གསར་རྙིང་སྤྱི་ཡི་ཆོས་སྐྱོང་གལ་ཆེ་ཞིང་རྒྱུན་དུ་རང་གི་ཆོས་སྐྱོང་ཆག་མི་རུང་བ་རྣམས་ཀྱི་གཏོར་བསྔོས།
གསར་རྙིང་སྤྱི་ཡི་ཆོས་སྐྱོང་གལ་ཆེ་ཞིང་རྒྱུན་དུ་རང་གི་ཆོས་སྐྱོང་ཆག་མི་རུང་བ་རྣམས་ཀྱི་གཏོར་བསྔོས་བཞུགས་སོ། །
དེ་ནས་ཆོས་སྐྱོང་སྤྱི་གཏོར་ཐམས་ཅད་དུས་གཅིག་བྱིན་གྱིས་བརླབས་ནས། ཨོཾ་ཨ་མྲྀ་ཏེ་ཧཱུྃ་ཕཊ། ཨོཾ་སྭ་བྷ་ཝ་སོགས། སྟོང་པའི་ངང་ལས་ཡཾ་ལས་རླུང་། །རཾ་ལས་མེ་དང་ཀཾ་ལས་ནི། །མི་མགོ་གསུམ་གྱི་སྐྱེད་པུའི་སྟེང་། །ཨ་ལས་ཡེ་ཤེས་ཀཱ་པ་ལ། །ཤ་ལྔ་བདུད་རྩི་ལྔ་པོ་དང་། །བདུད་དགྲའི་ཤ་རུས་སྤུང་པ་ལ། །ཨོཾ་ཨཱཿཧཱུྃ་གིས་སྐུ་གསུང་ཐུགས། །ཡེ་ཤེས་བདུད་རྩིར་བྱིན་བརླབས་ལ། །ལྷ་ཚོགས་དེ་དག་ཐམས་ཅད་ཀྱིས། །ཧཱུྃ་ལས་བྱུང་བའི་རྡོ་རྗེའི་ལྗགས། །འོད་ཀྱི་སྦུ་གུས་བདུད་རྩི་རྣམས། །དྲང་ཞིང་གསོལ་བས་མཉེས་པར་གྱུར། །རང་ཉིད་ཡི་དམ་རྒྱལ་བ་
རྒྱ་མཚོར་གསལ་བའི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཆོས་སྐྱོང་སྲུང་མ་རྣམས་སྤྱན་དྲངས་དེ་ནི་མངོན་རྟོགས་འདོན་མི་དགོས་སོ།། ཧཱུྃ། །ད་པ་དང་ནི་དམ་ཚིག་གིས། །སྤྱན་འདྲེན་དཔལ་ལྡན་ནག་པོ་ཆེ། །བདག་རྒྱུད་སྒྲིབ་པ་བསལ་བའི་ཕྱིར། །བརྩེ་བས་དགོངས་ཏེ་འདིར་བྱོན་ཅིག ། ཧཱུྃ༔ སྐུ་གསུང་ཐུགས་ཀྱི་བདག་ཉིད་ཅན། །རྡོ་རྗེ་ནག་པོ་འཁོར་བཅས་རྣམས། །རང་བཞིན་གནས་ནས་སྐུ་བཞེངས་ལ། །བསྟན་པ་བསྲུང་ཕྱིར་གཤེགས་སུ་གསོལ། །འོག་མིན་གནས་མཆོག་དམ་པ་དང་། །ལྕང་ལོ་ཅན་གྱི་ཕོ་བྲང་དང་། །ནཱ་ལེནྡ་ཡི་གཙུག་ལག་དང་། །བསིལ་བ་
ཚལ་གྱི་དུར་ཁྲོད་དང་། །གཞན་ཡང་དུར་ཁྲོད་གནས་བརྒྱད་དང་། །ཕྱི་ཡི་རྒྱ་མཚོའི་འགྲམ་དག་དང་། །རང་བཞིན་གར་བཞུགས་གནས་མཆོག་ནས། །དཔལ་ལྡན་མགོན་པོ་འཁོར་བཅས་རྣམས། །རྣལ་འབྱོར་བདག་ལ་རྗེས་དགོངས་ལ། །གནས་འདིར་མྱུར་དུ་གཤེགས་སུ་གསོལ། །ཨེ་རྒྱ་ཧི་ཛཿཧཱུྃ་བཾ་ཧོ༔ ཧཱུྃ། བསྟན་སྲུང་དྲག་པོའི་ཆ་ལུགས་ཐུགས་རྗེ་ཅན། །དཔག་མེད་ཡོན་ཏན་དབུ་རྫོགས་དགྲ་བགེགས་འདུལ། །པདྨ་ཉི་མའི་གདན་ལ་མངོན་དགྱེས་ཕྱིར། །དམ་ཆོས་བསྟན་པ་བསྲུང་ཕྱིར་བཞུགས་སུ་གསོལ། །ཏིཥྛ་ལྷན། ཧཱུྃ་ལས་སྐྱེས་པའི་ནག་པོ་ཆེ། །པདྨ་ཉི་མའི་གདན་ལ་བཞུགས། །གདུག་པ་ཟིལ་གནོན་མེ་དཔུང་ནང་། །མཐུ་ཆེན་ཁྱོད་ལ་ཕྱག་འཚལ་བསྟོད། །ཧཱུྃ། དཔལ་ལྡན་མགོན་པོ་འཁོར་བཅས་ལ། །ཁྲག་ཆེན་འབར་བའི་ཨནྡྷཾ་དང་། །ཞག་ཆེན་མཁྲིས་པའི་ཞབས་བསིལ་དང་། །དབང་པོ་ལྔ་ཡི་མེ་ཏོག་དང་། །ཤ་ཆེན་སྤོས་དང་ཚིལ་ཆེན་གསུར། །ཞུན་ཆེན་སྣང་གསལ་མར་མེ་དང་། །སྣ་ཚོགས་དྲི་ཡི་བྱུག་པ་དང་། །ཤ་ཆེན་ལྔ་ཡི་ཞལ་ཟས་དང་། །ཐོད་ཆེན་རྔ་དང་རྐང་ཆེན་དུང་། །བདུད་རྩི་སྨན་གཏོར་
རཀྟའི་ཚོགས། །དགྱེས་པའི་ཚུལ་གྱིས་བཞེས་སུ་གསོལ། །བཛྲ་མ་ཧཱ་ཀཱ་ལ་ས་པཱ་རི་ཝཱ་ར་ཨརྒྷཾ་སོགས། སརྦ་པཉྩ་ཨ་མྲྀ་ཏ་བ་ལིཾ་ཏ་ཁཱ་ཧི། ༀ་བཛྲ་ཀ་ཝུ་ཝ་ཝ་པ་ཤ་ཡ་མ་ཧཱ་ཀཱ་ལ་ཡ་ཧཱུྃ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་ཁ་ཁ་མུ་ཁ་ཀརྨ་རཀཱ་སྲོག་དུང་དུང་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་དེ་ཝ་རུ་པི་ནི་ཧཱུྃ་བྷྱོ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་རཀྵ་དུ་བོ་ཛ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་སེང་ཧ་མུ་ཁ་ཧཱུྃ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། །ཨོཾ་ཤྲཱི་མ་ཧཱ་ཀཱ་ལ་ཡ་ཤཱ་ས་ན་ཨུ་པ་ཧ་རི་ནི། ཨེ་ཥ་ཨ་པཉྩ་མ་ཧཱ་ཀཱ་ལོ་ཨ་ཡཾ། ཨི་དཾ་རཏྣ་ཏྲ་ཡཱ་ཡ། ཨ་པ་ཀ་རི་ཎི། ཡ་ཏི་པྲ་ཏི་ཛྙ་སྨ་ར་སི་ཏ་དཱ། ཨི་དཾ་དུཏྟཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲིཉྩ་གྲིཏྣ་བྷནྡྷ་བྷནྡྷ་ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མི་ཀེ་ན་ཧཱུྃ་ཕཊ། བཱི་མ་ཧཱ་ཀཱ་ལ་ཁྲག་འཐུང་གི་རྒྱལ་པོ་ཕྱག་བཞི་པ། བྱ་རོག་གི་མཚན་ཅན། སྐུ་གསུང་ཐུགས་ཀྱི་སྤྲུལ་པ་ལས་མགོན་བྱ་རོག་གདོང་། ཡུམ་ཆེན་རྩ་འཇིབ་དམར་མོ། ལེགས་ལྡན་ནག་པོ། ཕྱོགས་ཀྱི་མཁའ་འགྲོ་མ་བཞི། ཤ་ཟ་ནག་པོ་
སེང་གེའི་གདོང་ཅན་ཡབ་ཡུམ་སོགས་དང་། རང་འདྲའི་སྤྲུལ་པ་ལས་མཁན་འཁོར་ཚོགས་བཀའ་སྡོད་མཐུ་བོ་ཆེ་རྣམས་དང་། ནག་པོ་སྟོང་། ཤ་ཟ་འབུམ།་མ་མོ་བྱེ་བ། །གནོད་སྦྱིན་ཁྲི། ཁྲབ་ཅན་བྱེ་བ་དུང་ཕྱུར་གྱིས་བསྐོར་བ། བསྟན་པའི་བཀའ་སྲུང་། དམ་ཉམས་གྱི་སྲོག་གཅོད། །རིག་འཛིན་གྱི་སྲོག་ཤིང་། རྣལ་འབྱོར་གྱི་དགྲ་བླ། དུག་གསུམ་ནད་ཀྱི་སྨན་པ། གཙུག་ལག་ཁང་དང་དཀྱིལ་འཁོར་གྱི་སྲུང་མའི་ཚོགས་དང་བཅས་པ་རྣམས་ལ་དམ་རྫས་བདུད་རྩིའི་གཏོར་མ་དང་། དངོས་འབྱོར་ཡིད་སྤྲུལ་གྱི་མཆོད་པ་རྒྱ་ཆེན་པོ་འདིས་མཆོད་དོ། །བསྟོད་དོ། །དེ་དག་གི་མཐུས་རྣལ་འབྱོར་པ་བདག་ཅག་དཔོན་སློབ་རྣམས་ཀྱི་བཀའ་དང་བསྟན་པ་སྲུངས། ཚེ་དང་དབང་ཕྱུག་སྤེལ། དཔལ་དང་གྲགས་པ་སྒྲུབས། འཁོར་དང་སློབ་མ་སྐྱོངས། རྐྱེན་དང་བར་ཆད་ཟློག །མི་ནོར་ཟས་གསུམ་སྡུས། དགྲ་བགེགས་ཐལ་བར་རློགས། ཕྲིན་ལས་རྣམ་བཞི་སྒྲུབས། །རྟག་ཏུ་སྲུང་སྐྱོབ་མཛོད་ཅིག །ཧཱུྃ། དུས་གསུམ་སངས་རྒྱས་ཀུན་གྱི་བསྟན་སྲུང་ཞིང་། །མ་ལུས་གདུག་པ་འདུལ་བའི་སྐུ་མདོག་ནག །རྣམ་བཞིའི་ཕྲིན་ལས་མཛད་པའི་ཕྱག་
བཞི་པ། །ཁྲོས་པའི་མདངས་ལྡན་དཔའ་བོ་བརྗིད་པའི་སྐུ། །གདུག་པའི་ཚར་གཅོད་ཁྱོད་ལ་ཕྱག་འཚལ་བསྟོད། །ཅེས་ཕྱག་བཞི་པའི་གཙོ་འཁོར་ཀུན་ཚང་། ཧཱུྃ། དད་པ་དང་ནི་དམ་ཚིག་གིས། །ཚུར་གཤེགས་དམ་ཅན་ལྷ་ཆེན་པོ། །མ་ཧཱ་ཀཱ་ལ་མཐུ་བོ་ཆེ། །གསང་བའི་ཁྲོ་རྒྱལ་སྟོབས་ཀྱི་བདག །མ་ནིང་ནག་པོ་ཀུན་གྱི་རྗེ། །འོག་མིན་གནས་མཆོག་དམ་པ་དང་། །གསང་ཆེན་ལྷུན་གྲུབ་དུར་ཁྲོད་ནས། །མཆོད་ཕྱིར་སྒྲུབ་ཕྱིར་གཤེགས་སུ་གསོལ། །སྐུ་ལྔ་སྡེ་ལྔ་ཏྲཀཱད་ནག །མ་མགོན་སྡེ་བརྒྱད་བཅས་པ་བྱོན། །ལྷ་ཆེན་དཔལ་འབར་འཁོར་དང་བཅས། །མཐིང་ནག་རུ་ཏྲའི་གདན་ལ་བཞུགས། །ཤཱི་མ་ཧཱ་ཀཱ་ལ་ས་མ་ཡ་ཛཿཧཱུྃ་བཾ་ཧོ༔ ཏིཥྛ་ལྷན། ཧཱུྃ། མ་ཧཱ་ཀཱ་ལ་མཐུ་བོ་ཆེ། །ཁྱེད་ལ་མཆོད་པ་འབུལ་བ་ནི། །ཨུཏྤལ་མེ་ཏོག་སྣ་ཚོགས་དང་། །རྒྱ་ཤུག་ཛཱ་ཏི་ཨ་ཀ་རུ། །གླ་རྩི་ག་པུར་སྤོས་སོགས་དྲི། །ཞུན་ཆེན་སྣང་གསལ་ཁྲག་སྣའི་ཆབ། །ནས་ནག་བྲ་བོ་སྦྱར་བའི་བཤོས། །རྐང་ཆེན་རྔ་དུང་འཁར་རྔའི་སྒྲ། །དཔལ་ཆེན་འཁོར་དང་བཅས་ལ་འབུལ། །གཞན་ཡང་ཁྱོད་ལ་མཆོད་པའི་རྫས། །ཛ་གད་གསེར་སྐྱེམས་
སྤྲིངས་སེ་སྤྲེང་། །ཞལ་ཟས་ལོངས་སྤྱོད་ལྷུབས་སེ་ལྷུབ། །སྨན་གཏོར་རཀྟ་ཀྱི་ལི་ལི། །དགྲ་བོའི་ཤ་ཁྲག་གློ་སྙིང་དང་། །ཁྲག་རུལ་ཉ་སོགས་མཐུན་པའི་རྫས། །འདོད་ཡོན་མཆོད་པ་དཔག་མེད་འདིས། །མ་ནིང་ནག་པོ་འཁོར་དང་བཅས། །དམ་ཅན་རྒྱ་མཚོའི་ཐུགས་དམ་བསྐང་། །ༀ་ཤྲཱི་མ་ཧཱ་ཀཱ་ལ་ཨརྒྷཾ༴ མ་ཧཱ་པཉྩ་ཨ་མྲྀ་ཏ་རཀྟ་བ་ལིང་ཏ་ཙིཏྟ་ལ་ཁཱ་ཧི་ཁཱ་ཧི། ཨོཾ་ཤྲཱི་མ་ཧཱ་ཀཱ་ལ་གྲུ་ན་གྷ་ཡ་རཾ་སིདྡྷི་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཤྲཱི་ཝཱཀྐ་ལྕེ་ལྕེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་མ་ཧཱ་ཀཱ་ལ་ཏྲཀཱད་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་མ་ཧཱ་ཀ་ལ་སི་ཏི་ཡ་མ་དུ་ཛ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དཔལ་མགོན་མ་ནིང་ནག་པོ། མ་ནིང་རིགས་ལྔ། སྐུ་ཡི་མགོན་པོ་སྟག་ཞོན། གསུང་གི་ མགོན་པོ་བེང 
་མ། ཐུགས་ཀྱི་མགོན་པོ་གྲི་གུག །ཡོན་ཏན་གྱི་མགོན་པོ་སེང་ཞོན། ཕྲིན་ལས་ཀྱི་མགོན་པོ་ཏྲཀཱད། ལྗང་ནག་སྤུ་གྲི་གཅིག་ཤུལ། ཐུབ་བདག་གློག་ཕྲེང་། ཡང་འཁོར་སྡེ་བརྒྱད། བདུད་དམག་བྱེ་བ་འབུམ་སྡེའི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། སྡང་བའི་དགྲ་སོད། གནོད་པའི་བགེགས་
ཐུལ། བླ་མ་དང་རྣལ་འབྱོར་པ་བདག་ཅག་སྐུ་ཚེ་རིང་བ་དང་། ཕྲིན་ལས་དར་ཞིང་རྒྱས་པར་མཛད་དུ་གསོལ། ཧཱུྃ། ཆོས་དབྱིངས་སྐྱེ་བ་མེད་པའི་ཕོ་བྲང་ནས། །སྐྱེ་བའི་ཆོ་འཕྲུལ་ཁྲོ་རྒྱལ་མ་ནིང་སྐུ། །མཉམ་ཉིད་ཐུགས་མངའ་གཏུམ་ཆེན་མེ་ལྟར་འབར། །རུ་ཏྲ་འཇོམས་མཛད་བདུད་དཔུང་ཐལ་བར་རློགས། །མཐར་བྱེད་གཞོན་ནུ་འཇིགས་པའི་གད་རྒྱངས་ཅན། །མ་ཧཱ་ཀཱ་ལའི་སྐུ་ལ་ཕྱག་འཚལ་བསྟོད། །ཧཱུྃ། ཏྲཀྐད་བདུད་ཀྱི་མགོན་པོ་ནི། །ནག་པོ་ཐོད་པའི་ཕྲེང་བ་ཅན། །ཁྲག་གི་མིག་ལ་རལ་པ་དམར། །ལག་པ་དམར་པོ་མདུང་ཞགས་བསྣམས། །བེར་ནག་རྟ་ནག་ཅན་ལ་བསྟོད། །དེ་ལ་མ་ནིང་སྐུ་ལྔ་སྡེ་ལྔ་ཏཱཀྐད་དང་བཅས་པ་ཚང་བ་ཡིན། མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་མཚོའི་དབུས། །ཐོད་པ་སྐམ་རློན་གཞལ་ཡས་སུ། །ཨོཾ་ལས་དུད་སོལ་ལྷ་མོ་ནག །ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤཀྟི་རྩེ་གསུམ་འཛིན། །དུར་ཁྲོད་ཆས་བརྒྱན་མི་རོ་གསོལ། །བ་གླང་མི་ལྤགས་རེ་ལྡེ་གོས། །སྦྲུལ་བརྒྱན་ཞབས་གཉིས་ལྕགས་སྒྲོག་གསོལ། །བོང་བུ་ག་དམར་ཆིབས་པའོ། །
སྙིང་འཕྲོག་མ་གསུམ་རིགས་བཞི་དང་། །ལྷ་མོ་བརྒྱད་དང་ཕྲ་མེན་བརྒྱད། །སྒོ་མ་བཞི་སོགས་འཁོར་བཅས་གསལ། །གནས་གསུམ་འབྲུ་གསུམ་ཧཱུྃ་ཡིག་ལས། །འོད་འཕྲོས། འཁོར་བཅས་སྤྱན་དྲངས་གྱུར། །བྷྱོཿ རི་རབ་ཆེན་པོ་བྱང་ཤར་མཚམས། །གཡུ་མཚོ་མུ་ལེའི་མཐིང་དཀྱིལ་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནང་། །གྲུ་གསུམ་འབར་བའི་གཞལ་ཡས་ནས། །དཔལ་ལྡན་ལྷ་མོ་དུད་སོལ་མ། །ཞལ་གཅིག་ཕྱག་བཞི་བོང་བུ་ཆིབས། །སྐུ་མདོག་ནག་མོ་འཇིགས་པའི་གཟུགས། །འཁོར་ཡང་ནག་མོ་འབུམ་སྡེའི་ཚོགས། །གནས་འདིར་ཉིད་དུ་གཤེགས་སུ་གསོལ། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་ཨེ་ཨཱ་ར་ལི་ཧྲིང་ཧྲིང་༔ པདྨ་ཀ་མ་ལཱ་ཡེ་སྟེ། དཔལ་ལྡན་ལྷ་མོ་ཁྱོད་ཀྱི་བདག་ལ་སྐུ་མྱུར་དུ་སྟོན་ཅིག །གལ་ཏེ་མི་སྟོན་ན་ཡང་བདག་གི་ཡིད་ལ་ཅི་འདོད་པ་དེ་དག་འགྲུབ་པར་གྱིས་ཤིག །ཨོཾ་ས་མ་ཡ་ཧ་ན་ཧ་ན་མ་ཏི་ཀྲ་མ་ནི་ཧཱུྃ་ཕཊ། བཱི་དེ་ཝི་ཀཱ་ལི་ས་པཱ་རི་ཝཱ་ར་ཨརྒྱུ་སོགས། ཧ་ཧོཧྲཱི༔ ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། པཉྩ་ཨ་མྲྀ་ཏ་ཨོཾ་
ཨཱཿཧཱུྃ། དཔལ་ལྡན་ལྷ་མོ་དུད་པའི་སོལ་བ་མ། སྙིང་འཕྲོག་མ་གསུམ། རིགས་བཞིའི་ལྷ་མོ་བཞི། དུར་ཁྲོད་ཀྱི་མ་མོ་བརྒྱད། ཕྲ་མེན་མ་བརྒྱུད། སྒོ་མ་བཞི། འཁོར་མ་མོ་བྱེ་བ་འབུམ་སྡེའི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། ཁྱད་པར་དུ་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པ་ཐམས་ཅད་ལ་མི་ནད་ཕྱུགས་ནད་ཡམས་ནད་རིམས་ནད་ནད་རིགས་བཞི་བརྒྱ་རྩ་བཞིས་གནོད་པ་ཞི་བ་དང་། ཚེ་དང་བསོད་ནམས་རྒྱས་པ་དང་། །ཆག་ཆེན་ཉམ་ང་བཀྲ་མི་ཤིས་པ་ཐམས་ཅད་ཟློག་པའི་ཕྲིན་ལས་མཛོད་ཅིག །བྷྱོཿ རྒྱ་མཚོའི་ཀློང་ནས་མེ་འབར་ཁྱོད། །མཚོ་ཡང་སྐེམ་པར་ནུས་མ་སྟེ། །བུད་མེད་ཐམས་ཅད་ཞི་མཛད་ཕྱིར། །ལྷ་ཆེན་སྐུ་ཡི་ཕྱིར་དུ་བཞུགས། །རྫོང་དང་བཀའ་བཟློག་ནག་མོ་ཆེ། །ལྷ་དང་ལྷ་མིན་ཕྱག་གནས་མ། །མི་ནད་གང་ཡིན་ཁྱོད་ཀྱིས་ཤེས། །དེ་ལ་འཇིགས་པ་མེད་པར་གྱུར། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པ་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་བསྲུང་བ་
ཡིས། །དཔལ་ལྡན་ལྷ་མོ་ཁྱོད་ལ་བསྟོད། །དེ་ཡིས་རྒྱུན་ཁྱེར་ལྷ་མོའི་གཏོར་ཆོག་ཚང་། ཧཱུྃ། ཕོ་བྲང་མཁའ་སྤྱོད་ཙཱ་རི་ནས། །བདུད་མགོན་ནག་པོ་སེང་གེའི་གདོང་། །གནས་ལྟའདིར་སྤྱན་འདྲེན་གཤེགས་སུ་གསོལ། །ཡུམ་མཆོག་བདུད་མོ་སེང་གདོང་མ། །ལས་མཁན་བམ་རོ་ཕོ་མོ་དང་། །ཤན་པ་སྡེ་བརྒྱད་གཤེགས་སུ་གསོལ། །དགྲ་བགེགས་བསྣོལ་བའི་གདན་ལ་བཞུགས། །ཨེ་ཧྱ་ཧི་ས་མ་ཡ་ཛ་ཛཿ ཛཿཧཱུྃ་བཾ་ཧོ༔ ཨརྒྷཾ་སོགས། ཧཱུྃ། འཇིག་རྟེན་བྷནྡྷ་འབར་བའི་སྣོད་མཆོག་ཏུ། །སྨན་རཀ་བདུད་རྩིའི་མཆོད་པ་མཚོ་ལྟར་བསྐྱིལ། །དགྲ་བགེགས་བསྒྲལ་བའི་ཤ་ཁྲག་ནང་རོལ་ཚོགས། །དམ་རྫས་བརྒྱན་པའི་གཏོར་མ་རྒྱ་ཆེན་འདི། །ཞིང་སྐྱོང་མགོན་པོ་འཁོར་དང་བཅས་ལ་འབུལ། །ཨོཾ་མ་ཧཱ་ཀཱ་ལ་སེང་ཧ་མུ་ཁ་ཧཱུྃ་ཕཊ། ཏྲི་ཧྲིང་ཛཿ ཌཱཀི་ནཱི་སི་ན་ར་མ་ཧཱུྃ་ཕྲཊ། ཏྲི་ཧྲིང་ཛཿ ཡ་མ་རཱཙ་དུ་ཏྲི་ཕུ་ཏྲི་ཧཱུྃ་ཕཊ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞིང་སྐྱོང་སེང་གདོང་དཀར་པོ། བདུད་མགོན་སེང་གདོང་ནག་པོ། མཁའ་འགྲོ་སེང་གདོང་དམར་མོ། བམ་རོ་ཕོ་མོ་ཤན་པ་སྡེ་བརྒྱད། གཤིན་རྗེ་ཆོས་ཀྱི་རྒྱལ་པོ། ལས་གཤིན་འཆར་ཀ་
ནག་པོ། སྒྲོལ་གིང་བེག་རྩེ་ཡབ་ཡུམ། བདུད་དམག་སྟོང་གི་སྡེ་ལ་སོགས་པ་འཁོར་དང་བཅས་པའི་ཞལ་དུ་འབུལ་ལོ། །དགྲ་བགེགས་བྱད་མ་ཐམས་ཅད་རྡུལ་དུ་བརླག་པའི་ཕྲིན་ལས་མཛོད་ཅིག །ཧཱུྃ། བསྟན་པ་གཉེན་པོ་བསྲུང་བའི་མཐུ་རྩལ་ཅན། །ནག་པོ་ཁྲོ་གཏུམ་འཇིགས་གཟུགས་རྔམ་པའི་སྐུ། །ཞལ་གཅིག་ཕྱག་གཉིས་མཐིང་ནག་སེང་གེའི་གདོང་། །གཡས་པས་དར་ནག་གཡོན་པས་དམར་གཏོར་ཁྱེར། །བདུད་པོ་མ་རུངས་སྲོག་བདུད་ཁྱེད་ལ་བསྟོད། །ཞིང་སྐྱོང་ཡབ་ཡུམ་གྱི་གཏོར་ཆོག་བསྡུས་པའོ། །ཧཱུྃ༔ དུར་ཁྲོད་ཆེན་པོའི་གནས་མཆོག་ནས། །ཆོས་སྐྱོང་ཡབ་ཡུམ་གཤེགས་སུ་གསོལ། །ཀེང་རུས་ཐོད་པའི་གུར་ཁང་ནས། །ཆོས་སྐྱོང་ཡབ་ཡུམ་གཤེགས་སུ་གསོལ། །དཔལ་ལྡན་དུར་ཁྲོད་བདག་པོ་ནི། །གནས་འདིར་སྤྱན་འདྲེན་གཤེགས་སུ་གསོལ། །སངས་རྒྱས་བསྟན་པ་བསྲུང་བའི་ཕྱིར། །བཀའ་ཡི་ལས་མཁན་ངན་ན་མ། །འཁོར་བཅས་མ་ལུས་གཤེགས་སུ་གསོལ། །རཀྟའི་རྦ་ཀློང་ད་ལ་ནས། །མི་རོ་བསྣོལ་བའི་གདན་ལ་བཞུགས། །ཨེ་ཧྱ་ཧི་ཛཿཧཱུྃ་བཾ་ཧོ༔ ཨནྡྷཾ་སོགས། ཨོཾ་ཨཱཿཧཱུྃ་ཧ་ཧོ་ཧཱུྃ༔ ཨོཾ་གྷོ་རྭ་
ཛ་གྷི་རཱ་ཛ་ཀུ་མ་ཀུ་མ་ཁུ་ཐིས་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་ཨ་ར་ལི་པྲ་མ་ཡ་ཛ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། པཉྩ་ཨ་མྲྀ་ཏ་ཨོཾ་ཨཱཿཧཱུྃ། ཧཱུྃ། དཔལ་ལྡན་དུར་ཁྲོད་བདག་པོ་ནི། །ཞལ་གཅིག་ཕྱག་གཉིས་སྐུ་མདོག་དཀར། །གཡས་པས་ཐོད་དབྱུག་འབར་བ་ཐོགས། །གཡོན་པས་ཐོད་པ་ཁྲག་བཀང་གསོལ། །ཀེང་རུས་གར་བྱེད་མཆེ་བ་གཙིགས། །བརྐྱང་སྐུམ་གར་གྱིས་གདུག་པ་འདུལ། །འཇིགས་སུ་རུང་བའི་ཡབ་ཡུམ་སྐུ། །ཐམས་ཅད་མ་ལུས་སྐག་པར་བྱེད། །དགྲ་རྣམས་མ་ལུས་འཇོམས་ལ་བསྟོད། །ཧཱུྃ།་མ་མོ་ནག་མོ་མཐུ་རྩལ་ཅན། །མུ་སྟེགས་ལྷ་མོ་རྫུ་འཕྲུལ་བདག །ནོར་སྲང་གཅིག་གི་རྗེས་འབྲང་མ། །དཀོར་བདག་ངེ་ནེ་མ་ལ་བསྟོད། །དུར་ཁྲོད་བདག་པོ་ཡབ་དང་ཡུམ། །ངེ་ནེ་མ་དང་བཅས་པ་ཡིས། །མཆོད་གཏོར་དམ་པ་འདི་བཞེས་ལ། །བདག་གི་རྟ་ཕྱུགས་དཀོར་ནོར་རྣམས། །ཉིན་མཚན་གཡེལ་བ་མེད་པར་སྲུངས། །དགྲ་རྐུན་གཅན་སྤྱང་ཁ་ཆིངས་ཤིག །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་ནོར་ལྷ་བཀའ་སྲུང་གཞན་རྣམས་ཀྱི་གཏོར་མ་རིན་པོ་ཆེའི་སྣོད་བཅུད་བདུད་རྩིའི་རྒྱ་མཚོ་འདོད་པའི་ཡོན་
ཏན་སོ་སོར་གང་བར་བསྒོམ་ཞིང་། ༀ་ཨ་ཀཱ་རོ་མུ་ཁཾ་སོགས་སྔགས་ལན་གསུམ་གྱིས་དུས་གཅིག་བྱིན་གྱིས་བརླབས། ཧཱུྃ།་རི་རབ་ཆེན་པོའི་བྱང་ཕྱོགས་ནས། །ལྕང་ལོ་ཅན་གྱི་གནས་མཆོག་ནས། །རིན་ཆེན་འབར་བའི་གཞལ་ཡས་ནས། །གནོད་སྦྱིན་རྒྱལ་པོ་གཤེགས་སུ་གསོལ། །རྣམ་ཐོས་སྲས་པོ་གཤེགས་སུ་གསོལ། །ཛཾ་ལྷ་རིགས་ལྔ་ནོར་སྦྱིན་མ། །གནོད་སྦྱིན་ཕོ་བརྒྱད་མོ་བརྒྱད་སོགས། །འཁོར་དང་བཅས་པ་གཤེགས་སུ་གསོལ། །དགྱེས་ཤིང་བརྟན་པར་བཞུགས་སུ་གསོལ། །ཕུན་སུམ་ཚོགས་པའི་དངོས་གྲུབ་སྩོལ། །ཨོཾ་བྷེ་ཤཱ་མ་ཎ་ཡེ་ས་པཱ་རི་ཝཱ་ར་བཛྲ་ས་མ་ཡ་ཛཿ ཛཿཧཱུྃ་བཾ་ཧོ༔ ཨནྡྷཾ་སོགས། ཨོཾ་བཻ་ཤྲ་མ་ཎ་ཡེ་ས་པཱ་རི་ཝ་ར་ཨི་དཾ་བྷ་ལིད་ཧཱུྃ་ཧྥ་དཾ་ས་མ་ཡ་རཀྵན་ཏུ་མ་མ་སིདྡྷི་མེ་པྲ་ཡཙྪ་མ་མ་སརྦ་སིདྡྷི་ཨ་མོ་གྷ་སྭཱ་ཧཱ། ཨོཾ་པདྨ་ཀྲོ་དྷ་ཨཱརྱ་ཛམྦྷ་ལ་ཧྲིད་ཡ་ཧཱུྃ་ཕཊ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཛམྦྷ་ལ་ཛ་ལེནྡྲ་ཡེ་དྷ་ན་མི་དྷི་བྷིསྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་བཱ་སུ་དྷ་རི་ཎི་སྭཱ་ཧཱ། ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། བོ། བྱང་ཕྱོགས་སྐྱོང་བའི་རྒྱལ་ཆེན་རྣམ་ཐོས་
སྲས། །ནོར་གྱི་བདག་པོ་ཨརྨ་ཛམྦྷ་ལ། །དབུལ་བ་སེལ་བའི་ལྷ་མོ་ནོར་སྦྱིན་མ། །རྣམ་སྲས་འཁོར་དང་བཅས་ལ་ཕྱག་འཚལ་བསྟོད། །ལོངས་སྤྱོད་འདོད་ཡོན་ཆར་འབེབས་དངོས་གྲུབ་སྩོལ། །ཅེས་རྣམ་སྲས་སེར་ཆེན་འཛམ་དཀར་ནག་སེར་དམར་ནོར་རྒྱུན་མ་ཐམས་ཅད་ཚང་ངོ་། །ཧཱུྃ། རྒྱལ་བ་ཤཱཀ་ཐུབ་བསྟན་པ་ལ། །གླིང་བཞི་བྱང་ཕྱོགས་སྐྱོང་མཛད་པ། །ལྷ་ཡི་དགེ་བསྙེན་ཆེན་པོ་སྟེ། །ནོར་བདག་ཆེན་པོ་གཤེགས་སུ་གསོལ། །ཛཿཧཱུྃ་བཾ་ཧོ༔ ཕེ་ཕེ་ཧྲིང་ཧྲིང་ས་མ་ཡ་ཛ་ཛཿ ཏིཥྛ་ལྷན། ཨནྡྷཾ་སོགས། ཧཱུྃ། ནོར་བདག་རྒྱལ་པོ་ཚོའཁོར་བཅས་ལ། །དངོས་འབྱོར་ཡིད་ཀྱིས་རྣམ་སྤྲུལ་པའི། །ཕྱི་ནང་གསང་བ་མཆོད་པའི་སྤྲིན། །ནམ་མཁའི་མཐའ་ཀླས་གྱུར་པ་ཡི། །མཆོད་སྤྲིན་རྒྱུ་མཚོ་དཔག་མེད་མཆོད་།ཐུགས་དམ་གཉན་པོ་བསྐང་གྱུར་ཅིག །ཨོཾ་མ་ཧཱ་ར་ཙ་ཡཀྵ་ས་མ་ཡ། བྷེ་ཤྲ་མ་ཎ་ཡེ་སརྦ་རཏྣ་ཙིཏྟ་ཧྲིང་ཧྲིང་ཛ་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཧཱུྃ། རྒྱལ་པོ་ཆེན་པོ་རྣམ་ཐོས་སྲས། །ལྷ་ཡི་ན་བཟའ་སྣ་ཚོགས་དང་། །རིན་ཆེན་བསེ་ཡི་རྨོག་ཁྲབ་གསོལ། །ས་བརྒྱད་སེམས་དཔའི་སྐུ་ལ་བསྟོད། །སེང་གེའི་སྟེང་ན་འགྱིང་བག་
མཛད། །མདུང་དམར་རྒྱལ་མཚན་གཡས་ན་འཛིན། །ནེའུ་ལེ་ལྕགས་ཀྱུ་གཡོན་ན་འཛིན། །སྣང་སྲིད་དབང་དུ་བསྡུས་ལ་བསྟོད། །སྦྱིན་བདག་ཕོ་མོའི་ལག་པ་བསྒུལ། །འགྲོ་བ་མི་ཡི་རྣམ་ཤེས་བསྒྱུར། །ཁམས་གསུམ་སྲིད་གསུམ་དབང་དུ་སྡུས། །བཅོལ་བའི་ཕྲིན་ལས་འགྲུབ་པར་མཛོད། །ཅེས་མདུང་དམར་ཅན་ཚང་། ཀྱེ། །འཛམ་གླིང་ཉི་མ་ནུབ་ཕྱོགས་ནས། །ཕོ་བྲང་རྟག་ཆག་མཁར་ནང་ནས། །འཛམ་བུ་གླིང་གི་སྐྱེས་གཅིག་པུ། །རྡོ་རྗེ་ལེགས་པ་གཤེགས་སུ་གསོལ། །དགེ་བསྙེན་ཆེན་པོ་མཐུ་རྩལ་ཅན། །འཛིན་གིང་བརྟན་མའི་ཚོགས་དང་བཅས། །བཙན་རྒོད་དྲག་པོ་སྟོང་གིས་བསྐོར། །དཔོན་གཡོག་འཁོར་བཅས་གཤེགས་སུ་གསོལ། །བཛྲ་སྭཱ་དྷུ་ས་མ་ཡ་ཏྲི་ཤུ་ལ་ཛཿཧཱུྃ་བཾ་ཧོ༔ ཨརྒྷཾ་སོགས། ཧཱུྃ། དམ་ཅན་སྐྱེས་བུ་ཐིག་ལེ་རྩལ། །ཁྱོད་ཀྱི་ཐུགས་དམ་བསྐང་བ་ནི། །མཁར་ཐབས་བཤོས་བུ་ར་ཡིས་མཚན། །ཤ་ཁྲག་དམར་གཏོར་རཀྟ་དང་། །མཾ་ས་ར་ཡི་གསུར་ཆེན་དང་། །སྨྱུག་རྒོད་ཁྲབ་བྱང་རྔ་ཁྲབ་དང་། །མཛེས་པའི་རོལ་མོ་གླུ་གར་དབྱངས། །སྤྱན་གཟིགས་དཀོར་ཆས་ཐུགས་དམ་བསྐང་། །ༀ་
བཛྲ་སྭཱ་དྷུ་ས་མ་ཡ་སྲོག་ཏྲི་དུང་དུང་ཏྲི་ཛ་རཏྣ་ཕ་ལ་སིདྡྷི་ཧཱུྃ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ༀ་བཛྲ་སྭཱ་དྷུ་ས་མ་ཡ་སྲོག་ཏྲིའུ་ཛ་ཛཿ བཛྲ་ལི་ལ་མ་ཧཱུྃ་ཛཿ ཨོཾ་བཛྲ་མ་ཧཱ་མ་ཏྲི་དུང་དུང་ཏྲི་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཀྱཻ། དམ་ཅན་སྐྱེས་བུ་བཛྲ་ཐིག་ལེ་རྩལ། །ལྷ་མིའི་འཇིག་རྟེན་ཁམས་ན་དབང་ཕྱུག་བཙན། །དབང་རྟགས་རྡོ་རྗེ་དགྲ་བོའི་ཙིཏྟ་བསྣམས། །དགེ་བསྙེན་ཆེན་པོ་ཁྱོད་ལ་ཕྱག་འཚལ་བསྟོད། །སེང་གེ་དང་ནི་ར་སྐྱེས་ཆིབས་ནས་ཀྱང་། །དར་དམར་གསོལ་ཞིང་རྫུ་འཕྲུལ་སྣ་ཚོགས་འགྱེད། །བཙན་དང་བརྟན་མའི་འཁོར་གཡོག་བསམ་མི་ཁྱབ། །མཐུ་སྟོབས་རྫུ་འཕྲུལ་ཅན་ལ་ཕྱག་འཚལ་བསྟོད། །དེ་ལ་མགར་དམར་རིགས་གསུམ་ཚང་། ཧཱུྃ། དམ་ཅན་སྐྱེས་བུ་ཆེན་པོ་གིང་གི་བདག ། དཔལ་ལྡན་དྲེགས་པ་རྟ་མགྲིན་ཐུགས་ལས་སྤྲུལ། །དམ་ཅན་སྐྱེས་བུ་རྡོ་རྗེའི་མཚན་ཅན་ཁྱོད། །ཐུགས་རྗེའི་དབང་གིས་གནས་འདིར་གཤེགས་སུ་གསོལ། །དམ་ཅན་སྐྱེས་བུ་ཆེན་པོ་ཁྱོད་ཉིད་ནི། །སངས་རྒྱས་བསྟན་པ་ཡུན་དུ་བསྲུང་བ་དང་། །འགྲོ་བའི་དོན་དུ་ཐུགས་རྗེས་བརྩེར་དགོངས་ལ། །གནས་འདིར་སྤྱན་འདྲེན་མཆོད་ཕྱིར་གཤེགས་སུ་
གསོལ། །ཧཱུྃ། དམ་ཅན་སྐྱེས་བུ་ཆེན་པོ་འཁོར་དང་བཅས། །ཤ་ཁྲག་དམར་གྱི་གཏོར་མ་ཆེན་པོ་དང་། །ར་ཡི་རྣམ་ལྔ་གསུར་གྱི་དུད་པ་ཡིས། །དམ་ཅན་སྐྱེས་བུ་ཁྱོད་ལ་མཆོད་པ་འབུལ། །སྒྲུབ་པ་པོ་ལ་ཚེ་རིང་ནད་མེད་ཅིང་། །མཐུ་དང་ནུས་པ་རྒྱས་པའི་དངོས་གྲུབ་སྩོལ། །ཨོཾ་བཛྲ་སྭཱ་དྷུ་ས་མ་ཡ་ཝཀ་ཏྭཾ་ཀྲྀ་ཤི་ནི་ཀྲ་མ་ཎི་ས་མ་ཡ་སྭཱ་དྷུ་ཏྲི་ཛཿ ཛཿཧཱུྃ་བཾ་ཧོ༔ ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། ཧཱུྃ། ཁྲོ་རྒྱལ་རྟ་མགྲིན་ཐུགས་སྤྲུལ་མཆོག །དྲེགས་པའི་གཙོ་བོ་དམ་ཚིག་ཅན། །མཐུ་སྟོབས་ཆེན་པོས་དགྲ་བགེགས་འདུལ། །རྡོ་རྗེ་ལེགས་པ་ཁྱོད་ལ་བསྟོད། །རྒྱ་གར་ཡུལ་དུ་ཏིང་ཏིང་ཤག །གཡུང་དྲུང་བོན་གྱི་འཕྲུལ་ཏིང་ཞང་། །ཀོང་ཡུལ་མཐིལ་དུ་དེ་མོ་ཞེས། །གུ་རུའི་དྲུང་དུ་བོད་སྐྱོང་མ། །གནམ་ས་ཕྱེད་ཀྱི་བདག་མོ་མཛད། །སྐྱེས་བུའི་སྦྱོར་ཡུམ་མ་ལ་བསྟོད། །སྐྱེས་མཆོག་ཡབ་ཡུམ་འཁོར་བཅས་ཀྱིས། །མཆོད་སྦྱིན་གཏོར་མ་འདི་བཞེས་ལ། །མི་ནོར་ཟས་གསུམ་དབང་སྡུད་ལ། །བཀྲ་ཤིས་བདེ་ལེགས་དངོས་གྲུབ་སྩོལ། །ཅེས་མགར་ནག་ཚང་། ཧཱུྃ། སྟེང་ཕྱོགས་དག་པ་འཕྲུལ་གྱི་གཞལ་ཡས་ནས། །རིན་ཆེན་
སྤྲིན་དཀར་ལྡིང་བའི་གུར་ཁང་ནས། །རྡོ་རྗེ་གཡུ་སྒྲོན་སྨན་བཙུན་འཁོར་དང་བཅས། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་མྱུར་དུ་འགྲུབ་པར་མཛོད། །དམ་རྫས་གཙང་མར་སྦྱར་བའི་གཏོར་མ་ནི། །རྡོ་རྗེ་གཡུ་སྒྲོན་མ་ལ་མཆོད་པ་འབུལ། །ཐུགས་རྗེས་བརྩེར་དགོངས་བརྒྱན་པའི་གཏོར་མ་བཞེས། མཆོད་པ་བཞེས་ཤིག་བཛྲ་ཨ་ལ་ལ་ཧོ། །སོ་ཨཱཿཧཱུྃ་བཛྲ་པྲ་མོ་ཧ་ཧྲིང་ཧྲིང་ཛ་ཛཿ རྡོ་རྗེ་གཡུ་སྒྲོན་མ་འཁོར་དང་བཅས་པའི་ཞལ་དུ་ཁ་ཁ་ཁཱ་ཧི། ལན་གསུམ། ཨརྒྷཾ་སོགས། ཧཱུྃ༔ རྒྱལ་བའི་ཡུམ་མཆོག་རྡོ་རྗེ་གཡུ་སྒྲོན་མ། །ཆོས་སྐུ་དབྱིངས་ལ་སྤྲོས་པ་མི་མངའ་ཡང་། །ལོངས་སྐུ་རིགས་ལྔ་མ་དང་མཁའ་འགྲོ་སྤྲུལ། །སྤྲུལ་སྐུ་སྨན་མོ་འགྲོ་དོན་མཛད་ལ་བསྟོད། །སྤྲུལ་སྐུའི་གནས་ལ་ངེས་པ་མ་མཆིས་ཀྱང་། །རི་རབ་གླིང་དང་ནགས་ཚལ་མཚོ་གླིང་དང་། །ལྷོ་མོན་བོད་དང་རྒྱ་གར་ཡུལ་ལ་སོགས། །ཡུལ་རྣམས་ཀུན་ཏུ་དངོས་གྲུབ་སྟེར་ལ་བསྟོད། །ཆོས་བྱེད་སྲུང་མ་སྤྱན་རས་གཟིགས་ཀྱི་ལྕམ། །མངོན་ཤེས་རྫུ་འཕྲུལ་དངོས་གྲུབ་ཀུན་གྱི་བདག །དམ་ཚིག་ཅན་ལ་དགོས་འདོད་འབྲས་སྩོལ་
མ། །རྡོ་རྗེ་གཡུ་སྒྲོན་འཁོར་དང་བཅས་ལ་བསྟོད། །ཅེས་ལྷ་སྨན་ཕྱི་ནང་གསང་གསུམ་ཚང་། ཧཱུྃ། རྡོ་རྗེ་གདན་གྱི་བྱང་ཕྱོགས་ནས། །བལ་བོད་གཉིས་ཀྱི་སོ་མཚམས་ནས། །དར་དཀར་གུར་གྱི་ནང་ཤེད་ནས། །བཀྲ་ཤིས་ཚེ་རིང་དབང་ཕྱུག་མ། །དྲག་པོའི་གདུང་བས་ཁྱོད་འབོད་ན། །དེ་རིང་སྒྲུབ་པའི་གནས་མཆོག་འདིར། །ལྷབ་ལྷུབ་ན་བཟའི་རྒྱན་དང་བཅས། །སིལ་སྙན་རོལ་མོའི་སྒྲ་དང་བཅས། །ནམ་མཁའི་མཐོངས་ནས་སྤྱན་འདྲེན་ནོ། །ཚེ་རིང་མཆེད་ལྔ་འཁོར་དང་བཅས། །འདིར་གཤེགས་གཙང་མའི་མཆོད་པ་བཞེས། །ཨརྒྷཾ་སོགས། ཨོཾ་ཨ་ཀ་ནི་ཙ་ལི་མི་ཐུ་ཁྲི་ལི་རེ་སྭཱ་ཧཱ། པཉྩ་ཌཀྐི་ནཱི་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། པཉྩ་ཨ་མྲྀ་ཏ་སརྦ་པཱུ་ཙ་ཁཱ་ཧི། ཧཱུྃ། །ལྷ་སྨན་བཀྲ་ཤིས་ཚེ་རིང་དབང་ཕྱུག་མ། །ཁྱོད་ནི་རིགས་བཟང་གཙང་རིགས་ལྷ་ཡི་སྲས། །མགྲིན་པ་གཅིག་ལ་སྙན་པའི་གླུ་སྣ་སྟོང་། །དར་དཀར་གོས་གསོལ་རིན་ཆེན་དུ་མས་བརྒྱན་། །རྫུ་འཕྲུལ་སྣ་ཚོགས་སྟོན་པའི་ལས་མཛད་མ། །མཁའ་འགྲོ་དབང་ཕྱུག་མ་ལ་ཕྱག་འཚལ་བསྟོད། །སྒྲུབ་པ་པོ་ལ་དངོས་གྲུབ་བསྩལ་དུ་གསོལ། །ཚེ་རིང་མཆེད་ལྔའི་མཆོད་
བསྟོད་ཚང་། །རྟ་ལྷ་ཨཱརླ་རེ་མན་ཏ། །རྟ་བདག་རྒྱལ་པོ་ཀུ་བེ་ར། །བདག་ལ་དངོས་གྲུབ་སྟེར་བའི་ཕྱིར། །སྤྱན་འདྲེན་ཕེཾ་ཕེཾ་བདག་གིས་འབོད། །དངོས་འབྱོར་ཡིད་སྤྲུལ་མཆོད་པ་འབུལ། །གསོལ་ལོ་མཆོད་དོ་དགྱེས་གྱུར་ཅིག །བདག་ཅག་སློབ་དཔོན་འཁོར་བཅས་ཀྱི། །རྔོག་ཆགས་ཀུན་གྱི་མགོན་སྐྱབས་དང་། །རྐང་བཞི་འཕེལ་བའི་ཕྲིན་ལས་མཛོད། །ཨོཾ་ཨཱརྱ་རེ་མནྟ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨོཾ་ཀུ་བེ་ར་ཡེ་སྭཱ་ཧཱ། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ་སོགས། ཧཱུྃ། རེ་མན་དང་ཀུ་བེ་ར། །མནའ་དགུ་བཞག་པའི་ཤག་པོ་ཡིན། །ཕ་མ་བྱས་ཀྱང་དེ་རང་ཡིན། །དཔོན་གཡོག་བྱས་ཀྱང་དེ་རང་ཡིན། །ཚ་ཞང་བྱས་ཀྱང་དེ་རང་ཡིན། །ཁྱོད་བསྟེན་ཁྱོད་མཆོད་ཁྱོད་རྦད་ན། །རྔོག་ཆགས་གོད་ཁ་བཟློག་པ་དང་། །རྔོག་ཆགས་མ་ལུས་བསྲུང་དུ་གསོལ། །རྒྱུན་དུ་གཟའ་སྤྱན་འདྲེན་ན་རྩུབ་པས་མི་ལེགས་ལ་ནམ་མཁའ་གཟའ་ཡི་རང་བཞིན་ཡིན་པས་གཏོར་མ་བསྔོས་ན་བར་ཆད་སེལ་བའོ།། ཧཱུྃ། གཟའ་མཆོག་ཆེན་པོ་འཁོར་བཅས་ལ། །དམར་གཏོར་བཤོས་བུ་དགུ་སྐོར་དང་། །དགྲ་བོའི་ཤ་ཁྲག་རུས་པ་དང་། །མེ་ཏོག་སྟོང་དང་ཆུ་སྣ་
སྟོང་། །སྨན་སྣ་སྟོང་དང་ཤ་སྣ་སྟོང་། །སྙིང་སྣ་སྟོང་དང་ཁྲག་སྣ་སྟོང་། །གསུར་ཆེན་རོལ་མོ་སྣ་ཚོགས་ཀྱིས། །དྲང་སྲོང་འཁོར་བཅས་ཐུགས་དམ་བསྐང་། །དུག་གི་ཟོར་ཁ་དགྲ་ལ་བསྒྱུར། །གདུག་པའི་ཁ་རླངས་དགྲ་ལ་བསྒྱུར། །བདག་ཅག་དཔོན་སློབ་མི་ཕྱུགས་བཅས། །ཁྱོད་ཀྱི་བུ་སྤྱན་ཚ་བོ་ཡིན། །རྟག་ཏུ་སྲུང་སྐྱོབ་མ་གཡེལ་ཅིག །ཨོཾ་ཀེ་ཏ་ཀེ་ཏ་སྭཱ་ཧཱ། ཨི་དཾ་བ་ལི་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ་སོགས། ཧཱུྃ།་དྲང་སྲོང་ཆེན་པོ་གཟའ་མཆོག་རཱ་ཧུ་ལ། །སྐུ་མདོག་དུད་ཁ་དབུ་དགུ་སྤྱན་སྟོང་འབར། །ཕྱག་བཞི་རལ་གྲི་མདའ་གཞུ་ཆུ་སྲིན་ཞགས། །བསྐལ་པའི་མེ་འབར་ཁྱོད་ལ་ཕྱག་འཚལ་བསྟོད། །དཔའ་བོ་ཁྱོད་ཀྱི་སྲིང་མོ་གདོང་མོ་བཞི། །གཟའ་བརྒྱད་སྡེ་བརྒྱད་རྒྱུ་སྐར་ཉི་ཤུ་བརྒྱད། །ཁྱི་དང་ལྕེ་སྤྱང་བདུད་བྱ་ལ་སོགས་པའི། །ཕོ་ཉ་ལས་བྱེད་ཚོགས་ལ་ཕྱག་འཚལ་བསྟོད། །དམ་རྫས་བརྒྱན་པའི་མཆོད་གཏོར་འདི་བཞེས་ལ། །སྡང་བའི་དགྲ་ལ་ཆོ་འཕྲུལ་རྒྱུན་དུ་ཕོབ། །འཁོར་བཅས་སྡང་བྱེད་དགྲ་བོའི་སྟེང་དུ་བྷྱོཿ། །ཞེས་མཆོད་པ་བཞེས་ནས་གསོལ་བར་བསམ། ཀྱེ། བདུད་བཙན་ཀླུ་མགོན་འཁོར་
བཅས་ཀྱིས། །གུ་རུ་པདྨའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་བཞིན། །དམ་ལ་མ་འདའ་ད་ཚུར་བྱོན། །བསྟན་པ་བསྲུང་བའི་དུས་ལ་བབ། །དགྲ་བགེགས་བསྒྲལ་བའི་དུས་ལ་བབ། །བྱད་སྟེམས་བཟློག་པའི་དུས་ལ་བབ། །དགྲ་བོ་ཁུག་ལ་མྱུར་དུ་སྒྲོལ། །བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར། །དུ་པཾ་ཏྲི་ཤུ་ལ་ནཱ་ག་ར་ཙ་ཧཱུྃ་ཧཱུྃ་ཛཿ ཛཿཧཱུྃ་བཾ་ཧོ༔ ཨརྒྷཾ་སོགས། ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། བདུད་ནག་པོ་སྲོག་གི་སྤུ་གྲི། བཙན་དམར་ལས་ཀྱི་སྤུ་གྲི། །ཀླུ་རྒྱལ་དུག་གི་སྤུ་གྲི་ལ་སོགས་པ་བདུད་བཙན་ཀླུ་ཡི་དམག་ཚོགས་འཁོར་དང་བཅས་པའི་ཞལ་དུ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དགྲ་བགེགས་བྱད་མ་རྡུལ་དུ་བརླག་པའི་ཕྲིན་ལས་མཛོད། ཧཱུྃ། སངས་རྒྱས་བསྟན་པའི་བཀའ་སྲུང་མ། །བདུད་བཙན་ཀླུ་བདུད་མ་རུངས་འཇིགས་པའི་གཟུགས། །བཀའ་ཉན་ལས་བྱེད་ཕོ་ཉར་འགྱེད། །རིན་ཆེན་གཏེར་གྱི་སྲུང་མ་མཆོག །རྫུ་འཕྲུལ་ཅན་ལ་བདག་བསྟོད་དོ། །དེས་ནི་སྤུ་གྲི་མཆེད་གསུམ་ཚང་། ཧཱུྃ། ཡང་གཅིག་བཞེངས་ཤིག་ནག་པོ་ཏི་པ་ར་ཙ་ཁྱོད། །བྱང་ཕྱོགས་རྒྱུད་དུ་ཆེ་
བའི་སྐུར་སྟོན་པ། །གཉན་ཆེན་ཐང་ལྷ་ཞེས་སུ་མཚན་ཡང་གསོལ། །འདིར་གཤེགས་བརྒྱན་པའི་གཏོར་མ་འདི་བཞེས་ལ། །བདག་ཅག་རིག་འཛིན་རྣལ་འབྱོར་འཁོར་བཅས་ཀྱི། །མི་མཐུན་རྐྱེན་སོལ་མཐུན་རྐྱེན་བསམ་པ་སྒྲུབས། །གདུག་འདྲེའི་ནད་དང་གནོད་པ་ཞི་བ་མཛོད། །ཨོཾ་ཨཱཿཧཱུྃ་ཧཱིབཛྲ་འབར་བ་རྩལ་སརྦ་སིདྡྷི་ཕ་ལ་ཧཱུྃ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ༴ དྲི་ཟའི་རྒྱལ་པོ་ས་བརྒྱད་གནས་པའི་མཆོག །སྟོང་གསུམ་གཞི་བདག་ཀུན་གྱི་རྗེ་བོར་གྱུར། །ཐང་ལྷ་སྨྱོ་ཁ་ལ་སོགས་པའི། །གནས་བརྒྱད་མཚན་བརྒྱད་ལྡན་ལ་བསྟོད། །འཁོར་ཚོགས་དང་བཅས་བརྒྱ་བྱིན་སྲས་མོ་ནི། །མཚོ་སྨན་ཕྱུག་མོ་བཅས་ལ་ཕྱག་འཚལ་བསྟོད། །དེ་ནས་སྐྱེས་བུ་ལུང་བཙན་ནི༔ ཀྱེ། སྟོད་ཀྱི་བཙན་ཡུལ་ཡ་ཀི་ནས། །ཡ་ཀི་སྒོ་མོ་བྲག་དམར་ནས། །ཇོ་བོ་བཙན་གྱི་རྒྱལ་པོ་སྟེ། །སྐྱེས་བུ་ལུང་བཙན་སྤྱན་འདྲེན་ནོ། །འདུར་འདུར་འདུར་གྱིས་གནས་འདིར་བྱོན། །རིན་ཆེན་མཛེས་པའི་མཁར་ལ་བཞུགས། །འདོད་ཡོན་ལོངས་སྤྱོད་སྣ་ཚོགས་དང་། །ཕུད་དང་བཤོས་དང་མཆོད་པ་བཞེས། །གཞི་བྱེས་ལམ་གསུམ་
མགོ་ཐོན་ཅིང་། །མི་ནོར་བཙན་ཕྱུག་བཀྲ་ཤིས་པའི། །གྲོགས་དང་མགོན་སྐྱོབས་ཆེན་པོ་མཛོད། །ཨོཾ་བྱི་ཤུ་ཙ་ན། ས་མ་ཡ། ཁྲག་ཏ་ཀུ་རུ་ར་ཙ་ན་ཧཱུྃ་ན་ཧཱུྃ་ན་རུ་ཙ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཨརྒྷཾ༴ བསྟོད་པར་འོས་པ་ཐམས་ཅད་ལ། །སོགས། ཨོཾ་ཨཱཿཧཱུྃ། གཞན་ཡང་ཡུལ་དང་གྲོང་གི་བདག །རི་ཚལ་ཆུ་ཀླུང་ངམ་གྲོག་ཐང་། །གཉུག་མར་གནས་པ་མ་ལུས་དང་། །ངོམ་རྒྱལ་གཏམ་རྒྱལ་དབྱི་དོ་དང་། །གནས་འདིར་གཞི་བདག་ཐམས་ཅད་ལ། །བདུད་རྩིའི་གཏོར་མ་འདི་འབུལ་ལོ། །འགལ་རྐྱེན་བར་ཆད་ཞི་བ་དང་། །མཐུན་རྐྱེན་བསམ་པ་འགྲུབ་པར་མཛོད། །ཨོཾ་བྷ་མི་པཱ་ཏི་ས་པཱ་རི་ཝཱ་ར་ཨི་དམ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། དེ་ནས་རྗེས་ཆོག་བྱ་བ་ནི། ལྷ་རྣམས་ནོངས་པ་གང་མཆིས་བཟོད་པར་གསོལ། །རང་གནས་གཤེགས་སམ་རྟེན་ལ་ཅི་བདེར་བཞུགས། །འཇིག་རྟེན་འཇིག་རྟེན་འདས་པའི་དགེ་ལེགས་ཚོགས། །གོང་ནས་གོང་དུ་འཕེལ་བའི་བཀྲ་ཤིས་ཤོག །དེ་ལྟར་རྒྱུན་དུ་གཏོར་བསྔོས་བྱས་པ་ཡིས། །ཕན་ཡོན་རིག་པ་དག་ལ་ཚོགས་རྫོགས་པ། །འདི་ཕྱིའི་ལམ་གྱི་བར་ཆད་སེལ་བ་དང་ཐུན་མོང་དངོས་གྲུབ་ཅི་འདོད་པ་འབྱུང་ཞིང་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པའི་ཕྱིར་
རོ། །ནོར་བུ་རིན་པོ་ཆེ་བྱི་དོར་བྱས་ནས་མཆོད་པ་བྱས་པས་ཀྱང་བརྒྱ་སྟོང་འགྱུར་གྱིས་བརྟག་པ་ཤེས་པར་བྱའོ། །ཡིད་ཆེས་པའི་ལུང་ནི། གཏོར་མའི་ལས་རྒྱུད་ཆེན་པོ་ལས། །མཆོག་དང་ཐུན་མོང་དངོས་གྲུབ་ནི། །གཏོར་མ་དག་ལ་བརྟེན་ནས་ཐོབ། །རྣལ་འབྱོར་གཏོར་མོར་མི་བརྩོན་ན། །དེ་ཡི་བར་ཆད་གང་གིས་སེལ། །རྣལ་འབྱོར་གཏོར་མར་བརྩོན་པ་ན། །དེ་ལ་བར་ཆད་སུ་ཡིས་རུང་། །ཞེས་དང་། སྲོག་ཟན་ནག་པོའི་རྒྱུད་ལས། །གཏོར་མ་འབུལ་ཞིང་བསྟོད་པ་བྱ། །ཐུགས་དམ་བསྐུལ་ཞིང་ཕྲིན་ལས་བཅོལ། །ངེས་པར་ཁོ་ནས་འགྲུབ་པར་འགྱུར། །བསྒྲུབ་པར་འགྱུར་བའི་ཕན་ཡོན་ནི། །བུ་ནོར་འཁོར་དང་ལོངས་སྤྱོད་རྒྱས། །ཚེ་དང་གྲགས་པ་བསོད་ནམས་འཐོབ། །དཔལ་འབྱོར་གཟི་བརྗིད་རབ་ཏུ་འཕེལ། །རྟ་དང་བ་གླང་དུད་འགྲོ་རྣམས་དང་ལྡན། །བཀྲ་ཤིས་མཐུ་ཆེ་སྔགས་ཀྱི་དམོད་པ་འགྲུབ། །བར་ཆད་སེལ་ཞིང་ཕྲིན་ལས་ཉན། །དམ་ལ་འདུ་ཞིང་དགྲ་བགེགས་འདུལ། །དེ་ཕྱིར་གཏོར་མ་རྒྱུན་དུ་མཆོད། །ཅེས་གསུངས་སོ། །དེ་ལྟར་རྒྱུན་དུ་གཏོར་ཆོག་རྒྱས་པར་མ་གྲུབ་ཀྱང་། འདི་ལྟར་སོ་སོ་མ་འདྲེས་པ་བྱས་པ་འགྲུབ་པ་ཡིན་ནོ། །ཞེས་བཀའ་སྲུང་གེལ་པ་རྣམས་ཀྱི་རྒྱུན་ཁྱེར་གཏོར་བསྔོས་ཉུང་ངུ་ཞིག་དགོས་ཞེས་པདྨ་འགྲོ་མགོན་གྱིས་ཡང་ཡང་བསྐུལ་ཀྱང་བཀའ་གཉན་ཕྱིར་མི་འཐད་ཅེས་སྨྲས་ཀྱང་། ཕྱིས་འཚོ་མཛད་གྲག་ལུ་ཚེ་འདས་དུས་ཀྱང་ནན་ཏན་གྱིས་བསྐུལ་བས། ཁོ་ཕ་རྒན་ཤི་ནས་ཡུས་ཆེ་སྙམ་ནས་ངག་མ་བཅག་པར་བྲིས། ཤིང་
སྤྲུལ་ཐ་སྐར་ཟླ་བའི་ཉེར་དྲུག་ལ་༧ རཱ་ག་ཨ་སྱས་བྲིས་པ་ལ། ཉེས་འགལ་གང་མཆིས་བཀའ་སྲུང་རྣམས་ལ་བཤགས་ཤིང་། དགེ་བས་རང་གི་བརྒྱུད་པ་འཛིན་པ་རྣམས་ཀྱིས་བསྟན་པ་དར་ཞིང་རྒྱས་པར་གྱུར་ཅིག །ཡི་ཆོས་སྐྱོང་གལ་ཆེ་བ་རྣམས་བསྡུས་ནས་འཐུས་ཆེ་བས་རང་གིས་ཀྱང་ཐུགས་དམ་བྱ་བར་སེམས་ཏེ་བྲིས།། མངྒ་ལཾ། ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།