བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྫོགས་རིམ་གྱི་མན་ངག་ཟིན་བྲིས་རབ་ཏུ་གསལ་བ་བླ་མེད་རྡོ་རྗེ་ཐེག་པའི་ལམ་རིམ་ཇི་ལྟ་བ་མ་ནོར་བ།
བཅོམ་ལྡན་འདས་ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྫོགས་རིམ་གྱི་མན་ངག་ཟིན་བྲིས་རབ་ཏུ་གསལ་བ་བླ་མེད་རྡོ་རྗེ་ཐེག་པའི་ལམ་རིམ་ཇི་ལྟ་བ་མ་ནོར་བ་བཞུགས་པའི་དབུ་ཕྱོགས་ལགས་སོ།།
ན་མོ་ལོ་ཀི་ཤྭ་ར་ཡེ། བླ་མ་ཡི་དམ་དབྱེར་མེད་པའི། །ཐུགས་རྗེ་ཅན་ལ་ཕྱག་འཚལ་ནས། །དེ་ཡི་རྫོགས་རིམ་མན་ངག་འབྲི། ཆོས་བདག་སྲུང་མས་བཀའ་གནོང་ཞིང་། །དགོངས་པ་བཀྲོལ་བར་མཛད་དུ་གསོལ། །དེ་ཡང་པདྨ་ཟབ་པའི་རྒྱུད་ཀྱི་རྒྱལ་པོ་ལས། མཆོག་ནས་མཆོག་གི་སེམས་ཅན་ལ། །ཟབ་དང་རྒྱ་ཆེའི་ཆོས་རྣམས་བསྟན། །ཤེས་རབ་ཕུན་སུམ་ཚོགས་པ་ལ། །ཆོས་ཀྱི་རྣམ་གྲངས་ཆེན་པོ་བསྟན། །ཞེས་གསུངས་པ་ལྟར། དབང་ཐོབ་ཅིང་དམ་ཚིག་དང་ལྡན་པས། བསྐྱེད་རིམ་བརྟན་ཅིང་བསྙེན་སྒྲུབ་ཚད་དུ་འཁྱོལ་བའི་གང་ཟག །རྫོགས་རིམ་
ཟབ་པ་དང་རྒྱ་ཆེ་བའི་གདམས་པ་འདི་ལ་འཇུག་པར་བྱའོ། །དེ་ཡང་གོ་བར་བྱ་བ་དེ་དང་པོ་གོ་བར་བྱས་ལ། དེ་ནས་ཉམས་སུ་ལེན་རྒྱུ་གང་ཡིན་དེ་ཉམས་སུ་ལེན་དགོས་སོ། །དེ་མ་ཡིན་པར་ཉམས་སུ་བླང་ཡང་འབེན་མ་མཐོང་བའི་མདའ་དང་འདྲ་གར་འགྲོ་ཆ་མེད་ཡིན། དེ་ལ་སྤྱིར་མི་ལུས་ཐོབ་དཀའ། ཁྱད་པར་དལ་འབྱོར་ཆོས་ལྡན་གྱི་ལུས་ཐོབ་དཀའ། བསྐལ་བཟང་སངས་རྒྱས་སྟོང་གི་ནང་ནས་ཀྱང་ཤཱཀྱ་ཐུབ་པའི་བསྟན་པ་འདི་མ་གཏོགས། གསང་སྔགས་བླ་མེད་འདིའི་བསྟན་པ་མི་འབྱུང་། ཅུང་ཟད་འབྱུང་བ་ཡང་གཅིག་བརྒྱུད་ལྟ་བུ་ལས་ཀུན་གྱིས་ཐོབ་པར་མི་
འགྱུར། གསང་སྔགས་ཉམས་སུ་ལེན་པ་ལ་ཁམས་དྲུག་ལྡན་རྡོ་རྗེའི་ལུས་འཛམ་བུ་གླིང་གི་མི་ལུས་འདི་མིན་པ་མི་འོངས། དུས་ཀྱང་སྙིགས་མ་ལྔའི་དུས་འདིར་གསང་སྔགས་ཉམས་སུ་ལེན་པའི་དུས་ཡིན། བྱང་ཆུབ་སེམས་དཔའ་རྒྱུ་མཚན་ཉིད་ཀྱི་ཆོས་ཀྱིས་བསྐལ་པ་གྲངས་མེད་གསུམ་ན་སངས་རྒྱས། བྱ་རྒྱུད་སྤྱོད་རྒྱུད་མི་ཚེ་དྲུག་ཅུ། རྣལ་འབྱོར་རྒྱུད་མི་ཚེ་བཅུ་དྲུག་ལ་སངས་རྒྱས། བླ་མེད་རྡོ་རྗེ་ཐེག་པ་འདིའི་ཚེ་གཅིག་ལུས་གཅིག་ལ་སངས་རྒྱས། དེའི་ནང་ནས་ཟབ་མོ་རྩ་རླུང་ཐིག་ལེའི་གདམས་པ་བསྒོམས་ནས། རབ་ཀྱིས་རབ་སྐད་ཅིག་བཅུ་དྲུག །རབ་ཀྱི་འབྲིང་ཟླ་བ་དྲུག །རབ་ཀྱི་ཐ་མ་ལོ་གཅིག །འབྲིང་གི་རབ་ལོ་གསུམ། འབྲིང་གི་འབྲིང་ལོ་དྲུག །འབྲིང་གི་ཐ་མ་ལོ་བཅུ་གཉིས། ཐ་མའི་རབ་ཚེ་འདི་ལ། ཐ་མའི་འབྲིང་འཆི་དུས་སམ་བར་དོ། ཐ་མའི་ཐ་མ་སྐྱེ་བ་ཕྱི་མ། ཡང་ཐའི་སྐྱེ་བ་བདུན་ཚུན་ལ་སངས་མི་རྒྱ་མི་སྲིད། དེ་ལ་སངས་མ་རྒྱས་ན་དམ་ཚིག་ཆགས་པའི་རྟགས་ཡིན་ལན་གཅིག་ངན་སོང་དུ་འགྲོ་དགོས། དེར་སྡུག་བསྔལ་ཚབ་ཆེ་ལ་ཡུན་ཐུང་བ་གཅིག་མྱོང་ནས། སླར་ཆོས་འདི་དང་མཇལ་ཏེ། མྱུར་དུ་འབྲས་བུ་ཐོབ། དེའི་དོན་རྣམས་ལ་བསམས་ནས་ཆོས་
འདི་ལ་སྙིང་རུས་བྱའོ། །དེ་ལ་ཐོག་མར་སྐྱབས་འགྲོ་ནས་བཟུང་སྟེ། ཕྱི་མདོའི་ལུགས་དང་ཅུང་ཟད་མི་འདྲ་བ་སྨོས་ཅི་དགོས། བྱ་སྤྱོད་རྣལ་འབྱོར་རྒྱུད་དང་ཡང་མི་འདྲ་བླ་མེད་བསྐྱེད་རིམ་པའི་ལུགས་དང་ཡང་ཅུང་ཟད་མི་འདྲ་བའི་ཁྱད་ཆོས་རེ་ཡོད་པ་ངེས་ཤེས་དགོས་སོ། །དེ་ལ་དང་པོ་སྐྱབས་འགྲོའི་དུས་སུ་ཆོས་སྤྱིའི་དཀོན་མཆོག་གསུམ་ནི་ཕྱི་ཡི་དཀོན་མཆོག་གསུམ་ཡིན། འདིའི་ལུགས་ནི་ནང་དང་གསང་བའི་དཀོན་མཆོག་གསུམ་ཡིན་པས། རང་གི་རྩ་བའི་བླ་མའི་ཐུགས་མི་ཟད་རྒྱན་གྱི་འཁོར་ལོ་སངས་རྒྱས་དཀོན་མཆོག ། གསུང་མི་ཟད་རྒྱན་གྱི་འཁོར་ལོ་དམ་ཆོས། སྐུ་མི་ཟད་རྒྱན་གྱི་འཁོར་ལོ་དགེ་འདུན། ཡོན་ཏན་དང་དངོས་གྲུབ་མི་ཟད་རྒྱན་གྱི་འཁོར་ལོ་ཡི་དམ། འཕྲིན་ལས་དང་ནུས་མཐུ་མི་ཟད་རྒྱན་གྱི་འཁོར་ལོ་ཆོས་སྐྱོང་སྟེ། དཀོན་མཆོག་ལྔ་ཚོམ་ཡང་བླ་མའི་རོལ་པར་ཤེས་པར་བྱའོ། །སངས་རྒྱས་ཀྱང་མདོ་ལུགས་ཀྱི་ས་བཅུ་གཅིག་པའི་སངས་རྒྱས་དེ་མིན་པར། མ་དག་པའི་རླུང་སེམས་འགགས་ཏེ། རྩ་དབུ་མ་གཙུག་ཏོར་གྱི་བར་དུ་གསལ་བར་རྫོགས་པར་གྲུབ་ནས། མཆོག་ཏུ་མི་འགྱུར་བའི་བདེ་ཆེན་རྣམ་པ་ཀུན་གྱི་མཆོག་དང་ལྡན་པའི་སྟོང་ཉིད་གཉིས་
སུ་མེད་པའི་ཟུང་འཇུག་གི་སྐུ་ནི་སངས་རྒྱས་དཀོན་མཆོག །དེས་གསུང་པའི་བརྗོད་མེད་ནཱ་དའི་སྒྲ་ནི་དམ་ཆོས། དེའི་སྐུ་ལུས་རྩ་རླུང་ཐིག་ལེ་དྲུག་དཔའ་བོ་མཁའ་འགྲོའི་དཀྱིལ་འཁོར་དུ་བཞུགས་པ་ནི་དགེ་འདུན་ཡིན་པར་ཤེས་པར་བྱའོ། །དེ་ནས་ཉམས་སུ་བླང་བྱ་སྐྱབས་འགྲོ་ནི། མདུན་གྱི་ནམ་མཁར་རིན་པོ་ཆེའི་ཁྲི་ཡངས་ཤིང་རྒྱ་ཆེ་བ་སྣ་ཚོགས་པདྨ་འདབ་མ་སྟོང་ལྡན་དང་ཟླ་བའི་གདན་ལྔ་ཚོམ་ལ། རང་གི་རྩ་བའི་བླ་མ་དེ་ཉིད་སངས་རྒྱས་པདྨ་རབ་རྒྱས་ཞེས་ཀྱང་བྱ། འོད་དཔག་མེད་ཅེས་ཀྱང་བྱ། སྣང་བ་མཐའ་ཡས་ཞེས་ཀྱང་བྱ་བ་དེ་ཉིད་དང་དབྱེར་མེད་པ་ལ། རྣམ་པ་ལོངས་སྤྱོད་རྫོགས་སྐུ་ཚེ་དཔག་མེད་ཡབ་ཡུམ་ཞལ་སྦྱོར་ལ། དབུ་གཙུག་ན་ཡར་བརྒྱུད་པའི་བླ་མ་ཐམས་ཅད་མུ་ཏིག་སྟར་ལ་བརྒྱུས་པ་ལྟ་བུ། འཁོར་དུ་བཀའ་བརྒྱུད་ཀྱི་བླ་མ་ཐམས་ཅད་སྤྲིན་ལྟར་འཁྲིགས་པ་སྟེ། དེ་ཐམས་ཅད་གཅེར་བུ་རུས་པའི་རྒྱན་དྲུག་གསོལ་བ། ཕྱག་གཡས་ཌཱ་མ་རུ་དང་གཡོན་དྲིལ་བུ་འཛིན་པ་ཤ་སྟག་བསྒོམ། །དེའི་གཡས་སུ་སྟོན་པ་ཤཱཀྱ་ཐུབ་པ་ལ་བསྐལ་བཟང་སངས་རྒྱས་སྟོང་ལ་སོགས་སངས་རྒྱས་ཐམས་ཅད་དེ། དེ་ཡང་ཤཱཀྱ་ཐུབ་པ་མ་གཏོགས་ཐམས་ཅད་ལོངས་སྤྱོད་རྫོགས་སྐུ། གཡོན་དུ་
ཕྱག་ན་རྡོ་རྗེ་ལ་ཉེ་བའི་སྲས་བརྒྱད་དང་གསང་སྔགས་ཀྱི་རིག་འཛིན་ཐམས་ཅད། མདུན་དུ་ཐུགས་རྗེ་ཆེན་པོ་ཡབ་ཡུམ་ཞལ་སྦྱོར་ལ། ཕ་རྒྱུད་མ་རྒྱུད་གཉིས་མེད་རྒྱུད་དང་ཡོ་ག་གསུམ་གྱི་ལྷ་ཚོགས་ཐམས་ཅད། རྒྱབ་ཏུ་ཆོས་སྐུ་ཡུམ་ཆེན་མོ་ལ་བླ་མེད་རྒྱུད་སྡེའི་གླེགས་བམ་ཐམས་ཅད་བརྩེགས་པ། གདན་མཚམས་སུ་དཔའ་བོ་མཁའ་འགྲོ་ཐམས་ཅད་ན་བུན་ལྟར་འཐིབས་པ། འོག་ཏུ་བེར་ནག་ཅན་ཡབ་ཡུམ་ལ་ཡེ་ཤེས་ཀྱི་ཆོས་སྐྱོང་སྲུང་མ་ཐམས་ཅད་ཀྱིས་བསྐོར་བ། དེ་ཐམས་ཅད་ཀྱང་ཡེ་ནས་ཡེ་ཤེས་པ་དང་དམ་ཚིག་པ་དབྱེར་མེད་པའི་ངོ་བོར་བསྒོམས་ལ། དེའི་སྐྱབས་འོག་ཏུ་བདག་དང་སེམས་ཅན་ཐམས་ཅད་ཚུད་པར་བསམས་ཏེ། ཐལ་མོ་སྦྱར་ལ། བདག་གཞན་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཅེས་པ་ནས། ཆོས་སྐྱོང་སྲུང་མའི་ཚོགས་རྣམས་ལ་སྐྱབས་སུ་མཆིའོ། །ཞེས་པའི་བར་རྒྱལ་བ་རྒྱ་མཚོའི་ཆོ་གའི་ནང་གི་སྐྱབས་འགྲོ་དེ་ལན་བདུན་ནམ་ཉེར་གཅིག་ཙམ་བྱ། དེ་ནས་སྐྱབས་ཡུལ་ཐམས་ཅད་འོད་དུ་ཞུ་ནས་རང་ལ་ཐིམ་པས། རང་གི་སེམས་སངས་རྒྱས་དཀོན་མཆོག །ངག་རླུང་གི་རྒྱུ་བ་ཨཱ་ལི་ཀཱ་ལི་སྔགས་ཀྱི་རང་བཞིན་ཆོས་དཀོན་མཆོག་
ལུས་ཀྱི་རླུང་ཐིག་ལེ་དཔའ་བོ་མཁའ་འགྲོའི་རང་བཞིན་དུ་ཡེ་ནས་གནས་པ་མངོན་དུ་མ་གྱུར་མ་རིག་པའི་སྒྲིབ་པས་བསྒྲིབས་པ་དེ་དག་ནི། དཀོན་མཆོག་གསུམ་རང་ལ་གནས་པ་མངོན་དུ་སྣང་བར་བྱ། ཁྱད་པར་དུ་སེམས་ཀྱི་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། རྣམ་པ་འགག་མེད་སྤྲུལ་སྐུ། དུས་གསུམ་དབྱེར་མེད་ངོ་བོ་ཉིད་ཀྱི་སྐུར་ཡེ་ནས་ཡོད་པ་དེ་མངོན་སུམ་དུ་རྟོགས་པར་གྱུར་ཏེ། དཀོན་མཆོག་གསུམ་རང་བཞིན་དབྱེར་མེད་ཆུ་ལ་ཆུ་འདྲེས་པ་ལྟར་གྱུར་སྙམ་དུ་སེམས་མ་བཅོས་པ་ཀློད་དེ་བཞག་པའི་ངང་ནས་ཡི་གེ་དྲུག་པ་བཟླས་ཏེ། རྒྱལ་པོ་སྲོང་བཙན་སྒམ་པོས། ཨོཾ་སངས་རྒྱས་ལ་སྐྱབས་སུ་འགྲོ། མ་ཆོས་ལ་སྐྱབས་སུ་འགྲོ། ཎི་དགེ་འདུན་ལ་སྐྱབས་སུ་འགྲོ། པད་བླ་མ་ལ་སྐྱབས་སུ་འགྲོ། མེ་ཡི་དམ་ལ་སྐྱབས་སུ་འགྲོ། ཧཱུྃ་མཁའ་འགྲོ་ལ་སྐྱབས་སུ་འགྲོ། དེ་ལྟར་སྐྱབས་སུ་འགྲོ་བས་ངན་སོང་དང་འཁོར་བ་ལས་སྐྱོབ་པ་ཡང་། ཡི་གེ་དྲུག་པ་བཟླས་པ་ལས་འབྱུང་ངོ་། །ཞེས་གསུངས་པའི་དོན་ནོ། །གོང་གི་དམིགས་པ་བསྒོམ་ཞིང་བཟླ། རེས་འགའ་སྐྱབས་ཡུལ་བསྡུས་ནས་དམིགས་མེད་ངང་ནས་བཟླ་བར་བྱ་སྟེ། སྐྱབས་ཡུལ་དང་སྐྱབས་སུ་འགྲོ་མཁན་
སྐྱབས་འགྲོ་གསུམ་ཀ་རང་གི་སེམས་ལས་གཞན་དུ་གྲུབ་པ་རྡུལ་ཙམ་ཡང་མེད།། སེམས་ནི་ཡེ་ནས་ཡོད་མེད་དང་། རྟག་ཆད་ལ་སོགས་ཅིའི་ངོ་བོ་ཡང་མ་གྲུབ་པ་སྟོང་པ་ཆོས་སྐུ་སྐྱེ་བ་མེད་པ་ཡིན་ཏེ། དེའི་ངང་ལ་མཉམ་པར་བཞག་པ་ནི་དོན་དམ་པའི་སྐྱབས་འགྲོ་ཡིན་ཏེ། རང་སེམས་སྟོང་པ་ཆོས་ཀྱི་སྐུ་ལ་སྐྱབས་སུ་མཆིའོ། །ཞེས་དང་། རང་ཉིད་སྐྱབས་སུ་ཤེས་པ་ནི་སྐྱབས་ཀྱི་མཆོག་སྟེ། རང་སེམས་སྐྱེ་བ་མེད་པ་འདི་ཡེ་ནས་རྫོགས་པའི་སངས་རྒྱས་ཡིན་པར་ཤེས་པར་བྱ་སྟེ། རྒྱུད་སྡེ་རྣམས་ནས་སེམས་ནི་རྫོགས་པའི་སངས་རྒྱས་ཉིད། །ཅེས་གསུངས་པའི་དོན་རྟོགས་ན། རིག་འབྱུང་འཇུག་གི་ཨཱ་ལི་ཀཱ་ལི་སྔགས་ཀྱི་སྒྲ་དེ་དམ་ཆོས། ལུས་ཀྱི་རྩ་རླུང་ཐིག་ལེ་དཔའ་བོ་དང་ཊཱཀྐིའི་ངོ་བོར་བཞུགས་པ་དེ་དགེ་འདུན་ཡིན་པས། དེ་ལ་དང་པོ་གོ་བ། བར་དུ་མྱོང་། ཐ་མར་དངོས་སུ་རྟོགས་ན་སྐྱབས་འོག་ཏུ་ཚུད་དེ་དཀོན་མཆོག་གསུམ་དང་དབྱེར་མེད་དུ་གྱུར་པ་ཡིན་ནོ། །སྐྱབས་ཡུལ་གསལ་འདེབས་དུས་ཡེ་ཤེས་སྤྱན་འདྲེན་སོགས་མི་དགོས་ཏེ། ནམ་མཁས་གར་ཁྱབ་སངས་རྒྱས་ཀྱི་སྐུ་གསུང་ཐུགས་ཀྱིས་མ་ཁྱབ་པ་མེད་པར་གསུངས་ཤིང་། གཤེགས་དང་བཞུགས་པའི་
མཚན་མ་མི་མངའ་ཡང་། །ཆུ་ཟླ་བཞིན་དུ་གར་དམིགས་དེར་སྣང་བ། །ཞེས་པའི་དོན་ཡིན་ནོ། །ཚེ་འདིའི་ནད་དང་སྡུག་བསྔལ་འཇིགས་པ་བརྒྱད་དང་བཅུ་དྲུག་སོགས་ལས་ཀྱི་རྣམ་སྨིན་མ་གཏོགས་ཐམས་ཅད་སྐྱབས་འགྲོས་སྐྱོབ་པ་དང་། ཕྱི་སྡོམ་པ་དམ་ཚིག་ཐམས་ཅད་ཀྱི་རྨང་གཞི། ནང་རྩ་རླུང་ཐིག་ལེ་ལ་གེགས་སྐྱོན་མི་འབྱུང་བའི་སྐྱེལ་མ། གསང་བ་ལྟ་སྒོམ་སོགས་ས་ལམ་ལ་གེགས་མི་འབྱུང་བའི་དཔུང་རོགས། ཕྱི་མ་ངན་སོང་དང་འཁོར་བ་ལས་སྐྱོབ་པའི་གྲུ་གཟིངས་ཐམས་ཅད་སྐྱབས་འགྲོ་འདི་ཡིན་པས། ཐུན་རེར་སྐྱབས་འགྲོ་བདུན་ནམ་ཉེར་གཅིག །སྐྱབས་འགྲོའི་སྙིང་པོ་ཡི་གེ་དྲུག་པ་སྟོང་ཕྲག་རེ་བྱེད་ནས། སྔ་དྲོ་ཐུན་གཉིས་ཕྱི་དྲོ་ཐུན་གཉིས། མཚན་ཐུན་གཉིས་དང་ཐུན་དྲུག་རེ་གྱིས་ལ། ཞག་གསུམ་འདི་ཁོ་ན་ལ་ཅིག་དྲིལ་དུ་ཉམས་སུ་ལོངས་མཛོད། རྒྱལ་བ་རྒྱ་མཚོའི་བདག་བསྐྱེད་ཚར་རེ་དང་གཏོར་བསྔོས་རེ་ནི་བྱའོ། །ཆོས་ཐུན་གཅིག་པའོ།། ༈ དེ་ནས་བྱང་ཆུབ་མཆོག་ཏུ་སེམས་བསྐྱེད་པ་ལ། རྒྱུ་མཚན་ཉིད་ཐེག་པའི་སེམས་བསྐྱེད་ཐུན་མོང་བ་ནི། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་འདོད་པའི་བསམ་པ་ནི་སྨོན་པ་སེམས་བསྐྱེད། དེ་
ཐོབ་པའི་ཕྱིར་ཕར་ཕྱིན་དྲུག་ཉམས་སུ་བླངས་བ་ནི་འཇུག་པ་སེམས་བསྐྱེད་དེ། དེ་གཉིས་ཀུན་རྫོབ་སེམས་བསྐྱེད་ཡིན། དེ་ལྟར་བསྐལ་པ་གྲངས་མེད་གཅིག་ཉམས་སུ་བླངས་བའི་མཐུས། སྟོང་ཉིད་མངོན་སུམ་དུ་རྟོགས་པ་དོན་དམ་སེམས་བསྐྱེད་ཡིན་ནོ། །འདིར་སྔགས་ཀྱི་སེམས་བསྐྱེད་ནི། བཅོམ་ལྡན་འདས་ཤཱཀྱ་ཐུབ་པ་དེ་བྱང་ཆུབ་སེམས་དཔའ་རྒྱལ་བུ་དོན་གྲུབ་ཅེས་བྱ་བར་གྱུར་པའི་ཚེ། བྱང་ཆུབ་ཤིང་གི་དྲུང་དུ་སྐྱིལ་མོ་ཀྲུང་བཅས་ནས་བཞུགས་པའི་ཚེ། དེ་བཞིན་གཤེགས་པ་ཏིལ་གྱི་གང་བུ་ཁ་ཕྱེ་བ་ལྟ་བུ་བྱོན་ནས་ལོངས་སྤྱོད་རྫོགས་པའི་སྐུར་བསྟན་ནས། ཁྱོད་ཅིའི་ཕྱིར་སངས་རྒྱས་ཐམས་ཅད་ཀྱི་དེ་ཁོ་ན་ཉིད་མ་གཏོགས་ནས། དཀའ་བ་སྤྱད་ནས་བྱང་ཆུབ་ཐོབ་པར་བྱ་སྙམ་གསུངས་པས། རྒྱལ་བུ་དོན་གྲུབ་ཀྱིས་ཕྱག་འཚལ་ནས། དེ་ཁོ་ན་ཉིད་ཇི་ལྟར་བསྒྲུབ་ཞུས་པས། སངས་རྒྱས་ཐམས་ཅད་ཀྱིས་གསུང་གཅིག་ཏུ་རིགས་ཀྱི་བུ་རང་གི་སེམས་ལ་མཉམ་པར་ཞོག་ལ་སྔགས་འདི་ཟློས་ཤིག་གསུངས། དེ་ལྟར་བྱས་པས་རང་གི་སྙིང་གར་ཟླ་བའི་དཀྱིལ་འཁོར་ལྟ་བུར་མཐོང་། སླར་ཡང་སེམས་སྦྱང་བ་བྱང་ཆུབ་ཏུ་སེམས་བསྐྱེད་ཕྱིར་སྔགས་ཟློས་གསུངས་ནས་བཟླས་
པས། རང་གི་སྙིང་གར་ཟླ་བའི་དཀྱིལ་འཁོར་གྱི་སྙིང་པོ་མཐོང་ངོ་། །ད་སེམས་བསྐྱེད་དེ་བརྟན་པར་བྱ་བའི་ཕྱིར་ཟླ་བའི་དཀྱིལ་འཁོར་ལ་རྡོ་རྗེའི་དབྱིབ་སྒོམས་ཤིག་གསུངས་ནས་བསྒོམས་པས། ཟླ་བའི་སྟེང་དུ་རྡོ་རྗེ་མཐོང་། དེ་ནས་སངས་རྒྱས་ཐམས་ཅད་ཀྱིས་སེམས་བསྐྱེད་དེ་བརྟན་པའི་ཕྱིར་སྔགས་གསུངས་པས། སངས་རྒྱས་ཐམས་ཅད་ཀྱི་བྱིན་རླབས་བྱང་ཆུབ་སེམས་དཔའ་དེ་ལ་ཞུགས་ཏེ་དབང་བསྐུར་བས། རང་ཉིད་སངས་རྒྱས་ཀྱི་སྐུར་མཐོང་སྟེ་རྫོགས་པའི་བྱང་ཆུབ་ཏུ་སངས་རྒྱས་པའི་ལོ་རྒྱུས་རྒྱ་ཆེར་རྩ་རྒྱུད་དེ་ཉིད་བསྡུས་པ་སོགས་ནས་ཟློབཤད་པའི་དོན་ཡིན་པས། རང་ཉིད་སྐད་ཅིག་གིས་ཡི་དམ་ཐུགས་རྗེ་ཆེན་པོ་རྒྱལ་བ་རྒྱ་མཚོའི་སྐུར་སྐད་ཅིག་གིས་བསྒོམས་ལ། ཀུན་རྫོབ་བྱང་ཆུབ་སེམས་ཀྱི་ངོ་བོ་ཟླ་བའི་དཀྱིལ་འཁོར་ཉ་གང་བ་གཅིག་བསྒོམ། དེ་ཤིན་ཏུ་གསལ་བར་གྱུར་པ་ན། དེའི་སྟེང་དུ་དོན་དམ་པའི་བྱང་ཆུབ་སེམས་ཀྱི་ངོ་བོ་རྡོ་རྗེ་སྔོན་པོ་རྩེ་ལྔ་པ་འགྲེང་ཐབས་སུ་གནས་པ་གཅིག་བསྒོམ་ལ། ནམ་མཁའ་དང་མཉམ་སེམས་ཅན་ཀུན། །བདེ་ལྡན་སྡུག་བསྔལ་ཀུན་བྲལ་ཞིང་། །སྤྱན་རས་གཟིགས་ཀྱི་གོ་འཕང་སླད། །རིམ་གཉིས་ཟབ་མོ་བསྒོམ་པར་བྱའོ། །ཞེས་ལན་བདུན་
ནམ་གསུམ་བཟླས། དེ་ནས་རྡོ་རྗེའི་རྣལ་འབྱོར་དུ་སེམས་བསྐྱེད་པའི་སྔགས། ཨོཾ་སརྦ་ཡོ་ག་ཙིཏྟ་ཨུརྱ་ཏ་ཡ་མི། ཞེས་དང་། སེམས་བསྐྱེད་དེ་བརྟན་པའི་སྔགས། སུ་ར་སྟེ་ས་མ་ཡ་སྟོ་ཧོ། ཞེས་དང་། བདག་ཉིད་སངས་རྒྱས་ཐམས་ཅད་ཀྱི་ངོ་བོར་གྲུབ་པའི་སྔགས། སིདྡྷི་བཛྲ་ཡ་ཐཱ་སུ་ཁཾ། ཞེས་པའི་སྔགས་དེ་གསུམ་སྦྲེལ་ལ་བརྒྱའམ་ཉེར་གཅིག་བཟླ། དེ་ནས་སེམས་གཞན་དུ་མི་འཕྲོ་བར་སྙིང་ཁའི་ཟླ་བ་རྡོ་རྗེ་གཉིས་ལ་རྩེ་གཅིག་ཏུ་དམིགས་པ་གཏད་དེ། དེ་ཡང་ཟླ་བའི་ཁ་དོག་ཤིན་ཏུ་དཀར་བ་དང་། དབྱིབས་ཟླུམ་པོ་ཉ་གང་བ་དང་། འོད་ཟེར་དཀར་པོ་འཕྲོ་བ་དང་། རྡོ་རྗེ་ཁ་དོག་སྔོ་བ་དང་། ལྟེ་བ་ཟླུམ་པ་དང་། ཡར་རྩེ་ལྔ་དང་མར་རྩེ་ལྔ་དང་དེ་འགྲེང་ཐབས་སུ་གནས་པ་རྣམས་ལ་རིམ་པར་སེམས་བཟུང་། ཟླ་བ་རྡོ་རྗེ་དེ་ཡང་དངོས་པོར་མ་གྲུབ་པ་མེ་ལོང་གི་གཟུགས་བརྙན་ལྟ་བུ། དངོས་པོར་མེད་ཀྱང་ཤིན་ཏུ་གསལ་བར་སེམས་བཟུང་ངོ་། །དེ་ནས་དེ་ལྟར་ཟླ་བ་ནི་ཀུན་རྫོབ་བྱང་ཆུབ་ཀྱི་སེམས་ཡིན་ནོ། །རྡོ་རྗེ་ནི་དོན་དམ་བྱང་ཆུབ་ཀྱི་སེམས་ཡིན་ནོ། །ཟླ་བ་ནི་རང་གི་ལུས་ཀྱི་ཁམས་ཐིག་ལེ་དཀར་པོ་དྭངས་མའི་ངོ་བོ་ཡིན་ནོ། །རྡོ་རྗེ་ནི་རང་གི་སེམས་
བདེ་གཤགས་སྙིང་པོའི་ངོ་བོ་ཡིན་ནོ་བསམ་དུ་བྱ། དེ་ནི་རང་གི་སེམས་དང་ཟླ་བ་རྡོ་རྗེ་གཉིས་སོ་སོ་ཡིན་ནོ། །གཅིག་རེད་སྙམ་དུ་རྩད་གཅོད་པས། ཟླ་བ་རྡོ་རྗེ་ནི་སེམས་ཀྱིས་བསྒོམ་པ་ཡིན་པས། སེམས་ལས་ལོགས་སུ་སྒྲུབ། དེ་ནས་སེམས་ཀྱིས་སེམས་ལ་ཧྲིག་གེར་བལྟས་པས། གཟུགས་ཁ་དོག་ཅིར་ཡང་མ་གྲུབ། མ་གྲུབ་བཞིན་དུ་ཅིར་ཡང་འཆར་དུ་རུང་བ། ཡོད་པ་མ་ཡིན་པས་དངོས་པོ་མེད་པ། མེད་པ་མ་ཡིན་པས་ཅིར་ཡང་གསལ་བ། དེ་ནི་འདི་འདྲ་ཞིག་གདའ་ཞེས་ངག་ཏུ་བརྗོད་མི་ཤེས་པ། བརྗོད་མི་ཤེས་ཀྱང་ཕྱོགས་འགྲོ་ཙམ་རེ་བརྗོད་ན་ཟད་པམེད་པ། སྨྲ་བསམ་བརྗོད་མེད། ཅེས་དང་། ཚིག་ཏུ་བརྗོད་པ་སྤང་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག། །ཅེས་པའི་དོན། དེ་ཉིད་ལ་མཉམ་པར་བཞག་པ་ནི་དོན་དམ་པའི་སེམས་བསྐྱེད་ཡིན། སྔོན་དུ་ཟླ་བ་རྡོ་རྗེ་བསྒོམས་པ་ནི་ཀུན་རྫོབ་སེམས་བསྐྱེད་དེ། སྔགས་ལུགས་འདི་ཐབས་མཁས་པས་རྣམ་པ་ལམ་དུ་བྱེད་པ་ཡིན་ཏེ། དཔེར་ན་དམིགས་རྡེལ་བཞག་པ་ལྟ་བུ་ཡིན་གྱི། སེམས་ལ་ཟླ་བ་འདྲ་བ་ཅིག་མཐོང་རྒྱུ་ཡོད་ཟེར་བ་ནི་མིན་ནོ། །དེ་ལྟར་ཀུན་རྫོབ་ཟླ་བ་རྡོ་རྗེར་བསྒོམ་པ་དང་། དོན་དམ་སྟོང་ཉིད་བསྒོམ་པ་
གཉིས་རེས་མོས་སུ་བྱེད་ཅིང་། བྱང་ཆུབ་ཏུ་སེམས་བསྐྱེད་པའི་སྙིང་པོ་ཡི་གེ་དྲུག་པ་འདི་བཟླ་སྟེ། སྤྲུལ་པའི་རྒྱལ་པོའི་གསུངས་ལས། ཨོཾ་སྨོན་པ་བྱང་ཆུབ་མཆོག་ཏུ་སེམས་བསྐྱེད། མ་འཇུག་པ་བྱང་ཆུབ་མཆོག་ཏུ་སེམས་བསྐྱེད། ཎི་གཉིས་མེད་བྱང་ཆུབ་མཆོག་ཏུ་སེམས་བསྐྱེད། པད་ཆོས་ཉིད་བྱང་ཆུབ་མཆོག་ཏུ་སེམས་བསྐྱེད། མེ་ཡེ་ཤེས་བྱང་ཆུབ་མཆོག་ཏུ་སེམས་བསྐྱེད། ཧཱུྃ་དོན་དམ་བྱང་ཆུབ་མཆོག་ཏུ་སེམས་བསྐྱེད། བྱང་ཆུབ་མཆོག་ཏུ་སེམས་བསྐྱེད་པ་ཡང་། ཡི་གེ་དྲུག་པ་བཟླས་པ་ལས་འབྱུང་ངོ་། །ཞེས་གསུངས་པའི་དོན་ཡིན་ནོ། །དེ་ལྟར་རྟེན་ཀུན་རྫོབ་རྒྱུའི་བྱང་སེམས་ཐིག་ལེ་དཀར་པོ་དེ་ཉམས་ན། དེ་ལ་བརྟེན་ནས་གནས་པའི་དོན་དམ་བྱང་ཆུབ་ཀྱི་སེམས་བདེ་བ་ཆེན་པོའི་ཡེ་ཤེས་ཉམས་པའི་ཕྱིར། བྱང་སེམས་ཉམས་ན་ཉེས་པ་ཆེ་བ་སྟེ། དྲི་མེད་འོད་ལས། སྡུག་བསྔལ་སྐྱེས་བུ་ཁམས་ཟད་བྱེད། །ཁམས་ཟད་པ་ལས་འཆི་བར་འབྱུང་། །ཞེས་གསུངས། འདུལ་བ་ལས་རྨི་ལམ་དུ་བྱང་སེམས་ཉམས་ཀྱང་ལྟུང་བ་མེད་པར་གསུངས་ལ། དུས་འཁོར་ལུགས་ལ། རྨི་ལམ་དུ་ཉམས་ན་ཡང་རྩ་ལྟུང་དུ་བཤད། འདི་ལྟར་བྱང་སེམས་ཉམས་མི་རུང་བ་
ནི། པོན་ལུགས་དང་མུ་སྟེགས་པའི་ལུགས་ལ་ཡང་བཤད་པ་ཡོད་པར་སྣང་ན། གསང་སྔགས་བླ་མེད་ལུགས་ལ་ལྟ་སྨོས་ཅི་དགོས། འོན་ཀྱང་དྭངས་སྙིགས་ཀྱི་ཁྱད་པར་དང་། དུས་ཀྱི་གནང་བའི་སྐབས་ཡོད་དེ། དེ་དག་སོ་སོའི་སྐབས་སུ་འཆད་པར་བྱའོ། །དེ་ནས་ཚད་མེད་བཞི་བསྒོམ་པ་ལ་ཡང་། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་ན་ཅི་མ་རུང་དེ་ལྡན་པར་གྱུར་ཅིག་སྙམ་པ་སོགས་ནི་མདོའི་ལུགས་ཡིན། སྔགས་ལུགས་བླ་མེད་ཆགས་ལམ་པའི་སྐབས་སུ་འདོད་ཆགས་བཞི་ལ་ཚད་མེད་བཞི་སྟེ། བལྟ་བ་སྙིང་རྗེ། འཁྱུད་པ་བྱམས་པ། དགའ་བས་མྱོས་པ་དགའ་བ། གཉིས་ཀ་འཚོགས་པ་བཏང་སྙོམས་སུ་སངས་རྒྱས་ཐོད་པའི་རྒྱུད་སོགས་ནས་བཤད་ཀྱང་། འདིར་གྲོལ་ལམ་སྐབས་སུ་དེ་ལྟར་མི་འབབ་པས་འདིར་བསྒོམ་བྱ་ནི། རང་ཉིད་ཐུགས་རྗེ་ཆེན་པོ་རྒྱལ་བ་རྒྱ་མཚོར་སྐད་ཅིག་ལ་བསྒོམས་པའི་ཐུགས་ཀར་ཟླ་བའི་སྟེང་དུ་རྡོ་རྗེ་སྔོན་པོ་རྩེ་ལྔ་པ་གསལ་བཏབ་ལ། དེ་ལས་འོད་ཟེར་སྔོན་པོའམ་དཀར་པོ་འཇིག་རྟེན་ཐམས་ཅད་ཁྱབ་པར་འཕྲོས་པས། སེམས་ཅན་ཐམས་ཅད་བདེ་སྟོང་གཉིས་སུ་མེད་པར་མཆོག་ཏུ་མི་འགྱུར་བའི་བདེ་བ་ཆེན་པོ་དང་། དེ་ཐོབ་པའི་
རྒྱུད་གསང་སྔགས་རྩ་རླུང་ཐིག་ལེའི་གནད་མ་ཤེས་པས། འཁོར་བའི་སྡུག་བསྔལ་ཐམས་ཅད་བསྐྱེད་པ་དང་། སྡུག་བསྔལ་དེའི་རྒྱུ་ལྷན་ཅིག་སྐྱེས་པའི་མ་རིག་པ་དང་བྲལ་བར་བྱས། ཡང་འོད་ཟེར་དམར་པོ་འཕྲོས་པས། སེམས་ཅན་ཐམས་ཅད་གཉིས་སུ་འཛིན་པའི་སྡུག་བསྔལ་ཐམས་ཅད་དང་བྲལ་བའི་བདེ་བ་དམ་པ། བདེ་སྟོང་གཉིས་མེད་ཀྱི་ཡེ་ཤེས་འགྱུར་མེད་རྟག་པའི་རང་བཞིན་དམ་པ་དང་མི་འབྲལ་བར་བྱས། ཡང་འོད་ཟེར་ལྗང་ཁུ་འཕྲོས་པས། སེམས་ཅན་ཐམས་ཅད་ཀྱི་ལུས་ངག་ཡིད་གསུམ་ཡེ་ནས་སྐུ་གསུང་ཐུགས་རྡོ་རྗེའི་རང་བཞིན་ཆོས་ཀྱི་དབྱིངས་སུ་གཅིག་ཅིང་མཐོ་དམན་ཆེ་ཆུང་མེད་པར་མཉམ་པ་ཡིན་པས། དེ་ཡིན་ལ་ཡིན་བཞིན་དུ་རྟོགས་ཏེ་མཉམ་ཉིད་བདེ་བ་ཆེན་པོའི་རང་བཞིན་དུ་བྱས་པར་བསྒོམ་ལ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ཞེས་སོགས་ཆོ་ག་ནང་གི་ཚད་མེད་བཞི་དེ་ཚར་གསུམ་མམ་བདུན་ཙམ་དང་། ཚད་མེད་བཞིའམ་དྲུག་གི་སྙིང་པོ་ཡི་གེ་དྲུག་པ་བཟླས་ཏེ། སྤྲུལ་པའི་རྒྱལ་པོས། ཨོཾ་འགྲོ་དོན་མཉམ་པ་རེས་མེད་ཐུགས་རྗེ་ཚད་མེད་པ། མ་བྱམས་པ་ཚད་མེད་པ། ཎི་སྙིང་རྗེ་ཚད་མེད་པ། པད་དགའ་བ་ཚད་མེད་
པ། མི་བཏང་སྙོམས་ཚད་མེད་པ། ཧཱུྃ་ཆོས་ཉིད་ཚད་མེད་པའོ། །ཚད་མེད་པ་དྲུག་གིས་འགྲོ་བའི་དོན་བྱེད་པ་ཡང་ཡི་གེ་དྲུག་པ་བཟླས་པས་འགྲུབ་པ་ཡིན་ནོ། །ཞེས་གསུངས་སོ། །དེ་ལྟར་སྔ་དྲོ་སེམས་བསྐྱེད་བསྒོམ། ཕྱི་དྲོ་ཚད་མེད་པ་བཞི་བསྒོམ་པ་ཞག་གསུམ། ཆོས་མཐུན་གཉིས་པ་ཡིན་ནོ།། སྤྱིར་འཁོར་བའི་སྡུག་བསྔལ་ཐམས་ཅད་ཚེ་རབས་སྔ་མ་རྣམས་སུ་སྡིག་པ་མི་དགེ་བ་བྱས་པའི་འབྲས་བུ་ཡིན། དེ་ལ་ཡང་མཐོང་ཆོས་མྱོང་འགྱུར་དང་། སྐྱེས་ནས་མྱོང་འགྱུར་དང་། ལན་གྲངས་གཞན་དུ་མྱོང་འགྱུར་དང་གསུམ་ཡོད་དེ། མཐོང་ཆོས་མྱོང་འགྱུར་ནི་སྐྱེ་བ་འདི་ལ་ངེས་པར་སྨིན་དགོས། སྐྱེས་ནས་མྱོང་གྱུར་སྐྱེ་བ་གཞན་དུ་སྨིན། ལན་གྲངས་གཞན་དུ་མྱོང་གྱུར་ནི། རྣམ་སྨིན་གྱི་ངེས་པ་མེད། །ནད་གདོན་རྐྱེན་དང་འཕྲད་ན་མྱུར་དུ་སྨིན། རྐྱེན་དང་མ་འཕྲད་ན་བསྐལ་པ་མང་པོར་ཡང་མི་སྨིན་ཏེ་དུས་ནམ་ཞིག་ནི་སྨིན་ངེས། དེ་ལྟ་བུའི་སྒྲིབ་པ་དེ་ལས་ཀྱི་སྒྲིབ་པ་ཡིན་ཏེ། ཚེ་སྔ་མ་རྣམས་སུ་རང་གིས་བྱས་པའི་ལས་ཡིན། ཉོན་མོངས་པའི་སྒྲིབ་པ་ནི་ལུས་ངག་གིས་མ་བྱས་ཀྱང་། སེམས་ལ་འདོད་ཆགས་ཞེ་སྡང་གཏི་མུག་གི་རྟོག་པ་ངན་པ་འགྱུར་བ་ཡིན། ཤེས་
བྱའི་སྒྲིབ་པ་ནི་ཕྱིའི་རིག་པའི་གནས་རྣམས་ལ་མཁས་པས། དེ་དང་དེར་མངོན་པར་ཞེན་པ་སོགས་མདོར་ན་རང་རིག་གི་ཡེ་ཤེས་མ་རྟོགས་པའི་ཀུན་རྫོབ་རྣམས་ཡིན། བག་ཆགས་ཀྱི་སྒྲིབ་པ་ནི། དཔེར་ན། ལུས་ལྷར་བསྒོམས་ནས་བསྐྱེད་རིམ་ལྟ་བུ་གསལ་ན་ཡང་། ད་དུང་ཐ་མལ་པའི་ལུས་ཀྱི་བག་ཆགས་གཅིག་ཡོད་པ་ལྟ་བུ་ཡིན། ཕ་མ་དང་སློབ་དཔོན་བསད་པ་སོགས། སྐྱེ་བ་འདི་བརྗེས་ནས་སྐྱེ་བ་གཞན་གྱིས་བར་མི་ཆོད་པར་སྨིན་པ་ལྟ་བུས་མཚམས་མེད་པའི་ལས་ཡིན། ཚེ་འདི་ལ་རྩ་རླུང་སོགས་གསང་སྔགས་ཟབ་མོའི་བ་གདམས་པ་བསྒོམས་ཀྱང་གེགས་དང་གོལ་ས་འོང་བ་དང་། ལམ་རྟགས་ཀྱི་ཡོན་ཏན་མི་སྐྱེ་བ་རྣམས་ཀྱང་ཚེ་སྔ་མའི་སྡིག་སྒྲིབ་ཡིན། ཚེ་འདི་ལ་སྡིག་ལ་སྡིག་ལྟུང་མེད་སྙམ་ཡང་། སྡོམ་པ་དང་དམ་ཚིག་ལ་ཤེས་བཞིན་དུ་འགལ་བར་བྱས་ནས་མེད་དེ། དམ་ཚིག་སྡོམ་པའི་བཤད་པ་རྣམས་ཡིད་ལ་མེད་པས། ལྟུང་བ་བྱུང་བ་དང་མ་བྱུང་བ་རང་གིས་ངོ་ཤེས་དཀའ་བར་ཡོད། སྡིག་ལྟུང་དེ་དག་བཤགས་ན་མི་འདག་པ་གཅིག་ཀྱང་མེད། མ་བཤགས་ན་བསྐལ་པ་སྟོང་དུ་ཡང་མེད་པར་མི་འགྱུར་བའི་སྟེང་དུ། ཞག་རེ་སོང་ཞིང་སྐྱེད་རེ་འཕེལ། བཤགས་
པ་ཅུང་ཟད་རེས་རྩ་བ་ནས་མ་དག་ཀྱང་སྐྱེད་མི་འཕེལ་བ་ལ་ཕན། དེས་ན་བཤགས་པ་གལ་ཆེ་སྟེ། དེ་ཡང་རྩ་རླུང་ཅུང་ཟད་བསྒོམ་པ་ལ་མ་ངེས་རྩེ་གཅིག་ཏུ་བསྒོམས་ན། སྒྲིབ་པ་ཆུང་བ་རྣམས་ལ་གེགས་སྐྱོན་ཅི་ཡང་འབྱུང་བ་ལམ་རྟགས་ཀྱི་ཡོན་ཏན་སྤེལ་མར་འབྱུང་། སྒྲིབ་པ་འཐུག་པོའི་རིགས་ལ་དང་པོ་ཡོན་ཏན་ཅི་ཡང་མེད་པར་གེགས་སྐྱོན་ཁོ་ན་འབྱུང་། དེ་ལ་རང་ཉིད་ཡོན་ཏན་ཆེ་བའམ། བླ་མ་མཁས་པས་གེགས་སྐྱོན་བསལ་ཞིང་ཁྲིད་ན་ཡོན་ཏན་མུས་ཀྱིས་སྐྱེ། གེགས་སེལ་མེད་པར་ཨུ་ཚུགས་སུ་བྱས་ན། ནད་ཅན་དང་གདོན་ཅན་དུ་སོང་ནས་སྨྱོ་བའམ་གཅོང་ནད་ཅན་ནམ། ཡང་ན་གློ་བུར་དུ་འཆི་བར་འགྱུར་རོ། །དེ་ལྟར་སྐྱོན་རྣམས་མི་འབྱུང་ཞིང་ཡོན་ཏན་སྐྱེ་བ་ལ་དང་པོ་སྒྲིབ་པ་སྦྱོང་བ་གལ་ཆེ། ལྭ་བ་གཅིག་ཚོས་བྱེད་ན་ཡང་བཀྲུས་ནས་དྲི་མ་མེད་པ་ཅིག་དགོས། དྲི་མ་ཅན་ལ་ཚོས་མི་འགོ་བ་དང་འདྲ་བར་གསུངས། དེ་ལ་མདོ་སྔགས་ཐུན་མོང་གི་སྒྲིབ་སྦྱོང་ཕྱག་འཚལ་བ་དང་། སྔགས་ལུགས་རྡོར་སེམས་སྒོམ་བཟླས་ལ་ཡང་བྱ་སྤྱོད་རྣལ་འབྱོར་རྒྱུད་གསུམ་ཐུན་མོང་བ་ཡབ་རྐྱང་ལ་བདུད་རྩིའི་རྒྱུན་འབབ་པར་བསྒོམ་ལུགས་དང་། བླ་མེད་ཐུན་མོང་མ་ཡིན་པ་ཡབ་ཡུམ་ཞལ་སྦྱོར་ལ།
བྱང་སེམས་རྒྱུན་འབབས་པར་བསྒོམ་པ་དང་། རང་ཉིད་རྡོར་སེམས་བསྒོམ་པའི་ཐུགས་ཀར་ཧཱུྃ་ལས་བདུད་རྩི་བབ་པར་བསྒོམས་ཏེ་སྒྲིབ་པ་སྦྱོང་ལུགས་མང་དུ་ཡོད་ཀྱང་། སྒྲིབ་སྦྱོང་གི་སྙིང་པོ་ཡི་གེ་དྲུག་པ་ཉིད་ཟབ་པས། དེའི་མན་ངག་བསྒོམ་བྱ་ནི། རང་ཉིད་ཐ་མལ་པར་གནས་པའི་སྤྱི་གཙུག་ཏུ། ངོ་བོ་འཕགས་པ་སྤྱན་རས་གཟིགས་ཉིད་ཡིན་པ་ལ། རྣམ་པ་ཧིཡིག་དཀར་པོ་ཚེག་དྲག་རིང་ཆ་དང་བཅས་འོད་ཟེར་དཀར་པོ་འཕྲོ་ཞིང་བསྒོམ་ལ། ཧྲཱིཿཡིག་དེ་ཉིད་ཀྱང་བླ་མ་ཡི་དམ་སངས་རྒྱས་བྱང་སེམས་ཌཱཀི་ཆོས་སྐྱོང་ཐམས་ཅད་འདུས་པའི་ངོ་བོར་བསྒོམ་ལ། ཆོ་ག་ནང་གི་ཕྱོགས་བཅུ་དུས་གསུམ་བཞུགས་པ་ཡི། །ཞེས་པ་ནས། ལྷན་ཆད་བདག་ནི་མི་བགྱིད་དོ། །ཞེས་པའི་བར་ལན་གསུམ་བརྗོད་དེ། དེའི་དོན་ཡང་ཕྱོགས་བཅུའི་སངས་རྒྱས་བྱང་སེམས་འདས་པ་དང་མ་བྱོན་པ་དང་ད་ལྟའི་སངས་རྒྱས་བྱང་སེམས་བླ་མ་ཡི་དམ་ཐམས་ཅད་དགོངས་སུ་གསོལ། ཞེས་པས་བཤགས་ཡུལ་རྟེན་གྱི་སྟོབས་དེའི་དྲུང་དུ་ཐོག་མེད་ནས་བསགས་པའི་སྡིག་སྒྲིབ་བག་ཆགས་དང་བཅས་པ་དེ་ལ་འགྱོད་ཅིང་གནོང་ཆེ་བའི་བསམ་པས་བཤགས་པ་རྣམ་པར་སུན་འབྱིན་པའི་སྟོབས། ད་ཕྱིན་
ཆད་སྲོག་བབ་ཀྱང་མི་བགྱིད་པར་དམ་བཅའ་བ་ཆུར་ལོན་གྱི་སྟོབས། ཡི་གེ་དྲུག་པ་སྒྲིབ་པའི་གཉེན་པོ་ཡིན་པས་གཉེན་པོ་ཀུན་ཏུ་སྤྱོད་པའི་སྟོབས་བརྟེན་ནོ། སྟོབས་བཞིའི་སྒོ་ནས་བཤགས་ན། སྡིག་ལྟུང་ཐམས་ཅད་ངེས་པར་འདག་པ་ཡིན་ནོ། །དེ་ལྟར་སྟོབས་བཞི་པོ་ཚང་བའི་སྒོ་ནས་བཤགས་ཚིག་བརྗོད་པས། སྤྱི་བོའི་གྷིཡིག་ལས་བདུད་རྩིའི་རྒྱུན་འོ་མ་ལྟ་བུ་ངང་ན་ར་ར་བབ། རང་གི་སྤྱི་བོའི་ཚངས་བུག་ནས་ཞུགས་ཏེ་ལུས་ཀྱི་ནང་ཐམས་ཅད་བཀྲུས་བ་སྤུའི་བུ་ག་དང་འོག་སྒོ་དང་གསང་སྒྲུབ་དང་རྐང་ཞབས་དང་སེན་མོའི་བར་ནས། སྡིག་སྒྲིབ་དང་དམ་ཚིག་གི་ཆག་ཉམས་ཐམས་ཅད་ནག་ནུ་རུ་རུ་བུད་དེ། ས་འོག་ཏུ་སོང་བས་ལས་ཀྱི་གཤིན་རྗེ་ཁ་གདངས་བའི་ནང་དུ་སོང་ནས། གཤིན་རྗེ་ངོམ་ཞིང་ཚིམས་པས་དུས་མ་ཡིན་པར་འཆི་བ་མེད་པར་བྱས། ཡེ་ཤེས་ཀྱི་བདུད་རྩིས་ལུས་ཐམས་ཅད་དཀར་ལྟེམ་གྱིས་གང་བར་བསྒོམ་མོ། །ཡང་རང་ལ་ནད་ཡོད་ན། ནད་དེ་ཚད་པའི་རིགས་ཡིན་ན་བདུད་རྩི་དེ་ཡང་གངས་ཆུ་ལྟར་བསིལ་བའི་ངད་དང་ལྡན་ཞིང་། ག་པུར་ལྟར་བསིལ་བས་སྡིག་སྒྲིབ་དང་ལྷན་ཅིག་ཏུ་ནད་ཐམས་ཅད་དག་པར་བསྒོམ་པ་དང་། གྲང་བའི་ནད་རིགས་ཡོད་ན། བདུད་རྩི་
དེ་ཡང་ཁྲོ་ཆུ་ཁོལ་མ་ལྟར་ཤིན་ཏུ་ཚ་བའི་རང་བཞིན་ཅན་གྱིས། ནད་ཐམས་ཅད་བསྲེགས་ཤིང་ཚྭ་ཚྭ་དམར་ཐར་ཐར་ལུས་ཚལ་ཆིལ་ཆིལ་བར་བསྒོམ་པ་དང་། འདུས་པའི་ནད་ལ་བདུད་རྩི་ཁ་དོག་ལྔ་ལྡན་བདེ་བའི་རང་བཞིན་ཅན་གྱི། ལུས་བདེ་ཕྲིལ་ཕྲིལ་བ་དང་། གདོན་གནོད་ན་བདུད་རྩིའི་རྡུལ་ཕྲ་རབ་ཐམས་ཅད་རྟ་མགྲིན་སྐུ་ཆུང་བས་ལུས་གང་སྟེ༔ ཧཱུྃ་ཧཱུྃ་ཕཊ་ཕཊ་སྒྲོགས་པས་གདོན་ཐམས་ཅད་བ་སྤུའི་བུ་ག་ནས། འབུ་སྲིན་དང་སྦལ་སྦྲུལ་གྱི་གཟུགས་སུ་ཐོན་པར་བསྒོམ། དེ་ནས་ཡང་ཧཱུྃཡིག་ལས་འོད་ཟེར་ཁ་དོག་ལྔ་ལྡན་ཉི་མ་འབུམ་གྱི་འོད་ལྟར་འཕྲོས་པས། ལུས་ཀྱི་ནང་གི་སྡིག་སྒྲིབ་ཐམས་ཅད་དག་ནས་མུན་པ་ལ་ཉི་མ་ཤར་བ་ལྟར་གྱུར། ལུས་ཀྱི་ནང་ཐམས་ཅད་འོད་ཟེར་དེས་གང་ནས་འོད་ཟེར་ཁ་དོག་སྣ་ཚོགས་ཕྱིར་འཕྲོས་ནས། སེམས་ཅན་ཐམས་ཅད་ཀྱི་ནད་གདོན་སྡིག་སྒྲིབ་ཐམས་ཅད་དག་པར་བསྒོམ་ཞིང་ཧྲཱིཿཞེས་བརྒྱ་རྩབརྒྱད་དམ་ཅི་རིགས་བཟླ། གཙོ་ཆེར་ཡི་གེ་དྲུག་པ་བཟླ་བར་བྱ་སྟེ། པདྨ་རྒྱལ་པོའི་རྒྱུད་ཆེན་པོ་ལས། ཨོཾ་མ་ཎི་པདྨེ་ཧཱུྃ། ཐེབས་གཅིག་མོས་པས་བརྗོད་པ་ན། །སེམས་ཅན་དམྱལ་བའི་གནས་ལས་ཐར། །ཐེབས་གཉིས་བརྗོད་
པས་ཡི་དྭགས་ཀྱི། །འགྲོ་བའི་སྒོ་ཡང་འགགས་པར་འགྱུར། །གསུམ་བརྗོད་དུད་འགྲོའི་འགྲོ་བ་འགགས། །འདོད་པའི་ཡོན་ཏན་ལྔ་སྤྱད་ཀྱང་། །འདི་དང་མ་འབྲལ་གཙང་མར་གནས། །ཟས་དང་གོས་དང་བཏུང་བ་ཡང་། །འདི་དག་དྲན་པས་ཉེས་པ་མེད། །ཅེས་གསུངས་སོ། །སྤྲུལ་པའི་རྒྱལ་པོའི་རྡོ་རྗེའི་གསུང་ལས། ཨོཾ་གྱིས་ལུས་ཀྱི་སྒྲིབ་པ་སྦྱངས་མས་ངག་གི་སྒྲིབ་པ་སྦྱངས། ཎིས་ཡིད་ཀྱི་སྒྲིབ་པ་སྦྱངས། པད་ཀྱིས་ཉོན་མོངས་པའི་སྒྲིབ་པ་སྦྱངས། མེས་བག་ཆགས་ཀྱི་སྒྲིབ་པ་སྦྱངས། ཧཱུྃ་གིས་ཤེས་བྱའི་སྒྲིབ་པ་སྦྱངས། སྒྲིབ་པ་དྲུག་གི་རྟེན་སྦྱང་བ་ཡང་ཡི་གེ་དྲུག་པ་བཟླས་པས་སྦྱང་བ་ཡིན་ནོ། །ཞེས་གསུངས་པའི་དོན་ཡིན་ནོ། །དེ་ལྟར་ཐུན་རེ་ལ་ཡིག་དྲུག་སྟོང་ཕྲག་རེ་རེའམ་གསུམ་རེ་ཙམ་བཟླས་ལ། ཐུན་མཚམས་སུ་རང་ལུས་འོད་དུ་ཞུ་ནས་ཧཱི༔ཡིག་དེ་ལ་ཡར་ཐིམ། ཧྲཱིཿཡིག་ར་རྟགས་ཧ་ཁོག་ལ། ཐིག་ལེ་ཚེག་དྲག་ཀྱང་ཧ་ལ། ཧ་གི་གུ་ལ། དེ་ཡང་ནམ་མཁའ་ལ་འཇའ་ཡལ་བ་ལྟར་སྟོང་པ་ཉིད་དུ་ཡལ། དེ་ནས་སེམས་རང་ལུགས་སུ་ཀློད་ལ་མ་བཅོས་པའི་ངང་ལ་མ་ཡེངས་ཙམ་དུ་རང་ངོ་ལ་ཧྲིག་གེ་བལྟས་ཏེ་བཞག །དེའི་ཚེ་བཤགས་བྱ་དང་
བཤགས་བྱེད་བཤགས་པ་ཐམས་ཅད་དོན་དམ་པར་མ་གྲུབ་སྟེ་སྒྱུ་མ་རྨི་ལམ་ལྟ་བུ། ཐམས་ཅད་རང་གི་སེམས་ཙམ་ཉིད་ཡིན་ཅིང་། སེམས་ནི་ཡེ་གདོད་མ་ནས་ཅིའི་ངོ་བོར་ཡང་མ་གྲུབ་པས། བག་ཆགས་སྡིག་སྒྲིབ་ཐམས་ཅད་ཀྱང་མིང་བཏགས་པ་ཙམ་དང་། དོན་དམ་པར་ན་མོ་གཤམ་གྱི་བུ་དང་། ནམ་མཁའི་མེ་ཏོག་དང་། རི་བོང་གི་རྭ་ལྟ་བུ་སྟེ། མོ་གཤམ་ལ་བུ་མེད་པས། དེའི་དཔའ་རྩལ་རྫུན། ནམ་མཁའི་མེ་ཏོག་མེད་པའི་ཕྱིར། དེའི་བཀྲག་མདངས་རྫུན། རི་བོང་ལ་རྭ་མེད་པའི་ཕྱིར། དེའི་རྣ་བརྟུལ་རྫུན། །ལས་མེད་པའི་ཕྱིར་ལས་ཀྱི་རྣམ་སྨིན་རྫུན། དམ་ཚིག་མེད་པའི་ཕྱིར་ཆག་ཉམས་རྫུན། ཐམས་ཅད་མིང་དུ་བཏགས་པ་ཙམ་སྟེ། དོན་དམ་པར་ནི་ཆོས་ཉིད་སྐྱེ་བ་མེད་པའི་ངོ་བོ་ལས་ཅི་ཡང་མ་གཡོས་བར་རྟོགས་པར་བྱ་སྟེ། འདི་ལྟར་རྟོགས་ན་བཤགས་པའི་མཆོག་ཡིན་ནོ། །དེ་ལྟར་ཐུན་དྲུག་ཏུ་ཉམས་སུ་བླང་བར་བྱའོ། །འདི་ལ་ཞག་གསུམ། ཆོས་ཐུན་གསུམ་པའོ། །སྤྱིར་ཚེ་འདི་དང་ཕྱི་མ་ལ་བདེ་སྐྱིད་ཕུན་སུམ་ཚོགས་པ་འབྱུང་བའི་རྒྱུ་ནི་ཚོགས་བསགས་པ་གལ་ཆེ། ཁྱད་པར་རྩ་རླུང་ཟབ་མོ་བསྒོམ་པ་ལ་ཡང་ཚོགས་བསགས་
དགོས། ཚོགས་མ་བསགས་པར་གསང་སྔགས་ཀྱི་ལམ་རྟགས་སྐྱེ་བ་ལྟ་ཅི་སྨོས། གོ་བ་ཙམ་ཡང་མི་སྐྱེ། མཐར་སངས་རྒྱས་པའི་ཚེ་ན་ཡང་བསོད་ནམས་ཀྱི་ཚོགས་ལས་གཟུགས་སྐུ་གཉིས་འབྱུང་། ཡེ་ཤེས་ཀྱི་ཚོགས་ལས་ཆོས་སྐུ་འབྱུང་དགོས། ཁྱད་པར་གསང་སྔགས་ལུགས་ལ་ཚོགས་གཉིས་ཟུང་འབྲེལ་དུ་བསགས་དགོས། དེ་ལ་ཡེ་ཤེས་ཀྱི་ཚོགས་ནི་སྟོང་ཉིད་བསྒོམ་པ་ཁོ་ན་ཡིན། བསོད་ནམས་ཀྱི་ཚོགས་བསགས་ལུགས་མང་ན་ཡང་། སྟབས་བདེ་ཞིང་ཕན་ཡོན་ཆེ་བ་ནི་མཎྜལ་ཡིན། མཎྜལ་ལ་ཡང་གསེར་དངུལ་དང་ས་ཤིང་སོགས་ལས་བྱས་པའི་མཎྜལ། འབྲུ་དང་རིན་པོ་ཆེའི་ཚོམ་བུ་བཀོད་དེ་ཕུལ་བ་ཡིན། བྱ་སྤྱོད་རྣལ་འབྱོར་རྒྱུད་ཐུན་མོང་ཕྱིའི་མཎྜལ་ཡིན། འདིར་བླ་མེད་རྒྱུད་ཀྱི་ཐུན་མོང་མ་ཡིན་པ་ནི་ནང་ལུས་ཀྱི་མཎྜལ་འབུལ་བ་ནི། དེའི་རྒྱུ་མཚན་བླ་མེད་རྡོ་རྗེ་ཐེག་པའི་ལུགས་ལ། ནང་བཅུད་ཀྱི་སེམས་ཅན་ཐམས་ཅད་ཕུང་ཁམས་སྐྱེ་མཆེད་ཐམས་ཅད་ཀྱང་། རྡོ་རྗེའི་རི་རབ་དང་མཚོ་དང་གླིང་དང་མཎྜལ་གྱི་མཆོད་པར་མ་གྱུར་པ་མེད་པར་གསུངས་པས། འདིའི་སྐབས་སུ་ལུས་མཎྜལ་དུ་ཕུལ་བ་ཟབ་སྟེ། དེའི་རྒྱུ་མཚན་རང་ལ་གང་རྩིས་ཆེ་བ་དེ་བླ་མ་དཀོན་མཆོག་ལ་ཕུལ་
བས་ཚོགས་རྫོགས་ཕུལ་ཆེ་བ་ཡིན་པས། རང་གི་ལུས་ལས་གཅེས་ཤིང་འཕངས་བ་ཞིག་ཀྱང་མེད་ལ། ལོངས་སྤྱོད་ལ་སོགས་རྩིས་ཆེ་བ་ཡང་ལུས་གསོ་བའི་ཆེད་དུ་ཡིན་པ་དང་། རྩ་རླུང་བསྒོམ་པའི་རྟེན་ལུས་ཡིན། གེགས་དང་ཡོན་ཏན་གང་འོང་བ་དེ་ལུས་ལས་འོང་བའི་ཕྱིར། ལུས་རང་གིས་བདག་ཏུ་མ་བཟུང་བར་བླ་མ་དཀོན་མཆོག་ལ་ཕུལ་བས་དེ་བླ་མ་དཀོན་མཆོག་གིས་བདག་ཏུ་བཟུང་བ་ལྟར་སོང་ནས་གེགས་མི་འབྱུང་བ་ཡིན་ནོ། དེ་ལ་མཎྜལ་ཕུལ་བའི་ཚོགས་ཞིང་ནི། རང་གི་སྙིང་ཁའི་ཧྲཱིཿལས་འོད་ཟེར་འཕྲོས་པས། བདེ་བ་ཅན་གྱི་ཞིང་ཁམས་ནས། ཞེས་སོགས་དང་། ཧཱུྃ། བཞེངས་ཤིག་བཞེངས་ཤིག་སོགས་ནས། ཨོཾ་པདྨ་ཀཱ་མ་ལྱཱ་ཧཱུྃ་སྭཱ་ཧཱ། ཞེས་དང་། བཅོམ་ལྡན་འདས་རྒྱལ་བ་རྒྱ་མཚོ་ལྷ་ལྔའི་ལྷ་ཚོགས་སྤྱན་དྲངས་ཏེ་ནམ་མཁར་བཞུགས་པར་བསམས་ལ། དེའི་མདུན་དུ་རང་གི་པགས་པ་གསེར་གྱི་ས་གཞི། རྒྱུ་མ་ལྕགས་རི་འཁོར་ཡུག །སྒལ་ཚིགས་རི་བོ་མཆོག་རབ། མགོ་བོ་ལྷ་གནས་རྣམ་པར་རྒྱལ་བའི་ཁང་བཟང་། ལག་གཡས་ཤར་ལུས་འཕགས་པོ། རྐང་གཡས་ལྷོ་འཛམ་བུ་གླིང་། རྐང་པ་གཡོན་ནུབ་བ་གླང་སྤྱོད། ལག་པ་གཡོན་
བྱང་སྒྲ་མི་སྙན། མིག་གཉིས་ཉི་མ་དང་ཟླ་བ། རྣ་བ་གཉིས་གཟའ་དགྲ་ཅན་དང་དུས་མེ། སྣ་གསེར་གྱི་བུམ་པ། ལྕེ་འདོད་འཇོའི་བ། རྐང་སོར་བཅུ་ཕྱིའི་ལྷ་མོ་བཅུ་སྟེ། མེ་ཏོག་མ། བདུག་སྤོས་མ། མར་མེ་མ། དྲི་ཆབ་མ། ཞལ་ཟས་མ། གཟུགས་མ། སྒྲ་མ། དྲི་མ། རོ་མ། རེག་བྱ་མ་དང་བཅུ། ལག་སོར་བཅུ་ནང་གི་ལྷ་མོ་བཅུ་སྟེ༔ སྒེག་མོ་མ། ཕྲེང་བ་མ། གླུ་མ། གར་མ། ཆོས་འབྱུང་མ། སྐུ་གསུང་ཐུགས་ཡོན་ཏན་ཕྲིན་ལས་ཀྱི་རིག་མ་ལྔའོ། །ཚིགས་ཆེན་བརྒྱད་བཀྲ་ཤིས་པའི་རྟགས་བརྒྱད། དོན་སྣོད་བདུན་རྒྱལ་སྲིད་སྣ་བདུན། སྐྲ་དང་བ་སྤུ་ལྷ་དང་མིའི་ལོངས་སྤྱོད་ཕུན་སུམ་ཚོགས་པ་མ་ཚང་བ་མེད་པར་རང་བཞིན་ལྷུན་གྲུབ་ཏུ་བསྒོམས་ལ། དེ་རྣམས་བླ་མ་དཀོན་མཆོག་རྒྱུ་མཚོའི་ལྔའི་ལྷ་ཚོགས་ལ་འབུལ་བར་དམིགས་ལ། སྤྱན་རས་གཟིགས་དབང་ཐུགས་རྗེའི་བདག །བླ་མར་བཅས་པ་ཐམས་ཅད་ལ། །བདག་གི་ལུས་འདི་ཕུལ་བ་ཡིས། །ཐེག་པ་དམན་ལ་མི་འཇུག་ཅིང་། །ཐེག་ཆེན་བླ་ན་མེད་པའི་ལམ། །ཟབ་ཅིང་རྒྱ་ཆེ་བསྟན་དུ་གསོལ། །ཞེས་བརྒྱའམ་ཉེར་གཅིག་ཙམ་རེ་བརྗོད་ལ། དེ་ནས་མཎྜལ་ཕུལ་བའི་དམིགས་པ་
དེ་ཡང་ཡང་བྱེད་ཅིང་ཡི་གེ་དྲུག་པ་བཟླས་ཏེ། སྙིང་པོ་འཛབ་ཀྱི་མཆོད་པ་ཡིན་ཏེ། པདྨ་རྒྱལ་པོའི་རྒྱུད་ལས། ཡི་གེ་དྲུག་པའི་སྒྲ་བསྒྲགས་པས་སངས་རྒྱས་ཆོས་དང་དགེ་འདུན་ལ་མཆོད་པ་ཆེན་པོར་འགྱུར་རོ། །ཞེས་གསུངས་པ་དང་། ཟ་མ་ཏོག་ལས། ཡི་གེ་དྲུག་པ་ལན་གཅིག་བརྗོད་པའི་བསོད་ནམས་ཀྱང་ཚད་མེད་པར་གསུངས་པའི་ཕྱིར། མཆོད་པ་འབུལ་བའི་སྙིང་པོ་དང་བསོད་ནམས་བསགས་པའི་སྙིང་པོ་མཆོག་ཡི་གེ་དྲུག་པ་སྟོང་ཕྲག་གཅིག་གཉིས་ཡན་ཆད་བཟླས་པ་དེ་ནི་བསོད་ནམས་ཀྱི་ཚོགས་ཡིན་ལ། དེ་ནས་ནམ་མཁའི་ལྷ་ཚོགས་ཐམས་ཅད་རང་ལ་བསྟིམ་ལ་མཆོད་ཡུལ་དང་། མཆོད་པ་དང་མཆོད་མཁན་གསུམ་ཀ་མི་དམིགས་པ་སྟོང་ཉིད་ཕྱག་རྒྱ་ཆེན་པོའི་ངང་ལ་མཉམ་པར་བཞག་པ་ནི་ཡེ་ཤེས་ཀྱི་ཚོགས་ཡིན་ནོ། །དེ་ལྟ་བུའི་ཐུན་དྲུག་གམ་བཞིར་བཅད་ལ་ཉམས་སུ་ལེན་ནོ། །དེ་ཡང་གཅོད་ཀྱི་ལུགས་ལྟར་བེམ་རིག་ཕྲལ་ནས་ལུས་འབུལ་བ་ནི་མིན། ལུས་དེ་དག་མི་དམིགས་པར་བྱས་ནས་གླིང་བཞི་རི་རབ་ཏུ་སྤྲུལ་ནས་ཕུལ་བ་ཡང་མ་ཡིན་ནོ། །འོ་ན་ཅི་ཞེ་ན། ཕྱིའི་འཇིག་རྟེན་གླིང་བཞི་རི་རབ་ཐམས་ཅད་རང་གི་ལུས་ལ་ཚང་ནི་ཡོད་ཅིང་། དེ་ཡོད་པའི་
གནད་ཀྱིས་ཕྱི་རོལ་དུ་གླིང་བཞི་རི་རབ་སོགས་སྣང་བ་ཡིན་པས། ནང་གི་འཇིག་རྟེན་སྣོད་བཅུད་ཐམས་ཅད་ཕུལ་བས། ཕྱི་རོལ་ཡང་ཞོར་ལ་ཕུལ་བར་འགྲོ་སྟེ། དཔེར་ན། མེ་ལོང་ནང་དོད་རྒྱུའི་གཟུགས་དེ་ཕུལ་ན་མེ་ལོང་ནང་དུ་ཤར་བའི་གཟུགས་ཀྱང་ཕུལ་བ་དང་འདྲ་བའི་དོན་གོ་བར་བྱའོ། །དེ་ཡང་རྒྱུད་ཀྱི་རྒྱལ་པོ་པདྨ་ཟབ་པ་ལས། མཎྜལ་འབུལ་དང་མཆོད་པ་དང་། །ལུས་ཀྱི་ལས་རྣམས་ཅི་ནུས་བྱ། །ཞེས་དང་། གཞུང་ལས། བདག་གི་ལུས་འདི་ཕུལ་བ་ཡིས། །ཞེས་སོགས་གསུངས་པའི་དོན་ཡིན་ནོ། །སྔོན་འགྲོའི་ཆོས་འདི་རྣམས་དམིགས་པ་རྣོན་པོ་ལ། ཉི་མ་རེ་རེ་ལ་ཡང་ཚང་བར་བསྒོམ་ཞིང་དངོས་གཞི་རྩ་རླུང་ཡང་བསྒོམ་པ་ནི། ཏིང་ངེ་འཛིན་རྩ་ལ་རྫོགས་པས་བྱ་རུང་གི་ལས་དང་པོ་པས་དེ་རྣམས་དམིགས་པ་ཟིན་དཀའ་ཞིང་། རང་གང་དྲན་ཙམ་རེ་བྱས་ཀྱང་བསོད་ནམས་ནི་ཆེ་མོད་ཀྱང་། ལམ་རྟགས་ཀྱི་ཡོན་ཏན་སྐྱེ་མི་གཏུབ་པས། རིམ་པ་བཞིན་དུ་བློ་ཁ་རྫོགས་ངེས་རེ་བསྒོམས་པས། རིམ་པར་ཡོན་ཏན་སྐྱེ་བས་ཁྲིད་ཟེར་བའི་དོན་ཡང་ཚང་ངེས་འོང་། དེ་ནས་དངོས་གཞི་དུས་སྔོན་འགྲོ་མ་བསྒོམས་ཚེ་ཚོགས་སྐས་ལ་མ་འཛེགས་པར་ཐོག་ཀ་ནས་མཆོངས་ན་སར་སྡེབ་པ་ལས་
མི་འོང་། སྐས་ལ་རིམ་པར་འཛེགས་པས་བདེ་བླག་ཏུ་ཐར་བ་དང་འདྲ། སྔོན་འགྲོ་མང་བ་ལ་མ་སུན་སོ་སོ་ཐ་དད་དུ་ཕུར་ཚུགས་སུ་སྒོམས་ཤིག །ཞག་གསུམ། ཆོས་ཐུན་བཞི་པའོ།། །།དེ་ནས་བྱིན་རླབས་འཇུག་པ་བླ་མའི་རྣལ་འབྱོར་ནི། སྤྱིར་དགེ་བསྙེན་ཞུས་པའི་སློབ་དཔོན། དགེ་ཚུལ་ཞུས་པའི་མཁན་པོ་དང་སློབ་དཔོན་སོགས་འདུལ་བའི་ལུགས་ཀྱི་བླ་མ་ལྔ་པོ་དེ། མཁན་པོ་ལ་ཕའི་འདུ་ཤེས་བཞག་པར་བྱའོ། །ཞེས་སྙིང་བརྩེ་བ་དང་བཀུར་སྟིའི་ཡུལ་ཙམ་ལས་མ་གསུངས་ཀྱང་། གྲུབ་མཐའ་གཞན་གྱི་ལུགས་ལ་དབང་དང་པོར་ཆོས་སྒོར་བཙུད་པ་དེ་དྲིན་ཆེ་བ། སྐུ་ཕུད་ལེན་མི་དེ་རྩ་བའི་བླ་མར་འཛིན། དེ་ལ་ཞན་ཕོ་རུས་ཀྱི་སྒོ་ནས་དད་འདུན་བྱེད་སྲོལ་སྣང་། བྱང་ཆུབ་སེམས་ཁ་དཔའི་སྡོམ་པ་གནང་མཁན་དེ་དགེ་བའི་བཤེས་གཉེན་ཡིན་པས། དེ་ལ་བཀུར་སྟི་བྱ་བར་གསུངས་པ་ཙམ་ལས་མེད་དེ། དེང་སང་བྱུང་སྡོམ་གྲགས་ཆུང་བར་སྣང་། སྔགས་སྡོམ་ནི་དབང་བཞི་རྫོགས་པར་བསྐུར་མཁན་དེ་ཡིན། གསང་སྔགས་ལུགས་ལ། བླ་མ་དང་ནི་ཡི་དམ་ལྷ། །ཐ་དད་པར་ཡང་མ་ལྟ་ཞིག །ཅེས་བླ་མ་ཡི་དམ་དབྱེར་མེད་དུ་གསུངས། དེ་
ལ་བསྟན་སྤྱིའི་ལུགས་ལ། སོ་ཐར་བྱང་སྡོམ་སྔགས་སྡོམ་གསུམ་ཀ་བླ་མ་གཅིག་ལ་ཐོབ་ན་དེ་སུམ་ལྡན་རྡོ་རྗེ་འཛིན་པ་ཟེར། སྔགས་ལུགས་ལ་དབང་བསྐུར་བ་དང་། རྒྱུད་བཤད་པ་དང་། མན་ངག་གནང་བ་དང་གསུམ་ཀ་ཚང་ན། སུམ་ལྡན་རྡོ་རྗེ་འཛིན་པ་ཡིན། དེ་གསུམ་གང་གཙོ་ཆེ་ན། ས་ལུགས་སོགས་ལ་དབང་བསྐུར་བ་གཙོ་ཆེ་བར་བཤད་དེ། བཀའ་བརྒྱུད་པའི་ལུགས་ལ་དབང་ནི་གསང་སྔགས་ལ་འཇུག་པའི་སྒོ་ཡིན། རྒྱུད་ནི་བཤད་པ་ཡིན། གསང་སྔགས་ཟབ་མོའི་རང་སེམས་ངོ་སྤྱོད་པས་ཉམས་རྟོགས་གང་ལ་སྐྱེས་པ་དེ་རྩ་བའི་བླ་མར་འཛིན། དེ་ཡང་ཆོས་ཐོབ་གྲངས་མང་བ་དང་ཁྲིད་དབང་ཐོབ་གྲངས་མང་བར་མི་འཛིན། གང་ལ་བསྟེན་ནས་ཕྱག་རྒྱ་ཆེན་པོའི་རྟོགས་པ་མཆོག་སྐྱེས་པ་དེ་རྩ་བའི་བླ་མར་འཛིན། །དེ་ལ་དངོས་སུ་མ་མཇལ་ན་ཡང་དེའི་མཚན་ཐོས་པ་ཙམ་གྱིས་ཐེ་ཚོམ་མེད་པའི་དད་པ་བཟོད་གླགས་མེད་པ་སྐྱེས་ན་དེ་ཉིད་ལ་རྩེ་གཅིག་ཏུ་གསོལ་བ་བཏབ་ན་རྟོགས་པ་སྐྱེ་བས། དྭགས་པོ་དང་དུས་མཁྱེན་རྒོད་ཚང་བ་རྣམས་ཀྱིས་ཀྱང་མ་མཇལ་བ་རྣམས་ཀྱིས་གསོལ་བ་ཐོབ་དང་རྟོགས་པ་སྐྱེ་ཞིང་དེ་རྩ་བའི་བླ་མར་འགྱུར་རོ། །ཞེས་ཞལ་བཞེས་ཡོད་པ་ཡིན་གསུངས། དེའི་
གནད་ཀྱིས་བདག་གི་མན་ངག་བྱིན་ཀྱང་ཚེ་གཅིག་ལ་མཆོག་གི་དངོས་གྲུབ་སྦྱིན་པའི་ནུས་པ་མེད་པའི་ཕྱིར། ཨོ་རྒྱན་རིན་པོ་ཆེའམ་གྲུབ་ཆེན་ཀརྨ་པཀྵི་གཉིས་ཆོས་འདིའི་བཀའ་བབས་རྩ་བར་སྣང་བས། རྩ་བའི་བླ་མར་ཟུང་ལ་གསོལ་བ་ཐོབ་ཅིག །ཁྱད་པར་ཚེ་འདིར་ཐོས་བསམ་སྒོམ་གསུམ་གྱི་བཀའ་དྲིན་ཐོབ་པའི་བླ་མ་ཐམས་ཅད་ཀྱང་། རྩ་བའི་བླ་མ་དེར་བསྡུས་ཏེ་བསྒོམ་པ་མན་ངག་ཡིན་ནོ། །དེ་ལ་རང་ཉིད་སྐད་ཅིག་དྲན་རྫོགས་སུ་ཡི་གེ་དྲུག་པ་བརྗོད་མ་ཐག་ཐུགས་རྗེ་ཆེན་པོ་རྒྱལ་བ་རྒྱ་མཚོ་ཡབ་རྐྱང་གཙོ་བོ་རྐྱང་པའི་སྐུར་ཝལ་གྱིས་བསྒོམ་པའི། སྤྱི་གཙུག་ཁྲུ་གང་ཙམ་གྱི་ནམ་མཁར་པདྨ་དང་ཟླ་བའི་གདན་ལ་རྩ་བའི་བླ་མ་གྲུབ་ཆེན་ཀརྨ་པ་དང་དབྱེར་མེད་པའི་ཐུགས་རྗེ་ཆེན་པོ་རྒྱལ་བ་རྒྱ་མཚོ་ཡབ་ཡུམ་ཞལ་སྦྱོར༔ དེ་ཡི་སྤྱི་བོར་མཁས་གྲུབ་ལུང་རིགས་ཉི་མ། དེ་ཡི་སྤྱི་བོར་རྒྱལ་མཆོག་ཆོས་དབྱིངས་རྡོ་རྗེ་བསྒོམས་ཏེ། འདི་པ་ལས་ཐུགས་རྗེ་ཆེན་པོའི་བསྒོམ་ལུང་ཐོབ་པའི་ཕྱིར་རོ། །དེའི་སྤྱི་བོར་དྲིན་ཆེན་ཆོས་ཀྱི་དབང་ཕྱུག་ནས་བཟུང་སྟེ་རས་ཆེན་པའི་བར་ཐོ་བརྩེགས་སུ་བསྒོམ། དེ་ཡན་ཁ་ཊོ་ལྟར་རྩེ་གསུམ་དུ་གྱུར་པའི་དབུས་མར། ཟངས་རི་རས་པ། རས་ཆུང་
བ། ཏེ་ཕུ་པ། གྲུབ་པའི་རྒྱལ་མོ། པདྨ་འབྱུང་གནས། ཐུགས་རྗེ་ཆེན་པོ། སྣང་བ་མཐའ་ཡས་རྣམས་གྱེན་དུ་ཐོ་བརྩེགས། གཡས་ངོས་སུ་རྫོགས་རིམ་སྐུ་གསུམ་ངོ་སྤྲོད་ཀྱི་བརྒྱུད་རིམ་ཡིན་ཏེ། རྗེ་དུས་གསུམ་མཁྱེན་པ། དྭགས་པོ། མི་ལ། མར་པ། ནཱ་རོ། ཏེ་ལོ། རྡོ་རྗེ་འཆང་རྣམས་ཐོ་བརྩེགས། གཡོན་ངོས་སུ། བལ་པོའི་པཎྜི་ཏ་ཨ་སུ། རྒྱ་གར་གྱི་པཎྜི་ཏ་བཛྲ་པཱ་ནི། མེ་ཏྲི་པ། གྲུབ་ཆེན་ཛ་ལེན་དྷ་ར་ཡ། པདྨ་བཛྲ་དེ་རྣམས་ཐོ་བརྩེགས་སུ་བསྒོམ། གཞན་ཡང་མཐའ་སྐོར་དུ་གྲུབ་ཆེན་བརྒྱད་ཅུ་རྗེ་འབངས་ཉེར་ལྔ། གཏེར་སྟོན་བརྒྱ་རྩ་སོགས་རྒྱ་བོད་ཀྱི་རིག་འཛིན་ཐམས་ཅད་སྤྲིན་འཁྲིགས་པ་ལྟར་བསྒོམ། དེ་རྣམས་ཀྱི་སྤྱི་བོར་ཨོཾ་དཀར་པོ། མགྲིན་པར་ཨཱཿདམར་པོ། ཐུགས་ཀར་ཧཱུྃ་མཐིང་ཁ། དེ་ལས་འོད་འཕྲོས་འོག་མིན་ནམ་བདེ་བ་ཅན་ནས་ཡེ་ཤེས་པ་སྤྱན་དྲངས་ལ། གཉིས་མེད་དུ་སོ་སོ་ལ་ཐིམ་པར་བསམས་ལ། ཧཱུྃ། བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །ཞེས་པ་ནས། ཟབ་ཅིང་རྒྱ་ཆེར་བསྟན་དུ་གསོལ། །ཞེས་པའི་བར་གྱི་དོན་ཡིད་ལ་དྲན་བཞིན་བརྗོད། དེ་ནས་གསོལ་འདེབས་ནི། ཆོས་སྐུ་སྣང་བ་མཐའ་
ཡས་ལ་གསོལ་བ་འདེབས་སོ། །ནས་རས་ཆུང་རྡོ་རྗེ་གྲགས་པའི་བར་དང་། །འཇིག་རྟེན་དབང་ཕྱུག་ལ་གསོལ་བ་འདེབས་སོ། །ནས་ཟངས་རི་རས་པའི་བར། །དྲུག་པ་རྡོ་རྗེ་འཆང་ལ་གསོལ་བ་འདེབས་སོ། །ནས་འགྲོ་མགོན་རས་པ་ཆེན་པོ་ཡན་ཆད་གཏོར་བསྔོས་ལྟར་གསོལ་བ་འདེབས་ནས། མཚུངས་མེད་མི་བསྐྱོད་རྡོ་རྗེ། གར་དབང་དཀོན་མཆོག་ཡན་ལག །རྗེ་བཙུན་དབང་ཕྱུག་རྡོ་རྗེ། ཀུན་མཁྱེན་ཆོས་ཀྱི་དབང་ཕྱུག །རྒྱལ་མཆོག་ཆོས་དབྱིངས་རྡོ་རྗེ། མཁས་གྲུབ་ལུང་རིགས་ཉི་མ། དྲིན་ཆེན་རྩ་བའི་བླ་མ་ལ་གསོལ་བ་འདེབས་སོ། །ཡི་དམ་རྒྱལ་བ་རྒྱ་མཚོ་ལ་གསོལ་བ་འདེབས་སོ། །མཁའ་འགྲོ་གསང་བ་ཡེ་ཤེས་ལ་གསོལ་བ་འདེབས་སོ། །ཆོས་སྐྱོང་མ་མགོན་ལྕམ་དྲལ་ལ་གསོལ་བ་འདེབས་སོ། །རང་སེམས་གནས་ལུགས་རྟོགས་པར་བྱིན་གྱིས་རློབས་ཤིག །གེགས་དང་གོལ་ས་མེད་པར་བྱིན་གྱིས་རློབས་ཤིག །རྩ་ཁམས་གནས་སུ་དག་པར་བྱིན་གྱིས་རློབས་ཤིག །རྩ་མདུད་རང་སར་གྲོལ་བར་བྱིན་གྱིས་རློབས་ཤིག །རླུང་རྣམས་དྷ་ཏིར་ཚུད་པར་བྱིན་གྱིས་རློབས་ཤིག །བདེ་དྲོད་མེ་ལྟར་འབར་བར་བྱིན་གྱིས་རློབས་ཤིག །འཕོ་མེད་
བདེ་ཆེན་ཐོབ་པར་བྱིན་གྱིས་རློབས་ཤིག །འཇའ་ལུས་མཁའ་སྤྱོད་འགྲུབ་པར་བྱིན་གྱིས་རློབས་ཤིག །ཚེ་གཅིག་སངས་རྒྱས་ཐོབ་པར་བྱིན་གྱིས་རློབས་ཤིག །ཅེས་པ་འདི་རྒྱས་པར་བླ་མ་རེ་རེ་ནས་སྦྱར། འབྲིང་གསུམ་བཞི་ལྔ་དྲུག་པོ་ན་སྦྱོར། བསྡུས་ན་མཇུག་ཏུ་གཅིག་གིས་ཆོག །དེ་ནས་དབང་ཞུ་བར་གསོལ་བ་གདབ་པ་ནི། པདྨ་དབང་གི་དཀྱིལ་འཁོར་དུ། །མགོན་པོ་གཟི་བརྗིད་འོད་དཔག་མེད། །རྒྱལ་སྲས་ཚོགས་དང་བཅས་པ་ལ། །དབང་བསྐུར་ཡོངས་སུ་རྫོགས་པ་ལྟར། །དེ་བཞིན་བླ་མ་ཁྱེད་རྣམས་ཀྱིས། །བདག་ལ་དབང་བསྐུར་མཛད་དུ་གསོལ། །ཞེས་ལན་གསུམ་གསོལ་བ་བཏབ་པས། བརྒྱུད་པའི་བླ་མ་རྣམས་ཀྱི་སྐུ་ལས། ཟག་མེད་ཡེ་ཤེས་ཀྱི་བདུད་རྩི་བབས་པས། གོང་མ་གོང་མའི་བདུད་རྩི་འོག་མ་འོག་མའི་ཚངས་བུག་ནས་སྐུའི་དབྱིབ་བརྒྱུད་ཅིང་བབས་པས་བརྒྱུད་པ་གསུམ་གྱི་བདུད་རྩི་རས་ཆེན་པའི་སྤྱི་བོ་ནས་ཞུགས། རིམ་པར་བབས་པས་རྩ་བའི་བླ་མ་རྒྱལ་བ་རྒྱ་མཚོའི་སྐུར་གསལ་བའི་སྤྱི་བོ་ནས་ཞུགས། སྐུ་གང་ཞབས་གཡས་ཀྱི་མཐེ་བོང་ནས་ངང་རྒྱང་རྒྱང་བབ་པ་རང་གི་ཚངས་བུག་ནས་ཞུགས་ཏེ། ལུས་ཀྱི་ནང་ཐམས་ཅད་ཡེ་ཤེས་ཀྱི་བདུད་
རྩིས་གང་། ལུས་ཀྱི་ནད་གདོན་སྡིག་སྒྲིབ་ཐམས་ཅད་ནག་ནུར་གྱིས་འོག་སྒོ་དང་རྐང་མཐིལ་ནས་ཐོན། སྐུ་བུམ་པ་ཆུ་ཡི་དབང་ཐོབ། ཆུའི་ལྷག་མ་ཡར་ལུད་པ་རང་གི་སྤྱི་བོར་རིགས་བདག་འོད་དཔག་མེད་ཀྱི་དབུ་བརྒྱན་པར་བསྒོམ་མོ། །དེའི་བརྒྱུད་པའི་བླ་མ་ཐམས་ཅད་རྩ་བའི་བླ་མ་རྒྱལ་བ་རྒྱ་མཚོའི་སྐུ་ལ་ཐིམ། ཡབ་ཡུམ་སྙོམས་འཇུག་མཛད་པའི་སྒྲས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་སྤྱན་དྲངས་ཏེ་ཞལ་དུ་ཞུགས་ནས་བདུད་རྩི་བྱང་སེམས་ཀྱི་ངོ་བོར་ཞུ་བ། ཡབ་ཀྱི་རྡོ་རྗེའི་སྒྲུབ་ནས་ཡུམ་གྱི་པདྨར་འཕྲོས་པས། ཡུམ་གྱི་སྐུ་ལུས་ཀྱིས་ལྷ་ཚོགས་མཆོད་ཅིང་ཡབ་ཡུམ་བྱང་སེམས་དཀར་དམར་འདྲེས་པའི་རྒྱུན་རང་གི་ཁའི་ནང་དུ་བབས་པས། ལུས་ཀྱི་རྩ་སྟོང་ཕྲག་བདུན་ཅུ་རྩ་གཉིས་གང་། ངག་གི་སྒྲིབ་པ་དག་ནས་གསང་བའི་དབང་ཐོབ་པར་བསྒོམ་མོ། །དེ་ནས་སྤྱི་བོའི་བླ་མ་ཐུགས་རྗེ་ཆེན་པོ་ཡུམ་ཕག་མོ་གཉིས་པ་འཕྲོས་ཏེ། བདག་ཉིད་ཐུགས་རྗེ་ཆེན་པོ་གསལ་བ་ལ་འཁྱུད་ཅིང་། རྡོ་རྗེ་དང་པདྨ་སྦྱོར་བས་བདེ་བ་བསྐུལ་ཏེ། སྤྱི་བོའི་ཧཾ་ཡིག་ལེས་བྱང་སེམས་བབ་སྟེ། སྤྱི་བོ་མགྲིན་པ་སྙིང་ཁ་ལྟེ་བ་བཞིར་དགའ་བ་དང་། མཆོག་དགའ་དང་དགའ་
བྲལ་གྱི་དགའ་བ་ལྷན་ཅིག་སྐྱེས་པའི་དགའ་བ་མྱོང་། སླར་ཡང་གསང་གནས་ཀྱི་རྩེ་ནས་ཐིག་ལེ་གྱེན་དུ་ལོག་པས་རྩ་གནས་བཞིར་མས་བརྟན་གྱི་དགའ་བ་བཞི་ཉམས་སུ་མྱོང་སྟེ། བདུད་རྩི་དྭངས་མ་སྤྱི་བོའི་ཧཾ་ཡིག་ལ་ཐིམ། དེས་སེམས་ཀྱི་སྒྲིབ་པ་དག་ནས་ཤེས་རབ་ཡེ་ཤེས་ཀྱི་དབང་ཐོབ། དེ་ནས་བླ་མ་ཡབ་ཡུམ་འོད་དུ་ཞུ་ནས་རང་གི་སྨིན་མཚམས་སུ་ཐིམ་པས། རྩ་བ་དང་བརྒྱུད་པའི་བླ་མ་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་དང་། རང་གི་སེམས་མ་བཅོས་པར་མཉམ་པར་བཞག་གོ །འདི་ནི་ཏིང་ངེ་འཛིན་གྱི་དབང་བཞི་ཟབ་མོ་ཡིན་པས་ཐུན་བཞིའམ་དྲུག་ཏུ་བསྒོམ་སྟེ། དེ་དག་བསྒོམ་པའི་ཚེ་གསོལ་འདེབས་ཀྱི་སྙིང་པོ་ཡི་གེ་དྲུག་པ་བཟླས་ཏེ། སྤྲུལ་པའི་རྒྱལ་པོས། ཨོཾ་གྱིས་སྐུ་ལ་གསོལ་བ་འདེབས། མས་གསུང་ལ་གསོལ་བ་འདེབས། ཎིས་ཐུགས་ལ་གསོལ་བ་འདེབས། པད་ཀྱིས་ཡོན་ཏན་ལ་གསོལ་བ་འདེབས། མས་ཕྲིན་ལས་ལ་གསོལ་བ་འདེབས། ཧཱུྃ་གིས་སྐུ་གསུང་ཐུགས་ཡོན་ཏན་ཕྲིན་ལས་ལ་གསོལ་བ་འདེབས་སོ། །བདེ་བར་གཤེགས་པའི་སྐུ་གསུང་ཐུགས་ཡོན་ཏན་ཕྲིན་ལས་ལྔ་ལ་གསོལ་བ་འདེབས་པས་བྱིན་རླབས་ཚུར་ལ་འབྱུང་བ་ཡང་ཡི་གེ་དྲུག་པ་བཟླས་པས་
འབྱུང་ངོ་། །ཞེས་དང་། ཨོཾ་ལྷ་དབང་ལུས་ལ་དབང་བསྐུར་བར་བྱེད། །མས་གསང་དབང་ངག་ལ་དབང་བསྐུར་བར་བྱེད། །ཎིས་ཆོས་དབང་སེམས་ལ་བསྐུར་བར་བྱེད། །པད་བུམ་དབང་གིས་ལུས་སྨིན་པར་བྱེད། །མེས་གསང་དབང་གིས་ངག་སྨིན་པར་བྱེད། །ཧཱུྃ་ཤེས་རབ་ཡེ་ཤེས་ཀྱི་དབང་གིས་སེམས་སྨིན་པར་བྱེད་དོ། །དེ་ལྟར་དབང་གི་ལུས་ངག་ཡིད་གསུམ་སྨིན་པར་བྱེད་པ་ཡི་གེ་དྲུག་པ་བཟླས་པ་ལས་འབྱུང་ངོ་། །ཞེས་གསུངས་པ་དང་། པདྨ་ཟབ་པའི་རྒྱུད་ཀྱི་རྒྱལ་པོ་ལས་དབང་གི་ལེའུ་དཀྱིལ་ནས། བཟླས་བརྗོད་རྒྱུན་དུ་བཟླས་པའོ། །ཞེས་གསུངས་པ་དང་། དད་པ་དྲག་པོས་བླ་མ་བསྟེན། ཞེས་གསུངས་པའི་དོན་ཡིན། གསང་སྔགས་བྱིན་རླབས་ཀྱི་ལམ། བྱིན་རླབས་མོས་གུས་ཀྱི་ལམ་༔ མོས་གུས་གསོལ་འདེབས་ཀྱི་ལམ། གསོལ་འདེབས་ཀྱི་མན་ངག་བླ་མའི་རྣལ་འབྱོར་ཡིན། བླ་མའི་རྣལ་འབྱོར་ལ་རིགས་མང་ན་ཡང་། འདི་བླ་མེད་ཐུན་མོང་མ་ཡིན་པའི་ལུགས་ཡིན་པས། འདི་ལ་ཐུན་དྲུག་གམ་བཞིར་བསྒོམ་ཞིང་ཞག་གསུམ་བསྒོམ་པར་བྱའོ། །ཆོས་ཐུན་ལྔ་པ་ཡིན་ནོ།། །།བརྩོན་པས་ཉམས་སུ་ལོངས་མཛོད་ཅིག །ད་ནི་
དངོས་གཞི་ལ་དང་པོ་ཕྱི་ལུས་ཀྱི་སྟོང་ར་བསྒོམ་དགོས་ཏེ། རང་ཡི་དམ་གྱི་ལྷར་བསྒོམ་པ་ལ་ཡང་། བསྐྱེད་རིམ་པ་དང་ཁྱད་ཅིག་ཡོད་དེ། བསྐྱེད་རིམ་པས་རིམ་པར་བསྐྱེད། འདིར་རྫོགས་རིམ་ལུགས་འདི་སྐད་ཅིག་དྲན་རྫོགས་སུ་བསྐྱེད། བསྐྱེད་རིམ་པས། རྡུལ་ཚོན་དང་ཚོམ་བུ་ལ་སོགས་ལྷ་མ་ཡིན་པས་གཅིག་བློས་བཅོས་ནས་བསྒོམས་པས་ཀུན་བརྟགས་ཀྱི་ལྷ་ཟེར་དེའི་གནད་ཀྱིས་ཡེ་ཤེས་སྤྱན་འདྲེན་དབང་བསྐུར་རྒྱས་གདབ་སོགས་མི་དགོས་ཏེ། རྫོགས་རིམ་ལུགས་ལ་རང་ལུས་ཐིག་ལེ་རླུང་གསུམ་པོ་ཡེ་ནས་ལྷའི་དཀྱིལ་འཁོར་དུ་གྲུབ། །གྲུབ་པ་དེ་ཡིན་པ་ལས་ཡིན་པར་གསལ་འདེབས་པས། ཡོངས་གྲུབ་ཀྱི་ལྷ་ཟེར། དེའི་གནད་ཀྱིས་ཡེ་ཤེས་སྤྱན་འདྲེན་དབང་བསྐུར་རྒྱས་གདབ་སོགས་མི་དགོས་ཏེ། ཨོཾ་ཨཱཿཧཱུྃ། ཞེས་པའི་བརྗོད་པ་ཙམ་གྱིས་ལྷར་བསྒོམ་པ་ཡིན་པས། རང་ཉིད་སྐད་ཅིག་གིས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ཡབ་ཡུམ་མམ་གཙོ་བོ་རྐྱང་པར་བསྒོམ། འཁོར་གྱི་གྲངས་ལ་ངོས་བཟུང་མེད་དེ། སྣོད་ཀྱི་འཇིག་རྟེན་གཞལ་ཡས་ཁང་། བཅུད་ཀྱི་སེམས་ཅན་ཐམས་ཅད་ཐུགས་རྗེ་ཆེན་པོའི་ལྷ་ཚོགས་སུ་གསལ་གདབ། དེ་ནས་རང་ཕྱི་ཐུགས་རྗེ་ཆེན་པོའི་སྐུ་དར་དམར་གྱི་གུར་
ཕུབ་པ་ལྟར་ལམ་མེར་བསྒོམ། ལུས་ཀྱི་ནང་སྟོང་པ་ཕྲུ་མ་ཕུས་བཏབ་པ་ལྟར་སྟོང་སང་ངེ་བར་བསྒོམ། དབུའི་གཙུག་ཏོར་ནས་ཞབས་ཀྱི་སེན་རྩེའི་ནང་ཡན་ཆད་སྟོང་སང་ངེ་བསྒོམ། ཕྱག་མཛུབ་དང་མིག་དང་རྣ་བའི་རྩེ་ཚུན་ཆད་སྟོང་སེང་ངེ་བསྒོམ། རང་གི་མིག་ལམ་དུ་སྣང་བའི་ས་རྡོ་རི་བྲག་ཅི་དང་ཅི་མཐོང་བ་ཐམས་ཅད་ཀྱང་བདག་དང་འདྲ་བར་ནང་སྟོང་སེང་ངེ་བ། ཕྱིའི་གཟུགས་བརྙན་དེ་རྣམས་ཀྱང་འཇའ་ཚོན་གྱི་གཟུགས་ལྟར་དངོས་པོར་མ་གྲུབ་སྙམ་དུ་བྱའོ། །དེ་ལྟར་གསལ་ཐེབ་ནས་རང་ལུས་དེ་ཡང་རེས་འགའ་ཇེ་ཆེ་རི་བྲན་ཙམ། རི་རབ་ཙམ། སྟོང་གསུམ་ཙམ། ནམ་མཁའ་གང་བ་ཙམ་བསྒོམ། རེས་འགའ་ཇེ་ཆུང་རང་ལུས་ཙམ། གྲུ་རེ་ཙམ། མཐོ་རེ་ཙམ། སོར་རེ་ཙམ། ཡུངས་འབྲུ་དང་སྐྲའི་རྩེ་ཙམ་བསྒོམ། དེ་ཐམས་ཅད་ལ་ནང་སྟོང་པ་སྔར་ལྟར་བསྒོམ། དེ་ལྟར་སྟོང་ར་བཅའ་བ་འདིས། དམིགས་པ་མི་གསལ་བ་ཐམས་ཅད་གསལ་བར་བྱེད། དམིགས་པ་མི་ཟིན་པ་ཟིན་པར་བྱེད། སེམས་མི་གནས་པ་གནས་པར་བྱེད། ནང་སྟོང་པ་ཉིད་དང་བདག་མེད་རྟོགས་པའི་རྐྱེན་བྱེད་པ་ཡིན་ནོ། །ཕྱི་ལུས་ཀྱི་སྟོང་ར་འདི་ལ། གསང་ཁྲིད་རིམ་ལྔ་
དང་རྗེ་དྭགས་པོའི་གསུང་འགའ་ཞིག་ལས། ལྷ་འདི་བསྒོམ་མ་གསུངས་པར་ཐ་མལ་གྱི་ལུས་འདི་ཡེ་ནས་ལྷ་དམ་ཚིག་པ་ཡིན་པར་དགོངས་ནས། ཐ་མལ་གྱི་ལུས་ཉིད་ལ་སྟོང་ར་བསྒོམ་པར་གསུངས། བདེ་མཆོག་ལ་མོས་པས་བདེ་མཆོག །ཕག་མོ་ལ་མོས་པས་ཕག་མོ། དགྱེས་རྡོར་ལ་མོས་པས་དགྱེས་རྡོར་སོགས་རང་གང་མོས་སུ་བསྒོམ་པར་མཛད་དེ། ཆོས་དྲུག་སོགས་ཀྱང་བླ་མེད་རྒྱུད་སྡེ་སྤྱིའི་རྫོགས་རིམ་ཡིན་པའི་དོན་དུ་སྣང་། འོན་ཀྱང་ད་ལམ་གཞན་ལ་ཁ་གཡར་མི་དགོས། རྒྱལ་བ་རྒྱ་མཚོ་ཉིད་ལ་རྫོགས་རིམ་རྩ་རླུང་གི་གདམས་པ་ཟབ་མོ་ཡོད་པས་དེ་ཉིད་ཁོ་ན་བརྗོད། སྐུ་གསུམ་ངོ་སྤྲོད་སོགས་ནི་འདིའི་རྫོགས་རིམ་ཡིན་མོད་ཀྱང་། དུས་ཕྱིས་བཀའ་བརྒྱུད་འདིའི་ཡི་དམ་ཕག་མོ་དར་དྲགས་པས། སྟོང་རའི་སྐབས་སུ་ཕག་མོ་མཛད་འདུག་ཀྱང་། རང་རེ་རྒྱལ་བ་རྒྱ་མཚོ་ཡི་དམ་ཡིན་པས་འདི་ཉིད་བསྒོམ་པ་གལ་ཆེ། སྟོང་ར་ཡི་དམ་གྱི་སྐུ་སྟོང་པ་འོད་ཀྱི་རང་བཞིན་དེ་ཉིད་ཀྱང་། ལན་རེ་ཙམ་གསལ་བས་མི་ཆོག །ནམ་དྲན་དྲན་ལ་ཤིན་ཏུ་གསལ་བ་བར་སྣང་ལ་འཇའ་ཤར་བ་ལྟར་དྲན་རྫོགས་སུ་ལམ་ལམ་མ་བྱུང་གི་བར་དུ་བསྒོམ་དགོས། སྔ་མ་རྣམས་མ་གསལ་བར་ཕྱི་མ་རྣམས་
བསྒོམས་ཀྱང་། ཟས་མ་ཞུ་བའི་སྟེང་དུ་ཟས་ཟོས་པ་ལྟར་ཕན་པ་མེད་པའི་སྟེང་དུ་གནོད་པ་འོང་། དེས་ན་ཕྱི་ལུས་ཀྱི་སྟོང་ར་འདི་ཡང་ཞག་གསུམ་སྒོམས་ཤིག །བདག་གིས་མགོ་མཇུག་ཐམས་ཅད་དུ། ཡིད་ཆེས་པའི་ལུང་འདྲེན་མང་དུ་ཡོད་ཀྱང་། ལུང་འདྲེན་བྲིས་ན་དགེ་བའི་བཤེས་གཉེན་རྣམས་ཐུགས་དགྱེས། ཐེ་ཚོམ་ཅན་རྣམས་ཐེ་ཚོམ་ཆོད་ཀྱང་། རྨོངས་པ་རྣམས་ལུང་འདྲེན་རང་གིས་བསྒྲིབས་ནས་མི་གོ་བའི་རྐྱེན་དང་། ཧ་ཅང་གླེགས་བམ་ཁ་ལྗིད་པས་སྐྲག་པར་འགྱུར་དོགས་པས། འདིར་ངག་ཁྲིད་ཀྱི་ཚབ་ཤིན་ཏུ་གོ་སླ་བར་བཀོད་པ་ཡིན་ནོ། །དེ་ཡང་རང་གཞུང་ལུགས་ཅུང་ཟད་མ་བྲིས་ན་ཡང་རྩ་བ་འཆུག་དོགས་པའི་སྐྱོན་དུ་འགྱུར་བས། ལུང་ཅུང་ཟད་རེ་ཡང་བཀོད་དེ། པདྨ་རྒྱལ་པོའི་རྒྱུད་ལས་རང་ལུས་ལྷ་རུ་གསལ་བ་དང་། །ང་རྒྱལ་ཕྲ་བ་ཙམ་ཞིག་བསྒོམ། །ཞེས་དང་། པདྨ་ཟབ་པའི་རྒྱུད་ལས། དཀྱིལ་འཁོར་མཎྜལ་ལྟར་བསྒོམ་པ་དང་། དཀྱིལ་འཁོར་དུ་བསྒོམ་པ་དང་། རང་གི་ཕུང་པོ་ལ་བསྒོམ་པ་གསུམ་མཆིས་ན། འདིར་ཇི་ལྟར་བསྒོམ་པར་བྱ། ཞེས་ཞུས་པ་དང་། གཙོ་བོས་བཀའ་སྩལ་པ། འདིར་ནི་རང་གི་ཕུང་པོར་
བསྒོམ། ཞེས་བཀའ་སྩལ་ཏོ། རང་ཉིད་སྤྱན་རས་གཟིགས་སུ་བསྒོམ། །ཞེས་གསུངས་པའི་དོན་ཡིན་ནོ། །ལྷ་ཡེ་ཤེས་པ་ཕྱི་རོལ་ནས་སྤྱན་འདྲེན་ཅིང་མཆོད་ནས་གཤེགས་པ། བྱ་སྤྱོད་རྣལ་འབྱོར་རྒྱུད་གསུམ་སྟེ་གསང་སྔགས་ཕྱི་པ་ཞེས་བྱ། རང་ལུས་དམ་ཚིག་སེམས་དཔའ་རང་སེམས་ཡེ་ཤེས་སེམས་དཔའ་སྟེ། ཐམས་ཅད་རང་གི་སེམས་ཀྱི་ཆོ་འཕྲུལ་རྩ་རླུང་ཐིག་ལེའི་རྟེན་འབྲེལ་ཁོ་ནར་ཤེས་པས། ལྷ་ཡེ་ཤེས་པ་མ་གཤེགས་པར་སངས་རྒྱས་མ་ཐོབ་ཀྱི་བར་དུ་ཕྱག་རྒྱ་སྒོ་གཅད་དུ་བསྒྲུབ་པ་གསང་སྔགས་ནང་པའི་ལུགས་སོ། །དེ་ནས་རྩ་རླུང་བསྒོམས་པའི་ཐོག་མར། རྩ་རླུང་ཐིག་ལེ་གསུམ་བྱིན་གྱིས་བརླབ་པ་གལ་ཆེ་སྟེ། པདྨ་རྒྱལ་པོའི་རྒྱུད་ལས། བྱིན་གྱིས་བརླབས་པ་ཇི་ལྟ་བུ། །ཁྱེད་ཀྱིས་བདག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཉོན་ཅིག་འགྲོ་བའི་མགོན་པོ་ཁྱོད། །རྣལ་འབྱོར་རང་ལ་བྱིན་རླབས་པ། །ཆོས་ལ་འཇུག་པའི་དུས་དག་ཏུ། །འདི་ནི་ངག་ཏུ་བརྗོད་པར་གྱིས། །དཔལ་ལྡན་སངས་རྒྱས་སྐུ་འཆང་བ། །ཞེས་སོགས་རྒྱས་པར་གསུངས་པའི་དོན་ཡིན་པས། བདག་ཉིད་སྐད་ཅིག་གིས་ཐུགས་རྗེ་ཆེན་པོ་རྒྱལ་བ་རྒྱ་མཚོ་ཞལ་
གཅིག་ཕྱག་བཞི་པའི་སྐུར་ལམ་གྱིས་བསྒོམས་ལ། དེའི་སྤྱི་བོར་ཟླ་བའི་སྟེང་དུ་ཨོཾ་དཀར་པོ། མགྲིན་པར་པདྨའི་སྟེང་དུ་ཨཱཋདམར་པོ། ཐུགས་ཀར་ཉི་མའི་སྟེང་དུ་ཧཱུྃ་སྔོན་པོ་བསྒོམ། རང་གི་དཔྲལ་བའི་ཨོཾ་ལས་འོད་ཟེར་དཀར་པོའི་ཚོགས་སྤྲོས་པས། ཕྱོགས་བཅུ་དུས་གསུམ་གྱི་སངས་རྒྱས་སྐུ་བདེ་གཤེགས་རིགས་ཐམས་ཅད་ནམ་མཁའ་གང་བར་སྤྱན་དྲངས་པས། དེ་ཐམས་ཅད་རྣམ་སྣང་སྤྱན་རས་གཟིགས་སྐུ་མདོག་དམར་ལ་དཀར་མདོག་ཅན། ཡུམ་ཕག་མོ་དང་སྦྱོར་བས་ནམ་མཁའ་བར་སྣང་ཐམས་ཅད་གང་། དེ་ཐམས་ཅད་གཙོ་བོ་གཞན་ལས་སྐུ་ཆེ་བ་གཅིག་གི་དྲུང་དུ་བདག་ཉིད་གནས་པར་བསམས་ལ། ངག་ཏུ། དཔལ་ལྡན་སངས་རྒྱས་སྐུ་འཆང་བ། །རྡོ་རྗེ་མི་ཕྱེད་གསུམ་གྱི་སྐུ། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བདག་ལ་བྱིན་གྱིས་བརླབ་ཏུ་གསོལ། །ཨོཾ་ཞེས་ལན་གསུམ་གསོལ་བ་བཏབ་པས། ཡབ་ཡུམ་ཐམས་ཅད་སྙོམས་པར་ཞུགས་པས་ཐམས་ཅད་བདུད་རྩི་བྱང་སེམས་དཀར་པོའི་རང་བཞིན་དུ་ཞུ་ནས། རང་གི་སྤྱི་བོ་ཚངས་པའི་བུ་གའམ་སྨིན་
མཚམས་ནས་ཞུགས་ཏེ་ལུས་ཐམས་ཅད་གང་བས། མ་དག་པའི་རྩ་ཁམས་ཐམས་ཅད་དག་ནས་དག་པ་ཡེ་ཤེས་ཀྱི་རྩ་གསུམ་འཁོར་ལོ་བཞི་གསལ་བར་རྫོགས། རྩ་མདུད་ཐམས་ཅད་རང་བཞིན་གྱིས་གྲོལ་ཏེ། རྩ་དག་པ་སྐུ་རྡོ་རྗེའི་གོ་འཕང་ཐོབ་པར་བསྒོམ། ཡང་རང་གི་མགྲིན་པའི་ཨཱལས་འོད་ཟེར་དམར་པོའི་ཚོགས་འཕྲོས་པས། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་དང་གསུང་པདྨའི་རིགས་ཐམས་ཅད་ནམ་མཁའ་གང་བར་སྤྱན་དྲངས་པས། དེ་ཐམས་ཅད་གསུང་པདྨའི་རིགས་ཀྱི་སྤྱན་རས་གཟིགས་རྒྱལ་བ་རྒྱ་མཚོ་ཡབ་ཡུམ་སྐུ་མདོག་དམར་གསལ་གྱིས་ནམ་མཁའ་བར་སྣང་ཐམས་ཅད་གང་། དེ་ཐམས་ཅད་ཀྱི་གཙོ་བོ་གཞན་ལས་སྐུ་ཆེ་བ། གཅིག་གི་དྲུང་དུ་བདག་ཉིད་གནས་པར་བསམས་ལ་ངག་ཏུ། དཔལ་ལྡན་སངས་རྒྱས་གསུང་འཆང་བ། །རྡོ་རྗེ་མི་ཕྱེད་གསུམ་གྱི་གསུང་། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བདག་ལ་བྱིན་གྱིས་བརླབ་ཏུ་གསོལ། །ཨཱཞེས་ལན་གསུམ་གསོལ་བ་བཏབ་པས། དེ་ཐམས་ཅད་ཡབ་ཡུམ་སྦྱོར་བ་མཛད་པས། ཐམས་ཅད་བདུད་རྩི་བྱང་
སེམས་དམར་པོའི་རྣམ་པར་ཞུ་ནས་རང་གི་ཁ་ནས་ཞུགས་ཏེ་ལུས་ཐམས་ཅད་གང་ནས། མ་དག་པའི་རླུང་སྙིགས་མ་དུག་བཅས་ཐམས་ཅད་སྦྱངས་ནས། དག་པ་ཡེ་ཤེས་ཀྱི་རླུང་དུ་གནས་འགྱུར། རླུང་དག་པ་གསུང་རྡོ་རྗེའི་གོ་འཕང་མངོན་དུ་བྱས་པར་བསྒོམ། ཡང་རང་གི་ཐུགས་ཀའི་ཧཱུྃ་ལས་འོད་ཟེར་སྔོན་པོའི་ཚོགས་འཕྲོས་པས། ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་དང་ཐུགས་རྡོ་རྗེ་རིགས་ཀྱི་སངས་རྒྱས་ཐམས་ཅད་སྤྱན་དྲངས་ཏེ། དེ་ཐམས་ཅད་མི་བསྐྱོད་པ་རྡོ་རྗེ་རིགས་ཀྱི་སྤྱན་རས་གཟིགས་ཡབ་ཡུམ་གྱིས་ནམ་མཁའ་བར་སྣང་ཐམས་ཅད་གང་། དེ་ཐམས་ཅད་ཀྱི་དབུས་གཙོ་བོ་གཞན་ལས་སྐུ་ཆེ་བ་གཅིག་གི་དྲུང་དུ་རང་ཉིད་གནས་པར་བསམས་ལ། དཔལ་ལྡན་སངས་རྒྱས་ཐུགས་འཆང་བ། །རྡོ་རྗེ་མི་ཕྱེད་གསུམ་གྱི་ཐུགས། །བདག་ལ་བྱིན་གྱིས་བརླབ་ཏུ་གསོལ། །ཕྱོགས་བཅུར་བཞུགས་པའི་སངས་རྒྱས་རྣམས། །རྡོ་རྗེ་མི་ཕྱེད་གསུམ་བསྒོམས་པས། །བདག་ལ་བྱིན་གྱིས་བརླབ་ཏུ་གསོལ། །ཧཱུྃ་ཞེས་ལན་གསུམ་གསོལ་བ་བཏབ་པས། ཐམས་ཅད་ཡབ་ཡུམ་སྦྱོར་བ་མཛད་པས་བདུད་རྩི་བྱང་སེམས་སྔོན་པོའི་རྣམ་པར་ཞུ་སྟེ། རང་གི་སྙིང་ཁ་ནས་
ཞུགས་ཏེ་ལུས་ཐམས་ཅད་གང་བས། མ་དག་པའི་ཐིག་ལེའི་ཁམས་སྦྱངས་ནས་དག་པ་བདེ་ཆེན་འཛག་བྲལ་གྱི་ཐིག་ལེར་གནས་འགྱུར། ཐིག་ལེ་དག་པ་ཐུགས་རྡོ་རྗེའི་གོ་འཕང་མངོན་དུ་བྱས་པར་བསྒོམ། །གསོལ་འདེབས་ཀྱི་ཚིག་དེ་དག་རྒྱུད་ཚིག་ཡིན་ཅིང་གསང་འདུས་སོགས་ཕ་རྒྱུད་རྣམས་ནས་གནས་གསུམ་བྱིན་རླབས་འདི་འདྲ་ལ་ཁད་ལ། འདི་བས་རྒྱས་ཙམ་འབྱུང་མོད་ཀྱང་། འདི་ནི་བདག་ཐུགས་རྗེ་ཆེན་པོ་རྒྱལ་བ་རྒྱ་མཚོའི་ཆོས་ལ་མོས་འདུན་དྲག་པོ་སྐྱེས་ནས། ཅུང་ཟད་ཙམ་སྒྲུབ་པའི་མགོ་བརྩམས་སྐབས། རྨི་ལམ་དུ་འདི་ལྟར་བསྒོམ་ཞིང་འདི་ལྟར་གསོལ་བ་བཏབ་པས། ཇི་ལྟར་བསྒོམས་པ་དེ་མངོན་སུམ་དུ་གྱུར་ཏེ་སོང་བ་ཤིན་ཏུ་གསལ་བ་ཞིག་རྨིས་པས། ཆོས་ལ་ཞུགས་པའི་ཐོག་མར་རྒྱུད་བྱིན་གྱིས་རླབས་པའི་མཚན་མ་ཡིན་པར་མངོན། དེས་ན་འདི་རྒྱུད་རྒྱ་གཞུང་གི་དོན་ཡང་ཡིན་ལ། བདག་རང་གི་རྟོགས་ཆོས་ཀྱང་ཡིན་བྱིན་རླབས་ཤིན་ཏུ་ཆེ་བ་ཡིན་པས་འདི་ཞག་གསུམ་བསྒོམས་ལ། རྒྱུན་དུ་ཡང་སྐབས་སུ་དམིགས་པ་ཐུན་རེ་བསྒོམས་ན་བར་ཆད་སེལ་ཞིང་བྱིན་རླབས་ངེས་པར་འཇུག་པ་ཡིན་ནོ། །དེ་ཅིའི་ཕྱིར་ཞེ་ན། རྒྱུད་དང་རྒྱ་གཞུང་དང་ཉམས་མྱོང་གི་རྟོགས་ཆོས་དང་
གསུམ་ཁ་ཡིན་པའི་ཕྱིར་རོ། རྩ་ཐིག་རླུང་གསུམ་བྱིན་གྱིས་བརླབས་པའི་ཆོས་ཐུན་ཏེ། དྲུག་པ་ཡིན་ནོ།། །།དེ་ནས་རྩ་བསྒོམ་པ་འདི་ལ་གོ་བར་གསུང་རྒྱུ་དང་ཉམས་སུ་ལེན་རྒྱུ་གཉིས། དང་པོ་ནི། ཕྱི་སྣོད་འཇིག་རྟེན་ཁམས་ས་ཆ་སྐྱིད་སྡུག་སོགས་སྣ་ཚོགས་སྣང་བ་འདི་ནང་གི་རྩ་ཁམས་དག་མ་དག་གིས་རྟེན་འབྲེལ་ཁོ་ན་ཡིན། ནང་གི་རྩ་ཁམས་རྣམ་པར་དག་ན་ཕྱིའི་ཞིང་ཁམས་ཡང་དག་པར་འགྱུར་ཏེ། སངས་རྒྱས་རྣམས་དམྱལ་བར་བཞུགས་ཀྱང་བདེ་བ་ཅན་ལྟ་བུ་ཞིག་ལས་མི་མཐོང་། བཅོམ་ལྡན་འདས་ཤཱཀྱ་ཐུབ་པས་འཛམ་གླིང་ཞབས་ཀྱིས་བཅགས་ཏེ་ཕེབས་དུས་ས་ཆ་རང་རོང་དང་ཚེར་མ་མཐའ་དང་གད་ཅི་ཡང་མེད་པར་གར་ཕེབས་པའི་ཐད་དེ། ལག་མཐིལ་ལྟར་མཉམ་ཞིང་འཇམ་པར་འགྱུར་ཞིང་ཕེབས་ཚར་རྗེས་སྔར་ལྟར་རི་བྲག་དང་གཡང་ས་རང་མལ་དུ་གྱུར་སྐད་དོ། །རྗེ་མི་ལ་བྲག་དཀར་སྐྱིད་ཕུག་ཏུ་བཞུགས་སྐབས། ཡོན་བདག་གྲྭ་སློབ་རྣམས་གནས་ཤིན་ཏུ་སྡུག་ཅིང་མི་དགའ་བར་མཐོང་ཡང་། མི་ལས་སྐྱིད་པར་མཐོང་བ་ལྟ་བུ་ཡིན། མདོར་ན་རྩ་ནི་ཁྱིམ་དང་འདྲ། ཐིག་ལེ་ནི་ནོར་དང་འདྲ། རླུང་ནི་བདག་པོ་དང་འདྲ། ལུས་ལ་རྩ་བྲན་བྱེ་བ་ཕྲག་
མང་པོ་ཡོད་ཀྱང་། དེ་རྣམས་ཚུར་བསྡུས་ན་རྩ་གསུམ་འཁོར་ལོ་བཞིའམ་ལྔ་ལ་འདུས། དེ་བསྡུས་ན་རྩའི་གཙོ་བོ་གསུམ་ལ་འདུས། གཞན་དེ་ཐམས་ཅད་དེ་གསུམ་གྱི་འཁོར་ཡིན། ཐབས་ལམ་ཟབ་མོ་བསྒོམས་མི་ཤེས་པའི་གང་ཟག་ལ། རྩ་དེ་གསུམ་དུག་གསུམ་བསྐྱེད་པའི་རྩ་བ་ཡིན། ཐབས་ལམ་སྒོམ་པ་ལ་རྩ་གསུམ་གྱིས་སྐུ་གསུམ་ཐོབ་པར་བྱེད་པའི་རྩ། འཁོར་ལོ་བཞི་ནི་སྐུ་བཞི། འཁོར་ལོ་ལྔ་ནི་ཡེ་ཤེས་ལྔ་བསྐྱེད་པའི་རྩ་ཡིན། དེ་ཡང་རྩ་སྟོང་ཕྲག་བདུན་ཅུ་རྩ་གཉིས་ནི་དབུ་མའི་རིགས་ཏེ། རླུང་རྒྱུ་བ། སྟོང་ཕྲག་བདུན་ཅུ་རྩ་གཉིས་ནི་རཀྟ་རྒྱུ་བ་རོ་མའི་རིགས། སྟོང་ཕྲག་བདུན་ཅུ་རྩ་གཉིས་ནི་ཐིག་ལེ་རྒྱུ་སྟེ་རྐྱང་མའི་རིགས་ཡིན་ནོ། །རྩ་ཡི་གཙོ་བོ་དབུ་མ་ནི་རྙིང་མའི་ལུགས་ལ་ཐབས་ཀྱི་དབུ་མ་གཞུངས་པ། ཤེས་རབ་ཀྱི་དབུ་མ་སྲོག་རྩ་ནག་པོ། ཐབས་ཤེས་དབྱེར་མེད་ཀྱི་དབུ་མ་སྲོག་རྩ་དང་གཞུངས་པའི་བར་ཡོད་པར་ཡང་གསུངས། ཕྱག་ཆེན་ཐིག་ལེའི་རྒྱུད་ཀྱི་རྗེས་འབྲང་ས་སྐྱ་པས་ནི་རྩ་དབུ་མ་དེ་རྩ་མདུད་སུམ་ཅུ་སོ་གཉིས་ཀྱིས་བསྡམས་ནས་ཡོད་པས་གྲོལ་དཀའ་བར་བཞེད། ལ་ལས་སྲོག་རྩའི་དཀྱིལ་ལ་དབུ་མ་ཡོད་ཟེར། ལ་ལས་སྲོག་རྩའི་སུལ་ན་ཡོད་ཟེར། ལ་ལས་སྲོག་རྩ་
རང་དེ་ཡིན་ཟེར། བླུན་པོ་ལ་ལ་དག་འཁྲུལ་འཁོར་མང་དུ་བརྒྱབས་ནས་ཕོ་བ་སྒལ་པ་ལ་སྦྱར་དུས། ཕོ་བའི་རྒྱུད་དུ་རྩ་གཅིག་ཕྱི་ན་ལྟ་རྒྱུ་ཡོད་པ་དེ་ཡིན་ཟེར་ནས། །དེ་སྟོན་རྒྱུ་རྙེད་པ་གྲུབ་ཐོབ་ཏུ་འདོད། འོན་ཀྱང་སྒྲུབ་བརྒྱུད་འདིའི་ལུགས་ལ། དབུ་མ་རྩ་མདུད་མང་པོའི་བསྡམས་པ་དང་། རོ་རྐྱང་གཉིས་འཁྱོག་པོར་རྩའི་ཡོད་ལུགས་ལ་ཡོད་དེ། བསྒོམ་དུས་འཁྱོག་པོ་དང་མདུད་པས་བསྡམས་པ་ཚོ་བསྒོམ་མི་རུང་། འཁྱོག་པོ་དང་མདུད་པ་རྣམས་ཏིང་ངེ་འཛིན་གྱིས་འཁྱོག་པོ་དྲང་མདུད་པ་དཀྲོལ་དགོས་རྒྱུ་ཡིན་ཞེས། རྗེ་ཐམས་ཅད་མཁྱེན་པ་ཞྭ་དམར་དྲུག་པས་གསུངས། དེ་བཞིན་དུ་དབུ་མའི་རིགས་སམ་རྒྱུ་ནི་སྲོག་རྩ་དེ་ཡིན་གྱི། དངོས་སུ་ལྟ་རྒྱུ་ཡོད་པའི་དབུ་མ་མཚན་ཉིད་བཞི་ལྡན་དེ་འདྲ་བ་མེད། འོན་ཀྱང་བསྒོམས་པའི་སྟོབས་ཀྱིས་སྲོག་རྩ་དེ་ལ་དབུ་མ་འཆར་དགོས་པ་ཡིན་གསུངས། །བསྒོམས་པའི་རྩ་འཁོར་ལོ་བཞིའི་གྲངས་ཁ་ཡང་སྙིང་ཐིག་སོགས་རྫོགས་ཆེན་ལ། སྤྱིར་སུམ་བརྒྱ་དྲུག་ཅུ་ཡོད་ཀྱང་། བཀའ་བརྒྱད་རྒྱུད་བདེ་མཆོག་དགྱེས་རྡོར། ཆོས་དྲུག་སོགས་ཐམས་ཅད་གྲངས་ཁ་མཐུན་པ་ཡིན། དེ་ཡང་རྩ་འཁོར་ལོ་ལྔ་ཡི་མན་ངག་ནི་ལུགས་སུ་བཤད་ཟིན། །
འདིར་འཁོར་ལོ་བཞི་མ་རྒྱུད་ཀྱི་དགོངས་པ་ཡིན་ཏེ། པདྨ་ཟབ་པའི་རྒྱུད་ཆེན་པོ་ལས། འཁོར་ལོ་ནི་བཞི་སྟེ། བདེ་བའི་འཁོར་ལོ་དང་། ལོངས་སྤྱོད་ཀྱི་འཁོར་ལོ་དང་། ཆོས་ཀྱི་འཁོར་ལོ་དང་། སྤྲུལ་པའི་འཁོར་ལོའོ། །ཞེས་གསུངས། རྩ་བསྒོམ་པའི་མིང་ལ། རིགས་ལྡན་གྱིས་གཞི་བཟུང་བ་ཞེས་ཀྱང་བྱ། དཔག་བསམ་གྱི་ཤིང་འཛུགས་པ་ཞེས་ཀྱང་བྱ། རྩ་ནི་ནང་གི་མཁའ་འགྲོ་མ་ཡིན་ཏེ། རྩ་འཁོར་ལོ་གསུམ་ནི་སྐུ་གསུང་ཐུགས་ཀྱི་ཌཱཀྐི་མ། འཁོར་ལོ་བཞི་ནི་རིགས་བཞིའི་ཌཱཀྐིའི་ཚོགས་ཡིན་པའི་ཕྱིར། ཕྱི་ཡི་ཡུམ་བསྒོམ་ཡང་མི་དགོས་པའི་ཕྱིར། པདྨ་ཟབ་པའི་རྒྱུད་ལས། རྣལ་འབྱོར་པའི་ལུས་འདི་ལ་འཁོར་ལོ་དུ་ལགས་ཞུས་པས། སྐུ་ལ་བཞུགས་པའི་རྡོ་རྗེ་ཕག་མོ་རང་ཉིད་ལ་ཐིམ་ནས་མི་སྣང་བར་གྱུར་ཏོ། །ཞེས་གསུངས་པའི་དོན་ཡང་དེ་ཡིན་ནོ། །དབུ་མའི་ཁ་དོག་ཀྱང་དམར་བ་རྒྱ་སྐག་གི་ཁུ་བ་ལྟ་བུ་ཞེས་ལ་ལས་དམར་པོར་བསྒོམས། ལ་ལས་ཕྱི་དཀར་ནང་དམར་བསྒོམས་་ཀྱང་རང་ལུགས། རྗེ་ཆོས་ཀྱི་དབང་ཕྱུག་གསུངས་འདི་ལེགས་ཏེ། རྩ་གསུམ་སྐུ་ཡིན་པས་སྐུ་གསུམ་སོ་སོའི་ཁ་དོག་དང་། འཁོར་ལོ་བཞི་ཐབས་ཤེས་ཆ་རེ་ཡིན་པས་དཀར་པོ་
རེ་དང་དམར་པོ་རེ་བསྒོམས་པ་འདི་ཟབ་བོ། །དེ་ལ་བསྒོམ་བྱ་ནི། རང་ལུས་ཐུགས་རྗེ་ཆེན་པོའི་སྐུ་སྟོང་ཞིང་གསལ་བའི་ནང་དབུས་སུ། རྩ་དབུ་མ་སྔོན་པོ་ཁང་སྟོང་དུ་ཀ་བ་བཙུགས་པ་ལྟ་བུ་ཤིན་ཏུ་དྲང་བ། རང་ཉིད་རང་ལུས་ཙམ་དུ་བསྒོམས་པའི་ཚེ། སྦོམ་ཕྲ་གྲོ་སོག་འབྲིང་པོ་ཙམ། ཡར་སྣེ་སྤྱི་བོར་སྣ་ཚོགས་རྡོ་རྗེའི་རྩིབས་ཅན་གྱི་འཁོར་ལོས་སྤྲས་པའི་ཚངས་པའི་བུ་གའི་བར་དང་། མར་སྣེ་གསང་གནས་ཀྱི་རྡོ་རྗེའི་བུ་གར་ཟུག་པ་བསྒོམས། གཡས་རོ་མ་དམར་པོ་དང་། གཡོན་རྐྱང་མ་དཀར་པོ་གཉིས། སྦོམ་ཕྲ་དབུ་མ་དང་མཉམ་པ་གསུམ་ཁ་གཅིག་གིས་གཅིག་ལ་མ་ཐུག་པ། རོ་རྐྱང་གཉིས་ཡར་སྣེ་སྣ་བུག་གཉིས་སུ་ཟུག་པ། མར་སྣེ་ལྟེ་འོག་སོར་བཞི་ནས་གཅིག་ཏུ་གྱུར་པ། སྤྱི་བོ་བདེ་ཆེན་འཁོར་ལོ་རྩ་འདབ་སུམ་ཅུ་སོ་གཉིས་དཀར་པོ་གདུགས་ཀྱི་རྩིབས་མ་ལྟར་ཅུང་ཟད་ཁ་ཐུར་དུ་ལྟ་བ། ཐམས་ཅད་ཟླུམ་པོ་བམ་ཡིག་གི་དབྱིབས་ཅན། མགྲིན་པའི་རྩ་འདབ་བཅུ་དྲུག་དམར་པོ་ཅུང་ཟད་ཁ་གྱེན་དུ་བསྟན། ཐམས་ཅད་བསྡོམས་པའི་དབྱིབས་གྲུ་གསུམ་ཨེ་ཡིག་གི་དབྱིབས་ཅན། སྙིང་ཁའི་རྩ་འདབ་བརྒྱད་སྔོན་པོ་ཅུང་ཟད་རྩ་སྣེ་ཐུར་དུ་ཕྱོགས་པ་ཐམས་ཅད་
བསྡོམས་པའི་དབྱིབས་ཟླུམ་པོ་བམ་ཡིག་གི་དབྱིབས་ཅན། ལྟེ་བའི་རྩ་འདབ་དྲུག་ཅུ་རེ་བཞི་དམར་པོ་ཅུང་ཟད་རྩ་སྣེ་གྱེན་བསྟན་ཨ་ཡིག་གི་དབྱིབས་ཅན། རྩ་བ་རྣམས་ཐང་ཤིང་གི་ཡལ་ག་ལྟར་དབུ་མ་ལ་ཟུག་པ། རོ་རྐྱང་གཉིས་ལ་མ་རེག་པ། རྩ་སྣེ་ལས་རྩ་ཕྲན་མང་པོ་གྱེས་པ་ཐང་ཤིང་གི་ཡལ་གའི་རྩེ་ལ་འབོལ་ཁབ་ལྟར་ཡོད་པ། རྩ་འཁོར་གྱི་རྩ་རྣམས་གཙོ་མོ་རྣམས་ལས་ཇེ་ཕྲར་སོང་བ། ཐམས་ཅད་སོག་སྒྲུབ་ལྟར་ནང་སྟོང་པར་བསྒོམ་མོ། །དཔེར་ན་ཆུ་འདྲེན་པའི་ཐོག་མར་ཡུར་བ་ལེགས་པོར་བྱ་དགོས། དེ་མ་བྱས་ན་ཆུ་འབོ་བ་དང་། ཡུར་བ་རལ་བར་འགྱུར། དང་པོ་ཡུར་བ་ལེགས་པོར་བཟོས་པས་ཆུ་གར་འདོད་དུ་འགྲོ་བ་དང་འདྲ་བས། རྩ་འདི་ཡང་ཞག་གསུམ་དུ་བསྒོམས་ལ། རྒྱུན་དུ་ནི་བསམ་ཙམ་ནས་རྩ་གསུམ་འཁོར་ལོ་བཞི་གསལ་ཐེབ་པ་གལ་ཆེ། རྩ་ལ་སྦྱང་བ་ནི་རང་ལུས་ཇེ་ཆེར་བསྒོམས་དུས་རྩ་ཡང་དེ་དང་མཚུངས་པར་ཆེ་བ་དང་། རང་ལུས་ཇེ་ཆུང་ལ་བསྒོམས་དུས་རྩ་ཡང་དེའི་ཚོད་ཙམ་དང་། རང་ལུས་ཡུངས་འབྲུ་ཙམ་བསྒོམས་དུས་ཀྱང་རྩ་གསུམ་འཁོར་ལོ་བཞི་ཚང་བར་བསྒོམ་ཐུབ་པར་བྱའོ། །རེས་འགའ་དུས་རྩ་དབུ་མ་དེ་ཇེ་ཆེར་སོང་ནས་ལུས་ཀྱིས་གར་ཁྱབ་དབུ་
མས་ཁྱབ་པར་བསྒོམས་པས། རླུང་གང་དུ་ཟིན་ཀྱང་དབུ་མར་ཟིན་ནས་ཉམས་རྟོགས་སྐྱེ་བའི་རྟེན་འབྲེལ་དུ་འགྱུར་ཏེ། དབུ་མ་དེ་གདོས་བཅས་ཀྱི་རྩ་མ་ཡིན་ཡེ་ཤེས་ཀྱི་རྩ་དེ་བསྒོམས་པའི་སྟོབས་ལས་བྱུང་བའི་རྩ་ཡིན་པའི་ཕྱིར་རོ། །གཞན་རྩ་འཁོར་བཞིའི་ནང་སྐོར་དུ་རྩ་བཞི་རེ་དང་། ཕྱིའི་ནད་བསྐྱེད་པའི་རྩ་དང་། ལུས་ཀྱི་རྩ་གནས་ཉི་ཤུ་རྩ་བཞིར་གནས་ཡུལ་ཉེར་བཞི་རྩ་སོགས་མང་དུ་ཡོད་ཀྱང་ད་རེས་འདིའི་སྐབས། འཁོར་ལོ་བཞིའི་རྩ་བརྒྱ་དང་ཉི་ཤུ། རྩ་གཙོ་མོ་གསུམ་ལས་གཞན་བསྒོམས་མི་དགོས། འདི་ལྟར་རྩ་བསྒོམས་པས་རྩ་དང་མཁའ་འགྲོ་དོན་གཅིག་པས་མཁའ་འགྲོ་དང་མ་མོ་ཐམས་ཅད་དབང་དུ་འདུས། དེའི་གནད་ཀྱིས་མོ་རིགས་ཐམས་ཅད་དད་ཅིང་གུས། རྩ་དང་ཡུལ་ཁམས་དོན་གཅིག་པས་ཡུལ་ཁམས་ཐམས་ཅད་དབང་དུ་འདུ། རྩའི་ཁམས་དག་པས་ལུས་ལ་ནད་ཉུང་བ་དང་གཟི་མདངས་འབར། རྩ་དང་སྐུ་དོན་གཅིག་པས་སངས་རྒྱས་ཐམས་ཅད་ཀྱི་སྐུའི་བྱིན་རླབས་འཇུག །རྩ་ནི་སྤྲུལ་སྐུའི་ངོ་བོ་ཡིན་པས་ལུས་སྤྲུལ་སྐུར་འགྲུབ་སྟེ། མཐར་ཐུག་རྩ་དག་པ་སྐུ་རྡོ་རྗེའི་གོ་འཕང་ཐོབ་སྟེ། ལུས་སྤྲུལ་བསྒྱུར་ལ་དབང་ཐོབ་ནས། གང་འདུལ་དུ་
སྤྲུལ་ནས་སེམས་ཅན་གྱི་དོན་བྱ་བ་དང་། སྐྱེ་འཆི་མེད་པ་ཚེའི་དངོས་གྲུབ་དང་སྤྲུལ་པ་སྐད་ཅིག་རེ་ཡང་བྱེ་བ་ཕྲག་བརྒྱར་སྤྲུལ་བའི་ནུས་པ་ཐོབ་པར་བཤད་པ་ཡིན་ནོ། །ཆོས་ཐུན་བརྒྱད་དོ།། །།དེ་ནས་རླུང་བསྒོམས་པ་ལ་གོ་རྒྱུ་དང་ཉམས་སུ་ལེན་རྒྱུ་གཉིས་ལས། ནང་ལུས་ཀྱི་བསྤྲུལ་སྤྱོད་སྲོག་གི་ངོ་བོ་ཡང་རླུང་ཡིན། ཕྱིའི་འཇིག་རྟེན་ཆགས་འཇིག་དར་རྒུད་ཐམས་ཅད་རླུང་གིས་བྱེད། གསང་བ་སེམས་ཀྱི་རྣམ་པར་རྟོག་པ་སྣ་ཚོགས་སུ་འཕྲོ་བ་ཡང་རླུང་གི་རྩལ་ཡིན། དེ་ཕྱིར་རླུང་ལ་དབང་ཐོབ་ན་འཁོར་འདས་ཐམས་ཅད་ལ་རང་དབང་ཐོབ་པ་ཡིན་ཏེ། རླུང་ཞེས་བྱ་བས་ལས་ཀུན་བྱེད། །ཅེས་རྒྱུད་སྡེ་རྣམས་ནས་གསུངས་སོ། །རླུང་བཟུང་བའི་དུས། ཕྱི་ལྟར་ཤིང་དང་ལྕི་བའི་དུད་པ་ཆེན་པོ་ཡོད་དུས་མ་བཟུང་། དུ་བ་རྩ་སྦུབས་སུ་སོང་ན་ནད་འབྱུང་། ནང་ལྟར་སྣ་བུག་གཡས་ནས་རྒྱུ་དུས་མི་བཟུང་། གཡས་པ་ཉི་མ་དུག་གི་རླུང་ཡིན་པས་གེགས་སྣ་ཚོགས་འབྱུང་དུས་ཡིན། སྣ་བུག་གཡོན་ནས་རྒྱུ་བ་ཟླ་བ་བདུད་རྩིའི་རླུང་ཡིན་པས། ཐུན་མོང་གི་དངོས་གྲུབ་སྣ་ཚོགས་འགྲུབ་དུས་ཡིན་པས་བཟུང་། སྣ་བུག་གཉིས་ཀ་ནས་རྒྱུ་དུས་མཉམ་པོར་རྒྱུ་བ་ཡེ་ཤེས་ཀྱི་རླུང་ཡིན་པས། དེ་དུས་
བཟུང་ན་རླུང་དབུ་མར་ཚུད་དེ་མཆོག་གི་དངོས་གྲུབ་འབྱུང་དུས་ཡིན་པས་བཟུང་། ལུས་ཧ་ཅང་འགྲངས་ཆེས་པའི་དུས་བཟུང་ན་རླུང་མི་ཤོང་བར་རྩ་གནས་ལོག་པར་རླུང་འགྲོ་དོགས་ཡོད་པས་མི་བཟུང་། ཧ་ཅང་ལྟོགས་ཆེས་པའི་དུས་བཟུང་ན་རླུང་སྐྱེ་དོགས་ཡོད་པས་མི་བཟུང་། འགྲངས་ལྟོགས་རན་པའི་སྒྱུ་ལུས་བདེ། །ཞེས་གསུངས་པས་འགྲངས་ལྟོགས་རན་དུས་བཟུང་། འགྲངས་དུས་ལྟོགས་དུས་ཀྱང་འཇམ་རླུང་ཅུང་ཟད་ནི་སྐྱོན་མེད། རྩ་དང་རླུང་གི་སྐབས་སུ་ནངས་སྔའི་དྲི་ཆུ་བར་པ་དེ་ཐོད་པའི་ནང་དུ་བསོགས་སུ་བླུགས་ལ། དེར་སྨེ་བརྩེགས་ཀྱི་སྔགས་ཀྱིས་སྔགས་སམ། ཡང་ན་རང་ལུས་ཤེལ་གྱི་བུམ་པའི་ནང་དུ་རང་སེམས་རྡོ་རྗེ་རྣམ་འཇོམས་སམ། རྡོ་རྗེ་སེམས་དཔར་བསྒོམས། ཐུགས་ཀའི་ཧཱུྃ་ལ་སྔགས་ཀྱིས་བསྐོར་བ་ལས་བདུད་རྩི་བབས་པས་ལུས་གང་། གསང་བའི་རྡོ་རྗེ་བུམ་པའི་མཆུ་ནས་བདུད་རྩི་བབ་པར་བསྒོམས་ལ། དྲི་ཆུ་དང་པོ་དེ་དོར། ཐ་མ་ཡང་དོར། བར་པ་དེའི་ཕུད་དཀོན་མཆོག་མཆོད་པར་བསམས་ལ་ཅུང་ཟད་གཏོར། ལྷག་མ་བདུད་རྩིར་བསམས་ལ་འཁྱོར་གང་བཏུང་། དེ་འཕྲོས་ལུས་ཐམས་ཅད་དག་པར་བཀྲུས། དེ་འདྲ་སྐབས་
སུ་བྱས་ན། གྲིབ་སེལ། གེགས་མི་འབྱུང་། རིམས་ཀྱང་ཐུབ། ལུས་དྲོད་སྐྱེ་སླ་བ་ཡིན་ནོ། །འབལ་ཁེའི་ནང་དུ་འབལ་ལ་རྡོག་པོ་གཅིག་བལ་གྱིས་བཏུམ་པ་འོག་སྒོའི་ཞབས་སུ་བཞག་པས་འོག་རླུང་རང་བཞིན་གྱིས་ཟིན། ཡང་ན་གོས་ཀྱི་སྣེ་ཟླུམ་པོ་བཞག་པ་གལ་ཆེ། དེ་ནས་ལུས་རྡོ་རྗེ་སྐྱིལ་ཀྲུང་ངམ། སེམས་དཔའི་སྐྱིལ་ཀྲུང་། སྒལ་ཚིགས་ཤིན་ཏུ་དྲང་བར་བྱས། ལག་པ་གཉིས་ཀྱི་མཐེ་བོང་གིས་སྲིན་མཛུབ་ཀྱི་རྩ་བ་མནན་ལ་ཁུ་ཚུར་བཅངས་ནས། བརླ་རྩའི་སྟེང་དུ་བཞག །དེ་ནས་ལག་པ་གཡས་དལ་བུས་ཤད་ཀྱིས་བརྐྱངས་ལ་སྡིགས་མཛུབ་བྱས་པ་ཚུར་བསྐུམས་ལ། སྣ་བུག་གཡས་སྡིགས་མཛུབ་ཀྱིས་བཀག་ལ་སྣ་བུག་གཡོན་ནས་རླུང་དང་པོ་དལ་བུ་གཅིག །དེ་ནས་འབྲིང་གཅིག །དེ་ནས་ཤེད་ཅི་ཡོད་ཀྱིས་ཕྱིར་བུས། ཡང་གཡོན་པས་ལག་པ་དལ་བུས་བརྐྱངས་ལ་ཁུ་ཚུར་བཀུག་ནས། སྡིགས་མཛུབ་ཀྱིས་སྣ་བུག་གཡོན་བཀག །གཡས་ནས་སྔར་ལྟར་ལན་གསུམ་བུས། དེ་ནས་ཁུ་ཚུར་གཉིས་དཔྱི་མགོར་བཟུང་ལ། སྣ་བུག་གཉིས་ཀ་ནས་དང་པོ་དལ་བུས་གཅིག །དེ་ནས་འབྲིང་ཙམ་ཞིག་བུས། དེ་ནས་ཤེད་ཀྱིས་གཅིག་བུས། དེའི་ཚེ་ལུས་ཀྱི་བ་སྤུའི་བུ་ག་
ཐམས་ཅད་ཁྲོལ་མང་ལྟར་ཡོད་པ་དང་། སྣ་བུག་དང་བ་སྤུའི་སྒོ་ནས་ཚེ་འཁོར་བ་ཐོག་མ་མེད་པ་ནས་བསགས་པའི་སྡིག་སྒྲིབ་ཐམས་ཅད་ནག་ཉིལ་གྱིས་ཕྱིར་ཐོན་ལུས་ཐམས་ཅད་སྟོང་སང་གིས་སངས་དྲི་མ་མེད་པ་ཤེལ་ལྟ་བུ་ལ་སེམས་གཏད། དེ་ནས་རླུང་དལ་ལ་རིང་བ་རྔུབ་སྟེ་སྣའི་ཐད་སོར་བཅུ་དྲུག་གི་ཐད་ཀྱི་བར་སྣང་ནས་རླུང་ཁ་དོག་ལྔ་ལྡན་འོད་ཀྱི་སྐུད་པ་འདྲ་བ་བྱུང་ནས་སྣ་བུག་ནས་ཞུགས། རོ་རྐྱང་གཉིས་ནས་བརྒྱུད་དེ་ལྟེ་འོག་ནས་དབུ་མའི་ནང་དུ་ཞུགས་ཏེ། སྙིང་ཁའི་ཐད་དུ་ཐིམ་པར་བསྒོམས་ལ། ཕོ་བ་ཐེར་ཐེར་བྱས་རླུང་གིས་བཀང་། འོག་རླུང་བསྡམས། སྟེང་རླུང་མགྲིན་པ་མན་དུ་བསྡམས་ལ་འདུག་ཅི་ཐུབ་བྱ། མི་ཐུབ་ནད་བྱུང་ན་རླུང་ཅུང་ཟད་ཅིག་རྡུབ་ཆུང་སྣ་ནས་བྱས་ལ། བ་སྤུའི་བུ་ག་ནས་སྔོ་སང་སང་སོང་བར་བསྒོམས་ལ། ལག་པ་གཡས་ཀྱི་གྲུ་མོ་དང་དཔུང་པ་མཆན་ཁུང་དུ་གསུམ་བརྡབ། གཡོན་པས་དེ་འདྲ་བྱ། མ་ཐུབ་ན་ཡང་རྔུབ་ཆུང་དང་མཆན་བརྡབ་བྱ། དེ་ནས་མ་ཐུབ་ཤོར་ལ་ཁད་བྱུང་ན། དང་པོ་སྣ་བུག་གཉིས་ནས་དལ་བུས་དེ་ནས་ཤད་ཀྱིས་ལྷག་མ་མ་ལུས་པར་བུས། ཡང་སྔར་ལྟར་བཟུང་ངོ་། །དེ་ལ་དང་པོ་རྔུབ་པ་དང་གཅིག །དེ་
ནས་ཕོ་བར་དགང་པ་དང་གཉིས། དེ་ནས་དབུ་མའི་ནང་ནས་བ་སྤུའི་བུ་གར་གཞིལ་བ་དང་གསུམ། དེ་ནས་མཇུག་ཏུ་སྣ་བུག་ནས་མདའ་ལྟར་འཕེན་པ་དང་བཞི་ལ་སྦྱོར་བ་བཞི་ལྡན་ཟེར་རོ། །མདའ་ལྟར་འཕེན་པའི་སྐབས་སུ་རླུང་དབུ་མ་ནས་སྤྱི་བོར་སྔོ་སང་གིས་ཐོན་པར་བསྒོམས་པ་ཡོད་ཀྱང་། ཚེ་ལ་གནོད་པ་དང་གེགས་མང་བས་རེ་རེ་ཙམ་ལས་མི་བསྒོམ་མོ། །འདི་དག་གི་སྐབས་སུ་ངག་ནས་འདོན་མི་བདེ་ཡང་། ཡི་གེ་དྲུག་པ་ཡིད་ཀྱིས་བཟླས་པ་བྱ་སྟེ། ལུས་འབྱུང་བ་ལྔ་ཡི་དྭངས་མ་རླུང་ལྔའི་སྟོབས་བསྐྱེད་པའི་སྔགས་ནི་ཡི་གེ་དྲུག་པ་ཡིན་ཏེ༔ སྤྲུལ་པའི་རྒྱལ་པོས། ཨོཾ་འབྱུང་བ་ལྔ་འདུས་ཀྱི་དྭངས་མ། མ་སེམས་ཅན་ཐམས་ཅད་ཀྱི་གོ་འབྱེད། ཎིས་སེམས་ཅན་ཐམས་ཅད་ཀྱི་ཤ་དང་རུས་པ་སྨིན་ཅིང་འཁྲངས་བར་བྱེད་༔ པད་ཚ་ཞིང་དྲོ་བར་བྱེད་པས་རྣམ་རྟོག་གི་མཚན་མ་བསྲེགས་ནས་རང་བཞིན་གདུག་པ་འདུལ། མེས་ཁྲག་གི་རླན་ཅིང་མདངས་དང་ལྡན་པར་བྱེད་པ། ཧཱུྃ་སྲོག་འཛིན་ཅིང་ལུས་འདེག་པར་བྱེད་དོ། །ཨོཾ་མ་ཎི་པདྨེ་ཧཱུྃ། ཞེས་གསུངས་སོ། །ཡང་རླུང་བཟུང་བའི་ཚེ་ཡི་གེ་དྲུག་པ་ཚར་མང་པོ་འབྲེལ་བའི་ཕྲེང་བ་སྟོང་སྐུད་ཙམ་སྣ་བུག་གཡོན་ནས་ཞུགས། རྐྱང་
མའི་ལམ་ནས་བརྒྱུད་དེ་ལྟེ་འོག་ནས་གཡས་རོ་མའི་ནང་དུ་ཞུགས་པར་བསྒོམས་ལ་ཅུང་ཟད་དགང་། དེ་ནས་རླུང་ཕྱིར་འབུད་པས་སྣ་བུག་གཡས་ནས་ཕྱིར་ཐོན། ཡང་རྡུབ་པས་གཡོན་ནས་ཞུགས་པར་བསྒོམས་པ་ལན་ཁ་ཡར་བྱས་པས་རྩ་ལམ་སྦྱང་བ་ཡང་ཡིན་ནོ། །རླུང་རྡོ་རྗེའི་བཟླས་པ་ཡང་ཡིན་ནོ། །ཡང་རང་གི་ཐུགས་དབུས་དབུ་མའི་ནང་དུ་རྟ་མགྲིན་མཐེ་བོང་ཙམ་ཞིག་བསྒོམས། རླུང་ཕྱིར་འབུད་དུས་དེ་ལས་རྟ་མགྲིན་ཡུངས་ཀར་ཙམ་དཔག་ཏུ་མེད་པས་བ་སྤུ་ནས་འཇིག་རྟེན་ཁྱབ་པར་སྤྲོས་པས། བགེགས་ཐམས་ཅད་ཚར་བཅད། ཚུར་རྔུབ་པས་བ་སྤུའི་བུ་ག་ནས་ཚུར་འདུས་ནས་ལུས་ཐམས་ཅད་རྟ་མགྲིན་གྱིས་གང་བར་བསྒོམས་པ་སྲུང་འཁོར་ཡིན་པས་སྐབས་སུ་རེ་རེ་ཙམ་བསྒོམས། གཙོ་ཆེར་རླུང་སྦྱོར་བ་བཞི་ལྡན་རྒྱུན་དུ་བསྒོམས་ལུས་དལ་བར་བྱ། དྲག་ཤུལ་གྱི་ལས་སྤྱངས་ཁ་ཟས་བཅུད་ཆེ་ལ་སྔར་བས་ཅུང་ཟད་ཉུང་བ་རེ་བཟའ། རླུང་སྣ་གཡས་ནས་རྒྱུ་ཚེ་ཐུགས་དམ་ཆག་མེད་གཏོར་བསྔོས་སོགས་བྱ། གཡོན་ནས་ནམ་རྒྱུ་ལ་རླུང་བཟུང་། རླུང་གི་དམིགས་པས་སུན་ན། སེམས་ངོ་རང་བསྒོམ་ཞིང་རླུང་བཟུང་བ་ཡང་མཆོག་ཡིན། དེ་ལྟར་ཞག་བདུན་ཙམ་ཡུན་རིང་
དུ་བསྒོམས་པས། སྔར་བས་རླུང་ཁུག་པ་ཇེ་རིང་དུ་འགྱུར་ཏེ། རང་སྐྱིལ་ཀྲུང་བཅས་ནས་རླུང་ནང་དུ་བཟུང་ལ། ལག་པ་གཡས་ཀྱིས་པུས་མགོ་གཡས་ལ་རེག་ཙམ་འཕུར། པུས་མགོ་གཡོན་ལ་རེག་ཙམ་འཕུར། དཔྲལ་བར་ལག་མཐིལ་རེག་ཙམ་འཕུར། དེ་ནས་སེ་གོལ་དྲུག་བརྡབ། །དེ་རྣམས་གཅིག་ཏུ་བརྩིས་ལ། ལག་གཡོན་ཕྲེང་བ་བཟུང་ལ་གྲངས་བཟུང་ནས་བརྩིས་པས། སུམ་ཅུ་སོ་དྲུག་གི་བར་རླུང་ནང་དུ་བཟུང་ཐུབ་ན། ཅུང་ཟད་བྱང་བ་ཡིན། དེ་ཡི་གཉིས་འགྱུར་ཏེ་བདུན་ཅུ་དོན་གཉིས་ཐུབ་ན་འབྲིང་། སུམ་འགྱུར་ཏེ་བརྒྱ་རྩ་བརྒྱད་ཐུབ་ན་རབ་ཡིན་ཏེ། སྡོམ་པ་འབྱུང་བ་ལས། བུམ་པ་ཅན་ལ་བསྟེན་བྱས་ནས། །དབྱེ་བ་གསུམ་གྱིས་གཞོམ་པར་བཤད། །ཐ་མ་སུམ་ཅུ་སོ་དྲུག་ཙམ། །དེ་ཡི་གཉིས་འགྱུར་འབྲིང་དེ་བཞིན། །སུམ་འགྱུར་ཆེན་པོར་ཤེས་བྱས་ཏེ། །ཞེས་གསུངས་སོ། །ལུགས་གཅིག་ལ་མི་ནད་མེད་གཅིག་མདུན་དུ་བསྡད་ནས་དེའི་རླུང་དབྱུང་རྔུབ་སོ་དྲུག་སོགས་ཀྱི་ཡུན་ལ་བཟུང་ཐུབ་པ་ལ་ཚད་བཟུང་བ་ཡང་ཡོད་དོ། །འདིའི་དོན་འབྲུག་ལུགས་ཀྱི་རླུང་དེ་ཙམ་འགོགས་ཐུབ་པ་ལ་བུམ་པ་ཅན་ཆེ་འབྲིང་ཆུང་གསུམ་གྱི་དབྱེ་བ་ཡིན་པར་བྱེད་དེ། དེ་ལ་
མི་བསྐྱོད་ཞབས་ཀྱིས་བཀག་པ་མཛད། རང་ལུགས་རླུང་བུམ་ཅན་ནི་འོག་སྒོ་བསྡམས་ཏེ། མགྲིན་པ་མན་ཆད་གང་བར་བྱས་ལ་མནན་པ་བུམ་ཆེན། སྙིང་ཁ་མན་ཆད་དུ་བཀང་སྟེ་མནན་པ་བུམ་འབྲིང་། ཕོ་བ་ཁོ་ནར་བཟུང་པ་བུམ་ཆུང་སྟེ། འོག་སྒོ་ཅུང་ཟད་བསྡམས། ཕོ་བ་ཐེར་གྱིས་བརྒྱང་སྟེ། ངག་སྨྲས་ཀྱང་བཟོད་དེ། སྟེང་རླུང་རང་བབ་ཏུ་བཞག་པ། བར་རླུང་བཟུང་བ་ཡང་ཟེར། བུམ་ཆུང་ཡང་ཟེར། བར་རླུང་བཟུང་བ་ལ་ནི་དུ་བ་དང་རླུང་སྣ་གཡས་ནས་རྒྱུ་དུས་ཀྱང་བཟུང་རུང་བ་ཡིན་ནོ། །འདི་སྐབས་ཉིན་གུང་སོགས་སྟན་འབོལ་བ་ལ་འདུག་ལ། རྐང་པ་གཉིས་རྡོར་སྐྱིལ་ལམ་སེམས་སྐྱིལ་ལག་པ་གཉིས་ཁུ་ཚུར་པུས་སྟེང་དུ་སྦུབ། རླུང་རོ་བསལ་ནས་རླུང་བཟུང་ལ། ཁུ་ཚུར་གཉིས་མཐེ་བོང་གིས་སྲིན་ལག་གི་རྩ་བ་མནན་པ་དེས། དཔྱི་མགོ་ནས་མཆན་ཞབས་ནས་ཡར་དྲུད་ལ་ལག་པ་གཉིས་ཀས་དཔུང་པ་མགོ་ཐད་མདུན་ངོས་སུ་ཤེད་ཀྱིས་བརྐྱངས། ཚུར་མཉམ་དུ་བསྐུམས་ལ་ཁུ་ཚུར་གཉིས་ཀྱིས་ནུ་མ་གཉིས་ཀྱི་སྟེང་དང་། གྲུ་མོ་གཉིས་ཀྱིས་མཆན་ཞབས་སུ་བརྡབ། ཡང་ཤེད་ཀྱིས་བརྐྱངས་ནས་ཚུར་བརྡབ་པ་ལན་གཉིས་བྱ། དེ་ནས་ལག་མགོ་གཡོན་
པའི་དཔུང་ནས་སོར་མོའི་རྩེ་བར་དུ། ལག་པ་གཡས་ཀྱི་ཐལ་མོ་ལན་གསུམ་རེ་ཕར་རྒྱབ་ངོས་བྱུག །དེ་བཞིན་དུ་གཡོན་པས་གཡས་པ་ལན་གསུམ་བཤད། དེ་ནས་ལག་མགོ་གཉིས་གཅིག་གིས་གཅིག་ལ་ལན་གསུམ་རེ་འཕུར་ལ། དེ་ནས་ཐལ་མོ་གཉིས་བསྣོལ་ལ་གཅིག་རྣ་བའི་མདུན་ངོས་དང་གཅིག་རྒྱབ་ངོས་སུ་བཞག་ལ་གྱེན་དུ་མགོ་འཕུར་ནས་ལྟག་ཁུང་དུ་ལག་པ་གཉིས་བོར་བ་ལན་གསུམ་དང་། རྣ་བ་གཡོན་ནས་ཀྱང་དེ་ལྟར་ལན་གསུམ་འཕུར་རོ། །ཐལ་མོ་གཅིག་གིས་ཕྲག་གོང་ནས་ལག་པའི་མདུན་ངོས་སེན་རྩེའི་བར་ལན་གསུམ་རེ་ཕར་བྱུག་རྟགཡོན་ལའང་དེ་བཞིན་བྱ། དེ་ནས་ཁུ་ཚུར་གཉིས་བཅངས་ལ་གཅིག་སྐེད་པ་ནས་མདུན་གྱི་བྲང་རུས་གཡོན་ནས་སྒྲོག་རུས་བར་གྱེན་དུ་ལན་གསུམ་ཁུ་ཚུར་གྱིས་འཕུར་བ་དང་མཉམ་པོར། ལག་གཡོན་ཁུ་ཚུར་གྱིས་རྒྱབ་ངོས་སྐེད་པ་ནས་སོག་སྲུབ་གཡས་བར་གྱེན་དུ་ལན་གསུམ་འཕུར། དེ་གཡས་གཡོན་གཉིས་བརྗེས་ལ་ཁ་ཡ་ངོས་ལན་གསུམ་རེ་འཕུར། ཡང་ཁུ་ཚུར་གཡས་ཀྱིས་མདུན་ངོས་སྐྱེད་པ་ནས་དཔྱི་གཡོན་གྱི་ཨོཾང་ཚོས་བར་ཐུར་དུ་ལེན་གསུམ་འཕུར་བ་དང་དུས་མཉམ་དུ། ཁུ་ཚུར་གཡོན་པས་རྒྱབ་ཀྱི་སྐེད་པ་ནས་ཚང་རའི་ཨོཾང་ཚོས་
གཡས་བར་ལན་གསུམ་འཕུར། དེ་གོ་བརྗེས་ལ་གཡོན་ངོས་ཡང་ལན་གསུམ་འཕུར་རོ། །དེ་ནས་རྐང་པ་གཡས་དང་ལག་པ་གཡས་གཉིས་ཤེད་ཀྱིས་བརྐྱངས་ལ། ལག་པའི་ཐལ་མོ་རྐང་པའི་སེན་རྩེ་ནས་བརླ་རྩ་བར་ཕྱི་ནས་བྱུག །བརླ་རྩ་ནས་སེན་རྩེ་བར་ཡར་ནང་ངོས་ནས་བྱུག་པ་ལན་གསུམ། དེ་ནས་རྐང་ལག་གཡས་གཉིས་མགྱོགས་པོར་བསྐུམས་ལ། གཡོན་གཉིས་ཤེད་ཀྱིས་བརྐྱངས་ལ། སྔར་ལྟར་ལན་གསུམ་བྱུག་གོ །དེའི་རྩ་ཚིག་རྗེ་ཐམས་ཅད་མཁྱེན་པ་དྲུག་པས་བཀའ་སྩལ་པ་ནི། རྐང་པ་དཀྱིལ་ཀྲུང་སྐེད་པ་བསྲང་། །ལག་གཉིས་ཁུ་ཚུར་པུས་སྟེང་བཞག །རླུང་རོ་བསལ་ཞིང་རླུང་བཟུང་ནས། །རྡོ་རྗེའི་ཁུ་ཚུར་བརླ་གཉིས་དང་། །ལྟ་ཟུར་ནས་བརྒྱུད་འོག་ནས་བཞག །དཔུང་པའི་དྲང་ཐད་མདུན་དུ་བརྐྱང་། །ཁུ་ཚུར་གཉིས་ཀྱི་ནུ་སྟེང་ན། །གྲུ་མོས་མཆན་བརྡབ་དུས་མཉམ་གསུམ། །དེ་ནས་ལག་པ་གཡོན་ན་ནི། །གཡས་པའི་ཐལ་མོས་ལན་གསུམ་བཤད། །དེ་བཞིན་གཡས་ལའང་ལན་གསུམ་བཤད། །དེ་ནས་ཐལ་མོ་ལན་གསུམ་མཉེ། །རྣ་བའི་མདུན་རྒྱབ་ཐལ་མོ་གཉིས། །བསྣོལ་ཏེ་འགྲོ་བས་མགོ་བོ་མཉམ། །ཐལ་མོ་གཉིས་ཀྱི་ཕྲག་
གོང་ནས། །མདུན་དུ་གཡས་གཡོན་གསུམ་རེ་བཤད། །རོ་སྟོད་རྒྱབ་མདུན་ཁུ་ཚུར་གཉིས། །རེས་མོས་སྟོད་དུ་གསུམ་རེ་མཉེ། །དེ་བཞིན་རོ་སྨད་མདུན་རྒྱབ་མཉེ། །དེ་ནས་རྐང་པ་གཡས་བརྐྱངས་ཤིང་། །ལག་པའང་ཤེད་བརྐྱངས་ལུས་སྦྱིན་བྱ། །ཐལ་མོ་རྐང་པའི་སྟེང་འོག་གཉིས། །ལན་གསུམ་བཤད་ཅིང་གཡོན་ལའང་བྱ། །ཞེས་གསུངས་སོ། །ཡན་ལག་ལྔ་སྦྱོང་མི་འདྲ་བ་མང་ནའང་། འདིར་ཀར་ལུགས་མ་འཆུགས་པ་ཡིན་ནོ། །དེ་ཡང་དང་པོ་རླུང་བཟུང་ལ་སྣ་ཁ་གཅིག་གཉིས་མཚམས་སུ་རླུང་བཏང་། ཡང་བཟུང་ལ་འཕྲོ་མ་རྣམས་བྱ། བྱང་ནས་ཡན་ལག་ལྔ་སྦྱོང་ཚར་གཅིག་མ་རྫོགས་བར་དུ་རླུང་མི་བཏང་བར་བྱའོ། །རླུང་མ་བྱུང་བར་ཐིག་ལེ་བསྒོམས་ཀྱང་ནུས་པ་མི་འབྱུང་བས། འདི་ལ་ཞག་བདུན་ཙམ་བསྒོམས་པ་གལ་ཆེའོ། །འདིར་གེགས་སེལ་སོགས་དང་བཤད་པ་མང་ཡང་ལོགས་སུ་སྟོན་པར་བྱའོ། །དངོས་གཞི་རླུང་སྦྱོར་བ་བཞི་ལྡན་དང་འཁྲུལ་འཁོར་ལྔ་པོ་འདི་ལ་ཡུན་རིང་སྒོམས་ཤིག དེ་ནས་ཐིག་ལེ་བསྒོམས་པ་ལ་ཡང་གོ་བར་བྱ་རྒྱུ་དང་ཉམས་སུ་ལེན་རྒྱུ་དང་གཉིས་ལས། དང་པོ་ནི། དབུ་མའི་ཡར་སྣེ་སྤྱི་བོ་ནས་ཐིག་ལེ་དཀར་པོའི་དྭངས་མ་ཡུངས་ཀར་
ཙམ་ཡོད་དེ། དེ་ནི་ཡབ་ཧེ་རུ་ཀའི་ངོ་བོ་སྟེ། འདི་སྐབས་སུ་ཐུགས་རྗེ་ཆེན་པོའི་ངོ་བོ། སྤྱི་གཙུག་དེ་ཡང་ནང་གི་འོག་མིན་གྱི་གནས། ལྟེ་བར་ཐིག་ལེ་དམར་པོ་ཁྲག་ཐམས་ཅད་ཀྱི་དྭངས་མ་སྲན་མ་ཙམ་ཡོད་པ་དེ་གསུམ་ཕག་མོའི་ངོ་བོ། འདི་སྐབས་སུ་ཡུམ་གསང་བ་ཡེ་ཤེས། ལྟེ་འོག་དེ་ནང་གི་ནུབ་ཕྱོགས་ཨུ་རྒྱན་གྱི་ཡུལ་ཡིན། དེ་གཉིས་གཙོ་བོ་ཡིན་ལ། དེ་ཡི་འཁོར་ལྟ་བུ་རྩ་འཁོར་ལོ་བཞི་ལྟེ་བ་ལ་སྐུ་གསུང་ཐུགས་ཡེ་ཤེས་བཞིའི་ངོ་བོའི་ཐིག་ལེ་བཞི་དང་། རྩ་འདབ་རྣམས་སུ་དེའི་འཁོར་གྱི་ཐིག་ལེ་གནས། དེ་བཞིན་དུ་ལུས་ལ་ཡུལ་ཉེར་བཞིའི་རྩ་གནས་ཀྱི་རྩ་རྣམས་ཡུལ་སོ་སོའི་མཁའ་འགྲོ། རྩ་དེ་ལ་རྒྱུ་བའི་ཐིག་ལེ་ནི་ཡུལ་ཉེར་བཞིའི་དཔའ་བོ་ཡིན། མདོར་ན་རྩ་ཁྱིམ་ལྟ་བུ། རྩ་དང་ཐིག་ལེ་ནོར་ལྟ་བུ། རྩ་དང་ཐིག་ལེ་དེ་རྣམས་ལ་ཡེ་ཤེས་ཀྱི་ལྷ་དང་དཔའ་བོ་མཁའ་འགྲོ་རྣམས་རང་བཞིན་གྱིས་གནས། ཐིག་ལེ་འཕེལ་བས་ཚེ་དང་བསོད་ནམས་ཐམས་ཅད་རང་བཞིན་གྱིས་འཕེལ། ཡེ་ཤེས་རང་བཞིན་གྱིས་སྐྱེ། ཐིག་ལེ་ཉམས་པས་ཡེ་ཤེས་དང་དངོས་གྲུབ་བསོད་ནམས་ཉམས། ཐིག་ལེ་ཡུངས་ཀར་ཙམ་ཉམས་པས་རྩ་གནས་ཀྱི་མཁའ་འགྲོ་མ་སྟོང་རྩ་བརྒྱད་ལ་ཁྲག་
གི་ཕུར་པ་རེ་རེ་བཏབ་པ་དང་འདྲ་བས། མཁའ་འགྲོ་མ་རྣམས་ངུ་དི་རེ་ཡོད་པར་བཤད། རླུང་བཟུང་བས་དྲོ་སྐྱེ། དེས་བྱང་སེམས་ཞུ་ཞིང་འཕེལ། དེས་བདེ་བ་སྐྱེ། དེས་མི་རྟོག་པའི་ཡེ་ཤེས་ཤུགས་ཀྱིས་འཆར་བས་ཐབས་ཟབ་མོའི་ལམ་ཡིན་ནོ། །དེ་ལ་བསྒོམ་བྱ་རང་ཉིད་ཐུགས་རྗེ་ཆེན་པོ་རྩ་གསུམ་འཁོར་ལོ་བཞི་གསལ་བཏབ་པའི་དབུ་མའི་ཡར་སྣེ་ཚངས་བུག་ནས་ཚུར་བསྲིངས་ནས་དཔྲལ་བའི་སྨིན་མཚམས་སུ་ཟུག་སྨིན་མཚམས་སུ་རུས་གྲུ་གསུམ་གྱི་ནང་དུ། རླུང་སེམས་ཀྱི་ངོ་བོ་ཐིག་ལེ་དཀར་པོ་དཀར་ལ་འཚེར་བ་སྣུམ་ལ་འདྲིལ་བ་བདེ་བའི་ཚོར་བ་དང་ལྡན་པ་ཞིག་བསྒོམས་པ་ལ་གསལ་ཐེབ་པ་དང་། རླུང་བཏང་བ་དང་མཉམ་དུ་སྤྱི་བོར་གནས། རླུང་རྔུབ་པས་དབུ་མའི་ནང་དུ་མར་བྱུང་། རླུང་དགང་བའི་ཚེ་གསང་གནས་ཀྱི་རྩེར་བདེ་ཕྲི་ལེ་གནས་པར་བསྒོམས། རླུང་ཕར་བཏང་བ་དང་མཉམ་དུ་སྤྱི་གཙུག་ཏུ་སོང་སྟེ་སྨིན་མཚམས་སུ་གནས་པར་བསྒོམས། དེ་ལྟར་སྦྱང་བའི་ཐུན་མཚམས་སུ་ཐིག་ལེ་སྨིན་མཚམས་སུ་སོང་ནས་དེར་ཐིམ་པར་བསྒོམས་ལ་མི་དམིགས་པར་བཞག །དེ་ལྟར་བསྒོམས་པས་ལུས་ལ་རང་བཞིན་གྱི་བདེ་བ་བསྐྱེད་པར་གསུངས་པ་ཡིན་ནོ། །ཐིག་ལེ་ལ་གནོད་པའི་
མེ་དང་ཉི་མ་ལ་ཧ་ཅང་བསྡད་ཆེས་པ་མི་བྱ་སྟེ། དེའི་དོན་ཐིག་ལེའི་ཡོན་ཏན་ལུས་དཀར་ཞིང་བཀྲག་མདངས་བཟང་བར་འོང་རྒྱུ་ལ་མེ་ཉི་མ་བསྡད་ན་དེ་མི་འོང་བ་ཡིན་གྱིས། ཧ་ཅང་མི་རུང་བའི་སྐྱོན་ནི་མེད། ཐིག་ལེ་འཕེལ་བའི་རྫས་ཤ་ཆང་ཅུང་ཟད་བརྟེན་པར་གསུངས་ཏེ། ཚོགས་རྫས་སུ་བྱིན་གྱིས་རླབས་པའི་ཤ་ཆང་ཡིན་གྱི། དེ་མ་ཡིན་པར་བཟའ་བ་ནི་མ་ཡིན་ནོ། །བདེ་བའི་གནད་ཡིན་པས་དཀའ་ཐུབ་ཀྱིས་ལུས་རྒུད་པ་མི་རུང་སྟེ། ལུས་ཉམས་བཟང་ན་ཐིག་ལེ་འཕེལ། དེ་འཕེལ་ན་ཡེ་ཤེས་འཕེལ་ཕྱིར་བཟའ་བཏུང་ལུས་ལ་གང་འཕྲོད་ཚིམ་པར་བྱ་བ་ཡིན་ནོ། །སྙན་བརྒྱུད་རྣམས་ནས་སྟོབས་དང་མྱོས་བྱེད་རྒྱུན་དུ་བརྟེན། ཞེས་པ་དེ་ལའང་དགོངས་པའོ། །གལ་ཏེ་ཐིག་ལེ་བསྒོམས་པ་ཙམ་ནས་ལུས་སེམས་ལ་བདེ་བ་ཁྱད་པར་ཅན་སྐྱེ་ཐུབ་པའི་རིགས་ཀྱང་ཡོད་པས། དེ་ལྟར་བདེ་བ་ཤར་ན་བདེ་བ་ཕལ་པར་ཤོར་ན་འདོད་ཆགས་ཀྱི་དབང་དུ་འགྲོ་བས། བདེ་བའི་ངོ་བོ་ལ་བལྟས་པས་བདེ་སྟོང་དབྱེར་མེད་ཀྱི་ངང་ལ་བཞག་པར་གལ་ཆེའོ། །དེའི་དངོས་གཞི་རྩ་ཐིག་རླུང་གསུམ་བསྒོམ་བྱ་སོགས་ཐིག་ལེ་དེའང་ཞག་གསུམ་བསྒོམ་པར་མཛོད་ཅིག །དེ་ལ་ཆུ་ཟླའི་གར་
བསྒྱུར་ཞེས་བྱ་བ་སྟེ་ཐིག་ལེའི་དམིགས་རིམ་མོ། །དེ་ལྟར་རྩ་རླུང་ཐིག་ལེ་གསུམ་གྱི་དམིགས་རིམ་རྩ་བ་སོང་ནས། དེའི་བོགས་འདོན་པ་ལ། དང་པོ་དྲོད་ཀྱི་བོགས་འདོན་གཏུམ་མོ་བསྒོམ་པ་ཡིན། རྩ་གསུམ་འདུས་མདོར་མ་ལས་ཐོབ་པའི་རཀྟའི་དྭངས་མ་སྲན་མ་ཙམ་ཡོད་པ་འདི་ཉིད་རླུང་གིས་བསྐུལ་ནས་གྱེན་དུ་འབར་ཞིང་མ་དག་པའི་ཕུང་ཁམས་སྐྱེ་མཆེད་བསྲེགས་ནུས་པ་ཡུམ་རྡོ་རྗེ་ཕག་མོའི་ངོ་བོར་བཞུགས་པ། དེ་གྱེན་དུ་འབར་བ་ནས་སུམ་འཁྱོག་ཨ་ཐུང་ངུའི་གཟུགས་སུ་གནས་པས་ཨ་ཐུང་ཟེར། ཉོན་མོངས་པ་ཐམས་ཅད་གཅོད་པས་གཏུམ། །ཕག་མོའི་ངོ་བོ་ཡིན་པས་མོ་ཞེས་བྱ་སྟེ། དེ་ཉིད་བསྒོམ་པ་ནི། རང་ཉིད་ཐུགས་རྗེ་ཆེན་པོ་རྒྱལ་བ་རྒྱ་མཚོའི་རྩ་གསུམ་འཁོར་ལོ་བཞི་དང་བཅས་པ་གསལ་བའི། ལྟེ་འོག་སོར་བཞི་མན་ཆད་ནང་གཅིག་ཏུ་གྱུར་པའི་ནང་། ལྟེ་བའི་འོག་གསང་བའི་སྟེང་རྒྱུ་ཞབས་གཉེར་འཚམས་ཀྱི་ཐད་དབུས་མའི་ནང་དུ་མེའི་ཆོས་འབྱུང་གྲུ་གསུམ་གྱི་དབུས་སུ། ཡེ་ཤེས་ཀྱི་གཏུམ་མོ་ཐིག་ལེ་དམར་པོ་སྲན་མ་ཙམ་ཁ་དོག་དམར་ལ་རེག་བྱ་ཚ་བ། ངོ་བོ་སྟོང་པ་ཉིད། རྣམ་པ་བདེ་བ་སྟེ། མཚན་ཉིད་བཞི་དང་ལྡན་པར་བསྒོམས། དེ་ནས་རླུང་བཟུང་བས་རོ་རྐྱང་གཉིས་
ནས་སོང་བས། མེ་ཁྲོལ་ལ་སྦྱད་པ་བརྒྱབས་པ་ལྟར་རྩེ་ནས་མེ་དམར་གྱུར་གྱིས་འབར་དེར་མེ་དེ་ཡང་གཅན་གཟན་གྱི་སྤུ་ཙམ་རྩེ་མོ་སུམ་འཁྱོག་ཏུ་ཡོད་པ་ལ་སེམས་གཏད། དེ་ནས་ཁབ་ཙམ་སྐད་ཅིག་ཀྱང་མི་སྡོད་པར་གསལ་བ། དེ་ནས་སོར་བཞི་ཙམ་ལ་སེམས་གཏད། དེ་ནས་མེ་དེ་ཡང་རྩ་བ་སྦོམ་པ་རྩེ་མོ་ཕྲ་ཞིང་གཡོ་བ་སྐད་ཅིག་ཀྱང་མི་སྡོད་པར་གཡོ་བ། རྩེ་མོ་དྷུ་ཏིའི་ནང་ན་དམར་ཉུག་ཉུག་བྱེད་པར་བསྒོམ། དེར་རླུང་བཟུང་བས་མེ་ཆེར་འབར་ཏེ། ལྟེ་བའི་རྩ་འདབ་དྲུག་ཅུ་རེ་བཞི་མེས་གང་བར་བསྒོམས་ལ། འཁྲུལ་པའི་འཁོར་དྲུག་པ་བྱ་སྟེ། དང་པོ་རྐང་པ་རྡོར་སྐྱིལ་ལམ་སེམས་སྐྱིལ་བྱ། ལ་ཚིགས་བསྲངས། ལག་གཉིས་ཁུ་ཚུར་སྲིན་ལག་མཐེ་བོང་གིས་མནན་ལཾ། བརླ་རྩ་དཔྱི་ཟུར་དུ་མནན་ལ། སྒལ་ཚིགས་ཆེར་མི་འགུལ་བར་ཕོ་བ་གཡས་སུ་ལན་གསུམ་གཡོན་དུ་ལན་གསུམ་བསྐོར་རོ། །དེས་ལྟེ་བའི་རྩ་མདུད་གྲོལ་ལོ། །དེ་ནས་རླུང་བཟུང་བས་མེ་ཆེར་འབར་སྙིང་ཁའི་རྩ་འདབ་ཐམས་ཅད་མེས་གང་བར་བསྒོམས་ལ། ལག་གཉིས་མཐེ་བོང་སྲིན་རྩ་མནན་ནས་བརླ་རྩ་དཔྱི་ཟུར་ཁུ་ཚུར་གྱིས་མནན། དཔུང་པ་བརྒྱངས་ལ་ངོ་དང་རོ་སྟོད་གཉིས་ག་ཕྱོགས་
གཅིག་ཏུ་གཡས་སུ་དྲག་གཅུ་གཡོན་དུ་དྲག་གཅུ་བ་གསུམ་རེ་བྱ། དེས་སྙིང་ཁའི་རྩ་མདུད་གྲོལ་བར་བྱེད་དོ། ཡང་རླུང་བཟུང་བས་མགྲིན་པའི་རྩ་འདབ་བཅུ་དྲུག་མེས་གང་བར་བསྒོམས་ལ། ལག་པ་སྔར་བཞིན་ལ། མགྲིན་པ་ལྷོད་ལ་གཡས་བསྐོར་དུ་ལན་གསུམ། གཡོན་བསྐོར་དུ་ལན་གསུམ་བསྐོར་བས། མགྲིན་པའི་རྩ་མདུད་གྲོལ་ལོ། །དེ་ནས་རླུང་བཟུང་བས་ཡེ་ཤེས་ཀྱི་མེ་འབར་སྤྱི་བོའི་རྩ་འདབ་སུམ་ཅུ་སོ་གཉིས་གང་བར་བསྒོམས་ལ། མགོ་འགུགས་པས་མ་ནེ་བྲང་ལ་རྡེབ་མ་ཐག །མགོ་བོ་ཤེད་ཀྱིས་རྒྱབ་ལྟག་ཁུང་དུ་འཕེན། དེ་ལྟར་དགྱེ་དགུ་ལན་གསུམ་གྱིས། སྤྱི་བོའི་རྩ་མདུད་གྲོལ་ལོ། །རླུང་བཟུང་བས་མེ་ཆེར་འབར་ལག་པ་གཡས་དང་རྐང་པ་གཡས་ཀྱི་རྩ་ཐམས་ཅད་གང་བར་བསྒོམས་ལ། རྐང་པ་གཡས་དང་ལག་པ་གཡས་དུས་མཉམ་དུ་སྤྲུག་སྟེ་ཤེད་ཀྱིས་བརྐྱངས། དེ་མ་ཐག་དུས་མཉམ་དུ་དྲག་ཏུ་བསྐུམས་ནས། ཁུ་ཚུར་ནུ་མའི་སྟེང་དུ་གྲུ་མོས་རྩིབ་ལོགས་སྟེང་དང་རྐང་པའི་ཕྱི་རྙིང་གི་ཨོཾང་ཚོས་སྟེང་དུ་དུས་གཅིག་ལ་བརྡབ། དེ་འདྲ་གསུམ་བྱ། ཡང་རླུང་བཟུང་བ་དང་བཅས་མེ་འབར་ནས་རྐང་པ་གཡོན་དང་ལག་པ་གཡོན་གྱི་རྩ་འཁོར་ཐམས་ཅད་མེས་གང་བར་
བསྒོམས་ལ། ལག་གཡོན་དང་རྐང་གཡོན་དུས་མཉམ་དུ་སྤྲུག་ཅིང་བརྐྱངས། དེ་མ་ཐག་བསྐུམ་པ་ཁུ་ཚུར་དང་གྲུ་མོ་ཕྱི་རྟིང་གསུམ་གྱི་ནུ་མ་རྩིབ་ལོགས་ཨོཾང་ཚོས་གསུམ་ལ་བརྡབ། དེས་ཚིགས་ཀྱི་རྩ་མདུད་གྲོལ་ལོ། །དེ་ནས་རླུང་བཟུང་བས་རྐང་མཐིལ་ཡན་སྤྱི་བོའི་མན་གྱི་ལུས་ཐམས་ཅད་མེས་གང་། བ་སྤུའི་བུ་ག་ནས་མེ་ལྕེ་དམར་ཉུག་ཉུག་བྱུང་བར་བསྒོམས་ལ། རྐང་ལག་གཡས་གཉིས་ཁུ་ཚུར་དང་གྲུ་མོ་ཕྱི་རྟིང་ལ་མི་རྡེབ་པར་བརྐྱང་བསྐུམ་ལན་གསུམ་བྱ། གཡོན་ཡང་དེ་ལྟར་ལན་གསུམ་བྱས་མ་ཐག་གཡས་གཡོན་རོ་སྟོད་ཆ་གཉིས་དལ་དབུས་མདུན་ངོས་སུ་གཡས་གཅུ་གཡོན་གཅུ་བྱས་ལ། དེ་མ་ཐག་ལུས་ཐམས་ཅད་རྟའི་སྤྲུག་གསིག་འདྲ་བ་བྱས་མ་ཐག །ཁ་ནས་ཧཱ་ཧཱ་ཞེས་པ་དང་མཉམ་དུ་རླུང་ཐམས་ཅད་ཁ་ནས་ཕར་ལྷག་མ་མེད་པར་འབུད་དོ། །དེས་རྩ་ཐམས་ཅད་འདུལ་བ་ཡིན་ནོ། །དེ་རྣམས་དང་པོ་འཁྲུལ་འཁོར་རེ་རེ་དང་དམིགས་པ་རེ་རེ་ནས་སྦྱང་དེ། གོམས་ནས་རླུང་མི་བཏང་བར་རླུང་ཁུག་པ་གཅིག་གི་ནང་དུ་འཁྲུལ་འཁོར་དེ་དྲུག་ཐམས་ཅད་རྫོགས་པར་བྱ་བ་ཡིན་ནོ། །དེ་ལྟར་འཁྲུལ་འཁོར་འདི་དྲུག་ཟབ་ཆོས་ཐམས་ཅད་ནས། འཁྲུལ་འཁོར་དྲུག་པ་ཟེར།
ཆོས་དྲུག་ལྟར་ན་རོ་དྲུག་བསྐོར་དུ་དྲག་སྟེ། འདི་ལ་ཕྱག་ལེན་ཅུང་ཟད་མི་འདྲ་བ་མང་ཡང་རང་ལུགས། རྗེ་ཆོས་ཀྱི་དབང་ཕྱུག་གིས་གསུངས་པའི་རྩ་ཚིག་ནི། ལུས་ཀྱི་སྟོད་སྨད་རང་བབ་ལ། །ཕོ་བ་གཡས་སུ་ལན་གསུམ་བསྐོར། །གཡོན་ལ་ཡང་དེ་བཞིན་བསྐོར་བ་ཡིས། །ལྟེ་བའི་རྩ་མདུད་གྲོལ་བར་བྱེད། །རོ་སྟོད་གཡས་གཡོན་གཅུ་བ་དང་། །བཞིན་ཀྱང་དེ་ཡི་ཕྱོགས་དྲུག་གཅུད། །དེ་ལྟར་ལན་གསུམ་བྱས་པ་ཡིས། །སྙིང་ཁའི་རྩ་མདུད་གྲོལ་བར་བྱེད། །མགྲིན་པའི་རྩོལ་དུ་ལྷོད་ཀློད་ནས། །གཡས་གཡོན་གསུམ་གསུམ་བསྐོར་བ་ཡིས། །མགྲིན་པའི་རྩ་མདུད་གྲོལ་བར་བྱེད། །མགྲིན་པ་རྩོལ་མེད་སྔར་ལྟར་ལ། །ཀོས་ཀོས་བྲང་ལ་བརྡེག་མ་ཐག །མགོ་བོ་རྒྱབ་ཏུ་ཤུགས་ཀྱིས་འཕངས། །དེ་ལྟར་དགྱེ་དགུ་ལན་གསུམ་གྱིས། །སྤྱི་བོའི་རྩ་མདུད་གྲོལ་བར་བྱེད། །གཡས་ཀྱི་རྐང་ལག་སྤྲུག་སྟེ་བརྐྱངས། །ཁུ་ཚུར་ནུ་མའི་སྟེང་དུ་དང་། །གྲུ་མོ་རྩིབ་ལོགས་རྟིང་པ་ཡང་། །འཕོངས་ཚོས་སྟེང་དུ་བརྡབ་པ་གསུམ། །ལྷན་ཅིག་སྦྲག་སྟེ་ལན་གསུམ་བརྡེག །དེ་བཞིན་གཡོན་ལའང་བྱས་པ་ཡིས། །ཚིགས་ཀྱི་རྩ་མདུད་གྲོལ་བར་བྱེད། །ཁུར་ཚུར་རྡེབ་པ་མ་རྟོགས་པ། །
ལྷག་མ་ལུས་སྦྱོང་རྩ་ཁྲུས་ཀྱིས། །སྐབས་བཞིན་ལན་རེ་བྱས་པའི་མཐར། །གཡས་གཡོན་རོ་སྟོད་མདུན་ཕྱོགས་སུ། །ཐོག་མར་དལ་གྱིས་གཅུ་བྱ་ཞིང་། །དེ་ནས་རྟ་དྲེལ་སྤྲུག་པ་ལྟར། །ལུས་ཀུན་སྤྲུག་ཅིང་རླུང་རྣམས་ཀྱང་། །ཁ་ནས་ཧ་རིང་འདོན་པ་དང་། །ལྷན་ཅིག་ལྷག་མ་མེད་པར་བུས། །དེས་ནི་རྩ་ཀུན་འདུལ་བ་ཡིན། །སྐལ་ལྡན་རྣམས་ཀྱི་ཉམས་སུ་ལོངས། །ཞེས་གསུངས་སོ། །འདི་ལྟར་གཏུམ་མོ་སྒོམ་ཚེ་གོས་ཅུང་ཟད་བསྲབ་པར་བྱ། དེ་ཡང་གོས་སྤུ་ཅན་གྱོན་ན་དྲོད་སྐྱེས་མ་སྐྱེས་མི་ཚོར་བ་ཡིན། དྲོད་ཀྱང་ལུས་སྟོད་སྨད་གང་རུང་ནས་ལག་མཐིལ་ཙམ་ཇེ་ཆེར་སྐྱེ་བ་ཡང་ཡོད། ལུས་ཕྱི་ནས་དྲོད་སྐྱེ་བ་དང་། ནང་ནས་སྐྱེ་བ་ཡང་ཡོད། འདི་སྐབས་ལུས་དྲི་ཆུས་བཀྲུས་རྗེས། སྨན་ཤུ་དག་ནག་པོ་ཞིབ་པར་བཏུལ་ལ་མར་རྙིང་ཁ་ཚ་དང་སྦྱར་ཏེ། ལུས་ལ་བྱུག་དྲོད་སྐྱེ་མྱུར་བར་གསུངས་སོ། །འཁྲུལ་འཁོར་ཉིན་རེ་ཚར་རེ་ཙམ་ལས་མ་འཕྲོད་ནའང་། རྒྱུན་དུ་མེའི་དམིགས་པ་ཁོ་ན་བསྒོམ། ཡང་རླུང་ཁུག་པ་བཅུས་ལྟེ་བའི་རྩ་འཁོར་གང་། དེ་ནས་རླུང་ཁུག་བཅུས་མེ་མར་སོང་རྐང་མཐིལ་ཡན་གང་། བཅུས་སྙིང་ཁ། བཅུས་མགྲིན་པ། བཅུས་སྤྱི་བོ་
གང་བར་བསྒོམས་ནས་རླུང་དང་སྦྲགསཔས་དྲོད་སྐྱེ་མྱུར། ཐུན་མཚམས་སུ་མེ་ཐམས་ཅད་ལྟེ་བའི་ཐིག་ལེ་ཨ་ཐུང་ལ་ཐིམ་པར་བསྒོམས་ལ་དམིགས་པར་བཞག་གོ །གཏུམ་མོ་བསྒོམས་པས་ཟས་སྔར་ལས་ཞུ་ཆེ་བས་ལྟོགས་སྣང་ཆེ་བ་དང་། གོས་བསྲབས་པས་དྲོས་པ་དང་། ཉེ་ལོགས་ཀྱི་ཆུ་སོགས་ཆེར་མི་འཁེང་བ་དང་། ལུས་ལ་དྲོད་ཆེ་བ་དང་། སྣང་བ་དྲོའུ་རེ་བ་འཁྱག་སྣང་ཆུང་བ་འབྱུང་ངོ་། །སྦ་ལྕག་མའི་གཞུང་ལས། མེ་འབར་ཉོན་མོངས་རབ་བསྲེགས་ནས། །ཞེས་སོགས་རྒྱ་ཆེར་གསུངས་པའི་དོན་གོ་བདེ་བར་བྱས་སོ། །འདི་ལྟར་གཏུམ་མོ་སྒོམ་ཚེ་དྲོད་སྐྱེ་བའི་འཁྲུལ་འཁོར་གྱིས་ལུས་གནད་ཐབ་མགར་གྱི་ཕྱག་རྒྱ་བཅོ་བརྒྱད་ཅེས་ཀྱང་བྱ། མེ་ཐབས་དྲུག་ཆིངས་ཞེས་ཀྱང་བྱ་སྟེ། ལུས་ཙོག་པུར་འདུག །སྒལ་ཚིགས་བསྲངས། ལོང་མོའི་ཐད་རྐང་འགག་གཉིས་སྤུས་མོ་གཉིས་བསླང་བའི་སྟེང་དུ། ལག་པ་གཉིས་བསྣོལ་ཏེ་གྲུ་མོ་གཉིས་སྤུས་མོ་གཉིས་ཀྱི་སྟེང་དུ་བཞག །ལག་མཐིལ་གཉིས་དཔུང་པ་གཡས་གཡོན་སྟེང་དུ་སྦྱར། དེ་རྒྱབ་ནས་བསྒོམ་ཐག་ཡོད་ན་བཅིང་ངོ་། །དེས་རྐང་པ་ཐབ་མགར་གྲུ་གསུམ་པ་གཉིས། ལག་པ་ལ་བཞི་སྟེ་དྲུག །ནང་རྩ་ལ་ཡང་དེ་ལྟར་
དྲུག །གསང་བ་རླུང་དང་ཐིག་ལེ་ལ་ཡང་དྲུག་ཏུ་འབྱུང་བས་མེ་ཐབ་དྲུག་གསུམ་བཅོ་བརྒྱད་འབྱུང་བ་ཡིན། འདི་འཁྱག་དུས་དང་རྣམ་སྣང་ཆོས་བདུན་མ་ཐུབ་དུས་བྱ། འདི་ལྟར་ནུབ་སྔས་སྤངས་ན་ཡང་འདི་ལྟར་གོམས་ན་ཙོག་པུར་ཉལ་ཆོག་པ་ཡིན། འདི་སྐབས་སུ་རྩ་གསུམ་འཁོར་ལོ་བཞིར་གསལ་བཏབ། ལྟེ་བའི་གཏུམ་མོ་འབར་བས་འཁོར་བའི་སྟོན་བྱེད་པའི་རྩ་ཐམས་ཅད་དང་རྩ་མདུད་ཐམས་ཅད་བསྲེགས། ཡེ་ཤེས་ཀྱི་དབུ་མ་མ་གཏོགས་འཁོར་བའི་དབུ་མ་ཡང་བསྲེགས། མདོར་ན་མ་དག་པའི་ལུས་ཕུང་ཁམས་སྐྱེ་མཆེད་ཞི་ཐམས་ཅད་བསྲེགས་ནས། དག་པ་ཡེ་ཤེས་ཀྱི་ལུས་ཐུགས་རྗེ་ཆེན་པོའི་སྐུར་གྱུར་པའི་ལུས། ཕྱི་ནང་ཐམས་ཅད་ཡེ་ཤེས་ཀྱི་མེ་འབར་བའི་རང་བཞིན་དུ་གྱུར། རེས་འགའ་སྐུ་ལུས་ལས་འབར་བའི་མེ་དཔག་ཚད་ཙམ་གྱིས་བར་དུ་འབར་ཏེ་གནོད་བྱེད་ཐམས་ཅད་བསྲེགས། མེ་ཚུར་འདུས་ཇེ་ཆུང་དུ་ལྟེ་བའི་ཨ་ཐུང་ལ་ཐིམ། ཡང་རླུང་བཟུང་བས་ཇེ་ཆེར་འབར། བ་སྤུའི་བུ་ག་དང་དབང་པོའི་སྒོ་དང་ཚངས་བུག་ནས་ཐོན། ལུས་ཐམས་ཅད་ལ་གོས་ལྟར་དཀྲིས་པར་བསྒོམས་པས་དྲོད་སྐྱེ་བར་གསུངས་སོ། །དེ་ལ་དངོས་སུ་དྲོད་ཕེབ་པ་ལ་རླུང་བཟུང་
བའི་ངང་ནས་འཁྲུལ་འཁོར་གལ་ཆེ་བས། སྐབས་འདིར་ལུས་སྦྱོང་སོ་བདུན་མ་བྱ་སྟེ། དེའི་སྡོམ་ཚིག་ཞྭ་དམར་དྲུག་པས་བཀའ་སྩལ་པ། ས་ནོན་བྱས་ལ་ཕོ་བ་ནི། །གཡས་གཡོན་གསུམ་གསུམ་བསྐོར་བ་དྲུག །པུས་མོ་གཡས་པར་འཇུས་ནས་ནི། །དེ་བཞིན་དྲུག་དང་གཡོན་ལའང་དྲུག །མཐེ་བོང་སྲིན་རྩ་མནན་ནས་ཀྱང་། །གཡས་གཡོན་ཁུ་ཚུར་ཞགས་འཕེན་དྲུག །གཡས་གཡོན་མདའ་འགེང་བྱེད་པ་དྲུག །གཡས་གཡོན་ལག་པའི་ནང་བཤད་དྲུག །ལུས་ཀུན་སྤྲུག་དང་སོ་བདུན་ནོ། །ཞེས་གསུངས་ཏེ་གོ་སླ་ན་ཡང་། དང་པོ་ལག་པ་གཉིས་པུས་མོའི་སྟེང་དུ་བཀབ་ལ་ཕོ་བ་གཡས་སྐོར་གཡོན་སྐོར་གསུམ་སྟེ་སྒལ་ཚིགས་ཆེར་མི་འགུལ་བར་བྱ། དེ་ནས་ལག་པ་གཉིས་སོར་མོ་བསྣོལ་བས་པུས་མོ་གཡས་ལ་འཇུས་ལ་ཕོ་བ་གཡས་སྐོར་གསུམ་གཡོན་སྐོར་གསུམ། དེ་ནས་མཐེ་བོང་སྲིན་རྩ་མནན་པའི་ཁུ་ཚུར་རེ་རེ། ཡང་ན་སོར་མོ་བརྐྱང་བ་ཤེད་ཀྱིས་བཀུག་སྟེ། སྡུམ་བུ་ཆུ་སྲིན་སྡེར་མོ་འདྲ་བ་བྱས་ལ། ལག་པ་པུས་མོའི་སྟེང་ངོས་ན་ཁྱེར་ཏེ་མགོ་ལ་གཡོན་སྐོར་གཅིག་བྱས་མ་ཐག །ལག་པ་སྤྲུག་ལ་ཤེད་ཀྱིས་གཡས་བརྐྱང་དེ་འདྲ་གསུམ་བྱ། གཡོན་པས་ཀྱང་མགོ་ལ་གཡས་སུ་
བསྐོར་ཞིང་སྔོན་ལྟར་གསུམ། ལག་གཉིས་ཁུ་ཚུར་བྱས་ལ་མདའ་འཕེན་བཏང་བྱས་ལ། གྲུ་མོས་རྩིབ་ལོགས་ལ་བརྡབ་པ་གསུམ། གཡོན་པས་གཡས་ངོས་ལྟར་ལག་པ་གཞུ་བཟུང་བ་ལྟར་མདའ་འཕེན་བཏང་གསུམ་སྔར་ལྟར། ལག་གཉིས་ཁུ་ཚུར་བྱས་ལ་ལག་གཡོན་བརྐྱང་བའི་ནང་ངོས་གཡས་ཀྱིས་ལན་གསུམ་བཤད། གཡས་ལའང་དེ་ལྟར་གསུམ་བྱ། དེ་ནས་རླུང་རོ་འབུད་པ་དང་མཉམ་དུ་ལུས་རྟའི་སྤུག་གསིགས་ལྟར་ཧྲི་ལི་ལི་སྤྲུག་པ་དང་སོ་བདུན་ཏེ། དང་པོ་སོ་སོར་བྱ། གོམས་ནས་རླུང་ཁུག་པ་གཅིག་གི་སྟེང་དུ་སོ་བདུན་རྫོགས་པར་བྱ་དགོས་པ་ཡིན་ཞེས་རྟོགས་ལྡན་རྣམས་ཀྱིས་གསུངས་སོ། །འཁྲུལ་འཁོར་ལ་བརྩོན་པར་ཞུའོ། །དེ་ནས་བདེ་བའི་བོགས་འདོན་པ་ནི། རང་ཉིད་ཐུགས་རྗེ་ཆེན་པོ་རྩ་གསུམ་འཁོར་ལོ་བཞི་གསལ་བཏབ་ལ། སྤྱི་བོ་བདེ་ཆེན་འཁོར་ལོའི་དབུས་དབུ་མའི་ནང་དུ། བྱང་སེམས་དཀར་པོ་དྭངས་མ་ཐིག་ལེ་དཀར་པོ་དབྱིབས་ཟླ་བ་ཉ་གང་བ་འདྲ་བ་དཀར་ལ་འཚེར་བའི་ལྟེ་བའི། ཡི་གེ་ཧཱུྃ་ཡིག་དཀར་པོ་མགོ་ཐུར་དུ་བསྟན་པ་གཅིག་བསྒོམས། ལྟེ་བ་སྤྲུལ་པའི་འཁོར་ལོའི་དབུས་དྷུ་ཏིའི་ནང་དུ་ཡེ་ཤེས་ཀྱི་གཏུམ་མོ་མེའི་ཐིག་ལེ་དམར་པོ་སྲན་
མ་ཙམ་བསྒོམས། རླུང་བཟུང་བས་མེ་སོར་གང་ལྷག་ཙམ་འབར་བའི་འོད་དེས། དཔེར་ན་མར་མེའི་རྩེས་ཡ་ཟད་ཀྱི་མར་ཁུ་ཐུབ་པ་ལྟར། ཧཾ་ཡིག་དང་ཟླ་བ་ཅུང་ཟད་རྡུལ་ནས་ཧཾ་ཡིག་རྩེ་ནས་ཟག་ལ་ཁད་དུ་གྱུར། ཡང་རླུང་བཟུང་བས་མེ་སོར་གཉིས་ཙམ་འབར་བས། ཧཾ་ཡིག་གི་རྩེ་ནས་བྱང་སེམས་དཀར་པོ་ཡུངས་ཀར་ཙམ་ཐིག་པ་འཛག་པ་ལྟར་མང་དུ་འཛག་པ་དབུ་མའི་ནང་ནས། མགྲིན་པར་བབ། དེ་ནས་སྙིང་ཁར་བབ། ཡང་རླུང་བཟུང་བས་མེ་སོར་བརྒྱད་ཙམ་འབར་བས་ཐིག་ལེ་མར་བབསནས་གཏུམ་མོའི་མེ་དང་གཉིས་མེད་དུ་འདྲེས་མ་ཐག་་དཀར་ལ་དམར་བའི་མདངས་ཆགས་པའི་ཐིག་ལེའི་ལུས་ཐམས་ཅད་གང་ནས་ལུས་སེམས་ཐམས་ཅད་བདེ་བ་ཆེན་པོའི་ཁྱབ་པོར་བསྒོམས། ཡང་རླུང་བཟུང་བས་གཏུམ་མོའི་མེ་དབུ་མའི་ནང་དུ་ཡར་ནར་གྱིས་སོང་། སྤྱི་བོའི་ཧཾ་ཡིག་ལ་རེག་མ་ཐག་ལུས་ཐམས་ཅད་ཐིག་ལེ་དམར་པོས་གང་། སླར་ཧཾ་ཡིག་ལས་ཐིག་ལེ་དཀར་པོ་བབ་པས་མེ་ཞི་སྟེ་མེ་ལྟེ་བར་སོར་བཞི་ཙམ་དུ་གྱུར་མ་ཐག་ལུས་ཐམས་ཅད་བྱང་སེམས་དཀར་པོས་གང་བས་བདེ་བ་ཚད་མེད་སྐྱེས་པར་བསྒོམས། དེ་ནས་འབྲོས་དེད་ཀྱི་དམིགས་པ་ཞེས་བྱའོ། །དེ་ལྟར་བསྒོམས་པས་
བདེ་བ་སྐྱེ་མ་ཐུབ་ན། པུས་མོ་གཉིས་སྦྱར་རྐང་མགོ་གཉིས་ཕྱིར་བསྐྱེད་ལག་པ་གཉིས་པུས་མོ་ལ་འཁྱུད་དེ། རླུང་བཟུང་ལ་སྤྱི་བོའི་ཧཾ་ཡིག་ལས་ཐིག་ལེ་ཧཱུྃ་ཡིག་དཀར་པོ་བདེ་བའི་རང་བཞིན་གཅིག་ཚད་དེ་དབུ་མའི་ནང་ནས་མར་བྱུང་། གསང་གནས་རྡོ་རྗེའི་རྩེ་མོར་བདེ་ཕྲི་ལེ་གནས་པར་བསྒོམས་ལ། འོག་རླུང་ཡར་རྔུབ་པ་དང་ཕྱིར་ཕུལ་བའི་ཚུལ་མང་དུ་བྱས་པས་བདེ་བ་སྐྱེ། ཐིག་ལེ་འཆོར་དོགས་ཙམ་ན་ཧཱུྃ་ཡིག་དེ་སྤྱི་བོར་རྒྱངས་ཀྱིས་སོང་ནས་སྤྱི་བོའི་ཧཾ་ལ་ཐིམ། སྤྱི་བོའི་ཚངས་བུག་རྡོ་རྗེ་རྒྱ་གྲམ་དཀར་པོ་ཞིག་གིས་བཀག་པར་བསྒོམས་ལ་ཕྱག་ཆེན་ངང་ལ་བཞག་གོ །བདག་གི་མཁས་གྲུབ་ལུང་རིགས་ཉི་མའི་ཞལ་ནས། གཏུམ་མོ་སྡུག་བསྔལ་གྱི་དུས་སུ་སྙིང་རུས་བསྐྱེད། གཏུམ་མོ་འདོད་ཆགས་ཀྱི་དུས་སུ་སྟོང་ཉིད་ཀྱིས་རྒྱས་གདབ། ཅེས་གསུངས་པས། དང་པོ་རྩ་རྒོད་རླུང་རྒོད་མི་ཆུན། འཁྲུལ་འཁོར་བྱས་པས་ལུས་ངལ་ཅིང་དུབ། དམིགས་པ་མང་བས་མི་ཟིན། སྐྱུར་སྙིང་འདོད་པ་འབྱུང་། དེ་དུས་མི་སྐྱུར་བར་སྙིང་རུས་བསྐྱེད་དགོས། དེ་ནས་བདེ་དྲོད་ཀྱི་ཉམས་ཅུང་ཟད་སྐྱེས་ན་སོ་གཞོན་པའི་སྟེང་དུ་ཐིག་ལེ་འཕེལ་བས་འདོད་ཆགས་ཤས་ཆེ། བུད་མེད་
སོགས་ཡིད་ལ་འཕྲེང་། དེ་དུས་བདེ་བ་དེའི་ངོ་བོ་ལ་བལྟས་པས་བདེ་བ་དང་སྟོང་པ་འདྲེས་ན་ཏིང་ངེ་འཛིན་བཟང་པོ་འཆར་བ་ཡིན་པར་འདུག །གེགས་སེལ་མང་དུ་གསུངས་ཀྱང་། གྲང་བའི་ནད་ཐམས་ཅད་དང་གདོན་གྱི་གནོད་པ་ཐམས་ཅད་གཏུམ་མོའི་མེ་སྦར་བས་སེལ། ཚད་པའི་ནད་དང་རླུང་ནད་དང་། གློ་མི་བདེ་བའི་ནད་ཐམས་ཅད་ཐིག་ལེ་འབེབས་པའི་དམིགས་པས་སེལ། འདུས་པའི་ནད་ཐམས་ཅད་རླུང་དང་མེ་དང་ཐིག་ལེ་གསུམ་ཆ་སྙོམ་དུ་བསྒོམས་པས་སེལ། བྱིང་རྨུགས་ཐམས་ཅད་རླུང་བཟུང་བས་སེལ། རྣམ་རྟོག་འཕྲོ་རྒོད་ཐམས་ཅད་གཏུམ་མོའི་ཐིག་ལེ་ཁོ་ན་ལ་སེམས་བཟུང་ངོ་། །དེ་ལྟར་ཐིག་ལེའི་དམིགས་པ་འདི་ཡུན་རིང་བསྒོམ། མདོར་ན་རྒྱུན་དུ་རང་ཐུགས་རྗེ་ཆེན་པོ་རྩ་གསུམ་འཁོར་ལོ་བཞིར་གསལ་བཏབ། རླུང་བཟུང་མེ་སྦར་ཐིག་ལེ་དབབ་ངོ་བོ་ལྟ་བ་ཁོ་ན་རྒྱུན་དུ་ཉམས་སུ་ལོངས་ཤིག །དེ་ནས་མི་རྟོག་པའི་བོགས་དབྱུང་བ་ནི། ལུས་རྣམ་སྣང་གི་ཆོས་བདུན་སྤང་ལ་ཕུར་པ་བཏབ་པ་ལྟར་གཡོ་འགུལ་མེད་པར་བཅའ། མིག་ནམ་མཁའ་སྔོ་སང་ངེ་བའི་དཀྱིལ་དུ་ལྕེ་རེ་ལྟ། རླུང་འཇམ་རླུང་ཅུང་ཟད་བཟུང་ལ། མེ་དང་ཐིག་ལེ་དང་རྩ་དང་སྟོང་ར་སོགས་
གང་ཡང་ཡིད་ལ་མི་བསམ་པར། ལུས་ངག་ཡིད་གསུམ་འདི་བྱ་འདི་བྱེད་མེད་པར་ལྷན་ནེ་བཞག་གོ །དེའི་ཚེ་ཡི་དམ་གྱི་སྐུའམ། རྩ་དང་རླུང་དང་ཐིག་ལེ་དང་། དྲོད་དང་བདེ་བ་ལ་སོགས་པའི་རྣམ་རྟོག་ཤར་ནའང་། གང་ཤར་དེའི་ངོ་བོ་ལ་བཅོས་སླད་མེད་པར་བཞག །ཡང་ཐ་མལ་པའི་རྟོག་པ་ཅིག་འཕྲེང་བྱུང་ན་ཡང་དེའི་ངོ་བོ་ལ་ཅེར་གྱིས་བལྟས་ལ་བཞག །དེ་ལྟར་བཞག་པས་རིག་པ་དྭངས་སེང་ངེ་བ་ཆུ་དྭངས་མ་ལྟ་བུ་དང་། གསལ་སེང་ངེ་བ་མར་མེ་རླུང་གིས་མ་བསྐྱོད་པ་ལྟ་བུ་དང་། རྣམ་རྟོག་ཆེར་མི་སྐྱེ་བ་རྒྱ་མཚོ་རླུང་གིས་མི་བསྐྱོད་པ་ལྟ་བུའི་ཉམས་འཆར་རོ། །དེ་ནས་རྒྱུན་དུ་ནི་སྐད་ཅིག་དྲན་རྫོགས་སུ་ཐུགས་རྗེ་ཆེན་པོ་རྩ་གསུམ་འཁོར་ལོ་བཞི་སྤྱི་བོའི་ཧཾ་དང་ལྟེ་བའི་ཨ་ཐུང་རྣམས་གསལ་བཏབ། རླུང་རོ་བུས་ལ་རླུང་བཟུང་ལྟེ་བའི་གཏུམ་མོ་སྦྱར་བས་སྤྱི་བོའི་ཧཾ་ལས་བྱང་སེམས་བབས་པས་རྩ་གནས་གང་། བདེ་བའི་ཉམས་སྐྱེས་ཙམ་ན་དེའི་ངོ་བོ་ལ་བལྟས་ལ་བདེ་སྟོང་དབྱེར་མེད་དུ་བསྲེ། བདེ་སྟོང་འདྲེས་པའི་ཉམས་དེ་སྐྱེ་ཅི་ཐུབ། གནས་ཅི་ཐུབ། ཡུན་བསྲིང་ཅི་ཐུབ་ལ་འབད། དེ་ཡང་ད་ནངས་སྔ་མོ་རླུང་འབུད་པ་དགུ་སྤྲུག་ཅིག་བྱས་པས་ཁམས་དང་རིག་པ་
གསལ། དེ་ནས་རྒྱུན་དུ་རླུང་བཟུང་མ་འཕྲོད་ན་ཡང་། དེ་ཉིན་རླུང་ནམ་བཟུང་བཟུང་འབུད་པ་དགུ་སྤྲུག་མི་དགོས། སྣ་གཉིས་ནས་ལན་རེ་འབུད་པས་ཆོག །ལུས་གནད་ཀྱང་རྣམ་སྣང་ཆོས་བདུན་ནམ། མེ་ཐབ་དྲུག་ཆིངས་རླུང་ནམ་བཟུང་ཐུབ་ན་ལེགས། མ་ཐུབ་ན་ཡང་སྒལ་ཚིགས་དེ་དྲང་པོར་བསྲངས་ནས་ལུས་ཇི་ལྟར་བྱས་ཀྱང་བཟུང་རུང་། ཉལ་བའི་ཚེ་ཡང་སྔས་དམའ་བ་ལ་ཧྲིང་ཉལ་བྱས་ཏེ་སྒལ་ཚིགས་དྲང་པོར་ཡོད་ན་འཇམ་རླུང་བཟུང་རུང་བར་གསུངས། ཡང་གཏུམ་མོའི་གནད་ཀྱིས་གོས་བསྲབས་པས་དྲོས་པའི་འཁྲུལ་འཁོར་ནི། སྔས་དམའ་བར་བྱས་ལ་མགོ་བཀུག་ནས། ལག་མཐིལ་གཉིས་ཀྱིས་མཁལ་མ་གཉིས་བཀབ་ལ་རླུང་ཅུང་ཟད་བཟུང་ལ། གཏུམ་མོའི་དམིགས་པས་ལུས་ཐམས་ཅད་མེས་གང་། མེ་ཕྱིར་འཕྲོས་གོས་དང་སྔས་གདན་ཐམས་ཅད་མེའི་ཕུང་པོར་བསྒོམས་ལ་ཉལ། གཉིད་ལ་འགྲོ་ཁ་རླུང་བཏང་ལ་གཉིད་ལོག་གོ །ཡང་ན་ཁྱི་ཉལ་སྒོར་མོ་བྱ་སྟེ། པུས་མོ་གཉིས་བྲང་ལ་སྦྱར་རྐང་མཐིལ་གཡས་པས་བོལགོང་གཡོན་མནན། མ་ནེ་པུས་མགོ་ལ་བརྟེན། ལག་གཡོན་པའི་མཐིལ་གྱིས་མཁལ་མ་བཀབ། ལག་གཡས་འགྲམ་པ་བརྟེན། སྔས་མཐོ་
དམན་ཅི་བདེར་བྱས་ལ། འཇམ་རླུང་བཟུང་བས་གཏུམ་མོའི་མེ་འབར་ལུས་ཐམས་ཅད་བ་སྤུའི་བུ་ག་ནས་ཕྱིར་འཕྲོས་ཉལ་མལ་གནས་ཁང་དཔག་ཚད་ཙམ་དུ་འབར་བར་བསྒོམས་ལ་དམིགས་པ་རྩེ་གཅིག་ཏུ་གཏད། གཉིད་ལ་འགྲོ་ལ་ཁད་དུ་རླུང་བཏང་ལ་ཉལ་ལོ། །འདི་དག་ནི་གཏུམ་མོ་གོས་སུ་གྱོན་པ་དང་གདན་དུ་འདིང་བའི་གདམས་པ་ཞེས་ཀྱང་བྱའོ། །འདི་ཡན་གྱི་ཐབས་ལམ་གཏུམ་མོའི་དམིགས་རིམ་རྩ་བ་ནི་རྫོགས་སོ། །དེ་ལྟར་བསྒོམས་པས་ནཱ་རོ་ཆོས་དྲུག་དང་། ནི་གུ་ཆོས་དྲུག །གསར་རྙིང་རྒྱུད་སྡེ་བླ་མེད་ལུགས་ཐམས་ཅད་ཀྱི་རྩ་བ་རླུང་གི་གདམས་པ་ཐམས་ཅད་ཀྱི་དོན་ཐམས་ཅད་འཐུས་པ་ཡིན་ནོ། །ད་དུང་འདི་ཡི་གེགས་སེལ། བོགས་འདོན། བསྲེ་བ་སྐོར་གསུམ་སོགས་ནི་ཟད་མེད་པས་མུས་ཀྱིས་ཅི་ནུས་ཞུའོ། །ཞེས་པ་ཨ་རཱ་གས་སློབ་བུ་མཐར་ཕྱིན་ལ་རིམ་བཞིན་ཉམས་ཁྲིད་གདམས་པ་རེ་ཞིག་རྫོགས་སོ།། །།མངྒ་ལཾ། །ཨེ་ཀ་པྲིཙྪ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
ཤོག་སྟོང་།