མ་མགོན་གྱི་གཏོར་རྒྱག་ནད་གདོན་ཚར་གཅོད།
མ་མགོན་གྱི་གཏོར་རྒྱག་ནད་གདོན་ཚར་གཅོད་བཞུགས་སོ།
ན་མོ་གུ་རུ་ཀརྨ་ནཱ་ཐ་ཡེ། སྣང་སྲིད་ཟིལ་གནོན་གྲུབ་ཆེན་ཀརྨ་པ། །མགོན་པོ་འདི་ནི་བཀའ་ཉན་འགྲུབ་ཐག་ཉེ། །དགྲ་འདྲེ་གཉིས་ལ་བྱུང་བས་ཆོག་གསུངས་པས། །མགོན་པོའི་གཏོར་མས་འདྲེ་གདོན་འདུལ་བའི་ཐབས། །འདི་ལ་རུང་དང་མི་རུང་རྣམ་པ་གཉིས། །གདོན་ནི་གཟའ་ཀླུ་མ་མོ་མཁའ་འགྲོ་ལ། །དྲག་ལས་བྱས་ན་རང་ངམ་ཡོན་བདག་ལ། །ལྡོག་པར་འགྱུར་ཞེས་སྦྱོང་རྒྱུད་བཤད་པར་གསལ། །ནད་ནི་གཉན་དང་ཚད་པ་རིམས་ཀྱི་རིགས། །དེ་ལ་བྱས་ན་ནད་པ་འཆི་བར་འགྱུར། །དེ་ཕྱིར་དེ་དག་རྣམས་ལ་བརྩམ་མི་བྱ། །གདོན་ནི་རྒྱལ་འགོང་ཆུང་
སྲི་ན་ཚ་རྒོད། །འདྲེ་མོ་ཐེའུ་རང་དམ་སྲི་འགོང་པོའི་རིགས། །ནད་ནི་སྲོག་རླུང་སྨྱོ་འབོག་མཁྲིས་སྣ་རྒོད། །གཉིད་མི་གཉིད་ཅིང་ཡུན་རིང་ཕན་རྒྱུ་མེད། །ལམ་འདྲེ་གདོན་བགེགས་བཏབ་ལ་ཤིན་ཏུ་ཕན། །གློ་བུར་ཉིད་དུ་གཏོར་མ་མི་སྒྲུབ་པར། །ཆ་གསུམ་གླུད་གཏོར་སོགས་བཏང་སྙིང་རྗེ་བསྒོམ། །ཡོན་བདག་འབྱོར་བ་ཡོད་ན་ཞག་འགའ་ལ། །བསྐང་གསོ་བྱས་པའི་མཇུག་ཏུ་བྱ་རྒྱུ་སྟེ། །འབྱོར་པ་མེད་ན་ཞག་གཅིག་ལ་ཡང་རུང་། །བསྐང་གསོའི་བཅའ་ཚོགས་རྒྱས་བསྡུས་གཞུང་ལྟར་ཏེ། །དམར་གཏོར་ཆུང་འབྲིང་ཆེ་བ་གཅིག་དང་བདུན། །རེ་རེ་ལ་ཡང་རྩང་ཐུར་
བདུན་རེ་བཙུགས། །ཤིང་ལེབ་བམ་ནི་སྟེགས་གཞིར་རིམ་པར་བསྒྲིགས། །ཤས་བརྒྱན་མེ་རུ་རེ་ཡང་བཙུགས་ལ་བཞག །སྔོན་འགྲོ་དཀར་གཏོར་གཉིས་དང་བགེགས་གཏོར་གཅིག །གསེར་སྐྱེམས་བཤམས་རྣམས་འདི་ཡི་བཅའ་ཚོགས་ཡིན། །བདག་བསྐྱེད་མགོན་པོའི་སྲུང་འཁོར་བསྒོམ་པའི་རྗེས། །མགོན་པོའི་མཚལ་སེར་གང་འདོད་གཞུང་ལྟར་འདོན། །དེ་ནས་བསྙེན་པ་ཅུང་ཟད་བྱས་པའི་རྗེས། །ཐུན་གཏོར་འབུལ་བའི་མཚམས་དེར་སླེབ་པ་དང་། །ནད་པ་གང་ཡིན་མདུན་དུ་འདུག་བཅུག་ལ། །གཟའ་དང་མཁའ་འགྲོ་རང་གི་གདོང་མི་གཏུག །དེ་ནས་གཞི་བདག་དཀར་གཏོར་གཞུང་ལྟར་བསྔོ། །གཏོར་མ་འཕེན་པའི་ཕྱོགས་ངོས་འབུལ་རྒྱུ་བསྐུར། །དེ་ནས་ཤར་ལ་སོགས་པའི་ཕྱོགས་བཅུ་ན། །ཞེས་སོགས་སྣ་སེལ་གཏོར་མ་ཕུལ་རྒྱུ་བསྐུར། །གང་ཞིག་མཚན་མོ་སོགས་ཀྱིས་བགེགས་གཏོར་ཕུལ། །དཀོན་མཆོག་གསུམ་གྱི་བདེན་པ་བདར་བྱས་ཏེ། །བདེན་པས་གདོན་ཁྱོད་མ་གནོད་དེངས་ཞེས་བརྗོད། །ཆོས་རྣམས་ཐམས་ཅད་རྒྱུ་ལས་བྱུང་སོགས་བརྗོད། །དཀར་པོ་ཡིན་ན་དེ་གས་འགྲོ་བར་བཤད། །དེས་ཀྱང་མི་འགྲོ་རྣམས་ལ་གཏོར་རྒྱག་སྟེ། །གསེར་སྐྱེམས་འདོན་
ཅིང་གསེར་སྐྱེམས་ཐོར་དུ་ཆུག །དེ་ནས་སྲུང་མདུད་འཁོར་ལོ་ལ་སོགས་ལ། །རང་ལ་མགོ་བསྟན་སྔས་བཞག་ཉལ་བཅུག་སྟེ། །གཞོག་གཡས་སར་ཕབ་གོས་ཀྱང་མཐུག་པར་བཀོན། །རང་ཉིད་ལེགས་ལྡན་བསྐྱེད་རིམ་ང་རྒྱལ་བསྐྱེད། །ནད་པའི་རྐང་མཐིལ་ཐིག་ལེ་དཀར་དམར་གཉིས། །ཡར་སོང་ལྟེ་འོག་དབུ་མའི་ནང་དུ་འདྲེས། །ནད་པའི་བླ་སྲོག་ཚེ་དང་བསོད་ནམས་དང་། །དབང་ལྷ་བསྟིམ་པའི་བྱིན་རླབས་ཀུན་འདུས་པ། །ཐིག་ལེ་དཀར་དམར་མདངས་ལྡན་བཀྲག་མདངས་ཅན། །མ་སར་བྱ་ཡི་སྒོ་ང་ཙམ་པ་དེ། །རིམ་པར་སྙིང་ཁ་མགྲིན་པ་སྤྱི་བོ་ནས། །ཕཊ་ཅེས་རྒྱངས་སེ་ནམ་མཁར་སྤུར་བ་དེ། །ནམ་མཁར་གྲུབ་ཆེན་པཀྴི་བཞུགས་པ་ཡི། །ཐུགས་ཀར་གཏམས་པའི་ཚུལ་གྱིས་བསྟིམ་ལ་བཞག། །སྨྱོ་རྒོད་ཡིན་ན་རྣམ་ཤེས་སྤྱར་མི་རུང་། །སྨྱོ་འདྲེ་རྣམ་ཤེས་གཉིས་པོ་འདྲེས་ནི་ཡོད། །རྣམ་ཤེས་སྤར་རིམ་མི་སྤར་གང་བྱེད་ཀྱང་། །དེ་ཡི་ལུས་པོ་ལྕགས་ཁོང་གྲུ་གསུམ་པ། །དེ་ནང་གདོན་དེ་ལིང་གའི་ཆ་ལུགས་ལ། །སྙིང་གར་དྲི་ཡིས་མཚན་པ་གསལ་བར་དམིགས། །དེ་དག་རྟག་ཏུ་མི་བརྗེད་བསྒོམས་པས་འཐུས། །དེ་ནས་དམར་གཏོར་ཐམས་
ཅད་བྲན་བྱས་ལ། །ཐུན་གཏོར་སྐབས་ཀྱི་འགུགས་པ་བྱས་པའི་རྗེས། །ལྷ་ཚོགས་སྤྱི་ལ་ཤཱ་ས་ན་ཡིས་བསྔོ། །དེ་ནས་ནད་པའི་ལུས་ལ་གདོན་བཀུག་སྟེ། །ན་མོ་རྗེ་བཙུན་ཞེས་པ་ནས་བཟུང་ནས། །ཁྱད་པར་དུ་བོར་ཐུན་གཏོར་བཀུག་གཞུག་སྟེ། །ནད་པ་འདི་ཡི་དང་པོ་ནད་ཀྱི་སྣ་འདྲེན་པ། །བར་དུ་ནད་ཀྱི་ཚང་བཅའ་བ། །ཐ་མ་ནད་ཀྱིས་སྲོག་འཕྲོག་པར་། །བྱེད་པའི་གདོན་བགེགས་བྱད་མ་ཞེས་པ་ནས། །དྲག་པོ་ཐུན་གྱི་གཏོར་མ་མི་ཟེར་བར། །གཟུགས་ཀྱི་ཕུང་པོ་འདི་ལ་ཞེས་པ་སྦྱར། །གནེ་ཧོ་བར་བཀུག་གཞུག་ལན་གསུམ་བྱ། །བསྐུལ་པ་མཇུག་ནས་ཡར་ལ་འདོན་པ་སྟེ། །ཆོས་སྐྱོང་ཆུང་ཆུང་སྔོན་ལ་འདོན་པ་དང་། །ཆེ་ཆེ་རྗེས་ན་བཞག་པ་དམག་ཐབས་ཡིན། །བསྐུལ་པ་འདོན་ཚེ་གཏོར་མ་ལྷ་དེས་གསོལ། །གསོལ་ལྷག་མེ་དཔུང་ཆེན་པོར་གྱུར་པ་སྟེ། །རྒྱབ་པས་ནད་གདོན་གཞོབ་ཐུལ་བསྲེགས་པར་བྷེ། །གཏོར་མ་རྒྱོབ་ཁ་སོ་སོར་མེ་རུ་སྦར། །སྔགས་ཡོད་རྣམས་ལ་སོ་སོའི་སྔགས་ཀྱིས་བརྒྱབ། །མེད་ལ་སྤྱི་སྔགས་ཤཱ་ས་ན་ཡིས་རྒྱབ། །བྷྱོ། བཀའ་ཡི་ཚོགས་དང་བཅས་ཉིད་སོགས། །བརྟན་མའི་དམར་གཏོར་གཅིག་རྒྱབ་བོ། །ཧཱུཾ། རྡོ་རྗེ་དབང་
ཕྱུག་མ་བདུན་སོགས་གྱེར། །ཉམས་པའི་གདོན་དང་ལྷན་ཅིག་བཞེས་ཞེས་བསྒྱུར། །དབང་ཕྱུག་ཉེར་བརྒྱད་གཏོར་མ་གཅིག་རྒྱབ་བོ། །ཧཱུཾ། དབང་ཕྱུག་ལྗང་སྔོན་ལ་སོགས་བཙན་རྒྱབ་སྟེ། །གདོན་ལ་ཁྲམ་ཁ་དི་རི་རི་སོགས་སྦྱར། །དྲེགས་པ་དོན་གཉིས་གཏོར་མ་གཅིག་རྒྱབ་བོ། །དེ་བཞིན་དབུགས་ལེན་ཡབ་ཡུམ་བཅུ་དྲུག་དང་། །ཟས་སུ་གདོན་བགེགས་ཤ་ཟོ་ཞིག །སྐོམ་དུ་གདོན་བགེགས་ཁྲག་འཐུང་ཞིག །ཅེས་བསྒྱུར་བཅུ་དྲུག་ལ་གཅིག་རྒྱབ་བོ། །རཀྟ་ལ་སོགས་སྲིན་མགོན་ཡབ་ཡུམ་ལ། །གང་ལ་དམིགས་པའི་གདོན་བགེགས་རྣམས། །གདོན་བགེགས་ལུས་སྲོག་རྡུལ་དུ་རློགས། །དམ་ཉམས་གདོན་བགེགས་ལས་ངན་འདིའི། །ཞེ་སྡང་ཆེན་པོས་གདོན་བགེགས་འདུལ། །གང་ལ་དམིགས་པའི་གདོན་བགེགས་རྣམས། །ཞེས་བསྒྱུར་སྲིན་མགོན་སྔགས་ཤམ་དུ། །གདོན་བགེགས་མཱ་ར་ཡ་ཧཱུྃ་ཕཊ་ཅེས། །དྲག་ཏུ་བརྗོད་ཅིང་གཅིག་བརྒྱབ་བོ། །ཕོ་བྲང་མཁའ་སྤྱོད་ཙཱ་རི་དམར། །མཚོན་ཆ་མང་པོ་བགེགས་ལ་འདེབས། །དམ་ཉམས་གདོན་བགེགས་སྒྲོལ་ལ་ཤོག །རྩ་སྔགས་ཤམ་དུ་གོང་ལྟར་རྒྱབ། །དེ་ནས་མགོན་པོའི་གཏོར་མ་ལ། །བྱང་
ཕྱོགས་དུར་ཁྲོད་མ་དེ་གྱེར། །དེ་ནས་གཏོར་མ་ལག་ཏུ་བཟུང་། །འདས་དང་མ་བྱོན་མ་གྱེར་ཞིང་། །ཁྱོད་ནི་ཉམས་པར་འགྱུར་གྱི་མཇུག །ཤཱ་ས་ན་ནི་དྲག་ཏུ་བརྗོད། །རྦད་སྔགས་ཨཱ་རལླི་བརྗོད་རྒྱབ། །སྨྱོ་རྒོད་ཡིན་ན་རང་ལངོས་ལ། །རྐང་པ་གཡོན་པས་མགོ་མནོན་ནས། །ལྷམ་དང་དར་ནག་ཆོས་གོས་རྒྱབ། །རྡོ་ཐུན་ཡོད་ན་སྔགས་བཟླས་བྲབ། །དེ་ནས་ཡུད་ཙམ་ཉམས་ལེན་བསྐྱང་། །ནམ་མཁའི་ཐིག་ལེ་མར་ཕབ་ལ། །སྤྱི་བོའི་གཙུག་ནས་སྙིང་གར་བསྟིམ། །དེ་ནས་ཕྲེང་བ་མགོར་བཞག་ལ། །མགོན་པོ་ཡབ་ཡུམ་རྩ་སྔགས་མཇུག །བཛྲ་རཀྵ་རཀྵ་བརྗོད། །སྲུང་འཁོར་སོགས་བཀོན་མལ་སར་བཏང་། །དེ་ནུབ་གཏོར་འབུལ་མི་བྱ་ཞིང་། །སྲུང་ཟློག་སྔགས་དམིགས་མི་བྱ་བར། །དམིགས་མེད་ཉམས་ལེན་ངང་ལ་ཉལ། །ཕྱིར་ནངས་ཚེ་དབང་བསྐུར་བར་བྱ། །ལས་ནད་འཆི་ནད་མ་གཏོགས་པའི། །ནད་པ་གདོན་ཆེན་གང་ལ་ཡང་། །ཕན་པའི་ལག་བླང་གྲངས་མང་ངོ་། །གདོན་ཆེན་གལ་ཆེན་མ་གཏོགས་པའི། །གཞན་ལ་དེ་ལྟར་མི་རུང་སྟེ། །འབྲོག་པའི་སྦྱིན་བདག་བླུན་པོ་རྣམས། །བདེ་རིམ་ལ་ཡང་གཏོར་ཁ་འདི། །མ་བསྟན་ན་ནི་མི་ཚིམས་ཟེར། །དེ་
ཡི་རྣམ་རྟོག་དགག་པའི་ཐབས། །དམར་གཏོར་མི་ཡི་ལོ་གྲངས་བཅའ། །གསེར་སྐྱེམས་དཀར་བགེགས་མི་དགོས་ཏེ། །མདུན་དུ་ཁོང་རྣམས་འདུག་བཅུག་ལ། །ཁོང་རྣམས་རྒྱབ་དེར་ཆོས་སྐྱོང་བསྒོམ། །དེ་ཡི་ཞལ་དུ་ཕུལ་བར་བསྒོམ། །སྟེང་ངམ་པང་དུ་གཏོར་མ་རྫོངས། །མི་གྲངས་བདུན་ལས་མང་འདུག་ན། །ཕྱོགས་བཅུ་མགོན་པོ་ལ་ཡང་གཅིག །བྱང་ཕྱོགས་དུར་ཁྲོད་འདས་མ་བྱོན། །སོ་སོར་ཕྱེ་ན་གཏོར་མ་དགུ། །གཏོར་མ་དེ་ནི་བཟའ་ཡང་རུང་། །གཏོར་རྒྱོབ་དངོས་ཀྱི་གཏོར་མ་ནི། །སྨྱོན་པས་ཟོས་ན་ཕན་མི་ཐོག་གཞན་ལ་མི་འཁྱུར་མེ་ལ་བསྲེགས། །མ་འཕྲོད་བྱ་ཁྱིར་སྦྱིན་རུང་ཙམ། །རྩང་རྣམས་ངེས་པར་བསྲེགས་དགོས་ཏེ། །ཡུལ་མི་སྒོ་ནོར་ལ་བཏགས་ན། །གཤེད་ཁ་ལ་སོགས་གདོན་ཁོག་ཟེར། །བསྐུལ་པ་གཞན་རྣམས་མི་རུང་སྟེ། །དགྲ་ལ་རྦད་པ་ཁོ་ནའི་ཕྱིར། །ཚིག་གི་བསྒྱུར་ཐབས་དཀའ་བར་གདའ། །ལྷ་མོའི་གཏོར་མ་རྒྱབ་ན་ནི། །ཕ་རོལ་པོ་ལ་ཕན་ན་ཡང་། །ལྷ་མོ་ཇེ་རག་ཆེ་བའི་ཕྱིར། །ཕ་རོལ་ཉམས་གྲིབ་རང་ལ་འགོས། །ལུས་མི་བདེ་ཞིང་ནད་ཀྱིས་ཟིན། །དེ་ཕྱིར་ལྷ་མོ་མི་གླེབ་པར། །སློབ་དཔོན་མཁས་པའི་གསུང་
རྒྱུན་ཡིན། །བདུད་མོ་བླ་མས་བསྐུལ་བའི་ཕྱིར། །ཕག་ལོ་རྒྱལ་ཟླའི་གནམ་གང་གི །ཕྱི་དྲོ་རཱ་ག་ཨ་སྱས་སྨྲས། །དགེ་སློང་ཆོས་དགས་ཡི་གེར་བཀོད། །ཉེས་འགལ་ལྷ་དང་སྲུང་མར་བཤགས། །དགེ་བས་སློབ་མ་བརྒྱུད་པར་བཅས། །འཚོ་བ་སྦྱར་བའི་ཡོན་བདག་རྣམས། །བདུད་བཞིའི་གཡུལ་ལས་རྒྱལ་བར་ཤོག། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།