རྒྱལ་བ་རྒྱ་མཚོའི་བསྐྱེད་རིམ་སྒྱུ་མ་ལྷ་སྐུ།
རྒྱལ་བ་རྒྱ་མཚོའི་བསྐྱེད་རིམ་སྒྱུ་མ་ལྷ་སྐུ་བཞུགས་སོ། །
ན་མོ་ལོ་ཀེ་ཤྭ་ར་ཡེ། ཐུགས་རྗེ་ཅན་ལ་ཕྱག་འཚལ་ནས། །དེ་ཉིད་རྒྱལ་བ་རྒྱ་མཚོ་ཡི། །བསྐྱེད་རིམ་སྒྱུ་མ་ལྷ་སྐུ་ཡི། །མན་ངག་ཅུང་ཟད་བཀོད་པ་ལ། །ལྷ་དང་ཌཱཀིས་བཀའ་གནང་སྩོལ། །དེ་ཡང་རྒྱུད་ཆེན་པོ་པདྨ་ཟབ་པ་ལས། སྤྱན་རས་གཟིགས་ཐམས་ཅད་ཐལ་མོ་སྦྱར་བའོ། །གཡས་ཕྲེང་བ་གཡོན་པདྨའོ། །ཞེས་དང་། པདྨ་རྒྱལ་པོའི་རྒྱུད་ལས། སྣང་བ་རང་བཞིན་མེད་པར་མཐོང་། །སྒྱུ་མ་ལྷ་རུ་བསྡུས་པ་ཡིན། །ཞེས་པའི་དོན་ནོ། །རྡོ་རྗེའི་གུར་ལས། སངས་རྒྱས་མཐོང་དང་རྣམ་བྲལ་བ། །མེ་ལོང་གཟུགས་བརྙན་ཇི་བཞིན་དུ། །དེ་ཡིས་
བདག་ཉིད་སྣང་བར་བྱས། །ཞེས་དང་། རིམ་ལྔ་ལས། མེ་ལོང་ནང་གི་གཟུགས་བརྙན་བཞིན། །སྒྱུ་མའི་ལུས་ནི་ཤེས་པར་བྱ། །ཁ་དོག་རྣམས་ནི་འཇའ་ལྟ་བུ། །ཁྱབ་པ་ཆུ་ཡི་ཟླ་བ་ཡི། །ཞེས་དང་། བདག་བྱིན་གྱིས་བརླབ་པ་ལས། ཡན་ལག་ཀུན་དང་ལྡན་པ་ཡི། །མེ་ལོང་ནང་གི་གཟུགས་བརྙན་ནི། །ཇི་ལྟར་གསལ་བར་བཞུགས་པ་གཟུགས་ནི་རབ་ཏུ་སྣང་། །དཔེ་བྱད་བཟང་པོ་བརྒྱད་ཅུའི་མཚན་རྣམས་རབ་ཏུ་རྫོགས། །ཞེས་དང་། བདག་བྱིན་གྱིས་བརླབ་པ་ནི། སྒྱུ་མའི་དཔེ་ནི་བཅུ་གཉིས་སོ། །རྒྱས་པར་བཅུ་གཉིས་མཚན་ཉིད་གཅིག །དེ་ལ་ཁྱད་
པར་གསལ་ངོས་གང་། །ལྷ་དང་དམིགས་པའི་རྒྱུ་མཚན་གང་། །སྒྱུ་མ་གསུམ་ནི་ཡན་ལག་བསྟན། །འབད་པ་དེ་ནི་བསྒྲག་པར་བྱ། །མེ་ལོང་གི་བརྙན་ཟླ་བརྙན་དང་། །དེ་ལས་གཞན་ཡང་དབང་པོའི་གཞུ། །གསུམ་པ་ཆུ་ཡི་ཟླ་བ་སྟེ། །དེ་དག་ལྟར་ནི་སྐུ་རྡོ་རྗེ། །མདོ་རྒྱུད་དག་ཏུ་གང་བསྟན་པ། །སངས་རྒྱས་ལྔ་ཡི་རིགས་ཆེན་པོ། །དེ་བཞིན་རིགས་ལྔ་ལས་བྱུང་བས། །ལྷ་དང་ལྷ་མོ་སོ་སོར་མཉེས། །ཕོ་ཉ་ཕོ་མོ་དེ་བཞིན་ཁྲོ། །བྲན་ཕོ་བྲན་མོ་ཅི་བགྱིས་དག །དེ་མེད་ཡང་ཡོད་མ་ཡིན་ནོ། །སེམས་ཅན་དོན་དུ་རབ་ཏུ་བསྟན། །འདི་དག་རྣལ་འབྱོར་པས་སྤྲོ་ཞིང་། །བདག་ཉིད་ཀྱིས་ནི་བསྡུ་བར་བྱ། །སྒྱུ་མ་ལྟ་བུའི་ཏིང་འཛིན་གནས། །དཀྱིལ་འཁོར་དག་ཀྱང་རྒྱས་པར་བྱ། །ཞེས་དང་། སྤྱོད་འཇུག་ལས་འཇའ་ཚོན་ལྟ་བུར་སྐུ་དག་ནི། །དེ་ཉིད་བསྒོམས་པས་མཐོང་བར་འགྱུར། །མཁའ་འགྲོ་རྒྱ་མཚོ་ལས། ལྷ་ཡི་རྣམ་པའི་རྣལ་འབྱོར་བདག །སྐད་ཅིག་མངོན་སུམ་བྱེད་པ་པོ། །ཞེས་གསུངས་ཤིང་། སྒྱུ་མ་ལམ་རིམ་ལས། བསྟན་དང་གཡོ་བ་ཇི་སྙེད་པ། །སྒོ་ལྔའི་ཡུལ་དུ་གང་སྣང་ཀུན། །ཐམས་ཅད་སྣང་སྟོང་ལྷ་ཡི་སྐུ། །ལྷ་སྐུ་མཐའ་བྲལ་སྒྱུ་མ་
སྟེ། །ཞེས་གསུངས་པའི་དོན་ནི། མེ་ལོང་གསལ་པོ་གཅིག་ལ་རྒྱལ་བ་རྒྱ་མཚོའི་རས་བྲིས་བཀོད་པ་ལེགས་པོ་འཆར་བཅུག་ལ། དེ་ལ་དཔེ་བྱས་རང་ལུས་ལྷ་ཡི་སྐུ་དེ་ལྟར་བསྒོམ། ཕྱི་རོལ་གྱི་རི་རབ་ཁང་ཁྱིམ་རྣམས་གཞལ་མེད་ཁང་སེམས་ཅན་ཐམས་ཅད་རྒྱལ་བ་རྒྱ་མཚོའི་སྐུར་བསྒོམ། འབྱུང་བཞིའི་སྒྲ་དང་སྐྱེ་འགྲོའི་སྐད་ཐམས་ཅད་བྲག་ཆ་ལྟ་བུ་ཡི་གེ་བཅུའམ་དྲུག་པ་བསྒོམ། ཡིད་ཀྱི་བདེ་སྡུག་ཐམས་ཅད་རོ་སྙོམས་ནས་རང་གྲོལ་བློ་འདས་སུ་བཞག་གོ །དེ་ལྟར་ཉམས་སུ་བླངས་པ་ལ་ས་ལམ་གྱི་ཡོན་ཏན་ཐམས་ཅད་རིམ་པར་འཆར་ཏེ། སྒྱུ་མ་ལམ་རིམ་ལས། བྱང་ཆུབ་ཕྱོགས་ཆོས་ཐམས་ཅད་དང་། །ལྷ་སྐུ་སྒྱུ་མ་དབྱེར་མེད་པས། །མཁས་པས་ཉམས་སུ་བླང་བར་བྱ། །ཞེས་དང་། དེ་ཉིད་བྱང་ཆུབ་ཕྱོགས་ཆོས་དང་སྦྱར་བའི་བཤད་པ་རྒྱ་ཆེར་གསུངས་པ་དང་། རྒྱུད་ལས། ཚུལ་ཁྲིམས་ཐམས་ཅད་དམ་ཚིག་སྟེ། །ལམ་ལྔ་སྨིན་པའི་དབང་ལ་ཚང་། །ས་བཅུ་ལྷ་ཡི་སྐུ་བྷཻཾ་པས། །ཞེས་ས་བཅུ་དང་སྦྱར་བའི་བཤད་པ་རྒྱ་ཆེར་གསུངས་པ་ཡིན་ནོ། །དེས་སྒྱུ་མ་ལྷ་སྐུ་སོང་ནས། པདྨ་རྒྱལ་པོའི་རྒྱུད་ལས། སྣང་ལ་རང་བཞིན་མེད་པར་མཐོང་། །སྒྱུ་མ་ལྟ་བུར་
བསྡུས་པ་ཡིན། །ཞེས་པས་བསྐྱེད་རིམ་ལྷའི་སྣང་བ་ཉིད་བསྡུས་ནས། ཐུན་མཚམས་སྒྱུ་མའི་སྐྱེས་བུ་བྱ་སྟེ། ཡབ་སྲས་མཇལ་བའི་མདོ་ལས། སྒྱུ་མ་མཁན་པོའི་སྐུ་སྤྲུལ་ནས། །སྒྱུ་མ་ལེགས་པར་འཚལ་བ་ན། །དེ་ལ་རྨོངས་པར་འགྱུར་མ་ལགས། །ཁྱེད་ཀྱིས་འགྲོ་ཀུན་དེ་ཉིད་གཟིགས། །ཐམས་ཅད་མཁྱེན་ལ་ཕྱག་འཚལ་ལོ། །ཞེས་དང་། རྡོ་རྗེ་མཁའ་འགྲོ་ལས། ཁམས་གསུམ་པ་ནི་མ་ལུས་པའི། །འགྲོ་ཀུན་སྒྱུ་མ་ལྟ་བུ་ཡིན། །ཞེས་དང་། མེ་ལོང་ནང་གི་གཟུགས་བརྙན་དང་། །རྨི་ལམ་སྒྱུ་མའི་དྲི་ཟའི་གྲོང་། །མིག་འཕྲུལ་མཚུངས་པར་གང་གིས་མཐོང་། །རྡོ་རྗེ་ཐེག་པ་འདི་ལས་ནི། །དེ་ནི་གཙོ་བོ་ཡིན་པར་བརྗོད། །ཅེས་དང་། སཾ་བྷུ་ཏྲི་ལས། དྲི་ཟའི་གྲོང་ཁྱེར་ལྟ་བུ་དང་། །སྒྱུ་མ་སྨིག་རྒྱུ་ལྟ་བུ་དང་། །འཕྲོག་མ་ཟླ་བའི་གྲངས་མཚུངས་པ། །རྨི་ལམ་བརྩེ་བ་ལྟ་བུར་བལྟ། །རིམ་ལྔ་ལས། དཀྱིལ་འཁོར་ལ་སོགས་རྣལ་ལྡོག་དང་། །སྦྱིན་སྲེག་གཏོར་མ་ལ་སོགས་ཀུན། །རྟག་ཏུ་སྒྱུ་མ་བཞིན་དུ་བྱ། །ཞི་བ་དང་ནི་རྒྱས་པ་དང་། །དེ་བཞིན་དབང་དང་མངོན་སྤྱོད་དང་། །དགུང་སོགས་གང་ཅི་ཡང་རུང་ཀུན། །དོང་པོ་གཞུང་དང་མཚུངས་པར་བྱ། །
རྟག་ཏུ་སྒྱུ་མ་བཞིན་དུ་བྱ། །ཞེས་སོགས་དང་། རྡོ་རྗེ་ཐེག་པ་འདི་ཉིད་དུ། །འདི་ནི་མང་དུ་བཤད་མི་དགོས། །རྣལ་འབྱོར་པ་ནི་གང་ཡང་དམིགས། །དེ་ནི་སྒྱུ་མ་བཞིན་དུ་རྟོགས། །ཞེས་དང་། བྱང་ཆུབ་སེམས་དཔའ་འདྲེས་པས། མ་རིག་ནས་བཙལ་རྒ་ཤིའི་བར། །མཐར་ཡང་ཡན་ལག་བཅུ་གཉིས་བགྱི། །བསྟན་གནས་འབྱུང་བར་བྱ་བ་ཡིན། །ཁོ་བོ་རྨི་ལམ་སྒྱུ་འདྲར་བརྗོད། །ཅེས་གསུངས་པའི་དོན། སྤྱི་བོར་བླ་མ་སྒྱུ་ལུས་ཀྱི་རང་བཞིན་ཅན་ལ་མཆོད་དོ་གསོལ་བ་བཏབ་ནས་རང་ལ་བསྟིམ། ཐུན་མཚམས་སུ་ཆོས་ཐམས་ཅད་མེད་བཞིན་དུ་སྣང་བ་རྨི་ལམ་དང་སྒྱུ་མའི་སྤྲུལ་པ། འཚོགས་པ་ལས་བྱུང་བ་པེ་ཝཾ། རེ་རེ་བཞིན་མི་རྟག་པ་རྩྭ་རྩེའི་ཟིལ་པ། སྐད་ཅིག་ལ་སྐྱེ་ཞིང་འཇིགས་པ་ཆུའི་ལྦུ་བ། མེད་བཞིན་དུ་སྣང་བ་མེ་ལོང་ནང་གི་གཟུགས་བརྙན། འཁྲུལ་པའི་བློ་ལས་བདེན་པར་ཞེན་པ་རྨི་ལམ། འབྲེལ་པ་མེད་པ་ཆུ་ཟླ་ལྟར་བྷཻཾ། མདོར་ན་ཆོས་ཐམས་ཅད་རྒྱུ་རྐྱེན་ལས་བྱུང་བ་སྒྱུ་མ། གཡོ་བ་དང་བཅས་པ་སྨིག་རྒྱུ། གནས་དང་ལོངས་སྤྱོད་མེད་བཞིན་སྣང་བ་དྲི་ཟའི་གྲོང་ཁྱེར། སྣང་ལ་རང་བཞིན་མེད་པ་འཇའ་ཚོན། གསལ་ལ་རྫོགས་པ་མེ་
ལོང་གི་གཟུགས་བརྙན། ཀུན་ལ་ཁྱབ་པ་ཆུ་ཟླ། རང་ཡིན་ཡང་གཞན་དུ་སྣང་བ་བྲག་ཆ། སེམས་དང་བཅས་པའི་རྨི་ལམ། མི་རྟག་འགྱུར་བས་གློག །མེད་བཞིན་སྣང་བས་མིག་ཡོར། གཅིག་ཀྱང་དུ་མར་འབྱུང་བ་སྤྲིན། གཟུགས་སྣ་ཚོགས་སུ་སྤྲུལ་པ་སྟེ། སྒྱུ་མའི་དཔེ་བཅུ་གཉིས་པོ་ལྟར་ཆོས་ཐམས་ཅད་བདེན་མེད་སྒྱུ་མ་ལྟ་བུར་ཡིན་སྙམ་དུ་བྷཻཾ་ཞིང་། སྒྱུ་མའི་སྐྱེས་བུས་སྒྱུ་མར་སྤྱོད་པ་ལྟར། ཐུན་མཚམས་སུ་ཆོས་སྤྱོད་སོགས། ཐམས་ཅད་རང་ཉིད་ཐུགས་རྗེ་ཆེན་པོ་ཕྱག་གཉིས་པའི་ང་རྒྱལ་བྱ་ཞིང་། མི་དགེ་བ་མཐའ་དག་ཀྱང་སྤང་། རྒྱུད་ལས། རང་ཉིད་ལྷ་རུ་ངོ་ཤེས་ནུས། །ཐ་མལ་སྤྱོད་པ་དྲན་ཀྱང་སྤང་། སྒྱུ་མའི་ལམ་རིམ་ལས། སྡིག་པ་ཆུང་ཡང་སྤང་བྱེད་ཅིང་། །དགེ་བ་རྣམས་ནི་དང་དུ་ལེན། །ཆོས་ཉིད་སྒྱུ་མ་ཐོག་དོན་དུ། །ཚོགས་སོགས་པས་ནི་ཚོགས་ལམ་མོ། །ཞེས་གསུངས་སོ། །དེ་ལྟར་སྒྱུ་མ་ལྷ་སྐུ་དག་པའི་སྒྱུ་ལུས་བྷཻཾ་པ་དང་། ཐུན་མཚམས་སྒྱུ་མ་ལྟ་བུའི་སྤྱོད་པ་བྱས་པའི་ཡོན་ཏན་ནི། བདག་བྱིན་གྱིས་བརླབས་པའི་རིམ་པ་ལས། མྱ་ངན་འཇིགས་བྲལ་ཆགས་བྲལ་དང་། །འཇིགས་དང་དེ་བཞིན་ཉམས་པ་དང་། །སྡུག་བསྔལ་ཡིད་མི་བདེ་བ་དང་། །
ངེས་པ་མཐོང་དང་དེ་བཞིན་ཐོས། །སྲི་ངན་དང་ནི་ནོར་ངན་དང་། །ངན་རིགས་པ་ནི་གང་བྱུང་བ།། །ངེས་པའི་རང་བཞིན་དེ་དང་དེར། །བདག་བྱིན་བརླབས་པས་སྦྱང་བར་བྱ། །གཤང་བ་ལྕི་བ་འབྱུང་བ་དང་། །རིམས་དང་ནད་ལ་སོགས་པ་དང་། །རང་བཞིན་རྒས་པ་ལ་སོགས་པ། །ཐམས་ཅད་སྒྱུ་མས་གསོ་བར་བྱ། །ཞེས་དང་། སྒྱུ་མ་ལྟ་བུའི་ཏིང་འཛིན་ནི། །རྟག་ཏུ་རྣལ་འབྱོར་པས་མྱོང་བྱ། །རྣལ་འབྱོར་རྒྱུད་དུ་བརྟེན་པ་ཡི། །བརྡ་ལ་སོགས་པ་རྒྱས་པ་གང་། །སྒྱུ་མ་ཉིད་དུ་དམིགས་བྱས་ནས། །དེ་དག་ལ་ནི་འཇུག་པར་བྱ། །མི་འཇུག་པ་དང་འབྱེད་པ་དང་། །རྒོད་དང་སྨྲ་དང་དེ་བཞིན་དུ། །འགྲོ་དང་འདུག་དང་ཉལ་དང་ཟ། །སྒྱུ་མའི་ལས་ནི་དྲན་པར་བྱ། །ཞེས་དང་། བསམ་གཏན་ཆོ་ག་དཔག་མེད་ཀྱི། །སྔགས་དང་སྐུ་ཡི་ཏིང་ངེ་འཛིན། །གལ་ཏེ་སྒྱུ་མ་མ་རྙེད་ན། །བྱས་པ་ཐམས་ཅད་འབྲས་བུ་བྲལ། །ཞེས་དང་། རིམ་ལྔ་ལས། སྒྱུ་མ་ལྟ་བུའི་ཏིང་འཛིན་གནས། །ཐམས་ཅད་དེ་དང་འདྲ་བར་མཐོང་། །ཞེས་དང་། ཉོན་མོངས་ལས་ནི་ལམ་གྱི་ལུས། །བྱེད་པ་པོ་དང་འབྲས་བུ་ནི། །སྨིག་རྒྱུ་རྨི་ལམ་ལྟ་བུ་དང་། །དྲི་ཟའི་
གྲོང་ཁྱེར་ངེས་པར་མཚུངས། །ཏིང་འཛིན་འདི་ནི་མི་ཤེས་པས། །ཀུན་རྫོབ་ལ་ནི་ཉེར་དམིགས་ནས། །རྣམ་པ་སྣ་ཚོགས་ནད་རྣམས་སྐྱེ། །དེ་རྣམས་རྒྱུ་མིན་སྨན་གྱི་ཚོགས། །ཞེས་དང་། སྡོམ་འབྱུང་ལས། སྒྱུ་མ་ལྟ་བུའི་ཏིང་འཛིན་ནི། །རབ་ཏུ་མི་ཤེས་མི་རྣམས་ནི། །ཐོགས་མེད་དུག་ཅན་ཉོན་མོངས་ཀྱི། །བག་ཆགས་རབ་ཏུ་བསགས་བྱས་ལ། །དེ་དག་སྔོན་བསགས་ལས་ཀྱིས་ནི། །རྐྱེན་དང་འཆི་བ་ཡང་དག་འབྱུང་། །ཞེས་དང་། བྱང་ཆུབ་སེམས་འགྲེལ་ལས། དེ་ཕྱིར་ཆོས་རྣམས་ཀུན་གྱི་གཞི། །ཞི་ཞིང་སྒྱུ་མ་དང་མཚུངས་པ། །གཞི་མེད་སྡིག་པས་འཇིགས་བྱེད་པའི། །སྟོང་པ་ཉིད་ནི་རབ་ཏུ་བྷཻཾ། །ཞེས་དང་། མཁའ་འགྲོ་རྒྱ་མཚོའི་རྒྱུད་ལས། ལྷ་ཡི་རྣམ་པའི་རྣལ་འབྱོར་བདག །སྐད་ཅིག་མངོན་སུམ་བྱེད་པ་པོ། །ལུང་མ་ལ་སོགས་རྣལ་འབྱོར་གྱི། །རྣལ་འབྱོར་བྱས་པའི་དབྱིབས་སུ་འགྱུར། །སྟོང་ཉིད་རྣལ་འབྱོར་རང་ཉིད་གཟུགས། །བདག་བྱིན་བརླབས་པའི་མཚན་ཉིད་དོ། །བདག་བྱིན་བརླབས་འབྲས་རྣལ་འབྱོར་པས། །སྣུམ་སྐོག་དུམ་བུ་བཞིན་ཤེས་བྱ། །འདི་འདྲའི་མཚན་ཉིད་བཀོད་གྱུར་པ། །སྐྱེ་བོ་ཕྱུགས་རྣམས་ཀྱིས་མི་ཤེས། །དེ་ཕྱིར་སྒྱུ་
འཕྲུལ་འདི་བསྒོམས་ན། །བླ་ན་མེད་པའི་གོ་འཕང་ཐོབ། །རིམ་ལྔ་ལས། ལུས་དང་ལོངས་སྤྱོད་གནད་དག་དང་། །ས་དང་ཕ་རོལ་ཕྱིན་ལ་སོགས། །སངས་རྒྱས་སྒྱུ་འཕྲུལ་ཆོ་འཕྲུལ་སོགས། །ཐམས་ཅད་སྒྱུ་མའི་རྣམ་འཕྲུལ་ལོ། །སྒྱུ་མ་ལྟ་བུའི་ཏིང་འཛིན་གནས། །ཡང་དག་མཐའ་ནི་རྣམ་པར་སྦྱངས། །ཞེས་དང་། སྒྱུ་མ་ལམ་རིམ་ལས། ཆོས་རྣམས་སྒྱུ་མ་ལྟ་བུ་ལ། །དད་བརྩོན་གུས་པས་མཆོག་ལྡན་པས། །སྒྱུ་མ་ལྟ་བུར་བྷཻཾ་བྱས་ནས། །སྒྱུ་མ་ལྟ་བུ་མངོན་སངས་རྒྱས། །ཞེས་གསུངས་ཤིང་། སྒྱུ་མ་ལྟ་བུའི་ཏིང་ངེ་འཛིན་སྒོམ་པ་ལ་བརྟེན་ནས། གནས་སྐབས་སུ་འཇིག་རྟེན་པའི་ཆོས་བརྒྱད་པོ་རོ་སྙོམས་པ་དང་། གྲུབ་པ་ཆེན་པོ་བརྒྱད་དང་། བསད་ཕྱིར་གསོ་བ་དང་ལུས་མི་སྣང་བར་སྦ་བ་སོགས་འཕྲལ་གྱི་ཡོན་ཏན་དང་མཐར་ཐུག་འབྲས་བུ་ནི་རྫོགས་པའི་སངས་རྒྱས་ཉིད་ཐོབ་པར་གསུངས་སོ། །འདི་ལྟར། བཅོམ་ལྡན་རྒྱལ་བ་རྒྱ་མཚོ་ཡི། །བསྐྱེད་རིམ་ལྷ་སྐུ་སྒྱུ་མ་དང་། །ཐུན་མཚམས་སྒྱུ་མའི་སྐྱེས་བུ་བྱ་བའི་ཚུལ། །རྒྱུད་ཀྱི་རྡོ་རྗེའི་ཚིག་རྐང་གཞིར་བྱས་ཏེ། །ངེས་ཤེས་བསྐྱེད་ཕྱིར་མདོ་རྒྱུད་ལུང་དང་བཅས། །མན་ངག་བརྒྱུད་པས་གདམས་
པས་ལེགས་བརྒྱན་ཏེ། །ལེགས་པར་སྦྱར་བ་འདི་ལ་ཉེས་མཆིས་ན། །རྒྱལ་བ་རྒྱ་མཚོ་ལྷ་དང་ཌཱཀིར་བཤགས། །དགེ་བས་འགྲོ་ཀུན་ཏིང་འཛིན་མཆོག་ཐོབ་ནས། །མྱུར་དུ་འཇའ་ལུས་རྡོ་རྗེའི་སྐུ་འགྲུབ་ཤོག །དེ་སྐད་སྨྲས་གང་ཐུགས་རྗེ་ཆེན་པོ་ཡི། །རྣལ་འབྱོར་ཚེ་གཅིག་བརྩོན་ལྡན་དགེ་སློང་ནི། །རཱ་ག་ཨ་སྱ་ཞེས་བྱས་སྦྱར་བའོ། །བཀྲ་ཤིས་དཔལ་འབར་ཆོས་འདི་དར་རྒྱས་ཤོག། །།སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།