མ་མགོན་གྱི་གདམས་པ་ལས་སྣ་ཚོགས་ཀྱི་སྒྲུབ་ཐབས་རིགས་བསྡུས།
མ་མགོན་གྱི་གདམས་པ་ལས་སྣ་ཚོགས་ཀྱི་སྒྲུབ་ཐབས་རིགས་བསྡུས་བཞུགས་སོ། །
ན་མོ་གུ་རུ་མ་ཧཱ་ཀཱ་ལ་ཡེ། རང་ཉིད་དྲན་རྫོགས་དམ་ཡེ་དབྱེར་མེད་པའི། །རྩ་བའི་བླ་མ་གར་དབང་རྡོ་རྗེ་འཆང་། །སྐུ་མདོག་དམར་པོ་ལོངས་སྤྱོད་རྫོགས་པའི་སྐུ། །རྡོ་རྗེ་དྲིལ་བུ་རང་འདྲའི་ཡུམ་ལ་འཁྱུད། །སྐྱིལ་ཀྲུང་པད་ཟླ་ཁྱུང་གི་གདན་ལ་བཞུགས། །གནས་གསུམ་པད་ཟླར་ཧཱུཾ་ཡིག་དཀར་དམར་མཐིང་། །ཨོ་གུ་རུ་ཛྙཱ་ན་མ་ཧཱ་ཀཱ་ལ་ཀཱ་ལི་ཡེ་ཧཱུཾ། ཞེས་པའི་སྔགས་ཕྲེང་དཀར་དམར་མཐིང་གས་བསྐོར། །དཀར་པོའི་འོད་ཀྱིས་རྒྱལ་བ་སྲས་བཅས་ཀུན། །བླ་མའི་སྐུར་བྱས་རང་གི་དཔྲལ་བར་ཐིམ། །དམར་པོའི་འོད་ཀྱིས་སྒྲ་ཀུན་བླ་མའི་གསུང་། །སྔོན་པོའི་
འོད་ཀྱིས་འཁོར་འདས་བླ་མའི་ཐུགས། །ཐམས་ཅད་ཚུར་བསྡུས་རང་ལ་ཐིམ་གྱུར་པས། །རང་ཉིད་མགོན་པོ་པདྨ་རཱ་གའི་མདོག །དར་དམར་བེར་གསོལ་གྲི་གུག་ཐོད་ཁྲག་འཛིན། །པདྨ་དབྱིངས་ཕྱུག་དམར་མོ་སྐུ་ལ་འཁྲིལ། །འདོར་ཐབས་པད་ཉི་དགྲ་བགེགས་གདན་ལ་འགྱིང་། །ཐུགས་ཀར་ཉི་སྟེང་བཟླ་བྱའི་སྔགས་ཕྲེང་ལས། །འོད་ཟེར་དམར་པོ་ལྕགས་ཀྱུ་ལྟ་བུ་ནི། །ཕྱོགས་བཅུར་འཕྲོས་པས་འཁོར་འདས་ཐམས་ཅད་ཀྱི། །དངོས་གྲུབ་དབང་དུ་བསྡུས་ནས་བདག་ལ་ཐིམ། །ཨོཾ་མ་ཧཱ་ཀཱ་ལ་གུ་ཎ་ཧྲི་ད་ཧཱུྃ་ཕཊ། སརྦ་སིདྡྷི་པཱ་ཤཾ་ཀུ་རུ་ཧོ༔ ཅི་ནུས་བཟླས་
རྗེས་མི་དམིགས་སྟོང་ཉིད་བཞག །འདི་ནི་མ་མགོན་བླ་མའི་རྣལ་འབྱོར་ཏེ། །བར་ཆད་ཀུན་སེལ་ཉམས་དང་རྟོགས་པ་འཕེལ། །ཕྲིན་ལས་ཀུན་འགྲུབ་མཆོག་ཏུ་ཟབ་པར་གསུངས། །ཨྠྀི། །ཡང་ན་རང་ཉིད་ཡི་དམ་སྤྱན་རས་གཟིགས། །བསྒོམས་རྗེས་གོང་ལྟར་མགོན་པོ་དམར་པོར་བསྒྱུར། །གོང་ལྟར་སྒོམ་བཟླས་བྱས་པས་དབང་འགྲུབ་བོ། །དེ་བཞིན་རང་ཉིད་ཚེ་དཔག་དཀར་པོར་བསྒོམ། །སྔགས་ཤཾ་ཨཱ་ཡུསིདྡྷི་ཧཱུྃ་བཏགས་སོ། །དེ་ལྟར་རང་ཉིད་དང་པོར་ཕྱག་རྡོར་བསྒོམ། །དེ་ཉིད་མགོན་པོར་བྱས་པས་ཀླུ་འདུལ་ལོ། །རྟ་མཆོག་མགོན་པོར་བྱས་པས་རྒྱལ་བསེན་འདུལ། །དང་པོར་མགོན་པོར་གནས་པ་རྡོར་སེམས་བསྒྱུར། །རྒྱལ་བ་རྣམས་ཀྱིས་དབང་བསྐུར་ཁྲུས་བྱས་པས། །མགོན་པོར་གྱུར་པ་རྡོར་སེམས་རྒྱས་བཏབ་པས། །ཉམས་སྒྲིབ་སྦྱོང་བའི་མཆོག་ཏུ་གྱུར་པའོ། །དོན་ལ་བླ་མ་ཡི་དམ་ཆོས་སྐྱོང་ཀུན། །སོ་སོར་འཛིན་པ་བྱིས་སྔའི་བློ་ཅན་ཏེ། །དབྱེར་མེད་ངོ་བོ་གཅིག་པའི་གནད་ཤེས་པའི། །རིགས་གསུམ་གཅིག་དྲིལ་གདམས་པ་ཟབ་མོ་འདི། །མཁའ་སྤྱོད་དབང་པོའི་གསུངས་ལས་བྱུང་བ་དང་། །རྒྱུད་དང་པཀྵིའི་དགོངས་པ་བསྡེབས་པ་ཡིན། །
སྤྱི། །དྲན་རྫོགས་སྲུང་འཁོར་དབུས་སུ་རང་ཉིད་ནི། །མགོན་པོར་གསལ་བའི་འོད་ཀྱིས་ལྷ་ཚོགས་རྣམས། །སྤྱན་དྲངས་མཆོད་བསྟོད་ཡན་ལག་བདུན་པ་ནི། །དངོས་བཤམས་ཡིད་ཀྱིས་བྱས་རྗེས་སྟོང་པར་བསམ། །འབྱུང་བ་རིམ་བརྩེགས་མེ་དཔུང་རཀྟའི་མཚོ། །ཀེ་རུས་ས་གཞི་གསེར་གྱི་རི་རབ་སྟེང་། །མེ་དཔུང་རྡོ་རྗེ་ནག་པོའི་གུར་གྱི་ནང་། །འཇིགས་རུང་དུར་ཁྲོད་གྲུ་གསུམ་མཐིང་ནག་དབུས། །པདྨ་འབུམ་ལྡན་སྣ་ཚོགས་རྡོ་རྗེའི་ལྟེར། །ཧཱུྃ་ལས་བྱུང་བའི་དུར་ཁྲོད་གཞལ་ཡས་ཁང་། །པད་ཉི་རོ་གདན་ཕྱོགས་བཞི་དབུས་དང་ལྔར། །གསང་བདག་བགེགས་དགྲ་གཤིན་རྗེ་རྟ་མཆོག་དང་། །བདུད་རྩི་འཁྱིལ་བའི་ངོ་བོ་ཧཱུྃ་ཡིག་ལྔ། །དེ་ལས་འོད་འཕྲོས་དོན་བྱས་ཚུར་འདུས་པས། །རྡོ་རྗེ་རིན་ཆེན་འཁོར་ལོ་པད་དབྱུག་དང་། །རལ་གྲི་གུར་རྣམས་འོད་དུ་ཞུ་བ་ལས། །དབུས་མཐིང་ཤར་དཀར་ལྷོ་སེར་ནུབ་དམར་དང་། །བྱང་ལྗང་མགོན་པོ་ཡབ་ཡུམ་ལྔར་གྱུར་ཏེ། །རང་རྟགས་གྲི་ཐོད་རང་མདོག་བེར་དང་ནི། །ཁྲོ་བོའི་ཆས་རྫོགས་གཡོན་བརྐྱང་པད་ཉི་དང་། །རོ་གདན་ལ་བཞུགས་ཡུམ་རྣམས་གྲི་ཐོད་འཛིན། །རིགས་མཐུན་ཌཱཀྐི་བྱེ་བ་དུ་མ་དང་། །
འཇིག་རྟེན་སྐྱོང་བ་རྣམས་ཀྱི་བཀའ་སྡོད་བྱེད། །གནས་གསུམ་འབྲུ་གསུམ་འོད་ཀྱིས་ཡེ་ཤེས་པ། །སྤྱན་དྲངས་དབང་བསྐུར་རིགས་བདག་སོ་སོའི་བརྒྱན། །ཡིད་སྤྲུལ་མཆོད་ཅིང་འཁོར་འདས་མངོན་པར་བསྟོད། །རང་རང་ཐུགས་ཀའི་ཧཱུཾ་མཐར་སྔགས་ཕྲེང་བསྐོར། །རང་རང་མདོག་མཚུངས་འོད་ཟེར་ཕྱོགས་བཅུར་འཕྲོས། །རང་རང་རིགས་ཀྱི་མ་མགོན་དཔག་མེད་རྣམས། །བསྡུས་ནས་བསྟིམ་དམིགས་སྔགས་འདི་བཟླ་བའམ། །ཨོཾ་མ་ཧཱ་ཀཱ་ལ་དེ་ཝ་རཀྟ་ཛཧཱུྃ་བཾ་ཧོཨེ་ཧྱ་ཧི། ཨ་ཀར་ཡ། ཨ་ཀརྨ་ཡ། ཧཱུཾ་ཡ་ཿ ཧཱུྃ་ཡ་ཿ ཞེས་བྱ་བ་དང་། ༀ་མ་ཧཱ་དེ་ཝ་རཀྵ་ཧཱུཾ་ཕཊ། ཨོ་བཛྲ་མ་ཧཱ་ཀཱ་ལ་ཡ་ཧཱུྃ་ཕཊ། ཡང་ན་པཀཱིའི་དགོངས་པ་གུ་ཎ་བཟླས། །ཅུང་ཟད་རྟགས་ཐོན་ལས་ལ་སྦྱར་བ་ནི། །གཙོ་བོ་དང་ནི་ཤར་གྱི་མགོན་པོ་ཡི། །སྨིན་མཚམས་རང་འདྲའི་མགོན་པོ་གྲངས་མེད་འཕྲོས། །སྐུ་ཡི་ཕྲིན་ལས་བར་དུ་གཅོད་པ་དང་། །འགྲོ་བའི་ལུས་ཀྱི་བདུད་བགེགས་སྒྲིབ་པ་བཅོམ། །དེ་བཞིན་ལྷོ་ཡི་མགོན་པོའི་ཡོན་ཏན་དང་། །ནུབ་ཀྱི་གསུང་དང་བྱང་གི་ཕྲིན་ལས་དེར། །སླར་ཡང་རང་ཉིད་ཞལ་བཞི་ཕྱག་བརྒྱད་པ། །ཞབས་བརྒྱད་རང་འདྲའི་སྤྲུལ་བ་དུ་མ་དང་། །འཁོར་
བཞི་ལའང་རང་འདྲ་གྲངས་མེད་འཕྲོས། །ཐུགས་ཀྱི་བར་ཆད་འགྲོ་བའི་ཡིད་སྒྲིབ་བཅོམ། །སྔགས་ནི་ཕྱི་མ་གཉིས་པོ་གང་རུང་ངམ། །ཁྱད་པར་གུ་ཎ་བཟླ་བ་མན་ངག་ཡིན། །འདི་ནི་རིགས་བསྡུས་ཞེས་བྱ་སྤྱི་སྒྲུབ་ཡིན། ཨྠྀི༔ ཨོཾ་མ་ཧཱ་ཀཱ་ལ་རུ་རུ་རཀློ་ཞེས་པ་ལ་སརྦ་ཤཱནཾ་ཀུ་རུ་སྭཱ་ཧཱ་འམ། སརྦ་པུཊྚི་ཀུ་རུ་སྭཱ་ཧཱ་འམ། སརྦ་ཝ་ཤཾ་ཀུ་རུ་སྭཱ་ཧའམ་། སརྦ་མཱ་ར་ཡ་ཕཊ་སོགས་སམ། སརྦ་ཤན་པུཏྟཾ་ཝ་ཤཾ་མཱ་ར་ཡ་ཕཊ་ཅེས་སོགས་གང་འོས་སྐབས་སུ་སྦྱར་ཀྱང་ལེགས། ཨྠྀི། སྤྱི་སྒྲུབ་དེ་ལ་ཅུང་ཟད་རྟགས་ཐོན་ནས། །རང་ཉིད་མགོན་པོ་ཡབ་ཡུམ་དཀར་པོ་བསྒོམ། །འཁོར་དུ་མཁའ་འགྲོ་དཀར་མོ་བརྒྱད་ཀྱིས་བསྐོར། །ཕྱོགས་བཞི་བུམ་པ་མཚམས་བཞིས་ཐོད་པ་འཛིན། །སྤྱི་བོར་ཚེ་དཔག་དཀར་པོས་ཚེ་བུམ་འཛིན། །པདྨ་ཊཱ་ཀི་ཐོད་པ་འཛིན་པས་འཁྱུད། །ལྟེ་བར་པདྨ་ཊཱ་ཀི་ཚེ་དཔག་འཁྱུད། །དེ་ཡི་ཐུགས་ཀར་ཤེལ་དཀར་འཁོར་ལོ་ནི། །རྩིབས་བཅུའི་ལྟེ་བར་པད་དཀར་ཟླ་བ་ལ། །ཟླ་ཤེལ་གྲི་གུག་གསེར་རྡོར་ཡུ་བའི་དཀྱིལ། །པད་སྣོད་དཀར་པོ་བདུད་རྩི་དམར་པོས་བཀང་། །དེ་དབུས་ནོར་བུའི་བུམ་པ་དམར་པོ་ནི། །བདུད་རྩི་དཀར་པོས་གང་ནང་
ཧཱུྃ་དཀར་པོ། །མུ་ཏིག་མདོག་ཅན་ཧྲིདམར་བཅུ་དྲུག་བསྐོར། །ཉི་ཟླའི་གའུའི་དབུས་སུ་གནས་པར་བསམ། །རྩིབས་བརྒྱད་གཡོན་བསྐོར་དང་ནི་སྟེང་འོག་ཏུ། །ཧཱུྃ་ཡིག་སྤང་པའི་ཡིག་འབྲུ་རེ་རེར་བསམ། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་དང་། །འགྲོ་བ་རིགས་དྲུག་གདོན་བགེགས་ཐམས་ཅད་ཀྱང་། །ཚེ་དཔག་ཡབ་ཡུམ་སྐུར་གྱུར་འཆི་མེད་ཀྱི། །བདུད་རྩིའི་དབང་བསྐུར་སྤྱི་བོའི་ཡབ་ཡུམ་གྱི། །སྦྱོར་མཚམས་བདུད་རྩི་སྙིང་གི་ཧཱུྃ་རྒྱས་བྱས། །ལྟེ་བའི་ཡབ་ཡུམ་བདུད་རྩིའི་ལུས་ཀུན་གང་། །བ་སྤུའི་བུག་ཀུན་ཧྭཡིག་མེ་འབར་བལྟམས། །ༀ་བཛྲ་མ་ཧཱ་དེ་ཝ་ཨཱ་ཡུ་ཥེ་ཧཱུྃ་ཨཱ། །ཡང་ན་གུ་ཎའི་སྔགས་ལ་ཨ་ཡུ་བཏགས། །ཡིད་ཀྱིས་མཆོད་བསྟོད་དམིགས་མེད་ངང་ལ་བཞག །དེ་ལྟར་རྒྱུན་ཁྱེར་བྱས་པས་འཐུས་པ་ཡིན། །འཆི་མེད་བདུད་རྩིའི་བཅུད་ལེན་མཆོག་ཏུ་ཟབ། །ཌོམ་བྷི་ཧེ་རུ་ཀ་ཡི་གདམས་པའོ། ༈ །སྤྲོ་ན་ཟུར་གསུམ་རྡོ་ར་མེ་རིས་བསྐོར། །ཟླ་གམ་དམར་པོ་གྲི་གུག་དཀར་པོས་མཚན། །དེ་སྟེང་ཐོད་པ་བདུད་རྩི་རིལ་བུས་བཀང་། །ཤེལ་ལམ་དུང་གི་བུམ་གཟུགས་ཡོད་ཀྱང་བཞག །དར་དཀར་བཀབ་པའི་ཕྱོགས་མཚམས་དབུས་རྣམས་སུ། །
མར་གྱི་གཏོར་མ་མདའ་དར་དཀར་པོ་རེ། །མཆོད་གཏོར་རྒྱས་བཤམ་བདག་མདུན་སྤྲེལ་མ་བསྒྲུབ། །མངའ་གསོལ་བྱ་ཞིང་སྦྱིན་སྲེག་མཐའ་བརྟེན་ནོ། ཨྠྀི། རང་ཉིད་མགོན་པོ་ཡབ་ཡུམ་གསེར་མདོག་ལ། །ཌཱ་ཀི་སེར་མོ་བརྒྱད་ཀྱིས་བསྐོར་བ་སྟེ། །ཕྱོགས་བཞི་ནོར་བུ་མཚམས་བཞི་དཔག་བསམ་འཛིན། །ལྟེ་བར་ཇོ་སེར་ནོར་རྒྱུན་མ་དང་སྦྱོར། །མུ་ཏིག་རྒྱན་འཐུག་ཤ་རྒྱས་འབྲས་བུ་ཆེ། །པད་སྣོད་ཤེལ་འཛིན་གཡས་བརྐྱང་པད་ཟླར་བཞུགས། །རང་གི་སྙིང་གར་རིན་ཆེན་འབར་བའི་དབུས། །གྲི་གུག་སེར་པོའི་ལྟེ་བར་ཧཱུྃ་སྔགས་བསྐོར། །འོད་ཟེར་ལྕགས་ཀྱུ་ལྟ་བུས་ལྷ་མི་ཀླུ། །འགྲོ་བའི་བསོད་ནམས་དབང་ཐང་ནོར་བུའི་བཅུད། །ཐམས་ཅད་བསྡུས་ཏེ་ཛམ་ལྷ་ཡབ་ཡུམ་ཐིམ། །དེ་ལས་ཕྱི་ནང་དགོས་འདོད་རབ་འཕེལ་དམིགས། །ཨོ་བཛྲ་མ་ཧཱ་དྷེ་ཝ་སམ་བྷོ་ག་ཧཱུཾ་ཛ། །ཞེས་སམ་གུ་ཎ་ལ་སོགས་སྐབས་སྦྱར་བཟླས། །སྤྲོ་ན་དཀྱིལ་འཁོར་མཆོད་གཏོར་ཚེ་སྒྲུབ་ལྟར། །ཐོད་པ་སེར་པོ་བདུད་རྩི་རིལ་བུས་བཀང་། །འདིས་ནི་ལོངས་སྤྱོད་འདོད་དགུ་ཆར་འབེབས་ཞེས། །ཨརྞ་པ་ཡི་ཞལ་གདམས་རབ་ཏུ་གསང་། །ཨྠྀི། །རང་ཉིད་མགོན་པོ་ཡབ་ཡུམ་དམར་
པོ་ལ། །ཌཱ་ཀི་དམར་མོ་བརྒྱད་ཀྱིས་བསྐོར་བ་ཡང་། །ན་བཟའ་འཛིན་ཅིང་ཡབ་ལ་འདུད་པའི་ཚུལ། །སྨིན་མཚམས་འདོད་རྒྱལ་དམར་པོ་ཉི་ཟླ་འཛིན། །རིག་བྱེད་དམར་མོ་མདའ་གཞུ་འཛིན་པས་འཁྱུད། །རང་གི་སྙིང་གར་པདྨ་དམར་པོའི་དབུས། །གྲི་གུག་དམར་པོའི་ལྟེ་བར་ཧཱུྃ་སྔགས་འཁོར། །དེ་ཡི་འོད་ཀྱིས་ལྷ་མི་ལ་སོགས་བསྐུལ། །མདའ་སྟོང་ཛ་དང་མདེལ་རྩེར་ཧཱིས་མཚན་པ། །ཕོ་ཡི་སྙིང་དང་མོ་ཡི་གསང་བར་བསྣུན། །བཅུད་རྣམས་འོད་ཀྱིས་བསྡུས་ཏེ་རང་ལ་ཐིམ། །ཨོཾ་བཛྲ་མ་ཧཱ་དྷེ་ཝ་ཏི་ལ་ཀ་ཧཱུྃ་ཧཱིཿ །ཐོད་པ་དམར་པོ་རིལ་བུ་རྟེན་བཅས་བསྒྲུབས། །རབ་འགུགས་དབང་གི་ལྕགས་ཀྱུ་ཌོམྦིས་གསུངས། །ཨྠྀི། །རང་ཉིད་མགོན་པོ་ཡབ་ཡུམ་ལྗང་གུ་ལ། །ལྗང་མོ་ལྗང་གུ་རལ་གྲི་འཛིན་པས་བསྐོར། །མགྲིན་པར་ལས་ཀྱི་མཁའ་འགྲོ་ལྗང་གུ་ནི། །རལ་གྲི་བགྲང་ཕྲེང་འཛིན་པ་དེ་ཡི་ཡུམ། །རལ་གྲི་ཨུཏྤལ་ཅན་གྱི་སྒྲོལ་མས་འཁྱུད། །རང་གི་སྙིང་གར་རྡོ་རྗེ་རྒྱ་གྲམ་གྱི། །ལྟེ་བར་གྲི་གུག་ལྗང་གུའི་བུམ་པའི་སྟེང་། །ཧཱུྃ་ལས་སྔགས་ཀྱིས་བསྐོར་ལས་འོད་འཕྲོས་པས། །ཁྲོ་བོ་བདུད་རྩི་ཡབ་ཡུམ་དཔག་མེད་གྱུར། །རབ་འབྱམས་ལས་རྣམས་ཐམས་ཅད་འགྲུབ་
དམིགས་ཤིང་། །ༀ་བཛྲ་མ་ཧཱ་དེ་ཝ་ས་དྷ་ཀ་ཧཱུྃ་ཕཊ། ཅེས་སམ་གུ་ཎ་ལ་སོགས་ཅི་འགྲུབ་བཟླས། །ཐོད་པ་ལ་སོགས་རིག་པས་བརྟག་སྟེ་བསྒྲུབ། །སྣ་ཚོགས་ལས་གྲུབ་ཌོམྦྷི་མན་ངག་གོ །ཨྠྀི། རང་ཉིད་མགོན་པོ་ཡབ་ཡུམ་མཐིང་ནག་ལ། །ལྷ་མོ་སྔོན་མོ་བརྒྱད་ཀྱིས་བསྐོར་བ་ཡང་། །ཕྱོགས་བཞིའི་རྡོ་རྗེ་མཚམས་བཞིའི་མེ་ལོང་འཛིན་། །གསང་བར་འཇམ་དབྱངས་དབྱངས་ཅན་མ་དང་སྦྱོར། །དེ་གཉིས་སྐུ་མདོག་རབ་ཏུ་དམར་བ་སྟེ། །རང་གི་ཐུགས་ཀར་པད་ཉིར་གྲི་གུག་ནི། །ཨིན་དྲ་ནི་ལའི་ཡུ་ཅན་ཧཱུཾ་སྔགས་བསྐོར། །འོད་ཀྱིས་ཤེས་བྱ་མཐའ་དག་གསལ་བར་དམིགས། །ༀ་བཛྲ་མ་ཧཱ་དྷེ་ཝ་ཛྷཱ་ན་སཾ་ཧཱུྃ་ཕཊ། ཅེས་སམ་གུ་ཎ་ལ་སོགས་སྐབས་ཐོབ་བཟླས། །ཐོད་སྔོན་མེ་ལོང་སོགས་ལ་བརྟེན་ཏེ་བསྒྲུབ། །མངོན་ཤེས་ཞལ་མཐོང་སྒྲུབ་པ་ཌོམྦྷི་གསུངས། །སྤྱི་དང་སོ་སོར་སྒྲུབ་པ་ཐུན་མོང་སྟེ། །བུམ་ཅན་རླུང་དང་བསྲེ་བསྒོམ་ཐུན་མོང་མིན། །མཆོད་གཏོར་སྒོ་ནས་སྒྲུབ་ན་མདུན་བསྐྱེད་དེ། །སྤྱན་འདྲེན་མཆོད་པ་རྒྱས་བསྡུས་ཅི་རིགས་བྱ། །ཕྱོགས་བཅུ་དུས་གསུམ་ཁྲོ་བོ་ཐམས་ཅད་བསྡུས། །མདུན་བསྐྱེད་བསྟིམས་པས་གཟི་བརྗིད་ཇེ་
འབར་དམིགས། །གཏོར་ཆེན་དྲུང་དུ་གཏོར་ཆུང་རྣམས་འབུལ་ཞིང་། །མཐེབ་སྐྱུ་དམར་དང་རཀྟ་སུ་ར་དང་། །མེ་ཏོག་ནག་པོ་བཅས་པ་འབུལ་བྱ་སྟེ། །ཨོཾ་མ་ཧཱ་ཀཱ་ལ་ཀཱ་ལི་དྷེ་ཝ་རཀྟ་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞལ་དུ་གསོལ་དམིགས་བརྒྱ་འམ་སྟོང་རྩ་འབུལ། །སྔགས་སྒྲ་འོད་དང་སྐུ་དང་མཚོན་ཆ་ཡིས། །གང་འདོད་ཕྲིན་ལས་འགྲུབ་པ་སྤྱི་ལྟར་ཏེ།་ཆོ་གའི་གཞུང་བསྲང་རྗེས་རྣམས་སྤྱི་ལྟར་རོ། །ལྔ་ཚོམ་བརྒྱད་བརྒྱད་འཁོར་བཅས་བསྒོམ་ཡང་རུང་། །དཀྱིལ་འཁོར་བསྡུས་པ་རྡོ་ར་དུར་ཁྲོད་དང་། །གྲུ་གསུམ་པདྨ་བྲིས་ཀྱང་ཆོག་པར་གསུངས། །འདི་ནི་རིགས་བསྡུས་ལ་བརྟེན་མཆོག་སྒྲུབ་ཟེར། །འདི་ལ་རྒྱས་པར་ཕྲིན་ལས་བརྒྱ་རྩ་བརྒྱད། །ཌོམྦིའི་མན་ངག་མཁའ་སྤྱོད་དབང་པོས་གསུངས། །རང་གི་ཉམས་ལེན་རྒྱུན་ཁྱེར་བྱ་བའི་ཕྱིར། །རཱ་ག་ཨ་སྱས་ཅུང་ཞིག་གསལ་བར་བྱས། །ཉེས་འགལ་ལྷ་ལ་བཤགས་ཤིང་དགེ་བ་དེས། །སྒྲུབ་བརྒྱུད་བསྟན་པ་འཕེལ་བའི་རྒྱུར་གྱུར་ཅིག། ཀུརླན་ཏུ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།