དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ལས་ལྷ་དགུའི་ཡང་གསང་སྒྲུབ་པའི་ཟིན་བྲིས།
དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ལས་ལྷ་དགུའི་ཡང་གསང་སྒྲུབ་པའི་ཟིན་བྲིས་བཞུགས་སོ།།
ན་མོ་ལོ་ཀེ་ཤྭ་ར་དྷེ་ཝ་པཉྩཡེ། རྒྱལ་བ་རྒྱ་མཚོ་ལྷ་དགུའི་ལྷ་ཚོགས་ལ། །གུས་པས་ཕྱག་འཚལ་བཀང་གནང་བྱིན་གྱིས་རློབས། །ཡང་གསང་འཁོར་ལོ་ལྔ་ཡི་སྒྲུབ་པ་ལ། །སྒྲུབ་པའི་ལུགས་དང་ཁྲིད་ཀྱི་རིམ་པ་གཉིས། །ཁྲིད་རིམ་རྩ་རླུང་བསྒོམ་ལུགས་གཞན་དུ་གསལ། །འདིར་ནི་བསྐྱེད་རིམ་བསྙེན་སྒྲུབ་བྱ་བའི་ཚུལ། །མཚམས་བཅད་མི་དགོས་གང་དགར་བསྒོམས་པས་མཆོག །བདག་བསྐྱེད་འདོན་པའི་ཆས་ཙམ་མ་གཏོགས་པ། །སྒྲུབ་པའི་རྫས་ནི་ཅི་ཡང་མི་དགོས་སོ། །ད་ནངས་བདག་བསྐྱེད་ཚར་གཅིག་ཐོན་ཕྱི་ནས། །སྤྱོད་ལམ་ཀུན་ཏུ་སྔགས་བཟླ་དམིགས་པ་
བསྒོམ། །དགོང་མོ་གཏོར་བསྔོས་རྒྱས་བསྡུས་ཅི་རིགས་དང་།། །ཉལ་ཁ་ཐུན་བསྡུ་བསྔོ་སྨོན་རྒྱ་ཡིས་གདབ། །དེ་ལྟར་ཞག་བདུན་ཡན་ཆད་ལོ་ཟླའི་བར། །ཉམས་སུ་ལེན་པ་ཡང་གསང་སྒྲུབ་པ་ཉིད། །དེ་ཚེ་བསྒོམ་བྱ་དམིགས་པའི་རིམ་པ་ནི། །བདག་ཉིད་རྒྱལ་བ་རྒྱ་མཚོ་ཡབ་ཡུམ་སྐུ། །ཕྱི་ནི་དར་དམར་གུར་ཕུབ་ལྟ་བུ་ལ། །ནང་ནི་སྟོང་གསལ་ཕྲུ་མ་ཕུས་བཏབ་བཞིན། །དེས་དབུས་ཨ་ཝ་དྷུ་ཏི་མཐིང་གསལ་དྲང་། །ཡར་སྣ་ཧཾ་ཡིག་ཐིག་ལེ་དངུལ་ཆུའི་མདོག །མར་སྣ་ཨ་ཤད་ཐིག་ལེ་དམར་པོས་མཚན། །གཡས་གཡོན་རོ་མ་དམར་དང་རྐྱང་མ་དཀར། །ཡར་སྣེ་
སྣ་བུག་མར་སྣེ་ལྟེ་འོག་ཟུག །འཁོར་ལོ་ལྔ་ཡི་རྩ་འདབ་གདུགས་རྩིབས་བཞིན། །སྤྱི་བོར་རྩ་འདབ་སུམ་ཅུ་སོ་གཉིས་དཀར། །མགྲིན་པའི་བཅུ་དྲུག་དམར་པོ་ཁ་ཡར་ཕྱོགས། །སྙིང་ཁའི་རྩ་བརྒྱད་མཐིང་ཀ་ཅུང་ཟད་སྒྲུབ། །ལྟེ་བའི་རེ་བཞི་སེར་པོ་ཁ་ཡར་ཕྱོགས། །གསང་གནས་སོ་གཉིས་ཉེར་བརྒྱད་ལྗང་ཁུ་དྲང་། །འཁོར་ལོ་ལྔ་ཡི་རྩ་མདུད་དབུ་མའི་ནང་། སྤྱི་བོར་གཏི་མུག་ངོ་བོ་ཨོཾ་དཀར་པོ། །མགྲིན་པར་འདོད་ཆགས་ངོ་བོ་ཧྲཱི༔དམར་པོ། །སྙིང་གར་ཞེ་སྡང་ངོ་བོ་ཧཱུྃ་མཐིང་ཁ། །ལྟེ་བར་ང་རྒྱལ་ངོ་བོ་ཧཱུྃ་སེར་པོ། །གསང་གནས་ཕྲག་དོག་ངོ་བོ་ཨཱཿཋལྗང་གུ། །དེ་དག་རྣམས་ལས་འོད་ཟེར་ཕྱོགས་བཅུར་འཕྲོས། །བདག་དང་འབྲེལ་ཐོགས་གཙོར་བྱས་འགྲོ་ཀུན་གྱི། །དུག་ལྔའི་སྒོ་ནས་བསགས་པའི་སྡིག་སྒྲིབ་དང་། ལམ་རྒྱུད་ལྔ་རུ་སྐྱེ་བའི་ས་བོན་རྣམས། །འོད་ཟེར་དེས་བསྡུས་ཡིག་འབྲུ་ལྔ་ལ་ཐིམ། །བར་རླུང་གསུས་པ་ཐེར་ཙམ་བསྒོངས་པ་ཡིས། །དབུ་མའི་ཡར་སྣེ་གཏུམ་མོ་ཡེ་ཤེས་མེ། །ནར་གྱིས་འབར་ཏེ་དུག་ལྔའི་ས་བོན་བསྲེགས། །ཡེ་ཤེས་ལྔ་ཡི་སྤྱན་རས་གཟིགས་གྱུར་ཏེ། །སྤྱི་བོའི་སྐུ་ཡི་སྤྱན་གཟིགས་ཡབ་ཡུམ་དཀར། །འཁོར་ནི་ཌཀི་དཀར་མོ་རྩ་འདབ་
གྲངས། །ཐུགས་ཀར་ཧྲཱི༔ཡིག་དཀར་པོ་རེ་རེས་མཚན། །མགྲིན་པར་གསུང་གི་སྤྱན་གཟིགས་ཡབ་ཡུམ་དམར། །དམར་མོ་བཅུ་དྲུག་ཐུགས་ཀར་ནི་ཡིག་མཚན། །སྙིང་གར་ཐུགས་ཀྱི་སྤྱན་གཟིགས་ཡབ་ཡུམ་མཐིང་། །འཁོར་བརྒྱད་སྔོན་མོའི་ཐུགས་ཀར་ཧ་ཡིག་རེ། །ལྟེ་བར་ཡོན་ཏན་སྤྱན་གཟིགས་ཡབ་ཡུམ་སེར། །སེར་མོ་རེ་བཞིའི་ཐུགས་ཀར་རི་ཡིག་རེ། །གསང་བར་ཕྲིན་ལས་སྤྱན་གཟིགས་ཡབ་ཡུམ་ལྗང་། །རྩ་འདབ་གྲངས་མཉམ་ཌཱཀིའི་ཐུགས་ཀར་ས། །འཁོར་རྣམས་རང་རྟགས་གྲི་ཐོད་ཁ་ཊཾ་ག །ཡབ་ལྔའི་ཐུགས་ཀར་པདྨ་ཟླ་བའི་སྟེང་། །རང་མདོག་ཧྲུལ་ཡིག་བཅུ་གཡས་སུ་འཁོར། །ཡུམ་ལྔའི་ཐུགས་ཀར་ཆོས་འབྱུང་རྐྱང་པའི་སྟེང་། །རང་མདོག་ཧྲུལ་ཡུམ་སྔགས་གཡོན་དུ་འཁོར། །དེ་ནས་བར་རླུང་ཐེར་ཙམ་བཟུང་བ་ཡིས། །གསང་གནས་ཨ་ཤད་གཏུམ་མོའི་མེ་འབར་ཏེ། །རྩ་གནས་མེས་གང་སྤྱི་བོར་ཧཾ་ལ་རེག །བདུད་རྩི་བྱང་སེམས་འོ་མའི་རྒྱུན་བཞིན་བབ། །ལྷ་ཚོགས་ཀུན་གྱི་ཞལ་ཞུགས་སྐུ་ལུས་གང་། །བདེ་བས་ཐུགས་དགྱེས་བདེ་སྟོང་ཡེ་ཤེས་འབར། །སྔོན་ལས་བཀྲག་མདངས་གཟི་བརྗིད་རྒྱས་པར་བསྒོམ། །ཡིག་བཅུའམ་ཡིག་དྲུག་
བཟླས་པ་བསྙེན་པ་ཡིན། །དེ་ནས་ཡབ་ཡུམ་སྔགས་འཁོར་བཅུ་པོ་ལ། །འོད་ཟེར་སྣ་ཚོགས་ནམ་མཁའ་ཁྱབ་པར་འཕྲོས། །ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་དང་། །བླ་མ་ཡི་དམ་མཁའ་འགྲོ་ཐམས་ཅད་ལ། །འོད་དེས་མཆོད་པའི་སྤྲིན་དུ་གྱུར་པས་མཉེས། །ཐམས་ཅད་ཐུགས་རྗེ་ཆེན་པོ་ཡབ་ཡུམ་སྐུར། །གནས་འགྱུར་ཁ་བ་བུ་ཡུག་འཚུབ་བཞིན་བྱོན། །མཚོ་ལ་ཆར་བཞིན་བདག་ལ་སིབ་སིབ་ཐིམ། །དབང་དང་བྱིན་རླབས་དངོས་གྲུབ་ཐོབ་པར་བསྒོམ། །དེ་ནི་ཉེ་བར་བསྙེན་པའི་དམིགས་པ་ཡིན། །དེ་ནས་སྔགས་འཁོར་བཅུ་པོ་འཁོར་བཞིན་ལས། །སྤྱི་བོའི་ཡབ་ཡུམ་སྔགས་འཁོར་དྲག་ཏུ་འཁོར། །དེ་ལས་འོད་ཟེར་དཀར་པོ་ཕྱོགས་བཅུར་འཕྲོས། །བདེ་གཤེགས་རིགས་ཀྱི་སངས་རྒྱས་བྱང་སེམས་དང་། །སྐུ་ཡི་རིགས་ཀྱི་ལྷ་ཚོགས་ཐམས་ཅད་མཆོད། །དེ་ཀུན་སྤྱན་གཟིགས་ཡབ་ཡུམ་དཀར་པོའི་སྐུར། །གནས་འགྱུར་ཆར་བཞིན་བབས་ནས་བདག་ལ་ཐིམ། །འགྱུར་མེད་སྐུ་ཡི་དངོས་གྲུབ་ཐོབ་པ་དང་། །རང་གི་གཟུགས་ཀྱི་ཕུང་པོ་འདི་ཉིད་ནི། །བདེ་གཤེགས་སྤྱན་གཟིགས་ཡབ་ཡུམ་ངོ་བོར་གྱུར། །ཆོས་དབྱིངས་ཡེ་ཤེས་མངོན་དུ་བྱས་པར་བསྒོམ།
མགྲིན་པའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་དམར་པོ་ཕྱོགས་བཅུ་ཁྱབ་པར་འཕྲོས། །པདྨ་རིགས་ཀྱི་སངས་རྒྱས་བྱང་སེམས་དང་། །གསུང་གི་ལྷ་ཚོགས་ཐམས་ཅད་མཆོད་པས་མཉེས། །ཐམས་ཅད་སྤྱན་གཟིགས་ཡབ་ཡུམ་དམར་པོའི་སྐུ། །གནས་འགྱུར་ཆེར་བཞིན་བབས་ནས་བདག་ལ་ཐིམ། །འགགས་མེད་གསུང་གི་དངོས་གྲུབ་ཐོབ་པ་དང་། །འདུ་ཤེས་པདྨ་སྤྱན་གཟིགས་ངོ་བོར་གྱུར། །སོར་རྟོག་ཡེ་ཤེས་མངོན་དུ་བྱས་པར་བསྒོམ། །ཐུགས་ཀའི་ཡབ་ཡུམ་སྔགས་ཕྲེང་དྲག་ཏུ་འཁོར། །དེ་ལས་འོད་ཟེར་མཐིང་མདོག་ཕྱོགས་བཅུར་འཕྲོས། །རྡོ་རྗེ་རིགས་ཀྱི་སངས་རྒྱས་བྱང་སེམས་དང་། །ཐུགས་ཀྱི་ལྷ་ཚོགས་ཐམས་ཅད་མཆོད་པས་མཉེས། །ཐམས་ཅད་སྤྱན་གཟིགས་ཡབ་ཡུམ་མཐིང་ཀའི་སྐུར། །གནས་འགྱུར་བུ་ཡུག་འཚུབ་བཞིན་བདག་ལ་ཐིམ། །འཁྲུལ་མེད་ཐུགས་ཀྱི་དངོས་གྲུབ་ཐོབ་པ་དང་། །རྣམ་ཤེས་རྡོ་རྗེ་སྤྱན་གཟིགས་ངོ་བོར་གྱུར། །མེ་ལོང་ཡེ་ཤེས་མངོན་དུ་བྱས་པར་བསྒོམ། །ལྟེ་བའི་ཡབ་ཡུམ་སྔགས་ཕྲེང་མྱུར་བར་འཁོར། །དེ་ལས་འོད་ཟེར་གསེར་མདོག་ཕྱོགས་བཅུར་འཕྲོས། །རིན་ཆེན་རིགས་ཀྱི་སངས་རྒྱས་བྱང་
སེམས་དང་། །ཡོན་ཏན་ལྷ་ཚོགས་ཀུན་ལ་མཆོད་པས་མཉེས། །དེ་ཀུན་སྤྱན་གཟིགས་ཡབ་ཡུམ་གསེར་མདོག་སྐུ། །གནས་འགྱུར་ཆར་བཞིན་བབས་ནས་བདག་ལ་ཐིམ། །ཡོན་ཏན་ལྷུན་གྱིས་གྲུབ་པའི་དངོས་གྲུབ་ཐོབ། །ཚོར་བ་རིན་ཆེན་སྤྱན་གཟིགས་ངོ་བོར་གྱུར། །མཉམ་ཉིད་ཡེ་ཤེས་མངོན་དུ་བྱས་པར་བསྒོམ། །གསང་གནས་ཡབ་ཡུམ་སྔགས་ཕྲེང་མྱུར་བར་འཁོར། །དེ་ལས་འོད་ཟེར་ལྕགས་ཀྱུ་ཕྱོགས་བཅུར་འཕྲོས། །ལས་ཀྱི་རིགས་ཀྱི་སངས་རྒྱས་བྱང་སེམས་དང་། །ཕྲིན་ལས་རིགས་ཀྱི་ལྷ་ཚོགས་ཐམས་ཅད་མཆོད། །དེ་ཀུན་སྤྱན་གཟིགས་ཡབ་ཡུམ་ལྗང་གུ་གྱུར། །བུན་ནེ་ཆིལ་ལེ་བྱོན་ནས་བདག་ལ་ཐིམ། །ཕྲིན་ལས་འགྲོ་བ་འདུལ་བའི་དངོས་གྲུབ་ཐོབ། །འདུ་བྱེད་ཀརྨ་སྤྱན་གཟིགས་ངོ་བོར་གྱུར། །བྱ་གྲུབ་ཡེ་ཤེས་མངོན་དུ་བྱས་པར་བསྒོམ། །དེ་ལྟར་བསྒོམ་ཞིང་བཟླས་པ་སྒྲུབ་པ་ཡིན། །དེ་ནས་སྤྱི་བོའི་ཡབ་ཡུམ་སྔགས་ཕྲེང་ལས། །འོད་ཟེར་དཀར་པོ་ཟླ་བ་ཤར་འདྲ་འཕྲོས། །རང་གི་ལུས་ཀྱི་ནང་ཀུན་དཀར་གསལ་ཁྱབ། །ནད་གདོན་གཏི་མུག་སྡིག་སྒྲིབ་སངས་སེ་དག །འོད་དེ་ཕྱིར་འཕྲོས་འོད་དཀར་འཇིག་རྟེན་ཁྱབ། །དུད་འགྲོ་ལ་སོགས་གཏི་མུག་ལྡན་
རྣམས་ཀྱིས། །གཏི་མུག་སྒོ་ནས་བསགས་པའི་སྡིག་སྒྲིབ་དང་། །བག་ཆགས་བཅས་པ་དག་ནས་ཐམས་ཅད་ཀྱང་། །སྤྱན་གཟིགས་ཡབ་ཡུམ་དཀར་པོའི་སྐུ་རུ་གྱུར། །དེ་བཞིན་མགྲིན་པའི་ཡབ་ཡུམ་སྔགས་འཁོར་ནི། །དྲག་ཏུ་འཁོར་ནས་འོད་ཟེར་དམར་པོ་འཕྲོས། །ལུས་ཁྱབ་ནད་གདོན་འདོད་ཆགས་སྒྲིབ་པ་དག །ཕྱིར་འཕྲོས་ཉི་མ་འཆར་ཁའི་འོད་བཞིན་དུ། །ནམ་མཁའ་ཁྱབ་འཕྲོས་ཡི་དྭགས་ལ་སོགས་པ། །འདོད་ཆགས་སེར་སྣ་ཅན་རྣམས་སྒྲིབ་པ་སྦྱངས། །ཐམས་ཅད་སྤྱན་གཟིགས་ཡབ་ཡུམ་དམར་པོར་གྱུར། །ཐུགས་ཀའི་ཡབ་ཡུམ་སྔགས་འཁོར་དྲག་འཁོར་ལས། །འོད་ཟེར་མཐིང་མདོག་འཕྲོས་པ་བདག་ལུས་ཁྱབ། །ནད་གདོན་ཞེ་སྡང་སྡིག་སྒྲིབ་སངས་སེ་དག །འོད་ཟེར་ནམ་མཁའ་དྭངས་བའི་མདོག་ལྟ་བུ། །ཕྱོགས་ཀུན་ཁྱབ་པས་དམྱལ་བ་ལ་སོགས་པ། །ཞེ་སྡང་ཅན་རྣམས་ཀུན་གྱི་སྡིག་སྒྲིབ་སྦྱངས། །ཐམས་ཅད་སྤྱན་གཟིགས་ཡབ་ཡུམ་མཐིང་གར་གྱུར། །ལྟེ་བའི་ཡབ་ཡུམ་སྔགས་འཁོར་དྲག་འཁོར་ལས། །འོད་ཟེར་གསེར་མདོག་འཕྲོས་པས་བདག་ལུས་ཁྱབ། །ང་རྒྱལ་སྡིག་སྒྲིབ་དྲི་མ་སངས་སེ་དག །འོད་ཟེར་ཕྱིར་འཕྲོས་
སྤྲིན་མེད་ཉི་ཤར་བཞིན། །འོད་ཀྱི་ཕྱོགས་ཁྱབ་ལྷ་མི་ལ་སོགས་པ། །ང་རྒྱལ་ཅན་རྣམས་ཀུན་གྱི་སྡིག་སྒྲིབ་སྦྱངས། །ཀུན་ཀྱང་སྤྱན་གཟིགས་སེར་པོ་ཡབ་ཡུམ་གྱུར། །གསང་གནས་ཡབ་ཡུམ་སྔགས་འཁོར་མྱུར་འཁོར་བས། །འོད་ཟེར་ལྗང་གུ་འཕྲོས་པས་བདག་ལུས་ཁྱབ། །ནད་གདོན་ཕྲག་དོག་བག་ཆགས་སྒྲིབ་པ་དག །འོད་ཟེར་ཕྱིར་འཕྲོས་འོད་ལྗང་འཇིག་རྟེན་ཁྱབ། །ལྷ་མིན་ལ་སོགས་ཕྲག་དོག་ཅན་རྣམས་ཀྱི། །སྒྲིབ་སྦྱངས་སྤྱན་གཟིགས་ལྗང་གུ་ཡབ་ཡུམ་གྱུར། །དེ་ནས་གནས་ལྔའི་ཡབ་ཡུམ་སྔགས་འཁོར་ལས། །འོད་ཟེར་ཁ་དོག་སྣ་ཚོགས་བདག་ལུས་ཁྱབ། །ཐ་མལ་ལུས་ངག་ཡིད་ཀྱི་སྡིག་སྒྲིབ་སྦྱངས། །འཕགས་པའི་སྐུ་གསུང་ཐུགས་ཀྱི་ངོ་བོར་གྱུར། །འོད་ཟེར་འཇའ་ཚོན་ལྟ་བུ་ཕྱིར་འཕྲོས་པས། །ཐ་མལ་ཐོགདོས་བཅས་འབྱུང་བཞིར་འཛིན་པ་སྦྱངས། །ཡེ་ཤེས་གཞལ་ཡས་ཁང་གི་ངོ་བོར་གྱུར། །དེ་ལྟར་སྣོད་ཀྱི་འཇིག་རྟེན་གཞལ་ཡས་ཁང་། །བཅུད་ཀྱི་སེམས་ཅན་གཅིག་ཀྱང་མ་ལུས་པ། །རིགས་ལྔའི་སྤྱན་གཟིགས་ཡབ་ཡུམ་ཤ་སྟག་གྱུར། །ཀུན་ཀྱང་རང་གི་རམ་བུ་བཀྱག་པའི་ཚུལ། སྔགས་སྒྲ་འུར་ཆོམ་འཇིག་རྟེན་གཡོ་བ་བསྒོམ། །དེ་ནི་སྒྲུབ་པ་ཆེན་པོའི་
དམིགས་པའོ། །ཡིག་དྲུག་ཡིག་བཅུ་གང་རུང་བཟླ་ཆོག་སྟེ། །སྔགས་རིང་བཟླས་ན་རྟགས་དང་བྱིན་རླབས་མྱུར། །དམིགས་པ་དེ་དག་ཐུན་རེར་རྫོགས་པའམ། །ཞག་པོ་རེ་ལ་རྫོགས་པར་བྱས་ཀྱང་རུང་། །གལ་ཏེ་མཚམས་བསྡམས་རྩེ་གཅིག་སྒྲུབ་ན་ནི། །ཐུན་བཞིར་ཐུན་མཚམས་གཏོར་བསྔོས་ཐུན་བསྡུ་བྱ། །དེ་མིན་དགོང་ཀ་ནམ་འདོད་གཏོར་བསྔོས་གཅིག །དེ་ཚེ་སྤྲོ་ན་མདུན་བསྐྱེད་འདོན་ཡང་རུང་། །དེ་མིན་སྐད་ཅིག་གཏོར་མགྲོན་སྤྱན་དྲངས་ལ། །གཏོར་མ་བསྔོས་རྗེས་གཏོར་མགྲོན་ཡེ་ཤེས་པ། །རྟེན་ལ་བསྟིམ་མམ་མེད་ན་རང་ལ་བསྟིམ། །འཇིག་རྟེན་པ་རྣམས་རང་གནས་སོང་བར་དམིགས། །ཉལ་ཁ་ཐུན་བསྡུ་བསྔོ་སྨོན་གང་འདོད་བྱ། །དེ་ལྟར་མཚམས་བསྡམས་སྒྲུབ་ན་ཞག་དྲུག་གམ། །རྒྱུན་བསྙེན་ཡིན་ན་ཟླ་གཅིག་སོགས་འགྲུབ་ནས། །ཚེས་གཅིག་ནམ་ལངས་ཤར་དུ་ཁ་གྱུས་ལ། །དང་པོ་མགོ་བཙུགས་དེ་ནས་ནམ་འདོད་ཡིན། །སྤྱི་བོའི་ཡབ་ཡུམ་ཐུགས་ཀའི་སྔགས་འཁོར་ལས། །འོད་ཟེར་དཀར་པོ་ཕྱོགས་བཅུར་ཁྱབ་པར་འཕྲོས། །ཕྱོགས་བཅུར་བཞུགས་པའི་སངས་རྒྱས་བྱང་སེམས་དང་། །བླ་མ་ཡི་དམ་མཁའ་འགྲོ་ཐམས་ཅད་
ལ། །དཀར་གསུམ་མངར་གསུམ་ལ་སོགས་ཞི་བ་ཡིས། །འོད་དེས་མཆོད་རྫས་དཔག་མེད་གྱུར་པས་མཆོད། །ཞི་བ་ཆེན་པོའི་དངོས་གྲུབ་ཐམས་ཅད་ནི། །འོད་ཟེར་སྟོན་ཟླའི་མདོག་ཏུ་ཚུར་བསྡུས་ནས། །སྤྱི་བོའི་ཡབ་ཡུམ་སྐུ་ལ་ཐིམ་པ་ཡིས། །བདག་ཉིད་མཐོང་ཐོས་དྲན་རེག་འགྲོ་ཀུན་གྱི། །ནད་གདོན་སྡིག་སྒྲིབ་ཞི་ནས་དངོས་གྲུབ་ཐོབ། །སླར་ཡང་སྤྱི་བོའི་ཡབ་ཡུམ་སྔགས་འཁོར་ལས། །འོད་ཟེར་དཀར་པོ་ཤི་སོས་བདུད་རྩི་བཞིན། །བདག་ལུས་གང་བས་ནད་གདོན་སྡིག་སྒྲིབ་རྣམས། །བ་སྤུའི་སྒོ་ནས་ནག་ཉིལ་ཕྱིར་ཐོན་ཏེ། །བདག་ལུས་བདེ་དྲོད་ཡེ་ཤེས་འབར་བར་གྱུར། །འོད་ཟེར་ཕྱིར་འཕྲོས་བསྲུང་བྱ་འབྲེལ་ཐོགས་ཀྱི། །ནད་གདོན་སྡིག་ལྟུང་དྲི་མ་དག་པར་བསྒོམ། །སྔགས་རིང་ཧ་རི་ནི་སའི་མཇུག་དེ་རུ་། །ནད་གདོན་སརྦ་པཱ་པཾ་ཤཱནཾ་ཀུ་རུ་སྭཱ་ཧཱ། །རྒྱུན་ཁྱེར་ཡིན་ན་བརྒྱ་སྟོང་ཅི་འགྲུབ་སྟེ། །རྟགས་ཐོན་བྱེད་ན་ཞག་བདུན་ཁྲི་འབུམ་སོགས། །གང་འདོད་རང་གིས་ཉམས་དང་བསྟུན་པས་ཆོག །དེ་བཞིན་དང་པོ་རྒྱས་པའི་དབུ་འཛུགས་ཚེ། །བཅོ་ལྔའི་ཉིན་ཕྱེད་ལྷོའམ་བྱང་དུ་བལྟས། །ལྟེ་བའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་སེར་པོ་ཕྱོགས་
བཅུ་ཁྱབ་པར་འཕྲོས། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །བླ་མ་ཡི་དམ་མཁའ་འགྲོ་ནོར་ལྷའི་ཚོགས། །ཀུན་ལ་རྒྱལ་སྲིད་སྣ་བདུན་རིན་ཆེན་ལྔ། །རྒྱས་པའི་མཆོད་སྤྲིན་རྒྱ་མཚོར་གྱུར་པས་མཆོད། །བསོད་ནམས་ཡེ་ཤེས་རྒྱས་པའི་དངོས་གྲུབ་ཀུན། །འོད་ཟེར་བཙོ་མ་གསེར་གྱི་མདོག་ལྟ་བུ། །བསྡུས་ནས་ལྟེ་བའི་ཡབ་ཡུམ་ཐུགས་ཀར་ཐིམ། །ཡོན་ཏན་ལྷུན་གྱིས་གྲུབ་པའི་དངོས་གྲུབ་ཐོབ། །སླར་ཡང་ཡབ་ཡུམ་འཁོར་བཅས་སྐུ་ལུས་ལས། །འོད་ཟེར་འཛམ་བུ་ཆུ་གསེར་མདོག་ཅན་འཕྲོས། །བདག་ལུས་ཁྱབ་པས་ཚེ་བསོད་ཉམས་རྟོགས་རྒྱས། །འོད་ཟེར་ཕྱིར་འཕྲོས་སྤྲིན་མེད་ཉི་འོད་བཞིན། །འོད་དེས་དམིགས་ཡུལ་རྣམས་ལ་རེག་ཙམ་གྱིས། །དཔལ་འབྱོར་བདེ་སྐྱིད་བསོད་ནམས་རྒྱས་པར་བསྒོམ། །སྔགས་རིང་བེ་རོ་ཙ་ནི་ཡེ་ཡི་མཇུག །རི་ནི་ཧ་ས་མ་མ་ཨཱཿ་ཡུཔུཎྱེ་ཛྙཱ་ན་པུཎྚི་ཀུ་རུ་སྭཱ་ཧཱ། ཞེས་པ་གོང་ལྟར་མང་ཉུང་ཅི་འགྲུབ་བཟླ། །ཉེར་གསུམ་དགོང་ཀ་ནུབ་ཏུ་ཁ་ཕྱོགས་ལ། །མགྲིན་པའི་ཡབ་ཡུམ་སྔགས་འཁོར་མྱུར་བར་འཁོར། །འོད་ཟེར་དམར་ཆེམ་ཕྱོགས་བཅུར་འཕྲོས་པ་ཡིས། །ཕྱོགས་བཅུའི་སངས་རྒྱས་རྩ་གསུམ་ལྷ་
ཚོགས་ལ། །འདོད་ཡོན་ལྔ་དང་ཆང་སྣ་བཞི་ལ་སོགས། །དབང་གི་མཆོད་པ་རྒྱ་མཚོར་གྱུར་པས་མཆོད། །དབང་གི་དངོས་གྲུབ་བཅུད་རྣམས་འོད་ཟེར་ནི། །བྱུ་རུའི་མདོག་འདྲར་བསྡུས་ཏེ་མགྲིན་པར་ཐིམ། །བཀའ་བཙན་བདེན་ཚིག་འགྲུབ་པའི་དངོས་གྲུབ་ཐོབ། །མགྲིན་པའི་གཙོ་འཁོར་ཀུན་གྱི་སྐུ་ལས་ནི། །འོད་ཟེར་པདྨ་རཱ་གའི་མདོག་འདྲ་འཕྲོས། །བདག་ལུས་ཁྱབ་པས་རླུང་སེམས་རང་དབང་ཐོབ། །འོད་ཟེར་ཕྱིར་འཕྲོས་གློག་སྟོང་འཁྱུག་འདྲ་བས། །འཇིག་རྟེན་ཁམས་ཀྱི་ཚེ་བསོད་དཔལ་འབྱོར་དང་། །མཆོག་ཐུན་དངོས་གྲུབ་ཀུན་ཐོབ་བདག་ལ་ཐིམ། །སྔགས་རིང་བེ་རོ་ཙ་ནི་ཡེ་ཡི་མཇུག །ནི་རི་ཧ་ས་བཱ་སུ་ན་ན་ཁ་དྷེ་སརྦ་སིདྡྷི་པ་ཤང་ཀུ་རུ་སྭཱ་ཧཱ། ཅི་ལྕོགས་བཟླས་རྗེས་གོང་དང་འདྲ་བ་ཡིན། །ཉེར་དགུ་མུན་རུབ་ལྷོའམ་བྱང་བལྟས་ལ། །གསང་གནས་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་ལྗང་ནག་ཕྱོགས་བཅུ་ཁྱབ་པར་འཕྲོས། །ཕྱོགས་བཅུར་བཞུགས་པའི་རྩ་གསུམ་ལྷ་ཚོགས་ལ། །ཤ་ལྔ་ཤ་ཆེན་སྤོས་དང་ཚིལ་ཆེན་གསུར། །དྲག་པོའི་མཆོད་པ་དཔག་མེད་གྱུར་པས་མཆོད། །དེ་དག་ཀུན་གྱི་མཐུ་སྟོབས་ནུས་པ་ཀུན། །འོད་ཟེར་ལྗང་གུར་གྱུར་ཏེ་
གསང་གནས་ཀྱི། །ལྷ་ལ་ཐིམ་པས་བཀྲག་མདངས་ཕུན་སུམ་ཚོགས། །ཕྲིན་ལས་གང་བརྩམ་ཐོགས་མེད་དངོས་གྲུབ་ཐོབ། །གསང་གནས་ལྷ་ཚོགས་གཙོ་འཁོར་ཐམས་ཅད་ལས། །འོད་ཟེར་ལྗང་གུ་འཕྲོས་པས་བདག་ལུས་ཁྱབ། །ལུས་ཀྱི་ནད་གདོན་སེམས་ཀྱི་དུག་ལྔ་རྣམས། །འོད་དེས་བ་མོར་ཉི་ཟེར་ཕོག་ལྟར་བཅོམ། །འོད་ལྗང་ཕྱིར་འཕྲོས་མཚོན་ཆའི་དབྱིབས་འདྲ་བ། །དམྱལ་བའི་མེ་ལྟར་ཚ་ངར་ལྡན་པ་དེས། །གནོད་བྱེད་དགྲ་བགེགས་བདུད་བཞི་གཞོབ་ཐུལ་བསྲེགས། །རྩ་སྔགས་བེ་རོ་ཙ་ནི་ཡེ་ཡི་མཇུག་། ས་ནི་རི་ཧ་གནོན་བྱེད་སརྦ་ཤ་ཏྲོ་མཱ་ར་ཡ་ཧཱུྃ་ཕཊ། ཅེས་པ་ཐུན་མོང་ཕྲིན་ལས་བཞི་སྒྲུབ་ཡིན། །མཆོག་སྒྲུབ་ཡར་མར་ཚེས་བཅུ་ཉི་ཤར་དུས། །བྱང་ཤར་དབང་ལྡན་ཕྱོགས་སུ་ཁ་གྲུ་ལ། །ཐུགས་ཀའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་བེཟླུར་མདོག་ཅན་ཕྱོགས་བཅུར་འཕྲོས། །ཕྱོགས་བཅུའི་བཀའ་བརྒྱུད་གྲུབ་ཐོབ་རྒྱ་མཚོའི་ཚོགས། །ཡི་དམ་སངས་རྒྱས་བྱང་སེམས་ཐམས་ཅད་ལ། །རིག་མ་བཅུ་དྲུག་བྱང་སེམས་དཀར་དམར་སོགས། །བདེ་སྟོང་མཆོད་པར་གྱུར་པས་ཐུགས་རྒྱུད་མཉེས། །ཐུགས་ཀྱི་ཡེ་ཤེས་ཉམས་རྟོགས་
དངོས་གྲུབ་ཀུན། །འོད་ཟེར་ནམ་མཁའ་དྭངས་བའི་མདོག་ལྟ་བུ། །ཚུར་བསྡུས་ཐུགས་ཀའི་སྔགས་འཁོར་ཧྲིལ་ཐིམ། །དགོངས་པ་རྒྱལ་བ་ཀུན་དང་མཉམ་པ་དང་། །གཞན་རྒྱུད་བྱིན་གྱིས་རླབས་ནུས་དངོས་གྲུབ་ཐོབ། །སླར་ཡང་ཐུགས་ཀའི་གཙོ་འཁོར་ཐམས་ཅད་ལས། །འོད་ཟེར་ནམ་མཁའ་དྭངས་བ་ལྟར་འཕྲོས་པས། །བདག་དང་འབྲེལ་ཐོགས་འགྲོ་བ་ཐམས་ཅད་ལ། །ཉམས་རྟོགས་ཕུན་སུམ་ཚོགས་པ་སྐྱེ་བར་གྱུར། །སྔགས་རིང་ཧ་རི་ནི་སའི་མཇུག་དེ་རུ། །རི་ནི་ཧ་ས། ནི་རི་ཧ་ས། ས་ནི་རི་ཧ། ཨཱཿ་ཝེ་ཤ་ཡ་ཨཱཿ་ཝེ་ཤ་ཡ་ཨཱཿ ཨཱཿ ཉམས་རྟོགས་སྐྱེ་འདོད་འདི་ཉིད་ཅི་མང་བཟླ། །ཞག་དང་དུས་ཚོད་ཁ་ཡི་རྒྱུ་ཕྱོགས་སོགས། །དབུ་འཛུགས་དུས་ཡིན་རྒྱུན་དུ་མི་དགོས་སོ། །ཞག་དྲུག་སྒྲུབ་པའི་་་་ལས་བཞི་འདི་རྣམས་སོ་སོར་ཞག་དྲུག་གམ་བདུན་ལ་སྒྲུབ་གསུངས། མཇུག་ཏུ་ཡིན་ན་ནི། །ཞག་གཅིག་དུས་ཚོད་ཁ་ཡི་རྒྱུ་ཕྱོགས་བརྩི། །ཚེས་ཀྱི་གྲངས་ཀ་དེ་ལ་བརྩི་རྒྱུ་མེད། །ཡུན་རིང་རྟགས་ཐོན་སྒྲུབ་ན་སོ་སོའི་མཚམས། །ལས་བཞི་སོ་སོའི་སྦྱིན་སྲེག་གྲུབ་ན་ལེགས། །སྦྱིན་སྲེག་མ་གྲུབ་མ་ཚང་སྐྱོན་ནི་མེད། །དེ་ལྟར་ཡང་གསང་སྒྲུབ་པ་སྙན་བརྒྱུད་འདི། །གཉན་རས་ཡན་ལ་ཡི་གེར་
བཀོད་པ་མེད། །རང་བྱུང་རྡོ་རྗེས་རྩ་ཚིག་ཡི་གེར་བཀོད། །འདི་ཡི་རྒྱས་བཤད་གྲུབ་ཆེན་པཀཱིས་གསུངས། །གདམས་ངག་རྒྱ་མཚོ་མཐའ་ཡས་གཞུང་ཆེན་དང་། །ཟབ་ཆོས་རྒྱ་མཚོ་མཐའ་ཡས་རྒྱས་པ་དང་། །འཁོར་ལོ་ལྔ་ཡི་མན་ངག་མ་བུའི་སྐོར། །དེ་དག་རྣམས་སུ་འཐོར་ནས་སྦས་ཏེ་བཞུགས། །ལུང་འདྲེན་བྲིས་ན་པོ་ཏིར་ལོང་བ་ཙམ། །གཙོ་ཆེར་རྩ་རླུང་ཁོ་ན་ཡིན་ན་ཡང་། །རླུང་བཟུང་སྔགས་བཟླ་གང་འདོད་བྱ་གསུངས་ཕྱིར། །འདིར་ནི་བསྐྱེད་རིམ་སྔགས་བཟླ་གཙོ་བོར་བྱས། །འདི་ལ་ཡུན་རིང་འབད་ཅིང་རྟོགས་ཐོན་ན། །ཕྱི་ཡི་དཀྱིལ་འཁོར་སྒྲུབ་རྫས་སྦྱིན་སྲེག་སོགས། །ཅི་ཡང་མི་དགོས་མཆོག་ཐུན་དངོས་གྲུབ་རྣམས། །འདི་ཉིད་ཁོ་ནས་འགྲུབ་པར་པཀཱིས་གསུངས། །ཚེ་འདིར་མཆོག་ཐུན་དངོས་གྲུབ་ཀུན་ཐོབ་སྟེ། །འོད་གསལ་ཆེན་པོ་མངོན་ཏུ་གྱུར་ནས་ཀྱང་། །མཁའ་སྤྱོད་འགྲུབ་པར་རང་བྱུང་རྡོ་རྗེས་གསུངས། །བདག་ཀྱང་ཡུན་རིང་འདི་ལ་ཉམས་ལེན་བྱས། །རྗེས་འཇུག་རྣམས་ཀྱང་དེ་ལྟར་ཉམས་སུ་ལོངས། །མཐར་ཕྱིན་ཐབས་མཁས་གཉིས་ཀྱིས་བསྐུལ་བའི་ཕྱིར། །དྲིན་ཆེན་སྤྲུལ་སྐུའི་དགོངས་རྫོགས་ལ་དམིགས་ནས། །མེ་ལུག་ས་གའི་
བཅུ་གཅིག་སྔ་དྲོའི་ཐུན། །རཱ་ག་ཨ་སྱས་ཇི་ལྟར་གདམས་པ་ལྟར། །ཧོར་གྱི་བཙུན་པ་མཐར་ཕྱིན་ཞེས་བྱས་བྲིས། །འདི་ལ་འགལ་འཁྲུལ་ཉེས་པའི་ཆ་མཆིས་ན། །ཡི་དམ་ལྷ་དང་སྲུང་མའི་ཚོགས་ལ་བཤགས། །དགེ་བས་སྤྲུལ་སྐུའི་ཟག་མེད་ཐུགས་དགོངས་རྫོགས། །འབྲེལ་ཐོགས་འགྲོ་ཀུན་བདེ་ཆེན་ཞིང་བགྲོད་ཤོག །མངྒ་ལཾ་བྷ་བཅུ་ཤུ་བྷཾ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།། །།