བཀའ་སྲུང་སྤྱིའི་གཏོར་མ་འབུལ་བའི་སྨོན་ཚིག
བཀའ་སྲུང་སྤྱིའི་གཏོར་མ་འབུལ་བའི་སྨོན་ཚིག་ལགས་སོ།
ཨོཾ་ཨཱཿཧཱུྃ། །ཡཾ་རཾ་ཁཾ་ལས་རླུང་མེ་ཐོད་སྐྱེད་སྟེང་། །བྷནྡའི་ནང་དུ་ཟག་མེད་བདུད་རྩི་ཡི། །གཏོར་མ་འདི་ཉིད་འབུལ་བའི་གནས་རྣམས་ནི། །ཀུན་བཟང་ཡབ་ཡུམ་རྒྱལ་བ་རིགས་མཆོག་ལྔ། རྡོ་རྗེ་འཆང་ཆེན་སྟོན་པ་རྡོ་རྗེ་སེམས། །དགའ་རབ་རྡོ་རྗེ་ཤི་སི་ཧ་དང་། །རྒྱ་གར་རིག་འཛིན་བརྒྱད་ཅུ་ལ་སོགས་པ། །རྙིང་པ་བརྒྱུད་པའི་ཞལ་དུ་བ་ལིང་འབུལ། །སྣང་བ་མཐའ་ཡས་ཐུགས་རྗེ་ཆེན་པོ་དང་། །པདྨ་འབྱུང་གནས་རྗེ་འབངས་ཉི་ཤུ་ལྔ། །གཏེར་སྟོན་བརྒྱ་རྩ་ལས་ཅན་ཆོས་བདག་སོགས། །གཏེར་མ་བརྒྱུད་པའི་ཞལ་དུ་བ་ལིང་འབུལ། །རྡོ་རྗེ་
འཆང་ཆེན་རྡོ་རྗེ་རྣལ་འབྱོར་མ། །གསང་བའི་བདག་པོ་དཔལ་ལྡན་ས་ར་ཧ། །རྒྱ་གར་གྲུབ་ཆེན་བརྒྱད་ཅུ་ལ་སོགས་པ། །ཕྱག་ཆེན་བརྒྱུད་པའི་ཞལ་དུ་བ་ལིང་འབུལ། །ཏེ་ལོ་ནཱ་རོ་མར་མི་ལྷ་རྗེ་བཙན། །བཀའ་བརྒྱུད་ཡ་བཞི་འབྲི་སྟག་ཚལ་འབྲུག་བརྒྱད། །མངྒ་ཤྲཱི་གྷིར་ཏི་ཤི་སོགས།། བཀའ་བརྒྱུད་བླ་མའི་ཞལ་དུ་བ་ལིང་འབུལ། །བསྟན་པའི་མངའ་བདག་ཀརྨ་པ་བཅུ་གསུམ། །ཞྭ་དམར་ཉེར་གཅིག་སི་ཏུ་གདན་རབས་དང་། །དཔའ་བོ་རྒྱ་མཚོ་ཀྲེ་ཧོ་དྲུང་པ་སོགས། །ཀཾ་ཚང་བརྒྱུད་པའི་ཞལ་དུ་བ་ལིང་འབུལ། །སྨན་ལྷ་མཆེད་བརྒྱད་སྤྲུལ་པའི་
དྲང་སྲོང་གཉིས། །གཡུ་ཐོག་པ་དང་ཟུར་མཁར་གོང་འོག་གཉིས། །སྨན་གྱི་ལྷ་མོ་དྲང་སྲོང་འབུམ་ཕྲག་སོགས། །གསོ་རིག་བརྒྱུད་པའི་ཞལ་དུ་བ་ལིང་འབུལ། །འཇམ་དབྱངས་ཞི་བ་ལྷ་དང་གསེར་གླིང་པ། །ཇོ་བོ་འབྲོམ་རྔོག་རྒྱལ་སྲས་སྐུ་མཆེད་གསུམ། །ལུང་བསྟན་དགྲ་བཅོམ་བརྒྱད་ཁྲི་ལ་སོགས་པ། །བཀའ་གདམས་བརྒྱུད་པའི་ཞལ་དུ་བ་ལིང་འབུལ། །ཡུམ་ཆེན་འཇམ་དབྱངས་སྒྲོལ་མ་སུ་ཁ་སེ། །ཨཱརྱ་དྷེ་ཝ་དམ་པ་མ་གཅིག་དང་། །བཀའ་བབ་བུ་ཆེན་བཅུ་དྲུག་ལ་སོགས་པའི། །གཅོད་ཡུལ་བརྒྱུད་པའི་ཞལ་དུ་བ་ལིང་འབུལ། །དབང་བསྐུར་རྒྱུད་བཤད་མན་ངག་གནང་བ་ཡིས། །རྩ་བར་བརྒྱུད་པའི་བླ་མ་ཐམས་ཅད་ལ། །དམ་རྫས་བདུད་རྩིའི་གཏོར་མ་འདི་འབུལ་ལོ། །བཞེས་ནས་བདག་ལ་དབང་བསྐུར་བྱིན་གྱིས་རློབས། །གུ་རུ་སྐུ་གསུམ་སྐུ་ལྔ་མཚན་མཆོག་བརྒྱད། །རྟ་ཕག་ཡབ་ཡུམ་གིང་ཆེན་སྒོ་མ་བཞི། །ཐུགས་སྒྲུབ་འོད་འབར་ལྷ་ཚོགས་ཐམས་ཅད་ལ། །རྣམ་དག་དམ་རྫས་བདུད་རྩིའི་གཏོར་མ་འབུལ། །འཁོར་ལོ་སྡོམ་པ་རྡོ་རྗེ་རྣལ་འབྱོར་མ། །ཀྱེ་རྡོར་གསང་འདུས་དུས་འཁོར་འཇིགས་བྱེད་སོགས། །མཱ་ཡ་གདན་
བཞི་སངས་རྒྱས་ཐོད་པ་སོགས། །རྒྱུད་སྡེ་བཞི་ཡི་ལྷ་ལ་བ་ལིང་འབུལ། །དམར་ནག་མེ་ཕྲེང་ཡུམ་མཆོག་ཁྲོས་དམར་ནག །གོ་ཆ་ལྷ་ལྔ་བྱ་ཁྱུང་རིགས་ལྔའི་ཚོགས། །དྲག་པོ་རིགས་བཞི་ཁྲོ་བཅུ་ལ་སོགས་པ། །རིག་འཛིན་ཁྲོས་པའི་ལྷ་ལ་བ་ལིང་འབུལ། །པདྨ་རྒྱལ་པོ་བདུད་འདུལ་གྲོ་བོ་ལོད། །གིང་བཞི་ཡབ་ཡུམ་རྒྱལ་པོ་ཆེན་པོ་བཞི། །གསང་བདག་ཀླུ་འདུལ་ཁྱུང་དང་ཁྲོ་བོའི་ཚོགས། །ཡི་དམ་ལྷ་ཚོགས་རྣམས་ལ་བ་ལིང་འབུལ། །ཌཱཀྐི་མཚོ་རྒྱལ་སྒྲོལ་མ་དཀར་ལྗང་གཉིས། །ལོ་མ་ཅན་དང་ཕག་ཁྲོས་སེང་གསུམ་སོགས། །ཡི་དམ་མཁའ་འགྲོའི་ཚོགས་ལ་བ་ལིང་འབུལ། །བཞེས་ནས་མཆོག་དང་ཐུན་མོང་དངོས་གྲུབ་སྩོལ། །ཕྱག་བཞི་ཕྱག་དྲུག་བེར་ནག་གུར་གྱི་མགོན་། །སྲིན་མགོན་གཉེན་མགོན་བྲག་ལྷ་མགོན་པོ་དང་། །དུད་སོལ་རང་བྱུང་རྒྱལ་མོ་ལ་སོགས་པའི། །ཆོས་སྐྱོང་མ་མགོན་ཚོགས་ལ་བ་ལིང་འབུལ། །མ་ནིང་སྡེ་ལྔ་སྲོག་བདུད་དཔལ་འབར་མ། །སེང་གདོང་ཡབ་ཡུམ་བམ་རོ་སྡེ་བརྒྱད་སོགས། །སྤུ་གྲི་མཆེད་གསུམ་མ་གཟའ་དམ་གསུམ་སོགས། །བཀའ་སྲུང་དམ་ཅན་རྣམས་ལ་བ་ལིང་
འབུལ། །རྣམ་སྲས་རིགས་ལྔ་ཛཾ་ལྷ་རིགས་དགུ་སོགས། །ནོར་རྒྱུན་མ་དང་ཨཱརླ་རེ་མན་ཏ། །ཚོགས་བདག་རིགས་ལྔ་རྟ་བདག་ཀུ་བེ་ར། །ཨ་པར་ཙིཏྟ་ནོར་བདག་ཡེ་ཤེས་གྲགས། །ནོར་དབང་ལ་སོགས་ནོར་ལྷའི་ཚོགས་རྣམས་ལ། །གཏོར་མ་འདི་འབུལ་དགྱེས་པར་བཞེས་ནས་ཀྱང་། །ཟད་མེད་ལོངས་སྤྱོད་གཏེར་གྱི་དངོས་གྲུབ་སྩོལ། །ཇོ་བོ་སྤྱག་བཙན་སྐྱ་དགུ་བྲན་བཅུ་དང་། །མཁའ་རི་སྨྱོ་ཁ་ངོམ་རྒྱལ་མཁར་ནག་དང་། །རྟ་འདྲ་མོ་སྟོན་བྲེ་རང་བཙན་རྒོད་སོགས། །བཀའ་སྡོད་ཕོ་ཉའི་ཚོགས་ལ་བ་ལིང་འབུལ། །བཞེས་ནས་ཅི་བསམ་དོན་ཀུན་འགྲུབ་པར་མཛོད། བདག་གི་ནད་རིགས་ཀུན་ཞི་ཚེ་བསོད་དཔལ། །རྒྱས་ཤིང་སྣང་སྲིད་དབང་དུ་འདུ་བར་མཛོད། །དགྲ་བགེགས་ལོག་འདྲེན་ཆོས་ལོག་དམ་ཉམས་རྣམས། །སྐད་ཅིག་ཐལ་བ་རྡུལ་བཞིན་བརླགས་ནས་ཀྱང་། །བདག་གི་བསམ་པ་ཐམས་ཅད་བསྒྲུབ་ཏུ་གསོལ། །རུ་དྷེ་ཝ་ཌཱཀྐི་ནི་དྷརྨ་པ་ལ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་གཏོར་མ་འབུལ་བའི་སྨོན་ཚིག་འདི་ནི་མཁས་གྲུབ་རཱ་ག་ཨ་སྱས་མཛད་པའོ། །བཀྲ་ཤིས་ཤོག། །།