རྒྱལ་བ་རྒྱ་མཚོ་ལྷ་ལྔ་ལས་རྟ་མགྲིན་གཙོ་འཁོར་སྒྲུབ་པ་པདྨ་དབང་གི་དཀྱིལ་འཁོར་དུ་གདུག་པ་ཅན་ཟིལ་གྱིས་གནོན་ཅིང་ཚར་གཅོད་པའི་མན་ངག་གི་ཟིན་བྲིས།
རྒྱལ་བ་རྒྱ་མཚོ་ལྷ་ལྔ་ལས་རྟ་མགྲིན་གཙོ་འཁོར་སྒྲུབ་པ་པདྨ་དབང་གི་དཀྱིལ་འཁོར་དུ་གདུག་པ་ཅན་ཟིལ་གྱིས་གནོན་ཅིང་ཚར་གཅོད་པའི་མན་ངག་གི་ཟིན་བྲིས་བཞུགས་སོ།།
ན་མོ་གུ་རུ་རྒྱ་གྲི་ཝ་ཡེ། པདྨ་ཧེ་རུ་ཀ་ལ་ཕྱག་འཚལ་ལོ། །བཀའ་ཡི་གནང་བ་སྩོལ་ལ་བར་ཆད་སོལ། །རྟ་མགྲིན་དངོས་ཉིད་པདྨ་འབྱུང་གནས་ཀྱི། །པདྨ་དབང་གི་དཀྱིལ་འཁོར་འདི་ཉིད་དུ། །གདུག་པ་ཅན་ཀུན་ཟིལ་གནོན་ཚར་གཅོད་པའི། །གདམས་པ་མཁར་ཆེན་མཚོ་རྒྱལ་ཞེས་ཀྱང་བྱ། །བྷ་ག་ལ་ཡི་ཕག་མོ་ཞེས་བྱར་གནང་། །ཕྱིས་སུ་གྲུབ་ཆེན་པཀཱིས་ཐུགས་དམ་མཛད། །དེ་ཕྱིར་བཀའ་འབུམ་ནང་དུའང་བཞུགས་པ་ཡིན། །ཆོ་ག་འདི་དང་སྦྲེལ་བར་ཉམས་ལེན་ཐབས། །རྫ་ཤིང་ཟངས་ལྕགས་ལ་སོགས་སྣོད་གཙང་ནང་། །གཏོར་མ་རབ་ཏུ་གྲུ་གང་
འབྲིང་རྐང་གང་། །ཐ་མ་མཐོ་གང་ལས་ནི་མི་ཆུང་བ། །ཟུར་གསུམ་བྱས་པའི་སྨད་དེ་ཕྱིར་བཅད་ལ། །སྨད་ནང་ཧོམ་ཁུང་བྲུས་ལ་ཁྲག་གིས་བྱུག །ཕྱི་ནི་སོལ་བ་ཁྲག་བསྲེས་སྨུག་ནག་བྱ། །དེ་ནང་གྲོ་ཤོག་གཙང་མར་གང་གནོད་ཀྱི། །ལིངྒ་མིང་བཅས་སྤྱི་མཐུན་བྲིས་པ་དེ་། །མེ་ཁྲུས་རླུང་ཁྲུས་མེ་ལོང་ཆུ་གཙང་བཀྲུ། །དེ་ལ་འགུགས་གཞུག་བརྒྱ་རྩ་སོགས་བྱས་ལ། །ཁྱི་སྤུ་ར་བལ་སྐུད་པའམ་ཚོན་སྐུད་ཀྱིས། །བཅིངས་པ་དེ་ཡི་ནང་དུ་བཅུག་བྱས་ཏེ། །དེ་སྟེང་དམར་གཏོར་དེ་ཡིས་ཁ་བཅད་བཞག །ཟུར་གསུམ་རྩང་གསུམ་ལོགས་གསུམ་ཤ་རྒྱན་གསུམ། །
རྩེ་ལ་མར་གྱི་རྡོ་རྗེ་མེ་རི་འབར། །འཛོམ་ན་ཙཀྐི་དར་གདུགས་དམར་པོ་བཙུགས། །མཚེ་དང་ཡུངས་དཀར་སྒང་བུ་ཡོད་ན་བཙུགས། །མིང་ཡིག་ཤོག་དྲིལ་བཅུག་པའི་ལིང་གསུམ། །ཟུར་གསུམ་རྩང་གི་འོག་ཏུ་མགོ་ཐུར་བཙུགས། །ལོགས་གསུམ་འདབས་གསུམ་ཐོད་སྐམ་གསུམ་བྱས་བཞག །སྨད་ཀྱི་ལྕགས་ཁང་ནང་དུ་དགྲ་བགེགས་བཙུད། །སྟོད་ནི་མདུན་བསྐྱེད་རྟ་མགྲིན་དངོས་སུ་བསམ། །དེ་ནི་རང་གི་མདུན་ཕྱོགས་གར་བདེར་བཞག །ཕུག་གཏོར་མཆོད་པ་སྣ་བདུན་ཚོགས་མཆོད་དང་། །ཐུན་གཏོར་ལིང་ཆུང་པར་མ་མང་དུ་བསགས། །འདི་ནི་རྙིང་མ་ཁོ་ན་ཡིན་པའི་ཕྱིར། །མངོན་རྟོགས་གཅིག་གིས་བདག་མདུན་དུས་གཅིག་ཆོག །ལྷ་ལྔའི་མཆོད་བཞི་བསྟོད་བཞི་ཚར་བའི་རྗེས། །བསྙེན་པ་བྱེད་ཚེ་དམིགས་པའི་འཕྲོ་འདུ་ནི། །བདག་མདུན་རྟ་མགྲིན་དཀྱིལ་འཁོར་དབུས་སུ་བཞག །ཐུགས་རྗེ་ཆེན་པོ་གཡས་སུ་བཞུགས་པ་ལ། །འཕགས་མ་སྒྲོལ་མའི་ཚོགས་ཀྱིས་བསྐོར་ནས་ཀྱང་། །འཇིགས་པ་བཅུ་དྲུག་བར་ཆད་སེལ་བར་མཛད། །གཡོན་དུ་གསང་བ་ཡེ་ཤེས་ཌཱཀིའི་ཚོགས། །གདུག་པ་ཅན་རྣམས་དབང་དུ་བསྡུ་བར་མཛད། །སྟེང་དུ་པད་འབྱུང་གྲུབ་
ཐོབ་རྒྱ་མཚོ་རྣམས། །ཤིན་ཏུ་ཁྲོ་ཞིང་གཏུམ་པའི་ཆ་བྱད་ཀྱིས། །ཁམས་གསུམ་ཟིལ་གྱིས་གནོན་པའི་ཧཱུྃ་སྒྲ་སྒྲོག །འོག་ཏུ་དམ་ཅན་རྒྱ་མཚོ་ཐམས་ཅད་ཀྱང་། །ཤིན་ཏུ་ཁྲོ་གཏུམ་ཕྲིན་ལས་ཀུན་བསྒྲུབ་བསྒོམ། །དེ་དག་གདུག་པ་ཟིལ་གནོན་དམིགས་པ་ཡིན། །དེ་ནས་རྟ་མགྲིན་ཁྲོ་བོའི་ཏིང་འཛིན་བརྒྱད། །ས་ཕྱོགས་འདི་ཡང་རབ་འཇིགས་དུར་ཁྲོད་ནི། །མེ་འབར་རླུང་འཚུབ་ཐོག་སེར་འབྲུག་སྒྲ་ལྡིར། །གནས་ཁང་ཐོད་པ་སྐམ་རློན་རྙིང་གསུམ་བརྩེགས། །གྲུ་བཞི་སྒོ་བཞི་ཁྲོ་བོའི་དཀྱིལ་འཁོར་རྫོགས། །གདན་བཞི་པད་ཉི་གས་པ་བདུད་བཞི་བསྣོལ། །དེ་སྟེང་རང་ཉིད་རྟ་མགྲིན་གསལ་བ་ཡིས། །འདོར་ཐབས་བརྫིས་པས་སྟོང་གསུམ་ཤིག་ཤིག་གཡོས། །ཕྱག་གཡས་གནམ་ལྕགས་རྡོ་རྗེ་ཕྱར་བ་ལས། །རྡོ་རྗེའི་ཐོག་ཆེན་འཕྲོས་པས་དགྲ་བགེགས་བརླག །ཕྱག་གཡོན་སྡིགས་མཛུབ་རྩེ་དང་སྐུ་ལུས་ལས། །མེ་འབར་གནོད་བྱེད་ཐམས་ཅད་གཞོབ་ཐུལ་བསྲེགས། །དབུ་གཙུག་རྟ་དབུ་ལན་གསུམ་འཚེར་བ་ཡིས། །དང་པོས་ཁམས་གསུམ་ཐམས་ཅད་དབང་དུ་བསྡུས། །གཉིས་པས་སྲིད་གསུམ་ཐམས་ཅད་ཟིལ་གྱིས་གནོན། །གསུམ་པས་དྲེགས་པ་
ཐམས་ཅད་བྲན་དུ་ཁོལ། །སྤྱན་གསུམ་དམར་ཟླུམ་གནོད་བྱེད་བགེགས་རིགས་ལ། །སྡང་མིག་གཟིགས་པས་འདར་ཞིང་ས་ལ་འགྱེལ། །བརྒྱལ་ཞིང་འགྲེ་ལོག་བྱེད་པ་ཁོ་ནར་གྱུར། དེ་ནས་གཟི་བརྗིད་བསྐྱེད་པའི་ཏིང་ངེ་འཛིན། །བདག་གི་ཐུགས་ཀར་པདྨ་ཉི་མའི་སྟེང་། །ཏིཿཡིག་དམར་པོ་བྱི་རུའི་སྡོང་པོ་འདྲ། །དེ་ལས་སྔགས་ཕྲེང་གཡས་སུ་འཁོར་བ་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། །ཡེ་ཤེས་ཁྲོ་བོའི་ཚོགས་དང་ཁྲོ་མོའི་ཚོགས། །གྲུབ་ཐོབ་རྒྱ་མཚོ་སངས་རྒྱས་བྱང་སེམས་དང་། །ཡེ་ཤེས་ཆོས་སྐྱོང་སྲུང་མ་ཐམས་ཅད་ཀྱི། །སྐུ་གསུང་ཐུགས་ཀྱི་བྱིན་རླབས་ནུས་མཐུ་ཀུན། །འོད་ཀྱི་ཐིག་ལེ་ཁ་དོག་སྣ་ཚོགས་པའི། །རྣམ་པར་ཆར་དྲག་བཞིན་དུ་བབས་ནས་ཀྱང་། །བདག་མདུན་ལ་ཐིམ་གཟི་བརྗིད་རབ་ཏུ་འབར། །རང་དང་ལྷ་གཉིས་དབྱེར་མེད་ངེས་ཤེས་ཀྱིས། །ཉམ་ང་བག་ཚ་མེད་པའི་བརྟུལ་ཞུགས་བསྐྱེད། །ཨོཾ་བཛྲ་ཀྲོ་དྷ་རྒྱ་ཤྲཱི་ཝ་ཧུ་ལུ་ཧུ་ལུ་ཧཱུྃ་ཕཊ་སྭཱ་ཧཱ། ཨོཾ་ཨཱཿཧཱུྃ་ཨོཾ་མ་ཎི་པདྨེ་ཧཱུྃ། རྭ་ཙ་བཱིཡ། ཧ་རི་ནི་ས། ཧཱུྃ་ཛཿ དེ་ལྟར་བཟླ་བོ་བསྙེན་པའི་དམིགས་པའོ། །རང་གི་ཐུགས་ཀའི་ཧྲིདང་སྔགས་ཕྲེང་ལས། །མེ་འབར་རང་གི་ལུས་ཀྱི་
ནང་ཀུན་གང་། །ལུས་གདོན་ནད་དང་བཅས་པ་གཞོབ་ཐུལ་བསྲེགས། །ཐལ་སོལ་བ་སྤུའི་སྒོ་ནས་ཕྱིར་ཐོན་པ། །སྐུ་ལས་འབར་བའི་མེ་ཡིས་རྗེས་མེད་བསྲེགས། །རང་གི་སྐུ་ལུས་མེ་དང་དབྱེར་མེད་པ། །མེ་སྒྲ་སྔགས་སྒྲ་སྒྲོག་པར་བསྒོམས་པ་ནི། །ནམ་མཁའ་གནམ་ལྕགས་ཏིང་ངེ་འཛིན་ཞེས་བྱ། །རང་གི་ཐུགས་ཀའི་ས་བོན་སྔགས་ཕྲེང་ལས། །ཁ་དོག་ལྔ་ལྡན་དམར་ནག་ཤས་ཆེ་བའི། །མེ་འབར་ལུས་ཀྱི་རྩ་གནས་ཐམས་ཅད་གང་། །རྩ་གནས་བཞུགས་པའི་ནད་གདོན་ཐམས་ཅད་བསྲེགས། །མེ་ལྕེ་སྤྱི་གཙུག་བཤང་ལམ་གསུམ་ནས་ཐོན། །རྩེ་འཕྲད་ལུས་གཏུམ་མེ་དཔུང་ཇེ་ཆེར་འབར། །ལུས་གདོན་གནས་གདོན་སྟོང་གསུམ་འཇིག་རྟེན་བསྲེགས། །སྟོང་པར་གྱུར་ནས་ཚུར་འདུས་ཐུགས་ཀར་ཐིམ། །མེ་འབར་ཀློང་ཆེན་ཏིང་ངེ་འཛིན་ཞེས་བྱ། །རང་གི་ཐུགས་ཀའི་སྔགས་ཀྱི་ཕྲེང་བ་ལས། །རང་འདྲའི་ཁྲོ་ཆུང་བྱེ་བ་གྲངས་མེད་པ། །བ་སྤུའི་བུ་ག་རྣམས་ནས་ཕྱིར་འཕྲོས་པས། །ཁམས་གསུམ་འགྲོ་བའི་བདུད་བཞི་དུག་ལྔའི་ཚོགས། །བསད་བཅད་གཏུབ་དང་གསོལ་ཞིང་མེ་ཡིས་བསྲེགས། །ཁྲོ་ཆུང་ཚུར་འདུས་བདག་ཐིམ་མཐུ་སྟོབས་རྒྱས། །རང་གི་བ་སྤུའི་བུ་
ག་ཐམས་ཅད་ནས། །གསེར་གྱི་རྡོ་རྗེ་ནས་འབྲས་ཙམ་གྱིས་གཏམས། །འདུ་འཕྲོ་ཁྲོ་བོའི་ཏིང་ངེ་འཛིན་ཅེས་བྱ། །རང་གི་སྐུ་ལས་འོད་ཟེར་རིམ་པར་འཕྲོས། །མདུན་བསྐྱེད་ལ་ཕོག་མདུན་བསྐྱེད་དཔྲལ་བ་ནས། །རྟ་མགྲིན་སྐུ་ནི་བྱེ་བ་གྲངས་མེད་འཕྲོས། །དགྲ་བགེགས་ཀུན་གྱི་ལུས་ཀྱི་གཟི་བརྗིད་བཅོམ། །འཁོར་འདས་ཀུན་གྱི་སྐུ་ཡི་གཟི་བརྗིད་བསྡུས། །ཐམས་ཅད་ཚུར་འདུས་བདག་གི་དཔྲལ་བར་ཐིམ། །མདུན་བསྐྱེད་མགྲིན་པའི་ལྗགས་ལས་ཧྲི༔ཡིག་འཕྲོས། །སྔགས་ཀྱི་རང་སྒྲ་དང་བཅས་འཇིག་རྟེན་གང་། །དགྲ་བགེགས་ཀུན་གྱི་ངག་གི་ནུས་པ་བཅོམ། །འཁོར་འདས་ཀུན་གྱི་གསུང་གི་ནུས་མཐུ་བསྡུས། །ཚུར་འདུས་བདག་ཉིད་རྟ་མགྲིན་ལྗགས་ལ་ཐིམ། །མདུན་བསྐྱེད་ཐུགས་ལས་པདྨ་རཱ་ག་ཡི། །དྲག་པོའི་རྡོ་རྗེ་རྩེ་གསུམ་ཁ་གདེངས་འཕྲོས། །དེ་ལས་དེ་འདྲ་གྲངས་མེད་འཇིག་རྟེན་ཁྱབ། །དགྲ་བགེགས་ཀུན་གྱི་སེམས་ཀྱི་གདུག་རྩུབ་བཅོམ། །འཁོར་འདས་ཀུན་གྱི་ཐུགས་ཀྱི་མཐུ་སྟོབས་བསྡུས། །ཚུར་འདུས་བདག་ཉིད་རྟ་མགྲིན་ཐུགས་ཀར་ཐིམ། །དེ་ནི་རྣམ་གསུམ་སྙིང་པོའི་བཟླས་པར་གསུངས། །དེ་ནས་བདག་གི་ཐུགས་ཀའི་སྔགས་ཕྲེང་ལས། །འོད་ཟེར་
དམར་ནག་འཕྲོས་པ་ཞལ་ནས་ཐོན། །མདུན་གྱི་ཞལ་ཞུགས་སྔགས་ཕྲེང་དྲག་ཏུ་འཁོར། །ལྟེ་བ་ནས་ཐོན་བདག་གི་ལྟེ་བ་ནས། །ཐུགས་ཀར་ཐིམ་ཞིང་མགལ་མེ་ལྟ་བུར་འཁོར། །དེ་ནས་འོད་ཟེར་དེ་ཡང་སྔགས་ཕྲེང་གྱུར། །སྔགས་ཕྲེང་དེ་ལས་འོད་ཟེར་ཕྱོགས་བཅུར་འཕྲོས། །སྟེང་ཕྱོགས་དུར་ཁྲོད་མེ་རི་འབར་བ་སོགས། །མཁའ་སྤྱོད་ཞིང་བཞུགས་ཁྲོ་བོ་ཐམས་ཅད་མཆོད། །དེ་དག་སྐུ་ལས་རྟ་མགྲིན་སྐུ་དང་ནི། །གསུང་ལས་སྔགས་ཕྲེང་ཐུགས་ལས་རྡོ་རྗེའི་ཚོགས། །གྲངས་མེད་ཆར་དྲག་བབ་པ་ལྟ་བུར་བྱོན། །བདག་མདུན་རྣམས་ལ་སིབ་སིབ་ཐིམ་པར་བསྒོམ། །མགལ་མེ་ཀླད་ལ་བསྐོར་འདྲའི་བཟླས་པའོ། །གོང་གི་ཧ་རི་ནི་སའི་མཇུག་དེ་རུ། །གནོད་བྱེད་སརྔ་མཱ་ར་ཡ་ཧཱུྃ་ཕཊ། ཅེས་བཏགས་བཟླས་པས་རང་གི་ནད་གདོན་སེལ། །དེ་རྣམས་སྒྲུབ་པའི་སྔགས་དམིགས་ཡིན་པའོ། །དེ་ནས་བདག་མདུན་གཙོ་བོའི་སྐུ་ལས་ནི། །འོད་འཕྲོས་གཡས་གཡོན་སྟེང་འོག་རྣམས་ལ་ཕོག །བདག་མདུན་དཀྱིལ་འཁོར་བཅུ་པོ་ཐམས་ཅད་ཀྱི། །རྟ་མགྲིན་ཁྲོས་པའི་དཀྱིལ་འཁོར་བཅུ་རུ་གྱུར། །ཀུན་ཀྱང་སྔགས་སྒྲ་འབྲུག་སྟོང་ལྟར་སྒྲོག་བསྒོམ། །དེ་ནི་རིགས་
བསྒྱུར་ཏིང་ངེ་འཛིན་ཞེས་བྱ། །བདག་མདུན་སྐུ་ལས་སྤྲུལ་པའི་ཁྲོ་ཆུང་ཚོགས། །རླུང་ནག་མེ་དཔུང་འཚུབ་མ་དང་བཅས་པ། །བསྐལ་པའི་རླུང་ཐོག་སེར་དྲག་ལྟ་བུར་འཕྲོས། །བདག་དང་བསྲུང་བྱ་ལ་གནོད་གདོན་བགེགས་རྣམས། །དྲག་པོའི་རླུང་གིས་བྱ་སྤུ་གཏོར་བ་བཞིན། །སྟོང་གསུམ་ནམ་མཁའི་ཕ་མཐར་བསྐྲད་པར་བསམ། །སྔགས་རིང་ཧ་རི་ནི་སའི་མཇུག་དེ་རུ། །གནོད་བྱེད་ཨུ་ཙ་ཏ་ཡ་སྤ་ར་ཎ་ཕཊ༔ ཕྲེང་སྐོར་ཙམ་བཟླ་སྒྲུབ་པའི་གེགས་སེལ་འགྱུར། །ནད་པ་སྲིའུ་གསོ་དང་མཛེ་ཕོ་བཅོས། །སྨྱོན་པ་འདུལ་དང་ཁྱིམ་གྱི་གདོན་ཕུད་ན། །དམིགས་པ་གྲངས་མང་ཝིག་ཅིང་སྔགས་མང་བཟླ། །མཐར་ནི་ཁྲོ་ཆུང་ཚུར་འདུས་བདག་ལ་བསྟིམ། །རང་ཉིད་རྟ་མགྲིན་ང་རྒྱལ་གསལ་བ་ཡི། །བསྲུང་བྱ་ཕོ་གཡས་མོ་གཡོན་དུད་འགྲོ་རྒྱབ། །ཟས་ནོར་ཐམས་ཅད་མདུན་དུ་ཡོད་པར་བསྒོམ། །བདག་མདུན་སྐུ་ལས་འོད་ཟེར་འཕྲོས་པ་ཡིས། །སྟེང་འོག་ཕྱོགས་མཚམས་ཐོད་པ་སྐམ་པོའི་གུར། །དུང་མདོག་ཁ་ཕྱིར་བསྟན་ཅིང་སོ་ཡང་རྡེབ། །སྣ་མིག་དམར་དང་ཧ་རེ་ཚྭ་ཚྭ་འཕྲོ། །དེ་རྒྱབ་རིགས་བཞི་དཔའ་བོའི་གུར་ཁང་ནི། །ཤར་ཕྱོགས་ཐམས་ཅད་རྡོ་རྗེ་དཔའ་བོ་དཀར། །ལྷོ་
ཕྱོགས་ཐམས་ཅད་རིན་ཆེན་དཔའ་བོ་སེར། །ནུབ་ཕྱོགས་ཐམས་ཅད་པདྨ་དཔའ་བོ་དམར། །བྱང་ཕྱོགས་ཐམས་ཅད་ཀརྨ་དཔའ་བོ་ལྗང་། །སྟེང་འོག་ཐམས་ཅད་སངས་རྒྱས་དཔའ་བོ་མཐིང་། །དེ་རྒྱབ་མཁའ་འགྲོའི་གུར་ཁང་བསྒོམ་པ་ནི། །ཤར་ཕྱོགས་ཐམས་ཅད་རྡོ་རྗེ་མཁའ་འགྲོ་མཐིང་། །ལྷོ་ཕྱོགས་ཐམས་ཅད་རིན་ཆེན་མཁའ་འགྲོ་སེར།ནུབ་ཕྱོགས་ཐམས་ཅད་པདྨ་མཁའ་འགྲོ་དམར། །བྱང་ཕྱོགས་ཐམས་ཅད་ཀརྨ་མཁའ་འགྲོ་ལྗང་། །སྟེང་འོག་ཐམས་ཅད་སངས་རྒྱས་མཁའ་འགྲོ་དཀར། །དེ་ལྟར་དཔའ་བོ་མཁའ་འགྲོ་ཐམས་ཅད་ཀྱང་། །རང་རྟགས་གྲི་གུག་ཐོད་ཁྲག་ཁ་ཊཾ་འཛིན། །ནང་དུ་ཞལ་གཟིགས་སྲུང་བའི་སྔགས་དམིགས་མཛད། །དེ་རྒྱབ་འོག་ཕྱོགས་རྡོ་རྗེའི་ས་གཞི་བརྡལ། །མཐའ་བསྐོར་རྡོ་རྗེའི་རྭ་བས་ཟླུམ་པོར་བསྐོར། །དེ་ནང་རྡོ་རྗེའི་གུར་ཆེན་ཕུབ་པ་ལས། །ནང་ལོགས་རྡོ་རྗེའི་རྭ་བ་དྲུ་བ་དང་། །སྟེང་དུ་རྡོ་རྗེའི་བླ་བྲེ་བྲེས་པའོ།། །དེ་རྒྱབ་སྤྲུལ་པའི་ཁྲོ་བོ་འཆོལ་བའི་གུར། །ཁ་དོག་སྣ་ཚོགས་མཚོན་ཆ་སྣ་ཚོགས་ཐོགས། །རབ་ཁྲོས་ཕྱིར་གཟིགས་ཟློག་པའི་ཕྲིན་ལས་མཛད། །དེ་རྒྱབ་སྟེང་འོག་གནམ་ལྕགས་འཁོར་ལོ་ནི། །སྟེང་
འོག་གའུ་ཁ་སྦྱོར་ལྟ་བུའི་གུར། །སྟེང་འོག་སོ་འཐབ་སྤུ་གྲི་ལྟར་རྣོ་བ། །དེ་རྒྱབ་ཡེ་ཤེས་མེ་ཡི་གུར་ཁང་ནི། །ཁ་དོག་ལྔ་ལྡན་དུམ་བུ་གཅིག་ཏུ་འབར། །བསྲུང་བྱ་ཐམས་ཅད་སྲུང་འཁོར་ནང་ཚུད་པས། །བར་ཆད་གང་གིས་བརླག་མི་རྙེད་པར་བྷོ། །གོང་གི་ཧ་རི་ནི་སའི་སྔགས་མཇུག་ཏུ། །བསྲུང་བྱ་མ་མ་རཀྵ་རཀྵ་ཀུ་རུ་ཡེ་སྭཱ་ཧཱ། གལ་ཏེ་ཡུལ་གྱི་སེར་བ་སྲུང་ན་ཡང་། །སྲུང་འཁོར་ནང་དུ་ཚུད་པར་བྷཻཾ་པ་ཡིན། །གདོང་ཟློག་བྱེད་ཚེ་སྐུ་ལས་མེ་ཆེན་འབར། །སེར་བ་སེར་བྱེད་གཞོབ་ཐུལ་བསྲེག་པར་བསྒོམ། །ཨ་པཱ་ན་ཡ་བཟློག་གི་སྔགས་མཇུག་ཏུ། །ཆར་ནི་ཆུར་ནི་སྭཱ་ཧཱ་དྲག་ཏུ་བརྗོད། །བསྲུང་ཁ་བཟུང་བའི་ཡོན་བདག་ནོར་ཕྱུགས་སོགས། །གོང་དུ་བཤད་ལྟར་རང་གི་གཡས་གཡོན་བསྒོམ། །བླ་མའམ་དམ་ཚིག་གཅིག་པའི་མཆེད་གྲོགས་སོགས། །ཤིན་ཏུ་གལ་ཆེན་ཐུགས་ཀའི་ཧཱུྃནང་བཙུད། །སྔགས་ཀྱི་མང་ཉུང་གལ་ནི་ཆེ་ཆུང་བསྟུན། །བདག་མདུན་ཁྲོ་བོའི་ལྷ་ཚོགས་ཐམས་ཅད་ཀྱིས། གར་མཛད་ཨ་ར་ལླི་ཡིས་སྒྲ་བསྒྲགས་པས། །འོད་ཟེར་མེ་ཡི་མདོག་ཅན་ཕྱིར་འཕྲོས་ཏེ། །ཕྱི་རོལ་གནམ་ལྕགས་འཁོར་ལོ་ལ་ཕོག་པས། །སྟེང་མ་གཡས་དང་འོག་མ་གཡོན་དུ་
འཁོར། །གནོད་ཅིང་འཚེ་བའི་དགྲ་བགེགས་བྱད་མ་རྣམས། །འཁོར་ལོ་སྤུ་གྲི་ལྟར་རྣོ་སོ་འཐབས་པས། །ཚར་པ་དུམ་བུ་དམར་དང་ཐར་ཐར་བཏང་། །ནང་དུ་བྲུལ་བ་ཁྲོ་བོ་རྣམས་ཀྱིས་ཟོས། །ཕྱི་རུ་འཐོར་བ་མེ་ཡི་གུར་གྱིས་བསྲེགས། །གཞུང་སྔགས་ཧ་རི་ནི་སའི་མཇུག་དེ་རུ། །སརྦ་ཨ་པཱ་ཡ་ན་ཟློག་ཅེས་བཏགས། །ཕྲེང་བ་ཕྱིར་བཅད་ཕྲེང་སྐོར་ཙམ་བཟླས་ནས། །ཆོ་གའི་མགོ་ཡི་བདེན་སྟོབས་བརྗོད་པའི་མཇུག །བྱད་ཁ་ཟློག་ཅེས་བརྗོད་ལ་ཐལ་མོ་བརྡབ། །བྱད་ཁའི་དོགས་པ་ཆེ་ན་ཚར་མང་ཝིག །སླར་ཡང་བདག་མདུན་བར་དུ་སྔགས་ཕྲེང་འཁོར། །ཐུགས་རྒྱུད་བསྐུལ་ནས་མདུན་བསྐྱེད་ལྷ་རྣམས་ཀྱིས། །སྐུ་ལས་སྤྲུལ་པའི་ཁྲོ་བོ་ཁྲོ་མོ་དང་། །མེ་ཡི་བྱ་ཁྱུང་གནམ་ལྕགས་སྡིག་པའི་ཚོགས།མེ་རླུང་འཚུབ་མ་དང་བཅས་འཇིག་རྟེན་ཁྱབ། །གནོད་ཅིང་འཚེ་བའི་གདོན་བགེགས་ཐམས་ཅད་ནི། །ཁྲོ་བོ་ཁྲོ་མོ་རྣམས་ཀྱི་མཚོན་ཆས་གཏུབ། །བྱ་ཁྱུང་ལྕགས་སྡིག་རྣམས་ཀྱིས་ཤ་ཁྲག་ཟོས། །ལྷག་མ་མེས་བསྲེགས་རླུང་གཏོར་རྗེས་མེད་གྱུར། །སྔགས་རིང་ཧ་རི་ནི་སའི་མཇུག་དེ་རུ། །གནོད་བྱེད་སརྦ་མཱ་ར་ཡ་ཧཱུྃ་ཕཊབཏགས། །འདི་ནི་དངོས་
གཞི་ཡིན་པས་ཅི་མང་བཟླ། །དེ་ནས་ཐུན་གཏོར་ལིང་ཆུང་དང་བཅས་བཤམས། །རང་གི་སྒྲུབ་པ་ཡིན་ན་དགྲ་བགེགས་དང་། །ནད་འདྲེ་ཀླུ་གདོན་སྨྱོ་འབོག་གོད་འདྲེ་དང་། །ཟ་འདྲེ་ཤི་གཤེད་བྱད་མ་རྦོད་གཏོང་སོགས། །གང་དམིགས་དེ་ཉིད་བཀུག་གཞུག་ལན་གསུམ་བྱ། །ཐུན་གཏོར་སྨད་དང་གཏོར་མའི་སྨད་ཆ་རྣམས། །གནམ་ལྕགས་ཁང་སྒྲོམ་ཟུར་གསུམ་མེ་འབར་ནང་། །གནོད་བྱེད་བཀུག་སྟེ་སྤྱི་བོའི་གཙུག་ཏུ་གནས། །བདག་དང་མདུན་བསྐྱེད་རྟ་མགྲིན་ཐུགས་ཀ་ནས། །ཡི་གེ་ཛཡིག་དམར་ནག་གཉིས་འཕྲོས་པས། །ཁོ་ཡི་སྤྱི་གཙུག་བཤང་ལམ་གཉིས་ནས་ཞུགས། །སྙིང་ཁར་ཕྱིན་པས་ཟངས་དང་གནམ་ལྕགས་ཀྱི། །འཁོར་ལོ་རྩིབས་བརྒྱད་རྣོ་ངར་ལྡན་པ་གཉིས། །སྟེང་མ་ལྕགས་ནི་གཡས་འཁོར་ཟངས་གཡོན་འཁོར། །ཇེ་ཆེར་གྱུར་ཅིང་ཤུགས་དྲག་འཁོར་བ་དེ། །དོན་སྙིང་ནང་ཁྲོལ་ཤ་ཁྲག་དམར་ཉིལ་གཏུབ། །ཐུན་རྫས་རྣམས་ཀྱང་མཚོན་ཆ་སྣ་ཚོགས་ཀྱི། །ཚར་དུ་གྱུར་ནས་དགྲ་བགེགས་བླ་སྲོག་ལུས། །ཤ་མོང་ལ་ནི་སེར་དྲག་ཕོག་ལྟར་བསྒོམ། །ཡུངས་དཀར་ཡུངས་ནག་ལྕགས་ཕྱེ་ཟངས་ཕྱེ་དང་། །ཀེ་ཚེ་ཤངས་ཚེ་ཟབ་རྒོད་རྡོ་ཕྱེ་སོགས། །ཐུན་
རྫས་གང་འཛོམ་ཐོད་ཏིང་ཟངས་ལྕགས་སྣོད། །བཞག་ལ་ཁ་རླངས་མ་སོང་ཕུས་མི་གདབ། །གཏོར་མའི་སྨད་དང་ཐུན་གཏོར་ལིངྒ་བྲན། །གོང་གི་སྔགས་རིང་ཧ་རི་ནི་སའི་མཇུག །གནོད་བྱེད་སརྦ་ཤ་ཏྲི་ནི་སྲིད་ཧུར་ཐུ་ཛ་མཱ་ར་ཡ་ཕཊ༔ མང་ཉུང་གལ་དང་བསྟུན་ཞིང་བཟླ་བཞིན་བྲབ། །དགྲ་བགེགས་གང་ལ་བྱས་པ་རེངས་པ་དང་། །བརྒྱལ་དང་འཆི་བར་འགྱུར་བར་གསུངས་པ་ཡིན། །དེ་ལྟར་བསྙེན་སྒྲུབ་སྦྱོར་གསུམ་སྲུང་ཟློག་བསད། །ཐུན་གཅིག་ལ་ནི་རྫོགས་པར་བྱས་པའི་རྗེས། །ཐུན་གཏོར་དེ་ཉིད་བདུད་རྩིས་བྲན་བྱས་པ་ལ། །བྷན་རློན་པ་ལྕང་ལོར་བཅས་པའི་ནང་། །དགྲ་བགེགས་ཤ་ཁྲག་རུས་པ་ནང་ཁྲོལ་རྣམས། །དཀར་དམར་མདངས་ལྡན་དྲོད་དང་རླངས་པར་བཅས། །བསྒྲེ་སྣུམ་བཅུད་ལྡན་ངོ་བོ་བདུད་རྩིར་བསམ། །ཧ་ཧོ་ཧྲིདང་ཨོཾ་ཨཱཿཧཱུྃ་གསུམ་བརྗོད། །རྩ་སྔགས་ཧ་རི་ནི་སའི་མཇུག་དེ་རུ། །གནོད་བྱེད་དགྲ་བགེགས་ཀྱི་གཏི་མུག་ཤ་ཡི་བ་ལིཾ་ཏ་ལ་ཁཱ་ཧི། འདོད་ཆགས་ཁྲག་གི་བ་ལི་ཏ་ལ་ཁཱ་ཧི། ཞེ་སྡང་རུས་པའི་བ་ལིཾ་ཏ་ལ་ཁཱ་ཧི། ལན་གསུམ་བརྗོད་རྗེས་རོལ་མོ་དབྱངས་དང་བཅས། །ཡབ་བསྟོད་ཚར་རྗེས་འདོད་གསོལ་ཚིག་འདི་སྦྱར། ༈ །
དམ་རྫས་བརྒྱན་པའི་གཏོར་མ་འདི་བཞེས་ལ། །གནོད་བྱེད་དགྲ་བགེགས་ཐལ་བ་རྡུལ་དུ་རློགས། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཅེས་བརྗོད་མདུན་བསྐྱེད་དཀྱིལ་འཁོར་ལྔ་པོ་ཀུན། །གནམ་ས་ཙམ་གྱི་ཞལ་གདངས་མཆེ་བ་གཙིགས། །ལྗགས་ནི་གློག་ལྟར་འཁྱུགས་པའི་ཞལ་དུ་བསྟབ། །རྐན་སྒྲ་དང་བཅས་ཆེམས་ཆེམས་གསོལ་བར་དམིགས། །སྒྲུབ་པ་མ་ཚར་བར་དུ་ཐུན་མི་བསྡུ། །རྗེས་མའི་ཐུན་ལ་བྷཻཾ་ཝིག་བྱས་པ་ཡིན། །རྩེ་གཅིག་སྒྲུབ་པ་བྱེད་ན་ཐུན་བཞི་སྟེ། །ཞག་ནི་གསུམ་ལྔ་བདུན་དགུ་རྟགས་དང་བསྟུན། །རྒྱུན་ཁྱེར་བྱེད་ན་དགོང་མོ་ཐུན་རེས་ཆོག །ཞག་རེ་ནམ་དགར་ཚོགས་དང་གཏོར་བསྔོས་བྱ། །ལུས་གོས་ཕྲེང་བར་མེ་འབར་རྟ་སྐད་འབྱིན། །གནས་དང་གཏོར་མ་མེ་འབར་འོད་འཕྲོ་སོགས། །བསྙེན་སྒྲུབ་ལྷ་ཡི་རྟགས་མཚན་སྤྱི་དང་མཐུན། །ལུས་ལས་རྣག་ཁྲག་འབུ་སྲིན་མི་གཙང་ཐོན། །ཁྲུས་བྱས་གོས་སར་གྱོན་སོགས་ནད་བུད་རྟོགས། །གཡུལ་རྒྱལ་སེར་བ་བཟློག་དང་ཆུ་བསྒྱུར་དང་། །ཟོར་དང་གཏོར་མ་བཀྱག་སོགས་བྱད་བཟློག་རྟོགས། །རྫོང་བཟུང་གོ་ཁྲབ་གྱོན་སོགས་བསྲུང་བའི་རྟགས། །བནྡེ་བུད་མེད་ཆུ་གནས་
དུད་འགྲོ་དང་། །ཁྱི་དང་གཅན་གཟན་བསད་བརྡུང་གདོན་ཐུལ་རྟགས། །རྟགས་ནི་ལན་གསུམ་བྱུང་ན་མང་མི་རུང་། །རྟགས་ཐོན་པའམ་ཞག་གྲངས་ཚང་བའི་དུས། །བདག་མདུན་ཆོ་ག་ཚར་གཅིག་ཚར་བའི་རྗེས། །གཏོར་མའི་ལྷ་བསྐྱེད་ནམ་མཁར་བཏེག་ལ་བཞུགས། །གཏོར་མའི་སྟོད་དེ་ཟངས་ལྕགས་སྣོད་དུ་བཞག །སྨད་ནི་གྲུ་གསུམ་ལིངྐར་བཅས་པ་དེ། །རྒྱུ་ལྡོག་བརྩིས་ལ་ཕྱོགས་ཀྱི་གཙང་ས་རུ། །ཕྱར་བ་ནག་པོའི་སྟེང་དུ་བཞག་པའི་ནང་། །གཏོར་མའི་ལིངྒ་གསུམ་ཡང་བླངས་བཞག་བྲན། །དེ་ལ་འགུགས་གཞུག་དྲག་པོ་ལན་གསུམ་བྱ། །གོང་གི་གཏོར་མ་གསོ་བྲན་ལེགས་བྱས་ནས། །གོང་གི་ཐུན་གཏོར་བཞིན་དུ་དམིགས་ལ་བསྔོ། །ཡབ་བསྟོད་འདོད་གསོལ་བཅས་པ་ཚར་བའི་མཇུག །ཐུན་བརྡེག་དུས་ཀྱི་ཕཊ་རིང་དྲུག་བརྗོད་ཅིང་། །གཏོར་མ་གནམ་ལྕགས་རྡོ་རྗེ་ཁ་གདེང་བ། །བསྐལ་པའི་མེ་དཔུང་རབ་ཏུ་འབར་བ་དེ། །རང་ཉིད་རྟ་མགྲིན་གསལ་བའི་ཕྱག་གཡས་ཀྱི། །ལིངྒ་གནོད་བྱེད་དངོས་སུ་གསལ་བའི་སྟེང་། །འཕངས་པས་དཔེར་ན་རྩྭ་ཕུང་ཆེན་པོའི་སྟེང་། །མེ་ཡི་ཐོག་བརྒྱབ་བཞིན་དུ་རྗེས་མེད་བསྒོམ། །དར་ནག་གམ་
ནི་ཆོས་གོས་མཐུ་བ་བརྡབ། །དེ་ནས་ཡུད་ཙམ་མི་དམིགས་ངང་ལ་བཞག །དེ་ནས་ཤོག་ལིང་རྐང་པ་གཡོན་ནས་གཏུབ། །འཛོམ་ན་ལིང་ཆུང་པར་མ་གསར་པ་རེ། །ཤོག་ལིང་དུམ་བུ་ཤི་དུམ་ཁྲག་ཐིགས་སྦྲག །མང་ཉུང་མེད་པར་བརྒྱ་དང་ཉེར་བརྒྱད་བྱ། །གལ་ཏེ་ཤོག་ལིང་དེ་ཡིས་མ་ཐེམ་ན། །མིང་ཡིག་ཡོད་པའི་ཟན་ལིང་གསུམ་པོ་གཏུབ། །གལ་ཏེ་ལིང་པར་མ་མ་འཛོམ་ན། །ཟན་ལིང་ཆེན་པོ་གཅིག་ལ་འགུགས་གཞུག་བྱ། །དེ་ཉིད་གཏུབ་པའི་ཟན་དུམ་ཁྲག་ཐིགས་སྦྲག །མེ་ལྷ་གཏོར་མ་ཟུར་གསུམ་གཉིས་ལ་སོགས། །དྲག་པོའི་སྦྱིན་སྲེག་ཇི་ལྟར་ཤེས་བྱས་ལ། །མེ་ལྷ་འོད་ཞུ་མེ་དཔུང་གྱུར་པའི་དཀྱིལ། །མདུན་བསྐྱེད་ལྷ་ལྔ་བསྐྱེད་དང་སྤྱན་འདྲེན་སོགས། །མཆོད་བཞི་བསྟོད་བཞི་ཚང་བར་འགྲུབ་ན་རབ། །བསྡུ་ན་མཆོད་ཡོན་བདུག་སྤོས་ཞེས་སོགས་མཆོད། །ལྷ་ལྔའི་དཀྱིལ་འཁོར་རྟ་མགྲིན་ལྔ་རུ་བསྒྱུར། །རྩ་སྔགས་ཧ་རི་ནི་སའི་མཇུག་དེ་རུ། །བསྲེག་རྫས་སོ་སོའི་སྔགས་བཏགས་འབུལ་བ་སྟེ། །ཡམ་ཤིང་མར་ཁུ་བདུན་ལས་ཉུང་ཐབས་མེད། །དེ་རྗེས་ཐུན་བརྡེག་པ་ཡི་སྔགས་མཇུག་ཏུ། །ཛྭ་ལ་རཾ་ཁཱ་ཧི་བཏགས་ལ་ལིངྒ་ནི། །བརྒྱ་རྩ་རང་གིས་ལག་པས་རིམ་
པར་འཕང་། །དེ་ཉིད་ཁོ་ནས་ཀྱང་ནི་ཆོག་པ་སྟེ། །བར་ཆད་ཞི་བར་བྱེད་ན་ཡུངས་དཀར་དང་། །ཤི་སྒབ་གཅོད་ན་དཱུར་བ་ཅི་མང་འབུལ། །ནད་པའི་རིམ་གྲོར་སྨན་སྣ་འབུལ་བ་དང་། །གོད་གཅོད་ལ་ནི་སོ་བ་ཅི་མང་སྟེ། །སྔགས་ནི་བསྒྱུར་བ་སྦྱིན་སྲེག་སྤྱི་ལྟར་རོ། །གཏོར་མ་ཐུན་གཏོར་བཞིན་དུ་རྟ་མགྲིན་འབུལ། །རྟ་མགྲིན་གཤེགས་རྗེས་མེ་ལྷ་གསལ་བཏབ་ལ། །མེ་ལྷའི་གཏོར་མ་བསྲེག་རྫས་ལྷག་ཀུན་འབུལ། །གཏོར་ཆེན་མ་གཏོགས་གཏོར་ཆུང་ཧོམ་ཁུང་སོགས། །མེ་དེར་བསྲེག་གམ་ཕྱོགས་ཀྱི་གཙང་སར་ལ་དོར། །མེ་དེ་བརྫུ་མ་སྟེ་སླ་ང་སོགས་ཀྱིས་སྒྲུབ། །དེ་སྟེང་གཏོར་ཆེན་བཞག་སའི་སྣོད་དེ་སྦུབ། །གནོད་བྱེད་དམ་སྲི་དེ་འོག་འགུགས་གཞུག་བྱ། །གདོན་བགེགས་དམ་སྲི་སྒབ་འདྲེ་ཐམས་ཅད་ནི། །གཉའ་དགུགས་སྤྱི་བོའི་ཐོག་ཏུ་རྐང་གཉིས་བསྣོལ། །སྤྱི་བོ་རྐང་མཐིལ་སར་བཙུགས་གནས་པའི་སྟེང་། །རང་ཉིད་རྟ་མགྲིན་ཞབས་གཉིས་སྲ་ཞིང་མཁྲེགས། །སྣ་ཚོགས་རྡོ་རྗེ་རྒྱ་གྲམ་མཚན་པ་དེས། །དྲག་ཏུ་བརྡབས་པས་ས་འབོལ་ཁབ་བདས་བཞིན། །རིམ་དགུ་ས་ཡི་འོག་ཏུ་ཏ་ལེར་སོང་། །བྱམས་མགོན་མ་བྱོན་བར་དུ་མི་ལྡང་བསམ།
ཧཱུྃ༔ ཐུགས་རྗེའི་འགྲོ་འདུལ་དཀྱིལ་འཁོར་འདིར། །བར་ཆད་དམ་སྲི་འདུལ་བའི་ལྷ། །ཁྲོ་བོའི་རྒྱལ་པོ་རྟ་མཆོག་དཔལ། །གཏུམ་ཆེན་རྔམ་པའི་སྒྲ་སྒྲོག་ཅིང་། །དཔལ་གྱི་རྟ་སྐད་ཅེ་རི་རི། །ཁྲོ་བོའི་འབྲུག་སྒྲ་འུ་རུ་རུ། །རོལ་པའི་རྟ་བྲོ་ཆེམས་སེ་ཆེམ། །དགྲ་བགེགས་འབྱུང་པོ་རྡུལ་དུ་རློགས། །ཨོཾ་བཛྲ་ཀྲོ་དྷ་ཧྱ་གྲི་ཝ་ཧུ་ལུ་ཧུ་ལུ་ཧཱུྃ་ཕཊ༔ སོགས་ནས་ཧ་རི་ནི་སའི་སྔགས་མཇུག་ཏུ། །གནོད་བྱེད་ཐམས་ཅད་སྟེ་བྷ་ཡ་ནན། །ཇི་སྲིད་བྱམས་མགོན་བསྟན་པ་མ་བྱོན་བར། །ནམ་ཡང་སྟེང་དུ་ལྡང་བར་མ་བྱེད་ཅིག །རྟ་མགྲིན་ཁྲོ་བོའི་ཚོགས་ཀྱིས་རྒྱས་གདབ་བོ། །རྒྱུ་ལ་དམ་ལ་མ་འདའ་ས་མ་ཡ་རྒྱ་རྒྱ། །རྐང་པ་གཡས་གསུམ་གཡོན་གསུམ་མཉམ་དུ་གསུམ། །སྟེང་དུ་བཞག་རྗེས་མེ་ནི་ཞི་བའི་ཚེ། །ཐལ་བ་མཁའ་འགྲོའི་གདོང་དང་མ་ཐུག་པར། །རྒྱ་གྲམ་ལམ་མམ་རི་སྣ་ཚྭ་ཁང་འོག །བླུག་བཅུག་ལས་སྦྱོར་མནན་སྲེག་འཕང་གསུམ་ཚང་། །གནོད་བྱེད་དོན་དུ་ཡིག་དྲུག་མང་དུ་བགྲང་། །བྱམས་པ་བྱོན་དུས་ས་ཡི་སྟེང་ལངས་ནས། །བྱང་ཆུབ་སེམས་བསྐྱེད་ཐོབ་པའི་སྨོན་ལམ་གདབ། །དགའ་སྟོན་ཚོགས་དང་རྗེས་ཆོག་གཞུང་ལྟར་བྱ། །གཏོར་ཆེན་མར་རྒྱན་བཅས་པ་
གཏོར་བདུག་རུང་། །ཟ་འདྲེ་ཆུང་སྲི་འདུལ་དང་གོད་གཅོད་དང་། །སྲུང་ཟློག་རིམ་གྲོར་འདི་ལས་ཟབ་པ་མེད། །གཙོ་བོར་ངག་གི་ནུས་པ་སྒྲུབ་པ་སྟེ། །མཆོག་གི་དངོས་གྲུབ་ཞོར་ལ་འབྱུང་བ་ཡིན། །པཀཱིའི་བཀའ་འབུམ་ནས་བྱུང་པད་འབྱུང་གསུངས། །རྒྱལ་བ་རྒྱ་མཚོའི་སྒྲུབ་གཞུང་ཐམས་ཅད་ནས། །ཁ་བཀང་དགོས་པའི་སྔགས་དང་དམིགས་པ་བསྣན། །ཤིན་ཏུ་ཟབ་ཅིང་ལག་ཏུ་བླངས་བདེ་འདི། །མཐར་ཕྱིན་ཐབས་མཁས་གཉིས་ཀྱིས་བསྐུལ་བའི་ཕྱིར། །མེ་ལུག་ས་གའི་དམར་པོའི་ཚེས་ལྔ་ཡི། །སྔ་དྲོའི་ཐུན་ལ་རཱ་ག་ཨ་སྱས་གདམས། །ཧོར་རིགས་བཤེས་གཉེན་མཐའ་རུ་ཕྱིན་པས་བྲིས། །ཉེས་འགལ་མཆིས་ན་ལྷ་དང་སྲུང་མར་བཤགས། །དགེ་བས་ཞིང་གཤེགས་རིག་འཛིན་སྤྲུལ་པའི་སྐུ། །བདུད་བཞིའི་དགྲ་ལས་རྣམ་པར་རྒྱལ་གྱུར་ཅིག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །