ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལས། ཡབ་ཡུམ་དྲིལ་སྒྲུབ་རྒྱུན་ཁྱེར་གྱི་བུ་ཡིག
ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལས། ཡབ་ཡུམ་དྲིལ་སྒྲུབ་རྒྱུན་ཁྱེར་གྱི་བུ་ཡིག་བཞུགས་སོ།།
ན་མོ་གུ་རུ་ལོ་ཀེ་ཤྭ་ར་ཡེ། རྒྱལ་བ་རྒྱ་མཚོ་རྒྱུན་ཁྱེར་བྱེད་པའི་དུས། །དུས་བཟང་ངམ་ནི་མཆོད་རྫས་འཛོམ་པའི་ཚེ། །ཚོགས་ཀྱི་འཁོར་ལོ་གཞུང་ལྟར་ཚར་བའི་རྗེས། །མདུན་གྱི་ནམ་མཁའི་ཚོགས་མགྲོན་ལྷ་རྣམས་ཀྱི། །དཔྲལ་མགྲིན་ཐུགས་ཀ་ལྟེ་བ་གསང་གནས་ནས། །འོད་ཟེར་དཀར་དམར་མཐིང་སེར་ལྗང་གུ་དང་། །སྐུ་དང་སྔགས་ཕྲེང་ཕྱག་མཚན་དཔག་མེད་འཕྲོས། །རང་གི་ལུས་ཀྱི་གནས་ལྔར་ཐིམ་པ་ཡིས། །སྐུ་གསུང་ཐུགས་ཡོན་ཕྲིན་ལས་བྱིན་རླབས་དང་། །དབང་དང་དངོས་གྲུབ་ཐམས་ཅད་ཐོབ་པར་བསྒོམ། །རོལ་མོ་དབྱངས་བཅས་སྤྱན་འདྲེན་ཚར་
གཅིག་རྗེས། །སྔགས་རིང་མཇུག་ཏུ་འདི་སྦྱར་གསུམ་བདུན་བརྗོད། །ཀཱ་ཡ་ཝཱཀ་ཙིཏྟ་གུརྦ་ཀརྨ་སིདྡྷི་ཧཱུྃ། དེས་ནི་རྒྱུན་སྒྲུབ་དངོས་གྲུབ་ལེན་ཆོག་དང་། །བདག་འཇུག་བསྡུས་པའི་དོན་ཡང་ཚང་བ་སྟེ། །སྔོན་གྱི་ཕྱག་ལེན་རྒྱུན་ལ་ཡོད་དོ་ཞེས། །མཚུར་ཕུ་འཇམ་དབྱངས་ཆེན་པོའི་ཞལ་གདམས་ཡིན། །འདི་ཡི་ལས་སྦྱོར་གཙོ་བོ་སྦྱིན་སྲེག་སྟེ། །དཀར་གསུམ་མངར་གསུམ་ཤ་ཕུད་བཟང་སྨན་དང་། །གང་འདོད་ཟས་སྣ་འབྲུ་སྣ་གང་རྙེད་དང་། །དར་ཟབ་ཕྲུག་གི་དུམ་བུ་རྙེད་ཚད་བསྲེ། །སྒྲུབ་རྫས་རིལ་བུ་རྙེད་ན་མཆོག་ཡིན་ཏེ། །མ་རྙེད་བདུད་རྩི་རིལ་བུའམ་སིནྡྷཱར་
བཏབ། །གུར་གུམའམ་ཆང་ཕུད་གཙང་མ་བླུག་ལ་སྒྲོགས། །དེ་ནང་ཕྱུར་བ་ཕྱེ་མར་ཅི་མང་བསྲེ། །མང་དུ་བྱས་ལ་སྣོད་གཙང་ནང་དུ་འཚག །ཤུག་པའམ་ཙནྡན་རྙེད་ན་མཆོག་ཡིན་ཏེ། །འདི་ལ་ཐབ་སོགས་བྲིས་པ་མེད་ཀྱང་ཆོག །མདུན་མེའམ་ནི་ཐབ་ཀྱི་མེ་ལའང་རུང་། །མེ་དབུས་སྐད་ཅིག་མཁའ་འགྲོ་གཙོ་འཁོར་ནི། །ཐུགས་ཀའི་འཇིག་རྟེན་དབང་ཕྱུག་བཅས་པ་བསྐྱེད། །སྤྱན་འདྲེན་ནང་ནས་རྟ་མགྲིན་ཆོས་སྐྱོང་བསྒྱུར། །དབང་བསྐུར་མི་དགོས་བཞུགས་གསོལ་བྱས་པས་འཐུས། །ཨོཾ། མཆོད་ཡོན་བདུག་སྤོས་ལ་སོགས་ཚིགས་ཟློབཅད་དང་། །ཨརྒྱུ་ལ་སོགས་སྔགས་ཀྱིས་མཆོད་བྱས་ལ། །བསྲེག་རྫས་སྡེར་གང་ཙམ་ཞིག་བྲན་བྱས་ལ། །ཨ་ཀཱ་རོ་ཡི་སྔགས་ཀྱིས་བྱིན་གྱིས་བརླབས། །ལྷ་ལྔའི་སྔགས་རིང་ཉེར་བརྒྱད་ཧཱུྃ་ཛའི་མཐར། །བཱ་སུ་ན་ན་ཥ་དྷེ་པུཎྚི་ཀུ་རུ་ཡེ་སྭཱ་ཧཱ། རྫོ་ས་རེ་འདེབས་དང་སྔགས་རེ་སྤྲད་བྱ་སྟེ། །བརྒྱ་དང་རྩ་བརྒྱད་བར་དུ་ཕུལ་བ་ཡིས། །མཉེས་ནས་དགོས་འདོད་ཆར་ལྟར་འབེབས་པར་བསམ། །ཡུམ་གྱི་བསྟོད་པ་ཚང་བར་བྱེད་པ་ཡིན། །དེས་ནི་སྦྱིན་སྲེག་ཚར་གཅིག་ཚང་བ་སྟེ། །གཅིག་གསུམ་ལྔ་བདུན་ལ་སོགས་ཅི་ལྕོགས་བྱ། །རྗེས་ཆོག་ཨརྒྷཾ་
སོགས་ཀྱིས་མཆོད་བྱས་ཤིང་། །བསྟོད་པར་འོས་པ་ལ་སོགས་ཤོ་ལོས་བསྟོད། །དེ་ནས་ལྷ་རྣམས་འོད་ཞུ་བདག་ལ་བསྟིམ། །གནས་བཟང་དུས་བཟང་རྫས་སྣ་འཛོམ་ན་ཟབ། །སྔོན་དུ་ལྷ་ལྔའི་བསྙེན་པ་མང་ཐེམས་ནས། །དེས་ནི་རྣོ་མྱུར་དགོས་འདོད་འཕྲལ་དུ་འབྱུང་། །གོང་དུ་བསྙེན་སྒྲུབ་ཅི་ཡང་མ་ཐེམ་པར། །ལས་སྦྱོར་བྱས་པས་འབྲས་བུ་ག་ལ་འབྱུང་། །འདི་ཉིད་ཉམས་སུ་བླངས་པའི་ཕན་ཡོན་ནི། །ཡེ་ཤེས་མཁའ་འགྲོ་ཉིད་དང་མཉམ་པར་གསུངས། །དེ་ལྟར་ཡབ་ཡུམ་དྲིལ་སྒྲུབ་ཞལ་གདམས་འདི། །མཐར་ཕྱིན་ཐབས་མཁས་གཉིས་ཀྱིས་བསྐུལ་བའི་ཕྱིར། ༧ རཱ་ག་ཨ་སྱས་འཕྲལ་དུ་གདམས་པ་ལྟར། །མཐར་ཕྱིན་ཞེས་བྱས་འཕྲལ་དུ་ཡི་གེར་བཏབ། །ཉེས་པ་མཆིས་བཤགས་དགེ་བ་བྱང་པ་ཆུབ་བསྔོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།