མ་མགོན་ལྕམ་དྲལ་གྱི་ནོར་སྒྲུབ་རིན་ཆེན་བསམ་འཕེལ།
མ་མགོན་ལྕམ་དྲལ་གྱི་ནོར་སྒྲུབ་རིན་ཆེན་བསམ་འཕེལ་ཞེས་བྱ་བ་བི་ཛ་ཧ་ར།
ན་མོ་གུ་རུ་རཏྣ་མ་ཧཱ་ཀཱ་ལ་དེ་ཝི་ཡེ། གསོལ་བ་གང་བཏབ་འབྱུང་བའི་རིན་པོ་ཆེ། །བླ་མ་ཡི་དམ་མགོན་པོ་ནོར་ལྷ་རྣམས། དབྱེར་མེད་གཅིག་བསྡུས་ཀརྨ་པ་ལ་འདུད། །མགོན་པོ་ཡབ་རྐྱང་ནོར་སྒྲུབ་རྒྱས་བསྡུས་གཉིས། །ཞལ་སྦྱོར་དངོས་གྲུབ་ལེན་ཆོག་དང་ནི་གསུམ། །གབ་སྤྱད་ཉམས་སུ་ལེན་པར་བྱ་བའི་ཐབས། །རིན་ཆེན་སྣོད་ནི་ཆེ་ཆུང་གཉིས་ཀྱི་ནང་། །གཏོར་མ་རིན་ཆེན་འབར་བ་གཅིག་ལ་ནི། །དེ་འདྲ་དེ་བས་ཆུང་བ་བཅུ་ཡིས་བསྐོར། །ཆུང་བའི་རྩེ་དེར་ཞལ་སྦྱོར་ཙཀླི་བཙུགས། །མེད་ན་མར་རྒྱན་ཧཱུྃ་ནག་བྷོ་སྔོན་བྲི། །གཞི་གཙང་སྟེང་དུ་ནས་ཀྱི་པདྨ་
ནི། །འདབ་བཅུའི་དབུས་སུ་མཉྫིའི་སྟེང་དུ་བཞག །རྩེ་ལ་དར་གདུགས་སེར་པོ་བཙུག་པར་བྱ། །དེ་ཉིད་དང་པོ་བྲན་ནས་གསོ་མི་དགོས། །དེ་མདུན་གཏོར་མ་ཆེ་བ་བཞག་པའི་ནང་། །འབྲུ་སྣ་ཟས་ཕུད་ཤིང་ཏོག་གང་རྙེད་བླུག །གཡས་སུ་བདུད་རྩི་གཡོན་དུ་རཀྟ་དང་། །མཐའ་སྐོར་མཆོད་པ་སྣ་བདུན་བསྐོར་བཤམ་བྱ། །ཡོད་ན་མ་མགོན་གཉིས་ཀྱི་ཞལ་ཐང་དང་། །མདའ་དར་སེར་པོ་ཡང་ནི་བཤམ་པར་བྱ། །ཐུན་གཏོར་ནོར་བུའི་དབྱིབས་ཅན་འབུལ་རྒྱུ་དང་། །ཕུགས་གཏོར་ཚོགས་སོགས་སྤྱི་དང་མཐུན་པར་བཤམས། །བདུད་རྩི་བྱིན་རླབས་སྔོན་འགྲོ་གཏོར་མ་
ནས། །ཕག་མོའི་བདག་བསྐྱེད་རྫོགས་པར་བྱས་ནས་བསྡུས། །དེ་ནས་མགོན་པོ་མཚལ་སེར་གང་རིགས་ཀྱི། །མངོན་རྟོགས་ཚར་གཅིག་བཏོན་པ་དེ་ཉིད་ཀྱི། །བདག་མདུན་དུས་གཅིག་སོ་སོར་དམིགས་པ་སྒོམ། །དེ་ནི་པཀྵིའི་དགོངས་པ་འཁྲུལ་མེད་དེ། །རྙིང་མའི་ལུགས་ཡིན་མི་འཐད་མི་དགོངས་འཚལ། །དེ་ནས་སྤྱན་འདྲེན་མཆོད་བསྟོད་བསྙེན་པའི་བར། །མཚལ་སེར་གང་བྱེད་གཞུང་ལྟར་བཏོན་པའི་རྗེས། །བདག་མདུན་མགོན་པོ་གཉིས་ཀྱི་ཐུགས་ཀ་རུ། །ནོར་བུ་རིན་ཆེན་འོད་དུ་འབར་བའི་ནང་། །ཟླ་སྟེང་ཧཱུྃ་ཡིག་མཐིང་ནག་མཐའ་མ་ལ། །ཨོཾ་ཤྲཱི་མ་ཧཱ་ཀཱ་ལ་ཡ་ཧཱུྃ། བདག་ལ་རཏྣ་སིདྡྷི་སྭཱ་ཧཱ། ཞེས་པའི་སྔགས་ཕྲེང་གཡས་སུ་འཁོར་བ་དང་། །ལྷ་མོའི་ཐུགས་ཀར་ཉི་སྟེང་ཧཱུཾ་སྔོན་མཐར། །ཨོཾ་མ་ཧཱ་ཀཱ་ལི་དེ་ཝི་ཡེ་ཧཱུྃ། བདག་ལ་རཏྣ་སིདྡྷི་སྭཱ་ཧཱ། ཞེས་པའི་སྔགས་ཕྲེང་གཡོན་དུ་འཁོར་བ་སྟེ། །ཁྱད་པར་བདག་བསྐྱེད་ཐུགས་ཀའི་ནོར་བུའི་རྩེར། །ཡི་དམ་དམ་ནི་ལེགས་ལྡན་ཚོན་གང་སྒོམ། །བདག་མདུན་མ་མགོན་ནག་པོ་བཅུ་དྲུག་གིས། །དར་ནག་བེར་དང་རིན་ཆེན་སྣ་ཚོགས་ཀྱིས། །དྲྭ་བ་དྲྭ་ཕྱེད་བྲོབ་བེར་ཡོད་པར་བསྒོམ། །གཙོ་འཁོར་ཀུན་ལ་ནོར་བུའི་
དབུ་རྒྱན་དང་། །དར་དང་རིན་ཆེན་སྣ་ཚོགས་རྒྱན་གྱིས་བཀླུབ། །ཁྱད་པར་ཤར་ལྷོའི་མགོན་པོའི་འཁོར་དུ་ནི། །ནོར་ལྷ་མཆེད་བརྒྱད་རྟ་སྔོན་ཆིབས་པས་བསྐོར། །བྱང་གི་མགོན་པོའི་འཁོར་དུ་གནོད་སྦྱིན་ཚོགས། །ནོར་ལྷ་བྱེ་བ་བདུན་འབུམ་བསྐོར་བར་དམིགས། །དེ་ནས་སེམས་བསྐྱེད་ཡིད་ལ་བསམ་བྱ་སྟེ། །འགྲོ་བ་ཀུན་གྱི་དབུལ་ཕོངས་སྡུག་བསྔལ་བསལ། །བདག་ཀྱང་སྦྱིན་པའི་ཕ་རོལ་ཕྱིན་རྫོགས་ཕྱིར། །འདི་ཉིད་སྒྲུབ་སྙམ་ཁ་ཞེ་མེད་པར་བྱ། །རང་དོན་བསམ་ན་འགྲུབ་པར་མི་འགྱུར་རོ། །དེ་ནས་བདག་མདུན་གཙོ་བོའི་འོད་ཟེར་གྱིས། །གཙོ་འཁོར་ཀུན་ཁྱབ་བཀྲག་དང་གཟི་མདངས་རྒྱས། །གཙོ་འཁོར་ཀུན་ལས་འོད་ཟེར་ཕྱོགས་བཅུར་འཕྲོས། །རང་རང་གནས་དང་ཁྱད་པར་བྱང་གི་ཕྱོགས། །ལྕང་ལོ་ཅན་གྱི་ཕོ་བྲང་དམ་པ་ནས། །རྣམ་སྲས་འཛམ་ལྷ་ནོར་ལྷ་མཆེད་བརྒྱད་དང་། །གནོད་སྦྱིན་བྱེ་བ་བདུན་དང་འཁོར་ཚོགས་བྱོན། །ཉི་མའི་དཀྱིལ་ནས་དཔལ་རབ་འཆང་བ་དང་། །ཨོ་རྒྱན་བྲག་རིའི་རྩེ་ནས་ཤ་བ་རི། །དཔག་མེད་བྱོན་ནས་རང་རང་སྐུ་ལ་ཐིམ། །དེ་ལྟར་བསྒོམ་ཞིང་དེ་ཝ་རཀྟའི་སྔགས། །བརྒྱའམ་ཡང་ན་ཉེར་གཅིག་ཙམ་ཞིག་
བཟླས། །དེ་ནས་བདག་མདུན་གཙོ་བོའི་འོད་ཟེར་གྱིས། །ནུབ་བྱང་མཚམས་ཀྱི་མགོན་པོ་ལ་ཕོག་པས། །དེ་ལས་རང་འདྲའི་སྤྲུལ་པ་གྲངས་མེད་འཕྲོས། །གོད་འདྲེ་བསེ་རག་ཐམས་ཅད་བསྐྲད་པར་བསྒོམ། །གཞུང་གི་ཧེད་ནིས་སྔགས་ཀྱི་མཇུག་དེ་རུ། །གནོད་བྱེད་གོད་འདྲེའི་ཙིཏྟ་བཾ་ཙིཏྟ་སྲིད། །ཅེས་པ་བརྒྱའམ་ཉེར་གཅིག་ཆོག་པ་སྟེ། །གོད་ཁ་ཆེ་ན་དེ་ཉིད་ཅི་མང་བཟླས། །སླར་ཡང་བདག་མདུན་གཙོ་བོའི་འོད་ཟེར་གྱིས། །འཁོར་རྣམས་ཀུན་གྱི་སྲོག་སྙིང་བཅུད་བསྡུས་ཏེ། །བདག་ལ་ཐིམ་པས་ནོར་གྱི་དངོས་གྲུབ་ཐོབ། །འཁོར་རྣམས་ཀུན་ལས་སྤྲུལ་པའི་ཕོ་ཉ་ནི། །རང་འདྲ་དཔག་མེད་འཇིག་རྟེན་ཁྱབ་པར་འཕྲོས། །ཁམས་གསུམ་རིགས་དྲུག་སེམས་ཅན་ཐམས་ཅད་ཀྱི། །བཅུད་དང་དངོས་གྲུབ་འོད་ཟེར་གསེར་མདོག་གི །རྣམ་པར་བསྡུས་ནས་བདག་ལ་སིབ་སིབ་ཐིམ། །ཆོས་སྐྱོང་སྤྱི་ཡི་གཏོར་མའི་ལས་རྒྱུད་ལས། །ཤཱ་ས་ན་འདི་ཆོས་སྐྱོང་སྤྱི་ཡི་སྔགས། །ཕྲིན་ལས་གང་འདོད་འདི་ཡིས་འགྲུབ་གསུངས་པས། །ཤཱ་ས་ན་ལ་བརྒྱའམ་ཉེར་གཅིག་བཟླས། །དེ་མིན་འདི་ཡི་བསྙེན་པ་ཡིན་པ་སྟེ། །དེ་ནས་འདི་ཡི་དངོས་གྲུབ་ལེན་ཆོག་འདོན། །བདག་དང་མདུན་
བསྐྱེད་མ་མགོན་ཡབ་ཡུམ་དང་། །ནག་པོ་བཅུ་དྲུག་ཀུན་གྱི་བེར་ནག་ལ། །གསེར་གྱི་གཡུང་དྲུང་རིས་ལྡན་དགུ་བརྩེགས་ཀྱི། །སུལ་ནས་རིན་ཆེན་སྣ་ཚོགས་ཆར་ཆེན་འབེབས། །འགྲོ་བ་ཀུན་གྱི་དབུལ་ཕོངས་ཞི་བར་བྱས། །ཁྱད་པར་རང་གི་གནས་དང་ཁང་ཁྱིམ་སོགས། །ནོར་བུའི་ཚོགས་ཀྱིས་ཕྱུར་བུར་གང་བ་ཡི། །གང་འདོད་དངོས་གྲུབ་ལྷུན་གྱིས་གྲུབ་པར་བསྒོམ། །དངོས་གྲུབ་ལེན་སྔགས་སྔགས་འབྲུ་ཉེར་གཉིས་པ། །སྟོང་ཕྲག་ཡན་ཆད་ཅི་མང་བཟླ་བར་བྱ། །དེ་ནས་ཐུན་གཏོར་དཀར་དམར་རྒྱན་ལྡན་བཤམས། །གཞུང་གི་ཐུན་གཏོར་བཀུག་གཞུག་དེ་ཡི་མཇུག །བྱད་མ་རྦོད་གཏོང་ཞེས་པ་དེ་ཡི་མཚམས། །གོད་འདྲེ་གོད་སྲི་ཞེས་པ་འཛུད་པར་བྱ། །བྱང་ཕྱོགས་དུར་ཁྲོད་མ་ཡི་བསྐུལ་རིང་དང་། །ཡེ་ཤེས་དབྱིངས་མ་གཉིས་པོ་འདོན་པར་བྱ། །འདི་གཉིས་ཕྲིན་ལས་རྣམ་བཞི་གང་འདོད་ཀྱང་། །འགྲུབ་པར་འགྱུར་ཞེས་ཀརྨ་པཀྱིས་གསུངས། །དེ་ལྟར་གཏོར་མ་ཕུལ་བའི་ལས་སྦྱོར་ཏེ། །ཐུན་གཏོར་ཕྱི་རུ་མི་འབུལ་དཀྱིལ་འཁོར་མདུན། །རིམ་པ་བཞིན་དུ་བསྒྲིགས་ནས་བཞག་པར་བྱ། །དེ་ནས་མདུན་དུ་ས་ལ་གྲུ་གསུམ་བྲི། །དེ་སྟེང་གཏོར་སྣོད་
སྦུབ་སྟེང་རྡོ་རྗེ་བཞག །ས་གཞི་ལྕགས་མཁར་གྲུ་གསུམ་མེ་འབར་ནང་། །གནོད་བྱེད་གོད་འདྲེ་བསེ་རག་མངོན་སུམ་གསལ། །གཏོར་སྣོད་སུམ་ལས་སྐྱེས་པའི་རི་རབ་སྟེང་། །རྡོ་རྗེ་ཧཱུཾ་ལས་སྣ་ཚོགས་རྡོ་རྗེས་མནན། །རིམ་དགུ་ས་ཡི་འོག་སོང་ཐལ་མེད་སྒོམ། །གཞུང་གི་རྟ་བྲོ་ཚར་གཅིག་འདོན་པའི་རྗེས། །གཏོར་སྣོད་ཡར་ཟེད་ནང་དུ་ནས་འབྲུ་བཏབ། །གང་གྱུར་ཅིག་སོགས་ཤོ་ལོ་ཀ་དེ་བརྗོད། །དེ་ནས་ཐུན་མཚམས་བྱ་བ་གང་དགོས་བསྒྲུབ། །དེ་ལྟར་སྔ་དྲོ་ཉིན་གུང་དགོང་མོ་དང་། །སྲོད་དང་ཐུན་བཞིར་ཉམས་སུ་ལེན་བྱ་སྟེ། །ཐུན་ནི་བཞི་ཀར་གསོལ་ཁ་རྒྱས་པར་དགོས། །གསོལ་ཁ་འདོན་ཚེ་གསོལ་ཁའི་དམིགས་པ་ནི། །རང་གི་ཐུགས་ལས་འོད་ཟེར་ཕྱོགས་བཅུར་འཕྲོས། །སངས་རྒྱས་བྱང་སེམས་ཀུན་གྱི་བྱིན་རླབས་དང་། །ཁྲོ་བོ་ཁྲོ་མོ་ཀུན་གྱི་མཐུ་སྟོབས་དང་། །བདུད་དང་ལྷ་འདྲེ་ཀུན་གྱི་སྟོབས་གཟི་བརྗིད། །ལྷ་ཀླུ་མི་ཡི་ཚེ་བསོད་དཔལ་འབྱོར་རྣམས། །འོད་ཟེར་ཁ་དོག་སྣ་ཚོགས་རྣམ་པ་རུ། །བསྡུས་ནས་མདུན་གྱི་གཙོ་བོ་རྣམས་ལ་བསྟིམ། །དཔེར་ན་མེ་དཔུང་ནང་ན་ཤིང་བསྣན་ལྟར། །བཀྲག་མདངས་གཟི་བརྗིད་ཀུན་ཀྱང་ཇེ་ཆེར་གྱུར། །དམིགས་པ་ལྔ་
བདུན་བཅུ་གཅིག་བར་དུ་ཝིག །ཆོས་སྐྱོང་ནུས་པ་ཉམས་པ་སོས་པར་བཤད། །དུས་ནི་ཞག་པོ་ལྔ་བདུན་དགུ་སོགས་བསྒྲུབས། །འདོན་མི་མང་ན་ཞག་པོ་ཉུང་ཡང་རུང་། །དངོས་རྟོགས་སྒྲུབ་པ་མེད་པར་ཟས་ནོར་འདུ། །མ་ཟོས་ན་ཡང་མི་ལྟོགས་དང་ཁ་མེར། །གཏོར་མ་བཀྲག་བཟང་ནང་མཆོད་ཁོལ་ལམ་འཕྱུར། །དགུན་ཁ་ཡིན་ན་ཡོན་ཆབ་ཆབ་བྲལ་འཕྱུར། །ཉམས་དང་རྨི་ལམ་ཟང་ཟིང་འདུ་འཚོགས་ཆེ། །ཚོང་པ་རྟ་ཁྱུ་ནོར་ཁྱུ་ཚུར་ལ་བྱུང་། །ལོ་ལེགས་འབྲུ་ཡི་ཕུང་པོ་མང་པོ་མཐོང་། །རྩ་ཤིང་ལྕི་ལུད་མང་པོ་སྤུང་བ་དང་། །རང་ལ་མཛེ་བྱུང་མི་རོ་བཤས་རྨིས་བཟང་། །ཚོང་དཔོན་སྐྱེས་ཕྲན་བུད་མེད་མཛེས་མ་ཡིས། །དཀར་གསུམ་རྩྭ་སྔོན་རིན་ཆེན་བྱིན་རྨིས་འགྲུབ། །ཁྲིར་འདུག་གོས་བཟང་གྱོན་རྨིས་དཔལ་འབྱོར་འཕེལ། །ཁྲོམ་འདུ་དར་ཕྱར་དུང་འབུད་སྙན་གྲགས་འབྱུང་། །རྨི་ལམ་འཁྲུལ་པ་ཡིན་པས་མི་བདེན་ཀྱང་། །རྩེ་གཅིག་སྒྲུབ་ཚེ་རྟགས་ཅན་རྨི་ལམ་ནི། །འབྲས་བུ་དངོས་སུ་འབྱུང་བར་རྒྱུད་གཞུང་གསལ། །དེ་ལྟར་མ་མགོན་ནོར་སྒྲུབ་འདི་ཉིད་ལ། །གཞུང་བྱས་སྔགས་དང་དམིགས་པའི་བསྒྱུར་ཁ་ཡི། །ལས་ཚོགས་ཕྲན་བུ་ཞོར་ལ་སྒྲུབ་
འདོད་ན། །ཐུན་གཏོར་མ་ཕུལ་བ་ཡི་གོང་དེ་རུ། ༈ །དང་པོ་རྟ་ཡི་གོད་གཅོད་བྱ་བ་ནི། །རྟ་ལྷ་དཔལ་ལྡན་ཨརྱ་རེ་མནྟ། །དཔལ་རབ་འཆང་གཉིས་དོན་གཅིག་མིང་གི་གྲངས་། །བདག་མདུན་གཙོ་བོའི་ཐུགས་ཀའི་འོད་ཟེར་གྱིས། །ཤར་གྱི་མགོན་པོ་ལ་ཕོག་དེ་ཉིད་ཀྱིས། །རང་འདྲའི་ཕོ་ཉ་འཇིག་རྟེན་ཁྱབ་པར་སྤྲོས། །རྟ་གཡང་ཀུན་བསྡུས་རང་གི་རྟ་ལ་བསྟིམ། །རྟ་ལ་གནོད་བྱེད་ཐམས་ཅད་མཐར་བསྐྱེད་ནས། །འོད་ཀུན་རྟ་ལ་ཐིམ་པས་གོད་གཅོད་སྒོམ། །མ་མགོན་གསུང་གི་སྙིང་པོའི་སྔགས་ཤམ་དུ། །ཨརྱ་རེ་མན་གྷོ་ར་ཟློར༔ ཞེས་པ་བརྒྱ་སྟོང་ཅི་འགྲུབ་བཟླ་བར་བྱ། ༈ །ནོར་ཕྱུགས་བེལ་ལུག་གོད་ཁ་གཅོད་འདོད་ན། །བདག་མདུན་གཙོ་བོའི་ཐུགས་ཀའི་འོད་ཟེར་ལས། །ནུབ་བྱང་མགོན་པོ་ལ་ཕོག་དེ་ཉིད་ལས། །རང་འདྲ་སྤྲུལ་པའི་ཕོ་ཉ་དཔག་མེད་སྤྲོས། །གོད་འདྲེ་མཐར་བསྐྲད་འོད་ཟེར་བེའུ་ལུག་ཐིམ། །གོད་ཁ་གཅོད་ཅིང་བེའུ་ལུག་ལ་ཐིམ། །གོད་ཁ་གཅོད་ཅིང་བེའུ་ལུག་བསྲུང་བར་བསྒོམ། །རྩ་སྔགས་ཤམ་བུར་འདི་ཉིད་བརྒྱ་སྟོང་བཟླས། །པཎ་ཤ་ཝ་རི་སརྦ་བཱ་སུ་རཀྵ། ༈ །རྟ་ནོར་སྒབ་ཟོས་འཕེལ་ཁ་ཆེ་འདོད་ན། །བདག་མདུན་འོད་
ཟེར་ཤར་ལྷོའི་མགོན་པོ་བསྐུལ། །རང་འདྲའི་ནོར་ལྷ་མཆེད་བརྒྱད་འཁོར་དང་བཅས། །དཔག་མེད་སྤྲུལ་ནས་འཇིག་རྟེན་ཐམས་ཅད་ཀྱི། །ཕྲུ་གཡང་དངོས་གྲུབ་ཀུན་འདུས་རང་ཉིད་དང་། །ནོར་ཕྱུགས་ལ་ཐིམ་དམིགས་ཤིང་རྩ་སྔགས་མཐོར། །ཛམྦྷ་ལ་སརྦ་བཱ་སུ་པུཊྚི་ཀུ་རུ་ཡེ་སྭཱ་ཧཱ། ༈ །ཆོས་སྲིད་དབང་ཐང་བསོད་ནམས་འཕེལ་འདོད་ན། །གཙོ་བོའི་འོད་ཀྱིས་བྱང་ཕྱོགས་མགོན་པོ་བསྐུལ། །རང་འདྲའི་གནོད་སྦྱིན་བྱེ་བ་དུང་ཕྱུར་རྣམས། །མདུང་དར་དམར་པོ་ཕྱར་ཞིང་འཇིག་རྟེན་གང་། །རང་གི་ཆོས་སྲིད་དབང་ཐང་སྤེལ་བའི་ཕྱིར། །ཕྲིན་ལས་ཤིག་ཤིག་ཡཾ་ཡཾ་བསྒྲུབ་པར་སྒོམ། །རྩ་སྔགས་ཤམ་ལ་འདི་བཏགས་ཅི་ནུས་བཟླས། །བེ་ཤ་ཝ་ཎ་ཡེ་པུཎྱ་པུཊྚི་ཀུ་རུ་ཡེ་སྭཱ་ཧཱ། ༈ །དབང་སྡུད་འདོད་ན་གཙོ་བོའི་འོད་ཟེར་གྱིས། །ཤར་གྱི་ལྷ་ཆེན་ནུབ་ཀྱི་མགོན་པོ་བསྐུལ། །དེ་ལས་འོད་ཟེར་གློག་ཞགས་ལྟ་བུ་འཕྲོས། །གང་འདོད་དབང་དུ་སྡུད་ལ་བདག་ལ་བསྟིམ། །རྩ་སྔགས་ཤམ་དུ་འདི་བཏགས་ཅི་འགྲུབ་བཟླས། །མ་ཧཱ་དེ་ཝ་སརྦ་ལོ་ཀ་པཱ་ལ་པ་ཤཾ་ཀུ་རུ་ཡེ་སྭཱ་ཧཱ། ༈ དེ་དག་ཐམས་ཅད་སྦྱར་རམ་གང་འདོད་རུང་། །དེ་ལྟར་སྔགས་དམིགས་
ཐམས་ཅད་བསྒྲུབ་པར་བརྩི། །དེ་བཞིན་སྒྲུབ་པ་མ་རྫོགས་བར་དུ་ནི། །རྗེས་ཆོག་མི་བྱ་མདུན་བསྐྱེད་མི་གཤེགས་བཞུགས། །བདག་བསྐྱེད་སྟོང་པར་བསྡུ་སོགས་མི་དགོས་ཏེ། །སྒོམ་མཁན་ངོ་བོར་བལྟས་པས་སྟོང་པ་དངོས། །དེ་ནས་སྒྲུབ་པ་གྲོལ་ཁའི་ཞོགས་པ་ལ། །དངོས་གྲུབ་ལེན་ཆོག་དེ་ཉིད་འདོན་བཞིན་དུ། །སྒྲུབ་གཏོར་རང་གི་གནས་གསུམ་དུ་གཏུགས་པས། །སྐུ་གསུང་ཐུགས་ཀྱི་དབང་དང་དངོས་གྲུབ་ཐོབ། །གཞུང་ལྟར་སྐུ་དང་སྔགས་ཕྲེང་ཕྱག་མཚན་རྣམས། །འཕྲོས་ནས་རང་གི་གནས་གསུམ་ཐིམ་པར་བསྒོམ། །མདུན་བསྐྱེད་གཏོར་མའི་ལྷ་རྣམས་ནམ་མཁར་བཏེག །གཏོར་མ་དེ་ཉིད་བྲན་ལ་མཚལ་མ་འདོན། །དེ་ནས་རྗེས་ཆོག་གཞུང་ལྟར་བྱས་ལ་གྲོལ། །གཞུང་ལྟར་བསང་བཏང་མངའ་གསོལ་བྱེད་པའི་ཚེ། །གཏོར་མའི་ཕུད་རྣམས་བསང་གི་ནང་དུ་མཆོད། །ལྷག་མ་ཕྱི་ལ་མི་འཁྱར་དངོས་གྲུབ་བཟའ། །མདའ་དར་མེད་པར་མི་བྱ་རྟེན་དུ་འཆང་། །འདི་ནི་ནོར་ལྷའི་མཆོག་གྱུར་ནོར་བུ་འདྲ། །འཛམ་གླིང་དབང་སྡུད་དངོས་གྲུབ་ཆར་ལྟར་འབེབས། །འདི་འདྲ་གཞན་ལ་མེད་ཅེས་པཀཱིས་གསུངས། །འཕགས་པའི་ས་ཐོབ་རྣམས་ནི་མ་གཏོགས་པ། །
མི་ལུས་ཐོབ་ཚད་བསམ་མནོ་འཕྲོད་ཙམ་ན། །བསྒྲུབ་རྒྱུའི་གཙོ་བོ་ཟས་ནོར་ལོངས་སྤྱོད་ལགས། །སྡིག་པ་ཀུན་དང་བསྡོམས་ནས་བསྒྲུབས་ལགས་ཀྱང་། །སྦྱིན་འབྲས་མེད་ན་མི་འགྲུབ་དབུལ་ཕོངས་དང་། །འདི་ནི་ཡིད་བཞིན་ནོར་བུ་རིན་ཆེན་ཏེ། །བསོད་ནམས་ལྡན་ན་མངའ་ཐང་དགུང་དང་མཉམ། །བསོད་ནམས་དམན་ཀྱང་འདི་ལ་འབད་པ་ན། །དབུལ་ཕོངས་སྡུག་བསྔལ་མི་འབྱུང་ལོངས་སྤྱོད་ལྡན། །སྐྱེ་བ་ཀུན་ཏུ་ལོངས་སྤྱོད་ལྡན་གྱུར་ན། །སྦྱིན་པའི་ཕར་ཕྱིན་རྫོགས་ནས་མངོན་འཚང་རྒྱ། །ཚེ་འདིར་དཔལ་འབྱོར་ལོངས་སྤྱོད་ཐམས་ཅད་ནི། །གསོད་སར་ཁྲིད་པའི་གཤེད་མའི་དགའ་སྟོན་བཞིན། །ཞེན་པ་གཏིང་ནས་ལོག་པ་མིན་ན་ནི། །རྒྱ་འགྲོ་དབུས་སྐོར་སོ་ནམ་ཁེ་སྐྱེད་སྐྱུར། །སྒྲུབ་པ་འདི་ལ་རྩེ་གཅིག་འབད་པར་རིགས། །དར་རྒྱས་མཚན་འཆོང་བདུད་མོ་བླ་མ་ཡིས། །བསྐུལ་ཕྱིར་དགེ་སློང་རཱ་ག་ཨ་སྱ་ཡི། །མགོན་པོའི་དགུ་ཆེན་དགུ་གཏོར་ཆེན་པོའི་ཉིན། །ངག་མཚནས་སྨྲས་ལྟར་བརྩོན་འགྲུས་ཞེས་བྱས་བྲིས། །ཉེས་འགལ་མཆིས་ན་ལྷ་དང་སྲུང་མར་བཤགས། །དགེ་བས་བསྟན་པ་འཛིན་པའི་སྐྱེས་བུ་རྣམས། །འཁོར་ལོས་སྒྱུར་ལྟ་བུར་འབྱོར་
ལྡན་ཤོག །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།