བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། བདུད་རྩི་ལག་མཆོད་ཀྱི་ཟིན་བྲིས་བལྟས་ཆོག་ཏུ་བཀོད་པ།
བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། བདུད་རྩི་ལག་མཆོད་ཀྱི་ཟིན་བྲིས་བལྟས་ཆོག་ཏུ་བཀོད་པ་བཞུགས་སོ།།
ན་མོ་ལོ་ཀེ་ཤྭ་ར་ཌཱཀི་ཡེ། སྤྱན་རས་གཟིགས་དབང་མཁའ་འགྲོའི་ཚོགས་བཅས་ལ། ཕྱག་འཚལ་སྐྱབས་སུ་མཆིའོ་བཀའ་གནང་སྩོལ། །སྒྲུབ་པའི་དུས་སམ་དུས་བཟང་ཚོགས་མཆོད་དུས། །སྡེར་སོགས་འབྲུ་ཡིས་བཀང་སྟེ་ཐོད་པ་ནི། །སྐྱོན་མེད་མར་གྱིས་བྱུག་ནང་ཆང་ཕུད་བཀང་། །བདུད་རྩི་རིལ་བུ་མེད་ན་སིནྡྷར་བཏབ། །རང་གི་མདུན་བཞག་བདག་བསྐྱེད་གསལ་བཏབ་ནས། །པདྨནྟ་ཀྲྀཏ་སྔགས་ཀྱིས་མ་དག་སྦྱངས། །ཤུ་ནྱ་ཏཱ་ཡི་སྔགས་ཀྱིས་སྟོང་པར་བསམ། །སྟོང་པའི་ངང་ལས་ཨ་ལས་ཡེ་ཤེས་ཀྱི་ཀ་པཱ་ལ་ཕྱི་དཀར་བ་ཟླ་བའི་རང་བཞིན། ནང་དམར་བ་ཉི་མའི་རང་བཞིན་ཡངས་ཤིང་རྒྱ་ཆེ་བའི་ནང་དུ། གོ་ཀུ་དྷ་ཧ་ན་ལས་
ཤ་ལྔ་དབུགས་དང་བྲལ་མ་ཐག །བྷི་མུ་མ་ར་ཤུ་ལས་བདུད་རྩི་ལྔ། །རླངས་པ་མ་ཡལ་བ། དེའི་སྟེང་དུ་ཡེ་ཤེས་ལྔའི་རང་བཞིན་ཨོཾ་བྷཾ་ཨོཾ་ཛི་ཁཾ་དེ་རྣམས་འོད་དུ་ཞུ་ནས། དམ་ཚིག་གི་བདུད་རྩི་མུ་ཏིག་མདོག་ལ་སྦྲང་རྩིའི་རོ་དང་ལྡན་པ་འོ་མའི་རྒྱ་མཚོ་ལྟ་བུར་གྱུར། ཨོཾ་ཨཱཿཧཱུྃ་ཧ་ཧོ་ཧིཿ དེ་ནས་སྲིན་ལག་གཡོན་པས་ཐོད་པའི་ཁར་ཟླུམ་སྐོར་བྱ་ཞིང་། ཨོཾ་སྭ་བྷ་ཝ་སོགས། རང་བཞིན་སྟོང་པ་ཉིད་དུ་གྱུར། ཡང་སྲིན་ལག་གིས་དེའི་སྟེང་དུ་གྲུ་གསུམ་བྲི་ཚུལ་བྱ་ཞིང་། ཨོཾ་ཨཱཿཧཱུྃ་ངོ་བོ་བདེ་བ་ཆེན་པོར་གྱུར། དེའི་ནང་དུ་རོའི་ལྷ་མོ་ཀྲོ་དྷི་སེར་མོའི་ལྟེ་བ་ཡན་ཆད་ཆང་གི་སྟེང་དུ་ཐོན་པ། རྒྱན་
ཐམས་ཅད་ཀྱིས་བརྒྱན་ཅིང་ཕྱག་གཉིས་བདུད་རྩིའི་ཐོད་པ་ཐོགས་ནས་ལྷ་རྣམས་ལ་མཆོད་པའི་སྤྲིན་སྤྲོ་བའོ། །སྲིན་ལག་གཉིས་ཀྱིས་ལག་པ་གཉིས་ལ་ཆང་གཏོར་ཞིང་། ཨོཾ་ཧྲིཔདྨན་སོགས། བརྗོད་ཅིང་ལག་གཉིས་བསྣོལ་ཏེ་ནུ་མ་གཉིས་ཀྱི་ཐད་དུ་ཕྱིའོ། །སྲིན་ལག་གཡས་ཆང་ལ་བསྒྲེས་ནས་ལག་མཐིལ་གཡོན་དུ་ཟླུམ་སྐོར་བྲི་ཞིང་། ཨོཾ་སྭ་བྷ་ཝ་སོགས། གཡོན་སྐོར་དུ་ཆོས་འབྱུང་བྲི་ཞིང་། ཨོཾ་ཨཱཿཧཱུྃ། ལག་མཐིལ་གཡོན་དུ་ཐིག་ལེ་ལྔ་བྱ་ཞིང་། དབུས་སུ་ཐུགས་རྗེ་ཆེན་པོ་ཡབ་ཡུམ། ཤར་དུ་པད་འབྱུང་ཡབ་ཡུམ། ལྷོར་རྟ་མགྲིན་ཡབ་ཡུམ། ནུབ་ཏུ་གསང་ཡེ་ཡབ་ཡུམ། བྱང་དུ་ཆོས་སྐྱོང་ཡབ་ཡུམ་རྣམས་གསལ་བ་ལས། འོད་འཕྲོས་ཡེ་ཤེས་པ་ནམ་མཁར་སྤྱན་དྲངས། ༈ ཧཱུྃ། རང་བཞིན་རྣམ་དག་ཕོ་བྲང་ནས། །མགོན་པོ་ཚེ་དབང་འོད་དཔག་མེད། །སྤྱན་རས་གཟིགས་དབང་འཁོར་དང་བཅས། །འགྲོ་བའི་དོན་དུ་སྤྱན་འདྲེན་ན། །ཐུགས་རྗེས་དགོངས་ནས་གཤེགས་སུ་གསོལ། །ཨོཾ་བཛྲ་གུ་རུ་པདྨ་སིདྡྷི་ཧཱུྃ། ཨོཾ་ཨཱཿཧཱུྃ་ཧི༔ ཨོཾ་མ་ཎི་པདྨེ་ཧཱུྃ། དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ར་ཙ་ཧཱིཡ། ཨེ་ཨཱཿ་ར་ལླི་ཧྲཱི་ཧཱུྃ། ཨ་ཀརྨ་ཡ་ས་མ་ཡ་ཛ་ཛཿ ཕོ་ཕོ་ལཾ། ཛཧཱུྃ་བཾ་ཧོ༔ དམ་ཚིག་སེམས་
དཔའ་དང་གཉིས་སུ་མེད་པར་གྱུར། ཨགྷཾ་སོགས། རཱུ་པ༴ ཤབྡ༴ གདྡྷེ༴ རྭ་ས༴ སྤརྴེ་པྲ་ཏིཙྪ་པུ་ཛ་ཧོ། མ་ཧཱ་སུ་ཁ་པཱུ་ཛ་ཧོ༔ པཉྩ་ཨ་མྲྀ་ཏ་ཨོཾ་ཨཱཿཧཱུྃ། ༈ །ཧཱུྃ༔ ཆོས་སྐུ་སྐྱེ་འགག་མེད་པ་ལ། །འཇའ་ཚོན་ལྟ་བུའི་གཟུགས་ཀྱི་སྐུ། །ལོངས་སྐུ་མཚན་དང་དཔེ་བྱད་ལྡན། །གང་ལ་གང་འདུལ་སྐུར་སྤྲུལ་ནས། །འགྲོ་བ་མ་ལུས་འདྲེན་མཛད་པའི། །སྤྱན་རས་གཟིགས་ལ་ཕྱག་འཚལ་བསྟོད། །སྐྱེ་བ་མེད་པའི་རང་བཞིན་ལས། །འགག་པ་མེད་པའི་སྐུར་སྟོན་པ། །གནས་པ་མེད་པའི་རྣལ་འབྱོར་ལས། །ཆགས་པ་མེད་པར་འགྲོ་དོན་མཛད། །འགྱུར་བ་མེད་པའི་དངོས་གྲུབ་སྩོལ། །ཌཱཀི་མ་ལ་ཕྱག་འཚལ་བསྟོད། །རྡོ་རྗེ་རིགས་དང་རིན་ཆེན་རིགས། །པདྨའི་རིགས་དང་ལས་ཀྱི་རིགས། །རིགས་བཞིའི་དཔའ་བོ་དཔའ་མོ་ལ། །གུས་པའི་ཚུལ་གྱིས་ཕྱག་འཚལ་བསྟོད། །མཆོག་དང་ཐུན་མོང་དངོས་གྲུབ་ནི། །མྱུར་བ་ཉིད་དུ་བསྩལ་དུ་གསོལ། །ལག་པ་གཉིས་ཆོས་འབྱུང་གི་ཕྱག་རྒྱ་བདུད་རྩིའི་སྟེང་དུ་སྒྲུབ་ལ་གཡོན་དུ་དལ་གྱིས་བསྐོར་ཞིང་། ཡབ་ཡུམ་སྙོམས་འཇུག་གི་སྦྱོར་མཚམས་ནས་ཡེ་ཤེས་ཀྱི་བདུད་རྩི་བབས་ནས་ཐོད་པར་ཐིམ་
པར་གྱུར། ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཧཱུྃ་ཧཱུྃ། ལག་པའི་ལྷ་ཚོགས་རང་ལ་ཐིམ་པར་གྱུར། ཅེས་ལག་པ་གཡོན་སྤྱི་བོར་བྱུག །སྲིན་ལག་གཡོན་གྱིས་བདུད་རྩི་ལན་གསུམ་དཀྲུག་ཚུལ་བྱ་ཞིང་། དམ་ཚིག་གི་བདུད་རྩི་དང་ཡེ་ཤེས་ཀྱི་བདུད་རྩི་གཉིས་སུ་མེད་པར་གྱུར། ཨོཾ་ཨཱཿཧཱུྃ། གཡོན་གྱི་སྲིན་ལག་གིས་བདུད་རྩི་བླངས་ལ། ནམ་མཁར་གཏོར་ཞིང་། བྱིན་རླབས་ཀྱི་རྩ་བ་བཀའ་བརྒྱུད་བླ་མ་རྣམས་ཀྱི་ཞལ་དུ་ཨོཾ་ཨཱཿཧཱུྃ། ཞེས་མཆོད་པའི་སྤྲིན་དུ་གྱུར་པར་བསམ་ཞིང་། བར་སྣང་དུ་གཏོར་ལ། དངོས་གྲུབ་ཀྱི་རྩ་བ་ཡི་དམ་ལྷ་ཚོགས་རྣམས་ཀྱི་ཞལ་དུ་ཨོཾ་ཨཱཿཧཱུྃ། རང་གི་ཐད་དུ་གཏོར་ལ། ཕྲིན་ལས་ཀྱི་རྩ་བ་མཁའ་འགྲོ་ཆོས་སྐྱོང་རྣམས་ཀྱི་ཞལ་དུ་ཨོཾ་ཨཱཿཎཱཧཱུྃ། བདུད་རྩིའི་ཟེགས་མ་རྟ་མགྲིན་གྱི་ཚོགས་སུ་གྱུར་པས་བགེགས་ཐམས་ཅད་བསྐྲད་པར་གྱུར། དྭིཔདྨནྟ་ཀྲྀཏ་གནོད་བྱེད་ཨུ་ཙ་ཏ་ཡ་ཕཊ༔ གཡས་གཡོན་དུ་གཏོར་ཞིང་། འཁོར་དུ་འཚོགས་པ་ཐམས་ཅད་དཔའ་བོ་དཔའ་མོར་གྱུར། མཆོད་རྫས་ཐམས་ཅད་བདུད་རྩི་ལོངས་སྤྱོད་མཆོད་པའི་སྤྲིན་ཕུང་དུ་གྱུར། གནས་ཁང་དང་རང་གི་བ་སྤུའི་བུ་ག་ཐམས་ཅད་ཁྲོ་ཆུང་གིས་གཏམས་པར་གྱུར། སྤྱི་བོ་མགྲིན་པ་ཐུགས་ཀ་ལྟེ་བར་ཐིག་ལེ་བྱ་ཞིང་ལྕེ་ལ་ཡང་བཞག །ལུས་ཀྱི་ལྷ་རྣམས་མཆོད་པས་
མཉེས་ནས་དངོས་གྲུབ་ཐོབ་པར་གྱུར། ཀཱ་ཡ་སིདྡྷི་ཨོཾ། ཝཱཀྐ་སིདྡྷི་ཨཱཿ ཙིཏྟ་སིདྡྷི་ཧཱུྃ། སརྦ་སིདྡྷི་ཧྲཱི༔ བདུད་རྩི་དེ་ཡིས་ཚོགས་བྲན་ཚོགས་བྱ་ཞིང་། །གཏོར་བསྔོས་དུས་སུ་བདུད་རྩི་དེ་ཡིས་བྲན། །དཀར་བགེགས་ལ་སོགས་དེ་ཡིས་བྲན་མི་རུང་། །བཀུག་གཞུག་མ་ཚར་བར་དུ་ཐུན་གཏོར་ཡང་། །དེ་ཡིས་བྲན་པར་བྱ་བ་མ་ཡིན་ནོ། །རྒྱུན་དུ་དཀྱིལ་འཁོར་མདུན་གྱི་མཆོད་སྟེགས་ཁར། །བཞག་སྟེ་ཁ་ཆོད་ལེགས་པར་བརྒྱབས་བྱས་ནས། །ཤིན་ཏུ་གཙང་བར་བྱ་བ་གལ་ཆེའོ། །དེ་ལྟར་རྒྱལ་བ་རྒྱ་མཚོའི་ལག་མཆོད་འདི། །རོལ་པའི་རྡོ་རྗེ་དེ་བཞིན་གཤེགས་པ་དང་། །དཀོན་མཆོག་འབངས་ཀྱིས་མཛད་དང་ཚན་པ་གསུམ། །ཉང་གི་གཏེར་དང་སངས་རྒྱས་གླིང་པའི་གཏེར། །ཀུན་གྱི་དོན་བསྡུས་ལག་ཏུ་བླངས་བདེར་བྱས། །རྐྱེན་ངན་བར་ཆད་ཐམས་ཅད་ཞི་བ་དང་། །དངོས་གྲུབ་རྣམ་གཉིས་ཐོབ་པར་ཨོ་རྒྱན་གསུངས། །རྒྱུན་དུ་བདག་བསྐྱེད་གསལ་བར་བྱས་པའི་རྗེས། །འདི་ཉིད་དམིགས་པ་གསལ་བས་ཇི་བཞིན་བྱ། །ཆང་བཞིན་མ་འདྲེས་བྷནྡྷའི་ཆང་དེ་ཉིད། །ལུས་ལྷ་མཆོད་པར་དམིགས་ནས་བཏུང་བྱས་པ། །ཆང་འཐུང་བ་ཡིས་ཉེས་པ་མི་འབྱུང་ངོ་། །གསང་སྔགས་ཐབས་ནི་མང་པའི་ཁྱད་པར་ལགས། །ཚོགས་ཆེན་ལ་སོགས་རྒྱས་པའི་ཆང་ལ་ཡང་། །ལག་མཆོད་བདུད་རྩི་བསྲེས་པས་ཉེས་པ་ཁེགས། །དམ་རྫས་དངོས་གྲུབ་ཐོབ་པའི་རྒྱུ་རུ་འགྱུར། །དུག་ཉིད་བདུད་རྩིར་བསྒྱུར་བའི་གདམས་པ་ཟབ། །རྒྱལ་བ་རྒྱ་མཚོའི་
ཟིན་བྲིས་ཆ་ཚང་ཕྱིར། །མཐར་ཕྱིན་ཐབས་མཁས་གཉིས་ཀྱིས་བསྐུལ་བ་དང་། །དྲིན་ཆེན་སྤྲུལ་སྐུའི་དགོངས་རྫོགས་ལ་དམིགས་ནས། །མེ་ལུག་ས་ག་ཟླ་བའི་བཅུ་དྲུག་གི་་།དགོང་མོའི་ཐུན་ལ་རཱ་ག་ཨ་སྱས་གདམས། །ཡི་གེ་པ་ནི་སློབ་བུ་མཐར་ཕྱིན་ནོ། །འདི་བྲིས་ཉེས་འགལ་ལྷ་དང་ཌཀིར་བཤགས། །དགེ་བས་མཆོད་པའི་སྤྲིན་ཕུང་དུ་གྱུར་ནས། །སྐུ་གསུམ་དག་པའི་ཞིང་ཁམས་གར་བཞུགས་ཀྱང་། །སྤྲུལ་པའི་སྐུ་ཡི་དགོངས་པ་རྫོགས་བྱེད་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།