བཅོམ་ལྡན་འདས་འཇིག་རྟེན་དབང་ཕྱུག་རྒྱལ་བ་རྒྱ་མཚོ་ལྷ་ལྔའི་དཀྱིལ་འཁོར་གྱི་མངོན་པ་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་གསང་སྒྲུབ་འཁོར་ལོ་ལྔ་མའི་ཟིན་བྲིས།
བཅོམ་ལྡན་འདས་འཇིག་རྟེན་དབང་ཕྱུག་རྒྱལ་བ་རྒྱ་མཚོ་ལྷ་ལྔའི་དཀྱིལ་འཁོར་གྱི་མངོན་པ་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་གསང་སྒྲུབ་འཁོར་ལོ་ལྔ་མའི་ཟིན་བྲིས་བཞུགས་སོ། །
ན་མོ་གུ་རུ་ལོ་ཀེ་ཤྭ་ར་དྷེ་ཝ་པཉྩ་ཡེ། རྒྱ་མཚོ་ལྔ་ཡི་ལྷ་ལ་ཕྱག་འཚལ་ལོ། །དགོངས་པ་གྲོལ་ཞིང་བྱིན་རླབས་དངོས་གྲུབ་སྩོལ། །ལྷ་ལྔའི་གསང་སྒྲུབ་འཁོར་ལོ་ལྔ་མ་ཡི། །སྒྲུབ་ཐབས་གྲུབ་པའི་རྒྱལ་མོས་མཛད་པ་དེ། །ཆོ་ག་འདི་དང་སྦྲེལ་ནས་ཉམས་ལེན་ཐབས། །སྟ་གོན་ཚར་རྗེས་བདག་བསྐྱེད་གཞུང་ལྟར་ལས། །དམ་ཅན་རྒྱ་མཚོའི་དཀྱིལ་འཁོར་རོ་ཡི་མཚམས། །དྲན་རྫོགས་ལུས་ལྷ་ལ་སོགས་གསལ་གདབ་སྟེ། །གཙོ་བོར་མཁའ་འགྲོ་དམར་མོ་ཞལ་གཅིག་མ། །ཕྱག་གཉིས་གྲི་གུག་ཐོད་ཁྲག་འཛིན་པས་འཁྱུད། །གཟིག་ཤམ་རྒྱན་དྲུག་གཡེར་ཁ་དྲྭ་བས་སྤྲས། །
ཡབ་ཡུམ་ཞལ་སྦྱོར་མེ་དཔུང་ཀློང་ན་བཞུགས། །དབུ་གཙུག་པད་འབྱུང་རྡོ་རྗེའི་སྐྱིལ་ཀྲུང་ལ། །མཚོ་རྒྱལ་དཀར་དམར་གྲི་ཐོད་འཛིན་པས་འཁྱུད། །གཡས་ཀྱི་རྟ་མགྲིན་ཕག་མོ་ཡུམ་དང་སྦྱོར། །གཡོན་གྱི་གསང་ཡེའི་ཡབ་སྦས་རྡོ་རྗེ་ཁ་ཊཾ་འཁྱུད། །གཙོ་བོའི་སྐུ་ནང་སྟོང་ཞིང་གསལ་བ་ལ། །རྩ་གསུམ་འཁོར་ལོ་བཞི་པོ་གསལ་གདབ་སྟེ། །སྤྱི་བོར་རྡོ་རྗེ་རིགས་ཀྱི་སྤྱན་རས་གཟིགས། །དཀར་པོ་རྡོ་རྗེ་དྲིལ་བུ་འཛིན་པ་སྟེ་།ཡུམ་ནི་དཀར་མོ་འཁོར་ལོ་གྲི་ཐོད་འཁྱུད། །རྩ་འདབ་སོ་གཉིས་ཡབ་ཡུམ་སུམ་ཅུ་གཉིས། །མགྲིན་པར་རིན་ཆེན་སྤྱན་གཟིགས་སྐུ་མདོག་
སེར། །རིན་ཆེན་དྲིལ་འཛིན་ཡུམ་སེར་གྲི་ཐོད་འཁྱུད། །ཐུགས་ཀར་པདྨ་རིགས་ཀྱི་སྤྱན་གཟིགས་དམར། །པདྨ་དྲིལ་འཛིན་ཡུམ་དམར་གྲི་ཐོད་འཁྱུད། །ལྟེ་བར་ལས་ཀྱི་སྤྱན་གཟིགས་སྐུ་མདོག་ལྗང་། །རྒྱ་གྲམ་དྲིལ་འཛིན་ཡུམ་ལྗང་གྲི་ཐོད་འཁྱུད།། །ཐམས་ཅད་ཞལ་སྦྱོར་བདེ་བའི་ཉམས་དང་ལྡན། །གཙོ་བོ་ལྔ་པོ་པད་ཟླར་སྐྱིལ་ཀྲུང་བཞུགས། །འཁོར་རྣམས་ཟླ་སྟེང་བརྐྱང་བསྐུམ་བཞེངས་སྟབས་ཏེ། །གཙོ་བོ་ཆེ་ཞིང་འཁོར་རྣམས་ཅུང་ཟད་ཆུང་། །ལྟེ་འོག་རྩ་གསུམ་འདུས་མདོར་དབུ་མའི་ནང་། །ཆོས་འབྱུང་དམར་པོ་གྲུ་གསུམ་བསྣོལ་བའི་སྟེང་། །པདྨ་འདབ་བཞིའི་ཟེའུ་འབྲུར་ཉི་ཟླའི་སྟེང་། །གསང་བ་ཡེ་ཤེས་མཁའ་འགྲོ་གཞུང་ལྟར་བསྒོམ། །འདབ་བཞི་རྡོ་རྗེ་རིན་ཆེན་པདྨ་དང་། །ལས་ཀྱི་གིང་རྣམས་དཀར་སེར་དམར་ལྗང་མདོག །ཡབ་ཡུམ་ཞལ་སྦྱོར་གྲི་ཐོད་འཛིན་པའོ། །ཐུགས་དབུས་རྡོ་རྗེ་སྤྱན་གཟིགས་ཐུགས་ཀ་རུ། །པདྨ་འདབ་བཞི་ཟེའུ་འབྲུ་ཉི་མའི་སྟེང་། །རྟ་མགྲིན་དམར་པོ་དབུ་གཙུག་རྟ་དབུ་འཚེར། །ཕྱག་གཡས་དབང་སྡུད་ཕྱག་རྒྱས་ཕྲེང་བ་དམར། །གཡོན་པས་སྡིགས་མཛུབ་རྡོ་རྗེའི་ཞགས་པ་འཛིན། །ཕག་མོ་ཞལ་གཉིས་གྲི་ཐོད་འཛིན་མས་
འཁྱུད། །ཡབ་ཡུམ་རྒྱན་རྫོགས་ཡེ་ཤེས་མེ་དཔུང་འབར། །འདབ་བཞིར་རིགས་བཞི་མཁའ་འགྲོ་ཡབ་ཡུམ་རྣམས། །ཞལ་སྦྱོར་གྲི་གུག་ཐོད་ཁྲག་འཛིན་པར་བསྒོམ། །གནས་གསུམ་བྱིན་རླབས་ཡེ་བསྟིམ་རྒྱས་གདབ་སོགས། །བསྙེན་པའི་བར་དུ་ལྷ་ལྔའི་བདག་བསྐྱེད་ཉིད། །དེ་ནས་བཟླས་པ་བྱེད་ཚེ་དམིགས་པ་ནི། །ཕྱི་དང་ནང་གི་ལྷ་ཚོགས་གཙོ་བོ་དང་། །འཁོར་ཚོགས་ཀུན་གྱི་ཐུགས་ཀར་པད་ཟླའི་སྟེང་། །བྷིཡིག་དམར་པོ་ཚེག་དྲག་བཅས་པའི་མཐར། །བཟླ་བྱའི་སྔགས་ཀྱིས་བསྐོར་བར་བསྒོམ་པ་ལ། །ཀློག་པའི་ཚུལ་དུ་ཅུང་ཟད་བསྙེན་པ་བྱ། །དེ་ནས་ཡིག་འབྲུ་མི་འཁོར་འོད་ཟེར་འཁོར། །དེ་ནས་ཡིག་འབྲུ་ཕོ་རྣམས་གཡས་སུ་འཁོར། །མོ་རྣམས་གཡོན་སྐོར་དང་པོ་དལ་བུ་སྟེ། །དེ་ནས་ཇེ་མགྱོགས་དྲག་ཏུ་འཁོར་བ་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས། །ཕྱི་སྣོད་འཇིག་རྟེན་གཞལ་ཡས་ཁང་དུ་གྱུར། །ནང་བཅུད་སེམས་ཅན་གཅིག་ཀྱང་མ་ལུས་པ། །ཕོ་རྣམས་ཐམས་ཅད་དཔའ་བོ་སྡེ་བཞི་སྟེ། །མོ་རྣམས་ཐམས་ཅད་དཔའ་མོ་སྡེ་བཞིར་གྱུར། །ཀུན་ཀྱང་རང་གི་རམ་བུ་བཀྱག་པའི་ཚུལ། །སྔགས་སྒྲ་འུར་ཆོམ་སིང་ཁྲོལ་
སྟོང་གསུམ་གང་། །ལྷ་ལྔའི་སྔགས་རིང་ཡིག་འབྲུ་ཉེར་བརྒྱད་བཟླ། །དེ་ནས་ཐུན་གྱི་ཕྱེད་ལ་སླེབ་པ་དང་། །ལྷ་ལྔའི་མདུན་བསྐྱེད་ལུས་ཀྱི་ལྷ་དང་བཅས། །གསལ་གདབ་སྤྱན་འདྲེན་མཆོད་བཞི་བསྟོད་བཞི་བྱ། །དེ་ནས་བདག་མདུན་གནས་ལྔའི་ལྷ་རྣམས་ཀྱི། །ཐུགས་ཀར་པད་ཟླའི་སྟེང་དུ་ཧྲཱིཿཡིག་མཐར། །བཟླ་བྱའི་སྔགས་ཕྲེང་གཡས་གཡོན་འཁོར་བཞིན་ལས། །བདག་གི་ཐུགས་ཀའི་རྟ་མགྲིན་སྔགས་ཕྲེང་ལས། །འོད་ཟེར་སྣ་ལྔ་སྟོང་སྐུད་ལྔ་བསྒྲིལ་བཞིན། །ཞལ་ནས་ཐོན་ཞིང་ལུས་ཀྱི་ལྷ་རྣམས་ཀྱི། །གསང་བ་ནས་ཞུགས་རིམ་བཞིན་ཞལ་ནས་ཐོན། །སྤྱི་བོའི་གཙོ་བོའི་ཞལ་ནས་ཕྱིར་ཐོན་ཏེ། །རང་གི་ཞལ་ཐོན་མདུན་བསྐྱེད་ཞལ་དུ་ཞུགས། །སྤྱི་བོའི་ཞལ་བརྒྱུད་སྐུ་ལུས་ལྷ་ཀུན་བརྒྱུད། །སྦྱོར་མཚམས་ནས་ཐོན་རང་གི་སྦྱོར་མཚམས་ཞུགས། །སུམ་མདོའི་གསང་ཡེའི་བྷ་ག་ནས་ཞུགས་ཏེ། །ལྟེ་བ་ཐུགས་ཀའི་ལྷ་ཡི་སྦྱོར་མཚམས་ནས། །ཞུགས་ཤིང་བརྒྱུད་དེ་རྟ་མགྲིན་ཐུགས་ཀར་ཐིམ། །དེ་ལྟར་གནས་ལྔའི་བདག་མདུན་ལྷ་རྣམས་ཀྱི། །གཙོ་བོ་བཅུ་པོའི་སྐུ་ལུས་བརྒྱུད་པ་སྟེ། །འཁོར་དང་སྦྱོར་ཡུམ་རྣམས་ལ་མ་ཡིན་ནོ། །དེ་ལྟར་འོད་ཟེར་མགལ་མེ་བཞིན་དུ་
འཁོར། །དེ་ནས་འོད་ཟེར་དེ་ཡང་སྔགས་ཕྲེང་བསྒྱུར། །སྔ་དྲོའི་ཐུན་ལ་སྔགས་ཕྲེང་དཀར་པོ་སྟེ། །ཤེལ་དཀར་ཕྲེང་བ་བཞིན་དུ་འཁོར་བ་དེས། །ནད་གདོན་སྡིག་སྒྲིབ་ཐམས་ཅད་ཞི་བར་བསམ། །སྔགས་ཕྲེང་དེ་ལས་འོད་ཟེར་ཕྱོགས་བཅུར་འཕྲོས། །རྡོ་རྗེ་རིགས་ཀྱི་ལྷ་ཚོགས་ཐམས་ཅད་ལ། །ཞི་བའི་མཆོད་རྫས་དཔག་མེད་གྱུར་པས་མཆོད། །དེ་ཀུན་རྡོ་རྗེ་རིགས་ཀྱི་སྤྱན་རས་གཟིགས། །ཡབ་ཡུམ་སྐུ་མདོག་དཀར་པོའི་རྣམ་པ་ཅན། །གསུང་ནི་སྔགས་ཀྱི་ཕྲེང་བ་དཀར་པོ་དང་། །ཐུགས་ནི་ཤེལ་དཀར་རྡོ་རྗེ་རྩེ་ལྔ་པའི། །རྣམ་པར་ཁ་བ་བུ་ཡུག་འཚུབ་བཞིན་བྱོན། །བདག་མདུན་ལྷ་ཚོགས་སྤྱི་བོར་སིབ་སིབ་ཐིམ། །བདག་གི་སྤྱི་བོའི་ལྷ་ཚོགས་འོད་ཟེར་ནི། །དཀར་པོ་ཤི་སོས་བདུད་རྩི་ལྟ་བུར་འཕྲོས། །བདག་ལུས་གང་བས་ནད་གདོན་སྡིག་སྒྲིབ་དག །མདུན་བསྐྱེད་དཔྲལ་བའི་ལྷ་ཚོགས་འོད་ཟེར་ནི། །སྟོན་ཟླའི་མདོག་འདྲ་འཇིག་རྟེན་ཁྱབ་པར་འཕྲོས། །འགྲོ་བ་ཀུན་གྱི་སྒྲིབ་གཉིས་བག་ཆགས་བཅས། །མུན་པར་ཟླ་ཤར་ལྟ་བུར་དག་པར་བསྒོམ། །དེ་ནས་སྔ་དྲོའི་གཏོར་བསྔོས་ཐུན་བསྡུ་བྱ། །ཉིན་གུང་ཐུན་ལ་བདག་བསྐྱེད་བསྒོམ་པ་དང་། །བདག་
བསྐྱེད་སྒོམ་བཟླས་མདུན་བསྐྱེད་འདོན་ལུགས་དང་། །མཆོད་བཞི་བསྟོད་བཞི་མདུན་བསྐྱེད་བསྙེན་པ་དང་། །འོད་ཟེར་འཁོར་ལུགས་ཐུན་རྣམས་ཀུན་ལ་འགྲེས། །ཁྱད་པར་ཉིན་གུང་བདག་མདུན་སྔགས་འཁོར་ནི། །གསེར་མདོག་འོད་ལྔའི་མདངས་དང་ལྡན་པ་ཡི། །རྨ་བྱའི་སྒྲོ་ཆུན་འདྲ་བ་འཁོར་བ་ལས། །འོད་ཟེར་བཙོ་མའི་མདོག་ཅན་ཞིང་ཀུན་ཁྱབ། །རྒྱལ་བ་སྲས་བཅས་ཀུན་ལ་རྒྱལ་སྲིད་སོགས། །འདོད་ཡོན་སྣ་ཚོགས་མཆོད་པའི་སྤྲིན་དུ་གྱུར། །དེ་ཀུན་རིན་ཆེན་རིགས་ཀྱི་སྤྱན་རས་གཟིགས། །ཡབ་ཡུམ་སྐུ་མདོག་སེར་པོའི་རྣམ་པ་ཅན། །སྔགས་ཕྲེང་སེར་པོ་ཕྱག་མཚན་ནོར་བུའི་ཚོགས། །ཆེ་བ་རི་རབ་ཆུང་བ་ཡུངས་འབྲུའི་ཚད། །ཕྱོགས་བཅུ་ཀུན་ནས་ལྷུག་ལྷུག་ཆིལ་ཆིལ་བྱོན། །བདག་མདུན་མགྲིན་པ་ལོངས་སྤྱོད་འཁོར་ལོ་ཡི། །ལྷ་ཚོགས་རྣམས་ལ་སིབ་སིབ་ཐིམ་པ་ཡིས། །བདག་གི་མགྲིན་པའི་ལྷ་ལས་གསེར་མདོག་འོད། །འཕྲོས་པས་བདག་ལུས་ལྟེམ་གྱིས་གང་བ་ཡིས། །ཚེ་དང་བསོད་ནམས་ཉམས་རྟོགས་ཡོན་ཏན་རྒྱས། །མདུན་བསྐྱེད་མགྲིན་པའི་ལྷ་ལས་གསེར་མདོག་འོད། །སྤྲིན་མེད་ཉི་མའི་འོད་བཞིན་ཕྱོགས་བཅུར་ཁྱབ། །འགྲོ་བ་ཀུན་གྱི་བསོད་
ནམས་ཚོགས་གཉིས་རྒྱས། །དེ་རྗེས་གཏོར་བསྔོས་ཐུན་བསྡུ་གཞུང་ལྟར་རོ། །དགོང་མོ་བདག་མདུན་འདོན་ལུགས་དམིགས་རིམ་སོགས། །སྔགས་ཕྲེང་ཁ་དོག་བསྒྱུར་ཙམ་མ་གཏོགས་མཚུངས། །བདག་མདུན་བར་དུ་སྔགས་ཕྲེང་བྱུ་རུའི་མདོག །ལྕགས་སྒྲོག་དབྱིབས་སུ་ཅུང་ཟད་འཁྱོག་ཅིང་འཁོར། །འོད་ཟེར་དམར་པོས་ཕྱོགས་བཅུའི་ཞིང་ཁྱབ་པས། །ཆང་སྣ་བཞི་དང་རིག་མ་བཅུ་དྲུག་སོགས། །དབང་གི་མཆོད་པ་དཔག་མེད་གྱུར་པ་ཡིས། །ཕྱོགས་བཅུའི་ཞིང་གི་རྒྱལ་བ་སྲས་བཅས་མཆོད། །དེ་ཀུན་པདྨ་རིགས་ཀྱི་སྤྱན་རས་གཟིགས། །ཐམས་ཅད་ཡབ་ཡུམ་སྐུ་མདོག་དམར་པོའི་སྐུ། །གསུང་གི་ངོ་བོ་སྔགས་ཕྲེང་དམར་པོ་དང་། །ཐུགས་ནི་པདྨ་དམར་པོ་ཧྲིས་མཚན་པ། །རྣམ་པར་ལྷོ་བུན་བུ་ཁན་ཡུག་འཚུབ་བཞིན་བྱོན། །བདག་མདུན་ཐུགས་ཀར་སིབ་སིབ་ཆིལ་ཆིལ་ཐིམ། །བདག་བསྐྱེད་ཐུགས་ལས་འོད་ཟེར་རཱ་གའི་མདོག །བདག་ལུས་ཁྱབ་པས་རླུང་སེམས་རང་དབང་ཐོབ། །མདུན་བསྐྱེད་ཐུགས་ལས་འོད་ཟེར་དམར་པོ་ནི། །ཉི་མ་འཆར་ཀའི་འོད་ལྟར་ཀུན་ཏུ་ཁྱབ། །འགྲོ་ཀུན་རླུང་སེམས་རང་དབང་ཐོབ་པར་བསྒོམ། །དེ་ནས་ལག་མཆོད་
ཚོགས་དང་གཏོར་བསྔོས་བྱ། །སྐབས་འདིར་ཆག་མེད་གཏོར་བསྔོས་གང་དགོས་སྦྱར། །གཏོར་བསྔོས་རྗེས་སུ་འདོད་དོན་ཀུན་འགྲུབ་པའི། །སྔགས་རིང་སྦྱར་བ་ཐུན་བཞི་ཀུན་ལ་འགྲེས། །ཐུན་བསྡུ་བསྔོ་སྨོན་ལ་སོགས་གཞུང་དང་མཚུངས། །དེ་ནས་མུན་རུབ་བདག་བསྐྱེད་བསྙེན་པ་དང་། །མདུན་བསྐྱེད་མཆོད་བཞི་བསྟོད་བཞི་བྱེད་ལུགས་འདྲ། །བདག་མདུན་བར་དུ་འཁོར་བའི་སྔགས་ཕྲེང་དེ། །འོད་ཟེར་ལྗང་ནག་ཐག་འཁྱུག་ལྟ་བུ་ལས། །འོད་ཟེར་སྣ་ཚོགས་ནམ་མཁའ་ཁྱབ་པར་འཕྲོས། །རབ་འབྱམས་ཞིང་བཞུགས་ཁྲོ་བོ་ཁྲོ་མོ་ལ། །ཤ་ལྔ་བདུད་རྩི་ལྔ་དང་དབང་པོ་ལྔ། །དོན་སྙིང་ལྔ་དང་དྲག་པོའི་མཆོད་པས་མཆོད། །ཐམས་ཅད་ལས་ཀྱི་རིགས་ཀྱི་སྤྱན་རས་གཟིགས། །ཡབ་ཡུམ་སྐུ་མདོག་ལྗང་གུའི་རྣམ་པ་ཅན། །གསུང་ནི་སྔགས་ཀྱི་ཕྲེང་བ་ལྗང་གུ་ལ། །ཐུགས་ནི་སྣ་ཚོགས་རྡོ་རྗེ་ཧྲིས་མཚན་པ། །ཆེ་ཕྲ་སྣ་ཚོགས་ཁ་བ་བུ་ཡུག་བཞིན། །བུན་ནེ་ཆིལ་ལེ་བདག་མདུན་ལྟེ་བར་ཐིམ། །བདག་གི་ལྟེ་བའི་ལྷ་ལས་འོད་ལྗང་གུ། །མར་གད་མདོག་ཅན་བདག་ལུས་ལྟེམ་གྱིས་གང་། །ནད་དང་ལུས་གདོན་ཉོན་མོངས་ཚར་ཆོད་གྱུར། །མདུན་བསྐྱེད་ལྟེ་བའི་ལྷ་
ཚོགས་འོད་ཟེར་ནི། །སྤང་ཆེན་མདོག་འདྲེས་འཇིག་རྟེན་ཁྱབ་པ་དེས། །བ་མོ་ལ་ནི་ཉི་ཟེར་ཕོག་པ་ལྟར། །འགྲོ་བའི་དུག་གསུམ་བདུད་བཞི་ཚར་གཅོད་བསྒོམ། །དེ་ནས་གཏོར་བསྔོས་ཐུན་བསྡུ་གོང་ལྟར་ཡིན། །དེ་ལྟར་ཐུན་བཞིར་མ་ཡེངས་རྩེ་གཅིག་གིས། །ཞག་བདུན་བསྒྲུབས་རྗེས་དངོས་གྲུབ་ལེན་ཆོག་དང་། །སྦྱིན་སྲེག་འགྲུབ་ན་ལེགས་ཤིང་མ་འགྲུབ་ཀྱང་། །དགའ་སྟོན་ཚོགས་འཁོར་རྗེས་ཆོག་རྣམས་བྱའོ། །དེ་ལྟར་རྒྱལ་བ་རྒྱ་མཚོ་ལྷ་ལྔ་ཡི། །གསང་སྒྲུབ་འཁོར་ལོ་ལྔ་མ་ཞེས་བྱ་བ། །གྲུབ་པའི་རྒྱལ་མོས་རས་ཆུང་པ་ལ་གནང་། །གཅིག་བརྒྱུད་མིན་པ་སུ་ལའང་མི་བསྟན་གསུངས། །སྙན་བརྒྱུད་རྒྱ་གཞུང་རྒྱ་སྐད་མེད་པ་དེ། །དྲུང་མཛད་ཆོ་ག་དང་བསྟུན་ཉམས་ལེན་ཐབས། །ཐབས་མཁས་མཐར་ཕྱིན་གཉིས་ཀྱིས་བསྐུལ་བ་དང་། །རིག་འཛིན་སྤྲུལ་སྐུའི་དགོངས་རྫོགས་ལ་དམིགས་ནས། །མེ་ལུག་ས་ག་ཟླ་བའི་བཅུ་བདུན་ཉིན། །ཉིན་གུང་ཐུན་ལ་རཱ་ག་ཨ་སྱས་གདམས།ཧོར་གྱི་བཙུན་པ་མཐར་ཕྱིན་ཞེས་བྱས་བྲིས། །ཉེས་འགལ་མཆིས་ན་ཊཱཀིའི་ཚོགས་ལ་བཤགས། །དགེ་བས་སྤྲུལ་སྐུའི་ས་ལམ་ཡོན་ཏན་རྫོགས། །འདི་ཉིད་མཐོང་
ཐོས་དོན་གཉིས་ལྷུན་གྲུབ་ཤོག །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།