མགོན་པོའི་སྲུང་འཁོར་གྱི་དམིགས་རིམ་ཟབ་མོའི་མན་ངག་བསྲུང་བ་རྡོ་རྗེའི་གོ་ཁྲབ་བི་ཛ་ཧ་རཾ།
མགོན་པོའི་སྲུང་འཁོར་གྱི་དམིགས་རིམ་ཟབ་མོའི་མན་ངག་བསྲུང་བ་རྡོ་རྗེའི་གོ་ཁྲབ་བི་ཛ་ཧ་རཾ།།
ན་མོ་གུ་རུ་ཛྙཱ་ན་ནཱ་ཐ་ཡེ། ཡེ་ཤེས་མགོན་པོའི་ཚོགས་ལ་ཕྱག་འཚལ་ལོ། །མགོན་པོའི་སྲུང་འཁོར་ཟིན་བྲིས་ཅུང་ཟད་བྲི། །བཀའ་ཡི་གནང་བ་སྩོལ་ལ་བྱིན་གྱིས་རློབས། །སྲུང་འཁོར་འདི་ལ་རྒྱས་བསྡུས་མི་འདྲ་གསུམ། །བསྡུས་པ་འདི་ཉིད་སྟབས་བདེ་དོན་འདུས་ཕྱིར། །དཀོན་མཆོག་འབངས་ཀྱིས་ཚིགས་བཅད་འདོན་བདེར་མཛད། །པར་དུ་འཁོད་པ་འདི་ཉིད་འགྲོ་དོན་ཆེ། །འོན་ཀྱང་སྔགས་ལ་འཁྲུགས་དང་གབ་སྐུང་ཆེ། །དེ་དག་ཇི་བཞིན་ཞལ་ཁྲིད་མི་ལྡན་ན། །ཅི་འགྱུར་ཆ་མེད་དུག་དང་སྨན་བསྲེས་འདྲ། །ཚིག་ཉུང་དོན་མང་ཤིན་ཏུ་རྟོགས་པར་དཀའ། །
འདི་ཉིད་ཉམས་སུ་ལེན་པའི་ཐབས་བསྟན་པ། །སྒྲུབ་པའི་ལུགས་དང་རྒྱུན་ཁྱེར་རྣམ་པ་གཉིས། །སྒྲུབ་ན་མགོན་པོ་མཚལ་སེར་འདོན་པའི་ཆས། །གཏོར་མ་མཆོད་པ་ཐམས་ཅད་གཞུང་ལྟར་བཅའ། །སྲུང་འཁོར་ཁོ་ན་མ་རྟོགས་མི་འདོན་ན། །ཐུན་བཞིར་དམར་གཏོར་འབུལ་རྒྱུ་བཅའ་བས་འཐུས། །རྒྱས་པར་དང་པོ་ཕག་མོ་ལ་སོགས་པ། །རང་གི་ཡི་དམ་གང་ཡིན་བདག་བསྐྱེད་འདོན། །དེ་ནས་ཐུན་བསྡུ་སྟོང་པར་བྱས་པའི་རྗེས། །སྲུང་འཁོར་འདི་ཉིད་གཞུང་ལྟར་འདོན་བསྒོམ་སྦྲག །འདི་ལ་བསྙེན་པ་ལས་ཚོགས་གསུམ་ཀ་ཚང་། །དང་པོ་བསྙེན་པའི་སྔགས་
གསུམ་སྦྲེལ་བ་ནི། །ཕྲལ་ནས་སྔགས་དང་དམིགས་པ་སྦྲུགས་པ་ཟབ། །ལེགས་ལྡན་འདི་ལ་རིགས་གསུམ་ཡོད་པ་སྟེ། །ཡེ་ཤེས་ལེགས་ལྡན་སྤྱན་རས་གཟིགས་ཁྲོས་པ། །ཟ་མ་ཏོག་གི་མདོ་ལས་སྤྱན་རས་གཟིགས། །ནག་པོ་ཆེན་པོས་འདུལ་བའི་སེམས་ཅན་ལ། །ནག་པོ་ཆེན་པོའི་གཟུགས་ཀྱི་ཆོས་སྟོན་ཏེ། །ཞེས་གསུངས་དེ་བཞིན་ལེགས་ལྡན་རྒྱུད་བསྟོད་ལས། །མགོན་པོ་སྤྱན་རས་གཟིགས་ལ་ཕྱག་འཚལ་གསུངས། །ལས་ཀྱི་ལེགས་ལྡན་མ་ཊྭཱཾ་རུ་ཊ་སྟེ། །རྟ་མགྲིན་གྱིས་ནི་རུ་ཊ་བཏུལ་བའི་ཚེ། །རྣམ་ཤེས་དགེ་བསྙེན་ལེགས་ལྡན་ནག་པོར་གྱུར། །བསྐལ་པ་འདི་ཡི་སངས་རྒྱས་བསྟན་པ་སྲུངས། །མ་འོངས་ཐལ་བས་ཁེབས་པའི་འཇིག་རྟེན་དུ། །ཐལ་བའི་དབང་པོ་ཞེས་བྱར་སངས་རྒྱས་གསུངས། །འཇིག་རྟེན་ལེགས་ལྡན་ལྷ་ཆེན་བརྒྱད་ཀྱི་གྲངས། །ལེགས་ལྡན་སྨུག་ནག་ཕྱག་ན་བེང་ཆེན་བསྣམས། །གསུངས་པ་དེ་མིན་གསུམ་པོ་ཐ་དད་ཏེ། །ས་ལམ་མཐོ་དམན་ཁྱད་པར་ཡོད་ན་ཡང་། །ཡེ་ཤེས་པ་དེས་གཉིས་པོ་བྱིན་བརླབས་པས། །བྱིན་གྱིས་བརླབས་པའི་སྤྲུལ་པ་ཡིན་པའི་ཕྱིར། །མིང་དང་ཆ་ལུགས་ཕྲིན་ལས་གཅིག་པ་ཡིན། །དེ་ཕྱིར་མགོན་པོ་ཡོངས་ཀྱི་
སྤྱི་སྒྲུབ་དང་། །མགོན་པོ་སྐོར་གསུམ་མན་ངག་ཅེས་ཀྱང་གསུངས། །བེར་ནག་ཅན་སོགས་མགོན་ཆེན་བཞི་པོ་ཀུན། །ལས་ཀྱི་ལེགས་ལྡན་འདི་ཡི་སྲས་ཡིན་པས། །མགོན་པོ་ཡོངས་ཀྱི་ཕ་རྒན་ལེགས་ལྡན་དང་། །བེར་ནག་ཅན་ལ་སྲས་མཆོག་ནག་པོ་ཟེར། །བདུད་རྒྱལ་ཏྲཀཱད་ཕྱོགས་སྐྱོང་བཅུ་ལ་སོགས། །བདུད་རིགས་ལྷ་སྲིན་སངས་རྒྱས་བསྟན་སྲུང་ཀུན། །ཡེ་ཤེས་པ་དེས་དམ་བཏགས་བྱིན་གྱིས་བརླབས། །ཕྲིན་ལས་བསྒྲུབ་ཕྱིར་འཇིག་རྟེན་མགོན་པོ་ཟེར། །ཆ་ལུགས་མ་ངེས་ཕལ་ཆེར་གཙོ་དང་མཚུངས། །སྔགས་དང་དམིགས་པ་ཁྱད་པར་ཆེ་བ་ཡི། །རང་ཉིད་ལེགས་ལྡན་ཐུགས་ཀར་པད་ཉིའི་སྟེང་། །ཧཱུྃ་ཡིག་མཐིང་ནག་མེ་དཔུང་འབར་བའི་མཐར། །སྔགས་གསུམ་སྦྲེལ་མ་གཡས་སུ་འཁོར་བ་ལས། །འོད་ཟེར་སྨུག་ནག་སངས་རྒྱས་ཞིང་ཀུན་ཁྱབ། །སྤྱན་རས་གཟིགས་སོགས་དུས་གསུམ་སངས་རྒྱས་དང་། །སེམས་དཔའ་བླ་མ་ཡི་དམ་མཁའ་འགྲོ་མཆོད། །ཐམས་ཅད་ཐུགས་མཉེས་ལེགས་ལྡན་སྐུར་གྱུར་ཏེ། །ཆར་བཞིན་བབས་ནས་རང་ལ་ཐིམ་བསྒོམ་ཞིང་། །དང་པོ་ཡིག་འབྲུ་བཅུ་པ་བརྒྱ་སྟོང་དང་། །སླར་ཡང་འོད་འཕྲོས་ཕྱོགས་བཅུའི་ཞིང་
བཞུགས་པའི། །ཁྲོ་བོ་ཁྲོ་མོ་དཔའ་བོ་མཁའ་འགྲོ་དང་། །ལས་ཀྱི་མགོན་པོ་ཀུན་ལ་འོད་དེས་མཆོད། །ཐམས་ཅད་མགོན་པོ་ལེགས་ལྡན་སྐུར་གྱུར་ནས། །བུ་ཡུག་འཚུབ་བཞིན་བྱོན་ནས་བདག་ལ་ཐིམ། །མཐུ་སྟོབས་ནུས་པ་ཇེ་ཆེར་འབར་བསྒོམ་ཞིང་། །སྔགས་འབྲུ་བཅུ་དྲུག་པ་དེ་བརྒྱ་སྟོང་བཟླས། །སླར་ཡང་འོད་ཟེར་སྨུག་ནག་དཔག་མེད་པ། །འཇིག་རྟེན་ཁམས་ཀུན་ཁྱབ་པར་འཕྲོས་པ་ཡིས། །འཇིག་རྟེན་ཁམས་ཀྱི་ལྷ་སྲིན་ཐམས་ཅད་ཀྱི། །སྲོག་སྙིང་མཐུ་སྟོབས་ནུས་པ་འོད་དེས་བསྡུས། །རང་ལ་ཐིམ་པས་མཐུ་སྟོབས་ཐོགས་མེད་ཅིང་་། །ལྷ་སྲིན་ཀུན་གྱི་བཀའ་ཉན་གསུང་སྡོད་བསྒོམ། །སྭཱ་ཧཱ་འབྱོར་བའི་རྩ་སྔགས་བརྒྱ་སྟོང་བཟླས། །འདི་ཡི་སྲུང་འཁོར་འདི་ཡི་བསྙེན་པ་སྟེ། །ལེགས་ལྡན་སྒྲུབ་པའི་གོ་ཡང་ཆོད་པ་ཡིན། །དེ་ནས་རང་གི་ཐུགས་ཀར་ཆོས་འབྱུང་དབུས། །རང་སེམས་ཡི་དམ་གང་བསྒོམ་འདྲ་ན་ཡང་། །ཕྱག་རྡོར་སྒོམ་ན་ཤིན་ཏུ་ལེགས་པ་སྟེ། །གསར་མི་རྒྱུད་སྡེ་རྣམས་ལས་ཕྱག་རྡོར་གྱི། །དབང་ཕྱུག་ཆེན་པོ་བསྒྲལ་བའི་རྣམ་ཤེས་ནི། །འོག་ཕྱོགས་འཇིག་རྟེན་ཁམས་སུ་སངས་རྒྱས་ཤིང་། །རྣམ་ཤེས་ཆ་གཅིག་ཁོ་རང་ལུས་ལ་ཞུགས། །ཕྱག་རྡོར་
གྲོགས་བྱེད་བསྟན་པ་སྲུང་བར་བཤད། །དེ་དང་རྙིང་མའི་རུ་ཊ་དོན་གཅིག་སྟེ། །ཕྱག་ན་རྡོ་རྗེས་བྱིན་གྱིས་བརླབ་པའི་ཕྱིར། །བྱིན་རླབས་སྤྲུལ་པ་ཐུགས་རྒྱུད་གཅིག་ཏུ་གྱུར། །སྐྱེ་རྒྱུད་དབང་ཕྱུག་ཡིན་ཕྱིར་རྣོ་ལ་མྱུར། །ཙཎྜ་མ་ཧཱ་ཀཱ་ལ་ཞེས་པ་འདི། །ལས་མགོན་ལེགས་ལྡན་དེ་ཡི་སྔགས་ཡིན་ནོ། །ཐུགས་ཀར་ཕྱག་རྡོར་གསལ་བའི་ཐུགས་ཀ་རུ་། །ཧཱུཾ་མཐིང་མཐའ་ལ་ཕྱག་རྡོར་སྔགས་གཡས་བསྐོར། །ཕྱག་རྡོར་ཙཎྜ་མ་ལ་བརྒྱ་སྟོང་བསྙེན། །དེ་དོན་ཡི་དམ་ལྷ་ཡི་སྙིང་པོ་ཡང་། །མང་དུ་འདོན་པར་བྱ་ཞེས་ཡིག་རྙིང་གསལ་།དེ་ནས་རང་སེམས་ཕྱག་རྡོར་དེ་ཉིད་ཀྱིས། །གཡས་སུ་བསྲུང་བྱ་ཕོ་རིགས་ཐམས་ཅད་དང་། །དེ་བཞིན་གཡོན་དུ་བསྲུང་བྱ་མོ་རིགས་དང་། །མདུན་དང་རྒྱབ་དང་མཚམས་ནི་ཐམས་ཅད་དུ། །སྦྲ་ཁང་དཀོར་ནོར་རྟ་ཕྱུགས་ཐམས་ཅད་དེ། །ཀུན་ཀྱང་ངོ་བོ་ཁོང་རྣམས་ཡིན་པ་ལ། །རྣམ་པ་ཐམས་ཅད་ཚེ་དཔག་མེད་ཀྱི་སྐུ། །སྙིང་ཁར་ཚིགས་ལ་རང་རང་མིང་ཡིག་བསྐོར། །ཡེ་ཤེས་མགོན་པོའི་ཚོགས་ནི་སྤྲིན་ལྟར་འདུ། །བསྲུང་བྱ་རྣམས་ལ་བྱིན་གྱིས་བརླབས་མཛད་ཅིང་། །ལས་ཀྱི་ལེགས་ལྡན་ཚོགས་ནི་ཆར་ལྟར་བབས། །ཕྱི་
ནང་བར་ཆད་ཐམས་ཅད་བཟློག་པར་བསྒོམ། །གོང་གི་ལེགས་ལྡན་སུམ་སྦྲེལ་སྔགས་ཀྱི་མཇུག །མ་མ་ཀ་བ་ཙི་རཀྵ་རཀྵཿ དེ་ལྟར་བསྲུང་སྔགས་དེ་ཉིད་ཡར་སྦྱར་ནས། །སྟོང་ལས་མི་ཉུང་ཅི་ནུས་འབད་དེ་བཟླས། །དེ་ནས་རྩིབས་བཅུ་ནང་གི་མགོན་པོ་སོགས། །ཀུན་གྱིས་སྲུང་སྔགས་འུར་འུར་འདོན་པར་བསྒོམ། །དེ་ནས་འཁོར་ལོ་རྩིབས་བཅུ་བསྒོམ་པ་དེ། །དཔེར་ན་སྦྱབ་ཆོལ་ཁ་སྦྱོར་ལྟ་བུ་སྟེ། །ཕྱོགས་མཚམས་རྩིབས་བརྒྱད་སྟེང་འོག་གཉིས་དང་བཅུ། །རྩིབས་ཐད་རྩིབས་ལ་མ་རེག་ཚུན་ཙམ་དུ། །སྲས་མཆོག་བཅུ་བསྒོམ་སྲུང་དུས་ཞལ་ནང་གཟིགས། །བསྡུས་པར་འཁོར་ལོ་བསྒོམ་པ་འདིས་ཆོག་སྟེ། །རྒྱས་པར་སྤྲོ་ན་འཁོར་ལོའི་ཕྱི་རོལ་དུ། །གྲི་གུག་སོ་འཐབས་གུར་དང་རྡོ་རྗེའི་གུར། །རིན་ཆེན་གུར་དང་རྒྱ་གྲམ་ཁ་གདེངས་གུར། །ཙནྡན་བེང་གི་གུར་དང་ལྔ་རིམ་རྒྱབ། །ཕྱོགས་བཅུར་ཕྱོགས་བཅུའི་མགོན་པོའི་དམག་གི་ཚོགས། །དེ་རྒྱབ་ཙནྡན་བེང་ལས་སྤྲུལ་པ་ཡི། །ལྷ་དམག་བྱེ་བ་ཕྲག་བརྒྱའི་གྲངས་ལྡན་པ། །གསེར་དངུལ་ཟངས་ལྕགས་བསེ་ཡི་ཁྲབ་རྨོག་གྱོན། །མཚོན་ཆ་སྣ་ཚོགས་ཕྱི་ལ་འཕེན་པར་བསྒོམ། །ནང་གི་འཁོར་ལོ་རྩིབས་བརྒྱད་རྩིབས་སྟེང་
ན། །རང་ལ་གནོད་པ་ཆེ་བའི་དགྲ་བགེགས་རྣམས། །རང་ལ་འཚེ་བའི་ཚུལ་དུ་འདུག་པ་སྟེ། །འཁོར་ལོ་རྩིབས་བརྒྱད་རལ་གྲི་སོ་གཉིས་ཀྱི། །རྩེ་ལྟར་རྣོ་ངར་སྤུ་གྲི་ལྟ་བུ་དེ། །གཡོན་དུ་དྲག་ཏུ་འཁོར་བས་ཕུལ་ཕུལ་གཏུབ། །རང་དང་སྲས་མཆོག་བཅུ་སོགས་འཁོར་བཅས་ཀྱི། །སྐུ་ལས་བསྐལ་པའི་མེ་དཔུང་འཚུབ་ཅིང་འབར། །གཏུབས་པའི་རོ་མ་ཐམས་ཅད་རྗེས་མེད་བསྲེགས། །མེ་དཔུང་རྒྱ་ཆེན་མཆེད་ཅིང་དྲག་ཏུ་འབར། །གནོད་བྱེད་གདོན་བགེགས་ནམ་མཁའི་ཕ་མཐར་བྲོས། །སྔགས་འབྲུ་ཉེར་གཉིས་མཱ་ར་ཡ་ཅན་དེ། །བརྒྱ་སྟོང་ལ་སོགས་ཅི་འགྲུབ་བཟླས་པར་བྱ། །རང་གི་འོག་ཕྱོགས་ལྷོ་འམ་ལྷོ་ནུབ་ཕྱོགས། །ལས་ལས་གྲུབ་པའི་ལྕགས་ཁང་གྲུ་གསུམ་ནི། །རྒྱ་ཆེ་མཐིལ་ཡངས་གཏིང་ཟབ་མུན་གླིང་ནང་། །གནོད་བྱེད་དགྲ་བགེགས་མངོན་སུམ་ལྟ་བུར་གསལ། །སྤྲུལ་པའི་མགོན་པོ་རྣམས་ཀྱིས་བཀུག་ལ་བསྟིམ། །རླུང་ཡང་མི་རྒྱུ་ཁ་ལེབ་དམ་པོར་བསྒྲིག །རང་འོག་མགོན་པོའི་གདན་ལས་སྤྲོས་པ་ཡི། །གནམ་ལྕགས་རྡོ་རྗེ་རྒྱ་གྲམ་རི་ལས་བརྗིད། །དེ་ཉིད་དེ་ཡི་སྟེང་དུ་བཞག་ཙམ་གྱིས། །རིམ་དགུ་ས་ཡི་འོག་ཏུ་ཏལ་གྱིས་སོང་། །རཀྟ་ཅན་
གྱི་སྔགས་དེ་མི་སྦྱར་བ། །སྟམ་བྷ་ཡ་ནན་ཟེར་བའི་སྔགས་བར་པ། །དམིགས་པ་དེ་ཉིད་བསྒོམ་ཞིང་སྔགས་དེ་བཟླས། དེ་ནས་དམར་གཏོར་ཤ་ཁྲག་བརྒྱན་པ་བཤམས། མགོན་པོའི་གཞུང་གི་བཀུག་གཞུག་བསྡུས་པར་བྱས། །སྤྲུལ་པའི་མགོན་པོ་དཔག་ཏུ་མེད་པ་འཕྲོས། །གནོད་བྱེད་རིང་དབང་མེད་པར་བཀུག་ལ་བསྟིམ། །འཁོར་ཚོགས་རྣམས་ཀྱིས་མཚོན་ཆའི་ཆར་ཕབ་བསྒྲལ། །ཁོ་ཡི་རྣམ་ཤེས་ཨ་ཡིག་དཀར་པོ་དེ། །འོག་ཕྱོགས་ཐལ་བས་ཁེབས་པའི་ཞིང་དུ་འཕང་། །རྡོ་རྗེ་འཆང་ནི་ཚོན་གང་ཙམ་དུ་གྱུར། །ཁོ་ཡི་ཚེ་དང་བསོད་ནམས་ལྷག་མ་ཀུན། །ནཾ་ཡིག་ལྗང་གུར་གྱུར་ནས་བདག་ལ་ཐིམ། །སྤྲུལ་པའི་ལས་མཁན་དཔག་ཏུ་མེད་པ་ཡིས། །ཁོ་ཡི་ཤ་ཁྲག་རུས་པ་དོན་སྙིང་རྣམས། གྲི་གུག་གིས་དཀྲུགས་གཡོན་པའི་ཐོད་པར་བཅུག །གཏོར་མ་དེ་དང་དབྱེར་མེད་ལྷ་ཀུན་མཆོད། །ཀུན་གྱིས་ཧབ་ཧབ་ཆེམ་ཆེམ་གསོལ་བར་བསྒོམ། །ཁཱ་ཧི་ཞེས་པའི་སྔགས་དེ་བརྒྱ་སྟོང་བཟླས། །བྱང་ཕྱོགས་དུར་ཁྲོད་མ་ཡི་བསྐུལ་རིང་འདོན། །དྲག་སྔགས་བཀའ་བབས་བེ་རོ་ཙ་ན་ཡིས། །ལེགས་ལྡན་མེ་ལྕེ་ཕྲེང་བའི་རྒྱུད་ཀྱི་དོན། སྔ་འགྱུར་མགོན་པོ་ཚོགས་བདག་ཞེས་གྲགས་
པ། །དེ་ཡི་དགྲ་ཆོས་པོ་ཏི་ཆེན་པོ་གཅིག །ཤིན་ཏུ་རྣོ་མྱུར་དྲག་སྔགས་ཐོག་འདྲ་བ། །དེང་སངས་ཀཿཐོག་ཕྱོགས་སུ་གྲགས་ཆེ་བ། །དེ་ཡི་དོན་བསྡུས་གྲུབ་ཆེན་པཀྴི་ཡིས། །བྱང་ཕྱོགས་དུར་ཁྲོད་མ་ཡི་བསྐུལ་འདི་མཛད། །ཡེ་ཤེས་འཇིག་རྟེན་མགོན་པོ་འཁོར་བཅས་ཀྱི། །བསྐུལ་རིང་འདི་ལ་གཏོར་མ་ཆེན་པོ་འབུལ། །དུས་གསུམ་ལྷ་ཆ་དཀྲོལ་ཞིང་འདོན་བྱས་ནས། །ཕྲིན་ལས་བཞི་འགྲུབ་དགྲ་འདྲེ་ཐམས་ཅད་ཐུབ། །མཐུ་ཡང་གཞན་ནས་སྒྲུབ་ནི་མི་དགོས་ཏེ། །གཏོར་ཟོར་ཁོ་ན་འཕེན་པ་ཆོག་པར་གསུངས། །ཡེ་ཤེས་དབྱིངས་མ་སྦྱར་རུང་མ་སྦྱར་རུང་། །དེ་ནས་ལས་ཀྱི་རྡོ་རྗེས་གཏོར་མ་བཏེག །མེད་ན་ཅུང་ཞིག་ཕྱིར་ལ་སྣུད་ནས་བཞག །ནུབ་མོ་ཡིན་ན་དཔལ་འབར་བཙུགས་བྱས་ལ། །རྡོ་རྗེ་གར་གྱི་བཀའ་ཟློག་མ་དེ་གྱེར། །ཕྱོགས་བ་གཙང་དམིགས་པའི་ཕྱོགས་གཉིས་འགྲིགས་གྱུར་ན། །གཏོར་མ་རང་གིས་ཁྱེར་ཏེ་ཟོར་དུ་འཕང་། །ཡང་ན་གནོད་པའི་ཕྱོགས་སུ་འབུལ་རྒྱུ་བསྐུལ། །བདག་བསྐྱེད་མ་གཏོགས་འཁོར་དང་ཡང་འཁོར་བཅས། །དམག་དཔོན་ལེགས་ལྡན་ཉིད་ཀྱིས་བྱས་ནས་ཀྱང་། །གནོད་པའི་གདོན་བགེགས་ལོག་འདྲེན་ཐམས་ཅད་
ཀུན། །རང་དབང་མེད་པར་བཙོན་དུ་ཁྱེར་ནས་ཀྱང་། །རི་རབ་རྩེ་ཡི་བྱང་ཕྱོགས་རྩུབ་འགྱུར་ཚལ། །བྲག་སྟེང་གྲུ་གསུམ་གནས་དེར་གཤེགས་པར་བསྒོམ། །དེ་ནི་བགེགས་ལ་དམིགས་པའི་ལུགས་ཡིན་ཏེ། །དམག་ཚོགས་འཁོར་བཅས་དགྲ་ཡི་ཡུལ་སོང་ནས། །ཤ་ཟ་ཁྲག་འཐུང་བྱེད་དམིགས་དགྲ་ལ་ཡིན། །དེ་ནས་བདག་བསྐྱེད་མཐའ་ནས་དབུས་སུ་ཡལ། །དབུས་ཀྱི་རང་ཉིད་ལེགས་ལྡན་གནས་གྱུར་ནས། །དྲང་སྲོང་ལོཀྟི་པ་ལ་སྐུ་མདོག་མཐིང་། །ཞལ་གཅིག་ཕྱག་བཞི་ཁྲོ་བོས་ཆས་ཀུན་རྫོགས། །དང་པོའི་ཕྱག་གཉིས་ཉི་མ་ཟླ་བ་ཕྱིར། །འོག་གཉིས་ཐོ་བ་དང་ནི་ཞགས་པ་འཛིན། །དྲན་རྫོགས་དམ་ཡེ་དབྱེར་མེད་ཐུགས་སྲོག་ཧཱུྃ། །དེ་ལྟར་བསྒོམས་ལ་ལོཀྟི་པ་ལའི་སྔགས། །བདུན་ནམ་ཉེར་གཅིག་བརྒྱ་སྟོང་སྐབས་དང་བསྟུན། །བཀའ་ལ་མི་ཉན་དམ་ལ་མི་གནས་པའི། །གདོན་བགེགས་དམ་སྲི་མགོ་གཡོག་མགོ་བསྐོར་མཁན། །ཕ་རོལ་བྱད་མ་ཆོད་གཏོང་ལྷ་དང་བཅས། །སྐུ་ཡི་འོད་ཀྱིས་རང་དབང་མེད་པར་བསྡུས། །ཕྱག་གཡོན་ཉི་མའི་མཐིལ་དུ་སྤུངས་པ་དེ། །ཕྱག་གཡས་ཟླ་བ་སྟེང་དུ་བརྡབས་པ་ཡིས། །སྒོ་ང་བྲག་ལ་བརྡབ་ལྟར་དམར་ཆ་ལེ། །ཉི་མ་མེ་
འབར་གཞོབ་ཏུ་བསྲེགས་པའི་ཐལ། །ཟླ་བ་ཆུ་ཆེན་འབབས་པས་བཀྲུས་པ་དེ། །རིམ་དགུ་ས་ཡི་འོག་ཏུ་སོང་བསྒོམས་ལ། །ཐལ་མོ་དགུ་བརྡབ་དེ་ནས་དམིགས་མེད་བཞག །དེ་ལྟར་སྔ་དྲོ་ཐུན་གཅིག་ཉིན་གུང་གཅིག །དགོང་མོ་ཐུན་གཅིག་སྲོད་དང་ཐུན་བཞི་བྱ། །ཐུན་མཚམས་ཆོས་སྤྱོད་གཏོར་བསྔོས་ལ་སོགས་བྱ། །སྲུང་འཁོར་ཁོ་ན་སྒྲུབ་ན་དེས་ཆོག་གི །མགོན་པོའི་གཞུང་དང་འབྲེལ་ན་ལེགས་པའི་ཕྱིར། །དགོང་ཐུན་བདག་བསྐྱེད་སྲུང་འཁོར་སྒོམ་བཟླས་རྗེས། །མདུན་བསྐྱེད་མཚལ་སེར་གང་འདོད་གཞུང་ལྟར་བཏང་། །ཐུན་གཏོར་སྐབས་སུ་གོང་ལྟར་སྔགས་དམིགས་དང་། །བསྐུལ་པ་རྒྱས་བསྡུས་གང་འདོད་བྱས་པའི་རྗེས། །རྡོ་རྗེ་གར་བཟློག་མ་དང་ལོཀྟི་སྦྱར། །ལོཀྟི་པ་ལ་འདི་ནི་བཟློག་པ་དང་། །ཡང་བཟློག་ལྷ་སྔགས་མཆོག་ཏུ་གྱུར་པ་སྟེ། །ཕ་རོལ་བྱད་ཀ་རྦོད་གཏོང་གཏད་མནན་དང་། །རང་གི་བྱད་ཀ་ཚུར་ལ་ལོག་པ་དང་། །སྡེ་བརྒྱད་ལྷ་འདྲེའི་ངོ་ལོག་བཟློག་པའི་མཆོག །འདི་ཡང་སྤྱན་རས་གཟིགས་ཀྱི་སྤྲུལ་པ་སྟེ། །མགོན་པོ་ཉིད་དང་ཐུགས་རྒྱུད་གཅིག་པ་ཡིན། །དེ་ཕྱིར་མགོན་པོའི་བཟློག་པའི་རྣོ་སོར་བཞག །དྲང་སྲོང་དམོད་
སྔགས་ཡིན་པས་ཤིན་ཏུ་རྣོ། །རྐྱེན་ཁ་ཆེའམ་མཐུ་འདྲེན་བྱེད་པ་ཡི། །ཕ་རོལ་བྱད་མ་སྟོབས་ཆེན་དང་འགྲས་ན། །མཚམས་བཅད་ཞག་པོ་གསུམ་ལྔ་བདུན་སོགས་བསྒྲུབ། །དགོན་པ་ལ་སོགས་དགེ་འདུན་མང་ཡོད་ན། །མང་པོས་བསྒྲུབས་ན་སྔགས་རྒྱུན་མ་ཆད་པར། །སྔགས་རྣམས་ཤུབ་བུར་བཟླས་ཚེ་དམིགས་པ་སྤོ། །མི་གྲངས་མང་ན་ཞག་གྲངས་ཉུང་ཡང་ཆོག །གཅིག་ག་གིས་སྒྲུབ་ན་དེ་ལུགས་ཞག་གྲངས་བསྲིང་། །དེ་དོན་སྲུང་འཁོར་འདི་ཡི་ཡིག་རྙིང་ལས། །སྲུང་ཟློག་འདྲེན་མཆོག་རྒྱ་ཆེར་བྱེད་དགོས་ན། །ཚོགས་དང་གཏོར་མ་ལ་སོགས་རྒྱ་ཆེན་བྱ། །བསྟོད་བསྐུལ་ཕྲིན་ལས་གཞུང་ལྟར་སྒྲུབ་པ་དང་། །བྱད་མའི་ཕྱོགས་སུ་ནུབ་མོ་གཏོར་ཟོར་འཕང་། །སྔགས་རྣམས་རྒྱུན་ཁྱེར་སྲུང་བའི་དོན་ཡིན་ནོ། །སྔགས་གྲངས་ངེས་མེད་རྟགས་ནི་གཙོ་ཆེ་སྟེ། །རྫོང་བརྩེགས་བཙན་པའི་མཁར་དང་བྲག་ན་འདུག །རགས་དང་རིབ་མ་བརྩིགས་དང་གོ་ཆ་གྱོན། །སེམས་ཅན་སྲུང་སྐྱོབ་བྱས་རྨིས་སྲུང་བ་འགྲུབ་། །ཆུ་བསྒྱུར་སེར་བ་བཟློག་དང་གཡུལ་ལས་རྒྱལ། །མེ་མཆེད་བལྟས་དང་ཕུར་པ་དམར་གཏོར་བཅག །དེ་དག་བཟློག་པ་འགྲུབ་པའི་རྟགས་སུ་བཤད། །སྲོག་ཆགས་
བསད་དང་ཤ་ཁྲག་དོན་སྙིང་ཟོས། །དགྲ་འདྲེ་ཐུབ་པའི་རྟགས་སུ་བཤད་པ་ཡིན། །དེ་ལྟར་རྟགས་ཐོན་ཞག་གྲངས་རྫོགས་པ་དང་། །མགོན་པོ་ཚར་གཅིག་བཏང་རྗེས་ཆོ་ག་རྣམས། །མགོན་པོའི་གཞུང་དང་བཀྲ་ཤིས་ཡན་ཆད་བྱ། །གཞུང་དང་མི་འབྲེལ་སྲུང་འཁོར་ཁ་རྐྱང་གི །སྒྲུབ་པ་ཡིན་ན་རྗེས་ཆོག་མི་དགོས་སོ། །དེ་དག་སྲུང་འཁོར་སྒྲུབ་པ་བྱེད་ལུགས་ཡིན། །སྒྲུབ་པ་མི་བྱེད་རྒྱུན་ཁྱེར་ཉམས་ལེན་ནི། །གོང་དུ་བཤད་ལྟར་སྲུང་འཁོར་ཚར་གཅིག་བསྒོམ། །གཏོར་འབུལ་མི་དགོས་དམིགས་པའི་ཞལ་བསྟབ་ཆོག ། དམིགས་པ་དང་བསྟུན་སྔགས་ཚན་དྲུག་པོ་རྣམས། །རེ་རེ་ལའང་བརྒྱའམ་ཉེར་གཅིག་རེ། །རང་ལ་རྐྱེན་བགེགས་ཆེ་ཆུང་དེ་དང་བསྟུན། །གལ་ཏེ་བསྙེན་སྔགས་གསུམ་པོ་སྦྲེལ་འདོད་ན། །དམིགས་པ་གསུམ་པོ་དུས་གཅིག་བསྒོམ་བྱ་ཞིང་། །མ་མ་རཀྟ་དེ་ལ་བཏགས་པ་གཅེས། །བཟློག་བསད་སྔགས་གསུམ་སྦྲེལ་ཏེ་འདོན་ན་ཡང་། །དེ་ལ་རཀྟའི་སྔགས་དེ་མེད་པ་གཅེས། །གཞན་སྲུང་འཁོར་ལོ་འདོགས་པར་བྱེད་འདོད་ན། །འཁོར་ལོའི་ལྟེ་བར་ཧཱུྃ་ཡིག་ཁོང་སེང་ཅན། །དེ་མཐར་ཕྱག་རྡོར་ཙཎྜ་མ་ཡི་སྔགས། །མཇུག་ཏུ་འཆང་བ་པོ་ནི་ཆེ་གེ་
ཡི། །ལུས་ངག་ཡིད་ལ་གནོད་པར་བྱེད་པ་ཡི། །ནད་གདོན་བྱེད་ཀ་རྒྱལ་བསེན་དམ་སྲི་དང་། །གཟའ་ཀླུ་ས་བདག་གནོད་པ་སྲུངས་ཤིག་དང་། །མ་མ་གྲྭ་བ་ཙི་རཀྵ་རཀྵ་བྲི། །དེ་རྒྱབ་རྩིབས་བཅུ་ལ་ནི་ཧཱུྃ་བཅུ་སྟེ། །དེ་རྒྱབ་མུ་ཁྱུད་ཅུང་ཞིག་ཆེ་བ་ལ། །བསྙེན་སྔགས་གསུམ་དང་བཟློག་བསད་སྔགས་ཚན་གསུམ། །སྦྲེལ་མ་སྔགས་མགོ་ཕྱིར་བསྟན་ཏེ། །སྔགས་མཇུག་ནང་དུ་གཅུད་ལ་སྔགས་ཚན་གསུམ། །དེ་རྒྱབ་མེ་རིའི་གཡས་སུ་བསྐོར་བར་བྲི། །ལྟེ་བའི་ཧཱུཾ་དང་ལྟེ་བ་སྔོན་པོ་སྟེ། །རྩིབས་བཅུ་སྔོན་པོ་རྩིབས་མཆན་དམར་པོ་སྟེ། །མུ་ཁྱུད་སེར་པོ་མེ་རི་དམར་པོ་བྱ། །འཁོར་ལོ་དེ་ཉིད་སྲུང་འཁོར་བདག་བསྐྱེད་ལྟར། །མདུན་དུ་བསྒོམས་ལ་ཡེ་ཤེས་སེམས་དཔའ་བསྟིམ། །དེ་ཡི་ཐུགས་ཀར་བསྲུང་བྱ་ཚུད་བསྒོམ་ཞིང་། །སྔགས་ཚན་དྲུག་པོ་མང་བཟླས་ཕུ་བཏབ་སྟེ། །རྟེན་འབྲེལ་སྙིང་པོ་བཟླས་ལ་མེ་ཏོག་འཐོར། །ཧཱུྃ་ཡིག་མགོ་མཇུག་མ་ལོག་ཅི་བདེར་བལྟེབ། །བྱིན་རླབས་རྟེན་ནི་གང་རྙེད་ནང་དུ་བཅུག །ཚོན་རྩི་སྐུད་པས་རྒྱ་གྲམ་དེམ་པོར་བཅིངས། །དར་རས་ནག་པོས་ན་བཟའ་གསོལ་བྱས་ལ། །ཅི་བདེར་གཡོག་བྱས་བསྲུང་བྱར་བཏགས་པ་དེར། །ཧཱུྃ་གི་ཡིག་ངོ་རང་ལ་
བལྟ་བར་བྱ། །སྲུང་ཟློག་མཐར་ཐུག་ནག་པོ་ཆེན་པོ་ཡི། །སྲོག་གི་འཁོར་ལོ་ཤིན་ཏུ་ཟབ་པར་གསུངས། །དེ་ལྟར་མགོན་པོའི་སྲུང་འཁོར་མན་ངག་འདི། ། བདུད་མོ་བླ་མ་ཀརྨ་དར་རྒྱས་ཀྱིས། །བསྐུལ་ཕྱིར་སྔགས་འཆང་རཱ་ག་ཨ་སྱ་ཡིས། །གནམ་ལོ་འགལ་བྱེད་ལྕགས་མོ་ཕག་གི་ལོ། །སྟག་གི་ཟླ་བའི་བཅུ་དྲུག་ཉིན་པར་སྨྲས། །དགེ་སློང་ཀ་ལའི་མིང་ཅན་དེ་ཡིས་བྲིས། །སྦ་འོས་གསལ་བཀོད་ཉེས་པ་ལྷ་ལ་བཤགས། །དགེ་བས་བསྟན་འཛིན་སྐྱེས་བུ་དམ་པ་ཡི། །བཙན་པའི་མཁར་དང་གོ་ཆར་འགྱུར་བར་ཤོག །བརྒྱུད་པ་འདི་ནི་ལྷ་དང་བླ་མ་ལ། །རྩེ་གཅིག་དད་པའི་བརྒྱུད་འཛིན་མ་གཏོགས་པ། །གཞན་ལ་སྤེལ་ན་བཀའ་ཆད་འབྱུང་འགྱུར་ཞེས། །གྲུབ་ཆེན་པཀིས་བཀའ་སྩལ་གནང་བ་ལ་། །ཡིད་ཆེས་ཉམས་ལེན་བརྩོན་ཅིག་སྒྲུབ་ལ་བརྩོན། །མཐར་ཐུག་ནག་པོ་ཆེན་པོའི་དཀྱིལ་འཁོར་དུ། །དབང་བསྐུར་ཐོབ་ཅིང་ལས་བཞི་ཕྲིན་ལས་འགྲུབ། །ཆོས་སྐྱོང་ཡེ་ཤེས་མགོན་པོ་རྗེས་འཛིན་ཤོག །མངྒ་ལཾ།། ༈ སྲུང་བའི་འཁོར་ལོ་འདིའི་རབ་གནས་སྲུང་འཁོར་ལྟར་དབུས་སུ་བལྟེབས་ནས། དེའི་ཐུགས་ཀར་ཡི་དམ་ཧཱུྃ་གི་ནང་དུ་བསྲུང་བྱ་
བསྐྱེད་། རྩིབས་བཅུ་ལ་སྲས་མཆོག་བཅུ་བསྐྱེད། སྤྱན་འདྲེན་མཆོད་བསྟོད་སོགས་མགོན་པོའི་གཞུང་ལྟར་བཏང་། ལེགས་ལྡན་སྔགས་གསུམ་དང་། སྲུང་འཁོར་སྔགས་བརྒྱ་སྟོང་ཅི་འགྲུབ་ཀྱིས་ཕུ་བྱ། ཡེ་དྷརྨས་རབ་གནས་མེ་ཏོག་འཐོར། ལྟེབ་ལུགས་ཅི་བདེ་ལ་དབུས་སུ་ཧཱུྃ་མགོ་མཇུག་མ་ལོག་པར་བྱས་ལ། ཚོན་སྐུད་སྣ་ལྔས་རྒྱ་གྲམ་དུ་དཀྲིས། དར་རས་སམ་གོས་ཆེན་ནག་པོས་བཏུམས་ལ། གཡོགས་བྱས་མགུལ་དུ་བཏགས་ཏེ། ལྟེ་བའི་ཧཱུྃ་རང་ལ་ཁ་ཚུར་བསྟན་ནས་བཏགས་ནི་སྲུང་འཁོར་དང་། ཕར་བསྟན་ན་བཟློག་པར་འགྱུར་རོ། །རྒྱས་པར་འདོད་ན་ཕྱིའི་མུ་ཁྱུད་གཅིག་བསྐོར་ལ་དབྱངས་གསལ་དང་རྟེན་འབྲེལ་སྙིང་པོ་བྲི། མེད་ཀྱང་རུང་། ནང་རྟེན་བྱིན་རླབས་རྟེན་ཇི་སྙེད་བཅུག །ཚོན་ཡིག་དབུས་ཀྱི་ཧཱུྃ་སྔོན་པོ། ལྟེ་བ་སྔོན་པོ། རྩིབས་སེར། རྩིབས་མཆན་དམར། མུ་ཁྱུད་སྤྲོ། དེ་རྒྱབ་ཡོད་ན་དཀར། མེ་རི་དམར། ཨཱ་ར་གས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།