བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་གསང་སྒྲུབ་བླ་ན་མེད་པའི་ཟིན་བྲིས།
བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་གསང་སྒྲུབ་བླ་ན་མེད་པའི་ཟིན་བྲིས་སོ།།
ན་མོ་ལོ་ཀེ་ཤྭ་ར་གུ་བྱ་དྷེ་ཝ་པཉྩཡེ། གསང་སྒྲུབ་ཐུགས་རྗེའི་ལྷ་ལ་ཕྱག་འཚལ་ལོ། །བཀའ་གནང་བྱིན་གྱིས་བརླབ་པར་མཛད་དུ་གསོལ། །སེམས་དཔའ་རྡོ་རྗེ་སྙིང་པོའི་རྒྱ་གཞུང་དོན། །མཁའ་སྤྱོད་དབང་པོའི་ཞལ་གདམས་སྙན་བརྒྱུད་ནི། །དེ་བཞིན་གཤེགས་པས་རྒྱས་པར་མཛད་པ་དང་། །དཀོན་མཆོག་འབངས་ཀྱིས་ཅུང་ཞིག་བསྡུས་པ་རྣམས། །ཆོ་ག་འདི་དང་བསྟུན་ཏེ་ཉམས་ལེན་ཐབས། །སྟ་གོན་ཚར་རྗེས་ལྷ་ལྔའི་བདག་བསྐྱེད་ནི། །དམ་ཅན་རྒྱ་མཚོའི་དཀྱིལ་འཁོར་རེ་རེའི་བར། །ཅུང་ཞིག་ངལ་བསོས་ལྷ་བསྐྱེད་ཁྱད་པར་འདི། །སྐད་ཅིག་ཉིད་ལ་གནས་གྱུར་
གསལ་གདབ་སྟེ། །རང་ཉིད་གཙོ་བོ་གཡས་བརྐྱང་གཡོན་བསྐུམ་བཞེངས། །ཕྱག་གཉིས་པད་ཕྲེང་འཛིན་པ་ཡུམ་ལ་འཁྱུད། དར་གྱི་ཤམ་ཐབས་ཅུང་ཟད་གྲོལ་བ་ཙམ། །མ་གཏོགས་ཞི་ཉམས་རྒྱན་སོགས་སྔོན་དང་འདྲ། །ཡུམ་ནི་ཟངས་གྲི་ཕྱར་ཞིང་ཐོད་ཁྲག་འཁྱུད། གཡོན་བརྐྱང་གཡས་བསྐུམ་ཡབ་དང་འཁྲིལ་བའོ། །དར་དང་རིན་ཆེན་རུས་པའི་རྒྱན་དང་ལྡན། །གཡས་ཀྱི་རྟ་མགྲིན་ཕག་མོ་ཡུམ་ལ་འཁྱུད། །གཡོན་གྱི་གསང་ཡེའི་སྐུ་ལ་རྟ་མགྲིན་སྦྱོར། །སྟེང་གི་པད་འབྱུང་ན་བཟའ་དཀར་མོས་འཁྱུད། །འོག་གི་མ་མགོན་ཞལ་སྦྱོར་མཐའ་སྐོར་དུ། །
རིགས་བཞིའི་ཌཀི་ཡབ་ཡུམ་ཞལ་སྦྱོར་རོ། །གཙོ་བོའི་སྐུ་ལས་ཕྱི་ནང་སྒྲིབ་མེད་པ། །སྟོང་པ་འོད་ཀྱི་རང་བཞིན་ཅན་གྱི་དབུས། །རྩ་གསུམ་འཁོར་ལོ་ལྔ་པོ་གསལ་གདབ་སྟེ། །དྷུ་ཏི་རོ་རྐྱང་མཐིང་དམར་དཀར་གསལ་དྲང་། །སྤྱི་བོའི་རྩ་འདབ་སུམ་ཅུ་སོ་གཉིས་དཀར། །མགྲིན་པའི་རྩ་འདབ་བཅུ་དྲུག་དམར་པོ་སྟེ། །སྙིང་ཁའི་བརྒྱད་མཐིང་ལྟེ་བའི་རེ་བཞི་སེར། །གསང་བའི་བཞི་ལྗང་ཀུན་ཀྱང་པད་འདབ་དབྱིབས། །རྩ་མདུད་དབུས་ལྔར་པད་ཟླའི་གདན་ལྔ་ལ། །སྤྱི་བོར་བདེ་གཤེགས་རིགས་ཀྱི་སྤྱན་རས་གཟིགས། །ཞལ་གཅིག་ཕྱག་གཉིས་འཁོར་ལོ་པད་མཚན་དྲིལ། །ཡུམ་ནི་དཀར་མོ་འཁོར་ལོ་གྲི་ཐོད་འཁྱུད། །རྩ་འདབ་སོ་གཉིས་ཡུམ་འདྲའི་ཊཱཀི་དཀར། །མགྲིན་པར་པདྨ་རིགས་ཀྱི་སྤྱན་གཟིགས་དམར། །པདྨ་དྲིལ་འཛིན་ཌའི་དམར་མོས་འཁྱུད། །སྙིང་ཁར་རྡོ་རྗེ་རིགས་ཀྱི་སྤྱན་གཟིགས་སྔོ། །རྡོ་རྗེ་དྲིལ་འཛིན་རང་འོད་ཡུམ་དང་སྦྱོར། །ལྟེ་བར་རིན་ཆེན་རིགས་ཀྱི་སྤྱན་གཟིགས་སེར། །རིན་ཆེན་དྲིལ་འཛིན་ཡུམ་ནི་སེར་མོ་སྦྱོར། །གསང་བར་ལས་ཀྱི་རིགས་ཀྱི་སྤྱན་གཟིགས་ལྗང་། །རྒྱ་གྲམ་དྲིལ་འཛིན་ཌཱཀི་ལྗང་མོ་འཁྲིལ། །ལྔ་ཀ་བཞེངས་སྟབས་
གཡས་བརྐྱང་གཡོན་བསྐུམ་སྟེ། །ཀུན་ཀྱང་དར་དང་རིན་ཆེན་རུས་པས་བརྒྱན། །ཡུམ་རྣམས་གཡས་བསྐུམ་གཡོན་བརྐྱང་གཉིས་མེད་འཁྲིལ། །རྩ་འདབ་ཌཀི་རྣམས་ཀྱང་ཡུམ་དང་མཚུངས། །རང་རྟགས་གྲི་ཐོད་འཛིན་ཅིང་འདོར་ཐབས་བཞེངས། །སྙིང་གའི་རྡོ་རྗེ་རིགས་ཀྱི་སྤྱན་གཟིགས་ཀྱི། །ཐུགས་ཀར་རྟ་མགྲིན་ཡབ་རྐྱང་གསལ་བ་དང་། །ཡུམ་གྱི་ཐུགས་ཀར་ཕག་མོ་ཞལ་གཉིས་མ། ཕྱིའི་་།སྤྱི་བོའི་བདེ་གཤེགས་རིགས་ཀྱི་སྤྱན་གཟིགས་ཀྱི། སྤྱི་བོའི་ནང་གི་སྤྱི་བོར་པདྨ་འབྱུང་གནས་ཡབ་རྐྱང་དང་། །ཡུམ་གྱི་སྤྱི་བོར་ཡུམ་མཆོག་ན་བཟའ་དཀར་་་་་ཕྱིའི། ལྟེ་བའི་རིན་ཆེན་རིགས་ཀྱི་སྤྱན་གཟིགས་ཀྱི། །ལྟེ་བའི་རིགས་བཞི་དཔའ་བོ་ཡབ་རྐྱང་དང་། ཕྱི་་་་།ཡུམ་གྱི་ལྟེ་བར་རིགས་བཞི་དཔའ་མོ་རྣམས། །དེ་དག་ཕན་ཚུན་ཐབས་ཤེས་ཚུལ་དུ་བཞུགས། །སྙིང་པོ་བཀོད་པ་རྒྱན་གྱི་ལྷ་ཞེས་བྱ། །དེ་ནས་འབྲུ་གསུམ་བཀོད་དང་སྤྱན་འདྲེན་དང་། །དབང་བསྐུར་རྒྱས་གདབ་ཆོ་གའི་གཞུང་བཞིན་ནོ། །དེ་ནས་བདག་བསྐྱེད་བཟླས་པའི་སྐབས་དེ་རུ། །ལས་ཀྱི་སྤྱན་རས་གཟིགས་ཀྱི་འོག་དེ་རུ། །ཡཾ་ཡིག་ལྗང་གུའི་སྟེང་དུ་རཾ་ཡིག་དམར། །སྤྱི་བོའི་བདེ་
གཤེགས་སྤྱན་གཟིགས་དབུ་གཙུག་ཏུ། །ཧཾ་ཡིག་དཀར་པོ་མགོ་བོ་ཐུར་བསྟན་དཀར། །འདི་རུ་བུམ་ཅན་རླུང་ནི་བཟུང་བའམ། །སྔགས་བཟླས་རླུང་བཟུང་གང་གོམས་ཆོག་གསུངས་པས། །བར་རླུང་གསུས་པ་ཐེར་ཙམ་བྱས་པ་ཡིས། །ཡཾ་ལས་རླུང་བྱུང་རཾ་ལས་མེ་འབར་ཏེ། །ཆུ་གནས་ཐམས་ཅད་གཏུམ་མོའི་མེ་ཡིས་གང་། །རྩ་གནས་ལྷ་ཚོགས་ཐམས་ཅད་འོད་དུ་ཞུ། །ལྷ་གྲངས་མཉམ་པའི་ཐིག་ལེ་རང་མདོག་གྱུར། །སྤྱི་བོའི་ཧཾ་ལས་བདུད་རྩིའི་ཆར་ཟིམ་ལྟར། །བབས་པས་ཐིག་ལེ་རྣམས་ལ་རེག་མ་ཐག །རྩ་གནས་ལྷ་ཀུན་སྔར་ལྟར་གསལ་བ་ལས། །སྔར་ལས་བཀྲག་མདངས་གཟི་བརྗིད་ཆེ་བར་བསྒོམ། །དེ་ནི་ཉི་ཟླ་ཁ་སྦྱོར་བཟླས་པའོ། །སྙིང་དབུས་རྟ་མགྲིན་ཐུགས་ཀར་པད་ཉིའི་སྟེང་། །ཧིམཐར་ཡི་གེ་བཅུ་པས་བསྐོར་བ་ལས། །དང་པོ་གཡས་སྐོར་དལ་བུས་འཁོར་བ་དང་། །དེ་ནས་ཇེ་མགྱོགས་ཤིན་ཏུ་མགྱོགས་པར་འཁོར། །དེ་ལས་བཟླ་བྱའི་སྔགས་ཕྲེང་ཟད་མེད་འཕྲོས། །སྐུ་ཡི་ནང་བརྒྱུད་རྟ་དབུའི་སྨིན་མཚམས་ཐོན། །རྡོ་རྗེ་སྤྱན་གཟིགས་དབུ་གཙུག་ནས་ཐོན་ཏེ། །པདྨ་སྤྱན་གཟིགས་སྐུ་ཡི་ནང་དུ་ཞུགས། །ཞལ་ནས་ཕྱུང་ཞིང་བདག་གི་ཞལ་ནས་ཐོན། །
ཡུམ་གྱི་ཞལ་ཞུགས་སྐུ་ཡི་ནང་བརྒྱུད་ནས། །ཐུགས་ཀའི་ཕག་མོའི་ཕག་ཞལ་སྨིན་མཚམས་ཞུགས། །ས་བོན་ཧྲིལ་གཡོན་སྐོར་གཅིག་བྱས་པས། །སྔར་མེད་ཡུམ་སྔགས་ཕྲེང་བ་གཡོན་སྐོར་བསམ། །དེ་ལས་སྔགས་ཕྲེང་འཕྲོས་པ་བྷ་གར་ཐོན། །ལྟེ་བའི་རིགས་བཞི་དཔའ་མོའི་དབུས་སུ་ཞུགས། །ཡུམ་གྱི་ལྟེ་བ་ནས་ཐོན་བདག་ཉིད་ཀྱི། །ལྟེ་བ་ནས་ཞུགས་རིན་ཆེན་སྤྱན་གཟིགས་ཀྱི། །ལྟེ་བར་རིགས་བཞི་དཔའ་བོའི་དབུས་སུ་ཞུགས། །དབུ་གཙུག་ནས་ཐོན་རྡོ་རྗེ་སྤྱན་གཟིགས་ཀྱི། །སྐུ་ཡི་ནང་བརྒྱུད་རྟ་མགྲིན་སྔགས་ལ་ཐིམ། །དེ་ལྟར་རྟ་མགྲིན་ཐུགས་ཀར་སྔགས་གཡས་འཁོར། །ཞལ་གཉིས་མ་ཡི་ཐུགས་ཀར་སྔགས་གཡོན་འཁོར། །བདག་ཞལ་ཡུམ་ཞལ་ཡུམ་ལྟེ་བདག་གི་ལྟེ། །སྔགས་ཕྲེང་མགལ་མེའི་འཁོར་ལོ་ལྟར་བསྐོར་ཞིང་། །ངག་ཏུ་ཡི་གེ་བཅུ་པ་བཟླ་གསུངས་ཏེ། །འདི་ནི་གསང་སྔགས་འབྱིན་འཇུག་བཟླས་པའོ། །དེ་ནས་རང་ཉིད་ཡབ་ཀྱི་གསང་བ་ནི། །རྡོ་རྗེ་རྩེ་ལྔ་ལྟེ་བ་ཧཱུྃ་གིས་མཚན། །ཡུམ་གྱི་གསང་བར་པདྨ་འདབ་བཞི་དམར། །ཟེའུ་འབྲུ་ལ་ཨ་ཡིག་དམར་པོས་མཚན། །གཉིས་ཀའི་བུ་ག་ཕཊ༔ཡིག་དམར་ནག་བཀག །ཡབ་ཡུམ་
སྦྱོར་བ་བདེ་བ་ཆེན་པོའི་སྒྲ། །ཧ་ཧ་སི་སི་ཀུན་དྷུར་བཛྲ་དྷིཀ། །ཞེས་པའི་སྒྲ་ཡིས་ཕྱོགས་བཅུའི་ཞིང་ཁྱབ་པས། །རྒྱལ་བ་སྲས་བཅས་སྤྱན་དྲངས་བདག་ལ་ཐིམ། །བདུད་རྩི་བྱང་སེམས་གྱུར་ནས་བདག་ལུས་གང་། །བདུད་རྩིའི་ཟེགས་མ་བ་དག་ལྟ་བུ་ཞིག །རྡོ་རྗེའི་ཁོང་གསེང་དུ་ཆད་རྡོ་རྗེའི་རྩེར། །ཐིག་ལེ་དཀོར་པོ་ཡུངས་དཀར་རྡོག་པོ་ཙམ། །དེ་ནང་དཀྱིལ་འཁོར་མཚན་ཉིད་ཡོངས་རྫོགས་པ། །མེ་ལོང་ནང་གི་གཟུགས་བརྙན་ལྟ་བུར་བསྒོམ། །དེ་ནི་བྱིན་རླབས་གསང་བའི་བཟླས་པའོ། །དེ་ནས་རང་གི་སྐུ་ལས་འོད་འཕྲོས་པས། །འོག་མིན་མཁའ་སྤྱོད་ཉི་ཤུ་རྩ་བཞི་དང་། །རང་བཞིན་དག་པའི་གནས་མཆོག་ཐམས་ཅད་ནས། །རིགས་ཀྱི་དཔའ་བོ་ཌཱཀི་ཐམས་ཅད་ནི། །དཀར་མོའི་ཚོགས་དང་དེ་བཞིན་དམར་མོའི་ཚོགས། །སྔོན་མོ་སེར་མོ་ལྗང་མོའི་སྡེ་ཚན་རྣམས། །བུན་ནེ་ཆིལ་ལེ་དཔུང་དཔུང་ཐིབ་ཐིབ་བྱོན། །དཀར་པོ་ཐམས་ཅད་སྤྱི་བོའི་སྤྱན་གཟིགས་ཐིམ། །དམར་པོ་མགྲིན་པ་སྔོན་པོ་ཐུགས་ཀར་དང་། །སེར་པོ་ལྟེ་བ་ལྗང་གུ་གསང་བར་ཐིམ། །དེ་ནི་བདེ་མཆོག་དབང་བསྒྱུར་བཟླས་པའོ། །དེ་ནས་གསང་གནས་གཏུམ་མོའི་མེ་འབར་ནས། །སྤྱི་
བོའི་ཧཾ་ཞུ་བྱང་སེམས་བདུད་རྩིའི་རྒྱུན། །སྤྱི་བོའི་རྩ་འདབ་གང་ཞིང་མགྲིན་པར་བབས། །དགའ་བའི་ཡེ་ཤེས་རྒྱུད་ལ་སྐྱེ་བར་བསམ། །མགྲིན་པ་གང་ཞིང་སྙིང་གར་བབ་པ་ཡིས། །མཆོག་ཏུ་དགའ་བའི་ཡེ་ཤེས་རྒྱུད་ལ་སྐྱེས། །སྙིང་ག་གང་ཞིང་ལྟེ་བར་བབ་པ་ཡིས། །ཁྱད་པར་ཅན་གྱི་དགའ་བའི་ཡེ་ཤེས་སྐྱེས། །ལྟེ་བ་གང་ཞིང་གསང་བར་བབ་པ་ཡིས། །ལྷན་ཅིག་སྐྱེས་པའི་དགའ་བའི་ཡེ་ཤེས་སྐྱེས། །དགའ་བ་ཞེས་བྱ་ལུས་སེམས་བདེ་བ་སྟེ། །ངོ་བོ་སྟོང་པར་རྟོགས་པ་ཡེ་ཤེས་ཡིན། །བདེ་སྟོང་ཟུང་དུ་འཇུག་པ་ཕྱག་ྋརྒྱ་ཆེན་པོའོ། །དེ་ནས་རིག་པ་སྤྱི་བོའི་ཧཾ་ལ་གཏད། །ཐིག་ལེ་ཆུ་ཡི་རླབས་བཞིན་གྱེན་དུ་ལོག །རྩ་གནས་བཞི་ལ་མས་བརྟན་དགའ་བཞི་མྱོང་། །ཐིག་ལེའི་དྭངས་མ་སྤྱི་བོའི་ཧཾ་ལ་འདུས། །དེ་ནི་དབང་བཞི་གཅིག་རྫོགས་བཟླས་པའོ། །དེ་ནས་མི་དམིགས་ངང་དུ་ཡུད་ཙམ་བཞག །དེ་ནས་མདུན་བསྐྱེད་ལུས་ལྷར་བཅས་པ་ནི། །གསལ་བཏབ་མཆོད་བཞི་བསྟོད་བཞི་གཞུང་ལྟར་བྱ། །བདག་མདུན་རྟ་མགྲིན་ཐུགས་ཀར་པད་ཉིའི་སྟེང་། །ཧིམཐར་ལྷ་ལྔའི་སྔགས་རིང་གཡས་སུ་འཁོར། །དེ་ལས་འོད་ཟེར་དམར་པོ་འོད་ལྔའི་མདངས། །
རྟ་མགྲིན་སྐུ་བརྒྱུད་རྟ་ཞལ་སྨིན་མཚམས་ཐོན། །རྡོ་རྗེ་སྤྱན་གཟིགས་སྤྱི་གཙུག་ནས་ཐོན་ཏེ། །པདྨ་སྤྱན་གཟིགས་སྐུར་ཞུགས་ཞལ་ནས་ཐོན། །བདག་གི་ཞལ་ནས་མདུན་བསྐྱེད་ཞལ་དུ་ཞུགས། །མདུན་བསྐྱེད་མགྲིན་པ་ཐུགས་ཀའི་ལྷ་བརྒྱུད་ནས། །མདུན་བསྐྱེད་ལྟེ་བའི་ལྷ་བརྒྱུད་རང་ཉིད་ཀྱི། །ལྟེ་བ་ནས་ཞུགས་ཐུགས་ཀར་ཐིམ་པར་བསམ། །དེ་ལྟར་འོད་ཟེར་མགལ་མེའི་འཁོར་ལོ་ལྟར། །དེ་ནས་འོད་ཟེར་དེ་ཡང་སྔགས་ཕྲེང་བསྒྱུར། །དེ་ལས་འོད་ཟེར་ཕྱོགས་བཅུར་འཕྲོས་པ་ཡིས། །བླ་མ་ཡི་དམ་སངས་རྒྱས་བྱང་སེམས་དང་། །དཔའ་བོ་མཁའ་འགྲོ་ཐམས་ཅད་མཆོད་པས་མཉེས། །དེ་ཀུན་ཐུགས་རྗེ་ཆེན་པོ་ཡབ་ཡུམ་དང་། །རིགས་ལྔའི་མཁའ་འགྲོའི་ཚོགས་ཀྱི་སྐུར་གྱུར་ཏེ། །སྡེ་ཚན་སྡེ་ཚན་ཆར་དྲག་བཞིན་དུ་བབ། །བདག་མདུན་གནས་ལྔ་སོ་སོར་སིབ་སིབ་ཐིམ། །ཚོགས་རྫོགས་སྒྲིབ་སྦྱང་དངོས་གྲུབ་ཐོབ་པར་བསྒོམ། །ཡིག་བཅུ་སྒྲིབ་སྦྱང་སྔགས་རིང་བཅས་པ་བཟླ། །དེ་ནས་ལག་མཆོད་ཚོགས་དང་གཏོར་བསྔོས་དང་། །ཆག་མེད་གཏོར་བསྔོས་གང་དགོས་དེ་རུ་བྱ། །ཐུན་བསྡུ་བསྔོ་སྨོན་དེ་རུ་བྱ་བ་ཡིན། །དེ་ལྟར་ཐུན་བཞིར་ཉམས་ལེན་ཁྱད་མེད་དེ། །ཚོགས་
ནི་ཐུན་བཞི་མ་ལྕོགས་དགོང་མོ་ཆོག །དེ་ལྟར་ཞག་པོ་བདུན་ལས་མི་ཉུང་བྱ། །དེ་ནས་དངོས་གྲུབ་བླང་ཞིང་རྗེས་ཆོག་བྱ། །སྦྱིན་སྲེག་འགྲུབ་ན་ལེགས་ཤིང་མ་འགྲུབ་རུང་། །རྡོ་རྗེ་སྙིང་པོས་མཛད་པའི་གསང་སྒྲུབ་ཀྱི། །ཉམས་ལེན་ཚིག་ཉུང་དོན་གསལ་གོ་བདེ་འདི། །མཐར་ཕྱིན་ཐབས་མཁས་གཉིས་ཀྱིས་བསྐུལ་བ་དང་། །གཏེར་སྟོན་སྤྲུལ་སྐུའི་དགོངས་རྫོགས་ལ་དམིགས་ནས། །མེ་ལུག་ས་ག་ཟླ་བའི་བཅུ་བདུན་གྱི། །སྔ་དྲོའི་ཐུན་ལ་རཱ་ག་ཨ་སྱས་གདམས། །ཡི་གེ་པ་ནི་དགེ་བཤེས་མཐར་ཕྱིན་ནོ། །འདི་ལ་ཉེས་འགལ་གསང་སྒྲུབ་ལྷ་ལ་བཤགས། །དགེ་བས་འགྲོ་ཀུན་སྤྱན་རས་གཟིགས་འགྲུབ་ཤོག། །།མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།