འཇིག་རྟེན་མགོན་པོ་བེར་ཅན་གྱི་སྒོ་ནས་བསྟན་པ་དར་བའི་ཐབས།
འཇིག་རྟེན་མགོན་པོ་བེར་ཅན་གྱི་སྒོ་ནས་བསྟན་པ་དར་བའི་ཐབས་ལ། རང་ཉིད་ཡི་དམ་གསལ་བའི་མདུན་དུ། བེར་ཅན་ཡབ་ཡུམ་མཆོད་རྟེན་ལ་རྒྱབ་གཏད་པ་གཅིག་བསྒོམ། རང་གི་ཐུགས་ཀ་ནས་འོད་ཟེར་འཕྲོས་མགོན་པོའི་ཐུགས་ཀར་ཕོག །དེའི་ཐུགས་ཀ་ནས་འོད་ཟེར་འཕྲོས་སྲིད་པ་གསུམ་གྱི་ལྷ་སྲིན་དྲེགས་པ་ཐམས་ཅད་བཀུག་ནས་བསྟན་པ་བསྲུང་བའི་ལས་བྱེད་པར་བསམས་ལ། ཨོཾ་ཤྲཱི་མ་ཧཱ་ཀཱ་ལ་ཡཀྵ་བེ་ཏ་ལི་ཤ་ས་ན་པུཊཱིཀརྨ་མན་ཏུ་སྭཱ་ཧཱ། ཞེས་བཟླས་ན་བསྟན་པ་རྒྱས་སོ།།་༈ དགོངས་གཏེར་མན་པ་ངག་གསལ་བྱེད་ནི༔ རང་ཉིད་མགོན་པོ་ཡབ་ཡུམ་ནི༔ ཡི་དམ་ལྷ་དང་དབྱེར་མེད་གསལ༔ སྤྱི་བོར་ཀརྨ་པཀི་བཞུགས༔ མདུན་དུ་འཇིག་རྟེན་མགོན་པོ་བེར་ནག་ཅན༔ ཡབ་ཡུམ་ཞལ་སྦྱོར་གཞུང་ལྟར་ལས༔ མཆོད་རྟེན་བཀྲ་ཤིས་སྒོ་མང་ནི༔ རྩེ་མོ་སྲིད་པའི་རྩེ་མོར་སླེབ༔ དེ་ལ་སྐུ་རྒྱབ་གཏད་ནས་བཞུགས༔ འཁོར་སོགས་གཞུང་དང་འདྲ་བ་ལས༔ རང་གི་ཐུགས་ནས་འོད་ཟེར་འཕྲོས༔ མདུན་བསྐྱེད་ཡབ་ཡུམ་ཐུགས་ཀར་ཕོག༔ ཐུགས་ཀའི་སྔགས་ཕྲེང་དྲག་ཏུ་འཁོར༔ སྔོན་གྱི་ཁས་བླངས་དམ་ཚིག་དྲན༔ ཡབ་ཡུམ་ཐུགས་ལས་འོད་
ཟེར་འཕྲོས༔ སྲིད་པ་གསུམ་གྱི་ལྷ་འདྲེ་དང་༔ སྡེ་བརྒྱད་ཡུལ་ལྷ་ཐམས་ཅད་བཀུག༔ ཁྲོམ་ལྟར་འཛམ་གླིང་ལྟེམས་སེ་གང་༔ ཀུན་ཀྱང་བསྟན་པ་བསྲུང་བ་དང་༔ བསྟན་པ་རྒྱས་པའི་ཕྲིན་ལས་ནི༔ ཤིག་ཤིག་ཡམ་ཡམ་བྱས་པར་བསྒོམ༔ སྒྲུབ་བརྒྱུད་སྤྱི་དང་ཁྱད་པར་དུ༔ རང་རེའི་བསྟན་པ་རྒྱས་པར་བསྒོམ༔ ཨོཾ་ཤྲཱི་མ་ཧཱ་ཀཱ་ལ་ཡཀྵ་བེ་ཏ་ལི་ཤ་ས་ན་པུཊྚ་ཀརྨ་མན་ཏུ་སྭཱ་ཧྭ༔ མཚལ་མ་འདོན་ལུགས་ཐུན་གྱི་བཟུང་ལུགས་སོགས་སྔོན་དང་ཁྱད་མེད་ཞག་བདུན་བཟླས་པ་བྱ། ལས་དང་ཡེ་ཤེས་མགོན་པོ་གཉིས་ཁོལ་དུ་ཕྱུང་སྟེ་ཨ་རཱ་གས་བཀོད༔