བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། གསང་སྒྲུབ་འཁོར་ལོ་གཅིག་མའི་ཟིན་བྲིས།
བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། གསང་སྒྲུབ་འཁོར་ལོ་གཅིག་མའི་ཟིན་བྲིས་བཞུགས་སོ།།
ན་མོ་གུ་རུ་ལོ་ཀེ་ཤྭ་ར་དྷེ་ཝ་ཌཱཀི་ནཱི་ཡེ། རྩ་གསུམ་ཐུགས་རྗེའི་ལྷ་ལ་ཕྱག་འཚལ་ལོ། །དགོངས་པ་གནང་ཞིང་བྱིན་གྱིས་བརླབ་ཏུ་གསོལ། །འདི་ནི་གྲུབ་ཐོབ་ཀརྨ་པཀཱི་ལ། །བློ་གྲོས་རིན་ཆེན་ཞེས་བྱས་ཞུས་ནས་གནང་། །དེ་བཞིན་སིང་རས་ཀྱིས་ཞུས་གནང་བ་གཉིས། །གསང་སྒྲུབ་ཡིག་སྣའི་ཡང་སྣ་ཞེས་བྱ་སྟེ། །འདི་ནི་ཤིན་ཏུ་གསང་ཞེས་བཀའ་རྒྱ་གདབ། །དུས་ཕྱིས་སངས་རྒྱས་གླིང་པའི་གཏེར་ཁ་ལས། །ཐུགས་རྗེ་ཆེན་པོ་རྒྱལ་བ་རྒྱ་མཚོ་ཡི། །གནད་ཡིག་གབ་པ་མངོན་ཕྱུང་ཞེས་བྱ་བྱུང་། །དེ་གསུམ་ཚིག་དོན་ཁྱད་མེད་གཅིག་པར་སྣང་། །དེ་ཉིད་ཆོ་ག་འདི་
དང་བསྟུན་ནས་ཀྱང་། །རྒྱུན་ཁྱེར་ཉམས་སུ་ལེན་པར་བྱ་བ་སྟེ། །བདག་བསྐྱེད་འདོན་པའི་ཆས་ཙམ་མ་གཏོགས་པ། །སྒྲུབ་པའི་རྫས་ནི་ཅི་ཡང་མི་དགོས་སོ། །ལྷ་ལྔའི་བདག་བསྐྱེད་གཞུང་ལྟར་ཚར་བའི་རྗེས། །བསྙེན་པའི་སྐབས་སུ་དམིགས་པའི་བྱེ་བྲག་ནི། །རང་ཉིད་ཐུགས་རྗེ་ཆེན་པོའི་སྐུ་ཡི་ནང་། །ལྟེ་བར་གསེར་གྱི་རྡོ་རྗེ་རྒྱ་གྲམ་ནི། །གདན་ཐབས་མདུན་རྒྱབ་གཡས་གཡོན་རྩེ་བསྟན་བསྒོམ། །དེ་ཡི་ལྟེ་བར་ཨཱཿཡིག་དམར་པོ་ལས། །གཏུམ་མོའི་མེ་ནི་མར་མེ་འབྲིང་ཙམ་འབར། །མེ་དང་རང་གི་སྐུ་ལས་འོད་དམར་པོ། །ཕྱོགས་བཅུ་ཀུན་ཏུ་ཡང་ཡང་
འཕྲོས་པ་ཡིས། །དྲེགས་པ་ཕོ་རྒྱུད་ཀུན་གྱི་བཅུད་བསྡུས་ནས། །གཡས་ཀྱི་རྟ་མགྲིན་སྐུ་ལ་ཐིམ་པར་བསྒོམ། །དྲེགས་པ་མོ་རྒྱུད་ཀུན་གྱི་བཅུད་བསྡུས་ནས། །གཡོན་གྱི་གསང་ཡེའི་སྐུ་ལ་ཐིམ་པར་བསྒོམ། །སངས་རྒྱས་བྱང་སེམས་ཀུན་གྱི་བྱིན་རླབས་བསྡུས། །སྟེང་གི་པད་འབྱུང་སྐུ་ལ་ཐིམ་པར་བསྒོམ། །ཆོས་སྐྱོང་ཀུན་གྱི་ནུས་མཐུ་བཅུད་བསྡུས་ནས། །འོག་གི་ཆོས་སྐྱོང་སྐུ་ལ་ཐིམ་པར་བསྒོམ། །དེ་ནས་གཡས་གཡོན་སྟེང་འོག་ལྟ་སྟངས་དང་། །རླུང་ནི་ཕར་དབྱུང་དུས་སུ་འོད་ཟེར་འཕྲོས། །ཚུར་ལ་རྔུབ་དུས་ནང་དུ་བསྡུ་བ་དང་། །མེ་ལ་བསྟིམས་ནས་རླུང་ཁུག་གཅིག་མནན་པ། །དེ་རྣམས་གྲུབ་ན་ལེགས་ཤིང་མ་གྲུབ་ཀྱང་། །བར་རླུང་གསུས་པ་ཐེར་ཙམ་བསླངས་བ་དང་། །སྔགས་དང་དམིགས་པ་ཁོ་ནས་ཆོག་པ་ཡིན། །ལྟེ་བའི་མེ་ལས་འོད་ཟེར་དམར་པོ་ནི། །ལྕགས་ཀྱུའི་དབྱིབས་ཅན་རིམ་པར་འཕྲོས་པ་ཡིས། །དང་པོ་གཡས་ཀྱི་རྟ་མགྲིན་དཔའ་བོའི་ཚོགས། །འོད་དེས་སྤྱན་དྲངས་ལྟེ་བའི་མེ་ལ་བསྟིམ། །དེ་བཞིན་གཡོན་གྱི་གསང་ཡེ་དཔའ་མོའི་ཚོགས། །སྤྱན་དྲངས་ལྟེ་བའི་མེ་ལ་བསྟིམས་པ་དང་། །སྟེང་གི་པད་འབྱུང་གྲུབ་ཐོབ་རྒྱ་མཚོའི་ཚོགས། །མར་ལ་སྤྱན་
དྲངས་ལྟེ་བའི་མེ་ལ་བསྟིམ། །འོག་གི་ཆོས་སྐྱོང་དམ་ཅན་རྒྱ་མཚོའི་ཚོགས། །ཡར་ལ་བསྡུས་ཏེ་ལྟེ་བའི་མེ་ལ་བསྟིམ། །འོད་དེས་རིགས་དྲུག་སེམས་ཅན་ཐམས་ཅད་ཀུན། །རིགས་བཞི་དཔའ་བོ་མཁའ་འགྲོའི་རྣམ་པ་རུ། །རང་གི་སྣ་བུག་གཡས་གཡོན་གཉིས་ནས་བསྡུས། །དེ་ནས་འོད་ཟེར་ལྕགས་ཀྱུ་ལྟ་བུ་ཡིས། །སེམས་ཅན་ཀུན་གྱི་སྙིང་ཁ་ནས་བཟུང་བཀུག །ཕོ་རྣམས་གཡས་དང་མོ་རྣམས་གཡོན་དུ་བསྟིམ། །སླར་ཡང་ལྟེ་བའི་མེ་དང་རང་ལུས་ལས། །འོད་ཟེར་སྣ་ཚོགས་ནམ་མཁའ་ཁྱབ་པར་འཕྲོས། །ཞིང་ཁམས་ཀུན་གྱི་སངས་རྒྱས་བྱང་སེམས་དང་། །སྟོང་གསུམ་ཁམས་ཀྱི་དཔའ་བོ་མཁའ་འགྲོ་ལ། །འོད་ཟེར་མཆོད་པའི་སྤྲིན་དུ་གྱུར་པས་མཆོད། །ཐམས་ཅད་མཚོ་ལ་ཁ་བ་བབ་པ་བཞིན། །ཐིབ་ཐིམ་སྤུངས་སྤུངས་རང་གི་སྐུ་ལ་ཐིམ། །ལྟེ་བའི་མེ་ལ་དམིགས་པ་གཏད་བྱས་ལ། །འཁྲུལ་འཁོར་དངོས་པོ་ཕོ་སྐོར་ཅུང་ཟད་བྱ། །དེ་ཡན་སྔ་དྲོ་ཉིན་ཕྱེད་ཡན་ལ་བསྒོམ། །དེ་ནས་ལྷ་ལྔའི་མངོན་རྟོགས་བསྒོམ་ཝིག་བྱ། །སྤྲོ་ན་བདག་བསྐྱེད་འདོན་ཝིག་འགྲུབ་ན་ལེགས། །མ་འགྲུབ་ཡིད་ཀྱིས་བསྒོམ་ཡང་འགལ་བ་མེད། །ཉིན་ཕྱེད་ཕྱིན་ཆད་རང་གི་ལྟེ་བ་
རུ། །པདྨ་དམར་པོ་འདབ་བཞིའི་ཟེའུ་འབྲུའི་སྟེང་། །ཐུགས་རྗེ་ཆེན་པོ་ཞལ་གཅིག་ཕྱག་གཉིས་པ། །ཞི་འཛུམ་གཡས་བརྐྱང་གཡོན་བསྐུམ་བཞེངས་ཐབས་ཅན། །བགྲང་ཕྲེང་པདྨ་འཛིན་པ་ཡུམ་ལ་འཁྱུད། །ཡུམ་ནི་གསང་ཡེ་དམར་མོ་གྲི་ཐོད་ཅན། །གཡས་བསྐུམ་གཡོན་བརྐྱང་ཡབ་དང་མཉམ་པར་སྦྱོར། །ཡབ་ཡུམ་ཐུགས་ཀར་ཧྲཱི༔ཡིག་རང་སྔགས་བསྐོར། །འདབ་བཞི་རིགས་བཞིའི་ཌཱཀི་ཡབ་ཡུམ་རྣམས། །ཀུན་ཀྱང་དམར་པོ་གྲི་གུག་ཐོད་ཁྲག་འཛིན། །ཐོད་པ་སྐམ་རློན་རུས་པ་རིན་ཆེན་བརྒྱན། །རང་རང་ཐུགས་ཀར་རང་སྲོག་ཡིག་འབྲུ་རེ། །དེ་ནས་རང་གི་སྐུ་ལུས་སྟོང་གསལ་ནང་། །དབུ་མའི་ཡར་མར་སྣ་གཉིས་རག་དུང་ཁ། །ཡར་སྣེ་སྤྱི་བོའི་པད་འབྱུང་སྐུ་ལ་ཟུག །མར་སྣེ་ལྟེ་བའི་ཐུགས་ཆེན་ཡབ་ཡུམ་ཟུག །རོ་རྐྱང་མར་སྣེ་མཁའ་འགྲོ་སྡེ་བཞིར་ཟུག །ཡར་སྣེ་སྣ་བུག་གཉིས་ནས་ཕྲག་གོང་ཐོན། །དཔའ་བོ་རྒྱ་མཚོ་དཔའ་མོ་རྒྱ་མཚོར་ཟུག །ལྟ་སྟངས་དང་བཅས་སྟེང་གི་གྲུབ་ཐོབ་ཚོགས། །བྱང་སེམས་བདུད་རྩིའི་རྣམ་པར་འོད་ཞུ་ནས། །དབུ་མའི་ནང་བརྒྱུད་འདོད་ཡོན་རྣམ་ལྔ་ཡི། །མཆོད་པའི་རྣམ་པར་ལྟེ་བའི་ལྷ་ལ་ཐིམ། །དེ་བཞིན་གཡས་ཀྱི་དཔའ་བོ་རྒྱ་
མཚོ་རྣམས། །བདུད་རྩི་བྱང་སེམས་ངོ་བོར་འོད་ཞུ་སྟེ། །གཡས་ཀྱི་རྩ་བརྒྱུད་ལྟེ་བའི་ལྷ་ཚོགས་མཆོད། །གཡོན་གྱི་དཔའ་མོ་རྒྱ་མཚོའི་བདུད་རྩིར་ཞུ། །གཡོན་གྱི་རྩ་བརྒྱུད་ལྟེ་བའི་ལྷ་ཚོགས་མཆོད། །ལྷ་རྣམས་བདེ་བ་རྒྱས་ཤིང་གཟི་བརྗིད་འབར། །སླར་ཡང་ལྟེ་བའི་ལྷ་དང་རང་ལུས་ལས། །འོད་ཟེར་དམར་པོ་ཕྱོགས་བཅུར་འཕྲོས་པ་ཡིས། །སྟོང་གསུམ་ཁམས་ཀྱི་ལྷ་འདྲེ་མི་གསུམ་རྣམས། །དབང་དུ་བསྡུས་ནས་ལྟེ་བའི་ལྷར་ཐིམ་བསྒོམ། །བར་རླུང་གསུས་པ་སྦྱང་ཞིང་ཕོ་སྐོར་བྱ། །དེ་ནི་དགོང་མོའི་བར་གྱི་བསྒོམ་བྱ་ཡིན། །སླར་ཡང་ལྷ་ལྔའི་ལྷ་ཚོགས་གསལ་གདབ་སྟེ། །རྩ་ཡི་བསྒོམ་ལུགས་རྣམས་ནི་གོང་དང་འདྲ། །ལྟེ་བའི་ཆོས་འབྱུང་པད་ཉིའི་སྟེང་དུ་ནི། །རྒྱལ་བ་རྒྱ་མཚོ་ཡབ་རྐྱང་ཕྱག་བཞི་པ། །སྤྱི་དང་མཐུན་པ་གཅིག་ནི་བཞུགས་པར་བསམ། །དེ་ཡི་ཐུགས་ཀར་ཧྲིལ་ཡིག་བཅུས་བསྐོར། །འདབ་བཞིར་གིང་ཆེན་བཞི་པོ་ཡབ་རྐྱང་ལ། །དམར་པོ་འདོར་ཐབས་གྲི་ཐོད་ཁ་ཊཾ་འཛིན། །ཐུགས་ཀར་ར་ཙ་ཧིཡ་འབྲུ་བཞིའི་མཚན། །དེ་དག་སྐུ་ལས་འོད་ཟེར་དམར་པོ་འཕྲོས། །སྟེང་དུ་བཞུགས་པའི་གྲུབ་ཐོབ་རྒྱ་མཚོ་དང་། །གཡས་
གཡོན་དཔའ་བོ་དཔའ་མོ་རྒྱ་མཚོའི་ཚོགས། །བྱང་སེམས་བདུད་རྩི་འདོད་ཡོན་རྣམ་ལྔ་ཡི། །རྣམ་པར་ཞུ་ནས་རྩ་གསུམ་ནང་དུ་བབས། །ལྟེ་བའི་ལྷ་ལ་མཆོད་པ་ཕུལ་ནས་ཐིམ། །སླར་ཡང་ལྟེ་བའི་ལྷ་ལས་འོད་ཟེར་འཕྲོས། །ལྷ་འདྲེ་མི་གསུམ་བསྡུས་ནས་ལྟེ་བ་ཡི། །ལྷར་ཐིམ་བར་རླུང་བཟུང་ཞིང་ཕོ་སྐོར་བྱ། །དེ་ནི་མུན་རུབ་བར་དུ་བསྒོམ་པ་ཡིན། །སྲོད་ལ་སླར་ཡང་བདག་བསྐྱེད་ཝིག་ན་ལེགས།། །མ་གྲུབ་ལྷ་རྣམས་ཡིད་ཀྱིས་གསལ་གདབ་སྟེ། །ཡེ་ཤེས་སྤྱན་དྲངས་དབང་བསྐུར་རྒྱས་གདབ་བསྒོམ། །རྩ་གསུམ་བསྒོམ་ལུགས་ལ་སོགས་གོང་ལྟར་ལས། །ལྟེ་བར་ཆོས་འབྱུང་པདྨ་ཉི་ཟླའི་སྟེང་། །གསང་བ་ཡེ་ཤེས་ཕྱག་བཞི་གཞུང་ལྟར་བསྒོམ། །ཐུགས་ཀར་པད་ཉིའི་སྟེང་དུ་ཧཱུྃཡིག་མཐར། །ཨོཾ་འབྱར་དྷ་མ་གྷ་ཡེ་གཡོན་དུ་བསྐོར། །འདབ་བཞིར་རིགས་བཞིའི་མཁའ་འགྲོ་བཞི་ཀ་དམར། །གྲི་ཐོད་ཁ་ཊཾ་འཛིན་ཅིང་གར་སྟབས་འཁྱུད། །ཐུགས་ཀར་ཧ་རི་ནི་ས་འབྲུ་རེས་མཚན། །འོད་དམར་འཕྲོས་པས་སྟེང་དང་གཡས་གཡོན་གྱི། །གྲུབ་ཐོབ་དཔའ་བོ་དཔའ་མོ་རྒྱ་མཚོའི་ཚོགས། །འོད་ཞུ་བདུད་རྩིར་གྱུར་པ་རྩ་གསུམ་བརྒྱུད། །ལྟེ་བའི་གསང་ཡེ་མཆོད་ཅིང་ཐིམ་པ་
དང་། །འོད་འཕྲོས་སྟོང་གསུམ་ལྷ་འདྲེ་མི་གསུམ་རྣམས། །བསྡུས་ནས་འོད་ཞུ་ལྟེ་བའི་ལྷར་ཐིམ་བྷོ། །དེ་ལྟར་སྔ་དྲོ་ཐུན་གཅིག་དགོང་ཐུན་གཉིས། །མཚན་མོའི་ཐུན་དང་ཐུན་བཞིས་སྐབས་རྣམས་སུ། །གང་མོས་གཅིག་ཏུ་གཏོར་བསྔོས་བྱ་དགོས་ཀྱི། །གལ་ཏེ་མདུན་བསྐྱེད་ཚོགས་འཁོར་ཡོད་ན་ཡང་། །གང་མོས་སྐབས་སུ་འདོན་ཅིང་མཆོད་བསྟོད་བྱ། །མདུན་བསྐྱེད་ལ་དམིགས་བསྙེན་པ་བྱ་རྒྱུ་མེད། །འདི་ཉིད་རྒྱུན་ཁྱེར་བྱ་བའི་དབང་དུ་ཡིན། །གལ་ཏེ་མཚམས་བྱེད་རྩེ་གཅིག་སྒྲུབ་ན་ནི། །བདག་བསྐྱེད་ཐུན་བཞིར་ཐུན་མཚམས་གཏོར་བསྔོས་བྱ། །གཏོར་མགྲོན་རྟེན་ལ་བསྟིམ་མམ་རྟེན་མེད་ན། །རང་ལ་ཐིམ་དམིགས་འཇིག་རྟེན་རང་གནས་གཤེགས། །སྒྲུབ་པ་ཚར་རྗེས་དགའ་སྟོན་ཚོགས་འཁོར་དང་། །རྗེས་ཆོག་བྱ་ཡི་དངོས་གྲུབ་ལེན་ཆོག་མེད། །འདི་ལ་སྦྱིན་སྲེག་ཆེད་དུ་མི་དགོས་སོ། །གསང་སྒྲུབ་འཁོར་ལོ་གཅིག་མའི་སྒྲུབ་ཐབས་འདི། །ཐབས་མཁས་མཐར་ཕྱིན་གཉིས་ཀྱིས་བསྐུལ་བ་དང་། །དྲིན་ཆེན་རྡོ་རྗེའི་མཚན་ཅན་དགོངས་རྫོགས་ཕྱིར། །མེ་ལུག་ས་ག་ཟླ་བའི་བཅུ་བདུན་གྱི། །དགོང་མོའི་ཐུན་ལ་རཱ་ག་ཨ་སྱས་གདམས། །ཡི་གེའི་
འབྲི་བྱེད་བྷ་ཏ་ཧོར་གྱི་རིགས། །རིགས་བཟང་བློ་གསལ་ང་རྒྱལ་མེད་པ་སོགས། །སྐལ་ལྡན་སློབ་མའི་མཚན་ཉིད་ཡོངས་རྫོགས་པ། །དགེ་བཤེས་ཡོན་ཏན་ཕུན་ཚོགས་མཐར་ཕྱིན་པས། །གསང་སྔགས་ཆོས་འདི་སོར་མོའི་རྩེ་ནས་འཁྲུངས། །འདི་ལ་འགལ་འཁྲུལ་ཉེས་པའི་ཆ་མཆིས་ན། །ཊཱཀི་དམ་ཅན་རྒྱ་མཚོའི་ཚོགས་ལ་བཤགས། །དགེ་བས་ཞིང་གཤེགས་སྤྲུལ་པའི་སྐུ་དེ་ཉིད། །ས་ལམ་ཡོན་ཏན་གོང་དུ་འཕེལ་བ་དང་། །འགྲོ་ཀུན་བླ་མེད་བྱང་ཆུབ་ཐོབ་ཕྱིར་བསྔོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།