ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལས། ཡང་གསང་སེམས་ལ་བཀོད་པའི་སྒྲུབ་ཐབས་དང་། སྐུ་གསུམ་སྐུ་བཞིའི་ངོ་སྤྲོད་རྣམས་གཅིག་ཏུ་བསྡོམས་པའི་ཟིན་བྲིས།
ཐུགས་རྗེ་ཆེན་པོ་རྒྱལ་བ་རྒྱ་མཚོ་ལྷ་ལྔ་ལས། ཡང་གསང་སེམས་ལ་བཀོད་པའི་སྒྲུབ་ཐབས་དང་། སྐུ་གསུམ་སྐུ་བཞིའི་ངོ་སྤྲོད་རྣམས་གཅིག་ཏུ་བསྡོམས་པའི་ཟིན་བྲིས་བཞུགས་པའི་དབུ་ཕྱོགས་ལགས་སོ།།
ན་མོ་ལོ་ཀེ་ཤྭ་ར་ཀཱ་ཡ་ཙ་ཏུར་ཡེ། སྐུ་བཞིའི་བདག་ཉིད་བཅོམ་ལྡན་འདས། །སྤྱན་རས་གཟིགས་ལ་ཕྱག་འཚལ་ལོ། །བཀའ་གནང་བྱིན་གྱིས་བརླབ་ཏུ་གསོལ། །རྡོ་རྗེ་སྙིང་པོའི་རྒྱ་གཞུང་ལས། །ཕྱི་ལྟར་རྒྱལ་བ་རྒྱ་མཚོའི་ཚོགས། །མ་ལུས་ཕྱི་རུ་འགོད་པ་དང་། །ནང་ལྟར་ལུས་ལ་འགོད་པ་དང་། །གསང་བ་རྩ་ལ་འགོད་པ་དང་། །ཡང་གསང་དེ་ཉིད་སེམས་ལ་འགོད། །དེ་ཡང་བསྙེན་སྒྲུབ་ལས་གསུམ་སྟེ། །ཡང་གསང་འབྲས་བུའི་ངོ་སྤྲོད་བྱ། །གསུངས་པའི་ངོ་སྤྲོད་དེ་ཉིད་ནི། །སྐུ་གསུམ་སྐུ་བཞིའི་ངོ་སྤྲོད་ཡིན། །ཟབ་ཆོས་སྐུ་གསུམ་ངོ་སྤྲོད་དེ། །ཏཻ་
ལོ་ནཱ་རོ་ནས་བརྒྱུད་དེ། །སྙན་བརྒྱུད་ཡི་གེ་མེད་པ་ཡིན། །རིན་ཆེན་གླིང་པའི་ཤོག་སེར་ལས། །ཐུགས་རྗེ་ཆེན་པོ་སྤྱན་རས་གཟིགས། །རྒྱལ་བ་རྒྱ་མཚོའི་ཕྲིན་ལས་ཀྱིས། །རྒྱ་བོད་ཧོར་གསུམ་འདུས་པ་ཡིན། །དུས་གསུམ་མཁྱེན་པ་མཚུར་ཕུར་ཞེས། །གྲགས་པ་ཀརྨའི་མིང་ཅན་འབྱུང་། །ཨོ་རྒྱན་ང་ཡི་ཟབ་ཆོས་ལ། །རྩལ་དང་ཡོན་ཏན་རྫོགས་པར་སྟོན། །ཞེས་གསུངས་ལུང་བསྟན་ཅི་བཞིན་ཏུ། །རང་བྱུང་རྡོ་རྗེས་ཡི་གེར་བཀོད། །དེ་རྗེས་ཡབ་སྲས་ན་རིམ་རྣམས། །ཁྲིད་ཡིག་རྒྱས་བསྡུས་མང་དུ་མཛད། །ཟིན་བྲིས་བསྐྱེད་རྫོགས་ཆ་ཚང་ཕྱིར། །རྩ་ཚིག་
ཉམས་སུ་བླངས་བདེར་བརྗོད། །དབང་པོ་ཐ་མའི་གང་ཟག་ལ། །སྐྱབས་སེམས་ཡིག་བརྒྱ་མཎྜལ་ཏེ། །ལྷ་ལྔའི་ཆོ་ག་དོན་གྱིས་ཚང་། །དབང་པོ་འབྲིང་གི་གང་ཟག་ལ། །གདན་བཞི་ཆོས་ཀྱི་འཁོར་ལོ་བསྐོར། །བཅའ་བ་ལུས་ཀྱི་གནད་དང་གཅིག །མོས་གུས་བླ་མའི་གནད་དང་གཉིས། །སྲོག་རྩོལ་རླུང་གི་གནད་དང་གསུམ། །རྩོལ་བ་ལུས་སྦྱངས་གནད་དང་བཞི། །གནད་བཞི་ལྡན་པའི་གཏུམ་མོ་བྷཻཾ། །གསང་སྒྲུབ་རྣམས་ལ་དོན་གྱིས་ཚང་། །རྒྱས་པར་གཞན་དུ་གསལ་ལྟར་ཡིན། །རྫོགས་རིམ་བསྐྱེད་རིམ་འདི་རྣམས་ཀྱང་། །རྣམ་པར་རྟོག་པའི་བསྐྱེད་རིམ་མིན། །རྣམ་པར་མི་རྟོག་བསྐྱེད་རིམ་སྟེ། །སྟོང་ཉིད་ལྟ་བའི་ངང་ནས་བསྒོམ། །པདྨ་ཉི་ཟླ་བརྩེགས་པའི་སྟེང་། །དྲན་རྫོགས་རང་ཉིད་བཅོམ་ལྡན་འདས། །ཤཱཀ་ཐུབ་བཙོ་མ་གསེར་གྱི་མདོག །མཚན་དཔེས་རྒྱན་ལྡན་སྐྱིལ་ཀྲུང་བཞུགས། །ཆོས་གོས་རྣམ་གསུམ་སྐུ་ལ་གསོལ། །ཐུགས་ཀར་ཟླ་སྟེང་ཧཱུྃ་སེར་མཚན། །རླུང་ནི་ཕར་ལ་གཏོང་བའི་དུས། །སྐུ་ལ་སངས་རྒྱས་སྟོང་རྩ་དང་། །ཤཱཀ་ཐུབ་བྱེ་བ་གྲངས་མེད་འཕྲོས། །འཇིག་རྟེན་ཐམས་ཅད་སེར་ལྟེམས་གང་། །དེ་དག་ཀུན་གྱིས་ཆོས་གསུངས་
པས། །འགྲོ་དྲུག་ཤཱཀ་ཐུབ་དེ་འདྲ་བ། །ཁོ་ནའི་སྐུ་རུ་གྱུར་པ་དེ། །རླུང་གཅིག་ཚུར་ལ་རྔུབ་པའི་དུས། །ཐམས་ཅད་ཚུར་འདུས་དབུ་མར་ཐིམ། །མི་དམིགས་ངང་ལ་མཉམ་པར་བཞག །སྟོང་ཉིད་ངང་ནས་སྙིང་རྗེ་བསྒོམ། །རིག་པ་ལྟ་བའི་དབུས་སུ་གཏད། །དེ་ལྟར་ཡང་ཡང་སྒོམས་པ་ཡིས། །ཆོས་ཀུན་སྤྲུལ་སྐུར་རྟོགས་པར་གསུངས། །དེ་དོན་ཕ་རྒྱུད་གསང་འདུས་ལས། །མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔ་རུ་རབ་ཏུ་གྲགས། །སྐྱེ་མཆེད་ཁམས་དང་དབང་པོ་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་གསུངས་རྒྱལ་བ་བྱམས་པས་ཀྱང་། །རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་རྣམས། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་འགྲོ་བ་སེམས་ཅན་རྣམས། །ཡི་དམ་ལྷ་ཡི་ཡང་སྤྲུལ་དུ། །དགོངས་འདུས་རྒྱུད་ལས་གསུངས་པའི་ཕྱིར། །འགྲོ་དྲུག་སྤྲུལ་སྐུ་ཉིད་ཡིན་ཀྱང་། །མ་རྟོགས་ཐ་མལ་ཞེན་པས་བསྒྲིབས། །བསྒོམས་པས་ཐ་མལ་འཁྲུལ་པ་སྦྱངས། །སྣང་སྲིད་སྤྲུལ་སྐུར་རྟོགས་པར་བཤད། །དེ་དོན་རྡོ་རྗེའི་ཚིག་རྐང་ལས། །པུ་
ལ་ཧ་རིའི་འོག་ཁང་དུ། །སྤྲུལ་སྐུ་ཐོགས་མེད་ཆར་རྒྱུན་འབེབ། །རྡོ་རྗེའི་ཚིག་རྐང་གཉིས་དེའོ། །པདྨ་ཉི་མ་ཟླ་བའི་སྟེང་། །དྲན་རྫོགས་རང་ཉིད་སྐད་ཅིག་གིས། །རྒྱལ་བ་རྒྱ་མཚོ་སྤྱན་རས་གཟིགས། །ཡབ་རྐྱང་མངོན་རྟོགས་བཞིན་དུ་བསྒོམ། །ཐུགས་ཀར་ཟླ་སྟེང་ཧཱུྃཡིག་མཐར། །ཡི་གེ་དྲུག་པས་བསྐོར་བར་བསམ། །རླུང་གཅིག་ཕྱི་རུ་བུས་པ་ཡིས། །སྣ་བུག་བ་སྤུའི་བུ་ག་ནས། །འོད་ཟེར་ཁ་དོག་སྣ་ལྔའི་ཚོགས། །ཕྱོགས་བཅུའི་འཇིག་རྟེན་ཁྱབ་པར་འཕྲོས། །རིགས་དྲུག་བར་དོར་བཅས་པ་ཡི། །འགྲོ་བ་སེམས་ཅན་ཟློམ་ལུས་པ། །ལོངས་སྤྱོད་རྫོགས་སྐུ་སྤྱན་རས་གཟིགས། །རྒྱལ་བ་རྒྱ་མཚོ་ཤ་སྟག་གྱུར། །རླུང་གཅིག་ཚུར་ལ་རྡུབ་པ་ཡིས། །ཐམས་ཅད་ཚུར་འདུས་རང་ལ་ཐིམ། །ངོ་བོ་རྗེན་པའི་ངང་ལ་བཞག །ཡང་གཅིག་འོད་ཟེར་འཕྲོས་པ་ཡིས། །དག་པའི་ཞིང་ཁམས་རབ་འབྱམས་ན། །ལོངས་སྤྱོད་རྫོགས་སྐུ་ཐམས་ཅད་ལ། །མཆོད་པའི་སྤྲིན་སྤུང་རྒྱ་མཚོས་མཆོད། །དེ་ཀུན་རྒྱལ་བ་རྒྱ་མཚོར་གྱུར། །རླུང་གཅིག་ཚུར་ལ་རྔུབ་པ་ཡིས། །ཐམས་ཅད་ཚུར་འདུས་བདག་ལ་ཐིམ། །ངོ་བོའི་སྟེང་དུ་ལྷང་ངེར་བཞག །རིག་པ་མགྲིན་པའི་
གནས་སུ་ཐིམ། །དེ་ལྟར་ཡང་ཡང་བསྒོམས་པ་ཡི། །ཆོས་ཀུན་ལོངས་སྤྱོད་རྫོགས་སྐུར་སྟོན། །ཡོན་ཏན་དཔག་ཏུ་མེད་པ་འབྱུང་། །ལོངས་སྐུའི་ལྷ་ཚོགས་ཞལ་མཐོང་ཞིང་། །རང་ཉིད་མ་འོངས་ལོངས་སྐུ་ཡིས། །སེམས་ཅན་དོན་བྱེད་ནུས་པར་གསུངས། །སྣང་སྲིད་འཁོར་འདས་ཆོས་རྣམས་ཀུན། །ངོ་བོ་སྟོང་ལ་རང་བཞིན་གསལ། །གསལ་སྟོང་ཟུང་འཇུག་ལོངས་སྐུ་ཡི། །རྟོགས་པ་ཤུགས་ཀྱིས་འཆར་བར་འགྱུར། །དེ་དོན་རྡོ་རྗེའི་ཚིག་རྐང་ལས། །པུ་ལ་ཧ་རིའི་བར་ཁང་དུ། །ལོངས་སྤྱོད་རྫོགས་སྐུ་བརྡ་ཡི་མཚོན། །ཞེས་པའི་དོན་གྱི་ཉམས་ལེན་ནོ། །རྒྱལ་བ་རྒྱ་མཚོའི་ལྷ་ཚོགས་རྣམས། །ཡང་གསང་སེམས་ལ་འགོད་པ་དང་། །དྲན་རྟོག་ཐུགས་ཀྱི་ཁྱེར་སོ་དང་། །དབུ་ཕྱག་རྫོགས་གསུམ་ཉམས་ལེན་རྣམས། །དོན་གཅིག་མིང་གི་རྣམ་གྲངས་ཡིན། །རྡོ་རྗེའི་སྙིང་པོའི་རྒྱ་གཞུང་ལས། །ཡང་གསང་སེམས་ལ་འགོད་པ་ནི། །དབེན་གནས་ཕྱི་རོལ་མི་བཙལ་ཏེ། །ལུས་འདི་གཞལ་ཡས་ཁང་ཉིད་ཡིན། །ལྷ་སྐུ་གཞན་དུ་མི་བཙལ་ཏེ། །སེམས་ཉིད་སྐྱེ་འགག་མེད་པ་དེ། །རིགས་ཀྱི་བདག་པོ་བླ་མ་ཡིན། །མ་རྟོགས་ཉོན་མོངས་གཏི་མུག་དེ། །
རྟོགས་གྲོལ་ཐུགས་རྗེ་ཆེན་པོ་ཡིན། །ཡིད་བྱེད་རྟོགས་ཚོགས་འཕྲོ་བ་དེ། །རྟོགས་པ་སངས་རྒྱས་སྟོང་རྩ་ཡིན། །ཞེ་སྡང་གདུག་སེམས་ལྡན་པ་དེ། །གཞི་མེད་རྟོགས་པ་རྟ་མགྲིན་ཡིན། །འདོད་ཆགས་གདུང་སེམས་ཏུར་ཏུར་དེ། །རྩ་བྲན་ཤར་བ་གསང་ཡེ་ཡིན། །ཉོན་མོངས་ང་རྒྱལ་རྟོགས་ཚོགས་རྣམས། །ངར་འཛིན་བྲལ་བ་དཔའ་བོ་ཡིན། །ཕྲག་དོག་རླུང་ལྟར་འཚུབ་པ་དེ། །རེ་དོགས་ཟད་པ་དཔའ་མོ་ཡིན། །ཆུ་ཁམས་ཁྲག་དང་རྣམ་ཤེས་དེ། །རྡོ་རྗེ་རིགས་ཀྱི་མཁའ་འགྲོ་ཡིན། །རྩ་ཁམས་ཤ་དང་ཚོར་བ་ནི། །རིན་ཆེན་མཁའ་འགྲོ་མ་ཞེས་གྲགས། །མེ་ཁམས་དྲོད་དང་འདུ་ཤེས་དེ། །པདྨ་རིགས་ཀྱི་མཁའ་འགྲོ་ཡིན། །རླུང་ཁམས་དབུགས་དང་འདུ་བྱེད་དེ། །ལས་ཀྱི་མཁའ་འགྲོ་ཞེས་སུ་བཤད། །ནམ་མཁའི་ཁམས་དང་སེམས་ཉིད་དེ། །གཟུགས་ཀྱི་ཕུང་པོ་བདེ་གཤེགས་རིགས། །པདྨ་མཁའ་འགྲོ་དྲྭ་བ་འོ། །སྐྱེ་མཆེད་ཚོགས་དྲུག་དེ་ཡི་ཡུལ། །འདོད་ཡོན་མཆོད་པའི་ལྷ་མོ་ཡིན། །དགེ་དང་མི་དགེའི་རྟོག་ཚོགས་རྣམས། །དམ་ཅན་བཀའ་སྡོད་སྲུང་མར་བཤད། །དེ་ལྟར་སེམས་ཀྱི་ངོ་བོ་དེ། །མ་རྟོགས་འཁྲུལ་པ་འཁོར་བ་དེ། །དེ་ཤེས་རྟོགས་པ་མྱ་
ངན་འདས། །ལྷ་སྐུ་སེམས་ཀྱི་རིག་རྩལ་དེ། །དངོས་པོར་བཟུང་བ་འཁྲུལ་པ་ཡིན། །ལྷ་ཡང་སེམས་ཉིད་ཆོས་སྐུར་གསལ། །སྔགས་ནི་སྨྲ་བརྗོད་བྲལ་བའི་ཕྱིར། །ཕྱི་ནང་རླུང་གི་རྒྱུ་བ་ཡང་། །སྨྲས་ཚད་གྲག་སྟོང་བརྗོད་མེད་ཡིན། །གདོད་ནས་དག་པའི་རིག་པ་འདི། །ཡེ་ནས་ཆོས་སྐུར་གནས་པ་ལ། །ངོ་སྤྱོད་དེ་ངོ་ཤེས་པ་ཡི། །ཆོས་དབྱིངས་ཡེ་ཤེས་རྟོགས་པ་དེ། །སངས་རྒྱས་ཞེས་སུ་གྲགས་པ་ཡིན། །གོམས་འདྲིས་བརྟན་ན་དྲོད་རྟགས་འཆར། །དེ་ལྟར་ཆོས་སྐུའི་ངོ་བོ་ལ། །བཟུང་བར་བྱ་བའི་ཡུལ་ཡང་མེད། །ཁམས་དྲོད་རྟགས་དང་ཉམས་མྱོང་ལ། །མ་ཆགས་རང་བྱུང་རྩ་ནས་དག །རང་དོན་ཆོས་སྐུ་མངོན་གྱུར་ཏེ། །གཞན་དོན་གཟུགས་སྐུ་ལྷུན་གྲུབ་འགྱུར། །འཁོར་བ་མྱ་ངན་འདའ་བར་འགྱུར། །སྙན་བརྒྱུད་དྲི་མ་མེད་པའོ། །དེ་བཞིན་དགྱེས་རྡོར་རྒྱུད་ལས་ཀྱང་། །འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་ནས་རྙེད་མི་འགྱུར། །སེམས་ནི་རྫོགས་པའི་སངས་རྒྱས་ཡིན། །ཞེས་གསུངས་སེམས་ལ་ལྷ་ཚོགས་ཚང་། །འོན་ཀྱང་གཟུགས་དང་དངོས་པོ་མེད། །དེ་དོན་རྟོགས་པ་གཉིས་པ་ལས། །གཟུགས་མེད་མཐོང་བ་པོ་
ཡང་སེམས། །སྒྲ་མེད་ཐོས་པ་པོ་ཡང་སེམས། །དྲི་མེད་རྩོམ་པ་པོ་ཡང་སེམས།། །རོ་མེད་མྱོང་བ་པོ་ཡང་སེམས། །རེག་མེད་རེག་པ་པོ་ཡང་སེམས། །སེམས་མེད་སེམས་ལས་བྱུང་བའང་སེམས། །དེ་ཉིད་ཉམས་སུ་ལེན་པའི་ཚུལ། །པདྨ་རྒྱལ་པོའི་རྒྱུད་ཉིད་ལས། །དེ་ལ་མ་ཡེངས་ནང་དུ་བདེ། །སེམས་ལ་ཡེ་ཤེས་ཆེན་པོ་སྐྱེས། །སེམས་དབེན་རྟོག་པ་ངན་པ་མེད། །སྣང་ལ་རང་བཞིན་མེད་པར་མཐོང་། །སྒྱུ་མ་ལྟ་བུར་བསྡུས་པ་ཡིན། །གསལ་ལ་མི་རྟོགས་འོད་གསལ་ལོ། །ཐམས་ཅད་སྤྲོས་པ་མེད་པར་རྟོགས། །བདེ་དང་སྟོང་པ་གཅིག་ཏུ་སྣང་། །འབྲས་བུ་ཞེས་བྱ་ཟུང་འཇུག་ཡིན། །དེ་དོན་རིག་ཐོག་ངོ་སྤྲད་པ། །མཁའ་སྤྱོད་དབང་པོས་གསུངས་པའི་དོན། །བསྡུས་པར་བརྗོད་ན་འདི་ལྟ་སྟེ། །འཁོར་བ་ཐམས་ཅད་སེམས་ལ་རྟོགས། །དེ་ནི་དགའ་བའི་ཡེ་ཤེས་སོ། །སེམས་ཉིད་སྤྲོས་དང་བྲལ་བར་རྟོགས། །དེ་ནི་མཆོག་དགའི་ཡེ་ཤེས་སོ། །སེམས་ཉིད་སྐུ་ལྔ་ལྷུན་གྲུབ་རྟོགས། །དེ་ནི་ཁྱད་དགའི་ཡེ་ཤེས་སོ། །འཁོར་འདས་དབྱེར་མེད་ཟུང་འཇུག་རྟོགས། །ལྷན་ཅིག་སྐྱེས་དགའི་ཡེ་ཤེས་སོ། །དབང་བཞི་སྐུ་བཞིའི་ཡེ་ཤེས་བཞི། །སེམས་ཉིད་སྟེང་དུ་སྐད་ཅིག་
རྫོགས། །དབང་བཞི་གཅིག་རྫོགས་བཟླ་བར་གསུངས། །ཨོྃ་ཨཱཿཧཱུྃ་ཧྲཱི༔ཡིག་འབྲུ་བཞི། །སངས་རྒྱས་ཀུན་གྱི་སྐུ་བཞིའི་སྔགས། །ཡིག་དྲུག་གཅིག་ཙམ་ཡིག་འབྲུ་ལྔ། །འབུམ་ཚོ་གཅིག་ཙམ་བཟླས་ན་ཡང་། །རྟགས་ནི་རབ་འབྲིང་ཐ་གསུམ་སོགས། །སྣ་ཚོགས་མི་འབྱུང་མི་སྲིད་པས། །སྐུ་བཞི་ངོ་སྤྲོད་ཟབ་མོའི་གནད། །སློབ་བུ་རྣམས་༎ ཀྱིས་ཤེས་གྱིས་ལ། །འགྲུབ་རྟགས་སྣ་ཚོགས་འཛམ་བུ་གླིང་། །ཁྱབ་པར་སྟོན་གཅིག་པཀཱིས་གསུངས། །དེ་དག་རྩ་བའི་ཚིག་རྐང་ལས། །པུལླ་ཧ་རིའི་ཡང་ཐོག་ཏུ། །ཆོས་སྐུ་སྤྲོས་མེད་བརྡ་ཡིས་མཚོན། །ཞེས་གསུངས་པ་ཡི་དོན་ཡིན་ནོ། །རང་ཉིད་རྒྱལ་བ་རྒྱ་མཚོ་ཡི། །ལྟེ་བར་གཏུམ་མོའི་མེ་སྦར་ལ། །འཁོར་འདས་སྣོད་བཅུད་ཐམས་ཅད་ཀུན། །བྱང་སེམས་དངུལ་ཆུ་ལྟ་བུར་ཞུ། །སྣ་བུག་ནས་རྡུབ་མེ་ལ་བསྟིམ། །རླུང་བཟུང་ཉམས་ལེན་ངང་ལ་བཞག །བདེ་བ་ཆེན་པོའི་སྐུ་ཡི་ནང་། །ངོ་སྤྱོད་བདེ་སྟོང་ཟུང་དུ་འཇུག །ཚེ་དང་བསོད་ནམས་ཡེ་ཤེས་རྒྱས། །སྣང་བ་ཐམས་ཅད་དབང་དུ་འདུས། །འགྲོ་འཆགས་བཟའ་བཏུང་ཉལ་ལ་སོགས། །སྤྱོད་ལམ་གང་དང་ཅི་བྱེད་ཀུན། །ཉམས་ལེན་དེ་རྣམས་བསྲེ་
ཞིང་བསྒོམ། །མཉམ་རྗེས་ཟུང་དུ་འཇུག་པར་འགྱུར། །རྒྱུན་དུ་ཡིག་བཅུའམ་ཡིག་དྲུག་འབད། །མཇུག་ཏུ་བསྔོ་སྨོན་རྒྱ་ཡིས་གདབ། །རྫོགས་རིམ་རྩ་ཚིག་མདོར་བསྡུས་འདི། །མཐར་ཕྱིན་ཐབས་མཁས་གཉིས་ཀྱིས་བསྐུལ། །མེ་ལུག་ས་གའི་བཅུ་དགུ་ཡི། །དགོང་ཐུན་རཱ་ག་ཨ་སྱས་གདམས། །སྒོམ་ཆེན་མཐའ་རུ་ཕྱིན་པས་བྲིས། །ཉེས་འགལ་སྒྲུབ་བརྒྱུད་སྲུང་མར་བཤགས། །དགེ་བས་དྲིན་ཆེན་སྤྲུལ་སྐུ་ཉིད། །མྱུར་དུ་སྐུ་གསུམ་མངོན་བྱེད་ཤོག །ཀཾ་པོ་གངས་ཀྱི་སྒྲུབ་བརྒྱུད་པའི། །སྙན་བརྒྱུད་ཆོས་ཀྱི་བཅུད་འདི་ཡིན། །གྲུབ་མཐའ་གཞན་ལ་མ་གྲགས་སོ། །དེ་ཕྱིར་མ་འོངས་རྗེས་འཇུག་རྣམས། །ཉམས་ལེན་སྙིང་པོ་འདི་ལ་དྲིལ། །བསྐལ་པ་ཇི་ལྟར་ཞན་ན་ཡང་། །བར་དོར་སྐུ་གསུམ་མངོན་དུ་འགྱུར། །འདི་ལས་ཟབ་པའི་གདམས་པ་ནི། །འཇིག་རྟེན་འདི་ན་མི་སྲིད་པ། །མི་བསྐྱོད་རྒྱལ་བའི་གསུངས་ལས་སོ།། །།ཤུ་བྷཾ་མ་སྐུ་སརྦ་ཛ་ག་ཏཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།