རཏྣ་གླིང་པའི་དཔལ་མགོན་མ་ནིང་གི་དབང་བསྐུར་རྒྱས་བསྡུས་ཀྱི་ལོ་རྒྱུས།
རཏྣ་གླིང་པའི་དཔལ་མགོན་མ་ནིང་གི་དབང་བསྐུར་རྒྱས་བསྡུས་ཀྱི་ལོ་རྒྱུས་བཞུགས་སོ།།
སྔོན་བཅོམ་ལྡན་འདས་ཀུན་བཟང་ཧེ་རུ་ཀ་དང་ཡུམ་ཀུན་ཏུ་བཟང་མོ་དབྱིངས་ཕྱུག་མས་སྦྱོར་སྒྲོལ་གྱི་སྟོན་པར་ཞུས་པས། བཅོམ་ལྡན་འདས་ཀྱི་སྐུ་ལས་འོད་ཟེར་བྱེ་བ་ཕྲག་བརྒྱ་སྤྲོས་པས་ས་རྣམ་པ་དྲུག་ཏུ་གཡོས་ཤིང་། སྦྱོར་མཚམས་ནས་འཆོལ་བའི་ཁྲོ་བོ་བརྒྱད། སྐུ་གསུང་ཐུགས་ལས་ཁྲོ་བོ་འཆོལ་པ་གསུམ། སྐུ་ཡི་གནས་ལྔ་ནས་སྐུ་ཡི་མགོན་པོ་ལྔར་སྤྲུལ་ལོ། །དེའི་ཚེ་རུ་ཊ་སྡེ་གསུམ་དང་སྡེ་བརྒྱད་དང་བདུད་བྱེ་བ་ཕྲག་མང་པོ་འཚོགས་ནས་སེམས་ཅན་ལ་འཚེ་བར་གྱུར་ཏོ། དེར་ཡུམ་གྱིས་བདུད་འདུལ་བར་ཞུས་པས། དཔལ་ཆེན་པོའི་སྤྲུལ་པ་ཞལ་གསུམ་ཕྱག་དྲུག་
པ་དང་། དབུ་དགུ་ཕྱག་བཅོ་བརྒྱད་དང་། དབུ་ཉི་ཤུ་རྩ་གཅིག་ཕྱག་བཞི་བཅུ་རྩ་གཉིས་སོགས་སྤྲུལ་ནས་བདུད་རྣམས་དང་སྟོབས་འགྲན་ནོ། །དེ་ནས་དཔལ་ཆེན་པོ་སྙིང་རྗེས་བསྒྲལ་བའི་ཏིང་ངེ་འཛིན་ལ་བཞུགས་པས་བདུད་རྣམས་ཕྱོགས་ཀུན་ཏུ་བྲོས་ཀྱང་མ་ཐར་ནས། སྲིན་ཡུལ་གནམ་ལྕགས་མ་ལ་ཡའི་རྩེར་འདུས་ནས་ད་རུང་རྩོད་པར་བྱེད་དོ། །དེ་ནས་བཅོམ་ལྡན་ཊ་རུ་ཉིད་དུ་སྤྲུལ་ནས། རུ་ཊའི་ཆུང་མ་ལ་རོལ་བས། བུ་ཁྲོ་བོ་ལྗང་ནག་ཞལ་གསུམ་ཕྱག་དྲུག་པ་གཅིག་བྱུང་བ་རུ་ཊའི་བུར་བརྫུས་ཏེ་རུ་ཊའི་མགོ་བོ་ལ་བེང་བརྒྱབས་ནས་བསྒྲལ་ཏེ། ཁོག་པ་ལ་ཞུགས་སེམས་
གདན་དུ་བྱས། བདུད་ཀྱི་འཁོར་རྣམས་རང་གི་འཁོར་དུ་བསྐོར། དེར་སྐུ་གསུམ་མགོན་པོས་རུ་ཊ་སྡེ་གསུམ་དང་། ཡོན་ཏན་དང་ཕྲིན་ལས་ཀྱི་མགོན་པོས་ཕོ་རྒྱུད་དང་མོ་རྒྱུད་ཀྱི་རུ་ཊ་བཏུལ་ལོ། །དེ་ནས་རུ་ཊ་སྡེ་བརྒྱད་དང་བདུད་བྱེ་བ་དུང་ཕྱུར་དེ་དག་བསྒྲལ་ནས། རྩིག་པ་དང་ཀ་གདུང་བྱས་ནས། ངོ་བོ་རུ་ཊའི་ཁོག་པ་ཐོད་མཁར་མེ་རླུང་འཚུབ་མའི་ནང་པད་ཉི་རུ་ཊའི་གདན་ལ། ཆེ་མཆོག་ཧེ་རུ་ཀ་ཉིད། མགོན་པོ་མ་ནིང་ནག་པོར་སྤྲུལ་ནས་སྔགས་བརྗོད་པས་རུ་ཊ་ཐུལ་ནས་སྲོག་སྙིང་ཕུལ། བསྟན་པ་སྲུང་བར་ཁས་བླངས། ལས་མཁན་སྲོག་བདུད་དུ་དབང་བསྐུར་རོ། །དེ་ནས་མ་ནིང་ནག་པོ་སྲོག་བདུད་དུ་སྤྲུལ་ནས་རི་མ་ལ་ཡའི་རྩེར་ཐོད་པའི་མཁར་ན་འཁོར་དུ་མས་བསྐོར་ཏེ་བཞུགས་སོ། །དེ་ནས་ལྷ་དང་ལྷ་མ་ཡིན་འཐབ་པའི་ཚེ། །བརྒྱ་བྱིན་གྱིས་ལྷ་མོ་ཨུ་མ་ཕོ་ཉར་བཏང་སྟེ། ཡེ་ཤེས་མགོན་པོའི་སྤྲུལ་པ་སྲོག་བདུད་དེ་ལྷ་ཡུལ་དུ་སྤྱན་དྲངས་ནས་ལྷ་ཐམས་ཅད་མཆོད་ཅིང་དམག་དཔོན་དུ་མངའ་གསོལ། དཔལ་མགོན་བདུན་ཅུའི་བྲན་བྱེད་པར་ཁས་བླངས་སོ། །དེར་ནག་པོ་ཨུ་མ་དང་རོལ་བས་བུ་ལེགས་ལྡན་དང་བུ་མོ་ལྷ་མོ་རེ་མ་ཏི་བྱུང་ངོ་། །དེར་མ་ནིང་སྲོག་བདུད་ནག་པོ་དམག་ཆས་སུ་
ཞུགས་ཏེ། ཡན་ལག་བཞི་ལ་པྲ་མ་རཱ་ཙ། ཡ་མ་རཱ་ཙ། ནཱ་ག་རཱ་ཙ། ཨ་སྲེ་རྒྱལ་བ་བཞི་སྤྲུལ། འཁོར་གྱི་ལྷ་བརྒྱད་ཁྱེའུ་ཆུང་བརྒྱད་གནོད་སྦྱིན་བརྒྱད་བྱ་ཁྲ་གཤིན་རྗེ་བརྒྱད། སྟག་གཟིག་ཀླུ་བརྒྱུད་འབྲུག་བརྒྱད་སོགས་སུ་སྤྲུལ་ཞིང་བདུད་འདུལ་ཉི་ཁྲི་ཆིག་སྟོང་གི་དམག་དང་བཅས་ནས། ལྷ་མ་ཡིན་གྱི་གཡུལ་བཟློག་སྟེ་རྒྱ་མཚོའི་གཏིང་དུ་བྲོས་ཏེ་ཕུང་བར་བྱས་སོ། །དེ་ནས་བདུད་དང་ལྷ་མིན་ཐུལ་བའི་འོག་མིན་ལྕང་ལོ་ཅན་ན། ལག་ན་རྡོ་རྗེ་རྡོ་རྗེ་ཆོས་སུ་སྤྲུལ་ནས་ཕྱི་ནང་གསང་བའི་མཆོད་པ་དང་ཚོགས་ཀྱི་འཁོར་ལོས་བཅོམ་ལྡན་འདས་ཆེ་མཆོག་ཧེ་རུ་ཀ་ལ་མཆོད་ཅིང་ཞུས་པའི་ངོར་མ་ནིང་གི་ལས་རྒྱུད་ཆེན་པོ་གསུངས་སོ། །འདི་ལ་ལེའུ་བཅུ་བཞི་ཡོད་དོ། །མགོན་པོ་མ་ནིང་འདི་ནི་སྐུའི་སྤྲུལ་པ་སྟག་ཞོན་། གསུང་སྤྲུལ་བེང་ཆེན། ཐུགས་སྤྲུལ་གྲི་གུག །ཡོན་ཏན་སྤྲུལ་པ་སེང་ཞོན། ཕྲིན་ལས་ཀྱི་སྤྲུལ་པ་ཏྲཀཱད་དུ་གསུངས། མགོན་པོ་དང་། གཟའ་བདུད་དང་། ཀླུ་བདུད་དང་། སྲོག་བདུད་མ་ནིང་སྟེ་བཞི་དང་། དེ་རྣམས་དོན་གྱི་ངོ་བོ་སྡེ་བརྒྱད་ཡང་ཅིག་ལ། ཡེ་ཤེས་དང་། ལས་དང་། དམ་ཚིག་དང་། སྤྲུལ་པ་དང་། རུ་ཊ་རང་རྒྱུད་གནས་
བསྒྱུར་བ་དང་། ཤ་ཟ་མགོན་པོ་སྡེ་ལྔ་དང་། སྤྱིར་མགོན་པོ་ཉི་ཤུ་རྩ་ལྔ་ཡོད་པར་བཤད་དོ། །འཁོར་ནི་དཔལ་མགོན་བདུན་ཅུ་དང་། བདུད་འདུལ་ཉི་ཁྲི་ཆིག་སྟོང་ཡོད་ལ། གང་ལྷགི་མགོན་པོ་ཉེར་ལྔ་པོ་དེ་ངོ་བོ་ནི་ཆེ་མཆོག་གི་སྤྲུལ་པ་ཡིན་ཏེ། ལས་རྒྱུད་ལས། བརྒྱ་བྱིན་གྱིས་བསྟོད་པ་ལས། ཆོས་སྐུ་སྐྱེ་མེད་ཀུན་ཏུ་བཟང་། །ལོངས་སྐུ་ཆེ་མཆོག་ཧེ་རུ་ཀ །སྤྲུལ་སྐུ་མ་ནིང་ཁྲོ་བོའི་རྒྱལ། །ཅེས་གསུངས་སོ། །ལས་མགོན་ལ་སོགས་འཁོར་རྣམས་འཇིག་རྟེན་དབང་ཆོག་ནས་གསུངས་སོ། །འཛམ་གླིང་བྱེ་བ་ཕྲག་བརྒྱ་ན་ཨོ་རྒྱན་བྱེ་བ་ཕྲག་བརྒྱ་བཞུགས་པའི་གཏེར་སྲུང་ཡིན་ཅིང་། ཞིང་འདིར་ཡང་རང་བྱུང་གི་མཆོད་རྟེན་བརྒྱད་དང་། དཔལ་ལྡན་འབྲས་སྤུང་གི་མཆོད་རྟེན་དང་། ནཱ་ལེནྡྲ་སོགས་གནས་ཆེན་བརྒྱ་རྩ་བརྒྱད་། བསམ་ཡས་སོགས་བོད་ཀྱི་གཙུག་ལག་ཁང་ཐམས་ཅད་ཀྱི་སྲུང་མ་ཡིན་པར་བསྟོད་པ་ལས་གསུངས་སོ། །སྟག་གི་ལོ་ལ་རཏྣ་གླིང་པས་བསམ་འགྲུབ་གཙུག་ལག་ཁང་དུ་དུས་མཆོད་བསྐང་གསོལ་བྱེད་དུས་མ་ནིང་འཁོར་བཅས་ཞལ་གཟིགས་ཤིང་བསྟོད་པ་ཡང་མཛད་ཅིང་། ལྷག་པར་ཐུགས་སྒྲུབ་ཉམས་སུ་ལེན་པ་ལ་བུ་ལྟར་འགོ་བ་ཡིན་ནོ། །དེས་ད་ལྟ་མ་
ནིང་གི་དབང་ཐོབ་པའི་ཕན་ཡོན་ནི། ལོ་ཀ་འདི་ན་ཆེ་བཙན་ལྡན། །ཞི་རྒྱས་དབང་དྲག་བསམ་པ་འགྲུབ། །མཆོག་དང་ཐུན་མོང་དངོས་གྲུབ་ཐོབ། །བཀྲ་ཤིས་ནོར་འཕེལ་མཐུ་རྩལ་ཆེ། །ཀུན་གྱི་ཡིད་འོང་གཙུག་ཏུ་ཁུར། །ཅེས་དང་། ཡང་མདོར་ན་འདི་ཉིད་གསོལ་ཁས་འགྲུབ། མ་ནིང་ཡིན་ཕྱིར་བཟློག་ཏུ་མེད། །བསྙེན་སྒྲུབ་ཡོན་ཏན་བརྗོད་ལས་འདས། །ལས་ཀྱི་ཁ་ཚར་བསམ་མི་ཁྱབ། །ཅེས་དང་། ཐེམས་ཡིག་ལས། ཆོས་སྐྱོང་མཐར་ཐུག་མ་ནིང་ནག་པོ་འདི། །དགོས་འདོད་ཀུན་འབྱུང་ཡིད་བཞིན་ནོར་བུ་འདྲ་། །ནད་རྣམས་ཀུན་འཛོམས་བུ་རམ་རྐྱལ་པ་འདྲ། །ཁམས་གསུམ་དབང་སྡུད་དབང་གི་ཞགས་པ་འདྲ། །དགྲ་བགེགས་ཚར་གཅོད་ཏིལ་མར་རལ་གྲི་འདྲ། །བཀྲ་ཤིས་དར་རྒྱས་དཔག་བསམ་ལྗོན་ཤིང་འདྲ། །ཞེས་དང་། གྲགས་པས་རྒྱལ་ཁམས་བཞིན་ཏུ་ཁྱབ་པར་འགྱུར། །ཕྲིན་ལས་གང་འདོད་བརྩམས་པས་ཐོགས་མེད་འགྲུབ། །དབུ་ནག་མི་ཡི་སྤྱི་བོའི་གཙུག་ཏུ་ཁུར། །བཀྲ་ཤིས་དཔལ་འབར་འཛམ་གླིང་རྒྱན་དུ་འགྱུར། །ཅེས་དང་། ཕྱི་ནང་ཆོས་སྐྱོང་བྱེ་བ་དཔག་མེད་ལས། །མཐར་ཐུག་མ་ནིང་འདི་འདྲ་ཡོད་རེ་ཀན།
ཞེས་དང་། མངོན་རྟོགས་ཡིག་ཆུང་ལས། དེ་ལྟར་རྒྱུན་དུ་བཟླས་གྱུར་ན། །རི་རབ་གཡོ་ཞིང་རྒྱ་མཚོ་ལུད། །གླིང་བཞི་གཡོ་འགུལ་སྙན་གྲགས་ཐོབ། །བཀྲ་ཤིས་བྱིན་ཆེན་རྒྱུད་རྣམས་འཕེལ། །འཇིགས་པ་ཀུན་ལས་རྣམ་པར་ཐར། །འཇིག་རྟེན་འདི་ན་ཆེ་བཙན་ལྡན། །གྲགས་པ་བཞི་ཡི་དངོས་གྲུབ་ཐོབ། །སྟོང་གསུམ་འཁོར་ལོས་སྒྱུར་བར་ནུས། །ཞེས་དང་། དར་ནག་བསྒྲུབ་པར་ནི། དེས་ནི་བསོད་ནམས་གཟི་བརྗིད་བསྐྱེད། །ཁྲོམ་འདུ་གཡོ་འགུལ་སྙན་གྲགས་བཙན་ཐབས་སུ་འབྱུང་། ཞེས་དང་། རྟགས་ཡིག་ལས། ཚེ་འདི་ཉིད་ལ་དངོས་གྲུབ་ཐོབ། །ཕྱི་མ་རྒྱལ་བའི་སྲས་སུ་འཁྲུངས། །གྲགས་པས་ཕྱོགས་ཀུན་ཁྱབ་པར་གྱུར། །ཅེས་དང་། གནད་ཡིག་ལས། དཔལ་མགོན་པོ་མ་ནིང་ནག་པོ་ནི། །མཐུ་དང་རྫུ་འཕྲུལ་མངོན་ཤེས་ལྡན། །བཀྲ་ཤིས་སྙིང་ཉེ་སྡོང་གྲོགས་བྱེད། །ཆོས་སྐྱོང་ཀུན་གྱི་མཐར་ཐུག་སྟེ། །ཞེས་དང་། རྟེན་རྫས་ཡིག་སྣར། དེ་ལྟར་བརྟེན་རྣམས་འཚོགས་བྱས་ནས། །ཙཎྜའི་འོད་ཟེར་ཀུ་མུའི་པད་སྙིང་བཞིན། །འབྲལ་མེད་རྣལ་འབྱོར་རྟག་ཏུ་སྐྱོབ་པ་ཡིས། །བཀྲ་ཤིས་ནོར་ཕྱུགས་རྒྱུད་རྣམས་དར་བ་དང་། །ཞི་རྒྱས་དབང་དྲག་
ཕྲིན་ལས་ཐོགས་པ་མེད། །ཡིད་ལ་གང་བསམ་ནོར་རྣམས་འགྲུབ། །འཇིགས་པ་བརྒྱད་ལ་རྒྱབ་ཀྱི་ཕྱོགས། །འཁོར་ལོས་སྒྱུར་བའི་རྒྱལ་པོ་ཡི། །བསོད་ནམས་སྟོབས་དང་ལྡན་པར་འགྱུར། །ཅེས་དང་། རྟེན་གཏོར་ལས། ཡོན་ཏན་སྲིད་གསུམ་དབང་དུ་བསྡུས། །བཀྲ་ཤིས་ནོར་འཕེལ་རིགས་རྒྱུད་དར། །ཞེས་དང་། དྲིལ་སྒྲུབ་ལས་རྟག་ཏུ་སྤང་བླང་མེད་པར་མཆོད་བསྒྲུབ་རྫས་འཛོམ་ཞིང་བསྐང་གསོལ་ལ་བརྩོན་ན་མ་བསྐུལ་པར་ཡང་ལས་ཐམས་ཅད་རང་བཞིན་གྱིས་འགྲུབ་པར་ཐེ་ཚོམ་མེད་དོ། །ཕྲིན་ལས་སྒྲུབ་པར། ལན་གཅིག་བསྒྲུབས་ནས་རྗེས་སུ་བསྐུལ། །གཏོར་མཆོད་དུལ་མོ་རྡེབ་པ་ལ་སོགས་བྱས་པས་དགྲ་བོ་སྒྲོལ་བར་འགྱུར་རོ། །བཟློག་པས་མི་བཟློག་སྔགས་བདག་བཟློག་མཁན་ཁོ་རང་འཆིའོ། །ཞེས་དང་། བེང་བཟོ་གནད་དམིགས་ལས། དེས་ལུས་དང་གྲིབ་མ་བཞིན་དུ་འགྲོགས། མཐུ་དང་ནོར་དུས་གཅིག་འབྱུང་བའོ། །ལན་གསུམ་བསྒྲུབས་ན་འཁོར་ལོས་སྒྱུར་བའི་རྒྱལ་པོ་དང་འདྲའོ། །མཐུ་དང་ནོར་གང་བསམ་ཡིད་བཞིན་འགྲུབ། བཀྲ་ཤིས་བྱིན་ཆེ། ཞེས་དང་། རྩ་བའི་སྒྲུབ་པ་ལས། ལན་གཅིག་བསྒྲུབས་ནས་
གཏོར་མཆོད་དང་། །དམོད་བཅོལ་གཡབ་མོ་བརྡབ་པས་སྒྲོལ། །མདོར་ན་འདི་ཉིད་གསོལ་ཁས་འགྲུབ། །མ་ནིང་ཡིན་པས་བཟློག་ཐབས་མེད། །བཀྲ་ཤིས་སྙིང་ཉེ་མི་ནོར་འཕེལ། །བཟློག་མེད་ཡོད་ན་དགྲ་བོ་ཡི། །སྔོན་ལ་སྔགས་ནག་ཁོ་རང་ཕུང་། །ཁྱད་པར་ནད་པ་སྲིའུ་གསོ། །གཙུག་ལག་ཁང་གིས་དཀོར་སྲུངས་ཤིས། །ཞེས་དང་། སྐུ་མགོན་སྒྲུབ་པར། འཇིགས་པ་བརྒྱད་ཞི་བ་དང་། དངོས་གྲུབ་ཆར་ལྟར་འབེབས་ཤིང་གསང་བ་བསྒྲུབ། ཅེས་དང་། འདི་ནི་ཡིད་བཞིན་ནོར་བུ་ལྟ་བུའི་སྒྲུབ་པ་སྟེ། རྐྱེན་ཕྱི་ནང་གི་བར་ཆད་སེལ། ཡིད་ལ་འདོད་པའི་དོན་རྣམས་འགྲུབ། །བཀྲ་ཤིས་བྱིན་ཆེ། སྤྱིར་ཕྲིན་ལས་རྣམ་བཞིའི་མཆོད་བསྟོད་ལ་བརྩོན་པ་རང་གིས་བསྒྲུབ། ཅེས་དང་། གསུང་མགོན་བསྒྲུབ་པར། ཆོས་དང་ཟང་ཟིང་མཐུ་དང་སྙན་གྲགས་ལ་སོགས་གང་འདོད་འབྱུང་སྟེ། མགོན་པོ་དམར་པོ་ཡིད་བཞིན་ནོར་བུ་ལྟ་བུའོ། །ཞེས་དང་། འཛམ་ནག་སྒྲུབ་པར། མཐུ་དང་ནོར་དུས་གཅིག་ཏུ་འབྱུང་བས་ཤིན་ཏུ་ཟབ་ཅིང་གནད་ཆེའོ། །རྗེས་ཀྱང་སྔགས་རྒྱུན་དུ་བརྒྱ་རེ་བཟླས་ན། འཁོར་ལོས་སྒྱུར་བའི་རྒྱལ་པོ་དང་འདྲའོ། །ཞེས་
གསུངས་པས། ད་ལམ་དབང་བསྐུར་བ་ལ་སློབ་དཔོན་གྱིས་བྱ་བ་དབང་སྒྲུབ་པ་སོགས་སྔོན་དུ་སོང་བས། ཁྱེད་རང་སློབ་མ་རྣམས་ཀྱི་བགོ་བསྐལ་དུ་གྱུར་པ་མཎྜལ་ཕུལ། ཞེས་རཏྣའི་གཏེར་བྱོན་དཔལ་མགོན་མ་ནིང་གི་ལོ་རྒྱུས་དང་། དབང་གི་ཕན་ཡོན། ཨ་རཱ་གས་བྲིས་པ་ཚན་པ་གཉིས་སུ་ཡོད་པ། སྐྱབས་གནས་ཆགས་མེད་མཆོག་སྤྲུལ་ཀྱིས་བཀའ་གནང་ཐོབ་པར་བརྟེན་ནས་གོང་འོག་མཐུད་དེ་གཞན་བཅོས་བསླད་མེད་པར། ཆོས་དབྱིངས་རང་གྲོལ་རྩལ་གྱིས་བྲིས་པ་སྐལ་ལྡན་སྨིན་གྲོལ་ལམ་དུ་འགོད་པའི་རྒྱུར་གྱུར་ཅིག་དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།