དམིགས་རིམ་རྩ་ཚིག་གནམ་ཆོས་དཀར་ལུགས་ཟུང་འཇུག་བརྒྱུད་པ།
གནམ་ཆོས་ཀར་ལུགས་ཟུང་འཇུག་པ། །རྒྱལ་བ་རྒྱ་མཚོའི་ལྷ་ལྔ་ཡི། །དམིགས་རིམ་རྩ་ཚིག་བརྗེད་ཐོ་ནི། །ཉམས་ལེན་སྟོང་ཉིད་ལྟ་བའི་ངང་། །རྒྱལ་བ་རྒྱ་མཚོའི་ལྷ་ལྔ་པོ། །མཁའ་ལ་འཇའ་ཤར་བཞིན་དུ་བསྒོམ། །རྣམ་པ་གསལ་ལ་ངོ་བོ་སྟོང་། །བསྐྱེད་རྫོགས་ཟུང་འཇུག་ངང་ཉིད་དུ། །ཐུགས་ཀར་ཟླ་སྟེང་ཧྲཱིཿདམར་ལ། །།ཡིག་དྲུག་གཡས་སུ་འཁོར་བཞིན་ལས། །འོད་ཟེར་ཁ་དོག་སྣ་ཚོགས་འཕྲོས། །ཕྱོགས་བཅུའི་ཞིང་ཁམས་རབ་འབྱམས་ནས། །བཞུགས་པའི་སངས་རྒྱས་བྱང་ཆུབ་སེམས། །བླ་མ་ཡི་དམ་མཁའ་འགྲོའི་ཚོགས། །ཐམས་ཅད་འོད་དེས་མཆོད་པས་མཉེས། །ཐམས་ཅད་ཐུགས་རྗེ་ཆེན་པོ་རུ། །གྱུར་ནས་ཁ་བ་བུ་ཡུག་ལྟར། །བྱོན་ནས་རང་ལ་སིབ་སིབ་ཐིམ། །སླར་ཡང་འོད་ཟེར་འཕྲོས་པ་ཡིས། །སྣོད་ཀྱི་འཇིག་རྟེན་བདེ་བ་ཅན། །རིགས་དྲུག་སེམས་ཅན་ལྷ་ཡི་སྐུ། །ཕོ་རྣམས་ཐམས་ཅད་སྤྱན་རས་གཟིགས། །མོ་རྣམས་གསང་བ་ཡེ་ཤེས་མ། །བདུད་དང་ལོག་འདྲེན་རྟ་མགྲིན་སྐུ། །འཇའ་འོད་ཐིག་ལེ་འཁྲུགས་པའི་ཞིང་། །སྒྲ་སྐད་ཐམས་ཅད་ཡི་གེ་དྲུག །སེམས་ཀྱི་དྲན་རྟོག་ཕྱག་རྒྱ་ཆེ། །སྟོང་གསལ་ཆུ་ཟླ་ལྟ་བུར་
བསྒོམ། །མ་དག་སྣང་བ་རང་སར་ཞི། །སེམས་ཉིད་ཡེ་ནས་ཆོས་ཀྱི་སྐུ། །མ་རྟོགས་མ་ཤེས་འཁོར་བར་འཁྱམས། །ཤེས་ཤིང་རྟོགས་ནས་གདེང་ཐོབ་ན། །ཡེངས་དང་མ་ཡེངས་ཅི་ཞིག་ཡོད། །ཡེངས་ཡང་ཆོས་སྐུ་འགྱུར་བ་མེད། །མ་ཡེངས་དེ་བས་བཟང་རྒྱུ་མེད། །དེ་ནི་ཕྱ་ལེ་ཡ་ལེ་མཐོང་། །སྒོམ་འདེབས་ཤེས་པ་ཐམས་ཅད་དེ། །བསྒོམ་བཤིག་ཤེས་པ་ངོ་མཚར་ཆེ། །དེ་སྔ་ཕན་ཆད་བསྒོམས་པས་ཕུང་། །ད་ནི་མ་བསྒོམ་འཛིན་པ་ཐོངས། །རང་སེམས་བཟོ་མེད་ལྷུག་པར་ཞོག །དེ་ལྟར་བཞག་པའི་དུས་ཚོད་ལ། །ནང་གི་སེམས་ཉིད་ནམ་མཁའ་ལྟར། །བསྒོམ་བྱ་སྒོམ་བྱེད་སྤུ་ཙམ་མེད། །ཕྱི་ཡི་སྣང་བ་སྣ་ཚོགས་འདི། །ཆུ་ནང་ཤར་བའི་ཟླ་གཟུགས་ལྟར། །རྣམ་པ་གསལ་ཡང་ངོ་བོ་སྟོང་། །འཇའ་ཚོན་མེ་རླུང་གཟུགས་བརྙན་ལྟར། །ཐམས་ཅད་རང་སེམས་ཀློང་དུ་ནི། །རོ་གཅིག་ཆུ་ལ་ཆུ་བཞག་འདྲ། །དེ་ལྟར་མ་རྟོགས་སེམས་ཅན་ལ། །།ཤུགས་འབྱུང་བྱམས་དང་སྙིང་རྗེ་བསྐྱེད། །དེ་ལྟར་རིམ་གཉིས་རྣལ་འབྱོར་ལ། །ཡུན་རིང་སྒོམ་པར་ནུས་སྲིད་ན། །ནམ་ཞིག་བྱིན་རླབས་ཕེབས་པའི་རྟགས། །རྒྱལ་བ་རྒྱ་མཚོའི་སྐུ་གསུང་ཐུགས། །རང་གི་ལུས་
ངག་ཡིད་གསུམ་དང་། །དབྱེར་མེད་ཆུ་ལ་ཆུ་བཞག་ལྟར། །གོ་བའི་སྐྱ་རིས་མ་ཡིན་པར། །གདེང་ནས་རྟོགས་པའི་ཉམས་ཤིག་ཤར། །སངས་རྒྱས་ཀུན་གྱི་ཐུགས་རྒྱུད་དང་། །སེམས་ཅན་ཀུན་གྱི་སེམས་ཉིད་དང་། །རྣལ་འབྱོར་རང་སེམས་དབྱེར་མེད་འདྲེས། །ལྟ་བ་འཁོར་འདས་དབྱེར་མེད་ཡིན། །ནམ་མཁས་གར་ཁྱབ་སེམས་ཀྱིས་ཁྱབ། །སེམས་ཀྱིས་གར་ཁྱབ་ཆོས་སྐུས་ཁྱབ། །དེ་འདྲའི་ཉམས་རྟོགས་ཤར་བའི་དུས། །ནད་པའམ་ནི་ཚེ་འདས་ལ། །སེམས་ཉིད་བསྲེས་ལ་ཉམས་ལེན་སྐྱོངས། །ནད་གདོན་*་སྡིག་སྒྲིབ་དེ་ཡིས་སེལ། །བསྲེ་བའི་གདམས་པ་ངོ་མཚར་ཆེ། །ཉམས་ལེན་དེའི་ངང་བསྔོ་བ་བྱ། །འཁོར་གསུམ་ཡོངས་དག་བསྔོ་བ་མཆོག །དེ་ངང་མོས་གུས་གསོལ་འདེབས་བྱ། །བླ་མ་ཆོས་སྐུའི་སྒྲུབ་པ་ཡིན། །རང་དང་འབྲེལ་ཚད་འགྲོ་བ་རྣམས། །བདེ་ཆེན་ཞིང་དུ་སྐྱེ་བ་ཡི། །བསྔོ་བ་སྨོན་ལམ་རྒྱུན་དུ་ཐོབ། །དེ་རུ་འགྲོ་བའི་ངེས་ཤེས་བསྒོམ། །ནམ་ཞིག་འཆི་བའི་དུས་ཙམ་ན། །སྤྱི་བོར་འོད་དཔག་མེད་པ་བསྒོམ། །རང་ལུས་རྒྱལ་བ་རྒྱ་མཚོར་གསལ། །རང་སེམས་སྤྱི་བོའི་ཐིག་ལེ་རུ། །འཕོ་བའི་དམིགས་པ་ཉེར་གཅིག་
ཙམ། །དེ་ནས་ཅི་ཡང་མི་བསྒོམ་པར། །ཉམས་ལེན་ངོ་བོའི་ངང་དུ་བཞག །ཐིམ་རིམ་འཁྲུལ་སྣང་ཅི་ཤར་ཡང་། །གང་ཤར་བཟོ་མེད་ལྷུག་པར་ཞོག །ཕྱི་དབུགས་ཆད་ནས་འོད་གསལ་ནི། །ཚུར་ལ་ཤར་དུས་ངོས་ཟིན་པར། །དེ་སྟེང་བཞག་པས་ཐུགས་དམ་ཟིན། །ལུས་སེམས་བྲལ་ནས་རང་ཉིད་ནི། །ཤི་བར་ཤེས་ཚེ་མ་ཆག་པར། །བདེ་བ་ཅན་དུ་ཏ་ལེར་བྱོན། །རྒྱལ་བ་རྒྱ་མཚོ་སྤྱན་རས་གཟིགས། །རྒྱ་མཚོ་ལྔ་ཡི་ལྷ་ཚོགས་ཀྱི། །ཐུགས་རྗེ་བྱིན་རླབས་བདེན་པའི་མཐུས། །ཀརྨ་ཤེས་རབ་རྒྱ་མཚོ་ཡི། །ནད་གདོན་སྒྲུབ་པའི་བར་ཆད་ཞི། །ཚེ་བསོད་ཉམས་དང་རྟོགས་པ་དང་། །ཚེ་དང་སྒྲུབ་པ་མཐར་ཕྱིན་ནས། །འབྲེལ་ཚད་དོན་དང་ལྡན་ནས་ཀྱང་། །བདེ་བ་ཅན་གྱི་ཞིང་ཁམས་སུ། །བརྫུས་སྐྱེས་སྤྲུལ་སྐུ་ཐོབ་པར་ཤོག །དེ་སྐད་རཱ་ག་ཨ་སྱས་ཡིས། །རྟོགས་ལྡན་དཀའ་བ་ཆེར་དཔྱད་ནས། །ཚ་བ་དགོངས་སུ་རྗེས་འབྲངས་ནས། །ཚག་གླའི་ཚུལ་དུ་བྲིས་པ་དགེ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།