གསང་སྔགས་ནང་གཏོར་གྱི་བཅའ་ཐབས་ཟིན་བྲིས་གསལ་བར་བཀོད་པ་བློ་གསལ་སྒྲོན་མེ།
གསང་སྔགས་ནང་གཏོར་གྱི་བཅའ་ཐབས་ཟིན་བྲིས་གསལ་བར་བཀོད་པ་བློ་གསལ་སྒྲོན་མེ་བཞུགས་སོ།
རྒྱ་གར་སྐད་དུ། གུ་རྒྱ་མན་བ་ལིང་ཨུ་པ་དེ་ཤ་ན་མ། བོད་སྐད་དུ། གསང་བ་སྔགས་ཀྱི་གཏོར་མའི་ཞལ་གདམས་ཞེས་བྱ་བ། །འཇམ་དབྱངས་བླ་མའི་ཞབས་ལ་ཕྱག་འཚལ་ལོ། །གཏོར་མའི་དབྱེ་བ་ཕྱི་ནང་གསང་བ་གསུམ། །ཕྱི་ནི་ཆུ་སྦྱིན་གསང་བ་ལུས་སྦྱིན་ཡིན། །འདི་ནི་གསང་སྔགས་ནང་གཏོར་གཏོར་བསྔོས་ཡིན། །དེ་ལ་རྟག་གཏོར་རྒྱུན་གཏོར་བསྐང་གཏོར་དང་། །སྒྲུབ་གཏོར་དབང་གཏོར་རྟེན་གཏོར་དུས་གཏོར་དང་། །མདོས་གཏོར་ཟློག་གཏོར་བསད་གཏོར་ཐུན་གཏོར་དང་། །གཏོར་འབུལ་གློ་བུར་ལས་བཅོལ་གཏོར་མ་དང་། །རྟག་གཏོར་དང་ནི་རྣམ་
གྲངས་བཅུ་གཉིས་ལས། །རྟག་གཏོར་ཕུག་གཏོར་གོང་གཏོར་དོན་གཅིག་སྟེ། །རིམ་གྲོ་མཚམས་སོགས་མ་གྲོལ་བར་དུ་བཞག །ལོ་རེ་ལན་རེ་བརྗེ་འམ་རྟག་ཏུ་བཞག །དེ་ཕྱིར་རྟག་གཏོར་ཞེས་སུ་བཤད་པ་ཡིན། །དེ་ལ་ཕུག་གཏོར་གོང་ནས་ཕྱིར་བཤམས་ཕྱིར། །གོང་གཏོར་ཕུག་གཏོར་ཞེས་སུ་གྲགས་པ་ཡིན། །ནངས་ནུབ་གསོ་བྲན་བྱ་ཞིང་གསང་སྔགས་ཀྱི། །ལྷ་གཞུང་འདོན་ཞིང་གཏོར་བསྔོས་བྱ་བའི་ཕྱིར། །གསང་སྔགས་ནང་གཏོར་ཞེས་སུ་གྲགས་པ་ཡིན། །འདི་ལ་བཅའ་ཚོགས་ཕྱག་ལེན་མཐའ་ཡས་པ། །གྲུབ་མཐའ་སོ་སོར་དར་ཕྱིར་བཤད་མི་ལོངས། །
འདི་ནི་རྗེས་འཇུག་གསར་བུ་པ་རྣམས་ལ། །ཕན་ཕྱིར་རང་གིས་གཏོར་བསྔོས་རྒྱས་པའི་ལུགས། །བཤད་པ་འབྲིང་དང་བསྡུས་པའང་ཤུགས་ཀྱིས་ཤེས། །གཏོར་མའི་རྫ་ས་ནི་ཤ་ལྔ་བདུད་རྩི་ལྔ། །ཡིན་ཞེས་ཕལ་པས་དངོས་སུ་བསྲེ་མི་རུང་། །རང་གི་དྲི་ཆེན་དངོས་སུ་ག་པུར་བསྒྱུར། །རང་གི་ཁྲག་ནི་འོ་མར་བསྒྱུར་ཐུབ་རུང་། །མེད་ཀྱང་ཐབས་ནི་ཆག་པ་མ་ཡིན་ཏེ། །ཡིད་ཀྱིས་བསྒོམ་པར་ཆོག་པ་རྒྱུད་ནས་གསུངས། །དགོས་པ་ཤ་ལྔས་དངོས་གྲུབ་ལྔ་འགྲུབ་ཕྱིར། །ལྕགས་ཀྱུ་ལྔ་ཞེས་རྒྱུད་ནས་གསུངས་པ་ཡིན། །བདུད་རྩི་ལྔ་ཞེས་མངོན་ཤེས་ལྔ་གསལ་ཕྱིར། །སྒྲོན་མེ་ལྔ་ཞེས་རྒྱུད་ནས་གསུངས་པ་ཡིན། །མཐར་ཐུག་འབྲས་བུ་རིགས་ལྔ་ཡབ་ཡུམ་བཅུ། །གྲུབ་པའི་རྫས་མཆོག་ཁྱད་པར་འཕགས་པ་ཡིན། །འབྲུ་སྣ་སྨན་སྣ་ཟས་སྣ་ཕུད་སྣ་ཚོགས། །རིན་ཆེན་སྣ་ཚོགས་ཕྱེ་མ་བསྲེས་བྱས་ལ། །ལོངས་སྤྱོད་འཕེལ་ཞིང་ནད་མེད་བདེ་བ་ཡི། །ཐབས་སུ་མན་ངག་ལས་ཚོགས་འགའ་ལས་འབྱུང་། །སྨན་སྒྲུབ་ཕྱེ་མ་ནང་དུ་བསྲེས་བྱས་པས། །གྲོག་མའི་ཁམ་བུ་གང་ལ་མཁའ་འགྲོ་མ། །འབུམ་ཕྲག་འདུ་བར་སྨན་སྒྲུབ་གཞུང་ནས་གསུངས། །ཕུད་ཉམས་བཀའ་ཆད་འབྱུང་ཕྱིར་མ་
ཉམས་པའི། །ཟན་གྱི་མིང་ལ་ཚ་ཞེས་བྱ་བ་དེར། །ཆང་གི་སྙིང་ཁུར་བུར་སྦྲང་སྦྱར་བ་ལ། །གལ་ཞེས་བྱ་སྟེ་དེ་གཉིས་བསྲེ་བོ་ལ། །ཚེ་དང་གལ་གྱི་ཐུན་གཉིས་ཐུན་སྡེབས་ཟེར། །ཆང་གི་རང་ཁུའམ་ནི་ཟན་ཆང་ནི། །རུ་གཅིག་མར་ནི་རུ་གཉིས་ཞིབ་ཆེན་རྩམ་པ་བསྲེས། །བསིལ་དྲོད་སྙོམས་པའི་དུས་སུ་བཅའ་བྱས་པས། །ལོ་མང་སོང་ཡང་མི་རུལ་འབུ་མི་འཇུག །དགོངས་འདུས་གཏོར་མའི་དམར་ཁྲིད་ལག་ལེན་ལས། ༈ །བླ་མའི་གཏོར་མ་རིགས་ལྔ་གསུང་ན་ཡང་། །ཀུན་འདུས་བྱིན་རླབས་གཏོར་མ་ནི། །ཅོག་འདྲ་སྟོད་སྡེར་རྩེ་མོ་ཅན། །མཐེབ་སྐྱུ་པདྨ་འདབ་བརྒྱད་ལྟར། །ཟེའུ་འབྲུ་ཕུམ་ཕུམ་བཅས་པས་བསྐོར། །པདྨ་ཁ་འབུས་དབྱིབས་ལྟར་ལས། །དབུས་སུ་ཕྱུར་བུར་ཕྱུང་བའོ། །ཞེས་གསུངས་པ་ཡི་དོན་དང་མཐུན་པ་སྟེ། །སྟོད་ནི་ལྡིར་ཞིང་ཟླུམ་པོ་བུམ་པའི་དབྱིབས། །ཀུན་ཟླུམ་ཐིག་ལེ་ཆེན་པོས་མཚན་པ་སྟེ། །གཞོན་ནུ་བུམ་སྐུའི་ཀློང་དུ་སངས་རྒྱས་བརྡ། །མདུན་དུ་མར་རྒྱན་པདྨ་ཆེན་པོ་ནི། །ཆོས་སྐུའི་ཀློང་ནས་ལོངས་སྐུར་བཞེངས་པའི་བརྡ། །དེ་ནང་པདྨ་གཅིག་དང་གཉིས་བརྩེགས་ནི། །སྐུ་གཉིས་མི་འགལ་ཟུང་དུ་འཇུག་པའི་
བརྡ། །ཕྱི་ཡི་པད་འདབ་སྤུ་ཤེད་བརྒྱད་ཅུ་དང་། །ནང་གི་པད་འདབ་སུམ་ཅུ་སོ་གཉིས་ནི། །དཔེ་བྱད་བརྒྱད་ཅུ་མཚན་བཟང་སོ་གཉིས་དང་། །བླ་མ་ལོངས་སྤྱོད་རྫོགས་སྐུར་ཚང་བའི་བརྡ། །གཏོར་མ་ཐམས་ཅད་དམར་པོ་དབང་གི་མདོག །རྗེས་འཇུག་དབང་གིས་སྨིན་ཅིང་གྲོལ་བའི་བརྡ། །དེ་ལ་དཀར་ཐིག་གྲངས་མེད་བརྒྱན་པ་ནི། །ཕྱོགས་བཅུར་སྤྲུལ་པ་གྲངས་མེད་འཕྲོ་བའི་བརྡ། །ཕྱོགས་བཞིར་ཞི་བའི་པད་འདབ་ཆེན་པོ་བཞི། །པད་འདབ་བཞི་འམ་ཀྱུ་གུ་བཞིས་བསྐོར་བ། །བསྡུ་དངོས་བཞི་ཡིས་འགྲོ་དོན་བྱེད་པའི་བརྡ། །ཀྱུ་གུ་རིལ་བུ་གཉིས་གཉིས་བརྒྱད་ཡོད་པ། །འཕགས་ལམ་ཡན་ལག་བརྒྱད་དང་ལྡན་པའི་བརྡ། །གཏོར་མའི་རྩེ་ལ་མུ་ཏིག་ཕྲེང་བ་ནི། །བརྒྱུད་པ་མུ་ཏིག་རྩ་ལ་བརྒྱུད་འདྲའི་བརྡ། །དེ་སྟེང་ཚེ་ཡི་བུམ་པ་བཞག་པ་ནི། །བླ་མ་ཚེ་དཔག་མེད་པ་བསྒྲུབ་པའི་རྟེན། །རྗེས་འཇུག་ཚེ་ཡི་དངོས་གྲུབ་འབྱུང་བའི་བརྡ། །བུམ་པའི་ཁ་རྒྱན་མེ་ཏོག་པདྨ་ནི། །བླ་མ་ཐུགས་རྗེ་ཆེན་པོ་བསྒོམ་པའི་རྟེན། །འབྲེལ་ཚད་དོན་ལྡན་འགྲོ་བ་འདྲེན་པའི་བརྡ། །དེ་སྟེང་རྡོ་རྗེ་ཕྱེད་པ་སྐྱེས་པ་ནི། །རྡོ་རྗེ་པདྨ་འབྱུང་གནས་བསྒོམ་པའི་རྟེན། །རྗེས་འཇུག་སྣང་སྲིད་ཟིལ་གྱིས་
གནོན་པའི་བརྡ། །གཡས་གཡོན་ཟུར་དུ་སྐར་མ་ཤར་བ་ནི། །སྒྲུབ་བརྒྱུད་སྐར་འཚོགས་བཞིན་དུ་བཀྲ་བའི་བརྡ། །དེ་སྟེང་ཡར་ངོའི་ཟླ་བ་ཚེས་པ་ནི། །འགྲོ་བའི་མ་རིག་མུན་པ་སངས་བའི་བརྡ། །དེ་སྟེང་ཉི་མའི་དཀྱིལ་འཁོར་རྒྱས་པ་ནི། །མདོ་སྔགས་བསྟན་པའི་ཉི་འོད་གསལ་བའི་བརྡ། །དེ་སྟེང་ནོར་བུ་སུམ་ཚོམ་བཞག་པ་ནི། །སྐུ་གསུམ་འབྲས་བུ་མྱུར་དུ་འགྲུབ་པའི་བརྡ། །བར་མཚམས་ཐམས་ཅད་སྟོང་པར་བཞག་པ་ནི། །སྟོང་ཉིད་ལྟ་བ་མངོན་སུམ་རྟོགས་པའི་བརྡ། །མཐའ་ལ་པ་ཏྲའི་ཕྲེང་བས་བསྐོར་བ་ནི། །ཤེས་བྱའི་གནས་ཀུན་མ་འདྲེས་མཁྱེན་པའི་བརྡ། །ཤ་རྒྱན་དཀར་དམར་གཉིས་པོ་བརྩེགས་པ་ནི། །ཨཧཾ་དཀར་དམར་བདེ་སྟོང་ཟུང་འཇུག་བརྡ། །ཤ་རྒྱན་གཡས་གཡོན་རྒྱབ་དང་གསུམ་སྦྲེང་བ། །དབུ་རྐྱང་རོ་གསུམ་བདེ་གསལ་མི་རྟོགས་མཚོན། །དབང་བསྐུར་རྒྱུད་བཤད་མན་ངག་སྦྱིན་པ་ཡི། །བླ་བརྒྱུད་གསུམ་པོ་ཐོ་བརྩེགས་བསྒོམ་པའི་བརྡ། །གཏོར་༈ འདབ་པདྨ་འདབ་མ་བརྒྱད་པ་ནི། །བླ་མའི་དཀྱིལ་འཁོར་བསྒོམ་པའི་གདན་གྱི་ཚུལ། །གཏོར་མ་དངོས་ནི་ཞལ་ཟས་མཆོད་པའི་སྤྲིན། །མར་རྒྱན་བླ་མ་སྐུ་གསུམ་ཕྱག་མཚན་ཏེ། །
བླ་མ་ཆོས་སྐུ་སྣང་མཐའ་ཚེ་དཔག་མེད། །བླ་མ་ལོངས་སྐུ་འཕགས་པ་སྤྱན་རས་གཟིགས། །བླ་མ་སྤྲུལ་སྐུ་རྡོ་རྗེ་པདྨ་འབྱུང་། །རྩ་བར་བརྒྱུད་པའི་བླ་མ་ཐམས་ཅད་ཀྱང་། །སྐུ་གསུམ་དེ་ཡི་སྤྲུལ་པ་ཡང་སྤྲུལ་དང་། །ཉིང་སྤྲུལ་སུམ་སྤྲུལ་བྱིན་གྱིས་བརླབས་པ་ཉིད། །ཡིན་ཕྱིར་བླ་མ་མཆོད་ཚོགས་ཚེ་ཆོག་དང་། །ཐུགས་རྗེ་ཆེན་པོ་གུ་རུ་ཞི་བའི་རིགས། །དགོངས་འདུས་མཚོ་སྐྱེས་རྡོ་རྗེ་ལ་སོགས་པ། །བླ་མའི་ལས་བྱང་ཐམས་ཅད་འདི་ལ་འདོན། །བླ་བརྒྱུད་ཀུན་གྱི་གཏོར་བསྔོས་འདི་ལ་བྱ། །བྱིན་རླབས་རྩ་བ་བླ་མའི་གཏོར་མ་ཡིན། ༈ །ད་ནི་ཕུག་གཏོར་རྣམས་ཀྱི་བཤམས་ལུགས་ཀྱང་། །དགོངས་འདུས་གཏོར་མའི་ལག་ལེན་དམར་ཁྲིད་ལས། །དལ་དང་ཁྲི་སོགས་མ་འཛོམས་ན། །ནར་མོར་དབུས་སུ་བླ་མ་དང་། །གོཡས་གཡོན་ཡི་དམ་མཁའ་འགྲོ་ཡི། །གཏོར་མ་རིམ་བཞིན་བཤམས་ནས་ཀྱང་། །དམ་ཅན་ཆོས་སྐྱོང་ལ་སོགས་ཀྱང་། །དེ་ཡི་གཡས་དང་གཡོན་དུ་བཤམས། །ཞེས་གསུངས་ཡི་དམ་བླ་མའི་གཡས་སུ་བཤམས། ༈ །ཡི་དམ་གཏོར་མར་རིགས་གསུམ་བཤད་ན་ཡང་། །དགོངས་འདུས་གཏོར་མའི་དམར་ཁྲིད་དེ་ཉིད་ལ། །
ཡི་དམ་མཁའ་འགྲོའི་གཏོར་མ་ནི། །ཅོག་ཟླུམ་ཟུར་གསུམ་འདེར་སོ་ལ། །དངོས་འདྲ་ཟུར་ཕྲན་མཐེབ་སྐྱུས་བསྐོར། །གསུངས་པའི་དོན་དང་མཐུན་པར་བྱ་བ་སྟེ། །རྩ་བ་ཟླུམ་པོ་ཅུང་ཞིག་ཕྲ་བ་དེ། །འཁོར་དུ་མཁའ་འགྲོ་ཞི་བའི་ལྷ་ཡོད་རྟགས། །སྟོད་ནི་འདིར་ཞིང་ཆེ་བ་ཡོད་པ་དེ། །སྟོབས་བཅུའི་སྟོབས་ལྡན་ཆེ་བའི་ཆེ་མཆོག་བརྡ། །ཕྱོགས་བཞིར་པདྨ་འདབ་བཞི་ཡོད་པ་ནི། །རིགས་བཞི་འཁོར་བཅས་ཕྲིན་ལས་བཞི་འགྲུབ་བརྡ། །མདུན་དུ་པད་ཀར་ཟླུམ་པོ་ཆེན་པོ་དང་། །པད་སེར་གྲུ་བཞི་པད་དམར་ཟླ་གམ་དབྱིབས། །པད་ལྗང་གྲུ་གསུམ་སུམ་བརྩེགས་བརྒྱན་པ་ནི། །ལས་བཞི་ཕྲིན་ལས་གང་ལ་དམིགས་ན་ཡང་། །གཏོར་མ་གཅིག་གིས་ཐམས་ཅད་འགྲུབ་པའི་གནད། །མར་སྐུད་འཐེན་པས་གཏོར་མ་གཉིས་བརྩེགས་འདྲ། །ཡབ་ཡུམ་གཉིས་ཀྱི་གཏོར་མ་དོན་གྱིས་ཚང་། །ཕྱི་རིམ་མར་རྒྱན་མེ་རི་ཞིབ་པོས་བསྐོར། །རང་འོད་མེ་དཔུང་ཀློང་ན་བཞུགས་པའི་བརྡ། །དཀར་ཐིག་ངེས་མེད་གར་ཡང་བཏབ་པ་ནི། །ལས་ལ་ངེས་མེད་གང་ཡང་འགྲུབ་པའི་བརྡ། །གཏོར་མའི་རྩེ་ལ་མུ་ཏིག་ཕྲེང་བས་བསྐོར། །སྒྲུབ་བརྒྱུད་མུ་ཏིག་གྲངས་འདྲ་འབྱུང་བའི་བརྡ། །དེ་
སྟེང་རྡོ་རྗེ་བསླང་སྟེ་བཞག་པ་ནི། །ཡི་དམ་ཐམས་ཅད་བསྒོམ་པའི་ཐུགས་ཀྱི་རྟེན། །དེ་སྟེང་ཟླ་བ་ཚེས་པས་བརྒྱན་པ་ནི། །བར་ཆད་བདུད་ཀྱི་མུན་པ་སངས་པའི་བརྡ། །དེ་སྟེང་ཉི་མའི་དཀྱིལ་འཁོར་རྒྱས་པ་ནི། །བསྐྱེད་རྫོགས་ཟུང་འཇུག་ཏིང་འཛིན་གསལ་བའི་བརྡའ། །དེ་སྟེང་ནོར་བུ་སུམ་བརྩེགས་བཞག་པ་ནི། །སྒོ་གསུམ་སྐུ་གསུང་ཐུགས་སུ་འགྲུབ་པའི་བརྡ། །བར་མཚམས་ཐམས་ཅད་སྟོང་པར་བཞག་པ་ནི། །སྟོང་ཉིད་ཉམས་ལེན་གཤིས་དང་མ་བྲལ་བརྡ། །ཕྱི་རོལ་མེ་དཔུང་རབ་ཏུ་འཁྲུགས་པ་ནི། །གཟི་བརྗིད་བསྐལ་པའི་མེ་ལྟར་འབར་བའི་བརྡ། །གཡས་གཡོན་ཤ་རྒྱན་གསུམ་པོ་གྱེན་བསྒྲེང་བ། །བསྐྱེད་དང་རྫོགས་དང་བསྐྱེད་རྫོགས་ཟུང་འཇུག་གསུམ། །མཐའ་རུ་ཕྱིན་ཞིང་བརྟན་པ་ཐོབ་པའི་བརྡ། །མར་རྒྱན་ལས་བཞིའི་དཀྱིལ་འཁོར་དབྱིབས་ཡོད་པ། །རྟེན་གྱི་དཀྱིལ་འཁོར་ཐམས་ཅད་དེ་ལ་ཚང་། །མར་སྐུད་འཐེན་པས་གཏོར་མ་ཕྱི་ནང་གཉིས། །ཡི་དམ་ཡབ་ཡུམ་གཏོར་མ་དེ་ལ་ཚང་། །ཕྱོགས་བཞིར་པད་འདབ་ཆེན་པོ་བཞི་ཡོད་པ། །རིགས་བཞི་འཁོར་གྱི་གཏོར་མ་ཚང་བ་ཡིན། །ཕྱི་ཟུར་མེ་རི་ཞིབ་པོས་བསྐོར་བ་ནི། །ཡེ་ཤེས་རང་འོད་མེ་ཀློང་བཞུགས་
པའི་བརྡའ། །བདེ་དགྱེས་གསང་གསུམ་གསར་མའི་ཡི་དམ་ལྷ། །གུ་དྲག་བཀའ་བརྒྱུད་དགོངས་འདུས་ཕུར་པ་དང་། །ཁྲོ་ཆུ་འཇིགས་བྱེད་ཚེ་བདགེ་ལ་སོགས་པ། །ཡི་དམ་ཁྲོ་བོ་ཀུན་གྱི་ལས་གཞུང་བཏང་། །ཁྲོ་བོ་ཀུན་གྱི་གཏོར་བསྔོས་འདི་ལ་བྱ། །དངོས་གྲུབ་རྩ་བ་ཡི་དམ་གཏོར་མའོ། ༈ །བླ་མེད་ཀུན་གྱི་གསང་བའི་ཡུམ། །མཁའ་འགྲོའི་གཏོར་མ་བླ་མའི་གཡོན་དུ་བཤམས། །དེ་ཡང་དགོངས་འདུས་གཏོར་མའི་པྲ་ཁྲིད་ལས། །མཁའ་འགྲོའི་གཏོར་མའི་རིགས་ལ་བཅུ་གསུངས་ཀྱང་། །པད་མའི་རིགས་ལ་དབང་གི་གཏོར་མའི་དབྱིབས། །ཟླུམ་པོ་ཕྱེད་གཤག་ཟླ་གམ་ཅན། །གསུངས་ཕྱིར་མཁའ་འགྲོའི་གཏོར་མ་སྟོད་འདིར་བ། །ཟུར་གཉིས་བྱས་པས་ཟླ་གམ་དབྱིབས་སུ་གྲུབ། །མཁའ་འགྲོའི་གཙོ་བོ་ཕྲིན་ལས་དབང་གི་ལས། །ཡིན་ཕྱིར་གཏོར་མར་འབྲི་མོག་དམར་པོ་བྱུགས། །ལོགས་གཉིས་ཞི་བ་ཁྲོ་བོའི་གཏོར་མ་གཉིས། །པད་འདབ་རྩེ་རྣོ་ཟུར་གསུམ་དབྱིབས་ཅན་བཞི། །འཁོར་གྱི་རིགས་བཞི་མཁའ་འགྲོའི་ལས་འགྲུབ་རྟགས། །གཏོར་མའི་སྨད་ནི་ཟླུམ་པོ་དཀར་ཐིག་ཅན། །མཁའ་འགྲོ་སྤྱི་གཏོར་དེ་ལ་ཚང་བ་ཡིན། །མདུན་དུ་
མར་རྒྱན་པདྨ་ཆེན་པོའི་དབུས། །ཆོས་འབྱུང་ཟུར་དྲུག་ཕག་ཁྲོས་དཀྱིལ་འཁོར་ཚང་། །མར་སྐུད་འཐེན་པས་གཏོར་མ་ཕྱི་ནང་གཉིས། །ནང་ནི་ཡེ་ཤེས་ཕྱི་ནི་ལས་མཁའ་འགྲོ། །སྨད་ཆ་འཇིག་རྟེན་མཁའ་འགྲོའི་གཏོར་མ་ཚང་། །གཏོར་མའི་རྩེ་མོ་མུ་ཏིག་ཕྲེང་བས་བསྐོར། །ཕྲིན་ལས་མུ་ཏིག་ལྟར་རྒྱུན་འགྲུབ་པའི་བརྡའ། །དེ་སྟེང་གྲི་ཐོད་མཁའ་འགྲོའི་ཕྱག་མཚན་ཏེ། །ཕག་ཁྲོས་སེང་སོགས་མཁའ་འགྲོ་བསྒོམ་པའི་རྟེན། །དེ་སྟེང་ཟླ་བ་ཕྱེད་པས་བརྒྱན་པ་ནི། །མ་རིག་མུན་པ་རིམ་པར་སངས་བའི་རྟགས། །དེ་སྟེང་ཉི་མའི་དཀྱིལ་འཁོར་གསལ་བ་ནི། །ཟག་མེད་མངོན་ཤེས་རྟག་ཏུ་གསལ་བའི་རྟགས། །དེ་སྟེང་ནོར་བུ་སུམ་ཚོམ་བརྒྱན་པ་ནི། །རྩ་ཐིག་རླུང་གསུམ་འབྲས་བུ་ཐོབ་པའི་བརྡ། །དེ་རྒྱབ་མེ་དཔུང་འབར་བས་བསྐོར་བ་ནི། །ཕྲིན་ལས་རྣོ་མྱུར་མེ་ལྟར་ཚྭ་བའི་བརྡ། །གཡས་གཡོན་རྒྱབ་གསུམ་ཤ་དར་གསུམ་སྦྲེང་བ། །གནས་གསུམ་མཁའ་འགྲོའི་ཚོགས་རྣམས་མཆོད་པའི་བརྡ། །ཟུར་གཉིས་མར་རྒྱན་སྤུ་ཤེད་ཅན་གྱིས་བསྐོར། །འཇའ་དང་འོད་ཟེར་འཁྲུགས་པའི་ཀློང་བཞུགས་བརྡ། །མདུན་གྱི་མར་རྒྱན་རྟེན་གྱི་དཀྱིལ་འཁོར་ཚང་། །རྩེ་ཡི་མར་རྒྱན་བརྟེན་པའི་ལྷ་
རྣམས་ཚང་། །གཏོར་མ་དངོས་ཀྱི་ལྷ་གྲངས་གཏོར་མ་ཚང་། །ཕྲིན་ལས་རྩ་བ་མཁའ་འགྲོའི་གཏོར་མའོ། ༈ །དེ་ནས་དགོངས་འདུས་གཏོར་མའི་པྲ་ཁྲིད་ལས། །དམ་ཅན་ཆོས་སྐྱོང་གཏོར་མ་ནི། །སོ་སོའི་གཞུང་ནས་འབྱུང་གྱུར་ཀྱང་། །ཁྱད་པར་སྙིང་ལ་ཟུར་སྟོད་བཞིན། །རྔམ་པར་བྱ་སྟེ་ཕོ་མོའི་ཚད། །ཕོ་རྒྱུད་རྣམས་ལ་ཆེ་ཞིང་བརྗིད། །མོ་རྒྱུད་རྣམས་ལ་ཕྲ་ཞིང་རིང་། །སོ་སོར་བཤོས་ཕྲན་དངོས་འདྲ་བར། །མཐེབ་སྐྱུ་བཅད་ཁས་ཕྱིར་བསྟན་བསྐོར། །གསུངས་པའི་དོན་ནི་འདི་མན་ཆད། །ཆོས་སྐྱོང་གཏོར་མ་སྤྱི་ལ་སྟེ། །མཁའ་འགྲོའི་གཡོན་དུ་ཡི་དམ་ཆོས་སྐྱོང་གཉིས། །ཟུང་འཇུག་ཡིན་ཕྱིར་རྟ་མགྲིན་ནག་པོ་སྟེ། །ཟུར་གསུམ་འདིར་ཡོད་སྙིང་ལ་ཟུར་བཏོད་འདྲ། །ལོགས་གསུམ་རྟ་མགྲིན་ནཱ་ག་ཀླུ་འདུལ་དང་། །ལས་རིམ་བདུན་མ་རྟ་ནག་དྲེགས་པ་གསུམ། །ཟུར་གསུམ་ནཱ་ག་རཀ་གནོད་སྦྱིན་དམར། །འཁོར་གྱི་སྡེ་བརྒྱད་གཅིག་བརྩི་གཏོར་མ་ཚང་། །། གཙོ་འཁོར་བར་ནི་མར་རྒྱན་འཐེན་པས་བཅད། །མདུན་དུ་མར་རྒྱན་འདབ་བརྒྱད་ཆེན་པོ་ནི། །འཁོར་གྱི་སྡེ་བརྒྱད་བཞུགས་པའི་གདན་གྱི་ཚུལ། །དེ་དབུས་གྲུ་གསུམ་མཐིང་ནག་
པད་འདབ་བཞི། །རྟ་ནག་རིགས་གསུམ་དཀྱིལ་འཁོར་དེ་ལ་ཚང་། །དམར་ཆེན་གཏོར་མ་ཡིན་ཕྱིར་འབྲི་མོག་བྱུགས། །ཕྲིན་ལས་ངེས་མེད་སྣ་ཚོགས་འགྲུབ་པའི་ཕྱིར། །དཀར་ཐིག་ངེས་མེད་གར་ཡང་གདབ་པ་ཡིན། །ལས་མཁན་རིགས་གསུམ་རྣོ་མྱུར་མེ་དང་འདྲ། །དེ་ཕྱིར་ཟུར་གསུམ་མེ་རི་ཞིབ་པོས་བསྐོར། །མར་རྒྱན་རལ་གྲི་རྡོ་རྗེ་ཞགས་པ་ནི། །རྟ་ནག་རིགས་གསུམ་གང་ཡང་བསྒོམ་པའི་རྟེན། །དེ་རྒྱབ་མེ་རི་འབར་བས་བསྐོར་བ་ནི། །བྱིན་རླབས་ནུས་པ་མེ་ལྟར་འབར་བའི་རྟགས། །དབུས་དང་གཡས་གཡོན་ཤ་དར་གསུམ་ཆ་བཙུགས་པ། །གཙོ་དང་འཁོར་གྱི་ཕོ་རྒྱུད་མོ་རྒྱུད་མཉེས། །ངོ་བོ་ཡེ་ཤེས་རྣམ་པ་དམ་ཚིག་ལྷ། །ཕྲིན་ལས་འཇིག་རྟེན་པ་ལྟར་རྣོ་མྱུར་ལྡན། །རྟ་མགྲིན་ནག་པོ་སྒྲུབ་པའི་དཀྱིལ་འཁོར་ཚང་། །མཆོད་གཏོར་སྒྲུབ་གཏོར་ཐམས་ཅད་འདི་ཡིས་ཚང་། །རྩ་གསུམ་གཏོར་མ་མར་གྱུ་གྲལ་གྱི་མགོ །དེ་ནས་གཡས་གཡོན་གྲལ་གྱི་ཚུལ་དུ་སྟེ། །གཡོན་གྲལ་མགོ་དེར་རྟ་མགྲིན་ནག་པོ་ཡིན། ༈ །གཡས་གྲལ་མགོ་དེར་མ་མགོན་ལྕམ་དྲལ་ཏེ། །ཡབ་ཡུམ་སྦག་སྒྲུབ་བཀྲ་ཤིས་ཚན་ཆེའི་གནད། །སྲིད་པ་གཏེར་ཁྱིམ་སོགས་ལས་རྒྱ་ཆེར་
བཤད། །དེ་ཕྱིར་མ་མགོན་གཏོར་མ་གཅིག་ཏུ་བསྡུ། དབྱིབས་ནི་དབང་ཕྱུག་རྡོ་རྗེའི་ཞལ་ཁྲིད་ལྟར། །སྟོད་ཟུར་གསུམ་པ་འདིར་ཆེ་ཕྲག་པ་ཅན། །ལོགས་གསུམ་ཡེ་ཤེས་ལས་དང་འཇིག་རྟེན་གྱི། །མ་མགོན་རིགས་གསུམ་གཏོར་མ་ཚང་བ་ཡིན། །སྨད་ཆ་ཟླུམ་པོ་དཀར་ཐིག་མང་པོས་བརྒྱན། །དཀྱིལ་འཁོར་འཁོར་གྱི་གཏོར་མ་ཐམས་ཅད་ཚང་། །ཟུར་གསུམ་དཀྱིལ་འཁོར་ལྷ་གྲངས་མི་ཐེ་བའི། །ལས་མཁན་བཙན་བདུད་ཀླུ་གསུམ་གཏོར་མ་ཚང་། །ལྷ་དམག་བྱེ་བ་དུང་ཕྱུར་དཔུང་ཆེའི་ཕྱིར། །ཟུར་རྩེ་ཕྲག་པ་དཔུང་ཡི་པར་ལྡན་པའོ། །མགོན་པོ་དབང་ཕྱུག་ངོ་བོ་གཅིག་གསུངས་ཕྱིར། །གཏོར་མ་དབང་གི་ཁ་དོག་དམར་པོར་བྱུག །ལས་མཁན་མ་མགོན་གཏོར་མར་མི་བསྲེ་ཕྱིར། །མར་སྐུད་འཐེན་པས་ཟུར་གསུམ་ཕྱི་ལ་བཅད། །མཐུ་སྟོབས་གཟི་བརྗིད་མེ་ལྟར་འབར་བའི་ཕྱིར། །ཟུར་གསུམ་མེ་རི་ཕྲའུ་ཕྲེང་བས་བསྐོར། །མདུན་དུ་མར་རྒྱན་ཟུར་གསུམ་མཐིང་ནག་ནི། །མ་མགོན་ཡོངས་ཀྱི་དཀྱིལ་འཁོར་ཚང་བ་ཡིན། །དེ་ནང་པདྨ་འདབ་བརྒྱད་ཕྱི་ནང་གཉིས། །འཁོར་གྱི་ནག་པོ་ཡབ་ཡུམ་བཅུ་དྲུག་མཚོན། །མར་རྒྱན་དེ་ལ་སྒྲུབ་པའི་དཀྱིལ་འཁོར་ཚང་། །
དམར་ཐིག་ངེས་མེད་གར་ཡང་བཏབ་པ་ནི། །གློ་བུར་ཕྲིན་ལས་ངེས་མེད་གང་བརྩམ་འགྲུབ། །མར་རྒྱན་གྲི་ཐོད་མགོན་པོ་སྒོམ་པའི་རྟེན། །ཁཊཾ་ཕུར་བུ་མེ་ལོང་སྦྲུལ་ཞགས་ནི། །ལྷ་མོ་སྒོམ་པའི་རྟེན་ཏེ་སྒྲུབ་རྟེན་ཚང་། །དེ་རྒྱབ་མར་རྒྱན་མེ་རི་འབར་ཞིང་འཚུབ། །མེ་དཔུང་རླུང་འཚུབ་དབུས་སུ་བཞུགས་པའི་དོན། །དབུས་དང་གཡས་གཡོན་ཤ་དར་གསུམ་ཕྱིར་ནི། །ཡེ་ཤེས་ལས་དང་འཇིག་རྟེན་མ་མགོན་རྣམས། །ཤ་དང་ཁྲག་ལ་དགྱེས་ཕྱིར་མཆོད་པའི་རྫས། །འདི་ལ་བེར་ཡོད་ཟེར་ནག་སྐོར་གསུམ་དང་། །བེར་མེད་གྲི་ཐོད་འཛིན་པ་སྐོར་གསུམ་དང་། །ལྷ་མོ་སྐོར་གསུམ་ཀུན་ལ་བསྔོ་ཞིང་འབུལ། ༈ །ས་པཎ་ལ་སོགས་མཁས་པ་འགའ་ཞིག་གིས། །དཔལ་ཆེན་གཏོར་མ་ཟུར་གསུམ་རུ་ཏྲའི་སྙིང་། །ཞེས་པ་རྙིང་མའི་རྒྱུད་ལ་བཤད་མོད་ཀྱི། །གསར་མའི་རྒྱུད་ལ་གཏོར་མ་ཟུར་གསུམ་མེད། །གསུངས་ཕྱིར་གུར་མགོན་ལ་སོགས་ཟླུམ་གཏོར་དར། །འོན་ཀྱང་གསར་མའི་མགོན་པོ་ཕྱག་བཞི་པའི། །བྱ་རོག་སྲོག་ཟན་ནག་པོའི་རྒྱུད་ཆེན་ལས། །འབྲུ་ནག་མགོན་བཤོས་ཟུར་གསུམ་ལ། །ཐ་མ་མཐེབ་སྐྱུ་འབྲས་ཀྱིས་དགང་། །གསུངས་ཕྱིར་དུད་སོལ་མ་དང་ཕྱག་བཞི་
པ། །གཅིག་བསྡུས་གཏོར་མ་ཟུར་གསུམ་ལྷུན་ཆགས་པ། །ལྷ་མོ་ཁྲག་ལ་མཉེས་ཕྱིར་འབྱུང་བའི་ཁྲག །འབྲི་མོག་བྱུག་ལ་ཁྲག་གི་མདོག་ཏུ་བྱེད། །གཙོ་དང་འཁོར་གྱི་གཏོར་མ་མི་བསྲེ་ཕྱིར། །ཟུར་དང་ལོགས་ཀྱི་བར་དུ་མར་སྐུད་དང་། །རི་མོ་བྱས་པར་བར་མཚམས་བཅད་པར་བྱ། །མདུན་ལོགས་མགོན་པོ་གཡོན་ལོགས་དུད་སོལ་མ། །གཡས་ལོགས་ལས་མགོན་བྱ་རོག་གདོང་ཅན་ཡིན། །གཡས་ཟུར་ཡབ་འཁོར་གཙོ་བོ་ནག་པོ་སྟོང་། །གཡོན་ཟུར་ཡུམ་འཁོར་མ་མོ་བྱེ་བ་འབུམ། །རྒྱབ་ཟུར་དུར་ཁྲོད་བརྒྱད་ཀྱི་ཤ་ཟ་འབུམ། །ཟུར་གསུམ་མར་གྱིས་ཤན་ནས་བཤད་པ་དེ། །ནོར་ལྷ་གནོད་སྦྱིན་ཁྲི་དང་དཔལ་མགོན་སོགས། །དེ་དག་ཀུན་གྱི་གཏོར་མ་དེ་ཡིས་ཚང་། །གཏོར་མ་གཅིག་ལ་ལྷ་གྲངས་གཏོར་མ་ཀུན། །བརྩི་བ་འདི་འདྲ་གང་ནས་ཐོས་ཞེ་ན། །མཁས་པ་ཆེན་པོ་འབྲུག་པ་པད་དཀར་གྱིས། །གཏོར་མ་གཅིག་ལ་མགོན་མང་ཐམས་ཅད་ཀྱི། །གཏོར་མ་སོ་སོར་བརྩི་སྲོལ་འདུག་དང་མཚུངས། །མར་རྒྱན་ཕྲིན་ལས་བཞི་ཡི་དཀྱིལ་འཁོར་འདིར། །གཏོར་མའི་ལས་རྒྱུད་འགྲེལ་པ་རྟེན་གཏོར་དང་། །མདོས་གཏོར་ལ་སོགས་ཀུན་ནས་གསུངས་པ་
སྟེ། །རས་བྲིས་དཀྱིལ་འཁོར་བཤམས་སྲོལ་ཡོད་པ་ལྟར། །མ་མགོན་སྒྲུབ་རྟེན་དཀྱིལ་འཁོར་དོན་གྱིས་ཚང་། །མར་རྒྱན་ནང་དུ་ཡབ་ཡུམ་ཕྱག་མཚན་ནི། །མ་མགོན་བྱ་སེང་ཡུམ་གསུམ་བསྒོམ་པའི་རྟེན། །ཐ་མ་མེ་རིས་དཀྱུས་ནས་བསྐོར་བ་ནི། །བསྟན་པ་མེ་ལྟར་འབར་བའི་རྟེན་འབྲེལ་ལགས། །ཤ་དར་གསུམ་ནི་མ་མགོན་ཡབ་ཡུམ་དང་། །འཁོར་གྱི་ཕོ་རྒྱུད་མོ་རྒྱུད་མཆོད་པའི་རྫས། །འདི་ལ་ཕྱག་བཞི་པ་དང་བྱ་རོག་གདོང་། །རྩ་འཇིབ་མ་དང་དུད་སོལ་ལྷ་མོ་འདོན། །སྒྲུབ་པའི་རྟེན་ཡང་འདི་ཡིས་ཆོག་པ་ཡོད། ༈་།ཕྱག་དྲུག་པ་ལ་ཟུར་གསུམ་ལྷུན་ཆགས་པ། །ཟུར་དང་ལོགས་གཉིས་མར་སྐུད་རི་མོས་བཅད། །དམར་ཆེན་གཏོར་མ་ཡིན་ཕྱིར་འབྲི་མོག་བྱུག །མདུན་ལོགས་མྱུར་མཛད་མགོན་པོ་ཕྱག་དྲུག་པ། །གཡོན་ལོགས་དེ་ཡི་ཡུམ་ཆེན་རེ་མ་ཏི། །གཡས་ལོགས་དཀར་པོ་གཟི་ལྡན་ནོར་གྱི་ལྷ། །གཡས་ཟུར་ཀླུ་ཊ་པ་ལ་ལས་མཁན་ཆེ། །གཡོན་ཟུར་ཛི་ན་ཏཱཀྐི་ཏྲཀཱད་དོ། །རྒྱབ་ཟུར་དྲེགས་པ་ཕོ་མོ་ལྔ་བརྒྱ་སྟེ། །ཟུར་གསུམ་དཀར་གྱིས་བརྒྱན་ཅིང་བཤད་པ་ནི། །དཔལ་མགོན་བདུན་ཅུ་རྩ་ལྔ་དཀར་ལ་མཉེས། །མདུན་དུ་མར་རྒྱན་གྲུ་གསུམ་མཐིང་ནག་
དབུས། །པདྨ་འདབ་དྲུག་མགོན་པོའི་དཀྱིལ་འཁོར་ཚང་། །རྩེ་རུ་མགོན་པོའི་ཕྱག་མཚན་དྲུག་པོ་ནི། །མགོན་པོའི་ལྷ་བསྐྱེད་རྟེན་ཡིན་སྒྲུབ་རྫས་ཚང་། །མཐའ་སྐོར་མར་རྒྱན་མེ་དཔུང་འབར་བའི་ཚུལ། །ཐུགས་རྗེ་བྱིན་རླབས་མེ་ལྟར་འབར་བའི་རྟགས། །རྒྱབ་དང་གཡས་གཡོན་ཤ་དར་གསུམ་བཙུགས་པ། །མགོན་པོའི་ལས་མཁན་ཕོ་རྒྱུད་མོ་རྒྱུད་མཉེས། །འདི་ལ་ཁོ་རང་འཁོར་བཅས་མ་གཏོགས་པར། །གཞན་ལ་གཏོར་མ་བསྔོ་བར་མི་རུང་གསུངས། །ཤན་པ་ནག་མོ་རེ་ཏི་མཆེད་གསུམ་དང་། །དམག་ཟོར་མ་དང་དཔལ་ལྡན་རབ་བརྟེན་མ། །རེ་མ་ཏི་ཡི་རིགས་ཡིན་རུང་བ་སྟེ། །བ་ལམ་ཁྲི་སྨན་རྟག་སྨན་གསུམ་པོ་ནི། །རེ་མ་ཏི་ཡི་གཡོག་མོ་ཡིན་ཕྱིར་རུང་། །ཕྱག་དྲུག་དཀར་མཐིང་ཀེ་ཊ་རེ་མ་ཏི་། །གང་སྒྲུབ་གཏོར་མ་གཅིག་པོས་ཆོག་པ་ཡིན། ༈ །མ་ནིང་གཏོར་མ་ཟུར་གསུམ་སྙིང་འདྲ་བ། །ཁ་དོག་དམར་པོ་ནག་པོ་གང་ཡང་རུང་། །མདུན་ལོགས་མགོན་པོ་གཡོན་ལོགས་དཔལ་འབར་མ། །གཡས་ལོགས་སྲོག་བདུད་ཏྲཀཱད་དོན་གཅིག་ཡིན། །རྒྱབ་ཟུར་མ་ནིང་ཡང་འཁོར་བརྒྱད་པོ་སྟེ། །གཡས་ཟུར་བཀའ་སྲུང་ཕོ་རྒྱུད་ཐམས་ཅད་དང་། །
གཡོན་ཟུར་བཀའ་སྲུང་མོ་རྒྱུད་ཐམས་ཅད་དེ། །གཙོ་འཁོར་མཚམས་སུ་མར་སྐུད་འཐེན་པའམ། །ཡང་ན་རི་མོ་བྲིས་པས་བར་མཚམས་བཅད། །ཟུར་གསུམ་མར་གྱིས་ཤན་ཅིང་། བཤད་པ་ནི། །བཀའ་སྲུང་ཀླུ་སོགས་དཀར་ལ་དགྱེས་རྣམས་མཆོད། །མར་རྒྱན་གྲུ་གསུམ་མཐིང་ནག་སྦྱར་བའི་དབུས། །པདྨ་འདབ་གསུམ་སྒྲུབ་རྟེན་དཀྱིལ་འཁོར་ཚང་། །རྩེ་རུ་མར་རྒྱན་རུ་མཚོན་སྙིང་ཞགས་ནི། །མ་ནིང་རིགས་ལྔ་ལྷ་བསྐྱེད་བསྒོམ་རྟེན་ཚང་། །འདི་ལྟར་གཏོར་མ་ཟུར་གསུམ་ཕལ་ཆེར་ལ། །འོག་ཏུ་གཏོར་འདབ་མཐེབ་སྐྱུ་གསུམ་སྦྱར་བ། །བདག་དང་འགྲོ་བ་སེམས་ཅན་ཐམས་ཅད་ཀྱིས། །དུག་གསུམ་མཆོད་པ་ཕུལ་ནས་ཞལ་དུ་བསྟབ། །མཐར་ཐུག་སྐུ་གསུམ་འགྲུབ་པའི་རྟེན་འབྲེལ་མཚོན། །རྩེ་ཡི་ཕྱག་མཚན་རྒྱབ་ཀྱི་མེ་རི་ནི། །ཨོ་རྒྱན་བྱེ་བ་ཕྲག་བརྒྱའི་བསྟན་སྲུང་སྟེ། །མཐུ་སྟོབས་བསྐལ་པའི་མེ་ལྟར་འབར་བའི་རྟགས། །མ་ནིང་རིགས་ལྔ་སྲོག་བདུད་ཏྲཀཱད་སོགས། །གང་ལྟར་བསྒྲུབ་ཀྱང་གཏོར་མ་འདི་ཡིས་ཚང་། །བཀའ་སྲུང་གཏེར་སྲུང་ཀུན་གྱི་གཙོ་བོའི་ཕྱིར། །མ་མགོན་སྡེ་བརྒྱད་སྤུ་གྲི་གདོང་ལྷ་དང་། །དྲེགས་པ་བཅོ་བརྒྱད་སྡེ་དཔོན་སུམ་ཅུ་སོགས། །བཀའ་སྲུང་
ཐམས་ཅད་གཏོར་མ་འདི་ལ་བསྔོ། །གསར་མ་ཁ་རྐྱང་བྱེད་པའི་ལུགས་ལ་ནི། །ཕྱག་བཞི་ཕྱག་དྲུག་གུར་དང་རྣམ་སྲས་བཞི། །མགོན་ཆེན་སྡེ་བཞི་ཡིན་པར་རྩི་ན་ཡང་། །ན་བཟའ་ཡོད་མེད་ཁྱད་ཙམ་མ་གཏོགས་པར། །གུར་དང་བེར་ནག་ཅན་དང་ལེགས་ལྡན་དང་། །མགོན་པོ་ཚོགས་བདག་གྲི་གུག་ཨ་གྷོ་ར། དེ་རྣམས་གཅིག་པར་རྒྱུད་གཞུང་རྣམས་ནས་གསལ། །དེ་ཕྱིར་བེར་ནག་ཅན་དང་ཕྱག་བཞི་དྲུག །མ་ནིང་བཞི་པོ་མགོན་ཆེན་སྡེ་བཞི་ཡིན། །དེ་དོན་གསར་རྙིང་ཕྱོགས་མེད་རྒྱུད་རྣམས་གསལ། ༈ །ཞིང་སྐྱོང་གཏོར་མ་ཟུར་གསུམ་དབལ་དགུ་པ། །ཞྭ་དམར་ན་རིམ་རྣམས་ཀྱི་ཕྱག་ལེན་ཡིན། །དམར་གཏོར་ཡིན་ཕྱིར་འབྲི་མོག་བྱུག་པར་བྱ། །ལོགས་གསུམ་དབལ་གྱི་སྙིང་པོ་གསུམ་པོ་ནི། །མདུན་ནི་ཞིང་སྐྱོང་ནག་པོ་སེང་གེའི་གདོང་། །གཡས་ནི་ཞིང་སྐྱོང་དཀར་པོ་སེང་གདོང་སྟེ། །གཡོན་ནི་ཡུམ་མཆོག་སི་ན་ར་མ་ཡིན། །མདུན་གྱི་ཟུར་ནི་བར་པ་གཏོར་མའི་ཚུལ། །ཡབ་ཀྱི་ལས་མཁན་བམ་རོ་ཕོ་ཡིན་ལ། །གཡོན་གྱི་དབལ་ནི་བར་མ་གཏོར་མའི་ཚུལ། །ཡུམ་གྱི་ལས་མཁན་བམ་རོ་མོ་ཡིན་ཏེ། །གཡས་ཀྱི་དབལ་ནི་བར་མ་གཏོར་མའི་
ཚུལ། །གཡོན་ཟུར་གཉིས་པོ་བམ་རོ་དཀར་པོ་གཉིས། །ཟུར་གསུམ་འཁོར་གྱི་གཏོར་མ་ཚང་བ་སྟེ། །གཡས་ཟུར་བྱེ་བ་གུང་རིང་འཆར་ཀ་ཡིན། །རྒྱབ་ཟུར་གནམ་ལྷ་ལ་སོགས་འཁོར་དྲུག་ཡིན། །ཟུར་གསུམ་མར་གྱིས་བྱུག་ཅིང་སེན་མོས་བཤད། །འཁོར་གྱི་འཇིག་རྟེན་སྐྱོང་ཀུན་དཀར་ལ་དགྱེས། །མདུན་དུ་མར་རྒྱན་གྲུ་གསུམ་མཐིང་ནག་དབུས། །པདྨ་འདབ་བརྒྱད་སྒྲུབ་པའི་དཀྱིལ་འཁོར་ཚང་། །རྩེ་ཡི་མར་རྒྱན་ཁཊ་གཡབ་དར་དང་། །གློ་བ་སྙིང་བཅས་ཡབ་ཡུམ་སྒོམ་པའི་རྟེན། །དྲག་གཏུམ་མེ་ལྟར་འབར་ཕྱིར་མེ་རིས་བསྐོར། །ཤ་ཟ་སེང་གདོང་འཁོར་བཅས་ཤ་ལ་དགྱེས། །དེ་ཕྱིར་ཤ་དར་གསུམ་ནི་ཕྱུར་བ་ཡིན། །ཞིང་སྐྱོང་དཀར་ནག་འཆར་ཀ་བེག་རྩེ་དང་། །ཆོས་རྒྱལ་བཅས་པ་གཏོར་མ་འདི་ལ་འདོན།གསུམ་པོ་ཞིང་སྐྱོང་འཁོར་ནི་ཡིན་ཕྱིར་རོ། ༈ །སྲིན་མགོན་གཏོར་མ་ཟུར་གསུམ་ཅུང་ཞིག་ཕྲ། །གཡས་གཡོན་གཉིས་སུ་ཆུང་ངུ་གཉིས་སྦྱར་ཏེ། །ལོགས་གསུམ་སྲིན་མགོན་དབང་ཕྱུག་ཞལ་བཞི་པ། །ཟུར་གསུམ་དེ་དག་ཀུན་གྱི་འཁོར་རྣམས་ཡིན། །གཏོར་ཆུང་གཡོན་ནི་ཡུམ་ཡིན་གཡས་པ་ནི། །སྲིང་མོ་སྲིན་མོ་བྱེ་བའི་གཏོར་མ་སྟེ། །སུམ་ཚོན་
བཅས་པ་གཞུང་དང་ཕྱག་ལེན་མཐུན། །གུར་ལ་མགོན་ཆེན་ཞལ་ལ་མགོན་ཆུང་ཟེར། །མགོན་ཆུང་ཡིན་ཕྱིར་ཅུང་ཟད་ཕྲ་ལ་སྐེམ། །མར་རྒྱན་གྲུ་གསུམ་དབུས་སུ་འདབ་བརྒྱད་ནི། །སྒྲུབ་རྟེན་དཀྱིལ་འཁོར་དོན་གྱིས་ཚང་བ་ཡིན། །མར་རྒྱན་ཡབ་ཡུམ་ཕྱག་མཚན་བསྒོམ་པའི་རྟེན། །སྲིན་མགོན་ཤ་ལ་དགྱེས་ཕྱིར་ཤ་དར་གསུམ། །མགོན་པོ་ཞལ་འདི་རྣོ་མྱུར་མེ་དང་འདྲ། །དེ་ཕྱིར་མར་རྒྱན་མེ་རི་བྱས་པ་ཡིན། །ཞལ་དང་སྲིན་མགོན་དབང་ཕྱུག་དོན་གཅིག་སྟེ། །འབྱུང་པོ་དབང་ལྡན་མུ་སྟེགས་དབང་ཕྱུག་ཡིན། །དེ་ཕྱིར་མགོན་པོའི་ནང་ནས་འདི་རྣོ་སྐད། ༈ །དེ་ནས་བྲག་མགོན་མདུང་འཛིན་གཏོར་མ་ནི། །མགོན་ཆུང་ཡིན་ཕྱིར་ཕྲ་ལ་ཅུང་ཟད་ཆུང་། །ལོགས་གསུམ་བྲག་མགོན་མདུང་འཛིན་མོན་པ་གསུམ། །ཟུར་གསུམ་འཁོར་དང་ཡང་འཁོར་སྤྲུལ་པ་རྣམས། །བར་མཚམས་མར་རྒྱུན་ནམ་ནི་རི་མོས་བཅད། །མདུན་དུ་མར་རྒྱན་གྲུ་གསུམ་མཐིང་ནག་དབུས། །པདྨ་འདབ་བཞི་བསྒྲུབ་པའི་དཀྱིལ་འཁོར་ཚང་། །རྩེ་ལ་མར་རྒྱན་ཁཊཾ་མདུང་དར་གཉིས། །བྲག་མགོན་མདུང་འཛིན་གཉིས་པོ་སྒོམ་པའི་རྟེན། །མཐུ་རྩལ་མེ་བས་ཚ་ཕྱིར་མེ་དཔུང་བསྐོར། །
མགོན་པོ་དཔུང་གཉིས་ལས་མཁན་མོན་པ་གསུམ། །མཆོད་ཕྱིར་ཤ་དར་གསུམ་ནི་ཕྱུར་བ་ཡིན། །དེ་ཡིས་གཡས་གྲལ་གཏོར་མ་བདུན་པོ་ཚང་། ༈ །གཡོན་གྲལ་གཉིས་ལ་སྔགས་སྲུང་ཕྲ་ཞིང་ལྡེམ། །ལོགས་གསུམ་སྔགས་སྲུང་སྲོག་སྒྲུབ་ཁ་མོ་ཆེ། །ཟུར་གསུམ་སྤྱང་ཞོན་མཆེད་གསུམ་གཏོར་མ་ཚང་། །མར་རྒྱན་མེ་རིའི་དབུས་སུ་ཞིང་དབྱུག་ནི། །སྔགས་ཀྱི་སྲུང་མ་བསྒོམ་པའི་རྟེན་ཡིན་ལ། །མ་མོ་མཁའ་འགྲོ་ཤ་དང་ཁྲག་ལ་དགྱེས། །དེ་ཕྱིར་གཏོར་མ་ཁྲག་མདོག་ཤ་དར་ཕྱིར། །རྫོགས་ཆེན་བཀའ་སྲུང་གཙོ་བོ་འདི་ཡིན་ཕྱིར། །གལ་ཆེན་བྱེད་ན་གཏོར་མ་གུད་དུ་བཅའ། ༈ །བཙན་གྱི་གཏོར་མ་ཕུར་རྩེ་གྱེན་བསླང་བཞིན། །བཙན་གྱི་རང་མདོག་ཁ་དོག་དམར་པོ་སྟེ། །རྣོ་མྱུར་ཤིན་ཏུ་ཆེ་ཕྱིར་ཟུར་ཀྱང་ནོ། །མར་རྒྱན་པདྨ་འདབ་གསུམ་ཆོས་འབྱུང་དབྱིབས། །དེ་ལ་བཙན་སྒྲུབ་མཎྜལ་ཚང་བ་ཡིན། །རྩེ་མོར་མདུང་དམར་མེ་འབར་བསྒོམ་པའི་རྟེན། །བཙན་རྒོད་འབར་བ་ཇག་མེ་སྤྱག་བཙན་གསུམ། །མཆོད་ཕྱིར་ཤ་དར་གསུམ་ནི་ཕྱུར་བ་ཡིན། །དགོངས་འདུས་བཀའ་སྲུང་གཙོ་བོ་འདི་ཡིན་ཕྱིར། །གཏོར་མ་གུད་དུ་བཅའ་བ་དེ་ཡི་དོན། །མི་རྟ་བཙན་གསུམ་ཁ་མོ་ཆེ་དང་
བཞི། །དགོངས་འདུས་འདོན་ཡོང་ཕུག་གཏོར་འདི་གས་ཆོག ༈ །འདི་མན་དཀར་གཏོར་རིགས་ལྔ་འདི་དག་ལ། །སྨན་སྒྲུབ་བདུད་རྩི་རིལ་བུ་བསྲེ་མི་རུང་། །ཆང་ནི་བསྲེས་ཀྱང་འགལ་བ་མེད་པ་སྟེ། །ཀླུ་སྨན་ཕྱེ་མ་འོ་མ་ཅུང་ཙམ་བསྲེ། །ཐུད་སོགས་དཀར་གསུམ་ལ་ནི་བཅས་ཀྱང་ལེགས། །ཆང་ནི་བསྲེས་ཀྱང་རུང་ལ་མ་བསྲེས་ཀྱང་རུང་། ༈ །སྔགས་བདག་གཏོར་མ་ཟུར་གཉིས་འཁྱིལ་པ་སྟེ། །འཁྱིལ་པའི་ནང་དུ་རིལ་བུ་གཉིས་དང་ནི། །དབུས་ཀྱི་འབུར་དང་གསུམ་པོ་ནོར་བུའི་དབྱིབས། །སྔགས་བདག་འཛམ་སེར་གཅིག་གསུང་ནོར་ལྷའི་རིགས། །མདུན་ལོགས་སྔགས་བདག་རྒྱབ་ལོགས་མི་མགོན་དཀར། །སྨད་ནི་ཟླུམ་པོ་འཁོར་གྱི་ཀླུ་ས་བདག །འདབ་མ་བརྒྱད་སྦྱར་ཀླུ་ཆེན་བརྒྱད་ཡིན་ཏེ། །པདྨ་འདབ་བརྒྱད་ཀླུ་ཡི་དཀྱིལ་འཁོར་ཚང་། ༈ །འདི་མིན་དཀར་གཏོར་བཞི་པོ་ཐམས་ཅད་དང་། །མར་རྒྱན་གསུམ་རེ་བཙུགས་པ་མཚོན་བྱ་མེད། །སྒར་ཆེན་འཛམ་གླིང་རྒྱན་པའི་ཕྱག་ལེན་ལགས། ༈ །ཚེ་རིང་མ་ཡི་གཏོར་མ་ལྡེམ་ཞིང་ཕྲ། །ལྔ་ཀ་རྩ་བ་ཟླུམ་པོ་སྔོ་འམ་ལྗང་། །སྤང་ལྗོངས་སྐྱེད་མོས་ཚལ་རྣམས་མཚོན་པ་ཡིན། །རྩེ་མོ་
ལྔ་པོ་དཀར་གཏོར་གངས་རིའི་ཚུལ། །ཤར་ནི་ཟླུམ་པོ་ལྷོ་ནི་འབྲང་རྒྱས་དབྱིབས། །ནུབ་ནི་བོང་བུའི་རྨིག་པ་འདྲ་བ་སྟེ། །བྱང་ནི་བྱ་ཡི་མཆུ་འདྲ་བྱ་མཆུ་མ། །རི་ཡི་དབྱིབས་ལ་དེ་ཤུལྟར་ཡོད་དོ་སྐད། །སྐད་པ་དུང་གི་ཕྲེང་བས་ལེགས་པར་དཀྲིས། །རྩེ་ནི་གངས་རི་ཟུར་གསུམ་མདུན་དུ་བསྒྱུར། །དེ་ལ་ན་བུན་མཚོན་ཕྱིར་སྤྲིན་རིས་བྲི། །སྔོན་ཚེ་ཤ་ཟ་སྤྱན་ལྔ་ཡིན་པ་ལ། །ད་ལྟ་དམན་མོའི་འཁོར་ཚོགས་ཤ་ལ་དགྱེས། །དེ་ཕྱིར་ཤ་དར་གསུམ་ནི་ཕྱུར་བ་ཡིན། །ཚེ་རིང་མ་ཡི་ཡབ་ནི་ཚོགས་བདག་སྟེ། །མཁའ་རི་ལྕམ་དྲལ་ཀོང་བཙུན་དེ་མོ་ཚུདང་། །ཀུན་འཁྱིལ་མཆེད་གསུམ་ཕག་གདོང་མཆེད་ལྔ་དང་། །བརྟན་མ་བཅུ་གཉིས་རིགས་མཐུན་འདི་ལ་བསྔོ། །མི་ལའི་ཆོས་བརྒྱུད་ཇོ་བོའི་ཆོས་བརྒྱུད་ཀྱི། །བཀའ་སྲུང་ཡིན་ཕྱིར་གཏོར་མ་གུད་དུ་བཅའ། ༈ །མཁར་ནག་གཏོར་མ་ཀླུ་མཁར་སྔོན་པོའི་དབྱིབས། །དཀར་ཕྱོགས་ཡིན་ཕྱིར་དེ་སྟེང་དཀར་གཏོར་བཞག །ངོ་བོ་ཀླུ་རིགས་ཡིན་ཕྱིར་སྦྲུལ་ནག་དཀྲིས། །པད་འདབ་རྣམས་ནི་ཀླུ་ཡིན་མཚོ་སྨན་མཚོ། །ཐང་ལྷ་སྨྱོ་ཁ་མཁར་ནག་ངོ་བོ་གཅིག །ཀླུ་བདུད་མཚོ་སྨན་ཚོགས་ཀུན་དེ་ཡི་འཁོར། །ཀཾ་ཚང་བསྟན་སྲུང་ཡིན་ཕྱིར་
གུད་དུ་བཅའ། ༈ །ངོམ་རྒྱལ་གཏོར་མ་ཡུལ་ལྷའི་དཀར་གཏོར་དབྱིབས། །ཡུལ་ལྷ་ཅུང་ཞིག་རྩུབ་ན་སྡེ་དར་ཕྱིར། །ཟུར་གསུམ་དབྱིབས་བྱས་ཤ་དར་གསུམ་གྱིས་བརྒྱན། །ཉི་ཟླ་ནོར་བུས་མཚོན་པ་དགེ་ལེགས་འབྱུང་། །ལོགས་གསུམ་ངོམ་རྒྱལ་སྤོམ་ར་གཏམ་རྒྱལ་གསུམ། །ཟུར་གསུམ་སྨོན་སྐྱེས་གངས་བཞུར་མཆེད་གསུམ་སྟེ། །སྟོད་ཆ་གཙོ་བོ་སྨད་ཆ་འཁོར་ལ་བསྔོའོ། ༈ །ཕྱི་རྒྱུད་གཏོར་མ་དཀར་གཏོར་ཟླུམ་པོ་གཅིག །པད་འདབ་བརྒྱད་སྦྱར་ཕྱི་ཡི་སྡེ་བརྒྱད་ཡིན། །སྟོད་ཆ་ས་ཡི་ལྷ་མོ་རྒྱལ་ཆེན་བཞི། །སྨད་ཆ་སྟོང་གསུམ་གཞི་བདག་ཐམས་ཅད་ཡིན། །དེ་ལྟར་གཡོན་གྲལ་གཏོར་མ་བརྒྱད་དང་ནི། །བསྡོམས་པས་བཅོ་བརྒྱད་རྟག་གཏོར་ཕུག་གཏོར་ཚང་། །འདི་དག་རྣམས་ལ་ཆོས་རྗེ་མཁར་དྲུང་ལུགས། །སོ་སོའི་མཐུན་རྫས་བསྐང་འབྲས་བཙུགས་སྲོལ་དར། །བསྐང་བ་ལོགས་སུ་ཡོད་ཕྱིར་དེ་མི་དགོས། ༈ །གཏོར་མའི་མར་རྒྱན་ལ་སོགས་མཚོན་བྱ་ཉིད། །གཞུང་ནས་བཤད་པའི་མཐོང་ཐོས་མ་མཆིས་ཀྱང་། །བློ་གསལ་སློབ་མ་ཐབས་མཁས་ཞེས་བྱ་བས། །མཚོན་བྱ་བློ་ནས་གསར་དུ་བརྩམས་དགོས་ཟེར། །འཕྲལ་དུ་ཉམས་ལ་གང་ཤར་
བྲིས་པ་སྟེ། །རྣལ་འབྱོར་ཉམས་ལ་ཅི་ཡང་འཆར་བའི་ཕྱིར། །མཁྱེན་ལྡན་རྣམས་ཀྱིས་ཐུགས་ཁྲེལ་མི་གནང་ཞུ། །སྣང་བ་བརྡ་ཡི་བླ་མ་མ་མཇལ་བས། །བརྡ་དོན་འཕྲོད་དམ་མ་འཕྲོད་ཆ་མ་མཆིས། །འོན་ཀྱང་གསར་བུ་རྣམས་ལ་ཕན་ཕྱིར་བྲིས། ༈ །ཕུག་གཏོར་མཐའ་ཡི་གཡས་གཡོན་གར་བདེ་རུ། །བསྐང་བ་གསོལ་ཁའི་གཏོར་མ་གཉིས་པོ་བཞག་གྲུབ་ཆེན་ཀརྨ་པཀྵིའི་གསུངས་ལས་ཀྱང་། །མདོས་དང་མཎྜལ་བསྐང་བ་དོན་གཅིག་གསུངས། །བསྐང་གཏོར་རི་རབ་བང་རིམ་བཞི་པའི་སྟེང་། །ཞི་རྒྱས་དབང་དྲག་ཕྲིན་ལས་གང་ཟློབསྒྲུབ་པའི། །གཏོར་མ་བཅའ་བར་ཡོངས་སུ་གྲགས་ན་ཡང་། །ཉམས་ཆག་སྡིག་སྒྲིབ་ཞི་ཕྱིར་གཙོ་ཆེ་བས། །གཏོར་མ་ཟླུམ་པོར་བཅའ་བ་ལེགས་པ་ཡིན། །པད་འདབ་གྲུབ་ན་ལེགས་ཀྱིས་མེད་ཀྱང་ཆོག །ཕྲིན་ལས་བཞི་ཀ་ཞོར་ལ་འགྲུབ་པའི་ཕྱིར། །མར་རྒྱན་ལས་བཞིའི་གཟུགས་ཀྱི་དབྱིབས་ཅན་བྱ། །ཉམས་དང་རྟོགས་པ་ཅི་ཡང་འཆར་བའི་ཕྱིར། །གཏོར་མའི་རྩེ་ལ་མུ་ཏིག་སྐར་ལྟར་བཀྲ། །མ་རིག་མུན་པ་སེལ་ཕྱིར་ཟླ་བ་དང་། །ཉམས་དང་རྟོགས་པ་གསལ་ཕྱིར་ཉི་མ་དང་། །དགོས་འདོད་ལྷུན་གྱིས་འགྲུབ་ཕྱིར་ནོར་བུས་
བརྒྱན། །ཉམས་ཆག་སྡིག་སྒྲིབ་བསྲེགས་ཕྱིར་མེ་རི་འབར། །རླུང་སེམས་དབང་དུ་འདུ་ཕྱིར་གཏོར་མདོག་དམར། །རི་རབ་ཕྱོགས་མདོག་གྲུབ་ན་ལེགས་པ་སྟེ། སྣང་བ་དབང་དུ་འདུ་ཕྱིར་དམར་པོ་རུང་། །རྩེ་རུ་བཀྲ་ཤིས་རྟགས་བརྒྱད་རྒྱལ་སྲིད་བདུན། །དེ་འོག་བྱ་རིགས་དེ་འོག་གཅན་གཟན་དང་། །དེ་འོག་རི་དྭགས་དེ་འོག་གཡུང་དྭགས་དང་། །དེ་འོག་ཆུ་གནས་བར་མཚམས་ངེས་མེད་དུ། །མཆོད་པའི་ལྷ་མོའི་ཕྱག་མཚན་སྣ་ཚོགས་བཙུགས། །བྱ་ནག་རྟ་ནག་གཡག་ནག་ལུག་ནག་དང་། །ཁྱི་ནག་རྣམས་ནི་ཟན་ནག་པར་བཏབ་སྟེ། །བཅུ་གསུམ་དགུའམ་བདུན་སོགས་ཅི་འབྱོར་བཙུགས། །ཕྱོགས་གསུམ་མམ་ནི་ཟུར་བཞི་གང་རུང་དུ། །ཤ་དར་ཕྱར་བས་ལྷ་སྲིན་ཤ་ལ་མཉེས། །བསྐང་འབྲས་ཐམས་ཅད་ནང་དུ་ཁ་སྟོན་པ། །བསྐང་ཐབས་ཡིན་ཕྱིར་ཕྱོགས་མཚམས་ཕྱིར་བསྟན་པ། །བཟློག་ཐབས་དམག་ཐབས་ཞེས་ནི་བྱ་བ་དང་། །གནོད་བྱེད་ཕྱོགས་སུ་ཕྱོགས་གཅིག་ཁ་སྟོན་པ། །ཇག་ཐབས་ཡིན་ཞིང་ཀུན་གྱིས་སྨྲ་ན་ཡང་། །བསྐང་བ་ཡིན་ཕྱིར་བསྐང་ཐབས་གཙོ་ཆེ་ཞིང་། །བསྐང་ཐབས་ནང་དུ་ཁ་བསྟན་ཟེར་བའི་དོན། །དབུས་ཀྱི་མར་རྒྱན་ཉིད་
ལ་ཁ་བསྟན་པར། །བྱེད་མཁན་མང་ཡང་དེ་ནི་མ་ཡིན་ནོ། །བདག་དང་ཕུག་གཏོར་རྩེ་གཉིས་ལྷར་བསྐྱེད་པས། །དེ་ལ་བསྐང་བ་ཀུན་གྱིས་ཁ་སྟོན་ནས། །ཕུག་གཏོར་གཡས་ཟུར་ངོས་ནས་ཚུར་བཤམས་ལེགས། །སྒར་ཆེན་ལུགས་ལ་བསྐང་འབྲས་མི་དར་བས། །གདན་ས་རྣམས་དང་འཕྲལ་ཉིད་དེ་རུ་ཡང་། །སྤྱན་གཟིགས་དཔག་མེད་བཤམས་ནས་ཡོད་པའི་དོན། །བསྐང་འབྲས་ཞལ་ཐང་བཤམས་རྒྱུ་ཡོད་ན་ནི། །བསྐང་འབྲས་མ་བཙུགས་ན་ཡང་ཆོག་པ་ཡིན། །ལ་ལས་བསྐང་འབྲས་ཙཀ་ལི་བཙུགས་སྲོལ་ཡོད། །ལྷ་མོ་རྫས་ལ་དགའ་བས་རྫ་ས་དགའ་མ། །དམིགས་པ་བསྒོམ་པ་ཁོ་ནས་མི་ཆོག་སྟེ། །དངོས་སུ་རབ་ཡིན་མེད་ཀྱང་གཟུགས་བརྙན་ཙམ། །མེད་ཐབས་མེད་པ་ལྷ་མོའི་རྒྱུད་ནས་གསུངས། །གྲུབ་ཐོབ་ཨོ་རྒྱན་པ་ཡི་ཞལ་ནས་ཀྱང་། །དམ་སེལ་མིན་པའི་དགྲ་ཡིས་མི་ཐུབ་གསུངས། །དམ་ཚིག་ཕྲ་ཞིབ་སྲུང་རྒྱུ་མང་བའི་ཕྱིར། །དམ་སེལ་ཆག་ཉམས་ནམ་བྱུང་ཆ་མེད་པས། །བསྐང་བ་འདི་ལ་འབད་པར་མན་ངག་ཡིན། །རྒྱས་པར་བསྐང་བའི་རྒྱུད་དང་བསྐྱེད་ཆོག་དང་། །བསྐང་ཆེན་བཞི་པོ་ལོ་རེ་ཚར་རེ་འདོན། །གསར་མ་ཁ་རྐྱང་བྱེད་པའི་ལུགས་ལ་ནི། །པཀྴིའི་
གསར་བསྐང་རྡོ་རྗེའི་ཕྲེང་བ་དང་། །རྙིང་བསྐང་བཀྲ་ཤིས་སྒོ་མང་རྒྱས་པ་དང་། །བདེ་མགོན་རིན་ཕྲེང་བསྐང་ཆེན་བཞི་ལ་བརྩི། །གསར་རྙིང་གཉིས་ཀ་བྱེད་པའི་ལུགས་ལ་ནི། །བཀའ་བརྒྱད་མདངས་བསྐང་དགོངས་འདུས་མདངས་བསྐང་གཉིས། །བདེ་མགོན་རིན་ཕྲེང་གཉིས་དང་བསྐང་ཆེན་བཞི། །ཞི་དྲག་མ་ནིང་མ་མོའི་འཁྲུགས་བསྐང་སོགས། །ལུང་རྒྱུན་ཡོད་ཚད་བསྐང་བ་ཐམས་ཅད་འདོན། །བསྡུ་ན་བསྐང་སྤུང་ཉིད་ལ་ཐམས་ཅད་ཚང་། །དེ་ནི་དགུ་གཏོར་ནམ་བྱེད་དུས་སུ་འདོན། །རྒྱུན་དུ་གསར་རྙིང་བསྐང་ཐུང་ཆག་མེད་འདོན། ༈ །ཆོས་སྐྱོང་རིགས་ནི་འགའ་ལ་གསོལ་ཁ་འབྱུང་། །བེར་ནག་ཅན་ལ་གསོལ་ཁ་གྲགས་ཆེ་ཞིང་། །དེ་ལ་གཏོར་མ་གཙོ་འཁོར་བཅུ་གསུམ་དང་། །འོན་ཀྱང་གཏོར་ཆེན་གཅིག་གིས་ཆོག་པ་འདི། །སྒར་ཆེན་འཛམ་གླིང་རྒྱན་པའི་ཕྱག་ལེན་ཡིན། །གཏོར་མདོག་དམར་པོ་འབྲི་མོག་གང་ཡང་རུང་། །མགོན་གཏོར་ཡིན་ཕྱིར་དམར་ནག་བྱ་བ་ལེགས། །མགོན་པོའི་གཏོར་མའི་ལས་རྒྱུད་ཆེན་པོ་ནས། །གཏོར་གདན་ལས་བཞི་དེ་ལ་གསུངས་བའི་དོན། །མར་རྒྱན་ཉིད་ལ་བྱས་པས་འཐུས་པ་ཡིན། །དགོས་ཆེད་ཕྲིན་ལས་
ཀ་འགྲུབ་པའི་དོན། །ཕྱི་ནང་མེ་རི་མར་རྒྱན་ལ་སོགས་པ། །མཚོན་བྱ་མེད་དེ་རྔམས་བརྗིད་ཆེ་ཕྱིར་ཡིན། །གསོལ་ཁ་ལྷ་ཡི་གཟི་བརྗིད་བསྐྱེད་ཕྱིར་ཡིན། །འདོན་བྱ་གསོལ་སྤུང་འདོན་པས་འཐུས་མོད་ཀྱི། །མ་ནིང་བཅོལ་གཏམ་ཤན་པའི་བཅོལ་གཏམ་སོགས། །འདོན་ན་འདི་ལ་འདོན་པས་ཆོག་པ་ཡིན། །སྒར་པས་དམ་ཅན་གསོལ་ཁ་འདིར་འདོན་ཏེ། །གཏོར་མ་འདི་ལ་བསྔོ་བ་མ་ཡིན་ནོ། །རྒྱུན་དུ་བསྟན་སྲུང་མཐར་ཐུག་མ་ཙམ་འདོན། །དེ་ཡི་སྟེང་གི་ཕུག་གཏོར་གྲྭ་ཚར་རྫོགས། ༈ །དེ་ནས་དེ་འོག་ལྡིང་ཁྲི་བར་མ་ལ། །ནོར་ལྷའི་རིགས་རྣམས་ཕྱོགས་གཅིག་བསྒྲིག་པའི་དོན། །ནོར་ལྷའི་གཏོར་མ་ཕྱི་མི་ལ་མི་བྱིན། །བྱ་ཁྱི་ཝ་དང་བོང་བུར་བྱིན་པ་ན། །དངོས་གྲུབ་ཡལ་བར་གསུངས་ཕྱིར་ལོགས་སུ་བཅའ། །དེ་ཡང་མགོན་དཀར་དུར་ཁྲོད་བདག་པོ་ནི། །བདེ་མཆོག་སྤྲུལ་པ་བདེ་མཆོག་རྒྱུད་དུ་གཏོགས། །མགོན་པོ་ཡིན་ཕྱིར་གྲལ་ཡང་མཐོ་བ་ཡིན། །སྟོད་ཟུར་གསུམ་པོ་ཡི་དམ་གཏོར་མ་འདྲ། །ཕྲ་ཞིང་གཡོན་ནས་ཡུམ་གཏོར་ཟུར་གསུམ་སྦྱར། །དེ་ནི་སྔར་གྱི་ཕྱག་ལེན་རྙིང་པ་ཡིན། །གཡས་ནས་ཟུར་གསུམ་ཕྲའུ་གཉིས་སྦྱར་བ། །དུར་ཁྲོད་བདག་མོ་
ངན་ནེ་མ་ཡིན་ཕྱིར། །རྒྱུན་དུ་ཞི་སྒྲུབ་ཡིན་ཕྱིར་ཤ་མི་སྦྱར། །མར་རྒྱན་ཟུར་བརྒྱད་ནོར་བུའི་མཚོན་པ་ནི། །མགོན་དཀར་སྒྲུབ་པའི་དཀྱིལ་འཁོར་ཚང་བ་ཡིན། །རྩེ་རུ་དབྱུག་པ་ཐོད་ཁྲག་ལྷ་བསྐྱེད་རྟེན། །རྩེ་ཡི་མེ་རི་ཟུར་གསུམ་མེ་རིའི་ཚུལ། །མེ་བས་ཚ་ཞིང་གློག་བས་མྱུར་བའི་བརྡ། །ཡབ་དང་ཡུམ་དང་འཁོར་གྱི་ཤ་ཟ་རྣམས།། །མཆོད་ཕྱིར་ཤ་དར་གསུམ་ནི་ཕྱུར་བ་ཡིན། །རི་ཁྲོད་འདུག་གམ་ཕྱོགས་སུ་འགྲོ་བ་ཡིན། །སྙིགས་དུས་ཇག་རྐུན་གནོད་པ་རླུང་ལྟར་འཚུབ། །དེ་ཕྱིར་འདི་ཉིད་གེལ་དུ་བཅའ་དགོས་བྱུང་། ༈ །དེ་ཕྱིར་ནོར་ལྷ་སྤྱི་ཡི་གཏོར་མ་ནི། །ཟླུམ་པོའི་སྟེང་དུ་ཟུར་གཉིས་ནོར་བུའི་དབྱིབས། །དེ་ཉིད་པད་འདབ་བརྒྱད་ཀྱིས་བསྐོར་བར་བྱ། །དབང་སྡུད་ཡིན་ཕྱིར་མདོག་ནི་དམར་པོ་བྱ། །མདུན་དུ་མེ་ཏོག་འདབ་མ་བཅུ་དྲུག་པ། །ནོར་ལྷ་ཕོ་བརྒྱད་མོ་བརྒྱད་དཀྱིལ་འཁོར་ཚང་། །ནང་རིམ་མར་སྐུད་ཟུར་གཉིས་མར་གྱིས་ཤན། །སེན་མོས་བཤད་པ་ནོར་བུའི་མེ་རི་མཚོན། །ཟུར་གཉིས་མར་རྒྱང་མང་དུ་བཙུགས་པ་ལ། །མར་ཐུད་རིལ་བུ་མེ་ཏོག་མང་པོས་བརྒྱན། །རིལ་བུ་རྣམས་ནི་མེ་ཏོག་ཆར་འབེབས་ཚུལ། །མེ་ཏོག་དཔག་བསམ་ཤིང་དང་
སྐྱེད་མོའི་ཚལ། །འདི་ལ་ཤ་རྒྱན་རུང་དང་མི་རུང་བའི། །ལྷ་གྲངས་མང་ཕྱིར་ཤ་རྒྱན་མི་བྱའོ། །འདི་ནི་སྔོན་གྱི་སྔགས་རྒན་ཐམས་ཅད་ཀྱིས། །གཡང་སྐྱབས་གཏོར་མའི་ཕྱག་ལེན་རྙིང་པ་ཡིན། །འདི་ལ་འཛམ་ལྷ་རིགས་དགུ་ནོར་རྒྱུན་མ། །དེ་སོགས་ནོར་ལྷའི་རིགས་གྱུར་ཀུན་ལ་བསྔོ། །འཇའ་ཚོན་ལུགས་དང་གནམ་ཆོས་ལུགས་ལ་སོགས། །འགྲུབ་སྦྱོར་ཡོད་དུས་གཡང་སྐྱབས་འདོན་འདོད་ན། །འདི་ལ་འདོན་ཆོག་ལོགས་སུ་བཅའ་མི་དགོས། །ད་ནི་བཞི་བཅུ་ཁ་རལ་སུམ་ཅུར་ཉེར། །སུམ་ཅུ་པ་ལ་མུ་གེའི་བསྐལ་པ་འབྱུང་། །གསུངས་ཕྱིར་འདི་ཉིད་ཤིན་ཏུ་གལ་ཆེན་ཡིན། ༈ །དེ་ནས་རེ་མན་ཡི་གཏོར་མ་ནི། །ཟླུམ་པོ་སྟོད་ཟུར་གཉིས་པ་ནོར་བུའི་དབྱིབས། །ཁ་དོག་དམར་པོ་དབང་གི་རང་བཞིན་མཚོན། །ནོར་བུ་དབུས་མར་མེ་ཏོག་པདྨ་ནི། །འདི་ཉིད་སྒྲུབ་པའི་དཀྱིལ་འཁོར་ཚང་བ་ཡིན། །ཟུར་གཉིས་མར་གྱིས་ཤན་ཅིང་སེན་མོས་བཤད། །དེ་ནི་ནོར་བུའི་མེ་རིའི་མཚོན་པ་ཡིན། །རྩེ་ལ་རལ་གྲི་མེ་འབར་འཁོར་ལོ་ནི། །ལྷ་ཉིད་སྒོམ་པའི་དམིགས་རྟེན་ཡིན་པའོ། །དཔག་བསམ་ཤིང་དང་ནོར་བུའི་ཆར་མཚོན་པའི། །མར་རྒྱང་གཡས་གཡོན་གཉིས་རེ་
བཙུགས་པ་ཡིན། །བླ་ཆེན་ཡིན་ན་རྟ་གོད་འོང་དོགས་སྣང་། །བླ་ཕྲན་ཡིན་ཀྱང་སྡོམ་རྟ་འཆི་དོགས་སྣང་། །འདི་ནི་རྣམ་སྲས་ལོགས་སུ་བཞག་པའམ། །མགོན་པོ་ཡིན་ཕྱིར་གོང་དུ་བཞག་ཀྱང་རུང་། ༈ །དེ་ནས་རྣམ་སྲས་སེར་ཆེན་གཏོར་མ་ནི། །རྣམ་སྲས་དངོས་གྲུབ་འབྱུང་བའི་རྒྱུད་ཆེན་ལས། །གཏོར་མའི་ཆོ་ག་བྱ་བ་ནི། །འབྲས་སམ་ཏིལ་ལམ་གང་ཡང་རུང་། །རི་རབ་གཟུགས་བྱས་བང་རིམ་བཞི། །དབུས་སུ་རྒྱལ་པོའི་བཞུགས་གདན་བྱ། །ཟུར་བཞི་ལྕོགས་བཞི་བྱ་བ་ནི། །དུང་དང་དུང་ནི་ཆེན་པོ་དང་། །པདྨ་པདྨ་ཆེན་པོའོ། །གླིང་བཞི་གླིང་ཕྲན་བརྒྱད་དང་བཅས། །དེ་ནི་རྒྱལ་པོ་རྟེན་པའི་རྫས། །མར་མེ་བརྒྱ་དང་ལྷ་བཤོས་བརྒྱ། །གནོད་སྦྱིན་ཆེན་པོ་བརྒྱད་ཀྱི་རྫས། །དཀར་གསུམ་མངར་གསུམ་བླུག་པ་ནི། །ཀླུ་ཆེན་བརྒྱད་ཀྱི་རྫས་ཡིན་ནོ། །མཐེབ་སྐྱུ་བརྒྱ་དང་རྩ་བརྒྱད་བཞག །གནོད་སྦྱིན་བྱེ་བ་རྟེན་པའི་རྫས། །གསུངས་པ་སེར་དམར་གཉིས་ཀྱི་གཏོར་མ་ཡིན། །པཎ་ཆེན་བུད་དྷ་གུལྟའི་རྒྱ་གཞུང་ལས། །བཤོས་བུ་རི་རབ་དབྱིབས་སུ་བྱ་བར་གསུངས། །རི་རབ་བྱ་བ་དེ་དག་དོན་འདུས་ཡིན། །དེ་ལ་དུང་ཕྲེང་བྱས་པ་མཛེས་
པའི་རྒྱན། །དེ་སྟེང་ཟླུམ་པོ་མིག་མང་རིས་བྲིས་པ། །བཞུགས་གནས་གདན་དང་བཅས་པ་མཚོན་པ་ཙམ། །དེ་སྟེང་ནོར་བུ་སུམ་ཚོམ་དགོས་འདོད་འབྱུང་། །ནོར་བུ་གསུམ་ལ་འདབ་བརྒྱད་གསུམ་བཀོད་པ། །སྟེང་མ་རྣམ་སྲས་གནོད་སྦྱིན་མོ་བརྒྱད་དང་། །གཡས་པ་ཕོ་བརྒྱད་གཡོན་པ་ཀླུ་བརྒྱད་མཚོན། །སེར་ཆེན་ལྗང་ཆུང་དྲེགས་པ་གསུམ་མཚོན་ཕྱིར། །རྩེ་ལ་མར་རྒྱང་གསུམ་ནི་བཙུགས་པ་ཡིན། །ཤ་ནི་ཤེས་ཤིང་འོས་པ་ཞེས་བྱའོ། །རྡོ་རྗེ་སེར་གོར་རྒྱུད་ལས་གསུངས་པའི་ཕྱིར། །གཡས་གཡོན་ཤ་རྒྱན་གཉིས་ནི་བཙུགས་པ་ཡིན། །འདི་ཉིད་གཞུང་དུ་བཅའ་ཚུལ་མ་འཆུག་ཀྱང་། །འཛམ་གླིང་རྒྱན་པའི་ཕྱག་ལེན་བརྒྱུད་པ་ཡིན། ༈ །དེ་ནས་མདུང་དམར་ཅན་གྱི་གཏོར་མ་ནི། །རི་རབ་བང་རིམ་བཞི་པའི་འོག་མ་ལ། །མར་སྐུད་འདབ་བརྒྱད་བྲིས་པ་ཀླུ་བརྒྱད་མཚོན། །བང་རིམ་གསུམ་ལ་དུང་ཕྲེང་འཐེན་པ་ནི། །གཞོང་ཐོགས་ཕྲེང་ཐོགས་རྟག་མྱོས་ལྷ་རྣམས་མཚོན། །དེ་སྟེང་ཟུར་གཉིས་བཤོས་ཆུང་བརྒྱད་བསྐོར་བ། །བཀའ་སྡོད་ནོར་ལྷ་མཆེད་བརྒྱད་གཏོར་མ་ཡིན། །དེ་དབུས་གཙུག་ལག་ཁང་གི་དབྱིབས་འདྲ་བ། །ལྕང་ལོ་ཅན་གྱི་ཕོ་བྲང་མཚོན་པ་ཡིན། །དེ་སྟེང་
ཟུར་བཞི་པད་འདབ་བཞི་བཞག་པ། །དུང་དང་དུང་ཆེན་ལ་སོགས་གཏོར་ཆེན་བཞི། །དེ་དབུས་གཏོར་མ་གྲུ་བཞི་བཞག་པ་ནི། །རྒྱས་པའི་ཕྲིན་ལས་གཙོ་བོ་ཡིན་པའི་ཕྱིར། །རྩེ་ལ་ཕྱག་མཚན་མེ་རི་འོད་ཟེར་ཚུལ། །རྒྱལ་པོ་འཁོར་དང་བཅས་པ་སྒོམ་པའི་རྟེན། །གོ་ཆ་མནབས་པ་འདི་ནི་དྲག་པོའི་ཚུལ། །ཡིན་ཕྱིར་གཏོར་མདོག་དམར་ཞིང་ཤ་རྒྱན་ལྡིང་། །འདི་ཡི་གཏོར་མ་གཞུང་ནས་འདྲ་མིན་མང་། །འོན་ཀྱང་འདི་ཙམ་ཕྱག་ལེན་རྒྱུད་ལྡན་ཏེ། །བཅའ་སློ་གང་དང་མ་འགལ་ཕྱོགས་ཙམ་མཐུན། །གོང་མ་རྣམས་ཀྱི་ཕྱག་སྲོལ་འདི་ཙམ་འདུག ༈ །དེ་ནས་དགོངས་འདུས་གཏོར་མའི་དམར་ཁྲིད་ལས། །འཇིག་རྟེན་པ་ཡི་གཏོར་མགྲོན་དང་། །ཁྱད་པར་ཡི་དྭགས་རིགས་རྣམས་ལ། །རྒྱུ་དག་ཆེ་ཞིང་མང་བར་བཤམས། །དེ་མཉེས་འདོད་པའི་དོན་གྲུབ་འགྱུར། ༈ །རྒྱུད་ལས་ཡི་དྭགས་་་་མགར་ནག་མཆན། བཙན་གྱི་རྒྱལ་པོ་ཉིད། །ཡིན་པར་གསུངས་ཕྱིར་གཏོར་མ་ཆེ་ན་ལེགས། །གཞུང་ནས་མཁར་ཐབས་སུམ་བརྩེགས་གསུངས་ན་ཡང་། །སྒར་ཆེན་ཕྱག་ལེན་ཟུར་གསུམ་རྭ་མགོ་ཅན། །རང་ལུགས་རྭ་མགོས་གནད་འབེབས་འགྲུབ་པར་སླ།
ལོགས་གསུམ་རྭ་ཞོན་དཀར་ནག་རྐང་ཐང་གསུམ། །ཟུར་གསུམ་ལྷ་བཙན་བདུད་ཀྱི་དགེ་བསྙེན་ནི། །བརྒྱ་དང་ཉི་ཤུ་ཚན་གསུམ་གཏོར་མ་ཚང་། །གཙོ་འཁོར་བར་དུ་མར་རྒྱུན་རི་མོས་བཅད། །ཟུར་གསུམ་མར་རྒྱན་མེ་རི་ཞིབ་པོས་བརྒྱན། །རྩེ་ལ་ཕྱག་མཚན་གཙོ་བོ་སྒོམ་པའི་རྟེན། །མེ་འབར་དྲག་རྩལ་མེ་ལྟར་འབར་བའི་རྟགས། །གཙོ་འཁོར་ཡུམ་གསུམ་མཆོད་ཕྱིར་ཤ་དར་གསུམ། ༈ །མགར་དམར་གཏོར་མ་མཁར་ཐབས་སུམ་བརྩེགས་ནི། །ཕ་ཝང་ལོང་བུ་ཟངས་དང་ལྕགས་ཀྱི་མཁར། །ཁ་བད་དུང་ཕྲེང་ལོངས་སྤྱོད་མཛེས་པའི་བརྒྱན།ཟུར་གསུམ་ལོགས་གསུམ་ཤ་རྒྱན་གོང་དང་མཚུངས། །ཕྱག་མཚན་བྷཻཾ་རྟེན་མེ་འབར་དྲག་པོའི་རྟགས། །བཙན་བཤོས་ཡིན་ཕྱིར་མཁར་ཐབས་ངེས་པར་དགོས། བླ་མ་ཞིང་གཤེགས་ཆོས་དབང་ཀུན་བཟང་ལ། །རྨི་ལམ་ལྷ་མོ་ཉིད་ཀྱིས་ལུང་བསྟན་ནས། །འབྲས་ཟན་གཏོར་མ་བཅས་ནས་ཕྱག་ཁྲིད་གནང་། །གཏོར་གདན་ཟན་གྱི་ཟླུམ་སྐོར་སྲབ་བུའི་སྟེང་། །སྨན་ཏིང་པདྨ་འདབ་བཞི་ལྡན་པའི་དབུས། །ལྕོག་ཟླུམ་འདེར་སོ་བཞག་པའི་ལྷ་མོ་ཉིད། །ཕྱོགས་བཞིར་བཤོས་ཕྲན་བཞི་ནི་མཆེད་བཞི་སྟེ། །སྨན་ཏིང་དེ་ནི་བརྟན་མ་
བཅུ་གཉིས་ཏེ། །གདན་གྱི་ཟན་ནི་སྨན་མོ་འབུམ་ཕྲག་ཚང་། །ཉི་ཟླ་ནོར་བུ་ལྷ་མོ་བསྒོམ་པའི་རྟེན། །མེ་རི་འཇམ་པོ་འཇའ་འོད་གུར་དུ་མཚོན། །མདུན་གྱི་པདྨ་སྒྲུབ་རྟེན་ཚོམ་བུ་ཚང་། །མར་རྒྱང་གཉིས་ནི་ཞི་སྒྲུབ་དཀར་མོ་ཚང་། །ཤ་རྒྱན་གཉིས་ནི་ནག་མོ་སྲོག་སྒྲུབ་དང་། །ཌཀྐི་ཟ་བྱེད་གདོང་ཅན་མཆོད་པའི་རྫས། །གཏོར་མ་བརྒྱད་པོས་ནོར་ལྷའི་གཏོར་མ་ཚང་། །དེ་དག་གཏོར་གདན་སྟེང་དུ་ཕྲེང་བྱས་བཤམས། ༈ །དེ་དང་མི་འདྲ་གཏོར་སྣོད་དགོས་པ་གཉིས། །རིན་ཆེན་སྣོད་དམ་མེད་ན་ཤིང་སྡེར་དུ། ༈ །ཐང་ལྷའི་གཏོར་མ་གྲུ་བཞི་སོར་བཅུ་གཉིས། །དབུ་མ་བཞི་ནི་ལྷ་ཀླུ་བདུད་བཙན་འཁོར། །གཡུང་དྲུང་གཡས་འཁྱིལ་སྒྲུབ་རྟེན་དཀྱིལ་འཁོར་ཚང་། །དུང་ཕྲེང་མཛེས་པའི་རྒྱན་ཡིན་༈ གཡའ་སྤང་མཚམས། །སྤྲིན་རིས་བྱས་པ་ན་བུན་འཕྱུར་བའི་ཚུལ། །ཉི་ཟླ་སྐར་གསུམ་དུང་ཕྲེང་དགེ་ལེགས་འབྱུང་། །ནོར་བུ་མེ་རི་འཇམ་པོ་ལྷ་སྒོམ་རྟེན། །གཏོར་མ་དངོས་ནི་མཆོད་པའི་ཞལ་ཟས་ཏེ། །གནམ་མཚོ་ཡུམ་དང་བཀའ་སྡོད་ཐང་འབྲེལ་གཉིས། །མཆོད་པའི་མར་རྒྱང་གཉིས་ནི་བཙུགས་པ་ཡིན། །འཕྲལ་དུ་རྒྱལ་འགོང་གནོད་པ་བྱུང་བའི་ཚེ། །
གཏོར་མ་མགོར་བཞག་བཀའ་བསྒོ་བྱ་བའི་ཕྱིར། །གཏོར་མ་གྲལ་དུ་མི་བསྒྲིག་སྣོད་དུ་བཅའ། ༈ །དེ་བཞིན་ལྕགས་སྡེར་རམ་ནི་ཟངོས་སྡེར་དུ། །གཏོར་མ་ཟུར་གསུམ་ནག་པོ་གཡས་དཀྱུས་དགུ། །འདི་ཡི་མིང་ལ་ར་བཤོས་མིང་དུ་གྲགས། །གཙོ་བོར་མིག་དགུ་འཁོར་ལ་མིག་རེ་ཟུང་། །གཙོ་བོར་ཁྱབ་འཇུག་འཁོར་ནི་གཟའ་ཆེན་བརྒྱད། །ཕྱོགས་བཞི་སྙིང་དང་གདོང་མོ་མཆེད་བཞི་ཡིན། །འཁོར་ལ་མེ་ལྕེ་གཙོ་བོར་བྱ་ཡི་མཆུ། །དེ་ནི་རང་རྟགས་ཡིན་པས་གནད་ལ་ཕེབས། །ཤ་རུལ་ཁྲག་རུལ་མཆོད་རྫས་གཙོ་བོའི་ཕྱིར། །ལོགས་གསུམ་ཤ་དར་གསུམ་སོགས་མང་བར་བཙུགས། །གློ་བུར་ལས་བཅོལ་ཟོར་དུ་འཕང་བའི་ཕྱིར། །གྲལ་དུ་མི་བསྒྲིག་སྣོད་དུ་བཅའ་བ་ཡིན། །དྲང་སྲོང་གནོད་པ་ལ་སོགས་མི་འབྱུང་ཞིང་། །སྙིགས་དུས་ཆོམ་རྐུན་ལ་སོགས་འཚེ་བའི་ཚེ། །ཆོ་འཕྲུལ་དགོས་ན་འདི་ཉིད་མྱུར་བའི་ཕྱིར། །འདི་ཡང་གལ་ཆེ་གུད་དུ་བཅའ་དགོས་བྱུང་། ༈ །དེ་ནས་གོང་དུ་བསྐང་བའི་དྲུང་དེ་རུ། །གཡག་ནག་ལིངྒ་བཀལ་དང་བྱ་མོ་དང་། །མགྲིན་པར་དུང་ཕྲེང་བརྒྱན་དང་ལུག་ནག་གཟུགས། །དཔྲལ་བར་མར་བྱུག་དར་ཚོན་ཚར་བུས་བརྒྱན། །དེ་ནི་མ་
མགོན་བསྐང་བ་རྫས་མཆོད་བཅའ། །དེ་ཡིས་གཏོར་བསྔོས་རྒྱས་པའི་བཅའ་ཚོགས་ཚང་། ༈ །དེ་ནས་མདོས་སོགས་རིམ་གྲོ་བྱ་བའི་དུས། །བླ་མ་ཡི་དམ་མཁའ་འགྲོ་མར་གྱུ་དབུས། །གཡས་གྲལ་བེར་དང་ཕྱག་བཞི་ཕྱག་དྲུག་པ། །མ་ནིང་ཞིང་སྐྱོང་གཉིས་ཏེ་མགོན་པོ་ལྔ། །གཡོན་དུ་དུར་ཁྲོད་བདག་པོ་རྣམ་སྲས་དང་། །དམ་ཅན་ལྷ་སྨན་རེ་མན་དང་ལྔ། །གཡས་མཐར་དཀར་གཏོར་ཕྱི་རྒྱུད་ངོམ་རྒྱལ་ཡིན། །གཡོན་མཐར་ཐང་ལྷ་སྔགས་བདག་མཁར་ནག་སོགས། །གཙོ་བོ་ཐང་ལྷ་བྱས་ཏེ་གཏོར་མ་གཅིག །རྟ་མགྲིན་ནག་པོ་ཡི་དམ་གཏོར་མར་འདུས། །བྲག་མགོན་སྲིན་མགོན་ཞིང་སྐྱོང་གཏོར་མར་འདུས། །རྣམ་སྲས་སེར་དམར་མགར་བ་དམར་ནག་རྣམས། །གཏོར་མ་སོ་སོར་མི་དགོས་རེ་རེས་ཆོག །མར་རྒྱན་ཞིབ་ཆ་མི་དགོས་ཕྱོགས་མགོ་ཙམ། །བྱ་ཚུལ་གོང་དུ་བཤད་དང་མཚུངས་པ་ཡིན། ༈ །དེ་ལས་བསྡུ་ན་རྩ་གསུམ་གོང་ལྟར་ལས། །ཁེར་དང་ཕྱག་བཞི་ཕྱག་དྲུག་གཅིག་ཏུ་བསྡུ། །མ་ནིང་ཞིང་སྐྱོང་གཉིས་དང་ཆོས་སྐྱོང་གསུམ། །དེ་མཐར་ངོམ་རྒྱལ་ཕྱི་རྒྱུད་དཀར་གཏོར་གཅིག །གཡོན་དུ་རྟ་ལྷ་རྣམ་ཐོས་སྲས་ལ་བསྡུ། །ཐང་ལྷ་ཀླུ་རིགས་ཀུན་
ལ་དཀར་གཏོར་གཅིག །འདི་དུས་སྔགས་སྲུང་ཕྱག་བཞི་པ་ལ་བསྡུ། །བཙན་ནི་མ་ནིང་འཁོར་དུ་འདུ་བ་ཡིན། །སྔགས་བདག་མཁར་ནག་ཐང་ལྷའི་ནང་དུ་འདུ། །གཏོར་རྩེར་ལྷ་ནི་མི་བསྐྱེད་ནམ་མཁར་བསྐྱེད། །དེ་ཕྱིར་ཕྱག་མཚན་མར་རྒྱན་ལ་སོགས་པ། །ཅི་བདེར་ཆོག་གི་ངེས་པ་ཡོད་པ་མིན། །དེ་བས་བསྡུ་ན་སྔགས་ནག་གཏོར་མ་ལྟར། ༈ །དེ་ལས་བསྡུ་ན་རྒྱུན་གཏོར་གནམ་ཆོས་ལུགས། །རིན་ཆེན་འབར་བ་ལས་བཞིའི་གཏོར་མས་བསྐོར། །རིན་ཆེན་འབར་བའི་ལོགས་གསུམ་རྩ་བ་གསུམ། །ཟུར་གསུམ་གཡས་གཡོན་རྒྱབ་ཀྱི་ཟུར་གསུམ་པོ། །ཆོས་སྐྱོང་ཕོ་རྒྱུད་མོ་རྒྱུད་བཀའ་སྲུང་གསུམ། །སྐེད་པ་ཟླུམ་པོ་ནོར་ལྷ་གཞི་བདག་ཀུན། །རྩ་བ་ཟླུམ་པོ་ཕྱི་རྒྱུད་པ་ཀུན་ཡིན། །གཡས་ཀྱི་གྲུ་བཞི་རྣམ་སྲས་སེར་དམར་གཉིས། །གཡོན་གྱི་གྲུ་གསུམ་མགར་བ་དམར་ནག་གཉིས། །རྒྱབ་ཀྱི་ཟུར་གཉིས་ལྷ་སྨན་དབང་གི་ལྷ། །མདུན་གྱི་ཟླུམ་པོ་ཤ་སྤང་ཕྱི་རྒྱུད་པ། །རྒྱུན་གཏོར་ནུབ་རེ་བཞིན་དུ་གཤེགས་དགོས་པས། །མར་རྒྱན་ཐེབ་རྒྱན་ཅི་འབྱོར་བྱས་པས་འཐུས། །ཤ་རྒྱན་ཡོད་ན་བཞི་པོ་རྣམས་ལ་བཙུགས། །གཏོར་མའི་ངོ་བོ་ངེས་ཚིག་ཨོ་རྒྱན་གསུང་། །ངོ་བོ་དབྱིབས་
དང་ཡེ་ཤེས་གཉིས་མེད་དེ། །ཆོས་ཉིད་ངང་ལས་ཆོས་ཅན་གཏོར་མར་འཆར། །ངེས་ཚིག་ཆགས་འཛིན་མེད་པར་སྟོང་པས་གཏོར། །མགྲོན་རྣམས་ཀུན་ལ་ཁྱབ་པས་མ་ཞེས་བྱ། །དགོས་ཆེད་ཚོགས་རྫོགས་སྒྲིབ་བྱང་བར་ཆད་ཞི། །དངོས་གྲུབ་རྣམ་གཉིས་མྱུར་དུ་ཐོབ་པའོ། །ཆུ་ནི་ཆུང་ངུ་མང་དུ་སྤེལ་བའི་རྫས། །ཡིན་ཕྱིར་ཆབ་ཀྱིས་བྲན་པ་དེ་ཡི་དོན། །ཆབ་བྲན་ཆང་རྒོད་བྲན་ཅིང་ཆུ་གཙང་བྲན། །ཆུ་གཉིས་བར་གྱི་ཆང་ཞེས་བྱ་བ་སྟེ། །དེ་ནས་བྱིན་གྱིས་བརླབས་པའི་བདུད་རྩིས་བྲན། །དེ་ནས་གཏོར་མ་བྱིན་རླབས་བསྔོ་ཚུལ་སོགས། །ཆོ་གའི་གཞུང་ནས་གསལ་ཕྱིར་བཤད་མ་དགོས། ༈ །ནས་ནག་གཙང་མ་མདུན་དུ་བཞག་བྱས་ཏེ། །ནས་འབྲུ་རེ་རེ་ཧཱུྃ་ཡིག་རེ་རེར་དམིགས། །དེ་ནས་མི་དམིགས་ངང་ནས་རྔོ་བཏག་བྱེད། །ཆོས་སྐྱོང་གང་ཡིན་དེ་ཡི་གཏོར་མ་བཅའ། །གཙོ་འཁོར་ཧྲག་བསྡུས་དྲག་རིམ་གཏོར་མ་བཅའ། །ཤོག་དྲིལ་བྱ་སྟེ་རྩེ་དང་སྨད་ཆ་བཞིར། །རྩེ་ནས་བླ་མ་བརྒྱུད་རིམ་མཐོ་ཐོག་མཚན། །དེ་འོག་ཡི་དམ་རྣམས་ཀྱི་སྙིང་པོ་དང་། །དེ་འོག་ཆོས་སྐྱོང་གང་ཡིན་བསྙེན་སྒྲུབ་སྔགས། །དེ་འོག་ཆོས་སྐྱོང་དེ་ཡི་བསད་སྔགས་སོགས། །
ཤོག་དྲིལ་བཅུག་ཅིང་གསེར་ལ་སོགས་པ་ཡི། །རིན་པོ་ཆེ་ཡི་ནང་གཞུག་གང་ཡོད་བཅུག །མར་རྒྱན་ཤ་རྒྱན་ལ་སོགས་གཟབ་བྱས་ནས། །གཏོར་སྣོད་ནང་བཤམས་ལྷ་ཡི་གཞལ་ཡས་ཁང་། །མཆོད་པའི་སྤྲིན་ཕུང་ཆེན་པོར་དམིགས་བྱས་ཏེ། །མི་བསྒུལ་རྒྱུན་དུ་བཞག་ཅིང་དུས་བཟང་ལ། །གསོ་བྲན་བྱེད་པ་རྟེན་གཏོར་ཞེས་བྱའོ། །དེ་ནི་ཕྱོགས་མཚོན་ཡིན་གྱིས་ཞིབ་པར་ནི། །སོ་སོའི་གཞུང་ནས་གཏོར་མ་བཅའ་ཐབས་གསལ། ༈ །སྒྲུབ་པ་བྱེད་དུས་ཐུན་མཚམས་དྲུག་གམ་བཞིར། །གཏོར་མ་འབུལ་བ་ཐུན་གཏོར་ཞེས་བྱའོ། །མདོས་སོགས་སྲུང་ཟློག་བཅའ་བའི་དུས་ཀྱི་ཚེ། །ནུབ་མོ་དཀར་གཏོར་དམར་གཏོར་གཉིས་བཤམས་ནས། །ཆོས་སྐྱོང་གཏོར་འབུལ་ཆད་ཐོ་བརྟན་སྐྱོང་དང་། །དཀར་གཏོར་འདོན་ལ་འབུལ་བ་གཏོར་འབུལ་ཟེར། །སྒྲུབ་པའི་དུས་སུ་ལྷ་བསྐྱེད་གཏོར་མ་ནི། །རིན་ཆེན་འབར་བ་ལ་སོགས་སྒྲུབ་གཏོར་ཡིན། །གློ་བུར་ལས་ལ་ཟད་པའི་དུས་ཀྱི་ཚེ། །གཏོར་མ་གསར་བཅས་བསྐུལ་པ་གང་ཡོད་འདོན། །ཕྲིན་ལས་བཅོལ་གཏམ་བྱས་ནས་ཕུལ་བ་ནི། །གློ་བུར་ལས་བཅོལ་གཏོར་མ་ཞེས་བྱའོ། ༈ །འདོད་གསོལ་མ་གཏོགས་ལམ་གཏོར་དེ་
དང་འདྲ། །སྔོན་གྱི་སྔགས་འཆང་རྣལ་འབྱོར་ཕལ་ཆེར་གྱིས། །གསོལ་ཁ་ལམ་གཏོར་གཏོང་སྲོལ་ཡོད་དོ་སྐད། །གཏོར་མའི་བཤད་པ་རྒྱས་པ་དཔག་མེད་ཀྱང་། འདི་རུ་བྲི་བར་མི་ལོངས་རྒྱ་ཆེའོ། །བྲིས་ཀྱང་གལ་ཆུང་ནའང་བཤད་པར་སྣང་། ༈ །དེ་ལྟར་གཏོར་མའི་བཅའ་ཚོགས་ཟིན་བྲིས་འདི། །མཁས་པ་རྣམས་ལ་དགོས་པ་མི་སྣང་ཡང་། །བློ་དམན་གསར་བུ་རྣམས་ལ་ཕན་པའི་ཕྱིར། །བླ་མ་པདྨ་ནམ་མཁའ་ཞེས་བྱ་དང་། །དབུ་མཛད་དགེ་སློང་ཐབས་མཁས་ཞེས་བྱ་བས། །ནན་གྱིས་བསྐུལ་ཕྱིར་རཱ་ག་ཨ་སྱ་ཡིས། །འཕྲལ་དུ་ཡིད་ལ་གང་དྲན་བཀོད་པ་ལ། །ཉེས་འགལ་མཆིས་ན་མཁས་པ་རྣམས་ལ་བཤགས། །དགེ་བས་འགྲོ་བ་དཔག་ཏུ་མེད་པ་དང་། །བློ་གསར་རྣམས་ལ་དགའ་སྟོན་ཆེན་པོར་ཤོག །སརྦ་མངྒ་ལཾ། ཤུ་བྷཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།