ཐུགས་རྗེ་ཆེན་པོ་རྒྱལ་བ་རྒྱ་མཚོ་ལས་དབང་གསུམ་ཤེས་རབ་ཡེ་ཤེས་དབང་གི་ཉམས་ལེན།
ཐུགས་རྗེ་ཆེན་པོ་རྒྱལ་བ་རྒྱ་མཚོ་ལས་དབང་གསུམ་ཤེས་རབ་ཡེ་ཤེས་དབང་གི་ཉམས་ལེན་བཞུགས་སོ།།
ན་མོ་ཤཱཀྱ་མུ་ན་ཡེ། རྡོ་རྗེ་འཆང་དང་ཤཱཀྱ་ཐུབ། །པདྨ་འབྱུང་གནས་ཞབས་ལ་འདུད། །དེ་རྣམས་གསུངས་ལ་དཔང་པོ་བྱས། །རང་བཟོ་མིན་པའི་ཆོས་ཅིག་བཤད། །གེགས་དང་གོལ་ས་བྱུང་བ་དེ། །ཉམས་ལེན་བྱས་པའི་རྟགས་མཚན་ཡིན། །ཉམས་ལེན་མེད་ལ་ཅི་ཆ་ཡོད། །དེ་ཉིད་མ་གསང་བཤད་པ་དེ། །དམ་ཚིག་གཙང་བའི་དངོས་རྟགས་ཡིན། །ངོས་ལྐོག་མཁན་ལ་ཅི་ཆ་ཡོད། །གེགས་སེལ་བློ་ནས་འཆད་པ་འདི། །གདམས་ངག་ཕྱུག་པའི་དངོས་རྟགས་ཡིན། །དཔེ་རུལ་ཀློག་ལ་ཅི་ཆ་ཡོད། །འདོད་ཁམས་གནས་དྲུག་སེམས་ཅན་ཀུན། །ལུས་འདི་
འདོད་ཆགས་རྒྱུ་ལས་བྱུང་། །དེ་ཕྱིར་ཤིན་ཏུ་སྤང་དཀའ་གསུངས། །འཁོར་བར་འཁྱམས་པའི་རྩ་བ་ཡིན། །དེ་ཉིད་སྤངས་བ་ཉན་ཐོས་ལམ། །བསྒྱུར་དང་ལམ་ཁྱེར་གསང་སྔགས་ལམ། །སྡོམ་པ་ལ་སོགས་མ་ཞུས་ཀྱང་། །སྐྱེས་པ་བུད་མེད་དུད་འགྲོ་སོགས། །ཆགས་པ་སུ་ཡིས་སྤྱོད་ཀྱང་འདྲ། །རྣམ་པར་སྨིན་པའི་འབྲས་བུ་ཡིས། །ཡི་དྭགས་གནས་སུ་ངེས་པར་སྐྱེ། །དབང་གི་འབྲས་བུ་ཚད་རོང་གི །སྦྲུལ་དང་སྦལ་པ་རྩངས་ཕག་སོགས། །སེམས་ཅན་སྤུ་མེད་རིགས་སུ་སྐྱེ། །རྒྱུ་མཐུན་འབྲས་བུས་བྱི་ལ་དང་། །བོང་བུ་རྟ་གསེབ་ལ་སོགས་པ། །ཆགས་
པའི་ཟུག་གཟེར་ཅན་དུ་སྐྱེ། །དེ་དག་སྐྱེ་བ་རེ་རེ་མིན། །རྒྱུན་མར་ལྔ་བརྒྱ་རེ་རེ་སྐྱེ། །དེ་ཕྱིར་ཐུབ་པས་བཀག་པ་ཡིན། །སྐྱེ་བོ་ཕལ་པའི་ཆགས་པ་ཡང་། །ཆེ་ཆུང་ཡང་ལྗི་དུ་མ་བཤད། །བླ་མའི་དྲུང་དང་ལྷ་ཁོང་དང་། །མོ་རང་ངོ་ཚ་བསྲུང་དགོས་པའི། །ཉེ་ལོགས་སྤྱད་ན་སྡིག་པ་ཆེ། །ན་བའི་དུས་དང་བསྙེན་གནས་སྲུང་། །ཉི་མཚམས་བརྒྱད་དང་དུས་ཀློབཟང་དང་། །ཁ་དང་གཤང་བར་སྤྱད་པ་དང་། །དེ་དུས་ལྷག་པར་སྡིག་པ་ཆེ། །བརྡུང་དང་དབང་མེད་བཙན་ཐབས་ཀྱིས། །སྤྱད་ན་སྡིག་པ་ཆེ་བར་གསུངས། །གྲངས་ནི་དུས་གཅིག་བདུན་ལས་མང་། །སྤྱད་ན་སྡིག་པ་ལྷག་པར་ཆེ། །མ་དང་སྲིང་མོར་སྤྱད་པ་ན། །སྡིག་པ་དགུ་འགྱུར་ཆེ་བར་བཤད། །དགེ་སློང་མ་ཡི་བཀའ་ཕབ་ན། །མི་བསད་པ་དང་སྡིག་པ་ཉེ། །མཚམས་མེད་ཉེ་བའི་སྡིག་པ་ཡིན། །དེ་དག་མིང་ལ་སྡིག་པ་ཟེར། །སྡོམ་པ་བླངས་བས་དེ་བྱས་ན། །གོང་གི་སྡིག་པ་དེ་ཡི་སྟེང་། །སངས་རྒྱས་བཀའ་བཅག་ཉེས་པ་དང་། །བསྟན་པ་བཤིགས་པའི་ཉེས་པ་མཁན། །སྐྱེ་བོའི་དེ་ལས་འབུམ་གྱུར་ལྗི། །སྔོན་དུ་བཤད་པའི་ལུས་ངན་རྣམས། །སྐྱེ་བ་འབུམ་ཕྲག་བརྒྱ་ལེན་གསུངས། །དེ་ཕྱིར་སྲོག་
ནི་ཆད་པ་ལས། །སྡོམ་པ་ཤོར་བ་ཐུ་བར་གསུངས། །སྡོམ་བཟུང་ཤི་ཡང་ལུས་བཟང་ལེན། །དེ་ནི་ཤི་ཡང་ཤི་བ་མིན། །སྡོམ་ཤོར་ཤི་བས་ཐར་དུས་མེད། །དེ་ཕྱིར་བུད་མེད་སྤྱོད་པ་ནི། །སྡོམ་ལྡན་རྣམས་ཀྱིས་སྲོག་ལྟར་བསྲུངས། །གྲུབ་པ་ཐོབ་པའི་རྣལ་འབྱོར་པས། །མཚན་ལྡན་བུད་མེད་བསྟེན་ན་ནི། །ཚེ་གཅིག་རྡོ་རྗེ་འཆང་ཆེན་འགྲུབ། །རྒྱ་གར་གྲུབ་ཆེན་ཕལ་ཆེར་བཞིན། །གྲུབ་པ་ཐོབ་པའི་གང་ཟག་གིས། །བུད་མེད་མཚན་ལྡན་མ་རྙེད་ན། །དུད་འགྲོ་མཚན་ལྡན་བསྟེན་རུང་གསུངས། །དཔེར་ན་ཀུ་ཀུ་རས་པ་བཞིན། །གལ་ཏེ་གྲུབ་པའི་སར་གནས་ཀྱང་། །སངས་རྒྱས་བསྟན་ལ་གནོད་དོགས་ནས། །བུད་མེད་བསྟེན་པར་མ་བྱས་ན། །ཚེ་འདིར་སངས་རྒྱས་མི་ཐོབ་སྟེ། །བར་དོར་སངས་རྒྱས་ཐོབ་པར་གསུངས། །དཔེར་ན་ཁ་ཆེ་པཎ་ཆེན་བཞིན། །རྩ་རླུང་རང་དབང་མ་ཐོབ་པས། །རང་འདོད་ཆགས་པའི་དབང་གྱུར་པས། །གལ་ཏེ་བུད་མེད་བསྟེན་པ་ནི། །དམྱལ་བ་ཤལ་མ་རིར་སྐྱེ་ཞིང་། །དེ་ལས་ཐར་ན་མངལ་སྲིན་གྱི། །སྐྱེ་བ་ལྔ་བརྒྱ་ལེན་པར་བཤད། །བུད་མེད་བསྟེན་རུང་ནམ་ཡིན་ན། །རླུང་ནི་སོར་རྩེ་ནས་བུས་པས། །
ཐལ་བ་གཏོར་བར་ནུས་པ་དང་། །འོ་དཀར་གསང་རྡོར་གྱིས་རྔུབས་ནས། །ཁ་ནས་འཕུད་པར་ནུས་པ་དང་། །རྒྱ་ཁབ་དར་སྐུད་ཁ་ནས་མིད། །གསང་རྡོར་རྩེ་ནས་འདོན་པ་དང་། །གསང་རྡོར་རྩེ་ནས་རླུང་བུས་པས། །རྐང་དུང་དུང་དཀར་ཕེར་བ་ན། །ཕྱག་རྒྱ་བསྟེན་རུང་ཚད་ཡིན་ཏེ། །རིགས་ངན་མིན་པའི་ཌཱཀི་མ། །ལྔ་བརྒྱ་ཙམ་ལ་འབྲེལ་བཞག་ན། །མཆོག་གི་དངོས་གྲུབ་ཐོབ་པར་བཤད། །དེ་འདྲ་རང་རེའི་སྤྱོད་ཡུལ་མིན། །དངོས་སུ་བུད་མེད་མ་སྤྱོད་ཅིང་། །ལུས་ལ་རེག་ཙམ་མ་བྱས་ཀྱང་། །མིག་གིས་བུད་མེད་མཛེས་མ་མཐོང་། །མ་མཐོང་ན་ཡང་སྐད་ཐོས་ན། །སྐད་མ་ཐོས་ཀྱང་ཡིད་ལ་དྲན། །སྐྱེ་བོའི་དུས་སུ་སྤྱོད་བསྐུང་ངམ། །མིན་ཀྱང་གཞན་གྱི་སྤྱོད་ཐོས་དྲན། །དུད་འགྲོ་གཅིག་ལ་གཅིག་སྤྱོད་མཐོང་། །དེ་འདྲ་གང་རུང་རྐྱེན་བྱས་ནས། །རང་ལ་ཆགས་པ་དྲག་པོ་སྐྱེས། །རང་དབང་མེད་པར་ཐིག་ལེ་འཆོར། །དངོས་སུ་ཅི་ཡང་མ་སྤྱད་ཅིང་། །དེ་ཡིས་སྡོམ་པ་མི་འཆོར་ཡང་། །སྡོམ་པ་གཙང་བར་མི་གྱུར་ཞེས། །འཁྲིག་པ་བདུན་པའི་མདོ་ལས་གསུངས། །འདི་དོན་འོག་ནས་འཆད་པ་ཡི། །བུད་མེད་སྦྱོར་བར་སྒོམ་པ་གཉིས། །འདྲའམ་
སྙམ་ན་མི་འདྲ་སྟེ། །འདི་ནི་ཐ་མལ་འདོད་ཆགས་ཡིན། །འགོ་དེ་ལྷ་ཡི་ཏིང་འཛིན་དང་། །ལྷ་ལ་མཆོད་པར་བྱ་བ་དང་། །ཉམས་རྟོགས་བོགས་སུ་ཐོན་ཕྱིར་རོ། །རབ་ཏུ་བྱུང་བས་དུད་འགྲོ་མོར། །སྤྱོད་པ་གྲུབ་ཐོབ་མ་གཏོགས་པ། །ཁྱེ་འུ་བཙུན་ཆུང་ལ་སོགས་པའི། །ཁ་དང་གཤང་ལམ་སྤྱད་པ་ནི། །རྟེན་ནི་བུད་མེད་མིན་པའི་ཕྱིར། །སྡོམ་པ་འཆོར་ནི་ཨུ་འཆོར་ཏེ། །རྨ་གསུམ་ཁྱད་པར་མེད་གསུངས་ཕྱིར། །ལྟུང་བ་ཤིན་ཏུ་ཚབས་ཆེན་ཡིན། །བརླ་ཡིས་བར་དུ་བཤུད་པ་ཡིས། །བྱང་སེམས་ཉམས་པར་གྱུར་པ་ནི། །བསམ་བཞིན་ཁུ་བ་ཕྱུང་བ་ཞེས། །དགེ་འདུན་ལྷག་མའི་ལྟུང་བ་ཡིན། །སྡོམ་པ་འཆོར་བར་མི་འགྱུར་ཕྱིར། །རྒྱ་བོད་ཆོས་སྡེ་ཀུན་ཏུ་དར། །ལྟུང་བ་ཆེ་ཆུང་ཅི་ཞེ་ན། །བུད་མེད་ལག་པས་རེག་པ་དང་། །དེ་གཉིས་ལྟུང་བ་མཉམ་པར་བཤད། །དེ་ཉིད་སྤང་བར་མི་ནུས་ན། །ལྟུང་བཤགས་ཡིག་བརྒྱ་འབད་པར་གསུངས། །གོང་དུ་བཤད་པའི་ཉེས་དམིགས་ལ། །སྐག་ནས་མི་གཙང་མི་སྤྱོད་ཅིང་། །སངས་རྒྱས་བྱང་སེམས་མངོན་ཤེས་ཅན། །ལྷ་ཀླུ་གཞི་བདག་ལ་སོགས་པ། །ཅེ་རེ་ལྟ་ཞིང་ཀྲོག་གེ་ཉན། །དེ་དག་ཀུན་ལ་ངོ་ཚ་ཞིང་། །
སྐྲག་འཇིགས་བསམས་ནས་སྤངས་བ་ནི། །ཉན་ཐོས་ལུགས་ཀྱི་གདམས་ངག་ཡིན། །བདག་དང་གཞན་གྱི་ལུས་འདྲ་ཤར། །རྣག་ཁྲག་གཅིན་སྟུག་མི་གཙང་གང་། །འབུ་སྲིན་སུམ་བརྒྱ་དྲུག་ཅུ་ཚང་། །དེ་དག་བསམ་བཞིན་སྐྱུག་བྲོ་ལྟ། །རྒོད་ཀྱིས་ཟོས་པའི་རྩིང་གོག་ལ། །ཅི་ཡོད་རང་གཞན་ལུས་ལ་ཡོད། །དེ་དག་བསྒོམས་པས་ཆགས་པ་ཞི། །འདོད་ཆགས་གཉེན་པོ་མི་སྡུག་པ། །བསྒོམ་པ་མདོ་ཡི་ལུགས་ཡིན་ནོ། །སེམས་ལ་འདོད་ཆགས་སྐྱེས་མ་ཐག །སྭ་བྷཱ་ཝ་ཡི་སྔགས་ཀྱིས་སྟོང་པར་སྦྱངས། །དེ་ཉིད་ཡི་གེ་ཧཱིར་སྒྱུར། །དེ་ཉིད་འདོད་ཆགས་རྣམ་དག་པ། །སྣང་བ་མཐའ་ཡས་ཡབ་ཡུམ་བསྒོམས། །དེ་ལས་འོད་འཕྲོས་འགྲོ་ཀུན་གྱི། །འདོད་ཆགས་ཐམས་ཅད་སྦྱངས་བྱས་ཏེ། །ཚུར་འདུས་འོད་ཞུ་སྟོང་པར་བསམ། །བདག་ནི་ཚེ་རབས་ཐམས་ཅད་དུ། །མཐོང་ཐོས་དྲན་པའི་འགྲོ་བ་རྣམས། །ཉོན་མོངས་འདོད་ཆགས་རྒྱུན་ཆད་ནས། །ཚུལ་ཁྲིམས་ཕུན་སུམ་ཚོགས་པར་ཤོག །ནམ་ཞིག་བདག་ཉིད་སངས་རྒྱས་པའི། །ཞིང་དེར་འདོད་ཆགས་མེད་གྱུར་ཅིག །དེ་ནི་བསྒྱུར་བའི་ལམ་ཞེས་པ། །བསྐྱེད་རིམ་པ་ཡི་གདམས་ངག་ཡིན། །འདོད་ཆགས་རྟོག་པ་སྐྱེས་
པའི་ཚེ། །དེ་ཡི་ངོ་བོ་རྣམ་རྟོག་ཡིན། །དེ་ཡི་ངོ་བོར་ཧྲིག་གེ་ལྟ། །གཞི་མེད་སྟོང་པ་ཉིད་དུ་ཡལ། །སོ་སོར་རྟོག་པའི་ཡེ་ཤེས་ཡིན། །ཕྱག་རྫོགས་གཉིས་ཀྱི་མན་ངག་གོ །དེ་ལྟར་མན་ངག་མང་བཤད་ཀྱང་། །འདོད་ཆགས་ཤས་ཆེའི་གང་ཟག་ལ། །དེ་དག་གང་གིས་མི་ནོན་ཏེ། །ཆེ་སྟེ་སྡོམ་པ་འཆོར་བའམ། །ཆུང་སྟེ་བྱང་སེམས་ཉམས་པ་ཡིན། །རྩ་རླུང་ཡོན་ཏན་མེད་པར་འགྱུར། །མོ་གདོན་དྲག་པོས་གནོད་པ་ན། །འདོད་ཆགས་དྲག་པོ་མེ་ལྟར་འབར། །གནས་དེར་སྔོན་དུ་སྡོམ་ཤོར་མང་། །གནས་ཀྱི་གྲིབ་ཀྱིས་འདོད་ཆགས་སྐྱེ། །བུད་མེད་ལ་སོགས་འདོད་ཆགས་སྐྱེ། །དེ་འདྲའི་དཀོར་ཟས་བྱུང་བའི་དུས། །ཟས་ཀྱི་གྲིབ་ཀྱིས་འདོད་ཆགས་སྐྱེ། །ན་གཞོན་ཟས་བཅུད་བཟང་བ་ན། །ལུས་ཟུངས་རྒྱས་པས་ཆགས་པ་སྐྱེ། །རྩ་རླུང་འཁྲུལ་འཁོར་འབད་པ་ན། །ཐིག་ལེ་འཕེལ་བས་ཆགས་པ་སྐྱེ། །དེ་དག་གེགས་སེལ་མ་ཤེས་ན། །གནད་ཀྱི་ཏིང་འཛིན་མི་ལྡན་པར། །བསམ་བཞིན་བྱང་སེམས་བཏང་བ་ན། །གསང་སྔགས་རྩ་བའི་ལྟུང་བར་འགྱུར། །ཉམས་རྟོགས་མི་སྐྱེ་ཚེ་བསོད་འགྲིབ། །སྔར་ནས་མི་ཤེས་མིན་པ་ཡི། །བློ་བུར་
འདོད་ཆགས་དྲག་པོ་སྐྱེས། །ཐིག་ལེ་དབང་མེད་ཡང་ཡང་འཆོར། །ཡིད་ལ་བུད་མེད་ཁོ་ན་དྲན། །གསང་རྡོར་རྩེ་རུ་སྔར་མེད་པའི། །ཐིག་ལེ་སྨེ་བ་ནག་པོ་བྱུང་། །དེ་ནི་འཆི་བའི་རྟགས་ཡིན་ཏེ། །ཚེ་སྔོན་དམ་ཚིག་ཉམས་པའི་ཕྱིར། །རྡོ་རྗེ་དམྱལ་བར་འགྲོ་བར་གསུངས། །ཡིག་བརྒྱ་བསྙེན་ཅིང་ལྟུང་བཤགས་འདོན། །ཞི་ཁྲོའི་བརྒྱ་ཕྱག་ཡང་ཡང་འཚལ། །དེ་ནི་བཤགས་པའི་གེགས་སེལ་གསུངས། །དངོས་སུ་འདོད་ཆགས་ཆེ་བ་དང་། །རྨི་ལམ་བུད་མེད་སྤྱོད་རྨིས་ནས། །ཐིག་ལེ་ཡང་ཡང་འཆོར་བ་ནི། །འདྲེ་མོས་ཚེ་ལ་བརྐུ་བའི་རྟགས། །ཉལ་ཁ་གསང་རྡོར་ལྕགས་སྲེག་གི །ཕུར་པ་རྣོ་ངར་ལྡན་པར་བསྒོམ། །དེ་ཡིས་ཕན་པར་མ་གྱུར་ན། །བདེན་སྟོབས་བཅས་པས་གནོད་བྱེད་བཀུག །རང་དང་ཁ་སྦྱོར་འཁྱུད་པར་བསྒོམ། །ཕྱི་ནས་སྦྲུལ་ནག་སྟོང་གིས་དཀྲིས། །ཇི་སྲིད་བྱང་ཆུབ་མ་ཐོབ་བར། །ང་དང་ཁྱོད་གཉིས་མི་འབྲལ་ཞིང་། །རྟག་ཏུ་ཆུང་མ་བྱའོ་སྨྲ། །གསང་རྡོར་དུག་སྦྲུལ་ནག་པོར་གྱུར། །མོ་ཡི་ཁོག་པར་ཡར་རྒྱུག་ནས། །གློ་སྙིང་ནང་ཁྲོལ་འདྲད་པ་ཡིས། །མོ་ཉིད་སྐད་རན་ཙེར་ཙེར་འདོན། །ད་ནི་ཁོ་མོ་ཐོངས་མཛོད་དང་། །ཕྱིན་ཆད་གནོད་རེ་ན་
ར་ཀན། །ཐ་ཚིག་ལན་གསུམ་ཕུལ་བར་བསྒོམ། །དེ་ནས་སྦྲུལ་བཅུད་བཤིག་ལ་བཏང་། །སྙིང་རྗེ་ཐུན་གཅིག་སྟོང་ཉིད་བསྒོམ། །དེ་ནི་དམིགས་པའི་གེགས་སེལ་ཡིན། །བུ་མོ་གཙང་མས་བཀལ་བ་ཡི། །སྲུང་སྐུད་དམར་པོ་འདོམ་ཕྱེད་ཙམ། །མདུད་པ་བདུན་རྒྱབ་སྔགས་འདིས་བསྔགས། །ཡིག་དྲུག་གམ་ནི་རྟ་མགྲིན་སོགས། །ཡི་དམ་སྔགས་ཀྱི་ཤམ་བུ་རུ། །ཧཱ་རེ་པཱ་ར་དྷ་ནི་ཤུབ་ཁྲབ་དྷ་ར་ནི་སེ་ཏུར་ཐེ་སྭཱ་ཧཱ། སྲོད་ཀྱི་དུས་སུ་སྐྱེད་པར་བཅིངས། །གདོན་གྱིས་ཐིག་ལེ་འཕྲོག་པར་གསུངས། །ན་གཞོན་ཟས་ཕུད་བཅུད་ཆེ་ལ། །དཀར་ཕྱོགས་སྨྱུང་གནས་བསྲུངས་བས་སེལ། །གཞན་གྱིས་ད་བྱིད་སྦྱིན་པའམ། །ནད་ཀྱིས་རང་དབང་མེད་པ་ལ། །མ་ནུ་སྒ་སྐྱ་བུལ་ཏོག་དང་། །ཡུངས་བ་བཞི་ཡི་ཐང་བཏང་ན། །མེ་ལ་ཆུ་བཞིན་ཆགས་པ་ཞི། །གནས་ཀྱི་གྲིབ་ཀྱིས་གནོད་པ་ལ། །བགེགས་གཏོར་བཏང་ཞིང་མཚམས་གཅོད་བྱ། །སྨེ་བརྩེགས་གཟུངས་ཆུ་ཁྱིམ་དུ་གཏོར། །རྫོག ཁང་པའི་ཕྱི་ལ་མེ་ལོང་ངོས། །ཁང་པར་བྱབ་ཁྲུས་བྱས་པས་ཕན། །ཟས་ཀྱི་གྲིབ་ཀྱིས་གནོད་པ་ལ། །ཟས་ནོར་གང་ཡིན་བྱུང་མ་ཐག །དེ་ཉིད་བྲན་ལ་གཏོར་བསྔོས་བྱ། །ལྷ་ཡི་
གསོལ་ལྷག་ཟས་དེ་ནི། །དངོས་གྲུབ་བདུད་རྩིའི་ངོ་བོར་བསྒོམ། །དེ་ཡིས་ཟས་གྲིབ་འབྱུང་མི་སྲིད། །དེ་དག་ཐུན་མོང་སྤྱི་ཡི་ལུགས། །དེ་ནས་ཐུན་མོང་མ་ཡིན་པའི། །གསང་སྔགས་ཉམས་ལེན་ཟབ་མོ་འདི། །དམ་ཚིག་ལྡན་པའི་སློབ་མ་དང་། །དམ་ལྡན་མཆེད་གྲོགས་མ་གཏོགས་པ། །གལ་ཏེ་ཟུར་ཙམ་བརྗོད་ན་ཡང་། །མནར་མེད་དམྱལ་བར་འགྲོ་འགྱུར་ཞིང་། །ཚེ་འདིར་མཁའ་འགྲོའི་སྲོག་གཅོད་པར། །བཅོམ་ལྡན་རྡོ་རྗེ་འཆང་གིས་གསུངས། །དེ་ཕྱིར་གསང་བའི་དམ་ཚིག་རྒྱ། །འདོད་ཆགས་ཆེ་བའི་གང་ཟག་ལ། །འདོད་ཆགས་སྤོང་བར་མི་ནུས་ཏེ། །འདོད་ཆགས་ལམ་དུ་ཁྱེར་ཤེས་ན། །འདོད་ཆགས་ཉིད་ཀྱིས་བྱང་ཆུབ་ཐོབ། །དེ་དོན་བརྟག་གཉིས་རྒྱུད་ལས་གསུངས། །དཔེར་ན་མེ་ཡིས་ཚིག་པ་ལ། །སླར་ཞི་མེ་ཡིས་གདུང་བར་བྱ། །དེ་བཞིན་འདོད་ཆགས་མེས་ཚིག་ལ། །འདོད་ཆགས་མེ་ཡིས་གདུང་བར་བྱ། །སྐྱེ་བོ་མི་བཟད་པ་ཡི་ལས། །གང་དང་གང་གིས་འཆིང་གྱུར་པ། །ཐབས་དང་བཅས་པ་དེ་ཉིད་ཀྱི། །སྲིད་པའི་བཅིངས་ལས་གྲོལ་བར་འགྱུར། །ཆགས་པས་འཇིག་རྟེན་འཆིང་གྱུར་ན། །འདོད་ཆགས་ཀྱིས་ནི་འདོད་ཆགས་
གྲོལ། །བཟློག་པའི་གོམས་པ་འདི་ཉིད་ནི། །སངས་རྒྱས་མུ་སྟེགས་ཅི་མི་ཤེས། །ཞེས་གསུངས་འདི་ནི་བཟློག་བསྒོམ་ཡིན། །གསང་བ་ནོར་བུ་ཐིག་ལེའི་རྒྱུད། །ས་སྐྱ་པཎ་ཆེན་གྱིས་བསྒྱུར་བ། །དོན་འདི་ཁོ་ནའི་གེལ་རྒྱུད་ཡིན། །གཞན་ཡང་དེ་འདྲའི་རྒྱུད་གསུངས་ཚེ། །མཁའ་འགྲོ་དཔག་ཏུ་མེད་པ་ཡིས། །ཡིད་ཀྱིས་སྦྱོར་བ་བྱེད་བསྒོམ་པའི། །བྲན་དང་ཆུང་མར་ཁས་བླངས་ནས། །འཛམ་བུ་གླིང་པ་འདི་ཉིད་ཀྱི། །གནས་ཆེན་ཀུན་ཏུ་དངོས་སུ་བཞུགས། །མཁའ་འགྲོ་མ་ནི་ཐམས་ཅད་ལ། །ལྷ་ཡི་ཏིང་འཛིན་ལྡན་པའི་ཚེ། །རང་གིས་སྦྱོར་བ་བྱེད་བསྒོམས་ན། །མཆོག་དང་ཐུན་མོང་དངོས་གྲུབ་ནི། །ཇི་ལྟར་འདོད་བཞིན་སྩོལ་བར་མཛད། །ཐིག་ལེ་མ་ཉམས་རྟོགས་པ་འཕེལ། །གལ་ཏེ་ཐིག་ལེ་ཉམས་ན་ཡང་། །གསང་བའི་མཆོད་པ་ཡིན་པའི་ཕྱིར། །ལྟུང་བ་བྱུང་བ་མ་ཡིན་ནོ། །འདི་ནི་ཟབ་ཆོས་ཞི་ཁྲོ་ཡི། །འོག་སྒོ་བདེ་ཆེན་རང་གྲོལ་དང་། །ཟབ་ལམ་གསང་བ་འདུས་པ་དང་། །མཁའ་འགྲོ་སྙིང་ཐིག་ལ་སོགས་པ། །ཨོཾ་རྒྱུན་གསུངས་རྣམས་ཤིན་ཏུ་གསལ། །ཕ་རྒྱུད་གསང་བ་འདུས་པ་དང་། །ཐིག་ལེ་ནོར་བུའི་མདོ་དང་ནི། །
ཟབ་ལམ་རྡོ་རྗེ་ཚིག་འབྱེད་དང་། །བརྟག་གཉིས་ལམ་འབྲས་ལ་སོགས་པ། །གསར་མའི་གཞུང་ལས་ཤིན་ཏུ་གསལ། །དེ་སོགས་ལུང་འདྲེན་བྲི་མི་ནུས། །བྲིས་ཀྱང་བློ་ཆུང་གོ་བར་དཀལ། །འདི་ནི་དམར་འདོན་ལག་ཁྲིད་ཡིན། །དེ་ཕྱིར་ཐེ་ཚོམ་མ་བྱེད་ཅིག །ཡི་དམ་གང་ལ་སྦྱར་ཀྱང་འདྲ། །འོན་ཀྱང་རང་རེའི་ཡི་དམ་ནི། །རྒྱལ་བ་རྒྱ་མཚོ་དང་སྦྱར་སྐྱོ་ནས། །རྒྱལ་བ་རྒྱ་མཚོའི་སྟོང་རེ་དང་། །རླུང་ནི་ཅུང་ཟད་བྱུང་བ་གཅེས། །གསང་སྔགས་བླ་མེད་རྒྱུད་ཀུན་ནས། །མི་སྤང་བ་ཡི་དམ་ཚིག་ལས། །ཉོན་མོངས་འདོད་ཆགས་མི་སྤང་གསུངས། །བྱང་ཆུབ་སེམས་དཔའ་རྣམས་ཀྱིས་ཀྱང་། །འགྲོ་བའི་དོན་དུ་སྤྲུལ་སྐུའི་རྒྱུ། །འདོད་ཆགས་མི་སྤང་བཞག་པར་གསུངས། །ནཱ་རོ་པཎ་ཆེན་ཞལ་ནས་ཀྱང་། །ཉོན་མོངས་ཡེ་ཤེས་ཆེན་པོ་སྟེ། །ནགས་ལ་མེ་བཞིན་རྣམ་པར་འགྲོགས། །བསྟོད་པ་གླུ་བླངས་རྒྱུད་ལས་ཀྱང་། །མཆོད་པ་ཆེན་པོ་འདོད་ཆགས་ཆེ། །གསུངས་ཕྱིར་འདོད་ཆགས་བསྒོམ་པར་བྱ། །རང་གི་མདུན་དུ་ཐ་མལ་གྱི། །བུད་མེད་མཛེས་ཤིང་ཡིད་འོང་ཞིག །ཆགས་པའི་དབང་གིས་བྱུང་བར་བྷེ། །གཟུགས་ལ་བལྟ་ཞིང་དགོད་པར་བསམ། །དེ་ཡིས་ངོ་བོ་
རང་སེམས་ལྟ། །གཟུགས་ལ་ཚིགས་པ་སྣང་སྟོང་འཆར། །དེ་ནས་ཆགས་པའི་གཏམ་སྨྲ་ཞིང་། །རྩེ་འཇོའི་གཏམ་རྣམས་བརྗོད་པར་བྷེ། །དེ་ནས་དེ་ཡི་ངོ་བོར་ལྟ། །སྒྲ་ལ་ཆགས་པ་གྲག་སྟོང་འཆར། །དེ་ནས་ཚུར་ལ་མོ་ཉེ་ནས། །ཁ་རླངས་སྒྲ་དྲི་ལུས་དྲི་སོགས། །བྲོ་བས་ཆགས་པ་འཕེལ་བར་བསྒོམ། །དེ་ནས་དེ་ཡི་ངོ་བོར་ལྟ། །དྲི་ཡི་ཆགས་པ་ཚོར་སྟོང་འཆར། །དེ་ནས་ཀ་ར་བུ་རམ་དང་། །ཤ་ཆང་ཞིམ་མངར་བཟའ་བཏུང་རྣམས། །སྦྱིན་ནས་བཟའ་བ་བྱེད་པར་བསྒོམ། །དེ་ཡི་ངོ་བོར་དེ་ཡིས་ལྟ། །རོ་ཡི་ངོ་བོ་མྱོང་སྟོང་འཆར། །དེ་ནས་ཕན་ཚུན་གཅིག་ལ་གཅིག །ལུས་པོར་བྱུག་ཅིང་འཕུར་བར་བསྒོམ། །བཞིན་རས་བལྟ་བ་འཕུར་བར་བསྒོམ། །དེ་ནས་དེ་ཡི་ངོ་བོར་བལྟ། །རེག་བྱའི་ངོ་བོ་ཚོར་སྟོང་འཆར། །དེ་ནས་སྐད་ཅིག་གནས་འགྱུར་ཏེ། །རང་ཉིད་རྒྱལ་བ་རྒྱ་མཚོའི་སྐུ། །རྩ་གསུམ་འཁོར་ལོ་ལྔ་དང་བཅས། །ཚངས་བུག་ཡར་སྣེ་སྤྱི་གཙུག་ཏུ། །ཐིག་ལེ་དངུལ་གྱི་མདོག་ལྟ་བུ། །ཧཾ་ཡིག་མགོ་བོ་ཐུར་བསྟན་མཚན། །དབུ་མའི་མར་སྣེ་གསང་རྡོར་གྱི། །བུ་གའི་ནང་དུ་ཧཱུྃ་ཡིག་ནི། །དམར་པོ་སུམ་བརྩེགས་བཀག་པར་བསྒོམ། །དེ་
ནས་མདུན་གྱི་བུད་མེད་དེ། །མངོན་རྟོགས་བཞིན་དུ་ཕག་མོར་བསྒོམ། །དེ་ཡི་བྷ་གར་པདྨ་ནི། །དམར་པོ་འདབ་མ་གསུམ་པ་ལ། །བུ་གར་ཕཊ༔ཡིག་སེར་པོས་བཀག །རང་གི་གསང་བའི་རྡོ་རྗེ་ཡང་། །རྡོ་རྗེ་དམར་པོ་རྩེ་གཅིག་བསྒོམ། །དེ་ནས་ཡབ་ཡུམ་ཞལ་སྦྱོར་བསྒོམ། །རྡོ་རྗེས་པདྨ་དལ་བུས་དཀྲུག །བྷ་ག་པདྨའི་ཟེ་འབྲུ་ནས། །འདོད་ཆགས་གཏུམ་མོའི་མེ་འབར་ཏེ། །རྡོ་རྗེའི་བུ་ག་ནས་ཡར་ཞུགས། །རང་གི་དབུ་མའི་ནང་དུ་ཡར། །དམར་དང་ཁྱུག་ཁྱུག་འབར་བ་ཡིས། །སྤྱི་བོའི་ཧཾ་ཡིག་དེ་ཞུ་སྟེ། །ཆབ་བྲོམ་ལས་ནི་ཆུ་འབབ་བཞིན། །ཐིག་ལེ་འོ་མ་ལྟ་བུ་ཡིས། །སྤྱི་བོའི་རྩ་འདབ་ཐམས་ཅད་གང་། །མར་བབ་མགྲིན་པའི་རྩ་འདབ་གང་། །ལུས་སེམས་བག་ཙམ་བདེ་བ་འཆར། །དེ་ཡི་ངོ་བོར་བལྟས་པ་ཡིས། །དགའ་བའི་ཡེ་ཤེས་ཞེས་བྱའོ། །སེམས་ཀྱི་སྒྲིབ་པ་དག་པ་དང་། །བུམ་པའི་དབང་ནི་ཐོབ་པ་ཡིན། །དེ་ནས་ཆགས་པའི་སྣང་བ་རྙེད། །འཁྱུག་ཅིང་རྡོ་རྗེས་དཀྲུག་པར་བསྒོམ། །ཐིག་ལེ་མར་བབ་སྙིང་ཁ་ཡི། །རྩ་གནས་ཐམས་ཅད་གང་བ་ཡིས། །ལུས་སེམས་བདེ་ཉམས་རབ་ཅིག་སྐྱེས། །དེ་ཡི་ངོ་བོར་བལྟས་པ་ཡིས། །བདེ་བ་སྟོང་
པ་དབྱེར་མེད་འདྲེས། །མཆོག་དགའི་ཡེ་ཤེས་ཞེས་བྱའོ། །ངག་གི་སྒྲིབ་པ་དག་པ་དང་། །གསང་བའི་དབང་ནི་ཐོབ་པ་ཡིན། །དེ་ནས་ཆགས་པ་ཆེར་བསྐྱེད་ལ། །འོ་བྱེད་དམ་དུ་འཁྱུད་པ་དང་། །ཆགས་པའི་སྒྲ་སྐད་སྒྲོག་པར་བསྒོམ། །དེ་ནས་ཐིག་ལེ་ཕྱིར་དབབ་པས། །འདོད་ཆགས་རབ་ཏུ་ཆེར་སྐྱེས་པས། །ལུས་སེམས་བདེ་བས་གང་གྱུར་ནས། །རྣམ་རྟོག་རགས་པ་གཞན་ཀུན་འགག །བདེ་དང་མི་བདེའི་བསམ་པའང་མེད། །དེ་ཡི་ངོ་བོར་བལྟས་པ་ཡིས། །དགའ་བྲལ་ཡེ་ཤེས་ཞེས་བྱའོ། །སེམས་ཀྱི་སྒྲིབ་པ་དག་པ་དང་། །ཤེས་རབ་ཡེ་ཤེས་དབང་དངོས་ཐོབ། །དེ་ནས་ཆགས་པ་ཆེར་སྐྱེས་ལ། །བྷ་གའི་དཀྱིལ་དུ་རིག་པ་གཏད། །དེ་ནས་ཐིག་ལེ་ཕྱིར་དབབ་ནས། །གསང་གནས་རྩ་འདབ་གང་བར་བསྒོམ། །དེ་ནས་བདེ་བ་ཚད་མེད་སྐྱེས། །འདོད་ཆགས་བདེ་བ་ཚབ་ཆེ་བས། །རྣམ་རྟོག་ཀུན་འགག་དྲན་སེམས་མེད། །དེ་ཡིས་ངོ་བོ་མ་མཐོང་ན། །ཉོན་མོངས་འདོད་ཆགས་དྲག་པོ་ཡིན། །དེ་ཡི་ངོ་བོར་བལྟས་པ་ཡིས། །བདེ་དང་སྟོང་པ་དབྱེར་མེད་འདྲེས། །ལྷན་ཅིག་སྐྱེས་དགའི་ཡེ་ཤེས་ཞེས། །དཔེ་ཡི་ཕྱག་རྒྱ་ཆེན་པོ་
ཡིན། །དཔེ་འདི་མཐོང་བར་མ་གྱུར་ན། །དོན་གྱི་ཕྱག་ཆེན་མི་རྟོགས་གསུངས། །འདི་ལྟར་ཐིག་ལེ་འབེབས་པ་ཡང་། །ལུས་ཟུངས་བཟང་ཞིང་ཆགས་པ་ཆེ། །དེ་ལྟར་འཁྲུལ་འཁོར་མི་དགོས་ཏེ། །དམིགས་པ་ཁོ་ནས་ཐིག་ལེ་ཕེབས། །བཙན་ཐབས་དུ་ནི་འཆོར་འགྲོ་བས། །དལ་བུས་ངལ་ནི་བསོ་ཞིང་འབེབས། །དེ་དོན་མི་ལ་རས་ཆེན་གྱིས། །འབེབས་པ་རུས་སྦལ་འགྲོས་ཀྱིས་འབེབས། །གསུངས་པ་དལ་བུས་དགོས་པའི་དོན། །རྩ་རླུང་གོམས་པར་མ་གྱུར་པས། །བདེ་བ་རིབ་ཅིག་སྐྱེས་པ་ན། །བཟློག་དགོས་དེ་མིན་བཟློག་མི་ཐུབ། །བཟློག་པའི་དམིགས་པ་འདི་ལྟར་ཏེ། །རིག་པ་སྤྱི་བོའི་ཧཾ་ལ་གཏད། །གསང་གནས་རྩ་འཁོར་ནས་བཟུང་སྟེ། །ཆུ་ཆེན་རླབས་ནི་གྱེན་ལོགས་བཞིན། །རྩ་འཁོར་རྣམས་ནས་རིམ་པར་བསྡུས། །སྤྱི་བོའི་ཧཾ་ལ་ཐིམ་པར་བསྒོམ། །དེས་ཀྱང་བཟློག་པར་མ་ནུས་ན། །གསང་གནས་རྡོ་རྗེའི་རྩ་བ་ནས། །ཐིག་ལེ་སྐར་མདའ་བརྒྱུགས་པ་བཞིན། །ཡང་ཡང་སྤྱི་བོའི་ཧཾ་ལ་བསྟིམ། །གལ་ཏེ་འཆོར་དོགས་མ་བྱུང་བར། །རང་དབང་ཐོབ་པར་བྱུང་བ་ནི། །གསང་གནས་ཐིག་ལེ་ཡར་ལོགས་ཏེ། །ལྟེ་བའི་རྩ་འདབ་གང་
བར་བསྒོམ། །དེ་ཡི་ངོ་བོར་བལྟས་པ་ཡིས། །མས་བསྟན་དགའ་བ་གཉིས་པ་ཡིན། །དེ་ནས་ཐིག་ལེ་ཡར་ལ་གོ་བཟློག་སྟེ། །སྙིང་ཁའི་རྩ་འདབ་གང་བར་བསྒོམ༔ །སེམས་རྒྱུད་དགའ་བ་འདྲ་ཅིག་འབྱུང་། །མས་བརྟན་དགའ་བ་གཉིས་པ་ཡིན། །དེ་ནས་ཐིག་ལེ་ཡར་བཟློག་པས། །མགྲིན་པའི་རྩ་འདབ་གང་བར་བསྒོམ། །ལུས་སྟོད་ཚད་འཁྱིལ་འདྲ་བ་འབྱུང་། །མས་བརྟན་དགའ་བ་གསུམ་པ་ཡིན། །དེ་ནས་ཐིག་ལེ་གྱེན་དུ་བཟློག །ཐམས་ཅད་སྤྱི་བོའི་ཧཾ་ལ་བསྟིམ། །འདོད་ཆགས་བདེ་བ་ཐམས་ཅད་ཡལ། །མས་བརྟན་དགའ་བ་བཞི་པ་ཡིན། །གལ་ཏེ་རྩ་རླུང་མ་འབྱོང་ངམ། །ཆགས་པ་ཆེན་པོས་ལུས་ཟུངས་རྒྱས། །མྱུར་དུ་འཁྱོར་གྲབས་བྱུང་བ་ན། །གསང་གནས་རྩ་བའི་ཐིག་ལེ་དེ། །དབུ་མའི་ལམ་ནས་མདའ་འཕང་ལྟར། །ནམ་མཁའ་མཐོན་པོའི་དབྱིངས་སུ་འཕེང་། །ནམ་མཁའ་མཐོན་པོའི་དབྱིངས་དེ་དང་། །སེམས་དང་ཐིག་ལེ་དབྱེར་མེད་བསྲེས། །དེ་ཡི་ངོ་བོར་ཡུན་རིང་ལྟ། །དེ་ནི་བཟློག་ཐབས་དྲག་པོ་ཡིན། །དེ་རྣམས་དམིགས་པའི་བསྐོར་ཡིན་ཏེ། །ལུས་ཟུངས་ཧ་ཅང་མི་བཟང་དང་། །ཆགས་པ་ཆུང་བའི་
རིགས་ལ་ནི། །དམིགས་པས་ཐིག་ལེ་འབེབས་མི་ནུས། །དམིགས་པ་འཁྲུལ་འཁོར་གཉིས་ཀ་དགོས། །དམིགས་པ་མེད་པའི་འཁྲུལ་འཁོར་ནི། །ཐ་མལ་ཉོན་མོངས་ཡིན་པས་སྤང་། །ཡབ་ཡུམ་འཁྱུད་པར་བསྒོམ་པའི་ཚེ། །སྤྱས་མོ་ཙོག་པུར་གྱེན་དུ་སློང་། །།ཡུམ་ལ་འཁྱུད་པར་བྷེ་ནས་ཀྱང་། །ལག་པས་པུས་མོ་དམ་འཁྱུད་ཅིང་། །ལོང་བུའི་བར་དུ་རྡོ་རྗེ་བཞག །རིག་པ་བྷ་གའི་དཀྱིལ་དུ་གཏད། །འོག་སྒོ་འབྱེད་འཛུམ་འགའ་རེ་བྱ། །དེ་ནི་ཆོས་དྲུག་རྣམས་ནས་བཤད། །དེས་ཀྱང་ཕེབས་པར་མ་གྱུར་ན། །ལག་པ་གཡས་གཡོན་གང་རུང་གི །སོར་མོ་མཁའ་འགྲོ་སྡེ་ལྔར་བསྒོམ། །ཁ་ཡི་ཆབ་ཀྱིས་བརླན་བྱས་ལ། །རྡོ་རྗེ་དལ་བུས་ཉུག་བྱས་ཏེ། །དྲག་ན་མྱུར་དུ་འཁྱོར་ཉན་ཆེ། །རང་གི་ལག་གིས་རྡོ་རྗེ་མཆོག །ཡང་ནས་ཡང་དུ་གསོར་བྱེད་པ། །འདི་དོན་ཟབ་ལམ་གསང་འདུས་དང་། །ཞི་ཁྲོའི་གཞུང་ནས་གསལ་བོར་གསུངས། །ཐིག་ལེ་འབེབས་པའི་འཁྲུལ་འཁོར་ཡིན། །ཧཱུྃ་ཡིག་བསྒོམས་པས་མ་ཁོག་ཅིང་། །ཐིག་ལེ་འཆོར་བ་དོགས་པའི་ཚེ། །ཆུ་སྲིན་གྲེ་འགག་འཁྲུལ་འཁོར་ནི། །ལག་པ་གཡས་གཡོན་གང་བདེ་བའི། །མཛུབ་མོ་གུང་མོ་གཉིས་པོ་
ཡིས། །འོག་སྒོ་གསང་གནས་གཉིས་ཀྱི་མཚམས། །ཐིག་ལེ་རྒྱུ་བའི་རྩ་བོ་ཆེ། །དྲག་ཏུ་མནན་པས་ཐེམ་འཆར་འདྲ། །ཐིག་ལེ་བཟུང་བའི་འཁྲུལ་འཁོར་ཟབ། །ཐིག་ལེ་བཟློག་པའི་འཁྲུལ་འཁོར་ནི། །འོག་སྒོ་དང་ནི་ཞྭ་བཞི་གློད། །ལྕེ་ནི་ཡ་རྐན་དག་ལ་སྦྱར། །ལྟོ་བ་རྒྱུ་མ་སྒལ་པར་སྦྱར། །མིག་ནི་གྱེན་ལྡོག་ནམ་མཁར་བལྟ། །རླུང་ནི་གྱེན་དུ་འདྲེན་བཞིན་དུ། །ཧཱུྃ་རིང་ཧིང་རིང་ཧྲིང་རིང་བསྒྲང་། །རྡོ་རྗེ་ཞི་བར་མ་གྱུར་བར། །ཆུ་སྲིན་གྲེ་འགག་མི་གཏོང་བསྡམ། །འཁྲུལ་འཁོར་འདི་དག་གཞུང་རྣམས་སུ། །བརྡའ་ཚིག་གོ་བར་དཀའ་བ་སྟེ། །འདི་ནི་རྗེན་བུར་དམར་འདོན་བྲིས། །གང་ཟག་སྐལ་པ་ཞན་པ་དང་། །ཆགས་པ་ཤས་ནི་ཆུང་བ་རྣམས། །ལྷ་ནི་ཡབ་ཡུམ་བསྒོམས་པ་ལ། །ཆགས་པ་སྐྱེས་པར་མི་འགྱུར་ཞིང་། །ཐིག་ལེ་འབེབས་པར་མི་ནུས་པས། །དགའ་བཞི་ཡེ་ཤེས་ངོ་མི་འཕྲོད། །དེ་ལ་གདམས་ངག་འདི་ལྟར་གསུངས། །དང་པོ་བདག་དང་ཡུམ་གཉིས་པོ། །དང་པོ་ཡི་དམ་ཡབ་ཡུམ་བསྒོམ། །དེ་ནས་དེ་ཉིད་འོད་ཞུ་བས། །རང་ཡང་བཙུན་གཟུགས་མ་ཡིན་པའི། །རྣལ་འབྱོར་གྲུབ་ཐོབ་གཟུགས་སུ་བསྒོམ། །ཡུམ་ནི་རང་
གི་ཡིད་ཡུལ་དུ། །གང་འཐད་ཐ་མལ་བུད་མེད་བསྒོམ། །དེ་བས་སྦྱོར་བའི་དམིགས་པ་རྣམས། །གོང་དུ་བཤད་པ་ལྟ་བུར་བསྒོམ། །འཁྲུལ་འཁོར་གང་དགོས་སྐབས་དང་བསྟུན། །ཐིག་ལེ་བཟློག་པར་ཐུབ་མ་ཐུབ། །ཆུ་སྲིན་གྲེ་འགག་གློད་པའི་དུས། །ལག་པའི་མཐིལ་དུ་རྡོ་རྗེ་བཙིར། །ཐིག་ལེ་ཅི་འདུག་དེར་བླུག་བལྟས། །དཀར་པོ་ཞོ་འམ་སྣབ་འདྲའི་གསེབ་།ཟར་མའི་འབྲུའམ་ཡུངས་དཀར་ཙམ། །དཀར་ལ་སྔོ་བའི་མདང་ཆགས་པ། །ཐར་ཐོར་བྱུང་ན་དྭངས་མའི་བཅུད། །བུད་མེད་ལ་སོགས་སྲིད་འབྱུང་རྒྱུ། །ཉམས་ན་ཉེས་པ་ཆེ་བ་དང་། །བཟུང་ན་ཉམས་རྟོགས་འཕེལ་རྒྱུ་ཡིན། །དེ་འདྲ་མེད་པའི་དཀར་པོ་ནི། །སྣབ་འདྲ་ཅུང་ཟད་སླ་བ་ནི། །དྭངས་མའི་སྙིགས་མ་ཡིན་པར་བཤད། །ཉམས་ཀྱང་ཉེས་པ་ཆུང་བ་དང་། །བཟུང་ཡང་ཤ་ཉམས་རྒྱས་ཙམ་ལས། །ཕན་ཡོན་ཆེན་པོ་མེད་པར་གསུངས། །དཀར་པོ་ལ་སོགས་མདོག་མེད་པར། །བ་གླང་ཁ་ཆུ་འདྲ་བ་ཡི། །ཉག་མ་ཡོད་པའི་བརླན་དེ་ནི། །སྙིགས་མའི་སྙིགས་མ་ཡིན་པ་སྟེ། །བཟུང་ཡང་དེ་ཉིད་མི་ཟིན་ཏེ། །ཤོར་ཡང་ཉེས་པ་མེད་པར་གསུངས། །དེ་ཉིད་མ་གཏོགས་དཀར་པོའི་རིགས། །
བིགྷ་ནན་ཏ་ཀྲི་ལ་སོགས་བསྔགས། །བཟླས་པས་བྱིན་གྱིས་བརླབས་བྱས་ནས། །དྲོད་མ་ཡལ་བར་བཏུང་བར་བྱ། །དེ་ལ་བཙོག་པའི་འདུ་ཤེས་ན། །གསང་དབང་དམ་ཚིག་རྩ་ལྟུང་ཕོག །དེ་དོན་བརྟག་གཉིས་རྒྱུད་ལས་ནི། །ངེས་པར་བློ་དང་སྟོབས་ཀྱིས་ཕྱིར། །ག་པུར་མཁས་པས་མི་སྤང་སྟེ། །ངེས་པར་བློ་དང་སྟོབས་ཀྱིས་ཕྱིར། །མི་འཆི་ལྕེ་ཡིས་བླངས་ཞེས་གསུངས། །ཅི་ཕྱིར་གསང་བའི་བདུད་རྩི་ཡིན། །གལ་ཏེ་འདོད་ཆགས་ཤུགས་ཆེ་བས། །ཐིག་ལེ་ཐམས་ཅད་ཤོར་ན་ཡང་། །འཐུང་ན་ཉེས་ལྟུང་མེད་པར་གསུངས། །དེ་ཡང་དྲོད་མ་ཡལ་དགོས་ཏེ། །དྲོད་ཡལ་ན་ནི་ནད་དུ་འགྱུར། །དོན་དེ་ཤེས་པས་ནམ་དུ་ཡང་། །འདོད་ཆགས་དྲག་པོས་གདུང་བའི་ཚེ། །ཡབ་ཡུམ་སྦྱོར་བའི་དམིགས་པ་དང་། །འཁྲུལ་འཁོར་བཅས་པས་ཐིག་ལེ་དབབ། །འདོད་ཆགས་འདོད་པས་ཚིམས་བྱས་ཏེ། །ཐིག་ལེ་བཟུང་བཟློག་དམིགས་པ་བྱ། །གལ་ཏེ་མ་ཟིན་མ་བཟློག་ན། །།གང་ལྟར་མ་གུད་བཏུང་བར་བྱ། །ཐིག་ལེ་ཉམས་པའི་ཉེས་པ་དང་། །ལྟུང་བ་གང་གིས་མི་གོས་པས། །གསང་སྔགས་རྒྱུད་གཞུང་ཀུན་ནས་གསུངས། །དེ་ནས་དེ་ཡི་ལས་ཚོགས་
ནི། །རང་ཉིད་སྤྱན་རས་གཟིགས་དབང་བྷྱོ༔ །སྒྲོལ་མ་དཀར་སྔོན་དམར་མོ་སོགས། །ཡུམ་དུ་བསྒོམས་ནས་སྦྱོར་མཆོད་ཕུལ། །སྦྱོར་མཚམས་བྱང་སེམས་འོད་ཟེར་གྱིས། །སྒྲོལ་མ་དཔག་མེད་འཇིག་རྟེན་བཀང་། །འཇིགས་པ་བཅུ་དྲུག་ཀུན་བསལ་ནས། །ཚུར་འདུས་རང་ཉིད་ཡབ་ཡུམ་ཐིམ། །འཇིགས་པ་བཅུ་དྲུག་ཞི་བར་འགྱུར། །ལོ་མ་ཅན་དང་སྦྱོར་བར་བསྒོམ། །སྦྱོར་མཚམས་ལྷ་མོ་གྲངས་མེད་འཕྲོས། །ཡམས་ནད་རིམས་ནད་ཐམས་ཅད་བཅད། །ཚུར་འདུས་རང་ལ་ཐིམ་བསྒོམས་ན། །མི་ནད་ཕྱུགས་ནད་གཅོད་པའི་ཟླུམཆོག །ཀུ་རུ་ཀུ་ལེར་སྦྱོར་མཆོད་ཕུལ། །སྦྱོར་མཚམས་ལྷ་མོ་གྲངས་མེད་འཕྲོས། །སྣང་སྲིད་ཐམས་ཅད་དབང་དུ་སྡུད། །ཚུར་འདུས་ཡུམ་ལ་ཐིམ་བསམས་པས། །དབང་སྡུད་ཀུན་གྱི་མཆོག་ཏུ་འགྱུར། །ནོར་རྒྱུན་མ་ལ་སྦྱོར་མཆོད་ཕུལ། །སྦྱོར་མཚམས་ལྷ་མོ་གྲངས་མེད་སྤྲོས། །འབྲུ་དང་རིན་ཆེན་ཆར་པ་ཕབ། །ཚུར་འདུས་རང་དང་ཡུམ་ལ་ཐིམ། །དངོས་གྲུབ་ཀུན་གྱི་མཆོག་ཏུ་འགྱུར། །རང་ཉིད་རྟ་མགྲིན་གཙོ་རྐྱང་བསྐྱེད། །གསང་བ་ཡེ་ཤེས་ཡུམ་དང་སྦྱོར། །སྦྱོར་མཚམས་རྟ་མགྲིན་གྲངས་མེད་སྤྲོས། །གནོད་བྱེད་ཐམས་ཅད་
དབྱུག་ཐོས་བརྡུང་། །མེ་དཔུང་གིས་བསྲེག་རང་ལ་ཐིམ། །དེ་བཞིན་རང་ཉིད་ཕྱག་བཞི་པར། །བསྒོམས་ནས་དུད་སོལ་མ་དང་སྦྱོར། །དེ་ནས་རང་ཉིད་བེར་ནག་ཅན། །རང་བྱུང་རྒྱལ་མོར་སྦྱོར་བར་བསྒོམ། །ལྷ་མོའི་སྒྲུབ་ཐབས་མཆོག་ཏུ་གསུངས། །དཔེར་ན་སྐྱེས་པ་བཞིན་བཟང་བ། །རྡོ་རྗེ་ཆེ་ཞིང་ཤུགས་དྲག་པས། །བུད་མེད་གཞོན་ནུར་སྦྱོར་བྱས་ན། །བུད་མེད་དེ་ནི་དེ་ལ་དགའ། །དེ་བཞིན་རྣལ་འབྱོར་ཏིང་འཛིན་ལྡན། །མཁའ་འགྲོ་རྣམས་ལ་སྦྱོར་བསྒོམས་ན། །མཁའ་འགྲོ་མ་རྣམས་དེ་ལ་མཉེས། །མཆོག་དང་ཐུན་མོང་དངོས་གྲུབ་སྦྱིན། །གསང་མཆོད་མཆོད་པའི་མཆོག་ཡིན་པས། །ཕྱི་ཡི་མཆོད་རྫས་ཅི་བཟང་ཡང་། །རྣལ་འབྱོར་གཞན་ལ་དགའ་བ་མེད། །དེ་དག་དཔེ་དོན་རྒྱ་ཆེར་འགྱུར། །ཐིག་ལེ་ནོར་བུའི་རྒྱུད་ནས་གསུངས། །ཤེས་རབ་ཡེ་ཤེས་དབང་ཐོབ་ནས། །ཞག་པོ་རེ་ལ་ལན་རེ་རེ། །སྦྱོར་བའི་དམིགས་པ་མ་བསྒོམས་ན། །དབང་གི་དམ་ཚིག་ཉམས་པའི་ཕྱིར། །ལྷ་རྣམས་ཞལ་སྦྱོར་བསྒོམ་དགོས་པའི། །གསང་བའི་གནད་འགག་དེ་ཡིན་ནོ། །བཀའ་བརྒྱུད་བདེ་མཆོག་སྙན་བརྒྱུད་དང་། །གསར་མའི་གསང་འདུས་ཆོ་ག་
ལས། །འདི་དག་རྒྱུན་དུ་འདོན་བྱར་ཡོད། །འོན་ཀྱང་གསང་སྔགས་མི་ཤེས་པས། །འདོན་ཆ་ཆོས་སྤྱོད་ལྟ་བུ་སོགས། །ཁྱད་པར་གནད་ཀྱི་མན་ངག་ཅིག །ཆགས་པ་རིམ་དུ་ཆེ་བ་ཡི། །ཐིག་ལེ་སྟོང་པར་མི་འདོད་ཅིང་། །བཟུང་བའི་བསམ་པ་ཡོད་ན་ཡང་། །བཟུང་བཟློག་གཏན་ནས་མི་ཐུབ་ན། །ཡུམ་གྱི་བྷ་གའི་ནང་དེ་རུ། །ཡི་དམ་དཀྱིལ་འཁོར་ཚང་བར་བསྒོམ། །དེ་ལ་གསང་མཆོད་འབུལ་བར་བསྒོམ། །ཐིག་ལེ་གཞན་དུ་མ་བོ་བར། །རང་གི་ལག་མཐིལ་རྫོགས་པར་གཏོང་། །ཨ་མྲྀ་ཏ་སོགས་སྔགས་ཀྱིས་བཏབ། །གོང་ལྟར་ལྷག་མེད་བཏུང་བྱས་ལ། །རང་གི་རྩ་གནས་མེར་གྱིས་གང་། །གསང་བའི་དབང་མཆོག་ཐོབ་པར་བསྒོམ། །དེ་ཡིས་ལྟུང་བ་མི་འབྱུང་ངེས། །གྲངས་ཀྱི་མང་ཉུང་རུང་མི་རུང་། །གསུམ་པའི་དམ་ཚིག་ནོས་གསུངས་ལྟར། །ཞག་རེ་ལན་རེ་རུང་བ་དང་། །ལྷ་མོའི་དམ་ཚིག་ནས་གསུངས་ཕྱིར། །ལྷ་མོར་བསྒོམ་པ་རེ་ཡང་རུང་། །མང་ཡང་ལྟུང་བ་མི་འབྱུང་སྟེ། །བསྐྱེད་རིམ་དཀྱིལ་འཁོར་གསལ་ཕྱིར་རོ། །འོན་ཀྱང་ཧ་ཅང་མང་བ་ན། །རླུང་ནད་མཁལ་སྲིན་ལྡང་ཉེན་ཡོད། །དཔལ་ལྡན་ལྷ་མོའི་རྒྱུད་རྣམས་ནས། །ཟླ་བ་ཡར་
མར་ངོ་རེ་ལ། །ལྷ་མོར་སྦྱོར་བའི་དམིགས་པ་མ་བྱས་ན། །དཔལ་ལྡན་ལྷ་མོའི་དམ་ཚིག་ཉམས་པར་གསུངས། །འདི་ལྟར་འདོད་ཆགས་ལམ་དུ་འཁྱེར་བའི་ཚུལ། །འདོད་ཆགས་ཉིད་ཀྱིས་འདོད་ཆགས་འཇོམས་བྱེད་པ། །འདོད་ཆགས་མ་སྤངས་སངས་རྒྱས་ཐོབ་པའི་ཐབས། །འདུལ་ཁྲིམས་སྡོམ་པ་ཞུས་པའི་གང་ཟག་གིས། །སྡོམ་པ་མཐར་ཕྱིན་བསྟན་ལ་ཕན་པའི་ཐབས། །ཉོན་མོངས་འདོད་ཆགས་རྒྱུན་དུ་སྤྱད་བྱས་ནས། །ཉེས་ལྟུང་མི་གོས་ཉམས་རྟོགས་འཕེལ་བའི་ཐབས། །གསར་རྙིང་བླ་མེད་རྒྱུད་ཀྱི་སྙིང་ཁུ་སྟེ། །མ་མོ་མཁའ་འགྲོ་ཀུན་གྱི་སྙིང་ཁྲག་ཡིན། །རྩ་རླུང་རྒྱུས་ཡོད་དམ་ཚིག་གཙང་མ་དང་། །འགྱུར་མེད་དད་པ་མོས་གུས་ལྡན་ལ་སྟོན། །གསང་སྔགས་རྒྱུས་མེད་ཐེག་དམན་ཉན་ཐོས་དང་། །གྲུབ་མཐའ་མི་གཅིག་ལོག་ལྟ་གཤེ་སྐུར་མཁན། །དེ་འདྲར་བསྟན་ན་སྟོན་མཁན་ལྟ་མཁན་གཉིས། །མ་གཅིག་དཔལ་ལྡན་ལྷ་མོ་དཔོན་གཡོག་དང་། །ཤ་ཟ་མཁའ་འགྲོ་ཀུན་གྱིས་ཚོགས་སུ་རོལ། །དམ་ཚིག་མོས་གུས་ལྡན་པའི་རྗེས་འཇུག་གིས། །འདི་ཉིད་ཉམས་སུ་ལེན་པར་བྱེད་པའི་ཚེ། །ཡེ་ཤེས་མཁའ་འགྲོ་ཀུན་གྱིས་བྱིན་གྱིས་རློབས། །ལས་ཀྱི་མཁའ་
འགྲོ་ཀུན་གྱིས་དངོས་གྲུབ་བྱིན། །འཇིག་རྟེན་མཁའ་འགྲོ་ཀུན་གྱིས་ཕྲིན་ལས་བསྒྲུབ། །རྩ་གནས་མཁའ་འགྲོ་ཀུན་གྱིས་བདེ་སྟོང་སྦྱོར། །ཤ་ཟ་མཁའ་འགྲོ་ཀུན་གྱིས་བསྟན་པ་སྲུང་། །ཁྱད་པར་མ་གཅིག་ལྷ་མོ་དཔོན་གཡོག་གིས། །ལུས་དང་གྲིབ་བཞིན་སྲུང་སྐྱོབས་མེལ་ཚེ་མཛོད། །ཅེས་པ་དགེ་སློང་པདྨ་བསོད་ནམས་ཀྱིས། །ཚེས་བརྒྱད་སྨན་ལྷ་ཆག་མེད་འདོན་པ་ཡི། །ཁས་ལེན་མཎྜལ་དང་བཅས་ཞུས་པའི་ངོར། །སྔགས་འཆང་རྣལ་འབྱོར་རཱ་ག་ཨ་སྱ་ཡིས། །ལུང་འདྲེན་ལ་སོགས་སྤྲོས་པ་ཀུན་བྱས་ཏེ། །ཉིན་གུང་ཐུན་གཅིག་ལ་ནི་རྫོགས་པར་སྨྲས། །སློབ་བུ་དད་ལྡན་པདྨ་ཐབས་མཁས་ཀྱིས། །རྫུ་འཕྲུལ་ལྟ་བུས་རེག་ཟིན་ཉིད་དུ་བྲིས། །འདི་ལ་གསང་སྔགས་སྦ་འོས་གསལ་བཀོད་པའི། །ཉེས་འགལ་མ་མོ་མཁའ་འགྲོའི་ཚོགས་ལ་བཤགས། །དགེ་བས་རྗེས་འཇུག་ཚུལ་ཁྲིམས་མཐར་ཕྱིན་ཤོག །སརྦ་མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།