དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་གཏོར་དབང་འཁྲུགས་བཤངས་བཀླག་ཆོག་ཏུ་བཀོད་པ།
དཔལ་ཡེ་ཤེས་ཀྱི་མགོན་པོ་མ་ནིང་ནག་པོའི་གཏོར་དབང་འཁྲུགས་བཤངས་བཀླག་ཆོག་ཏུ་བཀོད་པ་རཏྣ་ལུགས་ཏེ་འཇའ་ཚོན་ལུགས་ལ་ཡང་མཚུངས་སོ༔
སྒེས་དབང་གཏོར་མ་ལ་བསྡུས་ཏེ་བསྐུལ་བ་ནི༔ རྟོག་གཏོར་རྒྱུན་གཏོར་མཆོད་གཏོར་བཤམས༔ ལས་གཞུང་བསྲངས༔ མ་ནིང་སྔགས་ཀྱིས་ལུགས་ལྟར་བཀུག་ལ༔ མཆོད་བསྟོད་ཚར་རྗེས་སུ༔ སློབ་མ་ཁྲུས་བྱས་མཎྜལ་ཕུལ༔ འོ་ན་ད་ལམ་ཁྱེད་ལ་དཔལ་ཡེ་ཤེས་ཀྱི་མགོན་པོ་མ་ཧཱ་ཀཱ་ལ་མ་ནིང་ནག་པོའི་སྲོག་དབང་༔ གཏོར་མ་ལ་བརྟེན་ནས་ཅུང་ཟད་བསྡུས་པ་བསྐུར་བ་ལ༔ ཐོག་མར་ལོ་རྒྱུས་ནི༔ སྔོན་འདས་པའི་དུས་ན་བདུད་རིགས་བྱེ་བ་དུང་ཕྱུར་མང་པོའི་སེམས་ཅན་རྣམས་ལ་འཚེ་བའི་ཚེ༔ དཔལ་ཀུན་ཏུ་བཟང་པོ་ཆེ་མཆོག་ཧེ་རུ་ཀའི་སྐུར་བཞེངས་ནས༔ སྐུ་གསུང་ཐུགས་ཡོན་
ཏན་ཕྲིན་ལས་ལྔ་ལས་མགོན་པོ་མ་ནིང་རིགས་ལྔར་སྤྲུལ་ནས་ཀླུ་རིགས་ལྔ་བཏུལ་ལོ༔ དེར་རུ་ཏྲ་སྡེ་གསུམ་རུ་ཏྲ་སྡེ་བརྒྱད་ལ་སོགས་པ་བདུད་དམག་རྣམས་དང་དཔལ་གྱིས་སྤྲུལ་པ་རྣམས་སྟོབས་འགྲན་པ་ན༔ དཔལ་ཆེན་པོ་ཉིད་ཀྱིས་རུ་ཏྲའི་བུར་སྤྲུལ་ནས་བདུད་ཐམས་ཅད་བསྒྲལ་ཏེ༔ ཐོད་མཁར་དུ་བརྩེགས་པའི་ནང་དུ་མགོན་པོ་མ་ནིང་དུ་སྤྲུལ་ནས་བཞུགས་སོ༔ དེ་ནས་བརྒྱ་བྱིན་གྱིས་སྤྱན་དྲངས་ནས་ལྷ་ཡི་དམག་དཔོན་དུ་བསྐོས༔ དེར་མ་ནིང་ལས་ལ་ཆས་ཏེ༔ སྲོག་བདུད་དུ་སྤྲུལ་ནས་ལྷ་མ་ཡིན་གྱི་གཡུལ་བཟློག་གོ༔ དེའི་ཚེ་ལྕང་ལོ་ཅན་དུ་ཆེ་
མཆོག་ཧེ་རུ་ཀ་ལ་ཚོགས་ཀྱི་མཆོད་པ་རྒྱ་ཆེན་པོ་ཕུལ་ནས༔ ཕྱག་ན་རྡོ་རྗེས་ཞུས་པ་ལ་བརྟེན་ནས༔ མ་ནིང་ནག་པོའི་ལས་རྒྱུད་རྒྱས་བསྡུས་འབྲིང་གསུམ་གསུངས་སོ༔ དེ་མཁའ་འགྲོ་མ་རྣམས་ཀྱིས་བསིལ་བ་ཚལ་དུ་གཏེར་དུ་སྦས་པ༔ མཁའ་འགྲོ་མ་ལས་ཀྱི་དབང་མོ་ཆེས་ཨོ་རྒྱན་རིན་པོ་ཆེ་ལ་གཏད༔ སྒྲུབ་ཐབས་རྣམས་མཛད་ནས་གཏེར་ཁ་རྣམས་སུ་སྦས་པ༔ ཕྱིས་རཏྣ་གླིང་པ་འཇའ་ཚོན་པ་སོགས་གཏེར་སྟོན་མང་པོས་ཐོན་ནོ༔ འདི་ནི་རཏྣའི་སྲས་རྒྱུད་གཉིས་སློབ་རྒྱུད་གསུམ་ནས་བརྒྱུད་པ་ཡིན་ལ༔ གཞན་འཇའ་ཚོན་ལུགས་སུ་འགའ་རེ་ཡང་ཐོན་ཞིང་༔ གཏོར་དབང་བྱ་ཚུལ་གཅིག་པས་ན་བརྒྱུད་པ་གར་འདོད་དུ་དེད་ཆོག་པར་གདལ༔ དེ་ཡང་མ་ནིང་ལས་རྒྱུད་རྒྱས་འབྲིང་གཉིས་ཚིག་མཐུན་པར༔ དབང་ཐོབ་ཡོན་ཏན་བསམ་མི་ཁྱབ༔ འཇིག་རྟེན་འདི་ན་ཆེ་བཙན་ལྡན༔ ཞི་རྒྱས་དབང་དྲག་བསམ་པ་འགྲུབ༔ མཆོག་དང་ཐུན་མོང་དངོས་གྲུབ་ཐོབ༔ བཀྲ་ཤིས་ནོར་འཕེལ་མཐུ་རྩལ་ཆེ༔ ཀུན་གྱི་ཡིད་འོང་གཙུག་ཏུ་ཁུར༔ ཅེས་དང་༔ ཨོ་རྒྱན་རིན་པོ་ཆེས་ཞལ་ནས༔ མཐར་ཐུག་མ་ནིང་ནག་པོ་འདི༔ དགོས་འདོད་ཀུན་
འབྱུང་ཡིད་བཞིན་ནོར་བུ་འདྲ༔ ནད་རྣམས་ཀུན་འཇོམས་བུ་རམ་རྐྱལ་པ་འདྲ༔ ཁམས་གསུམ་དབང་སྡུད་དབང་གི་ཞགས་པ་འདྲ། དགྲ་བགེགས་ཚར་གཅོད་ཏིལ་དམར་རལ་གྲི་འདྲ༔ བཀྲ་ཤིས་དར་རྒྱས་དཔག་བསམ་ལྗོན་ཤིང་འདྲ༔ ཕྱི་ནང་ཆོས་སྐྱོང་བྱེ་བ་དཔག་མེད་ལས༔ མཐར་ཐུག་མ་ནིང་འདི་འདྲ་ཡོད་རེ་ཀན༔ ལན་གཅིག་བསྒྲུབས་ནས་གཏོར་ཟོར་དང་༔ རྨོད་བཅོལ་གཡབ་མོས་དགྲ་བོ་སྒྲོལ༔ མདོར་ན་འདི་ཉིད་གསོལ་ཁོས་འགྲུབ༔ མ་ནིང་ཡིན་པས་བཟློག་ཐབས་མེད་བཀྲ་ཤིས་སྙིང་ཉེ་མི་ནོར་འཕེལ༔ ཟློག་བྱེད་ཡོད་ན་དགྲ་བོ་ཡི༔ སྔོན་ལ་སྔགས་ནག་ཁོ་རང་ཕུང་༔ ཁྱད་པར་ནད་པ་སྲིའུ་གསོ༔ གཙུག་ལག་ཁང་གི་དཀོར་སྲུངས་ཤིས༔ ཨོ་རྒྱན་བདག་གི་སྙིང་ཐིག་འདི༔ སྤེལ་བར་འཕངས་ནས་གཏེར་དུ་སྦས། ཞེས་གསུངས་ཏེ༔ འདི་ཡི་ངོ་བོ་ཆེ་མཆོག་ཡིན་པས་སངས་རྒྱས་ཀྱི་གོ་འཕང་སྩོལ༔ ཁྲོ་བོ་རྨེ་བརྩེགས་དང་གཅིག་པས་གྲིབ་དང་མི་གཙང་བས་མི་ཚུགས་ཤིང་༔ ཁྲོ་བོ་སྟོབས་པོ་ཆེ་དང་ངོ་བོ་གཅིག་པས་ཆོས་སྐྱོང་ཀུན་ལས་འདི་སྟོབས་ཆེ༔ རྣམ་པ་སྲོག་བདུད་གཟའ་བདུད་ཀླུ་བདུད་ཡིན་པས་རྣོ་
མྱུར་འཇིག་རྟེན་ལྷ་འདྲེ་དང་འདྲ༔ སྔགས་བཟློག་གི་གཤེད་མ་ཡིན་པས་མཐུ་བཟློག་པས་མི་ཟློག༔ ཨོ་རྒྱན་བྱེ་བ་ཕྲག་བརྒྱ་ཡི་བཀའ་སྲུང་པས༔ ཆོས་སྐྱོང་ཐམས་ཅད་ཀྱི་རྒྱལ་པོ་ཡིན༔ ཁྱད་པར་དུ་བཀའ་བརྒྱད་ཐུགས་སྒྲུབ་ཀློང་གསལ་ཉམས་སུ་ལེན་པ་ལ་མ་སྒྲུབ་ཀྱང་རང་བཞིན་གྱིས་འཁོར་བས་བར་ཆད་སེལ་བ་ཡིན༔ དེ་ལྟ་བུའི་དབང་ཞུ་བའི་དོན་དུ༔ བླ་མ་དང་ཆེ་མཆོག་ཧེ་རུ་ཀ་དངོས་ཡིན་སྙམ་པ་གྱིས་ལ་རྗེས་ཟློས་མཛོད༔ ཧོ༔ རྒྱལ་བ་ཀུན་དང་མཉམ་པར་སྦྱོར༔ དྲེགས་པ་ཀུན་འདུས་དབང་བསྒྱུར་བས༔ སྒྲུབ་ཆེན་རྣལ་འབྱོར་བདག་ལ་དགོངས༔ བདག་ཅག་བྱང་ཆུབ་སེམས་བསྐྱེད་ཅིང་༔ འཕགས་མཆོད་འགྲོ་དོན་བགྱིད་དགོངས་པས༔ བདུད་དང་འབྱུང་པོ་ལོག་འདྲེན་དང་༔ མི་ནག་སྲིན་པོ་གདོང་དམར་གྱིས༔ བྱང་ཆུབ་བར་ཆད་བསྟན་པ་བཤིགས༔ དེ་ཡི་གཉེན་པོར་དྲེགས་པའི་དབང་༔ ཆོས་སྐྱོང་གཏོར་དབང་མཐུ་རྩལ་ཞུ༔ ཞེས་ལན་གསུམ་ཞུའོ༔ དེ་ནས་བླ་མས་འདི་སྐད་དོ༔ ཧོ༔ ཞི་ཁྲོ་བདེ་གཤེགས་ལྷ་བསྙེན་ཅིང་༔ རྣལ་འབྱོར་དམ་ཚིག་ལ་གནས་ན༔ ཆོས་སྐྱོང་རྣམས་ཀྱང་བྲན་ཁོལ་བྱེད༔ དམ་ཆོས་ཚུལ་བཞིན་སྤྱོད་པ་
ན༔ མ་བསྒྲུབ་པར་ཡང་ཆོས་སྐྱོང་ཉན༔ འོན་ཀྱང་ཞུས་པ་དེ་བཞིན་དུ༔ དྲེགས་པའི་གཙོ་མཆོག་མ་ནིང་ཆེ༔ སྲུང་མར་གཏད་གྱིས་དམ་གཙང་སྲུངས༔ ཞེས་གནང་བ་བྱིན༔ ད་བདག་ཉིད་ཆེ་མཆོག་ཏུ་གསལ་བའི༔ དཔལ་གཏོར་སྐུ་དང་བཅས་པ་དཔལ་མགོན་དངོས་སུ་བསྐྱེད༔ སློབ་མ་ཡང་མ་ནིང་དུ་བསྐྱེད་པར་གསུངས་པས་འདི་ལྟར་སྒོམས་ཤིག༔ ༈ ཕོ་བྲང་པད་ཉི་རོ་ཡི་གདན་སྟེང་དུ༔ བདག་ལས་རྒྱུ་ཡི་ཡི་གེ་ཧཱུྃ་སྤྲོས་པས༔ ལྷ་ཆེན་མཐིང་ནག་རྔམ་བརྗིད་འཇིགས་པ་ཡི༔ ཞལ་གཅིག་ཕྱག་གཉིས་བར་ནག་སྐུ་ལ་གསོལ༔ ཕྱག་གཡས་རུ་མཚོན་སྙིང་དང་ཞགས་པ་བསྣམས༔ ཐོད་སྐམ་ལྔ་དང་སྦྲུལ་ནག་རལ་པ་འཕྱང་༔ སྦྲུལ་ནག་མགོ་ཕྲེང་སྙིང་གི་དོམ་དོམ་སྤྲས༔ སྐུ་ལ་གསེར་རྐེད་མི་ལྤགས་བེང་ཆེན་བཙུགས༔ སྤྱན་གསུམ་ཁྲག་འདྲ་གྱེན་ཐུར་ཕྱོགས་བཅུར་བསྒྲད༔ ཞབས་གཉིས་གྱད་ཀྱི་འདོར་ཐབས་ཚུལ་དུ་བཞུགས༔ འཁོར་གྱི་དམག་ཚོགས་ཁྲོམ་ལྟར་བསྐྱེད་༔ ཐུགས་སྲོག་ཧཱུྃ་ལས་འོད་ཟེར་འཕྲོས༔ བསིལ་བ་ཚལ་དང་ནཱ་ལེནྡྲ༔ རྡོ་རྗེ་གདན་དང་ཨུ་ཙ་ལ༔ འོག་མིན་ཆོས་དབྱིངས་ཕོ་བྲང་ནས༔ སངས་རྒྱས་བྱང་
ཆུབ་སེམས་དཔའ་དང་༔ ཡི་དམ་ལྷ་ཚོགས་མཁའ་འགྲོ་དང་༔ ཆོས་སྐྱོང་ཕོ་རྒྱུད་མོ་རྒྱུད་རྣམས༔ མ་ནིང་ལྷ་ཚོགས་གྱུར་ནས་སུ༔ བྱ་ནག་ཤ་ལ་རུབ་པ་བཞིན༔ འུར་འུར་ཐིབས་ཐིབ་ཆེམས་ཆེམ་བྱོན༔ མདུན་གྱི་ལྷ་ལ་གཉིས་མེད་ཐིམ༔ སྤྲོས་རོལ་མོ་རྒྱས་པར་སྤྲོ་ན་ལས་བྱང་གི་སྤྱན་འདྲེན་བཞུགས་གསོལ་གཉིས་བྱ༔ བསྡུ་ན་མི་དགོས༔ ཨོཾ་ཤྲཱི་མ་ཧཱ་ཀཱ་ལ་ས་མཱ་ཡ་ཛ་ཛ་ཛཿཧཱུྃ་བཾ་ཧོ༔ དེ་ལྟར་གཏོར་མ་ཡེ་ཤེས་པར་གསལ༔ ཁྱེད་རང་རྣམས་དམ་ཚིག་པར་གསལ་བ་ལ༔ སློབ་དཔོན་ཆེ་མཆོག་ཏུ་གསལ་བས༔ ཕྱག་གཡས་ན་རུ་མཚོན་བཞག་པའི་མོས་པ་མཛོད༔ རྩ་སྔགས་བརྗོད་ཅིང་གཏད་ལ༔ ཕྱག་གཡོན་དུ་སྙིང་དང་ཞགས་པ་གཏད་པའི་མོས་པ་མཛོད༔ གཏད། རྐེད་ལ་ཙནྡན་གྱི་བེང་བཅུག་པའི་མོས་པ་མཛོད་གཏུག༔ བསྒྲུབ་ཡིག་མགོ་དང་སྙིང་གཏད་ནས་པོ་ཏི་ལུང་གི་དབང་ཐོབ་པར་སྒོམས་ཤིག༔ བཀའ་ཐོབ་པར་གྱུར་ཅིག༔ ལུང་ཐོབ་པར་གྱུར་ཅིག༔ ཆོས་འདི་ཡི་བདག་པོར་གྱུར་ཅིག༔ མགོ་དང་སྙིང་གར་པོ་ཏི་འམ་མེད་ན་དབང་དཔེ་བཞག༔ བླ་རྡོ་མཆན་ཁུང་གཡོན་དུ་གཏད་པས་ནམ་ཡང་མི་འབྲལ་བར་སྒོམས༔ བླ་རྡོ་མེད་ན་དཔེའུ་རིས་ལྟར༔ སྔགས་ཡོད་པའི་དཔེ་བཞག་པས་
འཐུས༔ ད་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་ལ༔ བཀའ་བསྒོ་དང་དྲུག་ལས༔ དང་པོ་སྐུ་ཡི་དོན་དུ་སློབ་དཔོན་ལ་མོས་འདུན་བྱས་པས༔ སློབ་དཔོན་ཆེ་མཆོག་ཏུ་གསལ་བའི་ཐུགས་ཀ་ནས་འོད་ཟེར་འཕྲོས༔ མདུན་གྱི་གཏོར་མ་ཡེ་ཤེས་ཀྱི་མགོན་པོ་ལ་ཕོག་པས་ཐུགས་རྒྱུད་བསྐུལ་ཏེ༔ མགོན་པོས་སློབ་མ་ལ་དབང་བསྐུར་བར་དགོངས་པ་གཏད་པས༔ མགོན་པོའི་དཔྲལ་བ་ནས་སྐུའི་མགོན་པོ་དཀར་པོ་འཕྲོས་ནས་ཁྱེད་རང་གི་དཔྲལ་བར་ཐིམ་པར་སྒོམས་ཤིག༔ གཏོར་མ་ལག་ཏུ་གནང་༔ མཆོད་གཡོག་པས་རྔ་བརྡུངས༔ སྤོས་ཌཱ་དྲིལ་དབྱངས་དང་བཅས༔ ཧཱུྃ༔ འོག་མིན་སོགས། ཚར་གཅིག །གཏོར་མ་དཔྲལ་བར་གཏུགས་ལ༔ ཨོཾ་ཤྲཱི་མ་ཧཱ་ཀཱ་ལ་ཀཱ་ཡ་ཨ་བྷི་ཥིཉྩ་ཨོཾ༔ ཞེས་བརྗོད༔ མེ་ཏོག་འཐོར་ཞིང་༔ ཧཱུྃ༔ འཇིག་རྟེན་འདས་པའི་དུས་ན་སྔོན་བྱུང་བ༔ ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས༔ སྐུ་ཡི་མགོན་པོས་ཨ་ཀར་རུ་ཏྲ་བཏུལ༔ སྐུ་ཡི་མགོན་པོའི་བཀྲ་ཤིས་ལུས་ལ་ཤོག༔ དེས་སྐུ་ཡི་དབང་ཐོབ༔ དེང་ཕྱིན་ཆད་མགོན་པོ་འདི་ཡི་སྐུ་བསྒོམ་པར་དབང་༔ ལུས་ཀྱི་ནད་གདོན་ཞི་ནས་གཟི་བརྗིད་དང་ལྡན༔ མཐར་ཐུག་གང་ལ་གང་
འདུལ་གྱིས་སྐུ་སྤྲུལ་ནུས་པ་སྐུ་ཡི་དབང་ངོ་༔ ཡང་མགོན་པོའི་མགྲིན་པ་ནས་གསུང་གི་མགོན་པོ་དམར་པོའི་ཚོགས་འཕྲོས་ནས་ཁྱེད་རང་གི་མགྲིན་པར་ཐིམ་པར་སྒོམས་ཤིག༔ ཧཱུྃ༔ འོག་མིན་སོགས་གོང་ལྟར་རོ༔ གཏོར་མ་མགྲིན་པར་བཞག་ལ༔ ཨོཾ་ཤྲཱི་མ་ཧཱ་ཀཱ་ལ་ཝཱཀྐ་ཨཱཿབྷི་ཥིཉྩ་ཨཱ༔ མེ་ཏོག་འཐོར་ཞིང་༔ ཧཱུྃ༔ འཇིག་རྟེན་འདས་པའི་དུས་ན་སྔོན་བྱུང་བ༔ ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས༔ གསུང་གི་མགོན་པོས་ཁ་ཊྭཱཾ་རུ་ཏྲ་བསྒྲལ༔ གསུང་གི་མགོན་པོའི་བཀྲ་ཤིས་ངག་ལ་ཤོག༔ དེས་གསུང་གི་དབང་ཐོབ༔ དེང་ཕྱིན་ཆད་མ་ནིང་བསྙེན་སྒྲུབ་རུང་ངག་དིག་ལྐུགས་ཞི༔ ངག་ནུས་པ་དང་མཐར་ངག་བདེན་ཚིག་འགྲུབ་པས་འགྲོ་བའི་དོན་ནུས་པ་གསུང་གི་དབང་ངོ་༔ ཡང་ཐུགས་ཀྱི་དོན་དུ་མགོན་པོའི་ཐུགས་ཀ་ནས་ཐུགས་ཀྱི་མགོན་པོ་མཐིང་ནག་གི་ཚོགས་བྱོན་ནས་ཁྱེད་རང་གི་སྙིང་གར་ཐིམ་པར་སྒོམས་ཤིག༔ ཧཱུྃ༔ འོག་མིན་སོགས། ཨོཾ་ཤྲཱི་མ་ཧཱ་ཀཱ་ལ་ཙིཏྟ་ཨ་བྷི་ཥིཉྩ་ཧཱུྃ༔ མེ་ཏོག་འཐོར༔ ཧཱུྃ༔ འཇིག་རྟེན་འདས་པའི་དུས་ན་སྔོན་བྱུང་བ༔ ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས༔ ཐུགས་ཀྱི་མགོན་པོས་མ་ཏྲཾ་རུ་ཏྲ་བཏུལ༔ ཐུགས་ཀྱི་མགོན་པོའི་
བཀྲ་ཤིས་སེམས་ལ་ཤོག༔ དེས་ཐུགས་ཀྱི་དབང་ཐོབ༔ ཡོད་མེད་གཉིས་ཀ་མ་ཡིན་པ་མ་ནིང་གི་ལྟ་བ་བསྒོམ་པར་དབང་༔ སེམས་ལ་རྟག་ཆད་གཉིས་ཀ་མ་ཡིན་པ་མ་ནིང་གི་རྟོགས་པ་འཆར༔ མཐར་ཐུག་ཀུན་ཏུ་བཟང་པོའི་གོ་འཕང་ཐོབ་པ་ཐུགས་ཀྱི་དབང་ངོ་༔ ཡང་མགོན་པོའི་ལྟེ་བ་ནས་ཡོན་ཏན་གྱི་མགོན་པོ་སེར་པོ་འཕྲོས༔ ཁྱེད་རང་གི་ལྟེ་བར་ཐིམ་པར་སྒོམས་ཤིག༔ ཧཱུྃ་འོག་མིན་སོགས༔ ཨོཾ་ཤྲཱི་མ་ཧཱ་ཀཱ་ལ་སརྦ་ཨ་བྷི་ཥིཉྩ་ཧཱི༔ ལྟེ་བར་གཏུགས༔ ཧཱུྃ༔ འཇིག་རྟེན་འདས་པའི་དུས་ན་སྔོན་བྱུང་བ༔ ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས༔ ཡོན་ཏན་མགོན་པོས་ཕོ་རྒྱུད་རུ་ཏྲ་བཏུལ༔ ཡོན་ཏན་མགོན་པོའི་བཀྲ་ཤིས་དེང་འདིར་ཤོག༔ ཅེས་མེ་ཏོག་འཐོར༔ དེས་ཡོན་ཏན་གྱི་དབང་ཐོབ་པས༔ མགོན་པོ་བསྒྲུབས་པས་དངོས་གྲུབ་རྣམས་འབྱུང་༔ ཚེ་དང་བསོད་ནམས་རྣམས་འཕེལ༔ མཐར་ཐུག་འགྲོ་བའི་རེ་འདོད་བཀང་ནུས་པ་ཡོན་ཏན་གྱི་དབང་ངོ་༔ ཡང་མགོན་པོའི་གསང་གནས་དང་སྐུ་ཡི་ཆ་ཐམས་ཅད་ནས༔ ཕྲིན་ལས་ཀྱི་མགོན་པོ་ལྗང་གུའི་ཚོགས་འཕྲོས་ནས༔ ཁྱེད་རང་རྣམས་ཀྱི་གསང་གནས་དང་༔ ལུས་ཀྱི་ཆ་
ཐམས་ཅད་ལ་ཐིམ་པར་སྒོམས་ཤིག༔ ཧཱུྃ༔ འོག་མིན་སོགས། སྔགས་དང་བཅས་པ་ཚར་ནས༔ ཧོ༔ སྲོག་བདུད་མ་ནིང་ནག་པོ༔ གཟའ་བདུད་མ་ནིང་ནག་པོ༔ ཀླུ་བདུད་མ་ནིང་ནག་པོ༔ བཀའ་འཁོར་དཔལ་མགོན་བདུན་ཅུ༔ ཡང་འཁོར་ལྷ་སྲིན་སྡེ་བརྒྱད༔ ལྷ་དམག་ཉི་ཁྲི་ཆིག་སྟོང་༔ བདུད་དམག་བྱེ་བ་འབུམ་འགྱུར༔ ཡུམ་ཆེན་ལྷ་མོ་དཔལ་འབར༔ སྲིད་པའི་མ་མོ་བྱེ་བ་རྣམས་ཀྱིས༔ རྡོ་རྗེའི་སློབ་མ་འདི་ཡི་དམ་པའི་ཆོས་སྒྲུབ་པའི་འགལ་རྐྱེན་བར་དུ་གཅོད་པ་ཐམས་ཅད་ཕྱིར་བཟློག༔ མཐུན་རྐྱེན་ཚེ་དང་བསོད་ནམས་དཔལ་དང་འབྱོར་པ་ཐམས་ཅད་ཟླ་བ་ཡར་གྱི་ངོ་བཞིན་འཕེལ་ཞིང་རྒྱས་པ་དང་༔ ཕྲིན་ལས་རྣམ་བཞི་ཐོགས་པ་མེད་པར་འགྲུབ་པའི་ཕྲིན་ལས་མཛོད་ཅིག༔ ཨོཾ་ཤྲཱི་མ་ཧཱ་ཀཱ་ལ་ཀརྨ་ཨ་བྷི་ཥིཉྩ་ཨཱ༔ ཞེས་ལག་ཏུ་བཞག་གོ༔ ཧཱུྃ༔ འཇིག་རྟེན་འདས་པའི་དུས་ན་སྔོན་བྱུང་བ༔ ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས༔ ཕྲིན་ལས་མགོན་པོས་རུ་ཏྲ་མོ་རྒྱུད་བཏུལ༔ ཕྲིན་ལས་མགོན་པོའི་བཀྲ་ཤིས་དེང་འདིར་ཤོག༔ དེས་ཕྲིན་ལས་ཀྱི་དབང་ཐོབ༔ བསམ་པའི་བར་ཆད་ཞི༔ ཕྲིན་ལས་གང་བརྩམ་འགྲུབ༔ མཐར་ཐུག་སངས་རྒྱས་ཀྱི་ཕྲིན་ལས་སྒྲུབ་ནུས་པ་
ཕྲིན་ལས་ཀྱི་དབང་ངོ་༔ ད་གཏོར་མ་འདི་ཉིད་ཡེ་ཤེས་ཀྱི་མགོན་པོ་མ་ནིང་མགོན་པོ་ལ་སྐུ་ལྔའི་མགོན་པོས་བསྐོར་བ༔ དེ་ཡི་སྟེང་གི་ཆ་ལ་ཆེ་མཆོག་དཔལ་དགུ་བརྒྱུད་པའི་བླ་མ་དང་བཅས་སྤྲིན་འཁྲིགས་པ་ལྟར་སྤྱི་བོར་བྱོན་ནས་དབང་བསྐུར་བྱིན་གྱིས་བརླབ་པར་སྒོམས་ཤིག༔ སློབ་མ་དམ་ཚིག་ཅན་ཡིན་ན་འོད་དུ་ཞུ་ནས་ཐིམ་པར་བསྒོམ༔ མིན་ན་མི་རུང་། གཏོར་མ་ལག་ཏུ་ཐོགས་ལ༔ བཅོམ་ལྡན་འདས་ཀུན་བཟང་ཡབ་ཡུམ༔ རྒྱལ་བ་རིགས་ལྔ་རྡོ་རྗེ་འཆང་༔ རྡོ་རྗེ་སེམས་དཔའི༔ ཤཱཀྱ་ཐུབ་པ༔ རིག་འཛིན་རྡོ་རྗེ་ཆོས༔ མཁའ་འགྲོ་ལས་ཀྱི་དབང་མོ་ཆེ༔ ཆོས་རྒྱལ་ཨིནྡྲ་བྷོ་དྷི༔ དགའ་རབ་རྡོ་རྗེ༔ ཤྲཱི་སེང་ཧ་སྲས་གོ་མ་དེ་བྱི༔ པདྨ་འབྱུང་གནས༔ ཡེ་ཤེས་མཚོ་རྒྱལ༔ རཏྣ་གླིང་པ༔ ཚེ་དབང་གྲགས་པ་ལ་སོགས་བརྒྱུད་པའི་བླ་མ་དམ་པ་རྣམས་དང་༔ ཡི་དམ་ཆེ་མཆོག་དཔལ་དགུ༔ ཡེ་ཤེས་ཀྱི་མགོན་པོ་མ་ནིང་ནག་པོ༔ སྐུ་ཡི་མགོན་པོ་སྟག་ཞོན༔ གསུང་གི་མགོན་པོ་བེང་མ༔ ཐུགས་ཀྱི་མགོན་པོ་གྲི་གུག༔ ཡོན་ཏན་གྱི་མགོན་པོ་སེང་ཞོན༔ ཕྲིན་ལས་ཀྱི་མགོན་པོ་ཏྲཀཱད༔ མགོན་ཆེན་ཉི་ཤུ་རྩ་ལྔའི་ཚོགས་དང་བཅས་པས༔ རྡོ་
རྗེའི་སློབ་མ་འདི་ལ་བྱིན་གྱིས་རླབས་པ་དང་༔ དབང་བསྐུར་དུ་གསོལ༔ ལུས་ངག་ཡིད་གསུམ་ལོག་པའི་ལམ་དུ་མི་འགྲོ་ཞིང་༔ ཐར་པ་བྱང་ཆུབ་ཀྱི་ཕྱོགས་སུ་བློ་འགྲོ་བར་མཛད་དུ་གསོལ༔ ལུས་ངག་ཡིད་གསུམ་བསྲུང་བ་དང་སྐྱབས་པར་མཛད་དུ་གསོལ༔ ནད་དང་གདོན་དང་བར་ཆད་ཞི་བར་མཛད་དུ་གསོལ༔ མཆོག་དང་ཐུན་མོང་གི་དངོས་གྲུབ་ཐོབ་པར་མཛད་དུ་གསོལ༔ སྨིན་ཅིང་གྲོལ་བར་མཛད་དུ་གསོལ༔ རྒྱས་པར་ན་ཆེ་མཆོག་དཔལ་དགུའི་སྔགས་བརྗོད༔ བསྡུ་ན་གཞུང་ལྟར་ཆེ་མཆོག་དང་མ་ནིང་སྔགས་གསུམ་བརྗོད་དེ་སྤྱི་བོར་བཞག་གོ༔ ད་མེ་ཏོག་མཐིང་ཀའི་ཕྲེང་བ་ཞིག་ཕུལ་བའི་མོས་པས་རྗེས་ཟློས་གྱིས༔ མགོན་པོ་མ་ནིང་བདག་གིས་བཟུང་ལགས་ཀྱིས༔ བདག་ལ་འགོ་བར་མཛད་དུ་གསོལ༔ སློབ་དཔོན་དང་མདུན་བསྐྱེད་ཀྱི་ཐུགས་ཀ་ནས་སྔགས་ཕྲེང་འཕྲོས་ནས་ཁྱེད་རང་གི་ཞལ་དུ་ཞུགས་ནས༔ ཐུགས་ཀར་ཧཱུྃ་གི་མཐར་འཁོར་བར་བསྒོམ་ལ་སྔགས་ཀྱི་རྗེས་ཟློས་ལན་གསུམ༔ ཨོ་ཤྲཱི་མ་ཧཱ་ཀ་ལ་གྷ་ན་གྷ་ཡ་རཾ་སིདྡྷི་ཧཱུྃ་ཕཊ༔ ད་སྔགས་ཕྲེང་མེ་ཏོག་གི་ཕྲེང་བར་གྱུར་ནས་སྤྱི་བོར་བཞག་པའི་མོས་པ་གྱིས༔ ཙམ་པ་ཀའམ་ནས་བཞག༔ མགོན་པོ་མ་ནིང་འདི་ལ་བསྩལ་
ལགས་ཀྱིས༔ འདི་ལ་འགོ་བར་མཛད་དུ་གསོལ༔ ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ དེས་མ་ནིང་གི་དབང་ལེགས་པར་ཐོབ་པ་ཡིན་པས༔ མ་ནིང་ལས་རྒྱུད་ཆེན་པོ་ལས༔ དབང་སྲོག་དམ་ཚིག་གིས་བཟུང་བ༔ བླ་མ་ཡི་དམ་མཁའ་འགྲོ་ཡི༔ སྐུ་གསུང་ཐུགས་དང་རྩ་བ་དང་༔ ཡན་ལག་དམ་ཚིག་མ་ཉམས་བསྲུང་༔ བླ་མའི་དམ་ཚིག་སྐུ་མི་སྨདི༔ གསུང་མི་བཅག་ཅིང་ཐུགས་མི་དཀྲུག༔ ཡི་དམ་བསྐྱེད་རྫོགས་གསལ་བ་དང་༔ འཛབ་དང་བཟླས་པ་མི་བཅག་ཅིང་༔ དུས་མཆོད་མི་བཅག་རྟེན་མི་སྤངས་ཆོས་སྐྱོང་དག་གིས་དམ་ཚིག་ནི༔ ལྟ་བས་རྒྱས་བཏབ་གསོལ་མཆོད་རེམ༔ སྒོམ་སྒྲུབ་རེམ་ཞིང་ཕུད་མི་འབགས༔ དམ་རྫས་མི་སྤེལ་མི་བརྟེན་ཅིང་༔ ཆོས་སྐོར་མི་འབགས་སྒྲུབ་ལ་བརྩོན༔ ཉམས་པ་མི་བརྟེན་བསྐང་མདོས་རེམ༔ ཌཱཀྐིའི་དམ་ཚིག་ཚོགས་ལ་འབད༔ སྐྲ་སེན་མི་བྲེག་སྟན་མི་སྤྲུགས༔ རལ་པའི་རྩེ་མོ་མི་བཅད་ཅིང་༔ བླ་མ་མིན་ལ་ཕྱག་མི་བྱ༔ དེ་ལྟར་དམ་ཚིག་གཙང་གྱུར་ན༔ ཚེ་འདིར་བདེ་སྐྱིད་ཕུན་སུམ་ཚོགས༔ ཕྱི་མ་རྒྱལ་བའི་སྲས་སུ་འགྱུར༔ དམ་ཚིག་ཉམས་པའི་སྔ་ལྟས་ནི༔ སྔོན་ན་བུ་དང་
ཆུང་མ་འཆི༔ ཡིད་དུ་མི་འོང་སྣ་ཚོགས་འབྱུང་༔ ཕྱི་མ་རྡོ་རྗེའི་དམྱལ་བ་ནས༔ བསྐལ་པ་འབུམ་དུ་ཐར་དུས་མེད༔ དེ་བས་དམ་གཙང་ཤིན་ཏུ་གཅེས༔ ཞེས་གསུངས་པས་དམ་ཚིག་ཅི་ནུས་སྲུང་ཞིང་མགོན་པོ་འདི་ཡི་དམ་ཆོས་སྐྱོང་དབྱེར་མེད་དུ་བརྟེན་སྙམ་པས་རྗེས་ཟློས་གྱིས༔ གཙོ་བོའི་ཇི་ལྟར་བཀའ་སོགས༔ གཏང་རག་གི་མཎྜལ་ཕུལ༔ ས་གཞི་སྤོས་སོགས༔ དེ་ནས་སློབ་མ་གྱེས་རང་གི་མཆོད་བསྟོད་བྱའོ༔ ༈ ཡང་སྙིང་གི་སློབ་བུ་དམ་ཚིག་ཅན་ན་ནས་ཅིས་ཀྱང་མ་ཕན་ན༔ འདིའི་གཏོར་དབང་བརྒྱ་རྩ་ལོ་གྲངས་སོགས་བྱ་སྟེ༔ གོང་གི་གསོལ་འདེབས་ནས་བླ་རྡོ་གཏད་ཡན་ཆད་གོང་ལྟར་བྱས་ལ༔ ཉིན་རེ་ལ་ད་ནངས་རེ་རེའི་ཆོག༔ དེ་མན་ཆོད་འདི་ལ་གྲངས་འཛིན་ནོ༔ དེ་ཡང་མ་ནིང་མེ་དབལ་ནག་པོའི་རྒྱུད་ལས༔ ནད་པ་སློབ་མ་བསྲུང་བ་ལ༔ གཏོར་དབང་དག་ལ་ནན་ཏན་བསྐྱེད༔ ཅེས་གསུངས་པས༔ སློབ་དཔོན་ཆེ་མཆོག་ཏུ་གསལ་བའི་མོས་འདུན་བྱས་པས༔ གཏོར་མ་མགོན་པོར་གསལ་བའི་སྐུ་ལས་སྐུ་ཕྲ་མོ་དཀར་ལ་དམར་ལྗང་དང་༔ གསུང་སྔགས་ཕྲེང་༔ ཐུགས་ཧཱུྃ་ཡིག༔ ཡོན་ཏན་ཕྲིན་ལས་འོད་ཟེར་ཁ་དོག་སྣ་ཚོགས་བྱོན་པ༔ ཁྱེད་རང་གི་ལུས་ངག་ཡིད་གསུམ་ལ་ཐིམ་པས༔ བར་ཆད་ཐམས་ཅད་ཞི་
དབང་དང་བྱིན་རླབས་ཐམས་ཅད་ཐོབ་པར་སྒོམས་ཤིག༔ ཧཱུྃ༔ འོག་མིན་སོགས་ནས་སྔགས་གཉིས་ནས་སྤྱི་བོ་མགྲིན་པ་སྙིང་ག་ལྟེ་བ་བཞིར་གཏུགས་ཤིང་༔ ཨོཾ་ཤྲཱི་མ་ཧཱ་ཀཱ་ལ་ཀཱ་ཡ་ཨ་བྷི་ཥིཉྩ་ཨོཾ༔ ཝཱཀྐ་ཨ་བྷི་ཥིཉྩ་ཨཱཿ ཙིཏྟ་ཨ་བྷི་ཥིཉྩ་ཧཱུྃ༔ སརྦ་ཨ་བྷི་ཥིཉྩ་ཧཱུྃ༔ ཞེས་གནས་བཞིར་གཏུགས༔ སློབ་བུ་ལ་སྤྱན་དྲངས་ནས་བསྟིམ༔ ད་རྩ་སྔགས་རྗེས་ཟློས་གྱིས༔ ཨོཾ་ཤྲཱི་མ་ཧཱ་ཀཱ་ལ་གྷ་ན་གྷ་ཡ་རཾ་སིདྡྷི་ཧཱུྃ་ཕཊ༔ དེས་ཀྱང་དབང་བཞི་དམ་པ་ཐོབ་པས་ཕྲིན་ལས་འགྲུབ་པར་འགྱུར་རོ༔ དེ་ལྟ་བུའི་དབང་བརྒྱ་རྩ་དང་ལོ་གྲངས་སོགས་ཀྱིས་བར་ཆད་ངེས་པར་སེལ་ཏེ༔ རྒྱུད་འཛིན་བསྟན་པ་ལ་ཕན་ངེས་མིན་པར་བྱས་ན་བཀའ་ཆད་འོང་བས་མི་བྱ༔ མཇུག་ཏུ་གཙོ་བོའི་སོགས་དང་མཎྜལ་ཕུལ་ལོ༔ ༈ མ་ནིང་གསང་སྒྲུབ་དབང་དང་ལས་ཚོགས་བཅས༔ དགེ་རིའི་བྲག་ལ་ཨ་ཐཾ་ས་མ་ཡ༔ གཏེར་རྒྱ༔ སྦས་རྒྱ༔ གསང་རྒྱ༔ ཁ་ཐཾ་རྒྱ་རྒྱ་རྒྱ༔ དགེ་རི་བྲག་ནས་རཏྣ་གླིང་པས་བཏོན༔ ཅེས་པ་ལ་གབ་འཁྲུགས་བསལ་ནས་རཱ་ག་ཨ་སྱས་བྲིས། །ཉེས་འགལ་ཆོས་སྐྱོང་འཁོར་དང་བཅས་ལ་བཤགས། །དགེ་བས་ཨོ་རྒྱན་བསྟན་པ་རྒྱས་གྱུར་ཅིག །མངྒ་ལཾ།