གཏོར་ནག་པར་བུའི་མན་ངག
གཏོར་ནག་པར་བུའི་མན་ངག་བཞུགས་སོ།
ཌོམྦི་ཧེ་རུ་ཀ་ལ་མ་མགོན་གྱི་ལུང་བསྟན་ནས། རྒྱུད་བཅོ་བརྒྱད་ཀྱི་དགོངས་པ་བསྡུས་ཏེ་མཛད་པའི་ཡབ་ཡུམ་ཞལ་སྦྱོར་གྱི་རྒྱ་གཞུང་གསང་སྔགས་ལ་བསྟེན་ནས་དྲག་པོའི་སྒྲུབ་པ་ཞེས་གསུངས་པ་དང་། ཀརྨ་པཀྵིའི་ཡབ་ཆོས་ཡབ་ཡུམ་ཞལ་སྦྱོར་མགོན་པོ་སྤར་ནག་བསྡུས་གཏོར་ཆེན་པར་བུའི་མན་ངག་ཟབ་མོ་གཟའ་སྐར་རྩུབ་མོ་ལ་ལིང་ག་སྤྱི་ལྟར་བྲིས་པའི་མཐར་ཞལ་སྦྱོར་གྱི་སྔགས་རིང་དང་ཛ་ཁྲོ་གྱིས་བསྐོར་བ་བཀུག་གཞུག་ལྷ་དབྱེ་བྱ་ཚོན་སྐུད་དམ་ར་ཁྱིའི་སྐུད་པས་བཅིངས་ལ། དེ་མདོས་སྣོད་སྟེང་དུ་ཟན་གྲུ་གསུམ་ལ་ནང་གྲུ་གསུམ་ཧོ་ཁུང་བྲུས་ཁྲག་
བྱུག་པར་བཅུག །དེ་སྟེང་གཏོར་མ་ཟུར་གསུམ་རྣོ་བ། ནག་པོ་ཤ་དང་སྙིངགཟུགས་ཀྱིས་བརྒྱན་པར་བཞག །དར་ནག་གི་གདུགས་སམ་ནམ་མཁའ་ནག་པོ་འཛུགས། དེ་མཐར་གཏོར་ནག་ཆུང་བ་བརྒྱད། གཙོ་བོའི་ཟུར་གསུམ་ལ་རྩང་ཐུང་བདུན་རེ་སྟེ་ཉེར་གཅིག་འཁོར་ལ་བདུན་རེ་འཛུགས། མར་རྒྱུན་མི་བྱ། མདོས་མཐར་རྩང་རིང་ཉེར་བརྒྱད་འཛུགས་པ་སྔོ་དམར་སྐུད་པའམ་བ་སུ་ཏའི་ཅུད། ལིང་ག་དང་གཏོར་ཆུང་མང་དུ་བསགས། གཏོར་མའི་སྟོད་ཡབ་ཡུམ་འཁོར་བརྒྱད་དབུགས་ལེན་ཡབ་ཡུམ། སྐེད་པ་མཆོད་རྫས། འོག་གྲུ་གསུམ་ཧོ་ཁུང་དུ་
དགྲ་བགེགས་མགོ་ཐུར་དུ་གནས་པ་བསྐྱེད། རབ་དུས་བཞི། འབྲིང་སྔ་དྲོ་དགོང་མོ་མཚན་དང་གསུམ། ཐ་མ་སྔ་དྲོ་སྤྱོད་གཉིས་ལ་མཚལ་མ་ཚར་རེ་བཏང་། བསྙེན་པའི་འདབ་ཏུ་ཕྱིན་པ་དང་། ལས་འགྲིགས་ལྟར་བཀུག་གཞུག །ལྷ་དབྱེ་བྱས་ཏེ་ལིང་ག་བྲིས་པ་དེ་དང་འཕྲལ་དུ་ཟན་ལིང་ལྕགས་སྣོད་དམ་ཐོད་པར་བཤམས་པ་ལ་ཕུར་འདེབས་བྱས། ཟན་ལིང་གཏོར་ཆེན་དུ་བསྟབ། གཏོར་ཆུང་རེ་ལ། གསོན་ཅིག་མ་འདོན་ལ། གཏོར་ཆེན་དུ་འབུལ་ལོ།:།དངོས་གཞི་ལིང་ག་དག་བགེགས་དངོས་སུ་གསོལ་བ་དང་། མ་མགོན་ཐུགས་ནས་ཧཱུྃ་དང་ཛའཕྲོས། ཁོའི་བཤང་ལམ་ནས་སྙིང་དཀྱིལ་དུ་ཞུགས་པ། ཧཱུཾ་ལས་གྲི་གུག་གི་འཁོར་ལོ་གཡས་སུ་འཁོར་བ། ཛ་ལས་རུལ་གྲིའི་འཁོར་ལོ་གཡོན་དུ་འཁོར་བ་རྣོ་ངར་ཤུགས་དང་ལྡན་པས། བླ་སྲོག་ནང་གྲོལ་དམར་ཉི་ལི་ལི་གཏུབ་པ། འཁོར་དང་སྤྲུལ་པས་ཧབ་ཐོབ་ཏུ་ཟླ་བ་རྩེ་གཅིག་ཏུ་དམིགས་པ་གཏད་ལ། བསྙེན་སྔགས་དང་འབྲེལ་མི་དགོས་པར་། མ་མགོན་ཞལ་སྦྱོར་གྱི་སྔགས་རིང་དྲག་ཏུ་འདོན་ཏེ། ཐུག་མཇུག་ཏུ་ཡང་གཏོར་ཆུང་བོསྐྱོལ་པ་དང་། བཞེས་འབོད་མཛུག་གི་དམོད་མོ་བྱ་ཞིང་། གཏོར་ཆེན་དུ་འབུལ། ཐལ་
མོ་བརྡབ་བོ། །ཡང་སྔར་ལྟར་མཚལ་མ་སོགས་བྱ། དེ་ལྟར་ཐུན་བཞིའམ་གསུམ་མམ་གཉིས་བྱས་ལ་ངག་བཅད་ཅིང་ཞག་བདུན་ནམ། གསུམ་མམ། ལྔའམ། ཡུན་རྟགས་ལ་ལྟ། རི་དྭགས་སོད་དམ། སེམས་ཅན་བསད་པ། ནང་གྲོལ་སྟེར་བ། ཤིང་སྡོང་གཅོད་པ། དངོས་སུ་བསད་པ་སོགས་ཁུག་རྟགས་སོད་རྟགས། ལན་གཅིག་མིན་པ་གསུམ་ཡན་བྱུང་བ་དང་། གཏོར་མ་བཏེག་ལ་ལིང་ག་ལོ་ཕུར་འདེབས་རྒྱས་པར་བྱ། གྲུབ་ན་གཅིག་སྦྱིན་སྲེག་བྱ་མ་གྲུབ་ན་གཏོར་ཆེན་ལ་མེ་རུ་སྦྱར་བས་བསྲེགས་ཏེ། མགོན་པོའི་ཞལ་ནས་མེ་འབར་བས་སྲེག་པར་སྒོམ། ལིང་ག་གཅིག་དགྲ་ཕྱོགས་དང་། ཕྱོགས་གཙང་འགྲིགས་ན་རབ། མ་འགྲིགས་ན་ཕྱོགས་གཙང་སར་བཙུགས། དེ་དགྲ་བགེགས་དངོས་སུ་བསམ་ལ། བསྐུལ་ཐམས་ཅད་དང་བཞེས་འབོད་ཆེན་མོ་བྱས་ལ། གཏོར་མ་དང་པོ་འཁོར་བརྒྱད། དེ་ནས་གཙོ་བོ་དེ་ལ་ཟོར་དུ་འཕེན། སྔགས་རིང་བཟླ་ཞིང་ལིང་ག་ལ་བརྒྱབ་། ལིང་རོ་བསྲེགས་ལ་རླུང་ལ་བསྐུར། ལིང་ག་གཅིག་ཀླུ་གདུག་པ་ཅན་གནས་ས་ས་དགྲ་ངན་པའམ་མཚོ་སོགས་ལ་མནན་གཏད་སྤྱི་ལྟར་བྱ། དེ་ནས་རྒྱུན་དུའམ་དགུ་གཏོར་
དང་གཟའ་སྐར་ངན་དུས་བསྐུལ་པ་བྱ་ཞིང་ཐུན་གཏོར་འཕེན་ནམ་དེ་ངོས་སུ་ཕུལ། ཁོ་བསོད་ནམས་ནུས་པ་ཆེའམ་སྲུང་ཟློག་མང་ན། ལྡོག་དོག་ལ་ཐུན་གཏོར་རྗེས། ལོག་ཏྲི་པཱ་ལ་ཅི་ནུས་བཟླས། རང་ཡང་མགོན་པོའི་སྲུང་འཁོར་བསྒོམ། དེས་ཉེ་ན་ཟླ་བ། འབྲིང་ལོ་མི་འགོར། ཤིན་ཏུ་རིང་ཡང་ལོ་ངོ་གསུམ་ཧྲིལ་ཕྱེད་གཉིས་ལས་མི་འགྱང་བ་ཁ་ཕུང་དུ་འགྲོའོ། །འདྲེ་ལ་ཡང་ཚུལ་དེ་ལྟར་བྱས་ན་ཚར་གཅོད་པར་ངེས་སོ། །ནག་པོ་སྲོག་གི་འཁོར་ལོའི་རྒྱུད་ལས། ལེགས་ལྡན་སྔགས་ཀྱི་རྩ་ཟིན་པ། །ཐ་མ་རྩ་བ་འདུས་རྒྱུད་འཆད།། གང་ལ་དམིགས་པའི་སྲོག་དབུགས་ལེན། །དམ་ཉམས་རྣམས་ལ་ཆད་པས་གཅོད། །ཅེས་རང་བྱུང་རྒྱལ་མོའི་རྒྱུད་ལས། ལྷ་མོས་དམ་བཅས་པ། གང་བསྒོམ་པ་དང་སྒྲུབ་པ་དང་ཉམས་སུ་ལེན་པ་དེའི་གིང་དང་ཕོ་ཉ་བྲན་དུ་བྱའོ། །དེ་ལྟར་དམ་བཅས་པ་བཞིན་བདག་གིས་མ་བགྱིད་ན། བདག་གིས་ད་ལྟ་ཉིད་དུ་བཅོམ་ལྡན་འདས་བསླུ་བར་ལགས་སོ། །དེའི་དབང་གི་རང་སྲོག་གི་སྙིང་པོ་མེ་ལྟར་འབར་ནས་ལུས་སྲོག་ཐལ་བ་བཞིན་དུ་ཚིག་པར་གྱུར་ལ། མནར་མེད་པའི་སེམས་ཅན་དམྱལ་བ་ཆེན་པོར་གྱུར་ཅིག །ཅེས་དམོད་བོར་བའི་ཕྱིར་
ལས་མི་འགྲུབ་མི་སྲིད་དོ། །འདི་མན་ངག་ཡི་གེར་བཀོད་པ་ཤིན་ཏུ་དཀོན་པས། བསྟན་པ་ལ་ཕན་ངེས་བརྒྱུད་པ་འཛིན་ངེས་མ་གཏོགས་སུ་ཡིན་ལ་སྤེལ་ན་མ་མགོན་། མགར་གསུམ་གྱིས་བཀའ་ཆད་དྲག་པོ་ཕོབ་ཅིག །སྔགས་ནག་ཨ་རཱ་གས་ཞལ་ཤེས་ཡི་གེ་ལ་ཕབ་པས་ཉེས་འགལ་མཆིས་ན་སྲུང་མ་རྣམས་ལ་བཤགས། དགེ་བས་ཀཾ་ཚང་བསྟན་དར་རྒྱས་ཤོག །ཤུ་བྷཾ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།