མ་མགོན་གཏོར་ནག་ཟིན་བྲིས།
མ་མགོན་གཏོར་ནག་ཟིན་བྲིས་བཞུགས་སོ།
ཤྲཱི་མ་ཧཱ་ཀཱ་ལ་ཡེ། ལྷ་རྒྱུད་གསང་བ་ཆེན་པོའི་དོན། །མ་མགོན་སྤར་ནག་སྒྲུབ་པ་ནི། །སློབ་དཔོན་པདྨ་ཁྲི་སྲོང་རྗེ། །སད་ན་ལེགས་ནས་གདུང་རྒྱུད་ལ། །བརྒྱུད་པའི་པཀྵིའི་ཡབ་ཆོས་ཏེ། །རྒྱས་པ་ཐོད་ནག་པར་བུ་དང་། །བསྡུས་པ་གཏོར་ཆེན་པར་བུ་ལས། །བསྡུས་པའི་ཟིན་བྲིས་ཐོ་ཙམ་བཀོད། །ཞིབ་པར་ངག་ལས་ཤེས་བྱ་སྟེ། །རྒྱས་པར་བྲིས་ན་དམྱལ་བར་ལྟུང་། །དེ་ཕྱིར་སྔོན་ཆད་ཡི་གེ་མེད། །ཟུར་ཙམ་བྲི་བར་མ་བྱས་ན། །བསྟན་པ་སྙིགས་ཕྱིར་རྒྱུན་ཆད་དོགས། །མང་དུ་སྤེལ་ན་དམ་ཚིག་ཉམས། །སྙིང་ཁྲག་སྒྲོལ་གིང་ནག་པོས་འཐུང་། །
ལྕགས་སྣོད་ནང་དུ་གཏོར་མ་ནི། །ཟུར་གསུམ་རྣོ་བ་ནག་པོ་བྱ། །དེ་ཡི་སུམ་གཉིས་མན་ཆད་བཅད། །ནང་དུ་གྲུ་གསུམ་ཧམ་ཁུང་བྲུ། །ཁྲག་བྱུག་ནང་དུ་ལིང་ག་བཙུག །མཚམ་སྦྱར་ཤ་ཁྲག་རྩང་གིས་བརྒྱན། །དེ་ལ་དཀར་རྒྱན་སྤོང་བར་བྱ། །རྩེ་ལ་མ་མགོན་ཙཀྐི་བཙུགས། །མཐའ་ལ་གཏོར་ཆུང་ནག་པོ་བརྒྱད། །ཐམས་ཅད་རྩང་དང་ཤ་ཡིས་བརྒྱན། །དེ་ཉིད་མདུན་དུ་དྲག་པོ་ཡི། །མཆོད་པ་སྣ་བདུན་བཤམས་པ་དང་། །དམར་གཏོར་ཐུན་གཏོར་ཟིན་ལིང་དང་། །ཕུགས་གཏོར་ལ་སོགས་གཞུང་ལྟར་རོ། །གཏོར་མ་དགུ་པོའི་སྟོད་ཆ་ནི། །མ་
མགོན་ཡབ་ཡུམ་གཞུང་ལྟར་བསྐྱེད། །སྨད་ཀྱི་ལིངྒ་ལྕགས་ཁུང་ནང་། །དགྲ་བགེགས་གང་ཡིན་དངོས་ལྟར་བསམ། །མཚལ་སེར་གང་བྱེད་གཞུང་ལྟར་ལས། །ཟན་ལིང་ཕུར་། འདེབས་ལ་སོགས་པ། །ལས་འགྲིགས་གཞུང་ལྟར་དུས་བཞིའམ། །ཐ་ན་དགོང་མོ་མཚན་མོ་གཉིས། །བྱས་ལ་ལིང་རོ་གཏོར་ཆེན་དུ། །མགོན་པོ་འཁོར་བཅས་ཞལ་དུ་བསྟབ། །ཐུན་གཏོར་གསོན་གཅིག་མ་འདོན་ཞིང་། །དགྲ་བགེགས་ཕྱོགས་སུ་འཕེན་པའམ། །ཡང་ན་དེ་ཕྱོགས་རྒྱུན་དུ་འབུལ། །མདུན་བསྐྱེད་ཡབ་ཡུམ་བེར་གྱི་སུལ། །སྣ་ཚོགས་མཚོན་ཆའི་ཆར་ཆེན་བབ། །དགྲ་བགེགས་གྲོག་ཚང་སེར་རྒྱབ་ལྟར། །ཁྱད་པར་མ་མགོན་ཐུགས་ཀ་དང་། །ཕྱག་མཚན་རྩེ་ནས་ཧཱུྃ་བྷོའཕྲོས། །ཁོ་ཡི་སྣ་བུག་བཤང་ལམ་ཞུགས། །སྙིང་དཀྱིལ་ཟངས་ལྕགས་འཁོར་ལོ་གཉིས། །རྩིབས་རྣམས་གྲི་གུག་ཁ་ཊྭཱཾ་དབྱིབས། །གཡས་དང་གཡོན་དུ་དྲག་ཏུ་འཁོར། །བླ་ཚེ་ནང་ཁྲོལ་སྲོག་རྩ་གཏུབས། །ཤ་སྐྱོ་ཁྲག་སྐྱོ་ལྟར་གྱུར་པ། །འཁོར་རྣམས་ཀུན་གྱི་ཟ་བ་སོགས། །དམིགས་པ་གསོན་གཅིག་མ་ལྟར་བསྒོམ། །སྔགས་ནི་ཞལ་སྦྱོར་སྔགས་རིང་ལ། །ཐུན་བཞིར་འབད་ཅིང་རྟགས་ཐོན་བྱ། །ལིངྒ་
བཏོན་ལ་སྦྱིན་སྲེག་གམ། །ཡང་ན་མེ་ཐབ་གཞུང་ལྟར་ཕུལ། །ཐལ་བ་ཚུམ་གཅིག་དམར་གཏོར་བཅས། །བཞེས་འབོད་བྱས་ལ་ཟོར་དུ་འཕང་། །ཐལ་བ་ཆ་གཅིག་གཉེན་སར་ཕྱོར། །ཆ་གཅིག་ལིངྒ་བཀུག་གཞུག་བྱས། །མ་རུངས་ལྷ་སྲིན་གནས་སར་མནན། །སྒྲུབ་པའི་ཚད་ནི་ཞག་བདུན་ཏེ། །སྒྲུབ་གྲོགས་མང་ན་ཞག་གསུམ་ཆོག །གལ་ཆེར་རྟོགས་དང་བསྟུན་ཏེ་བྱ། །ལོ་གཅིག་ནང་དུ་ཁ་ཕུང་འགྲོ། །མྱུར་ན་ཟླ་གཅིག་མི་འགོར་རོ། །རྒྱུན་དུ་དམིགས་ནི་བདུན་རྒྱུད་ཆད། །པར་ནག་སྲོག་གི་སྤུ་གྲི་ཡི། །རྩ་་ཚིག་ས་བོན་ཙམ་འདི་ནི། །གྲོགས་མཆེད་སྐུ་ངོ་ཆེ་བའི་ཕྱིར། །སྔགས་འཆང་རཱ་ག་ཨ་སྱས་བཀོད། །གཞན་ལ་བསྟན་ན་དམྱལ་བར་འགྲོ། །ས་མ་ཡ་ཁ་ཐཾ་རྒྱ་རྒྱ་རྒྱ།། །། ༧ ཁམས་སྟོད་ནང་ཆེན་འབང་སྒོང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།