ཆིག་བརྒྱུད་མགོན་པོའི་ཞལ་གདམས་གབ་སྐུང་ཕུད་པ་མན་ངག་ཤོག་དྲིལ།
ཆིག་བརྒྱུད་མགོན་པོའི་ཞལ་གདམས་གབ་སྐུང་ཕུད་པ་མན་ངག་ཤོག་དྲིལ་ནི།
དཔལ་ཡེ་ཤེས་མགོན་པོའི་ཐན་འགྱེད་ནི། །ཐན་འགྱེད་དུག་མདའི་ཞལ་ཤེས་གཞན་མེད་ཅིང་། །འོན་ཀྱང་དགྲ་བོ་ཆེ་ཐན་ཕོབ་ཚེ། །ཆེ་ཟེར་དུས་དགྲ་བོའི་མིང་བརྗོད་དགོས། །དགྲ་ལ་ངེས་མེད་ཀ་ཆ་ཤོར་བའམ། །དགྲ་མིང་མ་ཤེས་ན་ནི་ཀ་ཆ་སོགས། །གང་ཤོར་ས་ཆ་དེ་ཡི་མིང་བརྗོད་ནས། །ཡུལ་ནི་སྨྲེ་ཀ་ཆ་འདི་ཁྱེར་མི། །གནོད་འཚེ་ཟླ་སྐྱེལ་མི་ཐན་ཕོབ་ཕོབ། །བསྒྱུར་ཁ་བྱས་ཤིང་སྔགས་རིང་འདོན་པར་བྱ། །གོང་དུ་མཚལ་མ་འདོན་ནི་ཅེས་ཀྱང་དགོས། །ཤར་ཕྱོགས་དམག་རྒྱལ་བསྐུལ་འདོན་གཏོར་ཟོར་འཕེན། ༈ །ཁྲེས་པོ་ཁ་སྲུང་གབ་རྐུང་གཞན་མེད་
དེ། །རྐུན་མ་ལ་སོགས་ཞལ་ཤེས་དགོས་ཟེར་བ། །ལིང་ག་སྤྱི་མཐུན་བྲི་དུས་དགྲ་བོ་ཡང་། །ངོས་ཟིན་མེད་དམ་མིང་ནི་མ་ཤེས་ན། །ས་ཆ་ཡུལ་མིང་འདི་ཞེས་བྱ་བ་ལས། །ཀ་ཆ་དཀོར་ནོར་རྒེ་ཁྱེར་མི་ལ། །ལིངྒའི་མལ་དུ་དེ་ལྟར་བྲིས། །འགུགས་གཞུག་དུས་དང་གཏོར་མ་འཕང་བའི་ཚེ། །རྗེ་ཟེར་བ་རྣམས་ལ་དེས་རིགས་འགྲེ། ༈ སྦྱིན་སྲེག་སྔགས་དང་དམིགས་བསྒྱུར་ཁ་ཤེས་དགོས་ཀྱང་། དྲག་པོའི་སྦྱིན་སྲེག་ལྷ་སྔགས་མཐར། ཡམ་ཤིང་སྔགས་དང་དགྲ་བོ་ཆེའི་གཟི་བརྗིད་ཕུན་སུམ་ཚོགས་པ་མཱ་ར་ཡ་ཕཊ༔ ཅེས་སྤེལ་ཚིག་རིགས་འགྲེས་ཐམས་ཅད་ཤེས་པར་
བྱ། །བསྲེག་རྫས་ཡམ་ཤིང་མར་ཁུ་ཉ་བོ་དང་། །ཤོག་ལིང་གཏུབ་པའི་དུམ་བུ་ཡུངས་ཀར་སོགས། །གང་འཐད་རིགས་པས་ཕྱེ་ཤེས་དམིགས་པ་ཀྱང་། །རི་ཆོས་དྲག་པོའི་སྦྱིན་། སྲེག་སྤྱི་དང་མཐུན། ༈ །ཕུང་རེ་དགྲ་འདྲེས་བཏབ་པའི་བདག་མེད་དེ། །རོ་རུལ་རྙེད་ན་ལིང་ག་བཏུམ་པའི་གོས། །གཏོར་ནག་པར་བུ་གཞུག་པར་བྱ་བ་སྟེ། །ལིང་ག་གཉིས་པ་ཁ་སྦྱོར་ཞལ་ཤེས་བྱ། །བསྡུས་པ་ལིངྒ་སྤྱི་མཐུན་མིང་ཡིག་ཅན། །གཅིག་བྲིས་གཏོར་མའི་འོག་ཏུ་བཞག་པས་འཐུས། །ལིངྒའི་དཔྲལ་བར་རུས་བྲིས་སྙིང་གར་མིང་། །འདོམས་སུ་བླ་རྟོགས་འབྲི་དགོས་གསུངས་ན་ཡང་། །དེ་ལ་རུས་ལ་ངེས་མེད་ཆ་ཆོད་དཀའ། །རུས་མིང་གཏད་ཀྱང་ཡིན་པའི་ངེས་པ་མེད། །ངེས་མེད་མི་ལ་ཁ་སྦྱོར་བྱས་ན་ཕུང་། །བླ་ནི་གདོང་ལ་ཤ་བ་གླ་བ་སོགས། །བླ་རྟགས་གང་ཡིན་ཟེར་བ་བྲི་བའམ། །དེ་ཡང་ངེས་པར་ཤེས་མི་དཀོན་པའོ། །མ་ཤེས་བཞིན་དུ་ལས་སྦྱོར་ཉེས་པ་ཆེ། །དེ་ཕྱིར་རུས་ནི་གལ་ཏེ་མ་ཤེས་ན། །རུས་ཀྱི་མལ་དུ་ཕ་ཡི་མིང་དེ་སྨོས། །བླ་རྟགས་མ་ཤེས་མ་ལ་གང་མིང་སྨོས། །དེ་ཡང་ཕ་ནི་འདི་ཞེས་བྱ་བའི་བུ། །འདི་ཞེས་བྱ་བའི་མ་ཡི་བུ་ཞེས་བྱ། །འགུགས་
གཞུག་ལྷ་དབྱེ་མགོན་པོའི་ལས་འགྲིགས་ལྟར། །སྔགས་ཐེམ་མན་ངག་ལས་གསུངས་བསྙེན་སྐབས་བཞིན། །དགྲ་བགེགས་མཱ་ར་ཡ་ཕཊ་ཀྱི་ཚེ། །བགེགས་ནི་མི་བརྗོད་ཕ་རོལ་དགྲ་ཡི་སྨོས། །ཡང་ན་དགྲ་བོ་མཱ་ར་ཡ་ཕཊ་ཅེས་འདོགས། ༈ །སྦྱིན་སྲེག་སྔགས་ཀྱི་བསྒྱུར་སོ་སྔར་ཤེས་བཞིན། །རོ་གཡམ་ཞེས་པ་དུར་རྡོར་རྒྱ་གྲམ་བྲིས། །གཏིང་རྡོ་བཏགས་འཕེན་ཞེས་བྱ་འདི་ལྟ་སྟེ། །རི་གཉན་མཚོ་གཉན་དགྲ་བོ་གཏད་པའི་སྐྱོན། །ས་བདག་ཀླུ་གཉན་ཞེ་ནག་གདུག་པའི་སྐྱོན། །དང་པོ་དགྲ་བོ་ཕོ་རྒྱུད་མོ་རྒྱུད་ནི། །མིང་ཙམ་མེད་པར་མ་ཟད་བར་དུ་ཟ། །དེ་ནས་གཏད་མནན་མཁན་གྱི་སྔགས་པ་ཡི། །ཕོ་རྒྱུད་མོ་རྒྱུད་རིགས་རུས་མཐུན་ཚད་ནི། །མ་ཟད་བར་དུ་མིང་ཙམ་མེད་པར་ཟ། །རང་གཞན་གཉིས་ཀ་ཕུང་བ་ཐེ་ཚོམ་མེད། །སྔར་ཡང་དེ་འདྲ་མཐོང་ཐོས་མང་བའི་ཕྱིར། །མཚམས་མནན་འདི་ལ་ཉེས་པ་ཆེན་པོ་ཡོད། །ཁ་ལག་འབྲེལ་ཚད་དམྱལ་བར་ལྷུང་བའི་ཕྱིར་། །མཚམས་མེད་ལྔ་ལས་ཀྱང་ནི་འདི་སྡིག་ཆེ། །དེ་ཕྱིར་མཐུ་གཏད་སྔགས་འཁོར་གཏད་མནན་སོགས། །རང་ལ་འགགས་ཐུག་སྡུག་བསྔལ་ཅི་བྱུང་ཡང་། །ཡིད་ལ་དྲན་པ་
ཙམ་ཡང་བྱ་མི་རུང་། །ཅི་ཕྱིར་མི་ལུས་ཐོབ་པ་ཉིན་སྐར་ཙམ། །ཤེས་བཞིན་དམྱལ་བར་བཏུང་བ་འདི་ཕོད་དམ། །ཆོས་སྐྱོང་ལས་སྦྱོར་འདི་དག་རུང་མི་རུང་། །ཞིང་བཅུ་ཚང་བའི་དགྲ་བོ་ཡིན་ན་རུང་། །དེ་ཡང་རང་གཞན་མང་པོར་མི་གནོད་པར། །ཞིང་བཅུ་ཚང་བའི་དགྲ་བོ་གཅིག་པུ་ཡིན། །ལིངྒ་མིང་ཡིག་བྲིས་པ་འདི་ཟོ་ཞིག །དེ་ནས་ས་ཟོ་རྡོ་ཟོ་ཟེར་བ་བྲིས་། །མན་ངག་འདི་ལྡན་རིང་ལ་མི་གནོད་ཅིང་། །ཕ་རོལ་དོན་མེད་མི་ལ་མི་གནོད་ཅིང་། །མན་ངག་འདི་ཡང་འཛམ་གླིང་ཙམ་ན་ཉུང་། །འོན་ཀྱང་དགོས་པ་སྤུ་ཙམ་མེད་ན་ཡང་། །གསང་སྔགས་ཕྱག་ལེན་བརྒྱུད་པ་མ་ཆད་ཙམ། །བྱང་ཆུབ་སེམས་ལྡན་སྣོད་ལྡན་རེ་ཙམ་སྤེལ། །མང་དུ་སྤེལ་ན་རླུང་ཕྱོགས་བརྗོད་མི་རུང་། །སློབ་བུ་སྙིང་འདྲ་བརྩོན་འགྲུས་རྒྱ་མཚོ་ལ། །གབ་ཚིག་ཞལ་ཤེས་གབ་སྐུང་ཕུད་པ་འདི། །སུ་ལ་མ་སྤེལ་ངག་གསང་དམ་དུ་ཆོད། །དོན་མེད་ལས་འབྲས་དམྱལ་བར་ལྟུང་ཉེས་ཆེ། །འདི་འདྲའི་ཉེས་མཆིས་ཆོས་སྐྱོང་ཚོགས་ལ་བཤགས། །དགེ་བས་ཆོས་བརྒྱུད་བསྟན་པ་མཐར་རྒྱས་ཤིང་། །ཕྲིན་ལས་རྣམ་བཞི་འགྲུབ་པའི་བཀྲ་ཤིས་ཤོག །ཅེས་རིག་སྔགས་འཆང་བ་ཨ་རཱ་གས་སོ།། །།