བརྟན་གསོལ་བསྡུས་པ།
བརྟན་གསོལ་བསྡུས་པ་ནི༔ གུ་རུ་དྷེ་ཝ་ཌཱཀྐི་ནི་ཧཱུྃ། ཨོཾ་ཨ་ཀཱ་རོ་སོགས། གཏོར་མ་བྱིན་གྱིས་བརླབས་ནས༔ རང་ཉིད་པདྨ་འབྱུང་གནས་སྐུར་གསལ་བས༔ སྐད་ཅིག་ཉིད་ལ་སྤྱན་དྲངས་མདུན་བཞུགས་བསམ༔ བྷྱོཿ ཕྱི་ལྟར་ཤེལ་གུར་སྐུ་གསུང་ཐུགས་ཀྱི་འཕྱོ༔ ནང་ལྟར་བདུད་མཁར་རྩེ་དགུ་དགུང་དུ་འཕྱོ༔ གསང་བ་བདེ་མཆོག་དམ་ཚིག་འཁོར་ལོའི་གནས༔ མ་མོ་མཁའ་འགྲོ་ལྷ་སྲིན་རླུང་ལྟར་འཚུབ༔ དེ་འདྲའི་གནས་ནས་རྡོ་རྗེ་གཡུ་སྒྲོན་མ༔ འཁོར་བཅས་མཆོད་ཕྱིར་སྤྱན་འདྲེན་གཤེགས་སུ་གསོལ༔ ཡིད་སྤྲུལ་གཙོ་འཁོར་འཚམས་པའི་གནས་འདིར་བཞུགས༔ སྔོན་གྱི་ཁས་བླངས་དམ་ཚིག་དྲན་མཛོད་ལ༔ བདག་གིས་བཅོལ་བའི་ཕྲིན་ལས་འགྲུབ་པར་མཛོད༔ བཛྲ་ས་མ་ཡ་ཛ་ཛཿ ཛཿཧཱུྃ་བཾ་ཧོ༔ ཏིཥྛ་ལྷན༔ ཉེར་སྤྱོད་བདུན་དང་འདོད་པའི་ཡོན་ཏན་ལྔ༔ བཀྲ་ཤིས་རྫས་རྟགས་བརྒྱད་དང་རིན་ཆེན་བདུན༔ ཕྱི་ནང་གསང་མཆོད་དངོས་འབྱོར་ཡིད་ཀྱིས་སྤྲུལ༔ གཏོར་མ་ཟག་མེད་བདུད་རྩིའི་རྒྱ་མཚོ་འདི༔ རྡོ་རྗེ་གཡུ་སྒྲོན་མཆེད་ལྔ་དར་འཛིན་བརྒྱད༔ བརྟན་མ་བཅུ་གཉིས་དཀར་མོ་ཉི་ཤུ་བཞི༔ གཟུང་མཆོད་ཞེ་བརྒྱད་སྨན་ཕྲན་བྱེ་བ་
འབུམ༔ ཡབ་ཡུམ་མིང་པོ་དམག་དཔོན་ལ་སོགས་པའི༔ འཁོར་དང་བཅས་ལ་འབུལ་ལོ་དགྱེས་པར་རོལ༔ ཐམས་ཅད་མ་ལུས་མཉེས་ཤིང་ཚིམ་གྱུར་ཅིག༔ ཨོཾ་བཛྲ་པྲ་མོ་ཧ་ཧྲིང་ཧྲིང་སྭཱ་ཧཱ༔ ས་པཱ་རི་ཝཱ་ར་ཨི་དཾ་བ་ལི་ཁ་ཁ་ཁཱ་ཧི་ཁཱ་ཧྲཱི༔ ཨརྒྷཾ་སོགས། ཤབྡ་པྲ་ཏཱིཙྪ་སྭཱ་ཧཱཿ བྷྱོཿ ཀུན་ཏུ་བཟང་མོ་རིག་པའི་རང་རྩལ་ལས༔ སྲིད་པའི་རྒྱལ་མོ་སྲིད་པ་ཆག་གས་བྱེད་མ༔ ཨེ་ཀ་ཙ་ཏི་གཡུ་ཡི་རལ་གཅིག་མ༔ བདེ་མཆོག་མཚམས་མ་གཤིན་རྗེའི་མཆེ་བ་ཅན༔ རྗེ་བཙུན་སྒྲོལ་མ་སྔོན་མོའི་ཐུགས་སྤྲུལ་མ༔ ཡེ་ཤེས་ངང་ལས་འཇིག་བློ༔ རྟེན་ཚུལ་བཟུང་མ༔ འཇིག་རྟེན་སྒྲོལ་མ་སྔོན་མོ་གཡུ་སྒྲོན་མ༔ བཅོམ་ལྡན་རྡོ་རྗེ་སེམས་དཔའི་ཕྱག་བྱས་མ༔ འཕགས་པ་སྤྱན་རས་གཟིགས་ཀྱི་ལྕམ་གཅིག་མ༔ ཙཱ་རི་ཏྲ་ཡི་ཞིང་སྐྱོང་ལྷན་སྐྱེས་མ༔ ནམ་མཁའི་ཉི་འོད་འབར་བའི་ལྷན་ཅིག་མ༔ ཞི་བའི་ལས་མཛད་དཀར་མོ་འོད་ལྡན་མ༔ རྒྱས་པའི་ལས་མཛད་གནམ་མཚོ་ཕྱུག་མོ་མ༔ དབང་གི་ལས་མཛད་འཇིག་རྟེན་གསུམ་དབང་མ༔ ཕུར་པའི་སྲུང་མ་རྡོ་རྗེ་ཕག་བྱིན་མ༔ དྲག་པོའི་ལས་མཛད་བདུད་མོ་རེ་མ་ཏི༔ བརྟན་མ་དམག་གི་རྒྱལ་མོ་དམག་ཟོར་མ༔ ཤིན་ཏུ་
ཁྲོས་ཚེ་མགོ་དགུ་སྤྱང་ཞོན་མ༔ བརྟན་མ་ཀུན་གྱི་གཙོ་མོ་གཡུ་སྒྲོན་མ༔ འཁོར་དང་བཅས་ལ་བདག་གིས་བསྟོད་པར་བགྱི༔ དམ་རྫས་བརྒྱན་པའི་མཆོད་གཏོར་འདི་བཞེས་ལ༔ བདག་ཅག་དཔོན་སློབ་བསྲུང་བྱ་ཐམས་ཅད་ཀྱི༔ ནད་གདོན་བར་ཆད་ཐམས་ཅད་ཞི་བ་དང་༔ ཚེ་དང་བསོད་ནམས་དཔལ་འབྱོར་རྒྱས་པ་དང་༔ སྣང་སྲིད་དབང་སྡུད་དགྲ་བགེགས་ཚར་གཅོད་སོགས༔ ཅི་བསམ་དོན་ཀུན་འབད་མེད་འགྲུབ་པ་དང་༔ ཚེ་དང་སྒྲུབ་པ་མཐའ་རུ་ཕྱིན་པ་ཡི༔ སྡོང་གྲོགས་མཛོད་ཅིག་མ་སྲིང་བརྟན་མའི་ཚོགས༔ དམ་ཚིག་དུས་ལ་བབ་བོ་ས་མ་ཡ༔ སྔགས་འཆང་རཱ་ག་ཨ་སྱས་སྦྱར་བའོ། །མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།