བླ་མ་ཡི་དམ་མགོན་པོ་དབྱེར་མེད་དུ་སྒྲུབ་པའི་རྒྱུན་ཁྱེར།
བླ་མ་ཡི་དམ་མགོན་པོ་དབྱེར་མེད་དུ་སྒྲུབ་པའི་རྒྱུན་ཁྱེར་བཞུགས་སོ། །
ཨོཾ་དཾཥྚོརྐཊ་བེ་ར་ཝ་ཡ་སཾ་སཾ་སཾ་རུ་རུ་རུ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་སྭ་བྷ་ཝ་སོགས། སྟོང་པའི་ངང་ལས་རྫུ་འཕྲུལ་དྲེལ་རྟའི་སྟེང་། །ཧཱུཾ་ལས་མགོན་པོ་ཞལ་གཅིག་ཕྱག་གཉིས་པ། །མཐིང་ནག་སྤྱན་གསུམ་ལྗགས་འདྲིལ་མཆེ་བ་གཙིགས། །དབུ་སྐྲ་གྱེན་བརྫེས་གཡས་པས་གྲི་ཁུག་དང་། །གཡོན་པས་ཐོད་ཁྲག་ཐོད་སྐམ་དབུ་བརྒྱན་ཅན། །དུག་སྦྲུལ་རུས་པ་སྣ་ཚོགས་དར་གྱིས་བརྒྱན། །དར་ནག་འཇོལ་བེར་སྟག་གི་ཤམ་ཐབས་ཅན། །མགོ་ཕྲེང་དོ་ཤལ་ཞབས་གཡས་བརྐྱངས་བའི་གར། །གཡོན་པས་ཡུམ་ལ་འཁྲིལ་ཚུལ་འགྱིང་བའི་པང་། །མ་ལས་ལྷ་མོ་
ཞལ་གཅིག་ཕྱག་བཞི་པ། །ཁ་ཊྭཱཾ་ཕུར་པ་མེ་ལོང་སྦྲུལ་ཞགས་འཛིན། །བཙན་འཁྱིལ་སྟབས་ཀྱིས་ཞབས་གཉིས་ཡབ་ལ་འཁྲིལ་། །སྤྱི་བོར་རྩ་བརྒྱུད་བླ་མ་ཀུན་འདུས་པ། །གྲུབ་ཆེན་པཀྴི་སྐུ་མདོག་སྨུག་ནག་ལ། །ཆོས་གོས་རྣམ་གསུམ་ཞྭ་ནག་གསེར་མདོངས་ཅན། །སྤྱན་མིག་ཟུར་གསུམ་ཆོས་དབྱིངས་ནམ་མཁར་གཟིགས། །སྐུ་ཤ་རབ་རྒྱས་ཨག་ཚོམ་ཟུར་གསུམ་ལྷག །ཕྱག་གཉིས་བདུད་འདུལ་ཕྱག་རྒྱས་ས་གནོན་གྱིས། །སྣང་སྲིད་ཟིལ་གྱིས་མནན་བཞིན་ལམ་མེར་བཞུགས། །རང་ཉིད་མགོན་པོའི་ཐུགས་ཀར་ཟླ་བའི་སྟེང་། །ཡི་དམ་
རྒྱལ་བ་རྒྱ་མཚོ་སྐུ་མདོག་དམར། །ཞལ་གཅིག་ཕྱག་བཞི་དང་པོ་ཐལ་མོ་སྦྱར། །འོག་མ་གཉིས་ན་ཕྲེང་བ་པདྨ་འཛིན། །སྐྱིལ་ཀྲུང་དར་དང་རིན་ཆེན་རྒྱན་གྱིས་སྤྲས། །ཡབ་ཀྱི་ཐུགས་ཀར་ཟླ་སྟེང་ཧཱུྃ་གི་མཐར། །ཨོཾ་ཤྲཱི་མ་ཧཱ་ཀཱ་ལ་ཡཀྵ་བེ་ཏཱ་ལི་ཧཱུྃ་ཿ ཞེས་པའི་སྔགས་ཕྲེང་གཡས་སུ་འཁོར་བ་ལས། །འོད་ཟེར་ཁ་དོག་སྣ་ཚོགས་ཕྱོགས་བཅུར་འཕྲོས་། །བླ་མ་ཡི་དམ་སངས་རྒྱས་བྱང་ཆུབ་སེམས། །དཔའ་བོ་མཁའ་འགྲོ་ཡེ་ཤེས་ཆོས་སྐྱོང་ཚོགས། །ཀུན་ལ་འོད་དེས་མཆོད་ནས་ཐུགས་རྒྱུད་མཉེས། །ཐམས་ཅད་མ་མགོན་ལྕམ་དྲལ་སྐུར་གྱུར་ཏེ། །ཁ་བ་བུ་ཡུག་འཚུབ་བཞིན་ཐམས་ཅད་བྱོན། །བདག་ལ་ཐིམ་པས་བྱིན་རླབས་དངོས་གྲུབ་ཐོབ། །བསོད་ནམས་ཡོན་ཏན་ཡེ་ཤེས་རྒྱས་པར་གྱུར། །དེ་ལྟར་བསྒོམ་ཞིང་བསྙེན་སྔགས་ཅི་ནུས་བཟླས། །མཐར་ནི་སྒོམ་མཁན་སེམས་ཀྱི་ངོ་བོར་ལྟ། །བླ་མ་པཀྴི་ཡི་དམ་སྤྱན་རས་གཟིགས། །ཆོས་སྐྱོང་མ་མགོན་དབྱེར་མེད་སྒྲུབ་པའི་ཐབས། །རྒྱུན་ཁྱེར་ཉུང་ངུ་ཟབ་གནད་ལྡན་པ་འདི། །བླ་མ་ཡོན་ཏན་རིང་ནས་བསྐུལ་བའི་ཕྱིར། །རཱ་ག་ཨ་སྱས་འཕྲལ་དུ་བྲིས་པའོ། །དགེ་བས་མ་མགོན་བསྟན་པ་དར་རྒྱས་ཤོག །མངྒ་ལཾ།། །།