རྒྱལ་བ་རྒྱ་མཚོ་ལྷ་ལྔ་རྒྱ་མཚོ་ལྔ་ཡི་དཀྱིལ་འཁོར་གྱི་བཟློག་དཔུང་དགྲ་བགེགས་རླག་བྱེད་ཐོད་རྒོད་འབར་བ།
རྒྱལ་བ་རྒྱ་མཚོ་ལྷ་ལྔ་རྒྱ་མཚོ་ལྔ་ཡི་དཀྱིལ་འཁོར་གྱི་བཟློག་དཔུང་དགྲ་བགེགས་རླག་བྱེད་ཐོད་རྒོད་འབར་བ་ཞེས་བྱ་བ་བཞུགས་པའི་དབུའོ།།
སྐད་ཅིག་གིས་བདག་མདུན་རྣམས་གནས་འགྱུར་ཏེ། གཙོ་བོ་རྟ་མགྲིན་ལ་དཔའ་བོ་ཁྲོ་རྒྱལ་རྒྱ་མཚོས་བསྐོར་བ། སྟེང་དུ་སློབ་དཔོན་པདྨ་ལ་གྲུབ་ཐོབ་བརྒྱུད་པའི་བླ་མ་རྣམས་ཁྲོ་ཞིང་གཏུམ་པའི་ཆ་བྱད་ཅན་ཁམས་གསུམ་ཟིལ་གྱིས་གནོན་ནུས་པའི་ཧཱུྃ་སྒྲ་སྒྲོག་པ་དང་། གཡས་ཕྱོགས་སུ་ཐུགས་རྗེ་ཆེན་པོ་ལ་འཕགས་མ་སྒྲོལ་མའི་ཚོགས་ཀྱིས་བསྐོར་ནས་བར་ཆད་སེལ་བ། གཡོན་དུ་གསང་བ་ཡེ་ཤེས་ཀྱི་ཌཱཀི་ལ་ཕོག་ཁྲོས་སེང་གསུམ་སོགས་ཌཱཀི་རྒྱ་མཚོས་བསྐོར་ནས་གདུག་པ་ཅན་དབང་དུ་སྡུད་པ། འོག་ཏུ་དམ་ཅན་རྒྱ་མཚོ་བཀའ་ཉན་གསུང་སྡོད་ཀྱི་ཚུལ་དུ་ཀུན་ཀྱང་
ཁྲོས་པའི་ཆ་བྱད་ཅན། ཁྲོ་བོའི་དཀྱིལ་འཁོར་ཐམས་ཅད་དང་མཁའ་འགྲོའི་ཚོགས་རྣམས་དང་། རྩ་བརྒྱུད་ཀྱི་བླ་མ་ཐམས་ཅད་དང་ཆོས་སྐྱོང་ཐམས་ཅད་རང་བཞིན་གྱི་གནས་ནས་ཚར་བབས་པ་ལྟར་བྱོན་ནས། བདག་མདུན་སོ་སོ་ལ་ཐིམ་པས་གཟི་བརྗིད་རབ་ཏུ་འབར་བ། པདྨ་དབང་གི་དཀྱིལ་འཁོར་དུ་གདུག་པ་ཅན་ཟིལ་གྱིས་གནོན་ཞིང་ཚར་གཅོད་པའི་རང་བཞིན་ཅན་དུ་གྱུར། ཕཊ༔ སྐད་ཅིག་གིས་གཏོར་སྣོད་བྷནྡྷ་ལྕང་ལོ་ཅན་དབྱིབས་གྲུ་གསུམ་སྟོང་གསུམ་དང་མཉམ་པའི་ནང་གཏོར་མ་དང་ལིངྒ་དང་ཚྭ་དང་ཁྲི་ལས་དགྲ་བགེགས་དངོས་སུ་གསལ་
བར་གྱུར། ན་མོ་གུ་རུ་པདྨ་འབྱུང་གནས་ཞི་བ་དང་དྲག་པོ་བླ་མ་དགོངས་འདུས་ལ་སོགས་རིག་འཛིན་གྲུབ་ཐོབ་རྒྱུ་མཚོའི་བདེན་པ་དང་། ཐུགས་རྗེ་ཆེན་པོ་རིགས་ལྔའི་སངས་རྒྱས་བསྐལ་བཟང་གི་སངས་རྒྱས་སྟོང་རྩ་གཉིས་འཕགས་མ་སྒྲོལ་མ་བརྒྱ་རྩ་བརྒྱད་ལ་སོགས་པ་དཀོན་མཆོག་གསུམ་གྱི་བདེན་པ་དང་། དཔལ་ཆེན་རྟ་མགྲིན་དྲྭ་བ་སྡོམ་པ་ཆེ་མཆོག་དཔལ་དགུ་ལ་སོགས་པ་དཔའ་བོ་ཁྲོ་རྒྱལ་རྒྱ་མཚོའི་བདེན་པ་དང་། རྡོ་རྗེ་འཇིགས་བྱེད་ཚེ་བདག་ཀིང་ཀཾ་གཤིན་རྗེའི་གཤེད་ཀྱི་ལྷ་ཚོགས་རྣམས་ཀྱི་བདེན་པ་དང་། ནག་པོ་ལྕགས་རལ་རྟ་ནག་དྲེགས་པ་ལ་སོགས་པ་པདྨ་དབང་གི་ལྷ་ཚོགས་རྣམས་ཀྱི་བདེན་པ་དང་། རྡོ་རྗེ་གཏུམ་པོ་ཡེ་ཤེས་འཇིགས་བྱེད་རྡོ་རྗེ་གཞོན་ནུ་ལ་སོགས་པ་རྡོ་རྗེ་ཐུགས་ཀྱི་ཁྲོ་བོ་རྣམས་ཀྱི་བདེན་པ་དང་། གསང་བ་ཡེ་ཤེས་མཁའ་འགྲོ་ཕག་ཁྲོས་སེང་གསུམ་འཇིགས་བྱེད་ཆེན་མོ་ལ་སོགས་པ་དཔའ་མོ་རྒྱ་མཚོའི་བདེན་པ་དང་། ལས་གཤིན་ཁྲོ་ཆུ་འཆར་ཀ་ནག་པོ་མ་མགོན་ལྕམ་དྲལ་ལ་སོགས་པ་དམ་ཅན་རྒྱ་མཚོའི་བདེན་པ་དང་། བདེན་པ་ཆེན་པོའི་མཐུས། སྤྱིར་ཞིང་བཅུ་ཚང་བ་བསྟན་པའི་སྤྱི་དགྲ། ཁྱད་པར་དུ་བདག་ཅག་དཔོན་སློབ་
བསྲུང་བྱ་མི་ནོར་ཐམས་ཅད་ལ་གནོད་ཅིང་འཚེ་བར་བྱེད་པའི་དགྲ་བགེགས། ལུས་ལ་ན་ཚ་བཏང་བ། སེམས་ལ་སྡུག་བསྔལ་བཏང་བ། ཚེ་བསོད་ནམས་ལ་བར་དུ་གཅོད་པ། བྱང་ཆུབ་སྒྲུབ་པའི་གེགས་བྱེད་པའི། གདོན་བགེགས་བྱད་མ། ནད་འདྲེ་གཅོང་སྲི། ཟ་འདྲེ་ཤི་སྲི། གོད་འདྲེ་གཅན་སྲི། སྒབ་འདྲེ་དམ་སྲི། བྱད་མ་ལྷ་སྲུང་དང་བཅས་པ། གདོན་རྒྱབ་བརྟེན་དང་བཅས་པ། ནད་སྣ་འདྲེན་དང་བཅས་པ་ཐམས་ཅད་སྐད་ཅིག་རང་དབང་མེད་པར་དྲག་པོ་དམར་གྱི་གཏོར་མ་གཟུགས་ལིངྒ་འདི་ལ་ཁུག་ཅིག །ཨོཾ་བཛྲ་ཨཾ་ཀུ་ཤ་ཛ་ཛ༔ ཆིངས་ཤིག་བཛྲ་པ་ཤ་ཧཱུྃ་ཧཱུྃ། སྡོམས་ཤིག་བཛྲ་ཕོ་ཊ་བཾ་བཾ། མྱོས་ཤིག་བཛྲ་གྷནྡྷེ་ཧོ་ཧོཿ ལྷ་དང་ཕྲོལ་ཅིག་བཛྲ་པྲ་ཝེ་ཤ་ཡ་ཕཊ་ཕཊ༔ དབྱེར་མེད་སྙིམས་ཤིག་བཛྲ་ཨཱ་ཝེ་ཤ་ཡ་ཨ་ཨཱ༔ དེ་ནས་ཕུར་པའམ་མཚོན་ཆ་གདེངས་བའམ་ཡུངས་དཀར་ནག་གིས་གཏོར་མའི་ལིངྒ་བྲབ་ཅིང་། ཀིང་ཀང་གི་སྒོ་ནས་བསྒྲལ་ལས་བསྡུས་པ་ནི། ཧཱུྃ། གཤིན་རྗེ་རོལ་པའི་དུར་ཁྲོད་ཆེན་པོ་ནས། །གཏུམ་དྲག་བདུད་འདུལ་རབ་ཁྲོས་མཐུ་སྟོབས་བདག །ཁྲོ་བོའི་ལྷ་ཚོགས་མ་ལུས་སྐུ་བཞེངས་འཚལ། །གཤེད་མའི་དམག་དཔུང་སྐར་མདའ་
ཐོག་ལྟར་བསྐྱོད། །གནད་ནས་བསྐུལ་ལོ་དགྲ་བགེགས་ད་ལྟ་ཁུག །འདས་དང་མ་འདས་སྲུང་སྐྱོབ་ལྷ་དང་ཕྲོལ། །མཚོན་ཆའི་ཆར་ཕོབ་ལུས་སེམས་ཕྲོལ་ལ་སོད། །གཤིན་རྗེ་ཀིང་ཀང་དམར་ནག་འཁོར་བཅས་ཀྱིས། །དགྲ་བགེགས་ཤ་ཁྲག་རུས་པ་ཞལ་དུ་བསྟབ། །མིང་ཙམ་མེད་པར་རྡུལ་དུ་བརླག་པར་མཛོད། །ཨོཾ་བཛྲ་ཀྲོ་དྷ་བྱ་ཤྲཱི་ཝ་ཧུ་ལུ་ཧུ་ལུ་ཧཱུྃ་ཕཊ་སྭཱ་ཧཱ། ཨོཾ་ཨཱཿཧཱུྃ་ཧཱུྃ་ཨོཾ་མ་ཎི་པདྨེ་ཧཱུྃ། ར་ཙ་ཧིཡ་ཧ་རི་ནི་ས་གནོད་བྱེད་སརྦ་ཤ་ཏུ་ནི་ཏྲི་ཧུར་ཐུ་ཛ་མཱ་ར་ཡ་ཕཊ༔ ཅེས་བསྒྲལ་ནས་ཚེ་བདག་དང་རྡོ་རྗེ་འཇིགས་བྱེད་གཉིས་ཀའི་སྒོ་ནས་བསྟབ་པ་བྱ་སྟེ། ཧཱུྃ། འཇིགས་བྱེད་ཡ་མཱནྟ་ཀ་ནི། །སྲིད་པ་གསུམ་ལ་འཁོར་ལོ་བསྐོར། །འགྲོ་བ་ཀུན་གྱི་སྲོག་དབུགས་ལེན། །ཉམས་པར་གྱུར་པའི་དགྲ་དང་བགེགས། །འདི་ཡི་ལས་ཀྱིས་མཐའ་བསྡུས་ཏེ། །རྡུལ་ཕྲན་བཞིན་དུ་བརླགས་བྱས་ནས། །ཚེ་བདག་ནག་པོའི་ཞལ་དུ་བསྟབ། །བཞེས་ཤིག་རོལ་ཅིག་ཁ་རཾ་ཁཱ་ཧི། །གུ་རུ་དྷེ་ཝཱ་ཌཱཀི་ནཱི་སརྦ་དྷརྨ་པཱ་ལ་གནོད་བྱེད་དགྲ་བགེགས་ཀྱི་གཏི་མུག་ཤའི་བ་ལི་ཏ་ལ་ཁཱ་ཧི། འདོད་ཆགས་ཁྲག་གི་བ་ལི་ཏ་ལ་ཁཱ་ཧི། ཞེ་སྡང་རུས་པའི་བ་ལིཾ་ཏ་ལ་ཁཱ་ཧི། ལན་གསུམ། ཧཱིཿ མ་
བཅོས་ལྷུན་གྲུབ་བདེ་ཆེན་ཞིང་ཁམས་ནས། །རང་བྱུང་ཡེ་ཤེས་ཐུགས་རྗེའི་ལྷ་ཚོགས་རྣམས། །མ་འགགས་འགྲོ་བ་འདུལ་བར་ཐུགས་དམ་བསྐུལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །རང་བཞིན་རྣམ་པར་དག་པའི་དཀྱིལ་འཁོར་ནས། །ཡེ་ཤེས་ལྔ་ལྡན་རྒྱལ་བ་རིགས་ལྔའི་མཆོག །དུག་ལྔ་རྩད་ནས་གཅོད་པར་ཐུགས་དམ་བསྐུལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཕྱོགས་བཅུའི་བདེ་གཤེགས་འདུས་པའི་དཀྱིལ་འཁོར་ནས། །རྣམ་ཐར་བརྒྱད་ལྡན་བྱང་ཆུབ་སེམས་དཔའི་ཚོགས། །རྣམ་ཤེས་ཚོགས་བརྒྱུད་དག་པར་ཐུགས་དམ་བསྐུལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །འགྲོ་འདུལ་སྤྲུལ་པ་སྐུ་ཡི་ཞིང་ཁམས་ནས། །བཅོམ་ལྡན་ཐུབ་པ་དྲུག་གི་ཐུགས་དམ་བསྐུལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །མཛད་པ་རྨད་དུ་བྱུང་བའི་དཀྱིལ་འཁོར་ནས། །འགྲོ་འདུལ་སངས་རྒྱས་སྟོང་གི་ཐུགས་དམ་བསྐུལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཚད་མེད་རྣམ་པར་ཐར་པའི་སྒོ་བཞི་ནས། །ཁྲོ་རྒྱལ་སྒོ་སྐྱོང་བཞི་ཡི་ཐུགས་དམ་
བསྐུལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །དཀྱིལ་འཁོར་ཆེན་པོའི་བར་ཁྱམས་འཁོར་ཡུག་ནས། །རིག་འཛིན་བཀའ་སྡོད་ཚོགས་ཀྱི་ཐུགས་དམ་བསྐུལ། རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཧྲཱིཿ ཡེ་ཤེས་མེ་དཔུང་འབར་བའི་ཀློང་དཀྱིལ་ནས། །གདུག་པའི་ཀླུ་རྣམས་བརྩེགས་པའི་ཁྲི་སྟེང་དུ། །ཐུགས་རྗེ་ཆེན་པོ་ཁྲོས་པའི་ཚུལ་བསྟན་པ། །དབང་ཆེན་རྟ་མཆོག་རྒྱལ་པོ་ཧེ་རུ་ཀ །བསྙེལ་བ་མི་མངའ་སྟོབས་བཅུའི་ཤུགས་འཆང་ཞིང་། །མཐུ་རྩལ་རླབས་ཀྱིས་ས་རྣམས་གཅིག་ཆར་བསྒྲོད། །རྟ་སྐད་ཐང་གསུམ་གསང་བའི་ཐུགས་དམ་བསྐུལ། །སྟབས་དགུའི་འགྲོས་ཀྱིས་ཐེག་དགུའི་ལམ་ལ་སྦྱོར། །དྷཱི༔ཡིས་ང་རོས་ལོག་འདྲེན་ཟིལ་གྱིས་གནོན། །རོལ་པའི་རྟ་བྲོས་བདུད་བཞི་ཐལ་བར་རློགས། །ཀུན་ལ་དབང་བྱེད་དབང་མཆོག་རྒྱལ་པོའི་སྐུ། །སྔོན་གྱི་ཞལ་བཞེས་ཐུགས་དམ་རྒྱལ་པོ་ནི། །སྲིད་གསུམ་གདུག་པ་འདུལ་བར་དམ་བཅས་པ། །མ་རུངས་གདུག་པའི་ས་བདག་ཀླུ་གཉན་དང་། །སྒྲུབ་ལ་བར་དུ་གཅོད་པའི་དགྲ་དང་བགེགས། །གནོད་བྱེད་འབྱུང་པོའི་ཚོགས་རྣམས་རྡུལ་དུ་རློགས། །དམ་
བཅས་མ་གཡེལ་ཕྲིན་ལས་མྱུར་དུ་མཛོད། །ཐུགས་དམ་དུས་ལ་བབ་བོ་ས་མ་ཡཱ། །ཧྲཱིཿ བསྐལ་པ་མེ་ལྟར་འབར་བའི་ཀློང་དཀྱིལ་ནས། །ཀླུ་དང་ས་བདག་བསྣོལ་བའི་ཁྲི་སྟེང་དུ། །ཁྲོ་བོའི་རྒྱལ་པོ་རྟ་མཆོག་དབང་གི་ལྷ། །སྐུ་མདོག་དམར་ནག་ཆེན་པོ་རྔམ་པའི་སྐུ། །ཁྲོ་གཉེར་བསྡུས་ཤིང་སྨིན་མ་གློག་ལྟར་འཁྱུགས། །སྤྱན་གསུམ་སྡང་མིག་ཉི་ཟླའི་འོད་ཟེར་འཁྲུགས། །རྔམ་པའི་ཞལ་གདངས་ལྗགས་འདྲིལ་རྐན་སྒྲ་རྡེབ། །མཆེ་བ་ཟངས་ཡག་ལོག་འདྲེན་དགྲ་བགེགས་སྒྲོལ། །སྨ་ར་ཨག་ཚོམ་དམར་སེར་བདུད་དཔུང་བསྲེགས། །དབུ་སྐྲ་ཁམ་ནག་རལ་པ་གྱེན་དུ་འཁྱིལ། །སྤྱི་བོའི་གཙུག་ཏུ་རྟ་མགོ་ལྗང་ཞུར་འཚེར། །ལྷང་ལྷང་ཙེར་ཙེར་སྣང་སྲིད་འདར་ཞིང་གཡོ། །ཕྱག་མཚན་ཅིར་ཡང་བསྒྱུར་ཞིང་མཚོན་ཆ་བསྣམས། །རིན་ཆེན་རྒྱུན་བཟང་རྣམ་པ་སྣ་ཚོགས་དང་། །གདུག་པ་སྦྲུལ་ཆེན་རིགས་ལྔས་སྐུ་ལ་བརྒྱན། །ན་བཟའ་སྟོད་གཡོགས་དར་གྱི་ཆོས་གོས་གསོལ། །སྐུ་སྨད་དཔའ་བོ་སྟག་གི་ཤམ་ཐབས་དཀྲིས། །ཞབས་གཉིས་བརྐྱང་བསྐུམ་ཆུ་བདག་ཕོ་མོ་བརྫིས། །སྐུ་ལས་སྤྲུལ་པའི་ཁྲོ་ཚོགས་སྐར་ལྟར་འཁྲུགས། །
དུར་ཁྲོད་འབར་བའི་ཆས་རྣམས་སྐུ་ལ་རྫོགས། །འོད་ཟེར་དྲག་པོ་མེ་དང་ཉི་མ་དང་། །གནམ་ལྕགས་བྱེ་ཚན་ཆར་འབེབས་ཁྲག་དང་དུག༔ ༈ །བྱུ་རུའི་མདོག་འདྲ་ལྗགས་ཀྱི་ཚྭ་ཚྭ་ཡིས། །གདུག་པའི་འཇིག་རྟེན་ཁམས་རྣམས་སྟོངས་པར་མཛད། །ཡེ་ཤེས་མེ་རི་འབར་བའི་ཀློང་དཀྱིལ་ན། །རིག་སྔགས་རྒྱལ་པོ་ཁྲོ་བོ་མང་པོས་བསྐོར། །ཀུན་ཀྱང་རབ་ཏུ་མི་བཟད་འབར་བ་སྟེ། །རྣམ་འགྱུར་ཁྲོས་པའི་སྟངས་སྟབས་ལམས་སེ་ལམ། །དྲག་སྔགས་དབང་གིས་རྟ་སྐད་ཅེ་རེ་རེ། །དཔལ་ཆེན་ཁྲོས་པའི་རྟ་བྲོ་ཁྲིགས་སེ་ཁྲིག །འགྲོ་ལ་ཐུགས་རྗེའི་སྤྲིན་ཚོགས་ཐིབས་སེ་ཐིབ། །གདངས་གསལ་ཡེ་ཤེས་འོད་འབར་ཁྱུགས་སེ་ཁྱུག །ཁྲོ་རྒྱལ་རྔམ་པའི་འབྲུག་སྒྲ་དི་རི་རི། །དྲག་པོའི་གནམ་ལྕགས་ཐོག་འབེབས་ཆེམས་སེ་ཆེམ། །སྲེག་བྱེད་རྡོ་རྗེའི་མེ་འབར་ལྷབས་སེ་ལྷབ། །རྣོ་དབལ་མཚོན་ཆའི་ཆར་པ་སི་ལི་ལི། །ས་བདག་ཀླུ་གཉན་རྒྱལ་བསེན་ཕོ་མོ་དང་། །སྡང་བའི་དགྲ་དང་གནོད་པར་བྱེད་པའི་བགེགས། །སྒྲུབ་ལ་བར་དུ་གཅོད་པ་གང་ཡིན་རྣམས། །རྡུལ་ཕྲན་བཞིན་དུ་ཐལ་བ་རྡུལ་དུ་རློགས། །སྔོན་གྱི་ཐུགས་དམ་ཆེན་པོའི་དུས་ལ་བབ། །ཞལ་
བཞེས་བཞིན་དུ་དྲག་པོའི་ཕྲིན་ལས་མཛོད། །ཧཱུྃ། གསང་ཆེན་རོལ་པའི་དུར་ཁྲོད་ཆེན་པོ་ནས། །དགུ་ཀློང་འཁྲུགས་པ་ཨེ་ཡི་གཞལ་ཡས་ཁང་། །འབྱུང་བ་རང་འོད་འཁྲུགས་པའི་དཀྱིལ་འཁོར་ནས། །ཡི་དམ་ཞི་ཁྲོའི་ཚོགས་རྣམས་སྐུ་བཞེངས་འཚལ། །བཞེངས་ཤིག་བཞེངས་ཤིག་རང་རང་གནས་ནས་བཞེངས། །བསྐུལ་ལོ་བསྐུལ་ལོ་ཐུགས་དམ་གནད་ནས་བསྐུལ། །མཛོད་ཅིག་མཛོད་ཅིག་དྲག་པོའི་ཕྲིན་ལས་མཛོད། །པདྨ་བཛྲ་འཁོར་བཅས་སྐུ་བཞེངས་འཚལ། །བུདྡྷཱ་ཐོད་ཕྲེང་འཁོར་བཅས་སྐུ་བཞེངས་འཚལ། །མི་བསྐྱོད་རྡོ་རྗེ་འཁོར་བཅས་སྐུ་བཞེངས་འཚལ། །པདྨ་དབང་ཆེན་འཁོར་བཅས་སྐུ་བཞེངས་འཚལ། །ཐོད་པ་རྩལ་ཆེན་འཁོར་བཅས་སྐུ་བཞེངས་འཚལ། །དྲག་པོ་མེ་ཕྲེང་འཁོར་བཅས་སྐུ་བཞེངས་འཚལ། །སངས་རྒྱས་དཔའ་བོ་འཁོར་བཅས་སྐུ་བཞེངས་འཚལ། །དབང་ཆེན་རྟ་མགྲིན་འཁོར་བཅས་སྐུ་བཞེངས་འཚལ། །ལག་ན་རྡོ་རྗེ་འཁོར་བཅས་སྐུ་བཞེངས་འཚལ། །རང་རང་གནས་ནས་སྐུ་བཞེངས་འདིར་གཤེགས་ལ། །ཕྲིན་ལས་མྱུར་མགྱོགས་དྲག་པོའི་ལས་མཛོད་ཅིག །ངང་ཉིད་དོན་གྱི་དབྱིངས་
ལས་མ་གཡོས་ཀྱང་། །གནས་སྐབས་གཟུགས་སྐུས་འགྲོ་བའི་དོན་མཛད་ཅིང་། །གནོད་བྱེད་གདུག་པའི་དགྲ་བགེགས་བསྒྲལ་བའི་ཕྱིར། །རྣམ་འགྱུར་ཁྲོ་ཚུལ་འཇིགས་པའི་ཆ་ལུགས་ལ། །ཞལ་གདངས་ལྗགས་འདྲིལ་མཆེ་གཙིགས་རྐན་སྒྲ་རྡེབ། །།སྤྱན་རྩ་དམར་པོ་གྲུ་གསུམ་སྡང་མིག་བསྒྲད། །སྨིན་མ་ཨག་ཚོམ་མེ་འབར་གྱེན་དུ་འཕྱོ། །དབུ་སྐྲ་རལ་པ་ཁམ་ནག་གཙུག་ཏུ་འཁྱིལ། །ཐོད་སྐམ་རིན་ཆེན་རྩེ་བྲན་སྦྲུལ་གྱིས་དཀྲིས། །གཞན་ཡང་དུར་ཁྲོད་ཆས་དང་རུས་པས་བརྒྱན། །སྣ་ཚོགས་རིན་ཆེན་དར་གྱིས་ལྷབ་ལྷུབ་དཀྲིས། །རྣམ་འགྱུར་འདོར་སྟབས་བད་ཅིང་འགྱིང་བག་ཚུལ། །མི་སྲུན་དྲག་ཤུལ་འབར་བའི་གར་སྟབས་འཁྱུགས། །ཞལ་ནས་དྲག་པོའི་སྔགས་ཀྱི་འབྲུག་སྒྲ་སྒྲོག །ཤ་ཁྲག་དམར་གྱི་གཏོར་མ་འདི་བཞེས་ལ། །གནོད་བྱེད་དགྲ་བགེགས་ཐལ་བ་རྡུལ་དུ་རློགས། །ཧཱུྃ། དྲག་པོ་པདྨ་རྡོ་རྗེ་ཐོད་ཕྲེང་རྩལ། །ཁྱེད་ནི་འགྲོ་བའི་མགོན་གྱུར་སྐྱབས་ཀྱི་མཆོག །བདག་གིས་སྒོ་གསུམ་གུས་པས་ཁྱོད་སྒྲུབ་ཅིང་། །དཀའ་བ་དང་བླངས་ལྗི་བ་ཁུར་དུ་ཁུར། །ལུས་སྲོག་འབེན་བཙུགས་ཤ་ཁྲག་གཟན་དུ་བོར། །མོས་གུས་གཏིང་
ནས་ཁྱེད་ལ་སྐྱབས་གསོལ་ན། །ཐུགས་རྗེ་མ་ཆུང་སྔོན་གྱི་ཐུགས་དམ་དགོངས། །དུས་ངན་སྙིགས་མའི་དུས་འདིར་བདག་སྐྱེས་ནས། །ཁྱེད་ཀྱི་ཐུགས་རྗེས་བདག་ལ་བྱིན་གྱིས་རློབས། །བདག་སོགས་བླ་མེད་བྱང་ཆུབ་སྒྲུབ་པ་ལ། །ལམ་ལ་བར་དུ་གཅོད་པའི་དགྲ་བགེགས་རྣམས། །དབང་དྲག་པདྨ་འཁོར་དང་བཅས་པ་ཡིས། ཐུགས་རྗེ་དྲག་པོའི་སྟོབས་ཀྱིས་བསྒྲལ་ནས་ཀྱང་། །གྲུ་གསུམ་མཐིང་ནག་འབར་བའི་ཞལ་དུ་སྦྱོངས། །གསུང་དབྱངས་དྲུག་ཅུ་ལྡན་པའི་མགུལ་དུ་བསྒྲིམ། །དོན་དམ་སྐྱེ་མེད་ཐུགས་ཀྱི་དབྱིངས་སུ་བསྟིམ། །རྣལ་འབྱོར་བདག་གི་འདོད་པའི་དོན་རྣམས་ཀུན། །དབང་དྲག་པདྨ་འཁོར་དང་བཅས་པ་ཡིས། །འགྲུབ་པར་མཛོད་ཅིག་བཛྲ་ས་མཱ་ཡ། །གུ་རུ་དྲག་པོའི་ལས་བྱེད་སྡིག་པའི་གཟུགས། །རྟགས་ཀྱི་རྣོ་དབལ་འཇིགས་བྱེད་འབར་བའི་སྐུ། །མགོ་དགུའི་ཁ་ལ་ཁམས་གསུམ་ཟས་སུ་ཟ། །རྭ་ནི་བཅོ་བརྒྱད་སྲིད་གསུམ་ཟིལ་གྱིས་གནོན། །རྐང་ལག་བརྒྱད་ཀྱིས་སྟོང་གསུམ་དབང་དུ་སྡུད། །མེ་ཡི་ཚྭ་ཚྭ་དྲག་པོ་སྐར་ལྟར་འཁྲུགས། །དྲི་མ་མི་ཞིམ་ཤིན་ཏུ་དཔག་ཚད་ཁྱབ། །ཁ་གདངས་མཆེ་གཙིགས་
རྐན་སྒྲ་བརྡབས་པ་ཡིས། །གནོད་བྱེད་རྒྱལ་འགོང་སྲོག་བདག་ཟས་སུ་ཟ། །ཁ་དགུ་མིག་དགུ་དྲག་པོས་གདུག་པ་འདུལ། །བདུད་འདུལ་ལྕགས་སྡིག་སྐུ་ལ་ཕྱག་འཚལ་བསྟོད། །ལྟཕོ་རིགས་ཀླུ་ལ་ལྕགས་སྡིག་ནག་པོ་བྷྱོ༔ །མོ་རིགས་ཀླུ་ལ་ལྕགས་སྡིག་ནག་པོ་བྷྱོ༔ །དྲག་པོ་གཟའ་ལ་ལྕགས་སྡིག་ནག་པོ་བྷྱོ༔ །གནོད་བྱེད་གདོན་ལ་ལྕགས་སྡིག་ནག་པོ་བྷྱོ༔ སྲོག་བདག་ཐེའུ་རང་ཀུན་ལ་ལྕགས་སྡིག་ནག་པོ་བྷྱོ༔ །དགྲ་བགེགས་ཤ་ཁྲག་གཏོར་མ་འདི་བཞེས་ལ། །མི་མཐུན་ཕྱོགས་རྣམས་ཐལ་བ་རྡུལ་དུ་རློགས། །ཧཱུྃ། མི་ཟླུམངོན་དབྱིངས་ནས་སྐུ་བཞེངས་ཤིག །བཞེངས་ཤིག་བཞེངས་ཤིག་ཆོས་ཀྱི་དབྱིངས་ནས་བཞེངས། །བསྐུལ་ལོ་བསྐུལ་ལོ་སེམས་ཅན་དོན་ལ་བསྐུལ། །མཛོད་ཅིག་མཛོད་ཅིག་དྲག་པོའི་ལས་མཛོད་ཅིག །བླ་མ་བདེ་མཆོག་དཀྱིལ་འཁོར་ལྷ། །དཔའ་བོ་མཁའ་འགྲོ་དམ་ཅན་ཚོགས། །མཆོད་སྦྱིན་གཏོར་མ་འདི་བཞེས་ལ། །ཞི་རྒྱས་དབང་དྲག་ཕྱིན་ལས་ཀྱི། །ལས་རྣམས་མ་ལུས་འགྲུབ་པར་མཛོད། །ཧཱུྃ། ཁྲོ་རྒྱལ་ཆེན་པོའི་ཐུགས་ཀྱི་དཀྱིལ་འཁོར་ནས། །ཐུགས་མཆོག་འགྱུར་མེད་གསང་བདག་རྡོ་རྗེ་འཛིན། །སྐུ་
མདོག་མཐིང་ནག་དཔའ་གཏུམ་འཇིགས་པའི་གཟུགས། །ཕྱག་གཡས་རྡོ་རྗེས་དགྲ་དཔུང་ཐལ་བར་བརླགས། །གཡོན་པས་སྡིགས་མཛུབ་མེ་འབར་ཁམས་གསུམ་བསྲེགས། །སངས་རྒྱས་ཀུན་གྱི་ཐུགས་ཀྱི་མཐུ་སྟོབས་བསྡུས། །དགྲ་བགེགས་ཤ་ཁྲག་གཏོར་མ་འདི་བཞེས་ལ། །དམ་ཉམས་དགྲ་བགེགས་རྩད་ནས་བརླག་པར་མཛོད། །ཧཱུྃ། ཆོས་དབྱིངས་མཉམ་ཉིད་རིག་པའི་ཡེ་ཤེས་ལྷ། །བདེ་གཤེགས་སྒྲུབ་པ་བཀའ་བརྒྱད་ལྷ་ཚོགས་རྣམས། །མ་བཅོས་ལྷུན་འགྲུབ་ཛཿཧཱུྃ་བཾ་ཧོ༔ཨཱཿ །ས་མཱ་ཡཿཨཱ་ཝེ་ཤ་ཡ་ཏིཥྛ་ལྷན༔ རང་རིག་ཡེ་ཤེས་ལྷ་ལ་ཕྱག་འཚལ་བསྟོད། །ཧཱུྃ། རང་བྱུང་ཐབས་ཤེས་དབྱེར་མེད་སྨན་གྱིས་མཆོད། །རྒྱུ་རྐྱེན་རྣམ་དག་བདུད་རྩི་གཏོར་མས་མཆོད། །ཆགས་བྲལ་རཀྟ་དམར་ཆེན་རྫས་ཀྱིས་མཆོད། །ཕྱི་ནང་གསང་བ་དེ་བཞིན་ཉིད་ཀྱིས་མཆོད། །གཉིས་མེད་བླང་དོར་མེད་པའི་ངང་དུ་མཆོད། །སརྦ་པཉྩ་ཨ་མྲྀ་ཏ་ལ་ཁཱ་ཧི། མ་ཧཱ་པཱུ་ཛ་ཁཱ་ཧི། མ་ཧཱ་བ་ལིཾ་ཏ་ལ་ཁཱ་ཧི། མ་ཧཱ་མཾ་ས་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་གོ་རོ་ཙ་ན་ལ་ཁཱ་ཧི། མ་ཧཱ་བ་སུ་ཏ་ལ་ལཱ་
ཧི། ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །ཚོམ་བུ་དགུ་ཡི་ལྷ་ཚོགས་འཁོར་བཅས་ཀྱིས། །དགྲ་བགེགས་ཤ་ཁྲག་རུས་པ་འདི་བཞེས་ལ། །བྱད་མ་དགྲ་བགེགས་གནོད་པའི་སྦྱོར་བ་ཟློག །དགྲ་བགེགས་གཤེད་མ་བྱ་ཁྱུང་རྒྱལ་པོ་ཡིས། །ལྟས་ངན་བཟློག་ཅིང་བསྒྱུར་བའི་ཕྲིན་ལས་མཛོད། །ཧཱུྃ༔ དཔལ་ཆེན་རྡོ་རྗེ་གཞོན་ནུ་ཁྲོ་བོའི་རྒྱལ༔ ཆོས་དབྱིངས་རྣམ་དག་འཁོར་ལོ་རྒྱས་འདེབས་ཡུམ༔ ཐབས་ཤེས་སྐུ་ལས་སྤྲུལ་པའི་ཁྲོ་བོ་བཅུ༔ རང་བཞིན་དབྱིངས་ལས་ཤར་བའི་ཁྲོ་མོ་བར༔ སྤྲུལ་པ་ལས་ལ་མངག་པའི་ཁྲ་ཐབས་ཚོགས༔ ཟ་གསོད་མཆེ་བ་སྟག་གི་གཤོག་པ་ཅན༔ དཀྱིལ་འཁོར་ཕྱོགས་བཞི་སྐྱོང་བའི་སྒོ་མ་བཞི༔ གསོད་པའི་ལས་མཛད་ཕུར་སྲུང་བཅུ་གཉིས་དང་༔ བསེ་ལྕགས་དུང་གི་སྐྱེས་བུ་ལ་སོགས་ཏེ༔ ཕུར་པའི་སྲུང་མར་ཞལ་བཞེས་དམ་བཅས་ཚོགས༔ འདིར་གཤེགས་དགྲ་བགེགས་ཤ་ཁྲག་གཏོར་མ་བཞེས༔ ཁྱེད་ཀྱི་ཐུགས་རྗེ་ཐུགས་དམ་དུས་ལ་བབ༔ མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད༔ ཧཱུྃ༔ གྲུ་གསུམ་མཐིང་ནག་འབར་བའི་དཀྱིལ་འཁོར་ནས༔ དགྲ་བགེགས་བསྣོལ་བའི་གདན་
སྟེང་ནས༔ རྟ་མགྲིན་ནག་པོ་སྐུ་བཞེངས་ཤིག༔ གནོད་སྦྱིན་ནག་པོ་སྐུ་བཞེངས་ཤིག༔་ལས་མཁན་ནག་པོ་སྐུ་བཞེངས་ཤིག༔ བཞེངས་ཤིག་ཆོས་ཀྱི་དབྱིངས་ནས་བཞེངས༔ ཧཱུྃ༔ བསྐུལ་ལོ་ཡཀྵ་མཐུ་བོ་ཆེ༔ ཟད་དོ་དྲེགས་པ་སྡེ་བརྒྱད་ཚོགས༔ མ་གཡེལ་སྲུང་མ་ཐུགས་དམ་ཅན༔ དམ་རྫ་ས་གཏོར་མ་འདི་བཞེས་ལ་སངས་རྒྱས་བསྟན་པ་ཁྱོད་ཀྱིས་སྲུངས༔ དཀོན་མཆོག་དབུ་འཕང་ཁྱོད་ཀྱིས་བསྟོད༔ རྣལ་འབྱོར་སྐུ་ཚེ་ཁྱོད་ཀྱིས་སྲིངས༔ བསྲུང་བྱའི་བར་ཆད་ཁྱོད་ཀྱིས་སོལ༔ སྡང་བའི་དགྲ་ལ་རྟགས་ཕྱུངས་ཤིག༔ གནོད་པའི་བགེགས་ལ་ལས་མཛོད་ཅིག༔ དུས་ལ་བབ་བོ་ས་མ་ཡ༔ བཅོལ་བའི་ཕྲིན་ལས་འགྲུབ་པར་མཛོད༔ ཨེཿ དྲག་པོ་ཆོས་དབྱིངས་གཤིན་རྗེའི་གཞལ་ཡས་ནས༔ ཚ་གྲང་མཚོན་ཆ་དུག་ཕུར་བསྐལ་པའི་མེ༔ སྣང་སྲིད་ལྷ་སྲིན་སྡེ་བརྒྱད་ཁྲི་སྟེང་ནས༔ བདེ་གཤེགས་རྒྱལ་བའི་སྐུ་གསུང་ཐུགས་སྤྲུལ་པ༔ འཇམ་དཔལ་གཤིན་རྗེ་རིགས་གསུམ་འདུས་པའི་སྐུ༔ གཤེད་ཆེན་ཤན་པ་སྲོག་བདག་གསུམ་གྱིས་མཚན༔ གཤིན་རྗེ་ཁྲོ་ཆུ་དུག་གདོང་གཤེགས་སུ་གསོལ༔ ཚེ་བདག་འཆི་བདག་
སྲོག་བདག་གཤེགས་སུ་གསོལ༔ བྷེ་ཝ་ས་ཏ་ཟ་བ་ལྗང་དམར་དང་༔ ཡ་མཱ་རཱ་ཙ་འཁོར་བཅས་གཤེགས་སུ་གསོལ༔ དམ་རྫས་སྨན་རཀ་གཏོར་མའི་མཆོད་པ་འབུལ༔ གསུམ་སྨན་རཀ་གཏོར་མས་ཐུགས་དམ་བསྐང་༔ དགྲ་བགེགས་འཁོར་བཅས་དགྱེས་པར་བཞེས་སུ་གསོལ༔ མ་གཡེལ་མ་གཡེལ་དམ་ཅན་གཤིན་རྗེའི་ཚོགས༔ དགྲ་བགེགས་གནོད་བྱེད་བསྒྲལ་བའི་ཕྲིན་ལས་མཛོད༔ རྐྱེན་ངན་བར་ཆད་བཟློག་པའི་དུས་ལ་བབ༔ ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད༔ ཧཱུྃ༔ ཆོས་དབྱིངས་ལས་གྲུབ་པ་ཡི་རང་བཞིན་ལྷ༔ ཡེ་ཤེས་འཇིགས་བྱེད་ལས་ཧུར་ཡུམ་དང་བཅས༔ ཕོ་བརྒྱད་མོ་བརྒྱད་འཁོར་དང་བཅས་པ་ཀུན༔ འདིར་གཤེགས་གནོད་བྱེད་དགྲ་བགེགས་གདན་ལ་བཞུགས༔ སྨན་གཏོར་རཀྟའི་མཆོད་པས་ཐུགས་དམ་བསྐང་༔ གནོད་བྱེད་དགྲ་བགེགས་མཐུ་སྟོབས་ཤ་ཁྲག་དབུགས༔ ཞལ་དུ་བསྟབ་བོ་བཞེས་ཤིག་ཁཱ་རཾ་ཁཱ་ཧྲཱིཿ ཧཱུྃ་ཧཱུྃ་ཕོ་པེ༔ མ་གཡེལ་མ་སྤངས་མཁའ་འགྲོ་རྣལ་འབྱོར་མ༔ ཆོས་དབྱིངས་ཨེ་ཡི་གཞལ་ཡས་ནས༔ རང་བཞིན་དབྱིངས་ཀྱི་མཁའ་འགྲོ་མ༔ རྡོ་རྗེ་ཕག་མོ་སྐུ་བཞེངས་ཤིག༔
གསང་བ་ཡེ་ཤེས་སྐུ་བཞེངས་ཤིག༔ འཇིགས་བྱེད་ཆེན་མོ་སྐུ་བཞེངས་ཤིག༔ སེང་གདོང་ཌཀི་སྐུ་བཞེངས་ཤིག༔ ཁྲོས་མ་ནག་མོ་སྐུ་བཞེངས་ཤིག༔ ཀུ་རུ་ཀུལླེ་སྐུ་བཞེངས་ཤིག༔ ལས་ཧུར་དྲག་མོ་སྐུ་བཞེངས་ཤིག༔ ལབ་ཀྱི་སྒྲོན་མ་སྐུ་བཞེངས་ཤིག༔ བདེ་ཆེན་རྒྱལ་མོ་སྐུ་བཞེངས་ཤིག༔ འོད་ཟེར་ཅན་མ་སྐུ་བཞེངས་ཤིག༔ དབྱངས་ཅན་ལྷ་མོ་སྐུ་བཞེངས་ཤིག༔ ལོ་མ་གྱོན་མ་སྐུ་བཞེངས་ཤིག༔ སྒྲོལ་མའི་ལྷ་ཚོགས་སྐུ་བཞེངས་ཤིག༔ ཨ་ཕྱི་ཆོས་སྒྲོན་སྐུ་བཞེངས་ཤིག༔ ཕག་གདོང་མཆེད་ལྔ་སྐུ་བཞེངས་ཤིག༔ ཀུན་འཁྱིལ་མཆེད་གསུམ་སྐུ་བཞེངས་ཤིག༔ བསེ་ཡི་ལྷ་མོ་སྐུ་བཞེངས་ཤིག༔་རི་རབ་ཆེན་པོའི་གླིང་བཞི་དང་༔ ཉི་ཤུ་རྩ་བཞིའི་གནས་མཆོག་ནས་རིགས་བཞི་མཁའ་འགྲོ་ཤུགས་འགྲོ་དང་༔ ཡེ་ཤེས་ལས་གྲུབ་མ་མོའི་ཚོགས༔ ཁྲི་འབུམ་བྱེ་བ་ས་ཡ་རྣམས༔ དར་གྱི་ཅོད་པན་པུ་རུ་རུ༔ སིལ་སྙན་མང་པོ་སི་ལི་ལི༔ རོལ་མོ་མང་པོ་ཏི་རི་རི༔ རྒྱན་ཆ་མང་པོ་ཁྲོ་ལོ་ལོ༔ ཌཱ་རུ་གར་སྟབས་ཤིགས་སེ་ཤིག༔ ཞལ་ནས་སྔགས་སྒྲ་དི་རི་རི༔ ཕཊ་དང་ཕེ་སྒྲ་འུ་རུ་རུ༔ རི་རབ་གླིང་བཞི་ལྡེམས་སེ་ལྡེམ།
རྒྱ་མཚོ་ཀུན་ཀྱང་ཁྱོམས་སེ་ཁྱོམ༔ སྣང་སྲིད་དབང་སྡུད་ཧྲཱིཿ་ལི་ལི༔ སྡེ་བརྒྱད་བྲན་དུ་ཁྱུགས་སེ་ཁྱུག༔ རྐང་པ་རྡོ་རྗེ་འགྲོས་སྟབས་ཀྱིས༔ མཁའ་ལ་ཐོགས་མེད་བུན་ནེ་བུན༔ བྷལག་པ་གསེར་གྱི་གདུ་བུ་ཅན༔ སྣ་ཚོགས་གར་བྱེད་ཁྱུགས་སེ་ཁྱུག༔ ཆ་ལུགས་རྣམ་པ་སྣ་ཚོགས་ཅན༔ ཕྲིན་ལས་རྣམ་བཞི་ཐོགས་མེད་བསྒྲུབ༔ བསྐུལ་ལོ་ཐུགས་དམ་གནད་ནས་བསྐུལ༔ མཁའ་འགྲོ་དངོས་གྲུབ་མ་གཡེལ་ཞིག༔ ཤུགས་འགྲོ་ལས་ལ་མ་བུལ་ཞིག༔ བསེ་ལམ་མཐུ་སྟོབས་མ་ཆུང་ཞིག༔ བརྒྱན་པའི་གཏོར་མ་འདི་བཞེས་ལ༔ འདོད་པའི་དོན་ལ་གསོལ་འདེབས་ཀྱིས༔ མཆོག་དང་ཐུན་མོང་དངོས་གྲུབ་སྩོལ༔ ཚེ་དབང་ལོངས་སྤྱོད་རྒྱས་པ་དང་༔ རྐྱེན་ངན་བར་ཆད་ཐམས་ཅད་ཟློག༔ བཅོལ་བའི་ཕྲིན་ལས་འགྲུབ་པར་མཛོད༔ ཧཱུྃ༔ སངས་རྒྱས་བསྟན་པ་སྲུང་བྱེད་པའི༔ དཀྱིལ་འཁོར་མུ་རན་སྐྱོང་བ་ཡི༔ ཆོས་སྐྱོང་སྲུང་མ་མཐུ་རྩལ་ཅན༔ ཁྱོད་ཀྱི་དམ་ཚིག་དུས་ལ་བབ༔ མ་གཡེལ་མ་གཡེལ་ཆོས་སྐྱོང་ཚོགས༔ བསྟན་པ་བསྲུང་བའི་དུས་ལ་བབ༔ ཕྲིན་ལས་སྒྲུབ་པའི་དུས་ལ་བབ༔ དགྲ་བགེགས་བསྒྲལ་བའི་དུས་ལ་བབ༔ མཐུ་རྩལ་ཕྱུངས་བའི་
དུས་ལ་བབ༔ འབར་མ་ཕོ་ཉ་རྫུ་འཕྲུལ་ཅན༔ གར་གྱི་དབང་ཕྱུག་ཁྲོ་རྒྱལ་དཔལ༔ རྟ་མཆོག་རྒྱལ་པོ་ཧེ་རུ་ཀ༔ དོན་གྱི་སངས་རྒྱས་ཡིན་མོད་ཀྱང་མཛད་པའི་ཆོ་འཕྲུལ་དུ་མ་ལས༔ རྣམ་པ་སྣ་ཚོགས་ཆ་ལུགས་ཅན༔ བྲན་གྱི་ཚུལ་དུ་བཀའ་སྲུང་མཛད༔ འཁོར་དུ་སྡེ་བརྒྱད་ཚོགས་ཀྱིས་བསྐོར༔ ཡབ་ཡུམ་སྲས་འཁོར་ཡང་སྤྲུལ་བཅས༔ འདིར་གཤེགས་བརྒྱན་པའི་གཏོར་མ་བཞེས༔ བཅོལ་བའི་ཕྲིན་ལས་མ་ལུས་སྒྲུབས༔ ཡཱཿ ལྷོ་ཕྱོགས་གཤིན་རྗེའི་གྲོང་ཁྱེར་ནས༔ རིམ་པ་དགུ་ཡི་ས་འོག་ནས༔ ལྕགས་མཁར་སྒོ་མེད་ནང་ཤེད་ནས༔ ལས་ཀྱི་གཤིན་རྗེ་གཤེགས་སུ་གསོལ༔ ཤ་ཁྲག་བརྒྱན་པའི་གཏོར་མ་བཞེས༔ བྲ་སྲན་ཤ་རམ་ཁྱི་རྟ་ནག༔ བཙས་སུ་མཐུན་རྫས་ཟས་སུ་བཞེས༔ སྨིན་ཕྲག་སྨག་སྨིན་གློག་འགྱུ་བ༔ ལྷ་གདོན་རྡུལ་དུ་བརླག་པར་མཛོད༔ རིགས་གསུམ་མགོན་པོའི་དབུ་རྒྱན་ཅན༔ རྒྱ་བོད་གཉིས་ཀྱི་བྱད་མ་ཟློག༔ ཞལ་གདངས་ཧ་ལའི་སྒྲ་སྒྲོག་པ༔ གནོད་བྱེད་མ་ལུས་ཟས་སུ་ཟོ༔ མོན་ནག་མགུལ་ན་ལྔ་བ་ཅན༔ ཟ་འདྲེ་ཤི་གཤེད་རྡུལ་དུ་རློགས༔ གཅེར་བུ་སྦྲུལ་ལྡག་བཟློག་གྱོན་ཅན༔ བན་
བོན་མ་ལུས་རྡུལ་དུ་རློགས༔ དགྲ་སྡུས་དགྲ་བོའི་ཙིཏྟ་ཡི༔ ལྟས་ངན་ཐལ་བ་རྡུལ་དུ་རློགས༔ འཆར་ཀ་སྲིད་པའི་འཁོར་ལོ་ཡིས༔ སྲིད་གསུམ་བྱད་མ་རྡུལ་དུ་རློགས༔ ཁྲོ་ཆུ་ཕ་ཝང་འཁོར་ལོ་ཡིས༔ བསྟན་ལ་གནོད་བྱེད་རྡུལ་དུ་རློགས༔ སིར་སིར་གནམ་ལྕགས་ཟེགས་མ་ཅན༔ བསྟན་བཤིག་སྡིག་ཅན་རྡུལ་དུ་རློགས༔ དབལ་གསུམ་མི་མཐུན་རྐྱེན་ངན་ཟློག༔ རྩེ་ཕུར་བྱེད་སྙིང་བརྡོལ་ཏེ་བརྡེག༔ བྱད་མ་ལྷ་སྲུང་རྡུལ་དུ་རློགས༔་དབལ་གསུམ་མེ་ཡིས་འཁོར་ལོ་བསྐོར༔ འགོང་པོ་ཐུལ་ཐུན་ཐལ་བར་རློགས༔ རླུང་ནག་འཚུབ་མ་དཀྱལ་དང་དཀྱིལ༔ མི་ནད་ནོར་ནད་རྡུལ་དུ་རློགས༔ མེ་འབར་ཉམ་ང་ཚ་ཧི་ག༔ སྐྱེ་འགྲོ་དྲུག་གི་གནོད་པ་ཟློག༔ མོན་ནག་ཧ་ལའི་འཁོར་ཚོགས་ཅན༔ ལས་མཁན་ཕོ་ཉ་རྡུལ་དུ་རློགས༔ སྡེ་བརྒྱད་སྣང་སྲིད་ལྷ་འདྲེས་བསྐོར༔ འཇིག་རྟེན་དྲེགས་པ་རྡུལ་དུ་རློགས༔ ཁྱོད་ཀྱི་དུས་ལ་བབ་ལགས་སོ༔ སྲིད་པ་ནག་པོ་ཚ་བོ་ཚ། བདག་ལ་གནོད་བྱེད་འགའ་མཆིས་པས༔ སྤྱི་དགོས་བསྟན་དང་བདག་ཅག་ལ༔ གནོད་བྱེད་ཐལ་བ་རྡུལ་དུ་རློགས༔ ཇི་ལྟར་བྱེད་ཀྱང་ཁྱེད་ཡིན་གྱིས༔ ཁས་བླངས་བཞིན་དུ་
དམ་ལ་འདུས༔ པདྨ་འབྱུང་གནས་བྷ་ཝི་ལྷ༔ ཨཱརྱ་མཉྫའི་བཀའ་མ་བཅག༔ ད་ལྟ་བཅོལ་བའི་ཕྲིན་ལས་མཛོད༔ བྷྱོ༔ མ་གཡེལ་མ་འདའ་བྱ་རོག་མཚན༔ ཁྱོད་ཀྱི་ཐུགས་དམ་དུས་ལ་བབ༔ བདག་ཅག་སློབ་དཔོན་འཁོར་བཅས་ལ༔ དགྲ་བགེགས་བྱད་ཁ་བྱུང་བ་འདི༔ དམ་ཅན་ཁྱོད་ཀྱིས་མ་ཚོར་རམ༔ ཡེ་ཤེས་སྤྱན་དང་མི་ལྡན་ནམ༔ སྔོན་གྱི་དམ་བཅའ་མི་གཉེར་རམ་རིག་འཛིན་རྣལ་འབྱོར་མི་སྐྱོངས་སམ༔ སངས་རྒྱས་བསྟན་པ་མི་སྲུངས་སམ༔ དམ་ཉམས་ལོག་འདྲེན་མི་འདུལ་ལམ༔ ཁྱོད་ཀྱི་ཐུགས་དམ་དུས་ལ་བབ༔ དགྲ་བགེགས་ཤ་ཁྲག་འདི་བཞེས་ལ༔ བར་ཆད་བཟློག་པའི་དུས་ལ་བབ༔ ཧཱུྃ༔ དམ་ཉམས་བསྟན་པའི་དགྲ་བགེགས་འདི། རྡོ་རྗེ་བེར་ཆེན་ལྕམ་དྲལ་དང་༔ མྱུར་མཛད་མགོན་པོ་དུད་སོལ་མ༔ སྲིན་མགོན་གདོང་བཞི་ལ་སོགས་པ༔ བསྟན་སྐྱོང་བཀའ་སྲུང་འཁོར་བཅས་ཀྱི༔ ལྗགས་དམར་བསྐྱོད་པའི་ཞལ་དུ་འབུལ༔ དགེ་དེས་བསྟན་པ་དར་རྒྱས་ཤོག༔ ཧཱུྃ༔ མེ་དཔུང་འབར་བའི་ཀློང་དཀྱིལ་ནས༔ གཤིན་རྗེ་འཆར་ཀ་ནག་པོ་ནི༔ སྐུ་མདོག་ཆར་སྤྲིན་འཐིབས་པ་
འདྲ༔ ཞལ་གདངས་སྟག་གཟིག་རྔམ་པ་འདྲ༔ མཆེ་བ་ཚེར་ཕུང་གདེངས་པ་འདྲ༔ ཤངས་ནས་བསྐལ་པའི་རླུང་ནག་འཚུབ༔ སྙན་ནས་སྟོང་གསུམ་འབྲུག་སྒྲ་སྒྲོག༔ ཞལ་ནས་དྲག་པོའི་སྔགས་བཟླས་ཤིང་༔ འོད་ཟེར་ཚྭ་ཚྭ་སྐར་ལྟར་འཁྲུགས༔ ཚྭ་ཚྭ་སྤྲུལ་པའི་ཕོ་ཉ་འགྱེད༔ གནོད་བྱེད་ཤ་ཁྲག་གཏོར་མ་བཞེས༔ དགྲ་བགེགས་ཟློག་པའི་ལས་མཛོད་ཅིག༔ ནད་ཁ་རིམས་ཁ་དགྲ་ལ་སྡིག༔ བྱད་ཁ་ཆོད་གཏོང་ཐམས་ཅད་ཟློག༔ བཀའ་བརྒྱད་ཕོ་ཉ་ཡོངས་རྫོགས་ཐུགས་དམ་ཅན༔ འདོད་ཡོན་བརྒྱན་པའི་མཆོད་གཏོར་འདི་བཞེས་ལ༔ ཡིད་ལ་བརྣག་པའི་དགྲ་བགེགས་ཐམས་ཅད་སྒྲོལ་དུས་མིན་འཆི་དང་རྗོད་ཟོར་ལྟས་ངན་ཟློག༔ ཧཱུྃ༔ ནམ་མཁའ་ས་གཞི་བར་སྣང་གང་༔ ཧབ་ཤ་མ་ལུས་འཁོར་དང་བཅས༔ གཞན་ཡང་སྤྲུལ་པའི་ཕོ་ཉ་སོགས༔ ཐམས་ཅད་མ་ལུས་གནས་འདིར་བྱོན༔ བརྒྱན་གྱི་གཏོར་མ་འདི་བཞེས་ལ༔ བར་ཆད་ཐམས་ཅད་ཞལ་དུ་གསོལ༔ སྨྱོ་ནད་ཐམས་ཅད་བསྲུང་དུ་གསོལ༔ རིམས་གྲིབ་ཐམས་ཅད་བསྒྱུར་དུ་གསོལ༔ བདུད་ཀྱི་གནོད་པ་བཟློག་ཏུ་གསོལ༔ ཁ་སྤྱད་སྣ་རིས་བྱེད་རྣམས་ཟློག༔ བཅོལ་
བའི་ཕྲིན་ལས་མྱུར་འགྲུབ་མཛོད༔ ཧཱུྃ༔ རི་རབ་བྱང་ཤར་དྲག་པོའི་དཀྱིལ་འཁོར་ནས༔ ད་ལ་ལྗང་ནག་གྲུ་གསུམ་གཞལ་ཡས་ནས༔ ཨུ་ཙ་ལ་ཡི་དུར་ཁྲོད་ཆེན་པོ་ནས༔ བདུད་ཕོ་བདུད་མོའི་གྲོང་ཁྱེར་ཆེན་པོ་ནས༔ དཔལ་ཆེན་ཐུགས་སྤྲུལ་སྲོག་བདུད་ཏྲཀྐད་ནི༔ སྐུ་མདོག་མཐིང་ནག་ཤིན་ཏུ་གཏུམ་ལ་རྔམ༔ ཤ་ཁྲག་ཕུད་ཀྱི་མཆོད་པ་འདི་བཞེས་ལ༔ རྣལ་འབྱོར་སྒྲུབ་མཆོག་དཔོན་སློབ་མི་ནོར་ལ༔ གཟུགས་ཅན་དགྲ་དང་གཟུགས་མེད་བགེགས་ལ་སོགས༔ ཚར་གཅོད་དྲག་པོའི་ཕྲིན་ལས་མཛད་དུ་གསོལ༔ བྱད་ཁ་ཕུར་ཁ་ཟོར་ཁ་དམོད་མོ་རྣམས༔ བཟློག་པའི་ཕྲིན་ལས་དྲག་པོ་མཛད་དུ་གསོལ༔ ༈ ཞིང་སྐྱོང་མགོན་པོའི་དམག་ཚོགས་རྣམས༔ འཇིག་རྟེན་སྲུང་མ་གཉེན་པོ་རྣམས༔ བརྒྱན་པའི་གཏོར་མ་འདི་བཞེས་ལ༔ ད་ལྟ་དགྲ་བོའི་ཟས་ནོར་འཕྲོག༔ ཟིན་ལ་དབང་ལྡན་གནང་དུ་བྱིན༔ ད་ལྟ་དགྲ་ཡི་ར་སྒོ་ཕྱེས༔ ཚང་གསུམ་ནོར་ལ་ནང་བྱོན་གྱིས༔ དགྲ་ཡི་ནོར་རྣམས་ཟིན་ལ་བྱིན༔ རང་གི་མི་ནོར་ཁ་འཛིན་གྱིས༔ དགྲ་དང་བགེགས་ལ་དམག་འདྲེན་པ༔ དམག་མི་རྣམས་ཀྱིས་དམག་དཔུང་བསྐྱེད༔
བདག་ཅག་དཔོན་སློབ་འཁོར་བཅས་ཀྱི༔ རྒྱུ་རྐྱེན་འབྲས་བུ་ཆུད་མ་གསན༔ དགྲ་དང་གདོན་ལ་དམག་སྣ་དྲོངས༔ གནོད་བྱེད་མི་རྟ་གྲུམ་ཆིང་གྱིས༔ བཅོལ་བའི་ཕྲིན་ལས་མ་གཡེལ་ཅིག༔ རང་གི་མི་རྟ་ཁ་འཛིན་གྱིས༔ དགྲ་བགེགས་བར་ཆད་གློ་བུར་ནད་རྣམས་བཟློག་ཏུ་གསོལ༔ ཀྱེ༔ གླིང་བཞི་རི་རབ་རྩེ་མོ་ནས༔ གནོད་སྦྱིན་ཆེན་པོ་དྲག་རྩལ་ཅན༔ ཆིབས་སུ་ཁྱུང་དམར་རླུང་གཤོག་ཆིབས༔ སྐུ་ལ་དར་དམར་འཇོལ་བེར་གསོལ༔ སྟག་རལ་གཡས་ལ་གཟིག་ཤུབས་གཡོན༔ རྒྱབ་ན་བསེ་ཡི་ཕུར་དམར་གྱོན་ཕྱག་གཡས་མདུང་དར་དགྲ་ལ་འདེབས༔ གཡོན་པས་དགྲ་སྙིང་རྒྱུ་ཞགས་འཛིན༔ བསེ་ཞུ་བསེ་ཁྲབ་སི་ལི་ལི༔ བཀའ་ཉན་འཁོར་བརྒྱད་དང་བཅས་པ༔ དམ་རྫས་གཏོར་མས་ཐུགས་དམ་བསྐང་༔ ཆག་ཆེན་ཉམ་ང་བཟློག་ཏུ་གསོལ༔ བྱད་ཁ་བཟློག་ལ་ཕུར་ཁ་སྒྱུར༔ དགྲ་སྣ་ཇགི་སྣ་དམག་སྣ་ཟློག༔ དམ་ཉམས་དགྲ་ལ་ཟོར་ཁ་སྒྱུར༔ འཁོར་སྲུང་རྐྱེན་ཟློག་བསམ་པ་སྒྲུབས༔ ཕྲིན་ལས་རྣམ་བཞི་བསྒྲུབ་ཏུ་གསོལ༔ ཧཱུྃ༔ གཤིན་རྗེ་མ་མོ་བདུད་བཙན་དབང་ཕྱུག་གཟའ༔ སྡེ་དཔོན་སུམ་ཅུ་དྲེགས་པ་བཅོ་བརྒྱད་
སོགས༔ འཇིག་རྟེན་འདས་དང་མ་འདས་དྲེགས་པའི་ཚོགས༔ སྐུ་མདོག་ཆ་ལུགས་རྫུ་འཕྲུལ་ཅིར་ཡང་སྟོན༔ རང་རང་ཆུང་མ་བུ་དང་འཁོར་དཔུང་བཅས༔ གྲངས་མེད་ནམ་མཁའ་ཁྱབ་པར་རྒྱུག་པ་རྣམས༔ མགྱོགས་པའི་ཆིབས་ལྡན་སྲ་བའི་གོ་ཆ་གྱོན༔ རྣོ་བའི་མཚོན་ཐོགས་གདུག་པའི་ང་རོ་སྒྲོག༔ གནག་པའི་སེམས་འཆང་དགྲ་འཇོམས་དམག་ཚོགས་བསྟོད༔ སྨན་རཀ་གཏོར་སོགས་ཕྱི་ནང་གསང་མཆོད་འབུལ༔ ཐུགས་དམ་བསྐང་བའི་དམ་རྫས་རྒྱས་པར་བཞེས༔ བསྟན་པ་གཉན་སྲུངས་དཀོན་མཆོག་དབུ་འཕང་བསྟོད༔ རྣལ་འབྱོར་བདག་ཅག་འཁོར་དང་བཅས་པ་ཡི༔ མི་མཐུན་བར་ཆད་ཀུན་སོལ་ཅི་འདོད་སྒྲུབས༔ སྡང་བའི་སེམས་འཆང་གནོད་བྱེད་དགྲ་དང་བགེགས༔ གང་ན་འདུག་ཀྱང་ཐལ་བ་རྡུལ་དུ་རློགས༔ བཅོལ་བའི་ཕྲིན་ལས་མ་ལུས་འགྲུབ་པར་མཛོད༔ དཀྱིལ་འཁོར་མུ་རན་སྐྱོང་མཛད་པའི༔ མ་ཚོགས་དབང་ཕྱུག་ཉེར་བརྒྱད་ཀྱི༔ སྔོན་ཚེ་དཔལ་ཆེན་སྤྱན་སྔ་རུ༔ བསྟན་པ་བསྲུང་བར་ཞལ་བཞེས་པའི༔ དགྲ་བགེགས་བསྒྲལ་བར་དམ་བཅས་པ༔ ཁས་བླངས་དམ་བཅས་མ་གཡེལ་བར༔ བཅོལ་བའི་ལས་
ལ་མཐུ་མོ་ཆུང་༔ གང་ལ་བྱ་བ་ཁྱོད་ཀྱིས་ཤེས༔ གནག་པའི་དགྲ་བགེགས་ཐམས་ཅད་སྒྲོལ༔ ཕ་རོལ་རྦོད་གཏོང་རྦད་འདྲེ་ཟློག༔ ཆག་ཆེན་ཉམ་ང་ཐམས་ཅད་ཟློག༔ བཟློག་ཅིང་བསྒྱུར་བའི་ལས་མཛོད་ཅིག༔ བྷྱོ༔ མཁའ་འགྲོ་ཆེན་མོ་བཀྲ་ཤིས་ཚེ་རིང་མ༔ དཔོན་གཡོག་ལྔར་བཅས་ཞིང་སྐྱོང་མཁའ་འགྲོ་དང་༔ སྡེ་བརྒྱད་ལ་སོགས་བྲན་གཡོག་ཕོ་ཉའི་ཚོགས༔ ཁྱེད་རྣམས་དོ་ནུབ་མཐུ་དང་དཔུང་བསྐྱེད་ལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ ནད་རིགས་བཞི་བརྒྱ་རྩ་བཞི་ཞི་བ་དང་༔ སྟོང་ཕྲག་བརྒྱད་ཅུའི་བགེགས་ཀྱི་གནོད་པ་ཟློག༔ གཏད་ཁྲམ་ངན་སྔགས་དམོད་མོ་རྦོད་གཏོང་དང་༔ འཇིགས་པ་བརྒྱད་དང་འཐབ་རྩོད་མེད་པར་མཛོད༔ བླ་མའི་སྐུ་དགྲ་བསྟན་པ་བཤིགས་པ་དང་༔ སེམས་ཅན་འཚེ་དང་རྣལ་འབྱོར་བདག་ཅག་ལ༔ སྡང་བའི་དགྲ་དང་གནོད་པའི་བགེགས་ཀྱི་ཚོགས༔ སོད་ཅིག་སྐྱོད་ཅིག་རྨུག་ཅིང་རེངས་པར་མཛོད༔ ཟུངས་ཤིག་གཏུབ་ཅིག་མྱོས་དང་རྨོངས་པར་མཛོད༔ ཤིག་ཅིག་ཆོམས་ཤིག་རྡུལ་ཙམ་མེད་པར་མཛོད༔ ཟོ་ཞིག་འཐུང་ཞིག་ཤ་ཁྲག་ཚོགས་ལ་རོལ༔ བྷྱོ༔ བོད་ཁམས་བརྟན་མ་སྐྱོང་མ་
འཁོར་བཅས་རྣམས༔ བལ་ཡུལ་ཡང་ལེ་ཤོད་ཀྱི་སྟེང་ཤོད་དུ༔ སྒྲུབ་གནས་ཨ་སུ་ར་ཡི་བྲག་ཕུག་ཏུ༔ པདྨ་འབྱུང་གནས་གླང་ཆེན་དཔལ་སེང་གིས་རུ་ཏྲ་བསྒྲལ་བའི་ཞིང་ཆེན་གདན་ལ་བཞག༔ དམ་ཚིག་བདུད་རྩི་ལྕེ་ལ་བཞག་ནས་ཀྱང་༔ མ་འོངས་ཐར་པ་ཐོབ་པར་ལུང་ཡང་བསྟན༔ རྡོ་རྗེ་འཆང་གི་གྲལ་དུ་བཞག་ནས་ཀྱང་༔ བདག་ཅག་སྒྲུབ་པོ་འཁོར་དང་བཅས་པ་ཡི༔ ནད་དང་གནོད་པ་ཐམས་ཅད་ཞི་བ་དང་༔ དགྲ་བགེགས་ལོག་འདྲེན་ཐམས་ཅད་བསྒྲལ་བ་དང་༔ རྣལ་འབྱོར་རེ་བ་ཐམས་ཅད་བཀང་བ་དང་༔ སྔགས་འཆང་བསམ་པ་ཐམས་ཅད་བསྒྲུབ་བོ་ཞེས༔ ཅི་ལས་གྱུར་པའི་རྐྱེན་རྣམས་ཟློག་པར་མཛོད༔ དམ་ཚིག་རྣམས་ལ་ཁྱེད་རྣམས་མ་འདའ་ཅིག་གལ་ཏེ་བཀའ་དང་དམ་ལས་འདས་ན་ནི༔ དཔལ་ཆེན་བཛྲ་ཡཀ་ཁྲོ་བོ་ཡིས༔ ཁྱེད་རྣམས་སྙིང་གི་དཀྱིལ་ནས་ཁྲག་དྲངས་ནས༔ མྱ་ངན་འོ་དོད་འབོད་པར་གདོན་མི་ཟ༔ དེ་བས་བཀའ་དང་དམ་ལས་མ་འདའ་བར༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ ནད་ཁ་རིམས་ཁ་རྐྱེན་ཁ་བྱད་ཁ་ཟློག༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་
མཛོད༔ རྒྱ་མཚོ་ལྔ་ཡི་ལྷ་ཚོགས་འཁོར་བཅས་ཀྱིས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ བདག་ཅག་འཁོར་དང་བཅས་ལ་གནོད་པ་ཡི༔ སྲིད་པའི་ཁྲམ་ཁ་ཐམས་ཅད་དགྲ་ལ་སྒྱུར༔ ལྷ་འདྲེའི་དམག་ཚོགས་མ་ལུས་དགྲ་ལ་དྲོངས༔ ཕ་རོལ་བསམ་སྦྱོར་ངན་པའི་ལས་བརྩམས་པ༔ བྱད་ཁ་ཕུར་ཁ་རྦོད་གཏོང་དྲག་པོ་དང་༔ མཆེ་ཟོར་ཕུང་འདྲེ་ཡུངས་ཟོར་འཕེན་པ་ཟློག༔ ས་བདག་ཀླུ་ཡིས་བྱེད་དུ་བཅུག་པ་དང་༔ ཐེའུ་རང་འགོང་པོའི་སྲིས་རྐུན་ཐམས་ཅད་ཟློག༔ གཤིན་རྗེའི་འཁོར་ལོ་བདུད་ཀྱི་ཁྲམ་འདེབས་དང་༔ མུ་སྟེགས་ངན་པས་བར་ཆད་བྱེད་པ་ཟློག༔ རྒྱལ་བསེན་རྣམས་ཀྱིས་སྨྱོ་འབོག་གཏོང་བ་ཟློག༔ དྲང་སྲོང་གཟའ་དང་ཀླུ་གདོན་གནོད་པ་ཟློག༔ ཞང་ཞུང་ཛོ་ཟོར་སུམ་པའི་གླང་ཟོར་དང་༔ བོན་པོ་རྣམས་ཀྱིས་སྟ་ཟོར་འཕེན་པ་ཟློག༔ བན་དེའི་སྔགས་ཟོར་སྐྱེས་པའི་མདའ་ཟོར་དང་༔ བུད་མེད་རྣམས་ཀྱིས་དམོད་ཟོར་འཕེན་པ་ཟློག༔ བདུད་ཀྱི་གཤེད་བཞི་རོ་ལངས་འབྱུང་པོ་དང་༔ མ་མོ་རྣམས་ཀྱིས་ཁྲག་ཟོར་འཕེན་པ་ཟློག༔ མོ་རྩིས་ངན་དང་རྨི་ལམ་མཚན་མ་ངན༔ ལྟས་ངན་མི་རུང་བརྒྱད་ཅུ་རྩ་
གཅིག་ཟློག༔ བཞི་བརྒྱ་རྩ་བཞིའི་ནད་རྣམས་མ་ལུས་དང་༔ གདོན་རིགས་ཉི་ཁྲི་གཅིག་སྟོང་ཚོགས་རྣམས་ཟློག༔ སྟོང་ཕྲག་བརྒྱད་ཅུའི་བགེགས་ཚོགས་མ་ལུས་པ༔ ཡེ་འདྲོག་ཆེན་པོ་སུམ་བརྒྱ་དྲུག་ཅུ་ཟློག༔ གདོན་ཆེན་བཅོ་ལྔ་ལོ་ཟླ་ཞག་དུས་སྐག༔ མི་མཐུན་ཕྱོགས་རྣམས་དགྲ་བགེགས་སྟེང་དུ་ཟློག༔ དུས་མིན་འཆི་བའི་འཇིགས་པ་བརྒྱད་རྣམས་དང་༔ ལྟས་ངན་ཆོ་འཕྲུལ་དགྲ་བོའི་སྟེང་དུ་ཟློག༔ དཔའ་བོ་ཌཱཀི་ཆོས་སྐྱོང་མཐུ་རྩལ་ཅན༔ ཡབ་ཡུམ་མི་སྲུན་སྡེ་བརྒྱད་དམག་ཚོགས་བཅས༔ ཕྲིན་ལས་དྲག་པོ་ཤིན་ཏུ་མི་བཟད་པ༔ སོད་ཅིག་ཐུལ་ཅིག་དགྲ་དང་བགེགས་ཀྱི་ཚོགས༔ གཏད་དོ་གཉེར་རོ་སྲུང་མ་མཐུ་རྩལ་ཅན༔ ལེ་ལོ་བཏང་སྙོམས་གཡེལ་བ་མ་མཛད་པར༔ རྟགས་དང་མཚན་མ་མྱུར་དུ་སྟོན་མཛོད་ཅིག༔ རྣལ་འབྱོར་བདག་གིས་བཅོལ་བའི་ཕྲིན་ལས་རྣམས༔ ད་ལྟ་ཉིད་དུ་འགྲུབ་པར་མཛད་དུ་གསོལ༔ ༈ རྡོ་རྗེ་གར་གྱི་བཀའ་ཟློག་མ༔ ཤར་ཕྱོགས་གདོན་གྱི་བཀའ་སྒྱུར་ཅིག༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ རིན་ཆེན་གར་གྱི་བཀའ་ཟློག་མ༔ ལྷོ་
ཕྱོགས་གདོན་གྱི་བཀའ་སྒྱུར་ཅིག༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ པདྨ་གར་གྱི་བཀའ་ཟློག་མ༔ ནུབ་ཕྱོགས་གདོན་གྱི་བཀའ་སྒྱུར་ཅིག༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ ལས་ཀྱི་གར་གྱི་བཀའ་ཟློག་མ༔ བྱང་ཕྱོགས་གདོན་གྱི་བཀའ་སྒྱུར་ཅིག༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ གཞན་གྱིས་ཕུར་ཆེན་འདེབས་པ་ཟློག༔་མཚེ་ཟོར་ཡུངས་ཟོར་འཕེན་པ་ཟློག༔ གཤིན་རྗེའི་འཁོར་ལོ་བསྐོར་བ་ཟློག༔ བདུད་ཀྱི་ཁྲམ་ལ་བཏབ་པ་ཟློག༔ མ་མོས་ཐུན་ཟོར་འཕེན་པ་ཟློག༔ ཀླུ་ཡིས་བྱེད་དུ་བཅུག་པ་ཟློག༔ ཕོ་ཉས་བླ་སྲོག་འཕྲོག་པ་ཟློག༔ ཐེའུ་རང་ཚེ་ལ་རྐུ་བ་ཟློག༔ མུ་སྟེགས་བར་ཆད་བྱེད་པ་ཟློག༔ ཞང་ཞུང་ཙོ་དམར་འཕེན་པ་ཟློག༔ བོན་པོས་སྔགས་ལོག་བསྒྲུབས་པ་ཟློག༔ སུམ་པས་གླང་ཟོར་འཕེན་པ་ཟློག༔ སྐྱེས་པས་མདའ་ཟོར་འཕེན་པ་ཟློག༔ བུད་མེད་དམོད་ཟོར་འཕེན་པ་ཟློག༔ ལྟས་ངན་བརྒྱད་ཅུ་རྩ་གཅིག་ཟློག༔ ཡེ་འདྲོག་སུམ་བརྒྱ་དྲུག་ཅུ་ཟློག༔ བགེགས་རིགས་སྟོང་ཕྲག་བརྒྱད་ཅུ་
ཟློག༔ བྱིསྦའི་གདོན་ཆེན་བཅོ་ལྔ་ཟློག༔ བཟློག་གོ་དམར་ཆེན་གཏོར་མས་ཟློག༔ བསྒྱུར་རོ་ལྟས་ངན་དགྲ་ལ་སྒྱུར༔ ཧཱུྃ༔ ཁྲོ་རྒྱལ་ཁམས་གསུམ་ཧཱུྃ་སྒྲ་ཅན༔ ཟངས་ཁྲབ་གསོལ་ནས་མདུང་དམར་ཐོགས༔ བ་དན་རྩེ་གསུམ་གཡབ་པའི་ཚེ༔ ལྷ་སྲིན་དབང་སྡུད་དགྲ་བགེགས་གསོད༔ བདུད་དཔུང་འཇོམས་ཤིང་སྲོག་དབུགས་དབང་༔ མདུང་དམར་དབལ་གྱིས་ལོག་འདྲེན་སྒྲོལ༔ དགྲ་བགེགས་ཐམས་ཅད་བཟློག་ཏུ་གསོལ༔ བྷྱོཿབྷྱོཿསྡང་བའི་དགྲ་ལ་བྷྱོཿ བཟློག་བཟློག་གནོད་པའི་བགེགས་ལ་ཟློག༔ ༈ བྷྱོ༔ ཉི་མ་ལྷོ་ཕྱོགས་ཕ་ཀི་ན༔ རིམ་པ་བདུན་གྱི་ས་འོག་ན༔ མཐའ་མེད་རྒྱ་མཚོའི་གཏིང་རུམ་ནས༔ ཀླུ་བདུད་ནག་པོ་ཏི་པ་ཙ༔ ལས་ཀྱི་གཤིན་རྗེའི་དམག་ཚོགས་རྣམས༔ ཁྲི་དང་དྲུག་སྟོང་འཁོར་དང་བཅས༔ རྒྱལ་ཆེན་ཕྱོགས་སྐྱོང་ཕོ་ཉར་འགྱེད༔ ལྷ་འདྲེ་སྟོང་སྡེ་ལས་ལ་འཛུད༔ ཀུན་ཀྱང་འུར་སྒྲ་ཆེམས་སེ་ཆེམ༔ ཕྱག་ན་ཟློག་པའི་ཀོང་ཟོར་དང་༔ རང་རྟགས་མཚོན་ཆ་མེ་ལྟར་འབར་སྔོན་ནས་བྱད་ཟོར་ཟློག་པའི་ལྷ༔ དམར་ཆེན་གཏོར་མ་འདི་བཞེས་ལ༔ དོ་ནུབ་ཟློག་པའི་
དཔུང་ལ་ཆོས༔ དགྲ་དཔུང་གཡུལ་ངོ་ཟློག་པར་མཛོད༔་གནོད་བྱེད་དགྲ་བགེགས་དམ་སྲི་རྣམས༔ ས་འོག་གཤིན་རྗེའི་ཡུལ་དུ་ཁྱེར༔ རྣམ་པར་སྨིན་པའི་ཆོས་ཤོད་ལ༔ བྱམས་མགོན་བསྟན་པ་མ་བྱུང་བར༔ ནམ་ཡང་སྟེང་དུ་མ་བཏང་ཞིག༔ ཨོཾ་ཀིང་ཀང་ཀ་ལ་དགྲ་བགེགས་ནན༔ རྩ་སྔགས་ལ། སརྦ་ཨ་པ་ན་ཡ་ཟློག་ཟློག༔ ཨོཾ་ལོཀྟི་པཱ་ལ་ནན༔ ས་ག་པཱ་ཤ་ནན༔ ནཱ་ག་དུ་དུ་ནན༔ མ་མཾ་མ་མཾ༔ ཙི་ཙ་ར་ཙི་ཙ་ར༔ རྦད་རུ་ལུ་རྦད་རུ་ལུ༔ རྦད་ཏྲ་ཀོ་ཤ་ཡ་རྦད་ཏྲ་ཀོ་ཤ་ཡ༔ ཧོ་ར་ཧོ་ར༔ ཙི་དུ་སོད་ཙི་དུ་སོད༔ ཤིག་ལྷ་རུ་གཏུབ༔ ཧ་ལ་པ་ཏི་ནན༔ འཁོར་བ་དུལ༔ བདག་གི་གནོད་བྱེད་ཀ་བ་ཙི་བརླག་བརླག༔ ཅེས་བརྗོད་མཐར་གསེར་སྐྱེམས་ཡོད་ན་དཀར་གཏོར་གྱིས་སྣ་དྲངས་ལ་ཕྱོགས་གཙང་སར་འབུལ་བཅུག་གོ༔ ཞེས་ཨ་རཱ་གས་འགྲུབ་སྦྱོར་ཉིན་ཡོངས་སུ་རྫོགས་པར་བསྒྲིགས་པའོ།། །།མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།། །།