མགོན་པོ་ཕྱག་བཞི་པའི་གཏོར་མ་ཁོག་ཕུབ་པའི་མཚལ་མ་འབྲིང་པོ།
མགོན་པོ་ཕྱག་བཞི་པའི་གཏོར་མ་ཁོག་ཕུབ་པའི་མཚལ་མ་འབྲིང་པོ་བཞུགས་སོ།།
དྲིན་ཅན་དྷརྨ་ཤྭ་རའི་ཞབས་ལ་འདུད། དཔལ་ཡེ་ཤེས་ཀྱི་མགོན་པོ་ཕྱག་བཞི་པ་དང་དུད་སོལ་ལྷ་མོ་སྦྲག་སྒྲུབ་ཀྱི་གཏོར་བསྔོས་ལ་གཞི་བྱས་ཏེ་མཚལ་མ་འདོན་ལུགས་ནི། རང་གསར་མ་ཡིན་ན་རྒྱལ་བ་རྒྱ་མཚོ། རྙིང་མར་གུ་དྲག་ལ་སོགས་སྔོན་དུ་འགྲོ་ཚར་བས། རྒྱལ་བ་རྒྱ་མཚོའི་གཏོར་བསྔོས་རྒྱས་པ་དང་། འོག་ཕྱག་བཞི་པའི་གཏོར་བསྔོས་འདིར་བྱའོ། །དེ་ཡང་སྟེང་གི་ཆ་ལ་བརྒྱུད་པའི་བླ་མ་སངས་རྒྱས་བྱང་ཆུབ་སེམས་དཔས་བསྐོར་བ། བར་གྱི་ཆ་ལ་ཡི་དམ་གྱི་ལྷ་ཚོགས་ལ་རྒྱུད་སྡེ་དྲུག་གིས་བསྐོར་བ། འོག་གི་ཆ་ལ་ཕྱག་བཞི་པ་བཀའ་སྲུང་དམ་ཅན་རྒྱ་མཚོ་ལ་བཀའ་སྡོད་ཕོ་ཉ་རྣམས་ཀྱིས་བསྐོར་བ། ནམ་མཁའི་སྤྲིན་འཁྲིགས་པ་ལྟར་སྐད་ཅིག་གིས་གསལ་གདབ་ནས་བཞུགས་པར་བསམས་ལ། ཞྭ་དམར་ཆོས་ཀྱི་
དབང་ཕྱུག་གིས་མཛད་པའི་རྒྱ་གཞུང་ནས། དཔལ་ཡེ་ཤེས་ཀྱི་མགོན་པོ་ཕྱག་བཞི་པ་ལྷ་བཅུ་གསུམ་པ་ལྷོ་སྒོ་ནག་པོ་སྤྱིའི་རྒྱུད་ནས་གསུངས་པའི་རྒྱལ་ཆེན་བཞི་དང་ལས་མགོན་དམར་པོ་དུད་སོལ་བདུད་རྩི་རྒྱལ་མོ་དང་བཅས་སྤྲུག་སྒྲུབ་འདོན་བྱའོ། །ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ་ཨོཾ་སྭ་བྷ་ཝ་ཤུདྡྷསརྦ་དྷརྨསྭ་བྷ་ཝ་ཤུདྡྷོཉཧཾ། ཆོས་རྣམས་ཐམས་ཅད་དངོས་པོའི་མཐའ། །རང་བཞིན་སྟོང་པའི་ངང་ཉིད་ལས། །མདུན་གྱི་གཞི་འདིར་དུར་ཁྲོད་ཀྱི། །ས་གཞིར་པཾ་ལས་པདྨ་དང་། །རཾ་ལས་ཉི་མའི་དཀྱིལ་འཁོར་སྟེང་། །ཧཱུྃ་ཡིག་མཐིང་ནག་ལས་གྱུར་པའི། །རྡོ་རྗེ་གྲི་གུག་ཧཱུྃ་གིས་མཚན། །འོད་འཕྲོས་བདུད་ཀྱི་སྡེ་བཅོམ་
ནས། །འཕགས་མཆོད་ཚུར་འདུས་ཡོངས་གྱུར་ལས། །ཡེ་ཤེས་མགོན་པོ་ཕྱག་བཞི་པ། །ཆར་སྤྲིན་གདོང་བ་ལྟ་བུའི་མདོག །དམར་ལ་ཟླུམ་པའི་སྤྱན་གསུམ་ལྡན། །ཁྲོ་གཉེར་བསྐྱོད་ཅིང་མཆེ་བ་གཙིགས། །ཞལ་ནས་ཧ་ཧ་ཧཱུྃ་ཧཱུྃ་གིས། །གད་སྒྲོག་ལྗགས་ནི་རྣམ་པར་འགྱུར། །དབུ་སྐྲ་སྨིན་མ་སྨ་ར་དང་། །དམར་སེར་མེ་ལྟར་རབ་ཏུ་འབར། །ཕྱག་བཞི་དང་པོས་གྲི་ཁུག་དང་། །གཡས་འོག་རལ་གྲི་འདེབས་པའི་ཚུལ། །གཡོན་གྱི་དང་པོས་ཀ་པཱ་ལར། །བདུད་རྩིས་བཀང་བ་ཐུགས་ཀར་འཛིན། །གཡོན་འོག་རྡོ་རྗེ་ཁ་ཊཾ་ག །ཕྱར་བའི་སྟབས་འཛིན་མི་མགོ་ནི། །སྐམ་པོ་ལྔ་ཡིས་དབུ་བརྒྱན་དང་། །རློན་པ་ཁྲག་འཛག་ལྔ་བཅུ་ཡིས། །སེ་རལ་དར་དང་རིན་པོ་ཆེ། །རུས་པ་སྦྲུལ་དང་དྲིལ་བུ་ཡིས། །གཡེར་ཁའི་ཕྲེང་བས་རབ་ཏུ་བརྒྱན། །སྟག་ལྤགས་གསར་པ་ཁྲག་ཅན་གྱིས། །སྨད་གཡོགས་སྐུ་ལས་ཡེ་ཤེས་ཀྱི། །མེ་དཔུང་འབར་བའི་དབུས་ཉིད་ན། །མི་རོ་ཁ་སྦྱབ་བསྣོལ་བའི་གདན། །དཔའ་བོ་རོལ་པའི་སྟབས་ཀྱིས་བཞུགས། །དེ་ཡི་གཡས་སུ་ཧཱུྃ་ཡིག་ལས། །ལས་མགོན་བྱ་རོག་གདོང་ཅན་ནི། །སྐུ་མདོག་དམར་པོ་ཞལ་གཅིག་
པ། ཕྱག་གཉིས་གྲི་གུག་ཐོད་པ་འཛིན། །ནག་པོ་སྟོང་གི་འཁོར་གྱིས་བསྐོར། །གཡོན་དུ་བྱོ་ཡིག་ཡོངས་གྱུར་ལས། །ཡུམ་མཆོག་རྩ་འཇིབ་དམར་མོ་ནི། །ཞལ་གཅིག་ཕྱག་བཞི་གཡས་པ་ན། །རལ་གྲི་རྩེ་གསུམ་གཡོན་པ་ན། །མདའ་གཞུ་མི་མགོ་འཛིན་པའོ། །མ་མོ་བྱེ་བའི་ཚོགས་ཀྱིས་བསྐོར། །མདུན་དུ་ཧཱུྃ་ལས་ཤ་ཟ་ནི། །སེང་གེའི་གདོང་ཅན་སྐུ་མདོག་ནག །ཞལ་གཅིག་ཕྱག་གཉིས་རལ་གྲི་དང་། །ཐོད་ཁྲག་འཛིན་པ་ཤ་ཟ་ནི། །འབུམ་གྱིས་བསྐོར་བ་དེ་རྒྱབ་ཏུ། །ལེགས་ལྡན་ནག་པོ་དར་ནག་གི །བེར་གསོལ་གཎྜི་འཛིན་པའོ། ༈ །ཁྲུབ་ཆེན་བྱེ་བ་འབུམ་གྱིས་བསྐོར། །མདུན་ཟུར་གཡས་གཡོན་གང་མཛེས་གཉིས། །གསེར་མདོག་ཟས་སྣའི་བུམ་པ་སྟོབས། །གནོད་སྦྱིན་ཁྲི་ཡི་འཁོར་གྱིས་བསྐོར། །དེ་ཕྱིར་ཤར་དུ་མཁའ་འགྲོ་མ། །བྱ་རྒོད་གདོང་ཅན་བྱང་དུ་ནི། །ཁྱུང་དང་ནུབ་ཏུ་ཁྭ་ཏ་དང་། །ལྷོ་རུ་འུག་པ་ཤར་ལྷོར་ཕག །ལྷོ་ནུབ་ཁྱི་དང་ནུབ་བྱང་དུ། །སྤྱང་ཀི་བྱང་ཤར་མཚམས་ཉིད་དུ། །སྟག་གི་གདོང་ཅན་བརྒྱད་ཀ་ཡང་། །གཅེར་བུ་སྐྲ་གྲོལ་ཞལ་གཅིག་པ། །ཕྱག་གཉིས་གྲི་གུག་
ཐོད་ཁྲག་འཛིན། །འཁོར་རྣམས་བཞེངས་ནས་གར་སྟབས་ཀྱིས། །རོལ་གར་སྣ་ཚོགས་མཛད་པའོ། །མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་མཚོ་དབུས། །ཐོད་པ་སྐམ་རློན་གཞལ་ཡས་སུ། །ཨོཾ་ལས་དུད་སོལ་ལྷ་མོ་ནག །ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤཀྟི་རྩེ་གསུམ་བསྣམས། །དུར་ཁྲོད་ཆས་བརྒྱད་མི་རོ་གསོལ། །བ་གླང་གླང་ལྤགས་རེ་ལྡེ་བགོས། །སྦྲུལ་བརྒྱན་ཞབས་གཉིས་ལྕགས་སྒྲོག་གསོལ། །བོང་བུ་དམར་གྲྭ་ཆིབས་པའོ། །སྙིང་འཕྲོག་མ་གསུམ་ལྷ་མོ་བཞི། །དུར་ཁྲོད་མ་མོ་ཕྲ་མེན་བརྒྱད། །སྲིད་པའི་མ་མོ་ཀུན་གྱིས་བསྐོར། །ཕྱོགས་བཞིར་རྒྱལ་པོ་ཆེན་པོ་བཞི། །དཔུང་བཞི་ཡན་ལག་དམག་དང་བཅས། །དུར་ཁྲོད་ཆེན་པོའི་ཕྱི་རོལ་དུ། །རྡོ་རྗེའི་རྭ་གུར་ཡེ་ཤེས་ཀྱི། །མེ་རི་དྲག་ཏུ་འབར་བའོ། །གཙོ་འཁོར་ཀུན་གྱི་སྤྱི་བོ་ནི། །ཨོཾ་དང་མགྲིན་པར་ཨཱཿཉིད་དང་། །ཐུགས་ཀའི་ཧཱུྃ་ལས་འོད་འཕྲོས་པས། །འོག་མིན་ལ་སོགས་སངས་རྒྱས་ཀྱི། །ཞིང་ཁམས་རྒྱ་མཚོར་བཞུགས་པ་ཡི། །ཡེ་ཤེས་མགོན་པོ་འཁོར་བཅས་ཀུན། །ནམ་མཁར་སྤྲིན་བཞིན་གཏིབས་པར་
གྱུར། །ཧཱུྃ། དད་པ་དང་ནི་དམ་ཚིག་གིས། །སྤྱན་འདྲེན་དཔལ་ལྡན་ནག་པོ་ཆེ། །བདག་རྒྱུད་སྒྲིབ་པ་བསལ་བའི་ཕྱིར། །བརྩེ་བས་དགོངས་ཏེ་འདིར་བྱོན་ཅིག །ཧཱུྃ། སྐུ་གསུང་ཐུགས་ཀྱི་བདག་ཉིད་ཅན། །རྡོ་རྗེ་ནག་པོ་འཁོར་བཅས་རྣམས། །རང་བཞིན་གནས་ནས་སྐུ་བཞེངས་པ། །བསྟན་པ་བསྲུང་ཕྱིར་འདིར་གཤེགས་ཤིག །འོག་མིན་གནས་མཆོག་དམ་པ་དང་། །ལྕང་ལོ་ཅན་གྱི་ཕོ་བྲང་དང་། །ནཱ་ལེནྡྲའི་གཙུག་ལག་དང་། །བསིལ་བ་ཚལ་གྱི་དུར་ཁྲོད་དང་། གཞན་ཡང་དུར་ཁྲོད་གནས་བརྒྱད་དང་། །ཕྱི་ཡི་རྒྱ་མཚོའི་འགྲམ་དག་དང་། །རང་བཞིན་གར་བཞུགས་གནས་མཆོག་ནས། །དཔལ་ལྡན་མགོན་པོ་འཁོར་བཅས་རྣམས། །རྣལ་འབྱོར་བདག་གིས་འབོད་པ་ལས། །གནས་འདིར་མྱུར་དུ་གཤེགས་སུ་གསོལ། །བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའི་མཐིང་དཀྱིལ་དབུས། །རིན་ཆེན་སྣ་ལྔའི་གཞལ་ཡས་ཁང་། །དེ་དབུས་གྲུ་གསུམ་ཐོད་མཁར་དང་། །གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་
པའི་གཟུགས། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡང་ནག་མོ་འབུམ་གྱིས་བསྐོར། གནས་འདིར་ཉིད་དུ་གཤེགས་སུ་གསོལ། །མགོན་པོ་ཀུན་གཤེགས་ཐུགས་རྗེ་ཅན། །ད་ལྟ་སྙིགས་མ་ལྔ་ཡི་དུས། །གཤེགས་ཤིང་བཞུགས་པའི་གནས་ངན་ཡང་། །འདྲེན་པའི་བསྟན་པ་སྲུང་བ་དང་། །སེམས་ཅན་ཀུན་ལ་ཕན་གདགས་ཕྱིར། །དམ་ཚིག་ཅན་ལ་རྗེས་བརྩེ་བས། །ནག་པོ་ཡབ་ཡུམ་འཁོར་དང་བཅས། །རྒྱལ་ཆེན་སྡེ་བཞི་དཔུང་དང་བཅས། །གནས་འདིར་ཉིད་དུ་གཤེགས་སུ་གསོལ། །ཨོཾ་ཙ་ཏུར་ཧསྟེ་བཛྲ་མ་ཧཱ་ཀཱ་ལ་དེ་ཝི་ཀ་ལི་ཙ་ཏུར་ར་ཛ་ས་པཱ་རི་ཝཱ་ར་བཛྲ་ས་མཱ་ཛཿ ཨེ་ཧྱ་ཧི་ཛཧཱུྃ་བཾ་ཧོ༔ ཧཱུྃ། སངས་རྒྱས་བསྟན་པ་སྲུང་བའི་མཐུ་རྩལ་ཅན། །དཔལ་ལྡན་མ་ཧཱ་ཀཱ་ལ་འཁོར་དང་བཅས། །བདུད་དང་མུ་སྟེགས་མ་ལུས་འདུལ་བ་དང་། །གདུག་པའི་དགྲ་བགེགས་མ་ལུས་འདུལ་བའི་ཕྱིར། །དྲག་པོའི་གཞལ་ཡས་དཀྱིལ་འཁོར་ཆེན་པོ་འདིར། གཉིས་མེད་བརྟན་པར་བཞུགས་ནས་ཕྲིན་ལས་མཛོད། །བྷྱོཿ རླུང་དམར་དྲག་པོའི་ཤུགས་ལྡན་བོང་བུའི་སྟེང་། །དུར་ཁྲོད་ཆོས་ལྡན་ཞབས་གཉིས་ལྕགས་སྒྲོག་མཛེས། །
ཞལ་གདངས་མཆེ་གཙིགས་ཀི་ལི་ཀཱི་ལ་སྒྲོག །དཔལ་ལྡན་འདོད་ཁམས་དབང་ཕྱུག་གདན་ལ་བཞུགས། །དམ་ཚིག་པ་དང་ཡེ་ཤེས་གཉིས་མེད་གྱུར། །པདྨ་ཀཱ་མ་ལ་ཡེ་སྟེ། དཔལ་ལྡན་མགོན་པོ་འཁོར་བཅས་ལ། །ཁྲག་ཆེན་འབར་བའི་ཨནྡྷཾ་དང་། །ཞག་ཆེན་འཁྲིགས་པའི་ཞབས་བསིལ་སོགས། །དབང་པོ་ལྔ་ཡི་མེ་ཏོག་དང་། །ཤ་ཆེན་སྤོས་དང་ཚིལ་ཆེན་སོགས། །ཞུན་ཆེན་སྣང་གསལ་མར་མེ་དང་། །སྣ་ཚོགས་དྲི་ཡི་བྱུག་པ་དང་། །ཤ་ཆེན་ལྔ་ཡི་ཞལ་ཟས་དང་། །ཐོད་ཆེན་རྔ་དང་རྐང་ཆེན་དུང་། །དགྱེས་པའི་ཚུལ་གྱིས་བཞེས་སུ་གསོལ། །བཛྲ་མ་ཧཱ་ཀཱ་ལ་དེ་ཝ་ས་པཱ་རི་ཝཱ་ར་ཨབྷཾ་སོགས། ཤབྡ་པྲ་ཏཱིཙྪ་སྭཱ་ཧཱ། ཧཱུྃ་ཧཱུྃ་ལས་སྐྱེས་པའི་ནག་པོ་ཆེ། །པདྨ་ཉི་མའི་་གདན་ལ་བཞུགས། །གདུག་པ་ཟིལ་གནོན་མེ་དཔུང་འབར། །མཐུ་ཆེན་ཁྱོད་ལ་ཕྱག་འཚལ་བསྟོད། །བྱ་རོག་མིང་ཅན་ནག་པོ་ཆེ། །ཞལ་གཅིག་ཕྱག་གཉིས་ཁྲོ་བོའི་གཟུགས། །ཞབས་གཉིས་གྱད་ཀྱི་སྟབས་ཀྱིས་བཞུགས། །སྟོབས་ཆེན་ཁྱོད་ལ་ཕྱག་འཚལ་བསྟོད། །ཆ་ལུགས་འཆང་བའི་ནག་པོ་ཆེ། །སྦྲུལ་དང་རིན་ཆེན་ཐོད་པས་
བརྒྱན། །སྟག་ལྤགས་ཤམ་ཐབས་སྐུ་ལ་གསོལ། །དཔའ་བོ་ཁྱོད་ལ་ཕྱག་འཚལ་བསྟོད། །ཕྲིན་ལས་མཛད་པའི་ནག་པོ་ཆེ། །འབྲས་བུ་ཐོད་ཁྲག་ཞལ་དུ་གསོལ། །གདུག་པའི་མཚོན་ཆ་ཕྱག་ན་བསྣམས། །གསོད་བྱེད་ཁྱོད་ལ་ཕྱག་འཚལ་བསྟོད། །གཟི་མདངས་ལྡན་པའི་ནག་པོ་ཆེ། །དབུ་སྐྲ་སེར་པོ་གྱེན་དུ་བརྗེས། །ཨག་ཚོམ་སྨིན་མ་མེ་ལྟར་འབར། །བརྗིད་པ་ཁྱོད་ལ་ཕྱག་འཚལ་བསྟོད། །སྙིང་རྗེས་ཁྲོས་པའི་ནག་པོ་ཆེ། །སྤྱན་གསུམ་སྡང་མིག་མེ་ལྟར་འབར། །རབ་ཏུ་འཁྲུགས་པའི་ཁྲོ་གཉེར་ཅན། །གཏུམ་ཆེན་ཁྱོད་ལ་ཕྱག་འཚལ་བསྟོད། །འཇིགས་པའི་གཟུགས་ཅན་ནག་པོ་ཆེ། །ཞལ་གདངས་མཆེ་བ་རབ་ཏུ་གཙིགས། །ལྗགས་འདྲིལ་ཧཱུྃ་ཧཱུྃ་སྒྲ་སྒྲོག་པ། །ཟ་བྱེད་ཁྱོད་ལ་ཕྱག་འཚལ་བསྟོད། །བྱང་ཆུབ་སེམས་ལྡན་ནག་པོ་ཆེ། །སངས་རྒྱས་སྤྱན་སྔར་ཁས་བླངས་པ། །བསྟན་པ་བསྲུང་བར་ཞལ་གྱིས་བཞེས། །དམ་ཅན་ཁྱོད་ལ་བདག་བསྟོད་དོ། །དམ་ལ་མ་འདའ་ནག་པོ་ཆེ། །བསྟན་པ་བསྲུང་བར་ཞལ་གྱིས་བཞེས། །བསྟན་པ་སྲུངས་ཤིག་ནག་པོ་ཆེ། །རྣལ་འབྱོར་སྐྱོངས་ཤིག་ནག་པོ་ཆེ། །བཀའ་བཞིན་སྒྲུབས་ཤིག་
ནག་པོ་ཆེ། །གལ་ཏེ་དམ་ལས་འདས་གྱུར་ན། །དུས་གསུམ་སངས་རྒྱས་ཁྱོད་ཀྱིས་བསླུས། །ཁྱོད་ནི་ཉམས་པར་འགྱུར་ཏ་རེ། །དེ་བས་དམ་ལ་མ་འདའ་ཞིག །ཨོཾ་བཛྲ་མ་ཧཱ་ཀཱ་ལ་ས་མ་ཡ་ཧ་ན་ཧ་ན་ཧཱུྃ་ཕཊ། དཔལ་ལྡན་ལྷ་མོ་དུད་པའི་སོལ་བ་མ་ཁྱོད་ཀྱིས་བདག་ལ་སྐུ་མངོན་སུམ་དུ་སྟོན་ཅིག །སྐུ་མངོན་སུམ་དུ་མི་སྟོན་ན་ཡང་། སྔོན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ལ་སོགས་པའི་སྤྱན་སྔར། ཇི་ལྟར་ཁས་བླངས་དམ་བཅས་པ་བཞིན་དུ། སངས་རྒྱས་ཀྱི་བསྟན་པ་གཉན་པོ་བསྲུང་བ་དང་བླ་མ་དམ་པ་རྣམས་ཀྱི་ཕྲིན་ལས་སྒྲུབས་ཤིག །སྔགས་འཆང་སྒྲུབ་པ་པོ་བདག་གི་དགྲ་བགེགས་ཐམས་ཅད་སྒྲོལ་ཅིག །ཚེ་དང་དཔལ་སྐྱེད་ཅིག །བདག་ཅག་དཔོན་སློབ་མི་ནོར་ལ་གནོད་པར་བྱེད་པའི། ནད་གདོན་ཡམས་ནད་རིམས་ནད་ཐམས་ཅད་ཞི་བར་མཛོད་ཅིག །གཞན་ཡང་བདག་གི་ཡིད་ལ་གང་འདོད་པ་དེ་ཁྱོད་ཀྱིས་འགྲུབ་པར་གྱིས་ཤིག །དེ་ལྟར་མི་བྱེད་ན་ཁྱོད་དམ་ཚིག་ཆེན་པོས་རབ་ཏུ་གཟིར་བར་བྱའོ། །ཨོཾ་ཧཱུྃ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཨེ་ཨཱཿ་རལླི་ཧྲཱི་ཛ་ཧ་ན་ཧ་ན་བཛྲ་ཀྲོ་ཏ་ས་མ་
ཡ་མ་ཏི་ཀྲ་མ་ནན་ཧཱུྃ་ཕཊ༔ སྔོན་གྱི་དམ་ཚིག་གཉན་པོ་དགོངས། །སླར་ཡང་ཐུགས་ཀའི་འོད་ཟེར་གྱིས། །རྒྱལ་བ་རིགས་ལྔ་ཡུམ་བཞི་དང་། །སེམས་དཔའ་སེམས་མ་ཁྲོ་བོ་དང་། །ཁྲོ་མོ་སྤྱན་དྲངས་བདུད་རྩིའི་ཆུས། །དབང་བསྐུར་སྐུ་གང་དྲི་མ་དག །ཆུ་ལྷག་སྤྱི་བོར་བརྟེན་པ་ལས། །གཙོ་བོར་བདེ་མཆོག་ལྷན་སྐྱེས་དང་། །འཁོར་རྣམས་ཀུན་ལ་བཅོམ་ལྡན་འདས། །མི་བསྐྱོད་རྡོ་རྗེས་དབུ་བརྒྱན་གྱུར། །བདག་ཉིད་བཅོམ་ལྡན་སྤྱན་རས་གཟིགས། །གསལ་བའི་ཐུགས་ཀར་ཟླ་བའི་སྟེང་། །དཀྱིལ་འཁོར་དབུས་སུ་ཧྲཱི༔ཡིག་མཐར། །ཡི་གེ་བཅུ་པོ་རབ་ཏུ་གསལ། །མགོན་པོའི་ཐུགས་ཀར་ཉི་སྟེང་ཧཱུྃ། །དམར་པོ་འོད་ཟེར་འབར་བའི་མཐར། །ཨོཾ་མ་ཧཱ་ཀཱ་ལ་གུ་ཎ་ཧྲཱི་ད་ཧཱུྃ་ཕཊ༔ ཅེས་པའི་སྔགས་ཕྲེང་འཁོར་བར་བསམ། །རང་གི་ཐུགས་ཀའི་ཧཱུྃཿཡིག་ལས། །འོད་འཕྲོས་དཔལ་ལྡན་ནག་པོ་ཆེའི། །ཐུགས་ཀར་ཕོག་པས་ཐུགས་རྗེ་ཆེ། །བསྐུལ་ཏེ་དངོས་གྲུབ་བྱིན་རླབས་ཀུན། །འོད་ཟེར་ཁ་དོག་སྣ་ཚོགས་ཚུལ། །མགོན་པོའི་ཞལ་ནས་བདག་ཉིད་ཞལ། །ཞུགས་ནས་ཐུགས་ཀར་ཐིམ་པའི་མོད། །ཡེ་ཤེས་མགོན་པོ་འཁོར་བཅས་ལ། །
སྤྲུལ་པའི་ཕོ་ཉ་མང་འཕྲོས་ཏེ། །བདུད་བཞི་བཏུལ་ཞིང་ཕྲིན་ལས་བཞི། །ཐོགས་པ་མེད་པར་འགྲུབ་པར་གྱུར། །ཅེས་མན་ངག་ལྟར་བསྙེན་ནོ། །ཨོཾ་ཁཎྜ་རོ་ཧེ་སོགས། ཨོཾ་སྭ་བྷ་ཝས་སྦྱངས། སྟོང་པའི་ངང་ལས་ཡཾ་ལས་རླུང་། །རཾ་ལས་མེ་དང་ཀཾ་ལས་ནི། །མི་མགོ་གསུམ་གྱི་སྐྱེད་པུའི་སྟེང་། །ཨ་ལས་ཡེ་ཤེས་ཀ་པཱ་ལར། །ཤ་ལྔ་བདུད་རྩི་ལྔ་པོ་དང་། །བདུད་དགྲའི་ཤ་རུས་སྤུང་པ་ལས། །ཨོཾ་ཨཱཿཧཱུྃ་གིས་སྐུ་གསུང་ཐུགས། །ཡེ་ཤེས་བདུད་རྩིར་བྱིན་གྱིས་བརླབས། །ལྷ་ཚོགས་དེ་དག་ཐམས་ཅད་ཀྱིས། །ཧཱུྃ་ལས་བྱུང་བའི་རྡོ་རྗེའི་ལྗགས། །འོད་ཀྱིས་སྦུ་གུས་བདུད་རྩི་རྣམས། །དྲངས་ཤིང་གསོལ་བས་མཉེས་པར་གྱུར། །ཨོཾ་བཛྲ་ཀ་ཝུ་ཝ་ཝ་པ་ཤ་ཡ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་ཁ་ཁ་མུ་ཁ་ཀརྨ་རཀྵ་སྲོག་དུང་དུང་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལི་དེ་ཝི་རུ་པ་ནི་ཧཱུྃ་བྷྱོ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་སེང་ཧ་མུ་ཁ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་རཀྵ་དུ་བཻ་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་དྷི་ཏྲ་སྱེ་ཧཱུྃ་ཧཱུྃ་
ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་གྷ་རུ་ཊ་སྐྱེ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་ཀཾ་ཀ་ཕྱེ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཧུ་ལུ་ཀཱ་སྱེ་ཧཱུྃ་། ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་ཝཱ་ར་སུཾ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་ཤྭ་ན་སྐྱེ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཤྲཱི་གྷ་ལ་སྐྱེ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་བྱུ་གྱི་སྐྱེ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་ཡ་ཤ་ས་ན་ཨུ་པ་ཧ་རི་ཎི། ཨེ་ཥ་ཨ་པིཉྩ་མ་ཧཱ་ཀ་ལོ་ཨ་ཡཾ། །ཨི་དཾ་རཏྣ་ཏྲ་ཡཱ་ཡ། ཨ་པ་ཀ་རི་ཎི། ཡ་ཏི་པྲ་ཏི་ཛྙཱ། སྨ་ར་སི་ཏ་ད། ཨི་དམ་དུཏྟཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲིཉྩ་གྲིཉྩ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ན། པ་ཙ་པ་ཙ། དེ་ན་མེ་ཀེ་ན་ཧཱུྃ་ཕཊ༔ ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ནཱཾ་ས་ལ་ཁཱ་ཧི། རཀྟ༴ ཙིཏྟ༴ གོ་རོ་ཙ་ན༴ བ་སུ་ཏ་ལ༴ ཨོཾ་ཨི་དཾ་བ་ལིཾ་ཏ་ཧྥ་གྷིཧྥ་ས་མ་ཡ་ཧཱུྃ་ཕཊ༔ ཨོཾ་ཨ་ཀཱ་རོ༔ ཨོཾ་དྷིཥྛ་རབྦ་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བྷཻཾ་རུ་ཌྷ་ཀ་ཡེ་སྭཱ་
ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བྷཻཾ་རུ་པཀྵ་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་བྷཻཾ་ཤཱ་མ་ཎ་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། །ཨོཾ་མ་ཧཱ་ཀཱ་ལ་ཡཀྟ་དེ་ཝ་བྷ་ཏི་དྷི་དྷ་ཧེ་ལུ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཤྲཱི་མ་ཧཱ་ཀཱ་ལ་ཁྲག་འཐུང་གི་རྒྱལ་པོ། ཕྱག་བཞི་པ། བྱ་རོག་གི་མཚན་ཅན། སྐུ་གསུང་ཐུགས་ཀྱི་སྤྲུལ་པ། ལས་མགོན་ཡུམ་མཆོག །རྩ་འཇིབ་དམར་མོ། ལེགས་ལྡན་ནག་པོ། ཕྱོགས་ཀྱི་མཁའ་འགྲོ་བརྒྱད་སོགས། རང་འདྲའི་སྤྲུལ་པ་ལས་མཁན་འཁོར་ཚོགས། བཀའ་སྡོད་མཐུ་བོ་ཆེ་རྣམས་དང་། ནག་པོ་སྟོང་ཤ་ཟ་འབུམ། མ་མོ་བྱེ་བ། གནོད་སྦྱིན་ཁྲི། ཁྲབ་ཅན་བྱེ་བ་དུང་ཕྱུར་གྱིས་བསྐོར་བ། བསྟན་པའི་བཀའ་སྲུང་། དམ་ཉམས་གྱི་སྲོག་གཅོད། མནའ་ཟན་གྱི་གཤེད་པོ། རིག་འཛིན་གྱི་སྲོག་ཤིང་། རྣལ་འབྱོར་གྱི་དགྲ་བླ། དུག་གསུམ་ནད་ཀྱི་སྨན་པ། གཙུག་ལག་ཁང་དང་། དཀྱིལ་འཁོར་གྱི་སྲུང་མའི་ཚོགས་དང་བཅས་རྣམས་ལ་དམ་རྫས་བདུད་རྩིས་གཏོར་མ། དངོས་འབྱོར་ཡིད་སྤྲུལ་གྱི་མཆོད་པ། རྒྱ་ཆེན་པོ་འདིས་གསོལ་ལོ་མཆོད་དོ་
བསྟོད་དོ། །དེ་དག་གི་མཐུས་རྣལ་འབྱོར་པ་བདག་གི་བཀའ་དང་བསྟན་པ་སྲུང་། ཚེ་དང་དབང་ཕྱུག་སྤེལ། དཔལ་དང་གྲགས་པ་སྒྲུབས། འཁོར་དང་གང་ཟག་སྐྱོངས། བདུད་དང་བར་ཆད་ཟློག །མི་ནོར་ཟས་གསུམ་སྡུས། དགྲ་བགེགས་ཐལ་བར་རློགས། །ཕྲིན་ལས་རྣམ་བཞི་སྒྲུབས། རྟག་ཏུ་སྲུང་སྐྱོབ་མཛོད་ཅིག །དཔལ་ལྡན་ལྷ་མོ་དུད་པའི་སོལ་བ། གསོད་བྱེད་མ་གསུམ་རིགས་བཞིའི་ལྷ་མོ་དུར་ཁྲོད་ཀྱི་མ་མོ་བརྒྱད། ཕྲ་མེན་མ་བརྒྱད། སྒོ་མ་བཞི་སོགས་སྲིད་པའི་མ་མོ་མཁའ་འགྲོ་ཐམས་ཅད་ལ་གསོལ་ལོ། །མཆོད་དོ་འབུལ་ལོ། །མཉེས་རབ་ཀྱི་ཕུད་དང་དགྱེས་རབ་ཀྱི་མཆོད་པ་དམ་པ་འདི་མཛོད་ལ། བདག་ཅག་རྣལ་འབྱོར་པ་མི་ནོར་འཁོར་དང་བཅས་པའི། ནད་ཀྱི་།རིགས་སུ་གྱུར་པ། རླུང་ལས་གྱུར་པ། མཁྲིས་པ་ལས་གྱུར་པ། བད་ཀན་ལས་གྱུར་པ། འདུས་པ་ལས་གྱུར་པ། ནད་རིགས་བཞི་བརྒྱ་རྩ་བཞི་པོ་ཐམས་ཅད་ཞི་ཞིང་བཟློག་པར་མཛོད་ཅིག །ཡམས་ནད་རིམས་ནད་མི་ནད་ཕྱུགས་ནད་ཐམས་ཅད་རྒྱུན་ཚད་པ་དང་མི་འབྱུང་བའི་ཕྲིན་ལས་རྒྱ་ཆེན་པོ་མཛོད་ཅིག །རྒྱལ་པོ་ཆེན་པོ་ཡུལ་འཁོར་སྐྱོང་དང་།
འཕགས་སྐྱེས་པོ་དང་། སྤྱན་མི་བཟང་དང་། རྣམ་ཐོས་སྲས་དང་། བཙུན་མོ་དང་བཅས་པ། འཁོར་དཔུང་ཚོགས་དང་བཅས་པ། གནོད་སྦྱིན་གང་པོ། དང་རབ་མཛེས་མ་ཀླུ་རྒྱལ་གང་པོ་དང་མཛེས་མ་རྣམས་ལ། གསོལ་ལོ། །མཆོད་དོ། །མཉེས་ཤིང་ཚིམས་ནས་བདག་ཅག་དཔོན་སློབ་བསྲུང་བྱ་རྣམས་ལ། བར་ཆད་ཐམས་ཅད་ཀྱིས་མི་ཚུགས་པ་དང་སྟོབས་དང་མངའ་ཐང་བསོད་ནམས་ལོངས་སྤྱོད་འཕེལ་ཞིང་རྒྱས་པ་དང་། ཕྱོགས་བཞིའི་དགྲ་བགེགས་ཐམས་ཅད་འདུལ་བའི་ཕྲིན་ལས་རྒྱ་ཆེན་པོ་མཛོད་ཅིག །དཔལ་ལྡན་རྡོ་རྗེ་ནག་པོ་ཆེ། །ལྕམ་དྲལ་བཀའ་འཁོར་བཅས་པ་ཡི། །ཟག་མེད་བདེ་ཆེན་བསྐྱེད་གྱུར་པའི། །བདུད་རྩི་རོ་མཆོག་མྱོང་མཛད་པ། །བསོད་ནམས་ཚོགས་ཆེན་གང་བསགས་དེས། །རྩ་བརྒྱུད་བླ་མའི་བཀའ་དང་ནི། །རང་དམ་གཉེན་པོ་དགོངས་པ་ལྟར། །སངས་རྒྱས་བསྟན་དང་སེམས་ཅན་དོན། །འབད་པ་མེད་པར་འགྲུབ་མཛད་ཅིང་། །ཁྱད་པར་གསོལ་འདེབས་བདག་རྒྱུད་ལ། །མཆོག་དང་ཐུན་མོང་དངོས་གྲུབ་སྩོལ། །དེ་ལ་འགལ་རྐྱེན་གང་མཆིས་པ། །ཕྲིན་ལས་རྣམ་བཞིའི་སྒོ་ནས་
ནི། །ཚར་གཅོད་རྗེས་འཛིན་མཛད་དུ་གསོལ། །ཧཱུྃ། ཡན་ལག་བརྒྱད་ལྡན་སྨན་གྱི་ཆབ། །མི་ཁྲག་གི་ཁྲག་དང་འདྲེས་པའི། །དུག་ཆུ་ཁོལ་མའི་མཆོད་ཡོན་ནི། །མ་མགོན་འཁོར་བཅས་མདུན་དུ་འབུལ། །པདྨ་ཨུཏྤལ་སྔོན་པོ་དང་། །བཙན་དུག་ར་དུག་དུག་ཤིང་གི །མེ་ཏོག་སྔོན་པོ་དྲི་ངད་ཅན། །མ་མགོན་འཁོར་བཅས་དབུ་ལ་འབུལ། །གུ་གུལ་ཨ་ག་རུ་དག་དང་། །རྔ་མོང་བོང་བུའི་བདུད་རྩི་དང་། །ཤ་ཆེན་ཚིལ་ཆེན་བདུག་སྤོས་འདི། །མ་མགོན་འཁོར་བཅས་ཤངས་ལ་འབུལ། །རྩི་མར་འབྲུ་མར་སྣང་གསལ་དང་། །ར་ཚིལ་ཁྱི་ཚིལ་ཕག་ཚིལ་དང་། །ཞུན་ཆེན་སྣང་གསལ་སྒྲོན་མེ་འདི། །མ་མགོན་འཁོར་བཅས་སྤྱན་ལ་འབུལ། །ཙན་དན་ག་པུར་གླ་རྩི་དང་། །ཤ་རུལ་ཁྲག་རུལ་དུག་སྦྱར་བའི། །དམར་ནག་འཁྲུགས་པའི་དྲི་ཆབ་འདི། །མ་མགོན་འཁོར་བཅས་ཐུགས་ཀར་འབུལ། །རོ་བརྒྱ་ལྡན་པའི་ཟས་མཆོག་དང་། །ནས་ནག་ཏིལ་ནག་བྲ་བོ་ནག །ཚིགས་མ་ནག་པོའི་ལྷ་བཤོས་འདི། །མ་མགོན་འཁོར་བཅས་ཞལ་དུ་འབུལ། །རྔ་དང་རྗེའུ་ཆུང་ཏིང་ཏིང་ཤག །མི་རྐང་དུང་དང་ཌཱ་མ་རུ། །རོལ་མོ་སིལ་སྙན་
གྱེར་མ་དབྱངས། །མ་མགོན་འཁོར་བཅས་སྙན་ལ་འབུལ། །ཨོཾ་བཛྲ་མ་ཧཱ་ཀཱ་ལ། དྷེ་ཝི་ཀཱ་ལི་ཙ་ཏུར་རཱ་ཛ་ས་པ་རི་ཝཱ་ར་ཨརྒྷཾ་པུཥྤེ་སོགས། ཤབྡ་པྲ་ཏཱིཙྪ་སྭཱ་ཧཱ། ཤེས་རབ་མ་དཱ་ན་ཡི་ཆང་། །ཐབས་ཀྱི་ཚིགས་ས་བ་ལི་ཟན། །དམ་རྫས་བདུད་རྩིའི་ཚོགས་ཕུད་འདི། །མ་མགོན་འཁོར་དང་བཅས་ལ་འབུལ། །བཛྲ་མ་ཧཱ་ཀཱ་ལ་དེ་ཝི་ཀ་ལི་ས་པ་རི་ཝཱ་ར་པཉྩ་ཨ་མྲྀ་ཏ་ཨོཾ་ཨཱཿཧཱུྃ། ཆར་སྤྲིན་གཡོ་བ་དང་མཚུངས་རྔ་རྔོག་བཟང་། །གློག་གི་ཞགས་ལྟར་མྱུར་མགྱོགས་གོམ་སྟབས་ཅན། །རླུང་གི་ཤུགས་དང་འདོད་དགུའི་འགྲོས་ལྡན་པ། །མྱུར་མགྱོགས་རྒྱན་གྱིས་བརྒྱན་པ་གྲངས་མེད་འབུལ། །འདམ་བུའི་ཚལ་བཞིན་རིང་བཞིན་འཚུབ་པ་ཡི། །སྤུ་གཞོམ་གྱིས་གཡོགས་མདུང་རྩེ་ལས་རྣོ་རྭ། །ཡན་ལག་རགས་ཤིང་སྤུ་གྲིའི་རྨིག་པ་ཅན། །གཡག་ནག་རྒྱན་དང་ལྡན་པ་གྲངས་མེད་འབུལ། །རི་དྭགས་དགྲ་ལྟར་དྲག་གཏུམ་མི་བཟད་པའི། །ཁ་གདངས་མཆེ་གཙིགས་རོ་འཛིན་གཅོད་པ་ནི། །མུན་ནག་གློག་ཕྲེང་ཟླ་ཕྱེད་འཕྲོག་པ་བཞིན། །ནོར་སྐྱོང་གཏུམ་པོ་རྒྱན་གྱིས་བརྒྱན་ཏེ་འབུལ། །མུན་པ་ལྟར་ནག་སྤྱི་ཡི་ཚོགས་འཁྲུགས་ཤིང་། །དུང་
ལྟར་དཀར་བའི་རྭ་འཁྱིལ་རྣམ་པར་མཛེས། །གསེར་སྦྱང་བཙོ་མའི་མདངས་ཆགས་མིག་གཡོ་བའི། །ལུག་ནག་རྒྱན་དང་ལྡན་པ་གྲངས་མེད་འབུལ། །གནམ་ལྕགས་བབས་ཀྱང་འབིགས་པར་མི་བཟོད་ཅིང་། །གཡུལ་གྱི་མཚོན་ཆའི་ངར་རྣམས་ཉམ་བྱེད་པའི། །གཏུམ་པོའི་ལུས་ལ་མི་ཤིགས་སྐྱོབས་པ་ཡི། །དངུལ་ཆུ་ལྟར་འཚེར་ཁྲབ་རྣམས་ཁྱོད་ལ་འབུལ། །སྤྲིན་དཀར་དུམ་བུའི་ཕུང་པོར་གྱུར་པ་བཞིན། །བཅུ་དྲུག་བྱང་བུའི་བསྡེབ་པའི་རྨོག་བཟང་པོ། །ཀླད་ན་གངས་ཀྱི་རི་ལས་རྔམས་པ་ཡི། །ཕོད་དཀར་ལྡེམ་པ་དུ་མ་ཁྱོད་ལ་འབུལ། །ཆང་ཟུང་རབ་བརྟན་ལོགས་ཀུན་མེ་རི་འཁྱུག །མཆོག་ཏུ་འཁྲིགས་པའི་ངར་ལྡན་རབ་རྣོ་བས། །གང་ལ་འདེབས་པར་བགྱིས་པ་ཐལ་བར་རློགས། །རལ་གྲི་དུ་མ་ཁྱོད་ལ་གུས་པས་འབུལ། །རླུང་ལྟར་མགྱོགས་པའི་རྟ་ནག་རྟིང་དཀར་དང་། །གཡག་ནག་རུ་རྣོ་སྤུ་ཞོལ་བརྗིད་ཅིང་ཆེ། །ཁྱི་ནག་དོམ་བུ་གཏུམ་ཞིང་འཇིགས་པའི་གཟུགས། །ལུག་ནག་རྒྱན་ལྡན་ཚོགས་རྣམས་འབུལ་བར་བགྱི། །གཞོམ་མེད་རྡོ་རྗེའི་གོ་ཆ་དུ་མ་དང་། །ཕ་རོལ་བདུད་དཔུང་གཅོད་པའི་མཚོན་ཆའི་ཚོགས། །ཕྱི་ནང་གསང་
བའི་རྟེན་རྫས་སྒྲུབ་རྫས་དང་། །མཆོད་པའི་སྤྲིན་ཕུང་བསམ་གྱིས་མི་ཁྱབ་འབུལ། །དཔལ་ནག་པོ་ཆེན་པོའི་བསྟོད་པ་རྐང་པ་བརྒྱད་པ་ནི། ཨོཾ་འགྲུབ་པར་གྱུར་ཅིག་ཧཱུྃ་ཧཱུྃ་་ཕཊ་ཅེས་དྲག་པོའི་སྒྲ་ཡིས་སྲིད་པ་གསུམ་གྱི་ཁོངས་རྣམས་མ་ལུས་འགེངས་ནུས་ཤིང་། །ཧ་ཧ་ཊོ་ཊ་ཞེས་བཞད་གང་གི་དུས་ཀུན་ཏུ་ནི་ཤིན་ཏུ་རབ་ཏུ་འཇིགས་མཛད་པ། །ཀཾ་ཀཾ་ཀཾ་ཞེས་ཐོད་པའི་ཕྲེང་བས་དབུ་ལ་སྤྲས་ཤིང་ནག་པོའི་ཆུ་དང་མཚུངས་པའི་སྐུ། །ཧཱུྃ་ཧཱུྃ་ཧཱུྃ་ཞེས་ནུས་པ་མཆོག་གིས་ཁྲོ་གཉེར་འཇིགས་མཛད་འཇིགས་པའི་ཁ་གདངས་ཤ་ཟ་ཞིང་། །དབུ་སྐྲ་དང་ནི་སྨ་ར་སྨིན་སེར་ཉེ་བར་བསྐྱོད་པའི་ཞིང་སྐྱོང་ཁྱོད་ཀྱིས་སྲུང་བར་མཛོད། །རཾ་རཾ་རཾ་ཞེས་སྤྱན་དམར་འཁྲུགས་ཤིང་བསྒྱུར་མཛད་ཀྲུ་ཀྲུ་ཀྲུ་ཞེས་རབ་ཁྲོས་སྤྱན་གྱིས་གཟིགས། །རྡོ་རྗེའི་གློག་སྟོང་འགྱུ་བའི་སྔགས་སྒྲ་ཧྲཱི་ཧྲིཉྩསྒྲོག་པས་དཔའ་བོའི་མངའ་བདག་རྣལ་འབྱོར་པ་རྣམས་ལ། །སྨིན་མ་སེར་ཞིང་མཆེ་གཙིགས་རོ་ཡི་གདན་ལ་དགྱེས་པའི་ཞིང་སྐྱོང་ཁྱོད་ཀྱིས་སྐྱོང་བར་མཛོད། །ཧ་ཧ་ཧཱུྃ་དང་ཀཱི་ལི་ཀཱི་ལ་ཞེས་སྒྲོག་ཕྱག་གཡོན་ཁ་ཊཾ་གར་བཅས་ཐོད་པ་བསྣམས། །རུ་རུ་རུ་ཞེས་ཁྲག་རྒྱུན་འབབ་པ་ཕྱག་གིས་བསྣམས་ཤིང་
གསོལ་མཛད་འཐུང་བ་ལ་དགྱེས་ཤིང་། །ཁཾ་ཁཾ་ཁཾ་ཞེས་གཏུམ་པོའི་ཕྱག་གཡས་གྲི་གུག་རལ་གྲིས་བགེགས་རྣམས་ལ་ནི་རོལ་མཛད་པ། །ཀྲྀ་ཊཾ་ཊ་ཞེས་ཌཱ་མ་རུ་ཅན་དེ་ཡིས་འདུལ་མཛད་འཁོར་བཅས་ཞིང་སྐྱོང་ཁྱོད་ཀྱིས་སྲུངས། །རབ་ཏུ་རྔམ་ཞིང་མགོ་བོ་རྣམས་ཀྱི་ཕྲེང་བས་གཤིན་རྗེ་དང་མཚུངས་འཇིགས་པའི་སྐུ་བརྒྱན་ཅིང་། །ཀྱི་ཀྱི་ཀྲྀ་ཞེས་བཟོད་པར་དཀའ་བའི་གཟུགས་ཅན་ཅ་ཅོ་སྒྲོག་པར་བྱེད་པའི་གདུག་པ་རྣམས་བཟུང་སྟེ། །གཅིག་པུའི་སྣ་ཚོགས་མནན་ཅིང་མནན་ནས་ཀ་ཧ་ཀ་ཧ་བརྗོད་མཛད་ཆར་སྤྲིན་སྔོན་པོའི་མདོག །སྐུ་ཚུལ་མི་ཡི་ཤ་དང་རྒྱུ་མས་སྦྲེལ་བའི་ཕྲེང་བས་ཀུན་ནས་བརྒྱན་ཅིང་ཞལ་དུ་གསོལ། །དྲག་ཤུལ་ཕྱག་གིས་འདོད་པའི་གཟུགས་དང་མི་སྡུག་པ་ཡི་གཟུགས་ཅན་གྱིས་ནི་འབྱུང་པོ་རོ་ལངས་ཚོགས། །མ་ལུས་བཟུང་ནས་མྱུར་དུ་བསད་པ་རྣམས་ཀྱི་མགོ་བོ་ཁྲག་རྒྱུན་འབབ་པ་རབ་ཏུ་གསོལ། །ཧྲཱི་ཏྟཾ་ཤི་ཡི་སྔགས་ཀྱི་གསུངས་ཅན་པ་ཙ་པ་ཙའི་སྔགས་ཀྱིས་བགེགས་རྣམས་རབ་ཏུ་བསྲེགས། །རོལ་པས་རོལ་པ་སེལ་ཞིང་མི་ཡིས་གང་བའི་ས་ལ་ཞིང་སྐྱོང་ཁྱོད་ཀྱིས་སྲུང་བར་མཛོད། །ཕོ་ཕེ་ཕོ་རེས་སྒྲོགས་པས་སོ་སོར་བསྐྱོད་པའི་མེ་དཔུང་ཆེན་པོའི་
དབུས་སུ་བཞུགས་ནས་སུ། །རིགས་ཀྱི་ལུས་ཅན་སྐྱོང་བར་མཛོད་ཅེས་སྒྲུབ་པོ་རྣམས་ཀྱིས་ཞིང་རྣམས་ངེས་པར་ཞིང་སྐྱོང་མཛོད། །ཕྱུགས་རྣམས་ཀྱིས་ནི་ཉིན་རེ་བཞིན་དུ་བགེགས་དང་སྡིག་འཇོམས་དྲི་མེད་བརྙེས་པ་ཆུ་ཉི་བཞིན། །ཅི་ཙོ་ཙོ་ཞེས་གཏུམ་པོའི་ཤུགས་ཀྱིས་རབ་གཡོས་རྨད་བྱུང་ས་ཡི་འཇིག་རྟེན་སྣང་མཛད་པ། །ཀྲྀ་ཀྲྀ་ཀྲྀ་ཞེས་གཤེགས་པས་དགྲ་བོ་ཉོན་མོངས་པ་རྣམས་ངེས་པར་ཉོན་མོངས་འཇོམས་མཛད་ཅིང་། །སཾ་སཾ་སཾ་ཞེས་ཚོགས་པའི་བདག་ཉིད་དམ་ཚིག་ཐོས་འཛིན་ཞིང་སྐྱོང་གང་ཡིན་ཁྱོད་ཀྱིས་སྐྱོང་། །ཐཾ་ཐཾ་ཐཾ་ཞེས་གཤིན་རྗེ་ལྟར་ཁྲོ་དྲི་མ་མེད་པའི་སྣ་ཚོགས་ཆུ་བཞིན་གཟིགས་མཛད་ཅིང་། །ཡཾ་ཡཾ་ཡཾ་ཞེས་རླུང་གི་ཤུགས་ཀྱིས་མྱུར་དུ་རྒྱུ་ཞིང་ཉོན་མོངས་འཇིག་རྟེན་གནོད་བྱེད་མཁྱེན། །ཀཾ་ཀཾ་ཀྲྀ་ཞེས་གདུག་པའི་གཟུགས་ཀྱིས་སྲིད་གསུམ་ཉིན་མཚན་དུས་ཀུན་ཉོན་མོངས་གྱུར་པ་གང་། །ཀཾ་ཀཾ་ཀཾ་ཞེས་ཕན་པར་མཛད་ཅིང་གནོད་པ་སྐད་ཅིག་གིས་སེལ་ཞིང་སྐྱོང་ཁྱོད་ཀྱིས་སྐྱོངས། །པཾ་པཾ་པཾ་ཞེས་ཐུགས་རྗེའི་ཞགས་པས་བྱོལ་སོང་རྣམས་འཛིན་ཕྱག་གིས་གདུལ་བྱ་རྣམས་སྐྱོང་བ། །སྔགས་བདག་སྔགས་ཀྱིས་གཟུགས་ཅན་
ཐུགས་ཀྱི་སྔགས་པ་རྣམས་ལ་བློ་གྲོས་འབྲས་བུས་མཚུངས་མེད་སྟེར། །ཞིང་རྣམས་སྐྱོང་བར་མཛད་པ་ཁྱེད་ཀྱིས་འགྲོ་བའི་ལུས་རྣམས་མ་ལུས་ཡུན་རིང་བསྐྱང་དུ་གསོལ། །སྒྲུབ་པ་པོ་རྣམས་སློབ་དཔོན་གང་ཞིག་དམ་ཚིག་ཐོས་འཛིན་གང་ཡིན་བློ་ལྡན་གྱུར་པ་དག །ཐུན་གསུམ་དུ་ནི་སྔགས་རྣམས་བརྒྱད་པོ་ཀློག་བྱེད་དེ་ནི་བསོད་ནམས་ལྡན་པར་གྱུར་བ་དང་། །ཚེ་དང་དཔལ་དང་གྲགས་དང་མཐུ་སྟོབས་འབྱོར་པ་འཛིན་དང་གཟི་བརྗིད་རྒྱས་པ་མཚུངས་མེད་སྟེར། །ས་སྟེང་དང་ནི་མཐོ་རིས་སུ་ཡང་བགེགས་ཀྱི་ཚོགས་རྣམས་རྟག་ཏུ་ཉམས་པར་འགྱུར། །ཡང་དུད་སོལ་མའི་བསྟོད་པ་རྐང་པ་བརྒྱད་པ་བཞུགས་སོ། །བྷྱོཿ ཏིལ་མར་གྱིས་བསྐུས་ལེན་བུ་གཅིག་འཕྱང་རོ་ཉེའི་རྣ་ཆས་སྒེག་ཅིང་རྒྱན་རྣམས་མ་ལུས་འཆང་། །རྒྱུན་དུ་རྐང་སྒོག་ལྕགས་ལ་བྱས་ཤིང་གཅིག་གིས་རང་གི་རྐང་པ་མཛེས་པར་བྱས་པ་སྟེ། །གཅེར་བུ་བོང་བུ་ཞོན་ནས་འགྲོ་བ་འདི་ན་རྒྱུ་བ་དེ་ནི་ལྷ་མོ་ཁྱོད་ཉིད་ཀྱི། །བདག་ཉིད་མཛེས་པར་ཤེས་ཀྱི་གཞན་ལྟས་ཁྱོད་ཀྱི་སྤྱོད་པའི་མཚོ་ཆེན་དོན་དག་སུ་ཡིས་ཤེས། །འཁོར་བ་འཇིག་པའི་ཆེ་ན་མི་ལུས་དག་ལས་ཁྲག་དང་ཞག་འཛག་དུད་པ་འཐུལ་བ་ན། །ལྷ་མོ་མི་བཟད་
མཆེ་གཙིགས་ཁྱོད་ཀྱི་ཞལ་དུ་འགྲོ་ཀུན་སྐད་ཅིག་ཙམ་གྱིས་ཞུགས་པར་གྱུར། །ནག་མོ་མི་ཐོད་ཐོགས་པ་ཁྱོད་ནི་རྣལ་འབྱོར་གྲུབ་པའི་སྤྱོད་ཡུལ་ཅན་ཏེ་དུར་ཁྲོད་དགྱེས། །ཁྱོད་ནི་གཡོ་ཅན་མནན་ཅིང་ནད་དང་འཆི་བའི་འཇིགས་སེལ་ཞི་ལ་མི་བཟད་དྲེལ་འཆང་སྒྲོག །ཁྱོད་ནི་དཔའ་བོ་དག་གི་མགོ་བོའི་ཅོད་པན་ལེགས་སྤྱད་གཡུལ་དུ་མཚོན་གྱིས་བཅད་པ་ཡི། །ཕྲེང་བ་ཐོགས་ཤིང་གར་བྱེད་ལག་པ་གཉིས་བརྐྱང་རྐུབ་ཚོས་ཆེ་ལ་ཀླུ་དབང་བཤིབ་པ་ཡི། །སྐ་རགས་འཆིང་ཞིང་ལག་ན་མདུང་དང་རལ་གྲི་ཐོགས་ནས་ཁྲག་དང་ཆང་གིས་མྱོས་གྱུར་པ། །མིག་རྩ་དམར་པོར་གྱུར་ཅིང་མཚན་མོ་དུར་ཁྲོད་ཉུལ་བ་འབྱུང་པོ་ཕལ་ཆེར་རྣམས་ཀྱིས་མཐོང་། །ཀོ་རློན་ཆེན་པོ་དྲལ་ཏེ་བརྐྱང་བའི་གོས་ཀྱི་སྟོད་གཡོགས་སྨད་ནི་རེ་ལྡེ་སེར་པོའི་ཤམ་བུ་དཀྲིས། །མི་ཡི་རྒྱུ་མ་གསར་པའི་སྦུབ་ཀྱིས་ཞལ་གྱི་ཟླ་བ་བརྒྱན་ཅིང་དྲིལ་བུ་འགྲམ་པར་འཁྲོལ། །ལུས་ནི་སྣུམ་གྱིས་གསར་དུ་བྱུག་ཅིང་ཁྲག་དང་ཞག་དམར་འཛག་པའི་ཐིག་ལེའི་ཚོམ་བུ་བྲིས། །མི་ཡི་རོ་ལ་སོ་ཡིས་ཆེམས་ཆེམས་གཅོད་བྱེད་ཐོད་པ་ཅན་གྱིས་བདག་ལ་སྐྱོངས་གྱུར་ཅིག །དྲག་པོ་དྲག་མོ་མི་བཟད་མི་
ཤ་ཁ་ན་ཐོགས་པ་སྔོན་ཆད་མ་བྱུང་ཁྱོད་མཐོང་ན། །མ་མོ་རྣམས་ཀྱང་སྐྲག་ཅིང་འདར་ལ་རྔམ་པ་འདོན་ཅིང་མིག་རྩ་ཧྲིག་ཧྲིག་ཁྱོད་ལ་བསྟོད། །ནག་མོ་བཟང་པོ་ལུས་མདོག་གནག་ཅིང་བཟོད་པར་དཀའ་བ་ཁྱོད་ལ་བརྒྱ་བྱིན་ལ་སོགས་ཀྱང་། །ཉིན་རེ་བཞིན་དུ་བསྟོད་པར་བྱེད་ཅིང་གཤིན་རྗེའི་རྒྱལ་པོ་ཉིད་ཀྱང་རྟག་ཏུ་འདར་ཞིང་འདུད་པར་བྱེད། །མི་རྣམས་དང་ནི་འགྲོ་བ་མ་ལུས་འཇུག་བཏུལ་བས་ནི་ཁྱོད་ཀྱི་རྣ་བའི་ཡ་གཅིག་ལ། །བྲང་གིས་འགྲོ་བའི་གདེངས་ཀ་སྟོང་དང་ལྡན་པ་གཅིག་གི་རྒྱབ་ནས་ཁྱོད་ལ་རྒྱན་དུ་བྱས། །ཡ་གཅིག་ལ་ནི་སེང་གེ་མཚུངས་མེད་འཕྱོ་ཞིང་རྒྱ་མཚོའི་མཐའ་བསྐོར་ས་གཞི་མ་ལུས་གནོན། །སྟེང་ན་རྒྱུ་བའི་ཉི་མ་འོད་ཟེར་སྟོང་ལྡན་དེ་ནི་ཁྱོད་ཀྱི་ལྟེ་བའི་ཕྱོགས་སུ་བཞག །བྷྱོ༔ རྒྱ་མཚོ་ཀློང་ནས་མེ་འབར་ཁྱོད། །མཚོ་རྣམས་སྐེམ་པར་ནུས་པ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱེད་དུ་བཞུགས། །རྫོང་དང་བཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་ཀྱི་ཤེས། །དེ་ལ་འཇིགས་པ་མེད་པར་འགྱུར། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པ་ཁམས་ཀྱི་དབང་ཕྱུག་མ། །
ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་སྲུང་མཛད་པའི། །དཔལ་ལྡན་ལྷ་མོ་ཁྱོད་ལ་བསྟོད། །བདག་གི་བར་ཆོད་ཐམས་ཅད་སོལ། །འདོད་པའི་དོན་རྣམས་འགྲུབ་པར་མཛོད། །ཧཱུྃ། དུས་གསུམ་སངས་རྒྱས་ཀུན་གྱི་བསྟན་བསྲུང་ཞིང་། །འཇིགས་བྱེད་མི་བཟད་དྲག་པོའི་ལས་རྣམས་མཛད། །རྔམ་པའི་ང་རོའི་སྲིད་གསུམ་ཐལ་བར་བརླག །མགོན་པོ་བྱ་རོག་མཚན་ལ་ཕྱག་འཚལ་བསྟོད། །མ་ལུས་གདུག་པ་འདུལ་ཕྱིར་སྐུ་མདོག་ནག །རྣམ་བཞི་ཕྲིན་ལས་མཛད་ཕྱིར་ཕྱག་བཞི་པ། །ཁྲོས་པའི་ཉམས་ལྡན་དཔའ་བོ་བརྗིད་པའི་སྐུ། །གདུག་པ་ཚར་གཅོད་ཁྱོད་ལ་ཕྱག་འཚལ་བསྟོད། །ཧེ་རུ་ཀ་དཔལ་མཆོག་གི་རྣམ་འཕྲུལ་ཁྱོད། །ཞིང་སྐྱོང་ཆེན་པོ་མཁའ་འགྲོའི་ཚོགས་ལ་རོལ། །བདུད་བཞིའི་ཁྲག་གསོལ་བྷན་ཕྱག་ན་བསྣམས། །འཆི་བདག་བགེགས་འཇོམས་ཁྱོད་ལ་ཕྱག་འཚལ་བསྟོད། །བསྟན་པ་རྒྱས་པར་མཛད་པའི་དབང་ཕྱུག་གཙོ། །ཕོངས་པའི་དབུལ་སེལ་སྦྱིན་པའི་ལོ་ཐོག་རྒྱས། །སྲིན་པོའི་གཟུགས་ཀྱིས་དགྲ་བགེགས་གསོད་པར་བྱེད། །དངོས་གྲུབ་ཀུན་སྟེར་ནག་པོ་ཁྱོད་ལ་བསྟོད། །དམ་རྫས་
བརྒྱན་པའི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཁྱོད་ཀྱི་དགྱེས་བྱེད་ཡུམ་གསུམ་ལེགས་ལྡན་ནག །བཀའ་སྡོད་ལས་མགོན་གསུམ་དང་སེང་གེའི་གདོང་། །ལས་ཀུན་སྒྲུབ་བྱེད་མཁའ་འགྲོ་བརྒྱུད་དྲུག་སོགས། །སྤྲུལ་པའི་འཁོར་གྱི་ཚོགས་ལ་ཕྱག་འཚལ་བསྟོད། །རྒྱལ་པོ་ཆེན་པོ་དཔལ་དང་ལྡན། །དུང་གི་མདོག་ཅན་པི་ཝང་འཛིན། །དྲི་ཟའི་ཚོགས་ལ་དབང་བསྒྱུར་བའི། །ཡུལ་འཁོར་སྲུང་ལ་ཕྱག་འཚལ་བསྟོད། །དཔའ་བོ་ཆེན་པོ་སྟོབས་པོ་ཆེ། །ཁ་དོག་སྔོན་པོ་རལ་གྲི་འཛིན། །གྲུལ་བུམ་ཚོགས་ལ་དབང་བསྒྱུར་ཅིང་། །འཕགས་སྐྱེས་པོ་ལ་ཕྱག་འཚལ་བསྟོད། །མངའ་བདག་ཆེན་པོ་མཐུ་སྟོབས་ཅན།། །ཁ་དོག་དམར་པོ་སྦྲུལ་ཞགས་འཛིན། །ཀླུ་དབང་ཚོགས་ལ་དབང་བསྒྱུར་བའི། །སྤྱན་མི་བཟང་ལ་ཕྱག་འཚལ་བསྟོད། །སྡེ་དཔོན་ཆེན་པོ་གསེར་མདོག་ཅན། །བེ་ཅོན་དང་ནི་ནེའུ་ལེ་འཛིན། །གནོད་སྦྱིན་ཚོགས་ལ་དབང་བསྒྱུར་བའི། །རྣམ་ཐོས་སྲས་ལ་ཕྱག་འཚལ་བསྟོད། །མཆོད་སྦྱིན་གཏོར་མ་འདི་བཞེས་ལ། །རྣལ་འབྱོར་བདག་ཅག་བསྲུང་བྱ་རྣམས། །བསོད་ནམས་
སྟོབས་འབྱོར་འཕེལ་བ་དང་། །ནད་གདོན་བར་ཆད་ཟློག་པ་དང་། །ཕྱོགས་བཞིའི་དགྲ་རྣམས་འདུལ་བར་མཛོད། །རྗེས་ཀྱི་བྱ་བ་ལ། མཆོད་བསྟོད་བསྡུས་པ་ནི། །ཨོཾ་གུ་རུ་དྷེ་ཝ་ཌཱཀི་ཧཱུྃ་ཧཱུྃ་སརྦ་དྷརྨ་པ་ལ་ཨགྷཾ་ནས། ཤབྡ་སྭཱ་ཧཱ། བསྟོད་པར་འོས་པ་ཐམས་ཅད་ལ། །ཞིང་རྡུལ་ཀུན་གྱི་གྲངས་སྙེད་པ། །ལུས་བཏུད་པ་ཡིས་རྣམ་ཀུན་ཏུ། །མཆོག་ཏུ་དད་པས་བསྟོད་པར་བགྱི། །མ་འབྱོར་པ་དང་ཉམས་པ་དང་། །གང་ཡང་བདག་རྨོངས་བློ་ཡིས་ནི། །བགྱིས་པ་དང་ནི་བགྱིད་རྩལ་བ། །དེ་ཀུན་མགོན་པོས་བཟོད་པར་གསོལ། །ཨོཾ་བཛྲ་སཏཱ་སོགས། གཏོར་མགྲོན་ཡེ་ཤེས་པ་རྣམས་རང་གནས་གཤེགས། །དམ་ཚིག་པ་རྣམས་བདག་ལ་ཐིམ་པར་གྱུར། །དགེ་བ་འདི་ཡིས་མྱུར་དུ་བདག །ཡེ་ཤེས་མགོན་པོ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག །བདག་ཅག་ལྕམ་དྲལ་ཐུགས་ཀྱི་དཀྱིལ་འཁོར་དུ། །འགྱུར་བ་མེད་པ་ལྷུན་གྱིས་གྲུབ་པ་དང་། །རབ་འབྱམས་རྒྱལ་བའི་བཀའ་ལ་དབང་ཐོབ་ཅིང་། །འགྲོ་ཀུན་དཔལ་དུ་འགྱུར་བའི་བཀྲ་ཤིས་ཤོག །དེ་ལྟར་རྒྱུན་གྱི་གཏོར་བསྔོས་ལ་བརྩོན་པར་བྱའོ། །ཀརྨ་
བརྩོན་འགྲུས་རྒྱ་མཚོས་ཡང་ཡང་བསྐུལ་བའི་ཕྱིར། ༧ རཱ་ག་ཨ་སྱས་བྲིས་པ་དགེ་ལེགས་འཕེལ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།