དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་བའི་ལམ་ཆེན་ལས། ལྷ་དགུའི་ནང་སྒྲུབ་གྱི་ཟིན་བྲིས།
དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་བའི་ལམ་ཆེན་ལས། ལྷ་དགུའི་ནང་སྒྲུབ་གྱི་ཟིན་བྲིས་བཞུགས་པའི་དབུ་ཕྱོགས་ལགས་སོ།།
ན་མོ་གུ་རུ་ཨཱཿརྱ་ལོ་ཀེ་ཤྭ་རཱཡ། འཕགས་པ་འཇིག་རྟེན་དབང་ཕྱུག་ལྷ་དགུ་ལ། །ཕྱག་འཚལ་སྐྱབས་སུ་མཆིའོ་བྱིན་གྱིས་རློབས། །འདི་ནི་ནང་སྒྲུབ་སྟ་གོན་ཚར་བའི་རྗེས། །ཐུན་བཞི་བདག་མདུན་གཉིས་ཀ་ཚར་རེ་འདོན། །བསྙེན་པ་ཅི་ནུས་བྱས་རྗེས་གཏོར་བསྔོས་དང་། །ཐུན་བསྡུ་བསྔོ་སྨོན་ཐུན་རྣམས་ཀུན་ལ་འགྲེས། །དགོང་མོའི་ཐུན་ལ་ཚོགས་མཆོད་རེ་རེ་བྱ། །དངོས་གཞི་ཐུན་སྐབས་སྒོམ་པའི་དམིགས་རིམ་ནི། །བདག་དང་མདུན་བསྐྱེད་གཉིས་ཀའི་ཐུགས་ཀ་རུ། །པདྨ་ཉི་མ་ཟླ་བ་བརྩེགས་པའི་སྟེང་། །རང་འདྲའི་ཡེ་ཤེས་སེམས་དཔའ་ཡུམ་དང་བཅས། །
གཟི་བརྗིད་འོད་དང་ལྡན་པའི་ཐུགས་ཀ་རུ། །སྣ་ཚོགས་པདྨ་ཟླ་བའི་གདན་གྱི་སྟེང་། །ཏིང་འཛིན་སེམས་དཔའ་པདྨ་དམར་པོ་ནི། །ཅུང་ཟད་ཁ་ནི་བྱེ་བའི་ཟེའུ་འབྲུའི་སྟེང་། །བྷིཡིག་བྱུ་རུའི་མདོག་ཅན་འགྲེངས་ཐབས་གནས། །ཕྱག་མཚན་པདྨས་མཐའ་བསྐོར་ཟླ་བའི་སྟེང་། །ཡིག་བཅུ་སྔགས་ཕྲེང་གཡས་སུ་འཁོར་བར་བསྒོམ། །བདག་མདུན་རིགས་ཀྱི་ཡབ་བཞིའི་ཐུགས་ཀ་རུ། །པད་ཟླའི་སྟེང་དུ་ཧྲིམཐར་ཡིག་བཅུས་བསྐོར། །བདག་མདུན་ཕྱི་ནང་ཡུམ་དྲུག་ཐུགས་ཀ་རུ། །ཆོས་འབྱུང་རྐྱང་པ་རྩེ་མོ་ཐུར་བསྟན་ལ། །ཁ་ནི་གྱེན་བསྟན་ཕྱི་དཀར་ནང་དམར་བ། །
ནང་ནི་སྟོང་པ་ཕྱེད་མན་འོད་ཀྱིས་གང་། །དེ་སྟེང་ཧྲིམཐར་སྔགས་ཕྲེང་གཡོན་དུ་འཁོར། །བདག་མདུན་རིགས་བཞིའི་མཁའ་འགྲོའི་ཐུགས་ཀ་རུ། །ཧ་རི་ནི་སའི་ཡིག་འབྲུ་རེ་རེ་ལ། །རང་རང་མཚན་སྔགས་གཡོན་དུ་འཁོར་བའོ། །རང་བྱུང་རྡོ་རྗེའི་ལྷ་དགུ་ཚིག་ལྷུག་མར། །མདུན་དུའང་བདག་བསྐྱེད་ལྟར་བསྒོམ་ཞིང་། །ལས་དང་མཐུན་པའི་འོད་ཀྱིས་སྤྲོ་བསྡུ་དང་། །སྔགས་ཀྱི་ཤམ་བུ་བཏགས་ལ་བསྒྲུབ་པར་བྱ། །གསུངས་པའི་དོན་དེ་རང་གི་ཐུགས་ཀ་ནས། །འོད་ཟེར་དམར་པོ་འོད་ལྔའི་མདངས་ལྡན་པ། །རང་གི་ཐུགས་ཀའི་སྔགས་ཕྲེང་ལས་འཕྲོས་ཏེ། །ཡེ་ཤེས་སེམས་དཔའི་ཞལ་ནས་ཐོན་ནས་ཀྱང་། །རང་གི་ཞལ་ནས་ཐོན་ཅིང་ཕར་འཕྲོས་ནས། །མདུན་བསྐྱེད་ཞལ་ཞུགས་དེ་ཡང་ཐུགས་ཀ་ཡི། །ཡེ་ཤེས་སེམས་དཔའི་ཞལ་ཞུགས་ཐུགས་ཀར་ཐིམ། །ཐུགས་དམ་རྒྱུད་བསྐུལ་སྔགས་ཕྲེང་དྲག་ཏུ་འཁོར། །སྔགས་ཕྲེང་དེ་ལས་འོད་ཟེར་འཕྲོས་པ་ཡིས། །ཡེ་ཤེས་སེམས་དཔའ་ཡབ་ཡུམ་སྦྱོར་མཚམས་ནས། །མར་སོང་སྦྱོར་མཚམས་རྡོ་རྗེའི་སྦུབས་ནས་ཐོན། །ཚུར་བྱོན་རང་གི་སྦྱོར་མཚམས་ནས་ཞུགས་ཏེ། །ཡར་སོང་ཐུགས་ཀའི་ཡེ་ཤེས་སེམས་དཔའ་ཡི། སྦྱོར་
མཚམས་རྡོ་རྗེའི་སྦུབས་ནས་ཐུགས་ཀར་ཐིམ། །རང་གི་སྔགས་ཕྲེང་ཡང་ནི་དྲག་ཏུ་འཁོར། །ཕར་ལ་མཆོད་པ་ཚུར་ལ་དངོས་གྲུབ་ཚུལ། །མགལ་མེའི་འཁོར་ལོ་བཞིན་དུ་རྒྱུན་དུ་འཁོར། །འདི་ནི་འདི་ཡི་ལུགས་ཀྱི་བསྙེན་པ་ཡིན། །དེ་ལྟར་འཁོར་ནས་མདུན་བསྐྱེད་སྔགས་ཕྲེང་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་དང་། །བླ་མ་ཡི་དམ་མཁའ་འགྲོ་ཆོས་སྐྱོང་མཆོད། །དེ་ཀུན་ཐུགས་རྗེ་ཆེན་པོ་ཡབ་ཡུམ་གྱི། །སྐུར་གྱུར་ཆར་ལྟར་བབས་ནས་མདུན་བསྐྱེད་ཐིམ། །དེ་དག་ཀུན་གྱི་བྱིན་རླབས་དངོས་གྲུབ་ནི། །འོད་ཟེར་ཚུལ་དུ་གོང་ལྟར་ཚུར་བྱུང་ནས། །ཐུགས་ཀར་ཞུགས་ཤིང་ཐིམ་པས་དངོས་གྲུབ་ཐོབ། །དེ་ནི་ཉེ་བར་བསྙེན་པའི་དམིགས་པ་ཡིན། །དེ་ནས་འོད་ཟེར་དེ་ཉིད་སྔགས་ཕྲེང་གྱུར། །སྔགས་ཕྲེང་བདག་མདུན་བར་དུ་སྔོན་ལྟར་འཁོར། །སྔགས་ཕྲེང་འཁོར་བས་མདུན་གྱི་ཐུགས་རྒྱུད་བསྐུལ། །མདུན་གྱི་སྔགས་ལས་འོད་ཟེར་དཔག་མེད་པ། །སྟེང་འོག་ཕྱོགས་མཚམས་ནམ་མཁའ་ཁྱབ་པར་འཕྲོས། །ཁམས་གསུམ་སེམས་ཅན་ཀུན་ལ་འོད་དེས་ཕོག །ལུས་ངག་ཡིད་གསུམ་
སྒྲིབ་པ་ཀུན་དག་ནས། །ཀུན་ཀྱང་ཐུགས་རྗེ་ཆེན་པོ་ཡབ་ཡུམ་གྱི། །སྐུར་གྱུར་སྔགས་སྒྲ་དིར་དིར་སྒྲོག་པར་བསམ། །དེ་བཞིན་སྒྲ་སྐད་ཐམས་ཅད་ཡིག་བཅུའི་སྒྲ། །གཟུགས་སུ་སྣང་བ་ཐམས་ཅད་སྤྱན་རས་གཟིགས། །དེ་ལྟར་བསྒོམ་སོགས་ཡིད་ཀྱི་དྲན་རྟོག་ཀུན། །གདོད་ནས་འགྱུར་མེད་ཆོས་སྐུ་ཡིན་པར་བསམ། །དེ་ནི་ཁྱེར་སོ་གསུམ་གྱི་དོན་བསྡུས་དང་། །བུང་བ་ཚང་ཞིག་ལྟ་བུའི་བཟླས་པ་སྟེ། །འདི་ཡི་ལུགས་ཀྱི་སྒྲུབ་པའི་དམིགས་པ་ཡིན། །ལས་སྦྱོར་ཕྱོགས་གཏོགས་སྒྲུབ་པ་ཆེན་པོ་ནི། །སྔ་དྲོའི་ཐུན་མཇུག་སྔགས་ཕྲེང་དཀར་པོར་བསྒོམ། །བདག་དང་འགྲོ་བའི་སྡིག་སྒྲིབ་ཞི་བར་བསམ། །ཉིན་གུང་ཐུན་མཇུག་སྔགས་ཕྲེང་སེར་པོར་བསྒོམ། །བདག་དང་འགྲོ་བའི་བསོད་ནམས་ཡེ་ཤེས་རྒྱས། །དགོང་མོའི་ཐུན་མཇུག་སྔགས་ཕྲེང་དམར་པོར་བསྒོམ། །རླུང་སེམས་སྣང་བ་དབང་དུ་འདུས་པར་བསམ། །སྲོད་ཀྱི་དུས་ལ་སྔགས་ཕྲེང་ལྗང་ནག་འཕྲོས། །ཉོན་མོངས་བདུད་བཞི་ལོག་འདྲེན་ཚར་ཆོད་བསྒོམ། །དེ་དག་ཀུན་ལ་སྔགས་རིང་ཧཱུྃ་ཕཊཿཅན། །རྒྱ་གཞུང་དགོངས་པ་ཡིན་པས་བཟླས་པ་ཟབ། །ཞག་བདུན་སྒྲུབ་ན་ཞག་དྲུག་དེ་ལྟར་སྟེ། །ཞག་བདུན་ཉིན་པར་སྔ་དྲོའི་
ཐུན་ལ་ནི། །རང་གི་ཐུགས་ཀའི་སྔགས་ཕྲེང་སྔར་ལྟར་དུ། །དཀར་པོ་འཕྲོས་པས་མདུན་དུ་བསྐྱེད་པ་ཡི། །རྡོ་རྗེ་སྤྱན་རས་གཟིགས་དེ་ཚུར་ཞལ་གཟིགས། །ཡབ་ཡུམ་གཉིས་ཀའི་ཞལ་དུ་སྔགས་ཕྲེང་ཞུགས། །ཐུགས་ཀར་ཐིམ་པས་ཡབ་ཡུམ་གཉིས་ཀ་ཡི། །སྔགས་ཕྲེང་གཡས་གཡོན་དྲག་འཁོར་ཐུགས་རྒྱུད་བསྐུལ། །གཉིས་ཀའི་སྔགས་ལས་རང་སྔགས་དངོས་གྲུབ་ཚུལ། །སྦྱོར་མཚམས་ནས་ཐོན་སྔགས་ཕྲེང་གཅིག་ཏུ་གྱུར། །ཚུར་བྱོན་རང་གི་སྦྱོར་མཚམས་ནས་ཞུགས་ཏེ། །རྡོ་རྗེའི་སྦུབས་ནས་རང་གི་ཐུགས་ཀ་ཡི། །ཡེ་ཤེས་སེམས་དཔའི་སྦྱོར་མཚམས་གསང་སྦུབས་ནས། །ཞུགས་ནས་ཐུགས་སྲོག་ཧཱིར་ཐིམ་དངོས་གྲུབ་ཐོབ། །དེ་ལྟར་བདག་མདུན་བར་དུ་སྔགས་ཕྲེང་ནི། །ཤེལ་དཀར་ཕྲེང་བ་བསྐོར་འདྲ་ཀྱི་ལི་ལི། །དེ་ལྟར་འཁོར་བས་རྡོ་རྗེ་སྤྱན་རས་གཟིགས། །ཡབ་ཡུམ་སྐུ་ལས་འོད་ཟེར་དཀར་པོ་ནི། །བདེ་བའི་རེག་བྱ་ལྡན་པ་ཕྱོགས་བཅུར་འཕྲོས། །ཞིང་ཁམས་ཕྱོགས་བཅུར་བཞུགས་པའི་རྒྱལ་བ་ལ། །དཀར་གསུམ་མངར་གསུམ་མེ་ཏོག་བདུག་སྤོས་སོགས། །ཞི་བའི་མཆོད་པ་རྒྱ་མཚོར་གྱུར་པས་མཉེས། །སངས་རྒྱས་ཀུན་གྱི་ཞི་བའི་དངོས་
གྲུབ་ནི། །འོད་ཟེར་དཀར་པོར་བསྡུས་ནས་མདུན་ལ་ཐིམ། །དེ་ཉིད་སྔགས་ཕྲེང་དཀར་པོའི་རྣམ་པར་འཕྲོས། །སྔར་ལྟར་རང་གི་ལུས་ཁྱབ་ཐུགས་ཀར་ཐིམ། །ཞི་བ་ཆེན་པོའི་དངོས་གྲུབ་ཐོབ་པར་གྱུར། །དེ་བཞིན་མདུན་གྱི་ཐུགས་ཀའི་འོད་ཟེར་ནི། །སྟོན་ཟླའི་མདོག་འདྲ་ཕྱོགས་བཅུར་ཁྱབ་པར་འཕྲོས། །འབྲེལ་ཐོགས་གཙོར་བྱས་སེམས་ཅན་ཐམས་ཅད་ཀྱི། །སྡིག་སྒྲིབ་ཉེས་ལྟུང་དྲི་མའི་ཚོགས་རྣམས་ཀུན། །བ་མོར་ཉི་ཟེར་ཕོག་ལྟར་དག་པར་བསྒོམ། །དེ་ནི་སྔ་དྲོའི་ཐུན་གྱི་ཕྱེད་ཡན་ཡིན། །དེ་ནས་སྔར་ལྟར་རང་གི་ཐུགས་ཀ་ནས། །སྔགས་ཕྲེང་དཀར་པོ་ནར་གྱིས་ཐོན་པ་སྟེ། །མདུན་བསྐྱེད་རྡོ་རྗེ་མཁའ་འགྲོའི་ཚུར་གཟིགས་པའི། །ཞལ་ཞུགས་ཐུགས་ཀར་ཐིམ་པས་སྔགས་མྱུར་འཁོར། །ཐུགས་རྒྱུད་བསྐུལ་བས་སྔགས་ལས་སྔགས་ཕྲེང་འཕྲོས། །བྷ་ག་ནས་ཐོན་རང་གི་སྦྱོར་མཚམས་ནས། །རྡོ་རྗེའི་སྦུབས་ཞུགས་ཐུགས་སྲོག་ཧིལ་ཐིམ། །ཕར་ལ་མཆོད་པ་ཚུར་ལ་དངོས་གྲུབ་ཚུལ། །སྔགས་ཕྲེང་མུ་ཏིག་ཕྲེང་བ་འཁོར་བ་བཞིན། །རྒྱུན་དུ་འཁོར་བས་མཁའ་འགྲོའི་ཐུགས་རྒྱུད་བསྐུལ། །སྐུ་ལས་འོད་ཟེར་སྟོན་ཀའི་ཟླ་བའི་མདོག །བསིལ་ཞིང་བདེ་བའི་
རེག་བྱ་ཅན་འཕྲོས་པས། །བདག་དང་བསྲུང་བྱའི་ནད་གདོན་སྡིག་སྒྲིབ་རྣམས། །མུན་པར་ཟླ་བ་ཤར་ལྟར་གསལ་བར་བསམ། །དེ་ལྟར་ཐུན་ནི་གོང་འོག་གཉིས་ཀ་ལ། །སྔགས་རིང་ཧ་རི་ནི་སའི་མཇུག་ཏུ་ནི། །ནད་གདོན་སརྦ་པཱ་པཾ་ཤཱནཾ་ཀུ་རུ་སྭཱ་ཧཱ། ཞེས་པ་བཏགས་ལ་ཅི་ལྕོགས་བཟླས་པ་བྱ། །དེ་ནས་ཐུན་མཚམས་གཏོར་མ་བསྔོ་བའི་ཚེ། །ཤར་གྱི་ཞི་བའི་གཏོར་མ་བྲན་བྱས་ལ། །གཏོར་མ་བྱིན་རླབས་འདོན་ཆ་གཞུང་ལྟར་ལ། །གཏོར་སྣོད་ཤེལ་དཀར་བྷན་རྒྱ་ཆེ་བར། །ངོ་བོ་གཞུང་ལྟར་ཤ་ལྔ་བདུད་རྩི་སོགས། །རྣམ་པ་སྐུ་ཡི་བདུད་རྩི་འོ་མའི་མཚོ། །ཀ་ར་སྦྲང་རྩིའི་རོ་ལྡན་བསམ་ལ་འབུལ། །ཐུན་བསྡུ་རྫོགས་རིམ་དགོངས་པ་གཞུང་ལྟར་བྱ། །དེ་ནས་ཉིན་གུང་བདག་མདུན་ཚར་གཅིག་རྗེས། །གི་ཐུགས་ལས་སྔགས་ཕྲེང་གསེར་གྱི་མདོག །ནར་གྱིས་ཐོན་ནས་མདུན་གྱི་དཀྱིལ་འཁོར་གྱི། །རིན་ཆེན་སྤྱན་གཟིགས་ཡབ་ཡུམ་ཞལ་དུ་ཞུགས། །ཐུགས་རྒྱུད་བསྐུལ་བས་སྔགས་ཕྲེང་གཡས་གཡོན་འཁོར། །སྔགས་ལས་སྔགས་ཕྲེང་འཕྲོས་པ་སྦྱོར་མཚམས་ནས། །སྔགས་ཕྲེང་གཅིག་གྱུར་ཚུར་བྱུང་རང་ཉིད་ཀྱི། །སྦྱོར་མཚམས་གསང་སྦུབས་ནས་ཞུགས་
ཐུགས་ཀར་ཐིམ། །དེ་ལྟར་བདག་མདུན་བར་དུ་སྔགས་ཕྲེང་ནི། །སྤོས་ཤེལ་ཞགས་པ་བསྐོར་འདྲ་ཀྱི་ལི་ལི། །དེ་ལྟར་འཁོར་བས་རིན་ཆེན་སྤྱན་རས་གཟིགས། །ཡབ་ཡུམ་གཉིས་ཀྱི་ཐུགས་དམ་རྒྱུད་བསྐུལ་ནས། །ཐུགས་ལས་འོད་ཟེར་ཛམ་བུ་ཆུ་གསེར་མདོག །ཕྱོགས་བཅུ་ནམ་མཁའ་ཁྱབ་པར་འཕྲོས་པ་ཡིས། །རབ་འབྱམས་ཞིང་དུ་བཞུགས་པའི་རྒྱལ་བ་ལ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །ལྷ་མིའི་ལོངས་སྤྱོད་དཔག་མེད་མཆོད་པར་གྱུར། །བསོད་ནམས་ཚོགས་རྫོགས་རྒྱས་པའི་དངོས་གྲུབ་ཀུན། །འོད་ཟེར་སེར་པོའི་རྣམ་པར་མདུན་བསྐྱེད་ཐིམ། །དེ་ཉིད་སྔགས་ཕྲེང་དུ་གྱུར་རང་ལ་བསྟིམ། །བསོད་ནམས་ཡེ་ཤེས་རྒྱས་པའི་དངོས་གྲུབ་ཐོབ། །སླར་ཡང་མདུན་བསྐྱེད་སྐུ་ལས་འོད་སེར་པོ། །ཉི་མ་ཤར་འདྲ་ནམ་མཁའ་ཁྱབ་པར་འཕྲོས། །འོད་དེས་རེག་པ་ཙམ་གྱིས་འགྲོ་ཀུན་གྱི། །བསོད་ནམས་ཡེ་ཤེས་ཚོགས་གཉིས་རྫོགས་པར་བསྒོམ། །དེ་ནི་གུང་ཐུན་ཕྱེད་ཡན་དམིགས་པ་སྟེ། །དེ་ནས་རང་གི་ཞལ་གྱི་སྔགས་ཕྲེང་དེ། །རིན་ཆེན་མཁའ་འགྲོའི་ཞལ་ཞུགས་ཐུགས་རྒྱུད་བསྐུལ། །བྷ་ག་ནས་ཐོན་རང་གི་སྦྱོར་མཚམས་ནས། །ཐུགས་ཀར་ཐིམ་
ཞིང་འཁོར་བ་སྔར་དང་འདྲ། །རིན་ཆེན་མཁའ་འགྲོའི་ཐུགས་དམ་རྒྱུད་བསྐུལ་བས། །སྐུ་ལས་འོད་ཟེར་བཙོ་མ་གསེར་གྱི་མདོག །བདེ་བའི་རེག་བྱ་ལྡན་པ་ཕྱོགས། བཅུར་འཕྲོས། །བདག་དང་བསྲུང་བྱ་ཀུན་ལ་འོད་དེ་ཕོག །དཔེར་ན་པདྨ་ཆུ་ཡིས་བྲན་པ་བཞིན། །ཚེ་བསོད་ཉམས་རྟོགས་ཡོན་ཏན་རྒྱས་པར་བསྒོམ། །སྔགས་རིང་བེ་རོ་ཙ་ནི་ཡེ་ཡི་མཇུག །རི་ནི་ཧ་ས་མ་མ་ཨཱཿཡུ་པུཎྱེ་ཛྙཱ་ན་པུཏྟིཾ་ཀུ་རུ་སྭཱ་ཧཱ། ཅི་ལྕོགས་བཟླས་རྗེས་གཏོར་བསྔོས་གཞུང་ལྟར་ལས། །དམིགས་པ་གསེར་གྱི་བྷན་སྟོང་གསུམ་མཉམ། །གཏོར་མ་བདུད་རྩི་གསེར་མདོག་རྒྱ་མཚོ་ནི། །རོ་བརྒྱ་ནུས་པ་སྟོང་དང་ལྡན་པ་ལ། །རླངས་པ་འདོད་ཡོན་སྣ་ཚོགས་སྤྲིན་སྤུང་འཁྲིགས། །དེ་ལྟར་བསྒོམ་ཞིང་རྒྱས་པའི་གཏོར་མ་བསྔོ། །ཐུན་བསྡུ་རྫོགས་རིམ་བསྒོམ་སོགས་གཞུང་ལྟར་བྱ། །དེ་ནས་དགོང་མོ་བདག་མདུན་ཚར་གཅིག་རྗེས། །བདག་གི་ཐུགས་ལས་སྔགས་ཕྲེང་དམར་པོ་ནི། །བྱུ་རུའི་ཕྲེང་བ་ལྟ་བུ་ནར་གྱིས་འཕྲོས། །མདུན་བསྐྱེད་པདྨ་སྤྱན་གཟིགས་ཡབ་ཡུམ་གྱིས། །ཞལ་ཞུགས་ཐུགས་ཀའི་སྔགས་ཕྲེང་གཡས་གཡོན་འཁོར། །སྔགས་ཕྲེང་གཉིས་ལས་སྔགས་ཕྲེང་སོ་སོར་འཕྲོས། །
སྦྱོར་མཚམས་ནས་ཐོན་གཅིག་གྱུར་ཚུར་བྱོན་ཏེ། །རང་གི་སྦྱོར་མཚམས་རྡོ་རྗེའི་སྦུབས་ནས་ཞུགས། །ཐུགས་ཀའི་ཧཱིར་ཐིམ་དབང་གི་དངོས་གྲུབ་ཐོབ། །སྔགས་ཕྲེང་མགལ་མེའི་བྱུ་རུའི་ཕྲེང་བ་ལྟར། །རྒྱུན་དུ་འཁོར་བས་མདུན་གྱི་ཐུགས་རྒྱུད་བསྐུལ། །སྐུ་ལས་འོད་ཟེར་པདྨ་རཱ་གའི་མདོག །ཉི་མ་འཆར་ཀའི་འོད་བཞིན་ཕྱོགས་བཅུར་ཁྱབ། །རབ་འབྱམས་ཞིང་གི་རྒྱལ་བ་སྲས་བཅས་ལ། །མཆོད་པའི་ལྷ་མོ་བཅུ་དྲུག་འདོད་ཡོན་ལྔ། །མཆོད་པར་གྱུར་པས་ཟག་མེད་བདེ་བས་དགྱེས། །སྣང་སྲིད་དབང་གི་དངོས་གྲུབ་འོད་དམར་པོ། །ཚུར་བསྡུས་བདག་བསྐྱེད་ལ་ཐིམ་སྔགས་ཕྲེང་གི་།རྣམ་པར་གྱུར་ནས་ཚུར་བྱོན་རང་ཐིམ་པས། །རླུང་སེམས་སྣང་བ་དབང་འདུས་དངོས་གྲུབ་ཐོབ། །སླར་ཡང་མདུན་ལས་འོད་ཟེར་དམར་པོ་འཕྲོས།། །འོད་དེས་རེག་པས་སེམས་ཅན་ཐམས་ཅད་ཀྱང་། །རང་རང་རླུང་སེམས་རང་དབང་འདུས་པར་བསམ། །དེ་ནི་དགོང་ཐུན་ཕྱེད་ཡན་དམིགས་པ་སྟེ། །དེ་ནས་རང་གི་ཞལ་གྱི་སྔགས་ཕྲེང་དེ། །པདྨ་མཁའ་འགྲོའི་ཞལ་ཞུགས་ཐུགས་རྒྱུད་བསྐུལ། །སྔགས་ཕྲེང་དྲག་འཁོར་དེ་ལས་སྔགས་ཕྲེང་འཕྲོས། །བྷ་ག་ནས་ཐོན་རང་གི་སྦྱོར་མཚམས་ཞུགས། །
ཐུགས་ཀའི་ཧཱིར་ཐིམ་དབང་གི་དངོས་གྲུབ་ཐོབ། །དེ་ལྟར་སྔགས་ཕྲེང་མགལ་མེ་ལྟར་འཁོར་བས། །པདྨ་མཁའ་འགྲོའི་ཐུགས་དམ་རྒྱུད་བསྐུལ་ནས། །སྐུ་ལས་འོད་ཟེར་དམར་པོ་གློག་ལྟ་བུ། །ཕྱོགས་བཅུ་འཇིག་རྟེན་ཁྱབ་པར་འཕྲོས་པ་ཡི། །ཆོས་དང་ལོངས་སྤྱོད་མཆོག་དང་ཐུན་མོང་གི །དངོས་གྲུབ་ཐམས་ཅད་འོད་ཟེར་དེས་བསྡུས་ཏེ། །པདྨ་མཁའ་འགྲོ་ལ་ཐིམ་གཟི་བརྗིད་འབར། །དངོས་གྲུབ་སྔགས་ཕྲེང་རྣམ་པར་ཚུར་བྱུང་སྟེ། །རང་གི་སྦྱོར་མཚམས་ནས་ཞུགས་ཐུགས་ཀར་ཐིམ། །སྣང་སྲིད་འཁོར་འདས་དབང་དུ་འདུས་པར་བསྒོམ། །སྔགས་རིང་བེ་རོ་ཙ་ནི་ཡེ་ཡི་མཇུག །ནི་རི་ཧ་ས་བ་སུ་ན་ན་ཁེ་དྷ་སརྦ་སིདྡྷི་པ་ཤཾ་ཀུ་རུ་སྭཱ་ཧཱ། ཞེས་པ་བཏགས་ལ་ཅི་འགྲུབ་བཟླས་པ་བྱ། །དེ་ནས་སྐབས་འདིར་ཚོགས་འཁོར་གཞུང་ལྟར་བྱ། །ཚོགས་ཕུད་ཕུལ་ལ་ནུབ་ཀྱི་གཏོར་མ་བྲན། །གཏོར་བསྔོས་གཞུང་ལྟར་འདོན་ཅིང་དམིགས་པ་ནི། །པདྨ་རཱ་གའི་བྷན་རྒྱ་ཆེའི་ནང་། །གཏོར་མ་གསུང་གི་བདུད་རྩི་དམར་ལྟེམ་མེ། །རོ་བཅུད་ཞིམ་མངར་ཕུན་ཚོགས་དམིགས་ལ་འབུལ། །ཚོགས་ལ་ལོངས་སྤྱོད་ལྷག་མ་གཞུང་ལྟར་འབུལ། །ཐུན་བསྡུ་རྫོགས་རིམ་བསྔོ་སྨོན་
གཞུང་ལྟར་རོ། །ཐུན་མཚམས་དགེ་སྦྱོར་ཆག་མེད་གང་དགོས་བྱ། །ཐུན་གྱི་དཀྱིལ་དུ་འདོན་པ་གཞན་མི་བསྲེ། །དེ་ནས་མུན་རུབ་བདག་མདུན་ཚར་གཅིག་འདོན། །བདག་གི་ཐུགས་ཀའི་སྔགས་ཕྲེང་དེ་ཉིད་ལས། །སྔགས་ཕྲེང་གཡུའམ་མར་གད་མདོག་ཅན་འཕྲོས། །མདུན་བསྐྱེད་ལས་ཀྱི་སྤྱན་གཟིགས་ཡབ་ཡུམ་གྱི། །ཞལ་ཞུགས་སྔགས་ཕྲེང་གཡས་གཡོན་དྲག་ཏུ་འཁོར། །ཐུགས་རྒྱུད་བསྐུལ་ནས་སྔགས་ལས་སྔགས་ཕྲེང་འཕྲོས། །སྦྱོར་མཚམས་ནས་ཐོན་སྔགས་ཕྲེང་གཅིག་གྱུར་ཏེ། །ཚུར་བྱོན་རང་གི་སྦྱོར་མཚམས་གསང་སྦུབས་ཞུགས། །ཐུགས་ཀའི་ཧཱིར་ཐིམ་དྲག་པོའི་དངོས་གྲུབ་ཐོབ། །དེ་ལྟར་བདག་མདུན་བར་དུ་སྔགས་ཕྲེང་ནི། །གཡུ་ཕྲེང་འཁོར་འདྲ་ཀྱི་ལི་ལི་འཁོར་བས། །ལས་ཀྱི་སྤྱན་གཟིགས་ཡབ་ཡུམ་ཐུགས་རྒྱུད་བསྐུལ། །སྐུ་ལས་འོད་ཟེར་ལྗང་གུ་སྤང་རྗེན་མདོག །ཕྱོགས་བཅུར་འཕྲོས་པས་ཁྲོ་བོ་ཁྲོ་མོ་དང་། །དཔའ་བོ་མཁའ་འགྲོ་ཆོས་སྐྱོང་ཐམས་ཅད་ལ། །ཤ་ལྔ་བདུད་རྩི་ལྔ་དང་ཤ་ཁྲག་རུས། །ཤ་ཆེན་བདུག་སྤོས་ཞུན་ཆེན་མར་མེ་སོགས། །དྲག་པོའི་མཆོད་པ་སྣ་ཚོགས་མཆོད་པས་མཉེས། །དེ་དག་ཀུན་གྱི་མཐུ་སྟོབས་ནུས་པ་རྣམས། །
འོད་ཟེར་ལྗང་གུར་བསྡུས་ནས་མདུན་བསྐྱེད་ཐིམ། །དེ་ཉིད་སྔགས་ཕྲེང་ཚུལ་དུ་ཚུར་བྱོན་ནས། །བདག་ཐིམ་མཐུ་སྟོབས་ནུས་མཐུའི་དངོས་གྲུབ་ཐོབ། །སླར་ཡང་མདུན་བསྐྱེད་སྐུ་ལས་འོད་ལྗང་གུ། །རྩུབ་ཅིང་ཚ་ངད་ལྡན་པ་འཕྲོས་པ་ཡིས། །བདག་དང་བསྲུང་བྱ་ལ་གནོད་བདུད་བགེགས་རྣམས། །གཞོབ་ཐུལ་བསྲེགས་པས་བདུད་བཞི་ལས་རྒྱལ་བསམ། །དེ་ནི་སྲོད་ཐུན་ཕྱེད་ཡན་དམིགས་པ་སྟེ། །དེ་ནས་རང་གི་ཞལ་གྱི་སྔགས་ཕྲེང་དེ། །ཅུང་ཟད་ལྗང་ནག་ཐག་འཁྱུག་ལྟར་འཕྲོས་པས། །ལས་ཀྱི་མཁའ་འགྲོའི་ཞལ་ཞུགས་ཐུགས་རྒྱུད་བསྐུལ། །བྷ་ག་ནས་ཐོན་རང་གི་སྦྱོར་མཚམས་ནས། །ཐུགས་ཀར་ཐིམ་པས་དྲག་པོའི་དངོས་གྲུབ་ཐོབ། །སྔགས་ཕྲེང་ལྗང་ནག་དྲག་ཏུ་འཁོར་བ་དེས། །ལས་ཀྱི་མཁའ་འགྲོ་རང་དབང་མེད་པར་བསྐུལ། །ལས་ཀྱི་མཁའ་འགྲོའི་སྐུ་ལས་འོད་ལྗང་ནག །རྣམ་པ་མེ་ཡི་རེག་བྱ་ཅན་འཕྲོས་པས། །བདག་དང་བསྲུང་བྱ་ལ་གནོད་ནད་གདོན་དགྲ། །ཐམས་ཅད་བྱ་སྒྲོ་མེ་ལ་བསྲེགས་ལྟར་བཅོམ། །དེ་ལྟར་སྔགས་རིང་བེ་རོ་ཙ་ནཱིའི་མཇུག །ཧ་རི་ནི་ས་གནོད་བྱེད་སརྦ་ཤ་ཏུཾ་མཱ་ར་ཡ་ཧཱུྃ་ཕཊ། ཅི་ལྕོགས་བཟླས་རྗེས་བྱང་གི་གཏོར་མ་
བྲན། །གཏོར་བསྔོས་བྱེད་ཚེ་དམིགས་པའི་བསྒྱུར་ཁ་ནི། །བྷན་རློན་པ་ལྕང་ལོ་དང་བཅས་པ། །ཡངས་ཤིང་རྒྱ་ཆེའི་ནང་དུ་གཏོར་མ་དེ། །ངོ་བོ་དགྲ་བགེགས་གནོད་བྱེད་ཤ་ཁྲག་ལ། །རྣམ་པ་ཐུགས་ཀྱི་བདུད་རྩི་སྔོ་ལྟེམ་མེ། །བསྒྲེ་སྣུམ་ཤ་ཁྲོག་རོ་ལྡན་དམིགས་ལ་འབུལ། །འདི་དག་རྣམས་ཀྱི་རྩ་བ་གང་ཞེ་ན། །ཛ་ལནྡྷ་རའི་ལྷ་དགུའི་རྒྱ་གཞུང་ལས། །དེ་ནས་རང་དང་གཞན་གྱི་དོན་བྱ་ཕྱིར། །ཕྲིན་ལས་རྣམ་པ་བཞི་པོ་སྒྲུབ་པའི་ཕྱིར། །ཕྲིན་ལས་གང་སྒྲུབ་དམིགས་པ་སྤོ་བ་སྟེ། །སྔགས་ཀྱི་ཤམ་བུ་བསྒྱུར་ལ་བཟླ་བར་བྱ། །ཞེས་གསུངས་ཐེ་ཚོམ་སྤོང་ལ་བསྒྲུབ་པར་བྱ། །གལ་ཏེ་ཟླ་གཅིག་ནང་སྒྲུབ་འདི་བྱེད་ན། །བདུན་གསུམ་ཙམ་ལ་གོང་གི་བསྙེན་བསྒྲུབ་བྱ། །ཞག་བདུན་ལས་བཞི་གོང་ལྟར་དུས་བཞིར་བྱ། །དེ་ནས་ཞག་གཅིག་སྔ་དྲོ་དགོང་ཞོགས་སོགས། །དུས་བཞི་ལས་བཞིའི་སྦྱིན་སྲེག་བྱ་བ་ཡིན། །དེ་ནས་ཞག་གཅིག་དངོས་གྲུབ་ལེན་ཆོག་ཚུལ། །བུམ་བསྐྱེད་བཏོན་ལ་བདག་འཇུག་ལེན་པ་དང་། །དགའ་སྟོན་ཚོགས་འཁོར་རྗེས་ཆོག་རྫོགས་པར་བྱ། །གལ་ཏེ་ཞག་བདུན་སྒྲུབ་རྗེས་གསང་སྒྲུབ་དང་། །སྦྲེལ་ནས་སྒྲུབ་ན་བདག་འཇུག་འདིར་མི་བྱ། །མཆོད་
པ་ཁ་གསོ་གསང་སྒྲུབ་ཉིད་ལ་འཇུག །ཞག་བདུན་ཁོ་ན་ལས་ནི་མི་སྒྲུབ་ན། །སྒྲུབ་རྫས་རྣམས་ཀྱིས་བདག་འཇུག་ལེན་པ་དང་། །ཚོགས་འཁོར་རྗེས་ཆོག་རྣམས་ནི་གཞུང་ལྟར་ཏེ། །ཞི་བའི་སྦྱིན་སྲེག་གཅིག་ཙམ་འགྲུབ་ན་ལེགས། །མ་འགྲུབ་ན་ཡང་ཆད་པའི་སྐྱོན་ནི་མེད། །དེ་ལྟར་ལྷ་དགུའི་ནང་སྒྲུབ་ཟིན་བྲིས་འདི། །མཐར་ཕྱིན་ཐབས་མཁས་གཉིས་ཀྱིས་བསྐུལ་བ་དང་། །རིག་འཛིན་སྤྲུལ་སྐུའི་དགོངས་རྫོགས་ལ་དམིགས་ནས། །ལུག་ལོ་ས་ག་ཟླ་བའི་ཚེ་བདུན་གྱི། །སྔ་དྲོའི་ཆ་ལ་རཱ་ག་ཨ་སྱ་ཡིས། །རྒྱུད་དང་རྒྱ་གཞུང་བོད་གཞུང་ཞལ་གདམས་ཚོགས། །རང་གི་མྱོང་བ་དང་བསྟུན་གསལ་བར་བཀོད། །འདི་ལ་འགལ་འཁྲུལ་ཉེས་པའི་ཆ་མཆིས་ན། །ལྷ་དགུའི་ལྷ་དང་སྲུང་མའི་ཚོགས་ལ་བཤགས། །འདི་བྲིས་དགེ་བའི་རྩ་བ་གང་མཆིས་དེས། །གཏེར་སྟོན་སྤྲུལ་སྐུའི་དགོངས་པ་རྫོགས་པ་དང་། །བདག་དང་བདག་ལ་འབྲེལ་ཐོགས་འགྲོ་བ་ཀུན། །ནམ་ཞིག་འདི་ནས་ཚེ་འཕོས་གྱུར་མ་ཐག །སྐྱེ་བ་གཞན་གྱིས་བར་མ་ཆོད་པ་རུ། །བདེ་བ་ཅན་གྱི་ཞིང་དུ་རྫུས་སྐྱེས་ནས། །སྤྱན་རས་གཟིགས་དང་ནམ་ཡང་འབྲལ་མེད་ཤོག །ཡི་གེ་པ་ནི་བྷ་ཏ་ཧོར་གྱི་རིགས། །
དགེ་བཤེགས་པདྨ་མཐར་ཕྱིན་ཞེས་བྱས་བྲིས། །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།