བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་ཕྱི་ནང་གསང་བ་ཡང་གསང་སྒྲུབ་པའི་རྗེས་ཆོག་གི་ཟིན་བྲིས།
བཅོམ་ལྡན་འདས་འཇིག་རྟེན་དབང་ཕྱུག་རྒྱ་མཚོ་ལྔའི་དཀྱིལ་འཁོར་གྱི་མངོན་པར་རྟོགས་པ་བྱིན་རླབས་ཐོགས་མེད་འགུགས་པའི་ལྕགས་ཀྱུ་ཞེས་བྱ་བ་ལས། ལྷ་ལྔའི་ཕྱི་ནང་གསང་བ་ཡང་གསང་སྒྲུབ་པའི་རྗེས་ཆོག་གི་ཟིན་བྲིས་བཞུགས་སོ།།
ན་མོ་གུ་རུ་ལོ་ཀེ་ཤྭ་ར་ཡེ། སྤྱན་རས་གཟིགས་དབང་ལྷ་ལྔའི་ཞབས་ལ་འདུད། །འགྲོ་བའི་དོན་ཕྱིར་བཀའ་གནང་བྱིན་གྱིས་རློབས། །ལྷ་ལྔའི་ནང་སྒྲུབ་གསང་སྒྲུབ་ཡང་གསང་གསུམ། །གང་ཡིན་ཞག་བདུན་ཚར་རྗེས་གྲོལ་ཁའམ། །གསུམ་ཀ་སྦྲེལ་ནས་བདུན་གསུམ་ཚར་བའི་རྗེས། །བདག་མདུན་བུམ་གསུམ་ཚར་གཅིག་འདོན་པའི་ཚེ། །དཀྱིལ་འཁོར་གཏོར་མ་སོ་སོར་ལྷ་ལྔ་དེ། །མདུན་བསྐྱེད་སྐབས་སུ་དམིགས་པས་ཕྱེ་སྟེ་བསྒོམ། །གཙོ་བོའི་མདུན་དུ་བུམ་པ་བསྒོམ་པ་དང་། །བུམ་པའི་ནང་དུ་ལྷ་དགུ་བུམ་བསྐྱེད་ལྟར། །ལས་བུམ་ནང་དུ་རྟ་མགྲིན་
བསྒོམ་པའམ། །དུང་ཆོས་ནང་ངམ་བུམ་པའི་མཆུ་ནང་བསྒོམ། །གཏོར་བསྐྱེད་ལ་དམིགས་ལྷ་ལྔའི་བསྙེན་པ་དང་། །དེ་ཚེ་མདུན་བསྐྱེད་ཡབ་ཡུམ་སྦྱོར་མཚམས་ནས། །བྱང་སེམས་འོད་ཟེར་ཚུལ་དུ་ཐོད་པར་བསྟིམ། །བུམ་བསྐྱེད་ལ་དམིགས་ཡིག་བཅུ་ཅུང་ཟད་བསྙེན། །དེ་ནས་བདག་འཇུག་རྒྱས་པ་གཏོར་དབང་བཅས། །དངོས་གྲུབ་ལེན་ཆོག་ཚུལ་དུ་བདག་འཇུག་བླངས། །གལ་ཏེ་བདག་འཇུག་རྒྱས་པར་མི་ལྕོགས་ན། །གཏོར་དབང་ཁོ་ན་ལེན་པ་འབྲིང་པོ་ཡིན། །བསྡུ་ན་མདུན་བསྐྱེད་ལྷ་ཚོགས་ཐམས་ཅད་ཀྱི། །སྐུ་ལས་རང་རང་སྐུ་གཟུགས་ཡུངས་འབྲུ་
ཙམ། །གསུང་ལས་ཨཱཿ་ལི་ཀཱ་ལི་སྔགས་ཀྱི་ཕྲེང་། །ཐུགས་ལས་བདུད་རྩི་འོ་མའི་ཆུ་རྒྱུན་ལྟར། །རང་གི་གནས་གསུམ་ཐིམ་ཞིང་ལུས་གང་བས། །ནད་གདོན་སྡིག་སྒྲིབ་དུད་ཁུ་སོལ་ཁུ་ལྟར། །འོག་སྒོ་རྐང་པའི་མཐིལ་ནས་ནག་ནུར་ཐོན། །རང་ལུས་ཡེ་ཤེས་བདུད་རྩིས་ངང་ལྟེམ་གང་། །མདུན་བསྐྱེད་སྐུ་ལས་འོད་ཟེར་དཔགོ་མེད་འཕྲོས། །ཕྱོགས་བཅུ་དུས་གསུམ་རྒྱལ་བ་སྲས་བཅས་རྣམས། །ཐམས་ཅད་རྒྱལ་བ་རྒྱ་མཚོའི་ངོ་བོར་གྱུར། །ནམ་མཁའི་དབྱིངས་ཀུན་གང་བར་གྱུར་ནས་ཀྱང་། །རོལ་མོ་འུར་འུར་ཌཱ་དྲིལ་ཁྲ་ལ་ལ། །གར་སྟབས་འཁྱུག་ཅིང་ཚར་དྲག་བབས་པ་ལྟར། །རང་ལ་ཐིམ་པས་དབང་བཞི་ཐོབ་པར་བསྒོམ། །རོལ་མོ་དབྱངས་བཅས་སྤྱན་འདྲེན་ཚར་གཅིག་འདོན། །ལྷ་ལྔའི་སྔགས་མཇུག་ཨཱཿ་ཝེ་ཤ་ཡ་ཨ་ཨཱཿ ཞེས་བཟླས་བུམ་པ་གཏོར་མ་དབང་རྫས་རྣམས། །རང་གི་གནས་གསུམ་དུ་ནི་གཏུགས་བྱས་ཤིང་། །བུམ་ཆུ་བདུད་རྩི་ཅུང་ཟད་ལྕེ་ལ་བཞག །སིནྡྷ་ར་ཡིས་གནས་གསུམ་ཐིག་ལེ་བྱ། །དེ་ནས་དགའ་སྟོན་ཚོགས་འཁོར་རྗེས་ཆོག་རྣམས། །གཞུང་ནས་གསལ་བ་ལྟ་བུ་ཡིན་པ་སྟེ། །མདུན་བསྐྱེད་རྟེན་ལ་བསྟིམ་མམ་མེད་ནི་གཤེགས། །མདུན་
བསྐྱེད་དམ་ཚིག་པ་ནི་རང་ལ་བསྡུ། །བདག་བསྐྱེད་མི་གཤེགས་སྟོང་པར་བསྡུ་བའོ། །སིན་ར་དེ་མཐའ་ནས་དབུས་སུ་བསྡུས། །དེ་ཉིད་ཀ་པཱ་ལ་ཡི་བདུད་རྩིར་བཏབ། །དེ་ལ་བུམ་ཆུ་ཅུང་ཟད་བསྲེས་བྱས་ལ། །རིལ་བུ་བྱས་ཏེ་དམ་ཚིག་རྫས་སུ་བཅང་། །བུམ་ཆུ་ཅུང་ཟད་བཏུང་ཞིང་སྤྱི་བོར་བླུགས། །ལྷག་མ་རྟེན་འདུས་རིལ་བུའམ་གཟུངས་རིལ་བྱ། །གང་རེག་དབང་དུ་འདུ་བའི་རྟེན་འབྲེལ་དང་། །སྐྱེ་བ་བདུན་ནས་བདེ་ཆེན་ཞིང་སྐྱེ་གསུངས། །དེ་ནས་སྒྲུབ་པའི་རྫས་རྣམས་བསྡུས་བྱས་ལ། །ས་སྟེགས་རྡུལ་ཚོན་ཡིན་ཞིང་སྟབས་བདེ་ན། །དཀྱིལ་འཁོར་སྟེང་དེར་ཤིང་གིས་ཐབ་བརྩེགས་ལ། །ཞི་རྒྱས་དབང་དྲག་གང་རུང་སྦྱིན་སྲེག་བྱ། །སྟབས་མི་བདེའམ་རས་བྲིས་སོགས་ཡིན་ན། གར་བདེར་སྦྱིན་སྲེག་བྱ་ཚུལ་སྤྱི་དང་མཐུན། །ཚོམ་བུ་རྡུལ་ཚོན་སྦྱིན་སྲེག་ཐལ་བ་རྣམས། །བསྡུས་ཏེ་ཆུ་བོའི་གཞུང་དུ་བསྐུར་བྱས་པས། །ཆུ་དེས་ཁྱབ་ཚད་སེམས་ཅན་ཐམས་ཅད་ཀྱང་། །བྱང་ཆུབ་མངོན་དུ་བྱེད་པའི་སྐལ་ལྡན་གྱུར། །རྣལ་འབྱོར་མཁའ་སྤྱོད་དབང་པོའི་གསུང་དང་ནི། །ཐུབ་ཆེན་དེ་བཞིན་གཤེགས་པའི་གསུང་ལས་བྱུང་། །གལ་ཏེ་ཕྱི་སྒྲུབ་
ཡུན་རིང་བསྙེན་རྗེས་སུ། །སྒྲུབ་པ་ཚར་རྗེས་ཡར་མར་ཚེས་བཅུ་ལ། །མཆོད་གཏོར་བཤམས་ལ་བདག་མདུན་བུམ་གསུམ་འདོན། །དེ་རྗེས་བདག་འཇུག་རྒྱས་བསྡུས་གང་རུང་བླངས། །ཚོགས་མཆོད་བཀྲ་ཤིས་རྗེས་ཆོག་གཞུང་ལྟར་བྱ། །སྦྱིན་སྲེག་འགྲུབ་ན་ཆད་ལྷག་ཁ་བཀང་ཞིང་། །སྒྲུབ་པའི་བྱིན་རླབས་མི་ཉམས་རུབ་གནས་འགྱུར། །དེ་དག་མི་ཐོན་ན་ཡང་ཉེས་སྐྱོན་མེད། །དེ་ལྟར་ལྷ་ལྔའི་རྗེས་ཆོག་ཟིན་བྲིས་འདི། །ཐབས་མཁས་མཐར་ཕྱིན་གཉིས་ཀྱིས་བསྐུལ་བ་དང་། །གཏེར་སྟོན་སྤྲུལ་སྐུའི་དགོངས་རྫོགས་ལ་དམིགས་ནས། །མེ་ལུག་ས་ག་ཟླ་བའི་བཅུ་གཉིས་ཀྱི། །དགོང་མོའི་ཐུན་ལ་རཱ་ག་ཨ་སྱས་གདམས། །དགེ་བཤེས་མཐའ་རུ་ཕྱིན་པས་ཡི་གེ་པ། །འདི་བྲིས་ཉེས་བཤགས་དགེ་བ་བྱང་ཆུབ་བསྔོ། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།