས། །དེ་དག་ཐམས་
ཅད་མཆོད་པར་དམིགས་པར་བྱ། །རྒྱལ་པོ་ཞེས་ནས་ཞིང་སྐྱོང་ཞེས་པའི་བར། །འཁོར་ལྔ་རང་རང་འཁོར་བཅས་མཆོད་པར་དམིགས། །མཁར་ནག་སྤྱིད་ཤོད་ལུང་དུ་གནོད་འཚེ་ཆེ། །དེ་ཕྱིར་མཆོད་པ་བྱེད་མཁན་ཡོད་ནའང་། །ཐང་ལྷ་མཁར་ཆུ་ལ་སོགས་གནས་ཆེན་བརྒྱད། །རྒྱ་གར་གྲོང་ཁྱེར་སྒྲ་སྒྲོག་ཞེས་བྱ་བའི། །ཀླུ་ཡིན་སྟོན་པའི་ཞལ་མཐོང་དམ་ཆོས་ཐོབ། །སྟོན་པ་འདས་དུས་རིང་བསྲེལ་བགོས་པའི་ཚེ། །སངས་རྒྱས་མཆེ་བ་གཡོན་པ་ཁོ་ལ་གནང་། །དུས་ཕྱིས་སོག་ཟམ་མཁར་ནག་བླ་མཚོ་ནས། །འབྲི་གུང་པ་ལ་ཕུལ་བའི་སངས་རྒྱས་ཚེམས། །འབྲི་གུང་མཐིལ་དུ་གདུང་འབུམ་བཞེངས་ནས་ཡོད། །ཀླུ་བདུད་ནག་པོ་མགོ་དགུ་ཞེས་བྱ་བ། །བཀའ་དགོངས་རྒྱུད་སྡེ་ནས་གསུངས་དཀྱིལ་འཁོར་ལྷ། །བྱང་སེམས་ནམ་མཁའི་སྙིང་པོའི་སྤྲུལ་པ་སྟེ། །ས་བརྒྱད་སེམས་དཔའ་ཡིན་པར་ཨོ་རྒྱན་གསུངས། །གྲུབ་ཆེན་པཀཱིར་སྲོག་གི་སྙིང་པོ་ཕུལ། །ཀཾ་ཚང་བསྟན་པ་བསྲུང་བར་དམ་བཅས་པ། །འདི་ཉིད་མི་མཆོད་མི་རུང་མཆོད་དུ་རུང་། །ཤ་ལྔ་བདུད་རྩིའི་མཆོད་རུང་གསང་སྔགས་ལྷ། །ཀརྨ་པ་ཡི་བསྟན་པ་སྐྱོང་རྣམས་ནི། །སྤྱིར་དུ་ཆོས་སྐྱོང་ཐམས་ཅད་ཡིན་མོད་ཀྱི། །ས་བརྒྱད་
སེམས་དཔའ་སྒམ་པོ་དཔལ་བརྩེགས་དང་། །ཁ་བ་དཀར་པོའི་དགེ་བསྙེན་དྲག་འདུལ་དང་། །ཙཱ་རིའི་སྒམ་པོ་ལྷ་རྩེ་གཡུ་སྒྲོན་མ། །གཉན་ཆེན་ཐང་ལྷ་རོང་ལྷ་རྒྱལ་མཚན་དང་། །ཁྱུང་ཐོ་དུང་རི་དཀར་པོའི་བམ་རྩེ་རི། །དེ་རྣམས་བསྟན་པ་སྐྱོང་བར་ཁས་བླངས་བྱས། །ཀརྨ་པཀྴི་བར་དེར་བཞུགས་པའི་ཚེ། །སྤྱན་རས་གཟིགས་ཀྱིས་འགྲོ་དོན་གྱིས་གསུངས་ཀྱང་། །འགྲོ་དོན་མི་འོང་སྐུ་སྐྱེ་མི་འབྱོན་དགོངས། །དེ་ཚེ་བོད་ཀྱི་བརྟན་མ་བཅུ་གཉིས་དང་། །སྐྱོང་མ་བཅུ་གཉིས་ཡ་མ་བཅུ་གཉིས་ཀྱིས། །།སྐུ་སྐྱེ་བྱོན་དང་བསྟན་པ་སྐྱོང་བ་དང་། །འགྲོ་དོན་འབྱུང་བའི་སྡོང་གྲོགས་ཁས་ལེན་བྱས། །ཁྱད་པར་གཅོད་ཀྱི་བཀའ་བབ་རང་བྱུང་པས། །ཀརྨ་པཀི་པདྨ་ཚུལ་ཁྲིམས་དང་། །ངོམ་རྒྱལ་སྤྱི་འབྱམ་བྱང་གྲགས་ལ་སོགས་པ། །རི་ཆེན་བརྒྱ་ཡི་རྩེར་བཞུགས་གཉན་ཐོག་བཅད། །བསྟན་པ་སྐྱོང་བའི་དགེ་བསྙེན་མིང་རེ་བཏགས། །དེ་དག་ཀུན་གྱིས་གཏོར་མ་ཐོབ་པར་བསྒོམ། །དེ་ནས་སྨན་གཏོར་རཀྟའི་མཆོད་པ་སོགས། །གོ་བར་སླ་བས་འདི་རུ་བཀྲོལ་མི་དགོས། །ཛ་གད་འདི་ལ་འཇུག་པ་མང་ན་ཡང་། །འདི་ཡི་སྐབས་སུ་ཆང་སྣ་བཞི་ལ་འཇུག །གསང་
བའི་མཆོད་པ་རིག་མ་བཅུ་དྲུག་སྤྲོ། །དེ་ཁོ་ན་ཡི་ཀུན་བཟང་མཆོད་པ་ནི། །མཆོད་པ་དེ་དག་ཟག་བཅས་དངོས་པོ་མིན། །ཟག་མེད་སྟོང་ཉིད་ཕྱག་རྒྱ་ཆེན་པོ་ཡི། །ཉམས་ལེན་ངང་ནས་མཆོད་པའི་སྤྲིན་སྤྲོ་བ། །སངས་རྒྱས་ཞིང་ཀུན་རྒྱས་པར་གང་བ་ཡིན། །གཏོར་མའི་མགྲོན་གྱུར་དེ་དག་ཐམས་ཅད་ལ། །སྐུ་གསུང་ཐུགས་ཀྱི་ཡོན་ཏན་མཐའ་ཡས་པ། །ཤེས་ན་སོ་སོར་བསྟོད་པར་བྷེ་པ་ཡིན། །འདོད་གསོལ་གོ་བར་སླ་ཕྱིར་བཀྲོལ་མི་དགོས། །ཀརྨ་པ་ཡིས་བཞེད་པ་གང་ཡིན་ན། །འགྲོ་དྲུག་སེམས་ཅན་གཅིག་ཀྱང་མ་ལུས་པ། །བླ་མེད་བྱང་ཆུབ་མཆོག་ལ་འགོད་པ་ཡིན། །ཀརྨ་པ་ཡི་བསྟན་ལ་གནོད་བྱེད་རྣམས། །དེ་ལ་བར་དུ་གཅོད་པ་རྣམས་ཡིན་ནོ། །དེ་ལྟར་མཆོད་པའི་དགེ་བའི་རྩ་བ་ནི། །རྫོགས་པའི་སངས་རྒྱས་ཐོབ་པར་ཤོག་ཅིག་བསྒོམ། །དེ་ཡིས་ཀར་ལུགས་གཞུང་གི་གཏོར་བསྔོས་ཚང་། ༈་།དེ་ནས་རྙིང་མ་སྤྱི་འདུས་གཏོར་བསྔོས་ནི། །དམིགས་པ་གོང་ལྟར་རྙིང་མའི་ལྷ་རྣམས་མཆོད། །གུ་རུ་ཞི་དྲག་བཀའ་དགོངས་ཕུར་གསུམ་སོགས། །ཡི་དམ་རྒྱ་མཚོ་ཐེག་པ་དགུ་ཡི་ལྷ། །མཁའ་འགྲོ་ཆོས་སྐྱོང་ཐམས་ཅད་མ་ཚང་མེད། །ནོར་ལྷ་རྒྱ་མཚོ་དམ་ཅན་རྒྱ་མཚོ་
ལ། །མ་ཚང་རྙིང་མའི་ལྷ་ནི་གཅིག་ཀྱང་མེད། །དེ་ཡིས་རྙིང་མ་སྤྱི་ཡི་གཏོར་བསྔོས་ཚང་། ༈ །ཕྱི་ལྟར་བཅོམ་ལྡན་ཤཱཀྱ་ཐུབ་པ་སྟེ།། །ནང་ལྟར་ཡི་དམ་འཁོར་ལོ་སྡོམ་པ་ཉིད། །གསང་བ་དྲུག་པ་རྡོ་རྗེ་འཆང་ཆེན་དང་། །དེ་ཁོ་ན་ཉིད་ཕག་མོ་གྲུ་པ་ཡིན། །འགྲོ་མགོན་བླ་མ་ཞེས་པ་དེ་ཡིན་ལ། །དེ་ཡི་གདན་སར་འཇིག་རྟེན་གསུམ་མགོན་བཞུགས། །དེ་ཡི་གདན་སར་གླང་ཆེན་དཔལ་སེང་བཞུགས། །སྤྱན་སྔ་གྲགས་པ་འབྱུང་གནས་ཞེས་བྱ་བ། །དེ་ནི་ཕག་གྲུ་སྐྱོབ་པ་གཉིས་ཀ་ཡིན། །གདན་ས་འཛིན་ཅིང་དེ་ཡི་སྐུ་རིང་ལ། །དགེ་འདུན་ཁྲི་ཚོ་བཅོ་བརྒྱད་བྱུང་བ་ཡིན། །ཡེ་ཤེས་མགོན་པོ་དངོས་སུ་འགྲུབ་གྱུར་ཏེ། །དེ་ཡི་སྒོ་ནས་དབང་སྡུད་མཛད་པ་ཡིས། །ས་ཧོར་ཡོན་མཆོད་གཉིས་ཀ་དབང་དུ་བསྡུས། །ཉིད་ཀྱི་དབོན་པོ་དབུས་གཙང་རུ་བཞི་ཡི། །སྤྱི་དཔོན་སྣེ་གདོང་རྩེ་པ་ཞེས་བྱར་བསྐོས། །དེ་ཡི་རྒྱུད་ལ་སྤྱན་སྔ་བརྒྱད་བྱུང་སྟེ། །ལྷ་ཆེན་བརྒྱད་དང་སྒོ་མང་བརྒྱད་ཀྱང་བཞེངས། །དེ་ནས་གདན་ས་ཞྭ་དམར་བཞི་པར་ཕུལ། །མཚན་ཡང་སྤྱན་སྔ་ཆོས་ཀྱི་གྲགས་པར་ཐོག །ཕག་མོ་གྲུ་པ་སེངྒེའི་ཁྲི་ལ་བཞུགས། །ཁྲི་དེར་སུ་ཡིན་བླ་མ་བཞུགས་མི་
ཕོད། །ཕྱག་བཞི་པ་ཡིས་ཉིན་རེ་ལན་གསུམ་དུ། །སུ་རེད་བཞུགས་དོགས་གྲི་གུག་གཡུག་ཅེས་གྲགས། །དེ་ཕྱིར་ཀརྨ་པ་ཡང་བཞུགས་སྲོལ་མེད། །ཁྲི་དེར་དཀོན་མཆོག་ཡན་ལག་བཞུགས་པའི་དུས། །མགོན་པོས་གྲི་གུག་གཡུག་དང་དུས་མཚུངས་ནས། །ཡེ་ཤེས་མགོན་པོ་དངོས་སུ་ཞལ་གཟིགས་ཏེ། །རྡོ་རྗེ་འཆང་དངོས་མགྲོན་མགོན་བླ་མ་ཞེས། །ཕག་གྲུས་བསྟོད་པ་དང་བཅས་འདི་ཉིད་མཛད། །མདུན་གྱི་ཆོས་སྐྱོང་རྣམས་ཀྱི་གྲལ་དེ་རུ། །མགོན་པོ་འཁོར་བཅས་གསལ་ནི་བཏབ་ནས་ཀྱང་། །གོང་དུ་བཤད་ལྟར་གཏོར་མ་གསོལ་བར་བསྒོམ། །མ་ཧཱ་ཀཱ་ལ་ཞེས་པ་ཕྱག་བཞི་པ། །ཞབས་ཞེས་བྱ་བ་ཞེ་སའི་ཚིག་ཡིན་ནོ། །ཡུམ་ཆེན་དེ་ལ་རྣམ་པ་གསུམ་ཡོད་དེ། །དབྱིངས་ཀྱི་ཡུམ་ནི་ཨེ་ཀ་ཙ་ཏི་མ། །སྦྱོར་བའི་ཡུམ་ནི་ལྷ་མོ་ཙན་ཏི་ཀ །སྒྲོལ་བའི་ཡུམ་ནི་ལྷ་མོ་དུད་སོལ་ཡིན། །ལས་མཁན་དེ་ལ་མང་ཡང་ཚན་བཞིར་འདུས། །བྱ་རོག་གདོང་ཅན་ནག་པོ་སྟོང་དང་བཅས། །སེང་གེའི་གདོང་ཅན་ཤ་ཟ་འབུམ་དང་བཅས། །དམར་མོ་རྩ་འཇིབ་མ་མོ་བྱེ་བའི་ཚོགས། །ལེགས་ལྡན་གནོད་སྦྱིན་ཁྲི་དང་ཁྲབ་ཅན་འབུམ། །སྡེ་བརྒྱད་དཔལ་མགོན་བདུན་ཅུ་བཅས་པའོ། །དེ་
དག་ཀུན་གྱིས་གཏོར་མ་གསོལ་བར་བསྒོམ། །ཀུན་བཟང་མཆོད་སྤྲིན་སྤུངས་སོགས་ཞེས་པ་ནི། །ཡིད་ཀྱིས་སྤྲུལ་པའི་མཆོད་པས་ནམ་མཁའ་བཀང་། །རང་གི་ལུས་དང་ལོངས་སྤྱོད་བཅས་པ་འབུལ། །མེ་ཏོག་བདུག་སྤོས་ལ་སོགས་ཕྱི་མཆོད་འབུལ། །ཤ་སྣ་སྙིང་སྣ་ཁྲག་སྣ་ཆང་སྣ་དང་། །རིག་མ་བཅུ་དྲུག་ཡིད་ཀྱིས་སྤྲུལ་ལ་མཆོད། །ཐུགས་དང་བསྡོམས་པས་རང་རིག་ཡེ་ཤེས་ནི། །དམིགས་པ་བསྒོམ་ཚེ་སེམས་ངོའི་གཤིས་མ་ཤོར། །བསྐྱེད་རྫོགས་ཟུང་འཇུག་ངང་ནས་བསྒོམ་པ་ཡིན། །འདོད་གསོལ་གཞུང་ལྟར་རྩེ་གཅིག་གསོལ་བ་བཏབ། །དེ་ཡིས་ཞྭ་དམར་ལུགས་ཀྱི་གཏོར་བསྔོས་ཚང་། །གསང་སྔགས་ནང་གཏོར་གྱི་ལེའུ་སྟེ་ལྔ་པའོ།། ༈ །།བསྐང་བ་བཅས་ནས་ཡོད་དམ་ཐང་སྐུའམ། །མེད་ན་གཏོར་མ་ཉིད་ལ་དམིགས་རྟེན་བྱ། །གོང་དུ་བཤད་པའི་བདུད་རྩིའི་རླངས་པ་ལས། །བསྐང་རྫས་སྣ་ཚོགས་འཕྲོ་ཞིང་མཆོད་པར་དམིགས། །ཡིད་ཀྱིས་སྤྲུལ་པ་གླིང་བཞི་རི་རབ་ནི། །ལྷ་མིའི་ལོངས་སྤྱོད་སྲོག་ཚོགས་སྣ་ཚོགས་བཅས། །དངོས་སུ་གྲུབ་པ་གླིང་བཞི་བྱེ་བ་བརྒྱ། །དེ་དག་བློ་ཡིས་བླངས་ཏེ་ཡིད་ཀྱིས་ཕུལ། །དེ་དོན་གྲུབ་ཆེན་
ཀརྨ་པཀྴི་ཡིས། །མདོས་དང་བསྐང་བ་མཎྜལ་དོན་གཅིག་གསུངས། །དེ་ལྟར་བསྒོམ་ཞིང་བསྐང་ཐུང་ཚར་གཅིག་འདོན། །བཀའ་བརྒྱུད་བསྐང་ཐུང་རང་བྱུང་རྡོ་རྗེས་མཛད། །འདི་གྷལ་རྒྱལ་བ་རྒྱ་མཚོ་ལྷ་ལྔ་དང་། །བེར་ནག་ཅན་གྱི་བསྐང་བ་ཚང་བ་ཡིན། ༈ །གནམ་ཆོས་བསྐང་ཐུང་རྙིང་མ་ཐམས་ཅད་འདུས། །དམ་ཚིག་ཉམས་ཆག་ཕྲ་ཞིབ་བྱུང་བོ་རྣམས། །བསྐང་བ་འདི་ཡིས་དག་པར་གསུངས་པ་ཡིན། །འདུལ་བའི་ལུགས་ལ་གསོ་སྦྱོང་དར་བ་ལྟར། །སྔགས་ཀྱི་ལུགས་ལ་བསྐང་བ་གསུངས་པ་ཡིན། །དམ་ཚིག་ས་ཡ་འབུམ་སྡེ་ཡོད་པའི་ཕྱིར། །ཕྲ་ཞིབ་ཉམས་པ་རང་གིས་མི་ཤེས་པས། །དེ་ཉིད་དག་ཕྱིར་བསྐང་ཐུང་ཆག་མེད་བྱ། །འདི་ནི་སྔགས་ཀྱི་གེགས་སེལ་གནད་ཆེན་ཡིན། །འདི་སྐབས་དམིགས་པ་སྒོམ་པར་འདོད་པ་ན། །ནམ་མཁའ་མཐོན་པོར་སངས་རྒྱས་བྱང་སེམས་ཚོགས། །དཀར་དམར་མཐིང་གསུམ་རིམ་པ་བཞིན་དུ་བསྒོམ། །དེ་ལས་ཡིག་བརྒྱ་དཀར་དམར་མཐིང་གསུམ་འཕྲོས། །ལྷ་ཚོགས་ཀུན་གྱི་གནས་གསུམ་འབྲུ་གསུམ་མཐར། །གཡས་སུ་འཁོར་བས་བདུད་རྩིའི་རྒྱུན་བབས་པས། །སྐུ་ལུས་གང་ཞིང་བཀྲག་མདངས་གཟི་བརྗིད་འབར། །ལྷ་
ཚོགས་མི་མཉེས་པ་དག་ཐུགས་དགྱེས་བསྒོམ། །ལྷ་ཚོགས་གནས་གསུམ་ཡིག་བརྒྱ་དཀར་དམར་མཐིང་། །འཕྲོས་པས་བདག་དང་བསྲུང་བྱ་ཐམས་ཅད་ཀྱི། །གནས་གསུམ་འབྲུ་གསུམ་མཐའ་རུ་གཡས་སུ་འཁོར། །དེ་ལས་བདུད་རྩིའི་རྒྱུན་བབ་ལུས་གང་བས། །དམ་ཚིག་ཉམས་ཆག་སྡིག་སྒྲིབ་ཉེས་ལྟུང་ཀུན། །འོག་སྒོ་བཤང་ལམ་བ་སྤུ་ནག་ཉིལ་ཐོན། །རང་ལུས་དྲི་མེད་ཤེལ་སྒོང་ལྟ་བུར་བསྒོམ། །ཨོཾ་ས་མ་ཡ༔ ཨཱས་མ་ཡ༔ ཧཱུྃ་ས་མ་ཡ༔ གུ་རུ་དྷེ་ཝ་ཌཱཀི་ནཱི་སརྦ་དྷརྨ་པཱ་ལ། ཨོཾ་བཛྲ་སཏྭ་ས་མ་ཡ༔ ཞེས་སོགས་ཡིག་བརྒྱ་ཅི་རིགས་བརྗོད་བྱ་སྟེ། །ཉམས་ཆག་བསྐང་བའི་སྔགས་དམིགས་ཤིན་ཏུ་ཟབ། །གསར་རྙིང་མགོན་པོའི་སྒྲུབ་སྐོར་རྣམས་ལས་བྱུང་། །བསྐང་ཐུང་འདི་གར་བརྒྱ་རྩ་གསོག་པ་ན། །སྒྲིབ་སྦྱོང་རྐྱེན་ཟློག་གཉིས་ཀའི་མཆོག་ཏུ་འགྱུར། །རྒྱུན་ཁྱེར་བསྐང་ཐུང་གི་ལེའུ་སྟེ་དྲུག་པའོ།། ༈ །།ཕྱི་རྒྱུད་གཞི་བདག་གཏོར་མ་བསྔོ་བ་ནི། །གནམ་ཆོས་སམ་ནི་ཀཾ་ཚང་གཞུང་ལྟར་བྱ། །དེ་ནས་གཏོར་མགྲོན་ཡེ་ཤེས་པ་དེ་རྣམས། །སྐུ་གསུང་ཐུགས་རྟེན་རྣམས་ལ་ཐིམ་པར་དམིགས། །འཇིག་རྟེན་པ་རྣམས་རང་གནས་ཡིད་ཀྱིས་གཤེགས། །
རྒྱུན་དུ་དེ་ག་ཙམ་གྱིས་ཆོག་པ་སྟེ། །གནས་དེར་མི་འདུག་ཐག་རིང་འགྲོ་དགོས་ན། །རྗེས་ཆོག་རྒྱལ་བ་རྒྱ་མཚོའི་གཞུང་ལྟར་བྱ། །མཚམས་བསྡམས་སྒྲུབ་པ་ལ་སོགས་ཡིན་ན་ཡང་། །ས་གཅིག་ཡུན་རིང་འདུག་ཅིང་བདག་བསྐྱེད་དང་། །བསྙེན་པ་གཏོར་བསྔོས་རྒྱུན་དུ་བྱེད་པ་དེ། །བྱང་ཆུབ་ནར་མར་སྒྲུབ་པ་ཡིན་པའི་ཕྱིར། །རྒྱུན་དུ་རྗེས་ཆོག་མི་དགོས་དེ་ཡི་དོན། །འདི་ནི་གསར་མས་མི་བཞེད་རྙིང་མའི་ལུགས། །དགོན་པ་རྣམས་སུ་གྲྭ་པ་སོ་སོ་ལ། །གཏོར་མ་མེད་ཀྱང་སྤྱི་ཕ་དེར་དམིགས་ནས། །གཏོར་བསྔོས་འདོན་པ་ཆོས་སྡེ་ཀུན་ལ་དར། །སྒར་པ་རྒྱང་རིང་བཀྱག་ཚེ་སྤྱི་ཕ་ལ། །གཏོར་མ་མེད་པས་རྩམ་གཏོར་ཞེས་བྱ་བ། །སྡེར་ཆུང་ངམ་ནི་ཐེབ་ཙེ་གཙང་མའི་ནང་། །མེ་བཤོར་བྱས་པའི་རྩམ་པས་ཕྱུར་བུར་བཀང་། །གྲི་ཡིས་བྱུགས་ཏེ་གྲུ་བཞི་རྩེ་རྒྱལ་བྱས། །ཟུར་དུ་མར་ནི་ཅུང་ཟད་གཅིག་བཞག་སྟེ། །དེ་ཉིད་ནག་ཚང་ཐབ་ཆེན་ཁ་དེར་བཤམས། །ཇ་ཕུད་བྲན་ནས་འཚོགས་པས་གཏོར་བསྔོས་དར། །གྲུ་པ་གཏོར་མར་བརྩོན་པ་ལ་ལ་ཡིས། །ཐེབ་ཙེ་ནང་དུ་དེ་འདྲ་བཤམས་ནས་ཀྱང་། །རང་རང་གཏོར་བསྔོས་ཙོག་པུ་ནང་དུ་བྱེད། །རེས་འགའ་བྲན་པའི་ཆུ་ཡང་རྙེད་དཀའ་
བས། །ཆུ་ཡི་སྙིང་པོ་ཡིན་ཞེས་ཚྭ་འདེབས་དར། །དེ་ཡང་མ་འཛོམ་མར་དང་ཐུད་དུམ་སོགས། །བྲན་ནས་འདོན་པ་འབྲོག་བླ་སྤྱི་ཡི་ལུགས། །ལ་ལས་ཡིད་ཀྱིས་སྤྲུལ་ནས་མཆོད་ཆོག་ཟེར། །དམིགས་རྟེན་གཏོར་མ་རྫས་ཙམ་མེད་པ་ལ། །ཆོ་ག་གཏོར་བསྔོས་རྒྱས་པ་འདོན་མཁན་གདའ། །རྟོགས་པ་མཐོ་ན་དེ་གས་ཆོག་པ་སྟེ། །ཕྱི་སྣོད་འཇིག་རྟེན་ཐམས་ཅད་གཏོར་གཞོང་ལ། །རི་རབ་གླིང་བཞི་སྐྱེ་འགྲོ་གཏོར་མར་གསུངས། །འོན་ཀྱང་རང་རེར་རྟོགས་པ་དེ་ཙམ་མེད། །གཏོར་མ་མེད་པའི་གཏོར་བསྔོས་གོད་ཀའི་རྒྱུ། །རྗེས་ཆོག་དང་ཞལ་གདམས་ཀྱི་ལེའུ་སྟེ་བདུན་པའོ།། །།དེ་ལྟར་གཏོར་བསྔོས་དམིགས་རིམ་བསྡུས་པ་འདི། །གྲྭ་པ་གསར་བུ་རྣམས་ལ་ཕན་པའི་ཕྱིར། །རཱ་ག་ཨ་སྱས་ཐུན་མཚམས་གཉིས་ལ་སྨྲས། །མཐར་ཕྱིན་ཞེས་བྱས་ཡི་གེར་བཀོད་པའོ།། །།ཤུ་བྷཾ་མ་སྐུ་སརྦ་ཛ་ག་ཏཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།