མ་མགོན་ཞལ་སྦྱོར་གྱི་དབང་གི་ལོ་རྒྱུས།
མ་མགོན་ཞལ་སྦྱོར་གྱི་དབང་གི་ལོ་རྒྱུས་སོ། །
འོ་ན་ད་ལམ་ཁྱེད་རྣམས་ལ་མ་མགོན་ཞལ་སྦྱོར་གྱི་དབང་བཞི་ཡོངས་རྫོགས་བསྐུར་བ་ལ། ཐོག་མར་ལོ་རྒྱུས་ཟུར་ཙམ་ཞུ་ན། ཡེ་ཤེས་མགོན་པོ་འདི་ནི་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་ཀྱི་རྡོ་རྗེའི་ངོ་བོ་སྟེ། ཀརྨ་པཀིས་རིན་ཆེན་དཔུང་རྒྱན་གྱི་འཚམས་སྦྱོར་དུ་ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ཡེ་ཤེས་རྒྱ་མཚོ་ཀྱེའི་རྡོ་རྗེར་འདུས་ལ། དེ་ཉིད་གདུལ་བྱའི་དབང་གིས་མགོན་པོ་ནག་པོ་སྐད་ཅིག་ཙམ་གྱིས་རྣམ་པར་འཕྲུལ་པ་ལས། ཞེས་དང་། མཁའ་སྤྱོད་དབང་པོས། བླ་མ་རྒྱལ་བ་མ་ལུས་པ། །འཇིགས་བྱེད་ཆེན་པོ་ཁྱོད་
གཅིག་པུའི། །སྤྲུལ་པ་ཀུན་ཏུ་སྤྲུལ་པ་སྟེ། །དེ་སླད་རྟག་ཏུ་ཁྱོད་བསྟེན་ནོ། །ཞེས་དང་། བདེ་གཤེགས་ཀུན་དངོས་བླ་མ་མཆོག །དེ་ཉིད་ནག་པོ་ཆེར་གཟུགས་ཀྱིས། །བདག་ནི་བསྲུང་ཞིང་ཀུན་བསྲུང་བར། །ཐེ་ཚོམ་མེད་པར་བདག་དད་དོ། །ཞེས་དང་། །རྗེ་དོན་ལྡན་ཞབས་ཀྱིས། རྒྱལ་བ་ཁྱབ་བདག་དཀྱིལ་འཁོར་ཀུན་གྱི་དབང་ཕྱུག་སྟོན་པ་རྡོ་རྗེ་འཛིན་པ་ཉིད། ཆོས་སྡུད་པ་པོ་དང་བསྲུང་བ་པོ་བསྟན་ཕྱིར་དཔལ་མ་ཧཱ་ཀཱ་ལ་ཡབ་ཡུམ་ནི། བཅོམ་ལྡན་འདས་དང་ངོ་བོ་གཅིག་པ་ཁོ་ན་སྟེ། ཞེས་གསུངས། འཕགས་པ་རིན་ཆེན་དཔུང་རྒྱན་
གྱི་རྒྱུད་ལས། བར་སྣང་གི་ལྷ་རྣམས་ཀྱིས་ནག་པོ་ཆེན་པོ་འདི་ལ་བསྟོད་པ་ལས། བསྐལ་པ་གྲངས་མེད་འདས་པའི་སྔོན་རོལ་ནས། །མཐའ་ཡས་ཚོགས་རྫོ་གས་མངོན་པར་སངས་རྒྱས་ཀྱང་། །ཐུགས་རྗེའི་དབང་གིས་འགྲོ་བའི་དོན་མཛད་པ། །མགོན་པོ་སྤྱན་རས་གཟིགས་ལ་ཕྱག་འཚལ་བསྟོད། །ཅེས་དང་། ཕ་རོལ་ཕྱིན་བཅུ་སྤྱོད་པས་ས་བཅུའི་གཙོ་བོ་མཛད། །ས་བཅུའི་གཙོ་བོ་ཆོས་ཀྱི་ཅོད་པན་མཛེས། །མགོན་པོ་སྤྱན་རས་གཟིགས་ཏེ་ཐུགས་རྗེའི་མངའ་བདག་ཅན། །ནག་པོ་ལྷ་མཆོག་ཁྱོད་ལ་བསྟོད་དེ་གུས་པར་ཕྱག་འཚལ་ལོ། །ཞེས་དང་། དཔལ་མགོན་པོའི་གཟུགས་གནོད་སྦྱིན་དྲག་པོ་འདུལ་བ་ཞེས་བྱ་རྟ་ནག་ཞོན་པ་གཙོ་བོར་སྟོན་པ་ལས། མགོན་པོ་ལ་བསྟོད་པ། མགོན་པོ་སྤྱན་རས་གཟིགས་ཏེ་ཐུགས་རྗེའི་དབང་ཕྱུག་ཅན། །ཡོན་ཏན་བརླབས་མངའ་འཇིག་རྟེན་ཀུན་གྱི་སྐྱབས། །ཞེས་དང་། སྲོག་གི་འཁོར་ལོའི་རྒྱུད་ལས། སྤྱན་རས་གཟིགས་ཀྱིས་མགོན་པོ་ལ་ཕྱག་འཚལ་ཞིང་བསྟོད་པ། བསྐལ་པ་གྲངས་མེད་འདས་པའི་སྔོན་རོལ་ནས། །མཐའ་ཡས་མངོན་པར་རྫོགས་པར་སངས་རྒྱས་ཀྱང་། །ཐུགས་རྗེའི་དབང་གིས་འགྲོ་བའི་
དོན་མཛད་པ། །མགོན་པོ་སྤྱན་རས་གཟིགས་ལ་ཕྱག་འཚལ་བསྟོད། །ཅེས་དང་། རྒྱུད་དེ་ཉིད་ལས་མགོན་པོ་ལ་ཕྱག་ན་རྡོ་རྗེས་བསྟོད་པ། ཕ་རོལ་ཕྱིན་བཅུ་སྤྱོད་པས་ས་བཅུའི་གཙོ་བོ་མཛད། །ས་བཅུ་མགོན་པོ་ལགས་པས་ཆོས་ཀྱི་ཅོད་པན་མཛེས། །མགོན་པོ་སྤྱན་རས་གཟིགས་ཏེ་ཐུགས་རྗེའི་མངའ་བདག་ཅན། ཞེས་གསུངས་ཤིང་།་གསང་བ་སྙིང་ཐིག་འཁོར་ལོའི་རྒྱུད་ལས་ཀྱང་། མགོན་པོ་ནག་པོ་ཞེས་བྱ་བ། །རྣལ་འབྱོར་ཀུན་གྱིས་མགོན་གྱུར་ཡིན། །ངོ་བོ་ཡེ་ཤེས་སྤྲུལ་པ་ལས། །ཡེ་ཤེས་སྐུ་སྟེ་རྡོ་རྗེ་ཆེ། །ཞེས་གསུངས་པ་དང་། རྒྱུད་དེ་ཉིད་ལས། བཅོམ་ལྡན་འདས་དཔལ་མགོན་པོ་ནག་པོ་ཞེས་བྱ་བ་གསུངས་པའི་ཡུམ་དང་བཅས་པ་ཞེས་གསུངས་པ་དང་། རྒྱུད་མེ་ལྕེ་ཕྲེང་བའི་དབུའི་འགྱུར་ཕྱག་ལ་ཡང་། བཅོམ་ལྡན་འདས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ནག་པོ་ཆེན་པོ་དང་། ཐབས་ཅིག་པ་ལ་ཕྱག་འཚལ་ལོ། །ཞེས་དང་། གྲུབ་ཆེན་ཀརྨ་པས། དཔལ་གྱི་མགོན་པོ་བེར་ནག་ཅན་དང་མིང་ཡོངས་སུ་གྲགས་པ་ཀརྨ་པ་གཉིས་ཐ་དད་མེད་པར་ཁྱེད་རྣམས་ཤེས་སམ་མི་ཤེས།
ཞེས་གསུངས་པ་དང་། བླ་མ་མགོན་པོ་དབྱེར་མེད། ཡི་དམ་མགོན་པོ་དབྱེར་མེད་ཡིན་ལ། འཇམ་དབྱངས་ཀྱི་ཡུམ་དབྱངས་ཅན་མ། གཤིན་རྗེ་གཤེད་ཀྱི་ཡུམ་རོ་ལངས་མ། མགོན་པོའི་ཡུམ་རང་བྱུང་རྒྱལ་མོ། དེ་རྣམས་ངོ་བོ་གཅིག་པར་རྒྱུད་སྡེ་དུ་མ་ནས་གསུངས་པའི་ཕྱིར། བླ་མ་ཡི་དམ་མཁའ་འགྲོ་ཆོས་སྐྱོང་ཐམས་ཅད་མ་མགོན་ཞལ་སྦྱོར་འདི་ལ་འདུས་པའི་ཕྱིར། འདི་ལ་གོང་ནོན་ཡི་དམ་གཞན་མི་དགོས། མལ་གྱོ་ལོ་ཙྪ་བའི་ལུགས་ཡབ་རྐྱང་དང་། དུས་མཁྱེན་གྱི་ལུགས་ཡུམ་རྐྱང་གཉིས་ཀ་འདི་ལ་འདུས། །འཁོར་དྲེགས་པའི་གཙོ་བོ་བདུན་ཅུ་རྩ་གཉིས་སོགས། བཀའ་སྲུང་ཐམས་ཅད་ཀྱང་འདི་ལ་མ་འདུས་པ་མེད། འདི་ལ་བརྒྱུད་པ་གཉིས་སོ། སློབ་དཔོན་པདྨ་སྲིན་པོའི་ཁ་གནོན་ལ་བཞུགས་གསུངས་ནས་གསེར་གྱིས་བརྫང་རྒྱལ་བློན་གྱིས་བསྐྱལ་ནས། ལོག་ནུབ་མི་ནག་པོ་གཅིག་གིས་ཁྱོད་སློབ་དཔོན་ལ་བསྒྲུབ་མི་དགོས་པའི་མཐུ་ཡོད་པ་མི་ཞུ་བ་ཅི་ཡིན་ཟེར་། རྒྱལ་པོ་རིན་པོ་ཆེ་སོགས་བཀའ་སྩལ་ཏེ་རྗེས་སུ་བསྙགས་པས་ཆུ་བོ་རིར་སླེབས། ཆིབས་པ་གསུམ་དང་ནོར་ཕུལ་ནས་ཞུས་པས། ང་ལ་མ་མགོན་གྱི་པར་བུ་གཅིག་ཡོད་
པ། ལྷོ་ནུབ་སྲིན་པོའི་ཁ་གནོན་ལ་འགྲོ་བ་ལ་འདི་དགོས་གསུངས་མ་གནང་བར་བཞུད་པས་རྒྱལ་པོ་ཕྱི་ལ་འཕྲ་འབྲང་བས། གྲོང་སྲིན་པོའི་རི་ཙར་སླེབ་ཞུས་པས་མ་གནང་། རྒྱལ་པོ་སྤྱན་ཆབ་ཕྱུང་བས་གནང་། ཁྱོད་རང་གི་སྐུ་སྲུང་གྱིས་མ་སྤེལ་གསུངས་པས་ཉིད་རིང་ལ་མ་སྤེལ། སྲས་སད་ན་ལེགས་དང་སད་ན་འགྱིང་ཡོན་གཉིས་ཡོད་པ་སད་ན་ལེགས་མིས་བསད་པ་ལ། སད་ན་ལེགས་འགྱིང་ཡོན་གྱིས་བོད་ཀྱི་མཁས་བཙུན་རྣམས་གདན་དྲངས། མ་མགོན་པར་བུ་ཞག་ཉེར་གཅིག་བསྐོར་བ་དགྲ་བོ་ཕྱགས་དམྱལ་དུ་བཏང་། དེ་ནས་འཕེལ་ལོ། །སྲས་སད་ན་ལེགས་པ་ཀུན་གྱིས་བསྐུལ་བ་འབངས་ཀྱིས་བསད། སད་ན་ལེགས་པ་འགྱིང་ཡོན་ལ་བུ་གསུམ་གྱི་ཆུང་བ་སྟག་་་་་་ནམ་མཁའི་ལྷ་བཟུང་སྟེ། ཨོ་རྒྱན་བི་མ་ནམ་མཁའི་སྙིང་པོ་གསུམ་གྱིས་དབང་བསྐུར་བྱིན་གྱིས་བརླབས། སྔགས་བོད་དུ་བསྒྱུར་ཚད་ལ་མངའ་བརྙེས། དངོས་གྲུབ་རྣམ་གཉིས་ལ་གྲུབ་པ་ཐོབ། ན་བཟའ་ཉི་མའི་སྲས་མདའ་ལ་འགེལ་བ་སོགས། འཇའ་འོད་ཐང་ལ་ཟུག་པ་ལ་འཇུ་ཞིང་ཐམས་ཅད་ཀྱིས་མཐོང་བར་ནམ་མཁའ་ལ་འགྲོ་ནུས། ཁྱད་པར་དཔལ་
རྡོ་རྗེ་སྲིན་པོ་དྲེགས་པ་ཕོ་དགུ་མོ་དགུ་འཁོར་དང་བཅས་པ་ཐ་དད་མེད་པ་སྟེ།་སྟག་ནམ་མཁའ་ལྷ་བཟུང་མན་ཆད་དུ་སྔགས་པ་ཚེ་རིང་ཤོས་མི་རབས་བཅུ་གསུམ། ཚེ་ཐུང་ཤོས་རི་མི་རབས་བཅོ་ལྔ། མིང་ཡོངས་སུ་གྲགས་པ་བཛྲ་རཀྵ་ཡན་ཆད་དུ། །གདམས་ངག་གོང་འོག་རྣམས་ལ་འཛམ་བུ་གླིང་གི་རྒྱལ་པོ་རྒྱུད་ལ་སོགས་པ་ཐམས་ཅད་ཀྱི་མཐོང་བ་དང་ཐོས་པ་དང་། ཕྱི་མའི་མུ་མཐར་ཐུག་གི་བར་དུ། རྟག་ཏུ་བསྟེན་པ་རྣམས་ཕྱི་ཞིང་སྣང་བ་དང་། གསང་དུ་མི་གཏུབ་པར་བསྟན་པའོ། །ཞེས་གསུངས་སོ། །ཌོམ་བྷི་ཧེ་རུ་ཀ་ལ་མ་མགོན་གྱིས་ལུང་བསྟན་ནས་མ་མགོན་གྱི་རྒྱུད་བཅོ་བརྒྱད་ཀྱི་དོན་བསྡུས་ཏེ་མཛད་པ་དང་རྩ་རླུང་གི་གདམས་ངག་དང་བཅས་པ་སྙན་བརྒྱུད་ཏེ་ལོ་ནཱ་རོ་ནས་མར་པར་བརྒྱུད་དེ།་སྟོད་ལས་བྱང་ཆུབ་སྒྲུབ་པའི་རླུང་སེམས་གནད་ཀྱི་འཁོར་ལོའོ། །ལྷོ་བྲག་པའི་མགོན་པོ་བེང་དབང་མ་ཞེས་བྱ་སྟེ། བླ་མེད་ཧེ་རུ་ཀ་ཕྲིན་ལས་སུ་བསྒྲུབ་པའི་ཨུ་པ་དེ་ཤ་བཀའ་རྒྱ་ཅན་ནོ། །འདི་མར་མི་དྭགས་པོ་དུས་མཁྱེན་ལས་བརྒྱུད་དེ། རས་ཆེན་པའི་མགོན་པོའི་མན་ངག་ལ་མཁས་པའི་ཐུགས་རྒྱལ་མངའ་བ་དུས་མཁྱེན་གྱི་འདི་ཉིད་སྙན་བརྒྱུད་དུ་གནང་བའི་
མལ་གྱོའི་ལུགས་ལས་ཆེས་ཤིན་ཏུ་ཟབ་པར་དགོངས་ཏེ་ཐུགས་དད་ནས་ཐུགས་རྒྱལ་ཆགས་ཤིང་། ཀཾ་ཚང་ལ་ལྷག་པར་ཐུགས་དད་ནས་དོན་བརྒྱུད་འཛིན་པར་གྱུར། ཅེས་མཁའ་སྤྱོད་པས་གསུངས་ཏེ་རྗེ་ཟླ་འོད་གཞོན་ནུ་ལས་བྱུང་བའི་མགོན་པོ་དཔལ་དུས་གསུམ་མཁྱེན་པ་རིན་པོ་ཆེས་སྦས་ཏེ་འགྲོ་མགོན་རས་ཆེན་ལ་བསྟན་པ། གཉལ་པ་ཇོ་སྲས་ལས་བྱུང་བ་ལས་ཁྱད་པར་འཕགས་པ་དགོངས་ཏེ། རབ་ཏུ་གསང་ནས་ཆིག་བརྒྱུད་དུ་བསྟན་ནོ་གསུངས། འོ་ན་ཞལ་སྦྱོར་འདི་དངོས་བསྟན་རྒྱུད་གང་ལས་བྱུང་ཞེ་ན། དྲག་པོའི་ལྷ་རྒྱུད་གསང་བ་ཆེན་པོ་ལས། ཡབ་ཡུམ་ཞལ་སྦྱོར་གྱི་སྒྲུབ་ཐབས་ཞལ་སྦྱོར་སྐུ་གསུང་ཐུགས་ཀྱི་སྔགས་རིགས་དང་བཅས་པ། ཞལ་སྦྱོར་པར་བུ་བསྐོར་ཐབས་རྒྱས་པར་འབྱུང་བ་ལ་བརྟེན་ནས། ཨོ་རྒྱན་རིན་པོ་ཆེས་མ་མགོན་པར་ནག་གི་སྒྲུབ་ཐབས་མཛད་པ་ནི་རྙིང་མ་སྟེ། གྲུབ་ཆེན་པཀྵིའི་ཡབ་ཆོས་ཡིན་ལ། ཞལ་སྦྱོར་ཌོམྦི་པས་མཛད་པ་ནི་སྙན་བརྒྱུད་དེ་གསར་མ་ཡིན་ལ། དེ་ཡང་དངོས་བསྟན་ནི་རྒྱུད་ལས་གསལ་ཏེ། རིན་ཆེན་དཔུང་རྒྱན་གྱི་རྒྱུད་ལས། བེ་ཏ་ལི་དང་ཡང་དག་ལྡན། །གཡོན་དུ་འཁྲིལ་བ་ཡུམ་གྱི་
ཚུལ། །ཞེས་དང་། སྲོག་གི་འཁོར་ལོའི་རྒྱུད་ལས། དཔལ་ལྡན་མགོན་པོ་ནག་པོ་དང་། །ལྷ་མོ་ནག་མོ་གཉིས་སུ་མེད། །ཅེས་གསུངས་པའི་དོན་ཡིན་ནོ། །སློབ་དཔོན་ཨཎྜ་པའི་ལུགས་ཀྱི་ཡབ་རྐྱང་གི་སྒྲུབ་སྐོར་ཐམས་ཅད་དང་། མར་པ་རིན་ཆེན་གྱི་གཏེར་མ་ལྷ་མོ་རབ་བྱུང་མ་སྐོར་གསུམ། སད་ན་ལེགས་ཀྱི་གཏེར་མ་ཡབ་ཡུམ་ཞལ་སྦྱོར།། ལྷོ་བྲག་གི་སྙན་བརྒྱུད་མགོན་པོ་ཞལ་སྦྱོར། ཡེ་ཤེས་ཀྱི་མགོན་པོ་ལེགས་ལྡན་བེར་ནག་ཅན། ལས་ཀྱི་མགོན་པོ་སྲས་མཆོག་བེར་ནག་ཅན། འཇིག་རྟེན་གྱི་མགོན་པོ་དྲེགས་བྱེད་བེར་ནག་ཅན། བེར་ནག་ཅན་སྐོར་གསུམ་སྟེ་སྐོར་གསུམ་དང་། རྒྱུད་གུར་དང་། ཧཱུྃ་མཛད་ནག་པོ་ཆེན་པོ་དང་། མགོན་པོ་ཟངས་གྲི་ཅན་ཏེ་གྲི་གུག་མ་སྐོར་གསུམ། དེ་ཐམས་ཅད་འདི་ལ་ཚང་། ཡབ་ཡུམ་ཞལ་སྦྱོར་སྦྲག་སྒྲུབ་འདི་བཀྲ་ཤིས་ཤིང་ཚན་ཆེ་བའི་གནད་ཟབ། པཀི་ཉིད་ཀྱི་ཞལ་གཟིགས་བྱུང་བ་ལ་བརྟེན་ནས་སྒྲུབ་པའི་གཞུང་མཛད་པ་ཡིན་པས་བཀའ་བབས་བྱིན་རླབས་ཀྱི་བརྒྱུད་པ་ཡིན་ཏེ། གྲུབ་ཆེན་ཀརྨ་པཀྵི་ཉིད་ཀྱི་ཞལ་ནས། ཕོ་རྒྱུད་མགོན་པོ་མོ་རྒྱུད་མ་མོའི་རྩ་བ་དང་ཀུན་གྱི་གཙོ་བོ། དེ་ཡབ་ལེགས་
ལྡན་མགོན་པོ་ནག་པོ་བེང་ཅན་ལས་ཐམས་ཅད་འཕྲོས་ཏེ། བསྟན་སྲུང་ནག་པོ་བེར་ནག་ཅན་དང་། བེར་མེད་གྲི་གུག་ཐོད་ཁྲག་ཅན་དང་། ཕྱག་བཞི་པ་དང་ཕྱག་དྲུག་པ་དང་ཞལ་ཕྱག་གྲངས་མེད་པ་ལ་སོགས་པ་རྣམས་མགོན་པོ་འདི་ཡི་སྤྲུལ་པ་དང་ཡང་སྤྲུལ། རྫུ་འཕྲུལ་དང་ཆོ་འཕྲུལ་ཡིན་པ་ཀུན་གྱིས་མཁྱེན་པར་མཛད་དོ། །དེ་ལྟར་མངོན་སུམ་ཚད་མར་མགོན་པོ་བེར་ནག་ཅན་མ་མགོན་ལྕམ་དྲལ་ཡོངས་སུ་གྲུབ་པ་མིང་ཡོངས་སུ་གྲགས་པ་ཀརྨ་པ་ཡིན་པ་ཁྱེད་རྣམས་ཀྱི་ཤེས་སམ་མི་ཤེས། ཁྱེད་རྣམས་ཀྱང་བརྒྱུད་པ་འཛིན་ཅིང་བསྒྲུབས་ན་འགྲུབ་སྟེ་མཆིས། མ་མགོན་གཉིས་ཀྱི་པོད་དུམ་མང་དུ་ཡོད་པ་ལས། ཐམས་ཅད་གཅིག་ཏུ་བསྡུས་ཤིང་བསྡོམས་པ་འདི་ཡིན་པས། ད་ཕྱིན་ཆད་ཐམས་ཅད་ཀྱིས་འདི་ལ་བྲིས་ཤིང་སྒྲུབས་དང་བྱིན་རླབས་ཆེ་ཞིང་ཐམས་ཅད་མ་ལུས་པ་མེད་པ་འདི་ལ་ཚང་བ་གོ་བར་གྱིས། གདམས་ངག་ཤེས་དགོས་པ་དང་། མི་ཤེས་དགོས་པ་གཉིས་ཡིན་པ་གཅིག་བརྒྱུད་སྙན་བརྒྱུད་མ་གཏོགས་ཡི་གེར་འགོད་པ་མེད་ལ། རྗེ་མཁའ་སྤྱོད་དབང་པོ་ལ་རྡོ་རྗེ་ཕག་མོས་ལུང་བསྟན་ནས་ནག་རྒྱལ་ཕག་གསུམ་གྱི་སྙན་བརྒྱུད་ཡི་
གེར་བཀོད། འདིའི་དབང་བཞི་ཡོངས་རྫོགས་མ་ཡིག་བུ་ཡིག་གཉིས་བཀོད། དེ་དག་མཁའ་སྤྱོད་དབང་པོས་མཛད་པས་རྟོགས་ལྡན་ལུགས་སུ་གྲགས། དེའི་ཚེ་མཚུར་ཕུ་འཇམ་དབྱངས་ཆེན་པོས། འདི་འདྲ་རྒྱུད་གཞུང་གི་ཡིག་ཆ་མེད་པས་རང་བཟོ་ཡིན་ཞེས་བཀག་པ་མཛད། ཁོ་རང་གི་སྙན་བརྒྱུད་མེད་པའི་གཞུང་དངོས་བསྟན་རེ་མཛད། དེ་ནི་མཚུར་ལུགས་ཏེ། བར་སྐབས་སུ་ཆོས་ལུགས་གཉིས་འབྱུང་། དེ་ནས་སྤྲུལ་སྐུ་མཐོང་བ་དོན་ལྡན་གྱིས་རྟོགས་ལྡན་ལུགས་ཀྱི་རྗེས་སུ་འབྲངས་ནས། ཞལ་སྦྱོར་གྱི་ཆོ་ག་མགོན་ཉོབ་མ་མཛད། འདིའི་ཞལ་སྦྱོར་གྱི་དབང་བཞི་རྒྱས་པར་མཛད་དེ། དེ་ནི་མགོན་ཉོབ་མ་ལ་སྦྱར་རྒྱུ་ཡིན་པས། རྗེ་དཀོན་མཆོག་ཡན་ལག་གི་ཞལ་སྦྱོར་གྱི་སྒྲུབ་ཐབས་ཤོག་དྲིལ་མཐའ་དག་རྣམ་པར་སྣང་བར་བྱེད་པའི་སྙིང་པོ་ཞེས་བྱ་བའི་ནང་ནའང་། དེང་སང་གི་མགོན་པོའི་ཆོ་ག་ལ་མི་འབྱར་བའི་ཕྱིར། དོན་ལྡན་གྱི་དབང་ཆོག་མ་བྲིས་པར། མང་ཉུང་འཚམས་ཤིང་དེང་སང་ཆོ་ག་འབྲེལ་བར་དགོངས་ནས། མཁའ་སྤྱོད་པས་དབང་ཆོག་གཉིས་པོ་བྲི་བར་མཛད། རྗེ་མི་བསྐྱོད་ཞབས་ཀྱིས་བཀའ་གནང་བ་ལྟར། མགོན་ཉོབ་མ་
ནས་བསྡུས་ཏེ་དེང་སང་གི་མཚལ་སེར་གྱི་དཔེ་ཚན་གསུམ་པོ་འདི་བསྒྲིགས་ནས་པར་དུ་འཁོད་པར་མཛད། མགོན་པོ་འདི་ཤིན་ཏུ་སྟོབས་རྫུ་འཕྲུལ་ཆེ་བ་སྟེ། རྒྱུད་མེ་ལྕེ་ཕྲེང་བ་ལས། བཅོམ་ལྡན་འདས་ཀྱིས་མགོན་པོ་ནག་པོ་ལ་བཀའ་སྩལ་པ། སྐྱེས་བུ་ཁྱོད་ཀྱི་མཐུ་རྩལ་ནི། །སྲིད་པ་གསུམ་ན་བྱོལ་འདེབས་ཤིང་། །ཁམས་གསུམ་དབང་དུ་སྡུད་པར་བྱེད། །འདོད་ཁམས་དཀྲུག་ཅིང་ཟིལ་གྱིས་གནོན། །སྟོང་གསུམ་གཞན་དུ་འཕེན་པར་བྱེད། །འབྱུང་པོ་ཀུན་གྱི་རྒྱུ་ལམ་གཅོད། །རྒྱ་མཚོ་ཆེན་པོ་ཧུབ་ཀྱིས་འདེབས། །རི་རབ་ལྷོ་རུ་ཟ་བར་བྱེད། །དགྲ་བགེགས་འབྱུང་པོ་ཚར་གཅོད་ཅིང་། །ཁྱོད་ཀྱིས་གད་མོ་བགད་པས་ནི། །གཤེ་བའི་གད་མོས་ལྷ་རྣམས་བརྒྱལ། །བདུད་དང་མུ་སྟེགས་སྔངས་པར་བྱེད། །ཤི་ལ་ཐུགས་པར་བརྒྱལ་བར་འགྱུར། །ངོ་མཚར་གད་མོས་དབང་དུ་སྡུད། །མ་མོའི་ཚོགས་ཀྱང་དབང་ཡིད་འཕྲོག །ཧཱུཾ་སྒྲས་ཁམས་གསུམ་དབང་དུ་སྡུད། །ཕཊཀྱིས་སྟོང་གསུམ་དུས་གཅིག་སྒྲོག །ལེ་ཕེ་ཕོ་གྱིས་འཇིག་རྟེན་གཡོ། །གཡོ་བ་ཐམས་ཅད་དབང་དུ་སྡུད། །བང་གི་སྟོབས་ནི་གློག་དང་འདྲ། །སྟོང་
གསུམ་དུས་གཅིག་ཁྱབ་པར་འགྲོ། །མངོན་ཤེས་ལྔ་དང་རབ་ལྡན་ཞིང་། །རྫུ་འཕྲུལ་སྣ་ཚོགས་རབ་ལྡན་ནས། །འགྲོ་བ་ལོག་རྟོག་སྒྲོལ་བར་བྱེད། །མཁའ་འགྲོ་ཀུན་གྱི་གཙོ་མོ་སྟེ། །དུར་ཁྲོད་ཀུན་གྱི་བདག་པོ་སྟེ། །ལྷ་ཆེན་ཚོགས་ཀྱི་བདག་པོ་སྟེ། །ཞིང་སྐྱོང་དཔའ་བོའི་དམག་དཔོན་བྱེད། །གཤིན་རྗེ་བདུད་ཀྱི་རྗེ་བོ་མཛད། །གནོད་སྦྱིན་ཀུན་ཀྱང་བྲན་དུ་ཁོལ། །དེ་ལྟར་དཔལ་ལྡན་དེད་དཔོན་ཁྱོད། །ཅེས་གསུངས་སོ། །རིན་ཆེན་དཔུང་རྒྱན་ལས། གང་ཚེ་ཅི་ཡི་འདུལ་བར་ཤེས་པ་པོ། །ཅི་དང་ཅི་འདུལ་སྤྲུལ་པར་ཤེས་པ་པོ། །ཞེས་གསུངས་པ་དང་། སྲོག་གི་འཁོར་ལོའི་རྒྱུད་ལས། མགོན་པོ་ཉིད་ཀྱིས་སྨྲས་པ། ཨེ་མ་ཧོ། བདག་ནི་ཤིན་ཏུ་མི་བསྲུན་པས། །སྲིན་པོ་རྣམས་ཀྱང་བྲན་དུ་ཁོལ། །ལྷ་མ་ཡིན་རྣམས་རླག་པར་བྱེད། །ལྷ་སྲིན་སྡེ་བརྒྱད་འཁོར་དུ་བཅས། །ལྷ་མ་ཡིན་གྱི་བུ་མོ་རྣམས། །སྲིན་མོར་བཅས་ཏེ་ཁས་བླངས་ནས། །སངས་རྒྱས་བསྟན་པ་སྲུང་དུ་བཅུག །ཅེས་སོ། །དེང་སང་མགོན་པོ་ལ་ནུས་མཐུ་མི་འདུག་ཅེས་སྨྲས་པ་ནི་དོན་མ་གོ་བ་སྟེ། མགོན་པོ་འདོན་མཁན་མང་ཡང་དབང་ལུང་མ་ཐོབ་པ་དང་
ཕྱག་ལེན་མི་ཤེས་པ་དང་། བསྙེན་སྒྲུབ་མ་ཐེམས་པས་ལེན་པ་ཡིན་ཏེ། གནམ་ཆོས་ལུང་བསྟན་ལས།་ད་ཨ་ཁ་ཁ་ཐོད་ནག་དད་ཅིག །ཕོ་མེད་ལིས་རེ་གོན་མ་དང་གཉིས་ཟེར་བས་ཀུན་གྱིས་སྐྱོ་སྐྱོ་བྱེད། །སྐྱོ་མི་དགོས་དང་ཁོང་གཉིས་ཕོ་ཅིག་ཡིན། ཞེས་སོགས་འབྱུང་བ་ལྟ་བུ་ཡིན་ནོ། །ཁྱད་པར་རང་བྱུང་རྒྱལ་མོ་ཐུགས་གསང་བའི་རྒྱུད་ལས།་གཞན་ཡང་ལྷ་མོ་དེས་སངས་རྒྱས་ཀྱི་བསྟན་པ་བསྲུང་བར་ཁས་བླངས་ཏེ། མངོན་པ་ལ་སོགས་པའི་སྡེ་སྣོད་གསུམ་ལ། གང་ཞིག་མོས་ཤིང་དད་ལ་ཡིད་ཆེས་པའི་གང་ཟག་དེ་ལ་བསྲུང་བ་དང་བསྐྱབ་པར་བགྱིའོ། །གང་ཞིག་འཆད་པ་དང་། ཉན་པ་དང་། ཀློག་ཅིང་ཀུན་ཆུབ་པར་བྱེད་པ་ལ་ཚུལ་བཞིན་དུ་ཡིད་ལ་བྱེད་པ་དེའི་སྦྱོར་བ་ངན་པ་གསལ་བར་བགྱིའོ། །གང་སྒོམ་པ་དང་སྒྲུབ་པ་ཉམས་སུ་ལེན་པ་དེའི་གིང་དང་ཕོ་ཉ་དུས་རྟག་ཏུ་བྱའོ། །དེ་ལྟར་དམ་བཅས་པ་བཞིན་བདག་གིས་མ་བགྱིས་ན། བདག་གི་ད་ལྟ་ཉིད་དུ་བཅོམ་ལྡན་འདས་བསླུས་པ་ལགས་སོ། །དེའི་དབང་གིས་རང་གི་སྲོག་གི་སྙིང་པོ་མེ་ལྟར་འབར་ནས་ལུས་སྲོག་ཐལ་བ་བཞིན་དུ་ཚིག་པར་འགྱུར་ལ། མནར་མེད་
དམྱལ་བ་ཆེན་པོར་གྱུར་ཅིག །ཅེས་སྨོན་ལམ་བཏབ་ཅིང་མནའ་བོར་རོ། །དེའི་གནད་ཀྱིས་དེང་སང་དུས་ཇི་ལྟར་སྙིགས་ཀྱང་གདན་ས་དང་དགོན་པ་དང་གྲྭ་རིགས་ཐམས་ཅད་ལ་དཔལ་ལྡན་ལྷ་མོས་བསྲུང་ཞིང་སྐྱོབ་པའི་རྟགས་དངོས་ཉམས་རྨི་ལམ་དུ་ཀུན་ལ་གསལ་བར་འདུག་པ་འདི་དག་ཡིན། དེ་ལྟར་བརྒྱུད་པ་བཞི་པོ་སོ་སོའི་བཤད་མ་དགོས་གོང་དུ་གསལ་ལྟར་ཡིན་ལ། ཞལ་སྦྱོར་དབང་བཞི་ཡོངས་རྫོགས་འདིའི་བརྒྱུད་པ་ནི། གྲུབ་ཆེན་ཀརྨ་པ་ནས། གཉེན་རས་དགེ་འདུན་འབུམ། རང་བྱུང་རྡོ་རྗེ་གྲགས་པོ་པ། དར་མ་རྒྱལ་མཚན། མཁའ་སྤྱོད་དབང་པོ། ཆོས་ཀྱི་བཟང་པོ། ཆོས་དཔལ་ཡེ་ཤེས། མཐོང་བ་དོན་ལྡན། དཔལ་འབྱོར་དོན་གྲུབ། ཆོས་གྲགས་རྒྱ་མཚོ། མཉན་པ་གྲུབ་ཆེན་། རྒྱལ་དབང་མི་བསྐྱོད་རྡོ་རྗེ། དཀོན་མཆོག་ཡན་ལག །བ་ལེ་བ་རྣམ་རྒྱལ་དཔལ་བཟང་། ངག་དབང་རྣམ་རྒྱལ། ངག་དབང་བཀྲ་ཤིས་དཔལ་གྲུབ། མཉན་པ་སྤྲུལ་སྐུ་བདེ་ལེགས་སྙིང་པོ། དེའི་དྲུང་ནས་བདག ༧ རཱ་ག་ཨ་སྱས་ཕྱག་ལེན་ངག་ཆད་དང་བཅས་ཏེ་ལན་གསུམ་ཞུས་ཁོང་གིས་དྲུང་པ་རྒྱལ་ཚབ་པ་ལས་ཡང་ཐོབ། ཅེས་
གསུངས། དེ་ལྟར་ན་དཀོན་མཆོག་ཡན་ལག་ནས་དབང་ཕྱུག་རྡོ་རྗེ། ཆོས་ཀྱི་དབང་ཕྱུག །གྲགས་པ་མཆོག་དབྱངས། མཉན་པ་སྤྲུལ་སྐུའོ། །ཡང་ན་མཁའ་སྤྱོད་དབང་པོ། དེ་བཞིན་གཤེགས་པ།། མཚུར་ཕུའི་སློབ་དཔོན་དཀོན་མཆོག་རྒྱལ་པོ། འཇམ་དཔལ་བཟང་པོ། རྒྱལ་དབང་ཆོས་གྲགས་རྒྱ་མཚོའི་མན་སྔར་ལྟར་རོ། །ཡང་མི་བསྐྱོད་རྡོ་རྗེ་ནས། སི་ཏུ་ཆོས་ཀྱི་གོ་ཆ་མི་འཁྲུགས་དཔལ་བཟང་པོ། དེས་དཔལ་ལྡན་མི་ཕམ་ཆོས་ཀྱི་དབང་ཕྱུག་ལ་ཡང་བརྒྱུད། ཡང་ན་ཆོས་གྲགས་རྒྱ་མཚོ། །བཀྲ་ཤིས་དོན་གྲུབ། སྒམ་པོའི་མཁན་པོ་ཤཱཀྱ་བཟང་པོ། ཆོས་ཀྱི་གོ་ཆ། དེས་བཛྲ་ཤྭ་ར་ལའོ། །ཡབ་ཡུམ་ཞལ་སྦྱོར་ཆོ་གའི་ལུང་རྒྱུན་ནི། ཀརྨ་པ། བླ་མ་གཉེན་རས་པ། ཆོས་རྗེ་རང་བྱུང་རྡོ་རྗེ། མགོན་པོ་རྒྱལ་མཚན། ཆོས་རྗེ་རོལ་པའི་རྡོ་རྗེ། རྟོགས་ལྡན་གྲགས་པ་སེང་གེ །དར་མ་རྒྱལ་མཚན། རྟོགས་ལྡན་མཁའ་སྤྱོད་དབང་པོ། ཀུན་དགའ་བློ་གྲོས། བླ་མ་རིན་པོ་ཆེ་རཏྣ་བྷ་དྲ། ཆོས་ཀྱི་བཟང་པོ། སྤྲུལ་སྐུ་ཆོས་དཔལ་ཡེ་ཤེས། ཀུན་མཁྱེན་མཐོང་བ་དོན་ལྡན། བྱང་སེམས་དཔལ་འབྱོར་དོན་གྲུབ།
རྒྱལ་དབང་ཆོས་གྲགས་རྒྱ་མཚོ། གྲུབ་ཆེན་བཀྲ་ཤིས་དཔལ་འབྱོར། མཚུངས་མེད་མི་བསྐྱོད་རྡོ་རྗེ། རྒྱལ་བ་དཀོན་མཆོག་ཡན་ལག །དེས་དབང་ཕྱུག་རྡོ་རྗེ། ཆོས་ཀྱི་དབང་ཕྱུག །ངག་དབང་འཇིགས་མེད་གྲགས་པ། དེའི་དྲུང་དུ་བདག ༧ རཱ་ག་ཨ་སྱས་མཚལ་སེར་ཡོངས་རྫོགས་ཀྱི་ལུང་ཞུས། སི་ཏུ་ཆོས་ཀྱི་རྒྱལ་མཚན་གྱི་དྲུང་ནས་མགོན་༡པོ་མཚལ་སེར་གྱི་དཔེ་དབང་གཅིག་ཀྱང་ཐོབ། མཚམས་དམ་པོ་ལ་འདུག་སྐབས་སི་ཏུ་མི་འཁྲུགས་ཆོས་ཀྱི་གོ་ཆ་དང་མཇལ་ཏེ་མ་མགོན་གྱི་སྒྲུབ་སྐོར་པོ་ཏི་ཆེན་པོ་གཅིག་གི་དབང་ལུང་ཡོངས་སུ་རྫོགས་པ་ཐོབ་པའི་སྣང་བ་གཅིག་བྱུང་། ཉམས་དང་རྨི་ལམ་གྱི་མཚམས་སུ། མ་མགོན་གཉིས་གསལ་པོར་མཇལ་བ། ལན་འགའ་བྱུང་ཞིང་། རང་གིས་བསྙེན་སྒྲུབ་རྟགས་ཐོན་བྱས། གཞན་ལ་དབང་ལུང་དང་ཕྱག་ཁྲིད་བྱས་ནས། བསྙེན་སྒྲུབ་བྱེད་བཅོལ་བས་རྟགས་ལེགས་པོ་ཐོན་པ་མང་དུ་བྱུང་བས། དབང་ལུང་གི་རྒྱུན་ཡོད་པ་ཙམ་མ་ཡིན་པར་བསྒྲུབ་རྒྱུན་བྱིན་གྱིས་བརླབས་ཀྱིས་བརྒྱུད་པ་དང་ལྡན་པ་ཡིན་ནོ། །དེ་ལྟ་བུའི་སྙན་བརྒྱུད་ཀྱི་དབང་ཞུ་བའི་ཕྱིར་དུ་མཎྜལ་ཕུལ། ཞེས་པ་དབང་གི་ལོ་རྒྱུས་ཉུང་ངུར་བསྡུས་པ་འདི། ༧ རཱ་ག་ཨ་
སྱས་སྨོས་ཤིང་བསྒྲིགས་པ་ལྟར། དགེ་སློང་གསུམ་མའི་མིང་ཅན་གྱི་ཡི་གེར་བཀོད་པ་ལས། ཉེས་འགལ་མཆིས་ན་བཤགས་ཤིང་། དགེ་བས་བསྟན་པ་དར་ཞིང་རྒྱས་པའི་རྒྱུར་གྱུར་ཅིག །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།
རྗེ་མཁའ་སྤྱོད་དབང་པོས་མཛད་པའི་མ་མགོན་ཞལ་སྦྱོར་གྱི་དབང་བཞི་ཡོངས་རྫོགས་རྒྱན་དབང་དང་བཅས་པ་གབ་སྤྲད་འཁྲུགས་བསལ་བ་བལྟས་ཆོག་ཏུ་བཀོད་པ་བཞུགས་སོ། །
བླ་མ་ཧེ་རུ་ཀ་དཔལ་ལ། །བཏུད་དེ་ནག་པོ་ཆེན་པོ་ཡི། །དབང་མཆོག་ཉེ་བར་སྦས་པ་དག །འགྲོ་ལ་ཕན་ཕྱིར་གསལ་བར་བྲི་། །བླ་མ་རྡོ་རྗེ་འཛིན་པ་དང་། །དཔལ་ལྡན་ནག་པོ་ལྕམ་དྲལ་ལ། །བཏུད་དེ་དེ་ཡི་མན་ངག་གི །སྨིན་བྱེད་ཆོ་ག་རྣམ་པར་བསྡུ། །དེ་ལ་རིགས་བསྡུས་དང་། བདེ་བ་དང་། ཕྲིན་ལས་ཏེ་གསུམ་གྱི་སྤྱི་དང་བྱེ་བྲག་གི་ཆོ་ག་ལས། འདིར་ནི་ཕྱི་མའི་ཕྱི་མ་སྟེ། དུར་ཁྲོད་སོགས་གནས་ཇི་ལྟར་རིགས་པར་སའི་ཆོ་ག་མདོར་བསྡུས་པ་སོགས་སྔོན་དུ་འགྲོ་བས། གྲུ་གསུམ་མཐིང་ནག་འཁོར་ལོ་བཞི་རིམ་དང་བཅས་པའི་དཀྱིལ་འཁོར་རྒྱས་པ་མངོན་རྟོགས་ནས་བཤད་པ་ལྟ་བུའམ། བསྡུས་པར་གྲུ་གསུམ་ཐོད་ར་རྡོ་ར་མེ་རི་དང་བཅས་པ་ཙམ་ལ་བརྟེན་པས་ཀྱང་རུང་སྟེ།
དབུས་རྟེན་གྱི་གྲི་གུག་དགོད། བྱང་ཕྱོགས་སུ་རྒྱུན་ཐུན་བ་ལིང་བཤམས། ཁྲག་གི་ཨགྷོ་སོགས་མཆོད་རྫས་ཀྱི་བྱེ་བྲག་དུ་མས་བསྐོར། ཡི་དམ་མམ་དཔལ་ཆེན་པོའི་བྱིན་གྱིས་བརླབས་པའི་བུམ་ཆུ་ཡང་སྟ་གོན་བྱ། བཅོམ་ལྡན་འདས་མ་སྒྲུབ་ཅིང་མཆོད་པའི་ཆོ་ག་ལ་སོགས་ཀྱིས་གཞུང་བསྲང་། འདི་ཉིད་ཀྱི་མཆོད་པའི་རིམ་པ་ཆོ་ག་བཞིན་ཞག་གསུམ་མམ་བདུན་སོགས་བྱས་ལ། སྒྲུབ་པ་པོ་སྔོན་དུ་དབང་ཐོབ་ཅིང་དམ་ཚིག་དང་ལྡན་པས། དཔལ་ལྡན་ནག་པོ་ཆེན་པོ་དང་། བླ་མ་ཡི་དམ་ཐ་དད་དུ་མི་སེམས་པའི་དད་པ་ཅན། གསང་ཆེན་རྡོ་རྗེའི་རིགས་ཀྱི་དམ་ཚིག་ལ་ལྷག་པར་སྤྱོད་པས། རིགས་བཞིའི་དམ་ཚིག་རབ་ཏུ་བསྟན་པ་ཅན་དེ་དག འདི་ཉིད་ཀྱི་དབང་ནོད་པར་འདོད་པས་བླ་མ་ལ་མཎྜལ་ཕུལ་ཏེ་གསོལ་བ་བཏབ་པར་བྱའོ། །སའི་
ཆོ་ག་ཅི་རིགས་དང་ལྡན་པའི་སྟེགས་སུ་བྱ་ཞིང་། ཐིག་གི་ཆོ་གས་ཐིག་གདབ། སྙན་གསན་གདབ། ཆོས་འབྱུང་མཐིང་ནག་གི་དབུས་སུ་པད་འདབ་བཞི། ལྟེ་བ་ནག་པོ། ཤར་དཀར། ལྷོ་སེར། ནུབ་དམར། བྱང་ལྗང་སྟེ་འདི། ནི་རིགས་བསྡུས་སོ། །རིགས་སོ་སོ་ལ་ནི་སོ་སོའི་ཚོན་སྤུངས་སམ། ས་བོན་ནམ། མཚན་མ། སྐུ་ནང་རྒྱན་ཕྱག་མཚན། གར་ཉམས། ཕྲིན་ལས་གསང་བའི་སྐུ་དང་། པད་སྣོད་དང་། ཌཱ་ཀིའི་སྐུ་དང་། རྡོ་རྗེ་དང་། གྲི་གུག་རྣམས་སོ་སོར་ཚང་བ་སོགས་ཇི་ལྟར་རིགས་པ་བཀོད། ཟླ་གམ་དམར། མུ་ཁྱུད་ཐོད་ཕྲེང་དཀར། སྒོ་སྒོ་རྒྱན་ཅི་རིགས་ལ། དུར་ཁྲོད་རྡོ་ར་མེ་རི་དང་བཅས་པ་བྲི། ཕྲིན་ལས་བྱེ་བྲག་མངོན་རྟོགས་ལྟར་ན། འཁོར་ལོ་བཞི་རིམ་ལ་སོགས་པའོ། །མཆོད་པའི་བཀོད་པ་དང་། བ་ལིཾ་གསུམ་སོགས་ཕུན་སུམ་ཚོགས་པར་བཤམས། མི་བསྐྱོད་བ་སོགས་ཀྱིས་བདག་ཉིད་རིགས་ཀྱི་མགོན་པོར་བུམ་པར་བསྐྱེད་བཟླས་བདུད་རྩིར་བྱ་བ་རྒྱལ་བྱེད་དང་། ཕྲིན་ལས་ཀྱི་མགོན་པོ་ལས་ཀྱི་བུམ་པ་བྱིན་གྱིས་བརླབས་ལ་ཤར་ཟུར་དུ་བཀོད། དེ་དང་ཉེ་བར་ཐོད་པ་བདུད་རྩི་སིན་དྷུ་རའི་མཎྜལ་ཡང་ཇི་ལྟ་བར་བཤམས། སྲུང་འཁོར་སྔོན་དུ་འགྲོ་བས་བདག་མདུན་བསྐྱེད་བཟླས་མཆོད་བསྟོད་སོགས་གཞུང་བཞིན་བྱས་ལ། སློབ་དཔོན་བདག་ཉིད་ཀྱིས་དབང་བླངས་ཏེ། ཡོལ་བའི་ཕྱི་རོལ་དུ་བགེགས་བསལ་བ་དང་། མཎྜལ་ཕྱག་སྐོར་སྔོན་དུ་འགྲོ་བས། བདག་མདུན་བསྐྱེད་བཟླས་ནི། བདག་བསྐྱེད་ཕག་མོའམ་རྒྱལ་བ་རྒྱ་མཚོ་སོགས་ཀྱི་ཆོ་གའི་
གཞུང་བསྲངས་ནས། མདུན་བསྐྱེད་མགོན་པོ་མཚལ་སེར་གཉིས་གང་གི་རུང་གཞུང་ལྟར་བཏང་། རྣམ་རྒྱལ་བུམ་པར་མགོན་པོ་རིགས་བསྡུས་ཡབ་ཡུམ་ཞལ་སྦྱོར་གཙོ་འཁོར་ལྔ་རྐང་ཐང་བསྐྱེད། ལས་བུམ་དུ་ཕྲིན་ལས་ཀྱི་མགོན་པོ་ཡབ་རྐྱང་རུང་མོད་ཀྱི། འདི་ནི་པཀྵིའི་ཡབ་ཆོས་རྙིང་མ་རང་རྐང་ཡིན་པས་ཡི་དམ་གཞན་མི་དགོས་པར་མཚལ་སེར་གཉིས་གང་རུང་། མངོན་རྟོགས་ཚར་གཅིག་གིས་བདག་བསྐྱེད་མདུན་བསྐྱེད་བུམ་བསྐྱེད་གཏོར་མ་ལྷར་བསྐྱེད་པ་དང་ཐམས་ཅད་དུས་གཅིག་ལ་བསྐྱེད་ནས་མཆོད་བསྟོད་བཟླས་པ་བྱེད་པས་འཐུས་པ་རྙིང་མའི་ལུགས་གྲུབ་ཆེན་པཀྵིའི་བཞེད་པ་ཡིན། དེའི་ཚེ་སྔགས་ཀྱང་ཞལ་སྦྱོར་གསུང་གི་སྙིང་པོ་རང་བཟླས་པས་འཐུས། ལས་བུམ་ནི་དོན་ལྡན་ཞབས་ཀྱིས་བཞེད་པ་ལྟར། བློ་ལས་ལས་བུམ་ནང་དུ་ཧཱུྃ་ཡིག་ལས། །དྲན་རྫོགས་དམ་ཡེ་དབྱེར་མེད་ལས་མགོན་ནི། །མཐིང་ནག་ཞལ་བཞི་ཕྱག་ནི་བཅུ་གཉིས་པ། །གཡས་དཀར་གཡོན་དམར་དབུས་མཐིང་ཁྲོ་བོའི་ཞལ། །རྒྱབ་ཞལ་ཕག་གདོང་ལྗང་གུ་དབུ་སྐྲ་འབར། །སྔོམ་ཐུང་གསུས་འཕྱང་ཞབས་བཞི་འདོར་སྟབས་བསྒྲད། །དང་པོའི་ཕྱག་གཉིས་ཡུམ་འཁྱུད་མ་མཆུ་བཙིར། །དེ་འོག་གཉིས་ཀྱིས་གྲི་གུག་རྔ་ཡབ་དཀར། །གསུམ་པ་རྡོ་རྗེ་རྩེ་གཅིག་ཁ་ཊྭཱཾ་ག །བཞི་པས་ཐོ་བ་དང་ནི་ཐོད་པ་སྟེ། །ལྔ་པ་གཉིས་ཀྱིས་
གླང་ཆེན་པགས་པ་བརྒྱངས། །དྲུག་གཉིས་རྡོ་རྗེ་ལོག་འདྲེན་མཆེ་བ་འཛིན། །བདུད་བཞི་མནན་ཞིང་མ་ཧེའི་སྟེང་ན་བཞེངས། །དེ་ལྟར་དམིགས་ལ་ཡིད་ཀྱིས་མཆོད་ཅིང་བསྟོད། །དིཊྛོརྐ་ཊ། ཅི་འགྲུབ་བཟླས་པར་བྱ། དེ་ནི་ལྔ་བཅུ་པ་ཡི་རྒྱུད་ལས་གསུངས། མདུན་བསྐྱེད་མཆོད་བསྟོད་སོགས་གཞུང་བཞིན་བྱས་ལ། སློབ་དཔོན་བདག་ཉིད་ཀྱིས་དབང་བླངས་ཏེ། རང་དོན་ཡིན་ན་བདག་འཇུག་རྒྱས་པར་བླངས། གཞན་དོན་མགྱོགས་དབང་ལ་ཏིང་ངེ་འཛིན་གྱིས་དབང་བླངས་ལ་བུམ་ཆུ་བཏུང་ཡང་ཆོག །བྱིན་རླབས་ནོད་པར་འདོད་པ་དག་ཡོལ་བའི་ཕྱི་རོལ་དུ་བགེགས་གསལ་བའི་གཏོར་མ་བཏང་། བགེགས་བསྐྲད་དེ་མཚམས་བཅད་ལ། བསྐོར་བ་དང་ཕྱག་སྔོན་དུ་འགྲོ་བས། མཎྜལ་ཕུལ་ལ། ལྕང་ལོ་ཅན་གྱི་གནས་མཆོག་དམ་པ་ན། །གསང་སྔགས་རིག་སྔགས་ཀུན་གྱི་བདག་པོ་སྟེ། །ལོག་འདྲེན་བགེགས་ཀྱི་ཚོགས་རྣམས་འཇོམས་མཛད་པ། །གསང་བདག་རྡོ་རྗེ་འཛིན་ལ་ཕྱག་འཚལ་བསྟོད། །སྔགས་འདི་ཟློས་ཤིག །ཨོཾ་བཛྲ་པཱ་ཎི་ཧཱུྃ། ལུས་ལྷ་ངག་སྔགས་སེམས་ཏིང་ངེ་འཛིན་དང་མ་བྲལ་བར་གྱིས་ཤིག །ཅེས་གདམས། དེ་ཡན་ནི་ས་ཆོག་མ་བྱས་པའི་གོང་དུ་བྱ་རྒྱུ་ཡིན་ཀྱང་མཆོག་དབང་སྐབས་འདིར་ཆད་ལྷག་མེད་ཕྱིར་འདིར་སྦྱར་བའོ། །ཁྲུས་བྱས་ཕྱག་དང་མཎྜལ་ཕུལ་ནས། ཤཱཀྱ་སེངྒེའི་བསྟན་པ་ལ།
བྱང་ཆུབ་མཆོག་ཏུ་སེམས་བསྐྱེད་ནས། །སངས་རྒྱས་བསྟན་པ་བསྲུང་བའི་ཕྱིར། །སྨིན་བྱེད་རིམ་པ་བསྟན་དུ་གསོལ། །ལན་གསུམ། དགའ་ཆེན་སྟོན་པ་ཁྱོད་གཅིག་པུ། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་ལ་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ལན་གསུམ། ད་ཐུན་མོང་གི་སྐྱབས་འགྲོ་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོད་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་གཉིས་རབ་བསྒྲུབ་ཕྱིར། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གི་མགྲོན་དུ་གཉེར། །
བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ད་ཁྱེད་རང་གི་སྤྱི་བོར་རྡོ་རྗེ་སེམས་དཔའ་རྡོ་རྗེ་དང་དྲིལ་བུ་འཛིན་པའི་སྐུ་ལས་བདུད་རྩི་བབས་ཉམས་ཆག་སྡིག་སྒྲིབ་དག་པར་སྒོམས་ལ་ཡིག་བརྒྱ་ཟློས། ཨོཾ་བཛྲ་སཏཱ་སོགས། གདོང་གཡོགས་མཐིང་ཀ་བཅིངས་པའི་མོས་པ་གྱིས། ཨོཾ་ཙཀྵ་བྷནྡ་ཝ་ར་མ་ཎ་ཡེ་སྭཱ་ཧཱ། མེ་ཏོག་གི་ཕྲེང་བ་རེ་གཏད་པའི་མོས་པས། ཨ་ཁཾ་བི་ར་ཧཱུྃ། ཁྱེད་རང་སྐད་ཅིག་གིས་མ་ཧཱ་ཀཱ་ལ་སྐུ་མདོག་མཐིང་ནག་གྲི་གུག་དང་ཐོད་ཁྲག་འཛིན་པ་ཡུམ་དང་ཞལ་སྦྱོར་བའི་དཔྲལ་བར་ཨོཾ་དཀར་པོ། མགྲིན་པར་ཨཱདམར་པོ། ཐུགས་ཀར་ཧཱུཾ་སྔོན་པོས་རྒྱས་གདབ་པར་བསྒོམ། ཡོལ་བ་བསལ་ནས་ཕྱག་འཚལ་བའི་མོས་པས་རྗེས་ཟློས་མཛོད་དུས་གསུམ་སངས་རྒྱས་ཀུན་གྱི་དངོས། །བླ་མ་མགོན་པོའི་སྐུ་མཆོག་ལ། །བདག་ནི་རྣམ་པ་ཐམས་ཅད་དུ། །སྒོ་གསུམ་གུས་པས་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་གསུངས། །བླ་མ་མགོན་པོའི་གསུང་མཆོག་ལ། །བདག་ནི་རྣམ་པ་ཐམས་ཅད་དུ། །སྒོ་གསུམ་གུས་པས་ཕྱག་འཚལ་ལོ། །དུས་གསུམ་སངས་རྒྱས་ཀུན་
གྱི་ཐུགས། །བླ་མ་མགོན་པོའི་ཐུགས་མཆོག་ལ། །བདག་ནི་རྣམ་པ་ཐམས་ཅད་དུ། །སྒོ་གསུམ་གུས་པས་ཕྱག་འཚལ་ལོ། །སངས་རྒྱས་ཀུན་གྱི་ཡོན་ཏན་མཆོག །བླ་མ་མགོན་པོའི་ཡོན་ཏན་ལ། །བདག་ནི་རྣམ་པ་ཐམས་ཅད་དུ། །སྒོ་གསུམ་གུས་པས་ཕྱག་འཚལ་ལོ། །སངས་རྒྱས་ཀུན་གྱི་ཕྲིན་ལས་མཆོག །བླ་མ་མགོན་པོའི་ཕྲིན་ལས་ལ། །བདག་ནི་རྣམ་པ་ཐམས་ཅད་དུ། །སྒོ་གསུམ་གུས་པས་ཕྱག་འཚལ་ལོ། །རྡོ་རྗེ་ནག་པོ་ཆེ་ཞབས་ཕྱག་འཚལ་ཞིང་། །བསམ་ཡས་མཆོད་པའི་ཁྱད་པར་དུ་མས་མཆོད། །འགལ་འཁྲུལ་ཉེས་པ་མ་ལུས་རབ་བཤགས་ནས། །མངོན་སྤྱོད་བརྟུལ་ཞུགས་འབར་ལ་རྗེས་ཡི་རང་། །ཕྲིན་ལས་རྒྱ་མཚོའི་ཆོས་འཁོར་བསྐོར་བར་བསྐུལ། །རྟག་ཏུ་མྱ་ངན་མི་འདའ་བཞུགས་པར་གསོལ། །འགྲོ་བ་མཐའ་དག་ཁྱོད་དང་དབྱེར་མེད་པའི། །བྱང་ཆུབ་ཆེན་པོ་གེགས་མེད་ཐོབ་གྱུར་ཅིག །ཁྱོད་ནི་རྡོ་རྗེའི་རིགས་སུ་སྐྱེས། །ང་ཡི་ཡེ་ཤེས་རྡོ་རྗེ་བྱིན། །བྱིན་པས་དངོས་གྲུབ་ཐོབ་པར་འགྱུར། །གང་ཞིག་འདི་འདྲ་མ་མཐོང་བའི། །དྲུང་དུ་སྨྲ་བར་མ་བྱེད་ཅིག །གལ་ཏེ་སྨྲས་ན་ཉམས་པར་
འགྱུར། །འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །པཉྩ་ཨ་མྲྀ་ཏ་ཨུ་ད་ཀ་ཋ་ཞེས་འཁྱོར་ཆུ་བྱིན་ལ། དེང་ནས་བརྩམས་ཏེ་བུ་ཁྱོད་ཀྱི། །རྡོ་རྗེ་འཛིན་པ་ང་ཡིན་གྱིས། །ང་ཡིས་ཇི་ལྟར་བཀའ་སྩལ་པ། །ཁྱོད་ཀྱིས་སྐྱོ་བ་མེད་པར་བསྒྲུབས། །གང་ཡང་ང་ལ་མ་གུས་མིན། །དེ་བཞིན་གུས་པར་མ་བྱས་ན། །བདུད་ཀྱིས་བཅོམ་ནས་ངན་འགྲོ་འགྲོ། །དེ་བས་དམ་ཚིག་གནས་པར་གྱིས། །ཞེས་དམ་བསྒྲགས་ལ། སྲས་བཅས་སངས་རྒྱས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །ཐམས་ཅད་བདག་ལ་དགོངས་སུ་གསོལ། །བདག་མིང་རྡོར་སེམས་ཞེས་བགྱི་བས། །དུས་འདི་ནས་ནི་བཟུང་ནས་སུ། །ཇི་སྲིད་བྱང་ཆུབ་སྙིང་པོའི་བར། །ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་མཆོག །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །སོ་སོར་བརྟན་པོར་
བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་བཟུང་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །རིན་ཆེན་རིགས་མཆོག་ཆེན་པོ་ལ། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་མཆོག་དག་པ་ལ། །ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ནི་མ་ལུས་བཟུང་། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་བགྱི་ཞིང་། །སེམས་ཅན་ཀུན་གྱི་དོན་གྱི་ཕྱིར། །བདག་གི་སྡོམ་པ་མ་ལུས་བཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་དགྲོལ་བར་བགྱི། །དབུགས་མ་ཕྱིན་རྣམས་དབུགས་དབྱུང་ཞིང་། །སེམས་ཅན་མྱ་ངན་འདས་ལ་
འགོད། །སྡོམ་པ་བཟུང་། སྙིང་ཁར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་སྔོན་པོ་རྩེ་ལྔ་པ་རེ་སྒོམས་ལ་རྗེས་ཟློས་མཛོད། ཨོཾ་སརྦ་ཡོ་ག་ཙིཏྟ་ཨུ་པ་ད་ཡ་མི། རྡོ་རྗེའི་རྣལ་འབྱོར་དུ་སེམས་བསྐྱེད་པ་དེ་བརྟན་པའི་མོས་པ་མཛོད། རྡོ་རྗེ་མེ་ཏོག་སྙིང་ཁར་བཞག་ལ། ཨོཾ་སུ་ར་ཏེ་ས་མ་ཡ་སཱུ་ཧོ༔ ད་ཡེ་ཤེས་པ་འབེབས་པའི་དོན་དུ་རྗེས་ཟློས་མཛོད། དཔལ་ཡེ་ཤེས་ཀྱི་མགོན་པོ་ལ་ཡེ་ཤེས་ཀྱི་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་བདག་ལ་བྱིན་གྱིས་རླབས་པར་མཛད་དུ་གསོལ། ཡེ་ཤེས་དབབ་པར་མཛད་དུ་གསོལ། །དཔལ་ཐུགས་ཀྱི་མགོན་པོ་རྡོ་རྗེ་མཁའ་འགྲོ་མ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་བདག་ལ་བྱིན་གྱིས་རླབས་པར་མཛད་དུ་གསོལ། ཡེ་ཤེས་དབབ་པར་མཛད་དུ་གསོལ། དཔལ་སྐུའི་མགོན་པོ་སངས་རྒྱས་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཡེ་ཤེས་དབབ་པར་མཛད་དུ་གསོལ། དཔལ་ཡོན་ཏན་གྱི་མགོན་པོ་རིན་ཆེན་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཡེ་ཤེས་དབབ་པར་མཛད་དུ་
གསོལ། དཔལ་གསུང་གི་མགོན་པོ་པདྨ་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཡེ་ཤེས་དབབ་པར་མཛད་དུ་གསོལ། དཔལ་ཕྲིན་ལས་ཀྱི་མགོན་པོ་ལས་ཀྱི་མཁའ་འགྲོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ཀྱིས་བདག་ལ་བྱིན་གྱིས་བརླབ་ཏུ་གསོལ། ཡེ་ཤེས་དབབ་པར་མཛད་དུ་གསོལ། ཁྱེད་རང་རྣམས་འགྲེངས་ཏེ། རྟིང་པ་བཏེག་ནས་གནས་པའི་མོས་པས། ཆོས་འབྱུང་གི་ཕྱག་རྒྱ་སྤྱི་བོར་གྱིས། ལས་བུམ་གྱིས་ཆུ་གཏོར་ཞིང་། དེཊོ་སོགས་ཀྱིས་བསངས། སྭ་བྷ་ཝས་སྦྱངས། སྟོང་པའི་ངང་ལས་ཁཾ་ལས་བྲག་སྟེང་མཐིང་ནག་གྲུ་གསུམ་འབར་བ། དེའི་དབུས་སུ་པཾ་ལས་སྣ་ཚོགས་པདྨ་འདབ་མ་བརྒྱད་པའི་ལྟེ་བར། མ་ལས་ཉི་མའི་དཀྱིལ་འཁོར་གྱི་སྟེང་དུ་ཁྱེད་རང་རྣམས་ཀྱི་རྣམ་པར་ཤེས་པའི་ངོ་བོ། ཧཱུྃ་མཐིང་ནག་དང་མ་སྔོ་སྐྱ་འོད་དུ་ཞུ་བ་ལས། སྐད་ཅིག་གིས་ཁམས་གསུམ་ཟོ་བྱེད་དུར་ཁྲོད་བདག་པོ། འཇིགས་བྱེད་འབར་བ་ཡབ་ཡུམ་གྱི་སྐུར་གྱུར་པ་སྟེ། དེ་ཡང་སྐུ་མདོག་དུད་ཁ་མུན་ཆེན་གྱི་མདོག་ལྟ་བུ། རབ་ཏུ་ཁྲོས་པའི་ཞལ་མཆེ་བ་བཞི་གཙིགས་ཤིང་ལྗགས་འགྱུ་
བ། སྡང་མིག་རྣམ་པར་གཡོ་བའི་སྤྱན་གསུམ་འཁྱིལ་ཞིང་ཕྱོགས་བཅུར་ལྟ་བ། གློག་ལྟར་ཁམས་པའི་སྨིན་མ་དང་སྨ་ར་དམར་སེར་མེ་སྟག་འཕྲོ་བ་གྱེན་དུ་ལངས་པའི་དབུ་སྐྲ་དམར་སེར་སྦྲུལ་དང་དར་གྱིས་བཅིངས་ཤིང་རིན་པོ་ཆེ་དུ་མའི་རྩེ་བྲན་ཅན་གྱི་ཐོད་པ་མེ་རབ་ཏུ་འབར་བའི་ཐོད་དང་ལྡན་པ་རུས་པ་དང་། དུག་སྦྲུལ་གདུག་པས་དབུ་དང་སྐུ་དང་ཡན་ལག་བརྒྱན་ཅིང་། སྟག་གི་པགས་པའི་ཤམ་ཐབས་དང་། དར་ནག་གི་འཇོལ་བེར་དགུ་བརྩེགས་དང་དར་སྣ་ཚོགས་ཀྱི་ན་བཟའ་ཅན་གདུག་པ་ཅན་རྣམས་ཀྱི་མགོ་བོའི་ཕྲེང་བ་ཁྲག་དང་བཅས་པའི་དོ་ཤལ་བྱས་ཤིང་། ཁྲག་གིས་གོས་ཤིང་མེ་འབར་བའི་གྲི་གུག་ཕྱག་གཡས་དག་གིས་གདེངས་པའི་འོད་ཀྱིས་འཇིག་རྟེན་གསལ་བ། ཡུམ་གྱི་ཞལ་དུ་སྟོབ་བཞིན་པའི་ཁྲག་ཅན་གྱི་ཐོད་པ་གཡོན་དུ་འཛིན་ཅིང་། ཞབས་གཡས་བསྐུམ་པའི་གར་དང་། གཡོན་བརྐྱངས་བས་ཡུམ་ལ་འཁྲིལ་བའི་ཚུལ་ཅན་མ་ལུས་པའི་བགེགས་དང་དགྲའི་ཚོགས་ཟ་བར་མཛད་ཅིང་ཆེར་རབ་ཏུ་འབར་བའི་མེའི་དབུས་ན་རྔམ་པའི་གད་མོས་མ་བྷོ༔ཧཱུྃ་གི་སྒྲ་ཆེན་པོས་ཁམས་གསུམ་ཁྱབ་པར་སྒྲོགས་པས་སྲིད་གསུམ་ཟིལ་གྱིས་གནོན་ཅིང་དབང་
དུ་སྡུད་པ། འཇིག་པ་མཐའ་དག་འཇིགས་པར་བྱེད་པ་དེའི་པང་དུ་དཔལ་ལྡན་ལྷ་མོ་སྐུ་མདོག་མཐིང་ནག་ཏུ་འདུག་པ་ཞལ་གཅིག་ཕྱག་བཞི་སྤྱན་གསུམ་མཆེ་བ་བཞི་གཙིགས་པ། དབུ་སྐྲ་ཁམ་ནག་གྱེན་དུ་བཅིངས་ཤིང་ཐུར་དུ་གྲོལ་བ་ལ། ཐོད་སྐམ་ལྔའི་ཕྲེང་བས་བཅིངས་བ། སྤྱི་གཙུག་ཏུ་ཟླ་བ་ཕྱེད་པ་དང་རྨ་བྱའི་མདོངས་ཀྱིས་མཛེས་པ། དར་གྱི་ཅོད་པན་དང་སྦྲུལ་ནག་གི་ཆུན་འཕྱངས་རིན་པོ་ཆེ་སྣ་ཚོགས་འཕྲོ་བའི་ཕྲེང་བས་བརྒྱན་པ། སྐུ་ལ་དར་ནག་གི་འཇོལ་བེར་གསོལ་ཞིང་ཐོད་རློན་གྱི་དོ་ཤལ་ཅན་ཞབས་གཉིས་བརྐྱང་བསྐུམ་ཡབ་ལ་འཁྲིལ་བའི་ཚུལ་གྱིས་བཞུགས་པ། ཕྱག་བཞི་གཡས་ཀྱི་དང་པོ་ན་ཁ་ཊྭཱཾ་ག་རྩེ་གསུམ་བསྣམས་པ། གཡོན་གྱི་དང་པོ་ན་འཕྲུལ་གྱི་མེ་ལོང་ཕྱི་ཞིང་བལྟ་བ། གཡས་ཀྱི་འོག་མ་ན་གནམ་ལྕགས་ཀྱི་ཕུར་པ་འདྲིལ་ཞིང་འདེབས་པ། གཡོན་གྱི་འོག་མ་ན་སྦྲུལ་ནག་གི་ཞགས་པ་ལྡོག་ཅིང་འཕེན་པ། གཡས་ཀྱི་འོག་མའི་ཕྱག་གིས་དཔལ་ནག་པོ་ཆེན་པོ་ལ་འཁྱུད་པ་སྟེ། དཔལ་ཆེན་པོའི་སྐུར་གསལ་བའི་དཔྲལ་བར་སྤྱན་དབུས་གཡོན་ཕྱོགས་སུ་དྲག་ཏུ་འཁོར་བ་དང་། གཡུང་དྲུང་རིས་དམར་པོ་ལ་སེམས་
གཏད། ཐུགས་ཀ་ནས་འོད་ཟེར་འཕྲོས་པས་རང་བཞིན་གྱི་གནས་ནས་མ་མགོན་ཡབ་ཡུམ་དཔག་ཏུ་མེད་པ་སྤྱན་དྲངས་ནས་སིབ་སིབ་ཐིམ་པར་སྒོམས་ཤིག །ཧཱུྃ། དད་པ་དང་ནི་དམ་ཚིག་གིས། །དཔལ་ལྡན་མགོན་པོ་སྤྱན་འདྲེན་ན། །ཐུགས་རྗེའི་ཐུགས་དམ་དབང་གིས་ནི། །བསྟན་པ་བསྲུང་ཕྱིར་གཤེགས་སུ་གསོལ། །བྷྱོཿ བྱང་ཤར་ཆོས་དབྱིངས་ཕོ་བྲང་ནས། །བསྟན་པ་བསྲུང་ཕྱིར་སྐུ་སྤྲུལ་མ། །ཚུར་གཤེགས་ཚུར་གཤེགས་གནས་འདིར་གཤེགས། །དམ་ཚིག་དབང་གིས་མྱུར་དུ་བྱོན། །ཨོ་ཨཱ་བེ་ཤ་ཡ་ཨཱ་བེ་ཤ་ཡ། མ་ཧཱ་ཀཱ་ལ་དེ་བ་རཀྟ་ཛཧཱུྃ་བཾ་ཧོ༔ ཨེ་ཧྱ་ཧི་ཨ་གཙྩཡ་ཨ་གཙྩཡ། ཧཱུཾ་ཡ་ཛ་ཧཱུྃ་ཡ་ཿ ཞེས་ཡུན་རིང་དུ་དབབ། ཚིལ་ཆེན་གྱིས་བདུག །རོལ་མོ་བྱ། མ་ཕེབས་ན་དམིགས་པ་བསྐྱར་ཏེ་དབབ། ཕེབས་ནས་རྡོ་རྗེའི་གླུ་དབྱངས། ཏིབཛྲ་གྱིས་བརྟན་པར་བྱས། སློབ་དཔོན། སླར་དཀྱིལ་འཁོར་གྱི་མཐོང་བ་བརྟག །པྲ་ཏིཙྪ་བཛྲ་ཧོ༔ མེ་ཏོག་དོར། པྲ་ཏི་གྲིཙྪ་སྭ་ཨི་མཾ། སཏཱ་མ་ཧཱ་བ་ལ། ཞེས་སླར་སྦྱིན། རིགས་ཀྱི་མིང་བཏགས། འཁོར་ལོ་བསྟན་ལྷ་ངོ་སྤྲོད་རྒྱས་བསྡུས་དེ་དག་སྔོན་དུ་བྱའོ། ༈ །དངོས་གཞི་འོད་ཀྱི་དབང་སོགས་ལས་མཎྜལ་ཕུལ་ལ། ཨོཾ་བཛྲ་ཧ་ཕྱེ་ཨུརྒྱུ་ཊ་ཡ་ཧཱུྃ། ཞེས་མིག་
དར་བསལ། ལྷ་ངོ་སྤྱད་དོ། །རྗེས་ཟློས་གྱིས། གདུག་པ་མ་ལུས་འདུལ་མཛད་པ། །ནག་པོ་ཆེན་པོ་བཅོམ་ལྡན་འདས། །མཁའ་འགྲོ་ཀུན་གྱི་དབང་ཕྱུག་གཙོ། །ཁྱོད་ཀྱིས་བདག་ལ་དབང་བསྐུར་སྩོལ། །ཅེས་ལན་གསུམ། ཐིག་ལེ་བྲིས་པའི་ཙཀ་ལི་གཏད་པའམ། དམིགས་པས་རུང་། །བླ་མ་ཡེ་ཤེས་མགོན་པོའི་སྨིན་མཚམས་ནས་འོད་དཀར་པོ་བྱུང་ཁྱེད་རང་རྣམས་ཀྱི་སྤྱི་བོར་ཐིམ་ལུས་སྒྲིབ་དག་ནས་སྐུ་ཡི་བྱིན་རླབས་ཐོབ་པར་བསྒོམ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ཀཱ་ཡ་ཨ་བྷི་ཥིཉྩ་ཨོཾ། བླ་མ་ཡེ་ཤེས་མགོན་པོའི་མགྲིན་པ་ནས་འོད་ཟེར་དམར་པོ་བྱུང་ཁྱེད་རང་རྣམས་ཀྱི་མགྲིན་པར་ཐིམ་ངག་སྒྲིབ་དག །གསུང་གི་བྱིན་རླབས་ཐོབ་པར་བསྒོམ། རྩ་སྔགས། ཝཱཀྐ་ཨ་བྷི་ཥིཉྩ་ཨཱ༔ བླ་མ་ཡེ་ཤེས་མགོན་པོའི་ཐུགས་ཀ་ནས། འོད་མཐིང་ཀ་བྱུང་ཁྱེད་རང་རྣམས་ཀྱི་སྙིང་ཁར་ཐིམ། ཡིད་སྒྲིབ་དག །ཐུགས་ཀྱི་བྱིན་རླབས་ཐོབ་པར་བསྒོམ།་རྩ་སྔགས། ཙིཏྟ་ཨ་བྷི་ཥིཉྩ་ཧཱུྃ། བླ་མ་ཡེ་ཤེས་མགོན་པོའི་ལྟེ་བ་ནས་འོད་སེར་པོ་བྱུང་ཁྱེད་རང་རྣམས་ཀྱི་ལྟེ་བར་ཐིམ། བསགས་པ་ཆེ་སྙམས་ཀྱི་སྒྲིབ་པ་དག །ཡོན་ཏན་གྱི་བྱིན་རླབས་ཐོབ་པར་བསྒོམ། རྩ་སྔགས། སརྦ་
ཨ་བྷི་ཥིཉྩཧཱུྃ༔ བླ་མ་ཡེ་ཤེས་མགོན་པོའི་གསང་བ་ནས་འོད་ཟེར་ལྗང་ནག་བྱུང་། ཁྱེད་རང་རྣམས་ཀྱི་གསང་བར་ཐིམ། ཤེས་བྱའི་སྒྲིབ་པ་དག །ཕྲིན་ལས་ཀྱི་བྱིན་རླབས་ཐོབ་པར་བསྒོམ། རྩ་སྔགས།་ཀརྨ་ཨ་བྷི་ཥིཉྩ་ཕཊ༔ བླ་མ་མགོན་པོའི་གནས་ལྔར་ༀ་ཨཱཿཧཱུྃ་ཧྲཱིཿཕཊ༔དང་། ཁྱེད་རང་སློབ་མའི་གནས་ལྔར་ༀ་ཨཱཿཧཱུྃ་ཧཱུྃཕཊ་ཀྱིས་མཚན་པར་བསྒོམས། དེ་ནས་མགོན་པོའི་དཔྲལ་བའི་ཨོ་ལས་ཨོ་མང་པོ་བྱུང་། ཁྱེད་རང་གི་དཔྲལ་བའི་ཨོ་ལ་ཐིམ་པར་བསྒོམ། ཨོཾ་ཨོཾ་ཨོཾ། ལན་གསུམ། མགོན་པོའི་མགྲིན་པའི་ཨཱལས་ཨཱཋམང་པོ་བྱུང་། ཁྱེད་རང་གི་མགྲིན་པའི་ལ་ཐིམ་པར་བསྒོམ། ཨཱཿཨཱཿཨཱ༔ མགོན་པོའི་ཐུགས་ཀའི་ཧཱུྃ་ལས་ཧཱུྃ་མང་པོ་བྱུང་། ཁྱེད་རང་གི་ཐུགས་ཀའི་ཧཱུཾ་ལ་ཐིམ་པར་བསྒོམ། ཧཱུྃ་ཧཱུྃ་ཧཱུྃ། མགོན་པོའི་ལྟེ་བའི་ཧཱུྃ་ལས་ཧཱིམང་པོ་བྱུང་། ཁྱེད་རང་གི་ལྟེ་བའི་ཧྲཱིཿལ་ཐིམ་པར་བསྒོམ། ཧྲཱིཿཧྲཱིཿཧྲཱི༔ མགོན་པོའི་གསང་བའི་ཕཊ༔ལས་ཕཊ་མང་པོ་བྱུང་། ཁྱེད་རང་གི་གསང་བའི་ཕཊ་ལ་ཐིམ་པར་བསྒོམ། ཕཊ་ཕཊ་ཕཊ༔ ཙཀ་ལིའམ་དམིགས་པས་ཀྱང་རུང་། ཨོ་ལས་འཁོར་ལོ་དཀར་པོ་ཨོཾ་གྱིས་མཚན་པ། ཨཱཿལས་པདྨ་
དམར་པོ་ཨཱཿས་མཚན་པ། ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ། ཧྲི༔ལས་རིན་པོ་ཆེ་འབར་བ་ཧིས་མཚན་པ། ཕཊ་ལས་རལ་གྲི་ལྗང་གུ་ཕཊ༔ཀྱིས་མཚན་པ། མགོན་པོའི་དཔྲལ་བའི་འཁོར་ལོ་ལས་འཁོར་ལོ་གྲངས་མེད་འཕྲོས། ཁྱེད་རང་གི་དཔྲལ་བའི་འཁོར་ལོ་ལ་ཐིམ་པར་སྒོམས། རྩ་སྔགས། ཙཀྲ་ཨ་བྷི་ཥིཉྩ་ཨོཾ། མགོན་པོའི་མགྲིན་པའི་པདྨ་ལས་པདྨ་གྲངས་མེད་པ་འཕྲོས། ཁྱེད་རང་གི་མགྲིན་པའི་པདྨར་ཐིམ་པར་སྒོམས། པདྨ་ཨ་བྷི་ཥིཉྩ་ཨཱཿ མགོན་པོའི་ཐུགས་ཀའི་རྡོ་རྗེ་ལས་རྡོ་རྗེ་གྲངས་མེད་པ་འཕྲོས། ཁྱེད་རང་གི་ཐུགས་ཀའི་རྡོ་རྗེ་ལ་ཐིམ་པར་བསྒོམ། རྩ་སྔགས། བཛྲ་ཨ་བྷི་ཥིཉྩ་ཧཱུཾ། མགོན་པོའི་ལྟེ་བའི་རིན་པོ་ཆེ་ལས་རིན་པོ་ཆེ་གྲངས་མེད་པ་འཕྲོས། ཁྱེད་རང་གི་ལྟེ་བའི་རིན་པོ་ཆེ་ལ་ཐིམ་པར་སྒོམས། རྩ་སྔགས། རཏྣ་ཨ་བྷི་ཥིཉྩ་ཧྲཱིཿ མགོན་པོའི་གསང་བའི་རལ་གྲི་ལས་རལ་གྲི་གྲངས་མེད་པ་འཕྲོས། ཁྱེད་རང་གི་གསང་བའི་རལ་གྲི་ལ་ཐིམ་པར་སྒོམས། རྩ་སྔགས། ཀརྨ་ཨ་བྷི་ཥིཉྩ་ཕཊ༔ འདི་ནི་མཚན་མའི་དབང་ངོ་། །སླར་ཡང་མཎྜལ་ཕུལ་ཞིང་རྗེས་ཟློས། གདུལ་དཀའ་འདུལ་མཛད་བཅོམ་ལྡན་འདས། །ཁྱེད་ལ་རྟག་
ཏུ་ཕྱག་འཚལ་ནས། །སྐུ་གསུང་ཐུགས་དང་ཡོན་ཏན་དང་། །ཕྲིན་ལས་རབ་འབྱམས་དབང་སྐུར་སྩོལ། །ཞེས་ལན་གསུམ་གསོལ་བ་བཏབ་ལ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་འགྲུབ་བྱེད་པ། །དཔལ་ལྡན་ནག་པོ་ལྕམ་དྲལ་གྱི། །སྐུ་ཡི་མངོན་པར་དབང་བསྐུར་རོ། །རྩ་སྔགས། ཀཱ་ཡ་ཨ་བྷི་ཥིཉྩ་ཨོཾ། ཞེས་སྐུ་ཡི་རྟེན་གང་ཡང་རུང་ལ། མགོར་བཀོད། མེ་ཏོག་གི་ཆར་དབབ། རོལ་མོའི་སྒྲ་བྱ། མངོན་རྟོགས་རྒྱས་པར་བཤད། སྟོང་པའི་ངང་ལས་ཁྱེད་རང་རྣམས། །གོན་པོ་ཞལ་གཅིག་ཕྱག་གཉིས་པ། །མཐིང་ནག་སྤྱན་གསུམ་ལྗགས་འདྲིལ་མཆེ་བ་གཙིགས། །དབུ་སྐྲ་གྱེན་བརྫེས་གཡས་པས་གྲི་གུག་དང་། །གཡོན་གྱི་ཐོད་ཁྲག་ཐོད་སྐམ་དབུ་རྒྱན་ཅན། །དུག་སྦྲུལ་རུས་པ་སྣ་ཚོགས་དར་གྱིས་བརྒྱན། །དར་ནག་འཇོལ་བེར་སྟག་གི་ཤམ་ཐབས་དང་། །མགོ་ཕྲེང་དོ་ཤལ་ཞབས་གཡས་བསྐུམ་པའི་གར། །གཡོན་པ་བརྐྱང་བའི་ཚུལ་གྱིས་འགྱིང་བའི་གཟུགས། །ཁམས་གསུམ་དབང་སྡུད་ཟིལ་གནོན་ཆེན་པོར་གྱུར། །དེ་ཡི་པང་དུ་མ་ལས་ལྷ་མོ་ཞལ་གཅིག་ཕྱག་བཞི་མ། །ཁཊྭཱཾ་ཕུར་པ་མེ་ལོང་སྦྲུལ་ཞགས་བསྣམས། །བཙན་སྟབས་འཁྱིལ་
བའི་སྟབས་ཀྱིས་བཞུགས་པར་གྱུར། །ཅེས་སློབ་མ་མངོན་པར་བསྐྱེད། དེ་ཡི་སྤྱི་བོར་ཨོཾ་ཡིག་དཀར་པོ་དང་། །མགྲིན་པར་ཨཱཿདམར་ཐུགས་ཀར་ཧཱུཾ་སྔོན་པོ། །མགོན་པོའི་ཐུགས་ཀར་ཟླ་བར་ཧཱུྃ་མཐིང་ནག །ལྷ་མོའི་ཐུགས་ཀར་ཉི་མར་བློ་སྔོན་པོ། །ཞེས་ཡི་གེ་ཕྲ་བཀོད། ད་བླ་མ་མགོན་པོའི་སྨིན་མཚམས་ནས། སྐུ་ཡི་མགོན་པོ་དཀར་པོ་གྲངས་མེད་པ་འཕྲོས། ཁྱེད་རང་གི་སྨིན་མཚམས་སུ་ཐིམ་པས་སྐུའི་མགོན་པོ་དཀར་པོར་སྒོམས་ཤིག །ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །སྐུ་མགོན་ཡབ་ཡུམ་དབང་བསྐུར་རོ། །ཨོཾ་བཛྲ་རེ་མ་ཏི་ཀཱ་ཡ་ཨ་བྷི་ཥིཉྩ་ཨོ༔ བླ་མ་མགོན་པོའི་མགྲིན་པ་ནས་གསུང་གི་མགོན་པོ་དམར་པོ་གྲངས་མེད་པ་འཕྲོས། ཁྱེད་རང་གི་མགྲིན་པར་ཐིམ་པས་གསུང་གི་མགོན་པོ་དམར་པོར་སྒོམས་ཤིག །ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །གསུང་མགོན་ཡབ་ཡུམ་དབང་བསྐུར་རོ། །རྩ་སྔགས། ཝཱཀྐ་ཨ་བྷི་ཥིཉྩ་ཨཱཿ བླ་མ་མགོན་པོའི་ཐུགས་ཀ་ནས་ཐུགས་ཀྱི་མགོན་པོ་མཐིང་ཀ་
གྲངས་མེད་པ་འཕྲོས། ཁྱེད་རང་གི་སྙིང་ཁར་ཐིམ་པས་ཐུགས་ཀྱི་མགོན་པོ་མཐིང་ཀར་སྒོམས་ཤིག །ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཐུགས་མགོན་ཡབ་ཡུམ་དབང་བསྐུར་རོ། །རྩ་སྔགས། ཙིཏྟ་ཨ་བྷི་ཥིཉྩ་ཧཱུྃ། བླ་མ་མགོན་པོའི་ལྟེ་བ་ནས་ཡོན་ཏན་གྱི་མགོན་པོ་སེར་པོ་གྲངས་མེད་པ་འཕྲོས། ཁྱེད་རང་གི་ལྟེ་བར་ཐིམ་པས་ཡོན་ཏན་གྱི་མགོན་པོ་སེར་པོ་སྒོམས་ཤིག །ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཡོན་ཏན་མགོན་པོའི་དབང་བསྐུར་རོ། །རྩ་སྔགས། གུ་ཎ་ཨ་བྷི་ཥིཉྩ་ཧཱུྃ༔ བླ་མ་མགོན་པོའི་གསང་བ་ནས་ཕྲིན་ལས་ཀྱི་མགོན་པོ་ལྗང་གུ་གྲངས་མེད་པ་འཕྲོས། ཁྱེད་རང་གི་གསང་བར་ཐིམ་པས་ཕྲིན་ལས་ཀྱི་མགོན་པོ་ལྗང་ཁུ་སྒོམས་ཤིག །ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཕྲིན་ལས་མགོན་པོའི་དབང་བསྐུར་རོ། །རྩ་སྔགས། ཀརྨ་ཨ་བྷི་ཥིཉྩ་ཕཊ༔ དེ་ནས་དཔྲལ་བ་ལ་སོགས་པའི་གནས་ལྔར་མགོན་པོའི་སྐུ་གྲངས་མེད་པ་རིམ་གྱིས་
ཐིམ་པར་མོས་ལ་རིམ་བཞིན་སྔར་གྱི་ཚིགས་སུ་བཅད་པ་དང་། རོལ་མོ་སོགས་བྱ། ཞེས་པའི་དོན་ནོ། །ད་དཔོན་སློབ་གཉིས་ཀ་ལྷར་གསལ་བའི་གནས་ལྔར་ཉི་ཟླ་ལ་ཧཱུྃ་རེ་རེ། སློབ་དཔོན་གྱི་ཧཱུྃ་ལྔའི་མཐར། སྐུ་གསུང་ཐུགས་ཡོན་ཏན་ཕྲིན་ལས་སྙིང་པོ་ལྔ་བཀོད་དེ། ཞལ་ནས་ཐོན་སློབ་མའི་གནས་ལྔ་སོ་སོར་འཁྱིལ་ཏེ་གནས་པར་བལྟས་ལ། སྔགས་རྣམས་གནས་ལྔར་བཀོད་པ་ལས་སྔགས་ཕྲེང་སློབ་མའི་གནས་ལྔར་འཁོར་བར་བལྟས་ལ། སྔགས་སོ་སོ་ལ་བརྒྱ་རེ། ཉེར་གཅིག་རེ་བཟླ་ཞིང་། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །སྤྱན་འདྲེན་སྔགས་ཀྱིས་དབང་བསྐུར་རོ། །ཨོཾ་མ་ཧཱ་ཀཱ་ལ་ཀཱ་ལ་ཡ། དེ་ཝ་རཀྟ། ཛཿཧཱུྃ་བཾ་ཧོཿ འདིར་ཤོག་འདིར་ཤོག །ཨ་གཙྪ་ཡ་ཨ་གཙྪ་ཡ། ཧཱུཾ་ཡ་ཿ ཧཱུྃ་ཡ་ཿ ཨོཾ་མ་ཧཱ་ཀཱ་ལི། ཏྲག་རཀྵ་ཏི་ལཾ། ས་མཱ་ཡ་ཛ༔ཧཱུྃ་བཾ་ཧོ༔ ནག་མོ་ཏི་ལཾ་མ་མ་དུན་བྷྱོཿ ཛཿཧཱུྃ་བཾ་ཧོཿ ཀཱ་ལི་དུན་བྷྱོ༔ ཨེ་ཨ་རལླི་ཧོཿ ཛཧཱུྃ་བཾ་ཧོ༔ མ་ཧི་མ་ཧཱ་ས་མཱ་ཡ། ཕོ་ཕེ་ཕོ། མ་མ་ས་ཤ་ར། ཤ་ཀ་ལ། ས་མཱ་ཡ་ཿ ཛཧཱུྃ་བཾ་ཧོ༔ ཨ་ལ་ལ་ཧོ། མ་མོ་ནག་མོ་ཏུཾ་
ཏིང་ལཾ། མ་མོ་ནག་མོ་དུ་ཏིང་བྷྱོ༔ ཛཧཱུྃ་བཾ་ཧོ༔ ནག་མོ་དུན་བྷྱོ༔ ཨོཾ་ཨཱཿཧཱུྃཿ ས་མ་ཡ། ཨེ་ཧྱ་ཧི་ཿ ཨཱ་རལླི་ཧོ༔ ཧཱུཾ་ཧཱུཾ། ཝཱཀྐ་ཨ་བྷི་ཥིཉྩ་ཨཱ༔ ཞེས་རྡོ་རྗེ་དཔྲལ་བར་རེག རོལ་མོ་བྱ། མེ་ཏོག་འཐོར། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཧེར་ནའི་སྔགས་ཀྱིས་དབང་བསྐུར་རོ། །ཨོཾ་མ་ཧཱ་ཀཱ་ལ་ཀཱ་ལ་ཡ། ཤོར་ཧེར་ནི་ཤོག །ཧེར་མ་དུམ་རིལ་ཤོག །འདིར་ཤོག་འདིར་ཤོག །འདིར་དུམ་འདིར་དུམ། གནོད་བྱེད་དགྲ་བོའི་ཙིཏྟ་བཾ་ཙིཏྟ་རྦད། །ཝཱཀྐ་ཨ་བྷི་ཥིཉྩ་ཨཱ༔ རྡོ་རྗེ་མགྲིན་པར་རེག །རོལ་མོ་བྱ།་མེ་ཏོག་འཐོར། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཧུ་རའི་སྔགས་ཀྱིས་དབང་བསྐུར་རོ། །ཨོཾ་མ་ཧཱ་ཀཱ་ལ་ཀཱ་ལ་ཡ། དེ་ཝ་རཀྟ་དགྲ་བོའི་ཙིཏྟ་ལ་ཧུ་ར་ཧུ་ར། བེ་ར་བེ་ར། དུ་ན་དུ་ན།་ཏྲི་ལམ་ཤམ་ཀ་རུ་ཏྲི་ཏ་ཏྲག་རཀྵ་རྦད། ཨོ་སྟེ་བྷནྡྷ་སྟེ་བྷནྡྷ་ཧཱུྃ་ཧཱུྃ་ཧཱུྃ་ཕཊ༔ ཝཀྐ་ཨ་བྷི་ཥིཉྩ་ཨཱ༔ ཞེས་རྡོ་རྗེ་སྙིང་ཁར་རེག །རོལ་མོ་བྱ། མེ་ཏོག་འཐོར། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་
སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཤཱ་སའི་སྔགས་ཀྱིས་དབང་བསྐུར་རོ། །ཨོཾ་མ་ཧཱ་ཀཱ་ལ་ཡ། ཤཱ་ས་ནཾ། ཨུ་པ་ཀཱ་རི་ཎི། ཨེ་ཥཱ་པཉྩི་མ་ཀཱ་ལོ་ཡཾ། ཨི་དཾ་རཏྣ་ཏྲ་ཡཱ་ཡ། ཨ་པ་ཀ་རི་ཎཾ། ཡ་ཏི་པྲ་ཏི་ཛྙཱ། སྨ་ར་སི་ཏ་དཱ། ཨི་དཾ་དུཏྟཾ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲི་སྐྱ་གྲི་། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དི་ན་མེ་ཀེ་ན། མཱ་ར་ཡ་ཧཱུྃ་ཕཊ༔ ཝཀྐ་ཨ་བྷི་ཥིཉྩ་ཨཱ༔ ཞེས་རྡོ་རྗེ་ལྟེ་བར་རེག །རོལ་མོ་བྱ། མེ་ཏོག་འཐོར། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །རྦད་སྔགས་ཀྱི་ནི་དབང་བསྐུར་རོ། །ཨོཾ་ཨེ་ཨཱ་རལླི་ཧོ༔ ཤྲཱི་མ་ཧཱ་ཀཱ་ལ་ཁཱ་ཧི། ཏྲག་རཀྵ་ཁཱ་ཧི། ཏྲག་མི་རཀྵ་ཐུན་བྷོ་ཁཱ་ཧི། ཏྲག་རཀྵ་རྦད་བྷོ་ཁཱ་ཧི། ཝཀ་ཨ་བྷི་ཥིཉྩ་ཨཱཿ ཞེས་རྡོ་རྗེ་གསང་བར་རེག །རོལ་མོ་བྱ། མེ་ཏོག་འཐོར། ར་ར་སི་སི་སོགས་སྔོན་དུ་འགྲོ་བས་བྱ་བ་སྔགས་ཀྱི་དབང་ངོ་། །དེ་ལྟར་གནས་ལྔ་ཆར་བྱའོ། །སློབ་དཔོན་གྱི་གནས་ལྔའི་འོད་མཐིང་སྐྱ། མཐིང་དམར། མཐིང་ག །མཐིང་སེར། མཐིང་ལྗང་རྣམས་སློབ་མ་འདིའི་གནས་ལྔར་ཐིམ་པས་ལས་སྒྲིབ་
ཐམས་ཅད་དག་ཅིང་ཆོས་དབྱིངས་ལ་སོགས་པའི་ཡེ་ཤེས་མཐའ་དག་ཐོབ་པར་བལྟས་ནས། སློབ་དཔོན་གྱི་དཔྲལ་བ་ནས་འོད་ཟེར་མཐིང་སྐྱ་འཕྲོས། ཁྱེད་རང་གི་དཔྲལ་བར་ཐིམ། གཏི་མུག་གི་ལས་སྒྲིབ་དག །ཆོས་དབྱིངས་ཡེ་ཤེས་ཐོབ་པར་སྒོམས། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཐུགས་ཀྱིས་མངོན་པར་དབང་བསྐུར་རོ། །ཨོ་བཛྲ་མ་ཧཱ་ཀཱ་ལ་རེ་མ་ཏི། ཙིཏྟ་ཨ་བྷི་ཥིཉྩ་ཧཱུཾ། སློབ་དཔོན་གྱི་མགྲིན་པ་ནས་འོད་ཟེར་མཐིང་དམར་འཕྲོས། ཁྱེད་རང་གི་མགྲིན་པར་ཐིམ། འདོད་ཆགས་ཀྱི་ལས་སྒྲིབ་དག །སོར་རྟོག་ཡེ་ཤེས་ཐོབ་པར་སྒོམས། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཐུགས་ཀྱིས་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་རེ་མ་ཏི་ཙིཏྟཾ་ཨ་བྷི་ཥིཉྩ་ཧཱུྃ། སློབ་དཔོན་གྱི་ཐུགས་ཀ་ནས་འོད་ཟེར་མཐོང་ནག་འཕྲོས། ཁྱེད་རང་གི་སྙིང་ཁར་ཐིམ། ཞེ་སྡང་གི་ལས་སྒྲིབ་དག །མེ་ལོང་ཡེ་ཤེས་ཐོབ་པར་སྒོམས། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་
པ། །དཔལ་ལྡན་མགོན་པོ་ལྕམ་དྲལ་གྱི། །ཐུགས་ཀྱིས་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་རེ་མ་ཏི་ཙིཏྟ་ཨ་བྷི་ཥིཉྩ་ཧཱུྃ། སློབ་དཔོན་གྱི་ལྟེ་བ་ནས་འོད་ཟེར་མཐིང་སེར་འཕྲོས། ཁྱེད་རང་གི་ལྟེ་བར་ཐིམ། ང་རྒྱལ་གྱི་ལས་སྒྲིབ་དག །མཉམ་ཉིད་ཡེ་ཤེས་ཐོབ་པར་སྒོམས། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཐུགས་ཀྱིས་མངོན་པར་དབང་བསྐུར་རོ། །ཙིཏྟ་ཨ་བྷི་ཥིཉྩ་ཧཱུཾ། སློབ་དཔོན་གྱི་གསང་བ་ནས་འོད་ཟེར་མཐིང་ལྗང་འཕྲོས། ཁྱེད་རང་གི་གསང་བར་ཐིམ། ཕྲག་དོག་གི་ལས་སྒྲིབ་དག །བྱ་གྲུབ་ཡེ་ཤེས་ཐོབ་པར་སྒོམས། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཐུགས་ཀྱིས་མངོན་པར་དབང་བསྐུར་རོ། །ཙིཏྟ་ཨ་བྷི་ཥིཉྩ་ཧཱུྃ། ཞེས་རེག །མེ་ཏོག་འཐོར། རོལ་མོ་སྔར་བཞིན་ཏེ། ཚིག་བསྒྱུར་ལ་གནས་ལྔར་རིམ་བཞིན་བྱའོ། །ཧཱུྃ་ལས་རྒྱན་རེ་རེ་བཞིན་རིན་པོ་ཆེ་དང་། སྦྲུལ་དང་། རུས་པ་དང་། སྟག་ལྤགས་དང་། དར་ལྷབ་ལྷུབ་དང་། མགོ་ཕྲེང་རྣམས་བསྐྱེད་དེ། དེ་
དང་ཁྲོ་རྒྱལ་ཐམས་ཅད་ཀྱི་ནུས་མཐུ་ཇི་སྙེད་པ་བསྡུས་པར་དམིགས་ཤིང་བསྟིམ། རྒྱན་གྱིས་དམིགས་པ་བརྟན་པར་བྱས་ཏེ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །རིན་པོ་ཆེ་ཡི་རྒྱན་ཆ་ཡིས། །ཡོན་ཏན་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་རེ་མ་ཏི་རནྟ་ཨ་ལངྐ་ཀ་ར་གུ་ཎ་ཨ་བྷི་ཥིཉྩ་ཧཱུྃ། ཞེས་སྔགས་ཕལ་ཆེར་འགྲེས་ཏེ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །རུས་པ་འདི་ནི་རྒྱན་དྲུག་གི །ཡོན་ཏན་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་རུ་ནི་རཾ་སུ་ཨ་ལངྐ་ར་ཨ་བྷི་ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །སྦྲུལ་རྒྱན་ཁ་དོག་བརྒྱད་པོ་ཡིས། །ཡོན་ཏན་མངོན་པར་དབང་བསྐུར་རོ། །ཨོཾ་བཛྲ་མ་ཧཱ་ཀཱ་ལ་ནཱ་ག་ཨཥྚ་ཨ་ལོང་ཀ་ར་ཨ་བྷི་ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །མགོ་ཕྲེང་ལྔ་བཅུའི་དོ་ཤལ་གྱིས་། །ཡོན་ཏན་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་ཀ་པཱ་མ་ལ་ཨ་ལང་ཀ་ར་ཨ་བྷི་ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །སྟག་པགས་རློན་པའི་ཤམ་ཐབས་
ཀྱིས། །ཡོན་ཏན་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་བྱ་ཊི་ཝནྟ་ཨ་ལང་ཀ་ར་ཨ་བྷི་ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །ལྷབ་ལྷུབ་དར་གྱི་བེར་ཆེན་གྱིས། །ཡོན་ཏན་མངོན་པར་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་ཝཔ་ཨ་ལང་ཀ་ར་ཨ་བྷི་ཥིཉྩ་ཧཱུཾ། རྒྱན་གྱི་དབང་ངོ་། དེ་བཞིན་དུ་ཐོད་པ་ཆང་གིས་བཀང་བ་དང་། གྲི་གུག་གཏད་དེ། དེ་དག་གིས་ལས་བཞི་མཐའ་དག་འགྲུབ་པར་དམིགས་ལ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཕྲིན་ལས་མཆོག་གི་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་ཀ་ཏྲ་རི་ཀརྨ་ཨ་བྷི་ཥིཉྩ་ཧཱུྃ། ཁམས་གསུམ་བཅུད་བསྡུས་གསོལ་ཟས་ཟད་པ་མེད་པར་བསྒོམ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཐོད་ཁྲག་འབར་བས་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་བཛྲ་ཀ་པཱ་ལ་ཀརྨ་ཨ་བྷི་ཥིཉྩ་ཧཱུྃ། ལྕགས་ཀྱུ་སོགས་གཏད་ལ། ཨེ་མ་སྐལ་ལྡན་རིགས་ཀྱི་བུ། །འགུགས་བྱེད་ལྕགས་ཀྱུས་དབང་བསྐུར་རོ། །རྩ་སྔགས། ཨོཾ་བཛྲ་མ་ཧཱ་ཀཱ་ལ་བཛྲ་ཨཾ་ཀུ་ཤ་ཀརྨ་ཨ་བྷི་
ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །འཆིང་བྱེད་ཞགས་པས་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་བཛྲ་པ་ཤ་ཀརྨ་ཨ་བྷི་ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །སྡོམ་བྱེད་ལྕགས་སྒྲོག་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་བཛྲ་སྤོ་ཊ་ཀརྨ་ཨ་བྷི་ཥིཉྩ་ཧཱུྃ། ཨེ་མ་སྐལ་ལྡན་རིགས་ཀྱི་བུ། །མྱུར་བྱེད་དྲིལ་བུས་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་བཛྲ་ཌེ་ཀརྨ་ཨ་བྷི་ཥིཉྩ་ཧཱུྃ། ཞེས་ཚིག་བསྒྱུར་ལ་ལས་བཞིའི་ཕྱག་རྒྱ་བྲིས་པ་བྱིན། ཕྲིན་ལས་སོ་སོའི་དམིགས་པས་འཁྲུལ་འཁོར་རྒྱས་པར་བྱ། ཨེ་མ་སྐལ་ལྡན་རིགས་ཀྱི་བུ། །ལས་བཞིའི་ཕྱག་རྒྱས་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་ཤཱནྟི་པུཊྛི་ཝ་ཤཾ་མཱ་ར་ཡ་ཀརྨ་ཨ་བྷི་ཥིཉྩ་ཧཱུཾ། བེང་སོགས་ཁྱད་པར་གྱི་ཕྱག་མཚན་སྦྱིན་པར་སྤྲོ་ན། ཨེ་མ་སྐལ་ལྡན་རིགས་ཀྱི་བུ། །ཕྱག་མཚན་བེང་དང་པར་བུའི་དབང་བསྐུར་རོ། །ༀ་བཛྲ་མ་ཧཱ་ཀཱ་ལ་གཎྜི་ཀ་ཊོ་ར་ཀརྨ་ཨ་བྷི་ཥིཉྩ་ཧཱུཾ། འདི་དག་ནི་ཕྱག་མཚན་གྱི་དབང་ཞེས་བྱའོ། །བུམ་པ་སྤྱིར་བོར་བཀོད། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་ཀུན་གྱི་ཕྱག་བྱས་པ། །སངས་རྒྱས་ཀུན་གྱི་གསང་གསུམ་གྱི། །གནས་ལས་བྱུང་བ་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུྃ། །
ཞེས་བུམ་ཆུ་སྦྱིན། །མི་བསྐྱོད་པས་གཙོར་བྱས་པའི་རིགས་ལྔས་དབུ་བརྒྱན་པར་བསྒོམ། བཀྲ་ཤིས་བརྗོད། བླ་མ་མགོན་པོའི་སྒེག་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་དཔའ་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་མི་སྡུག་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་རྒོད་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། །བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་
མགོན་པོའི་དྲག་ཤུལ་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ཤུལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་འཇིགས་རུང་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་སྙིང་རྗེ་ཉམས་སློབ་མ་ལ་འཕྲོས། དེའི་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་རྔམ་ཉམས་སློབ་མ་ལ་འཕྲོས། དེས་ཉམས་ཆེན་པོ་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུྃ། བླ་མ་མགོན་པོའི་ཞི་ཉམས་སློབ་མ་ལ་འཕྲོས། དེས་ཉམས་ཆེན་པོར་རབ་ཏུ་འབར་བས། བདུད་ཚར་བཅད་རྒྱལ་བ་རྣམས་
དགྱེས་པར་བསྐྱེད། རང་ང་རྒྱལ་བརྟན་པར་མོས་ལ། ཨོཾ་བཛྲ་མ་ཧཱ་ཀཱ་ལ་རེ་མ་ཏི་ནི་ཏྲ་ཨ་བྷི་ཥིཉྩ་ཧཱུཾ། གར་ཉམས་ཕུལ་བྱུང་གི་དབང་ངོ་། །བླ་མ་མགོན་པོས་འོད་ཀྱིས་སློབ་མ་མགོན་པོར་གནས་པ་བསྐུལ། དེའི་འོད་ཀྱིས་གནོད་བྱེད་ཐམས་ཅད་བསྐྲད་པར་སྒོམས། རྩ་སྔགས། ཨུ་ཙ་ཏ་ཡ་ཕཊ༔ བླ་མ་མགོན་པོའི་འོད་ཀྱིས་སློབ་མ་མགོན་པོར་གནས་པ་བསྐུལ། དེའི་འོད་ཀྱིས་གནོད་བྱེད་ཐམས་ཅད་བསྐྲད་པར་སྒོམས། རྩ་སྔགས། མཱ་ར་ཡ་ཕཊ༔ བླ་མ་མགོན་པོའི་འོད་ཀྱིས་སློབ་མ་མགོན་པོར་གནས་པ་བསྐུལ། དེའི་འོད་ཀྱིས་གནོད་བྱེད་ཐམས་ཅད་རྨོངས་པར་སྒོམས། རྩ་སྔགས། བཱི་དེ་ཤ་ཡ་ཕཊ༔ བླ་མ་མགོན་པོའི་འོད་ཀྱིས་སློབ་མ་མགོན་པོར་གནས་པ་བསྐུལ། དེའི་འོད་ཀྱིས་གནོད་བྱེད་ཐམས་ཅད་རེངས་པར་སྒོམས། རྩ་སྔགས། བནྡཱ་ཤ་ཡ་ཕཊཿ ཞི་རྒྱས་དབང་འགུགས་རྣམས་རྒྱས་པར་བསྒོམས་པ་ཕྲིན་ལས་ཀྱི་དབང་སྟེ། བླ་མ་མགོན་པོའི་སྐུ་ལས་འོད་ཟེར་དཀར་པོ་འཕྲོས་ཁྱེད་རང་རྣམས་ལ་ཐིམ་པས། ནད་གདོན་སྡིག་སྒྲིབ་ཐམས་ཅད་ཞི་བར་བསྒོམ། རྩ་སྔགས། ཧྲུནཾ་ཀུ་རུ་ཨ་བྷི་ཥིཉྩ་ཧཱུྃ། བླ་མ་མགོན་པོའི་སྐུ་ལས་འོད་ཟེར་
སེར་པོ་གསེར་མདོག་འཕྲོས། ཁྱེད་རིང་རྣམས་ལ་ཐིམ་པས། ཚེ་བསོད་དཔལ་འབྱོར་ཐམས་ཅད་རྒྱས་པར་བསྒོམ། རྩ་སྔགས། པུཏྟིཾ་ཀུ་རུ་ཨ་བྷི་ཥིཉྩ་ཧཱུྃ། བླ་མ་མགོན་པོའི་སྐུ་ལས་འོད་ཟེར་དམར་པོ་འཕྲོས། ཁྱེད་རང་རྣམས་ལ་ཐིམ་པས། སྣང་སྲིད་དབང་དུ་བསྡུས་པར་བསྒོམ། རྩ་སྔགས། པ་ཤཾ་ཀུ་རུ་ཨ་བྷི་ཥིཉྩ་ཧཱུྃ། བླ་མ་མགོན་པོའི་སྐུ་ལས་འོད་ཟེར་ལྗང་ནག་འཕྲོས། །ཁྱེད་རང་རྣམས་ལ་ཐིམ་པས། དགྲ་བགེགས་ཐམས་ཅད་ཚར་བཅད་པར་བསྒོམ། རྩ་སྔགས། མཱ་ར་ཡ་ཕཊཨ་བྷི་ཥིཉྩ་ཧཱུྃ། དེ་ལྟར་དབང་དགུ་པོ་འདི་དག་རེ་རེའམ། གསུམ་ཚན་གང་རུང་ངམ། ཚང་མ། སློབ་མ་སྣོད་དུ་རུང་མི་རུང་གི་དབྱེ་བས་བརྟགས་ལ་སྦྱིན་ནོ། །དེ་ལྟར་ན་སྐུ་ཞལ་ཕྱག་གི་དབང་། གསུང་བཟླས་ལུང་གི་དབང་། ཐུགས་ཏིང་ངེ་འཛིན་གྱི་དབང་། ཡོན་ཏན་རྒྱན་གྱི་དབང་། ཡོངས་སུ་རྫོགས་པ་རྒྱས་གདབ་ཀྱི་དབང་། ཞེས་དབང་དང་པོའི་དོན་ཡིན་ནོ། །ཤིན་ཏུ་སྐལ་པ་མཆོག་དང་ལྡན་པ་དེ་དག་སླར་ཡང་། མཎྜལ་ཕུལ། དཔལ་ལྡན་ཁྲག་འཐུང་ཆེན་པོ་ཡིས། །བདག་ལ་བུམ་པའི་དབང་བསྐུར་སྩོལ། །གསུམ།་སློབ་མ་མགོན་པོ་ལ་བདེར་གཤེགས་དུ་མའི་དབང་བསྐུར་བའི་མོས་པ་མཛོད། ཞེ་
སྡང་འཇོམས་མཛད་ཚུ་ཡི་དབང་། །དེང་འདིར་ཁྱོད་ལ་བསྐུར་བར་བྱ། །ཨུ་ད་ཀ་ཨ་བྷི་ཌི། ང་རྒྱལ་འཇོམས་མཛད་ཅོད་པན་དབང་། །དེང་འདིར་ཁྱོད་ལ་བསྐུར་བར་བྱ། །མུ་གུ་ཧཱུྃ་ཨ་བྷི་ཥིཉྩ། འདོད་ཆགས་འཇོམས་མཛད་རྡོ་རྗེའི་དབང་། །དེང་འདིར་ཁྱོད་ལ་བསྐུར་བར་བྱ། །བཛྲ་ཨ་བྷི་ཥིཉྩ། ཕྲག་དོག་འཇོམས་མཛད་དྲིལ་བུའི་དབང་། །དེང་འདིར་ཁྱོད་ལ་བསྐུར་བར་བྱ། །གནྡྷེ་ཨ་བྷི་ཊི། གཏི་མུག་འཇོམས་མཛད་མིང་གི་དབང་། །དེང་འདིར་ཁྱོད་ལ་བསྐུར་བར་བྱ། །ཀྱཻ་དཔལ་ཆྒེ། ཨ་བྷི་ཥིཉྩ། ཟུང་དུ་འཇུག་པ་སློབ་དཔོན་དབང་། །དེང་འདིར་ཁྱོད་ལ་བསྐུར་བར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏེ་ས་མ་ཡ་ཤྲཱི་ཡེ་ཧཱུཾ། རྗེས་ཟློས། ཨོཾ་མ་ཧཱ་ཀཱ་ལ་མི་ཏྲག་རཀྟ་མ་ཧཱ་ཀཱ་ལ་ཀཱ་ལ་ཡ། ཡཀྵ་བེ་ཏཱ་ལི་ཧཱུྃ་ཿ ཨོཾ་ཤྲཱི་མ་ཧཱ་ཀཱ་ལ་ཡ་ཡཀྵ་བེ་ཏཱ་ལི་ཧཱུྃ་ཿ ཨོཾ་མ་ཧཱ་ཀཱ་ལ་ཀཱ་ལ་ཡ། ཡཀྵ་གུ་ཎ་ཧྲི་ད་ཧཱུྃ་ཕཊ་ཛ་སྭཱ་ཧཱ། ཨོཾ་ཏྲག་རཀྟ་དུན་ཏི་མ་བྷྱོ༔ ཨོཾ་མ་ཧཱ་ཀཱ་ལ་ཀཱ་ལ་ཡ། ཤཱ་ས་ནི་ཨུ་པ་ཀཱ་རི་ཎཾ་ཨེ་ཥ་པཉྩི་མ་ཀཱ་ལོ་ཡཾ་དུ་དུ་རཀྟ་ཚལ་པ་ཧ་ལ་དུཏྟཾ་ཤ་ཏུཾ་ཏ་ཐཱ་རུ་ཏྲི་སི་ཏ་དྷ་མི་རཏྣ་ཏྲ་ཡཱ་ཡ། ཨ་པ་ཀ་རི་ཎཾ། ཡ་ཏི་པྲ་ཏི་
ཛྙཱ། སྨར་སི་ཏ་ད། ཨི་དཾ་མ་མ་དུཏྟཾ་དེ་ཝ་བྷ་སི། དྷ་ནི་མི། ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲོ་སྐྱ་གྲི་ཉྩ། བྷནྡྷ་བྷནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དཱི་ན་མེ་ཀེ་ན། དགྲ་བགེགས་མཱ་ར་ཡ་ཧཱུྃ་ཕཊ༔ ཅེས་པས་ནང་སྒྲུབ་གསང་སྒྲུབ་ཀྱི་སྔགས་སྦྱིན། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཡ་སྭཱ། ཨ་ནུ་ར་ག་ཡ་མི། ཞེས་མདའ་འཕང་། ནི་ཏྲ་ཨ་པ་ཧ་ར་ས་ཏྲ་མཾ་ཧྲཱིཿ མིག་སྨན་སྦྱིན། ཨ༔ ཞེས་མེ་ལོང་བསྟན། འདི་དག་ནི་སྐུ་བུམ་དབང་ངོ་། །མཎྜལ་དང་། མཁའ་འགྲོ་ཀུན་གྱི་དབང་ཕྱུག་གིས། །བདག་ལ་གསང་བའི་དབང་བསྐུར་སྩོལ། །གསུམ་ནས་དམ་རྫས་བདུད་རྩི་སྦྱིན་ཞིང་། བླ་མ་མགོན་པོ་བེ་ཏཱ་ལི་དང་སྦྱར་བའི་བྱང་སེམས་སྦྱིན་པར་མོས་ལ། ལུས་ཐམས་ཅད་ཁྱབ་རྩ་གནས་བཞིར་དགའ་བ་བཞི་ཉམས་སུ་མྱོང་བར་སྒོམས། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །བདུད་རྩི་རྒྱུན་གྱི་དབང་བསྐུར་རོ། །གུ་བྱེ་ཨ་བྷི་ཥིཉྩ་ཧཱུྃ། ཞེས་དང་ཐོད་པའི་བདུད་རྩི་ཐོད་པ་གཞན་དུ་སྤེལ་ལ། ཨོཾ་ཨཱཿཧཱུྃ། ཞེས་ཧུབ་གསུམ་གྱིས་རོལ་ཏེ། རྩ་འཁོར་སྦྱངས་བའི་དམིགས་པ་རྒྱས་པར་བྱ། གསང་དབང་ངོ་། །སླར་ཡང་
མཎྜལ། རྡོ་རྗེ་འཛིན་དང་ཕྲིན་ལས་བདག །བདག་ལ་ཤེས་རབ་ཡེ་ཤེས་སྩོལ། །གསུམ། སློབ་མ་མགོན་པོ་ལ། བླ་མས་མཁའ་འགྲོ་དུ་མ་བྱིན་པར་བསྒོམ། །དཔལ་ལྡན་བླ་མ་སྙིང་ཁར་ཐིམ་པར་མོས་ཤིང་། །སྙིང་ཁར་རྡོ་རྗེ་བཀོད་དེ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཤེས་རབ་མཆོག་གི་དབང་བསྐུར་རོ། །པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ། །ཞེས་སིནྡྷུ་རའི་མཎྜལ་མགོར་བཞག །གནས་ལྔར་བླུག །མན་ངག་བསྟན་ཏེ། ཤེས་རབ་ཡེ་ཤེས་ཀྱི་དབང་ངོ་། །དེ་བཞིན་མཎྜལ་དང་། དོན་དམ་རྡོ་རྗེ་ནག་པོ་ཆེ། །བཞི་པའི་དབང་བསྐུར་བདག་ལ་སྩོལ། །ཞེས་ལན་གསུམ། ཡེ་ཤེས་ལྔ་ལྡན་གྲི་གུག་གིས་མཚན་འཛིན་མཐའ་དག་གཅོད་དོན་གོ་བར་བྱ་སྟེ། གྲི་གུག་བྱིན་ཏེ། ཨེ་མ་སྐལ་ལྡན་རིགས་ཀྱི་བུ། །ཕྲིན་ལས་མཐའ་དག་སྒྲུབ་བྱེད་པ། །དཔལ་ལྡན་མགོན་པོ་ལྕམ་དྲལ་གྱི། །ཡེ་ཤེས་མགོན་པོའི་དབང་བསྐུར་རོ། །ཙ་ཏུར་ཨརྦ་ཨ་བྷི་ཥིཉྩ་ཧཱུཾ། ཞེས་རིག་སྟོང་དབྱེར་མེད་དོན་གྱི་ངོ་སྤྲད་དེ་དབང་བཞི་པའོ། །འདི་དག་དང་པོ་བཞི་སོགས་དོན་ནོ། །དེ་ལྟར་དབང་གསུམ་པོ་རེ་རེ་བཞིན་ཡང་རོལ་མོ་སྔར་ལྟར་བྱའོ། །འཇིག་རྟེན་ཁམས་ནི་
ཐམས་ཅད་དུ། །སེམས་ཅན་ཀུན་དོན་བསྒྲུབ་བྱའི་ཕྱིར། །ཇི་ལྟར་སྣ་ཚོགས་གདུལ་བྱ་ལ། །རྡོ་རྗེའི་འཁོར་ལོ་བསྐོར་བར་གྱིས། །འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་དོན་བསྒྲུབ་བྱའི་ཕྱིར། །ཇི་ལྟར་སྣ་ཚོགས་གདུལ་བྱ་ལ། །རིན་ཆེན་འཁོར་ལོ་བསྐོར་བར་གྱིས། །འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་དོན་བསྒྲུབ་བྱའི་ཕྱིར། །ཇི་ལྟར་སྣ་ཚོགས་གདུལ་བྱ་ལ། །པདྨའི་འཁོར་ལོ་བསྐོར་བར་གྱིས། །འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་དོན་བསྒྲུབ་བྱའི་ཕྱིར། །ཇི་ལྟར་སྣ་ཚོགས་གདུལ་བྱ་ལ། །རལ་གྲིའི་འཁོར་ལོ་བསྐོར་བར་གྱིས། །ཨོཾ་སརྦ་ཏ་ཐཱ་ག་ཏ་སིདྡྷི་ས་མ་ཡ་སྟི། བྷུར་བྷུ་ཝ་སྭཱ་ཧཱ། ཞེས་གནང་ལུང་བསྟན་བྱས། ཁམས་གསུམ་ཀུན་གྱི་རྒྱལ་སྲིད་ཆེ། །རྒྱལ་བའི་སྲས་པོར་བརྟན་གྱུར་པས། །དེས་ནི་བདུད་ལས་རྣམ་རྒྱལ་ལ། །གྲོང་ཁྱེར་མཆོག་ཏུ་ཞུགས་པ་ཡིན། །ཞེས་དབུགས་དབྱུང་། །གཏོར་མ་ཡེ་ཤེས་ལས་དང་འཇིག་རྟེན་གྱི་སྲུང་མ་མཐའ་དག་པའི་དཀྱིལ་འཁོར་དུ་བསྐྱེད་ལ། ཧཱུྃ། ཆོས་ཀྱི་དབྱིངས་ཀྱི་དཀྱིལ་འཁོར་ནས། །ཡེ་ཤེས་མགོན་པོ་འཁོར་དང་
བཅས། །འདིར་གཤེགས་བདག་ལ་དགོངས་ནས་ཀྱང་། །བྱིན་གྱིས་བརླབས་པར་མཛད་དུ་གསོལ། །ནམ་མཁའི་དབྱིངས་ཀྱི་དཀྱིལ་འཁོར་ནས། །སྲས་་མཆོག་ནག་པོ་འཇིགས་པའི་གཟུགས། །འདིར་གཤེགས་བདག་ལ་དགོངས་ནས་ཀྱང་། །བྱིན་གྱིས་བརླབས་པར་མཛད་དུ་གསོལ། །རི་རབ་མཆོག་གི་སྟེང་ཤོད་ནས།། འཇིག་རྟེན་མགོན་པོ་གཟི་བརྗིད་ཅན། །འདིར་གཤེགས་བདག་ལ་དགོངས་ནས་ཀྱང་། །བྱིན་གྱིས་བརླབས་པར་མཛད་དུ་གསོལ། །མཐོང་བ་ཙམ་གྱི་བདུད་ཀྱི་དཔུང་། །ཀུན་ནས་སྐྲག་པར་བྱེད་པ་ཡིས། །མ་ཧཱ་ཀཱ་ལ་ཁྱོད་ཀྱི་ཞལ། །དེ་རིང་བདག་ལ་བསྟན་དུ་གསོལ། །ལས་བཞི་གྲུབ་པ་ཆེན་པོ་བརྒྱད། །སྐད་ཅིག་ཡུད་ཀྱི་འགྲུབ་བྱེད་པ། །སྔགས་ཀྱི་དངོས་གྲུབ་ཆེན་པོ་དེའང་། འདི་ལའམ། ས་ག་ལ། བྱམས་པའི་ཐུགས་ཀྱི་འདི་ལ། བདག་ལ་དགོངས། །བརྩེ་བའི་སྤྱན་གྱིས་བདག་ལ་གཟིགས། །ལུང་བསྟན་རྗེས་སུ་གནང་བ་ཡི། །བཀའ་སྩལ་བདག་ལ་གནང་དུ་གསོལ། །བྷྱོ༔ མ་གཅིག་སྨིན་མཚམས་མཛོད་སྤྱ་ཡི། །འོད་ཟེར་གྱི་ནི་དྲ་བ་ལས། །སྐུ་ཡི་སྤྲུལ་པ་གྲངས་མེད་
འགྱེད། །དཔལ་ལྡན་ལྷ་མོ་རེ་མ་ཛ། །ཕྱོགས་བཅུ་ནམ་མཁའི་བདུད་བཅོམ་ནས། །སྐུ་ཡི་དངོས་གྲུབ་བསྩལ་དུ་གསོལ། །མ་གཅིག་ལྗགས་ཀྱི་དབང་པོ་ཡི། །འོད་ཟེར་གྱི་ནི་དྲ་བ་ལས། །གསུང་གི་སྤྲུལ་པ་གྲངས་མེད་འགྱེད། །དཔལ་ལྡན་ལྷ་མོ་རེ་མ་ཛུ། །ཕྱོགས་བཅུ་ནམ་མཁའི་བདུད་བཅོམ་ནས། །གསུང་གི་དངོས་གྲུབ་བསྩལ་དུ་གསོལ། །མ་གཅིག་ཐུགས་ཀྱི་དཔལ་བེའུ་ཡི། །འོད་ཟེར་གྱི་ནི་དྲྭ་བ་ལས། །ཐུགས་ཀྱི་སྤྲུལ་པ་གྲངས་མེད་འགྱེད། །དཔལ་ལྡན་ལྷ་མོ་རེ་མ་ཏི། །ཕྱོགས་བཅུ་ནམ་མཁའི་བདུད་བཅོམ་ནས། །ཐུགས་ཀྱི་དངོས་གྲུབ་བསྩལ་དུ་གསོལ། །ཨོཾ་བཛྲ་མ་ཧཱ་ཀཱ་ལ་རེ་མ་ཏི་ཀཱ་ཡ་ཝཱཀྐ་ཙིཏྟ་ཨ་བྷི་ཥིཉྩ་ཨོཾ་ཨཱཿཧཱུྃ། ཞེས་སྨིན་མཚམས་ནས་མགྲིན་པ་སྙིང་ཁ་གསུམ་དུ་གཏུགས་ལ་རོལ་མོ་བྱའོ། །སླར་ཡང་མགོར་བཀོད། དྲུག་པ་རྡོ་རྗེ་འཆང་ཆེན་པོ། གསང་བདག་ཕྱག་ན་རྡོ་རྗེ། དྷ་ན་སཾ་སྐྲྀ་ཏ། གུ་རུ་པདྨ་འབྱུང་གནས། ཆོས་རྒྱལ་ཁྲི་སྲོང་ལྡེའུ་བཙན། ལྷ་སྲས་སད་ན་ལེགས། སྟག་ནམ་མཁའི་ལྷ་གཟུངས། སྔགས་རབས་ཉི་ཤུ་རྩ་བརྒྱད། སྐྱེས་མཆོག་ཀརྨ་པཀཱི་ལ་སོགས་པ་ཞལ་སྦྱོར་སྤར་ནག་བརྒྱུད་པ་རྣམས་དང་། ཊོ་བྷི་ཧེ་རུ་
ཀ་ཆེན་པོ། བྷི་ན་པ། ལྭ་ཝ་པ། ཨིཎྜ་བྷོ་ཏི། ཙརྱ་ས་ཏཾ་ལོ། ནཱ་རོ་པ། མར་པ། །མི་ལ། དྭགས་པོ། དུས་མཁྱེན་སོགས་ཞལ་སྦྱོར་སྙན་་བརྒྱུད་ཀྱི་བླ་མ་རྣམས་དང་། སློབ་དཔོན་ཆེན་པོ་པདྨ་སཾ་བྷ་ཝ། ཞང་བཙུན་དར་མ་རིན་ཆེན། ཁྱུང་པོ་སྟག་ཤམ་ཅན། ཀླུ་ར་རྒྱལ་བའི་ཡེ་ཤེས། ཚིགས་བླ་ཆེན་མགོན་པོ། སྟོང་དཔོན་ཤེས་རབ་མགོན་པོ། དཔལ་ལྡན་དུས་གསུམ་མཁྱེན་པ་ལ་སོགས་པ་ཡུམ་རྐྱང་བརྒྱུད་པ་རྣམས་དང་། སློབ་དཔོན་ཨརྞ་པ། མལ་གྱོ་ལོ་ཙཱ་ཝ།་གཉལ་པ་ཉི་མ་འབར། གཉལ་པ་ཇོ་སྲས། འགྲོ་མགོན་རས་ཆེན། རིན་པོ་ཆེ་སྤོམ་བྲག་པ། ཆོས་རྗེ་ཀརྨ་པ། བླ་མ་གཉེན་རས། ཆོས་རྗེ་རང་བྱུང་རྡོ་རྗེ་ལ་སོགས་པ་རྩེ་བ་དང་བརྒྱུད་པའི་བླ་མ་དམ་པ་རྣམས་ཀྱི་བཀའ་དང་དམ་ལས་མ་འདའ་བར། དཔལ་ནག་པོ་ཆེན་པོ་ལྕམ་དྲལ་འཁོར་དང་བཅས་པ་རྣམས་ཀྱིས་བདག་སྒྲུབ་པ་པོ་འདིའི་ལུས་ངག་ཡིད་གསུམ་བྱིན་གྱིས་རླབས་པར་མཛད་དུ་གསོལ། ཞེས་བརྗོད། རྩ་སྔགས་མང་དུ་བརྗོད། དཀྱིལ་འཁོར་གཞལ་ཡས་འདིར་ཡང་བཀྲ་ཤིས། །སོགས། བཀྲ་ཤིས་བརྗོད། སྐུ་གསུང་ཐུགས་ཀྱི་དངོས་
གྲུབ་ཐོབ་པར་དམིགས་ལ་དམ་རྫ་ས་ལ་ལོངས་སྤྱོད། དེང་བདག་སྐྱེ་བ་འབྲས་བུར་བཅས། །བདག་ནི་གསོན་པའང་འབྲས་བུར་བཅས། །དེ་རིང་སངས་རྒྱས་འབྲས་བུར་བཅས། །སངས་རྒྱས་སྲས་སུ་ད་གྱུར་ཏོ། །ཞེས་གཟེངས་བསྟོད། དེང་ནས་བརྩམས་ཏེ་བདག་བྲན་དུ། །སོགས་ནས། །ཆ་ཡིས་ཀྱང་ནི་སྤྱད་དུ་གསོལ། །ཞེས་ལུས་ཕུལ། མཎྜལ་རྒྱས་པར་ཕུལ། བསྔོ་བ་སྨོན་ལམ་བྱ། གཏོར་ཚོགས་རྒྱས་པར་བྱ་བ་སོགས་རྗེས་ཀྱི་ཆོ་ག་ཅི་རིགས་པར་བྱ། དཔལ་མགོན་ནག་པོའི་དབང་རྒྱས་པར་བླང་བའི་ཆོ་གའོ། །གལ་ཏེ་གཏོར་མ་ཙམ་ལ་བརྟེན་པར་འདོད་ན། རྟེན་གཏོར་བྱིན་རླབས་ཤིང་མགོན་པོ་བསྒོམ། རྒྱུན་གཏོར་རྒྱས་པར་འབུལ། བཟླས་པ་དང་། མཆོད་བསྟོད་རྫོགས་པའི་ཚེ། མཎྜལ་འབུལ། གསོལ་བ་གདབ། སྐྱབས་སེམས་སྔོན་དུ་འགྲོ་བས། ཏིང་ངེ་འཛིན་རྒྱས་པར་བྱས་ཏེ། ཡེ་ཤེས་ཕེབས་ལ། སླར་ཡང་མཎྜལ་གསོལ་བཏབ་བྱས་ནས། དབང་དགུ་པོ་གང་རུང་རེའམ་གསུམ་ཚན་ནམ། དགུ་ཆར་བྱིན་ཞིང་གཏོར་མ་མགོར་བཀོད་དེ། བཀའ་བསྒོ་བཟླས་ལུང་བྱིན་ཏེ། གཏོར་མ་ཕུལ་བའི་ལྷག་མ་དངོས་གྲུབ་ཏུ་ལོངས་སྤྱོད། དེ་ལྟར་དབང་སོ་སོར་དགུ་དང་དགུ་པོ་རྫོགས་པ་དང་བཅུ། དེའི་སྟེང་དུ་དབང་བཞི་རྫོགས་པའི་མཆོག་དབང་སྟེ་བཅུ་གཅིག་གོ །ད་ལྟ་ནི་གཏོར་དབང་ཆུང་ངུའི་ཙམ་ལས་གཞན་སྦས་ཏེ་མི་སྣང་བར་མཛད་པ་ཡིན་ནོ། །འདི་དག་ནི་རྗེ་མར་པའི་མན་
ངག་དང་འགྲོ་མགོན་རས་ཆེན་གྱི་དབང་ཆོག་ཆེན་མོ་ལས་བསྡུས་ཏེ་བླ་མའི་ཞལ་གདམས་ལྟར་བྲིས་སོ། །མ་ཧཱ་ཀ་ལའི་དབང་གི་ཚུལ། །མདོར་བསྡུས་མན་ངག་ཇི་བཞིན་བྲིས། །གཞན་ལ་མེད་པ་ངེས་པ་སྟེ། །རབ་ཏུ་་གསང་ཞིང་སྦ་བར་བྱ། །དཔལ་ལྡན་ནག་པོ་ཆེན་པོའི་དབང་གི་རིམ་པ་དཔལ་མཁའ་སྤྱོད་པས་མོས་པ་ལྟ་བུར་བྱས་ཏེ། མཚུར་ཕུར་འཇིག་རྟེན་དབང་པོ་ཞལ་གཟིགས་ཀྱི་གཙུག་ལག་ཁང་དུ་བྲིས་པའོ། །ཞེས་དང་། དགའ་སྟོན་གྱི་ཆོ་ག་ལ་སོགས་ཀྱིས་མཐའ་རྒྱན་འདི་ནི་ཅུང་ཟད་རྒྱས་པའོ། །བསྡུས་པ་ན། གཏོར་མ་གནས་ལྔར་བཀོད་པ་དང་། སྔགས་ཀྱི་རྗེས་སུ་ཟློས་པ་ཙམ་ཡང་རུང་སྟེ། དེང་སངས་ཡོངས་སུ་གྲགས་པ་ནི་དེ་ཙམ་མོ། །དབང་བཞི་བསྡུས་ཏེ་བསྐུར་བའི་ཚུལ་འདི་ནི་ཤིན་ཏུ་ཟབ་པ་སྟེ་སྦ་བར་འོས་སོ། །རིག་བསྡུས་སོགས་ཀྱི་ཆོ་ག་ནི་གཞན་དུ་ཤེས་སོ། །མ་ཧཱ་ཀཱ་ལ་ལྕམ་དྲལ་གྱི་ཞལ་གདམས་སྨིན་བྱེད་ཆོ་གའི་ཁྲིགས་བརྗོད་པ་ལ་འགལ་བ་རྣམས་བཤགས་ཤིང་། དགེ་བས་སངས་རྒྱས་ཀུན་འགྲུབ་ཤོག །མ་ཧཱ་ཀཱ་ལ་ཞལ་སྦྱོར་གྱི་དབང་གི་རིམ་པ་ཤོག་དྲིལ་ངག་ཏུ་འཐོར་བ་བཤུས་ཏེ་མཁའ་སྤྱོད་དབང་པོས་གནོད་མཛེས་མཁར་དུ་བགྱིས་པའོ། །ཞེས་རྗེ་མཁའ་སྤྱོད་དབང་པོས་མཛད་པའི་མ་ཡིག་བུ་ཡིག་གཉིས་འབྱུང་བ་བཅོས་སླད་མེད་པར། ༧ རཱ་ག་ཨ་སྱས་གབ་སྤྲད་པའི་ཡི་གེ་པ་ནི་དགེ་སློང་བརྩོན་འགྲུས་ཏེ། འཁྲུགས་བསལ་བ་དང་། འགྲེས་བཤང་བ་ཙམ་མ་གཏོགས་བཅོས་བསླད་མེད་པར་ཡིད་ཆེས་ཀྱི་གནས་སུ་བྱའོ། །མངྒ་ལཾ།། །།