དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ཞེས་བྱ་བ་ལས་ལྷ་དགུ་ཕྱི་ལྟར་སྒྲུབ་པའི་ཟིན་བྲིས།
དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ཞེས་བྱ་བ་ལས་ལྷ་དགུ་ཕྱི་ལྟར་སྒྲུབ་པའི་ཟིན་བྲིས་བཞུགས་སོ། །
ན་མོ་གུ་རུ་ལོ་ཀེ་ཤྭ་རཱ་ཡ། འཇིག་རྟེན་འདྲེན་པའི་འཕགས་མཆོག་སྤྱན་རས་གཟིགས། །ལྷ་དགུའི་ལྷ་ལ་ཕྱག་འཚལ་སྐྱབས་སུ་མཆི། །དགོངས་པ་གྲོལ་ཞིང་བྱིན་གྱིས་བརླབ་ཏུ་གསོལ། །རྒྱུད་ལ་བསྟན་པའི་རྒྱ་གཞུང་ཆེན་པོ་དང་། །རང་བྱུང་རྡོ་རྗེའི་ཚིགས་བཅད་ཚིག་ལྷུག་གཉིས། །ཡབ་སྲས་སོ་སོས་མཛད་དང་ཞལ་གདམས་བཅས། །ཆོ་ག་འདི་ཡི་གཞུང་བསྲང་ཉམས་ལེན་ཅིང་། །བསྙེན་ཚད་མ་འཁྱོལ་བར་དུ་བདག་བསྐྱེད་ལ། །གཙོ་བོ་བྱེད་དགོས་དཀོན་མཆོག་འབངས་ཀྱིས་གསུངས། །དེ་ལ་སྒྲུབ་རྫས་དཀྱིལ་འཁོར་སོགས་མི་དགོས། །ཕུག་གཏོར་ནང་
མཆོད་མཆོད་པ་རྣམ་ལྔ་དང་། །སྔོན་འགྲོ་གཏོར་མ་ཌ་དྲིལ་འཛོམ་པར་བྱ། །ཉིན་རེར་སྔ་མོ་སྔོན་འགྲོ་རེ་རེ་བཏང་། །དེ་མིན་ཐུན་གཞན་སྔོན་འགྲོ་མི་དགོས་སོ། །གསར་བུ་ཡིན་ན་ཐུན་དྲུག་བྱ་བར་བཤད། །ཞོགས་པ་སྔ་དྲོ་ཉིན་གུང་དགོང་ཀ་བཞི། །སྲོད་དང་ཐོ་རངས་ཐུན་དྲུག་བྱ་བའམ། །སྔ་དྲོ་ཉིན་གུང་དགོང་ཀ་སྲོད་དང་བཞི། །ཐུན་མཇུག་གཏོར་བསྔོས་བྱེད་ན་ཐུན་བསྡུ་སྟེ། །ཐུན་མཚམས་དགེ་སྦྱོང་ཆག་མེད་གང་དགོས་བྱ། །ངག་ནི་འཁོར་ཡུག་བཅད་ན་མཆོག་ཡིན་ཏེ། །གལ་ཆེན་བྱུང་ན་ཐུན་མཚམས་བཏང་སྲོལ་གདའ། །བདག་བསྐྱེད་ཚར་རྗེས་བསྙེན་
པའི་སྐབས་དེ་རུ། །བདག་དང་རིགས་བཞིའི་སྤྱན་རས་གཟིགས་བཞི་ཡི། །ཐུགས་ཀར་པདྨ་དམར་པོ་འདབ་བརྒྱད་པའི། །ཟེའུ་འབྲུར་ཧཱུྃཡིག་དམར་པོ་བྱེ་རུའི་མདོག །འགྲེངས་ཏེ་གནས་པའི་ཡིག་མགོའི་ཕྱོགས་དེ་ནི། །ཡི་གེའི་མདུན་ཡིན་རང་གི་མདུན་ངོས་བལྟ། །དེ་མཐར་མདུན་ནས་བརྩམས་ཏེ་གཡོན་བསྐོར་དུ། །ཡིག་བཅུ་ཡིག་ངོ་ཕྱི་ལ་བསྟན་ཏེ་བཀོད། །ཡུམ་ལྔའི་ཐུགས་ཀར་ཆོས་འབྱུང་གདན་ཐབས་ནི། །དམར་པོ་མུ་རན་དཀར་པོ་ཅན་གྱི་དབུས། །རང་མདོག་བྷིཡིག་ལངས་ཏེ་གནས་པའི་མཐར། །ཧ་རི་ནི་ས་སྤངས་པའི་ཡུམ་སྔགས་ཏེ། །ཡིག་ངོ་ནང་བསྟན་གཡས་སུ་བསྐོར་ལ་བཀོད། །མཚམས་བཞིར་མཁའ་འགྲོ་བཞི་ཡི་ཐུགས་ཀར་རུ། །ཉི་མའི་སྟེང་དུ་ས་བོན་རེ་རེའི་མཐར། །རང་སྔགས་ཡིག་ངོ་ནང་བསྟན་གཡས་བསྐོར་བཀོད། །རྡོ་རྗེ་མཁའ་འགྲོའི་ཐུགས་ཀར་ཧ་སྔོན་མཐར། །ཨོཾ་བཛྲ་ཌཱཀི་ནཱི་ཡེ་ཧཱུྃ་ཕཊ། རིན་ཆེན་མཁའ་འགྲོའི་ཐུགས་ཀར་རི་སེར་མཐར། །ཨོཾ་རཏྣ་ཊྛཀི་ནཱི་ཡེ་ཧཱུྃ་ཕཊ། པདྨ་མཁའ་འགྲོའི་ཐུགས་ཀར་ནི་དམར་མཐར། ཨོཾ་པདྨ་ཊཱཀི་ནཱི་ཡེ་ཧཱུྃ་ཕཊ། །ལས་ཀྱི་མཁའ་འགྲོའི་ཐུགས་ཀར་ས་ལྗང་མཐར། །ཨོཾ་ཀརྨ་ཊཱཀི་ནཱི་ཡེ་ཧཱུྃ་ཕཊ། དེ་
ནས་ཐུགས་ཀའི་སྔགས་ཕྲེང་རིག་པ་གཏད། །ཀློག་པའི་ཚུལ་དུ་བཟླ་བ་བསྙེན་པའོ། །དེ་ནས་ཡིག་ཕྲེང་རྣམས་ལས་འོད་ཟེར་ནི། །ཁ་དོག་ལྔ་ལྡན་དམར་པོ་ཤས་ཆེ་བ། །ཡིག་འབྲུ་མི་འཁོར་འོད་ཟེར་འཁོར་བར་བསྒོམ། །དེ་ནས་དང་པོ་ཡིག་འབྲུ་དལ་བུས་འཁོར། །ཡབ་རྣམས་གཡས་འཁོར་ཡུམ་རྣམས་གཡོན་དུ་འཁོར། །དེ་ནས་ཇེ་མགྱོགས་ཤིན་ཏུ་མགྱོགས་པར་འཁོར། །དེ་ལྟར་བསྒོམ་ཞིང་བཟླས་པ་ཉེ་བསྙེན་ཏེ། །ཟླ་དཀར་ཕྲེང་བ་ལྟ་བུའི་བཟླས་པ་ཟེར། །དེ་ནས་བདག་ཉིད་ཡབ་ཡུམ་ཐུགས་ཀ་ཡི། །ཧྲཱིཿནི་མི་གཡོ་སྔགས་ཕྲེང་དྲག་འཁོར་བ། །དེ་ལས་འོད་ཟེར་ཁ་དོག་དམར་ཤས་ཆེ། །དཀར་སེར་ལྗང་མཐིང་འཇའ་ཚོན་ལྟ་བུ་ནི། །སྟེང་དང་ཕྱོགས་མཚམས་ནམ་མཁའ་ཁྱབ་པར་འཕྲོས། །གྲུབ་ཆེན་བརྒྱད་ཅུ་རྗེ་འབངས་ཉེར་ལྔ་དང་། །བཀའ་བརྒྱུད་བླ་མ་གྲུབ་ཐོབ་རྒྱ་མཚོ་ལ། །འོད་ཟེར་དེས་ཕོག་མཆོད་པ་ཆེན་པོར་གྱུར། །སྐུ་གསུང་ཐུགས་རྒྱུད་ཟག་མེད་བདེ་བས་མཉེས། །ཀུན་ཀྱང་རྒྱལ་བ་རྒྱ་མཚོ་ཡབ་ཡུམ་སྐུར། །གནས་འགྱུར་ཆར་ལྟར་བབ་བྱོན་བདག་ལ་ཐིམ། །བྱིན་རླབས་ཞུགས་པས་ཉམས་རྟོགས་འབར་བར་བསྒོམ། །བླ་མ་གྲུབ་
ཐོབ་རྣམས་དང་བསྲེ་བ་སྟེ། ་་བླ་མ་རྒྱ་མཚོ། །ཕྱག་ཆེན་འདོད་ན་དྭགས་པོ་ས་ར་ཧ། །རྫོགས་ཆེན་འདོད་ན་དགའ་རབ་བི་མ་ལ། །ནུས་པ་ཆེ་འདོད་ཨོ་རྒྱན་པཀི་སོགས། །བསྒོམས་པས་བླ་སྒྲུབ་མཆོག་ཏུ་གྱུར་པ་ཡིན། །ཡང་ནི་འོད་ཟེར་ཕྱོགས་བཅུར་འཕྲོས་པ་ཡི། །ཞིང་ཁམས་ཀུན་ན་བཞུགས་པའི་སངས་རྒྱས་དང་། །བྱང་ཆུབ་སེམས་དཔའ་ཐམས་ཅད་འོད་དེས་མཆོད། །ཐམས་ཅད་སྤྱན་རས་གཟིགས་ཀྱི་སྐུར་གྱུར་ནས། །ཆར་ལྟར་བབས་ནས་རང་ལ་ཐིམ་པར་བསྒོམ། ་་་རྒྱལ་བ་རྒྱ་མཚོ། །དེ་ཡང་ཚེ་བསྲིང་འདོད་ན་ཚེ་དཔག་མེད། །ནད་ཞི་འདོད་ན་སངས་རྒྱས་སྨན་གྱི་བླ། །སྡིག་ལྟུང་དག་པར་འདོད་ན་རྡོ་རྗེ་སེམས། །ལས་སྒྲིབ་དག་པར་འདོད་ན་མི་འཁྲུགས་པ། །ངན་སོང་སྒོ་གཅོད་འདོད་ན་ཀུན་རིག་དང་། །གང་འདོད་སོ་སོར་ཚན་ཆེན་བསྲེ་བར་བསྒོམ། །དེ་ཡི་གནད་ལ་དང་པོ་སྐད་ཅིག་ལ། །ནམ་མཁའ་བར་སྣང་གང་འདོད་ལྷ་དེ་ཡི། །སྐུ་ནི་མང་པོས་ཐེམ་འགགས་ནེམ་འགགས་གང་། །དེ་ནས་འོད་ཟེར་དེས་ཕོག་ཐུགས་མཉེས་ནས། །ཐམས་ཅད་ཐུགས་རྗེ་ཆེན་པོའི་སྐུར་གྱུར་ཏེ། །རང་ལ་སིབ་སིབ་ཐིམ་པར་བསྒོམ་པ་ཡིན། །དེ་བཞིན་བདེ་དགྱེས་་་་དཔའ་བོ་རྒྱ་མཚོ།
གསང་སོགས་གསར་མའི་ལྷ། །བཀའ་དགོངས་ཕུར་གསུམ་ལ་སོགས་རྙིང་མའི་ལྷ། །བྱ་སྤྱོད་རྣལ་འབྱོར་རྒྱུད་ཀྱི་ལྷ་ཚོགས་རྣམས། །གང་འདོད་ཐམས་ཅད་དེ་ལྟར་བསྒོམ་ཆོག་སྟེ། །འདི་ནི་རྒྱུད་སྡེ་བཞི་ཡི་སྤྱི་སྒྲུབ་ཡིན། །ལྷ་གཅིག་སྔགས་གཅིག་བཟླས་པས་ཀུན་འགྲུབ་གསུངས། །དེ་བཞིན་ཕག་ཁྲོས་་་་མཁའ་འགྲོ་རྒྱ་མཚོ། །སེང་གསུམ་སྒྲོལ་མའི་རིགས། །ཐུགས་རྗེ་ཆེན་པོ་ཡབ་ཡུམ་ཞལ་སྦྱོར་དུ། །གྱུར་ནས་རང་ལ་ཐིམ་པར་བསྒོམ་པར་བྱ། །དེ་བཞིན་ཕྱག་བཞི་་་ཆོས་སྐྱོང་རྒྱ་མཚོ། ཕྱག་དྲུག་བར་གུར་སོགས། །མ་ནིང་དུད་སོལ་མ་དང་རང་བྱུང་མ། །ཡི་དམ་ཆོས་སྐྱོང་རྣམས་ལ་བསྲེ་ཞིང་བསྒོམ། །ཁྱད་པར་རིམས་ནད་ཡོད་དུས་ལོ་མ་ཅན། །དགྲ་འཇིགས་ཡོད་དུས་འོད་ཟེར་ཅན་དང་བསྲེ། །དེ་ལྟར་རྣམ་གྲངས་མང་པོ་མི་ལྕོགས་སམ། །ཆ་ལུགས་སྐུ་མདོག་མི་ཤེས་ཟིན་དཀའ་ན། །སངས་རྒྱས་བྱང་སེམས་བླ་མ་ཡི་དམ་དང་། །མཁའ་འགྲོ་ཆོས་སྐྱོང་སྤྱི་ལ་འོད་དེས་མཆོད། །ཐམས་ཅད་ཐུགས་རྗེ་ཆེན་པོའི་སྐུར་གྱུར་ནས། །ཆར་བཞིན་བབས་ནས་རང་བསྟིམ་ཁོ་ནས་ཆོག །དེ་ལྟར་བསྒོམ་ཞིང་ཡིག་བཅུ་ཁོ་ན་བཟླས། །བྱིན་རླབས་བསྡུ་བའི་དམིགས་པ་སྒྲུབ་
པ་ཡིན། །དེ་ནས་རང་གི་ཐུགས་ཀའི་སྔགས་ཕྲེང་ལས། །འོད་ཟེར་ཕྱོགས་བཅུའི་ནམ་མཁའ་ཁྱབ་པར་འཕྲོས། །སྣོད་ཀྱི་འཇིག་རྟེན་བདེ་བ་ཅན་གྱི་ཞིང་། །པདྨ་དབང་གི་དཀྱིལ་འཁོར་ཉིད་དུ་གྱུར། །བཅུད་ཀྱི་སེམས་ཅན་ཐམས་ཅད་སྤྱན་རས་གཟིགས། །ཐུགས་རྗེ་ཆེན་པོའི་ལྷ་ཚོགས་རྣམས་སུ་གྱུར། །དམྱལ་བ་རྡོ་རྗེ་རིགས་ཀྱི་སྤྱན་རས་གཟིགས། །ཡབ་ཡུམ་སྐུར་གྱུར་དེ་བཞིན་ཡི་དྭགས་རྣམས། །པདྨ་རིགས་ཀྱི་སྤྱན་རས་གཟིགས་ཡབ་ཡུམ། །དུད་འགྲོ་བདེ་གཤེགས་རིགས་ཀྱི་སྤྱན་རས་གཟིགས། །ལྷ་མིན་ལས་ཀྱི་རིགས་ཀྱི་སྤྱན་རས་གཟིགས། །ལྷ་དང་མི་ནི་རིན་ཆེན་སྤྱན་རས་གཟིགས། །རྒྱན་དང་ཆ་ལུགས་མངོན་རྟོགས་ལྟ་བུའི་སྐུ། །འབའ་ཞིག་གྱུར་ནས་རང་གི་རམ་བུའི་ཚུལ། །ཡིག་བཅུ་འུར་འུར་དིར་དིར་འདོན་པར་བསྒོམ། །དེ་ནི་སྣང་བ་སྐུ་ཡི་ཁྱེར་སོ་དང་། །གྲག་པ་གསུང་གི་ཁྱེར་སོའི་དོན་ཚང་སྟེ། །སྐད་ཅིག་གཅིག་ལ་དུང་ཕྱུར་མང་པོ་འགྲོ། །།ཕྲེང་སྐོར་གཅིག་གིས་ཡི་དམ་འགྲུབ་པའི་གནད། །རྒྱལ་པོའི་ཕོ་ཉ་ལྟ་བུའི་བཟླས་པ་དང་། །བུང་བ་ཚང་ཞིག་ལྟ་བུའི་བཟླས་པའང་ཟེར། །སྒྲུབ་པ་ཆེན་པོའི་དམིགས་པ་ཡིན་པར་བཤད། །དམིགས་པ་དེ་རྣམས་
རྫོགས་པར་ཐུན་རེ་བསྒོམ། །མི་ལྕོགས་ན་ནི་ཞག་གཅིག་རྫོགས་པས་ཆོག །ཞག་བདུན་བསྒྲུབ་ན་དེ་ཡན་ཞག་དྲུག་བྱ། །དེ་ནས་ཞག་གཅིག་ལས་སྦྱོར་དམིགས་པ་ནི། །ཐུན་གྱི་བཟུང་ལུགས་སྔོན་དང་འདྲ་བ་ལས། །སྔ་ཐུན་ཡུད་ཙམ་ཤར་དུ་ཁ་བལྟས་ལ། །བདག་ཉིད་ཡབ་ཡུམ་ཐུགས་ཀའི་སྔགས་ཕྲེང་ལས། །འོད་ཟེར་དཀར་པོ་ཡབ་ཡུམ་ཞལ་ནས་ཐོན། །མདུན་དུ་བཞུགས་པའི་རྡོ་རྗེ་སྤྱན་རས་གཟིགས། །ཡབ་ཡུམ་གཉིས་ཀྱི་ཐུགས་ཀར་ཐིམ་པ་ཡི། །ཐུགས་ཀའི་སྔགས་ཕྲེང་དྲག་འཁོར་ཐུགས་རྒྱུད་བསྐུལ། །ཐུགས་ཀའི་ཧཱུྃལས་འོད་ཟེར་དཀར་པོ་བྱུང་། །ཞལ་ནས་ཐོན་ཅིང་བདག་ཉིད་ཡབ་ཡུམ་གྱི། །ཐུགས་ཀར་ཐིམ་པས་ནད་གདོན་སྡིག་སྒྲིབ་ཞི། །འོད་ཟེར་ཕར་ལ་འཕྲོ་དུས་མཆོད་པའི་ཚུལ། །མདུན་གྱི་ཐུགས་ཀར་ཐིམ་དུས་ཐུགས་རྒྱུད་བསྐུལ། །སྔགས་ཕྲེང་དྲག་འཁོར་ཕྲིན་ལས་དགོངས་པ་གཏད། །འོད་ཟེར་ཞལ་ནས་བྱུང་དུས་དངོས་གྲུབ་ཚུལ། །དེ་ཡི་འོད་ཟེར་ཟླ་བའི་འོད་ལྟ་བུས། །སེམས་ཅན་ཀུན་གྱི་སྡིག་སྒྲིབ་ཐམས་ཅད་ནི། །མུན་པར་ཟླ་ཤར་ལྟ་བུའི་འོད་དེས་གསལ། །སངས་རྒྱས་ཀུན་གྱི་ཞི་བའི་དངོས་གྲུབ་ཀྱང་། །འོད་ཟེར་དེ་ལ་སིབ་
ཀྱིས་ཐིམ་པ་ལས། །རང་གི་ཐུགས་ཀར་ཐིམ་ཞིང་ལུས་ཁྱབ་པས། །ནད་གདོན་སྡིག་སྒྲིབ་ཐམས་ཅད་སངས་ཀྱིས་དག །འོད་ཀུན་ཐུགས་ཀའི་ཧྲུལ་ཐིམ་པ་ཡིས། །སེམས་ཀྱི་ཉོན་སྒྲིབ་ཤེས་སྒྲིབ་ཐམས་ཅད་ཞི། །ཞི་བ་ཆེན་པོའི་དངོས་གྲུབ་ཐོབ་པར་བསྒོམ། །སྔགས་རིང་ཧ་རི་ནི་ས་ཧཱུྃ་ཕཊ་ཅན། །ལྔ་བརྒྱ་ལ་སོགས་ཇི་ཙམ་ལྕོགས་པ་བཟླ། །དེ་ནས་བདག་ཉིད་ཡབ་ཡུམ་སྔགས་ཕྲེང་ལས། །འོད་ཟེར་དཀར་པོ་ཡབ་ཡུམ་ཞལ་ནས་ཐོན། །གཡས་ཟུར་རྡོ་རྗེ་མཁའ་འགྲོའི་ཐུགས་ཀར་ཐིམ། །སྔགས་ཕྲེང་གཡོན་འཁོར་ཕྲིན་ལས་དགོངས་པ་གཏད། །མཁའ་འགྲོའི་ཐུགས་ལས་འོད་ཟེར་སྟོན་ཟླའི་མདོག་།བདེ་བའི་རེག་བྱ་ཅན་འཕྲོས་ཞལ་ནས་ཐོན། །བདེ་བའི་འོད་ཟེར་ཟླ་བའི་འོད་ལྟ་བུས། །བསྲུང་བྱ་ཀུན་ལ་ཕོག་པས་ནད་དང་གདོན། །ཐམས་ཅད་བ་མོར་ཉི་ཟེར་ཕོག་ལྟར་དག་།སངས་རྒྱས་བྱང་སེམས་དཔའ་བོ་མཁའ་འགྲོ་ཡི། །ཞི་བ་ཆེན་པོའི་དངོས་གྲུབ་འོད་དེར་འདུས། །རང་གི་ཐུགས་ཀར་ཞུགས་པས་ནད་དང་གདོན། །སྡིག་སྒྲིབ་མུན་པར་ཉི་ཤར་ལྟ་བུར་དག །འོད་དེ་ཐུགས་ཀའི་ཧྲུལ་ཐིམ་པ་ཡིས། །ཞི་བའི་ལས་ཀུན་འགྲུབ་པའི་དངོས་གྲུབ་ཐོབ། །དེ་ལྟར་
བསྒོམ་ཞིང་སྔགས་རིང་མཇུག་དེ་རུ། །ནད་གདོན་སརྦ་པཱ་པཾ་ཤཱནྟཾ་ཀུ་རུ་ཡེ་སྭཱ་ཧཱ། ཅི་ལྕོགས་བཟླས་རྗེས་གཏོར་བསྔོས་ཐུན་བསྡུ་བྱ། །དེ་ནས་ཉི་མ་དྲོས་ཆེན་དུས་བབ་ཚེ། །བདག་བསྐྱེད་ཚར་གཅིག་བཏང་བ་དེ་ཡི་རྗེས། །ལྷོའམ་བྱང་དུ་ཡུད་ཙམ་ཁ་གྱུས་ནས། །སྔགས་རིང་ནི་ས་ཧཱུྃ་ཕཊ་ཅན་བཟླ་ཞིང་། །བདག་ཉིད་ཡབ་ཡུམ་ཐུགས་ཀའི་སྔགས་ཕྲེང་ལས། །འོད་ཟེར་བཙོ་མ་གསེར་གྱི་མདོག་འདྲ་འཕྲོས། །ཡབ་ཡུམ་ཞལ་ནས་ཐོན་ཅིང་གཡས་ཕྱོགས་ཀྱི། །རིན་ཆེན་རིགས་ཀྱི་ཡབ་ཡུམ་ཐུགས་ཀར་ཕོག །མཆོད་པར་གྱུར་པས་མཉེས་ནས་སྔགས་ཕྲེང་འཁོར། །ཐུགས་རྒྱུད་བསྐུལ་ནས་ཕྲིན་ལས་དགོངས་པ་གཏད། །ཡབ་ཡུམ་ཧྲཱིཿལས་འོད་ཟེར་གསེར་མདོག་འཕྲོས། །རྒྱས་པའི་དངོས་གྲུབ་ཚུལ་དུ་ཞལ་ནས་ཐོན། །དེ་ཡི་འོད་ནི་ཉི་མ་ཤར་འདྲ་བའི། །བསྲུང་བྱ་རྣམས་ལ་ཕོག་པས་ཚེ་བསོད་རྒྱས། །འཁོར་འདས་ཀུན་གྱི་ཚེ་བསོད་འོད་དེར་ཐིམ། །ཚུལ་བྱུང་ཐུགས་ཀར་ཞུགས་ནས་ལུས་ཁྱབ་པས། །རང་གི་ཚེ་བསོད་ཉམས་རྟོགས་ཡེ་ཤེས་རྒྱས། །ཐུགས་སྲོག་ཧཱིར་ཐིམ་རྒྱས་པའི་དངོས་གྲུབ་ཐོབ། །དེ་ནས་རང་ཉིད་ཡབ་ཡུམ་ཐུགས་ཀ་ནས། །འོད་ཟེར་
གསེར་མདོག་འཕྲོས་ཤིང་ཞལ་ནས་ཐོན། །གཡས་ཀྱི་རྒྱབ་ཟུར་རིན་ཆེན་མཁའ་འགྲོ་ཡི། །ཐུགས་ཀར་ཐིམ་པས་མཆོད་པར་གྱུར་ནས་མཉེས། །སྔགས་ཕྲེང་དྲག་འཁོར་ཐུགས་དམ་རྒྱུད་བསྐུལ་ཏེ། །རྒྱས་པའི་ཕྲིན་ལས་སྒྲུབ་ལ་ཐུགས་དགོངས་གཏད། །ཐུགས་ལས་འོད་ཟེར་བཙོ་མ་གསེར་མདོག་འཕྲོས། །ཞལ་ནས་ཐོན་ཚེ་ཉི་མའི་དཀྱིལ་འཁོར་བཞིན། །དེ་ཡི་འོད་ཟེར་ཉི་མའི་འོད་ལྟ་བུ། །བསྲུང་བྱ་རྣམས་ལ་ཕོག་པས་ཚེ་བསོད་རྒྱས། །དཔེར་ན་མེ་ཏོག་པདྨར་ཉི་ཟེར་བཞིན། །ཡི་དམ་མཁའ་འགྲོ་ཆོས་སྐྱོང་དངོས་གྲུབ་ཀུན། །སྦྱར་ལེན་དྭངས་མར་རྡུལ་བཞིན་འོད་དེར་ཐིམ། །ཚུར་བྱོན་ཐུགས་ཀར་ཐིམ་ཞིང་ལུས་གང་བས། །རང་གི་ཚེ་བསོད་དབང་ཐང་ཉམས་རྟོགས་འཕེལ། །ཐུགས་སྲོག་ཧྲཱིཿར་ཐིམ་རྒྱས་པའི་དངོས་གྲུབ་ཐོབ། །སྔགས་རིང་བེ་རོ་ཙ་ནི་ཡེ་ཡི་མཇུག །རི་ནི་ཧ་ས་མ་མ་ཨཱ་ཡུཔུཎྱ་ཛྙཱ་ན་པུཊྚི་ཀུ་རུ་ཡེ་སྭཱ་ཧཱ། ཅི་ལྕོགས་བཟླས་རྗེས་གཏོར་བསྔོས་ཐུན་བསྡུ་བྱ། །དགོང་ཆེན་བདག་བསྐྱེད་ཚར་གཅིག་བཏང་བའི་རྗེས། །ཡུད་ཙམ་ནུབ་ཏུ་ཁ་ཕྱོགས་སྔགས་རིང་ནི། །གཞུང་གི་ཧཱུྃ་ཕཊ་ཅན་དེ་བཟླས་པའི་ཚེ། །བདག་ཉིད་ཡབ་ཡུམ་ཐུགས་ཀའི་སྔགས་ཕྲེང་ལས། །
འོད་ཟེར་དམར་པོ་བྱུ་རུའི་ཕྲེང་བ་ལྟར། །ཞལ་ནས་ཐོན་ཅིང་རྒྱབ་ཀྱི་ཕྱོགས་སུ་སོང་། །པདྨ་སྤྱན་གཟིགས་ཡབ་ཡུམ་ཐུགས་ཀར་ཐིམ། །སྔགས་ཕྲེང་དྲག་འཁོར་ཐུགས་དམ་རྒྱུད་བསྐུལ་བས། །སྣང་སྲིད་དབང་སྡུད་ལས་ལ་དགོངས་པ་གཏད། །ཐུགས་ཀའི་སྔགས་ཕྲེང་འོད་ཟེར་དམར་པོ་འཕྲོས། །ཞལ་ནས་ཐོན་པས་པདྨ་རཱ་གའི་མདོག །དེ་ལས་འོད་ཟེར་གློག་འདྲ་འཇིག་རྟེན་ཁྱབ། །སངས་རྒྱས་བྱང་སེམས་ཡི་དམ་མཁའ་འགྲོ་དང་། །ཆོས་སྐྱོང་ནོར་ལྷ་ཀུན་གྱི་དངོས་གྲུབ་དང་། །འཇིག་རྟེན་ཁམས་ཀྱི་བསོད་ནམས་ལོངས་སྤྱོད་ཀུན། །བསྡུས་ནས་འོད་དེར་ཐིམ་ཞིང་ཚུར་བྱོན་ནས། །རང་གི་ཐུགས་ཀར་ཞུགས་ཤིང་ལུས་ཁྱབ་པས། །རླུང་སེམས་སྣང་བ་དབང་དུ་འདུས་གྱུར་ནས། །བྷིར་ཐིམ་སྣང་སྲིད་དབང་སྡུད་དངོས་གྲུབ་ཐོབ། །དེ་ནས་རང་གི་ཐུགས་ལས་འོད་དམར་འཕྲོས། །ཞལ་ནས་ཐོན་ཅིང་རྒྱབ་ཟུར་གཡོན་བཞུགས་པའི། །པདྨ་མཁའ་འགྲོའི་ཐུགས་ཐིམ་སྔགས་མྱུར་འཁོར། །དབང་གི་ཕྲིན་ལས་སྒྲུབ་ལ་དགོངས་པ་གཏད། །སྔགས་ལས་འཕྲོས་པའི་འོད་དམར་ཞལ་ནས་ཐོན། །དེ་ཡི་འོད་ཀྱིས་སྣང་སྲིད་འཁོར་འདས་ཀྱི། །གང་འདོད་དངོས་
གྲུབ་བསྡུ་ཞིང་འོད་དེར་ཐིམ། །ཚུར་བྱོན་རང་གི་ཐུགས་ཀར་ཐིམ་པ་ཡིས། །ཁམས་གསུམ་དབང་དུ་འདུས་པའི་དངོས་གྲུབ་ཐོབ། །སྔགས་རིང་བེ་རོ་ཙ་ནཱི་ཡེ་ཡི་མཇུག །ནི་རི་ཧ་ས་བ་སུ་ན་ན་ཊི་དྷ་སརྦ་སིདྡྷི་པ་ཤཾ་ཀུ་རུ་སྭཱ་ཧཱ། །ཅི་ལྕོགས་བཟླས་རྗེས་གཏོར་བསྔོས་ཐུན་བསྡུ་བྱ། །དེ་ནས་མུན་རུབ་བདག་བསྐྱེད་ཚར་གཅིག་བཏང་། །ཡུད་ཙམ་བྱང་ངམ་ལྷོ་རུ་ཁ་ཕྱོགས་ལ། །སྔགས་རིང་ཧཱུྃ་ཕཊ་ཅན་དེ་བཟླས་བྱས་ཤིང་། །བདག་ཉིད་ཡབ་ཡུམ་ཐུགས་ཀའི་སྔགས་ཕྲེང་ལས། །འོད་ཟེར་ལྗང་གུ་སྤང་ཆེན་མདོག་འདྲ་འཕྲོས། །གཡོན་ཕྱོགས་ལས་ཀྱི་སྤྱན་རས་གཟིགས་དང་ནི། །སྒྲོལ་མ་ཞལ་སྦྱོར་བཞུགས་པའི་ཐུགས་ཀར་ཐིམ། །སྔགས་ཕྲེང་དྲག་འཁོར་ལས་ལ་དགོངས་པ་གཏད། །ཐུགས་ཀའི་སྔགས་ལས་དྲག་པོའི་དངོས་གྲུབ་ནི། །འོད་ཟེར་ལྗང་གུའི་ཚུལ་དུ་ཞལ་ནས་ཐོན། །འོད་དེའི་འོད་ཟེར་ལྗང་ནག་ཚ་ལ་རྩུབ། །ཕྱོགས་བཅུར་ཁྱབ་པས་གནོད་བྱེད་དགྲ་བགེགས་ཀུན། །བ་མོར་ཐལ་ཚན་ཕོག་བཞིན་གཞོབ་ཏུ་བསྲེག །ཁྲོ་བོ་ཁྲོ་མོ་ཆོས་སྐྱོང་ཐམས་ཅད་ཀྱི། །མཐུ་སྟོབས་འོད་དེར་ཐིམ་ཞིང་ཚུར་བྱོན་ཏེ། །རང་གི་ཐུགས་ཀར་ཐིམ་ཞིང་ལུས་གང་བས། །བདུད་བཞི་ཉོན་
མོངས་ལུས་གདོན་ལུས་ཀྱི་ནད། །ཐམས་ཅད་ཚར་བཅད་འོད་ཟེར་ཧིལ་ཐིམ། །དྲག་པོའི་ཕྲིན་ལས་ཐོགས་མེད་དངོས་གྲུབ་ཐོབ། །དེ་ནས་བདག་ཉིད་ཡབ་ཡུམ་ཐུགས་ཀ་ནས། །འོད་ཟེར་ལྗང་ནག་འཕྲོས་པས་ཞལ་ནས་ཐོན། །མདུན་གཡོན་ལས་ཀྱི་མཁའ་འགྲོའི་ཐུགས་ཀར་ཐིམ། །སྔགས་ཕྲེང་དྲག་འཁོར་ལས་ལ་དགོངས་པ་གཏད། །དྲག་པོའི་དངོས་གྲུབ་འོད་ཟེར་ལྗང་གུའི་ཚུལ། །ཞལ་ནས་ཐོན་ཚེ་འོད་དེའི་འོད་ཟེར་ནི། །རབ་ཏུ་རྩུབ་ཅིང་ཚ་ངར་ལྡན་པ་ཡིས། །རང་དང་བསྲུང་བྱ་ལ་གནོད་དགྲ་དང་བགེགས། །བྱ་སྒོ་མེ་ལ་བསྲེགས་བཞིན་ཚར་བཅད་དེ། །འཇིག་རྟེན་དྲེགས་པའི་མཐུ་སྟོབས་ནུས་པ་རྣམས། །བསྡུས་ཤིང་འོད་དེར་ཐིམ་ཞིང་ཚུར་བྱོན་ནས། །རང་གི་ཐུགས་ཀའི་ཧྲུལ་ཐིམ་པ་ཡིས། །དྲེགས་པ་ཚར་གཅོད་དངོས་གྲུབ་ཐོབ་པར་བསྒོམ། །སྔགས་རིང་བེ་རོ་ཙ་ནཱི་ཡེ་ཡི་མཇུག །ས་ནི་རི་ཧ་གནོད་བྱེད་སརྦ་ཤ་ཏུཾ་མཱ་ར་ཡ་ཧཱུྃ་ཕཊ། ཅི་ལྕོགས་བཟླས་རྗེས་གཏོར་བསྔོས་ཐུན་བསྡུ་ཉལ། །ཐུན་བསྡུའི་དམིགས་པ་སྟོང་པ་ཉིད་དོ་ཞེས། །ཟེར་བ་དེ་ནི་ཉལ་བའི་རྣལ་འབྱོར་ཡིན། །མཚམས་སྡོམ་ཞག་བདུན་ཕྱི་སྒྲུབ་ཚང་བ་སྟེ། །བདུན་གཉིས་
བདུན་གསུམ་ཟླ་སྒྲུབ་ལོ་སྒྲུབ་སོགས། །ཡུན་རིང་སྒྲུབ་ན་ལས་བཞི་རེ་རེ་ལའང་། །དུས་ནི་ཞག་བདུན་སྔགས་གྲངས་འབུམ་ཕྲག་སོགས། །སྒྲུབ་ན་ཕྲིན་ལས་སོ་སོའི་རྟགས་ཐོན་འགྱུར། །དེ་ཚེ་དུས་ཚོད་དང་ནི་ཁ་གྱུ་ཕྱོགས། །དང་པོ་དབུ་འཛུགས་དུས་སུ་བྱས་པས་འཐུས། །ལས་བཞི་རེ་རེའི་ཞག་གྲངས་སྔགས་གྲངས་ཀྱང་། །བསྙེན་སྒྲུབ་ཅི་ཙམ་ཐོན་པའི་བཅུ་ཆ་གཅིག །དེ་ལས་མང་ན་བསྙེན་སྒྲུབ་ནུས་པ་ཉམས། །དེ་ལས་ཉུང་ན་ལས་དེའང་འགྲུབ་པར་དཀའ། །དེ་ནི་མཚམས་སྡོམ་ཕྱི་སྒྲུབ་བྱེད་ཐབས་ཡིན། །མཚམས་མི་སྡོམ་པར་ཕྱི་སྒྲུབ་བྱེད་འདོད་ན། །ད་ནངས་བདག་བསྐྱེད་ཚར་གཅིག་བཏང་བའི་རྗེས། །ཉི་ཐལ་བར་དུ་འགྲོ་སྡོད་གང་གིས་ཚེ། །སྔགས་བཟླས་གོང་གི་དམིགས་པ་དེ་རྣམས་བསྒོམ། །ཉི་མ་ཐལ་ཀའི་དུས་ལ་བབ་ཙམ་ན། །རང་ཉིད་ཡབ་ཡུམ་ཐུགས་ཀའི་སྔགས་ཕྲེང་ལས། །འོད་ཟེར་ཁ་དོག་བཞི་ལྡན་སྟོང་སྐུད་བཞིན། །འོད་ཟེར་དཀར་པོ་གཉིས་དང་སེར་པོ་གཉིས། །དམར་པོ་གཉིས་དང་དེ་བཞིན་ལྗང་གུ་གཉིས། །ཞལ་ནས་ཐོན་ཞིང་ཕྱོགས་མཚམས་བརྒྱད་དུ་འཕྲོས། །རིགས་བཞི་ཡབ་ཡུམ་རིགས་བཞི་མཁའ་འགྲོ་ཡི། །ཐུགས་ཀར་ཐིམ་པས་
ཐུགས་དམ་རྒྱུད་བསྐུལ་ཏེ། །ལས་བཞིའི་དངོས་གྲུབ་འོད་ཟེར་ཁ་དོག་བཞིའི། །རྣམ་པར་ཞལ་ནས་ཐོན་ཅིང་བདག་ཉིད་ཀྱི། །ཐུགས་ཀར་ཐིམ་པས་ཕྲིན་ལས་བཞི་འགྲུབ་བསམ། །སྔགས་རིང་ཧཱུྃ་ཕཊཿཅན་དེ་ཅི་འགྲུབ་བཟླ། །འདི་ལྟར་ལས་བཞི་གཅིག་ཆར་བསྒོམ་པ་འདི། །དོན་ལྡན་ཞབས་དང་དཀོན་མཆོག་འབངས་ཀྱིས་གསུངས། །དེ་ནས་གཏོར་བསྔོས་བྱས་ལ་ཐུན་བསྡུ་སྟེ། །གཞུང་ལྟར་བསྔོ་སྨོན་བྱས་རྗེས་མུན་རུབ་ལ། །སྔོན་འགྲོ་མི་དགོས་བདག་བསྐྱེད་ཚར་གཅིག་འདོན། །གོང་ལྟར་དམིགས་པ་རྣམས་བསྒོམ་སྔགས་བཟླས་ཤིང་། །མཇུག་ཏུ་ལས་བཞིའི་སྔགས་དམིགས་ཡུད་ཙམ་བྱེད། །དེ་ནས་གཏོར་བསྔོས་བྱས་ཏེ་ཐུན་བསྡུ་ཉལ། །དེ་ལྟར་ཉིན་མཚན་ཐུན་གཉིས་མ་ཆག་པར། །ཟླ་གྲངས་མང་པོའི་བར་དུ་བྱ་བ་སྟེ། །ཟླ་ཞག་མི་བརྩི་སྔགས་ཀྱི་གྲངས་ལ་རྩི། །འབུམ་ཕྲག་བཅུ་སོགས་འགྲུབ་ན་ཕྱི་སྒྲུབ་ཐེམ། །བྱང་ཆུབ་ནར་མར་སྒྲུབ་པ་ཞེས་བྱ་སྟེ། །གནས་གཅིག་མིན་ཀྱང་གར་ཕྱིན་དེར་སྒྲུབ་ཆོག །དེ་ཡང་མི་ལྕོགས་རྒྱུན་ཁྱེར་ཉམས་ལེན་ནི། །ཉིན་ནུབ་ནམ་འདོད་བདག་བསྐྱེད་ཚར་གཅིག་ནི། །ཡི་དམ་ཡིན་ཕྱིར་ཆག་པའི་ཐབས་མེད་ཅིང་། །དེ་
བཞིན་གཏོར་བསྔོས་ཚར་གཅིག་མ་ཆག་བྱ། །དེ་མིན་འགྲོ་སྡོད་སྤྱོད་ལམ་ཀུན་གྱི་ཚེ། །གོང་གི་དམིགས་པ་དེ་དག་ཅི་ལྕོགས་བསྒོམ། །སྔགས་བཟླ་རུང་བར་བདེ་མཆོག་རྒྱུད་ལས་གསུངས། །ཉལ་ཁ་ཐུན་བསྡུ་བསྔོ་སྨོན་བྱ་བ་གཅེས། །སྔགས་ཀྱང་རྒྱུད་ཀྱི་དགོངས་པ་ཡི་གེ་དྲུག །རྒྱ་གཞུང་དགོངས་པ་ཡིག་བཅུ་གང་འདོད་ཆོག །རྟགས་དང་བྱིན་རླབས་མྱུར་འདོད་སྔགས་རིང་ཟབ། །དེ་ལྟར་ལྷ་དགུ་ཕྱི་ལྟར་སྒྲུབ་པ་འདི། །རྒྱུད་ཀྱི་དགོངས་པ་རྒྱ་གཞུང་སོར་བཞག་སྟེ། །པོད་གཞུང་རྣམས་ལས་དེ་དག་གསལ་ན་ཡང་། །བློ་ཆུང་རྣམས་ལ་ཕན་ཕྱིར་བསྡུས་ཏེ་བཀོད། །འགལ་འཁྲུལ་ཉེས་པའི་ཆ་མཆིས་ལྷ་ལ་བཤགས། །དགེ་བས་བླ་མའི་དགོངས་པ་རྫོགས་པ་དང་། །ཞུ་བ་པོ་ཡིས་གཙོར་བྱས་འབྲེལ་ཐོགས་ཀུན། །ཚེ་འདིར་ཐུགས་རྗེ་ཆེན་པོ་འགྲུབ་འགྱུར་ཞིང་། །ཕྱི་མ་བདེ་ཆེན་ཞིང་དུ་སྐྱེ་བར་ཤོག །མཐར་ཕྱིན་ཐབས་མཁས་གཉིས་ཀྱིས་ཞུས་པའི་ངོར། །རིག་འཛིན་སྤྲུལ་སྐུའི་དགོངས་རྫོགས་ལ་དམིགས་ཏེ། །ལུག་ལོ་ས་ག་ཟླ་བའི་ཡར་ཚེས་དྲུག །མཆོག་གི་སྤྲུལ་སྐུའི་ཆོས་འཁོར་བསྐོར་བའི་དུས། །རྒྱུ་སྐར་རྒྱལ་ལ་བབ་པའི་སྔ་དྲོའི་ཆར། །རཱ་ག་ཨ་སྱས་ཇི་ལྟར་སྨྲས་པ་
རྣམས། །པདྨ་མཐར་ཕྱིན་ཞེས་བྱས་ཡི་གེར་བཀོད།། །།མངྒ་ལཾ།། །། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅོས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།