བེར་གྱི་ལས་ཚོགས།
བེར་གྱི་ལས་ཚོགས་བཞུགས།
ཡབ་ཡུམ་ཞལ་སྦྱོར་གྱི་ལས་སྦྱོར་ཞི་རྒྱས་དབང་དྲག་ནི། ཆོ་ག་མཚལ་སེར་གཞུང་ལྟར་ལས། ཚར་གཅིག་གིས་བདག་མདུན་གཉིས་དང་། བུམ་པའི་ནང་དུ་དཀྱིལ་འཁོར་ཚང་བ་བསྒོམ་པ་དུས་གཅིག་ཏུ་བྱ། མདུན་བསྐྱེད་ལ་ཞི་བའི་དམིགས་པ་སྒྲུབ་པ་དུས་ལྟར་བྱ་ཞིང་། །ཁྱད་པར་ལྷ་ཚོགས་ཐམས་ཅད་སྐུ་མདོག་དཀར་པོ་ཞི་བའི་ཆ་ལུགས་ཞལ་འཛུམ་པ། ཡུམ་ལྷ་མོ་ནམ་མཁའ་ལ་གཟིགས་ནས་བཞད་པ། ཕྱག་གཡས་འོག་ལྕགས་ཀྱུ་དང་གཡོན་འོག་མས་ཚེ་བུམ་འཛིན་པ། ཡབ་ཡུམ་དར་དཀར་གྱི་བེར་ཅན་དུ་བསམ།་་འདོན་པའི་ཚིག་བསྒྱུར་མི་དགོས་མཆོད་གཏོར་
ཤ་ཁྲག་མ་འདྲེས་པ་དཀར་གསུམ་བྱ། སྔགས་ཡབ་ཡུམ་ཞལ་སྦྱོར་གསུང་གི་སྙིང་པོ་ལ། ནད་གདོན་བར་ཆད་སརྦ་ཤཱནཾ་ཀུ་རུ་སྭཱ་ཧཱ། ཞེས་པ་བརྒྱ་སྟོང་ཅི་འགྲུབ་བཟླས་ནས། ཐུན་གཏོར་ཡང་ཟླུམ་པོ་ལ། བྱང་ཕྱོགས་དུར་ཁྲོད་མ་དང་ཡེ་ཤེས་དབྱིངས་མས་འབུལ་ལོ། །བུམ་ལྷའི་སྐུ་ལས་བདུད་རྩི་འབེབས་པར་བསམ་ཞིང་རྩ་སྔགས་ལ། ཨེ་ཧོ་ཤུདྡྷེ་ཤུདྡྷེ། ཡཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། བི་ཧོ་ཤུདྡྷེ་ཤུདྡྷེ། ལཾ་ཧོ་ཤུདྡྷེ་ཤུདྡྷེ། །ཨེ་ཡཾ་རཾ་བཾ་ལཾ་ཤུདྡྷེ་ཤུདྡྷེ་ཨ་ཨ་སྭཱ་ཧཱ། བརྒྱ་རྩ་བརྒྱད་ལས་མི་ཉུང་བར་བཟླས་སོ། །བུམ་ལྷ་ཡེ་ཤེས་པ་མདུན་བསྐྱེད་ལ་ཐིམ་པར་
བསྒོམ༔ དམ་ཚིག་པ་འོད་དུ་ཞུ་ནས་བདུད་རྩིར་བསམས་ལ། ནད་པ་ལ་ཁྲུས་དང་འཐུང་པ་སོགས་བྱེད་དུ་བཅུག །རང་ཡང་འཐུང་བཀྲུ་སོགས་བྱ། སྦྲ་ཁྱིམ་ནོར་ཕྱུགས་ལ་གཏོར་བས་ནད་གདོན་གྲིབ་དང་བར་ཆད་ཞི་བའོ། ༈ །གཏོར་མ་རིན་ཆེན་འབར་བའི་དབྱིབས་ལ་འབྲུ་སྣ་རིན་པོ་ཆེ་སྣ་ཚོགས་དར་ཚོན་ས་ཕུད་སྣ་ཚོགས་བྱུགས་ལ་མགོན་པོའི་གཞུང་ལྟར་ལ། བདག་མདུན་ལྷ་ཚོགས་ཐམས་ཅད་སྐུ་མདོག་སེར་པོ་བེར་སེར་པོ་རིན་པོ་ཆེའི་རྒྱན་ཐམས་ཅད་ཀྱིས་བཀླུབས་པ། ཞལ་ཁྲོ་འཛུམ་སྐུ་ཤ་རྒྱས་པ་གནོད་སྦྱིན་གྱི་ཆ་ལུགས་ལྟར་བསྒོམ། བསྙེན་དུས་རྒྱས་པའི་དམིགས་པ་ལྟར་ལས། རྩ་སྔགས་ལ། བདག་ལ་རཏྣ་སིདྡྷི་སིདྡྷི་ཧཱུྃ། ཞེས་བསྙེན། གསོལ་ཁ་ཚར་ཅི་མང་འདོན། ཁྱད་པར་མདུན་བསྐྱེད་ཀྱི་བེར་གྱི་སུལ་ནས་རིན་པོ་ཆེ་དང་དགོས་འདོད་ཐམས་ཅད་ཀྱི་ཆར་བབས་ནས་བདག་ཉིད་ཀྱི་སྦྲ་ཁྱིམ་གང་བར་བསྒོམས་པས་ལོངས་སྤྱོད་འཕེལ་ལོ། །ཁྱད་པར་རྟ་གོད་གཅོད་ན། བདག་མདུན་གཙོ་བོའི་ཐུགས་ཀ་ནས་འོད་ཟེར་འཕྲོས་པས་བདག་མདུན་གཉིས་ཀྱི་ཤར་གྱི་མགོན་པོ་ལ་ཕོག་པས་དཔལ་རབ་འཆང་བའི་ཐུགས་ཀ་ནས་ཉི་མའི་སྲས་པོ་ཨརྱ་རེ་མན་ཏ་སྐུ་མདོག་
དམར་པོ་བསེ་ཁྲབ་ཤེལ་རྨོག་ཅན། རྟ་སྔོན་ཞོན་པ་ཕྱག་གཡས་གསེར་གྱི་རལ་གྲིས་རྟ་གདོན་ཐམས་ཅད་དམྱལ་དམྱལ་གཏུབས་པ། གཡོན་ལྕགས་ཀྱུས་རྟའི་གཡང་སྡུད་པ། ནམ་མཁའ་བར་སྣང་གང་བར་འཕྲོས། རྟ་ལ་གནོད་བྱེད་ཐམས་ཅད་བསད། རྒྱ་མཚོའི་ཕར་འགྲམ་དུ་བསྐྱོད་ནས་ཚུར་འདུས་རྒྱུན་དུ་རྟེ་ཐམས་ཅད་ལ་བསྐོར་ཞིང་སྲུང་བའི་རྟ་ལ་ཐིམ་པར་བསྒོམས་ཤིང་། མ་མགོན་གྱི་གསུང་གི་སྙིང་པོ་ལ། ཨོཾ་བཛྲ་ཀྲོ་དྷ་ཨརྱ་རེ་མན་ཏ་ཧ་ན་ཧ་ན་ཧཱུཾ་ཕཊ། ཅེས་བཟླས་པ་བརྒྱ་སྟོང་ཅི་འགྲུབ་བྱ། །སྲུང་སྐུད་སྔགས་ལ་བཏགས་། དམིགས་པ་བསྒོམ་ཞིང་གསོལ་ཁ་ཚར་གསུམ་བདུན་ལ་སོགས་བཏང་བས་རྟ་གོད་ཆད། རྟ་འཕེལ་ལོ། །རེ་མནྟ་ཤར་གྱི་མགོན་པོ་གཅིག་ཡིན་ནོ། ༈ །དེ་བཞིན་ནོར་ལུག་གི་གོད་ཁ་གཅོད་འདོད་ན། ནུབ་བྱང་གི་མགོན་པོ་ལས་འོད་ཟེར་འཕྲོས་པས་རང་འདྲ་གྲངས་མེད་པ་འཕྲོས་པས་གོད་འདྲེ་ཐམས་ཅད་རྡོ་རྗེས་བརྡུང་ཞིང་བསླད། ཕྱག་གཡོན་བུམ་པ་ནས་བདུད་རྩིས་རྒྱུན་བབ་ཁྲུས་བྱས་པས་ནད་བཀྲུས་པར་བསྒོམ་ཞིང་གསོལ་ཀ་མ་མགོན་རྩ་སྔགས་ལ་འདི་བཏགས། ཨོ་པཎ་ཤ་ཝ་རི་སྭཱ་ཧཱ། བ་སུ་རོ་ག་རཀྟ༔ ཞེས་ཅི་ནུས་
བཟླས། བུམ་པ་ཡང་སྔར་ལྟར་བསྒོམ་ཞིང་བུམ་ཆུ་གཏོར། དེས་སྒབ་སྤེལ་ལོ། །གོད་ཉུང་ངོ་། དེ་བཞིན་དུ་ཤར་ལྷོའི་མགོན་པོ་ལས་དེ་འདྲ་གྲངས་མེད་པ་འཕྲོས་པས་འཇིག་རྟེན་གྱི་ཚེ་བསོད་བསྡུས་ཏེ་སྦྲ་གུར་ནོར་ཕྱུགས་ལ་བསྟིམ་པས་གཡང་ཆགས། ཕྱྭ་གཡང་ཐམས་ཅད་ནོར་ཕྱུགས་དང་སྦྲ་གུར་ལ་བསྟིམ་ཞིང་རྩ་སྔགས་ལ། ཨོ་ཛཾ་བྷ་ལ་ཛ་ལན་ཏྲ་ཡ་པུཎྱེ་པུཊྚི་ཀུ་རུ་ཡེ་སྭཱ་ཧཱ། ཞེས་ཅི་ནུས་བཟླས་པས་བསོད་ནམས་དབང་ཐང་ཡར་དར་བ་འོང་ངོ་། །དབང་དང་དྲག་པོ་ལ་སོགས་ལོགས་སུ་གསལ་ལོ། །ཡང་རི་ཁྲོད་སོགས་སུ་འཚོ་བ་སྲབ་པར་བྱུང་ན་གང་འདོད་པའི་ཟས་ཇ་མར་ཐུད་སོགས་ཅི་མང་གིས་གསོལ་ཁའི་གཏོར་མ་གསོ། བཟའ་བཏུང་རུང་བའི་དངོས་པོ་གང་ཡོད་བྲན་ལ་གསོལ་ཁ་བྱ། ཡབ་ཡུམ་རྩ་སྔགས་ལ།་ན་ན་ཁ་དྷེ་པུཏྟིཾ་ཀུ་རུ་ཡེ་སྭཱ་ཧཱ། ཞེས་བཟླས་པས་ཁ་ཟས་ཤུགས་ཀྱིས་འབྱུང་བས་ཟབ་བོ། །དེ་ཐམས་ཅད་གསོལ་ཁ་ལ་བུངས་ལེན་ནོ། །ཨྠྀི། །ཞེས་པ་འདི་ནི་གྲུབ་ཆེན་ཀརྨ་པཀྵིའི་བཞེད་པ་སོར་བཞག་རས་ཆེན་དང་དུས་མཁྱེན་ལུགས་དང་མ་འདྲེས་པར་བསྐྱེད་རྫོགས་ཆ་ཚང་གསལ་བར་བཀོད་པ་ལ། སྦ་འོས་གསལ་བཀོད་ཉེས་པ་མཆིས་ན་མ་མགོན་ཚོགས་ལ་
བཤགས་ཤིང་། དགེ་བས་བསྟན་པ་དང་བསྟན་འཛིན་རྣམ་ལ་ཕན་པ་རྒྱ་ཆེན་པོར་གྱུར་ཅིག །ཅེས་སྔགས་འཆང་རཱ་ག་ཨ་སྱས་སོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།