དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་བའི་ལམ་ཆེན་ལས། ལྷ་དགུའི་གསང་སྒྲུབ་ཀྱི་ཟིན་བྲིས།
དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་བའི་ལམ་ཆེན་ལས། ལྷ་དགུའི་གསང་སྒྲུབ་ཀྱི་ཟིན་བྲིས་བཞུགས་སོ།།
ན་མོ་ལོ་ཀེ་ཤྭ་ར་པཉྩ་ཡེ། རིགས་ལྔའི་སྤྱན་རས་གཟིགས་དབང་ཡབ་ཡུམ་ལ། །གུས་པས་ཕྱག་འཚལ་བཀའ་གནང་བྱིན་གྱིས་རློབས། །འདི་ཡི་གསང་སྒྲུབ་སྟ་གོན་ཚར་བའི་རྗེས། །བདག་མདུན་མངོན་རྟོགས་རེག་བྱ་རྡོ་རྗེའི་མཚམས། །བདག་མདུན་ལུས་ལྷའམ་མོས་པ་ཙམ་ཞིག་བསྒོམ། །བདག་མདུན་ཚར་རྗེས་བསྙེན་པའི་སྐབས་དེ་རུ། །བསྙེན་པ་བྱ་ཞིང་དམིགས་པ་གསལ་བཏབ་སྟེ། །བདག་དང་མདུན་བསྐྱེད་གཙོ་བོ་ཡབ་ཀྱི་སྐུ། །སྤྱི་ནི་དར་དམར་གུར་ཕུབ་ལྟ་བུ་ལ། །ནང་ནི་སྟོང་པ་ཕྲུ་མ་ཕུས་བཏབ་བཞིན། །དེ་དབུས་དབུ་མ་ཁང་སྟོང་ཀ་བ་ལྟར། །
ཡར་སྣེ་སྤྱི་བོ་མར་སྣེ་གསང་གནས་ཟུག །ཡར་སྣེ་ཧཾ་དཀར་མགོ་བོ་ཐུར་བསྟན་དང་། །མར་སྣེ་ཨ་དམར་ལྕགས་སྲེག་མདོག་གིས་མཚན། །དབུ་མ་མཐིང་གསལ་དྲང་ཞིང་སྟོང་སང་ངེ་། །གཡོན་གཡས་རྐྱང་མ་དཀར་དང་རོ་མ་དམར། །ཡར་སྣེ་ཚངས་བུག་མར་སྣེ་ལྟེ་འོག་ཟུག་།འཁོར་ལོ་ལྔ་ཡི་རྩ་འདབ་གདུགས་རྩིབས་ལྟར། །སྤྱི་བོའི་རྩ་འདབ་སུམ་ཅུ་སོ་གཉིས་དཀར། །མགྲིན་པའི་རྩ་འདབ་བཅུ་དྲུག་དམར་པོ་སྟེ། །སྙིང་ཁའི་རྩ་འདབ་བརྒྱད་པོ་མཐིང་ཀའོ། །ལྟེ་བའི་དྲུག་ཅུ་རྩ་བཞི་སེར་པོ་སྟེ། །གསང་གནས་སོ་གཉིས་སམ་ནི་ཉེར་བརྒྱད་ལྗང་། །
བདག་མདུན་དབུ་མའི་ནང་གི་རྩ་འཁོར་དབུས། །སྤྱི་བོར་གཏི་མུག་ངོ་བོ་ཨོཾ་དཀར་པོ། །མགྲིན་པར་འདོད་ཆགས་ངོ་བོ་ཧྲིདམར་པོ། །སྙིང་ཁར་ཞེ་སྡང་ངོ་བོ་ཧཱུྃ་མཐིང་ཁ། །ལྟེ་བར་ང་རྒྱལ་ངོ་བོ་ཧཱུྃ་སེར་པོ། །གསང་བར་ཕྲག་དོག་ངོ་བོ་ཨཱཿལྗང་གུ། །དེ་དག་རྣམས་ལས་འོད་ཟེར་ཕྱོགས་བཅུར་འཕྲོས། །བདག་དང་འགྲོ་བ་སེམས་ཅན་ཐམས་ཅད་ཀྱིས། །དུག་ལྔའི་སྒོ་ནས་བསགས་པའི་སྡིག་སྒྲིབ་དང་། །ལམ་རྒྱུད་ལྔ་རུ་སྐྱེ་བའི་ས་བོན་རྣམས། །འོད་ཀྱིས་བསྡུས་ནས་ཡིག་འབྲུ་བཅུ་ལ་བསྟིམ། །བར་རླུང་གསུས་པ་ཐེར་ཙམ་བྱས་པ་ཡིས། །དབུ་མའི་མར་སྣེ་ཨཱཿཡིག་དམར་པོ་ལས། །གཏུམ་མོ་ཡེ་ཤེས་མེ་ལྕེ་ནར་གྱིས་འབར། །ཡིག་འབྲུ་བཅུ་བསྲེག་དུག་ལྔ་སྦྱངས་བའི་འབྲས། །རིགས་ལྔ་སྤྱན་རས་གཟིགས་ཀྱི་སྐུར་གྱུར་ཏེ། །སྤྱི་བོར་རྣམ་སྣང་སྤྱན་གཟིགས་ཡབ་ཡུམ་དཀར། །མགྲིན་པར་པདྨ་སྤྱན་གཟིགས་ཡབ་ཡུམ་དམར། །ཐུགས་ཀར་རྡོ་རྗེ་སྤྱན་གཟིགས་ཡབ་ཡུམ་མཐིང་། །ལྟེ་བར་རིན་ཆེན་སྤྱན་གཟིགས་ཡབ་ཡུམ་སེར། །གསང་བར་ཀརྨ་སྤྱན་གཟིགས་ཡབ་ཡུམ་ལྗང་། །ཀུན་ཀྱང་ཞལ་གཅིག་ཕྱག་བཞི་གཞུང་ལྟར་ལས། །པདྨ་ཟླ་བའི་གདན་ལ་སྐྱིལ་ཀྲུང་
བཞུགས། །ཡབ་ཡུམ་རིགས་ལྔ་སོ་སོའི་དབུ་བརྒྱན་བསམ། །རྩ་འདབ་གྲོངས་མཉམ་ཌཀི་ཐམས་ཅད་ནི། །རུས་པའི་རྒྱན་ལྡན་གར་སྟབས་ཟླ་སྟེང་བཞུགས། སྤྱི་བོར་སོ་གཉིས་འཁོར་ལོ་གྲི་ཐོད་དཀར། །མགྲིན་པར་བཅུ་དྲུག་པདྨ་གྲི་ཐོད་དམར། །སྙིང་གར་རྡོ་རྗེ་གྲི་ཐོད་འཛིན་བརྒྱད་མཐིང་། །ལྟེ་བར་རེ་བཞི་རིན་ཆེན་གྲི་ཐོད་སེར། །གསང་བར་སོ་གཉིས་རྒྱ་གྲམ་གྲི་ཐོད་ལྗང་། །འཁོར་རྣམས་ཐུགས་ཀར་ཟླ་སྟེང་ས་བོན་ཧྲཱིཿ །སྤྱི་བོའི་ཐུགས་ཀར་ཧཱུྃཡིག་དཀར་པོ་རེ། །གཞན་རྣམས་ཧ་རི་ནི་སའི་ཡིག་འབྲུ་རེ། །གཙོ་བོ་ལྔ་ཡི་ཐུགས་ཀར་པད་ཉིའི་སྟེང་། །ཏིཿཡིག་རང་མདོག་ཡིག་བཅུ་གཡས་སུ་འཁོར། །ཡུམ་ལྔའི་ཐུགས་ཀར་ཆོས་འབྱུང་རྐྱང་པའི་སྟེང་། །ཧཱུྃཡིག་མཐའ་མར་ཡུམ་སྔགས་གཡོན་དུ་འཁོར། །དེ་རྣམས་གསལ་བཏབ་བཟླས་པ་བསྙེན་པའོ། །དེ་ནས་ཐུགས་ཀའི་ཡབ་ཡུམ་སྔགས་འཁོར་ལས། །འོད་ཟེར་བྱུང་བ་ཡབ་ཡུམ་ཞལ་ནས་ཐོན། །མགྲིན་པའི་ཡབ་ཡུམ་སྦྱོར་མཚམས་ནས་ཞུགས་ཏེ། །ཐུགས་ཀའི་སྔགས་ཕྲེང་བརྒྱུད་ཅིང་ཞལ་ནས་ཐོན། །སྤྱི་བོའི་ཡབ་ཡུམ་སྦྱོར་མཚམས་ནས་ཞུགས་ཏེ། །ཐུགས་ཀའི་སྔགས་ཕྲེང་བརྒྱུད་དེ་ཞལ་ནས་
ཐོན། །མར་བྱུང་རང་གི་ཞལ་ནས་ཕྱིར་ཐོན་པས། །ཁ་དོག་ལྔ་ལྡན་སྟོང་སྐུད་ཆུན་པོ་བཞིན། མདུན་བསྐྱེད་ཞལ་ཞུགས་ཡར་སོང་སྤྱི་བོ་ཡི། །ཡབ་ཡུམ་ཞལ་ཞུགས་སྐུ་ཡི་དབྱིབས་བརྒྱུད་ནས། །སྦྱོར་མཚམས་ནས་ཐོན་མགྲིན་པའི་ཞལ་དུ་ཞུགས། །སྐུ་བརྒྱུད་སྦྱོར་མཚམས་ནས་ཐོན་ཐུགས་ཀ་ཡི། །ཡབ་ཡུམ་ཞལ་ཞུགས་སྔགས་ཕྲེང་དྲག་ཏུ་འཁོར། །སྦྱོར་མཚམས་ནས་ཐོན་ལྟེ་བའི་ཡབ་ཡུམ་གྱི། །ཞལ་ཞུགས་སྐུ་ལུས་བརྒྱུད་ཅིང་སྦྱོར་མཚམས་ཐོན། །གསང་གནས་ཡབ་ཡུམ་ཞལ་ཞུགས་སྐུ་ལུས་བརྒྱུད། །སྦྱོར་མཚམས་ནས་ཐོན་མདུན་ཚུབསྐྱེད་སྦྱོར་མཚམས་ནས། །ཚུར་བྱོན་རང་གི་སྦྱོར་མཚམས་ནས་ཞུགས་ཏེ། །བདག་བསྐྱེད་གསང་གནས་ཡབ་ཡུམ་སྦྱོར་མཚམས་ཞུགས། །སྐུ་ཡི་དབྱིབས་བརྒྱུད་ཡབ་ཡུམ་ཞལ་ནས་ཐོན། །ལྟེ་བའི་ཡབ་ཡུམ་སྦྱོར་མཚམས་ནས་ཞུགས་ཏེ། །སྐུ་ལུས་བརྒྱུད་དེ་ཡབ་ཡུམ་ཞལ་ནས་ཐོན། །ཐུགས་ཀའི་ཡབ་ཡུམ་སྦྱོར་མཚམས་ནས་ཞུགས་ཏེ། །སྐུ་ལུས་བརྒྱུད་དེ་ཡབ་ཡུམ་ཞལ་ནས་ཐོན། །ཐུགས་ཀའི་ཡབ་ཡུམ་སྦྱོར་མཚམས་ནས་ཞུགས་ཏེ། །ཐུགས་ཀའི་སྔགས་འཁོར་ས་བོན་ལ་ཐིམ་པས། །སྐུ་ལྔ་ཡེ་ཤེས་ལྔ་ཡི་དངོས་གྲུབ་ཐོབ། །དེ་ལྟར་འོད་
ཟེར་ཁ་དོག་ལྔ་ལྡན་པ། །དཔེར་ན་སྟོང་སྐུད་ཆུན་པོའི་བསྐོར་བ་བཞིན། །བདག་མདུན་བར་དུ་ཀྱི་ལི་ལི་འཁོར་བས། །བདག་མདུན་ཡབ་ཡུམ་སྔགས་ཕྲེང་ཉི་ཤུ་པོ། །ཡབ་བཅུ་གཡས་འཁོར་ཡུམ་བཅུ་གཡོན་དུ་འཁོར། །དེ་ཡང་ཇེ་མགྱོགས་དྲག་ཏུ་འཁོར་བ་ཡིས། །མདུན་བསྐྱེད་ཡབ་ཡུམ་བཅུ་ཡི་སྔགས་ཕྲེང་ལས། །འོད་ཟེར་སྣ་ཚོགས་ནམ་མཁའ་ཁྱབ་པར་འཕྲོས། །མཁའ་ཁྱབ་འགྲོ་བ་མ་ལུས་ཐམས་ཅད་ཀྱིས། །དུག་ལྔའི་སྒོ་ནས་བསགས་པའི་སྡིག་སྒྲིབ་དག །མཆོག་གི་ཡོན་ཏན་མ་ལུས་ཐོབ་པར་གྱུར། །སླར་ཡང་འོད་ཟེར་ཕྱོགས་བཅུའི་ཞིང་ཁྱབ་པས། །རིགས་ལྔའི་རྒྱལ་བ་སྲས་བཅས་ཐམས་ཅད་མཆོད། །སྐུ་ལྔ་ཡེ་ཤེས་ལྔ་ཡི་དངོས་གྲུབ་བཅུད། །འོད་ལྔའི་རྣམ་པར་བསྡུས་ཏེ་མདུན་བསྐྱེད་ཐིམ། །དེ་ཉིད་སྔགས་ཕྲེང་དེ་དང་དབྱེར་མེད་དུ། །ཚུར་བྱོན་རང་ལ་ཐིམ་པས་དངོས་གྲུབ་ཐོབ། །དེ་ལྟར་བསྒོམ་ཞིང་བཟླས་པ་ཉེ་བསྙེན་ཡིན། །དེ་དག་ཆེ་ནི་གཞུང་གི་སྔགས་རིང་བཟླ། །དེ་ནས་འོད་ཟེར་དེ་ཉིད་སྔགས་ཕྲེང་གྱུར། །བདག་མདུན་བར་དུ་སྔར་ལྟར་འཁོར་བ་ལས། །བདག་མདུན་བར་གྱི་སྔགས་ཕྲེང་དེ་ཉིད་ལས། །འོད་ཟེར་སྣ་ཚོགས་ནམ་
མཁའ་ཁྱབ་པར་འཕྲོས། །ཕྱོགས་བཅུ་དུས་གསུམ་བཞུགས་པའི་བླ་མ་དང་། །སངས་རྒྱས་བྱང་སེམས་ཡི་དམ་མཁའ་འགྲོའི་ཚོགས། །ཐམས་ཅད་འོད་དེས་མཆོད་པས་ཐུགས་མཉེས་ནས། །དེ་དག་རྣམས་ཀྱི་སྐུ་གསུང་ཐུགས་རྣམས་ལས། །ཐུགས་རྗེ་ཆེན་པོ་ཡབ་ཡུམ་སྐུ་ཆེ་ཕྲ། །ཆེ་བ་རི་རབ་ཙམ་དང་ཆུང་བ་ནི། །ཡུངས་འབྲུའི་ཚད་ཙམ་གསུང་ལས་སྔགས་ཀྱི་ཕྲེང་། །ཨཱཿ་ལི་དམར་པོ་ཀཱ་ལི་དཀར་པོའི་ཕྲེང་། །ཐུགས་ནི་ཕྱག་མཚན་རྡོ་རྗེ་འཁོར་ལོ་དང་། །རིན་ཆེན་པདྨ་རྒྱ་གྲམ་ཧཱིས་མཚན་པ། །ཆེ་ཕྲ་སྣ་ཚོགས་ཁ་བ་བུ་ཡུག་བཞིན། །སིལ་སིལ་ཆིལ་ཆིལ་ལྷུག་ལྷུག་བབས་གྱུར་ཏེ། །མཚོ་ལ་ཆར་བཞིན་བདག་མདུན་རྣམས་ལ་ཐིམ། སངས་རྒྱས་ཀུན་གྱི་སྐུ་གསུང་ཐུགས་དང་ནི། །ཡོན་ཏན་ཕྲིན་ལས་དངོས་གྲུབ་ཐོབ་པར་བསྒོམ། །དེ་ནི་སྒྲུབ་པའི་དམིགས་པ་གཙོ་བོ་ཡིན། །དེ་ནས་སྔགས་ཕྲེང་སྔར་ལྟར་འཁོར་བཞིན་ལས། །མདུན་བསྐྱེད་སྤྱི་བོའི་སྔགས་ཕྲེང་དམིགས་པ་གཏད། །དེ་ལས་འོད་ཟེར་དཀར་པོ་ཕྱོགས་བཅུར་འཕྲོས། །སེམས་ཅན་ཀུན་གྱི་གཏི་མུག་སྒྲིབ་པ་སྦྱངས། །ཀུན་ཀྱང་བདེ་གཤེགས་རིགས་ཀྱི་སྤྱན་རིས་གཟིགས། །ཡབ་ཡུམ་སྐུ་མདོག་དཀར་པོ་ཤ་སྟག་
གྱུར། །དེ་བཞིན་མདུན་བསྐྱེད་མགྲིན་པའི་ཡབ་ཡུམ་གྱི། །སྔགས་ཕྲེང་དྲག་འཁོར་འོད་ཟེར་དམར་པོ་འཕྲོས། །འགྲོ་བ་ཀུན་གྱི་འདོད་ཆགས་སྒྲིབ་པ་སྦྱངས། །ཀུན་ཀྱང་པདྨ་རིགས་ཀྱི་སྤྱན་རས་གཟིགས། །ཡབ་ཡུམ་སྐུ་མདོག་དམར་པོ་ཤ་སྟག་གྱུར། །དེ་བཞིན་མདུན་བསྐྱེད་ཐུགས་ཀའི་ཡབ་ཡུམ་གྱི། །སྔགས་ཕྲེང་དྲག་འཁོར་འོད་ཟེར་མཐིང་ཀ་འཕྲོས། །འགྲོ་བ་ཀུན་གྱི་ཞེ་སྡང་སྒྲིབ་པ་སྦྱངས། །ཐམས་ཅད་རྡོ་རྗེ་རིགས་ཀྱི་སྤྱན་རས་གཟིགས། །ཡབ་ཡུམ་སྐུ་མདོག་མཐིང་ཀ་ཤ་སྟག་གྱུར། །དེ་ནས་མདུན་བསྐྱེད་ལྟེ་བའི་ཡབ་ཡུམ་གྱི། །སྔགས་ཕྲེང་དྲག་འཁོར་འོད་ཟེར་གསེར་མདོག་འཕྲོས། །འགྲོ་བ་ཀུན་གྱི་ང་རྒྱལ་སྒྲིབ་པ་སྦྱངས། །ཐམས་ཅད་རིན་ཆེན་རིགས་ཀྱི་སྤྱན་རས་གཟིགས། །ཡབ་ཡུམ་གསེར་མདོག་ཤ་སྟག་སྐུ་རུ་གྱུར། །ཡང་ནི་མདུན་བསྐྱེད་གསང་གནས་ཡབ་ཡུམ་གྱི། །སྔགས་ཕྲེང་དྲག་འཁོར་འོད་ཟེར་ལྗང་གུ་འཕྲོས། །འགྲོ་བ་ཀུན་གྱི་ཕྲག་དོག་སྒྲིབ་པ་སྦྱངས། །ཐམས་ཅད་ལས་ཀྱི་རིགས་ཀྱི་སྤྱན་རས་གཟིགས། །ཀུན་ཀྱང་ཡབ་ཡུམ་ལྗང་གུའི་སྐུ་རུ་གྱུར། །དེ་ལྟར་འགྲོ་བ་སེམས་ཅན་ཐམས་ཅད་ཀྱང་། །སོ་སོའི་དུག་ལྔ་གང་ཆེ་དེ་སྦྱངས་པས། །
སྦྱངས་འབྲས་རིགས་ལྔ་སོ་སོའི་སྤྱན་རས་གཟིགས། །དམྱལ་བ་རྡོ་རྗེ་ཡི་དྭགས་པདྨའི་རིགས། །དུད་འགྲོ་བདེ་གཤེགས་ལྷ་མིན་ལས་ཀྱི་རིགས། །ལྷ་མི་རིན་ཆེན་རིགས་ཀྱི་སྤྱན་རས་གཟིགས། །དེ་ལྟར་རིགས་དྲུག་འཁོར་བ་དོང་སྤྲུགས་ནས། །ཀུན་ཀྱང་རང་གི་རམ་བུ་བཀྱག་པའི་ཚུལ། །སྔགས་སྒྲ་འུར་ཆོམ་འབྲུག་སྟོང་དུས་གཅིག་བཞིན། །ནམ་མཁའི་མཐར་ཐུག་སྔགས་ཀྱི་སྒྲས་ཁྱབ་པས། །འགྲོ་བ་རིགས་དྲུག་ལུས་ཀྱང་མ་བླངས་པའི། །ནམ་མཁའ་གང་བའི་རྣམ་ཤེས་འཁྱམ་པོའི་ཚོགས། །དེ་དག་ཀུན་གྱི་སྒྲིབ་གཉིས་བག་ཆགས་དག །ཀུན་ཀྱང་འཕགས་པའི་གོ་འཕང་ཐོབ་པར་བསྒོམ། །དེ་ནི་སྒྲུབ་པ་ཆེན་པོའི་དམིགས་པ་ཡིན། །སྔགས་རིང་ཧ་རི་ནི་སའི་མཇུག་དེ་རུ། །རི་ནི་ཧ་ས། ནི་རི་ཧ་ས། ས་ནི་རི་ཧ། །ཧཱུྃ་ཕཊ་སྭཱ་ཧཱ། སྦྱར་བཟླས་རྟགས་མྱུར་ཟབ། དམིགས་པ་དེ་རྣམས་ཐུན་རེ་རྫོགས་པར་བྱ། །ཐུན་མགོར་བདག་མདུན་ཚོར་རེ་འདོན་པ་དང་། །ཐུན་མཇུག་གཏོར་བསྔོས་ཐུན་བསྡུ་བསྔོ་སྨོན་བྱ། །དེ་ལྟར་ཞག་པོ་དྲུག་ལས་མི་ཉུང་བསྒྲུབ། །ཞག་བདུན་ཉིན་པར་སྔ་དྲོའི་ཐུན་ལ་ནི། །གོང་ལྟར་བདག་མདུན་སྔགས་ཕྲེང་འཁོར་བ་ཡི། །མདུན་བསྐྱེད་སྤྱི་བོའི་སྔགས་
འཁོར་དྲག་འཁོར་བས། །ཐུགས་རྒྱུད་བསྐུལ་ནས་སྤྱི་བོའི་གཙོ་འཁོར་ནི། །ཀུན་ལས་འོད་ཟེར་དཀར་པོ་ཟླ་བའི་མདོག །ཤི་སོས་བདུད་རྩི་ལྟ་བུ་ཕྱོགས་བཅུར་འཕྲོས། །འགྲོ་བའི་སྒྲིབ་གཉིས་མུན་ལ་ཟླ་ལྟར་གསལ། །འོད་ཟེར་བདག་དང་བསྲུང་བྱ་ལ་ཐིམ་པས། །ནད་གདོན་སྡིག་སྒྲིབ་ཐམས་ཅད་ཞི་བར་བསྒོམ། །སྔགས་རིང་ཧ་རི་ནི་སའི་མཇུག་དེ་རུ། །ནད་གདོན་སརྦ་པཱ་པཾ་ཤཱནྟི་ཀུ་རུ་ཡེ་སྭཱ་ཧཱ། །རང་ལ་གདོན་དང་ནད་ཀྱིས་གནོད་གྱུར་ན། །སརྦ་ཛཱ་ར་ནི་ཏྲ་ཧཱུྃ་ཕཊ་སྭ་ཧཱ་སྦྱར། ཅི་ནུས་བཟླས་རྗེས་གཏོར་བསྔོས་ཐུན་བསྡུ་བྱ། །སླར་ཡང་བདག་མདུན་བཏང་རྗེས་དམིགས་པ་ནི། །བདག་མདུན་བར་དུ་སྔགས་ཕྲེང་འཁོར་བ་དེས། །མདུན་བསྐྱེད་ལྟེ་བའི་ལྷ་ཚོགས་ཐུགས་རྒྱུད་བསྐུལ། །འོད་ཟེར་གསེར་མདོག་ནམ་མཁའ་ཁྱབ་པར་འཕྲོས། །འགྲོ་བའི་བསོད་ནམས་ཡེ་ཤེས་ཡོན་ཏན་ཚོགས། །པདྨར་ཉི་ཟེར་ཕོག་ལྟར་རྒྱས་པར་བྱས། །འོད་ཟེར་ཚུར་འདུས་བདག་དང་བསྲུང་བྱར་ཐིམ། །ཚེ་དང་བསོད་ནམས་ཡེ་ཤེས་ཡོན་ཏན་ཚོགས། །པདྨ་ཆུ་ཡིས་བྲན་ལྟར་བཀྲག་མདངས་རྒྱས། །སྔགས་རིང་བེ་རོ་ཙ་ནི་ཡེ་ཡི་མཇུག །རི་ནི་ཧ་ས་མ་མ་ཨཱཿ་ཡུ༔པུཎེ་
ཛྙཱ་ན་པུཎྚི་ཀུ་རུ་སྭཱ་ཧཱ། ཅི་ནུས་བཟླས་རྗེས་གཏོར་བསྔོས་ཐུན་བསྡུ་བྱ། །ཕྱེད་ཡོལ་ནས་བཟུང་བདག་མདུན་ཚར་གཅིག་རྗེས། །བདག་མདུན་བར་དུ་སྔགས་ཕྲེང་སྔར་ལྟར་འཁོར། །མདུན་བསྐྱེད་ཐུགས་ཀའི་ལྷ་ཚོགས་ཐུགས་རྒྱུད་བསྐུལ། །སྔགས་ཕྲེང་དྲག་འཁོར་འོད་ཟེར་བེཟླུའི་མདོག །ཕྱོགས་བཅུའི་ནམ་མཁའ་ཁྱབ་པར་འཕྲོས་པ་ཡིས། །རྒྱལ་བ་སྲས་བཅས་དཔའ་བོ་མཁའ་འགྲོ་ཡི། །མཆོག་གི་དངོས་གྲུབ་ཉམས་རྟོགས་ཡོན་ཏན་ཀུན། །འོད་ཟེར་མཐིང་གར་བསྡུས་ཏེ་བདག་ཉིད་ཀྱི། །སྙིང་གར་ཐིམ་པས་ཉམས་རྟོགས་མཆོག་ཐོབ་བསྒོམ། །སྔགས་རིང་ཧ་རི་ནི་སའི་མཇུག་དེ་རུ། །ཨཱཿ་ཝེ་ཤ་ཡ་ཨཱཿ་ཝེ་ཤ་ཡ་ཨཱཿཨཱཿ །ཞེས་པ་བཏགས་ལ་ཅི་ལྕོགས་བཟླས་པ་བྱ། །གཏོར་བསྔོས་ཐུན་བསྡུ་བྱས་རྗེས་བདག་མདུན་འདོན། །བདག་མདུན་བར་གྱི་སྔགས་ཕྲེང་སྔར་ལྟར་འཁོར། །དགོང་ཀ་ནས་བཟུང་མུན་རུབ་བར་དུ་སྟེ། །མདུན་བསྐྱེད་མགྲིན་པའི་ལྷ་ཚོགས་ཐུགས་རྒྱུད་བསྐུལ། །སྐུ་ལས་འོད་ཟེར་ཉི་མ་འཆར་ཁའི་མདོག །ཕྱོགས་བཅུར་འཕྲོས་པས་འོད་དེས་རེག་ཙམ་གྱིས། །འགྲོ་ཀུན་སོ་སོའི་རླུང་སེམས་རང་དབང་ཐོབ། །འོད་ཟེར་ཚུར་འདུས་པདྨ་རཱ་གའི་མདོག །རང་
ལ་ཐིམ་པས་སྣང་སྲིད་འཁོར་འདས་ཀུན། །དབང་སྡུད་ཟིལ་གནོན་དངོས་གྲུབ་ཐོབ་པར་བསྒོམ། །སྔགས་རིང་བེ་རོ་ཙ་ནི་ཡེ་ཡི་མཇུག །ནི་རི་ས་ཧ་བ་སུ་ན་ན་ཁ་དྷེ་སརྦ་སིདྡྷི་པ་ཤོ་ཀུ་རུ་ཡེ་སྭཱ་ཧཱ། ཅི་ནུས་བཟླས་རྗེས་གཏོར་བསྔོས་ཐུན་བསྡུ་བྱ། །ཐུན་མཚམས་རྣམས་སུ་ཆག་མེད་རིགས་རྣམས་བྱ། །མུན་རུབ་བདག་མདུན་ཚར་གཅིག་བཏང་བའི་རྗེས། །བདག་མདུན་བར་དུ་སྔགས་ཕྲེང་སྔར་ལྟར་འཁོར། །སྔགས་ཕྲེང་དྲག་འཁོར་གསང་གནས་ལྷ་ཚོགས་ཀྱི། །སྐུ་ལས་འོད་ཟེར་ལྗང་ནག་ཕྱོགས་བཅུར་འཕྲོས། །འོད་ཀྱི་ཟེར་མ་མཚོན་ཆའི་དབྱིབས་འདྲ་བས། །ཚ་ཞིང་རྩུབ་པའི་རེག་བྱ་དང་ལྡན་པ། །འགྲོ་བ་ཀུན་གྱི་བདུད་དང་ཐར་པའི་གེགས། །བ་མོར་ཉི་ཟེར་ཕོག་བཞིན་ཚར་བཅད་དེ། །འོད་ཟེར་ཚུར་འདུས་བདེ་བའི་རེག་བྱ་བཅས། །བདག་དང་བསྲུང་བྱ་རྣམས་ལ་ཐིམ་པ་ཡིས། །ནད་གདོན་བར་ཆད་ཐམས་ཅད་ཚར་བཅད་བསམ། །སྔགས་རིང་བེ་རོ་ཙ་ནི་ཡེ་ཡི་མཇུག །ས་ནི་རི་ཧ་གནོད་བྱེད་སརྦ་ཤ་ཏུཾ་མཱ་ར་ཡ་ཧཱུྃ་ཕཊ། ཅི་ནུས་བཟླས་རྗེས་གཏོར་བསྔོས་ཐུན་བསྡུ་ཉལ། །ཕྱིར་ནངས་བདག་མདུན་ཚར་གཅིག་བདག་འཇུག་བླངས། །དགའ་སྟོན་ཚོགས་
འཁོར་རྗེས་ཆོག་གཞུང་ལྟར་རོ། །དེ་ལྟར་ཞག་བདུན་གསང་སྒྲུབ་ཚང་བ་ཡིན། །གལ་ཏེ་གསང་སྒྲུབ་ཟླ་གཅིག་བྱེད་འདོད་ན། །བདུན་གསུམ་སྒྲུབ་པ་བདུན་གཅིག་ལས་སྦྱོར་དང་། །ཞག་གཅིག་དུས་བཞིར་ལས་བཞིའི་སྦྱིན་བསྲེག་བྱ། །དེ་རྗེས་ཞག་གཅིག་བདག་འཇུག་རྗེས་ཆོག་ཡིན། །གལ་ཏེ་གསང་སྒྲུབ་དྲིལ་སྒྲུབ་སྦྲེལ་འདོད་ན། །བདག་འཇུག་མི་བྱ་མཆོད་པ་ཁ་གསོས་ལ། །དེ་ནས་དྲིལ་སྒྲུབ་གཞུང་ལྟར་བྱས་པས་འཐུས། །ལྷ་དགུའི་མན་ངག་པཀཱིའི་སྙན་བརྒྱུད་ནི། །གཉན་རས་སང་གྷ་ལཀྵས་གསུངས་པ་བཞིན། །རང་བྱུང་རྡོ་རྗེས་ཡི་གེར་བཀོད་པ་ལས། །འདི་ནི་ཤིན་ཏུ་གསང་ཞིང་སྦས་གསུངས་ལྟར། །གསང་སྒྲུབ་ཡང་གསང་སྒྲུབ་པའི་རྩ་བ་ཡིན། །བསྐྱེད་རྫོགས་གཉིས་ཀའི་དོན་ཡང་འདིར་འདུས་ཏེ། །འདི་བ་ནི་བསྐྱེད་རིམ་གཙོ་བོ་བྱས་པ་ཡིན། །གཞན་ཡང་རང་བྱུང་རྒྱལ་བས་མཛད་པ་ཡི། །ལྷ་དགུ་ཚིགས་བཅད་མ་ཡི་གཞུང་ལས་ཀྱང་། །མདུན་དུའང་དེ་ལྟར་ལེགས་བསྐྱེད་ནས། །ལྟར་རང་རང་ཐུགས་ཀར་ནི། །པདྨའི་སྟེང་དུ་ཡི་གེ་ཧཱུཾ། སྙིང་པོར་བཅས་པ་འགོད་པར་བྱ། །ཨོཾ་ཨཱཿཧཱུྃ་ཧི༔ ཨོཾ་མ་ཎི་པདྨེ་ཧཱུྃ། ཨོཾ་བཛྲ་ཝཱ་རཱ་ཧི། སརྦ་བུདྡྷ་ཌཱ་ཀི་ནཱི་ཡེ། བཛྲ་
ཝརྞ་ནཱི་ཡེ། བཛྲ་བཻ་རོ་ཙ་ནཱི་ཡེ་སྭཱ་ཧཱ། ཧ་རི་ནི་ས། གསང་སྔགས་འོད་ཟེར་སྤྲོ་བསྡུ་ཡིས། །ཡེ་ཤེས་སྤྱན་འདྲེན་ལེགས་པར་མཆོད། །དབང་བསྐུར་རྒྱས་གདབ་དབུ་ཡང་བརྒྱན། །མཁའ་ཁྱབ་འགྲོ་བ་མ་ལུས་ཀུན། །མཆོག་གི་ཡོན་ཏན་ཐོབ་པར་བསམ། །འདི་ལ་སྤྲོ་བསྡུས་བཟླས་པའམ། །རྡོ་རྗེའི་བཟླས་པ་གང་རུང་གིས། །མདུན་བསྐྱེད་དེ་ལ་ལེགས་བསྟིམས་ནས། །ཞེས་གསུངས། དེ་བཞིན་ཞལ་གདམས་ཡི་གེ་ལས། །རྩ་གསུམ་འཁོར་ལོ་ལྔ་གསལ་གདབ། །ཅེས་སོགས་རྒྱ་ཆེར་གསུངས་པའི་དོན་ཡིན་སྤྱི་ནོ། །འདི་ནི་ལུང་འདྲེན་སྤངས་ཏེ་གོ་བདེ་བར། །ཐབས་མཁས་མཐར་ཕྱིན་གཉིས་ཀྱིས་བསྐུལ་བའི་ཕྱིར། །སྤྲུལ་སྐུ་གཤེགས་པའི་དགོངས་རྫོགས་ལ་དམིགས་ཏེ། །ལུག་ལོ་ས་ག་ཟླ་བའི་ཚེས་དགུ་ཡི། །སྔ་དྲོའི་ཆ་ལ་རཱ་ག་ཨ་སྱ་ཡིས། །ཇི་ལྟར་སྨྲས་བཞིན་མཐར་ཕྱིན་ཞེས་བྱས་བྲིས། །འདི་ལ་འགལ་འཁྲུལ་ཉེས་པའི་ཆ་མཆིས་ན། །ལྷ་དགུའི་ལྷ་ཚོགས་སྲུང་མར་བཅས་ལ་བཤགས། །འདི་བྲིས་རབ་དཀར་དགེ་བ་གང་མཆིས་དེས། །སྤྲུལ་སྐུ་ཆེན་པོའི་དགོངས་པ་རྫོགས་པ་དང་། །འདི་ཉིད་མཐོང་ཐོས་འབྲེལ་ཐོགས་འགྲོ་བ་ཀུན། །ཚེ་
གཅིག་ཐུགས་རྗེ་ཆེན་པོའི་སྐུ་འགྲུབ་ཤོག །སརྦ་མངྒ་ལཾ། དགེའོ། །དགེའོ། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།