ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལོས་ཡུམ་གསང་བ་ཡེ་ཤེས་མཁའ་འགྲོ་གཙོ་བོར་སྒྲུབ་པ་དངོས་གྲུབ་རྒྱ་མཚོ་ཞེས་བྱ་བའི་ཟིན་བྲིས།
ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལོས་ཡུམ་གསང་བ་ཡེ་ཤེས་མཁའ་འགྲོ་གཙོ་བོར་སྒྲུབ་པ་དངོས་གྲུབ་རྒྱ་མཚོ་ཞེས་བྱ་བའི་ཟིན་བྲིས་བཞུགས་སོ། །འདི་སྣོད་ལྡན་རེ་རེ་མ་གཏོགས་སྐལ་མེད་དང་མང་པོ་ལ་སྤེལ་ན་མཁའ་འགྲོ་མས་རང་གི་ཚེ་སྲོག་དང་ལོངས་སྤྱོད་ལ་འབྲིང་གསུངས་པས་སྙིང་འདྲ་མ་གཏོགས་ལ་གསང་ངོ་། །
ན་མོ་གུ་རུ་ལོ་ཀེ་ཤྭ་ར་གུ་བྱེ་ཛྙཱ་ན་ཌཱཀི་ཡེ། དཔའ་བོ་རྒྱ་མཚོའི་ཚོགས་ལ་ཕྱག་འཚལ་ལོ། །དགོངས་པ་གྲོལ་ཞིང་བྱིན་རླབས་དངོས་གྲུབ་སྩོལ། །རྒྱལ་བ་རྒྱ་མཚོ་ལྷ་ལྔའི་སྒྲུབ་ཐབས་ལས། །ཡུམ་ཉིད་གཙོ་བོར་སྒྲུབ་སྟེ་ལས་སྦྱོར་ཐབས། །སློབ་དཔོན་པདྨས་མཛད་པ་ཚན་གཉིས་དང་། །སྲོང་བཙན་སྒམ་པོས་མཛད་དང་པཀཱིས་གསུངས། །ཀུན་གྱི་དོན་བསྡུས་ཆོ་ག་འདི་ཉིད་ལ། །གཞུང་བཟུང་ཉམས་སུ་ལེན་ཐབས་ཁྱེར་བདེ་ནི། །སྒྲུབ་གནས་གནས་རི་བཟང་ངམ་དབེན་གནས་སུ། །རྒྱས་པར་མཎྜལ་སྟེགས་བུ་ལེགས་བྱ་སྟེ། །བུད་མེད་གཙང་མའི་པདྨ་རཀྟའམ། །
མ་རྙེད་ཚབ་ལ་བྲག་ཞུན་བཏང་བར་བྱ། །མཚལ་དང་སིནྡྷ་ར་རྣམས་ཆང་དང་སྦྱར། །ས་སྟེགས་ཡིན་ན་བཙག་གིས་དམར་པོར་བསྒྱུར། །དེ་སྟེང་རྫ་ས་སྣ་དེ་དག་བྱུག་པ་སྟེ། །ས་སྟེགས་མེད་ན་གཞི་ནི་དམར་པོ་བཏིང་། །དེ་སྟེང་རྫས་རྣམས་དེ་དག་ཅུང་ཟད་བཏབ། །དབུས་སུ་པདྨ་དམར་པོ་འདབ་བཞི་ལ། །དབུས་དང་ཕྱོགས་བཞིར་རང་མདོག་ཐིག་ལེ་བཀོད། །དེ་རྒྱབ་ཆོས་འབྱུང་བསྣོལ་མ་བྲི་བ་སྟེ། །ཟུར་དྲུག་དགའ་འཁྱིལ་མཚམས་དྲུག་གཡུང་དྲུང་རེ། །དེ་རྒྱབ་ཟླུམ་བསྐོར་དེ་རྒྱབ་པད་འདབ་བཞི། །ཚོམ་བུ་གཡས་གཡོན་དམར་དང་མདུན་རྒྱབ་ནག །དེ་རྒྱབ་རྡོ་
རྭ་མེ་རི་གཡོན་སྐོར་བྲི། །རྡུལ་ཚོན་མེད་ན་འབྲུ་ཡིས་བརྡ་ཙམ་བྲི། །དེ་དབུས་མཉྫིའམ་ཤིང་གི་ཨོཾ་བྱས་སྟེང་། །ཐོད་པ་དུམ་གཅིག་གམ་ནི་མཚན་བཟང་བཞག །པདྨ་རཀྟ་བྱང་སེམས་དཀར་པོ་གཉིས། །མ་རྙེད་ཚབ་ལ་ཅོང་ཞི་བྲག་ཞུན་ནོ། །བཟང་དྲུག་གི་ཝང་མཚལ་དང་སིནྡཱ་ར། །འབྲུ་སྣ་སྨན་སྣ་རིན་ཆེན་སྣ་ཚོགས་དང་། །ཟས་སྣ་བཟང་པོ་གང་འཛོམ་ཞིབ་པར་བཏུལ། །རྙེད་ན་བ་དམར་འོ་མ་མ་རྙེད་ཀྱང་། །ཆང་བསྲེས་བག་ཟན་ནམ་ནི་ཞིབ་ཙམ་གྱི། །རིལ་བུ་མང་བྱས་ཁ་དོག་དམར་པོ་བསྒྱུར། །ལེགས་པར་སྐམ་ལ་ཐོད་པ་དེ་ཉིད་བཀང་། །དར་དམར་བཀབ་སྟེ་མེ་ལོང་སིནྡྷ་ར། །འདབ་བཞི་ཆོས་འབྱུང་དགའ་འཁྱིལ་བཅས་པ་བྲི། །དབུས་ཧྲུའདབ་བཞི་ཧ་རི་ནི་ས་སྟེ། །ཆོས་འབྱུང་མཐའ་བསྐོར་བྷ་སུ་སིདྡྷི་སོགས། །བཟླ་བྱའི་སྔགས་ཤམ་ཡིག་མགོ་ཕྱིར་བསྟན་བྲི། །དེ་ཉིད་བྷནྡྷ་སྟེང་དེར་བཞུགས་པར་བྱ། །གཡས་གཡོན་གཉིས་སུ་སྨན་རཀ་གཉིས་པོ་བཤམས། །མདུན་དུ་རིན་ཆེན་སྣོད་དམ་ཡང་པའི་སྣོད། །མཁའ་འགྲོའི་གཏོར་མ་ཟུར་གཉིས་རྒྱན་ལེགས་པ། །འཁོར་བཞི་ཟུར་གསུམ་ཀུན་ཀྱང་ཤ་དམར་དང་། །ཟས་སྣ་རྙེད་ཚད་ཀུན་གྱིས་བརྒྱན་པ་
བཤམས། །མཐའ་བསྐོར་མཆོད་པ་སྣ་བདུན་སྐོར་བཤམས་དང་། །ཚོགས་དང་ལག་མཆོད་ཐུན་གཏོར་མང་པོ་བསགས། །དཀྱིལ་འཁོར་མདུན་དུ་སྣ་བདུན་བརྗེ་རྒྱུ་བཤམས། །དེ་ནས་ལྷ་ལྔའི་བདག་མདུན་གཞུང་ལྟར་རམ། འདི་ནི་རྙིང་མ་ཁོ་ན་ཡིན་པའི་ཕྱིར། །བདག་མདུན་དུས་གཅིག་བསྐྱེད་ཀྱང་མཆོད་པ་སྟེ། །མཆོད་བཞི་བསྟོད་བཞི་ཡན་ཆོད་ཚར་བའི་རྗེས། །བསྙེན་པའི་སྐབས་སུ་སྐད་ཅིག་གནས་འགྱུར་ཏེ། །བདག་མདུན་གསང་བ་ཡེ་ཤེས་དབུས་སུ་བཞུགས། །ཐུགས་རྗེ་ཆེན་པོའི་ལྷ་ཚོགས་གཡོན་ཕྱོགས་བཞུགས། །བདག་དང་རྟ་མགྲིན་ཐུགས་རྗེ་ཆེན་པོ་ཡི། །ཐུགས་ཀར་ཧཱིམཐར་རང་རང་སྔགས་ཕྲེང་ནི། །གཙོ་མོའི་འདབ་བཞིར་མཁའ་འགྲོ་དཔའ་བོ་བཞི། །རང་རང་ཐུགས་ཀར་རང་སྲོག་ཡིག་འབྲུ་རེ། །གཙོ་མོའི་སྔགས་ཕྲེང་གཡོན་འཁོར་གཡས་གཡོན་གྱི། །ལྷ་གཉིས་ཐུགས་ཀའི་སྔགས་ཕྲེང་གཡས་སུ་འཁོར། །དེ་ལས་འོད་ཟེར་སྣ་ཚོགས་ཕྱོགས་བཅུར་འཕྲོས། །སྟོང་གསུམ་སྟོང་གི་འཇིག་རྟེན་ཁམས་འདི་ཉིད། །ཆོས་འབྱུང་བདེ་ཞིང་གསལ་བའི་རང་བཞིན་ཅན། །རྒྱ་ཆེན་ཆོས་ཀྱི་དབྱིངས་དང་མཉམ་པར་གྱུར། །སླར་ཡང་འོད་
འཕྲོས་ཕྱོགས་བཅུའི་ཞིང་རྣམས་ནས། །ལྷ་ལྔའི་ལྷ་ཚོགས་དཔག་མེད་སྤྱན་དྲངས་ཏེ། །བདག་མདུན་ལྷ་ཚོགས་རྣམས་ལ་ཡང་ཡང་བསྟིམ། །དེ་ནས་བདག་གི་སྐུ་ལས་འོད་ཟེར་ལྟའཕྲོས། །ས་ཕྱོགས་འདི་ཉིད་ནུབ་ཕྱོགས་ཨོ་རྒྱན་ཡུལ། །འཇའ་གུར་མེ་ཏོག་ཆར་འབེབས་སྤོས་དྲི་ལྡང་། །རི་བོ་ཐམས་ཅད་ཀེང་རུས་རུས་པའི་རི། །ཆུ་ཀླུང་ཐམས་ཅད་ཁྲག་འཆང་བདུད་རྩི་ལྔ། །རྩི་ཤིང་ཐམས་ཅད་མདའ་མདུང་མཚོན་ཆར་སྐྱེས། །སྒྲ་སྐད་ཐམས་ཅད་ཧཱུྃ་ཕཊ་སྔགས་ཀྱི་སྒྲ། །དུས་གསུམ་སངས་རྒྱས་རྣམས་ཀྱང་ཡ་ང་ཞིང་། །ཁྲོ་བོ་བཅུ་ཡང་རྒྱུ་བར་མི་ནུས་པའི། །རབ་ཏུ་འཇིགས་པའི་དུར་ཁྲོད་ཆེན་པོར་གྱུར། །གནས་ཁང་ཐོད་པ་སྐམ་རློན་བརྩེགས་པའི་མཁར། །གྲུ་བཞི་སྒོ་བཞི་ཞིང་ཆེན་ཐོག་ཕུབ་ཅིང་། །ཁྲོ་མོའི་དཀྱིལ་འཁོར་ཡོངས་སུ་རྫོགས་པའི་དབུས། །ཆོས་འབྱུང་གྲུ་གསུམ་བསྣོལ་བའི་སྟེང་དུ་ནི། །ཨུ་མ་སྒྲ་གཅན་འདོད་ལྷ་བསྣོལ་བའི་སྟེང་། །རང་ཉིད་ལྷ་མོས་གར་མཛད་ཞབས་བརྫིས་པས། །སྟོང་གསུམ་འཇིག་རྟེན་ཤིག་ཤིག་ཡམ་ཡམ་འགུལ། །འུར་སྒྲ་ཐུག་ཆོམ་ཕྱོགས་བཅུར་བསྒྲགས་པ་ཡིས། །གནས་ཡུལ་རིགས་བཞིའི་དཔའ་བོ་ཌཱཀྐིའི་ཚོགས། །ཐམས་ཅད་
འཚོགས་ནས་གུས་འདུད་གདན་ནས་བཏེག །ཅི་བགྱིས་བཀའ་ཉན་གསུང་བསྒྲུབ་ཁས་བླངས་བསྒོམ། །ཕྱག་གཡས་གྲི་གུག་ལས་ནི་གྲི་གུག་ཆར། །བབས་པས་གནོད་བྱེད་ཐམས་ཅད་དུམ་བུར་གཏུབས། །སེམས་ཅན་ཀུན་གྱི་བདག་འཛིན་རྩད་ནས་བཅད། །ཕྱག་གཡོན་བདུད་རྩི་དེ་ལས་འོད་ཟེར་འཕྲོས། །འཁོར་འདས་ཀུན་གྱི་དངོས་གྲུབ་བཅུད་བསྡུས་ཏེ། །ཞལ་དུ་གསོལ་བས་བཀྲག་མདངས་གཟི་བརྗིད་རྒྱས། །ཁ་ཊཾ་རལ་གྲི་གཉིས་ལས་མཚོན་ཆའི་ཚོགས། །སྤྲོས་པས་བདག་དང་སེམས་ཅན་ཐམས་ཅད་ཀྱི། །ཞལ་ནས་ཨ་ར་ལི་དང་ཕོ་སྒྲ་ཡིས། །བྱང་ཆུབ་སྒྲུབ་པའི་བགེགས་རྣམས་ཚར་བཅད་གྱུར། །དཔའ་བོ་མཁའ་འགྲོ་ཐམས་ཅད་དབང་མེད་བསྡུས། །སྤྱན་གསུམ་དམར་ཟླུམ་ཕྱོགས་བཅུར་གཟིགས་པ་ཡིས། །གང་གཟིགས་འགྲོ་བ་ཐམས་ཅད་དབང་དུ་བསྡུས། །སྐུ་དང་རྒྱན་ཆ་རྣམས་ལས་འོད་ཟེར་འཕྲོས། །འོག་མིན་མཁའ་སྤྱོད་གནས་དང་ཨོ་རྒྱན་ཡུལ། །ས་འོག་ས་སྟེང་ས་བླར་གནས་པ་ཡི། །དཔའ་བོ་མཁའ་འགྲོ་ཀུན་གྱི་ཞིང་ཁམས་དང་། །ཕོ་བྲང་གདན་ཁྲི་རྒྱན་ཆ་ཐམས་ཅད་ཀྱི། །བྱིན་རླབས་བསྡུས་ནས་རང་གི་དེ་རྣམས་ལ། །ཐིམ་པས་
བཀྲག་མདངས་གཟི་བརྗིད་འོད་དུ་འབར། །སླར་ཡང་སྐུ་ལས་འོད་ཟེར་འཕྲོས་པ་ཡིས། །བདག་དང་མདུན་གྱི་དཀྱིལ་འཁོར་བཅུ་པོ་རྣམས། །ཐམས་ཅད་གསང་ཡེའི་དཀྱིལ་འཁོར་བཅུ་རུ་གྱུར། །བདག་གི་འོད་ཟེར་མདུན་བསྐྱེད་ལ་ཕོག་པས། །མདུན་བསྐྱེད་སྐུ་ལས་གསང་ཡེ་གྲངས་མེད་འཕྲོས། །རྒྱལ་བ་ཀུན་གྱི་སྐུ་ཡི་བྱིན་རླབས་དང་། །སེམས་ཅན་ཀུན་གྱི་ལུས་ཀྱི་གཟི་བརྗིད་བསྡུས། །ཚུར་འདུས་འོད་ཞུ་བདག་གི་དཔྲལ་བར་ཐིམ། །མདུན་བསྐྱེད་ཐུགས་ལས་ཧྲི༔ཡིག་གཅིག་ཆད་པས། །སྔགས་རིང་སྒྲ་དང་བཅས་པས་འཇིག་རྟེན་གང་། །རྒྱལ་བ་ཀུན་གྱི་གསུང་གི་བྱིན་རླབས་དང་། །འགྲོ་བ་ཀུན་གྱི་ངག་གི་ནུས་མཐུ་བསྡུས། །ཚུར་འདུས་འོད་ཞུ་བདག་གི་མགྲིན་པར་ཐིམ། །མདུན་བསྐྱེད་ཐུགས་ལས་རྡོ་རྗེ་རྩེ་ལྔ་པས། །མཚན་པའི་ཟངས་གྲི་གཅིག་འཕྲོས་འཇིག་རྟེན་གང་། །རྒྱལ་བ་ཀུན་གྱི་ཐུགས་ཀྱི་བྱིན་རླབས་དང་། །སེམས་ཅན་ཀུན་གྱི་བསོད་ནམས་ཡེ་ཤེས་བསྡུས། །ཚུར་འདུས་འོད་ཞུ་བདག་གི་སྙིང་གར་ཐིམ། །བདག་མདུན་སྔགས་འཁོར་གཡོན་དུ་དྲག་ཏུ་འཁོར། །བདག་གི་ཐུགས་ལས་འོད་ཟེར་དམར་པོ་འཕྲོས། །མདུན་གྱི་གཙོ་མོའི་ཞལ་ཞུགས་སྐུ་ལུས་
བརྒྱུད། །བྷ་ག་ནས་ཐོན་རང་གི་གསང་གནས་ནས། །ཐུགས་ཀར་ཐིམ་པས་བྱིན་རླབས་དངོས་གྲུབ་ཐོབ། །འོད་ཟེར་མགལ་མེའི་འཁོར་ལོ་ལྟར་བསྐོར་ཞིང་། །ཕྱིས་ནས་འོད་ཟེར་དེ་ཡང་སྔགས་ཕྲེང་གྱུར། །སྔགས་ཕྲེང་དེ་ལས་འོད་ཟེར་ཕྱོགས་བཅུར་འཕྲོས། །བླ་མ་ཡི་དམ་སངས་རྒྱས་བྱང་སེམས་ཀྱི། །སྐུ་གསུང་ཐུགས་ཀྱི་བྱིན་རླབས་དངོས་གྲུབ་དང་། །སེམས་ཅན་ཀུན་གྱི་སེམས་རྒྱུད་བསོད་ནམས་ཀུན། །རང་དབང་མེད་པར་བསྡུས་ནས་སྔགས་ཕྲེང་ལ། །ཐིམ་ཞིང་སྔགས་ཕྲེང་བདག་ལ་ཐིམ་པ་ཡིས། །འཁོར་འདས་ཡོན་ཏན་ཐམས་ཅད་བདག་ལ་ཐིམ། །སྔགས་ཕྲེང་འཁོར་བའི་འོད་ཟེར་དེ་ཕོག་པས། །སེམས་ཅན་ཀུན་གྱི་ལུས་ངག་ཡིད་གསུམ་གྱི། །སྡིག་སྒྲིབ་དག་ནས་ཕོ་རྣམས་སྤྱན་རས་གཟིགས། །མོ་རྣམས་གསང་བ་ཡེ་ཤེས་མཁའ་འགྲོར་གྱུར། །ཀུན་ཀྱང་སྔགས་སྒྲ་འུར་འུར་སྒྲོག་པར་གྱུར། །ཨོཾ་དྷུ་མ་གྷ་ཡེ་ན་མསྭཱ་ཧཱ། ཧ་རི་ནི་ས་ར་ཙ་ཧཱིཡ་ཧཱུྃ་ཛཿ ཨོཾ་ཨཱཿཧཱུྃ་ཧཱུྃ༔ ཨོཾ་མ་ཎི་པདྨེ་ཧཱུྃ། བཱ་སུ་སི་ཏི་ན་ན་ཥ་དྷེ་སི་ཏི་སརྦ་སི་ཏི་ཕ་ལ་ཧཱུྃ། སི་ཏི་སི་ཏི་ས་མ་ཡ་སྡུས་སྡུས་ཧཱུྃ་ཧཱུྃ། དེ་ནས་ཐུན་གཏོར་ཟུར་གསུམ་བདུད་རྩིས་བྲན། །ཨོཾ་ཨཱཿཧཱུྃ། རླུང་
མེ་ཐོད་སྐྱེད་ཡེ་ཤེས་ཀ་པཱ་ལ། །གཏོར་མ་ཤ་ལྔ་བདུད་རྩི་ལྔས་བརྒྱན་པ། །འོད་ཞུ་ཁ་དོག་དྲི་རོ་ཕུན་ཚོགས་གྱུར། །ཧ་ཧོ༔ཧྲཱིཿ ཨོཾ་ཨཱཿཧཱུྃ་སརྦ་བུདྡྷ་ཌཱཀྐི་ནཱི། མ་ཧཱ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བཛྲ་ཌཱཀྐི་ནཱི། རཏྣ་ཊཱཀྐི་ནཱི། པདྨ་ཌཀྐི་ནཱི། ཀརྨ་ཊཱཀྐི་ནཱི་ཡེ་བ་ལིཾ་ཏ་ཁཱ་ཧི་ཁཱ་ཧི། མཁའ་འགྲོ་གསང་བ་ཡེ་ཤེས་མ། །རྡོ་རྗེ་མཁའ་འགྲོ་རིན་ཆེན་མཁའ་འགྲོ་མ། །པདྨ་མཁའ་འགྲོ་ལས་ཀྱི་མཁའ་འགྲོ་མ། །བྱིན་གྱིས་བརླབ་ཅིང་བར་ཆད་སེལ་མཛད་མ། །བྱིན་རླབས་བསམ་པ་བསྒྲུབ་ཏུ་གསོལ། །དམ་རྫས་གཏོར་མ་འདི་ལོངས་ལ། །བདག་གི་བར་ཆད་བསྲུང་བ་དང་། །དངོས་གྲུབ་དགོས་འདོད་སྩོལ་བ་དང་། །གདུག་པའི་དགྲ་བགེགས་བསྒྲལ་བ་དང་། །རྣལ་འབྱོར་བསམ་པ་བསྒྲུབ་ཏུ་གསོལ། །ཨོཾ་བུདྡྷཱ་ཌཱཀྐི་ནཱི་ཡེ། བཛྲ་ཌཀྐི་ནཱི། རཏྣ་ཊཱཀྐི་ནཱི། པདྨ་ཊཱཀྐི་ནཱི། ཀརྨ་ཊཱཀྐི་ནཱི། སརྦ་སིདྡྷི་ཧཱུྃ། ཞེས་བརྗོད་ཐུན་གཏོར་གཏོར་ཆེན་ནང་དུ་ཕུལ། །དེ་ནས་སྐད་ཅིག་བདག་མདུན་གནས་འགྱུར་པས། །ལྷ་ལྔ་དང་པོའི་སྐུ་རུ་གསལ་བྱས་ལ་་་་་དེ་དོན་གཙོ་བོ་དང་རྟ་མགྲིན་གསང་ཡེ་སོགས་ཀྱི་དཀྱིལ་འཁོར་བསྒྱུར་མཆན། །དེ་ནས་ཇ་མར་ཐུད་སོགས་ཟས་སྣའི་རིགས། །མཐེབ་སྐྱ་དང་བཅས་གཏོར་ཆེན་
ཕུག་གཏོར་གསོས། །གཏོར་བསྔོས་བྱས་ཤིང་གང་འདོད་གསོལ་ཞེས་བརྗོད། །ལྷ་ལྔའི་སྔགས་རིང་ཡིག་འབྲུ་ཉེར་བརྒྱད་ལ། ན་ན་ཥ་དྷེ་པུཊྚི་ཀུ་རུ་ཡེ་སྭཱ་ཧཱ། ཞེས་པ་ཕྲེང་སྐོར་ཙམ་ཞིག་བཟླས་པ་བྱ། །དེ་ནས་ཐུན་བསྡུ་ལ་སོགས་གཞུང་ལྟར་རོ། །དེ་ནས་གུང་ཐུན་ལ་ཡང་དེ་ལྟར་མཚུངས། །ཐུན་དང་འདོན་ལུགས་དམིགས་པ་གོང་ལྟར་བྱ། །ཉིན་ཕྱེད་ཉིད་ལ་ཐུན་དཀྱིལ་རེད་ཀྱང་བཟོད། །སྦྱིན་སྲེག་བསྡུས་པ་འགྲུབ་ན་ཤིན་ཏུ་ལེགས། །མ་འགྲུབ་ན་ཡང་མ་ཚང་སྐྱོན་ནི་མེད། །དེ་ནས་དགོང་ཀའི་ཐུན་ལ་བབ་པའི་རྗེས། །ལྷ་ལྔ་བདག་མདུན་ཚར་གཅིག་གཞུང་ལྟར་འདོན། །དེ་ནས་བཟླས་པ་བྱེད་ཚེ་དམིགས་པ་ནི། །བདག་མདུན་གསང་བ་ཡེ་ཤེས་དབུས་སུ་བྷཻཾ། །ཐུགས་རྗེ་ཆེན་པོ་འཁོར་བཅས་གཡོན་དུ་བྷཻཾ། །བདག་མདུན་གཙོ་མོ་གཉིས་ཀྱི་ཐུགས་ཀ་རུ། །ཐུགས་རྗེ་ཆེན་པོ་འཇིག་རྟེན་དབང་ཕྱུག་སྐུ། །དམར་པོ་ཞལ་གཅིག་ཕྱག་གཉིས་འཛུམ་མདངས་ཅན། །ཕྱག་གཡས་མུ་ཏིག་དམར་པོའི་ཕྲེང་བ་འདྲེན། །གཡོན་པས་པདྨ་དམར་པོའི་སྡོང་བུ་འཛིན། །དར་དང་རིན་ཆེན་སྣ་ཚོགས་རྒྱན་གྱིས་སྤྲས། །ཞབས་གཉིས་པད་ཟླའི་གདན་ལ་སྐྱིལ་ཀྲུང་བཞུགས། །
ཐུགས་ཀར་པདྨ་དམར་པོའི་ཟེའུ་འབྲུ་ལ། །ཧིམཐར་ཡིག་དྲུག་དྷུ་མའི་སྔགས་གཡས་འཁོར། །དེ་ལས་འོད་ཟེར་དམར་པོ་འཕྲོས་པ་ཡིས། །རང་ཉིད་གསང་ཡེ་བྷ་ག་ནས་ཐོན་ཏེ། །འཁོར་ནི་རིགས་བཞིའི་མཁའ་འགྲོ་རང་ཉིད་ཀྱི། །གདན་ནི་པདྨ་འདབ་བཞི་བཏེག་པ་ལ། །ཕོག་པས་འཁོར་དང་རང་འདྲའི་སྤྲུལ་པ་ནི། །བྱེ་བ་དུང་ཕྱུར་འཇིག་རྟེན་ཁྱབ་པར་འཕྲོས། །ལས་བྱེད་སྤྲུལ་པའི་མཁའ་འགྲོ་དེ་རྣམས་ཀྱིས། །རྡོ་རྗེ་མཁའ་འགྲོས་ལྷ་མིན་དབང་དུ་བསྡུས། །རིན་ཆེན་མཁའ་འགྲོས་མི་ནོར་ཟས་གསུམ་བསྡུས། །པདྨ་མཁའ་འགྲོས་ཀཀི་ཟས་ནོར་བསྡུས། །ལས་ཀྱི་མཁའ་འགྲོས་དགྲ་བགེགས་དབང་དུ་བསྡུས། །འཇིག་རྟེན་ཟས་ནོར་དངོས་གྲུབ་བཅུད་བསྡུས་ནས། །ཐོད་པའི་རིལ་བུ་ལ་ཐིམ་ལྷུད་ལྷུད་གང་། །དེ་ནས་བདག་གི་ཐུགས་ཀའི་སྔགས་ཕྲེང་ལས། །འོད་ཟེར་ཡབ་ཡུམ་ཞལ་ནས་རིམ་པར་བརྒྱུད། །མདུན་གྱི་ཡུམ་ཡབ་ཞལ་ཞུགས་ཐུགས་ཀ་བརྒྱུད། །ཡུམ་ཡབ་གསང་བ་ནས་ཐོན་རང་ཉིད་ཀྱི། །ཡུམ་ཡབ་གསང་བ་ནས་ཞུགས་ཐུགས་ཀར་ཐིམ། །དེ་ལྟར་འོད་ཟེར་མགལ་མེ་བཞིན་དུ་འཁོར། །དེ་ནས་འོད་ཟེར་སྔགས་རིང་གྱུར་ནས་འཁོར། །དེ་ལས་འོད་ཟེར་
དམར་པོ་ལྕགས་ཀྱུའི་དབྱིབས། །མེ་ལྟར་ཚ་ཞིང་གདུང་བའི་ཚོགས་འཕྲོས་པས། །སྐྱེ་འགྲོ་ཀུན་གྱི་སྙིང་ནས་བཟུང་སྟེ་བཀུག །རིག་པའི་ངོ་བོ་ཐུགས་ཀའི་ཧྲིལ་་ཐིམ། །ལུས་པོ་འོད་དུ་ཞུ་ནས་ལྟེ་བར་ཐིམ། །སླར་ཡང་སྔགས་ཀྱི་འོད་ཟེར་གོང་ལྟར་འཕྲོས། །གང་དམིགས་ལ་སོགས་སྐྱེ་འགྲོ་ཐམས་ཅད་ཀྱི། །ཕོ་ཡི་སྙིང་དང་མོ་ཡི་གསང་གནས་ནས། །བཟུང་སྟེ་རང་དབང་མེད་པར་མདུན་དུ་བཀུག །འོད་ཀྱིས་ཕོག་པས་དེ་དག་བྱང་སེམས་ནི། །དཀར་དམར་ངོ་བོར་འོད་དུ་ཞུ་གྱུར་ནས། །བྱམས་དང་སྙིང་རྗེ་དྲག་ཏུ་བསྒོམས་བྱས་པས། །བྱང་སེམས་བདག་དང་མདུན་གྱི་རིལ་བུར་ཐིམ། །སླར་ཡང་སྔགས་ཕྲེང་འོད་ཟེར་དམར་པོ་འཕྲོས། །བླ་མ་ཡི་དམ་སངས་རྒྱས་བྱང་སེམས་དང་། །དཔའ་བོ་མཁའ་འགྲོ་ཆོས་སྐྱོང་ཐམས་ཅད་ཀྱི། །སྐུ་གསུང་ཐུགས་ཀྱི་བདུད་རྩི་བྱང་ཆུབ་སེམས། །བསྡུས་ནས་སྔགས་ཕྲེང་ལ་བརྒྱུད་བདག་ལ་ཐིམ། །བདུད་རྩིས་ལུས་གང་བདེ་སྟོང་ཡེ་ཤེས་སྐྱེས། །སླར་ཡང་སྔགས་ཕྲེང་འཁོར་ལས་འོད་ཟེར་ནི། །དམར་པོ་ལྕགས་ཀྱུའི་དབྱིབས་ཅན་གྲངས་མེད་འཕྲོས། །ལྷ་འདྲེ་མི་གསུམ་ལུས་ངག་ཡིད་གསུམ་གྱི། །ཚེ་བསོད་དཔལ་
འབྱོར་བཀྲག་མདངས་གཟི་བརྗིད་དང་། །ནོར་བུ་ལ་སོགས་སྟེང་འོག་བར་གསུམ་གྱི། །དངོས་གྲུབ་བཅུད་བསྡུས་བདག་དང་རིལ་བུར་ཐིམ། །སླར་ཡང་སྔགས་ཕྲེང་དྲག་ཏུ་འཁོར་བ་ཡིས། །མདུན་གྱི་ཐུགས་ཀའི་འཇིག་རྟེན་དབང་ཕྱུག་བསྐུལ། །དེ་ཡི་སྐུ་ལས་འོད་ཟེར་དམར་པོ་འཕྲོས། །བྷ་ག་ནས་ཐོན་རིགས་བཞིའི་མཁའ་འགྲོར་ཕོག །དེ་དག་བཞི་ལས་ལས་བྱེད་སྤྲུལ་པ་ཡི། །མཁའ་འགྲོ་དམར་མོ་གཅེར་བུ་རིན་ཆེན་བརྒྱན། །པདྨས་མཚན་པའི་ལྕགས་ཀྱུ་ཞགས་པ་ཐོགས། །གྲངས་མེད་འཕྲོས་ནས་ཁམས་གསུམ་དབང་དུ་བསྡུས། །རྡོ་རྗེ་ལས་བྱེད་མ་ཡིས་ལྷ་མི་བསྡུས། །རིན་ཆེན་ལས་བྱེད་མ་ཡིས་ཟས་ནོར་བསྡུས། །པདྨ་ལས་བྱེད་མ་ཡིས་ཌཱཀྐི་བསྡུས། །ཀརྨ་ལས་བྱེད་མ་ཡིས་དགྲ་བགེགས་བསྡུས། །མདོར་ན་འཇིག་རྟེན་མི་ནོར་ཟས་གསུམ་བཅུད། །བདག་དང་རིལ་བུ་རྣམས་ལ་འོད་དུ་བསྟིམ། །ལྷ་ལྔའི་སྔགས་རིང་ཉེར་བརྒྱད་པ་ཡི་མཇུག །བཱ་སུ་སིདྡྷི་ན་ན་ཌ་དྷེ་སརྦ་སིདྡྷི་ཕ་ལ་ཧཱུྃ། སིདྡྷི་སིདྡྷི་ས་མཱ་ཡ་སྡུས་སྡུས་ཧཱུྃ་ཧཱུྃ། པུཊྛིབ་ཤང་ཀུ་རུ་ཧཱུྃ། རཏྣ་སིདྡྷི་ས་མཱ་ཡ་ཧྲིང་ཧྲིང་ཛ་ཛཿ དེ་ནས་ཐུན་མཇུག་གོང་ལྟར་ཐུན་གཏོར་འབུལ། །ལག་མཆོད་འགྲུབ་ན་ལེགས་ཤིང་མ་
འགྲུབ་ཀྱང་། །ཚོགས་བྱས་ཚོགས་ཕུད་ཕུལ་ལ་གཏོར་བསྔོས་བྱ། །གཏོར་བསྔོས་མཇུག་གི་སྔགས་དེ་གོང་ལྟར་འདོན། །དེ་ནས་ཚོགས་དེ་རང་གིས་བཟའ་བའི་ཚེ། །རང་ཉིད་སྐད་ཅིག་གནས་འགྱུར་ནས། །རང་ཉིད་གསང་ཡེ་དབུ་སྟོང་ལྡན་པ་ཡི། །གཡས་གཡོན་མདུན་རྒྱབ་སྟེང་ཞལ་གཉིས་བརྒྱ་རེ། །གཡས་ཕྱག་སྟོང་གིས་གྲི་གུག་རལ་གྲི་སྟེ། །གཡོན་ཕྱག་སྟོང་གིས་ཁ་ཊཾ་ཐོད་པ་བསྣམས། །གཉིས་སྟོང་ཞབས་ཀྱིས་ལྟ་སྟངས་སྣ་ཚོགས་མཛད། །སྐུ་ཚད་བསམ་ལས་འདས་ཤིང་གཟི་བརྗིད་འབར། །ཞལ་ནས་ཨོཾ་ཨཱཿཧཱུྃ་ཞེས་གསུངས་པ་ཡིས། །འཇིག་རྟེན་ས་རྡོ་རི་བྲག་ནགས་ཚལ་དང་། །ཁམས་གསུམ་སེམས་ཅན་འཆི་མེད་བདུད་རྩིར་ཞུ། །ཡང་ནི་ཨོཾ་ཨཱཿཏྟཱཧཱུྃ་ཞེས་གསུངས་ཙམ་གྱིས། །ཕྱོགས་བཅུ་དུས་གསུམ་རྒྱལ་བ་སྲས་བཅས་ཀུན། །ཟག་པ་མེད་པ་ཡེ་ཤེས་བདུད་རྩིར་གྱུར། །འཁོར་འདས་ཐམས་ཅད་བདུད་རྩིར་གྱུར་པ་དེ། །བདག་ཉིད་ཞལ་སྟོང་ལྡན་པས་དུས་གཅིག་རྔུབ། །འཆི་མེད་ཚེ་དང་མཆོག་ཐུན་དངོས་གྲུབ་ཐོབ། །བདག་དང་ཐུགས་ཀའི་འཇིག་རྟེན་དབང་ཕྱུག་གཉིས། །བདུད་རྩིས་ཚིམས་པས་གཟི་བརྗིད་འབར་བར་བྷཻཾ། །སྣང་སྲིད་
ཟས་སུ་ཟ་བའི་གདམས་ངག་འདི། །ནམ་ཡིན་བཟའ་བཏུང་དུས་སུ་བྷཻཾ་ན་ཡང་། །མཁའ་འགྲོ་སྤྲིན་ལྟར་འདུ་ཞིང་དངོས་གྲུབ་ཐོབ། །ལྷག་མ་འབུལ་ཞིང་ཐུན་བསྡུ་གཞུང་ལྟར་རོ། །དེ་ལྟར་ཞག་བདུན་ཐུན་བཞིར་ཉམས་བླངས་པས། །རྟགས་ནི་རབ་ལ་རིལ་བུ་མང་དུ་འཕེལ། །འོད་དམར་འཕྲོ་དང་དུ་བ་རླངས་པ་འཐུལ། །འབྲིང་དུ་རིལ་བུ་དྲོད་འབར་དྲི་བཟང་འཐུལ། །ཟོས་པས་སྔར་མེད་རོ་བཅུད་སྣ་ཚོགས་ལྡན། །ཐ་མ་དངོས་སུ་བུད་མེད་མང་པོ་ཡིས། །ཟས་ནོར་དངོས་སུ་འབུལ་ཞིང་དད་གུས་བྱེད། །རྨི་ལམ་བུད་མེད་མང་པོས་བཀུར་སྟི་བྱེད། །རང་ཉིད་རླུང་གིས་ཁྱེར་རམ་ནམ་མཁར་འགྲོ། །རི་མཐོན་མཆོད་རྟེན་རྩེ་ལ་འཛེགས་པ་དང་། །ཉི་ཟླ་ཤར་དང་ཆོས་ནོར་གཏེར་ཁ་རྙེད། །རང་གིས་ཁྲོམ་ལ་ཆོས་བཤད་དབང་བསྐུར་སོགས། །ཡ་མཚན་རྨི་ལམ་བཟང་པོ་འབྱུང་བར་བཤད། །ཕྱིར་ནངས་བདག་མདུན་ཚར་གཅིག་ཚར་བའི་རྗེས། །རིལ་བུ་ཅུང་ཞིག་ཆང་ལ་བཏབ་ནས་བཏུང་། །མཆོག་དང་ཐུན་མོང་དངོས་གྲུབ་ཐོབ་པར་བསམ། །རིལ་བུ་གཅིག་ནི་ལུས་ལ་འཆང་བར་བྱ། །རིལ་བུ་འགའ་ཞིག་མེ་མཆོད་རྫས་ལ་བསྲེ། །དེ་འཕྲོས་རིལ་བུ་དར་རས་དམར་པོར་
བཏུམ། །ཐོད་པར་བཅུག་ལ་མཆོད་ཁང་ངམ་རྟེན་སྒམ་དུ། །བླ་རྡོའི་ཚུལ་དུ་རྟག་ཏུ་འཆང་བར་བྱ། །ཕན་ཡོན་པད་འབྱུང་སྲོང་བཙན་གོསུང་མཐུན་པར། །མི་ནོར་ཟས་གསུམ་དབང་དུ་འདུ་བ་དང་། །མཁའ་འགྲོ་དབང་སྡུད་སྣང་བ་དབང་འདུས་གསུངས། །འདི་ཡི་ལས་སྦྱོར་མེ་མཆོད་ཡིན་པ་སྟེ། །བསྒྲུབས་པའི་རྗེས་སམ་ཡར་མར་ཚེས་བཅུའམ། །ཡང་ན་རང་ལ་དགོས་དུས་ནམ་ཡང་རུང་། །རྒྱས་པོའམ་དབང་གི་སྦྱིན་སྲེག་སྤྱི་ལྟར་རམ། །ཡང་ན་མེ་མཆོད་བསྡུས་པ་ཚར་མང་གསོགས། །འདི་ཡིས་རྗེས་ཆོག་མཆོད་ལ་བསྟོད་ཚར་བའི་རྗེས། །མདུན་བསྐྱེད་ལྷ་ཚོགས་རིལ་བུ་བཅས་པ་རྣམས། །འོད་ཟེར་དམར་པོར་གྱུར་ནས་བདག་ལ་ཐིམ། །བདག་ཀྱང་འོད་ཕུང་དམར་པོར་ལམ་ལམ་གྱུར། །དེ་ཡང་འོད་ཟེར་ཁ་དོག་རྣམ་ལྔར་གྱུར། །དེ་ཡང་ནམ་མཁར་འཇའ་ཚོན་ཡལ་བ་བཞིན།། །ཅི་ཡང་མི་དམིགས་ཉམས་ལེན་ངང་ལ་བཞག །དེ་ནས་བསྔོ་བ་སྨོན་ལམ་བཀྲ་ཤིས་བརྗོད། །རྒྱལ་བ་རྒྱ་མཚོའི་དབང་སྡུད་ནོར་བསྒྲུབ་སྐོར། །སྦ་ལྕག་སྒྲུབ་པ་བ་མཁལ་སྒྲུབ་པ་དང་། །རིལ་བུའི་སྒྲུབ་པ་ཙིཏྟ་གའུ་མ། །དམར་མོ་གསུང་སྒྲུབ་ལ་སོགས་གྲངས་མང་
ཡང་། །ཟབ་ཅིང་ཕྱག་ལེན་བདེ་བ་འདི་ཉིད་དེ། །གཞན་ཚོ་འདི་ལས་ཟབ་པ་ཡོད་རེ་ཤི། །སྙིང་ནས་ཐུགས་རྗེ་ཆེན་པོ་སྒྲུབ་པ་ལ། །མཐུན་རྐྱེན་འཚོ་བ་སྒྲུབ་པ་མི་ཤོལ་ཕྱིར། །མཐར་ཕྱིན་ཐབས་མཁས་གཉིས་ཀྱིས་བསྐུལ་བའི་ངོར། །དབང་གིས་ལས་ཀུན་འགྲུབ་པའི་ཟླ་བ་ཡིས། །བཅོ་བརྒྱད་དགོང་མོ་དབང་གི་དུས་ཚོད་ལ། །རཱ་ག་ཨ་སྱས་ཇི་ལྟར་གདམས་པ་བཞིན། །མཐར་ཕྱིན་མིང་ཅན་ནུབ་ཏུ་ཁ་ཕྱོགས་བྲིས། །སྦ་འོས་གསལ་བཀོད་གསང་སྔགས་དམར་འདོན་གྱིས། །ཉེས་པར་གྱུར་པ་ཌཱཀྐིའི་ཚོགས་ལ་བཤགས། །དགེ་བས་རིག་འཛིན་སྤྲུལ་སྐུ་ཆེན་པོ་ཉིད། །སྐུ་གསུམ་ལྷུན་གྱིས་གྲུབ་ཅིང་རང་དབང་ཐོབ། །སྤྲུལ་པས་འགྲོ་བ་ཐམས་ཅད་དབང་དུ་བསྡུས། །ནུབ་ཕྱོགས་བདེ་བ་ཅན་དུ་འདྲེན་པར་ཤོག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།