མ་མགོན་ཞལ་སྦྱོར་གྱི་སྲོག་འཁོར་བྲི་ཐབས་དང་བླ་རྡོ་འཆང་ཐབས་ཀྱི་ཟིན་བྲིས།
མ་མགོན་ཞལ་སྦྱོར་གྱི་སྲོག་འཁོར་བྲི་ཐབས་དང་བླ་རྡོ་འཆང་ཐབས་ཀྱི་ཟིན་བྲིས་བཞུགས།
ན་མོ་གུ་རུ་མ་ཧཱ་ཀཱ་ལ་དེ་ཝི་ཡེ། དེང་སང་བཏང་བའི་བེར་གྱི་ཆོ་ག་འདིས། །དཀྱིལ་འཁོར་གཙོ་བོ་ལྷ་མོ་ཡིན་པའི་ཕྱིར། །མ་མགོན་གཉིས་ལས་ལྷ་མོ་གཙོ་ཆེ་སྟེ། །སྔགས་དང་དམིགས་པ་ཁོ་ནས་འགྲུབ་པའི་ཕྱིར། །སྒྲུབ་རྫས་མི་དགོས་སྙམ་ན་མི་རུང་སྟེ། །ལྷ་མོ་རྫས་ལ་དགའ་བས་རྫས་དགའ་མ། །སྒྲུབ་རྫ་ས་འཛོམ་ན་ཤ་རུལ་སྦྲང་མ་ལྟར། །རང་བཞིན་ཤུགས་ཀྱིས་འཁོར་བ་རྒྱུད་ནས་བཤད། །སྒྲུབ་རྫས་རྣམ་པ་དཔག་མེད་འཛོམ་དཀའ་ཡང་། །བླ་རྡོ་སྲོག་འཁོར་གཉིས་ནི་གཙོ་བོ་ཡིན། །མ་མགོན་སོ་སོའི་འཁོར་ལོ་མང་ན་ཡང་། །ཞལ་སྦྱོར་སྲོག་འཁོར་རྒྱུད་
ནས་བཤད་འདི་ཟབ། །དེ་ལ་བསད་འཁོར་སྲོག་འཁོར་རྣམ་པ་གཉིས། །འདིར་ནི་རྟེན་རྫས་སྲོག་གི་འཁོར་ལོ་སྟེ། །བྲི་གཞི་སྣག་ཚ་རབ་འབྲིང་ཐ་མ་གསུམ། །དར་ནག་མཐིང་ཤོག་ཤོག་དཀར་སྲབ་མོ་ལ། །གསེར་དངུལ་མཚལ་དང་རྒྱ་སྣག་གང་རུང་གིས། །ཉེར་དགུའི་ཉིན་པར་བྱང་ཤར་ཁ་བལྟས་བྲི། །ལྟེ་བར་ཧཱུྃ་བྷོ་མཐིང་ནག་ཁོང་སེང་ཅན། །དེ་ལྟར་འདོད་གསོལ་དག་གིས་བསྐོར་བ་སྟེ། །དེ་རྒྱབ་རྩིབས་བཅུ་སྔོན་པོ་ཐུགས་ཀྱི་སྔགས། །དེ་རྒྱབ་རྩིབས་བརྒྱད་དམར་པོ་གསུང་གི་སྔགས། །དེ་རྒྱབ་རྩིབས་བརྒྱད་དཀར་པོ་སྐུ་ཡི་སྔགས། །དེ་ཡི་རྩིབས་མཆན་
སྒྲུབ་གཞུང་རྒྱ་གཞུང་ནས། །འབྱུང་བའི་འཁོར་གྱི་ནག་པོ་བརྒྱད་ཀྱི་སྔགས། །དེ་ཡི་རྒྱབ་ཀྱི་མུ་ཁྱུད་སྔོན་པོ་ལ། །མ་མགོན་སྤྱི་དྲིལ་སྔགས་རིང་བྲི་བར་བྱ། །དེ་རྒྱབ་མུ་ཁྱུད་སེར་པོ་བདེ་མཆོག་དང་། །ཕག་མོ་གཤིན་རྗེ་རྟ་མགྲིན་ཕྱག་རྡོར་སྔགས། །དབྱངས་གསལ་རྟེན་འབྲེལ་སྙིང་པོ་བྲི་བར་བྱ། །དེ་རྒྱབ་མ་མགོན་ཞལ་སྦྱོར་སྐུ་བྲི་སྟེ། །ལུས་ལ་འདོགས་ན་འདོར་ཐབས་པད་ཉིའི་གདན། །མདའ་དར་བཏགས་སམ་རྟེན་སྒམ་ནང་འཆང་ན། །དྲེལ་ལ་ཆིབས་པ་ལ་སོགས་མངོན་རྟོགས་ལྟར། །བྲི་དང་ཚོན་དང་རབ་གནས་བརྡ་ཙམ་ཡང་། །ཉི་མ་གཅིག་ལ་འགྲུབ་ན་མཆོག་ཏུ་བཤད། །དེ་ནི་སྲོག་གི་འཁོར་ལོ་དམ་པའོ། །བྲག་ནག་རི་གཉེན་རྡེལ་བུའམ་བྲག་གི་ཕྱེ། །ཟུར་གསུམ་དབྱིབས་ཅན་སེན་མོ་ཆུང་ཤོས་ཙམ། །ལག་གིས་མི་རེག་གྲི་གུག་གྲི་རྩེས་བླངས། །དར་ནག་བཏུམ་སྟེ་ཁྱིམ་དུ་ཁྱེར་བ་དང་། །མཚོ་ཆེན་ནང་ནས་རྡེའུ་སྐྱོགས་ཀྱིས་གཅུས། །རྡེའུ་སྔོན་པོ་སེན་མོ་ཙམ་ཅིག་ནི། །ལག་གིས་མི་རེག་ཁེམ་གྱིས་དར་ནག་བོཏུམ། །ཁྱིམ་དུ་ཁྱེར་ནས་གསེར་རམ་མཚལ་གྱིས་ནི། །རྡེལ་ནག་ཧཱུྃ་དང་རྡེལ་སྔོན་བྷོ་ཡིག་བྲི། །གང་རྙེད་བྱིན་རླབས་རྟེན་དང་ལྷན་ཅིག་ཏུ། །སྲོག་
འཁོར་ནང་བཅུག་མགོ་མཇུག་མ་ལོག་པར། །རྟ་ནག་གཡག་ནག་ལུག་ནག་གང་རུང་གི །ཙིཏྟའི་ནང་དུ་བཅུག་པ་མཆོག་ཡིན་ཏེ། །མ་རྙེད་དར་རས་ནག་པོས་སུམ་རིལ་བཏུམ། །སྒྲུབ་པའི་དུས་སུ་གཏོར་མའི་རྩེ་ལ་བཙུགས། །ལུས་ལ་འཆང་ངམ་རྟེན་སྒམ་ནང་དུ་སྦ། །ཡང་ན་མདའ་དར་མགུལ་དུ་བཏགས་ལ་འཆང་། །རྒྱུན་དུ་མགོན་པོའི་ཆོ་ག་ནམ་བཏང་དུས། །རྒྱུན་དུ་ཡེ་ཤེས་མི་གཤེགས་དེ་ལ་བསྟིམ། །དེས་ནི་ལུས་དང་གྲིབ་བཞིན་འཁོར་བར་བཤད། །གཞན་ཡང་མ་མགོན་གཞུང་ནས་གསུངས་པ་ཡི། །རྟེན་རྫས་ཐམས་ཅད་འཛོམས་ན་མཆོག་ཡིན་ཏེ། །མ་འཛོམ་དེ་དག་ཀུན་གྱི་གཟུགས་བྲིས་ལ། །སོ་སོར་ཚོན་བྱས་ཁ་ཡིག་དང་བཅས་པ། །རྟེན་སྒམ་ནང་དུ་འཆང་བ་མན་ངག་ཡིན། །རྟེན་ལ་རྫས་མ་ཚང་ཡན་ལག་དམ་ཚིག་ཉམས། །མ་འཛོམ་གཟུགས་བརྙན་བྲིས་པས་ཆོག་པར་བཤད། །མགོན་པོའི་རྟེན་རྫས་གཙོ་བོ་གྲི་སྙིང་དང་་། །ལྷ་མོའི་རྟེན་རྫས་གཙོ་བོ་ནལ་བུའི་སྙིང་། །མགོན་པོའི་འབོད་རྫ་ས་གྲི་རྒོད་རྐང་དུང་གཡས། །ལྷ་མོའི་འབོད་རྫས་ནི་གྲིར་ཤི་རྐང་གཡོན། །དེ་དག་དངོས་སུ་རྙེད་པར་དཀའ་བའི་ཕྱིར། །རང་ཉིད་སྐྱེ་བ་དཔག་ཏུ་
མེད་པ་ནས། །དེ་འདྲ་ཤི་བ་གྲངས་མེད་བྱུང་བའི་ཕྱིར། །རང་གི་སྙིང་གིས་དེ་དག་སྙིང་གོ་ཆོད། །རང་གི་རྐང་དེས་དེ་དག་རྐང་གོ་ཆོད། །དེ་བཞིན་བུད་མེད་རྒྱ་མཚོར་ཤི་བའི་མགོ །ནལ་བུའི་ཐོད་པ་རང་གི་ཐོད་པས་ཆོག །དེ་ཕྱིར་རང་གི་མགོ་རྙིང་རྐང་སྙིང་རྣམས། །དེ་དག་ཡིན་པར་ཤེས་པའི་རྟེན་རྫས་སུ། །ཡིན་པར་དམིགས་པ་ངེས་ཤེས་བསྒོམས་བྱས་པས། །རྟེན་རྫས་མ་ཚང་བ་ཡི་ཉེས་པ་ཁོག །འབྲོག་རིགས་རྣམས་ཀྱིས་རྙེད་པར་སླ་བའི་ཕྱིར། །མགོན་པོའི་ཕྱི་རྟེན་གཡག་ནག་རྩེན་པ་དང་། །ལྷ་མོའི་རྟེན་རྫས་ལུག་ནག་རྩེན་པ་མཆོག །དེ་དག་མངའ་གསོལ་སྐབས་སུ་རྩེན་བྱ་ཞིང་། །བསྐང་བ་ནམ་འདོན་བསྐང་བའི་རྫས་སུ་དམིགས། །སྤུ་ནི་མི་བྲེག་ཁལ་ནི་བཀལ་མི་བྱ། །མ་མགོན་རྒྱུད་གཞུང་འོ་མའི་རྒྱ་མཚོ་ལས། །བཅུད་ཕྱུང་མར་གྱི་སྙིང་པོ་ལྟ་བུ་འདི། །དུལ་མོ་ཀརྨ་དར་རྒྱས་ཀྱིས་བསྐུལ་ནས། །སྔགས་འཆང་རཱ་ག་ཨ་སྱས་སྨྲས་པ་ལྟར། །པདྨ་ཐབས་མཁས་ཞེས་བྱས་ཡི་གེར་བཀོད། །ཤུ་བྷ་མ་ཏུ་སརྦ་ཛ་ག་ཏཾ།། ༈ གྲི་གུག་བརྩེགས་པའི་རྒྱུད་ལས། དེ་ནས་ཡང་དག་བཤད་བྱ་བ། ཛཧཱུྃ་བཾ་ཧོ༔ ཨེ་ཧྱ་ཧི་མ་ཧཱ་ཀ་རུ་ཎི་ཀ་ཛ་ཛཧཱུཾ། ཨོཾ་ཤྲཱི་མ་ཧཱ་ཀཱ་ལ་ཧ་ན་
ཧ་ན་བཛྲ་ནི་ནི་སྭཱ་ཧཱ། ཨོཾ་མ་ཧཱ་ཀཱ་ལ་མཱ་ར་ཡ་ཧཱུྃ་ཕཊ། ཨོཾ་བཛྲ་རཀྵ་དྷེ་ཝ་མ་ཧཱ་ཀཱ་ལ་ཁྲེ་ད་ཧཱུྃ༔ ཛ་ཛཿppཧ་ན་ཧ་ན། མ་ཧཱ་ཀཱ་ལ་མཱ་ར་ཡ་ཧཱུྃ་ཕཊ། པ་ཙ་པ་ཙ་མ་ཧཱ་ཀཱ་ལ་ཆེ་གེ་མཱ་ར་ཡ་ཧཱུྃ་ཕཊ༔ བནྡྷ་བནྡྷ་མ་ཧཱ་ཀཱ་ལ་མཱ་ར་ཡ་ཧཱུྃ་ཕཊ༔ ཚིནྡྷ་ཚིན་མ་ཧཱ་ཀཱ་ལ་མཱ་ར་ཡ་ཧཱུྃ་ཕཊ༔ བྷིནྡ་བྷིནྡྷ་མ་ཧཱ་ཀཱ་ལ་མཱ་ར་ཡ་ཧཱུྃ་ཕཊ༔ ཨོཾ་མ་ཧཱ་ཀཱ་ལ་ཧྥེ་ཤ་ཏཱཾ་མཱ་ར་ཡ་ཧཱུྃ་ཕཊ༔ ཨོཾ་མ་ཧཱ་ཀཱ་ལ་རུ་ལུ་རུ་ལུ་བྷྱོཿ མ་ར་མ་ར་གྲི་གྲི། བནྡྷ་བནྡྷ། ད་ཧ་ད་ཧ། པ་ཙ་པ་ཙ། དེ་ན་མེ་ཀེ་ན་ཧཱུྃ་ཕཊ༔ ཨོ་ཙནྡྲ་མ་ཧཱ་ཀཱ་ལ་བཛྲ་དྷཾ་ཏྲི་ནི། ཨོ་ཙན་མ་ཧཱ་ཀཱ་ལ་བཛྲ་དྷཾ་ཏྲི་ནན་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ༔ རྒེ་མཱ་ར་ཡ་ཧཱུྃ་ཕཊ་གསང་སྔགས་ཀྱི་ལེའུ་སྟེ་བཅུ་པའོ། །ཨྠྀི། ༈ ནག་པོ་ཡབ་ཡུམ་བཅུ་དྲུག་གི་སྔགས་ནི། ཨོཾ་མ་ཧཱ་ཀཱ་ལ་ཡ་ཿ ཡཀྵ་ཛཿ ཡཀྵ་དུ་ན་ལ༔ སུ་ཏང་པ་ཤ་ཿ ས་ཏྲི་ཡཀྵ་ཿ མེ་ཤ་ཿ ཡཀྵ་ཿ ཁ་ལ་ཐཾ་ཐཾ་ཛཿ རྒྱ་གཞུང་ལས་སོ། །ཨོཾ་མ་ཧཱ་ཀཱ་ལ་ཡ་ཿ མ་ཧཱ་ཀཱ་ལ་ཡཀྵ་ཛ་མ་ཧཱ་ཀཱ་ལ་ཡཀྲུ་དུ་ན་ཿ མ་ཧཱ་ཀཱ་ལ་སུ་ཏང་པ་ཤ་ཛཿ མ་ཧཱ་ཀཱ་ལ་ས་ཏྲི་ཡཀྟ་ཿ མ་ཧཱ་ཀཱ་ལ་མེ་ཤ་ཛཿ མ་ཧཱ་ཀཱ་ལ་ཡཀྵ་ཿ ཨོཾ་མ་ཧཱ་ཀཱ་ལ་ཁ་ལ་བོ་བི་ཛཿ ཞེས་སོ།། །།
རྩིབས་མཆན་བརྒྱད་ལ་སྒྲུབ་གཞུང་སྔགས་འདི་བྲི་རྒྱུ་མཛད་འདུག་པ་དཔེའུ་རིས་ལྟར་ཞུས་སོ། །ཤུ་བྷཾ།།