དཔལ་མགོན་མ་ནིང་ནག་པོའི་བསྐང་བ་རིན་པོ་ཆེ་རཱ་ག་ཨ་སྱས་མཛད་པ།
དཔལ་མགོན་མ་ནིང་ནག་པོའི་བསྐང་བ་རིན་པོ་ཆེ་རཱ་ག་ཨ་སྱས་མཛད་པ་བཞུགས་སོ།།
ཧཱུྃ༔ དཔལ་མགོན་ནག་པོ་འཁོར་བཅས་ལ། །གཞན་ཡང་མཐུན་པའི་དམ་རྫས་ནི། །རྩ་བརྒྱད་སྟོང་ལ་སྦྱར་བ་ཡི། །རང་བྱུང་བདུད་རྩི་ཨ་མྲྀ་ཏ། །དུག་ལྔ་སེལ་བའི་བདུད་རྩི་དང་། །རིན་ཆེན་སྣོད་དང་བྷན་རུ། །བཤོས་ནག་འབར་བ་ཁྲག་གིས་བྱུག །ཙིཏྟ་སྙིང་གི་རྒྱལ་མཚན་དང་། །གཡག་ལུག་ནག་པོ་ཁྱི་ཡི་མཚན། །དགྲ་བོའི་ཤ་རུས་ཐོད་ཚིལ་སྤུང་། །རཀྟ་དམར་གྱི་ཞམ་ཆུ་འབབ། །དམ་རྫ་ས་གཏོར་ཆེན་འབར་བ་ཡིས། །དཔལ་མགོན་ནག་པོའི་ཐུགས་དམ་བསྐང་། །ཡེ་ཤེས་མགོན་པོའི་ཐུགས་དམ་བསྐང་། །མ་ཧཱ་ཀཱ་ལིའི་ཐུགས་
དམ་བསྐང་། །གཏེར་བདག་ཆེན་པོའི་ཐུགས་དམ་བསྐང་། །མ་ནིང་ནག་པོའི་ཐུགས་དམ་བསྐང་། །རིག་འཛིན་སྲུང་མའི་ཐུགས་དམ་བསྐང་། །ལེགས་ལྡན་ནག་པོའི་ཐུགས་དམ་བསྐང་། །གནམ་ལྕགས་སྤུ་གྲིའི་ཐུགས་དམ་བསྐང་། །བདུད་རྒྱལ་ཐོད་ཕྲེང་ཐུགས་དམ་བསྐང་། །ཆོས་སྐྱོང་ཆེན་པོའི་ཐུགས་དམ་བསྐང་། །སྲོག་བདུད་ནག་པོའི་ཐུགས་དམ་བསྐང་། །དཔལ་ལྡན་ལྷ་མོའི་ཐུགས་དམ་བསྐང་། །ཡང་འཁོར་སྡེ་བརྒྱད་ཐུགས་དམ་བསྐང་། །ལྷ་དམག་འབུམ་གྱི་ཐུགས་དམ་བསྐང་། །ཕྱག་བརྙན་སྤྲུལ་པའི་ཐུགས་དམ་བསྐང་།
བདུད་དམག་འབུམ་སྡེའི་ཐུགས་དམ་བསྐང་། །ནག་པོ་སྟོང་གི་ཐུགས་དམ་བསྐང་། །གཤིན་རྗེ་བརྒྱད་ཀྱི་ཐུགས་དམ་བསྐང་། །གནོད་སྦྱིན་བརྒྱད་ཀྱི་ཐུགས་དམ་བསྐང་། །ཉི་ཁྲི་བདུན་སྟོང་ཐུགས་དམ་བསྐང་། །མ་མོ་བྱེ་བའི་ཐུགས་དམ་བསྐང་། །ཕྱོགས་སྐྱོང་བཅུ་ཡི་ཐུགས་དམ་བསྐང་། །ཤན་པ་གྲི་ཐོགས་ཐུགས་དམ་བསྐང་། །བདུད་པོ་ཟོར་ཐོགས་ཐུགས་དམ་བསྐང་། །མ་མོ་ཁྲམ་ཐོགས་ཐུགས་དམ་བསྐང་། །དམ་ཅན་རྒྱ་མཚོའི་ཐུགས་དམ་བསྐང་། །འཁོར་གྱི་སྲུང་མའི་ཐུགས་དམ་བསྐང་། །གཞན་ཡང་ཐུགས་དམ་བསྐང་བ་ནི། །བདུད་རྩི་སྨན་གཏོར་རཀྟ་དང་། །ཤ་སྣ་སྙིང་སྣ་ཁྲག་སྣ་དང་། །ཆིབས་རྟ་འགྱིང་གཡག་རྟེན་ལུག་དང་། །བེང་དང་རུ་མཚོན་གསང་བའི་རྫས། །མཐུན་རྫས་དུ་མས་ཐུགས་དམ་བསྐང་། །མ་ནིང་ནག་པོ་འཁོར་བཅས་ཀྱི། །ཐུགས་དམ་གཉན་པོ་བསྐང་གྱུར་ཅིག །ཐུགས་དམ་གཉན་པོ་བསྐངས་བ་ཡིས། །རྣལ་འབྱོར་བདག་ཅག་འཁོར་བཅས་ཀྱི། །ཆག་ཆེན་ཉམ་ང་ཐམས་ཅད་ཟློག །རྐྱེན་དང་བར་ཆད་ཐམས་ཅད་ཟློག །བསྲུང་དང་བསྐྱབ་པར་མཛད་དུ་གསོལ། །ཟས་དང་ཕུད་ཀྱིས་ཁྱོད་མཆོད་
ན། །འདོད་པའི་རེ་བ་བསྐང་དུ་གསོལ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་མཐར་ཕྱིན་གྱིས་བསྐུལ་ནས། སྔགས་འཆང་རཱ་ག་ཨ་སྱས་དཔལ་མགོན་སྤྱི་གཞུང་ངམ་བསྐུལ་རེ་བསྒྲིགས་པ་ལ་ཉེས་འགལ་མཆིས་ན་མ་ནིང་སྲོག་བདུད་འཁོར་དང་བཅས་ལ་མཐོལ་ལོ་བཤགས་སོ། །དགེ་བས་བདག་གཞན་ཐམས་ཅད་རྐྱེན་ལས་མྱུར་གྲོལ་ཤོག ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།