དཔལ་ཡེ་ཤེས་ཀྱི་མགོན་པོ་ཕྱག་བཞི་པའི་ཚོགས་ལས་དངོས་གྲུབ་ཀུན་འབྱུང་།
དཔལ་ཡེ་ཤེས་ཀྱི་མགོན་པོ་ཕྱག་བཞི་པའི་ཚོགས་ལས་དངོས་གྲུབ་ཀུན་འབྱུང་ཞེས་བྱ་བ་བཞུགས་སོ།།
ཨོཾ་ཁཎྜ་རོ་ཧེ་ཧཱུྃ་ཕཊ༔ ཨོཾ་སྭ་བྷ་ཝ་ཤུདྡྷསརྦ་དྷིམྨསྭ་བྷ་ཝ་ཤུདྡྷོཉཧཾ། སྟོང་པའི་ངང་ལས་ཡཾ་ལས་རླུང་རཾ་ལས་མེ་ཀཾ་ལས་མི་མགོའི་སྒྱེད་པུ་གསུམ། དེའི་སྟེང་དུ་ཨ་ལས་ཐོད་པའི་སྣོད་ཕྱི་དཀར་ལ་ནང་དམར་བ་ཡངས་ཤིང་རྒྱ་ཆེ་བའི་ནང་དུ་དགྲ་བགེགས་བྱད་མ་བསྒྲལ་བའི་ཤ་ཡི་རི་བོ་ཁྲག་གི་རྒྱ་མཚོ། རུས་པའི་གྲམ་རི། ཤ་ལྔ་བདུད་རྩི་ལྔ་ཡི་སྟེང་དུ་ཨོཾ་དཀར་པོ་ཨཱདམར་པོ་ཧཱུྃ་སྔོན་པོ་གསུམ་སྟེང་ནས་སྟེང་དུ་བརྩེགས་པ་ལས་འོད་ཟེར་འཕྲོས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཡེ་ཤེས་ཀྱི་བདུད་རྩི་བཀུག །ཡི་གེ་གསུམ་ལ་ཐིམ་འོད་དུ་ཞུ་
ནས་འོག་གི་ཤ་ཁྲག་དང་འདྲེས་པས། །ཁ་དོག་དཀར་བ་རེག་བྱ་འཇམ་པ་རོ་མངར་བ་ནུས་པ་ཕུན་སུམ་ཚོགས་པའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ་ཧ་ཧོ་ཧཱི༔ ལན་གསུམ་བརྗོད། ཨོཾ་ཨཱཿཧཱུྃ། འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས། །རྩ་བའི་བླ་མ་བརྒྱུད་པར་བཅས་པ་རྣམས། །སྐུ་མདོག་སྔོ་བསང་རྡོ་རྗེ་དྲིལ་བུ་འཛིན། །ཚོགས་གཉིས་རབ་རྫོགས་ཐུགས་རྗེའི་རང་བཞིན་ཅན། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །དགྲ་བགེགས་བྱད་མ་བསྒྲལ་བའི་ཚོགས་མཆོད་བཞེས། །ཐུགས་དམ་བརྒྱུད་བསྐུལ་ཐུགས་རྗེའི་བྱིན་གྱིས་རློབས། །
བདག་ཅག་དཔོན་སློབ་ཡོན་མཆོད་བསྲུང་བྱ་ལ། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །ཆོས་དབྱིངས་རྡོ་རྗེ་བཙུན་མོའི་བྷ་ག་ནས། །ཡི་དམ་དཔལ་ཆེན་འཁོར་ལོ་བདེ་བའི་མཆོག །ཐབས་ཤེས་གཉིས་སུ་མེད་པའི་ཡུམ་ལ་འཁྱུད། །དྲུག་ཅུ་རྩ་གཉིས་དཔའ་བོ་མཁའ་འགྲོར་བཅས། །ཡི་དམ་ཞི་ཁྲོ་མཁའ་འགྲོའི་འཁོར་གྱིས་བསྐོར། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །དགྲ་བགེགས་བྱད་མ་བསྒྲལ་བའི་ཚོགས་མཆོད་བཞེས། །ཐུགས་དམ་བརྒྱུད་བསྐུལ་ཐུགས་རྗེའི་བྱིན་གྱིས་རློབས། །བདག་ཚེཅག་དཔོན་སློབ་ཡོན་མཆོད་བསྲུང་བྱ་ལ། །ཟག་མེད་བདེ་བ་ཆེན་པོའི་དངོས་གྲུབ་སྩོལ། །མཐིང་ནག་གྲུ་གསུམ་འབར་བའི་དཀྱིལ་འཁོར་ནས། །བདེ་གཤེགས་ཐུགས་སྤྲུལ་ཡེ་ཤེས་མགོན་པོ་ནི། །ཞལ་གཅིག་ཕྱག་བཞི་སྐུ་མདོག་མཐིང་ནག་འཇིགས། །སྣ་ཚོགས་རྒྱུན་ལྡན་སྤྲུལ་པ་བསམ་མི་ཁྱབ། །སྐུ་ལྔའི་མགོན་པོ་རྒྱ་མཚོའི་ལྕམ་དྲལ་བཅས། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །དགྲ་བགེགས་བྱད་མ་བསྒྲལ་བའི་ཚོགས་མཆོད་བཞེས། །ཐུགས་དམ་བརྒྱུད་བསྐུལ་ཐུགས་རྗེའི་བྱིན་གྱིས་རློབས། །བདག་
ཅག་དཔོན་སློབ་ཡོན་མཆོད་བསྲུང་བྱ་ལ། །མཆོག་དང་ཐུན་མོང་དངོས་གྲུབ་བསྩལ་དུ་གསོལ། །གཏུམ་དྲག་མེ་ལྟར་འབར་བའི་དཀྱིལ་འཁོར་ནས། །ལས་ཀྱི་མགོན་པོ་བྱ་རོག་གདོང་ཅན་བརྒྱད། །ཞལ་གཅིག་ཕྱག་གཉིས་སྐུ་མདོག་ནག་ལ་རྔམས། །དུར་ཁྲོད་རྒྱན་ལྡན་དགྲ་བགེགས་སྲོག་རྩ་གཅོད། །ནག་པོ་སྟོང་སྡེ་ལས་མགོན་རྒྱ་མཚོས་བསྐོར། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །དགྲ་བགེགས་བྱད་མ་བསྒྲལ་བའི་ཚོགས་མཆོད་བཞེས། །ཐུགས་དམ་བརྒྱུད་བསྐུལ་ཐུགས་རྗེའི་བྱིན་གྱིས་རློབས། །བདག་ཅག་དཔོན་སློབ་ཡོན་མཆོད་བསྲུང་བྱ་ལ། །དགྲ་བགེགས་བྱེད་མ་བསྒྲལ་བའི་ཕྲིན་ལས་མཛོད། །ཧཱུྃ། བྱང་ཤར་རླུང་ནག་འཚུབ་མའི་དཀྱིལ་འཁོར་ནས། །ཡུམ་མཆོག་ཨེ་ཀ་ཙ་ཏྲི་རྩ་འཇིབ་མ། །སྦྱོར་སྒྲོལ་ཡུམ་གསུམ་ཤ་ཟ་ཁྲག་འཐུང་མ། །སྣ་ཚོགས་རྒྱན་ལྡན་དམ་ཉམས་སྐྱེ་རྒྱུད་གཅོད། །ལས་ཀྱི་མ་མོ་བྱེ་བ་འབུམ་གྱིས་བསྐོར། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །དགྲ་བགེགས་བྱད་མ་བསྒྲལ་བའི་ཚོགས་མཆོད་བཞེས། །ཐུགས་དམ་བརྒྱུད་བསྐུལ་ཐུགས་རྗེའི་བྱིན་གྱིས་
རློབས། །བདག་ཅག་དཔོན་སློབ་ཡོན་མཆོད་བསྲུང་བྱ་ལ། །དམ་ཉམས་དགྲ་བགེགས་བསྒྲལ་བའི་ཕྲིན་ལས་མཛོད། །ཧཱུྃ། བསྐལ་པ་མེ་ལྟར་འབར་བའི་དཀྱིལ་འཁོར་ནས། །ལྷ་མགོན་ཁྱུང་ནག་མཁའ་ལ་གཤོག་པ་རྡེབ། །སེང་གེའི་གདོང་ཅན་ཤ་ཟ་འབུམ་དང་བཅས། །ལེགས་ལྡན་དམག་དཔོན་བརྒྱད་དང་གནོད་སྦྱིན་ཁྲི། །དཔལ་མགོན་བདུན་ཅུ་སྡེ་བརྒྱད་ལ་སོགས་པ། །བཀའ་སྲུང་དམ་ཅན་རྒྱ་མཚོ་འཁོར་དང་བཅས། །ཡེ་ཤེས་ཚོགས་ལ་སྤྱན་འདྲེན་གཤེགས་སུ་གསོལ། །དགྲ་བགེགས་བྱད་མ་བསྒྲལ་བའི་ཚོགས་མཆོད་བཞེས། །ཐུགས་དམ་བརྒྱུད་བསྐུལ་ཐུགས་རྗེའི་བྱིན་གྱིས་རློབས། །བདག་ཅག་དཔོན་སློབ་ཡོན་མཆོད་བསྲུང་བྱ་ལ། །ཕྲིན་ལས་རྣམ་བཞིའི་དངོས་གྲུབ་བསྩལ་དུ་གསོལ། །ཚོགས་ཕུད་ཕུལ། གུ་རུ་དྷེ་ཝ་ཌཱཀྐི་ནི་ཤྲཱི་མ་ཧཱ་ཀཱ་ལ་སརྦ་དྷརྨ་པ་ལ་ས་པཱ་རི་ཝཱ་ར་གྷ་ན་ཙཀྲ་པཱུ་ཛ་ཁ་ཁ་ཁཱ་ཧི་ཁཱ་ཧི། མགོན་པོའི་གཡག་བསྐང་ནི། ཨོཾ་སྭ་བྷ་ཝས་སྦྱངས། སྟོང་པའི་ངང་ལས་ཡི་གེ་ཏི་ལས་གཡག་ནག་རྔམས་ཤིང་བརྗིད་པ་དང་། ལུག་ནག་སྤྱི་དཀར་རྣམས་དཔྲལ་བར་མར་གྱིས་བྱུགས་ཤིང་རྭ་ལ་དར་ནག་གིས་ཅོད་པན་འཕུར་བ། དར་ཚོན་
རྔ་ཚོན་སྔགས་བྱང་གིས་དཔུང་པ་མཛེས་པ། དགྲ་བགེགས་ཀྱི་བམ་རོ་བཀལ་བ། ཞུན་མར་ཉི་ཟླ་ལྟར་གསལ་བ། དར་ནག་གི་རུ་མཚོན་སྤྲིན་ལྟར་གཏིབས་པ། ཤ་ཆེན་གྱི་དུད་པ་ན་བུན་ལྟར་འཕྱུར་བ། བདུད་རྩིའི་གསེར་སྐྱེམས་མཚོ་ལྟར་འཁྱིལ་ཞིང་དམར་གྱི་གཏོར་མ་རི་ལྟར་སྤུངས་པ། དེ་འདྲ་རེ་རེ་ལ་གྲངས་མེད་པ་འཕྲོ་བར་གྱུར༔ ཨོཾ་སརྦ་དྷརྨ་པཱུ་ཙ་པཉྩ་རཏྣ་ཀཱ་ཡ་ཀོ་ཏི་བྷི་བྷ་ཝ་ཀ་སྭ་བྷ་ཝ་ཤུདྡྷོཉཧཾ། བསམ་གྱིས་མི་ཁྱབ་པའི་སྔགས་སོ། །ཁྲག་མཚོ་ཁོལ་མ་ནས་གསུངས་སོ། །ཧཱུྃ། མ་ཧཱ་ཀཱ་ལ་མཐུ་བོ་ཆེ། །ནག་པོ་ཆེན་པོ་ལྕམ་དྲལ་དང་། །ལས་མཁན་ནག་པོ་བྱ་རོག་གདོང་། །ཆོས་ཀྱི་དབྱིངས་ནས་སྐུ་བཞེངས་ལ། །གཤེགས་ཤིག་བུ་ཡི་གནས་འདིར་གཤེགས། །བུ་ཡི་གནས་མཆོག་དམ་པ་ནས། །ཁྱེད་དང་མཐུན་པའི་དམ་རྫས་ནི། །གཡག་ལུག་ནག་པོ་མར་གྱིས་བྱུག །དར་ནག་རུ་མཚོན་རྭ་ལ་བརྒྱན། །ཕྲག་པར་དགྲ་བགེགས་ལིངྒ་བསྐྱོན། །གསེར་སྐྱེམས་བདུད་རྩིས་བྲན་པ་འདིས། །ནག་པོ་ཆེན་པོའི་ཐུགས་དམ་བསྐང་། །བྱ་རོག་གདོང་ཅན་ལ་སོགས་པའི། །འཁོར་གྱི་མ་དང་མཁའ་འགྲོའི་ཚོགས། །སྣང་གསལ་
འོད་ཀྱི་ཞུན་མར་དང་། །ཤ་ཆེན་སྤོས་ཀྱི་དུད་སྤྲིན་གྱིས། །ནག་པོ་ཆེན་པོའི་ཐུགས་སྤྲུལ་ཏེ། །མཁའ་ལ་སྤྲིན་ལྟར་གཏིབས་ནས་ཀྱང་། །སྒྲུབ་པ་པོ་ལ་བུ་བཞིན་སྐྱོངས། །དར་ནག་ལྕགས་ཀྱི་རུ་མཚོན་གྱིས། །བྱ་རོག་གདོང་ཅན་དཔོན་དང་གཡོག །ཐུགས་དམ་གནད་ནས་བསྐུལ་བའི་ཚེ། །མྱུར་དུ་བསྐྱོད་ཅིག་མཁའ་འགྲོའི་ཚོགས། །རོ་ལངས་ལ་སོགས་གཅན་གཟན་སྣ་ཚོགས་དང་། །བསྟན་སྲུང་བཀའ་ཡི་བྱ་ར་བྱེད་པ་རྣམས། །བསྐང་ངོ་བསྐལ་པར་ཐུགས་དམ་བསྐང་། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། ལྷ་ཆེན་མ་ཧཱ་ཀཱ་ལ་གསན་ཅིང་དགོངས་སུ་གསོལ། །མ་ཧཱ་ཀཱ་ལའི་དཀྱིལ་འཁོར་སྒོར་ཞུགས་ནས། །བཀའ་ཡི་དམ་ཚིག་གཉན་པོ་སྲུང་རྒྱུ་ལ། །བཀའ་ལྟར་མ་འགྲུབ་གཞུང་བཞིན་རྔོ་མ་ཐོགས། །བསྙེན་སྒྲུབ་དུས་འདས་ཕུད་དང་གཏོར་མ་ཆག །རྩ་བ་ཡན་ལག་དམ་ཚིག་ཉམས་པ་ཀུན། །རྡོ་རྗེ་སྲིན་པོའི་དུར་ཁྲོད་ཚོགས་ལ་བཤགས། །ལུག་ནག་ཁྱི་ནག་གཅན་གཟན་ལ་སོགས་པ། །ཤ་ཁྲག་དམར་གྱི་གཏོར་མ་ཆག་གྱུར་ཏེ། །བྱ་རོག་གདོང་ཅན་འཁོར་དང་བཅས་ལ་བཤགས། །བསྟན་སྲུང་མཐུ་ཡི་དངོས་གྲུབ་
བསྩལ་དུ་གསོལ། །གཞན་ཡང་ཁྱོད་ལ་མཆོད་སྒྲུབ་ལྷར་བཟུང་ནས། །དུས་ཀྱི་ཚོགས་ཕུད་ནང་ནུབ་མཆོད་རྒྱུ་ལ། །མཆོད་པའི་འབྱོར་ཚོགས་ཆུང་སྟེ་སྐུ་མ་བརྙེས། །ཕྱི་རྟེན་གཡག་ལུག་ལ་སོགས་མ་འབྱོར་བས། །སྐུ་ཡི་དམ་ཚིག་ཉམས་པ་མཐོལ་ལོ་བཤགས། །བཟླས་བརྗོད་སྔགས་ཚིག་ལོང་གཏམ་བར་དུ་ཆོད། །ནག་པོའི་སྲོག་སྙིང་གནད་ནས་མ་ཁོལ་ཏེ། །བཟླས་བརྗོད་སྔགས་ཀྱི་དམ་ཚིག་ཉམས་པ་ཀུན། །ལྷ་ཆེན་འཁོར་དང་བཅས་ལ་མཐོལ་ལོ་བཤགས། །ཡི་དམ་རྩེ་གཅིག་གཞུང་བཞིན་སྒོམ་སྒྲུབ་ལ། །ཏིང་འཛིན་རྩེ་གཅིག་མ་གསལ་ནག་པོ་བསྐྱེད། །ཐུགས་དམ་དམ་ཚིག་ཉམས་པ་མཐོལ་ལོ་བཤགས། །དར་ནག་བྷན་དམ་ཚིག་ལ་སོགས་པ། །རྟེན་རྫས་མ་ཚོགས་ཡན་ལག་དམ་ཚིག་ཉམས། །ནག་པོ་འཁོར་དང་བཅས་ལ་མཐོལ་ལོ་བཤགས། །གནོང་ངོ་འགྱོད་དོ་མ་དང་མཁའ་འགྲོའི་ཚོགས། །མཐོལ་ལོ་བཤགས་སོ་ཆོས་སྐྱོང་སྲུང་མའི་ཚོགས། །མཐོལ་བཤགས་བཟོད་གསོལ་དང་དུ་ཡར་བཞེས་ལ། །སྒྲིབ་མེད་དངོས་གྲུབ་རྣམ་གཉིས་བསྩལ་དུ་གསོལ། །བསྐང་བཤགས་འདི་སྤུ་གྲི་ཀླད་གཟེར་གྱི་རྒྱུད་ཚིག་ཕྱག་བཞི་པ་ཉིད་
ཀྱི་གསུངས་ཡིན་པས། གཞན་བསྐང་གསོ་ཀློག་པ་ལས་ཀྱང་འདི་རང་ཚར་མང་དུ་བཏོན་ན་བྱིན་རླབས་ཆེའོ། །ཨོཾ་ས་མ་ཡ། ཨཱས་མ་ཡ། ཧཱུྃ་ས་མ་ཡ། ཨོཾ་བཛྲ་ཀ་ཝུ་ཝ་ཝ་པ་ཤ་ཡ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ། ཨོཾ་མ་ཧཱ་ཀཱ་ལ་སུ་ཏྲི་ཡ་མ་དུ་ཛཿ ཨོཾ་བཛྲ་སཏཱ་ས་མ་ཡ་སོགས་ཡིག་བརྒྱ་བཟླས་པས་དམ་ཚིག་ཉམས་ཆག་བྱུང་ན་བསྐང་ཞིང་བཤགས་པ། ས་མ་ཡའི་དམ་ཚིག་གི་སྔགས་བསྡེབ་ཟབ་མོ་གཉན་མགོན་པོ་གཞུང་ངོ་། །དེ་ནས་གཏོར་བསྔོས་ལ་འཇུག །ཚོགས་བར་པས་བསྐང་བ་གསོ་བར་བྱ། དེ་ནས་རྡོ་རྗེ་སློབ་དཔོན་ནས་རིམ་པར་དྲངས་ནས་ཚོགས་ལ་རོལ། ཧོ༔ གཟིགས་ཤིང་མཛེས་ལྡན་དམ་པའི་ཆོས། །འདི་ལ་ཐེ་ཚོམ་བྱ་མི་རུང་། །བྲམ་ཟེ་ཁྱི་དང་གདོལ་བ་གསུམ། །རང་བཞིན་གཅིག་ཏུ་དགོངས་ཏེ་རོལ། །ཅེས་དྲངས་ལ། ཧོ༔ རིན་ཐང་མེད་པའི་ལེགས་འོང་ཆོས། །གཟུང་འཛིན་མཚན་མ་ཀུན་སྤང་བའི། །བླང་དོར་ཆོས་ཀུན་བྲལ་བ་ཡིས། །དེ་བཞིན་ཉིད་ལ་བདག་ཕྱག་འཚལ། །ཨ་ལ་ལ་ཧོ༔ ཞེས་རོལ། ལྷག་མ་བྲན་ལ། ཕུད་དང་ལྷག་མའི་གཏོར་མ་བཟང་ཞིང་རྒྱ་ཆེ་བར་གྱུར། ཨོཾ་ཨཱཿཧཱུྃ། ཨུཙྪིཥྛ་བཛྲ་ཨ་ཧ་ཧ་ཏྲེ་པ་ཏྲེ་པཾ། ཞེས་བྱིན་གྱིས་བརླབས་སོ། །ཧཱུྃ། དཔལ་ལྡན་མགོན་པོའི་འཁོར་དུ་གཏོགས་པ་ཡི། །ཕྱི་འཁོར་སྐྱོང་
བའི་སྲུང་མ་དམ་ཚིག་ཅན། །དབང་ཕྱུག་མཁའ་འགྲོ་གིང་དང་ལངྐ་དང་། །ཕྲ་མེན་ཤུགས་འགྲོ་གཤིན་རྗེ་སྲིན་པོ་དང་། །འཇིགས་པའི་གཟུགས་ལ་རྔམ་པའི་། ཚོཆ་བྱེད་ཅན། །ལེགས་ཉེས་སྟངས་འཛིན་དམ་ཚིག་རྗེས་གཅོད་ཅིང་། །རྫུ་འཕྲུལ་ཐོགས་མེད་དཔལ་གྱི་ཕ་འབབ་སྡུད། །རིག་འཛིན་དྲོད་ཉུལ་རྣལ་འབྱོར་ཚོགས་ཁང་འགྲིམ། །རང་རང་སྤྲུལ་པ་འཁོར་དང་བཅས་པ་རྣམས། །ཞལ་ཟས་ལྷག་མའི་གཏོར་མ་འདི་བཞེས་ལ། །འཁོར་སྲུང་རྐྱེན་ཟློག་ཕྱི་ནང་བར་ཆད་སོལ། །བཅོལ་བའི་ཕྲིན་ལས་མ་ལུས་འགྲུབ་པར་མཛོད། །ཨོཾ་ཨུཙྪིཥྛ་སརྦ་དྷ་ཀི་ནི་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཕུད་ལ་མི་དབང་ཞིང་ལྷག་མ་ལ་དབང་བའི་འབྱུང་པོ་ནམ་མཁའ་དང་མཉམ་པ་ཚིམ་པར་གྱུར་ཅིག །ཡེ་ཤེས་མགོན་པོ་ཕྱག་བཞི་པའི་བསྐུལ་པ་ནི། བྷྱོཿ དཔལ་ལྡན་མགོན་པོ་ཡབ་ཡུམ་འཁོར་བཅས་རྣམས། །དགྲ་སྒྲོལ་བགེགས་འདུལ་དམག་ལ་ཆས་པའི་ཚེ། །བྱ་རོག་གདོང་ཅན་ལ་སོགས་ལས་མཁན་རྣམས། །དམ་ཉམས་དགྲ་བོའི་སྲོག་རྩ་དམར་པོ་ཆོད། །རྒྱལ་ཆེན་སྡེ་བཞིའི་རུ་དར་པུ་རུ་རུ། །ཕྱོགས་སྐྱོང་བཅུ་ནི་ནམ་མཁའི་སྤྲིན་ལྟར་གཏིབས། །ལྷ་སྲིན་སྡེ་
བརྒྱད་བསྭ་སྒྲ་ཏི་རི་རི། །བཀའ་གཉན་ཤན་པའི་གྲི་ཐོག་ཟངས་སེ་ཟང་། །ནག་པོ་སྟོང་གི་ཕོ་ཉ་གློག་ལྟར་འཁྱུགས། །ཤ་ཟ་འབུམ་གྱི་རྐན་སྒྲ་འབྲུག་ལྟར་ལྡིར། །མ་མོ་བྱེ་བས་གདུང་དབྱངས་ཀྱུ་རུ་རུ། །གནོད་སྦྱིན་དུ་མས་སྲོག་གཅོད་ཤ་ར་ར། །ཞིང་སྐྱོང་ས་ཡ་བསྲོ་སྒྲ་དི་རི་རི། །སྟག་སྤྱང་སེངྒེའི་འུར་སྒྲ་ཆེམས་སེ་ཆེམ། །གཏུམ་ཆེན་དུར་བྱས་གཤོག་སྒྲ་འུ་རུ་རུ། །བཞད་དང་ཀང་ཀ་མང་པོ་སྤུངས་སེ་སྤུང་། །བྱ་རོག་ཁྭ་ཏ་མང་པོ་ཐིབས་སེ་ཐིབ། །དོམ་དྲེད་ཁྱི་ནག་མང་པོ་ཀངས་སེ་ཀང་། །མོན་ཕོ་མོན་མོས་བཤུགས་གླུ་ཀྱུ་རུ་རུ། །ཤ་ཁྲག་དམར་གྱི་གཏོར་མ་འདི་བཞེས་ལ། །དམ་ཉམས་དགྲ་བོའི་ཡུལ་ཁམས་དམག་གིས་ཁེངས། །རྡོ་རྗེ་སྲིན་པོ་འཁོར་བཅས་དུས་ལ་བབ། །སྡིག་ཅན་དགྲ་བོ་བསྒྲལ་བའི་ཞིང་བཅུ་འདི། །ལོ་དང་ཟླ་བར་བཞག་པའི་སྐལ་མེད་པས། །ཞག་དང་ཟ་མར་མ་བཞག་ད་ལྟ་སྒྲོལ། །ཞེས་ཐུགས་དམ་རྒྱུན་དུ་བྱ་བའི་ཆེད་དུ། ༧ སྔགས་འཆང་རཱ་ག་ཨ་སྱས་བྲིས་པས་དགེ་བས་གསང་སྔགས་བསྟན་པ་རྒྱས་པར་གྱུར་ཅིག།