མགོན་པོ་ཕྱག་བཞི་པའི་བདེ་སྨོན།
མགོན་པོ་ཕྱག་བཞི་པའི་བདེ་སྨོན་བཞུགས་སོ། །ན་མོ་གུ་རུ་མ་ཧཱ་ཀཱ་ལ་ཡེ། དེ་བཞིན་གཤེགས་པ་བྱེ་བ་ཕྲག །དྲུག་ཅུ་རྩ་བཞིའི་ཐུགས་ཀ་ཡི། །འོད་ཟེར་གཅིག་ཏུ་འདུས་པ་ལས། །བྱུང་བའི་དཔལ་ལྡན་ནག་པོ་ཆེ། །སངས་རྒྱས་ཀུན་གྱི་བསྟན་སྲུང་ཞིང་། །སེམས་ཅན་ཀུན་གྱི་མགོན་སྐྱབས་མཛད། །མ་ཧཱ་ཀཱ་ལ་ཀ་ཝུ་ཝ། །ཞི་རྒྱས་རྒྱུདབང་དྲག་ལས་མཛད་ཕྱིར། །སྐུ་མདོག་ཆ་ལུགས་ཅིར་ཡང་བསྒྱུར། །རྣལ་འབྱོར་སྐུ་ཚེ་བསྲིང་བའི་ཕྱིར། །སྟོན་ཟླའི་མདོག་ཅན་ཤིན་ཏུ་ཞི། །ཕྱག་བཞི་གྲི་གུག་ཐོད་པ་དང་། ཁ་ཊཾ་བདུད་རྩི་ཞགས་པ་འཛིན། །པདྨ་ཟླ་བའི་གདན་སྟེང་དུ། །བཙན་འཁྱིལ་དར་དང་རིན་ཆེན་བརྒྱན། །སྐུ་ལས་བདུད་རྩིའི་རྒྱུན་བབ་ཅིང་། །འོད་ཟེར་དཀར་པོའི་ཕྲེང་བ་ཅན། །བླ་མ་ཡི་དམ་མགོན་པོ་རྣམས། །གཅིག་ཏུ་འདུས་པའི་ངོ་བོ་ཉིད། །མངོན་པར་བྱུང་བའི་རྒྱུད་རྒྱལ་ལས། །གསུངས་པའི་མགོན་དཀར་ཁྱོད་ལ་བསྟོད། །སྟོང་གསུམ་འཇིག་རྟེན་རབ་འབྱམས་ཀྱི། །དཔལ་འབྱོར་བློ་ཡིས་བླངས་ཏེ་མཆོད། །དངོས་གྲུབ་འབྱུང་བའི་རྒྱུད་ཆེན་ལས། །སྐལ་བཟང་འདི་ལས་བྱུང་བ་ཡི། །མགོན་པོ་ཀུན་གྱི་
མཆོག་དམ་པ། །ཁྱོད་ཉིད་ཁོ་ན་ཡིན་གསུངས་ཕྱིར། །བདག་གི་ཆོས་སྐྱོང་མཆོག་ཉིད་དུ། །མགོན་པོ་མཆོག་ཉིད་བསྟེན་འཚལ་གྱི། །བདག་དང་སློབ་མ་བརྒྱུད་པར་བཅས། །དུས་དང་དུས་མིན་འཆི་བ་ཟློག །ཚེ་དང་སྒྲུབ་པ་མཐར་ཕྱིན་ནས། །ཕྲིན་ལས་རྣམ་བཞིའི་དངོས་གྲུབ་སྩོལ། །གྲི་གུག་བརྩེགས་པའི་རྒྱུད་ཆེན་ལས། །བར་མ་དོ་རུ་འཇུག་ཚེ་ཡང་། །ཞིང་ཁམས་དག་པར་འཁྲིད་གསུངས་ཕྱིར། །ཁྱོད་ཉིད་རྟག་ཏུ་མཆོད་བསྒྲུབ་ཅིང་། །འདི་ཕྱི་བར་དོར་སྐྱབས་ཞུ་ཞིང་། །བར་མ་དོ་རུ་འཁྱམས་པའི་ཚེ། །བདེ་བ་ཅན་གྱི་ཞིང་ཁམས་སུ། །མགོན་པོ་ཁྱེད་ཀྱིས་སྐྱེལ་བར་མཛོད། །ཉི་ཟླ་ཐང་ལ་ལྷུང་བ་དང་། །ཆུ་བོ་མེ་རུ་འབར་སྲིད་ཅིང་། །རླུང་ནི་ཞགས་པས་ཟིན་སྲིད་ཀྱང་། །རྒྱལ་བའི་བཀའ་ཡིས་བསླུ་མི་སྲིད། །གསུངས་ཕྱིར་རྒྱུད་སྡེ་ཆེན་པོའི་གསུང་། །མི་བསླུ་འབྲས་བུ་མཆིས་པར་མཛོད། །དེ་ལྟར་འབྲུག་གི་དགུ་གཏོར་ཆེན་མོར། མགོན་པོའི་མདོས་ཆེན་དང་མགོན་དཀར་ལྷ་བདུན་བསྙེན་པའི་ཚེ་རྨི་ལམ་ལ་ཡ་མཚན་འགའ་རེ་དང་། ཡད་ཡུད་མདུན་གྱི་གསལ་ཁུང་ནས། །ཡེ་ཤེས་མགོན་པོ་ཕྱག་བཞི་པ། །མཐིང་ནག་ཤིན་ཏུ་གསལ་བར་ཞིག །གསལ་པོར་མཐོང་སྙམ་བྱེད་པའི་ཕྱིར། །རཱ་
ག་ཨ་སྱ་བདག་གིས་བྲིས། །བདེ་བ་ཅན་དུ་སྐྱེ་བར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།