བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་ནང་སྒྲུབ་ཀྱི་ཟིན་བྲིས།
བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་ནང་སྒྲུབ་ཀྱི་ཟིན་བྲིས་བཞུགས་པའི་དབུའོ།།
ན་མོ་གུ་རུ་ལོ་ཀེ་ཤྭ་ར་དྷེ་ཝ་པཉྩ་ཡེ། རྒྱ་མཚོ་ལྔ་ཡི་ལྷ་ལ་ཕྱག་འཚལ་ལོ། །བཀའ་ཡི་གནང་བ་སྩོལ་ལ་བྱིན་གྱིས་རློབས། །ནང་སྒྲུབ་རྡོ་རྗེ་སྙིང་པོའི་རྒྱ་གཞུང་དོན། །མཁའ་སྤྱོད་དབང་པོའི་ཞལ་གདམས་ཅི་བཞིན་དུ། །དེ་བཞིན་གཤེགས་པའི་ཟིན་བྲིས་རྒྱས་པ་ལས། །ཚིག་ཉུང་དོན་འཐུས་ཉམས་སུ་བླངས་བདེ་ནི། །སྟ་གོན་ཚར་ནས་ལྷ་ལྔའི་བདག་བསྐྱེད་ནི། །དམ་ཅན་རྒྱ་མཚོའི་དཀྱིལ་འཁོར་རོ་ཡི་བར། །གཞུང་ལྟར་འདོན་ཅིང་མཚམས་དེར་ངལ་བསོས་ལ། །ལུས་ལ་ལྷ་བཀོད་འདི་དག་ཡིད་ཀྱིས་བསྒོམ། །བདག་ཉིད་རྒྱལ་བ་རྒྱ་མཚོའི་སྐུ་ཡི་ནང་། །སྟོང་རའི་
རྣམ་པ་འོད་ཀྱི་རང་བཞིན་ཅན། །ཐུགས་ཀར་པད་ཉི་ཟླ་སྟེང་རྟ་མགྲིན་ནི། །དམར་ནག་དུར་ཁྲོད་ཆས་བརྒྱད་སྐུ་ལ་བརྒྱན། །ཕྱག་གཡས་དབང་སྡུད་ཕྱག་རྒྱ་དང་བཅས་ཏེ། །པདྨ་རཱ་གའི་ཕྲེང་བ་ཕྱག་སྟབས་འདྲེན། །ཞགས་པ་དམར་པོ་ཨུཏྤལ་ལས་མཚན་པ། །ཕྱག་གཡོན་སྡིགས་མཛུབ་དང་བཅས་དཀུ་ལ་བརྟེན། །དར་དང་རིན་ཆེན་གྱིས་བརྒྱན་རྟ་དབུ་འཚེར། །གཡས་བརྐྱང་གཡོན་བསྐུམ་མེ་དཔུང་ཀློང་ན་བཞུགས། །ལྟེ་བར་པདྨ་དམར་པོའི་ཟེའུ་འབྲུར། །གསེར་གྱི་རྡོ་རྗེ་རྒྱ་གྲམ་གདན་ཐབས་སྟེང་། །ཆོས་འབྱུང་ཟུར་དྲུག་དགའ་འཁྱིལ་བཅས་པའི་དབུས། །པད་
ཉི་རོ་སྟེང་གསང་བ་ཡེ་ཤེས་ནི། །སྐུ་མདོག་རབ་དམར་ཞལ་གཅིག་ཕྱག་བཞི་ན། །དང་པོའི་ཕྱག་གཉིས་གྲི་ཐོད་ཐུགས་ཀར་བརྩེགས། །འོག་གཉིས་རལ་གྲི་ཁ་ཊ་བསྒྲེང་སྟེ་འཛིན། །དར་དང་རིན་ཆེན་རུས་པའི་རྒྱན་གྱིས་སྤྲས། །ཐོད་པ་སྐམ་རློན་རྒྱུན་ལྡན་གར་སྟབས་འགྱིང་། །གསང་བའི་གནས་སུ་པདྨ་འདབ་བཞིའི་སྟེང་། །གིང་ཆེན་སྡེ་བཞི་ཌཱཀི་སྡེ་བཞི་|རྣམས། །ཞལ་སྦྱོར་གྲི་ཐོད་འཛིན་ཅིང་འདོར་ཐབས་བཞུགས། །མགྲིན་པར་འཇིག་རྟེན་དབང་ཕྱུག་སྐུ་མདོག་དམར། །ཞི་བའི་ངང་ཚུལ་བགྲང་ཕྲེང་པདྨ་འཛིན། །དར་དང་རིན་ཆེན་རྒྱུན་ལྡན་བཞེངས་ཐབས་ཀྱིས། །པདྨ་ཟླ་བའི་གདན་ལ་བཞུགས་པའོ། །དབུ་ནང་སྣང་བ་མཐའ་ཡས་དབྱེར་མེད་པའི། །པདྨ་འབྱུང་གནས་མཐིང་ནག་རྒྱན་དྲུག་གསོལ། །ཌཱ་དྲིལ་འཛིན་ཅིང་འགྱིང་སྟབས་སེམས་དཀྱིལ་གྱིས། །པདྨ་ཉི་ཟླའི་གདན་ལ་བཞུགས་པར་སྒོམ། །དེ་ནས་གཞུང་ལྟར་དཔྲལ་བར་ཨོཾ་སོགས་ནས། །བཟླས་པའི་བར་ནི་ཆོ་ག་གཞུང་ལྟར་འདོན། ༈ །དེ་ནས་འཛབ་དགོངས་དམིགས་པ་འཕྲོ་འདུ་ནི། །ཐུགས་དབུས་རྟ་མགྲིན་ཐུགས་ཀར་པད་ཉིའི་སྟེང་། །ཧྲིལ་སྔགས་ཕྲེང་གཡས་སུ་འཁོར་བ་ལས། །འོད་
འཕྲོས་རང་གི་ཤངས་བུག་གཡས་ནས་ཐོན། །མཆོད་པར་གྱུར་ཏེ་བ་གཡས་ཀྱི་རྟ་མགྲིན་མཆོད། །དེ་ལས་འོད་འཕྲོས་སངས་རྒྱས་ཡི་དམ་ལྷ། །ཀུན་གྱིས་ཡོན་ཏན་མཆོག་ཐུན་དངོས་གྲུབ་རྣམས། །འོད་ཀྱིས་བསྡུས་ནས་གཡས་ཀྱི་རྟ་མགྲིན་ཐིམ། །དེ་ལས་བྱིན་རླབས་དངོས་གྲུབ་འོད་ཟེར་ཚུལ། །བདག་གི་ཤངས་བུག་ནས་ཞུགས་སྐུ་གཡས་བརྒྱུད། །ཐུགས་ཀའི་རྟ་མགྲིན་ལ་ཐིམ་དངོས་གྲུབ་ཐོབ། །ལྟེ་བའི་གསང་བ་ཡེ་ཤེས་སྐུ་ལས་ནི། །འོད་བྱུང་སྐུ་གཡོན་བརྒྱུད་ནས་ཤངས་གཡོན་ཐོན། །མཆོད་པའི་སྤྲིན་གྱུར་གཡོན་གྱི་གསང་ཡེ་མཆོད། །དེ་ལས་འོད་འཕྲོས་འོད་ཟེར་ལས་བྱུང་བའི། །མཆོད་པས་ཞིང་ཁམས་ཀུན་གྱི་སངས་རྒྱས་དང་། །ཡེ་ཤེས་མཁའ་འགྲོའི་ཚོགས་རྣམས་ཐམས་ཅད་མཆོད། །དེ་དག་རྣམས་ཀྱི་སྐུ་གསུང་ཐུགས་ཡོན་དང་། །ཕྲིན་ལས་མཆོག་ཐུན་དངོས་གྲུབ་འོད་ཀྱིས་བསྡུས། །གཡོན་གྱི་གསང་ཡེ་ལ་ཐིམ་དེ་ཡི་འོད། །བདག་གི་ཤངས་བུག་གཡོན་ཞུགས་སྐུ་གཡོན་བརྒྱུད། །ལྟེ་བའི་གསང་བ་ཡེ་ཤེས་སྐུ་ལ་ཐིམ། །མགྲིན་པའི་འཇིག་རྟེན་དབང་ཕྱུག་སྐུ་ལས་ནི། །འོད་ཟེར་འཕྲོས་པ་རང་གི་སྨིན་མཚམས་ཐོན། །འཁོར་གྱི་བསྐལ་བཟང་
སངས་རྒྱས་རྣམས་ལ་མཆོད། །དེ་ལས་འོད་འཕྲོས་མཆོད་པའི་སྤྲིན་ཕུང་གིས། །ཕྱོགས་བཅུའི་སངས་རྒྱས་མ་ལུས་ཐམས་ཅད་མཆོད། །དེ་ཀུན་བྱིན་རླབས་བསྡུས་ཏེ་འཁོར་གྱི་ནི། །བསྐལ་བཟང་སངས་རྒྱས་སྟོང་རྩ་རྣམས་ལ་ཐིམ། །དེ་དག་སྐུ་ལས་འོད་ཟེར་བྱིན་རླབས་ཚུལ། །སྨིན་མཚམས་ནས་ཞུགས་མགྲིན་པའི་ལྷ་ལ་ཐིམ། །དུང་ཁང་ནང་བཞུགས་སློབ་དཔོན་པདྨ་ལ། །འོད་ཟེར་འཕྲོས་པ་མཛོད་སྤུ་ནས་ཐོན་ཏེ། །སྤྱི་གཙུག་ནམ་མཁའི་ཨོ་རྒྱན་སྐུ་ལ་མཆོད། །དེ་ལས་འོད་འཕྲོས་མཆོད་པའི་སྤྲིན་གྱུར་ཏེ། །རྒྱ་བོད་གྲུབ་ཐོབ་རིག་འཛིན་རྒྱ་མཚོ་མཆོད། །བྱིན་རླབས་ཚུར་བསྡུས་པད་འབྱུང་སྐུ་ལ་ཐིམ། །དེ་ཡི་བྱིན་རླབས་འོད་ཟེར་སྨིན་མཚམས་ཞུགས། །དབུ་ནང་བཞུགས་པའི་པད་འབྱུང་སྐུ་ལ་ཐིམ། །གསང་གནས་འཀི་ཡབ་ཡུམ་སྐུ་ལས་ནི། །འོད་ཟེར་ལྟེ་བའི་ཁུང་ནས་འཕྲོས་པ་དེས། །འོག་གི་དམ་ཅན་རྒྱ་མཚོ་ཐམས་ཅད་མཆོད། །དེ་ལས་འོད་འཕྲོས་མཆོད་པའི་སྤྲིན་གྱུར་ཏེ། །ཡེ་ཤེས་འཇིག་རྟེན་ཆོས་སྐྱོང་ཐམས་ཅད་མཆོད། །དེ་ཀུན་བྱིན་རླབས་མཐུ་སྟོབས་ཚུར་བསྡུས་ནས། །འོག་གི་ཌཱཀི་ཆོས་སྐྱོང་རྣམས་ལ་ཐིམ། །དེ་ཡི་མཐུ་སྟོབས་འོད་ཟེར་རྣམ་པ་རུ། །ལྟེ་བ་
ནས་ཞུགས་གསང་གནས་ལྷ་ལ་ཐིམ། །དེ་ཚེ་ཡིག་བཅུ་བཟླ་བ་བསྙེན་པ་ཡིན། །སླར་ཡང་ཐུགས་ཀའི་རྟ་མགྲིན་འོད་ཟེར་འཕྲོས། །སྐུ་གཡས་བརྒྱུད་དེ་ཤངས་བུག་གཡས་ནས་ཐོན། །གཡས་ཀྱི་རྟ་མགྲིན་ལ་མཆོད་དེ་ཡི་འོད། །ཕྱོགས་བཅུའི་སངས་རྒྱས་ཀུན་མཆོད་དེ་ཡི་འོད། །བྱིན་རླབས་བསྡུས་ནས་གཡས་ཀྱི་རྟ་མགྲིན་ཐིམ། །རྟ་མགྲིན་དཔའ་བོ་རྒྱ་མཚོ་འོད་དུ་ཞུ། །ཤངས་བུག་གཡས་ཞུགས་སྐུ་གཡས་བརྒྱུད་བྱས་ཏེ། །ཐུགས་ཀའི་རྟ་མགྲིན་ལ་ཐིམ་དངོས་གྲུབ་ཐོབ། །ལྟེ་བའི་གསང་ཡེའི་འོད་ཟེར་སྐུ་གཡོན་བརྒྱུད། །ཤངས་བུག་གཡོན་ཐོན་གཡོན་གྱི་གསང་ཡེ་མཆོད། །དེ་ཡི་འོད་ཟེར་ཕྱོགས་བཅུར་འཕྲོས་པ་ཡིས། །དེ་བཞིན་གཤེགས་མ་ཀུན་མཆོད་བྱིན་རླབས་བསྡུས། །གསང་ཡེ་ལ་ཐིམ་དཔའ་མོ་རྒྱ་མཚོར་བཅས། །འོད་ཞུ་ཤངས་བུག་གཡོན་ཞུགས་སྐུ་གཡོན་བརྒྱུད། །ལྟེ་བའི་གསང་ཡེ་ལ་ཐིམ་དངོས་གྲུབ་ཐོབ། །མགྲིན་པའི་འཇིག་རྟེན་དབང་ཕྱུག་འོད་ཟེར་ནི། །སྨིན་མཚམས་ནས་ཐོན་འཁོར་གྱི་སངས་རྒྱས་མཆོད། །དེ་ལས་འོད་འཕྲོས་ཕྱོགས་བཅུ་དུས་གསུམ་གྱི། །སངས་རྒྱས་སྟོང་རྩ་བྱེ་བ་ཕྲག་བརྒྱ་མཆོད། །བྱིན་རླབས་ཀུན་བསྡུས་འཁོར་གྱི་
སངས་རྒྱས་ཐིམ། །འཁོར་གྱི་སངས་རྒྱས་སྟོང་རྩ་འོད་དུ་ཞུ། །སྨིན་མཚམས་ནས་ཞུགས་མགྲིན་པའི་ལྷ་ལ་ཐིམ། །སྤྱི་བོའི་ནང་བཞུགས་པད་འབྱུང་འོད་ཟེར་ནི། །སྨིན་མཚམས་ནས་ཐོན་སྟེང་གི་པད་འབྱུང་མཆོད། །དེ་ལས་འོད་འཕྲོས་མཁའ་སྤྱོད་ཞིང་བཞུགས་པའི། །རིག་འཛིན་གྲུབ་ཐོབ་ཀུན་མཆོད་བྱིན་རླབས་བསྡུས། །པད་འབྱུང་ལ་ཐིམ་གྲུབ་ཐོབ་རྒྱ་མཚོ་བཅས། །འོད་ཞུ་སྨིན་མཚམས་ནས་ཞུགས་པད་འབྱུང་ཐིམ། །གསང་གནས་ཌཱཀིར་འོད་འཕྲོས་ལྟེ་བར་ཐོན། །འོག་གི་ཆོས་སྐྱོང་ཌོཀི་ཐམས་ཅད་མཆོད། །དེ་ལས་འོད་འཕྲོས་སྟོང་གསུམ་རབ་འབྱམས་ཀྱི། །མཁའ་འགྲོ་ཆོས་སྐྱོང་ཀུན་མཆོད་མཐུ་སྟོབས་བསྡུས། །ཆོས་སྐྱོང་ལ་ཐིམ་དམ་ཅན་རྒྱ་མཚོ་བཅས། །འོད་དུ་ཞུ་ནས་ལྟེ་བའི་ཁུང་ཞུགས་ཏེ། །གསང་བའི་ཌཱཀི་ཡབ་ཡུམ་རྣམས་ལ་ཐིམ། །དེ་ནི་ནང་དུ་འཇུག་པའི་སྒོམ་བཟླས་ཏེ། །འོད་ཟེར་ཐམས་ཅད་དམར་པོ་ཡིན་པར་བཤད། །དེ་ནས་བདག་ཉིད་གནས་པའི་ས་ཕྱོགས་འདི། །ཞིང་ཁམས་རྣམ་དག་བདེ་བ་ཅན་ལྟ་བུ། །བེཟླུར་ས་གཞི་ལག་མཐིལ་ལྟར་མཉམ་པ། །རིན་ཆེན་རི་བོ་རྣམས་དང་པདྨའི་ཚལ། །དཔག་བསམ་ལྗོན་ཤིང་ཕྲེང་བ་བདུད་རྩིའི་རྫོང་། །
མེ་ཏོག་ཆར་འབེབས་དྲི་བཟང་ངད་པ་ལྡང་། །འདོད་པའི་ཡོན་ཏན་སྣ་ཚོགས་ལྷུན་གྱིས་གྲུབ། །མཆོད་པའི་ལྷ་མོའི་ཚོགས་རྣམས་བསྟོད་དབྱངས་སྒྲོག །མཐའ་བསྐོར་འོད་ཀྱི་ཕྲེང་བ་ཀུན་ཏུ་འཁྲིགས། །དེ་ལྟར་བདག་གི་ཞིང་ཁམས་མཆོག་དེ་ལས། །འོད་ཟེར་ཕྱོགས་ཀུན་འཕྲོས་པས་ཞིང་ཀུན་ཁྱབ། །ཕྱོགས་བཅུའི་སངས་རྒྱས་ཀུན་གྱི་ཞིང་ཁམས་ཀྱི། །རྒྱན་དང་ཡོན་ཏན་བཀྲ་ཤིས་འོད་ཀྱིས་བསྡུས། །བདག་གི་ཞིང་ཁམས་ལ་ཐིམ་སྔོན་ལས་ཀྱང་། །འོད་མདངས་གཟི་བརྗིད་ཆེས་ཆེར་འབར་གྱུར་ནས། །སངས་རྒྱས་བྱང་སེམས་ཀུན་གྱི་ཞིང་ཁམས་ཀྱི། །ཡོན་ཏན་བདག་གི་ཞིང་ལ་ཚང་བར་བསྒོམ། །དེ་ནི་ཞིང་ཁམས་ཏིང་འཛིན་སྦྱང་ཞེས་བྱ། །དེ་ནས་བདག་ཉིད་གནས་པའི་ཁང་པ་ཡང་། །གཞལ་ཡས་ཁང་པ་གྲུ་བཞི་སྒོ་བཞི་པ། །དཀྱིལ་འཁོར་མཚན་ཉིད་ཡོངས་སུ་རྫོགས་པ་ལས། །འོད་འཕྲོས་སངས་རྒྱས་བྱང་སེམས་ཐམས་ཅད་ཀྱི། །གཞལ་ཡས་ལ་ཁྱབ་དེ་ཀུན་བྱིན་རླབས་བསྡུས། །བདག་གི་གནས་ཁང་གཞལ་ཡས་ཁང་ལ་ཐིམ། །སྔོན་ལས་བཀྲག་མདངས་གཟི་བརྗིད་ཇེ་ཆེར་འབར། །སངས་རྒྱས་བྱང་སེམས་ཀུན་གྱི་གཞལ་ཡས་ཀྱི། །ཡོན་
ཏན་བདག་གི་གཞལ་ཡས་ལ་ལྡན་བསྒོམ། །དེ་ནི་གཞལ་མེད་ཁང་གི་ཏིང་འཛིན་ནོ། །བདག་གི་གདན་ནི་རིན་ཆེན་སེངྒེའི་ཁྲི། །དར་དང་པདྨ་ཉི་ཟླ་བརྩེགས་པ་ལས། །འོད་འཕྲོས་སངས་རྒྱས་བྱང་སེམས་ཐམས་ཅད་ཀྱི། །གདན་ཁྲི་ལ་ཁྱབ་ཡོན་ཏན་བདེ་ལེགས་ཀུན། །འོད་ཀྱིས་བསྡུས་ནས་རང་གི་གདན་ཁྲིར་ཐིམ། །སྔར་ལས་མཐོ་ཞིང་གཟི་བརྗིད་འོད་དུ་འབར། །སངས་རྒྱས་བྱང་སེམས་ཀུན་གྱི་གདན་ཁྲི་ཡི། །བཀྲ་ཤིས་བདེ་ལེགས་ཀུན་དང་ལྡན་པར་བསྒོམ། །དེ་ནི་གདན་ཁྲིའི་ཏིང་ངེ་འཛིན་ཡིན་ནོ། །དེ་སྟེང་བདག་ཉིད་བཅོམ་ལྡན་སྤྱན་རས་གཟིགས། །ཞབས་གཉིས་རྡོ་རྗེའི་སྐྱིལ་ཀྲུང་བཅས་ཙམ་གྱིས། །ས་ཆེན་རྣམ་པ་དྲུག་ཏུ་གཡོས་གྱུར་ཏེ། །འུར་སྒྲ་ཐུག་ཆོམ་འཇིག་རྟེན་འོད་ཀྱིས་ཁྱབ། །ཚངས་པ་བརྒྱ་བྱིན་འཁོར་ལོས་སྒྱུར་རྒྱལ་དང་། །རྒྱལ་ཆེན་བཞི་སོགས་འདུས་ཏེ་དད་ཅིང་གུས། །ཕྱག་འཚལ་ཞབས་ལ་དབུ་གཏུགས་གདན་ཁྲི་བཏེག །དེ་ནི་བཞུགས་སྟངས་ཏིང་ངེ་འཛིན་ཞེས་བྱ། །ཕྱག་གཉིས་ཐུགས་ཀར་ཐལ་མོ་སྦྱར་བའི་བར། །གསེར་གྱི་རྡོ་རྗེ་རྩེ་ལྔའི་ལྟེ་བའི་ནང་། །རིགས་ལྔའི་ཕོ་བྲང་མེ་ལོང་གཟུགས་བརྙན་ལྟར། །དེ་ལས་རྒྱལ་བ་རིགས་ལྔ་གྲངས་
མེད་འཕྲོས། །འཇིག་རྟེན་ཐམས་ཅད་རྒྱལ་བ་རིགས་ལྔས་གང་། །ཚུར་འདུས་རྡོ་རྗེའི་ལྟེ་བའི་ལྷ་ལ་ཐིམ། །ཕྱག་གཡས་འོག་མས་བགྲང་ཕྲེང་འཛིན་པ་ཡི། །ཕྲེང་རྡོག་རེ་རེའི་འོད་ཀྱི་གོང་བུའི་ནང་། །དྷཱི༔ཡིག་སྔགས་ཕྲེང་ཨཱཿ་ལི་ཀཱ་ལིས་བསྐོར། །དེ་ལས་གྷིཡིག་སྔགས་ཕྲེང་རང་སྒྲ་བཅས། །འཇིག་རྟེན་ཁམས་གང་འགྲོ་བའི་སྒྲིབ་པ་སྦྱངས། །ཕྱག་གཡོན་འོག་མས་པདྨའི་སྡོང་པོ་ནི། །འདབ་མ་སྟོང་ལྡན་འཛིན་པའི་འདབ་རེའི་སྟེང་། །བསྐལ་བཟང་སངས་རྒྱས་རེ་རེ་བཞུགས་པ་ལས། །བསྐལ་བཟང་སངས་རྒྱས་གྲངས་མེད་འཕྲོས་པ་ཡིས། །འཇིག་རྟེན་ཁམས་གང་འཁོར་བ་ཇི་སྲིད་དུ། །སེམས་ཅན་དོན་ནི་མཐའ་ཡས་མཛད་པར་གྱུར། །དེ་གསུམ་ཕྱག་རྒྱའི་ཏིང་ངེ་འཛིན་ཞེས་བྱ། །རང་གི་ཞལ་ནས་ཡིག་བཅུ་སྔགས་ཀྱི་སྒྲ། །གཞན་ཡང་གསང་སྔགས་བླ་མེད་ཆོས་སྒྲའི་དབྱངས། །ལྷ་ཡི་རྔ་སྒྲ་ལྟ་བུར་ཟད་མེད་པ། །ནམ་མཁའ་མཐའ་ཀླས་གསུང་དབྱངས་སྙན་པོས་ཁྱབ། །བདག་ཚིག་སེམས་ཅན་གང་གིས་ཐོས་གྱུར་པ། །བླ་མེད་བྱང་ཆུབ་ཐོབ་པའི་སྐལ་ལྡན་གྱུར། །དེ་ནི་གསུང་དབྱངས་ཏིང་ངེ་འཛིན་ཡིན་ནོ། །བདག་ཉིད་རྒྱལ་བ་རྒྱ་མཚོའི་སྐུར་གསལ་བའི། །
སྤྱན་གཉིས་ཨུཏྤལ་འདབ་མ་ལྟར་ཡངས་ཤིང་། །དཀྱུས་རིང་མཆོག་ཏུ་རྣམ་དག་ཞི་བས་གཟིགས། །སྤྱན་གྱི་ལམ་དུ་ཉེ་བར་སྣང་བ་ཡི། །སེམས་ཅན་གང་དག་སྤྱན་གྱིས་གཟིགས་ཚད་རྣམས། །བླ་ན་མེད་པའི་བྱང་ཆུབ་ལམ་ལས་ནི། །ཕྱིར་མི་ལྡོག་པའི་སྐལ་བ་ཅན་དུ་གྱུར། །དེ་ནི་གཟིགས་སྟངས་ཏིང་ངེ་འཛིན་ཞེས་བྱ། །བདག་གི་རྒྱན་ནི་རིན་ཆེན་དུ་མས་སྤྱས། །དབུ་རྒྱན་ཕྱག་གདུབ་ཞབས་གདུབ་དོ་ཤལ་སོགས། །སྟོད་གཡོགས་སྨད་དཀྲིས་དར་དཔྱངས་ཅོད་པན་ལས། །འོད་འཕྲོས་ཕྱོགས་བཅུའི་སངས་རྒྱས་བྱང་སེམས་ཀྱི། །རྒྱན་ལ་ཁྱབ་ཅིང་དེ་དག་ཡོན་ཏན་བསྡུས། །བདག་གི་རྒྱན་ལ་ཐིམ་པས་སྔོན་ལས་ཀྱང་། །འོད་མདངས་གཟི་བརྗིད་ལྷག་པར་གསལ་གྱུར་ཏེ། །སངས་རྒྱས་ཀུན་གྱི་རྒྱན་དང་ན་བཟའ་ཡི༔ །བྱིན་རླབས་ཡོན་ཏན་ཀུན་དང་ལྡན་པར་བསྒོམ། །ཡིག་བཅུ་ནས་བཟུང་ཧཱུྃ་ཛཡན་གྱི་བར། ་།ཡིག་འབྲུ་ཉེར་བརྒྱད་བཟླ་བ་སྒྲུབ་པ་སྟེ། །སྔ་ཐུན་ཕྱེད་ཡན་དམིགས་པ་དེ་རྫོགས་ནས། ༈ །མདུན་བསྐྱེད་ལྷ་ལྔ་ལུས་ལྷ་དང་བཅས་པ། །སྔར་ལྟར་བསྒོམས་ནས་སྤྱན་འདྲེན་དབང་བསྐུར་དང་། །མཆོད་བཞི་བསྟོད་བཞི་ཚང་བར་བྱས་པའི་མཇུག །
ལས་སྦྱོར་ཚུལ་དུ་ཡི་གེ་བཅུ་པའི་མཇུག །ཚོགས་བསགས་སྒྲིབ་པ་སྦྱངས་བའི་སྔགས་རིང་བཟླ། །རང་གི་ཐུགས་ལས་འོད་ཟེར་སྣ་ཚོགས་འཕྲོས། །མདུན་བསྐྱེད་གཙོ་བོའི་ཐུགས་ཀར་ཐིམ་པ་ཡིས། །དེ་ཡི་བྱིན་རླབས་འོད་ཟེར་རྣམ་པར་བསྡུས། །བདག་གི་ཐུགས་ཀར་ཐིམ་པས་སྒྲིབ་གཉིས་དག །བསོད་ནམས་ཡེ་ཤེས་ཚོགས་གཉིས་རྫོགས་པར་བསྒོམ། །དེ་བཞིན་བདག་གི་ཐུགས་ཀའི་འོད་ཟེར་ནི། །མདུན་བསྐྱེད་རྟ་མགྲིན་ལ་ཐིམ་བྱིན་རླབས་བསྡུས། །རང་གི་ཐུགས་ཐིམ་ཚོགས་གཉིས་སྒྲིབ་པ་སྦྱངས། །འོད་འཕྲོས་མདུན་གྱི་གསང་ཡེའི་བྱིན་རླབས་བསྡུས། །འོད་འཕྲོས་སྟེང་གི་པད་འབྱུང་བྱིན་རླབས་བསྡུས། །འོད་འཕྲོས་འོག་གི་ཌཱཀི་ཆོས་སྐྱོང་གི །བྱིན་རླབས་བསྡུས་ཏེ་རང་ཐིམ་བསྒོམས་བྱས་ཤིང་། །སྔགས་རིང་དྲོས་ཆེན་བར་དུ་ཅི་ལྕོགས་བཟླ། །དེ་ནས་གཏོར་བསྔོས་བྱས་རྗེས་མདུན་བསྐྱེད་རྣམས། །བུམ་ཆུ་བདུད་རྩི་གཏོར་མ་རྣམས་ལ་ཐིམ། །བདག་བསྐྱེད་ཐུན་བསྡུ་ཐུན་གྱི་མཚམས་རྣམས་སུ། །ཆག་མེད་དགེ་སྦྱོར་གཞན་རྣམས་གང་དགོས་བྱ། ༈ །དེ་ནས་གུང་ཐུན་བདག་བསྐྱེད་ཚར་གཅིག་ནི། །ལུས་ལྷ་བཅས་པ་སྔར་ལྟར་བསྒོམ་པར་བྱ། །
དེ་ནས་ལྷ་ལྔའི་སྔགས་རིང་བཟླ་བཞིན་དུ། །རང་གི་དབུ་ནང་པད་འབྱུང་སྐུ་ལས་ནི། །འོད་འཕྲོས་སྟེང་གི་པད་འབྱུང་སྐུ་ལ་ཐིམ། །དེ་ལས་དེ་འདྲའི་སྐུ་ཚོགས་གྲངས་མེད་འཕྲོས། །འཇིག་རྟེན་ཐམས་ཅད་པད་འབྱུང་སྐུ་ཡིས་གང་། །འགྲོ་བའི་དོན་མཛད་རིག་འཛིན་ཐམས་ཅད་ཀྱི། །སྐུ་ཡི་བྱིན་རླབས་བསྡུས་ཏེ་ཚུར་འདུས་ནས། །དུང་ཁང་ནང་གི་པད་འབྱུང་དཔྲལ་བར་ཐིམ། །དབུ་གཙུག་པད་འབྱུང་ཐུགས་ལས་ཧྲིགཅིག་འཕྲོས། །དེ་ལ་གྷིཡིག་སྔགས་ཀྱི་རང་སྒྲ་ཅན། །འཇིག་རྟེན་གང་བས་འགྲོ་བའི་སྒྲིབ་པ་སྦྱངས། །རིག་འཛིན་ཀུན་གྱི་གསུང་གི་ནུས་མཐུ་བསྡུས། །དཔྲལ་བའི་པད་འབྱུང་མགྲིན་པར་ཐིམ་པར་བསྒོམ། །སྤྱི་གཙུག་ནམ་མཁའི་པད་འབྱུང་ཐུགས་ཀ་ནས། །པདྨ་དམར་པོ་འདབ་བརྒྱད་ཟེའུ་འབྲུ་ལ། །གསེར་གྱི་རྡོ་རྗེ་ཕྱེད་པས་མཚན་པར་འཕྲོས། །དེ་ལ་དེ་འདྲ་མང་འཕྲོ་ཞིང་ཀུན་ཁྱབ། །འོད་ཀྱི་འགྲོ་བ་ཀུན་ལ་ཉམས་རྟོགས་བསྐྱེད། །གྲུབ་ཐོབ་ཀུན་གྱི་རྟོགས་པའི་ཡོན་ཏན་བསྡུས། དཔྲལ་བའི་པད་འབྱུང་ཐུགས་ཀར་ཐིམ་པར་བསྒོམ། །འཁོར་གྱི་སངས་རྒྱས་སྟོང་རྩ་གསལ་བཏབ་ལ། །རང་གི་མགྲིན་པའི་འཇིག་རྟེན་དབང་ཕྱུག་ལས། །འོད་འཕྲོས་དེ་དག་རྣམས་
ལ་ཐིམ་པ་ཡིས། །དེ་དག་སྐུ་ལས་གསེར་མདོག་སངས་རྒྱས་སྐུ། །གྲངས་མེད་འཕྲོས་པས་འཇིག་རྟེན་སེར་ལྟེམ་གང་། །འགྲོ་བ་ཀུན་གྱི་ལུས་ཀྱི་སྒྲིབ་པ་སྦྱངས། །རྒྱལ་བ་ཀུན་གྱི་སྐུ་ཡི་བྱིན་རླབས་བསྡུས། །ཐམས་ཅད་འོད་ཞུ་ཚུར་འདུས་རང་ཉིད་ཀྱི། །མགྲིན་པའི་འཇིག་རྟེན་དབང་ཕྱུག་དཔྲལ་བར་ཐིམ། །སངས་རྒྱས་སྟོང་གི་ཐུགས་ལས་ཧཱུྃཡིག་རེ། །མདུན་དུ་ཆད་ལས་སྔགས་ཀྱི་རང་སྒྲ་བཅས། །འཇིག་རྟེན་ཁྱབ་པས་འགྲོ་བའི་ངག་སྒྲིབ་སྦྱངས། །རྒྱལ་བ་ཀུན་གྱི་གསུང་གི་བྱིན་རླབས་བསྡུས། །ཚུར་འདུས་མགྲིན་པའི་ལྷ་ཡི་ལྗགས་ལ་ཐིམ། །བསྐལ་བཟང་སངས་རྒྱས་སྟོང་གི་ཐུགས་ཀ་ནས། །གསེར་གྱི་པདྨ་ཧྲི༔ཡིག་གིས་མཚན་པ། །རེ་རེ་འཕྲོས་ཤིང་ཡང་འཕྲོས་འཇིག་རྟེན་ཁྱབ། །སེམས་ཅན་ཀུན་གྱི་ཡིད་ཀྱི་སྒྲིབ་པ་སྦྱངས། །ཚུར་འདུས་མགྲིན་པའི་ལྷ་ཡི་ཐུགས་ཀར་ཐིམ། །བདག་གི་ཐུགས་ཀའི་རྟ་མགྲིན་འོད་ཟེར་ནི། །གཡས་ཀྱི་རྟ་མགྲིན་སྐུ་ལ་ཐིམ་མ་ཐག །རྟ་མགྲིན་གྲངས་མེད་འཕྲོས་པས་འཇིག་རྟེན་གང་། །འགྲོ་བའི་བདུད་བཞི་ཉོན་མོངས་ཚར་གཅོད་ཅིང་། །དཔའ་བོ་ཁྲོ་རྒྱལ་ཀུན་གྱི་མཐུ་སྟོབས་བསྡུས། །འོད་ཞུ་ཚུར་འདུས་རང་གི་
ཐུགས་ཀ་རུ། །རྟ་མགྲིན་བཞུགས་པའི་དཔྲལ་བར་ཐིམ་པར་བསྒོམ། །དེ་བཞིན་འོད་འཕྲོས་གཡས་ཀྱི་རྟ་མགྲིན་གྱི། །མགྲིན་པའི་གནས་ནས་ཧཱིཝཡིག་གིས་མཚན་པའི། །ཅང་ཏེའུ་སྔགས་སྒྲར་བཅས་པས་འཇིག་རྟེན་གང་། །བདུད་བགེགས་ཀུན་གྱི་ངག་གི་ནུས་པ་བཅོམ། །ཁྲོ་རྒྱལ་ཀུན་གྱི་གསུང་གི་ནུས་མཐུ་བསྡུས། །ཚུར་འདུས་ཐུགས་ཀའི་རྟ་མགྲིན་ལྗགས་ལ་ཐིམ། །འོད་འཕྲོས་གཡས་ཀྱི་རྟ་མགྲིན་ཐུགས་ཀ་ནས། །གསེར་གྱི་རྡོ་རྗེ་ཁ་གདེངས་བ་གཅིག་འཕྲོས། །དེ་འདྲ་གྲངས་མེད་འཇིག་རྟེན་ཁྱབ་པ་དེས། །བདུད་བགེགས་ཀུན་གྱི་སེམས་ཀྱི་གདུག་རྩུབ་བཅོམ། །རྒྱལ་བ་ཀུན་གྱི་སྟོབས་བཅུའི་སྟོབས་བསྡུས་ཏེ། །རང་གི་ཐུགས་ཀའི་རྟ་མགྲིན་ཐུགས་ལ་ཐིམ། །ལྟེ་བའི་གསང་ཡེའི་སྐུ་ལས་འོད་འཕྲོས་པ། གཡོན་གྱི་གསང་ཡེ་ལ་ཐིམ་དེ་མ་ཐག །གསང་ཡེ་དཔག་མེད་འཕྲོས་པས་འཇིག་རྟེན་ཁྱབ། །སྣང་སྲིད་འགྲོ་བའི་ལུས་ཀུན་དབང་དུ་བསྡུས། །ས་འོག་ས་སྟེང་ས་བླར་གནས་པ་ཡི། །ཊྛཀི་ཀུན་གྱི་སྐུ་ཡི་བྱིན་རླབས་བསྡུས། །ཚུར་འདུས་ལྟེ་བའི་ལྷ་ཡི་དཔྲལ་བར་ཐིམ། །སླར་ཡང་འོད་འཕྲོས་གཡོན་གྱི་གསང་ཡེ་ལས། །ཧྲི༔ཡིག་སྔགས་རིང་གིས་བསྐོར་རང་སྒྲ་
བཅས། །འཇིག་རྟེན་ཁྱབ་པས་སྐྱེ་འགྲོ་ཐམས་ཅད་ཀྱི། །ངག་རྣམས་དབང་བསྡུས་གནས་གསུམ་ཌཱཀི་ཡི། །གསུང་གི་ནུས་པ་བསྡུས་ཏེ་འོད་དུ་ཞུ། །ཚུར་འདུས་ལྟེ་བའི་ལྷ་ཡི་མགྲིན་པར་ཐིམ། །སླར་ཡང་འོད་འཕྲོས་གཡོན་གྱི་གསང་ཡེ་ལས། །ཕྱག་མཚན་གྲི་ཐོད་བརྩེགས་པ་གྲངས་མེད་འཕྲོས། །སེམས་ཅན་ཀུན་གྱི་སེམས་རྒྱུད་དབང་དུ་་བསྡུས། །མ་རྒྱུད་མཁའ་འགྲོའི་ཐུགས་ཀྱི་ཡེ་ཤེས་བཅས། །འོད་ཞུ་ཚུར་འདུས་གསང་ཡེའི་ཐུགས་ཀར་ཐིམ། །གསང་གནས་རིགས་བཞིའི་ཌཱཀི་ཡབ་ཡུམ་ལས། །འོད་ཟེར་ལྟེ་བ་ནས་འཕྲོས་འོག་ཕྱོགས་ཀྱི། །མ་མགོན་དཔའ་བོ་ཌཱཀི་རྣམས་ལ་ཐིམ། །དེ་དག་རྣམས་ལས་མ་མགོན་ལྕམ་དྲལ་དང་། །རིགས་བཞིའི་དཔའ་བོ་ཌཱཀི་གྲངས་མེད་འཕྲོས། །ལུས་ལ་སགནོད་པའི་དགྲ་བགེགས་ཚར་བཅད་ཅིང་། །སྐྱེ་འགྲོ་ཀུན་གྱི་ལུས་ཀྱི་གཟི་བརྗིད་བསྡུས། །ཚུར་འདུས་གསང་གནས་ལྷ་ཡི་དཔྲལ་བར་ཐིམ། །སླར་ཡང་འོད་འཕྲོས་འོག་གི་ཆོས་སྐྱོང་ལས། །རང་སྲོག་ས་བོན་སྔགས་ཀྱི་རང་སྒྲ་ཅན། །སྟོང་གསུམ་འཇིག་རྟེན་ཁྱབ་པར་འཕྲོས་པ་ཡིས། །ངག་ལ་གནོད་པའི་དགྲ་བགེགས་ཚར་བཅད་ཅིང་། །སྐྱེ་འགྲོ་ཀུན་གྱི་ངག་གི་
ནུས་པ་བསྡུས། །ཚུར་འདུས་གསང་གནས་ལྷ་ཡི་མགྲིན་པར་ཐིམ། །སླར་ཡང་འོད་འཕྲོས་འོག་གི་ལྷ་རྣམས་ལས། །རྡོ་རྗེ་རིན་ཆེན་པདྨ་རྒྱ་གྲམ་གྱིས། །མཚན་པའི་གྲི་གུག་ཁ་ཊཱ་གྲངས་མེད་འཕྲོས། །སེམས་ལ་གནོད་པའི་དགྲ་བགེགས་ཚར་བཅད་དེ། །སྣང་སྲིད་སྐྱེ་འགྲོའི་མཐུ་སྟོབས་ནུས་པ་བསྡུས། །ཚུར་འདུས་གསང་གནས་ལྷ་ཡི་ཐུགས་ཀར་ཐིམ། །དེ་ནི་རྣམ་གསུམ་སྙིང་པོ་བཟླ་བའོ། ༈ །དེ་ནས་མདུན་བསྐྱེད་ལུས་ཀྱི་ལྷ་དང་བཅས། །སྔར་ལྟར་མཆོད་ཅིང་སྤྱན་འདྲེན་མཆོད་བསྟོད་སོགས། །མཆོད་བཞི་བསྟོད་བཞི་ཚང་བར་བྱས་པའི་རྗེས། །ཚོགས་བསགས་སྒྲིབ་སྦྱང་སྔགས་རིང་འདོན་བཞིན་དུ། །བདག་གི་ཐུགས་དབུས་རྟ་མགྲིན་ཐུགས་ཀར་ནི། །ཧྲིལ་སྔགས་ཕྲེང་འཁོར་ལས་འོད་ཟེར་འཕྲོས། །བདག་ཉིད་གཡས་ཀྱི་རྟ་མགྲིན་སྐུ་ལ་ཕོག །དེ་ནས་འོད་འཕྲོས་མདུན་གྱི་རྟ་མགྲིན་ཐིམ། །དེ་ལས་འོད་འཕྲོས་མདུན་གྱི་གཙོ་བོ་ལས། །དེ་ལས་འོད་འཕྲོས་ཕྱོགས་བཅུའི་ཞིང་ཁྱབ་པས། །འོད་ཟེར་ལས་བྱུང་མཆོད་པའི་སྤྲིན་ཕུང་གིས། །སངས་རྒྱས་བྱང་སེམས་ཁྲོ་རྒྱལ་ཐམས་ཅད་མཆོད། །སྐུ་གསུང་ཐུགས་ཡོན་ཕྲིན་ལས་བྱིན་རླབས་ཀུན། །འོད་ཀྱིས་བསྡུས་
ཏེ་མདུན་བསྐྱེད་གཙོ་བོར་ཐིམ། །དེ་ལས་བྱིན་རླབས་དངོས་གྲུབ་འོད་ཟེར་ཚུལ། །མདུན་གཡས་རྟ་མགྲིན་ལ་བརྒྱུད་བདག་ཉིད་ཀྱི། །གཡས་ཀྱི་རྟ་མགྲིན་ནས་བརྒྱུད་བདག་ལ་ཐིམ། །སྒྲིབ་གཉིས་དག་ཅིང་ཚོགས་གཉིས་རྫོ་གས་པར་བསྒོམ། །དེ་བཞིན་བདག་གི་འོད་ཟེར་གཡོན་ཕྱོགས་ཀྱི། །གསང་ཡེ་ནས་བརྒྱུད་མདུན་གྱི་གསང་ཡེ་ནས། །གཙོ་བོ་ལ་ཕོག་འོད་ཟེར་ཕྱོགས་བཅུར་འཕྲོས། །མཆོད་པའི་སྤྲིན་དུ་གྱུར་ནས་ཕྱོགས་བཅུ་ཡི། །དེ་བཞིན་གཤེགས་མ་སེམས་མ་ཌཱཀིའི་ཚོགས། །ཀུན་མཆོད་བྱིན་རླབས་དངོས་གྲུབ་འོད་དུ་བསྡུས། །མདུན་བསྐྱེད་ལ་ཐིམ་གཡོན་གྱི་གསང་ཡེ་ནས། །བདག་གཡོན་གསང་ཡེ་ནས་བརྒྱུད་བདག་ལ་ཐིམ། །བདག་ཐུགས་འོད་ཟེར་སྟེང་ཕྱོགས་པད་འབྱུང་ལ། །དེ་ཡི་འོད་ཟེར་མདུན་སྟེང་པད་འབྱུང་ལ། །ཕོག་ཅིང་པད་འབྱུང་འོད་ཟེར་གཙོ་བོར་ཕོག །གཙོ་བོའི་འོད་ཟེར་རྩེ་ལ་མཆོད་པའི་སྤྲིན། །སྤྲོས་ཏེ་ཞིང་ཁམས་ཀུན་ན་བཞུགས་པ་ཡི། །རིག་འཛིན་གྲུབ་ཐོབ་རྒྱ་མཚོ་ཐམས་ཅད་མཆོད། །ཉམས་རྟོགས་བྱིན་རླབས་ཀུན་བསྡུས་གཙོ་བོར་ཐིམ། །ཡར་འཕྲོས་ནམ་མཁའི་པད་འབྱུང་ནས་བརྒྱུད་དེ། །བདག་བསྐྱེད་པད་འབྱུང་
ནས་བརྒྱུད་བདག་ལ་ཐིམ། །ཉམས་དང་རྟོགས་པ་ཆེས་ཆེར་འབར་བར་བསྒོམ། །བདག་གི་ཐུགས་ཀའི་འོད་ཟེར་འོག་ཕྱོགས་ཀྱི། །ཆོས་སྐྱོང་ནས་བརྒྱུད་མདུན་གྱི་ཆོས་སྐྱོང་ནས། །མདུན་བསྐྱེད་གཙོ་བོ་ལ་ཐིམ་དེ་ཡི་འོད། །རང་རང་མཐུན་རྫས་མཆོད་པས་འཇིག་རྟེན་ཁྱབ། །ཡེ་ཤེས་འཇིག་རྟེན་ཆོས་སྐྱོང་ཐམས་ཅད་མཆོད། །མཐུ་སྟོབས་ནུས་པ་ཀུན་བསྡུས་མདུན་བསྐྱེད་ནས། །བདག་བསྐྱེད་ཆོས་སྐྱོང་ནས་བརྒྱུད་བདག་ལ་ཐིམ། །མཐུ་སྟོབས་ནུས་པ་ཕུན་ཚོགས་ཐོབ་པར་བསྒོམ། །ཕྱོགས་རེ་བ་ཡི་དམིགས་པ་ཞེས་བྱ་ཡིན། །དེ་རྗེས་གཏོར་བསྔོས་གཞུང་ལྟར་བྱ་བ་ཡིན། །གཏོར་བསྔོས་རྗེས་སུ་འདོད་དོན་ཀུན་འགྲུབ་པའི། །སྔགས་རིང་བདུན་ནམ་ཉེར་གཅིག་བརྒྱ་རྩ་ཙམ། །བཟླ་བ་གོང་འོག་གཏོར་བསྔོས་ཀུན་ལ་འགྲེས། །མདུན་བསྐྱེད་བུམ་ཆུ་བདུད་རྩི་གཏོར་མར་བསྟིམ། །བདག་བསྐྱེད་ཐུན་བསྡུ་ལ་སོགས་གཞུང་ལྟར་རོ། །དགོང་ཀ་བདག་བསྐྱེད་འདོན་དང་ལུས་ལྷ་བསྒོམ། །བཟླས་པའི་བར་དུ་བདག་བསྐྱེད་གོང་ལྟར་ལ། །རིགས་འཕྲོ་ཞེས་བྱ་གཙོ་བོ་རེས་མོས་ཏེ། །བདག་ཉིད་གཙོ་བོ་དེ་ཡི་ང་རྒྱལ་བཟུང་། །དང་པོ་སྤྱན་རས་གཟིགས་ནི་གཙོ་བོ་སྟེ། །སྒྱུ་མ་ལྟ་བུ་
སྐད་ཅིག་སྐད་ཅིག་ལ། །གནས་འགྱུར་རང་ཉིད་ཁྲོ་བོ་རྟ་མགྲིན་ཏེ། །དཔའ་བོ་རྒྱ་མཚོས་བསྐོར་བ་དབུས་སུ་བསྒོམ། །དེ་ཚེ་རྒྱལ་བ་རྒྱ་མཚོ་སྤྱན་རས་གཟིགས། །སངས་རྒྱས་སྟོང་གིས་བསྐོར་བ་གཡས་ཕྱོགས་བཞུགས། །རང་ཉིད་གསང་བ་ཡེ་ཤེས་དཔའ་མོའི་ཚོགས། །དབུས་སུ་སྒོམ་ཚེ་སྤྱན་རས་གཟིགས་དབང་ནི། །སངས་རྒྱས་སྟོང་བཅས་ཆ་གཡོན་དུ་བཞུགས་པར་བསམ། །རང་ཉིད་སློབ་དཔོན་པདྨ་གྲུབ་ཐོབ་འཁོར། །འབུམ་སྡེའི་བསྐོར་བ་སྒོམ་ཚེ་སྟེང་གི་ཕྱོགས། །སྤྱན་རས་གཟིགས་དབང་སངས་རྒྱས་སྟོང་བཅས་བཞུགས། །རང་ཉིད་མ་མགོན་དཔའ་བོ་མཁའ་འགྲོའི་ཚོགས། །ང་རྒྱལ་བཟུང་ཚེ་སྟེང་གི་གཡས་གཡོན་བར། །ནམ་མཁའ་དང་བཅས་དཀྱིལ་འཁོར་བཞི་ཁ་ཡང་། །རང་ཉིད་ཡིན་པར་མཉམ་པ་ཉིད་དུ་བྷཻཾ། །འདི་དག་རིགས་འཕྲོ་དངོས་གྲུབ་བཟླས་པ་ཟེར། །དེ་ནས་ལྷ་ལྔ་གཞུང་ལྟར་བསྒོམས་པ་ལས། །རིམ་བཞིན་འོད་ཟེར་འཕྲོས་པས་གཡས་གཡོན་དང་། །སྟེང་འོག་དཀྱིལ་འཁོར་དང་བཅས་ལྔ་ཁ་ཡང་། །བདག་ཉིད་ཇི་བཞིན་སྤྱན་རས་གཟིགས་དབང་ལ། །སངས་རྒྱས་སྟོང་གིས་བསྐོར་བ་ལྔ་ཚོམ་བསྒོམ། །གཙོ་བོའི་མལ་དུ་
རྟ་མགྲིན་སོགས། །རིམ་བཞིན་གཙོ་འཁོར་རེས་མོས་བསྐོར། །དེ་ནས་བདག་ཉིད་སྐད་ཅིག་རྟ་མགྲིན་གསལ། །དེ་ལས་འོད་ཟེར་སྟེང་འོག་གཡས་གཡོན་འཕྲོས། །རྟ་མགྲིན་དཔའ་བོ་རྒྱ་མཚོས་བསྐོར་བ་ཡི། །ཁྲོ་བོའི་དཀྱིལ་འཁོར་ལྔ་ཚོམ་གྱུར་པ་བསྒོམ། །དེ་ནས་རང་ཉིད་གསང་ཡེ་ང་རྒྱལ་བསྒོམ། །འོད་ཟེར་སྟེང་འོག་གཡས་གཡོན་འཕྲོས་པ་ཡིས། །མཁའ་འགྲོའི་དཀྱིལ་འཁོར་ལྔ་ཚོམ་གྱུར་པར་བསྒོམ། །དེ་ནས་བདག་ཉིད་པད་འབྱུང་ང་རྒྱལ་བཟུང་། །འོད་འཕྲོས་དཀྱིལ་འཁོར་ལྔ་པོ་ཐམས་ཅད་ཀྱང་། །པད་འབྱུང་གྲུབ་ཐོབ་རྒྱ་མཚོའི་དཀྱིལ་འཁོར་བསྒོམ། །བདག་ཉིད་མ་མགོན་དཔའ་བོ་ཌཱཀི་བསྒོམ། །འོད་འཕྲོས་དཀྱིལ་འཁོར་ལྔ་པོ་ཐམས་ཅད་ཀྱང་། །དམ་ཅན་རྒྱ་མཚོའི་དཀྱིལ་འཁོར་ཉིད་དུ་བསྒོམ། །རིགས་བསྒྱུར་ཏིང་ངེ་འཛིན་གྱི་བཟླས་པ་ཡིན། །དེ་ནས་རང་ཉིད་ལྷ་ལྔ་གཞུང་ལྟར་བསྒོམ། །དེ་ཚེ་སྔགས་རིང་ཉེར་བརྒྱད་པ་ཉིད་བཟླ། །དེ་ནས་མདུན་བསྐྱེད་ལུས་ཀྱི་ལྷར་བཅས་པ་། །གོང་ལྟར་བསྐྱེད་བསྟིམ་མཆོད་བཞི་བསྟོད་བཞི་བྱ། །དེ་ནས་ཚོགས་བསགས་སྒྲིབ་སྦྱང་སྔགས་རིང་བཟླ། །བདག་གི་ཐུགས་ཀའི་སྔགས་འཁོར་འོད་ཟེར་ལས། །འོད་ཟེར་རྩ་
བ་གཅིག་ལ་རྩེ་མོ་ལྔ། །རྩེ་མོ་རེ་ལ་མཆོད་པའི་སྤྲིན་འཕྲོ་བ། །སྤྲོས་ཏེ་མདུན་བསྐྱེད་ལྷ་ལྔའི་ལྷ་ཚོགས་མཆོད། །འོད་ཟེར་རྩེ་ལྔས་ལྷ་ལྔའི་བྱིན་རླབས་ཀུན། །བསྡུས་ཏེ་རང་གི་ཐུགས་ཀར་བསྟིམ་པ་ནི། །དཔེར་ནི་ལག་པས་བསྙབ་པ་ལྟ་བུའོ། །དེ་ནས་སྐབས་འདིར་ལག་མཆོད་བྱ་བ་ནི། །ལག་མཆོད་ཚོགས་དང་འབྲེལ་མ་ཡིན་ཕྱིར་རོ། །ལག་མཆོད་དེ་ཡིས་ཚོགས་བྲན་ཚོགས་གྱེར་ལ། །ཚོགས་ཕུད་ཕུལ་ལ་རང་གི་གཏོར་བསྔོས་དང་། །ཡི་དམ་ཆོས་སྐྱོང་ཆག་མེད་རིགས་རྣམས་ཀྱི། །གཏོར་བསྔོས་གང་དགོས་སྐབས་འདིར་སྦྱར་བར་བྱ། །ཚོགས་ལ་རོལ་ཞིང་ལྷག་མ་བཏང་ནས་ཀྱང་། །མདུན་བསྐྱེད་འོད་ཞུ་བུམ་ཆུ་བདུད་རྩིར་བསྟིམ། །བདག་བསྐྱེད་ཐུན་བསྡུ་བསྔོ་སྨོན་གཞུང་ལྟར་རོ། ༈ །དེ་ནས་མུན་རུབ་བདག་བསྐྱེད་ལུས་ལྷར་བཅས། །བདག་བསྐྱེད་ཚར་རྗེས་ལྷ་ལྔའི་སྔགས་བཟླས་ཤིང་། །དམིགས་པ་རང་གི་ལུས་ཀྱི་ནང་དུ་ནི། །དབུ་མའི་ཡར་སྣེ་སྤྱི་བོར་ཧཾ་ཡིག་མཚན། །མར་སྣེ་གསང་གནས་ཌཱཀི་བཞི་ཡི་མཚན། །ལྟེ་འོག་སུམ་མདོར་གཏུམ་མོའི་ཡེ་ཤེས་མེ། །ཨ་ཐུང་རྣམ་པ་མེ་ཡང་སོར་བཞི་འབར། །སྤྱི་བོར་པད་འབྱུང་མགྲིན་པར་སྤྱན་
རས་གཟིགས། །སྙིང་གར་རྟ་མགྲིན་ལྟེ་བར་གསང་ཡེ་རྣམས། །སྐུ་ཆུང་དབུ་མའི་ནང་དུ་ཚུད་པར་བསྒོམ། །གཡས་གཡོན་རོ་རྐྱང་གཉིས་དང་འཁོར་ལོ་ལྔ། །རྩ་འདབ་དེ་དག་མོས་པ་ཙམ་ཞིག་བསྒོམ། །དེ་ནས་བར་རླུང་གསུས་པ་ཐེར་བྱས་པས། །གཏུམ་མོའི་མེ་འབར་སྤྱི་བོའི་ཧཾ་ཡིག་ཞུ། །བདུད་རྩི་བྱང་སེམས་ཆར་ཟིམ་ལྟ་བུར་བབ། །སྤྱི་མགྲིན་སྙིང་ཁ་ལྟེ་བ་གསང་གནས་ཀྱི། །ལྷ་ཚོགས་རྣམས་ལ་མཆོད་པར་གྱུར་པས་མཉེས། །བཀྲག་མདངས་རྒྱས་ཤིང་འོད་ཟེར་སྣ་ཚོགས་འཕྲོས། །ཕྱི་རོལ་སྣོད་བཅུད་ཀུན་ལ་ཕོག་པ་ཡིས། །ཐམས་ཅད་བྱང་སེམས་དཀར་དམར་རྣམ་པར་ཞུ། །བདུད་རྩི་འོ་མའི་རྒྱ་མཚོ་ལྟ་བུར་གྱུར། །རླུང་ནི་ནང་དུ་རྔུབ་པ་དང་བསྟུན་ནས། །ཐམས་ཅད་ཚུར་འདུས་བདག་ལུས་ལ་ཐིམ་པས། །ཟག་མེད་ཏིང་འཛིན་བདེ་སྟོང་རྒྱས་པར་བྷོ། །བདེ་ཆེན་རྡོ་རྗེའི་བཟླས་པ་ཞེས་བྱའོ། །རླུང་ནི་ཕྱིར་ལ་ཕྱུང་བ་དང་བསྟུན་ཏེ། །བདག་གི་སྐུ་ལས་འོད་ཟེར་སྣ་ཚོགས་འཕྲོས། །ཕྱི་སྣོད་འཇིག་རྟེན་གཞལ་ཡས་ཁང་དུ་གྱུར། །ནང་བཅུད་སེམས་ཅན་ཐམས་ཅད་རིགས་ལྔ་དང་། །ཡུམ་ལྔའི་ཚོགས་སུ་གྱུར་པ་གསལ་བ་སྟེ། །རླུང་ནི་ནང་དུ་འཇུག་པ་དང་བསྟུན་ནས། །
ཐམས་ཅད་བདག་ལ་ཐིམ་པར་བསྒོམས་པ་ནི། །ལོངས་སྐུ་རྡོ་རྗེའི་བཟླས་པ་ཞེས་བྱའོ། །སླར་ཡང་ལུས་ལྷ་བཅས་པ་སྔར་ལྟར་ལས། །རླུང་ནི་ཕྱིར་ལ་ཕྱུང་བ་དང་བསྟུན་ནས། །འོད་ཟེར་སྣ་ཚོགས་འཕྲོ་བའི་རྩེ་མོ་ལས། །ཟས་འདོད་ཟས་དང་གོས་འདོད་རྣམས་ལ་གོས། །གང་ལ་གང་འདོད་ལོངས་སྤྱོད་ཆར་ལྟར་བབས། །འགྲོ་ཀུན་བདེ་སྐྱིད་ཕུན་སུམ་ཚོགས་པར་བསྒོམ། །དེ་ནི་སྤྲུལ་སྐུ་རྡོ་རྗེའི་བཟླས་པའོ། ༈ །དེ་ནས་དམིགས་པ་ཅི་ཡང་མི་བསྒོམ་པར། །སེམས་ལ་གང་ཤར་བཅོས་སླད་མེད་པ་རུ། །ངོ་བོ་རྗེན་པའི་སྟེང་དུ་མཉམ་པར་བཞག །དེ་ནི་ཆོས་སྐུ་རྡོ་རྗེའི་བཟླས་པའོ། ༈ །དེ་ནས་སྔར་ལྟར་མདུན་བསྐྱེད་ལུས་ལྷར་བཅས། །བསྐྱེད་ཅིང་སྤྱན་འདྲེན་མཆོད་བཞི་བསྟོད་བཞི་བྱ། །དེ་ནས་ལས་སྦྱོར་ཚུལ་གྱིས་དམིགས་པ་ནི། །བདག་མདུན་ཐུགས་ལས་འོད་ཟེར་དམར་པོ་ནི། །ལྕགས་ཀྱུའི་དབྱིབས་ཅན་ལྟ་བུ་གྲངས་མེད་འཕྲོས། །སེམས་ཅན་ཀུན་གྱི་སྙིང་ག་ནས་བཀུག་སྟེ། །ཐམས་ཅད་ཡི་དམ་ལྷ་ཡི་སྐུར་གསལ་བ། །ལུས་ནི་འོད་ཞུ་ལྟེ་བའི་གསང་ཡེར་ཐིམ། །སེམས་ནི་སྡིགྱུར་རང་གི་ཐུགས་ཀ་ཡི། །རྟ་མགྲིན་ཐུགས་སྲོག་
ཧྲཱིཿལ་ཐིམ་པར་བསྒོམ། །དེ་ནི་སྤྱི་ཁྱབ་དབང་གི་བཟླས་པའོ། །དེ་ཚེ་སྒྲིབ་སྦྱངས་སྔགས་རིང་བཟླས་པའམ། །ལྷ་ལྔའི་སྔགས་གཉིས་གང་བདེ་སྐབས་དང་བསྟུན། །དེ་ནས་གཏོར་བསྔོས་ཐུན་བསྡུ་གོང་དང་འདྲ། །ལས་སྦྱོར་ཡང་ནི་དེ་ལ་འདུས་པའོ། །དེ་ལྟར་ཞག་བདུན་ལས་ནི་མི་ཉུང་བར། །བསྒྲུབས་རྗེས་རྗེས་ཆོག་བྱས་ལ་མཚམས་བཀྲོལ་ལམ། །གསང་སྒྲུབ་སྦྲེལ་ན་རྗེས་ཆོག་མི་བྱ་བར། །མཆོད་པ་ཁ་གསོ་བྱས་ལ་གསང་སྒྲུབ་བྱ། །དེ་ལྟར་ནང་སྒྲུབ་མཁའ་སྤྱོད་དབང་པོས་གསུངས། །དམིགས་པ་ཐམས་ཅད་ཕྱོགས་གཅིག་གསུང་མོད་ཀྱིས། །ཐུན་རེར་དེ་དག་ཐམས་ཅད་རྫོགས་དཀའ་བས། །འདི་རྣམས་གང་རུང་བྱས་ལ་བསྒྲུབ་གསུངས་པས། །ཞག་གཅིག་ནང་དུ་དམིགས་པ་རྫོགས་པ་ཡིན། །གོ་རིམ་གཞུང་ནས་དཀྲུགས་ནི་གསུངས་ན་ཡང་། །སྔ་དྲོའི་བསྐྱེད་རིམ་ཉིན་གུང་རྩལ་སྦྱང་དང་། །དགོང་མོའི་རྫོགས་རིམ་འདི་ལྟར་བསྒོམ་པ་ལེགས། །སྐུ་བཞིའི་བཟླས་པ་རླུང་བཟུང་གཙོ་ཆེ་ཡང་། །སྔགས་བཟླས་རླུང་བཟུང་གང་གོམས་ཆོག་གསུངས་པས། །འདིར་ནི་སྔགས་བཟླས་གཙོ་བོ་བྱས་པ་ཡིན། །འཇམ་དབྱངས་ཆེན་པོའི་གསུང་ལེན་ལ་སོགས་པ། །འདི་རུ་མི་
བརྗོད་གཞན་དུ་གསལ་བར་བྱ། །ལུས་ལ་ལྷ་བཀོད་ནང་སྒྲུབ་ཟིན་བྲིས་འདི། །ཐབས་མཁས་མཐར་ཕྱིན་གཉིས་ཀྱིས་བསྐུལ་བ་དང་། །དྲིན་ཆེན་རིག་འཛིན་སྤྲུལ་སྐུའི་དགོངས་རྫོགས་ལ། །དམིགས་ནས་ལུག་ལོ་ས་གའི་བཅུ་དྲུག་ལ། །རཱ་ག་ཨ་སྱས་ཚིགས་བཅད་གོ་བདེར་བསྒྲིགས། །ཡི་གེ་པ་ནི་པདྨ་མཐར་ཕྱིན་ནོ། །འདི་བྲིས་ཉེས་འགེལ་ནང་སྒྲུབ་ལྷ་ལ་བཤགས། །དགེ་བས་སྤྲུལ་སྐུའི་ཟག་མེད་ཐུགས་དགོངས་རྫོགས། །བདག་དང་སློབ་མ་བརྒྱུད་པར་བཅས་པ་ལ། །འབྲེལ་ཐོགས་མཐོང་ཐོས་དྲན་རེག་འགྲོ་བ་ཀུན། །འཕོས་མ་ཐག་ཏུ་བདེ་ཆེན་ཞིང་སྐྱེས་ནས། །འཕགས་པ་སྤྱན་རིས་གཟིགས་དང་འབྲལ་མེད་ཤོག། །མངྒ་ལཾ། །བྷ་ཝནྟུ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།