མ་མགོན་ཤིན་ཏུ་བཀྲ་ཤིས་པའི་ཐབས།
མ་མགོན་ཤིན་ཏུ་བཀྲ་ཤིས་པའི་ཐབས་ཞེས་བྱ་བ་བཞུགས་སོ།
ན་མོ་གུ་རུ་བཛྲ་སཏཱ་ནཱ་ཐ་ཡེ། མགོན་པོའི་གདམས་པ་ཤིན་ཏུ་བཀྲ་ཤིས་ཐབས། །གྲི་གུག་བརྩེགས་རྒྱུད་ནས་གསུངས་གཟུངས་དང་གཉིས། །གཞུང་གི་བསྐང་བ་བཤགས་པ་གབ་སྤྱད་དགོས། །བཅའ་ཚོགས་འདོན་ལུགས་བསྐང་གསོ་གཞུང་དང་མཚུངས། །དགོས་ཆེད་མཁས་གྲུབ་ཨོ་རྒྱན་པ་ཡིས་གསུངས། །བོད་གངས་ཅན་གྱི་སྤྱང་པོ་ཨོ་རྒྱན་པ། །དགྲ་དམ་སེལ་མིན་པས་ཐུབ་པ་མེད། །གཉེན་བླ་མ་མིན་པས་འཁྱོངས་བ་མེད། །གསུངས་ཕྱིར་མ་མགོན་སྒྲུབ་པའི་རྣལ་འབྱོར་ལ། །ནང་གི་དམ་ཚིག་སེལ་ཞིག་མ་ཞུགས་ན། །ཕྱི་ཡི་དགྲ་གདོན་གང་གིས་
གནོད་མི་ནུས། །དམ་སེལ་ཅུང་ཟད་མེད་པ་ཤིན་ཏུ་དཀའ། །རྒྱས་པར་དམ་ཚིག་ས་ཡ་འབུམ་སྡེ་གསུངས། །དེ་དག་སྲུང་རྒྱུ་གང་ཡིན་མི་ཤེས་ན། །མདོར་བསྡུས་རྩ་ལྟུང་བཅུ་བཞི་སྦོམ་པོ་བརྒྱད། །ཡན་ལག་དམ་ཚིག་ཉི་ཤུ་རྩ་བརྒྱད་རྣམས། །དམ་ཚིག་རྒྱ་མཚོའི་གཞུང་འགྲེལ་རྣམས་ནས་གསལ། །དེང་སང་བླ་མ་ཉིད་དང་མ་འཁོན་ཙམ། །སྡོམ་པ་མ་ཤོར་ཙམ་ཞིག་གཙང་མར་བརྩི། །དེ་ཡིས་ཆོག་པར་རྒྱུད་ནས་གསུངས་པ་མེད། །ཁྱད་པར་མགོན་པོའི་དམ་ཚིག་རྩ་བ་ནི། །བསྙེན་སྒྲུབ་ཐམས་ཅད་བསྟན་པའི་སྤྱི་དོན་དམིགས། །བྱ་ནག་ཁྱི་ནག་རྣམས་ལ་རྡོ་མི་
འཕེན། །ཁྱད་པར་ལྷ་མོའི་དམ་ཚིག་བསྲུང་བྱ་ནི། །མེ་དང་རླུང་ལ་མི་དམོད་དགའ་བ་སྒོམ། །བུད་མེད་སྦྲུམ་མར་མི་དམོད་མེ་ཏོག་འཐོར། །ནལ་ཕྲུག་རྣམས་ལ་ཟས་སྦྱིན་དགའ་བར་བྱ། །རལ་གྲི་མི་བཅག་བོང་བུ་མི་བརྡུང་ཞིང་། །བསྙེན་སྒྲུབ་ཕྲེང་བ་མི་ལག་འགྲིམ་མི་བྱ། །ཤིང་ལོ་རླུང་ཁྱེར་མཐོང་ན་ཨེ་ཟིན་ལྟ། །དབང་མ་ཐོབ་པར་ཞལ་སྦྱོར་སྐུ་མི་བསྟན། །སྒྲུབ་རྫས་རྣམས་ཀྱང་མི་ལ་གསང་ཞིང་སྦ། །དེ་དག་དམ་ཚིག་ཅུང་ཟད་ཉམས་ན་ཡང་། །བཀའ་ཆད་འབྱུང་ཕྱིར་ལྷ་མོ་བསྟེན་པར་དཀའ། །དེ་ཕྱིར་བསྟེན་ཚུལ་དཀའ་མ་ཞེས་སུ་གྲགས། །བསྐང་བཤགས་ཤེས་ན་དེ་དག་བཅོས་སླ་བས། །དེ་ཕྱིར་བཅོས་སླ་མ་ཞེས་རྒྱུད་ལས་གསུངས། །བསྐང་གསོ་གཞུང་ནི་ཚར་བའི་རྗེས་དེ་རུ། །མདུན་དུ་མ་མགོན་པའི་འཁོར་བཅས་གསལ་བའི་མདུན། །བདག་དང་བསྲུང་བྱ་ཐམས་ཅད་ཐལ་སྦྱར་ཏེ། །མགྲིན་གཅིག་དམ་ཚིག་ཆག་ཉམས་བཤགས་པར་བསྒོམ། །ཧཱུྃ་དོན་དམ་ཆོས་ཀྱི་དབྱིངས་ལས་ཞེས་པ་ནས། །ཚངས་པར་བསྩལ་དུ་གསོལ་བར་བཤགས་པ་འདོན། །བདག་དང་མདུན་གྱི་མ་མགོན་དབུ་གཙུག་དང་། །བསྲུང་བྱ་ཀུན་གྱི་སྤྱི་བོར་པད་ཟླའི་སྟེང་། །ངོ་བོ་རྒྱལ་བ་
ཡབ་སྲས་ཡིན་པ་ལ། །རྣམ་པ་རྡོར་སེམས་ཡབ་ཡུམ་ཞལ་སྦྱོར་སྐུ། །རྒྱན་དང་ཆ་ལུགས་ཡོངས་སུ་རྫོགས་པ་ཡི། །དཔྲལ་བ་མགྲིན་པ་ཐུགས་ཀར་ཟླ་བའི་སྟེང་། ཨོཾ་དཀར་ཨཱཿདམར་ཧཱུྃ་མཐིང་གསུམ་གྱི་མཐར། །ཡིག་བརྒྱ་དཀར་དམར་མཐིང་གསུམ་གཡས་སུ་འཁོར། །དེ་ལས་འོད་ཟེར་རང་མདོག་ཕྱོགས་བཅུར་འཕྲོས། །རྒྱལ་བ་སྲས་བཅས་ཀུན་གྱི་བྱིན་རླབས་བསྡུས། །ཡིག་བརྒྱ་ལ་ཐིམ་བདུད་རྩི་རང་མདོག་གིས། །སྐུ་གང་སྦྱོར་མཚམས་ཞབས་ཀྱི་མཐེ་བོང་ནས། །དཀར་སྔོ་དམར་མདངས་བདུད་རྩི་མུ་ཏིག་མདོག ། བབས་པས་མ་མགོན་ཚངས་བུག་ནས་ཞུགས་པས། །སྐུ་ལུས་གང་བས་མ་མགོན་ཐུགས་མཉེས་པས། །དམ་ཚིག་ཆག་ཉམས་མཁོན་འགྲས་ཐམས་ཅད་དག །རྡོར་སེམས་སྦྱོ་མཚམས་བདུད་རྩི་ཟེག་མའི་ཚུལ། །འཕྲོས་པས་འཁོར་རྣམས་བཀྲུས་པ་དེ་བཞིན་གྱུར། །ལྷ་ཚོགས་ཐམས་ཅད་ཐུགས་མཉེས་བཀྲག་མདངས་རྒྱས། །རང་དང་བསྲུང་བྱའི་སྤྱི་བོའི་རྡོར་སེམས་ལས། །བདུད་རྩི་བབས་པས་ལུས་ཀྱི་ནང་གང་ཞིང་། །ཕྱི་ནས་བཀྲུས་པས་དམ་ཚིག་ཉམས་ཆག་དག །བདུད་རྩི་ལུས་གང་ཤེལ་བུམ་ཞེས་གང་བཞིན། །ལུས་ཀུན་དྲི་མེད་
ཤེལ་སྒོང་ལྟར་བསྒོམ་ཞིང་། །ཨོཾ་ས་མཱ་ཡ། ཨཱས་མ་ཡ། ཧཱུཾ་ས་མ་ཡ། ཨོཾ་ཤྲཱི་མ་ཧཱ་ཀཱ་ལ་ཡཀྵ་བེ་ཏཱ་ལི་ཧཱུྃ་ཿ ཨོཾ་བཛྲ་སཏཱ་ས་མ་ཡ་སོགས།། ས་ཏཱ་ཨཱཿབར། སུམ་སྦྲེལ་སྔགས་དེ་བདུན་ནམ་ཉེར་གཅིག་བརྗོད། །དམ་ཚིག་ཉམས་ཆག་བསྐང་བའི་སྔགས་བསྡེབ་ཟབ། །དེ་ནས་མགོན་པོའི་གཞུང་གི་གཟུངས་འདོན་ཏེ། །ཚེ་རབས་སྔོན་ནས་ཞེས་པ་ནས་བཟུང་སྟེ། །ཞི་བར་ཤོག་བར་བདུན་ནམ་ཉེར་གཅིག་བཟླས། །བསྐང་གསོ་གྲོལ་ཁ་ཚུན་ལ་བསྐང་ཐུང་དང་། །ཡིག་བརྒྱ་ཅན་གྱི་སྔགས་དང་གཟུངས་དེ་རྣམས། །བརྒྱ་རྩ་བརྒྱད་རེ་ངེས་པར་ཚང་བར་བྱ། །དེས་ནི་རང་གཞན་སྲུང་བ་རིམ་གྲོའི་མཆོག །ནད་པ་སོས་དང་ནད་ཡམས་ཆད་པ་དང་། །ཅི་བསམ་དོན་ཀུན་ཡིད་བཞིན་འགྲུབ་པར་གསུངས། །གལ་ཏེ་དགེ་འདུན་མང་པོ་ཡོད་ན་ནི། །དྲག་རིམ་རྣམས་ཀྱིས་བསྐང་གསོ་གཞུང་ལྟར་དང་། །མང་མ་རྣམས་དང་མང་ཉུང་གཉིས་ཕྱེ་ནས། །ཉུང་བས་གོང་ལྟར་ཡིག་བརྒྱ་ཅན་གྱི་སྔགས། །མང་མས་མགོན་པོའི་གཟུངས་དེ་སྔགས་རྒྱུན་བྱ། །མང་མས་བློ་ལ་མེད་ན་དཔེ་ཆོག་བྱ། །ཞག་གྲངས་གསུམ་ལྔ་བདུན་སོགས་དེ་བྱས་ན། །སྤྱིར་གྱི་དམ་ཚིག་ཆག་ཉམས་ཐམས་ཅད་
དང་། །ལོ་ཟླ་དུས་ཀྱི་མཆོད་པ་ཆག་ཉམས་དང་། །བསྟན་དོན་མ་བསམ་མཆོད་གཏོར་མ་གཙང་དང་། །ལྷ་དང་བླ་མར་མ་དད་ལོག་ལྟ་དང་། །ཟས་ནོར་འདོད་ཕྱིར་དྲག་ལས་མངའ་བ་དང་། །བསྟན་བཤིག་སྡིག་ཆེན་སྲུང་ཁ་བཟུང་བ་དང་། །ལྷ་སྲུང་འཁྲུག་ནས་བཀའ་ཆད་མི་དགེ་བ། །ཇི་ལྟར་བྱུང་ཡང་དེ་ཡིས་ཞི་བར་གསུངས། །བདེ་རིམ་བཀྲ་ཤིས་འདོད་ཀྱང་འདི་ཉིད་ཟབ། །དེ་ཕྱིར་ཤིན་ཏུ་བཀྲ་ཤིས་ཐབས་ཞེས་གསུངས། །ཨྠྀི། །ཞོར་ལ་ཁྲུས་ཀྱི་ཆོ་ག་བྱེད་འདོད་ན། །བུམ་པ་རྫས་ལྡན་སྤྱི་ལྟར་བཤམས་བྱས་ཏེ། །མདུན་བསྐྱེད་མངོན་རྟོགས་སྒོམ་པའི་སྐབས་ཉིད་ནས། །ཕྱི་ནི་རིན་ཆེན་བུམ་པ་མཚན་ཉིད་ལྡན། །ནང་ནི་ཡངས་ཤིང་རྒྱ་ཆེར་གྱུར་པའི་ནང་། །བུམ་བསྐྱེད་དང་ནི་མདུན་བསྐྱེད་སོ་སོ་སྟེ། །མངོན་རྟོགས་གཅིག་གིས་དུས་གཅིག་སོ་སོར་བསྐྱེད། །སྤྱན་འདྲེན་མཆོད་བསྟོད་དེ་བཞིན་དུས་གཅིག་བྱ། །བསྙེན་པའི་སྐབས་སུ་གོང་ལྟར་བུམ་བསྐྱེད་ཀྱི། །སྤྱི་བོར་རྡོར་སེམས་བདུད་རྩིའི་རྒྱུན་བབས་པས། །མ་མགོན་སྐུ་གང་སྦྱོར་མཚམས་བདུད་རྩི་བབས། །བུམ་པ་བདུད་རྩིས་གང་བར་བསྒོམ་བྱ་ཞིང་། །གོང་ལྟར་ཡིག་བརྒྱའི་གཟུངས་སྔགས་ཅུང་
ཟད་བཟླས། །ༀ་ཤྲཱི་མ་ཧཱ་ཀཱ་ལ་ཡཀྵ་བེ་ཏཱ་ལི་ཧཱུྃ་ཿ ནད་གདོན་སརྦ་ཤཱནྟཾ་ཀུ་རུ་ཡེ་སྭཱ་ཧཱ། ཞེས་པ་དེ་ལ་སྟོང་ཙམ་བཟླས་པའི་རྗེས། ཨོཾ་ཨེ་ཧོ་ཤུདྡྷེ་ཤུདྡྷེ། ཡཾ་ཧོ་ཤུདྡྷེ་ཤུདྡྷེ། རཾ་ཧོ་ཤུདྡྷེ་ཤུདྡྷེ། བི་ཧོ་ཤུདྡྷེ་ཤུདྡྷེ། ལཾ་ཧོ་ཤུདྡྷེ་ཤུདྡྷེ། ཨེ་ཡཾ་རཾ་བཾ་ལཾ་ཤུདྡྷེ་ཤུདྡྷེ་ཨ་ཨ་སྭཱ་ཧཱ། ཞེས་པ་དེ་ལ་བརྒྱ་རྩ་ཙམ་ཞིག་བཟླས། །ཨགྣི་ལ་སོགས་སྔགས་ཀྱིས་མཆོད་པ་དང་། །ཊཱཀྐི་བྱེ་བ་འབུམ་སོགས་སོ་སོའི་བསྟོད། །ཡེ་ཤེས་བུམ་ལྷ་མདུན་བསྐྱེད་ལ་ཐིམ་དམིགས། །བུམ་ལྷ་དམ་ཚིག་འོད་ཞུ་བདུད་རྩིར་བསམ། །རང་དང་བླ་མ་མཆེད་གྲོགས་གྲྭ་པ་སོགས་། །བུམ་ཆུ་འཐུང་ཞིང་ཡན་ལག་ལྔ་ཁྲུས་ཆེ། །ཨེ་ཧོ་ཞེས་པའི་སྔགས་བརྗོད་དྲིལ་བུ་འཁྲོལ། །སྦྱིན་བདག་ལ་སོགས་བསྲུང་བྱ་གཞན་རྣམས་ལ། །བུམ་ཆུ་ཅུང་ཟད་ངག་ཏུ་བླུད་ཙམ་བྱ། །རྟ་ཕྱུགས་ཁང་ཁྱིམ་བསྲུང་བྱར་གྱུར་རྣམས་ལ། །བུམ་ཆུས་ཅུང་ཟད་བྲན་པ་ཙམ་རེ་བཏུང་། །དམ་ཚིག་གཙང་མའི་ནད་པ་ཁག་ཆེ་ལ། །བྱབ་ཁྲུས་རྒྱས་པར་བྱ་བར་འདོད་ན་ནི། །ལྷ་དང་སྔགས་གཉིས་རྗེ་བར་མ་གཏོགས་པར། །བྱ་ཚུལ་རྣམ་འཇོམས་བྱབ་ཁྲུས་སྤྱི་དང་མཚུངས། །དམ་ཚིག་གཙང་མའི་སྐལ་ལྡན་མ་གཏོགས་པར། །དམ་ཉམས་
སྡིག་ཆེན་རིགས་ལ་མི་རུང་སྟེ། །ཡབ་སྲས་ལ་སོགས་ཐུ་མོར་བསྙུང་བའི་དུས། །འདི་ལྟར་ནག་རྒྱལ་ཕག་གསུམ་བུམ་ཆུ་ཡིས། །སྐུ་ཁྲུས་གསོལ་བའི་ཕྱག་སྲོལ་ཡོད་པའི་ཚུལ། །སྐྱེས་ཆེན་གཙུག་ལག་ཕྲེང་བའི་གསུངས་ལས་བྱུང་། །དེ་ཕྱིར་སྐུ་གྲིབ་སེལ་བའི་མཆོག་ཡིན་ཕྱིར། །སུ་མ་ཡིན་ལ་བྱ་རྒྱུ་མིན་པ་སྣང་། །དེ་ལྟར་མ་མགོན་ཞི་བའི་ལས་སྦྱོར་འདི། །བདུད་མོ་ཀརྨ་དར་རྒྱས་ཀྱིས་བསྐུལ་བས། །ཕག་ལོ་རྒྱལ་ཟླའི་གནམ་སྟོང་སྔ་དྲོ་ལ། །དགེ་སློང་རཱ་ག་ཨ་སྱས་སྨྲས་པ་ལྟར། །བརྩོན་འགྲུས་རྒྱ་མཚོ་ཞེས་བྱས་བརྩོན་པས་བྲིས། །ཉེས་འགལ་མེད་ཕྱིར་བཤགས་བྱ་མ་མཆིས་ཀྱང་། །དགེ་བས་འགྲོ་ཀུན་ཆག་ཉམས་སྡིག་སྒྲིབ་དག །ཕན་དང་བདེ་བའི་དཔལ་ལ་སྤྱོད་པར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།