གནམ་ཆོས་ཐུགས་ཀྱི་གཏེར་ཁའི་ཁ་སྐོང་གཏོར་བསྔོས་བདུད་རྩི་ཀུན་ཁྱབ།
གནམ་ཆོས་ཐུགས་ཀྱི་གཏེར་ཁའི་ཁ་སྐོང་གཏོར་བསྔོས་བདུད་རྩི་ཀུན་ཁྱབ་བཞུགས་སོ།།
ན་མོ་གུ་རུ་དེ་ཝཱ་ཌཱ་ཀི་ནི་ཧཱུྃ། གནམ་ཆོས་ལ་སོགས་རྙིང་མའི་གཏོར་བསྔོས་ནི། །རྒྱས་པར་རྩ་གསུམ་ཆོས་སྐྱོང་ནོར་ལྷ་དང་། །བཀའ་སྲུང་ཕྱི་རྒྱུད་གཏོར་མ་བདུན་ཚར་བཅའ། །བསྡུ་ན་རིན་ཆེན་འབར་བ་པད་ཀོར་ཅན། །ལོགས་གསུམ་བླ་མ་ཡི་དམ་མཁའ་འགྲོ་གསུམ། །གཡས་གཡོན་ཟུར་གཉིས་མ་མགོན་གཉིས་ཀྱི་རིགས། །རྒྱབ་ཟུར་བཀའ་སྲུང་ཚོགས་རྣམས་ཐམས་ཅད་དེ། །སྨད་ཀྱི་ཟླུམ་པོ་ནོར་ལྷ་ཐམས་ཅད་ཡིན། །པད་འདབ་སྐོར་བ་ཕྱི་རྒྱུད་འཇིག་རྟེན་པ། །དེ་ལ་ལྷ་བརྒྱ་གཏོར་གཅིག་ཅེས་སུ་གྲགས། །གལ་ཏེ་དེ་ལས་རྒྱས་ཙམ་འདོད་པ་ནི། །དེ་ཡི་མདུན་དུ་ཟླུམ་པོ་དཀར་གྱིས་བརྒྱན། །ཤ་ཁྲག་མི་རུང་བ་རྣམས་དེ་ལ་བསྔོ། །གཡས་སུ་གྲུ་བཞི་ནོར་ལྷ་རྒྱས་པའི་རིགས། །རྒྱབ་ཏུ་ཟུར་གསུམ་མཁའ་འགྲོ་ལྷ་མོའི་
རིགས། །གཡོན་དུ་ཟུར་གསུམ་ཆོས་སྐྱོང་ཐམས་ཅད་དེ། །དབུས་ཀྱི་མར་རྒྱུན་མདུན་བསྐྱེད་དཀྱིལ་འཁོར་རྟེན། །གཏོར་མ་མཆོད་པའི་སྤྲིན་ཕུང་ཆེན་པོར་དམིགས། །འདི་ནི་གནམ་ཆོས་གཏོར་མ་བསྡུས་པ་ཡིན། །ཆུ་ཆང་ཇ་ཕུད་ལ་སོགས་གང་རུང་བྲན། །དབང་བསྐུར་མ་ཐོབ་པ་ཡི་གཞི་བདག་ཀུན། །ཕུག་གཏོར་གྲ་འདིར་བསྔོ་བར་མི་རུང་ཡང་། །གཞི་བདག་ལྷ་སྲིན་སྡེ་བརྒྱད་ཐམས་ཅད་ཀུན། །ཐ་མལ་པ་ཡི་གཟུགས་སུ་མི་བསྒོམ་ཞིང་། །རིགས་བཞི་དཔའ་བོ་མཁའ་འགྲོའི་སྐུར་བསྒོམས་པས། །ནང་མཆོད་བྲན་པའི་གཏོར་མ་བསྔོ་བར་རུང་། །རང་ཉིད་ཡི་དམ་གང་རུང་སྔོན་སོང་རབ། །མིན་ན་སྐད་ཅིག་དྲན་རྫོགས་བསྒོམ་ཡང་རུང་། །གལ་ཏེ་གཏོར་མ་བཅའ་བ་མ་འཕྲོད་ན། །ཐེབ་ཙེའི་ནང་དུ་རྩམ་པ་གཙང་མ་བཤམ། །
དེ་ལ་རི་རབ་གཟུགས་ལྟར་གྲུ་བཞི་བྱ། །རྩེ་རུ་མར་ནི་ཅུང་ཟད་བཞག་པ་བྲན། །གཏོར་རྩམ་ཞེས་བྱ་གྲྭ་ས་ཀུན་ལ་དར། །ཡང་ན་ཐུད་དུམ་མར་སོགས་བྲན་ཡང་རུང་། །ཡང་ན་ཁྱིམ་དུ་གཏོར་མ་ཡོད་པ་དེ། །ཞག་གྲངས་དུ་ཐོག་གསོ་བྲན་བྱེད་པ་ནི། །ཕོགས་སྤྲད་བྱེད་པ་སྔགས་པ་ཀུན་ལ་དར། །དགོན་པ་ཆེན་པོ་སྤྱི་ཡི་གཏོར་མ་ལ། །གྲྭ་པ་ཀུན་གྱིས་གཏོར་བསྔོས་བྱེད་སྲོལ་ཡོད། །དམིགས་རྟེན་གཏོར་མ་ཅི་ཡང་མེད་པ་ལ། །གཏོར་བསྔོས་བྱེད་པ་གོད་ཁ་འབྱུང་བའི་རྒྱུ། །འོན་ཀྱང་རྟོགས་པ་ཤིན་ཏུ་མཐོ་ན་ནི། །གླིང་བཞི་གཏོར་སྣོད་རི་རབ་གཏོར་མ་དང་། །ལྷ་མིའི་ལོངས་སྤྱོད་ཐམས་ཅད་མཆོད་པར་དམིགས། །དེ་ནི་སྣང་སྲིད་གཞིར་བཞེངས་གཏོར་མ་སྟེ། །གང་ཟག་ཕལ་གྱི་སྤྱོད་ཡུལ་མ་ཡིན་ནོ། །དེ་ལྟར་མཐོ་དམན་གང་གི་ལུགས་བྱེད་ཀྱང་། །འདི་ཉིད་འདོན་སྒོམ་སྤྲུགས་པས་འཐུས་པ་ཡིན། ཧཱུྃ། རང་ཉིད་དྲན་རྫོགས་ཡི་དམ་ལྷ་གསལ་བའི། །ཐུགས་ལས་རཾ་ཡཾ་ཁཾ་གསུམ་འཕྲོས་པ་ཡིས། །མེ་ཆུ་རླུང་གིས་མི་གཙང་བསྲེགས་གཏོར་བཀྲུས། །ཡཾ་རཾ་ཀཾ་ལས་རླུང་མེ་ཐོད་སྐྱེད་སྟེང་། །ཨ་ཡིག་ལས་བྱུང་ཡེ་ཤེས་ཀ་པཱ་ལ། །ཕྱི་དཀར་ནང་དམར་ཉི་མ་ཟླ་བའི་སྣོད། །ཡངས་ཤིང་རྒྱ་ཆེ་སྟོང་གསུམ་མཉམ་པའི་སྟེང་། མུཿབིཿརཿཤུཿམཿལས་བདུད་རྩི་ལྔ། །རིན་ཆེན་དྲི་འདྲ་རླངས་པ་དང་བཅས་པ། །ནཿགོཿཀུཿདཿཧཿལས་ཤ་ལྔ་ནི། །
ཆེ་ཚོ་བཀྲག་མདངས་ལྡན་ཞིང་དྲོད་དང་བཅས། །དེ་སྟེང་ཧཱུྃ་ཨཱༀ་གསུམ་མཐིང་དམར་དཀར། །རླུང་གཡོས་མེ་སྦར་སྣོད་དྲོས་རྫས་རྣམས་ཁོལ། །ཞུ་བས་མི་གཙང་ལྦུ་བ་ཕྱི་རོལ་ལུད། །ཧཱུྃ་ཐིམ་ཐུགས་ཀྱི་བདུད་རྩི་སྔོན་པོ་གྱུར། །ཨཱཐིམ་གསུང་གི་བདུད་རྩི་དམར་ལྟེམ་མེ། །ཨོཾ་ཐིམ་སྐུ་ཡི་བདུད་རྩི་དཀར་ལྟེམ་མེ། །གསུམ་འདྲེས་ཡེ་ཤེས་བདུད་རྩི་མུ་ཏིག་མདོག །ཟག་མེད་བདེ་བ་སྐྱེད་བྱེད་བདུད་རྩི་མཚོ། །མཚོ་རླབས་རོལ་མོའི་སྒྲ་སྐད་སྣ་ཚོགས་འབྱུང་། །དྲི་བཟང་ངད་པ་སངས་རྒྱས་ཞིང་ཀུན་ཁྱབ། །རླངས་པ་སྣ་ཚོགས་མཆོད་པའི་སྤྲིན་ཕུང་འཁྲིགས། །ཁ་དོག་དྲི་རོ་ནུས་པ་ཕུན་སུམ་ཚོགས། །ཧ་ཧོཿཧྲཱིཿཡི་སྔགས་ཀྱིས་བྱིན་གྱིས་བརླབས། །རང་ཉིད་ཡི་དམ་ཐུགས་ཀའི་འོད་ཟེར་གྱིས། །གཏོར་མགྲོན་ཐམས་ཅད་སྐད་ཅིག་སྤྱན་དྲངས་གྱུར། །ཧཱུྃ། སྐུ་གསུམ་དག་པའི་ཞིང་ཁམས་ཐམས་ཅད་ནས། །བླ་མ་ཡི་དམ་མཁའ་འགྲོ་ཆོས་སྐྱོང་དང་། །ནོར་ལྷ་བཀའ་སྲུང་འཇིག་རྟེན་སྐྱོང་བའི་ཚོགས། །མཆོད་པའི་གནས་འདིར་སྤྱན་འདྲེན་གཤེགས་སུ་གསོལ། །ནམ་མཁའི་བར་སྣང་ས་གཞི་ཁྱབ་པར་བཞུགས། །ལུས་ངག་ཡིད་
གསུམ་གུས་པས་ཕྱག་འཚལ་ཞིང་། །དངོས་འབྱོར་ཡིད་སྤྲུལ་མཆོད་པ་རྒྱ་མཚོས་མཆོད། །བསྟོད་དབྱངས་ཡན་ལག་རྒྱ་མཚོས་བསྟོད་པར་བགྱི། །རང་གི་ཐུགས་ལས་སྤྲུལ་པའི་ལྷ་མོ་ནི། །རིན་ཆེན་རྒྱན་ལྡན་བྱེ་བ་གྲངས་མེད་འཕྲོས། །ཕྱག་ན་རིན་ཆེན་ལས་གྲུབ་བྷནྡྷའི་སྐྱོགས། །ཐོགས་པས་བདུད་རྩིའི་རྒྱ་མཚོ་ནས་བཅུས་ཏེ། །ལྷ་ཚོགས་སོ་སོའི་མདུན་དུ་བཏེགས་བྱས་པས། །ལྗགས་ནི་འོད་ཀྱི་སྦུ་གུས་བདུད་རྩི་གསོལ། །མཉེས་ཤིང་ཚིམས་ནས་སྐུ་ལུས་བཀྲག་རྒྱས་གྱུར། །ཨོཾ་ཨཱཿཧཱུྃ་མ་ཧཱ་བ་ལི་ཏ་ཞེས་སོགས་གཏོར་མ་བྱིན་གྱིས་བརླབས་སྔགས་དང་། ཨོཾ་ཨཱཿཧཱུྃ་ཧཱུྃ༔བཛྲ་གུ་རུ་དྷེ་ཝ་ཌཱཀི་ནཱི་སརྦ་དྷརྨ་པཱ་ལ་སརྦ་བ་སུ་དེ་ཝ་སརྦ་ལོ་ཀ་པཱ་ལ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧྲཱི༔ གསུམ་མམ་བདུན། ཨརྒྷཾ༴ སོགས། ཧཱུྃ། སངས་རྒྱས་ཀུན་ལས་བཀའ་དྲིན་ཁྱད་པར་འཕགས། །རྩ་གསུམ་ལྷ་ཡི་ཕྲིན་ལས་འབྱུང་བའི་སྒོ། །རིག་འཛིན་ཆེན་པོ་མི་འགྱུར་རྡོ་རྗེ་སོགས། །བརྒྱུད་པ་དྲུག་ལྡན་རྩ་བརྒྱུད་བླ་མ་ལ། །རྣམ་དག་བདུད་རྩི་གཏོར་མའི་མཉེས་མཆོད་འབུལ། །བཞེས་ནས་དབང་བསྐུར་བྱིན་གྱིས་བརླབ་ཏུ་གསོལ། །སྙིགས་དུས་འགྲོ་བའི་སྐྱབས་
གནས་པདྨ་འབྱུང་། །སྐུ་གསུམ་སྐུ་ལྔ་མཆོག་གི་མཚན་མཆོག་བརྒྱད། །འཕྲུལ་མཚན་བཞི་བཅུ་ཨོ་རྒྱན་བྱེ་བ་བརྒྱ། །པད་འབྱུང་ཞི་བའི་ལྷ་ཚོགས་ཐམས་ཅད་ལ། །དམ་རྫས་བདུད་རྩིའི་གཏོར་མ་འདི་འབུལ་ལོ། །བཞེས་ནས་ཁྱེད་རང་ལྟ་བུར་བྱིན་གྱིས་རློབས། །མི་ཏྲ་ཛོ་ཀི་བི་མ་མི་ཏྲ་དང་། །ཌོམ་བྷི་ཧེ་རུ་ཀ་དང་ཤི་སི་ཧ། །བིརླ་པ་དང་དམ་པ་རྒྱ་གར་དང་། །རིག་འཛིན་བརྒྱད་དང་གྲུབ་ཆེན་བརྒྱད་ཅུ་ལྔ། །རྗེ་འབངས་ཉེར་བདུན་གཏེར་སྟོན་བརྒྱ་རྩ་སོགས། །རིག་འཛིན་སློབ་དཔོན་ལྷ་ཚོགས་ཐམས་ཅད་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །བཞེས་ནས་ཕྱག་རྒྱ་ཆེན་པོའི་དངོས་གྲུབ་སྩོལ། །པདྨ་བཛྲ་དགོངས་འདུས་ལྷ་ཡི་ཚོགས། །དམར་ནག་མེ་ཕྲེང་ཕྱི་ནང་གསང་སྒྲུབ་ལྷ། །སེང་གེ་སྒྲ་སྒྲོག་རྡོ་རྗེ་གྲོ་བོ་ལོད། །དྲག་མཐིང་པད་འབྱུང་ཟབ་པར་སྟོན་ལ་སོགས། །རིག་འཛིན་ཁྲོས་པའི་ལྷ་ཚོགས་ཐམས་ཅད་ལ། །མ་ཧཱ་བ་ལིང་ཏ་ཡི་མཆོད་པ་འབུལ། །བཞེས་ནས་ཉིད་དང་དབྱེར་མེད་བྱིན་གྱིས་རློབས། །ཀུན་བཟང་རིགས་ལྔ་དམ་པ་རིགས་བརྒྱ་དང་། །སྟོན་པ་བཅུ་གཉིས་བསྐལ་མགོན་དྲུག་ཅུ་ལྔ། །
ཕྱོགས་བཅུ་དུས་གསུམ་རྒྱལ་བ་སྲས་བཅས་ལ། །ཡེ་ཤེས་བདུད་རྩིའི་གཏོར་མ་འདི་འབུལ་ལོ། །བཞེས་ནས་སྣང་བཞི་མཐའ་རུ་ཕྱིན་མཛད་གསོལ། །སྣང་བ་མཐའ་ཡས་ཚེ་་དཔག་རིགས་ལྔ་དང་། །ཚེ་སྤྲུལ་ཕྱི་ནང་གསང་བ་ཡང་གསང་ལྷ། །ཚེ་དཔག་དཀར་དམར་མཚོ་སྐྱེས་རྡོ་རྗེ་སོགས། །འཆི་མེད་ཚེ་ཡི་ལྷ་ཚོགས་ཐམས་ཅད་ལ། །འཆི་མེད་བདུད་རྩིའི་གཏོར་མ་འདི་འབུལ་ལོ། །བཞེས་ནས་རིག་འཛིན་ཚེ་ཡི་དངོས་གྲུབ་སྩོལ། །ཐུགས་རྗེ་ཆེན་པོ་ཕྱི་ནང་གསང་བའི་ལྷ། །འོད་དཀར་ཅན་དང་རྣོ་བཀྲ་དོན་ཡོད་ཞགས། །ལུས་དཀྱིལ་རིགས་ལྔ་རིགས་དགུ་ལྷ་ལྔ་དང་། །སངས་རྒྱས་སྟོང་གི་ཚོགས་དང་བཅས་པ་ལ། །ཡེ་ཤེས་བདུད་རྩིའི་གཏོར་མ་འདི་འབུལ་ལོ། །བཞེས་ནས་འབྲེལ་ཚད་བདེ་ཆེན་ཞིང་དུ་དྲོངས། །སྨན་བླ་ཆོས་བསྒྲགས་རྒྱ་མཚོ་འོད་དཔག་མེད། །བདེ་ཆེན་ཞིང་གི་ལྷ་ཚོགས་ཐམས་ཅད་དང་། །ཐུབ་པའི་དབང་པོ་ཉན་ཐོས་མཆོག་ཟུང་གཉིས། །གནས་བརྟན་བཅུ་དྲུག་དགེ་བསྙེན་དྷརྨཱ་ཏེ། །ཧྭ་ཤང་དགྲ་བཅོམ་ཁྲི་དང་དྲུག་སྟོང་སོགས། །འདུས་པ་མདོ་ཡི་ལྷ་ཚོགས་ཐམས་ཅད་ལ། །ཡེ་ཤེས་བདུད་རྩིའི་གཏོར་མ་འདི་
འབུལ་ལོ། །བཞེས་ནས་བསྟན་པ་ཡུན་རིང་གནས་པར་མཛོད། །འཇམ་དཔལ་རིགས་ལྔ་ཕྱག་རྟགས་སྤྲ་མ་དང་། །ཀིང་ཀང་འཇིགས་བྱེད་གཤེད་དམར་།གཤེད་ནག་དང་། །ཁྲོ་ཆུ་དུག་སྡོང་གནམ་ལྕགས་ཕ་ལམ་དང་། །རྡོ་རྗེ་ཞུན་བྱེད་ཚེ་བདག་འཆར་ཁ་ནག །ནཱ་ག་རཀཱ་དགྲ་ཟློག་རྣམ་དགུ་སོགས། །འཇམ་དཔལ་སྐུ་ཡི་ལྷ་ཚོགས་ཐམས་ཅད་ལ། །དམ་རྫས་བ་ལི་ཏ་ཡི་མཆོད་པ་འབུལ། །དུས་མིན་འཆི་དང་དགྲ་ཡི་གནོད་པ་བཟློག །དབང་ཆེན་དམར་ནག་བདེ་མཆོག་དམར་པོ་དང་། །རྟ་མགྲིན་གསང་འདུས་ཕྱི་ནང་གསང་བའི་ལྷ། །ནཱ་ག་ཀླུ་འདུལ་ལས་རིམ་བདུན་པ་སོགས། །རྟ་མཆོག་རོལ་པའི་ལྷ་ཚོགས་ཐམས་ཅད་ལ། །དམ་རྫས་མ་ཧཱ་བ་ལིང་ཏ་འདི་འབུལ། །བཞེས་ནས་སྣང་སྲིད་ཟིལ་གནོན་དངོས་གྲུབ་སྩོལ། །ཨོཾ་ཙུག་ཅན་དང་ནམ་མཁའི་བདག་པོ་དང་། །རྣམ་འཇོམས་དམེ་བར་བརྩེགས་དང་ཨུ་ཙརླ། །གཏུམ་ཆེན་གཏུམ་ཆུང་འབྱུང་འདུལ་གོས་སྔོན་ཅན། །རྡོ་རྗེ་སྒེག་པ་བཛྲ་ཧེ་རུ་ཀ །ཡང་དག་ཐུགས་ཀྱི་ལྷ་ཚོགས་ཐམས་ཅད་ལ། །མ་ཧཱ་བ་ལིང་ཏ་ཡི་མཆོད་པར་འབུལ། །བཞེས་ནས་བདག་ལུས་རྡོ་
རྗེའི་སྐུ་འགྲུབ་མཛོད། །ཆེ་མཆོག་དཔལ་དགུ་བཀའ་བརྒྱད་ལྷ་ཡི་ཚོགས། །ཡེ་ཤེས་འཇིགས་བྱེད་རོ་ཟ་གདམས་ངག་རྒྱལ། །ཡི་དམ་དཔལ་ཆེན་ལྷ་ཚོགས་ཐམས་ཅད་ཀྱིས། །དམ་རྫས་བདུད་རྩིའི་གཏོར་མ་འདི་བཞེས་ལ། །གཞོན་ནུ་བུམ་སྐུའི་ཀློང་དུ་གྲོལ་མཛད་གསོལ། །རྡོ་རྗེ་གཞོན་ནུ་ཁྲོ་བཅུ་ཁྲ་ཐབས་སོགས། །ཕུར་མཇུག་བཅུ་གཉིས་ཕུར་སྲུང་བཅུ་དྲུག་སོགས། །བདུད་འདུལ་ཕུར་པའི་ལྷ་རྣམས་གཏོར་མ་བཞེས། །བྱང་ཆུབ་བསྒྲུབ་ལ་བར་ཆད་མེད་པར་མཛོད། །མཚོ་རྒྱལ་མ་གཅིག་སྒྲོལ་མ་དཀར་སྔོན་དང་། །ཀུ་རུ་ཀུལླེ་ལྷ་མོ་འོད་ཟེར་ཅན། །ཕག་ཁྲོས་སེང་གསུམ་ལས་ཧུར་དྲག་མོ་སོགས། །རྦོད་གཏོང་མ་མོ་མཁའ་འགྲོའི་ལྷ་ཚོགས་ཀུན། །མ་ཧཱ་བ་ལིང་མཆོད་པ་འདི་བཞེས་ལ། །རྩ་རླུང་ལས་སུ་རུང་བར་བྱིན་གྱིས་རློབས། །མ་ནིང་སྡེ་ལྔ་སྲོག་བདུད་དཔལ་འབར་མ། །བྱ་རོག་མཚན་ཅན་མྱུར་མཛད་དཀར་མཐིང་གཉིས། །ལེགས་ལྡན་གུར་མགོན་ཚོགས་བདག་ཨ་གྷོ་ར། །སྲས་མཆོག་ནག་པོ་དྲེགས་བྱེད་བེར་ནག་ཅན། །མ་མགོན་སྡེ་བརྒྱུད་ཏྲཀ་ཤད་མདུང་འཛིན་དང་། །སེང་གདོང་ཡབ་ཡུམ་སྲིན་མགོན་གདོང་
བཞི་པ། །ཕོ་རྒྱུད་མགོན་པོའི་ལྷ་ཚོགས་ཐམས་ཅད་ཀྱིས། །དམ་རྫས་བ་ལོ་མཆོད་པ་འདི་བཞེས་ལ། །གནམ་ཆོས་བསྟན་པ་དར་ཞིང་རྒྱས་པར་མཛོད། །རང་བྱུང་རྒྱལ་མོ་དུད་པའི་སོལ་བ་མ། །རེ་ཏི་མཆེད་གསུམ་སྔགས་སྲུང་སྲོག་སྒྲུབ་མ། །དུར་ཁྲོད་བདག་པོ་ཡབ་ཡུམ་ངན་ནུ་མ། །སྤྱང་ཞོན་ཁ་མོ་ཆེ་དང་དམག་ཟོར་མ། །ཨ་ཕྱི་ཀོང་བཙུན་དེ་མོ་ཚེ་རིང་མ། །སྲིན་མོ་གཡག་གདོང་གཡུ་སྒྲོན་ཁོ་ལེ་མ། །ཐང་ནག་དཔལ་མོ་རྩ་འཇིབ་མ་ལ་སོགས། །བསྟན་སྲུང་མ་མོ་མཁའ་འགྲོ་ཐམས་ཅད་ཀྱིས། །དམ་རྫས་བདུད་རྩིའི་གཏོར་མ་འདི་བཞེས་ལ། །མི་ནད་ཕྱུགས་ནད་ཡམས་ནད་མེད་པར་མཛོད། །དབང་ཕྱུག་ཆེན་པོ་འདོད་པའི་རྒྱལ་པོ་དང་། །ཤིན་པ་དམར་ནག་བེག་རྩེ་ཡམ་ཤུད་དམར། །སྤུ་གྲི་མཆེད་གསུམ་ཁྱབ་འཇུག་རཱ་ཧུ་ལ། །མགར་བ་དམར་ནག་མཆེད་འཁོར་དཔུང་དང་བཅས། །འབར་བ་སྤྱན་བདུན་རོལ་པ་རྐྱ་བདུན་དང་། །ཇག་པ་མེ་ལེན་སྐྱེས་བུ་ལུང་གི་བཙན། སྤྲུག་གི་བཙན་རྒོད་ལ་སོགས་བཀའ་སྲུང་རྣམས། །དམ་རྫ་ས་བ་ལིང་མཆོད་པ་འདི་བཞེས་ལ། །ཁ་འཛིན་སྡོང་གྲོགས་མེལ་ཚེ་མ་གཡེལ་
ཅིག །ཀྵེ་ཏྲ་པཱ་ལ་དམ་ཅན་ཆོས་ཀྱི་རྒྱལ། །ཧ་ས་གནྡྷ་མ་ཧཱ་པཱ་ལ་དང་། །བྱ་རོག་གདོང་དགུ་ཕྱི་ནང་གསང་བ་དང་། །ཡང་གསང་སྦས་པའི་ལྷ་སྲིན་སྡེ་བརྒྱད་སོགས། །བཀའ་དང་བསྟན་པ་སྲུང་བར་ཞལ་བཞེས་པའི། །བཀའ་སྲུང་དམ་ཅན་རྒྱ་མཚོ་ཐམས་ཅད་ཀྱིས། །དམ་རྫས་གཏོར་མའི་མཆོད་པ་འདི་བཞེས་ལ། །རྣམ་འབྱོར་བདག་གི་སྡོང་གྲོགས་རྒྱབ་རྟེན་མཛོད། །བྷཾལས་རིན་ཆེན་སྣོད་མཆོག་རྒྱ་ཆེ་བར། །ཨོཾ་ལས་གཏོར་མ་དཀར་གསུམ་བདུད་རྩིའི་མཚོ། །སྦྲང་རྩིའི་རོ་ལྡན་ཟག་མེད་བདེ་སྐྱིད་འདི། །རྣམ་ཟློསྲས་རིགས་དགུ་ཛཾ་ལྷ་རིགས་དགུ་དང་། །ནོར་རྒྱུན་མ་དང་ཨཱརླ་རེ་མཱནྟ། །ཚོགས་བདག་རིགས་ལྔ་རྟ་བདག་ཀུ་བེ་ར། །ཨ་པར་ཛི་ཏ་དགེ་བསྙེན་ཡེ་ཤེས་གྲགས། །ནོར་བདག་ལ་སོགས་ནོར་ལྷའི་ཚོགས་རྣམས་ལ། །གཏོར་མ་འདི་འབུལ་དགྱེས་པར་བཞེས་ནས་ཀྱང་། །འཛད་མེད་ལོངས་སྤྱོད་གཏེར་གྱི་དངོས་གྲུབ་སྩོལ། །སྔགས་ཀྱི་བདག་པོ་སྨྱོ་ཁ་རྡོ་རྗེ་རྒྱལ། །ཐང་ལྷ་ཡར་བཞུད་མི་མགོན་དཀར་པོ་དང་། །ཀླུ་ཆེན་བརྒྱད་པོ་རིགས་བཞི་ཀླུ་ཡི་ཚོགས། །དཀར་གསུམ་བདུད་རྩིའི་གཏོར་མ་འདི་བཞེས་ལ། །ཀླུ་ནད་ཀུན་
སོལ་ལོ་ལེགས་འབྲུ་འཕེལ་མཛོད། །སྤོམ་ར་ལ་སོགས་མགུར་ལྷ་བཅུ་གསུམ་དང་། །མཁའ་རི་ལ་སོགས་དགེ་བསྙེན་ཉི་ཤུ་གཅིག །བརྟན་མ་བཅུ་གཉིས་སྐྱོང་མ་བཅུ་གཉིས་དང་། །ཡ་མ་བཅུ་གཉིས་སྨན་ཕྲན་འབུམ་དང་བཅས། །དབྱི་རྒྱལ་ལ་སོགས་ཕྱོགས་བཞིའི་དགེ་བསྙེན་བཞི། །སྨོན་སྐྱེས་ལ་སོགས་གཉན་ཕྲན་བཞི་བཅུ་གཉིས།དེ་སོགས་སྔོན་ཚེ་སློབ་དཔོན་པདྨ་དང་། །སྙིགས་དུས་རིག་འཛིན་མི་འགྱུར་རྡོ་རྗེ་ཡིས། །གནམ་ཆོས་དཀྱིལ་འཁོར་ཞལ་ཕྱེས་དབང་བསྐུར་ཚེ། །བསྟན་པ་སྲུང་བར་ཁས་བླངས་དམ་བཅས་པའི། །བོད་ཡུལ་ལྷ་སྲིན་གཞི་བདག་ཐམས་ཅད་ལ། །དམ་རྫས་དཀར་གསུམ་གཏོར་མ་འདི་འབུལ་ལོ། །བཞེས་ནས་སྔོན་གྱི་ཁས་བླངས་དྲན་མཛོད་ལ། །བདག་གི་འགལ་རྐྱེན་ཀུན་སོལ་མཐུན་རྐྱེན་སྒྲུབས། །བསམ་པའི་དོན་ཀུན་ཡིད་བཞིན་འགྲུབ་པར་མཛོད། །འཇིག་རྟེན་འདས་དང་མ་འདས་གཏོར་མགྲོན་རྣམས། །སོ་སོའི་ཡོན་ཏན་རྣམས་ལ་དང་བས་བསྟོད། །མཆོད་པ་དམན་དང་འབག་བཙོག་གྱུར་པ་བཤགས། །དེ་ལྟར་མཆོད་བསྟོད་དད་པའི་དགེ་བ་དེས། །ཚེ་འདིར་ཚེ་རིང་
ནད་མེད་ཉམས་རྟོགས་འཕེལ། །ཕྱི་མ་བདེ་ཆེན་ཞིང་དུ་སྐྱེ་ཕྱིར་བསྔོ། །གཏོར་མགྲོན་ལ་སོགས་སྐབས་སུ་དེ་ཡན་ཆོག །གཏོར་བསྔོས་ཁ་རྐྱང་ཡིན་ན་རྗེས་ཆོག་ནི། །ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །ཅེས་བརྗོད་མི་དམིགས་སྟོང་པའི་ངང་ལ་བཞག །གཏོར་མའི་ལས་རྒྱུད་ཆེན་པོ་ལས། །རྣལ་འབྱོར་གཏོར་མར་བརྩོན་པ་ན། །དེ་ལ་བར་ཆད་སུ་ཡིས་ནུས། །རྣལ་འབྱོར་གཏོར་མར་མི་བརྩོན་ན། །དེ་ཡི་བར་ཆད་སུ་ཡིས་སེལ། །ཅེས་གསུངས་བར་ཆད་སེལ་བའི་མཆོག །སྤུ་གྲི་ཀླད་གཟེར་རྒྱུད་ཆེན་ལས། །གཏོར་མ་འདི་ལ་བརྩོན་བྱས་ན། །བདེ་མཆོག་སྐུ་ཡི་དངོས་གྲུབ་ཐོབ། །ཅེས་གསུངས་མཆོག་གི་དངོས་གྲུབ་ཐོབ། །དེ་ཕྱིར་འདི་ལ་བརྩོན་པར་གྱིས། །དམིགས་པ་འདོན་སྒོམ་སྦྲགས་པ་འདི། །བླ་མ་གུ་རུ་ལེགས་ལྡན་དང་། །པདྨ་མཁྱེན་བརྩེས་བསྐུལ་བ་ལྟར། །རཱ་ག་ཨ་སྱས་འཕྲལ་དུ་སྨྲས། །མཁྱེན་བརྩེ་ལྡན་པས་ཡི་གེ་བྲིས། །ཉེས་འགལ་རྩ་བ་གསུམ་ལ་བཤགས། །དགེ་བས་འདི་དང་འབྲེལ་ཚད་རྣམས། །ཚོགས་གཉིས་ཡོངས་སུ་རྫོགས་པར་ཤོག །མངྒ་ལཾ།། །།