བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྷ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་ནང་སྒྲུབ་གསང་སྒྲུབ་ཡང་གསང་སྒྲུབ་པའི་སྟ་གོན་གྱི་ཟིན་བྲིས།
བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྷ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་ནང་སྒྲུབ་གསང་སྒྲུབ་ཡང་གསང་སྒྲུབ་པའི་སྟ་གོན་གྱི་ཟིན་བྲིས་སོ།།
ན་མོ་ལོ་ཀེ་ཤྭ་ར་དྷེ་ཝ་པཉྩ་ཡེ། རྒྱ་མཚོ་ལྔ་ཡི་ལྷ་ལ་ཕྱག་འཚལ་ལོ། །བཀའ་གནང་བྱིན་གྱིས་བརླབ་པར་མཛད་དུ་གསོལ། །རྒྱལ་བ་རྒྱ་མཚོ་ལྷ་ལྔའི་ནང་སྒྲུབ་དང་། །གསང་སྒྲུབ་ཡང་གསང་སྒྲུབ་པའི་སྟ་གོན་ནི། །བྱིན་རླབས་ལྡན་པའི་གནས་རི་ཡིན་ན་རབ། །གངས་རི་བྲག་རི་ས་གཙང་གནས་རི་འབྲིང་། །ཐ་མ་དབེན་ཞིང་མཐུན་རྐྱེན་འཛོམ་ས་རུ། །དཀྱིལ་འཁོར་རྒྱས་འབྲིང་བསྡུས་དང་རྣམ་པ་གསུམ། །རྒྱས་པར་ས་བསླང་སྟེགས་བུ་བརྩེགས་པའམ། །ཡང་ན་ཐིག་ཚོན་རྡུལ་ཚོན་བཀོད་པ་སྟེ། །ཐིག་རྩ་དང་བཅས་གཞུང་དུ་གསལ་ལྟར་ལས། །ལྟེ་བར་ཆོས་
འབྱུང་བསྣོལ་མ་ཕྱི་དཀར་ལ། །ནང་དམར་ཉི་སྟེང་ཧཱུྃཡིག་དམར་པོ་བྲི། །ཆོས་འབྱུང་ཟུར་དྲུག་དགའ་འཁྱིལ་གཡོན་སྐོར་རེ། །མཚམས་དྲུག་གཡུང་དྲུང་དཀར་པོ་གཡོན་སྐོར་རེ། །ཆོས་འབྱུང་རྒྱབ་དེར་སྣ་ཚོགས་པདྨ་ནི། །ལྟེ་བ་དམར་པོ་མུ་ཁྱུད་སེར་པོ་ལ། །འདབ་བཞིར་ཤར་སྔོ་ལྷོ་སེར་ནུབ་དམར་བ། །བྱང་ལྗང་མཚམས་དང་མུ་ཁྱུད་མཛེས་ཚོན་ནོ། །དེ་རྒྱབ་རྒྱས་པར་གྲུ་བཞི་སྒོ་བཞི་སྟེ། །བསྡུ་ན་རྡོ་རྗེའི་རྭ་བ་སེར་པོ་དང་། །མེ་རི་སྣ་ཚོགས་མདོག་ཅན་གཡས་སྐོར་བྲི། །འབྲིང་དུ་ས་བསླང་སྟེགས་བུ་བརྩེགས་མི་དགོས། །མཆོད་སྟེགས་སྟེང་དུ་རས་བྲིས་དཀྱིལ་
འཁོར་བཏིང་། །མ་འཛོམ་ཤོག་བྲིས་ཆུ་ཚོན་བྱས་པའང་རུང་། །བསྡུས་པར་འབྲུ་ལ་ཚོན་གྱིས་ཁ་དོག་བསྒྱུར། །ཆོས་འབྱུང་ཟུར་དྲུག་དབུས་སུ་ཚོམ་བུ་དམར། །ཟུར་དྲུག་ནང་དུ་ཚོམ་བུ་དཀར་པོ་རེ། །ཕྱོགས་བཞི་ཕྱོགས་མདོག་ཚོམ་བུ་རེ་དང་ནི། །མཚམས་བཞི་ནས་ཀྱིས་རང་མདོག་ཚོམ་བུ་བཞི། །དེ་རྒྱབ་མུ་ཁྱུད་དམར་པོ་ཟླུམ་པོར་སྐོར། །དེ་ནས་འབྲུ་ཡིས་རང་མདོག་ཟླུམ་པོར་སྐོར། །དེ་ནི་མེ་རི་རྡོ་རྭའི་མཚོན་བྱེད་ཡིན། །དེ་ནས་གཞུང་ནས་བཤད་པའི་སྒྲུབ་རྗེ་ས་ནི། །སྦ་ལྕག་རི་ལུ་འཁོར་ལོ་བ་མཁལ་སོགས། །དབང་སྡུད་ལས་སྦྱོར་སྒྲུབ་པའི་རྫས་ཡིན་ཕྱིར། །མཆོག་བསྒྲུབ་འདི་ལ་དེ་རྣམས་མི་དགོས་པས། །གཏེར་སྟོན་གར་གྱི་དབང་ཕྱུག་ཐུགས་དམ་རྒྱུད། །དཀོན་མཆོག་འབངས་ཀྱིས་མཛད་པའི་སྒྲུབ་ཐབས་ལས། །སྒྲུབ་རྫས་དེ་རྣམས་གང་ཡང་མ་གསུངས་སོ། །དཀྱིལ་འཁོར་དབུས་སུ་མཉྫི་ཡོད་ན་བཞག །དེ་སྟེང་བུམ་པ་ཆུ་ཆང་བསྲེས་པའི་ནང་། །བུམ་སྨན་དང་ནི་བདུད་རྩི་རིལ་བུ་བཏབ། །ཁ་རྒྱན་མགུལ་ཆིངས་ལ་སོགས་སྤྱི་ལྟར་བཤམས། །དེ་སྟེང་ཁྲིའུའམ་མཎྜིརྐང་རིང་སྟེང་། །ཐོད་པ་མར་གྱིས་བྱུག་ནང་ཆང་གིས་བཀང་། །བདུད་རྩི་རིལ་བུ་བཏབ་
ལོ་དར་དམར་བཀབ། །དར་དམར་བཀབ་སྟེང་མེ་ལོང་སིནྡྲ་བྱུག །དབུས་སུ་ཧྲིམཐར་ཡིག་བཅུ་དྷ་མའི་སྔགས། །དེ་རྒྱབ་ཟུར་དྲུག་ཟུར་ལ་དགའ་འཁྱིལ་རེ། །དེ་རྒྱབ་ཟླུམ་སྐོར་ཕྱི་ལ་འདབ་མ་བཞི། །ཤར་དུ་ཧ་ར་ལྷོ་རུ་རི་ཙ་དང་། །ནུབ་ཏུ་ནི་ཧྲུབྱང་དུ་ས་ཡ་སྟེ། །ཡིག་མགོ་ཐམས་ཅད་ཕྱིར་བསྟན་བྲིས་ལ་བཞག །མེ་ལོང་ཆུང་ན་ཤོག་བུར་ཟླུམ་པོར་བྲིས། །དེ་ཡི་སྟེང་དུ་མེ་ལོང་སིན་བཞག །དར་རས་དམར་པོས་གུར་གྱི་ཚུལ་དུ་བཀབ། །འདི་ནི་རྙིང་མའི་ལུགས་ཉིད་གཙོ་ཆེ་ཕྱིར། །བུམ་པའི་གཡས་གཡོན་སྨན་དང་རཀྟ་དང་། །བུམ་པའི་སྟེང་ངམ་མདུན་གྱི་གང་འཐད་དུ། །སྒྲུབ་གཏོར་རིན་ཆེན་འབར་བ་ལྔ་ཚོམ་གཅིག །ཐོད་པ་རིན་ཆེན་སྣོད་དམ་སྡེར་གྱི་ནང་། །དབང་གཏོར་ཇི་བཞིན་ལེགས་ཤིང་རྒྱན་ལྡན་བཤམས། །དཀྱིལ་འཁོར་ནུབ་ནས་ཚུར་ལ་ཁ་གྱུ་བར། །ལྷ་ལྔའི་གཏོར་མ་ཤ་མར་རྒྱན་ལྡན་ལྔ། །ནོར་ལྷ་ཕྱི་རྒྱུད་གཉིས་དང་བདུན་ཚར་བཤམས། །དཀྱིལ་འཁོར་མཐའ་བསྐོར་གཙོ་བོའི་མཆོད་པ་ནི། །ཤར་ནས་གཡས་སྐོར་ཕྱོགས་མཚམས་བརྒྱད་དུ་བཤམས། །དེ་རྒྱབ་ཕྱོགས་བཞིར་འཁོར་བཞིའི་མཆོད་པ་ནི། །ཆ་བཞི་བཤམས་ཏེ་མེད་ཀྱང་
འགལ་བ་མེད། །ནང་གི་ཕྱོགས་བཞིར་ཤར་དུ་རྡོ་རྗེ་དང་། །ལྷོ་རུ་དབུ་རྒྱུན་ནམ་ནི་བགྲང་ཕྲེང་སྟེ། །ནུབ་ཏུ་གླེགས་བམ་མམ་ནི་སྒྲུབ་ཡིག་དཔེ། །བྱང་དུ་དྲིལ་བུའམ་ནི་མར་མེ་བཤམས། །གཙོ་བོའི་ཙཀ་ལི་ཡོད་ན་སྒྲུབ་གཏོར་བཙུགས། །རིགས་ལྔའི་ཕྱག་མཚན་ཙཀ་ལི་ཡོད་ནའང་། །རིགས་ལྔ་རང་རང་གནས་སུ་བཀོད་པར་བྱ། །ཕུག་གཏོར་ལོགས་སུ་མེད་ན་རང་ཉིད་ཀྱིས། །ཆག་མེད་འདོན་པར་དགོས་པའི་ཆོས་སྐྱོང་དང་། །བཀའ་སྲུང་ནོར་ལྷ་རྣམས་ཀྱི་གཏོར་མ་ཡང་། །དཀྱིལ་འཁོར་ཕྱི་ཡི་བར་ཁྱམས་གང་བདེར་བཤམས། །ཚོན་སྐུད་བླ་བྲེ་སྒྲུབ་སྐོར་རྒྱལ་མཚན་སོགས། །རྙིང་མ་ཡིན་ཕྱིར་ཡོད་ན་ལེགས་མོད་ཀྱི། །མེད་ཀྱང་གཞུང་ནས་མ་གསུངས་ཕྱིར་མི་དགོས། །མཆོད་པ་རྣམས་ནི་ཁ་གསོ་ཙམ་མ་གཏོགས། །སྒྲུབ་རྫས་ཡིན་ཕྱིར་བརྗེ་བ་མི་དགོས་སོ། །ཕུག་གཏོར་གཞན་ཡོད་གསོ་བྲན་མི་དགོས་ན། །ཁྲ་བྱིལ་གནོད་དོགས་ཡོལ་བས་དཀྲིས་ཀྱང་རུང་། །དཀྱིལ་འཁོར་མདུན་དུ་མཆོད་སྟེགས་གཅིག་གི་སྟེང་། །རྒྱུན་དུ་བརྗེ་རྒྱུའི་མཆོད་པ་སྣ་བདུན་དང་། །ལག་མཆོད་བདུད་རྩི་ཚོགས་འཁོར་ཆོས་རྣམས་བཤམས། །ཞག་བདུན་བསྒྲུབ་ན་ཐུན་བཞིར་བརྗེ་རྒྱུ་
ནི། །ལྷ་བཤོས་སུམ་ཅུ་སྔོན་འགྲོ་གཏོར་མ་བརྒྱད། །ཚོགས་བརྒྱད་དེ་ཡི་ཚོགས་ཤ་ཚོགས་ཆང་དང་། །མཐེབ་སྐྱུ་མང་པོ་སྤོས་རིང་འབུལ་རྒྱུ་སོགས། །ཅི་འབྱོར་མཆོད་གཏོར་མར་མེ་ལ་སོགས་གཟབ། །རོལ་མོ་གྱེར་དབྱངས་རྣམས་ཀྱང་གང་ཤེས་གཟབ། །སྒྲུབ་པ་འདི་གསུམ་སྤྲོས་བཅས་གཙོ་བོ་ཡིན། །སྒྲུབ་ཡུན་ཐུང་བ་ཞག་བདུན་རྫོགས་པ་སྟེ༔ །ཟླ་སྒྲུབ་ལོ་སྒྲུབ་ལ་སོགས་སྐབས་དང་བསྟུན། །སྒྲུབ་གྲོགས་མང་པོ་ཡོད་ན་སྔགས་རྒྱུན་བྱ། །དེ་ལ་ཚོམ་བུ་འབུམ་བསྒྲུབ་མིང་དུ་བཏགས། །གཅིག་གིས་བསྒྲུབ་ན་ཐུན་བཞིར་སྤྱི་ཅི་ནུས་འབད། །ཐུན་མཚམས་དགེ་སྦྱོར་ཆག་མེད་གང་དགོས་བྱ། །དེ་ནི་དཔའ་བོ་གཅིག་སྒྲུབ་ཅེས་བྱའོ། །ལར་ནི་སྤྲོས་བཅས་སྒྲུབ་པ་མང་པོ་འདི། །དར་དྲག་ཡུན་ཐུང་བསྒྲུབས་ན་ལམ་དུ་འགྲོ། །དེ་ལྟར་ལྷ་ལྔ་སྒྲུབ་པའི་སྟ་གོན་འདི། །སྒྲུབ་པ་ལག་ལེན་བདེ་བར་བྱ་བའི་ཕྱིར། །མཐར་ཕྱིན་ཐབས་མཁས་གཉིས་ཀྱིས་རིང་ནས་བསྐུལ། དྲིན་ཆེན་གཏེར་སྟོན་བླ་མའི་དགོངས་རྫོགས་ཕྱིར། །ལུག་ལོ་ས་ག་ཟླ་བའི་བཅུ་གཉིས་ཀྱི། །ཉིན་གུང་ཐུན་ལ་རཱ་ག་ཨ་སྱས་གདམས། །ཡི་གེ་པ་ནི་སློབ་བུ་མཐར་ཕྱིན་ནོ། །འདི་བྲིས་ཉེས་འགལ་ལྷ་
ལྔའི་ལྷ་ལ་བཤགས། །དགེ་བས་སྤྲུལ་སྐུའི་ཟག་མེད་ཐུགས་དགོངས་རྫོགས། །འགྲོ་ཀུན་བདེ་ཆེན་ཞིང་དུ་སྐྱེ་ཕྱིར་བསྔོ།། །།མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།